Agosto

Aron mahimong maayong magtutudlo, kinahanglang mahimo unâ tang maayong estudyante. (1 Tim. 4:15, 16) Sa susama, kadtong gihatagan ni Jehova ug awtoridad sa pagdisiplina kinahanglang andam ug padayong magpagiya kaniya. Kon magpaubos, sila tahoron ug may kagawasan sa pagsulti dihang magbansay o magbadlong sa uban. Konsideraha ang ehemplo ni Jesus. Si Jesus nagmatinumanon sa iyang Amahan, bisan dihang lisod kaayo ang pagbuhat niana. Ug giila niya nga ang iyang gitudlo ug kaalam gikan sa iyang Amahan. (Juan 5:19, 30) Ang pagkamapainubsanon ug pagkamatinumanon ni Jesus nakapasuod sa matinud-anong mga tawo kaniya ug nakatabang nga mahimo siyang mabination ug buotang magtutudlo. (Mat. 11:29) Ang iyang maayong mga pulong nakapadasig niadtong mga tawo nga samag nabun-og nga tangbo o pabilong hapit nang mapalong. (Mat. 12:20) Bisan dihang gisulayan ang iyang pailob, si Jesus nagpakitag kaayo ug gugma. Makita ni dihang gibadlong niya ang iyang mga apostoles tungod sa ilang hakog, ambisyosong espiritu.​—Mar. 9:33-37; Luc. 22:24-27. w18.03 26 ¶15-16

Gitumong ni Pedro dinhi ang pagtukod ni Noe sa arka. Ang arka mao ang makitang pamatuod nga debotado si Noe sa pagbuhat sa kabubut-on sa Diyos. Matinumanong gituman ni Noe ang gipahimo ni Jehova kaniya. Oo, ang makita nga mga buhat sa pagtuo miresulta sa kaluwasan ni Noe ug sa iyang pamilya panahon sa Lunop. Ang arka maoy pamatuod sa pagtuo ni Noe. Sa susama, ang bawtismo atubangan sa publiko maoy makitang pamatuod. Gipakita niana nga gipahinungod sa usa ka Kristohanong tinun-an ang iyang kaugalingon kang Jehova base sa pagtuo sa Kristo. Sama kang Noe, ang dedikadong mga tinun-an motuman sa gipahimo sa Diyos kanila. Ingon nga si Noe naluwas sa Lunop, ang maunongong mga bawtismado maluwas dihang laglagon na kining daotang kalibotan. (Mar. 13:10; Pin. 7:9, 10) Tungod niini, importante kaayo ang dedikasyon ug bawtismo. Ang tawong maglangaylangay sa pagpabawtismo mameligrong mawad-an sa kahigayonan nga mabuhi sa walay kataposan. w18.03 4 ¶3-4

Moingon tingali ang pipila ka ginikanan, ‘Kon dili bawtismado akong anak, dili siya ma-disfellow.’ Nganong sayop nâ nga pangatarongan? (Sant. 1:22) Siyempre, dili gusto sa mga ginikanan nga mabawtismohan ang ilang anak kon dili pa ni hamtong sa paghimog balidong dedikasyon. Pero, sayop ang paghunahuna nga ang dili bawtismadong anak dili manubag kang Jehova. Ngano? Kay may tulubagon ta kang Jehova bawtismado man o dili. Ang bata may tulubagon sa Diyos dihang mahibaloan niya kon unsay husto ug sayop sa panan-aw ni Jehova. (Sant. 4:17) Busa, imbes ingnon ang anak nga dili usâ magpabawtismo, ang maalamong ginikanan maningkamot sa pagpakitag maayong panig-ingnan. Gusto nilang tudloan ang ilang anak sukad sa pagkamasuso nga apresyahon ang taas nga sukdanan ni Jehova sa moralidad. (Luc. 6:40) Ang maong apresasyon mao ang kinamaayohang proteksiyon, kay ang imong anak mapalihok sa pagsubay sa matarong nga dalan ni Jehova.​—Isa. 35:8. w18.03 11 ¶12-13

Padayon kanang gihimo ni Noe 350 ka tuig human sa Lunop. (Gen. 9:28) Pagkamaayong ehemplo sa pagtuo ug pagkamatinumanon! Masundog nato ang pagtuo ug pagkamatinumanon ni Noe pinaagi sa pagpaluyo sa pagkamatarong sa Diyos, pagbulag sa kalibotan ni Satanas, ug pag-una kanunay sa buluhaton sa Gingharian. (Mat. 6:33; Juan 15:19) Sa paghimo niana, seguradong dili malipay nato ang kalibotan. Gani, bisan karon, gisaway ta sa media diha sa pipila ka nasod kay gisunod gyod nato ang mga sugo sa Diyos, sama nianang bahin sa kaminyoon ug moralidad. (Mal. 3:17, 18) Pero sama kang Noe, kita mahinadlokon kang Jehova, dili sa mga tawo. Nahibalo ta nga siya ray makahatag ug kinabuhing walay kataposan. (Luc. 12:4, 5) Komosta sa imong bahin? Magpadayon ka ba ‘sa paglakaw uban sa Diyos’ bisag bugalbugalan o sawayon? Mosalig ba gihapon ka sa Magtatagana dihang magkalisodlisod? Kon imong sundogon ang pagtuo ug pagkamatinumanon ni Noe, makasalig ka nga atimanon ka ni Jehova.​—Filip. 4:6, 7. w18.02 4 ¶4, 8; 5 ¶9-10

Ang kalibotan nagpokus sa unodnong mga tinguha. Gihubit kana ni Pablo ingong “espiritu nga nagalihok karon diha sa mga anak sa pagkadili-masinugtanon.” (Efe. 2:2) Kana nga espiritu nag-impluwensiya sa kadaghanan nga mosunod sa ginahimo sa mga tawo sa ilang palibot. Tungod niana, gibuhat sa kadaghanan nila ang gibati nilang husto ug wala sila maningkamot sa pagsunod sa sukdanan sa Diyos. Sagad ang pisikal nga tawo maghunahuna nga ang posisyon, kuwarta, o personal nga katungod mao ang labing hinungdanon. Lain pa, ang tawong pisikal naghimo sa “mga buhat sa unod.” (Gal. 5:19-21) Apil sa unodnong panghunahuna ang: pagpahinabog pagkabahinbahin, pagdapigdapig, paglalisay, pagkihaay, pagkawalay apresasyon sa pagkaulo, ug pagpatuyang sa pagkaon ug pag-inom. Dihang tentalon, ang unodnong tawo maluya ug mokompromiso.​—Prov. 7:21, 22. w18.02 19 ¶3-5

Dili sayop ang balanseng panglantaw sa kalipayan. Dili gusto ni Jehova nga dumilian nato ang tanang kalipayan o likayan ang maayong kalihokan nga makahatag ug kalipay. Ang Bibliya nag-awhag sa mga matinumanon: “Lakaw, kan-a ang imong pagkaon uban ang pagmaya ug imna ang imong bino uban ang usa ka maayong kasingkasing.” (Eccl. 9:7) Ang 2 Timoteo 3:4 nagtumong sa pagpangagpas sa kalipayan nga wala nay paghunahuna sa Diyos. Matikdi nga ang teksto wala mag-ingon nga mas higugmaon sa mga tawo ang kalipayan kay sa Diyos, kay magpasabot kana nga nahigugma pod sila sa Diyos. Kini nag-ingong ‘inay sa Diyos.’ Usa ka eskolar misulat: “Kini [nga teksto] wala magpasabot nga nahigugma pod sila sa Diyos. Kini nagpasabot nga wala gyod sila mahigugma sa Diyos.” Seryosong pasidaan kini niadtong mahigugmaon sa kalipayan! Ang ekspresyong “mga mahigugmaon sa kalipayan” haom nga nagtumong niadtong “nalinga sa . . . mga kalipayan niining kinabuhia.”​—Luc. 8:14. w18.01 25 ¶14-15

Si Jehova mahinatagong Diyos. Gikan kaniya ang tanan natong nabatonan. Siya ang tag-iya sa tanang bulawan, plata, ug ubang bililhong butang sa yuta, ug gigamit niya kini aron mahimong posible ang kinabuhi dinhi sa yuta. (Sal. 104:13-15; Hag. 2:8) Sulod sa 40 ka tuig, gitagan-an ni Jehova ang nasod sa Israel ug mana ug tubig samtang didto sila sa kamingawan. (Ex. 16:35; Neh. 9:20, 21) Pinaagi kang propetang Eliseo, milagrosong gipadaghan ni Jehova ang diyutayng lana sa matinumanong babayeng balo. Ang maong regalo gikan sa Diyos nakatabang niya nga mabayran ang iyang utang ug human niana, may igo pa siyang kuwarta para niya ug sa iyang mga anak aron sila mabuhi. (2 Hari 4:1-7) Sa tabang ni Jehova, milagrosong nakatagana si Jesus ug pagkaon ug bisan kuwarta dihang gikinahanglan. (Mat. 15:35-38; 17:27 ) Puwedeng gamiton ni Jehova ang tanan niyang bililhong butang aron suportahan ang iyang yutan-ong mga linalang. Bisan pa niana, gidasig gihapon niya ang iyang mga alagad nga gamiton ang ilang materyal nga mga butang sa pagsuportar sa buluhaton sa iyang organisasyon.​—Ex. 36:3-7. w18.01 17-18 ¶1-3

Gipakita sa Bibliya nga ang matinumanong mga alagad kaniadto sagad mobati nga dili na sila makalahutay. (Job 7:7) Pero, imbes mosurender, sila nangayog kusog kang Jehova. Wala sila pakyasa, kay ang atong Diyos “naghatag ug gahom sa gikapoy.” (Isa. 40:29) Ikasubo, gibati sa pipila ka alagad sa Diyos karon nga aron maantos nila ang mga problema ‘mopahulay unâ sila sa pag-alagad,’ nga daw kabug-at ang pag-alagad imbes panalangin. Busa, mohunong sila sa pagbasa sa Pulong sa Diyos, pagtambong sa mga tigom, ug pagsangyaw​—nga mao gyoy gilaoman ni Satanas nga ilang buhaton. Nahibalo ang Yawa nga kon aktibo ta sa pag-alagad, kita mas molig-on, ug dili niya gustong mahitabo kana. Busa, kon kapoyon ka ug maguol, ayawg pahilayo kang Jehova. Pakigsuod pag-ayo kaniya, kay ‘siya magpalig-on kanimo, siya magpakusgan kanimo.’​—1 Ped. 5:10; Sant. 4:8. w18.01 7-8 ¶2-3

Ang ikaduhang pagkabanhaw nga narekord sa Bibliya gihimo ni propetang si Eliseo. Usa ka prominenteng babaye nga Israelinhon sa Sunem nga walay anak ang maabiabihon kaayo kang Eliseo. Pinaagi sa propeta, gigantihan sa Diyos ug anak ang maong babaye ug ang tigulang nang bana niini. Pipila ka tuig sa ulahi, ang bata namatay. Hunahunaa ang grabeng kaguol sa inahan. Sa pagtugot sa iyang bana, ang babaye mibiyaheg 30 kilometros ngadto kang Eliseo sa Bukid sa Carmelo. Gisugo sa propeta ang iyang tig-alagad nga si Gehazi nga mag-una sa Sunem. Wala mabanhaw ni Gehazi ang bata. Dayon miabot ang naguol nga inahan ug si Eliseo. (2 Hari 4:8-31) Si Eliseo misulod sa balay diin didto ang patayng lawas, ug siya miampo. Pinaagig milagro, ang patayng bata nabuhi ug nakauban ang iyang nalipayng inahan! (2 Hari 4:32-37) Klaro, pinaagi sa literal nga pagbanhaw sa bata sa Sunem, gipamatud-an sa Diyos ang Iyang katakos sa pagbanhaw. w17.12 4-5 ¶7-8

Klaro nga ang kaalam​—ang kaatbang sa kabuangan—​maoy pamatuod sa pagkahamtong. Ang pagkahamtong sa espirituwal wala lang magdepende sa edad kondili sa pagkahadlok kang Jehova ug sa pagkaandam mosunod sa iyang mga sugo. (Sal. 111:10) Ang mga batan-on nga makonsiderar nga hamtong sa espirituwal dili ‘matuyatuya sa mga balod ug madala ngadto-nganhi’ sa ilang mga tinguha o sa presyur sa ubang batan-on. (Efe. 4:14) Hinunoa, sila miuswag sa ‘pagbansay sa ilang mga gahom sa pagsabot aron sa pag-ila sa maayo ug sa daotan.’ (Heb. 5:14) Ilang gipakita nga miuswag sila sa pagkahamtong pinaagi sa paghimog maalamong mga desisyon. Kana nga kaalam ang gikinahanglan para sa kaluwasan. (Prov. 24:14) Busa, paneguroa nga klaro nimong isulti ang imong binase sa Bibliyang mga prinsipyo ngadto sa imong mga anak. Pinaagi sa pulong ug ehemplo, ipakita nga ang mga prinsipyo sa Bibliya mao sab ang imong gisunod.​—Roma 2:21-23. w17.12 20-21 ¶12-13

May ideya nga masulbad sa mga tawo ang iyang mga problema. Daghan ang nadani niining ideyaha. Ngano? Kay kon tinuod kini, wala na kinahanglana sa tawo ang giya sa Diyos ug puwede niyang buhaton bisag unsay iyang gusto. Makapadani usab kini kay​—sumala sa pipila ka pagtuon—​namenosan ang gubat, krimen, sakit, ug kapobre. Usa ka report nag-ingon: “Miarang-arang ang kahimtang sa tawo kay naningkamot siya sa paghimo sa kalibotan nga mas maayong puy-an.” Kon makadungog kag kalibotanong ideya nga morag magsulay sa imong pagtuo, susiha kon unsay giingon sa Pulong sa Diyos bahin niana ug hisgoti kana uban sa hamtong nga igsoon. Hunahunaa kon nganong morag makadani ang maong ideya, kon nganong sayop kana, ug kon unsaon kana pagsalikway. Sa pagkatinuod, mapanalipdan nato ang atong kaugalingon batok sa kalibotanong panghunahuna pinaagi sa pagsunod sa tambag ni Pablo diha sa atong teksto karon. w17.11 24 ¶14, 17

Nganong dili man gustong magpakitag kaluoy ang mga Pariseo? Ang Bibliya nag-ingon nga sila “nag-isip sa uban ingon nga walay pulos.” (Luc. 18:9-14) Sundoga si Jehova, dili ang mga Pariseo. Ipakita ang kaluoy. (Col. 3:13) Ang usa ka paagi nga mahimo kana mao ang pagpasaylo dayon niadtong nangayog pasaylo kanimo. (Luc. 17:3, 4) Pangutan-a ang kaugalingon: ‘Dali ra ba kong makapasaylo sa uban, bisan niadtong balikbalik nga nakasala nako? Naningkamot ba kong makig-uli niadtong nakasala o nakapasakit nako?’ Pinaagi sa pagpasaylo, masulayan ang atong pagkamapainubsanon. Napakyas ang mga Pariseo niana nga pagsulay kay giisip nilang ubos ang uban. Apan, ingong mga Kristohanon, kita “magaisip nga ang uban labaw” kanato, nga angayan sa atong pagpasaylo. (Filip. 2:3) Sundogon ba nimo si Jehova ug magmapainubsanon? Himoa ang imong pagkamapinasayloon nga samag “dalan” nga sayon ug daling agian. Ipakita dayon ang kaluoy ug magmahinay sa kasuko.​—Eccl. 7:8, 9. w17.11 14-15 ¶6-8

Basig maulaw ka kon ikomparar nimo ang imong tingog sa uban. Bisan pa niana, dili kana angayng mobabag sa imong responsibilidad sa pag-awit ug mga pagdayeg kang Jehova. Hinuon, ipataas ang imong songbook, ayawg iduko ang ulo, ug kanta nga kinasingkasing! (Esd. 3:11) Sa daghang Kingdom Hall karon, ang liriko sa awit makita diha sa eskrin. Makatabang kini aron makakanta tag kusog. Makapainteres sab nga ang pagkanta sa mga awit sa Gingharian giapil sa leksiyon sa Kingdom Ministry School para sa mga ansiyano. Gipasiugda niini nga angayng manguna ang mga ansiyano sa pag-awit diha sa kongregasyon. Daghan ang mahadlok moawit ug kusog kay basig mayabag ang ilang tingog. Pero, angay natong hinumdoman nga dihang mosulti ta, “kitang tanan mangapandol sa makadaghan.” (Sant. 3:2) Bisan pa niana, wala kini magpasabot nga dili na ta makig-estorya. Busa dili nato tugotan nga pugngan ta sa atong dili hingpit nga tingog sa pagdayeg kang Jehova pinaagig awit. w17.11 4-5 ¶9-10

Dihang natapos ang ikapitong panan-awon ni Zacarias, daghan ang kinahanglan niyang hunahunaon. Gigarantiya ni Jehova nga ang mga dili matinud-anon manubag sa ilang pagkadaotan. Kini nga panaad seguradong nakapalig-on kang Zacarias. Galing lang, wala pa gyoy nausab. Daghan gihapon ang dili matinud-anon ug naghimog pagkadaotan. Wala pod mahuman ang pagtukod pag-usab sa templo sa Jerusalem. Nganong gibiyaan dayon sa mga Hudiyo ang buluhaton nga gisugo sa Diyos kanila? Nanguli lang ba sila aron unahon ang ilang kaayohan? Nahibalo si Jehova kon unsay gikinahanglan sa iyang katawhan. Ang Diyos naghatag kang Zacarias ug kataposang panan-awon aron pasaligan ang mga Hudiyo sa Iyang gugma ug apresasyon sa ila nang nahimo ug nagsaad nga proteksiyonan sila kon mobalik sila sa pagtukod. Kon bahin sa pagtukod pag-usab sa templo, si Jehova nagsaad​—ang giingon sa teksto karong adlawa. w17.10 26 ¶1; 27 ¶5

Panalangin gyod sa kongregasyon ang mga brader nga andam modawat ug dugang responsibilidad. (1 Tim. 3:1) Pero ang uban tingali magduhaduha sa pagdawat. Lagmit ang brader nakahimog sala kaniadto, ug karon gibati niyang dili siya angayan nga mahimong ministeryal o ansiyano. O tingali bation sa brader nga dili siya kuwalipikado sa usa ka asaynment. Kon mao sab nay imong gibati, tabangan ka ni Jehova sa pagpakitag kaisog. (Filip. 4:13) Hinumdomi nga may panahong si Moises mibating dili kuwalipikado sa usa ka asaynment. (Ex. 3:11) Pero gitabangan siya ni Jehova nga magmaisogon, ug natuman niya ang iyang asaynment. Masundog sa mga brader ang maong kaisog kon mangayo silag tabang sa Diyos pinaagi sa pag-ampo ug pagbasag Bibliya kada adlaw. Makatabang sab ang pagpamalandong sa mga estorya sa Bibliya bahin sa kaisog. Sa mapainubsanong paagi, puwede sab silang mohangyo sa mga ansiyano nga bansayon sila ug moboluntaryo sa pagtabang sa kongregasyon. w17.09 32 ¶19

Ang mga Kristohanon dili angayng maghunahuna nga direktang gigiyahan sa Diyos ang paghubad sa Septuagint, Wycliffe Bible, King James Version, o sa uban pang hubad. Pero kon atong balikan ang kasaysayan niini ug sa uban pang mga hubad, masuportahan kini nga kamatuoran: Sumala sa gisaad ni Jehova, ang iyang Pulong milahutay. Dili ba nâ magpalig-on sa imong pagtuo nga matuman sab ang ubang saad ni Jehova? (Jos. 23:14) Gawas nga molig-on ang atong pagtuo, ang pagkahibalo kon sa unsang paagi nakalahutay ang Bibliya latas sa katuigan magpalalom sa atong gugma kang Jehova. Ngano kahang gitagana ni Jehova ang iyang Pulong? Ug nganong nagpasalig siya nga kini molahutay? Kay iya tang gihigugma, ug gusto ta niyang tudloan para sa atong kaayohan. (Isa. 48:17, 18) Busa, kinahanglang higugmaon sab nato si Jehova ug sundon ang iyang mga sugo.​—1 Juan 4:19; 5:3. w17.09 21-22 ¶13-14

Mas lisod ang pagbansay sa imong mga anak niini nga sugo kon dili Saksi ang imong kapikas. Pasidunggi ang imong kapikas aron sundogon ka sa imong mga anak. Pagpokus sa maayong mga hiyas sa imong kapikas, ug isulti ang imong apresasyon kaniya. Ayaw pagsultig dili maayo bahin sa imong kapikas atubangan sa imong mga anak. Hinuon, ipatin-aw kanila nga personal nga desisyon ang pag-alagad kang Jehova. Ang maayong panggawi sa imong mga anak lagmit makadani sa imong kapikas sa tinuod nga pagsimba. Lagmit did-an sa pipila ka bana ang Kristohanong kapikas sa pagtudlo sa ilang mga anak bahin sa Bibliya o sa pagdala niini sa tigom. Bisan pa niana, buhaton sa asawa ang iyang maarangan sa pagtudlo sa mga bata sa kamatuoran. (Buh. 16:1; 2 Tim. 3:14, 15) Bisag tahoron niya ang desisyon sa iyang bana, puwede gihapon niyang isulti sa mga bata ang kamatuoran kon may kahigayonan. Pinaagi niana, makakat-on ang mga bata bahin kang Jehova ug sa iyang mga sukdanan.​—Buh. 4:19, 20. w17.10 14 ¶9-10

Ang mga tawo gihimo sumala sa larawan sa mabinationg Diyos nga si Jehova. Busa, natural sa tawo nga hunahunaon ang kaayohan sa uban. Bisan kadtong wala makaila sa Diyos sagad magpakita gihapog pagkamabination. (Gen. 1:27) Atong makita diha sa Bibliya ang daghang estorya nga nagpasiugda sa pagkamabination. Hinumdomi ang estorya sa duha ka pampam (prostitute) nga naglalis atubangan ni Solomon kon kinsa kanila ang tinuod nga inahan sa bata. Aron testingan sila, si Solomon nagsugo nga pikason ang bata. Kay naluoy ang tinuod nga inahan, gipalabi niya nga ihatag na lang ang bata sa laing pampam. (1 Hari 3:23-27) Hinumdomi sab ang anak nga babaye ni Paraon kinsa nagluwas sa batang si Moises. Bisag nahibalo siya nga ang bata usa ka Hebreohanon ug kinahanglang patyon, “siya naluoy kaniya” ug midesisyon sa pagpadako sa bata ingong iyang anak.​—Ex. 2:5, 6. w17.09 8-9 ¶2-3

Para sa tanang magsisimba ni Jehova, importante kaayo ang pagpaubos ug moresulta kanag dagayang panalangin. (Prov. 22:4) Ang pagpaubos makatabang aron magmalinawon ug magkahiusa ang atong kongregasyon. Ang pag-ugmad ug ang pagpabiling mapainubsanon makatabang sab nato aron madawat nato ang hilabihang pagkamaayo sa Diyos. Si apostol Pedro miingon: “Kamong tanan sul-obi ang inyong kaugalingon sa pagkamapainubsanon sa hunahuna ngadto sa usag usa, tungod kay ang Diyos magabatok sa mga mapahitas-on, apan magahatag siyag dili-takos nga kalulot sa mga mapainubsanon.” (1 Ped. 5:5) Para sa kalibotan karon, huyang ang tawong malumo ug mapailobon. Pero dili nâ tinuod. Ang maong maayong hiyas naggikan sa gamhanan kaayong Persona sa uniberso. Si Jehova nga Diyos ang kinalabwang panig-ingnan sa kalumo ug pailob. Hunahunaa kon giunsa niya pagtubag​—pinaagi sa representanteng mga anghel—​ang mga pangutana ni Abraham ug Lot. (Gen. 18:22-33; 19:18-21) Dugang pa, sulod sa 1,500 ka tuig, si Jehova nagpailob sa dili masinugtanong nasod sa Israel.​—Ezeq. 33:11. w17.08 25 ¶13-14

Pag-ampo, ug imong madawat ang kalinaw sa Diyos. Apan matikdi nga ‘ang kalinaw sa Diyos molabaw sa tanang panghunahuna.’ Unsay ipasabot niana? Ang uban naghubad niinig “molabaw sa tanan natong damgo” o “molabaw sa tanang plano sa tawo.” Buot ipasabot ni Pablo, “ang kalinaw sa Diyos” mas maayo pa kay sa ato tingaling mahunahunaan. Busa, bisag sa panglantaw sa tawo morag dili masulbad ang atong mga problema, masulbad nâ ni Jehova, ug mahimo niya ang wala damha. (2 Ped. 2:9) Sa unsang paagi maanaa kanato “ang kalinaw sa Diyos” bisag nag-atubang ug mga pagsulay? Pinaagi sa paghupot ug maayong relasyon sa atong Diyos, si Jehova. Posible lang kini nga relasyon “pinaagi kang Kristo Jesus,” kinsa naghatag sa iyang kinabuhi ingong halad lukat. Ang pagtagana sa lukat maoy usa sa talagsaong gihimo sa atong Amahan. Gigamit ni Jehova ang lukat sa pagpasaylo sa atong mga sala, ug tungod niini makabaton tag hinlong konsensiya ug masuod kaniya.​—Juan 14:6; Sant. 4:8; 1 Ped. 3:21. w17.08 10 ¶7; 12 ¶15

Usahay, malisdan tingali ang usa nga nagbangotan sa pagpahayag sa iyang grabeng kaguol. Bisag mapahayag sa usa ang iyang gibati, usahay dili dayon masabtan sa uban ang buot niyang ipasabot. Busa, dili ikatingala nga lisod ang pagpangitag mga pulong nga ikasulti sa mga nagbangotan. Sagad ang kinamaayohan nimong matabang mao ang ‘paghilak uban sa mga tawong nanghilak.’ (Roma 12:15) Kon malisdan ka sa pagsulti sa personal, basin mas sayon ang paghatag ug paghupay pinaagig kard, e-mail, text, o sulat. Puwede nimong kutloon ang usa ka makapahupayng teksto, hisgotan ang dili nimo malimtang maayong kinaiya o hiyas sa namatay, o hisgotan ang makapalipayng kaagi. Ug dako kaayo ang matabang kon moampo ta uban ug alang sa nagbangotang igsoon. w17.07 14-16 ¶13-16

Unsa kaha kon ang kaminyoon lahi kaayo sa gidahom, o makapahigawad pa gani? Pamalandonga ang pagpakiglabot ni Jehova sa Israel. Gipakasama niya ang iyang kaugalingon sa bana nianang karaang nasod. (Isa. 54:5; 62:4) Pagkalisod niadto nga “kaminyoon”! Pero si Jehova wala dayon mosurender. Balikbalik niyang gipasaylo ang maong nasod ug siya nagmaunongon sa iyang pakigsaad kanila. (Sal. 106:43-45) Dili ba mas masuod ta kang Jehova tungod sa iyang maunongong gugma? Busa, kinahanglang sundogon sab sa mga magtiayon si Jehova. Dili sila mangitag dili kasulatanhong paagi aron makalingkawas sa problemadong kaminyoon. Sila nahibalo nga gihiusa sila ni Jehova ug gusto niya nga sila mounong sa usag usa. Ang seksuwal nga imoralidad lang ang Kasulatanhong basehanan alang sa diborsiyo nga mahimong maghatag sa usa ug kagawasan sa pagminyo pag-usab. (Mat. 19:5, 9) Pinaagi sa pagpaningkamot pag-ayo ug pagpangitag paagi sa pagpauswag sa ilang kaminyoon, ilang gipaluyohan ang matarong nga pagmando ni Jehova. w17.06 31 ¶17-18

Gikuwestiyon ni Satanas nga Yawa ang pagkamatarong sa pagkasoberano ni Jehova. Gusto niyang maghunahuna ang mga tawo nga dili matarong ang pagmando sa Diyos ug wala ihatag ni Jehova ang kinamaayohan ngadto sa iyang mga linalang. Sumala sa Yawa, ang mga tawo mas malipayon ug maayo ang kahimtang kon silay magmando. (Gen. 3:1-4) Nangangkon usab si Satanas nga kon lisodlisoron na, isalikway nila ang pagmando ni Jehova. (Job 2:4, 5) Gitugotan ni Jehova nga molabay ang panahon aron masinati mismo sa mga tawo kon unsa ka miserable ang kinabuhi kon dili sila magpasakop sa matarong nga pagmando sa Diyos. Siyempre, nahibalo si Jehova nga sayop ang mga pangangkon sa Yawa. Busa nganong gihatagan sa Diyos si Satanas ug panahon sa pagpamatuod sa iyang mga pangangkon? Ang tubag naglangkit sa tanang intelihenteng linalang. (Sal. 83:18) Kon buot hunahunaon, gisalikway sa unang magtiayon ang pagmando ni Jehova, ug mao sab nay gibuhat sa daghan sukad niadto. Tungod niana, mahimong maghunahuna ang uban nga husto ang pangangkon sa Yawa. w17.06 22-23 ¶3-4

Daghan kag makat-onan sa paghimog mga tinun-an, sama sa pagkamakugihon, pagpakig-estorya sa uban, pagbatog kompiyansa sa kaugalingon, ug pagkamahunahunaon. (Prov. 21:5; 2 Tim. 2:24) Pero ilabinang makapalipay ang paghimog tinun-an kay tabangan ka niini nga mahimong mas pamilyar sa Kasulatanhong basehanan sa imong pagtuo. Makat-onan sab nimo ang pagkahimong isigkamagbubuhat ni Jehova. (1 Cor. 3:9) Magmalipayon gihapon ka sa paghimog mga tinun-an bisag gamay ra ang maminaw sa maayong balita diha sa imong teritoryo. Magtinabangay ta sa paghimog tinun-an. Ang tibuok kongregasyon mangitag mga sinsero. Bisag usa ra ka igsoon ang makakitag tawo nga matabangan sa pagkahimong Saksi, ang tanan mitabang sa pagpangita ug ang tanan malipay. Pananglitan, si Brandon nagpayunir sulod sa siyam ka tuig diha sa teritoryo nga walay modawat. Siya miingon: “Oo, wala ko makakaplag ug tawo sa teritoryo nga natabangan nako hangtod sa bawtismo, pero nakakaplag man ang uban. Lipay kaayo kong apil sa akong plano ang buluhatong paghimog mga tinun-an.”​—Eccl. 11:6. w17.07 23 ¶7; 24 ¶9-10

Si Ana baog, samtang ang laing asawa ni Elkana nga si Penina may mga anak. (1 Sam. 1:4-7) Si Ana gitamay ni Penina “tuigtuig.” Tungod niana, naguol ug nasakitan pag-ayo si Ana. Nahupayan siya dihang iyang gitugyan kang Jehova ang iyang problema pinaagi sa pag-ampo. (1 Sam. 1:12) Siya misalig nga si Jehova magtapos sa iyang pagkabaog o kaha maghupay kaniya sa laing paagi. Ang mga kasakitan ug kalisdanan magpadayon samtang kita dili hingpit ug nagpuyo niining sistema nga gikontrolar ni Satanas. (1 Juan 5:19) Bisan pa niana, makapalipay gyong mahibalo nga si Jehova “ang Diyos sa tanang paghupay”! (2 Cor. 1:3) Ang usa ka paagi nga makatabang nato sa pagsagubang sa atong mga kasakitan o kalisdanan mao ang pag-ampo. Gipahayag ni Ana kang Jehova kon unsay naa sa iyang kasingkasing. Sa susama, panahon sa kalisdanan, kinahanglang dili ta basta mohisgot lang sa atong pagbati ngadto kang Jehova. Angay tang mangamuyo kaniya, oo, aron mapahayag nato ang atong pagbati pinaagi sa kinasingkasing nga pag-ampo.​—Filip. 4:6, 7. w17.06 6 ¶10-11

Ang nabanhawng si Jesus nahibalo nga walay kuha ang iyang mga tinun-an samtang nangisda. Busa siya miingon kanila: “‘Itaktak ang pukot sa tuo nga bahin sa sakayan ug may pipilang makaplagan ninyo.’ Busa gitaktak nila kini, apan dili na sila makabira niini tungod sa duot sa mga isda.” (Juan 21:1-6) Human sila daliti ug pamahaw, gisulti ni Jesus kang Simon Pedro ang mga pulong sa teksto karong adlawa. Unsay gitumong ni Jesus? Si Pedro ganahan kaayong mangisda. Busa, lagmit gipangutana siya ni Jesus kon unsay labaw niyang gihigugma. Mas gihigugma ba niya ang pagpangisda kay kang Jesus ug ang mga butang nga gitudlo Niya? Si Pedro mitubag: “Oo, Ginoo, nahibalo ka nga gimahal ko ikaw.” (Juan 21:15) Gipamatud-an gayod ni Pedro ang iyang giingon. Sukad niadto, gipamatud-an niya ang iyang gugma kang Kristo pinaagi sa pagkugi diha sa buluhatong paghimog mga tinun-an, ug nahimo siyang pundasyon sa unang siglong kongregasyon. w17.05 22 ¶1-2

Kanang lig-ong pagsalig sa mahigugmaong pag-atiman ni Jehova nakatabang kang Pablo sa pagsagubang sa mga problema. Wala niya tugoti ang negatibong mga kahimtang nga makapaluya kaniya. Unsay nakatabang niya? Kanunay siyang misalig ‘sa Diyos sa tanang paghupay, kinsa nagahupay kanato sa tanan natong kasakitan.’ (2 Cor. 1:3, 4) Ang pagpakigkomunikar pinaagig pag-ampo mao ang pundasyon sa suod nga relasyon ngadto sa Diyos. (Sal. 86:3; 1 Tes. 5:17; Roma 12:12) Kon mogahin tag igong panahon sa pagpahayag kang Jehova sa atong mga hunahuna ug pagbati, masuod gyod ta sa atong langitnong Amahan, ang “Tigpatalinghog sa pag-ampo.” (Sal. 65:2) Dugang pa, dihang atong makita nga gitubag ni Jehova ang atong mga pag-ampo, modako ang atong gugma kaniya. Mas kombinsido ta nga “si Jehova haduol [sa] tanan nga nagatawag kaniya.” (Sal. 145:18) Kana nga pagsalig sa mahigugmaong pagpaluyo ni Jehova motabang nato sa pagsagubang sa umaabot pang mga pagsulay. w17.05 19 ¶9-10

Unsay imong buhaton kon wala ka kasabot o supak ka sa desisyon sa mga ansiyano? Kana nga mga situwasyon magsulay sa atong pagtuo kang Jehova ug sa kahikayan sa iyang organisasyon. Sa unsang paagi maproteksiyonan ka sa pagkamapainubsanon kon makaatubang ka niini nga pagsulay? Konsideraha ang duha ka paagi. Una, ang pagpaubos makatabang nato sa pagdawat nga wala ta mahibalo sa tanang detalye. Bisag unsa pa ka daghan ang atong nahibaloan sa nahitabo, si Jehova ra ang makabasa sa simbolikong kasingkasing. Ang pagkahibalo niining dili malalis nga kamatuoran makatabang nato sa pagpaubos, pag-ila sa atong mga limitasyon, ug pagpasibo sa atong panglantaw. Ikaduha, ang pagpaubos makatabang nato nga magpasakop ug magpailob samtang naghulat kang Jehova nga tul-iron ang mga butang kon dunay tinuod nga inhustisya. Sama kana sa giingon sa maalamong tawo: “Maayo ang sangpotan niadtong nahadlok sa matuod nga Diyos . . . , apan dili gayod maayo ang sangpotan sa tawong daotan, ni malugwayan niya ang iyang mga adlaw.” (Eccl. 8:12, 13) Kon magpaubos ta, makaayo kini sa espirituwalidad sa tanan nga apil sa maong hitabo.​—1 Ped. 5:5. w17.04 25-26 ¶10-11

Dayag, biktima si Jose sa inhustisya. Miingon sab siya nga inosente siya sa krimen nga gipasangil kaniya. Base niini, iyang gihangyo ang tig-ipis ug ilimnon nga hisgotan ang iyang kaso kang Paraon. Ngano? Siya miingon: Aron “pagawason mo gayod ako niining [dapita].” (Gen. 40:14) Gipakita ba sa mga pulong ni Jose nga basta gidawat na lang niya ang iyang kahimtang? Wala gayod. Nahibalo gyod siya nga biktima siya sa daghang inhustisya. Gisaysay niya ang tinuod nga mga panghitabo ngadto sa tig-ipis ug ilimnon, nga lagmit naa sa posisyon nga motabang niya. Apan, matikdi nga walay makita sa Kasulatan nga gipahibalo ni Jose ang uban​—bisag si Paraon—​nga ang nagkidnap niya mao ang iyang mga igsoon. Gani, dihang ang iyang mga igsoon nangabot sa Ehipto ug nakig-uli kang Jose, gidawat sila ni Paraon ug gidapit sila sa pagpuyo sa Ehipto ug sa pagpahimulos sa “maayo sa tibuok yuta.”​—Gen. 45:16-20. w17.04 20-21 ¶12-13

Anaa kang Jehova ang kahibalo ug kaalam nga gikinahanglan sa pag-atiman sa uniberso. Mao kana ang usa ka rason kon nganong siya ang bugtong Soberano. Pananglitan, sa iyang tabang, ang iyang Anak nakaayog mga sakit nga dili matambalan sa mga doktor. (Mat. 4:23, 24; Mar. 5:25-29) Para kang Jehova, dili kana milagro. Siya nahibalo sa natural nga proseso sa lawas ug may katakos sa pag-ayo niini. Makahimo sab siya sa pagbuhi sa mga patay ug pagpahunong sa mga katalagman. Ang kalibotan ilalom sa impluwensiya ni Satanas nangita gihapog paagi sa paghusay sa mga away diha sa sulod sa nasod ug tali sa mga nasod. Si Jehova lang ang may kaalam sa pagpatunghag kalinaw sa kalibotan. (Isa. 2:3, 4; 54:13) Samtang tun-an nato ang kahibalo ug kaalam ni Jehova, bation nato ang gibati ni apostol Pablo, kinsa misulat ubos sa paggiya sa Diyos sa mga pulong sa teksto karong adlawa. w17.06 28 ¶6-7

Daghan karon sa kalibotan ang naghunahuna nga dili seryoso ang kaminyoon. Kon may problema sa panagtiayon, mosurender dayon sila ug mobiya sa ilang kapikas. Apan dili ingon niana ang mga Kristohanon. (1 Cor. 7:27) Ang pagbungkag sa panaad sa kaminyoon maoy katumbas sa pagpamakak ngadto sa Diyos, ug gidumtan sa Diyos ang mga bakakon! (Lev. 19:12; Prov. 6:16-19) Gidumtan sab ni Jehova ang malimbongong pakigdiborsiyo. (Mal. 2:13-16) Gitudlo ni Jesus nga ang bugtong Kasulatanhong basehanan sa pagtapos sa panaad sa kaminyoon mao kini​—kon ang inosenteng kapikas modesisyon nga dili pasayloon ang nakapanapawng kapikas. (Mat. 19:9; Heb. 13:4) Apan, komosta ang bahin sa panagbulag? Klaro usab ang giingon sa Bibliya bahin niana. (1 Cor. 7:10, 11) Ang Bibliya wala maghisgot ug mga basehanan sa panagbulag sa magtiayon. Apan, giisip sa ubang minyong Kristohanon ang pipila ka situwasyon ingong rason sa panagbulag, sama sa grabeng pagpameligro sa kinabuhi o sa espirituwalidad sa usa tungod sa abusado o apostatang kapikas. w17.04 7 ¶14-16