Hunyo

Tungod sa gugma, si Jehova nagabadlong, nagatudlo, ug nagabansay nato aron magpabilin ta sa iyang gugma ug sa dalan sa kinabuhi. Pero usahay, dili lang tambag o pagbadlong ang apil sa pagdisiplina. Kon ang usa nakahimog seryosong sala, mahimong mawad-an siyag mga pribilehiyo sa kongregasyon. Bisag mahitabo nâ, ang maong disiplina nagpakita nga gihigugma ta sa Diyos. Pananglitan, ang pagkawala sa pribilehiyo makatabang sa usa nga masabtan ang kaimportante sa pagpokus sa personal nga pagtuon sa Bibliya, pagpamalandong, ug pag-ampo. Sa pagbuhat niana, molig-on siya sa espirituwal. (Sal. 19:7) Ngadtongadto, mahimong mahibalik ang iyang mga pribilehiyo. Bisan ang pag-disfellowship nagpakita sa gugma sa Diyos kay maproteksiyonan niini ang kongregasyon batok sa daotang impluwensiya. (1 Cor. 5:6, 7, 11) Kay husto pirme ang disiplina sa Diyos, masabtan sa na-disfellowship ang kaseryoso sa iyang sala ug kini magpalihok niya sa paghinulsol.​—Buh. 3:19. w18.03 24 ¶5-6

Ang magbalantay sa prisohan dili pamilyar sa Kasulatan. Busa, aron makabaton ug lig-ong pundasyon sa Kasulatan, kinahanglang mahibalo siya sa simpleng kamatuoran sa Bibliya, masabtan ang kahulogan sa pagkahimong alagad sa Diyos, ug maningkamot sa pagsunod sa gitudlo ni Jesus. Sa mubo lang nga panahon, ang iyang kahibalo sa simpleng kamatuoran sa Kasulatan ug ang iyang apresasyon niini nagpalihok niya sa pagpabawtismo. (Buh. 16:25-33) Seguradong padayon siyang nagkat-on human sa iyang bawtismo. Base sa maong asoy, unsay imong himoon kon ang imong anak kinasingkasing nang nakaapresyar sa simpleng kamatuoran sa Bibliya, apil ang kahulogan ug kaimportante sa dedikasyon ug bawtismo? Puwede nimong ingnon ang imong anak nga makig-estorya sa mga ansiyano kon kuwalipikado na ba siyang magpabawtismo. Sama sa ubang bawtismadong tinun-an, padayong mouswag ang iyang kahibalo sa katuyoan ni Jehova sa tibuok niyang kinabuhi, bisan hangtod sa kahangtoran.​—Roma 11:33, 34. w18.03 10 ¶8-9

Samtang maningkamot tang mouswag sa espirituwal, ang balaang espiritu motabang nato sa pagbag-o sa atong hunahuna. Sa tabang niini, ang atong panghunahuna anam-anam nga mahisama nianang kang Kristo. Dugang pa, motabang ni nato sa pagwagtang sa unodnong tinguha ug sa pag-ugmad sa mga hiyas nga makapalipay sa Diyos. Kon maghunahuna ta nga sama kang Kristo, kini mag-impluwensiya sa atong sinultihan, atong panggawi diha sa trabahoan o eskuylahan, ug mga desisyon adlaw-adlaw. Ipakita sa maong mga desisyon nga naningkamot ta sa pagsunod kang Kristo. Ingong mga tawong espirituwal, dili ta mohimog bisan unsa nga makadaot sa atong relasyon sa langitnong Amahan. Ang atong samag Kristong panghunahuna makatabang nato sa pagsukol sa mga tentasyon. Dihang modesisyon, atong pamalandongon kini: ‘Unsang mga prinsipyo sa Bibliya ang makatabang nako sa pagdesisyon? Unsa kahay buhaton ni Kristo niini nga situwasyon? Unsa nga desisyon ang makapalipay kang Jehova?’ w18.02 25 ¶12; 26 ¶14

Panahon sa lolo sa tuhod ni Noe nga si Enoc, ang mga tawo daotan na kaayo. Misulti gani silag “makalilisang nga mga butang” batok kang Jehova. (Jud. 14, 15) Nagkagrabe ang kapintasan. Gani, sa adlaw ni Noe, “ang yuta napuno sa kapintasan.” Ang daotang mga anghel nagsul-ob ug lawas sa tawo, nangasawa, ug nanganak ug bayolenteng mga higante. (Gen. 6:2-4, 11, 12) Pero lahi kaayo si Noe. “Siya walay-ikasaway taliwala sa iyang mga katalirongan. Si Noe naglakaw uban sa matuod nga Diyos.” (Gen. 6:9) Konsideraha ang gipakita niana bahin kang Noe. Una, si Noe naglakaw uban sa Diyos niadtong daotang kalibotan unâ pa sa Lunop, pero dili lang sa 70 o 80 ka tuig​—nga maoy gitas-on sa kinabuhi sa kadaghanan karon. Siya nabuhig 600 ka tuig niadtong kalibotana! (Gen. 7:11) Dili pareho nato karon, walay kongregasyon sa mga igsoon sa pagtuo​—lagmit wala poy igsoon sa unod—​nga misuportar niya sa espirituwal. w18.02 4 ¶4-5

Ang mga tawong mahigugmaon sa salapi gustog dugang kuwarta, ug kay mangamas pag-ayo aron makabaton niana, sila nakaagom ug “daghang kasakitan.” (1 Tim. 6:9, 10; Eccl. 5:10) Siyempre, kitang tanan nagkinahanglag kuwarta. Kini makapanalipod nato. (Eccl. 7:12) Apan magmalipayon ba ang usa kon ang iyang kuwarta igo lang sa iyang panginahanglan? Oo! (Eccl. 5:12) Si Agur nga anak ni Jakeh misulat: “Ayaw ako hatagi ug kakabos ni mga bahandi. Pakan-a ako sa pagkaon nga maoy gikinahanglan lamang alang kanako.” Masabtan dayon nato kon nganong dili niya gustong mahimong hilabihan ka pobre. Matod niya, dili niya gustong matental sa pagpangawat kay kana makapasipala sa Diyos. Pero nganong wala man siya mag-ampo nga madato? Siya misulat: “Tingali unya ako mabusog ug magalimod kanimo ug magaingon: ‘Kinsa ba si Jehova?’” (Prov. 30:8, 9) Si Jesus nag-ingon: “Walay usa nga mahimong ulipon sa duha ka agalon; kay mahimong dumtan niya ang usa ug higugmaon ang lain, o unongan niya ang usa ug tamayon ang lain. Dili kamo mahimong ulipon sa Diyos ug sa Bahandi.”​—Mat. 6:24. w18.01 24 ¶9-11

Mapalambo nato ang panaghiusa kon kita mapinasayloon. Kon atong pasayloon ang mga nakasala kanato, atong gipakita nga giapresyar nato ang kapasayloan sa atong mga sala pinaagi sa halad lukat ni Kristo. Tagda ang ilustrasyon ni Jesus diha sa Mateo 18:23-34. Pangutan-a ang kaugalingon: ‘Napalihok ba ko sa pagpadapat sa gitudlo ni Jesus? Mapailobon ug masinabtanon ba ko sa mga igsoon? Andam ba kong mopasaylo sa mga nakasala nako?’ Tinuod, lainlain ang gibug-aton sa sala, ug ang pipila ka sala lisod kaayong pasayloon sa dili hingpit nga tawo. Pero ang maong ilustrasyon nagtudlo nato kon unsay gidahom ni Jehova. Klarong giingon ni Jesus nga dili ta pasayloon ni Jehova kon dili nato pasayloon ang atong mga igsoon dihang may basehanan sa pagbuhat niana. Maayo gyod nang hunahunaon! Atong giprotektahan ug gipreserbar ang atong bililhong panaghiusa dihang pasayloon nato ang uban sumala sa gitudlo ni Jesus kanato. w18.01 15 ¶12

Bisag mameligro ang iyang kinabuhi, dili gusto ni Daniel nga maghunahuna ang mga tawo nga mihunong na siya sa pagsimba kang Jehova. Gipanalanginan ni Jehova ang kaisog ug pagkamaunongon ni Daniel pinaagi sa milagrosong pagluwas kaniya sa sakit nga kamatayon. Gani, nakahatag nig dakong pamatuod bahin kang Jehova nga nakaabot sa kinalay-ang bahin sa Imperyo sa Medo-Persia! (Dan. 6:25-27) Sa unsang paagi maugmad nato ang pagtuo nga sama nianang kang Daniel? Aron molig-on ang atong pagtuo, kinahanglan natong ‘masabtan ang diwa’ sa Pulong sa Diyos, dili lang basta basahon kini. (Mat. 13:23) Gusto natong mahibaloan ang hunahuna ni Jehova sa mga butang, nga naglakip sa pagsabot sa mga prinsipyo sa Bibliya. Busa, kinahanglan natong palandongon ang atong gibasa. Importante sab ang regular ug kinasingkasing nga pag-ampo, ilabina kon may mga pagsulay o ubang lisod nga situwasyon. Kon moampo ta alang sa kaalam ug kusog, ihatag nâ ni Jehova kanato.​—Sant. 1:5. w18.02 10-11 ¶13-15

Bisag batan-on ka nga bawtismadong alagad sa Diyos, matilawan nimo ang kaayo ni Jehova dihang masinati nimo ang iyang tabang samtang imong isulti ang imong pagtuo sa uban. Mahimo nimo nâ diha sa ministeryo ug sa eskuylahan. Ang pipila malisdan sa pagsangyaw sa ilang mga eskolmet. Lagmit makasabot ka kon ngano. Wala kay ideya kon unsay ilang reaksiyon. Mas lisod tingali kon makig-estorya ka sa usa ka grupo kay sa usa lang ka klasmet. Unsay makatabang nimo? Una, hunahunaa kon nganong kombinsido ka sa imong gituohan. Gihubad ba sa inyong pinulongan ang mga giya sa pagtuon diha sa jw.org? Kon dili ka segurado, gahinig panahon ang pagpangita niini. Gidisenyo kini aron makapamalandong ka sa imong gituohan, nganong gituohan nimo kana, ug kon unsaon kana pagpatin-aw ngadto sa uban. Kon ikaw kombinsido ug andam, mapalihok ka sa pagsangyaw bahin kang Jehova.​—Jer. 20:8, 9. w17.12 26 ¶12, 14-15

Dili igo ang pagtudlo sa mga bata bahin sa mga tawo ug hitabo diha sa Bibliya. Si Timoteo ‘nakombinsir nga motuo.’ Sa orihinal nga pinulongan, kana nga ekspresyon nagpasabot ug “pagkasegurado” o “pagkakombinsido nga tinuod ang usa ka butang.” Si Timoteo nahibalo sa Hebreohanong Kasulatan sukad pa sa pagkamasuso. Pero, sa ulahi, nakombinsir siya sa lig-ong ebidensiya nga si Jesus mao ang Mesiyas. Unsaon nimo pagtabang ang imong anak aron makombinsir siya nga motuo sama ni Timoteo? Una, magmapailobon. Nagkinahanglag panahon aron makombinsir ang usa. Dili pod nimo ni mapasa sa imong anak tungod lang kay nakombinsir ka nga motuo. Kinahanglang gamiton sa matag bata ang iyang “gahom sa pagpangatarongan” aron makombinsir sa kamatuoran sa Bibliya. (Roma 12:1) Ingong ginikanan, importante ang imong papel sa maong proseso, ilabina kon may mga pangutana ang imong anak. w17.12 19 ¶3, 5-6

Ang suod nga higala ug tinun-an ni Jesus nga si Marta naguol. Namatay ang igsoon niini nga si Lazaro. May makahupay kaha niya? Oo. Gipasaligan siya ni Jesus: “Mobangon ang imong igsoon.” (Juan 11:20-23) Segurado si Marta nga mahitabo kana sa umaabot. Dayon, mihimo si Jesus ug milagro. Gibanhaw niya si Lazaro, nianang adlawa mismo. Dili ta makadahom nga si Jesus o ang iyang Amahan mohimog sama niana nga milagro para nato karon. Apan sama kang Marta, kombinsido ka ba sa umaabot nga pagkabanhaw sa usa ka minahal? Tingali namatyan kag kapikas, inahan, amahan, o minahal nga apohan. O lagmit naguol ka sa kamatayon sa imong anak. Nangandoy kang magakos, makaestorya ang imong minahal ug makigkataw-anay uban niya. Makapalipay nga sama kang Marta, may katarongan kang moingon, ‘Nahibalo ko nga mabanhaw ang akong minahal.’ Bisan pa niana, maayong pamalandongon sa matag Kristohanon ang mga rason kon nganong kombinsido ta niana. w17.12 3 ¶1-2

Gimahal ni Jesus ang Moisesnong Balaod. Ug dili nâ katingalahan! Kana nga Balaod gikan sa labing importanteng Persona sa kinabuhi ni Jesus​—ang iyang Amahan, si Jehova. Ang lawom nga gugma ni Jesus sa balaod sa Diyos gitagna diha sa atong teksto karon. Sa pulong ug buhat, gipamatud-an ni Jesus nga ang Balaod sa Diyos hingpit, mapuslanon, ug seguradong matuman. (Mat. 5:17-19) Nan, seguradong nasakitan si Jesus dihang nakita niya ang mga eskriba ug Pariseo nga sayop nga nagpadapat sa Balaod sa iyang Amahan! Sila estriktong nagtuman bisan sa pipila sa kinagamyang detalye niini, kay si Jesus miingon: “Naghatag kamo sa ikapulo sa yerbabuyna ug sa eneldo ug sa cumino.” Busa, unsay problema? Siya midugang: “Apan wala kamo magtagad sa mas bug-at nga mga butang sa Balaod, nga mao, ang hustisya ug ang kaluoy ug ang pagkamatinumanon.” (Mat. 23:23) Dili sama niadtong nagpakamatarong sa kaugalingon nga mga Pariseo, nasabtan ni Jesus ang katuyoan sa Balaod ug kon unsay gitudlo niini maylabot sa mga hiyas sa Diyos. w17.11 13 ¶1-2

Ang pipila moingon tingali: “Kinahanglan natong pahimuslan ang kinabuhi. Daotan ba diay ang pagpakigsekso gawas sa kaminyoon?” Sayop ang panghunahuna nga dili daotan ang seksuwal nga imoralidad. Ngano? Tungod kay ang Pulong sa Diyos nagdili sa seksuwal nga imoralidad. (1 Tes. 4:4-8) Si Jehova may katungod sa paghimog mga balaod alang kanato kay siyay naglalang nato. Ang balaod sa Diyos nagtugot lang sa seksuwal nga relasyon tali sa lalaki ug babaye nga naminyo sa usag usa. Ang Diyos naghatag natog mga balaod kay nahigugma siya nato. Kana makahatag natog kaayohan. Ang mga pamilya nga motuman niana mahimong mas mahigugmaon, matinahoron, ug may kasegurohan. Silotan sa Diyos kadtong tinuyong mosupak sa iyang balaod. (Heb. 13:4) Ang Pulong sa Diyos nagtudlo kon unsaon nato paglikay sa seksuwal nga imoralidad. Ang usa ka paagi mao ang pagbantay kon unsay atong tan-awon. (Mat. 5:28, 29) Busa, likayan sa usa ka Kristohanon ang pagtan-awg pornograpiya o pagpamati sa musika nga may imoral nga liriko.​—Efe. 5:3-5. w17.11 22 ¶9-10

Dugay nang gigamit sa matinumanong mga alagad ni Jehova ang musika ingong paagi sa pagdayeg kaniya. Makapainteres nga dihang nagmatinumanon kang Jehova ang mga Israelinhon, ang pag-awit maoy importanteng bahin sa ilang pagsimba. Pananglitan, dihang giandam ni Haring David ang pag-alagad sa templo, iyang giorganisar ang 4,000 ka Levihanon sa pagdayeg kang Jehova pinaagig musika. Ang 288 niini mga “binansay sa awit alang kang Jehova, tanan mga batid.” (1 Cron. 23:5; 25:7) Sa inagurasyon sa templo, may importanteng papel ang musika ug pag-awit. Ang asoy nag-ingon: “Sa dihang ang mga tigtrompeta ug ang mga mag-aawit nagkahiusa sa pagpalanog ug usa ka tingog sa pagdayeg ug pagpasalamat kang Jehova, ug sa dihang ilang gipatugbaw ang tingog uban sa mga trompeta ug sa mga piyangpiyang ug sa mga tulonggon sa awit ug sa pagdayeg kang Jehova, . . . ang balay sa matuod nga Diyos napuno sa himaya ni Jehova.” Makapalig-on gyod sa pagtuo ang maong okasyon!​—2 Cron. 5:13, 14; 7:6. w17.11 4 ¶4-5

Si Jesus nahibalo nga ang iyang gipanudlo makapabahin sa mga tawo. Nahibalo sab siya nga gikinahanglan sa iyang mga sumusunod ang kaisog sa pagsagubang sa pagsupak. Tuyo ni Jesus ang pagtudlo sa kamatuoran bahin sa Diyos, dili ang pagbungkag ug relasyon. (Juan 18:37) Bisan pa niana, mahimong lisod ang pagtuman sa mga pagtulon-an ni Kristo kon may suod nga higala o membro sa pamilya nga dili modawat sa kamatuoran. Aron mapamatud-ang takos kang Kristo, kinahanglang antoson nila ang pagbugalbugal o bisan ang pagsalikway sa ilang pamilya. Apan, mas dako ang ilang madawat kay sa mawala kanila. (Mar. 10:29, 30) Bisag supak ang atong mga paryente sa atong pagsimba kang Jehova, padayon nato silang higugmaon. Pero angay natong hinumdoman nga kinahanglang unahon nato ang atong gugma sa Diyos ug kang Kristo. (Mat. 10:37) Hinumdoman sab nato nga mahimong gamiton ni Satanas ang atong gugma sa pamilya aron mobiya ta kang Jehova. w17.10 13 ¶3-6

Gipasiugda niini nga panan-awon nga dili tugotan ni Jehova ang bisan unsang matang sa pagkadaotan taliwala sa iyang katawhan. Seguroon niya nga masumpo ug mawagtang dayon kini. (1 Cor. 5:13) Gipasaligan kita niana sa anghel pinaagi sa pagtaklob dayon sa sudlanan. Seguradong nahupayan ang mga Israelinhon sa adlaw ni Zacarias niining maong panan-awon​—usa ka garantiya nga huptang hinlo ni Jehova ang pagsimba kaniya! Ang panan-awon nagpahinumdom usab sa mga Hudiyo sa ilang responsibilidad nga huptang hinlo ang ilang pagsimba. Ang pagkadaotan dili tugotang makasulod ug magpabilin taliwala sa katawhan ni Jehova. Human kita dad-a ngadto sa hinlong organisasyon sa Diyos diin kita gipanalipdan ug gimahal, atong responsibilidad nga huptan kanang hinlo. Naningkamot ba kita nga huptang hinlo ang atong “balay”? Ang bisan unsang pagkadaotan walay dapit diha sa atong espirituwal nga paraiso. w17.10 24 ¶14-15; 25 ¶17-18

Ang unang 39 ka basahon sa Bibliya gisulat sa mga Israelinhon, o mga Hudiyo. Sila ang katawhan nga unang ‘gipiyalan sa sagradong mga pahayag sa Diyos.’ (Roma 3:1, 2) Pero niadtong ika-300 B.C.E., daghang Hudiyo ang dili na makasabot ug Hebreohanon. Ngano? Daghang nasod ang gisakop sa Imperyo sa Gresya nga gipangunahan ni Alejandro nga Bantogan. (Dan. 8:5-7, 20, 21) Tungod niana, nahimong komon nga pinulongan ang Grego sa mga lugar nga sakop sa maong imperyo, lakip kadtong mga Hudiyo nga nagpuyo sa maong mga lugar. Kay daghan nang Hudiyo ang nagasultig Grego, maglisod na silag sabot sa Hebreohanong Kasulatan. Unsay solusyon? Ang paghubad sa Bibliya gikan sa Hebrew ngadto sa Greek, nga nahuman mga 200 B.C.E. Ang koleksiyon sa maong mga basahon sa Bibliya nailhan ingong Grego nga Septuagint. Kini ang unang sinulat nga hubad sa tibuok Hebreohanong Kasulatan. w17.09 20 ¶7-9

Hangyoon tingali ka sa imong amo nga mag-obertaym kada gabii o sa weekend​—mga panahon nga para unta sa pamilyahanong pagsimba, pagsangyaw, ug sa tigom. Gikinahanglan ang kaisog sa pagbalibad sa maong hangyo ug sa pagpakitag maayong panig-ingnan sa imong mga anak. Gipakita usab nato ang kaisog dihang tabangan nato ang atong mga anak sa paghimo ug pagkab-ot sa espirituwal nga mga tumong. Pananglitan, magduhaduha ang ubang ginikanan nga dasigon ang ilang mga anak sa pagpayunir, pag-alagad sa lugar nga nanginahanglag dugang magsasangyaw, pag-alagad sa Bethel, o sa pagboluntaryo sa mga konstruksiyon sa atong organisasyon. Lagmit mabalaka ang mga ginikanan nga basig dili sila maatiman sa ilang mga anak inigkatigulang nila. Pero ang maalamong ginikanan magpakitag kaisog ug magmasaligon sa mga saad ni Jehova. (Sal. 37:25) Ang laing paagi sa pagpakitag kaisog ug pagsalig kang Jehova mao ang pagtabang sa inyong mga anak nga ipakita usab ang maong mga hiyas.​—1 Sam. 1:27, 28; 2 Tim. 3:14, 15. w17.09 30 ¶14-15

Unsaon nimo pagtabang ang imong mga anak nga makapugong sa kaugalingon? Ang mga ginikanan nahibalo nga dili awtomatikong mapakita sa mga batan-on ang maong hiyas. Ug sama sa ubang hiyas nga angayng makat-onan sa mga bata, kinahanglang magpakitag maayong ehemplo ang mga ginikanan. (Efe. 6:4) Busa, kon naglisod ang inyong mga anak sa pagkontrol sa ilang kaugalingon, susiha kon maayo ba mong panig-ingnan kanila. Ayaw pakamenosa ang epekto sa inyong pagkamakugihon sa pagsangyaw, pagtambong ug tigom, ug pagdumala sa pamilyahanong pagsimba. Kon gikinahanglan, ayaw kahadlok nga mobalibad sa hangyo sa inyong mga anak! Si Jehova nagbutang ug limitasyon kang Adan ug Eva​—mga limitasyon nga nakatabang nila nga motahod sa iyang awtoridad. Sa susama, ang pagdisiplina ug panig-ingnan sa mga ginikanan magtudlo sa mga bata nga makapugong sa kaugalingon. Kinahanglan nimong itudlo sa imong mga anak ang gugma sa awtoridad sa Diyos ug pagtahod sa iyang mga sukdanan.​—Prov. 1:5, 7, 8. w17.09 7 ¶17

Samtang wala pa matapos ang kalibotan ni Satanas, makaeksperyensiya pa gihapon tag pagsulay​—sama sa kawalay trabaho, grabeng sakit, paglutos, kalamidad, pagkawala sa kabtangan tungod sa krimen, o ubang kalisdanan. Aron makatabang sa usag usa dihang mag-antos o magkalisod, kinahanglang naa tay tinuod nga pagkamabination. Ang pagkamabination magpalihok kanato nga magmaluloton [o, buhaton ang maayo]. (Efe. 4:32) Kini nga mga bahin sa bag-ong pagkatawo makatabang nato sa pagsundog sa Diyos ug sa paghupay sa uban. (2 Cor. 1:3, 4) Unsaon nato pagpakitag konsiderasyon sa mga langyaw o sa mga makaluluoy diha sa kongregasyon? Kinahanglan nato silang suoron ug ipakita kanila nga importanteng bahin sila sa kongregasyon. (1 Cor. 12:22) Dugang pa, aron ipakita ang pagkamabination sa mga langyaw, daghang Saksi ang nagtuon ug bag-ong pinulongan. (1 Cor. 9:23) Miresulta kinig daghang panalangin. w17.08 23-24 ¶7-9

Kitang tanan kinahanglang andam nga mohulat ug magmapailobon. Pero unsay makatabang nato sa pagbuhat niana? Pag-ampo alang sa espiritu sa Diyos. Hinumdomi nga ang pagpailob maoy bahin sa bunga sa espiritu. (Efe. 3:16; 6:18; 1 Tes. 5:17-19) Pag-ampo kang Jehova nga tabangan kang makalahutay nga mapailobon. Hinumdomi usab kon unsay nakatabang kang Abraham, Jose, ug David aron makahulat nga mapailobon sa katumanan sa mga saad ni Jehova. Kana mao ang ilang pagtuo kang Jehova ug pagsalig sa iyang pagpakiglabot kanila. Wala sila magpokus sa ilang kaugalingon ug sa ilang personal nga kaayohan. Samtang atong pamalandongon ang resulta sa ilang pagpailob, madasig sab ta sa pagpakitag pagkamapailobon. Busa, bisag makaatubang tag mga pagsulay ug kalisdanan, determinado tang magpakitag “mahulatong tinamdan.” Oo, usahay makatuaw ta: “Hangtod kanus-a, Oh Jehova?” (Isa. 6:11) Pero sa tabang sa makapalig-ong gahom sa balaang espiritu sa Diyos, atong mahimo ang mga pulong ni Jeremias nga maoy teksto karong adlawa. w17.08 7 ¶18-20

Sa bata pa, si Jesus seguradong nagdula ug naglingawlingaw. Ang Pulong sa Diyos nag-ingon nga may “panahon sa pagkatawa . . . ug panahon sa paglukso [o, pagsayaw].” (Eccl. 3:4) Nakigsuod sab si Jesus sa Diyos pinaagi sa pagtuon sa Kasulatan. Dihang 12 anyos siya, ang mga magtutudlo sa templo nakadayeg sa “iyang pagsabot ug sa iyang mga tubag” bahin sa espirituwal nga mga butang. (Luc. 2:42, 46, 47) Malipayon gihapon si Jesus pagkadako na niya. Unsay nakapalipay niya? Nahibalo siya nga gusto sa Diyos nga iyang ‘ipahayag ang maayong balita ngadto sa mga kabos . . . ug ipasig-uli ang panan-aw sa mga buta.’ (Luc. 4:18) Nakapalipay niya ang pagsunod sa gisugo sa Diyos kaniya. Malipay siyang motudlo sa uban bahin sa iyang langitnong Amahan. (Luc. 10:21) Kas-a, human niya tudloi ang usa ka babaye bahin sa tinuod nga pagsimba, giingnan ni Jesus ang iyang mga tinun-an: “Ang akong pagkaon mao ang pagbuhat sa kabubut-on niya nga nagpadala kanako ug ang paghuman sa iyang buluhaton.” (Juan 4:31-34) Nakapalipay kang Jesus ang pagpakitag gugma sa uban ug sa Diyos. Makapalipay pod nâ nimo. w17.07 23 ¶4-5

Ang pagkamabination ni Jehova hingpit nga makita diha sa gisulti ug gibuhat sa iyang mabinationg Anak, si Jesus, dihang dinhi pa kini sa yuta. (Juan 5:19) Si Jesus gipadala aron sa paghupay sa “gun-ob nga kasingkasing” ug “sa tanang nagbangotan.” (Isa. 61:1, 2; Luc. 4:17-21) Busa, siya nailhan sa iyang pagkamaluluy-on​—ang mabinationg pagkahibalo sa pag-antos sa katawhan ug kinasingkasing nga tinguha sa paghupay kanila. (Heb. 2:17) Ang Bibliya nagpasalig kanato nga “si Jesu-Kristo mao sa gihapon kagahapon ug karon, ug hangtod sa kahangtoran.” (Heb. 13:8) Kay “ang Pangulong Ahente sa kinabuhi” nakasabot man sa pagbati sa namatyan, “siya makaarang sa pagtabang kanila nga ginasulayan.” (Buh. 3:15; Heb. 2:10, 18) Si Kristo padayong matandog sa kasakitan sa uban, makasabot sa ilang kaguol, ug makataganag paghupay “sa hustong panahon.”​—Heb. 4:15, 16. w17.07 13 ¶6-7; 14 ¶10

Si Satanas ug ang iyang kalibotan kanunayng naningkamot sa pagpaluya o pagdaot sa atong apresasyon sa espirituwal nga bahandi nga gihatag ni Jehova kanato. Posible tang madala sa iyang mga taktika. Mahimong mahaylo ta sa dakog suweldong trabaho, luho nga pagkinabuhi, o sa pagpasundayag sa atong mga bahandi. Si apostol Juan nagpasidaan kanato nga kining kalibotana ug ang mga tinguha niini mahanaw ra. (1 Juan 2:15-17) Busa, kinahanglan tang maningkamot nga maprotektahan ang atong gugma ug apresasyon sa espirituwal nga bahandi. Magmaandam nga biyaan ang bisan unsa nga mosapaw sa imong gugma sa Gingharian. Padayon sa pagsangyaw nga madasigon, ug ayaw wad-a ang imong apresasyon sa nagaluwas ug kinabuhing ministeryo. Paningkamot sa pagpangitag mga kamatuoran gikan sa Diyos. Samtang gibuhat nimo kana, nagatigom kag ‘bahandi sa mga langit, nga dili duolon sa kawatan ni ut-oton sa tangkob.’​—Luc. 12:33. w17.06 13 ¶19-20

Ang pagmando ni Jehova dili madaogdaogon ni sobra ka estrikto. Naghatag kinig kagawasan ug kalipay. (2 Cor. 3:17) Gipahayag kana ni David niining paagiha: “Ang dignidad ug kahalangdon [sa Diyos] anaa sa atubangan niya, ang kusog ug kalipay anaa sa iyang dapit.” (1 Cron. 16:7, 27) Sa susama, ang salmistang si Etan misulat: “Malipayon ang katawhan nga nakaila sa singgit sa kalipay. Oh Jehova, sa kahayag sa imong nawong sila nagpadayon sa paglakaw. Sa imong ngalan nagakalipay sila sa tibuok nga adlaw ug sa imong pagkamatarong sila ginabayaw.” (Sal. 89:15, 16) Ang kanunayng pagpamalandong sa pagkamaayo ni Jehova mas makapakombinsir kanato nga kinamaayohan ang iyang pagmando. Tinuod gayod kana! Ingong atong mahigugmaong Tigdisenyo ug Maglalalang, nahibalo gyod si Jehova kon unsay atong gikinahanglan aron tinuod nga magmalipayon, ug dagaya niyang gitagana kana. Ang tanan niyang sugo makaayo ug makapalipay pag-ayo kanato. Tinuod kini bisag nagkinahanglag sakripisyo ang pagsunod niana.​—Isa. 48:17. w17.06 29 ¶10-11

Tagda ang kahimtang sa usa ka sister sa England nga gusto gyong manganak, pero wala kana matuman. Dayon miabot ang panahon nga dili na gyod siya puwedeng manganak. Giangkon niya nga nahugno gyod siya, kay naamgohan niya nga ang iyang pangandoy dili mahitabo niining sistemaha sa mga butang. Sila sa iyang bana midesisyon sa pagsagop ug bata. Bisan pa niana, siya miingon: “Naguol gihapon ko. Nahibalo ko nga ang pagpanagop lahi ra kay sa ako mismo ang nanganak.” Tinuod, ang Bibliya nag-ingon nga ang Kristohanong babaye ‘giampingang luwas pinaagi sa pagpanganak.’ (1 Tim. 2:15) Apan wala kini magpasabot nga ang pagpanganak o pagbatog mga anak moresultag kinabuhing walay kataposan. Hinunoa, nagpasabot kini nga ang usa ka babaye nga nag-atiman sa mga anak, lakip sa ubang buluhaton sa panimalay, lagmit makalikay sa pagkahimong tsismosa ug hilabtanon sa kinabuhi sa uban.​—1 Tim. 5:13. w17.06 5-6 ¶6-8

Gipasiugda ba ni Elihu nga walay pulos ang atong mga paningkamot sa pag-alagad sa Diyos? Wala. Siya miingon nga wala magdepende si Jehova sa atong pagsimba. Walay kulang kang Jehova. Dili nato siya mahimong mas dato o mas kusgan. Sa laing bahin, gikan sa Diyos ang atong pagkamaayo, talento, o kusog, ug nakita niya kon giunsa nato kini paggamit. Giisip ni Jehova ang atong pagpakitag maunongong gugma sa iyang mga alagad nga samag siya mismo ang atong gipakitaan niini. Ang Proverbio 19:17 nag-ingon: “Siya nga nagapakitag kaluoy sa timawa nagapahulam kang Jehova, ug Siya magabayad kaniya sa iyang gibuhat.” Gipasiugda ba niining tekstoha nga nakita ni Jehova ang atong matag maayong buhat ngadto sa mga kabos? Makaingon ba ta nga ang Maglalalang sa uniberso mobating utangan siya sa mga tawo nga nagpakitag kaluoy sa mga kabos, ug isipon niya kana ingong utang nga iyang bayrag pabor ug panalangin? Oo, ug gipamatud-an kana sa bugtong Anak sa Diyos.​—Luc. 14:13, 14. w17.04 29 ¶3-4

Gawas sa pagbasa sa Bibliya ug sa atong mga publikasyon, unsa pay laing paagi nga mapalalom nato ang atong gugma sa kamatuoran? Mapalalom nato kana pinaagi sa regular nga pagtambong sa mga tigom. Ang senemanang pagtuon sa Bibliya gamit ang Bantayanang Torre maoy pangunang paagi nga kita matudloan. Aron masabtan ang topiko nga hisgotan, kinahanglan tang mangandam pag-ayo alang sa matag Pagtuon sa Bantayanang Torre. Ang usa ka paagi sa pagpangandam mao ang pagbasa sa matag teksto nga gisitar. Karon, ang Bantayanang Torre ma-download gikan sa jw.org nga website o makita sa JW Library app sa daghang pinulongan. Sa pipila ka electronic format niini, ato dayong makita ang gisitar nga mga teksto sa matag tun-anang artikulo. Pero bisag unsa pay atong paagi sa pagtuon, ang pagbasa ug pagpamalandong niining mga tekstoha magpalalom sa atong gugma sa kamatuoran. w17.05 20 ¶14

Human sa bawtismo, gusto natong magpadayon sa pagkinabuhi sumala sa atong pahinungod pinaagi sa matinumanong pag-alagad sa Diyos. Dili na puwedeng bawion ang pahinungod, nga bakwion kon unsay atong gisaad sa Diyos. Kon ang usa ka tawo moundang sa pag-alagad kang Jehova o sa pagkinabuhi sa Kristohanong paagi, dili siya makapangangkon nga dili tinuod ang iyang pahinungod ug nga ang iyang bawtismo dili balido. Kon buot hunahunaon, gipresentar niya ang iyang kaugalingon ingong usa nga bug-os napahinungod sa Diyos. Manubag siya kang Jehova ug sa kongregasyon kon makahimo siyag seryosong mga sala. Hinaot dili ta mahisama niadtong giingon ni Jesus: “Imong gibiyaan ang gugma nga imong nabatonan sa sinugdan.” Hinuon, gusto natong moingon si Jesus bahin kanato: “Nahibalo ako sa imong mga buhat, ug sa imong gugma ug pagtuo ug ministeryo ug paglahutay, ug nga ang imong ulahing mga buhat mas labaw pa kay sa mga nahauna.” (Pin. 2:4, 19) Hinaot magmadasigon ta sa pagkinabuhi sumala sa atong pahinungod aron malipay si Jehova. w17.04 6-7 ¶12-13

“Dili ba mobuhat ang Maghuhukom sa tibuok yuta sa kon unsay matarong?” (Gen. 18:25) Pinaagi nianang pangutanaha, gipahayag ni Abraham ang iyang pagsalig nga ipakita ni Jehova ang Iyang hingpit nga hustisya labot sa Sodoma ug Gomora. Kombinsido si Abraham nga si Jehova dili gyod mohimog inhustisya pinaagi “sa pagpatay sa tawong matarong uban sa usa nga daotan.” Para kang Abraham, “halayo ra” kanang mahitabo. Kombinsido siya kay si Jehova ang kinalabwang ehemplo sa hustisya ug pagkamatarong. Gani, ang Hebreohanong pulong nga gihubad ug “hustisya” ug “pagkamatarong” sagad magkauban diha sa Hebreohanong Kasulatan. Sa pagkatinuod, parehas rag kahulogan kining duha ka pulong. Busa, kay si Jehova man ang nagtakdag sukdanan sa pagkamatarong, ang iyang panglantaw kanunayng husto. Dugang pa, sumala sa iyang Pulong, “siya nahigugma sa pagkamatarong ug sa hustisya.”​—Sal. 33:5. w17.04 18 ¶1-2

Mga ginikanan, importante ang inyong panig-ingnan aron mosugod ang inyong mga anak pagsubay sa dalan paingon sa kinabuhing walay kataposan. Kon makita sa inyong mga anak nga inyong ‘gipangita pag-una ang Gingharian,’ makakat-on sila sa pagsalig kang Jehova bahin sa ilang matag adlawng panginahanglan. (Mat. 6:33, 34) Busa, pagkinabuhing simple. Unaha ang espirituwal nga mga butang imbes ang materyal. Kon mahimo, ayawg pangutang. Pangitaa ang “bahandi sa langit”​—ang pabor ni Jehova—​ug dili ang kuwarta o “himaya sa mga tawo.” (Mar. 10:21, 22; Juan 12:43) Gahini gyod ug panahon ang inyong mga anak. Sultii sila nga malipay kaayo mo kon unahon nila si Jehova imbes mangagpas ug kadungganan o bahandi​—alang kanila o kaninyo. Likayi ang dili Kristohanong panghunahuna nga obligasyon sa mga anak nga tagan-an ang ginikanan ug haruhayng kinabuhi. Hinumdomi, “ang mga anak dili angay nga magtagana alang sa ilang mga ginikanan, kondili ang mga ginikanan alang sa ilang mga anak.”​—2 Cor. 12:14. w17.05 8-9 ¶3-4