Oktubre

Si Jehova ang Tuboran sa kaalam, ug dagaya siyang nagahatag sa iyang kaalam ngadto sa uban. Ang usa ka paagi nga mabatonan nato ang kaalam sa Diyos mao ang pagdawat sa iyang disiplina. Ug ang maong kaalam makapanalipod nato batok sa moral ug espirituwal nga kadaot. (Prov. 2:10-12) Ingong resulta, “magpabilin [ta] diha sa gugma sa Diyos . . . nga nagapanglantaw sa kinabuhing walay kataposan.” (Jud. 21) Apan tungod sa atong pagkamakasasala, pagpadako kanato, ug sa uban pang rason, malisdan ta sa pagdawat sa disiplina o sa paglantaw niana sa positibong paagi. Maapresyar nato ang disiplina kon atong maeksperyensiyahan ang mga benepisyo niana, nga nagpamatuod sa gugma sa Diyos kanato. Ang Proverbio 3:11, 12 nag-ingon: “Ang disiplina ni Jehova, Oh anak ko, ayaw isalikway . . . kay ang gihigugma ni Jehova iyang ginabadlong.” Oo, dili gyod nato kalimtan nga naghunahuna si Jehova sa atong kaayohan. (Heb. 12:5-11) Kay ang Diyos nakaila pag-ayo kanato, ang iyang disiplina kanunayng haom ug mao gyoy atong gikinahanglan. w18.03 28-29 ¶1-2

Gisulat kana ni apostol Pedro sa mga kongregasyon sa Asia Minor nga lainlaig kultura ug nag-atubag ‘nagdilaab nga mga pagsulay.’ Unsay makatabang sa tanang Kristohanon sa paglahutay nianang malisod nga panahon? (1 Ped. 1:1; 4:4, 7, 12) Matikdi nga si Pedro nagdasig sa iyang mga igsoon nga magmaabiabihon “sa usag usa,” niadtong ila nang nailhan ug nakauban. Sa unsang paagi makatabang nila ang pagkamaabiabihon? Kana makapasuod nila. Hunahunaa ang imong eksperyensiya. Naimbitar na ba ka sa usa ka igsoon sa iyang balay? Di ba malipay kang handomon ang maong okasyon? Dihang nangimbitar ka sa pipila ka igsoon sa inyong kongregasyon, dili ba nagkasuod mo? Pinaagi sa pagpangimbitar, mas mailhan nato ang atong mga igsoon kay sa ubang situwasyon nga kauban nato sila. Ang mga Kristohanon sa adlaw ni Pedro kinahanglang mas magkasuod samtang nagkagrabe ang kahimtang. Mao man usab ang mga Kristohanon niining “kataposang mga adlaw.”​—2 Tim. 3:1. w18.03 14-15 ¶1-3

Maayo ang giingon sa Bibliya bahin sa mga tawong mahunahunaon sa espirituwal. Gipakita sa Roma 8:6 ang kaayohan sa pagkamahunahunaon sa espirituwal: “Ang paghunahuna sa unod nagkahulogan ug kamatayon, apan ang paghunahuna sa espiritu nagkahulogan ug kinabuhi ug kalinaw.” Kon magpokus ta sa espirituwal nga mga butang, atong maangkon karon ang kalinaw uban sa Diyos ug sa atong kaugalingon, ug sa umaabot kinabuhing walay kataposan. Pero, nagkinabuhi ta sa peligrosong palibot. Kay gilibotan ta sa mga tawong unodnon ug panghunahuna, kinahanglan tang maningkamot pag-ayo aron maugmad ang espirituwalidad ug mapanalipdan kini. Kon mawad-an ang usa sa iyang espirituwalidad, dali ra siyang maimpluwensiyahan sa hugawng “hangin” niining kalibotana. Si Judas naghisgot bahin sa mga tawo nga mahimong pisikal kaayo nga mawad-an na sila sa ilang espirituwalidad.​—Jud. 18, 19. w18.02 19 ¶5, 7; 20 ¶8

Daghang doktor ug nars ang nag-atiman niadtong dunay mananakod nga sakit. Giatiman nila ang ilang mga pasyente kay gusto nilang matabangan kini. Pero, sa pagbuhat niana kinahanglan nilang proteksiyonan ang kaugalingon aron dili sila matakdan sa sakit nga ilang gitambalan. Sa susama, daghan kanato ang nagpuyo ug nagtrabaho uban niadtong may mga panglantaw ug kinaiya nga sukwahi sa diyosnong mga hiyas. Tingali lisod kini alang kanato. Niining kataposang mga adlaw, nagkaus-os ang moral nga sukdanan. Ang ikaduhang sulat ni apostol Pablo kang Timoteo naghisgot sa mga kinaiya sa mga tawong nahilayo sa Diyos. (2 Tim. 3:1-5) Bisag makuratan tingali ta sa pagdaghan sa mga tawong ingon nianag kinaiya, posibleng maimpluwensiyahan ta sa ilang batasan ug panglantaw. (Prov. 13:20) Busa, maningkamot ta nga dili matakdan sa dili maayong kinaiya samtang nagtabang sa uban sa espirituwal nga paagi. w18.01 27 ¶1-2

Niadtong 33 C.E., ang nabanhawng si Jesus nagpakita sa kapig 500 ka tawo​—lalaki, babaye, ug lagmit may mga bata. Tingali nianang panahona nga iyang gisulti ang teksto karong adlawa. (1 Cor. 15:6) Oo, lagmit gatosan sa iyang sumusunod ang nakadungog sa sugo ni Jesus sa paghimog mga tinun-an. Busa, gipadayag ni Jesus nga ang bawtismo maoy kinahanglanon niadtong modawat sa yugo sa pagka-Kristohanon. (Mat. 11:29, 30) Aron ang usa makaalagad sa Diyos sa dalawatong paagi, kinahanglan niyang ilhon ug dawaton nga gigamit ni Jehova si Jesus sa pagpalampos sa Iyang katuyoan. Human niana, puwede nang bawtismohan ang maong tawo. Mao ra ni ang bawtismo sa tubig nga giuyonan sa Diyos. Sa Bibliya, daghag pamatuod nga sa unang siglo, nasabtan sa bag-ong mga tinun-an sa Kristo ang kaimportante sa bawtismo. Ug wala sila maglangan sa pagpabawtismo.​—Buh. 2:41; 9:18; 16:14, 15, 32, 33. w18.03 5 ¶8

Karon, nagpuyo ta niining kalibotan nga nadaot sa moral ug espirituwal tungod sa Dakong Babilonya, ang imperyo sa bakak nga relihiyon, ang “puloy-anan sa mga demonyo.” (Pin. 18:2) Mao nga lahi kaayo ta, gani bugalbugalan pa ta sa uban. (Mar. 13:13) Busa, sama kang Daniel, makigsuod ta sa atong Diyos, si Jehova. Dihang mapainubsanon ug masinugtanon tang mosalig niya, mahimo pod tang bililhon sa iyang mga mata. (Hag. 2:7) Ang mga ginikanan karon makakat-on sa ginikanan ni Daniel. Sa unsang paagi? Bisag kaylap ang pagkadaotan sa Juda sa bata pa si Daniel, nagdako siyang nahigugma sa Diyos. Gipakita niana nga gibansay si Daniel sa iyang ginikanan. (Prov. 22:6) Gani, ang ngalan ni Daniel, nga nagkahulogang “Ang Akong Maghuhukom Mao ang Diyos,” nagpakita nga ang ginikanan ni Daniel mahinadlokon sa Diyos. (Dan. 1:6) Busa, mga ginikanan, ayawg surender sa pagtabang sa inyong mga anak. Hinuon, magmapailobon sa pagtudlo kanila. (Efe. 6:4) Pag-ampo sab mo uban nila ug para kanila. Kon maningkamot mo sa pagtisok sa kamatuoran diha sa ilang kasingkasing, panalanginan mo ni Jehova.​—Sal. 37:5. w18.02 5 ¶12; 6 ¶14-15

Ang paghatag maoy paagi sa atong pagsimba kang Jehova. Sa panan-awon, nadungog ni apostol Juan ang mga alagad ni Jehova sa langit nga nag-ingon: “Takos ikaw, Jehova, nga among Diyos, nga modawat sa himaya ug sa dungog ug sa gahom, tungod kay imong gilalang ang tanang butang, ug tungod sa imong kabubut-on sila milungtad ug nalalang.” (Pin. 4:11) Seguradong mouyon ka nga takos si Jehova sa tanang himaya ug pasidungog, busa ihatag nato kaniya ang atong kinamaayohan. Pinaagi kang Moises, gisugo ni Jehova ang nasod sa Israel sa pag-atubang kang Jehova sa tulo ka tinuig nga pista. Ang paghatag maoy bahin sa ilang pagsimba sa maong mga pista. Busa, ang mga Israelinhon gisugo nga dili “moatubang kang Jehova nga walay dala.” (Deut. 16:16) Karon usab, importanteng bahin sa pagsimba ang kinabubut-ong paghatag ingong apresasyon ug pagsuportar sa buluhaton sa yutan-ong bahin sa organisasyon ni Jehova. w18.01 18 ¶4-5

Si Jesus midugang: “Isangon diha kaninyo ang akong yugo . . . Kay ang akong yugo masayon ug ang akong luwan magaan.” (Mat. 11:29, 30) Tinuod gayod kana! Usahay, gikapoy tingali ta dihang motambong sa tigom o mosangyaw. Apan unsay atong bation inig-uli nato? Kita marepreskohan ug mas andam nang moatubang sa mga problema. Gaan gayod ang yugo ni Jesus! Usa ka sister nga tawgon natog Kayla nag-antos sa chronic fatigue syndrome (sobrang kakapoy sa lawas), depresyon, ug grabeng sakit sa ulo. Busa, malisdan siya usahay sa pagtambong sa tigom. Apan, human siya maningkamot sa pagtambong sa usa ka tigom, siya misulat: “Ang pakigpulong naghisgot bahin sa kaluya sa emosyon. Ang impormasyon gipresentar sa mabination kaayong paagi maong nakahilak ko. Nagpahinumdom ni nako nga kinahanglan kong motambong sa tigom.” Nalipay kaayo siya nga naningkamot siya sa pagtambong! w18.01 8-9 ¶6-7

Komosta kon ang imong anak mosugod sa pagduhaduha pipila ka panahon human sa bawtismo? Pananglitan, madani tingali siya sa mga butang sa kalibotan o mosugod sa pagduhaduha kon maalamon ba gyod ang pagkinabuhi subay sa mga prinsipyo sa Bibliya. (Sal. 73:1, 3, 12, 13) Ingong ginikanan, hinumdomi nga ang imong paagi sa pagtubag sa maong mga pangutana makaapektar kon magpadayon ba siya sa pag-alagad o mobiya sa kamatuoran. Magmadeterminadong dili makig-away sa imong anak bahin niining mga butanga​—bata man siya o tin-edyer. Angay nga mahibalo siyang gimahal nimo siya ug gusto nimo siyang tabangan. Siyempre, ang bawtismadong batan-on nakahimog seryosong pagpahinungod kang Jehova. Nanaad siyang higugmaon ang Diyos ug unahon kanunay ang Iyang kabubut-on. (Mar. 12:30) Giisip ni Jehova nga seryoso ang maong panaad, ug kinahanglang dili kana pakamenoson sa usa nga nanaad.​—Eccl. 5:4, 5. w17.12 22 ¶16-17

Sama kang Marta, ang maunongong mga alagad ni Jehova nahibalo nga may pagkabanhaw sa umaabot. Hunahunaa ang gisugo sa Diyos kang Abraham bahin kang Isaac, ang dugay nang gihulat nga manununod. Si Jehova miingon: “Kuhaa, palihog, ang imong anak nga lalaki, ang imong bugtong anak nga imong gihigugma pag-ayo, si Isaac, ug . . . itanyag siya ingong usa ka halad-nga-sinunog.” (Gen. 22:2) Hunahunaa kon unsay gibati ni Abraham sa pagkadungog niana nga sugo. Si Jehova nagsaad nga pinaagi sa kaliwat ni Abraham, ang tanang nasod mapanalanginan. (Gen. 13:14-16; 18:18; Roma 4:17, 18) Dugang pa, si Jehova miingon nga ang panalangin moabot “pinaagi kang Isaac.” (Gen. 21:12) Pero unsaon man pagkatuman niana kon patyon ni Abraham si Isaac ingong halad? Si Pablo giinspirar sa pagpatin-aw nga si Abraham nagtuo nga ang Diyos makabanhaw kang Isaac. (Heb. 11:17-19) Wala mahibalo si Abraham kon kanus-a mabanhaw ang iyang anak. Pero siya misalig nga banhawon ni Jehova si Isaac. w17.12 5-6 ¶12-14

Angay sab natong sundogon ang panglantaw sa Diyos sa kinabuhi. Si Jehova “nagtinguha nga ang tanan makakab-ot sa paghinulsol.” (2 Ped. 3:9) Ingon ka ba usab niana? Imong makita nga ang pagkamaluluy-on magdasig nimo sa pagpauswag sa imong ministeryo ug mas makapalipay nimo. Masundog sab nato ang panglantaw ni Jehova sa kinabuhi kon maningkamot tang malayo sa peligro. Kinahanglang mag-amping ta kon magdrayb ug magtrabaho, bisan dihang kita magtukod, magmentinar, o kaha magbiyahe padulong sa tigomanan. Ang kinabuhi mas importante kay sa pagdaginot ug panahon o kuwarta. Ang Diyos pirmeng mobuhat kon unsay matarong ug husto. Gusto natong mahisama niya. Ang mga ansiyano ilabinang maningkamot nga dili mameligro ang ilang kinabuhi ug niadtong nagtrabaho uban nila. (Prov. 22:3) Kon pahinumdoman ka sa ansiyano bahin niana, paminawa siya. (Gal. 6:1) Lantawa ang kinabuhi sama sa panglantaw ni Jehova, ug “walay pagkasad-an sa dugo diha kanimo.”​—Deut. 19:10. w17.11 16 ¶11-12

Parehas ni apostol Pablo, ang dinihogang mga Kristohanon karon may bililhong paglaom nga makadawat sa “ganti nga pagkatinawag sa Diyos.” (Filip. 3:14) Sila naglaom nga mag-alagad kauban ni Jesu-Kristo sa langitnong Gingharian ug magtabang niya nga himoong hingpit ang katawhan. (Pin. 20:6) Talagsaon kaayo ang palaaboton niadtong giimbitar sa Diyos niana nga paglaom! Ang ubang karnero may lahi nga paglaom. Sila naglaom sa ganti nga mabuhi sa walay kataposan sa yuta​—ug pagkamakapalipay niana! (2 Ped. 3:13) Aron tabangan ang ubang dinihogan nga magmatinumanon ug madawat ang ganti, si Pablo nag-awhag nila: “Ipadayon pagpunting ang inyong mga kaisipan sa mga butang sa itaas.” (Col. 3:2) Kinahanglang kanunay nilang hinumdoman ang ilang bililhong paglaom nga mabuhi sa langit. (Col. 1:4, 5) Oo, ang pagpamalandong sa mga panalangin nga gisaad ni Jehova makatabang sa iyang mga alagad sa paghunahuna pirme sa ganti.​—1 Cor. 9:24. w17.11 25 ¶1-2

Daghan sa mga kanta diha sa Malipayong Mag-awit Kang Jehova anaa sa pormang pag-ampo. Pinaagi niining mga awita, mapahayag nimo kang Jehova ang imong pagbati. Ang ubang awit motabang sa “pagdasig [kanato] sa paghigugma ug sa maayong mga buhat.” (Heb. 10:24) Siyempre gusto natong mapamilyar sa musika, tono, ug liriko sa atong mga awit. Mahimo nimo kana pinaagi sa pagpaminaw sa gikanta nga mga bersiyon niini diha sa jw.org. Kon imong praktison kining mga kantaha sa balay, makakat-on ka sa pag-awit niini nga kinasingkasing ug may kompiyansa. Hinumdomi nga importanteng bahin sa atong pagsimba ang pag-awit. Usa kini ka puwersadong paagi sa pagpahayag sa atong gugma ug apresasyon kang Jehova. (Isa. 12:5) Kon malipayon kang moawit, madasig pod nimo ang uban sa pagkanta nga may kompiyansa. Oo, ang tanan sa kongregasyon​—batan-on, tigulang, ug mga interesado—​makaapil niining direktang pagsimba kang Jehova. Busa ayaw pagpanuko sa pag-awit nga kinasingkasing. Oo, mag-awit nga malipayon! w17.11 7 ¶18-19

Daghan sa mga bakwet karon naggikan sa mga nasod diin gidili ang buluhatong pagsangyaw. Tungod sa madasigong mga Saksi diha sa mga nasod nga midawat sa mga bakwet, libolibong bakwet ang nakadungog sa “pulong sa gingharian” sa unang higayon. (Mat. 13:19, 23) Daghang “nabug-atan” ang nahupayan diha sa atong mga tigom ug nakaingon dayon: “Ang Diyos anaa gayod sa inyong taliwala.” (Mat. 11:28-30; 1 Cor. 14:25) Kadtong mosangyaw sa mga bakwet kinahanglang “magmabinantayon” ug ‘magmaalamon.’ (Prov. 22:3) Magmapailobon dihang maminaw sa ilang mga problema, apan ayaw paghisgot ug politika. Sunda ang mga instruksiyon gikan sa sangang buhatan ug sa lokal nga mga awtoridad; ayaw gayod ipameligro ang imong kaugalingon o ang uban. Tungod kay ang mga bakwet lahig relihiyon ug kultura, kinahanglang sayron ug tahoron nato ang ilang pagbati ug opinyon. Pananglitan, ang mga tawo gikan sa pipila ka nasod estrikto kaayo maylabot sa sininaan sa mga babaye. Busa, dihang magsangyaw sa mga bakwet, maayo nga ang atong sinina dili makapandol nila. w17.05 7 ¶17-18

Puwede tang mangayog balaang espiritu ni Jehova aron mapakita ang bunga niini dihang makig-estorya sa atong dili magtutuo nga mga paryente. Dili ta angayng makigdebate bahin sa tanan nilang bakak nga pagtulon-an. Kon masakitan ta sa ilang gisulti o gibuhat, masundog nato ang mga apostoles. Si Pablo misulat: “Dihang gisultihag pasipala, kami nanalangin; sa dihang gilutos, kami nag-antos; sa dihang gidaot ang dungog, kami nangaliyupo.” (1 Cor. 4:12, 13) Bisag dakog ikatabang ang malumong sinultihan, ang maayong panggawi mas dakog epekto sa atong pakiglabot sa dili magtutuong mga paryente. (1 Ped. 3:1, 2, 16) Pinaagi sa imong ehemplo, ipakita sa imong mga paryente nga ang mga Saksi ni Jehova may malipayong kaminyoon, nag-atiman sa ilang mga anak, hinlo sa moral ug pisikal, ug may makapatagbawng kinabuhi. Bisag dili dawaton sa atong mga paryente ang kamatuoran, malipay gihapon ta nga nahimuot si Jehova sa atong maayong panggawi. w17.10 15 ¶13-14

Masorpresa ba ta nga daghan karon ang nakahimog dagkong kausaban tungod sa ilang pagtuon sa Pulong sa Diyos? Dili gyod! Ang ilang eksperyensiya nagpahinumdom nato sa unang siglong mga igsoon, nga may langitnong paglaom. (1 Cor. 6:9-11) Human hisgoti ang klase sa mga tawo nga dili makapanunod sa Gingharian sa Diyos, si apostol Pablo midugang: “Ingon niana ang pipila kaninyo kaniadto.” Pero nabag-o sila sa tabang sa Kasulatan ug sa balaang espiritu sa Diyos. Bisan human makadangat sa kamatuoran, ang pipila padayong nakigbisog sa seryosong mga problema sa ilang espirituwalidad. Ang Bibliya naghisgot sa usa ka dinihogang Kristohanon nga kinahanglang ipalagpot; sa ulahi, siya napasig-uli. (1 Cor. 5:1-5; 2 Cor. 2:5-8) Makapadasig ang pagkahibalo nga ang atong mga igsoon sa pagtuo nakalahutay sa mga problema pinaagi sa tabang sa Pulong sa Diyos! Seguradong gusto gyod natong gamiton ang Bibliya sa bug-os. w17.09 23-24 ¶2-3

Ang gugma nga gibase sa matarong nga mga prinsipyo (a·gaʹpe) maoy regalo ni Jehova. Siya ang Tinubdan niini. (1 Juan 4:7) Kini ang kinalabwang matang sa gugma. Bisag apil niini ang pagmahal ug pagkamabination, kini ilabinang maila pinaagi sa dili mahakogong mga buhat nga makaayo sa uban. Sumala sa usa ka reperensiya, ang a·gaʹpe “maila lang pinaagi sa mga buhat niini.” Kon kita magpakita o pakitaan ug dili mahakogong gugma, ang atong kinabuhi mahimong mapuslanon ug malipayon. Si Jehova nahigugma na sa mga tawo bisan sa wala pa niya lalanga si Adan ug Eva. Iyang gihimo ang yuta aron puy-an sa tawo hangtod sa kahangtoran, diin ang tawo dili lang basta mabuhi kondili magmalipayon usab. Si Jehova naghimo niini para sa atong kaayohan, dili sa iyaha. Nagpakita sab siyag dili mahakogong gugma pinaagi sa pagpanalangin sa mga anak ni Adan ug paghatag nilag paglaom nga mabuhi sa walay kataposan sa Paraiso. w17.10 7 ¶1-2

Si Santiago midugang: “Kon kamo magpadayon sa pagpakitag paboritismo, kamo nakasala.” (Sant. 2:9) Sa laing bahin, ang gugma magtabang nato nga likayan ang diskriminasyon tungod sa edukasyon, rasa, o estado sa kinabuhi. Oo, angayng sinsero ang atong pagkadili-mapihigon. Kinahanglang tinuod kining bahin sa atong pagkatawo. Ang gugma “hataas-ug-pailob ug maluloton” ug dili mapahitas-on. (1 Cor. 13:4) Nagkinahanglan gyod tag pailob, pagkamaayo, ug pagpaubos aron padayon natong masangyaw ang mensahe sa Gingharian. (Mat. 28:19) Ang maong mga hiyas makatabang sab nato aron maayo ang atong relasyon sa tanang igsoon. Unsay panalangin sa pagpakita sa maong gugma? Kana makapahiusa sa kongregasyon nga makahatag ug pasidungog kang Jehova ug makadani sa mga interesado. Mao diay nga dihang ang Bibliya naghisgot bahin sa bag-ong pagkatawo, kini mihinapos: “Gawas pa niining tanang butanga, isul-ob ninyo ang gugma, kay kini maoy usa ka hingpit nga bugkos sa panaghiusa.”​—Col. 3:14. w17.08 26 ¶18-19

Dili ba angay sab tang magmabination sa mga tawo nga posible pang maghinulsol ug makaangkon sa pabor sa Diyos? Dili gusto ni Jehova nga may mamatay sa umaabot nga paghukom. (2 Ped. 3:9) Busa samtang dili pa laglagon ang mga daotan, padayon natong isangyaw ang maluluy-ong pasidaan sa Diyos. Makakat-on sab ta kang Jesus. Nagmabination siya sa panon nga misunod niya, kay “sila pinanitan ug nagkatibuagsa sama sa mga karnero nga walay magbalantay.” Unsay iyang gihimo sa ilang makaluluoyng kahimtang? “Siya misugod sa pagtudlo kanila ug daghang butang.” (Mat. 9:36; Mar. 6:34) Lahi kaayo siya sa mga Pariseo, kinsa dili gustong motabang sa ordinaryong mga tawo. (Mat. 12:9-14; 23:4; Juan 7:49) Sama kang Jesus, gusto ba pod nimong tabangan ang mga tawong gigutom sa espirituwal? w17.09 10 ¶6, 9

Samtang didto sa bilanggoan sa Ehipto, may ideya ba si Jose nga mahimo siyang ikaduha sa kinatas-ang posisyon sa nasod o nga magamit siya ni Jehova sa pagluwas sa iyang pamilya gikan sa kagutom? (Gen. 40:15; 41:39-43; 50:20) Walay duhaduha nga gihimo ni Jehova ang labaw pa sa gidahom ni Jose. Gidahom kaha sa tigulang nang si Sara nga tugotan siya ni Jehova nga makabaton ug anak? Ang pagpanganak ni Sara kang Isaac seguradong milabaw sa tanan niyang gidahom. (Gen. 21:1-3, 6, 7) Tinuod, dili ta makadahom nga milagrosong wagtangon ni Jehova ang tanan natong problema sa wala pa ang gisaad nga bag-ong kalibotan. Ug dili ta maghunahuna nga kinahanglan siyang mobuhat ug talagsaong mga butang alang kanato. Apan nahibalo ta nga ang Diyos kinsa mitabang sa iyang mga alagad sa talagsaong paagi mao ang atong Diyos, si Jehova. (Isa. 43:10-12) Nahibalo ta nga mahimo niya ang bisan unsa sa paghatag natog kusog sa pagbuhat sa iyang kabubut-on. (2 Cor. 4:7-9) Oo, matabangan ta ni Jehova sa pagbuntog sa daw dili masulbad nga problema kon magmatinumanon ta kaniya. w17.08 11 ¶13-14

Pinaagi sa bug-os panahong pag-alagad, mailaila nimo ang ubang naa sa bug-os panahong pag-alagad nga makatabang nimo nga mahimong hamtong nga Kristohanon. Nakita sa daghan nga ang pag-alagad nga bug-os panahon samtang batan-on pa nakatabang nila nga mas molampos sa ilang kaminyoon. Sagad, kadtong nagpayunir sa wala pa magminyo nakapadayon sa pagpayunir nga magkauban bisag minyo na. (Roma 16:3, 4) Dihang magplano, ilakip kon unsay naa sa imong kasingkasing. Ang Salmo 20:4 nag-ingon bahin kang Jehova: “Magahatag unta siya kanimo nianang nahiuyon sa imong kasingkasing, ug tumanon unta niya ang tanan nimo nga laraw [o, plano].” Busa, hunahunaag maayo kon unsay gusto nimong buhaton sa imong kinabuhi. Pamalandonga ang ginahimo ni Jehova karon ug ang puwede nimong himoon sa pag-alagad kaniya. Dayon, paghimog plano nga makapalipay niya. Makapalipay kaayo ang bug-os nga pag-alagad kang Jehova kay kini ang kinabuhi nga magpasidungog kaniya. Oo, “magbaton ka . . . ug tumang kalipay diha kang Jehova, ug ihatag niya kanimo ang mga hangyo sa imong kasingkasing.”​—Sal. 37:4. w17.07 26 ¶15-18

Ang usa ka tawo nga makahimog kalamposan sa iyang asaynment ug makapakitag Kristohanong hiyas takos sa pagdayeg. Kon makadayeg ta sa mga tawo, unsa pa kaha sa atong Diyos nga si Jehova! Makadayeg ta niya tungod sa iyang dakong gahom nga makita sa iyang kalalangan, o tungod sa iyang gugma kanato pinaagi sa halad lukat sa iyang bugtong Anak. Ang magsusulat sa Salmo 147 napalihok sa pagdayeg kang Jehova. Gidasig sab niya ang uban sa pagdayeg sa Diyos. (Sal. 147:7, 12) Wala ta mahibalo kon kinsay nagsulat niini nga salmo. Pero kini nga salmista lagmit nabuhi dihang ang mga Israelinhon nga naulipon sa Babilonya gipabalik ni Jehova sa Jerusalem. (Sal. 147:2) Napalihok ang salmista sa pagdayeg kang Jehova kay ang katawhan sa Diyos makasimba nag balik sa ilang nasod. Unsay mga rason nga makaingon kag “Aleluya”?​—Sal. 147:1. w17.07 17 ¶1-3

Nahibalo si Jesus nga kadaghanan sa iyang sumusunod kinahanglang mangitag panginabuhian niining dili patas nga sistema sa negosyo. Bisag wala ipatin-aw ni Jesus kon nganong gitawag niya ang bahandi ingong “dili-matarong,” klaro nga gihisgotan sa Bibliya nga dili bahin sa katuyoan sa Diyos ang pagnegosyo. Si Jehova dagayang nagtagana sa panginahanglan ni Adan ug Eva sa Eden. (Gen. 2:15, 16) Sa ulahi, dihang gibubo ang balaang espiritu sa unang siglong kongregasyon sa mga dinihogan, ‘walay usa nga miingon nga ang bisan unsa sa mga butang nga iyang gipanag-iya iyang kaugalingon; apan giambitan sa tanan ang tanan nilang butang.’ (Buh. 4:32) Si propetang Isaias naghisgot sa panahon diin dagayang matagamtam sa tanang tawo ang bahandi sa yuta. (Isa. 25:6-9; 65:21, 22) Apan sa pagkakaron, kinahanglang gamiton sa mga sumusunod ni Jesus ang “praktikal nga kaalam” sa pagpanginabuhi, gamit ang “dili-matarong nga mga bahandi” niining kalibotana samtang nag-alagad sa Diyos.​—Luc. 16:8. w17.07 8 ¶4-6

Sa basahon sa Job, usa sa unang nasulat nga mga basahon sa Bibliya, atong masayran ang pangangkon ni Satanas nga kon si Job mag-antos pag-ayo, isalikway niini ang Diyos. Misugyot si Satanas nga pasakitan sa Diyos si Job. Wala kana buhata ni Jehova, pero gitugotan niya si Satanas sa pagsulay kang Job. Wala madugay human niana, nangamatay ang mga sulugoon ni Job, nahanaw ang iyang panginabuhian, ug namatay ang iyang 10 ka pinalanggang anak. Gihimo kini ni Satanas sa paagi nga morag ang Diyos mismo ang nagpahinabo sa mga kasakit ni Job. (Job 1:13-19) Dayon, gipahinabo ni Satanas nga takboyan si Job ug masakit ug makaluod nga balatian. (Job 2:7) Misamot ang kaguol ni Job kay ang iyang asawa ug tulo ka nagpakaaron-ingnong higala misultig sakit ug makapaluyang mga pulong. (Job 2:9; 3:11; 16:2) Unsay resulta? Napamatud-ang sayop ang pangangkon ni Satanas. Si Job wala gayod motalikod kang Jehova.​—Job 27:5. w17.06 24 ¶9-10

Karon, giila sa mga ulo sa pamilya nga duna silay Kasulatanhong responsibilidad sa pagtagana sa materyal nga panginahanglan sa ilang pamilya. Kinahanglang magkugi sila aron matuman kini nga obligasyon. Apan, niining kataposang mga adlaw, ang sekular nga trabaho sagad magpahinabog kabalaka. Tungod kay daghan ang nangitag trabaho ug diyutay lang ang trabahong masudlan, daghang trabahante ang napugos sa pag-obertaym, usahay bisag gamay rag suweldo. Dugang pa, tungod sa kanunayng presyur sa paggamag dugang mga produkto, ang mga trabahante nabug-atan sa pisikal, mental, ug emosyonal. Ang mga trabahante nga dili andam mosakripisyo alang sa ilang kompaniya mameligrong mapotbol sa trabaho. Ingong mga Kristohanon, angay nga mas maunongon ta kang Jehova, imbes sa atong amo. (Luc. 10:27) Ang sekular nga trabaho maoy usa ka paagi nga matagan-an ang atong pangunang panginahanglan ug masuportahan ang atong ministeryo. Pero, kon dili ta magbantay ang trabaho mahimong makabalda sa atong pagsimba. w17.05 23 ¶5-7

Usahay, ang mga bag-ohan mohangyo sa hamtong nga mga magmamantala sa pagtabang nila nga tudloan sa kamatuoran ang ilang mga anak. Kon modesisyon ang ginikanan nga lain ang modumalag pagtuon sa ilang anak, dili angayng pulihan sa nagdumala ang papel sa ginikanan. (Efe. 6:1-4) May mga kahimtang nga ang usa ka Saksi hangyoon sa pag-Bible study sa mga anak sa dili Saksing ginikanan. Bisan pa niana, angayng hinumdoman sa Saksi nga, sa iyang pagtabang sa espirituwal, wala siya mahimong ginikanan sa bata. Ug mas maayong dumalahon ang pagtuon diha mismo sa balay sa ginikanan o uban sa hamtong nga Saksi o kaha sa haom nga publikong lugar aron dili kana saypog sabot sa uban. Sa ngadtongadto, gidahom nga ang mga ginikanan mao nay moabaga sa ilang hinatag sa Diyos nga responsabilidad​—ang pag-atiman sa espirituwalidad sa ilang anak. w17.06 8 ¶15-16

Kon gibati sa mga anak nga dili na sila parehog kultura sa ilang ginikanan, basig dili na sila ganahang mokat-on sa pinulongan ug relihiyon sa ilang ginikanan. Unahon sa Kristohanong mga ginikanan ang espirituwal nga kaayohan sa ilang anak kay sa ilang gusto. (1 Cor. 10:24) Ang brader nga si Samuel miingon: “Giobserbahan namong magtiayon kon sa unsang pinulongan mouswag sa espirituwal ang among mga anak, ug nag-ampo mi alang sa kaalam. . . . Dihang nakita namo nga wala kaayo sila makabenepisyo sa tigom diha sa among pinulongan, midesisyon ming mobalhin sa lokal nga kongregasyon. Regular ming motambong ug mosangyaw nga magkauban. Mangimbitar sab mig mga higala gikan sa lokal nga kongregasyon nga mouban namo sa pagpangaon ug pagsuroysuroy. Kining tanan nakatabang sa among mga anak nga masuod sa mga igsoon ug makaila kang Jehova, dili lang ingong ilang Diyos kondili ingong ilang Amahan ug Higala. Para namo, mas importante ni kay sa malarino sila sa among pinulongan.” w17.05 10 ¶11-13

Sa dili madugay, mapuno ang yuta sa mga tawong dapig sa pagkasoberano ni Jehova. Gipangandoy gyod nato nang adlawa! Sama kang Debora ug Barak, kita moawit: “Sa ingon niana laglaga ang tanan mong kaaway, Oh Jehova, ug ang mga nahigugma kanimo himoang ingon sa pagsidlak sa adlaw diha sa pagkagamhanan niini.” (Maghu. 5:31) Matubag kini nga hangyo dihang taposon na ni Jehova ang daotang kalibotan ni Satanas! Inigsugod sa gubat sa Armagedon, dili na magkinahanglag boluntaryong mga tawo sa pagpildi sa mga kaaway. Panahon kana nga kita ‘mobarog nga walay lihok ug tan-awon ang kaluwasan ni Jehova.’ (2 Cron. 20:17) Apan sa kasamtangan, daghan tag kahigayonan nga suportahan ang katuyoan ni Jehova uban ang kaisog ug kadasig. “Tungod kay kinabubut-ong nag-alagad ang katawhan, dayega ninyo si Jehova.” Sa ingon, gisugdan ni Debora ug Barak ang ilang awit sa kadaogan pinaagig pagdayeg kang Jehova, dili sa mga linalang. (Maghu. 5:1, 2) Sa susama, hinaot ang imong pagboluntaryo magdasig sa tanang makabenepisyo niini sa pag-ingong “dayega ninyo si Jehova”! w17.04 32 ¶17-18

Bisag wala makalimti ni Jose ang iyang 13 ka tuig nga pag-antos, wala siya magdumot. (Gen. 45:5-8) Labaw sa tanan, wala niya tugoti nga madaot ang iyang relasyon kang Jehova tungod sa pagkadili-hingpit ug sayop sa uban. Ang pagkamaunongon ni Jose nakatabang niya nga makita kon giunsa pagsulbad ni Jehova ang mga inhustisya. Nakita sab niya ang pagpanalangin ni Jehova kaniya ug sa iyang pamilya. Sa susama, kinahanglan natong pabilhan ug proteksiyonan ang atong relasyon kang Jehova. Dili gyod nato tugotan ang pagkadili-hingpit sa mga igsoon nga magdaot sa atong relasyon sa Diyos, kinsa atong gihigugma ug gisimba. (Roma 8:38, 39) Hinunoa, kon makaeksperyensiya tag inhustisya sa kamot sa atong igsoon sa pagtuo, sundogon nato si Jose ug mas makigsuod ta kang Jehova, nga maningkamot sa paglantaw sa situwasyon sumala sa Iyang panglantaw. Kon nahimo na nato ang tanan sa pagsulbad sa situwasyon gamit ang Bibliya, kinahanglan nato kining itugyan kang Jehova, nga malaomong sulbaron niya kini sa iyang gitakdang panahon ug pamaagi. w17.04 20 ¶12; 22 ¶15-16

Gituman ni Ana ang iyang panaad sa Diyos. Wala gyod siya magduhaduha sa pagbuhat niini. Iyang gidala si Samuel sa Hataas nga Saserdoteng si Eli sa tabernakulo sa Shilo ug siya miingon: “May kalabotan niining bataa nga ako nag-ampo nga unta ihatag ni Jehova kanako ang akong gipangaliya kaniya. Ug ako, sa baylo, nagpahulam kaniya kang Jehova. Sa tanan niyang mga adlaw, siya ang gipangayo alang kang Jehova.” (1 Sam. 1:24-28) Didto, “ang batang si Samuel nagpadayon sa pagdako sa atubangan ni Jehova.” (1 Sam. 2:21) Apan unsay gipasabot niana kang Ana? Gimahal gyod niya ang iyang anak, ug karon dili na niya kini makauban adlaw-adlaw samtang kini magdako. Handurawa kon unsa ka dako ang iyang pangandoy nga magakos, makadula, ug maatiman ang bata samtang kini magdako. Bisan pa niana, si Ana wala magmahay nga gituman niya ang iyang panaad sa Diyos. Ang iyang kasingkasing nagmaya kang Jehova.​—1 Sam. 2:1, 2; Sal. 61:1, 5, 8. w17.04 4-5 ¶7-8

Human sa pagtagna nga kita karon anaa sa “makuyaw nga mga panahong lisod sagubangon,” si apostol Pablo giinspirar sa pagsulat: “Ang mga tawong daotan ug mga impostor mosamot pa kangil-ad.” (2 Tim. 3:2-5, 13) Nakita ba nimo nga nagakatuman ang maong tagna? Daghan kanato ang biktima sa mga daotan, sama sa madaogdaogong mga tawo, madumtanong mga panatiko, ug mapintas nga mga kriminal. Ang pipila klarong daotan; ang uban impostor, nga kunohay buotan. Bisag wala ta mabiktima nila, nakaapektar gihapon kanato ang mga daotan. Maguol ta dihang makabalita ta bahin sa ilang ngilngig nga mga binuhatan, sama sa pag-abuso sa mga bata, tigulang, ug sa uban pa nga dili makadepensa sa kaugalingon. Ang daotang mga tawo nagpakitag kinaiya nga sama nianang sa mga hayop o demonyo pa gani. (Sant. 3:15) Ikalipay nga ang Pulong ni Jehova dunay maayong balita nga kapuli nianang daotang balita. w17.04 10 ¶4