Abril

Sa unsang paagi makabenepisyo ta nianang bililhong mga gasa? Ang usa ka paagi mao ang pagsundog sa ilang pagtuo ug maayong ehemplo. Ang laing paagi mao ang pagsunod sa ilang binase sa Bibliyang tambag. (Heb. 13:7, 17) Hinumdomi, gimahal ta sa mga ansiyano ug gusto nilang mouswag ta sa espirituwal. Pananglitan, kon namatikdan nilang dili na ta regular sa tigom o anam-anam nga nawad-ag kadasig, seguradong tabangan dayon ta nila. Sila mamati nato ug mohatag natog mahigugmaong pagdasig ug haom nga tambag gikan sa Bibliya. Giisip ba nimo ang maong tabang ingong pamatuod sa gugma ni Jehova kanimo? Hinumdomi, dili tingali sayon para sa mga ansiyano ang pagtambag nato. Busa unsay imong buhaton aron dili kaayo malisdan ang inyong mga ansiyano sa paghatag ug tambag? Paningkamoti nga mahimo kang mapainubsanon, daling duolon, ug mapasalamaton. Isipa ang ilang tabang ingong pamatuod sa gugma sa Diyos. Makabenepisyo ka, ug magmalipayon ang mga ansiyano sa ilang buluhaton. w18.03 31-32 ¶15-16

Managlahi ang matag bata; dili tanan mohamtong sa samang gipaspason o sa samang edad. Ang pipila hamtong nag hunahuna ug pagbati bisag bata pa ug gusto nang magpabawtismo. Ang uban dili pa andam magpabawtismo hangtod nga dakodako na silag edad. Busa, dili presyuron sa maalamong mga ginikanan ang ilang mga anak sa pagpabawtismo. Hinuon, tabangan nila ang ilang anak nga mohamtong sa espirituwal depende sa pag-uswag niini. Malipay ang mga ginikanan dihang ipadapat sa anak ang giingon sa teksto karong adlawa. Pero, kinahanglang dili nila kalimtan ang ilang tumong​—ang pagtabang sa ilang anak nga mahimong tinun-an. Samtang hinumdoman kana, ang mga ginikanan mahimong mangutana, ‘Naa na bay igong kahibalo ang akong anak aron magpahinungod sa Diyos ug magpabawtismo?’ w18.03 9 ¶6

Kon midawat tag imbitasyon, dili nato ni bastabastang kanselahon. Ang nangimbitar nangandam pag-ayo, ug masayang ang tanan niyang paningkamot kon buhaton nato nâ. (Mat. 5:37) Gikanselar sa pipila ang imbitasyon para modawat ug mas maayong imbitasyon. Mahigugmaon ug matinahoron ba nâ? Hinunoa, kinasingkasing natong dawaton ang bisan unsang gidalit sa nangimbitar nato. (Luc. 10:7) Ug kon kinahanglan gyong kanselahon ang imbitasyon, mahigugmaon ug mahunahunaon ta kon pahibaloon dayon nato ang nangimbitar. Importante pong tahoron ang lokal nga kostumbre. Sa pipila ka kultura, abiabihon ang wala damhang mga bisita; sa uban, kinahanglang magpahibalo daan. Ug sa ubang kultura, gidahom nga ang imbitahon mobalibad ug kausa o kaduha; sa uban, pagpakitag walay pagtahod ang pagbalibad sa imbitasyon. Buhaton nato ang tanan aron malipay ang nangimbitar nato. w18.03 18 ¶20-21

Hinumdomi nga dili igo ang kahibalo sa Bibliya aron mahimong mahunahunaon sa espirituwal. (1 Hari 4:29, 30; 11:4-6) Busa gawas sa kahibalo, unsay gikinahanglan? Kinahanglan nga padayon tang mouswag sa espirituwal. (Col. 2:6, 7) Ang usa ka importanteng paagi mao ang pagtuon sa librong Magpabilin Kamo sa Gugma sa Diyos. Motabang nâ nimo sa pagpadapat sa mga prinsipyo sa Bibliya. Kon nahuman na nimo nag tuon, puwede nimong tun-an ang ubang publikasyon nga makapalig-on sa imong pagtuo. (Col. 1:23) Kinahanglan sab nimong pamalandongon ang imong nakat-onan ug mangayog tabang kang Jehova kon unsaon kana pagpadapat. Hinumdomi nga dihang magtuon ug mamalandong, atong tumong nga maugmad ang kinasingkasing nga tinguha sa pagpahimuot kang Jehova ug pagtuman sa iyang mga balaod. (Sal. 40:8; 119:97) Maningkamot sab ta sa pagsalikway sa bisan unsa nga makababag sa atong espirituwal nga pag-uswag.​—Tito 2:11, 12. w18.02 24-25 ¶7-9

Aron maugmad ang pagtuo nga sama nianang kang Noe, kinahanglan nga mahimo tang maayong estudyante sa Pulong sa Diyos, magpadapat sa atong nakat-onan, ug magtugot sa maong kahibalo sa pagbag-o ug paggiya kanato. (1 Ped. 1:13-15) Ang pagtuo ug diyosnong kaalam manalipod nato batok sa panglimbong ni Satanas ug sa daotang espiritu sa kalibotan. (2 Cor. 2:11) Tungod sa maong espiritu, ang mga tawo nahimong mahigugmaon sa kapintasan ug imoralidad, ug nagpadala sa unodnong tinguha. (1 Juan 2:15, 16) Tungod sab niini, mahimong balewalaon niadtong huyang sa espirituwal ang ebidensiya nga hapit na ang dakong adlaw sa Diyos. Matikdi nga dihang gitandi ni Jesus ang atong panahon nianang kang Noe, gipasiugda niya, dili ang kapintasan o imoralidad, kondili ang kapeligrohan nga maluya sa espirituwal. (Mat. 24:36-39) Pangutan-a ang kaugalingon: ‘Makita ba sa akong pagkinabuhi nga nailhan gyod nako si Jehova? Ang ako bang pagtuo nagtukmod nako sa pagsunod sa matarong nga sukdanan sa Diyos ug sa pagtudlo niini sa uban?’ Hinaot ang imong mga tubag magpakita nga ikaw “naglakaw [usab] uban sa matuod nga Diyos.”​—Gen. 6:9. w18.02 9-10 ¶8-10

Dili nato bug-os malikayan ang mga dili diyosnon. Tingali makauban nato sila sa trabahoan, eskuylahan, o puy-anan. Pero malikayan nato nga maimpluwensiyahan sa ilang panghunahuna ug kinaiya. Aron mahimo kana, palig-onon nato ang atong espirituwalidad pinaagi sa pagtuon sa Bibliya ug pagpakigsuod niadtong determinadong moalagad kang Jehova. Kinahanglan sab tang maningkamot sa pagtabang sa uban sa espirituwal. Pangitag kahigayonan sa pagsangyaw, ug pangayog tabang kang Jehova nga makasulti ka sa hustong pulong sa hustong panahon. Kinahanglang ipahibalo nato nga kita mga Saksi ni Jehova. Pinaagi niana, ang atong maayong kinaiya makadayeg sa Diyos ug dili kanato. Gibansay ta “sa pagsalikway sa pagkadili-diyosnon ug sa kalibotanong mga tinguha ug sa pagkinabuhi uban ang maayong panghunahuna ug pagkamatarong ug diyosnong pagkamahinalaron taliwala niini nga sistema sa mga butang.” (Tito 2:11-14) Kon mogawi ta sa diyosnong paagi, ang uban makamatikod ana, ug ang pipila tingali makaingon: “Mouban kami kaninyo, kay kami nakadungog nga ang Diyos nagauban kaninyo.”​—Zac. 8:23. w18.01 31 ¶17-18

Sayop bang mahigugma sa kaugalingon? Dili. Normal lang ug gikinahanglan pa gani nga higugmaon ang kaugalingon. Gidisenyo ta ni Jehova nga ingon niana. Si Jesus miingon: “Higugmaon mo ang imong silingan sama sa imong kaugalingon.” (Mar. 12:31) Kon wala ta mahigugma sa kaugalingon, dili ta makahigugma sa silingan. Mabasa pod nato sa Bibliya: “Ang mga bana angay nga maghigugma sa ilang mga asawa sama sa ilang kaugalingong mga lawas. Siya nga nahigugma sa iyang asawa nahigugma sa iyang kaugalingon, kay wala gayoy tawo nga nagdumot sa iyang kaugalingong unod; kondili nagapakaon ug nagapangga niini.” (Efe. 5:28, 29) Busa, angay sab nga magpakitag haom nga gugma sa kaugalingon. Ang paghigugma sa kaugalingon nga gihisgotan sa 2 Timoteo 3:2 maoy sayop, hakog nga gugma. Ang mga tawo nga sobrang nahigugma sa kaugalingon naghunahunag labaw kay sa angayng hunahunaon sa ilang kaugalingon. (Roma 12:3) Unahon nila ang ilang kaayohan imbes ang sa uban. Kon may dili maayong panghitabo, basolon nila ang uban imbes ang kaugalingon. Ang maong mga tawo dili tinuod nga malipayon. w18.01 23 ¶4-5

Ang personal nga pagtuon mao ang usa ka paagi nga mamati ta kang Jehova, ug ang pag-ampo mao ang paagi nga makig-estorya ta niya. Dili angayng isipon sa usa ka Kristohanon ang pag-ampo ingong walay pulos nga rituwal o ‘pasuwerte’ aron mas modako ang tsansa nga molampos sa usa ka buluhaton. Hinunoa, ang pag-ampo maoy tinuod nga pagpakigkomunikar sa atong Maglalalang. Gusto ni Jehova nga mamati sa imong isulti. (Filip. 4:6) Busa, bisag unsay imong gikabalak-an, ang maalamong tambag sa Bibliya mao ang ‘pagtugyan sa imong palas-anon kang Jehova.’ (Sal. 55:22) Nagtuo ba gyod ka niana? Minilyong igsoon ang makapamatuod nga nakatabang nâ kanila. Makatabang sab nâ nimo! Dili lang ang pagpangayog tabang kang Jehova ang rason kon nganong moampo ta. Usahay sobra tang mabalaka sa atong mga problema nga makalimtan na nato ang daghang panalangin nga atong nadawat. Busa sulayi kini: Kada adlaw, paghunahunag labing menos tulo ka butang nga angay nimong pasalamatan. Dayon, pasalamati si Jehova sa maong mga panalangin. w17.12 25-26 ¶10-11

Libolibo ka Bible study ang nagpahinungod sa ilang kaugalingon kang Jehova ug nagpabawtismo. Daghan nila mga batan-on pa, kinsa namatuto sa kamatuoran ug mipili sa kinamaayohang paagi sa pagkinabuhi. (Sal. 1:1-3) Kon Saksi ka nga ginikanan, seguradong nangandoy ka sa adlaw nga mabawtismohan ang imong anak. (Itandi ang 3 Juan 4.) Ingong Saksing ginikanan, gusto nimong mahibalo ang imong anak sa balaang mga sinulat, nga karon naglangkob sa Hebreohanong Kasulatan ug sa Kristohanon Gregong Kasulatan. Depende sa ilang katakos, bisan ang gagmayng bata makakat-on bahin sa mga tawo ug hitabo diha sa Bibliya. Ang organisasyon ni Jehova nagtaganag mga galamiton nga magamit sa mga ginikanan sa pagtabang sa ilang mga anak. Hinumdomi, ang kahibalo sa Kasulatan mao ang pundasyon sa lig-ong relasyon kang Jehova. w17.12 18 ¶1; 19 ¶4

Komosta kon asawa ka ug gibati nimong wala ka tratara sa imong dili Saksing bana sa hustong paagi? Moarang-arang ba ang situwasyon kon lalison nimo siya tungod sa iyang batasan? Bisan pag sundon na lang niya ang imong gusto, madani ba nimo siya sa kamatuoran? Lagmit dili. Pero kon tahoron nimo ang iyang pagkaulo, makaamot ka sa kalinaw sa pamilya, madayeg nimo si Jehova, ug basig madani pa gani nimo siya sa tinuod nga pagsimba; sa ingon, madawat ninyong duha ang ganti. (1 Ped. 3:1, 2) Komosta kon bana ka ug gibati nimong wala ka tahora sa imong dili Saksing asawa? Tahoron kaha ka niya kon singkahan nimo siya aron ipakita nga ikaw ang boss? Siyempre dili! Ang Diyos nagdahom nga ipakita nimo ang pagkaulo sa mahigugmaong paagi, ingong pagsundog kang Jesus. Gipakita ni Jesus ang iyang pagkaulo sa kongregasyon uban ang pailob ug gugma. (Luc. 9:46-48) Pinaagi sa pagsundog kang Jesus, basig madani sa bana ang iyang asawa sa tinuod nga pagsimba. w17.11 28-29 ¶13-14

Ang kalibotanong panghunahuna nagsalikway o nagpakamenos sa mga prinsipyo ni Jehova, ug ang impluwensiya niini anam-anam nga makapahuyang sa atong pagtuo. Anaa sa atong palibot ang kalibotanong panghunahuna. Kini gipasiugda diha sa TV, Internet, trabahoan, o sa eskuylahan. Diha sa daghang nasod, sagad may moingon nga sila dili motuog Diyos; giisip nila ang ilang kaugalingon nga dili relihiyoso. Tingali wala nila kuwestiyona ang paglungtad sa Diyos, pero gusto lang nila nga may kagawasan sila sa pagbuhat bisag unsay ilang gusto. (Sal. 10:4) Ang uban maghunahuna tingali nga sila intelihente kon sila moingon, “May prinsipyo gihapon ko bisag dili ko motuog Diyos.” Makataronganon ba ang pangangkon niadtong dili motuo nga dunay Maglalalang? Kon ang usa modangop sa siyensiya aron sa pagsusi kon gilalang ba ang kinabuhi, posibleng maglibog siya sa kadaghan sa impormasyon. Apan sa tinuoray lang, simple ra ang tubag. Kon dunay naghimo sa usa ka bilding, labaw na sa buhing mga butang! w17.11 20-21 ¶2-4

Pamalandonga ang kaimportante sa pagtambong sa Memoryal. Hinumdomi nga bahin sa atong pagsimba ang mga tigom sa kongregasyon. Seguradong nakita ni Jehova ug Jesus ang tanang naningkamot sa pagtambong niining labing importanteng tigom sa tuig. Sa tinuod lang, gusto natong makita nila nga motambong gyod ta sa Memoryal, gawas lang kon dili gyod kaya tungod sa sakit o sirkumstansiya. Dihang atong gipakita pinaagi sa buhat nga importante para nato ang mga tigom sa pagsimba, atong gihatagan si Jehova ug dugang rason nga magpabilin ang atong ngalan sa “basahon sa handomanan”​—ang “basahon sa kinabuhi”—​diin gisulat ang ngalan niadtong may kahigayonang mabuhi sa walay kataposan. (Pin. 20:15) Sa mga adlaw unâ ang Memoryal, makagahin tag panahon sa pag-ampo ug pagpamalandong bahin sa atong relasyon kang Jehova.​—2 Cor. 13:5. w18.01 13 ¶4-5

Kon ang midangop naa na sa siyudad nga dalangpanan, siya luwas na. Bahin niining mga siyudara, si Jehova miingon: “Kini magsilbi kaninyo nga dalangpanan.” (Jos. 20:2, 3) Si Jehova wala magsugo nga husayon pag-usab ang nakapatay tungod sa mao rang kaso. Dili sab tugotang mosulod sa siyudad ang tigpanimalos aron patyon ang nakapatay. Busa, ang midangop dili na mahadlok nga panimaslan. Samtang naa sa siyudad, siya luwas ilalom sa proteksiyon ni Jehova. Dili kini prisohan. Sa siyudad, siya makatrabaho, makatabang sa uban, ug makaalagad kang Jehova nga malinawon. Oo, posible pa ang malipayon ug malamposong kinabuhi! Ang pipila ka alagad sa Diyos nga grabeng nakasala pero naghinulsol na mibati gihapong “napriso” sa ilang pagkasad-an. Ang uban mibati gani nga lantawon sila ni Jehova nga makasasala hangtod sa hangtod. Kon kanay imong gibati, palihog hinumdomi nga dihang pasayloon ka ni Jehova, bug-os ka niyang gipasaylo! w17.11 9 ¶6; 11 ¶13-14

Ang usa ka paagi nga mapalambo nato ang panaghiusa mao ang pagpamalandong sa kahulogan sa mga emblema sa Memoryal. Unâ pa nianang gabhiona​—ug ilabina nianang gabhiona—​hunahunaa pag-ayo ang kaimportante sa tinapay nga walay lebadura ug sa pulang bino. (1 Cor. 11:23-25) Ang tinapay nagrepresentar sa walay salang lawas nga gihalad ni Jesus, ug ang bino nagsimbolo sa iyang giulang dugo. Hinumdomi, ang halad lukat ni Kristo konektado sa duha ka kinadak-ang pagpahayag sa gugma​—ang gugma nga gipakita ni Jehova pinaagi sa paghatag sa iyang Anak para kanato, ug ang gugma nga gipakita ni Jesus pinaagi sa kinabubut-ong paghatag sa iyang kinabuhi para kanato. Ang pagpamalandong sa ilang gugma angayng magpalihok nato sa paghigugma kanila. Ug ang gugma nato ug sa atong mga igsoon para kang Jehova samag pisi nga naghigot nato sa usag usa ug nagpalig-on sa atong panaghiusa. w18.01 14 ¶11

Si Jehova nahigugma ug nagpabili gayod sa mga tawo. Kinabubut-on niyang gihatag ang iyang Anak aron kita maluwas. (Juan 3:16) Kon dili tumanon ni Jehova ang iyang mga saad, may katarongan ang Yawa nga tawgon ang Diyos ug bakakon, nga wala maghatag sa mga tawo ug maayong mga butang ug sa ingon nagmando sa dili maayong paagi. Mapamatud-an usab nga tinuod ang pagbugalbugal sa mga magsusupak kinsa nag-ingon: “Hain na man kining gisaad nga presensiya niya? Aw, sukad sa adlaw nga ang atong mga katigulangan nangatulog sa kamatayon, ang tanang butang nagpadayon nga mao ra gayod sukad sa sinugdan sa kalalangan.” (2 Ped. 3:3, 4) Busa, seguroon ni Jehova nga ang pagbindikar sa iyang pagkasoberano maglakip sa kaluwasan sa matinumanong katawhan! (Isa. 55:10, 11) Dugang pa, ang pagkasoberano ni Jehova gipasukad sa gugma. Busa makaseguro ta nga kanunay niyang higugmaon, pabilhan, ug apresyahon ang iyang maunongong mga alagad.​—Ex. 34:6. w17.06 23 ¶7

Sa pagsaad ni Jehova bahin sa umaabot nga Manluluwas, nga narekord sa Genesis 3:15, giisip Niya nga nahimo na ang maong halad. Dayon, mga 4,000 ka tuig sa ulahi, si Jehova mihimog dakong sakripisyo pinaagi sa paghalad sa iyang bugtong Anak alang sa mga tawo. (Juan 3:16) Mapasalamaton gyod ta sa gugma ni Jehova! Makapakita tag dili mahakogong gugma kay gilalang ta sa larawan sa Diyos. Si Abel nagpakitag gugma sa Diyos pinaagi sa dili mahakogong paghalad sa iyang kinamaayohan. (Gen. 4:3, 4) Si Noe nagpakitag dili mahakogong gugma sa isigkatawo pinaagi sa pagsangyaw sa mensahe sa Diyos sulod sa daghang katuigan bisag walay naminaw. (2 Ped. 2:5) Giuna ni Abraham ang iyang gugma sa Diyos kay sa iyang pagbati dihang gisugo siya sa paghalad sa iyang anak, si Isaac. (Sant. 2:21) Parehas nianang matinumanong mga tawo, makapakita sab tag gugma bisag dili ni sayon. w17.10 8 ¶3-4

Ang gihimo sa atong Hataas nga Saserdote, si Jesus, nagpasalig kanato nga mapasaylo ang atong mga sala ug “makadawat kita ug kaluoy ug makakaplag ug dili-takos nga kalulot ingong tabang sa hustong panahon.” (Heb. 4:16) Busa, kinahanglan tang magpakitag pagtuo sa halad ni Jesus. Tuohi nga ang lukat mapadapat kanimo ingong indibiduwal. (Gal. 2:20, 21) Tungod sa lukat, tuohi nga mapasaylo ang imong mga sala, ug nga mabuhi ka sa walay kataposan. Ang halad ni Jesus maoy regalo ni Jehova kanimo. Ug dihang gipasaylo na ni Jehova ang atong sala, dili na ta angayng mahadlok nga mangita siyag rason nga akusahan o hukman tag balik tungod sa maong sala. (Sal. 103:8-12) Oo, bug-os tang makasalig sa pagpasaylo ni Jehova. w17.11 11-12 ¶14-17

Sa gabii nga gisugdan ang Panihapon sa Ginoo, si Jesus nag-ampo nga unta magkahiusa ang tanan niyang sumusunod ug matagamtam nila ang panaghiusa nga sama nianang natagamtam niya ug sa iyang Amahan. Gitubag gyod ni Jehova kana nga pag-ampo sa iyang minahal nga Anak, ug karon minilyon ang mituo nga gipadala ni Jehova ang iyang Anak. Labaw sa ubang tigom, ang Memoryal naghatag ug dili malalis nga ebidensiya nga nahiusa ang mga Saksi ni Jehova. Sa pipila ka lugar, panagsa rang magkatigom ang mga tawong lainlaig rasa para sa usa ka relihiyosong okasyon, o kon duna man, tamayon kini sa uban. Pero ang maong panaghiusa nindot kaayo sa panan-aw ni Jehova ug Jesus! Kitang katawhan ni Jehova dili matingala sa atong panaghiusa. Gani, gitagna ni mismo ni Jehova.​—Ezeq. 37:15-17; Zac. 8:23. w18.01 14 ¶7-9

Ang “mga magtutukod” nga nagsalikway sa Mesiyas mao ang Hudiyong mga lider. Ang ilang pagsalikway labaw pa sa wala nila pagpanumbaling o pagdawat kang Jesus ingong Kristo. Daghang Hudiyo ang nagsalikway niya pinaagi sa pagsinggit nga ipapatay siya. (Luc. 23:18-23) Oo, may tulubagon usab sila sa kamatayon ni Jesus. Kon si Jesus gisalikway ug gipatay, sa unsang paagi siya mahimong “pangulong bato sa pamag-ang”? Mahitabo lamang kana kon banhawon siya. Si apostol Pedro naghisgot bahin kang “Jesu-Kristo nga Nasaretnon, nga inyong gilansang apan kinsa gibangon sa Diyos gikan sa mga patay.” (Buh. 3:15; 4:5-11; 1 Ped. 2:5-7) Busa, kining binanhawng Anak nahimong usa kansang ngalan “gikahatag taliwala sa mga tawo nga pinaagi niini kita gayod maluwas.”​—Buh. 4:12; Efe. 1:20. w17.12 9-10 ¶6-9

Bahin sa dakong kasakitan nga hapit nang moabot, si Jesus miingon: “Sila makakita sa Anak sa tawo nga moanhi diha sa mga panganod sa langit uban ang gahom ug dakong himaya. Ug . . . ipadala [ni Jesus] ang iyang mga manulonda uban ang makusog nga tingog sa trompeta, ug ilang pagatigomon ang iyang mga pinili.” (Mat. 24:29-31) Ang maong ‘pagtigom sa mga pinili’ nagtumong sa panahon dihang ang tanang dinihogan nga nia pa sa yuta makadawat sa ilang langitnong ganti. Kini mahitabo human sa unang bahin sa dakong kasakitan pero sa dili pa ang gubat sa Armagedon. Dayon, ang tanang membro sa 144,000 mouban kang Jesus sa pagpildi sa mga hari sa yuta. (Pin. 17:12-14) Ang Memoryal nga iselebrar sa dili pa ‘moabot’ si Jesus aron sa pagtigom sa mga dinihogan sa langit mao ang kataposang Memoryal. w18.01 16 ¶15

Sa langit, si Jesus mabuhi “hangtod sa kahangtoran.” (Pin. 1:5, 18; Roma 6:9; Col. 1:18; 1 Ped. 3:18) Gipasaligan ni Jesus ang iyang matinumanong mga apostoles nga sila magmando uban niya sa langit. (Luc. 22:28-30) Si Pablo misulat nga “si Kristo gibangon na gikan sa mga patay, ang unang bunga kanilang nangatulog sa kamatayon.” Gipakita usab ni Pablo nga may lain pang mabanhaw ngadto sa langit. Siya miingon: “Ang matag usa sa iyang kaugalingong han-ay: Si Kristo ang unang bunga, pagkahuman kadtong mga iya ni Kristo panahon sa iyang presensiya.” (1 Cor. 15:20, 23) Sukad niadtong 1914 kita nagkinabuhi panahon sa gisaad nga “presensiya” ni Jesus. Kini nagpadayon gihapon, ug duol na kaayo ang kataposan niining daotang sistema sa mga butang. w17.12 10 ¶11; 11 ¶14-16

Ang atong maluluy-ong Amahan namatyan usab ug mga minahal​—si Abraham, Isaac, Jacob, Moises, ug Haring David. (Num. 12:6-8; Mat. 22:31, 32; Buh. 13:22) Ang Pulong sa Diyos nagpasalig kanato nga si Jehova naghinamhinam o nangandoy gayod sa panahon nga iyang buhion sila pag-usab. (Job 14:14, 15) Sila mabuhi nga malipayon ug himsog. Hinumdomi sab nga nakaagom ug mapait nga kamatayon ang pinalanggang Anak sa Diyos​—ang usa nga “iyang gikahinangpan pag-ayo.” (Prov. 8:22, 30) Seguradong wala gyoy pulong nga makahubit sa kaguol nga gibati ni Jehova. (Juan 5:20; 10:17) Makasalig ta nga tabangan gyod ta ni Jehova. Busa, dili ta angayng magduhaduha sa pagpahayag sa atong kaguol pinaagi sa pag-ampo. Mahupay gyod ta sa pagkahibalo nga si Jehova makasabot sa atong pagbati ug makatagana sa paghupay nga atong gikinahanglan!​—2 Cor. 1:3, 4. w17.07 13 ¶3-5

Karon, minilyon na ang miduyog sa tinuod nga pagsimba ug kinasingkasing nga miamot sa ilang “bililhong mga butang,” nga naglakip sa ilang panahon, kusog, ug kabtangan aron suportahan ang dakong espirituwal nga templo ni Jehova. (Prov. 3:9) Dili gyod malimtan ni Jehova ang atong pagkugi ug gugma kaniya. Ang tanang nalampos sa tinuod nga pagsimba niining kataposang mga adlaw maoy pamatuod sa panalangin ni Jehova ug pagpanguna ni Kristo. Bahin kita sa lig-on, luwas, ug walay kataposang organisasyon. Pabilhi ang imong dapit diha sa katawhan ni Jehova, ug ‘sa walay pakyas pamati sa tingog ni Jehova nga imong Diyos.’ (Zac. 6:15) Ug maproteksiyonan ka sa atong Hari ug Hataas nga Saserdote. Suportahi pag-ayo ang tinuod nga pagsimba. Kon buhaton nimo kana, makaseguro ka nga panalipdan ka ni Jehova sa kataposang bahin niining sistema sa mga butang​—ug hangtod sa kahangtoran! w17.10 30 ¶18-19

Sa dili madugay, ang tibuok sistema ni Satanas​—politika, relihiyon, ug negosyo—​gitakdang mawala. Gitagna sa mga propetang si Ezequiel ug Sofonias nga mahimong walay pulos ang bulawan ug plata​—mga butang nga importante kaayo sa sistema sa negosyo. (Ezeq. 7:19; Sof. 1:18) Unsa kahay atong bation kon moabot ang panahon nga matapos na ang atong kinabuhi niining sistemaha unya atong maamgohan nga gibaylo nato ang tinuod nga bahandi sa “dili-matarong nga mga bahandi”? Bation nato ang sama sa gibati sa tawong nagtrabaho pag-ayo para magtigom ug daghang kuwarta, ug sa ulahi nakaamgo nga kini mini diay. (Prov. 18:11) Oo, kana nga bahandi mahimo gyong walay pulos, busa pahimusli ang kahigayonan sa paggamit niana sa ‘paghimog mga higala’ sa langit. Ang atong pagsuportar sa buluhaton sa Gingharian mao ang makapadato nato sa espirituwal. w17.07 11 ¶16

Ang pipila ka Kristohanon nga nakahimog seryosong sala misulay pagtago niini aron sila dili maulawan o makadismayar sa uban. (Prov. 28:13) Pero dili kana mahigugmaon kay makadaot kana sa nakasala ug sa uban. Makababag kana sa pag-agos sa balaang espiritu ug makatugaw sa kalinaw sa kongregasyon. (Efe. 4:30) Ang tinuod nga gugma magpalihok sa nakasalang igsoon sa pagduol sa mga ansiyano aron matabangan nila siya. (Sant. 5:14, 15) Gugma ang kinalabwan sa tanang hiyas. (1 Cor. 13:13) Kana magpaila kanato ingong mga sumusunod ni Jesus ug mga tigsundog ni Jehova​—ang Tinubdan sa gugma. Si Pablo miingon: “Kon ako . . . walay gugma, ako walay kapuslanan.” (1 Cor. 13:2) Hinaot padayon natong ipakita ang gugma, dili lang “sa pulong,” kondili “sa buhat ug sa kamatuoran.”​—1 Juan 3:18. w17.10 11 ¶17-18

Konsideraha ang kaisog nga gipakita ni Jose dihang gitental siya sa asawa ni Potipar nga makigdulog. Nasayod siya nga mameligro ang iyang kinabuhi kon mobalibad siya. Pero imbes magpadaog, nagpakita siyag kaisog ug milihok dayon. (Gen. 39:10, 12) Ang laing ehemplo sa kaisog mao si Rahab. Dihang ang mga espiya sa Israel miadto sa iyang balay sa Jerico, maisogon niyang gitago ang duha ka lalaki ug gitabangan sila aron luwas nga makaikyas. (Jos. 2:4, 5, 9, 12-16) Dihang gisupak sa mga Saduseo, ang matinumanong mga apostoles, kinsa nakakita sa kaisog nga gipakita ni Jesus, wala moundang sa pagpanudlo bahin kang Jesus. (Buh. 5:17, 18, 27-29) Si Jose, Rahab, Jesus, ug ang mga apostoles nagpakitag kaisog sa pagbuhat kon unsay maayo. Ang ilang kaisog dili bunga sa ilang pagsalig sa kaugalingon. Sila misalig kang Jehova. Makaatubang sab tag mga situwasyon diin kinahanglan tang magmaisogon. Imbes mosalig sa kaugalingon, kinahanglang mosalig ta kang Jehova.​—2 Tim. 1:7. w17.09 29 ¶6-9

Ang paghukas sa daang pagkatawo dili molampos sa kaugalingong paningkamot. Sagad, ang mga indibiduwal nga naghimo niana naningkamot pag-ayo aron mabiyaan ang ilang daotang mga panggawi. Nagmadaogon sila kay ilang gidawat sa hunahuna ug kasingkasing ang gahom sa Pulong sa Diyos ug sa balaang espiritu. (Luc. 11:13; Heb. 4:12) Aron makabenepisyo sa maong gahom, kinahanglan tang magbasa sa Bibliya adlaw-adlaw, mamalandong niana, ug kanunayng mag-ampo para sa kaalam ug kusog sa pagpadapat sa tambag sa Bibliya. (Jos. 1:8; Sal. 119:97; 1 Tes. 5:17) Makabenepisyo sab ta sa Pulong sa Diyos ug sa balaang espiritu kon mangandam ta ug motambong sa mga tigom. (Heb. 10:24, 25) Dugang pa, angay natong pahimuslan ang lainlaing paagi nga ang Diyos nagtaganag espirituwal nga pagkaon sa iyang katawhan sa tibuok kalibotan. (Luc. 12:42) Samtang ang mga Kristohanon naningkamot nga hukason ang daang pagkatawo, dili lang kana ang kinahanglan aron maangkon ang pag-uyon sa Diyos. Kinahanglang isul-ob sab nato ang bag-ong pagkatawo.​—Col. 3:10. w17.08 21 ¶16-17

Si Haring David biktima sa daghang inhustisya. Gidihogan siya ni Jehova nga mahimong hari sa Israel sa bata pa. Pero kinahanglan siyang maghulat ug 15 ka tuig ayha mahimong hari bisan sa iyang tribo. (2 Sam. 2:3, 4) Dihay panahon nga gusto siyang patyon sa dili matinumanong hari nga si Saul. Ingong resulta, kinahanglan siyang magtagotago, usahay sa laing nasod ug sa ubang higayon, sa mga langob sa kamingawan. Bisan dihang namatay na si Saul sa gubat, kinahanglang maghulat si David ug mga pito pa ka tuig ayha mahimong hari sa tibuok nasod sa Israel. (2 Sam. 5:4, 5) Nganong andam si David nga maghulat nga mapailobon? Masaligon siya sa maunongong gugma ni Jehova. Malipayon siyang naghulat sa kaluwasan, ug iyang gipamalandong kon giunsa siya pagganti ni Jehova. (Sal. 13:6) Oo, gibati ni David nga dili makawang ang iyang paghulat. w17.08 6 ¶14-15

Mausab ang pinulongan o lenguwahe paglabay sa panahon. Ug posibleng lahi na karon ang kahulogan sa pipila ka pulong o ekspresyon. Ingon ana sab ang nahitabo sa Hebrew ug Greek​—pinulongan nga kasagarang gigamit sa pagsulat sa Bibliya. Lahi na kaayo ang modernong Hebrew ug Greek kay sa pagkagamit niini panahon sa Bibliya. Busa, kadtong gustong makasabot sa Pulong sa Diyos kinahanglang mobasa sa hubad niini​—bisag kadtong makamaog modernong Hebrew o Greek. Para sa uban, kinahanglang tun-an ang orihinal nga Hebrew ug Greek aron masabtan ang Bibliya. Pero lahi sa ilang gidahom, wala kaayo sila makabenepisyo niana. Mapasalamaton kaayo ta kay ang Bibliya o ang mga bahin niini nahubad na sa mga 3,000 ka pinulongan. Klaro, gusto gyod ni Jehova nga ang katawhan sa “matag nasod ug tribo ug pinulongan” makabenepisyo sa iyang Pulong. (Pin. 14:6) Dili ba kana mas makapasuod nimo sa atong mahigugmaon ug walay gidapigan nga Diyos? w17.09 19 ¶4

Kon naa kay napalagpot nga mga paryente, kinahanglan tingali nimong kontrolahon ang imong emosyon aron malikayan ang wala kinahanglanang pagpakigkontak nila. Niana nga mga kahimtang, dili sayon ang pagpugong sa kaugalingon, pero makatabang ang paghunahuna nga ang imong gibuhat nagsundog sa Diyos ug nagsunod sa iyang sugo. Panig-ingnan niana si Haring David. May dako siyang awtoridad pero wala niya kini gamita dihang nasuko siya kang Saul ug Simei. (1 Sam. 26:9-11; 2 Sam. 16:5-10) Diha poy panahon nga wala mapugngi ni David ang iyang kaugalingon​—dihang nakasala siya uban kang Bat-seba ug ang iyang unang reaksiyon sa kadalo ni Nabal. (1 Sam. 25:10-13; 2 Sam. 11:2-4) Bisan pa niana, naa tay makat-onan kang David. Una, ang mga nagapanguna sa katawhan sa Diyos kinahanglang magpakitag pagpugong sa kaugalingon aron dili nila maabusohan ang ilang awtoridad. Ikaduha, dili angayng mokompiyansa, nga maghunahunang dili ra matental.​—1 Cor. 10:12. w17.09 5-6 ¶12-13