Mayo

Tinuod, sakit tingali ang disiplina, pero dunay mas sakit pa niana​—ang kadaot nga moresulta tungod sa pagsalikway sa disiplina. (Heb. 12:11) Tagda ang pananglitan ni Cain. Dihang nakita sa Diyos nga nagdumot si Cain kang Abel ug gusto niya ning patyon, ang Diyos nagtambag kang Cain: “Nganong ikaw nanginit sa kasuko ug nganong nagminghoy ang imong panagway? Kon magbuhat ka ug maayo, dili ba adunay pagbayaw? Apan kon dili ka magbuhat ug maayo, adunay sala nga naghupo sa ganghaan, ug ikaw ang gipangandoy niini; ug makabuntog ka ba niini?” (Gen. 4:6, 7) Wala mamati si Cain ug siya nakasala. Giantos niya ang masakit nga epekto niana sa tibuok niyang kinabuhi. (Gen. 4:11, 12) Kana mas sakit kon ikomparar sa pagbadlong ni Jehova. Gusto gyod ni Jehova nga malikayan nato ang maong kasakit! (Isa. 48:17, 18) Busa, ‘magpatalinghog ta sa disiplina ug mahimong maalamon.’​—Prov. 8:33. w18.03 32 ¶18-20

Sa unsang paagi nailhan ni Daniel si Jehova? Dayag nga gitudloan siya sa iyang mga ginikanan sa paghigugma kang Jehova ug sa iyang sinulat nga Pulong. Ug wala gyod mawala ang maong gugma sa tibuok niyang kinabuhi. Bisan ganig tigulang na, siya padayong nagtuon sa Kasulatan. Ang lalom nga kahibalo ni Daniel sa Diyos, lakip na ang pagpakiglabot sa Diyos sa mga Israelinhon, makita diha sa iyang kinasingkasing ug mapainubsanong pag-ampo nga narekord sa Daniel 9:3-19. Gahinig panahon ang pagbasa ug pagpamalandong niana. Para sa matinumanong Hudiyo, dili sayon ang kinabuhi diha sa paganong Babilonya. Pananglitan, giingnan ni Jehova ang mga Hudiyo: “Tinguhaa ang kalinaw sa siyudad diin gipahinabo ko nga madestiyero kamo.” (Jer. 29:7) Pero gisugo sab sila nga siya ray ilang alagaron. (Ex. 34:14) Unsay nakatabang kang Daniel sa pagtuman nianang duha ka sugo? Ang diyosnong kaalam nakatabang niya nga masabtan ang relatibong pagsunod sa sekular nga awtoridad. Kasiglohan sa ulahi, si Jesus nagtudlo sa samang prinsipyo.​—Luc. 20:25. w18.02 10 ¶11-12

Nag-antos ka bag mga kalisdanan, sama sa sakit, problema sa kuwarta, o paglutos? Naglisod ka ba sa pagpabiling malipayon sa pag-alagad kang Jehova? Kon mao, madasig ka sa ehemplo ni Noe, Daniel, ug Job. Sila dili hingpit, ug nakasinatig kalisdanan nga ato pong giantos karon, ug diha pa ganiy mga higayon nga nameligro ang ilang kinabuhi. Pero sila nagmaunongon, nga nahimong mga ehemplo sa pagtuo ug pagkamatinumanon ngadto sa Diyos. (Ezeq. 14:12-14) Ang atong teksto karong adlawa gisulat ni Ezequiel sa Babilonya niadtong 612 B.C.E. (Ezeq. 1:1; 8:1) Hapit nang malaglag ang apostatang Jerusalem, nga nahitabo pagka-607 B.C.E. Pipila lang ang nagsundog sa mga hiyas ni Noe, Daniel, ug Job, ug sila naluwas. (Ezeq. 9:1-5) Karon usab, kadto lang giisip ni Jehova nga matarong sama nila ang maluwas dihang taposon ang presenteng sistema sa mga butang.​—Pin. 7:9, 14. w18.02 3-4 ¶1-3

Kon batan-on ka, pangutan-a ang kaugalingon: ‘Nakigbahin ba ko sa espirituwal nga mga kalihokan tungod lang kay mao nay gidahom sa akong ginikanan? Naningkamot ba kong maugmad ang personal nga relasyon sa Diyos?’ Siyempre, dili mga batan-on ray gitambagan sa paghimog espirituwal nga mga tumong. Ang maong mga tumong makatabang natong tanan sa pagpalig-on sa atong espirituwalidad. (Eccl. 12:13) Dihang mahibaloan na nato kon unsay pauswagon, kinahanglang mohimo tag mga paagi nga mouswag. Importante kaayo ang pagkahimong tawong espirituwal. Sa pagkatinuod, nagkahulogan kini sa atong kinabuhi. (Roma 8:6-8) Apan dili kinahanglang hingpit ta aron mahimong hamtong sa espirituwal. Ang espiritu ni Jehova makatabang nato nga mouswag. Pero kinahanglan gihapon tang maningkamot. Bisag makalingaw ang pagtuon sa Bibliya, dili nato hunahunaon nga ang Bibliya morag nobela nga gisulat para lang malingaw ta. Kinahanglang maningkamot ta sa pagpangitag espirituwal nga mga bahandi nga makatabang nato. w18.02 25 ¶10-11

Dili kinahanglang daghan kaayog nahibaloan ang usa aron makapahinungod sa Diyos ug magpabawtismo. Human sa bawtismo, ang tanang tinun-an kinahanglang padayon nga mouswag sa tukmang kahibalo. (Col. 1:9, 10) Busa, unsa ka daghang kahibalo ang gikinahanglan aron mabawtismohan? Makakuha tag ideya gikan sa eksperyensiya sa usa ka pamilya sa unang siglo. (Buh. 16:25-33) Sa ikaduhang misyonaryong panaw ni Pablo, siya mibisita sa Filipos niadtong mga 50 C.E. Didto, siya ug ang iyang kaubang si Silas sayop nga giakusahan, gidakop, ug gipriso. Pagkagabii, milinog ug natay-og ang pundasyon sa prisohan ug naabli ang tanang pultahan. Ang magbalantay sa prisohan maghikog na unta kay abi niyag nakaikyas ang mga piniriso, pero gitawag siya ni Pablo. Si Pablo ug Silas nakasangyaw sa magbalantay sa prisohan ug sa iyang pamilya. Unsay ilang gihimo dihang nakakat-on sila bahin kang Jesus? Nagpabawtismo dayon sila. w18.03 10 ¶7-8

Si Jehova malipayong Diyos, ug gipakita sa iyang katawhan ang maong hiyas. Dugang pa, dili sama niadtong mahigugmaon sa kaugalingon ug naghunahuna lang kon unsay ilang madawat, ang mga alagad ni Jehova malipayng mohatag sa uban. (Buh. 20:35; 2 Tim. 3:2) Unsaon nato pagkahibalo kon ang atong gugma sa Diyos nasapawan na sa gugma sa kaugalingon? Konsideraha ang tambag sa Filipos 2:3, 4: “Dili magabuhat ug bisan unsa tungod sa pagkamatigion o tungod sa pagpaimportante sa kaugalingon, kondili uban sa pagpaubos sa hunahuna nga magaisip nga ang uban labaw kay kaninyo, nga magatan-aw, dili lamang sa personal nga interes sa mga butang labot sa inyong kaugalingon, kondili sa personal nga interes usab sa uban.” Mahimong pangutan-on nato ang kaugalingon: ‘Gipadapat ba nako ang maong tambag? Naningkamot ba ko sa pagtabang sa uban, diha sa kongregasyon ug sa ministeryo?’ Dili kanunayng sayon ang paghatag sa atong panahon ug kusog. Nagkinahanglan nag paningkamot ug sakripisyo. Pero walay labawng makapalipay kay sa pagkahibalong giuyonan ta sa Soberano sa uniberso! w18.01 23 ¶6-7

Aron mahimo kana, pangutan-a ang kaugalingon: ‘Nagtuo ba gyod ko nga bahin ko sa bugtong organisasyon nga gigamit ni Jehova sa pagtuman sa iyang kabubut-on? Gibuhat ba nako ang tanan sa pagsangyaw ug pagtudlo sa maayong balita sa Gingharian? Ang ako bang binuhatan nagpakita nga nagtuo gyod kong nia na ta sa kataposang mga adlaw ug hapit nang taposon ang pagmando ni Satanas? Masaligon ba gihapon ko kang Jehova ug Jesus sama niadtong nagpahinungod ko sa akong kinabuhi kang Jehova?’ (Mat. 24:14; 2 Tim. 3:1; Heb. 3:14) Ang paghunahuna sa tubag nianang mga pangutanaha makatabang nato sa pagpamatuod kon unsa gyod ta. Basaha ug pamalandonga ang binase sa Bibliyang mga basahon nga naghisgot sa kaimportante sa Memoryal. (Juan 3:16; 17:3) Mabuhi lang ta sa walay kataposan pinaagi sa “pagkuha ug kahibalo,” o pagkaila kang Jehova ug ‘pagpasundayag ug pagtuo’ kang Jesus​—ang Iyang bugtong Anak. Sa pagpangandam sa Memoryal, gamita sa personal nga pagtuon ang mga artikulo nga makatabang nimo nga mas masuod kang Jehova ug Jesus. w18.01 13 ¶5-6

Dihang ikaw mobasa sa Bibliya ug sa atong mga publikasyon ug motambong sa mga tigom, makadungog kag makapadasig nga mga eksperyensiya kon giunsa pagtabang sa Diyos ang uban sa pagpabiling matinumanon. Pero samtang mouswag ka sa espirituwal, kinahanglan nimong masulayan mismo ang kaayo ni Jehova. Sa unsang paagi nimo natilawan ang kaayo ni Jehova? May usa ka paagi diin natilawan sa tanang Kristohanon ang kaayo ni Jehova. Kana mao ang pag-imbitar kanato sa pagpakigsuod kaniya ug sa iyang Anak. Morason tingali ang usa ka batan-on, ‘Gikabig ni Jehova ang akong ginikanan, misunod lang ko.’ Pero dihang nagpahinungod ka kang Jehova ug nagpabawtismo, imong gipakita nga duna ka nay espesyal nga relasyon kaniya. Karon, nakaila na gyod siya nimo. Ang Bibliya nagpasalig: “Kon ang usa ka tawo nahigugma sa Diyos, kini siya nailhan niya.” (1 Cor. 8:3) Paningkamoti kanunay nga apresyahon ang imong dapit diha sa organisasyon ni Jehova. w17.12 26 ¶12-13

Kon maghisgot ug “disiplina,” tingali maghunahuna kag silot, pero dili kay kana ra. Sa Bibliya, sagad positibo ang paghisgot sa disiplina, nga usahay hisgotan uban sa kahibalo, kaalam, gugma, ug kinabuhi. (Prov. 1:2-7; 4:11-13) Tungod kana kay ang disiplina sa Diyos nagpakita sa iyang gugma kanato ug sa iyang tinguha nga mabuhi ta sa walay kataposan. (Heb. 12:6) Bisag apil sa iyang disiplina ang pagsilot, kini dili gyod makadaot. Gani, ang kahulogan sa “disiplina” konektado sa edukasyon, sama anang pagpadako sa pinanggang anak. Ingong membro sa kongregasyon, bahin ta sa panimalay sa Diyos. (1 Tim. 3:15) Busa, gitahod nato ang katungod ni Jehova sa paghimog mga sugo ug sa paghatag ug mahigugmaong disiplina kon dili nato nâ sundon. Dugang pa, kon may dili maayong resulta ang atong gibuhat, ang iyang disiplina magpahinumdom nato nga importante gyod ang pagsunod sa atong langitnong Amahan.​—Gal. 6:7. w18.03 23 ¶1; 24 ¶3

Komosta kon tin-edyer ka ug gibati nimong wala ka masabti sa imong Saksing ginikanan ug paminaw nimo estrikto ra sila kaayo? Kon maglagot ka, basig magduhaduha ka nga ang pag-alagad kang Jehova ang kinamaayohang paagi sa pagkinabuhi. Pero kon moundang ka pag-alagad tungod ana, maamgohan nimo sa ulahi nga walay laing tinuod nga nagmahal nimo gawas sa imong mahinadlokon sa Diyos nga ginikanan ug sa inyong kongregasyon. Kon wala gyod ka badlonga sa imong ginikanan, makaingon kaha ka nga gimahal ka nila? (Heb. 12:8) Pero basig ang ilang paagi sa pagdisiplina ang nakapalagot nimo. Imbes magpokus niana, hunahunaa kon nganong gibuhat nila kana. Magpabiling kalmado ug paningkamoti nga dili maglagot pag-ayo nila. Paningkamoti nga mahimong hamtong sa espirituwal, nga kalmadong modawat sa tambag ug dili magpokus sa paagi sa pagtambag.​—Prov. 1:8. w17.11 29 ¶16-17

Tingali may nakita kang mga batan-on nga nabawtismohan pero sa ulahi gikuwestiyon nila kon maalamon ba ang pagsunod sa mga sukdanan sa Diyos. Ang pipila mibiya pa gani sa kamatuoran. Maong mabalaka tingali ka nga ang imong anak mosugod sa pagsunod sa Kristohanong pagkinabuhi pero sa ulahi mobugnaw ang unang gugma sa kamatuoran. Unsay imong buhaton aron dili maingon ana ang imong anak ug matabangan siyang ‘motubo ngadto sa kaluwasan’? (1 Ped. 2:2) Ang tubag makita sa sulat ni Pablo kang Timoteo: “Magpadayon ka sa mga butang nga imong nakat-onan ug nakakombinsir kanimo sa pagtuo, nga nahibalo kon kang kinsa nimo nakat-onan kini ug nga sukad pa sa pagkamasuso ikaw nahibalo na sa balaang mga sinulat [ang Hebreohanong Kasulatan], nga makahimo kanimong maalamon alang sa kaluwasan pinaagi sa pagtuo maylabot kang Kristo Jesus.” (2 Tim. 3:14, 15) Matikdi nga si Pablo naghisgot bahin sa (1) pagkahibalo sa balaang mga sinulat, (2) pagkakombinsir nga motuo sa mga butang nga nakat-onan, ug (3) pagkahimong maalamon alang sa kaluwasan pinaagi sa pagtuo kang Kristo Jesus. w17.12 18-19 ¶2-3

Gipahilayo sa daghang relihiyon ang mga tawo gikan sa Diyos pinaagi sa pagtudlog impiyernong kalayo, pagpangolektag ikapulo, o pagpaluyo sa politika. Mao diay nga nagkadaghan ang mibati nga magmalipayon gihapon sila bisag walay relihiyon! Siyempre, magmalipayon ang usa kon walay bakak nga relihiyon, apan dili siya tinuod nga malipayon gawas kon suod siya kang Jehova, kinsa gitawag ingong “malipayong Diyos.” (1 Tim. 1:11) Ang tanang buhaton sa Diyos makahatag ug kaayohan. Malipayon ang iyang mga alagad kay sila naningkamot sa pagtabang sa uban. (Buh. 20:35) Pananglitan, tagda kon sa unsang paagi makatabang ang matuod nga pagsimba aron magmalipayon ang pamilya. Ang matuod nga pagsimba nagtudlo nato sa pagpasidungog ug pagtahod sa kapikas, pag-isip sa panumpa sa kaminyoon ingong sagrado, paglikay sa pagpanapaw, pagmatuto ug matinahorong mga anak, ug pagpakitag tinuod nga gugma. Ingong resulta, ang maong pagsimba maghiusa sa mga tawo diha sa malipayong mga kongregasyon ug tibuok kalibotang panag-igsoonay. w17.11 21 ¶6-7

Daghang alagad sa Diyos ang mibatig sama sa giingon ni Pablo. Kitang tanan nag-antos tungod sa napanunod nga sala. Ug kon duna tay mahimo nga dili makapalipay kang Jehova, kita maguol. Ang pipila ka Kristohanon nga nakahimog seryosong sala mibati pa gani nga dili na gyod sila mapasaylo. Bisan pa niana, ang Bibliya nagpasalig nga ang modangop kang Jehova dili angayng mobati nga wala na siyay paglaom nga mapasaylo. (Sal. 34:22) Human mapahayag ni Pablo ang iyang kaguol kay wala niya matuman sa bug-os si Jehova, siya miingon: “Salamat sa Diyos pinaagi kang Jesu-Kristo nga atong Ginoo!” (Roma 7:25) Oo, bisag si Pablo naningkamot nga suklan ang sala ug nakasala kaniadto​—nga iya nang gihinulsolan—​masaligon siya sa pagpasaylo sa Diyos pinaagi ni Jesus. Ingong atong Manlulukat, si Jesus naghinlo sa atong konsensiya ug naghatag natog kalinaw sa hunahuna. (Heb. 9:13, 14) Ingong atong Hataas nga Saserdote, “siya makahimo usab sa pagluwas sa bug-os kanilang nagaduol sa Diyos pinaagi kaniya, tungod kay siya buhi man kanunay aron sa pagpangamuyo alang kanila.”​—Heb. 7:24, 25. w17.11 8 ¶1-2; 12 ¶15

Sa unsang paagi matuman nato ang atong pahinungod? Ang atong paglahutay sa mga pagsulay, dagko ug gagmay, angayng magpakita nga giisip natong seryoso ang atong panaad nga dayegon si Jehova “adlaw-adlaw.” (Sal. 61:8) Pananglitan, kon may magpaibog-ibog nimo diha sa trabahoan o eskuylahan, isipon ba nimo kini ingong kahigayonan sa pagpakitag ‘kahimuot sa mga dalan ni Jehova’ pinaagi sa pagsalikway sa maong panental? (Prov. 23:26) Kon ikaw lang sa pamilya ang nag-alagad kang Jehova, mangayo ka bag tabang kang Jehova nga mahuptan ang Kristohanong panggawi bisag ikaw ray naningkamot sa pagbuhat niana? Adlaw-adlaw ka bang moampo sa atong mahigugmaong langitnong Amahan, nga magpasalamat kaniya tungod sa iyang paggiya ug paghigugma kanimo? Naggahin ka bag panahon sa pagbasa sa Bibliya adlaw-adlaw? Apil kana sa imong gipanaad kang Jehova dihang nagpahinungod ka kaniya. Kinahanglan nimo kanang tumanon. Ang imong bug-os nga pagpakigbahin sa pagsimba magpakita nga imong gihigugma si Jehova ug gituman nimo ang imong pahinungod. Ang atong pagsimba maoy paagi sa pagkinabuhi, dili pormalidad lang. w17.10 23 ¶11-12

Usa ka iladong tigkomposog awit ang miingon: “Ang mga pulong makapalihok sa hunahuna. Ang musika makapukaw sa pagbati. Pero pinaagi sa awit, bation nimo ang naa sa imong hunahuna.” Ang kinamaayohang hunahuna nga atong “bation” mao kanang nagpahayag sa atong pagdayeg ug gugma sa atong langitnong Amahan, si Jehova. Maong dili ikatingala nga importanteng bahin sa putling pagsimba ang pag-awit, himoon man nato kini nga nag-inusara o uban sa kongregasyon. Apan unsay imong hunahuna sa pag-awit ug kusog diha sa kongregasyon? Maulaw ba ka? Sa ubang kultura, ang mga lalaki dili tingali komportableng mokanta sa publiko. Kini nga panghunahuna makaapektar sa tibuok kongregasyon, ilabina kon ang mga nagapanguna magpanuko sa pag-awit o mohimog ubang buluhaton samtang nagkanta ang kongregasyon. (Sal. 30:12) Kon gihunahuna gyod nato nga bahin sa atong pagsimba ang pag-awit, dili nato gustong mogawas panahon sa kanta o sayloan kanang bahina sa programa. w17.11 3 ¶1-3

Kitang tanan gustog malinawong kinabuhi, nga walay gikabalak-an. Mapasalamaton gyod ta nga gihatag ni Jehova kanato “ang kalinaw sa Diyos”​—kalinaw sa hunahuna nga manalipod nato batok sa makapatugawng panghunahuna ug pagbati! (Filip. 4:6, 7) Tungod sa atong pagdedikar kang Jehova, matagamtam pod nato ang “pakigdait uban sa Diyos,” usa ka maayong relasyon kaniya. (Roma 5:1) Pero, wala pa moabot ang panahon nga ipahinabo sa Diyos ang bug-os nga kalinaw. Ang kataposang mga adlaw punog panag-away, ug daghang tawo ang bayolente. (2 Tim. 3:1-4) Ingong mga Kristohanon, duna tay espirituwal nga pagpakiggubat batok kang Satanas ug sa bakak nga mga pagtulon-an nga iyang gipakaylap. (2 Cor. 10:4, 5) Pero ang kinadak-ang hagit sa atong pagpakigdait mahimong maggikan sa dili magtutuong mga paryente. Lagmit ang pipila magbiaybiay sa atong tinuohan, magpasangil nga gibungkag nato ang pamilya, o maghulga nga palayason ta kon dili ta moundang sa pag-alagad. w17.10 12 ¶1-2

Kay nagakausab ang pinulongan, nagakausab pod ang kahulogan sa pipila ka pulong nga gigamit diha sa Bibliya. Tingali ang karaang hubad sa Bibliya sayong sabton kaniadto pero lisod nang masabtan karon. Konsideraha ang English nga hubad sa Bibliya. Ang King James Version unang nahimo niadtong 1611. Usa ni sa mga popular kaayo nga English nga Bibliya, ug dako kaayo nig impluwensiya sa English nga pinulongan. Paglabay sa katuigan, daghang pulong sa King James Version ang dili na masabtan. Kana sab ang nahitabo sa unang mga hubad sa Bibliya diha sa ubang pinulongan. Busa, mapasalamaton gyod ta nga ang Bag-ong Kalibotang Hubad sa Balaang Kasulatan naggamit ug modernong lenguwahe. Ang tibuok o bahin niini nahubad sa kapig 150 ka pinulongan, maong daghan kaayong tawo karon ang naay kopya niini. Kay sayon kining sabton, ang mensahe sa Pulong sa Diyos nakatandog sa atong kasingkasing. w17.09 19 ¶5-6

Ang Kristohanong mga batan-on angayng mohimog importanteng mga desisyon. Gikinahanglan nila ang kaisog sa paghimog maalamong desisyon bahin sa maayong panagkauban, kalingawan, moral nga kahinlo, ug bawtismo. Ngano? Kay gisupak nila si Satanas, ang usa nga nagtamay sa Diyos. Usa sa importanteng desisyon sa mga batan-on mao ang bahin sa ilang mga tumong. Sa ubang nasod, ang mga batan-on gipresyur sa pagtinguhag mas taas nga edukasyon ug dagkog suweldong trabaho. Sa ubang lugar, tungod sa kalisod sa ekonomiya, lagmit bation sa mga batan-on nga kinahanglan silang magpokus sa pagsuportar sa materyal nga panginahanglan sa ilang pamilya. Panalanginan ni Jehova ang mga batan-on nga maisogong naningkamot sa pagkab-ot sa ilang espirituwal nga mga tumong ug sa pag-una sa buluhaton sa Gingharian. Tabangan sila ni Jehova aron matagan-an ang panginahanglan sa ilang pamilya. Niadtong unang siglo, ang batan-ong si Timoteo nagpokus sa iyang espirituwal nga mga tumong, ug mahimo sab nâ nimo.​—Filip. 2:19-22. w17.09 29-30 ¶10-12

Ang regular ug epektibong pagtuon sa Bibliya makatabang aron mapugngan ang kaugalingon. Sa unsang paagi? Gipakita sa Bibliya ang mga benepisyo ug resulta sa atong mga binuhatan. Gituyo gyod ni Jehova nga ipasulat kana. (Roma 15:4) Maayo gyong basahon, pamalandongon, ug tun-an kana! Ipadapat kini sa imong kaugalingon ug sa imong pamilya. Pangayog tabang kang Jehova aron mapadapat ang iyang Pulong. Kon nakita nimo nga dili kaayo ka makapugong sa kaugalingon, ayaw kana ilimod. Iampo kana, ug paningkamot nga mouswag. (Sant. 1:5) Pinaagi sa pag-research diha sa atong mga publikasyon, seguradong makakita kag artikulo nga makatabang kanimo. w17.09 6 ¶15-16

Ang “bag-ong pagkatawo” nagtumong sa pagkatawo nga “gilalang sumala sa kabubut-on sa Diyos.” (Efe. 4:24) Ug posibleng maugmad nato ang maong pagkatawo. Ngano? Tungod kay gilalang ni Jehova ang mga tawo sa iyang larawan, busa posible gayod nga masundog nato ang iyang maayong mga hiyas. (Gen. 1:26, 27; Efe. 5:1) Human tambagi bahin sa bag-ong pagkatawo, si Pablo naghisgot sa pagkadili-mapihigon ingong importanteng bahin sa bag-ong pagkatawo. Siya miingon: “Walay Grego ni Hudiyo, pagkatinuli ni pagkadili-tinuli, langyaw, Sityanhon, ulipon, tawong gawasnon.” Diha sa kongregasyon, nganong kinahanglang walay diskriminasyon sa rasa, nasyonalidad, o estado sa kinabuhi? Tungod kay ang tinuod nga mga sumusunod ni Kristo “nahiusa.” (Col. 3:11; Gal. 3:28) Kadtong nagsul-ob sa bag-ong pagkatawo nagtahod sa mga igsoon sa pagtuo ug sa mga tagagawas, bisan unsa may ilang estado sa kinabuhi o rasa.​—Roma 2:11. w17.08 22 ¶1; 23 ¶3-4

Wala ta pabuhata ni Jehova sa usa ka butang nga dili niya gustong buhaton. Naghatag siyag kinalabwang ehemplo sa pagkaandam mohulat. (2 Ped. 3:9) Si Jehova mapailobong naghulat sulod sa libolibong katuigan aron mahusay ang mga isyu nga gipatungha didto sa tanaman sa Eden. Padayon siyang “nagapaabot” sa panahon nga bug-os mabalaan ang iyang ngalan. Moresulta kinig daghan kaayong panalangin para niadtong mahinamong “nagapaabot kaniya.” (Isa. 30:18) Si Jesus andam sab nga mohulat. Bisag napamatud-an na niya ang iyang pagkamatinumanon dinhi sa yuta ug napresentar ang bili sa iyang halad lukat niadtong 33 C.E., kinahanglan siyang maghulat hangtod sa 1914 ayha pa magsugod sa pagmando. (Buh. 2:33-35; Heb. 10:12, 13) Human pa sa Usa ka Libo ka Tuig nga Pagmando ayha bug-os malaglag ang tanan niyang kaaway. (1 Cor. 15:25) Pero makaseguro tang dili kana makawang. w17.08 7 ¶16-17

“Human mamatay ang among anak, halos usa ka tuig ming nag-antos sa grabeng kaguol,” miingon si Susi. Usa ka brader ang miingon nga dihang kalit nga namatay ang iyang asawa, mibati siyag “dili masabtang sakit sa lawas.” Makapaguol nga daghan kaayo ang nakaeksperyensiyag ingon niana nga pag-antos. Daghang igsoon ang wala magdahom nga mamatyan silag minahal sa dili pa ang Armagedon. Kon ikaw man ang hingtungdan o may kaila kang namatyan, makapangutana tingali ka, ‘Sa unsang paagi mahupayan ang mga nagbangotan?’ Nakadungog na tingali ka nga may miingong maalim ra ang samad paglabay sa panahon. Pero, ang panahon ba mismo ang makaayo sa nadugmok nga kasingkasing? Usa ka biyuda ang miingon, “Para nako, mas husto ang pag-ingon nga ang paggamit sa usa sa iyang panahon mao ang tinuod nga makatabang niya.” Oo, pareho sa literal nga samad, ang emosyonal nga samad anam-anam nga maayo kon kini ginatambalan. w17.07 12-13 ¶1-3

Unsa ang girekomendar ni Jehova nga imong planohon? Iyang gilalang ang tawo nga magmalipayon diha sa pagkaila kaniya ug pag-alagad kaniya nga matinumanon. (Sal. 128:1; Mat. 5:3) Lahi ta sa mga hayop​—nga igo lang mokaon, moinom, ug manganak. Gusto sa Diyos nga magmalipayon ka pinaagi sa pagplanog mga buluhaton gawas nianang makapatagbaw sa mga hayop. Ang imong Maglalalang mao “ang Diyos sa gugma,” ang “malipayong Diyos,” kinsa naghimo nimo “sumala sa iyang larawan.” (2 Cor. 13:11; 1 Tim. 1:11; Gen. 1:27) Magmalipayon ka kon sundogon nimo ang atong mahigugmaong Diyos. Naeksperyensiyahan na ba nimo ang giingon sa Bibliya: “Adunay labaw nga kalipay sa paghatag kay sa pagdawat”? (Buh. 20:35) Importante kana nga kamatuoran sa kinabuhi. Busa, gusto sa Diyos nga ang imong mga plano nakapokus sa pagpakitag gugma sa uban ug sa Diyos.​—Mat. 22:36-39. w17.07 23 ¶3

Gitratar sa Diyos ang iyang mga alagad uban ang dignidad ug pagtahod. Maatiman ta niya labaw pa sa atong pag-atiman sa atong kaugalingon. Si Jehova nahigugma sa iyang katawhan ingong grupo. Siya usab interesado kaayo sa matag indibiduwal. Pananglitan, sulod sa 300 ka tuig, si Jehova nagpadala ug nagtabang sa mga maghuhukom aron luwason ang nasod sa Israel gikan sa mga kaaway. Niadtong gubot nga panahon, namatikdan gihapon niya ang dili Israelinhong si Ruth. Si Ruth mihimog dakong sakripisyo aron mahimong magsisimba ni Jehova. Gipanalanginan siya ni Jehova ug bana ug anak nga lalaki. Pero dili kay kana ra. Inigkabanhaw niya, iyang mahibaloan nga ang iyang anak nahimong usa sa mga kaliwat sa Mesiyas. Ug hunahunaa kon unsa kaha siya ka malipayon inigkahibalo niya nga ang sugilanon sa iyang kinabuhi napreserbar sa basahon sa Bibliya nga nagdala sa iyang ngalan!​—Ruth 4:13; Mat. 1:5, 16. w17.06 28-29 ¶8-9

Niadtong 1970, ang usa ka brader nga si Peter, kinsa 19 anyos, bag-o pa lang nag-alagad sa Bethel sa Britain. Samtang namalaybalay, nakasangyaw siyag usa ka bangason nga edarang lalaki. Si Peter nangutana sa lalaki kon gusto ba niyang masabtan ang Bibliya. Ang lalaki medyo nakuratan ug miingon nga balay ni sa Hudiyong mga rabbi. Aron sulayan si Peter, ang rabbi nangutana, “Unya Dong, sa unsang pinulongan gisulat ang basahon sa Daniel?” Si Peter mitubag, “Naay bahin ana nga gisulat sa Aramaiko.” “Ang rabbi,” nahinumdom si Peter, “nasorpresa nga kabalo ko sa tubag​—pero mas nasorpresa ko! Nganong nahibalo ko niana? Pag-uli nako, akong gitan-aw ang Bantayanang Torre ug Pagmata! sa miaging mga bulan, ug nakakita kog artikulo nga naghisgot nga ang Daniel gisulat sa Aramaiko.” (Dan. 2:4; footnote sa NWT, 2013 nga Edisyon.) Oo, ang balaang espiritu makapahinumdom nato sa ato nang mga nabasa.​—Luc. 12:11, 12; 21:13-15. w17.06 13 ¶17

Ang laing kabalaka sagad motungha dihang moingon ang asawa, “Mabdos ko.” Sagad, ang ilang kalipay bahin sa ilang umaabot nga anak masagolag gamayng kabalaka bahin sa pagpadoktor panahon sa pagmabdos o human niana. Ug angay sab konsiderahon ang mga galastohan​—sa pagkakaron ug sa umaabot. Dugang pagpasibo ang kinahanglang himoon dihang manganak na. Ang panahon ug atensiyon sa inahan mahimong mapokus na sa pag-atiman sa bata. Daghang bana ang mibating gibalewala kay ang asawa nagkapuliki sa pag-atiman sa ilang anak. Sa laing bahin, ang amahan mag-abagag bag-ong responsabilidad. Mas modako ang iyang obligasyon kay naa nay bag-ong membro sa pamilya nga kinahanglang atimanon ug tagan-an. May lain pang kalisdanan ang pipila ka magtiayon. Nangandoy silag anak pero wala kini matuman. Kon ang asawa dili mamabdos, maguol tingali siya pag-ayo. w17.06 4 ¶1; 5 ¶5-6

Ingong mga Kristohanon, atong gimahal ug gipabilhan ang kamatuoran. Ang Pulong sa Diyos mao gayod ang tinubdan sa kamatuoran. Sa pag-ampo ni Jesus sa iyang Amahan, siya miingon: “Ang imong pulong maoy kamatuoran.” (Juan 17:17) Busa, ang gugma sa kamatuoran magsugod sa pagkuhag tukmang kahibalo sa Pulong sa Diyos. (Col. 1:10) Pero, labaw pa ang gikinahanglan kay sa pagkuha lag kahibalo. Matikdi kon sa unsang paagi ang inspiradong magsusulat sa Salmo 119 nagtabang nato sa pagsabot kon unsay kahulogan sa paghigugma sa kamatuoran sa Bibliya. (Sal. 119:97-100) Sa tibuok adlaw, kinahanglan tang mogahin ug panahon sa pagpamalandong, o paghunahuna pag-ayo, sa mga tekstong atong nabasa. Modako ang atong pagpabili sa kamatuoran kon atong pamalandongon ang mga benepisyo sa pagpadapat niini. Matilawan usab nato ang binase sa Bibliya nga lamiang espirituwal nga pagkaon nga atong madawat gikan sa organisasyon sa Diyos. Puwede nato kanang tagamtamon aron atong mahinumdoman ang “makapahimuot nga mga pulong” sa kamatuoran ug magamit kana sa pagtabang sa uban.​—Eccl. 12:10. w17.05 19-20 ¶11-12

Gusto natong tabangan ang mga tawo nga nag-antos, lakip na ang mga dili Saksi. (Luc. 10:33-37) Ang labing maayong paagi sa paghimo niana mao ang pagsangyaw kanila. “Importanteng pahibaloon dayon nato sila nga kita mga Saksi ni Jehova ug ang atong pangunang tuyo mao ang pagtabang nila sa espirituwal, dili sa materyal,” matod sa usa ka ansiyano nga daghan nag natabangang mga bakwet. “Kay kon dili, ang pipila makig-uban nato aron lang makabentaha.” Ang pagpakitag Kristohanong gugma ngadto sa “mga langyaw nga pumoluyo” dunay maayong mga resulta. (Sal. 146:9) Giasoy sa usa ka sister ang paghawa sa ilang pamilya sa Eritrea tungod sa paglutos. Ang iyang upat ka anak nakaabot sa Sudan human sa walo ka adlaw nga kapoyng biyahe latas sa desyerto. Siya miingon: “Gitratar sila sa mga igsoon didto nga samag suod nga mga paryente. Gitagan-an silag pagkaon, sinina, puy-anan ug transportasyon. May lain pa bang mopasakag mga estranyo sa ilang balay tungod lang kay pareho silag Diyos nga gisimba? Mga Saksi ni Jehova lang!”​—Juan 13:35. w17.05 7 ¶17, 19-20

“Ang usa ka tawo . . . may pulos ba alang sa Diyos, nga siya nga hait ug salabotan magmapuslanon alang kaniya? May kahimuot ba ang Labing Gamhanan nga ikaw matarong, o may makuhang kaayohan nga gihimo mo ang imong dalan nga walay-ikasaway?” (Job 22:1-3) Nakahunahuna ka na ba sukad kon unsay tubag sa mga pangutanang sama niana? Dihang gipangutana kana ni Elipaz nga Temanhon kang Job, seguradong nagtuo si Elipaz nga dili ang tubag niana. Ang iyang kauban, si Bildad nga Shuhanon, nakiglalis pa gani nga imposible nga mahimong matarong ang mga tawo atubangan sa Diyos. (Job 25:4) Kining bakak nga mga maghuhupay nangangkon nga walay pulos kang Jehova ang atong pagkamaunongon kaniya ug gilantaw lang ta sa Diyos nga samag insekto, ulod, o wati. (Job 4:19; 25:6) Gipadayag ni Jehova ang iyang panglantaw dihang iyang gibadlong si Elipaz, Bildad, ug Zopar sa pagsultig bakak pero nalipay siya kang Job, kinsa iyang gitawag nga “akong alagad.” (Job 42:7) Busa, ang usa ka tawo mahimo gayong ‘mapuslanon sa Diyos.’ w17.04 28 ¶1-2

Dugay na tang nagpuyo niining daang kalibotan, ug tingali wala na ta makamatikod sa grabeng stress nga nahatag niini kanato. Pananglitan, ang mga tawong nagpuyo duol sa estasyon sa tren basin dili na makamatikod sa kabanha sa tren, ug ang nagpuyo duol sa basurahan basin dili na makamatikod sa kabaho sa basura. Pero hunahunaa kon wala na ang dili maayong kahimtang​—pagkamakapahupay! Unsay mopuli sa stress nga atong gibati karon? Matikdi ang saad nga maoy teksto karong adlawa. Makapatandog kaayo kana, dili ba? Mao gyod nay gusto ni Jehova para nimo. Busa, buhata ang tanan aron makapabiling suod kang Jehova ug sa iyang organisasyon niining malisod nga kataposang mga adlaw! Pabilhi ang imong paglaom, pamalandonga kini, himoa kining buhi sa imong hunahuna ug kasingkasing​—ug kanunay kining isulti sa uban! (1 Tim. 4:15, 16; 1 Ped. 3:15) Pinaagi niana, makaseguro ka nga dili ka maapil dihang mawala na ang daang kalibotan. Hinunoa, magpabilin ka​—buhi ug malipayon—​hangtod sa kahangtoran! w17.04 13 ¶16-17

Nahibalo na ta niini nga kamatuoran, pero masulayan ta dihang kita mismo ang maapektohan sa pagkadili-hingpit sa usa ka igsoon. Sa maong situwasyon, ang ato bang panglantaw sa hustisya sama nianang kang Jehova? Pananglitan, unsay imong reaksiyon kon ang usa ka ansiyano dunay masulti nga daw nagpakitag diskriminasyon? Mapandol ka ba kon ang usa ka ansiyano wala tuyoang makasultig sakit nga mga pulong? Imbes mohinapos dayon nga dili na kuwalipikado ang maong brader nga mahimong ansiyano, mapailobon ka bang maghulat sa ulo sa kongregasyon nga si Jesus? Maningkamot ka ba sa pagpamalandong sa katibuk-ang kahimtang, tingali apil ang matinumanong pag-alagad sa maong brader sa daghang tuig? Kon ang brader nga nakasala nimo ansiyano gihapon o nakadawat ug dugang pribilehiyo, malipay ka ba? Ang imong pagkaandam mopasaylo nagpakita nga ang imong panglantaw sa hustisya sama nianang kang Jehova.​—Mat. 6:14, 15. w17.04 27 ¶18