Septiyembre

Ang pagpadako sa anak diha sa “disiplina ug sa pagdumala-sa-kaisipan [o, giya] ni Jehova” mao ang usa sa kinadak-ang pribilehiyo sa ginikanan. (Sal. 127:3) Lahi sa mga anak sa karaang nasod sa Israel, ang mga anak sa Saksi karon dili awtomatikong bahin sa katawhan nga napahinungod kang Jehova. Dugang pa, dili mapanunod ang gugma sa Diyos ug sa kamatuoran. Sukad sa pagkatawo sa ilang anak, kinahanglang may intensiyon ang mga ginikanan nga himoong tinun-an ang ilang anak, nga tabangan kining mahimong dedikado, bawtismadong alagad ni Jehova. May mas importante pa ba niana? Ang dedikasyon, bawtismo, ug matinumanong pag-alagad sa Diyos mao ang makatabang sa usa nga mamarkahan sa kaluwasan panahon sa dakong kasakitan. (Mat. 24:13) Mga ginikanan, hinaot masinati ninyo ang kalipay ug katagbawan dihang makita ninyo ang inyong mga anak nga mahimong dedikado, bawtismadong alagad ni Jehova. w18.03 12 ¶16-17

Ang tanan nga gihatagag awtoridad sa pagdisiplina base sa Bibliya​—sa pamilya man o sa kongregasyon—​mahimong maalamon kon ilang sundogon ang Kristo. Oo, kon ila nang himoon, gipakita nila nga gusto nilang magpaumol sa Diyos ug sa iyang Anak. Dili nato maihap ang tanang panalangin dihang dawaton nato ang disiplina ug sundogon ang paagi sa pagdisiplina ni Jehova ug Jesus. Usa niana mao ang kalinaw sa pamilya ug kongregasyon. Bation sab sa usa nga tinuod siyang gihigugma, gipabilhan, ug may kasegurohan​—nga pasiuna sa mas daghang panalangin sa umaabot. (Sal. 72:7) Oo, tinuod gyod nga ang disiplina ni Jehova nagtudlo nato nga mabuhi hangtod sa hangtod ingong malinawon ug nagkahiusang pamilya ubos sa iyang pag-atiman ingong Amahan. (Isa. 11:9) Kon kanay atong panglantaw sa disiplina gikan sa Diyos, maapresyar nato ang tinuod nga kahulogan niini: talagsaong pamatuod nga gihigugma gyod ta sa Diyos. w18.03 26 ¶15; 27 ¶17, 19

Gipakita niadtong nagpabawtismo kang Juan nga sila naghinulsol sa ilang pagsupak sa Moisesnong Balaod. (Mat. 3:1-6) Pero, walay kalabotan sa paghinulsol ang labing importanteng bawtismo nga gihimo ni Juan. Siya may talagsaong pribilehiyo sa pagbawtismo kang Jesus, ang hingpit nga Anak sa Diyos. (Mat. 3:13-17) Si Jesus walay sala, busa dili siya kinahanglang maghinulsol. (1 Ped. 2:22) Ang iyang bawtismo nagsimbolo sa pagpresentar sa iyang kaugalingon aron buhaton ang kabubut-on sa Diyos. (Heb. 10:7) Sa ministeryo ni Jesus sa yuta, ang iyang mga tinun-an nagbawtismo usab sa uban. (Juan 3:22; 4:1, 2) Sama niadtong gihimo ni Juan, ang ilang bawtismo nagsimbolo sa paghinulsol sa ilang pagsupak sa Moisesnong Balaod. Pero, human sa kamatayon ug pagkabanhaw ni Jesus, ang bawtismo bag-o nag kahulogan para sa iyang mga tinun-an. w18.03 5 ¶6-7

Unsay kahulogan sa pagkahimong “tawong espirituwal”? Lahi sa tawong pisikal, ang tawong espirituwal mahunahunaon sa iyang relasyon sa Diyos. Ang mga tawong mahunahunaon sa espirituwal maningkamot nga “mahimong mga tigsundog sa Diyos.” (Efe. 5:1) Nagpasabot ni nga maningkamot sila nga mabatonan ang panghunahuna ug panglantaw ni Jehova sa mga butang. Ang Diyos tinuod gayod kanila. Sila naningkamot sa pagpahiuyon sa ilang kinabuhi sa mga sukdanan ni Jehova, dili sama sa unodnong mga tawo. (Sal. 119:33; 143:10) Imbes magpokus sa unodnong mga buhat, ang tawong mahunahunaon sa espirituwal maningkamot sa pagpakita sa “bunga sa espiritu.” (Gal. 5:22, 23) Aron mapatin-aw pa ang ekspresyong “mahunahunaon sa espirituwal,” tagda kini: Ang tawong maayo sa negosyo gitawag ug business-minded. Sa susama, ang usa nga nagpabili pag-ayo sa espirituwal nga mga butang gitawag ug mahunahunaon sa espirituwal o spiritually-minded. w18.02 19 ¶3, 6

Si Daniel nabihag sa Babilonya, usa ka siyudad nga puno sa idolatriya ug espiritismo. Dugang pa, ubos ang pagtan-aw sa mga Babilonyanhon sa mga Hudiyo​—nga nagbugalbugal nila ug sa ilang Diyos, si Jehova. (Sal. 137:1, 3) Pagkasakit niana para sa matinumanong mga Hudiyo sama kang Daniel! Nahimong isyu ang bahin sa pagkaon ug ilimnon kay dili gusto ni Daniel nga “hugawan ang iyang kaugalingon sa lamiang mga pagkaon sa hari.” (Dan. 1:5-8, 14-17) Ang laing kalisdanan ni Daniel, nga sa unang tan-aw morag dili lisod, lagmit may kalabotan sa iyang talagsaong abilidad​—nga tungod niana, nakadawat siyag espesyal nga mga pribilehiyo. (Dan. 1:19, 20) Pero, imbes manghambog ug mobati nga pirmeng husto ang iyang opinyon, nagpabilin siyang mapainubsanon ug makasaranganon, nga kanunayng naghatag sa pasidungog kang Jehova. (Dan. 2:30) Sa pagkatinuod, batan-on pa si Daniel dihang giapil siya ni Jehova sa mga ehemplo sa pagkamatarong​—kauban ni Noe ug Job. (Ezeq. 14:14) Nasayop ba ang Diyos sa pagsalig kang Daniel? Wala gayod! Si Daniel nagmaunongon ug nagmatinumanon bisan hangtod sa kamatayon. w18.02 5 ¶11-12

Si Jesus balanseg panglantaw sa kalipayan. Siya mitambong ug “kombira sa kasal” ug sa “[usa ka] dakong kombira.” (Juan 2:1-10) Sa kasal, dihang nahurot ang bino, milagroso niyang gihimong bino ang tubig. Apan, dili panguna sa kinabuhi ni Jesus ang kalipayan. Giuna niya si Jehova ug gihimo niya ang tanan sa pagtabang sa uban. Aron daghan ang mabuhi, kinabubut-on niyang giantos ang masakit nga kamatayon diha sa estaka. Giingnan ni Jesus kadtong gustong mosunod sa iyang tunob: “Malipayon kamo sa dihang pakaulawan kamo sa mga tawo ug pagalutoson kamo ug sa binakak sultihan kamo sa tanang matang sa kadaotan tungod kanako. Pagmaya ug lukso sa kalipay, sanglit dako ang inyong ganti sa mga langit.” (Mat. 5:11, 12) Kon tinuod natong gihigugma ang Diyos, likayan nato dili lang ang mga butang nga atong nahibaloang dili makapalipay niya kondili ang mga butang usab nga sa atong hunahuna dili makapahimuot niya.​—Mat. 22:37, 38. w18.01 26 ¶16-18

Mohatag ta kang Jehova tungod sa atong gugma ug pagpasalamat kaniya. Madasig gyod ta dihang hunahunaon ang tanang gihimo ni Jehova para kanato. Giila ni Haring David nga ang tanan natong nabatonan naggikan kang Jehova ug ang bisan unsa nga atong ihatag kang Jehova naggikan sa gihatag niya kanato. (1 Cron. 29:11-14) Makaayo kanato ang pagkahimong mahinatagon ug dili lang tigdawat. Hunahunaa ang usa ka bata nga mihatag ug regalo sa iyang ginikanan gikan sa gamayng alawans nga gihatag nila kaniya. Maapresyar gyod sa ginikanan ang maong regalo! Ang usa ka anak nga tingali nagpayunir ug nagpuyo uban sa iyang ginikanan mahimong mohatag ug kuwarta para makatabang sa mga galastohan sa balay. Bisag dili nâ dahomon sa ginikanan, dawaton tingali nila ang maong regalo kay usa nâ ka paagi nga ikapakita sa anak ang apresasyon sa ilang gihimo para kaniya. Sa susama, nahibalo si Jehova nga ang paghatag gikan sa atong bililhong mga butang makaayo kanato. w18.01 18 ¶4, 6

Dili igo nga sultihan ang imong mga anak kon unsay husto ug sayop. Maayong tabangan sab nimo sila nga mangatarongan sa mga pangutana sama sa: ‘Nganong gidili sa Bibliya ang mga butang nga makapadani sa tawo? Nganong kombinsido ko nga para sa akong kaayohan ang mga sukdanan sa Bibliya?’ (Isa. 48:17, 18) Kon ang imong anak gusto nang magpabawtismo, angay siyang tabangan sa pagpangatarongan sa lain pang butang​—kon unsay iyang pagbati sa mga responsabilidad sa pagka-Kristohanon. Unsay mga benepisyo? Unsa ang mga kalisdanan? Nganong mas daghan ang benepisyo kay sa kalisdanan? (Mar. 10:29, 30) Lagmit maatubang kana sa usa human sa bawtismo. Busa, importanteng konsiderahon kana sa dili pa magpabawtismo. Dihang matabangan ang mga anak sa paghunahuna niining mga butanga, lagmit makombinsir sila. Sa unsa? Makombinsir sila nga alang gyod sa ilang kaayohan ang sukdanan sa Bibliya. w17.12 21 ¶14-15

Daghan ninyo minahal nga mga igsoon ang nag-antos sa grabeng sakit. Ang pipila, bisag edaran na, nag-atiman sa tigulang nga mga paryente. Samtang ang uban naglisod sa pagtagana, dili sa mga luho, kondili bisan sa pangunang panginahanglan sa ilang pamilya. Ug nahibalo mi nga daghan ang nag-atubang, dili lang usa, kondili ubay-ubayng problema sa samang higayon! Kon gipabilhan ni Jehova ang way kinabuhing linalang, hunahunaa kon unsay iyang pagbati nimo kinsa nag-alagad kaniya, dili tungod kay obligado ka, kondili kay gihigugma nimo siya! (Sal. 19:1, 3, 14) Ang atong minahal nga Amahan nakaila gayod kanimo. ‘Ang mismong mga buhok sa imong ulo giihap [niya] ang tanan.’ (Mat. 10:30) Ug ang salmista nagpasalig kanato: “Si Jehova nahibalo sa mga adlaw sa mga walay-ikasaway.” (Sal. 37:18) Oo, nahibalo siya sa matag pagsulay nga imong giatubang, ug makahatag siyag kusog aron makalahutay ka niana. w18.01 7 ¶1; 8 ¶4

Ang pagbanhaw ni Pedro kang Tabitha makapakombinsir kaayo maong “daghan ang nahimong mga magtutuo sa Ginoo.” Sila makapamatuod bahin sa Ginoo ug ilabina sa katakos ni Jehova sa pagbanhaw sa mga patay. (Buh. 9:36-42) Ang uban nakasaksi sa laing pagkabanhaw. Usa ka higayon niana, si apostol Pablo didto sa tigom sa usa ka itaas nga lawak sa Troas, nga karon mao ang amihanan kasadpang Turkey. Si Pablo nagpakigpulong hangtod sa tungang gabii. Usa ka batan-on nga ginganlag Eutiko ang naminaw, nga naglingkod diha sa bentana. Pero siya nakatulog ug nahulog gikan sa ikatulong andana. Tingali ang doktor nga si Lucas ang unang nakaabot kang Eutiko, ug si Lucas nakahimog medikal nga konklusyon: Si Eutiko wala lang maangol o makuyapi—​siya patay na! Si Pablo nanaog ug migakos sa patayng lawas, ug dayon mihimog makapatingalang pahibalo: “Ang iyang kalag anaa kaniya.” Seguradong dako kaayo nag epekto sa mga nakakita! Kay nahibalo sila nga si Eutiko namatay ug dayon gibanhaw, “dili masukod ang ilang kalipay.”​—Buh. 20:7-12. w17.12 5 ¶10-11

Masulbad ba sa tawo ang mga problema nga dugay na niyang giantos? Klaro nga ang tawo wala gihapon makakitag paagi nga malikayan ang gubat. Nagkadaghan ang ubang klase sa krimen, sama sa cybercrime, kapintasan sulod sa panimalay, ug terorismo. Ug nagkadaghan pa ang makamatayng mga sakit. Ang sistema karon sa ekonomiya ug politika gikontrolar sa hakog nga mga tawo. Klaro nga dili nila mawagtang ang gubat, krimen, sakit, ug kapobre. Ang Gingharian lang sa Diyos ang makahimo niana. Tagda kon unsay buhaton ni Jehova alang sa katawhan. Gubat: Wad-on sa Gingharian sa Diyos ang tanang hinungdan sa gubat sama sa kahakog, korapsiyon, nasyonalismo, bakak nga relihiyon, ug si Satanas mismo. (Sal. 46:9) Krimen: Ang Gingharian sa Diyos nagtudlo na sa minilyon nga mahigugma ug mosalig sa usag usa​—nga wala mahimo sa bisan unsang gobyerno sa tawo. (Isa. 11:9) Sakit: Panalanginan ni Jehova ang iyang katawhan ug hingpit nga panglawas. (Isa. 35:5, 6) Kapobre: Wad-on kana ni Jehova ug hatagan niya ang iyang katawhan ug espirituwal ug pisikal nga kadagaya.​—Sal. 72:12, 13. w17.11 24 ¶14-16

Usa sa pangunang katuyoan sa mga siyudad nga dalangpanan mao ang pagpanalipod sa mga Israelinhon batok sa pagkasad-an sa dugo. Gihigugma ni Jehova ang kinabuhi, ug gidumtan niya ang “mga kamot nga nagaula ug inosenteng dugo.” (Prov. 6:16, 17) Kay usa ka Diyos sa hustisya ug pagkabalaan, dili niya puwedeng balewalaon bisan ang aksidenteng pagpatay. Dili sama kang Jehova, ang mga eskriba ug Pariseo walay pagpabili sa kinabuhi. Sa unsang paagi? Giingnan sila ni Jesus: “Gikuha ninyo ang yawi sa kahibalo; kamo mismo wala mosulod, ug kadtong nagasulod inyong gibabagan!” (Luc. 11:52) Angay unta nilang ipatin-aw ang kahulogan sa Pulong sa Diyos ug giyahan ang uban padulong sa kinabuhing walay kataposan. Hinunoa, ilang gipahilayo ang katawhan sa “Pangulong Ahente sa kinabuhi,” si Jesus, ug gigiyahan sila padulong sa kalaglagan. (Buh. 3:15) Kay garboso ug dalo, ang mga eskriba ug Pariseo walay pagpabili sa kinabuhi ug kaayohan sa uban. Sila bangis ug way kaluoy! w17.11 15 ¶9-10

Sa sinugdan, lagmit wala nato pahibal-a ang atong pamilya nga nagtuon ta uban sa mga Saksi ni Jehova. Pero sa nagkadako ang atong pagtuo, atong naamgohan nga kinahanglan silang pahibaloon bahin sa atong tinuohan. Kon ang imong lig-ong baroganan miresultag problema tali kanimo ug sa imong dili Saksing mga paryente, konsideraha ang pagbati nila. Bisag lipay kaayo ta sa atong nakat-onan sa Bibliya, lagmit ang atong mga paryente nagtuo nga kita nailad o nahimong membro sa usa ka kulto. Tingali maghunahuna sila nga wala na ta mahigugma nila kay dili na ta moapil sa ilang mga selebrasyon. Basin mabalaka pa gani sila sa mahitabo nato kon mamatay ta. Angay natong konsiderahon ang ilang pagbati ug paminawon ang ilang isulti aron masabtan ang ilang gikabalak-an. (Prov. 20:5) Si apostol Pablo naningkamot nga masabtan ang “tanang matang sa katawhan” aron masangyawan sila sa maayong balita. Puwede nato siyang sundogon.​—1 Cor. 9:19-23. w17.10 15 ¶11-12

Lagmit magpanuko ta sa pag-awit kay dili ta segurado kon unsaon pagkanta. Pero, puwede natong pauswagon ang atong pag-awit pinaagi sa pagpadapat sa pipila ka simpleng sugyot. Mapauswag nimo ang kakusog sa pag-awit pinaagi sa hustong pagginhawa. Sama sa koryente nga mohatag ug enerhiya aron mosiga ang bombilya, ang pagginhawa mohatag ug puwersa sa tingog dihang ikaw mosulti o moawit. Ang gikusgon sa imong pagkanta kinahanglang parehas o mas kusog pa kay sa imong normal nga pag-estorya. Gani, kon bahin sa pag-awit ug mga pagdayeg, ang Kasulatan usahay nag-awhag sa mga magsisimba ni Jehova sa ‘paghugyaw nga malipayon.’ (Sal. 33:1-3) Sulayi kini: Pagpilig usa sa imong paboritong mga awit sa atong songbook. Basahag kusog ug may kompiyansa ang liriko. Dayon, gamit ang maong gikusgon sa tingog, litoka ang tanang pulong sa usa ka prase sa usa lang ka pagginhawa. Unya kantaha kana nga prase sa parehong gikusgon. (Isa. 24:14) Ang imong tingog mahimong mas tibuok, ug nindot nâ. Ayawg kahadlok o kaulaw! w17.11 5-6 ¶11-13

Samtang nagbiyahe ang mga Hudiyo, seguradong nagsige silag hunahuna sa ilang bag-ong puy-anan. Nadunggan nila ang kanindot sa Jerusalem kaniadto. Nakita pod sa pipila ka tigulang sa ilang taliwala ang kanhing himaya sa templo. (Esd. 3:12) Kon kauban ka nila, unsa kahay imong bation inigkakita nimo sa Jerusalem​—ang imong bag-ong puy-anan? Maguol ba kang makita ang mga tinukod nga nagun-ob ug gituboan nag mga sagbot? Makita ba nimo ang kalainan sa dagko, dobleng paril sa Babilonya ug sa nagun-ob nga mga paril sa Jerusalem nga wala nay mga ganghaan ug torre? Pero wala maluya ang mga Hudiyo. Nakita na nila ang pagluwas ni Jehova kanila diha sa ilang pagbiyahe. Ang una nilang gitukod mao ang halaran diha sa kanhing gitukoran sa templo, ug nagsugod sila sa paghalad kang Jehova kada adlaw.​—Esd. 3:1, 2. w17.10 26-27 ¶2-3

Lagmit daghag nakat-onan si Solomon sa kaisog sa iyang amahan. Si David isog kaayong nakig-away sa usa ka gikahadlokang higante nga sundalo. Oo, sa tabang ni Jehova ug pinaagi sa hamis nga bato, napildi ni David si Goliat. (1 Sam. 17:45, 49, 50) Angayan gyod si David nga modasig kang Solomon nga magmaisogon ug tukoron ang templo! Gipasaligan ni Haring David si Solomon nga si Jehova magauban kaniya hangtod mahuman ang pagtukod sa templo. Tungod sa maong pasalig, wala makababag kang Solomon ang iyang pagkabatan-on ug kawalay kasinatian. Nagpakita siyag kaisog ug milihok. Sa tabang sab ni Jehova, iyang nahuman ang nindot kaayong templo sulod sa pito ka tuig ug tunga. Sama kang Solomon, tabangan ta ni Jehova aron magmaisogon ug matuman ang atong buluhaton, diha sa pamilya ug sa kongregasyon. (Isa. 41:10, 13) Dihang magpakita tag kaisog sa pag-alagad kang Jehova, makasalig ta nga iya tang panalanginan karon ug sa umaabot. w17.09 28 ¶3; 29 ¶4; 32 ¶20-21

Ingong katawhan ni Jehova, kombinsido ta nga ang pulong sa Diyos, ang iyang mensahe sa mga tawo, “buhi ug gamhanan.” Daghan kanato ang makapamatuod nga ang gahom sa Bibliya makabag-o sa kinabuhi. Sa wala pa ma-Saksi, ang pipila kaniadto kawatan, adik sa droga, o imoral. Ang uban, bisag nagtagamtam ug temporaryong kalamposan niining sistemaha, mibati gihapon nga dunay kulang sa ilang kinabuhi. (Eccl. 2:3-11) Sukad pa sa una, ang mga nawad-an ug direksiyon sa kinabuhi nagiyahan sa hustong dalan pinaagi sa gahom sa Bibliya. Seguradong nalipay ka sa pagbasa sa mga eksperyensiya diha sa Bantayanang Torre sa seryeng “Ang Bibliya Makabag-o sa Kinabuhi.” Ug imong nakita nga bisag nadawat na nila ang kamatuoran, ang mga Kristohanon padayong miuswag sa espirituwal sa tabang sa Kasulatan. w17.09 23 ¶1

Kini nga panghitabo sa kinabuhi ni Lot nagpakita nga nahibalo gyod si Jehova sa lisod nga mga situwasyon nga maatubang usahay sa iyang matinumanong katawhan. (Isa. 63:7-9; Sant. 5:11; 2 Ped. 2:9) Gitudloan sab niya ang iyang katawhan nga angayng ipakita ang pagkamabination. Konsideraha ang balaod nga gihatag sa Israel maylabot sa pagkuha sa sinina sa tawo ingong garantiya sa utang. (Ex. 22:26, 27) Ang way kaluoy nga tigpahulam lagmit maaghat sa pagkuha sa sinina sa nakautang, ug pasagdan kini nga matulog nga walay ikasul-ob. Pero, gitudloan ni Jehova ang iyang katawhan nga likayan kining dili mabinationg buhat. Kinahanglang magmabination ang iyang katawhan. Dili ba angay sab natong sundon ang prinsipyo sa maong balaod? Pasagdan ba nato ang atong mga igsoon nga matugnawan, ingnon ta, bisag duna tay mahimo aron matabangan sila sa ilang pag-antos?​—Col. 3:12; Sant. 2:15, 16; 1 Juan 3:17. w17.09 9 ¶4-5

Si Jesus miampo sa iyang Amahan nga pasayloon ang mga naglutos niya. Maayo gyod siyang panig-ingnan sa kalumo ug pailob bisan sa masakit ug malisod nga mga situwasyon! (1 Ped. 2:21-23) Unsaon nato pagpakita ang kalumo ug pailob? Gihisgotan ni Pablo ang usa ka paagi dihang gisulatan niya ang mga igsoon sa pagtuo: “Magpadayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain. Ingon nga si Jehova kinabubut-on nga nagpasaylo kaninyo, buhata usab ninyo ang ingon.” (Col. 3:13) Oo, gikinahanglan nato ang kalumo ug pailob aron matuman nato kini nga sugo. Pinaagi sa pagpasaylo, makatabang ta aron mahiusa ug magpabiling mahiusa ang kongregasyon. Kinahanglanon para sa mga Kristohanon ang pagsul-ob sa kalumo ug pailob. Importante sab ni aron maluwas ta. (Mat. 5:5; Sant. 1:21) Labaw sa tanan, pinaagi sa maong mga hiyas, mapasidunggan nato si Jehova ug matabangan nato ang uban sa pagsunod sa tambag sa Bibliya.​—Gal. 6:1; 2 Tim. 2:24, 25. w17.08 25-26 ¶15-17

Dihang susihon nato ang Bibliya, matag karon ug unya makakita tag mga pananglitan nga gihimo ni Jehova ang wala damha. Si Haring Ezequias nabuhi sa panahon diin gisakop ni Haring Senakerib sa Asirya ang tanang kinutaang siyudad sa Juda, gawas sa Jerusalem. (2 Hari 18:1-3, 13) Dayon, gusto niyang atakehon ang Jerusalem. Unsay gibuhat ni Haring Ezequias? Nag-ampo siya alang sa tabang ni Jehova ug nagpatambag sa propeta ni Jehova nga si Isaias. (2 Hari 19:5, 15-20) Gipakita sab ni Ezequias ang iyang pagkamakataronganon pinaagi sa pagbayad sa multa nga gipangayo ni Senakerib. (2 Hari 18:14, 15) Sa ulahi, nangandam si Ezequias alang sa dugayng paglikos. (2 Cron. 32:2-4) Pero sa unsang paagi nasulbad kini? Si Jehova nagpadalag anghel sa pagpatay sa 185,000 ka sundalo ni Senakerib sa usa lang ka gabii. Sa pagkatinuod, bisan si Ezequias wala magdahom niini!​—2 Hari 19:35. w17.08 10 ¶7; 11 ¶12

Unsaon nimo pagplano aron mahimong bug-os panahong ministro? Labaw sa bisan unsa, makatabang ang Kristohanong mga hiyas aron molampos sa bug-os panahong pag-alagad kang Jehova. Busa, pagkugi sa pagtuon sa Pulong sa Diyos, pamalandong pag-ayo sa kahulogan niana, ug pangitag mga paagi sa pagpahayag sa imong pagtuo diha sa kongregasyon. Samtang nag-eskuyla, makakuha kag eksperyensiya ug kahanas ingong magsasangyaw sa maayong balita. Kat-oni ang pagpakitag interes sa uban pinaagi sa mataktikanhong pagpangutana sa ilang opinyon ug pagpaminaw sa ilang tubag. Makaboluntaryo pod ka sa mga buluhaton sa kongregasyon, sama sa pagpanghinlo ug pagmentinar sa Kingdom Hall. Malipay si Jehova niadtong mapainubsanon ug andam motabang. (Sal. 110:3; Buh. 6:1-3) Gipauban ni apostol Pablo si Timoteo sa misyonaryong buluhaton kay “ang mga igsoon . . . may maayong panghimatuod” kang Timoteo.​—Buh. 16:1-5. w17.07 23 ¶7; 26 ¶14

Samtang dili pa mahusay ang isyu diha sa hunahuna sa mga tawo o anghel, mahimong mahitabo ang pag-awayay sa mga nasod, rasa, tribo, pamilya, ug mga indibiduwal. Apan dihang mabindikar na ang pagkasoberano ni Jehova, ang tanan magpasakop sa iyang matarong nga pagmando sa walay kataposan. Mapasig-uli na ang kalinaw sa tibuok uniberso. (Efe. 1:9, 10) Ang pagkasoberano sa Diyos mapamatud-ang matarong, ug ang pagmando ni Satanas ug sa mga tawo mapakyas ug matapos. Ang pagmando sa Diyos pinaagi sa iyang Mesiyanikong Gingharian molampos, ug mapamatud-an sa mga matinumanon nga posible diay nga ang mga tawo maunongong magpaluyo sa pagmando sa Diyos. (Isa. 45:24) Gusto ba nimong maapil nianang maunongong nagpaluyo sa pagkasoberano ni Jehova? Siyempre! Aron mahimo nato kana, kinahanglan natong ipokus ang atong mata sa hinungdanong isyu ug sabton kon unsa kana ka importante. w17.06 23 ¶4-5

Ang gidugayon sa pagbangotan magkalahi sa matag tawo. Busa, ubani ang hingtungdan, dili lang sa pipila ka adlaw nga naa pa ang mga higala ug paryente, kondili hangtod sa mga bulan diin ang uban namalik na sa normal nga pagkinabuhi. Mahimong tuboran sa paghupay ang mga igsoon sa pagtuo samtang nagbangotan pa ang usa ka igsoon. (1 Tes. 3:7) Hinumdomi nga usahay kalit nga mobalik ang kaguol sa usa ka namatyan tungod sa mga anibersaryo, musika, letrato, kalihokan, o bisan ganig baho, tingog, o klima. Daghang butang nga kinahanglang buhaton sa nabalo nga siyasiya ra ang makapaguol pag-ayo. Apil niana ang pagtambong ug asembliya o Memoryal. Pero hinumdomi nga ang nagbangotan nagkinahanglag pagdasig, dili lang panahon sa espesyal nga okasyon. w17.07 16 ¶17-19

Mamatikdan nato nga kon magpakita tag personal nga interes sa uban, sagad makalimtan nato ang atong mga problema. Ang mga sister, minyo man o dili, nahibalo nga makapalipay kaayo ang pagpaambit sa maayong balita ingong isigkamagbubuhat sa Diyos. Tumong nila nga pasidunggan ang Diyos pinaagi sa pagbuhat sa iyang kabubut-on. Gani, ang pipila nag-isip sa pagsangyaw ingong therapy. Oo, kitang tanan makaamot sa kasuod sa kongregasyon dihang magmahunahunaon ta sa uban​—sa teritoryo man o sa kongregasyon. Usa ka maayong ehemplo niana si apostol Pablo. Siya nahisamag “usa ka nagpasusong inahan” niadtong anaa sa kongregasyon sa Tesalonica; siya usab samag espirituwal nga amahan. (1 Tes. 2:7, 11, 12) Ang mga batan-on nga makakat-on sa paghigugma sa Diyos ug sa pagsunod sa iyang tambag makahatag ug kahupayan sa pamilya. Ikapakita nila kana pinaagi sa pagtahod sa ilang ginikanan ug sa pagtabang sa pinansiyal nga paagi. Makahatag sab silag bililhong espirituwal nga tabang. w17.06 7 ¶13-14; 8 ¶17

Ang tanan mouyon nga binilyon karon ang pobre kaayo, samtang ang uban dato kaayo nga ang ilang bahandi magamit bisan sa sunodsunod nga kaliwatan. Nasabtan ni Jesus nga ang ekonomiya karon dili mabag-o gawas kon moabot ang Gingharian sa Diyos. Uban sa sistema sa politika ug relihiyon, ang hakog nga sistema sa negosyo, nga girepresentahan sa “mga magpapatigayon” diha sa Pinadayag 18:3, maoy bahin sa kalibotan ni Satanas. Dili sama sa bug-os nga pagkabulag sa katawhan sa Diyos gikan sa politika ug sa bakak nga relihiyon, ang kadaghanan dili bug-os makabulag sa sistema sa negosyo sa kalibotan ni Satanas. Ingong mga Kristohanon, angay natong susihon ang atong panglantaw sa sistema sa negosyo pinaagi sa pagpangutana sa kaugalingon: ‘Unsaon nako paggamit ang akong materyal nga mga butang sa pagpakita sa akong pagkamatinumanon sa Diyos? Unsay akong buhaton aron dili ko bug-os makapakigbahin sa sistema sa negosyo? Unsang mga eksperyensiya ang nagpakita nga ang katawhan sa Diyos bug-os nagsalig kaniya niining malisod nga panahon?’ w17.07 7-8 ¶1-3

Nahibalo gayod si Jesus sa mga presyur gumikan sa mga kabalaka niining sistemaha sa mga butang. Sa iyang ilustrasyon bahin sa magpupugas, si Jesus miingon nga ang pipila modawat sa “pulong sa gingharian” ug mouswag sa sinugdan apan “ang kabalaka niining sistema sa mga butang ug ang malimbongong gahom sa mga bahandi motuok sa pulong.” (Mat. 13:19-22; Mar. 4:19) Sa pagkatinuod, kon dili ta magbantay, ang adlaw-adlawng mga kabalaka sa kinabuhi makahaylo sa atong kasingkasing ug makapaluya nato sa espirituwal. Mapamatud-an nato ang kalalom sa atong gugma kang Kristo pinaagi sa pag-una sa buluhaton nga iyang gisugo kanato. Unsaon nato pagseguro nga padayon natong mahimo kana? Matag karon ug unya, angay natong pangutan-on ang kaugalingon, ‘Unsa man gyoy labaw nakong gihigugma? Unsa may makahatag nakog dakong kalipay, ang espirituwal nga kalihokan o ang adlaw-adlawng kalihokan?’ w17.05 23 ¶3-4

Dihang ang mga langyaw nagpuyo nga layo sa mga Saksi nga pareho nilag pinulongan, kinahanglan silang magpasakop sa lokal nga kongregasyon. (Sal. 146:9) Pero kon naay kongregasyon sa duol nga naggamit sa imong pinulongan, kini ang pangutana: Unsang pinulongan sa kongregasyon ang mas makaayo sa imong pamilya? Human sa pagpamalandong, pag-ampo, ug pagkonsulta sa iyang asawa ug mga anak, kinahanglang modesisyon ang ulo sa pamilya. (1 Cor. 11:3) Kinahanglang konsiderahon sa mga ginikanan kon unsa gyoy gikinahanglan sa ilang mga anak. Siyempre​—bisag unsay pinulongan—​aron makasabot pag-ayo sa kamatuoran, ang mga bata nagkinahanglag labaw pa kay sa pipila lang ka oras nga espirituwal nga edukasyon diha sa tigom kada semana. Konsideraha kini: Sa mga tigom nga masabtan nila pag-ayo ang pinulongan, may makat-onan na ang mga bata bisag pinaagi lang sa pagtambong, tingali labaw pa sa gidahom sa ginikanan. Dili tingali ingon ana ang kahimtang sa mga bata nga dili kaayo makasabot sa pinulongan sa tigom.​—1 Cor. 14:11. w17.05 10 ¶10-11

Maayong pangutan-on nato ang kaugalingon: ‘Duna ba koy pagtuo ug kaisog sa paggamit sa tanan nakong nabatonan aron tumanon ang klarong sugo ni Jehova? Kon naghunahuna ko nga mobalhin sa laing siyudad o nasod aron mokitag dako, gipalandong ba nako ang epekto niini sa akong pamilya ug kongregasyon?’ Gipasidunggan ta ni Jehova pinaagi sa pagtugot kanato nga suportahan ang iyang pagkasoberano. Sukad nga nahaylo sa Yawa ang unang mga tawo sa pagsuportar sa iyang pagmando, ang imong pagsuportar sa pagmando ni Jehova magpakita kang Satanas kon kinsay imong gidapigan. Ang imong pagtuo ug integridad nagpalihok nimo sa pagboluntaryo, ug kini nakapalipay kang Jehova. (Prov. 23:15, 16) Iyang gigamit ang imong pagsuportar kaniya aron matubag ang mga pagtamay ni Satanas. (Prov. 27:11) Busa, tungod sa imong pagkamatinumanon, naghatag ka kang Jehova ug usa ka butang nga bililhon ug makapalipay kaayo kaniya. w17.04 32 ¶15-16

Ang Moisesnong Balaod nag-ingon: “Kon ang usa ka tawo manaad kang Jehova o manumpa ug usa ka panumpa . . . , kinahanglan nga siya dili maglapas sa iyang pulong. Magabuhat siya sumala sa tanan nga migula sa iyang baba.” (Num. 30:2) Sa ulahi, si Solomon giinspirar sa pagsulat sa teksto karong adlawa. Gipamatud-an ni Jesus ang kaseryoso sa paghimog mga panaad dihang siya miingon: “Giingon kini ngadto kanila sa kanhing panahon, ‘Dili ka manumpa nga dili nimo tumanon, apan angay nga bayran nimo ang imong mga panaad kang Jehova.’” (Mat. 5:33) Busa, klaro nga seryoso gayod ang paghimog mga panaad ngadto sa Diyos. Ang pagtuman nato sa atong mga panaad makaapektar sa atong relasyon kang Jehova. Si David misulat: “Kinsa ba ang makasaka ngadto sa bukid ni Jehova, ug kinsa ba ang makatindog diha sa iyang balaang dapit? Siya nga . . . wala magdala sa Akong [si Jehova] kalag ngadto sa bug-os nga kawalay-kapuslanan [o, manumpag bakak], ni nanumpa sa pagkamalimbongon.”​—Sal. 24:3, 4. w17.04 4 ¶3-4

Kon ang usa ka Kristohanon maghunahuna nga biktima siya sa inhustisya, kinahanglang dili niya kini ipanabi sa uban. Siyempre, maayong mangayo siyag tabang sa mga ansiyano ug pahibal-on sila kon may usa sa kongregasyon nga nakahimog seryosong sala. (Lev. 5:1) Apan, sa daghang kahimtang nga wala maglangkit ug seryosong sala, lagmit mas maayong sulbaron ang dili pagsinabtanay nga dili apilon ang uban, bisan gani ang mga ansiyano. (Mat. 5:23, 24; 18:15) Hinaot magmaunongon ta ug ipadapat ang mga prinsipyo sa Bibliya niini nga mga situwasyon. Sa pipila ka kahimtang, tingali maamgohan nato nga dili gyod diay ta biktima sa inhustisya. Mapasalamaton gyod ta nga wala nato padak-a ang problema pinaagig pagbutangbutang sa atong igsoon sa pagtuo! Hinumdomi, kita man husto o sayop, ang pagsultig sakit dili makasulbad sa problema. Ang pagkamaunongon kang Jehova ug sa atong mga igsoon motabang nato nga malikayan kana. w17.04 21 ¶14