Nobyembre

Ang pagdisiplina sa kaugalingon nag-apil sa pagkontrolar sa kaugalingon aron mahimong mas maayo ang atong panggawi ug panghunahuna. Wala ta ipanganak uban ang pagdisiplina sa kaugalingon. Kinahanglan nato kining makat-onan. Kon magmapailobon ang mga ginikanan sa pagbansay sa ilang mga anak “sa disiplina ug sa pagdumala-sa-kaisipan [o, giya] ni Jehova,” gitabangan sab nila ang ilang mga anak nga makakat-on sa pagdisiplina sa kaugalingon ug magmaalamon. (Efe. 6:4) Ang samang mga prinsipyo mapadapat niadtong nakaila kang Jehova dihang hamtong na sila. Tinuod, medyo nakakat-on na sila sa pagdisiplina sa kaugalingon. Pero sa espirituwal, ang bag-ong tinun-an dili pa hamtong. Apan anam-anam siyang mouswag ngadto sa pagkahamtong dihang isul-ob niya ang “bag-ong pagkatawo” nga sama nianang sa Kristo. (Efe. 4:23, 24) Ang pagdisiplina sa kaugalingon maoy importanteng bahin sa maong pag-uswag. w18.03 29 ¶3-4

Abiabihon nato ang tanan diha sa atong mga tigom ingong kaubang mga bisita sa usa ka espirituwal nga pagpangaon. Si Jehova ug ang iyang organisasyon ang tagbalay. (Roma 15:7) Dihang may bag-ong motambong, nahimo tang kauban sa tagbalay, ingnon ta. Tungod niana, kita ang unang moduol nila, bisag unsa pay ilang sininaan o pamostura. (Sant. 2:1-4) Kon may bisitang wala pa maatiman, puwede ba nimo siyang pataparon? Malipay gyod siya kon may motabang niya nga masundan ang programa ug mapangita ang mga tekstong gihisgotan. Maayo kining paagi sa ‘pagsunod sa dalan sa pagkamaabiabihon.’ May kahigayonan ta sa pag-abiabi kon naay mamumulong nga gikan sa laing kongregasyon, kon bisita sa tigdumala sa sirkito, ug usahay kon naay representante sa lokal nga sangang buhatan. (3 Juan 5-8) Ang usa ka paagi mao ang pag-andam ug esnak o pagkaon. Mahimo ba nimo kana? w18.03 15 ¶5, 7

Konsideraha ang ehemplo sa usa ka Hudiyo nga naglutos sa mga Kristohanon. Gipanganak siya diha sa nasod nga napahinungod sa Diyos. Pero, ang mga Hudiyo wala nay espesyal nga relasyon kang Jehova. Ang maong tawo dasig kaayo sa tradisyon sa Judaismo, pero nakat-onan niya ang mas maayong paagi. Personal nga nakig-estorya niya ang nabanhaw ug hinimayang si Jesu-Kristo. Unsay gibuhat sa maong tawo? Gidawat niya ang tabang sa Kristohanong tinun-an nga si Ananias. Bahin sa maong tawo, ang Bibliya nag-ingon: “Siya mitindog ug gibawtismohan.” (Buh. 9:17, 18; Gal. 1:14) Nahibalo na tingali ka nga ang maong Hudiyo nailhan sa ulahi ingong si apostol Pablo. Pero hinumdomi nga human niya masabti ang kamatuoran​—nga gigamit si Jesus sa pagpalampos sa katuyoan sa Diyos—​si Pablo nagpabawtismo dayon. (Buh. 22:12-16) Ingon sab niana ang mga Bible study karon​—bata man o tigulang. w18.03 5-6 ¶9-11

Dili sayon ang kinabuhi ni Jacob. Kinahanglan niyang agwantahon ang iyang unodnog panghunahuna nga igsoon, si Esau, kinsa gustong mopatay niya. Gawas pa niana, kinahanglan siyang makiglabot sa iyang ugangang lalaki, kinsa kadaghang nanglimbong niya. Pero, bisag may mga tawong “pisikal” sa iyang palibot, si Jacob usa ka tawong espirituwal. (1 Cor. 2:14-16) Mituo siya sa gisaad kang Abraham ug naningkamot siya sa pag-atiman sa iyang pamilya nga mahimong bahin sa katumanan sa katuyoan ni Jehova. (Gen. 28:10-15) Gipakita sa pulong ug buhat ni Jacob nga kanunay niyang gihunahuna ang sukdanan ug kabubut-on sa Diyos. Pananglitan, dihang nagtuo siya nga patyon siya ni Esau, si Jacob miingon sa Diyos: “Luwasa ako, ako nagaampo kanimo . . . Ikaw nag-ingon: ‘Sa walay duhaduha ako makiglabot nga maayo kanimo ug himoon ko ang imong binhi nga ingon sa mga balas sa dagat.’” (Gen. 32:6-12) Dayag nga mituo siya sa gisaad ni Jehova ug gusto niyang magkinabuhi nga nahiuyon sa kabubut-on ug katuyoan sa Diyos. w18.02 20 ¶9-10

Naeksperyensiyahan ni Job ang lainlaing kahimtang sa kinabuhi. Sa wala pa ang pagsulay kaniya, siya “ang labing bantogan sa tanan nga taga-Sidlakan.” (Job 1:3) Siya dato, ilado, ug tinahod kaayo. (Job 29:7-16) Bisan pa niana, si Job wala maghunahunang labaw o mobating wala niya kinahanglana ang Diyos. Gani, si Jehova nagtawag niyang “akong alagad.” Si Satanas naghimog sunodsunod nga grabeng pag-atake kang Job aron basolon niini ang Diyos. (Job 1:13-21) Dayon tulo ka dili tinuod nga maghuhupay ang miabot ug misultig sakit nga mga pulong. Matod nila, gibuhat sa Diyos kon unsay angay kang Job! (Job 2:11; 22:1, 5-10) Bisan pa niana, si Job nagmatinumanon. Human sa pagsulay, si Jehova naghatag kang Job ug doble sa kon unsay nawala kaniya, ug gidugangan pag 140 ka tuig ang iyang kinabuhi. (Sant. 5:11) Nianang panahona, padayon siyang nag-alagad kang Jehova sa tibuok kasingkasing. w18.02 6 ¶16; 7 ¶18

Ang mga tawong ingon nianag kinaiya gustong dayegon. Usa ka eskolar misulat bahin sa tawong garboso: “Sa iyang kasingkasing dunay gamayng altar diin siya moyukbo sa iyang kaugalingon.” Ang pipila miingon nga ang garbo ngil-ad kaayo nga bisag ang tawong garboso dili ganahan nga makita kana diha sa uban. Gidumtan gyod ni Jehova ang garbo. Dili siya ganahan niadtong may “mapahitas-ong mga mata.” (Prov. 6:16, 17) Ang garbo makapahilayo sa usa gikan sa Diyos. (Sal. 10:4) Kini kinaiya sa Yawa. (1 Tim. 3:6) Pero makapaguol nga bisan ang pipila ka maunongong alagad ni Jehova naimpluwensiyahan sa garbo. Si Uzzias, nga hari sa Juda, nagmatinumanon sa daghang katuigan. “Apan,” ang Bibliya nag-ingon, “sa diha gayod nga nagmakusganon na siya, ang iyang kasingkasing nagmapahitas-on hangtod nga kini nagpahinabog kadaot, sa ingon siya milihok nga dili-matinumanon batok kang Jehova nga iyang Diyos ug misulod sa templo ni Jehova aron sa pagsunog ug insenso.” Sa ulahi, si Haring Ezequias nagmapahitas-on usab, pero sa makadiyot lang.​—2 Cron. 26:16; 32:25, 26. w18.01 28 ¶4-5

Gihisgotan sa Kasulatan nga ang katawhan ni Jehova miamot alang sa iyang buluhaton. Sa pipila ka kahimtang, miamot sila para sa espesipikong mga proyekto. (Ex. 35:5; 2 Hari 12:4, 5; 1 Cron. 29:5-9) Sa unang Kristohanong kongregasyon, dihang nahibaloan sa mga igsoon ang panginahanglan tungod sa gutom, “naninguha ang mga tinun-an nga ang matag usa kanila sumala sa iyang maarangan, [makapadalag] hinabang ngadto sa mga igsoon nga nagpuyo sa Judea.” (Buh. 11:27-30) Siyempre, lainlain ang gigikanan sa maong mga amot. Sa unang siglo, gibaligya sa pipila ka Kristohanon ang ilang kabtangan, sama sa yuta o balay, ug gidala ang kuwarta ngadto sa mga apostoles. Dayon, iapod-apod kini sa mga apostoles ngadto sa nanginahanglan. (Buh. 4:34, 35) Ang uban magtigom ug kuwarta ug regular nga moamot aron makasuportar sa buluhaton. Busa, ang tanang klase sa tawo, dato man o pobre, puwedeng makaamot.​—Luc. 21:1-4. w18.01 18 ¶7; 19 ¶9

Bisag daghan tingali tag katakos, limitado ra ang atong mahimo sa kaugalingon natong kusog. Butang kana nga angay natong makat-onan. Bisag may katakos si apostol Pablo, siya may mga limitasyon nga nakapugong niya sa pagbuhat sa tanang gusto niyang buhaton. Dihang gisulti niya sa Diyos ang iyang gibati, siya giingnan: “Ang akong gahom ginahingpit diha sa kaluyahon.” Nasabtan ni Pablo ang punto. Siya miingon: “Dihang ako maluya, ako gamhanan hinuon.” (2 Cor. 12:7-10) Unsa may iyang gipasabot? Nahibalo si Pablo nga limitado lang ang iyang mahimo kon walay tabang sa Diyos. Ang balaang espiritu sa Diyos makahatag sa kusog nga gikinahanglan ni Pablo. Dili kay kana ra. Ang espiritu sa Diyos makatabang kang Pablo sa paghimo sa mga butang nga dili niya mapalampos sa iyang kaugalingong kusog. Mao man usab kanato. Kon hatagan ta ni Jehova ug kusog, molig-on gyod ta! w18.01 9 ¶8-9

Dihang ang imong anak gusto nang magpabawtismo, basaha ug tun-i ang mga materyal nga gitagana sa organisasyon ni Jehova para sa mga ginikanan. Ang paghimo niana makatabang aron mapasiugda nimo nga ang pagkahimong dedikado kang Jehova ug ang pagpabawtismo maoy seryosong desisyon pero daghag panalangin. Ingong ginikanan, naa kay dakong responsabilidad​—ug pribilehiyo—​sa pagmatuto sa imong mga anak sa “disiplina ug sa pagdumala-sa-kaisipan [o, giya] ni Jehova.” (Efe. 6:4) Dili lang kay basta tudloan sila kon unsay giingon sa Bibliya, kondili tabangan sab silang makombinsir sa ilang nakat-onan. Oo, kinahanglang mahimo silang kombinsido kaayo nga mapalihok sila sa pagpahinungod kang Jehova ug pag-alagad kaniya sa tibuok nilang kasingkasing. Hinaot ang Pulong ni Jehova, ang iyang espiritu, ug ang imong paningkamot ingong ginikanan magtabang sa imong mga anak nga mahimong “maalamon alang sa kaluwasan.” w17.12 22 ¶17, 19

Si Daniel mag-100 na ang edad ug hapit nang mamatay. Mabuhi kaha pag-usab si Daniel? Siyempre! Sa kataposan sa basahon sa Daniel, atong mabasa ang pasalig sa Diyos: “Kon bahin kanimo, magpadayon ka hangtod sa kataposan; ug ikaw mopahulay.” Ang tigulang nang si Daniel nahibalo nga ang patay nagpahulay, nga wala nay “lalang [o, plano] ni kahibalo ni kaalam sa Sheol.” Hapit na kanang adtoan ni Daniel. (Eccl. 9:10) Pero dili kana ang iyang kataposan. May gisaad kaniya alang sa umaabot. Ang mensahe kang Daniel nagpadayon pinaagi sa mga pulong sa teksto karong adlawa. Walay gisulting petsa o gidugayon. Si Daniel mamatay ug mopahulay. Bisan pa niana, dihang siya giingnan nga siya ‘mobarog para sa iyang bahin’ sa umaabot, susama rag gisaaran siyag pagkabanhaw​—nga dugay pang mahitabo human sa iyang kamatayon. Kana mahitabo “sa kataposan sa mga adlaw.” Ang Maayong Balita Biblia naghubad sa saad kang Daniel: “Ikaw [mobarog] sa dapit nga gitagana kanimo inig-abot na sa kataposan.” w17.12 7 ¶17-18

Gisugo ni Jehova ang mga ansiyano sa Israel nga sundogon ang iyang taas nga sukdanan sa hustisya. Una, kinahanglan nilang kompirmahon ang tanang impormasyon. Dayon, kinahanglan nilang konsiderahon pag-ayo ang motibo, paggawi, ug kanhing binuhatan sa nakapatay dihang modesisyon kon angay ba siyang kaluy-an. Aron masundog ang hustisya sa Diyos, kinahanglan nilang segurohon kon may “pagdumot” ug daotang motibo ang tawong midangop. (Num. 35:20-24) Kon may nakasaksi, kinahanglan nga labing menos duha ang motestigos sa pagpamatuod nga tinuyo ang pagpatay. Busa, kon makompirmar nila ang tanang impormasyon sa kaso, kinahanglang konsiderahon sa mga ansiyano ang tawo mismo, dili lang ang iyang nahimo. Kinahanglang naa silay lawom nga pagsabot​—nga magkonsiderar dili lang sa makita, kondili sa mga rason kon nganong nahimo ang usa ka sala. Labaw sa tanan, kinahanglan nila ang balaang espiritu ni Jehova, nga magtabang nila sa pagsundog sa Iyang pagsabot, kaluoy, ug hustisya.​—Ex. 34:6, 7. w17.11 16 ¶13-14

Atong nadiskobrehan ang pipila ka bililhong mga kamatuoran dihang una tang nakig-uban sa katawhan sa Diyos. Atong nakat-onan nga si Jehova ang Maglalalang ug Maghahatag ug Kinabuhi, ug duna siyay katuyoan alang sa katawhan. Nakat-onan sab nato nga mahigugmaon niyang gitagana ang iyang Anak ingong halad lukat aron mahigawas ta sa sala ug kamatayon. Nakat-onan pod nato nga ang iyang Gingharian magtapos sa tanang pag-antos, ug may kahigayonan ta nga mabuhi sa walay kataposan nga malinawon ug malipayon ubos sa pagmando sa Gingharian. (Juan 3:16; Pin. 4:11; 21:3, 4) Matag karon ug unya, may kausaban tingali sa atong pagsabot sa tagna o sa pipila ka teksto sa Bibliya. Dihang ihatag ang bag-ong katin-awan niana, kinahanglan nato kanang tun-an pag-ayo ug pamalandongon. (Buh. 17:11) Kinahanglang masabtan nato ang pangunang kausaban, maingon man ang gagmayng kalainan sa daan ug sa bag-ong pagsabot. Pinaagi niini, madugang nato ang bag-ong kamatuoran diha sa atong tipiganan. w17.06 12-13 ¶15-16

Ilabinang magbantay ta dihang may mga situwasyon nga magtental nato sa paglapas sa moral nga mga sukdanan ni Jehova. Pananglitan, para sa mga managtrato, maayo nga sa sinugdan pa lang, maghimo na silag klarong mga limitasyon bahin sa paghikap, paghalok, o kon sila rang duha. (Prov. 22:3) Mahimong mameligro sab ang moralidad sa usa ka Kristohanon dihang malayo siya sa iyang pamilya tungod sa negosyo o dihang magtrabaho uban sa dili niya parehas ug sekso. (Prov. 2:10-12, 16) Mas dali sab tang madala sa tentasyon kon kita maguol o mag-inusara. Basig madesperado ta pag-ayo nga modawat tag atensiyon gikan kang bisan kinsa na lang. Kon mahitabo nâ nimo, dangop kang Jehova ug sa iyang katawhan para sa tabang.​—Sal. 34:18; Prov. 13:20. w17.11 26 ¶4-5

Sa Israel, giisip ni Jehova nga seryoso ang tanang kaso sa pagpatay ug tawo. Patyon kadtong tinuyong nakapatay ug tawo. Ang mopatay niya mao ang kinadul-an nga paryenteng lalaki sa namatay, nga gitawag ug “tigpanimalos sa dugo.” (Num. 35:19) Kini maoy bayad sa pagpatay sa inosenteng tawo. Himoon dayon ang pagsilot aron dili mahugawan ang Yutang Saad, kay si Jehova nagsugo: “Dili kamo magahugaw sa yuta diin anaa kamo; tungod kay ang dugo [sa tawo nga giula] magahugaw sa yuta.” (Num. 35:33, 34) Pero, sa unsang paagi gihusay sa Israel ang kaso niadtong aksidenteng nakapatay? Bisag aksidente lang, sad-an gihapon siya sa pag-ula ug inosenteng dugo. (Gen. 9:5) Pero, mapakitaan siyag kaluoy ug makaikyas sa tigpanimalos pinaagi sa pagdangop sa usa sa unom ka dalangpanang siyudad. Didto, mahatagan siya ug proteksiyon. Kinahanglan siyang magpabilin sa maong siyudad hangtod mamatay ang hataas nga saserdote.​—Num. 35:15, 28. w17.11 9 ¶3-5

Usa ka sister sa Australia miingon: “Ang akong ugangang lalaki supak gyod sa kamatuoran. Sa dili pa manawag niya, mag-ampo mi sa akong bana nga unta tabangan mi ni Jehova nga malumong motubag kon masuko si Papa. Aron malikayan ang taas nga panag-estoryahay nga moresultag argumento bahin sa relihiyon, among limitahan ang oras sa among pagtawag.” Tingali basolon nimo ang imong kaugalingon sa dili pagsinabtanay, ilabina kon gimahal nimo ang imong mga paryente ug gusto nimong pahimut-an sila. Bisan pa niana, paningkamoting unahon ang imong pagkamaunongon kang Jehova imbes ang gugma sa pamilya. Ang pagbuhat niana motabang sa mga paryente nga makita ang kaimportante sa pagpadapat sa mga prinsipyo sa Bibliya. Bisag unsa pa man, hinumdomi nga dili nimo mapugos ang uban sa pagdawat sa kamatuoran. Pero puwede nimong ipakita kanila ang benepisyo sa pagsunod sa mga sugo ni Jehova. Sama sa iyang gihatag nato, ang atong mahigugmaong Diyos naghatag nilag kahigayonan sa pag-alagad kaniya.​—Isa. 48:17, 18. w17.10 15-16 ¶15-16

Ang atong gugma dili lang kutob sa pulong, ilabina sa mga panahon nga kinahanglang ipakita kini sa buhat. Pananglitan, kon ang atong igsoon sa pagtuo nagkalisodlisod, dili lang ang atong panghinaot ang ilang gikinahanglan. (Sant. 2:15, 16) Sa susama, ang atong gugma kang Jehova ug sa isigkatawo magpalihok nato nga bug-os makigbahin sa pagsangyaw, dili lang sa paghangyo sa Diyos sa ‘pagpadalag mga mamumuo’ aron sa pagpangani. (Mat. 9:38) Si apostol Juan misulat nga kinahanglan tang maghigugmaay “sa buhat ug sa kamatuoran.” Busa, ang atong gugma kinahanglang “walay pagkasalingkapaw,” o dili salingkapaw. (Roma 12:9; 2 Cor. 6:6) Nagpasabot kini nga dili ta makapakitag tinuod nga gugma samtang nagpakaaron-ingnon, nga morag nagsul-ob ug maskara. Makapangutana tingali ta, ‘Naa ba diay gugma nga salingkapaw?’ Wala. Kini dili tinuod nga gugma kondili mini nga gugma. w17.10 8 ¶5-6

Kon gusto natong makabenepisyo sa Pulong sa Diyos, kinahanglang regular nato ning basahon​—kon posible, kada adlaw. Siyempre, daghan tag buluhaton kada adlaw. Pero, dili nato tugotan ang bisan unsang butang​—lakip ang atong importanteng responsibilidad—​nga mobalda sa atong rutina sa pagbasag Bibliya. (Efe. 5:15, 16) Ang mga alagad ni Jehova mogahin gyod ug panahon nga mabasa ang Bibliya kada adlaw​—mabuntag, magabii, o sa bisan unsang orasa anang adlawa. Ilang gibati ang giingon sa salmista: “Gihigugma ko gayod ang imong balaod! Kini ang akong gipalandong sa tibuok nga adlaw.” (Sal. 119:97) Gawas sa pagbasag Bibliya, importante ang pagpamalandong sa atong nabasa. (Sal. 1:1-3) Pinaagi niini, mapadapat nimo ang bililhong kaalam sa Bibliya. Nagbasa man diha sa inimprenta o elektroniko, ang panguna natong tumong mao ang pagtandog sa atong kasingkasing. w17.09 24 ¶4-5

Dili kinahanglang magpakitag pagkamabination, o kaluoy, sa tanang situwasyon. Pananglitan, tungod sa kaluoy ni Haring Saul, gisupak niya ang sugo sa Diyos. Wala niya patya si Agag nga kaaway sa Diyos. Tungod niini, gisalikway ni Jehova si Saul ingong hari sa Israel. (1 Sam. 15:3, 9, 15) Siyempre, si Jehova mao ang matarong nga Maghuhukom. Mabasa niya ang kasingkasing sa tawo ug nahibalo siya kon kinsay dili angayng kaluy-an. (Lam. 2:17; Ezeq. 5:11) Duol na ang panahon dihang ipahamtang niya ang paghukom niadtong tanan nga misupak niya. (2 Tes. 1:6-10) Dili nâ mao ang panahon nga maluoy siya niadtong gihukman niyang daotan. Hinuon, ang paglaglag kanila maoy pagpakitag hustong kaluoy sa Diyos ngadto sa mga matarong nga iyang luwason. Klaro, wala tay katungod nga hukman ang usa ka tawo kon malaglag ba siya o dili. Hinuon, kinahanglang buhaton nato ang tanan sa pagtabang sa mga tawo. w17.09 10-11 ¶10-12

Diyosnong hiyas ang pagpugong sa kaugalingon. Si Jehova hingpit nga makakontrolar o makapugong sa kaugalingon. Sa laing bahin, kay dili hingpit, maglisod ang mga tawo nga pugngan ang kaugalingon. Ang kasagarang hinungdan sa daghang problema mao ang kawalay pagpugong sa kaugalingon. Tungod niana, daghan ang nahimong langaylangayan ug dili na maayo sa eskuylahan o trabahoan. Posibleng moresulta sab kini sa pagsultig sakit, paghuboghubog, pagkabayolente, pagdiborsiyo, pagpangutang nga wala kinahanglana, pagkaadik, pagkapriso, pagka-depress, pagkasakit ug sexually transmitted disease (STD), pagmabdos nga wala planoha, ug uban pa. (Sal. 34:11-14) Ug nagkadaghang tawo karon ang wala nay pagpugong sa kaugalingon. Sa mga 1940, gitun-an na ang bahin sa pagkontrolar sa kaugalingon, pero sumala sa bag-ong research, naglisod na pag-ayo ang mga tawo nga pugngan ang kaugalingon. Para sa mga nagtuon sa Pulong sa Diyos, dili ni katingalahan kay ang Bibliya nagtagna nga usa sa mga ebidensiya sa “kataposang mga adlaw” mao nga ang mga tawo “walay pagpugong-sa-kaugalingon.”​—2 Tim. 3:1-3. w17.09 3 ¶1-2

Kon anaa kanato “ang kalinaw sa Diyos,” magmalinawon ang atong kasingkasing ug hunahuna. Nahibalo ta nga naluoy si Jehova nato ug gusto niyang molampos ta. (1 Ped. 5:10) Kana nga kahibalo magbantay nato batok sa sobrang kabalaka ug kahigawad. Sa dili madugay, ang katawhan makasinati sa kinadak-ang kasakitan nga mahitabo sa yuta. (Mat. 24:21, 22) Wala ta mahibalo sa tanang detalye kon unsay mahitabo sa matag usa kanato. Bisan pa niana, dili ta angayng mabalaka pag-ayo. Bisag wala ta mahibalo sa tanang himoon ni Jehova, kita nakaila sa atong Diyos. Nakita nato sa iyang pagpakiglabot kaniadto nga bisag unsay mahitabo, kanunayng palamposon ni Jehova ang iyang katuyoan, ug usahay himoon niya kana sa paagi nga wala damha. Matag higayon nga himoon kana ni Jehova kanato, mahimong maeksperyensiyahan nato sa bag-ong paagi “ang kalinaw sa Diyos nga labaw sa tanang panghunahuna.” w17.08 12 ¶16-17

“Hangtod kanus-a?” Kana ang gipangutana sa matinumanong mga propeta nga si Isaias ug Habacuc. (Isa. 6:11; Hab. 1:2) Kana sab ang gipangutana sa atong Ginoong Jesu-Kristo dihang gilibotan siya sa walay pagtuong mga tawo. (Mat. 17:17) Busa, dili ikatingala kon makapangutana sab ta ana. Tingali nakasinati tag inhustisya. O kaha nag-antos ta sa katigulangon ug sakit o presyur sa pagkinabuhi niining “makuyaw nga mga panahong lisod sagubangon.” (2 Tim. 3:1) O kaha ang dili maayong kinaiya sa mga tawo sa atong palibot nakapaluya nato. Bisag unsay hinungdan, makapadasig ang pagkahibalo nga ang matinumanong mga alagad ni Jehova nakapangutana usab niana, ug wala sila isalikway sa pagbuhat niana! Pero unsay makatabang nato kon makaatubang tag lisod nga mga situwasyon? Gitubag kana sa tinun-ang si Santiago diha sa atong teksto karong adlawa. w17.08 3 ¶1-3

Si Jesus nagdasig sa iyang mga sumusunod nga gamiton ang “dili-matarong nga mga bahandi” sa paghimog mga higala sa langit. Ang usa ka paagi nga mapamatud-an nato nga kasaligan ta sa materyal nga mga butang mao ang paghatag ug donasyon sa tibuok kalibotang buluhaton nga gitagna ni Jesus. (Mat. 24:14) Usa ka batang babaye sa India ang may alkansiya ug ginahulogan niya kinig mga sensilyo. Gani, dili na siya mopalit ug dulaan. Pagkapuno sa alkansiya, iyang gidonar ang kuwarta para sa buluhatong pagsangyaw. Usa ka brader sa India nga may kalubihan ang maghatod ug daghang lubi sa Malayalam remote translation office. Siya miingon nga kay mamalit man gyod ug lubi ang opisina, ang iyang paghatag ug lubi mas makatabang kay sa paghatag ug kuwarta. Praktikal kana nga kaalam. Sa susama, ang mga igsoon sa Greece regular nga moamot ug keso, mantika nga gikan sa olibo, ug ubang pagkaon para sa pamilyang Bethel. w17.07 8 ¶7-8

Kay naulipon sa Babilonya, ang mga Hudiyo wala ganahing mokanta. Kinahanglan silang hupayon. Pero, sama sa giingon sa Diyos, sila naluwas pinaagi ni Ciro nga hari sa Persia. Gipildi niya ang Babilonya ug siya miingon: “[Si] Jehova . . . nagsugo kanako sa pagtukod kaniya ug usa ka balay sa Jerusalem . . . Bisan kinsa nga anaa sa inyong taliwala sa tibuok niyang katawhan, si Jehova nga iyang Diyos magauban kaniya. Busa paadtoa siya.” (2 Cron. 36:23) Seguradong nakapahupay gyod ni sa mga Israelinhon nga nagpuyo sa Babilonya! Dili lang ang tibuok Israel ang gihupay ni Jehova, kondili ang matag indibiduwal usab. Mao man usab karon. Ang Diyos “nagaayo sa mga may gun-ob nga kasingkasing, ug nagabugkos sa ilang masakit nga mga bahin.” (Sal. 147:3) Oo, si Jehova naluoy niadtong may sakit sa pisikal ug emosyonal. Gusto gayod niya nga hupayon ug tambalan ang atong emosyonal nga sakit. (Sal. 34:18; Isa. 57:15) Gihatagan ta niyag kaalam ug kusog sa pagsagubang sa atong mga problema.​—Sant. 1:5. w17.07 18 ¶4-5

Si Jehova ang kinadatoan sa uniberso. (1 Cron. 29:11, 12) Ingong mahinatagong Amahan, dagaya niyang gihatagan ug espirituwal nga bahandi ang tanang nahibalo sa bili niana. Mapasalamaton kaayo ta nga gihatagan tag espirituwal nga bahandi ni Jehova, nga naglakip sa (1) Gingharian sa Diyos, (2) makaluwas ug kinabuhing ministeryo, ug (3) bililhong kamatuoran diha sa iyang Pulong! Pero kon dili ta magbantay, basig mawad-an tag apresasyon niana nga mga bahandi, ug sa diwa, ato ra nang malabay. Aron dili ni mawala kanato, kinahanglang kanunay nato ning gamiton ug apresyahon. Oo, daghan kanato ang nakahimog dagkong kausaban aron mahimong sakop sa Gingharian. (Roma 12:2) Bisan pa niana, wala pa matapos ang atong pagpakigbisog. Kinahanglan tang magmabinantayon batok sa bisan unsa nga makadani kanato, sama sa pagtinguha sa materyal nga mga butang ug sa imoral nga buhat.​—Prov. 4:23; Mat. 5:27-29. w17.06 9 ¶1; 10 ¶7

Wala tay mabasa nga gisultian sa Diyos si Job sa hinungdan sa pag-antos niini. Wala ipatin-aw ni Jehova kang Job kon nganong nag-antos kini, nga daw kinahanglang pakamatarongon sa Diyos ang iyang kaugalingon. Hinunoa, gusto ni Jehova nga tabangan si Job nga makita kon unsa siya ka gamay kon itandi sa pagkadako sa Diyos. Ug gitabangan niya si Job nga masabtan nga dunay mas hinungdanong mga isyu nga angayng hatagag pagtagad. (Job 38:18-20) Nakatabang kini kang Job nga mabatonan ang hustong panglantaw. Sa paghatag ni Jehova nianang prangka nga tambag, nagpakita ba si Jehova ug pagkadili-mabination kang Job human kini mag-antos sa grabeng pagsulay? Wala, ug wala sab maghunahuna niana si Job. Bisan pa sa iyang pag-antos, si Job sa ulahi misulti sa iyang apresasyon. Siya miingon pa gani: “Ako naghimog pagbakwi, ug ako naghinulsol sa abog ug sa abo.” Mao nay epekto sa prangka apan makapadasig nga tambag ni Jehova. (Job 42:1-6) Human mosanong si Job sa pagbadlong sa Diyos ug magtul-id sa iyang panglantaw, gipahayag ni Jehova sa uban nga nalipay Siya sa pagkamatinumanon ni Job ilalom sa pagsulay.​—Job 42:7, 8. w17.06 24-25 ¶11-12

Aron masusi kon timbang ba ang atong panglantaw sa sekular nga mga butang ug sa espirituwal nga mga responsibilidad, maayong pangutan-on ang kaugalingon: ‘Giisip ba nako ang akong sekular nga trabaho ingong makalingaw ug makapalipay pero ang espirituwal nga kalihokan ingong ordinaryo o rutina lang?’ Ang pagpamalandong niini makatabang nato sa pagsusi kon unsa gyoy atong gimahal. Gihatag ni Jesus ang sukdanan sa pagbalanse sa sekular ug espirituwal nga mga butang. Usa niana ka higayon, si Jesus miduaw sa balay ni Maria ug sa igsoon niini, si Marta. Samtang nagkapuliki si Marta sa pagpreparar ug pagkaon, si Maria milingkod sa tiilan ni Jesus ug namati kaniya. Dihang mireklamo si Marta nga wala motabang si Maria, giingnan ni Jesus si Marta sa mga pulong sa teksto karong adlawa. (Luc. 10:38-42) Gitudloan ni Jesus si Marta ug importanteng leksiyon. Aron dili malinga sa sekular nga mga butang ug mapamatud-an ang atong gugma kang Kristo, kinahanglan nga padayon natong pilion “ang maayong bahin,” nga hatagag prayoridad ang espirituwal nga mga butang. w17.05 24 ¶9-10

Si Jehova naghatag sa mga ginikanan​—dili sa mga apohan o kang bisan kinsa—​sa pribilehiyo sa pagmatuto sa ilang mga anak diha sa kamatuoran. (Prov. 31:10, 27, 28) Bisan pa niana, ang mga ginikanan nga dili makasulti sa lokal nga pinulongan magkinahanglan tingalig tabang aron maabot ang kasingkasing sa ilang mga anak. Ang pagpangayog tabang wala magpasabot nga gitalikdan nila ang maong responsabilidad; hinunoa, mahimong bahin kini sa pagmatuto sa mga anak diha sa “disiplina ug sa pagdumala-sa-kaisipan [o, paggiya] ni Jehova.” (Efe. 6:4) Pananglitan, ang mga ginikanan mahimong mangayog sugyot sa mga ansiyano kon unsaon pagdumala ang pamilyahanong pagsimba. Makapangayo sab silag tabang sa pagpangitag maayong mga higala alang sa ilang mga anak. Matag karon ug unya, mahimong imbitahon sab nila ang ubang pamilya sa ilang pamilyahanong pagsimba. Dugang pa, daghang batan-on ang mouswag sa espirituwal tungod sa impluwensiya sa hamtong nga mga Kristohanon, nga tingali makauban nila sa pagsangyaw ug sa maayong lingawlingaw.​—Prov. 27:17. w17.05 11-12 ¶17-18

Human pasidan-i si Jose sa anghel ni Jehova nga gustong patyon ni Haring Herodes si Jesus, ang batang si Jesus ug ang iyang ginikanan namakwet sa Ehipto. Nagpabilin sila didto hangtod sa kamatayon ni Herodes. (Mat. 2:14, 19-21) Katuigan sa ulahi, ang mga tinun-an ni Jesus “nahitibulaag sa tibuok nga mga rehiyon sa Judea ug Samaria” tungod sa paglutos. (Buh. 8:1) Nahibalo si Jesus nga daghan sa iyang mga sumusunod ang mapugos pagbiya sa ilang mga pinuy-anan. Siya miingon: “Dihang kamo pagalutoson sa usa ka siyudad, kalagiw ngadto sa lain.” (Mat. 10:23) Ingon niana ang kahimtang sa libolibo ka Saksi ni Jehova. Daghan ang nawad-ag mga minahal ug halos sa tanan nilang kabtangan. Ang pipila ka bakwet mahimong mag-atubag kapeligrohan samtang mamakwet o dihang magpuyo sa kampo sa mga bakwet diin ang mga tawo manginom, manugal, mangawat, ug mga imoral. Bisan pa niana, gihuptan nila ang positibong panglantaw pinaagi sa paghinumdom nga, sama sa pagpanaw sa Israel sa kamingawan, ang ilang pagpuyo sa kampo matapos ra.​—2 Cor. 4:18. w17.05 3-4 ¶2-5

Usahay, ikaw o ang imong kaila makaeksperyensiya o makakita tingalig situwasyon sa kongregasyon nga daw inhustisya. Ayawg kapandol. Hinuon, ingong matinumanong mga alagad sa Diyos, maunongon ug mainampoon tang mosalig kaniya. Sa samang panahon, mapainubsanon natong ilhon nga wala ta mahibalo sa tanang detalye. Angay natong hinumdoman nga mahimong masayop ang atong panglantaw sa mga butang tungod sa atong pagkadili-hingpit. Likayan nato ang pagsultig sakit kay nahibalo ta nga makapadako lang kini sa problema. Sa kataposan, imbes mangunay sa pagsulbad sa problema, magmadeterminado nga magpabiling maunongon ug mapailobong maghulat kang Jehova sa pagsulbad niini. Kon buhaton nato kana, uyonan ug panalanginan ta ni Jehova. Oo, segurado tang si Jehova, “ang Maghuhukom sa tibuok yuta,” kanunayng mobuhat kon unsay matarong, “kay ang tanan niyang dalan hustisya.”​—Gen. 18:25; Deut. 32:4. w17.04 22 ¶17

Unsay mahitabo niadtong dili magbag-o ug padayong mosuportar niining sistemaha hangtod sa pagsugod sa dakong kasakitan? Si Jehova nagsaad nga mawala ang daotan dinhi sa yuta hangtod sa hangtod. (Sal. 37:10) Basin maghunahuna ang mga daotan nga dili sila maapil sa maong paghukom. Gitago sa daghan ang ilang daotang buhat, ug sa kalibotan karon, morag makaikyas sila sa hustisya ug silot. (Job 21:7, 9) Bisan pa niana, ang Bibliya nagpahinumdom kanato: ‘Ang mga mata [sa Diyos] anaa sa mga dalan sa tawo, ug iyang makita ang tanan niyang mga lakang. Walay kangitngit ni mabagang kangiob diin makatago sa ilang kaugalingon ang mga nagabuhat sa makadaot.’ (Job 34:21, 22) Walay matago kang Jehova nga Diyos. Dili siya malimbongan sa mga impostor; walay kangitngit nga makasalipod sa iyang gamhanang mga mata ug makita niya kon unsa gyoy tinuod nga nahitabo. Busa human sa Armagedon, wala na tay makitang daotan bisan pag susihon nato ang ilang dapit. Mawala na sila hangtod sa hangtod!​—Sal. 37:12-15. w17.04 10 ¶5