Disyembre

Sa kapanahonan sa Bibliya, apil sa pag-abiabi ang pagpangimbitar nga mangaon sa balay. (Gen. 18:1-8; Maghu. 13:15; Luc. 24:28-30) Ang pagpangimbitar sa pagpangaon maoy imbitasyon sa pagpakighigala ug kalinaw. Kinsa ang ilabinang imbitahon? Kadtong bahin sa atong kinabuhi, ang mga igsoon sa kongregasyon. Panahon sa kalisod, dili ba gikinahanglan nato ang usag usa? Kinahanglang duna tay suod ug malinawong relasyon nilang tanan. Ang mga tigdumala sa sirkito ug ang mga estudyante sa mga theocratic school ug ang mga boluntaryo sa konstruksiyon nagkinahanglan sab tingalig puy-anan. Ang mga pamilyang nagub-ag balay tungod sa katalagman nagkinahanglan tingalig kapuy-an hangtod matukoran silag balay. Dili nato angayng hunahunaon nga kadto lang nindot ug balay ang makatabang; kadaghan na tingali nila kanang nahimo. Puwede ba kang makapapuyo bisag simple lang ang imong balay? w18.03 15 ¶6; 16 ¶9

Unsay makatabang sa nasayop nga molampos? Dili ang kaugalingon niyang kusog, kondili ang espiritu sa Diyos. (Filip. 4:13) Apil sa bunga sa maong espiritu ang pagpugong sa kaugalingon, nga susama gayod sa pagdisiplina sa kaugalingon. Importante sab ang kinasingkasing nga pag-ampo, pagtuon sa Bibliya, ug pagpamalandong. Pero komosta kon malisdan ka sa pagtuon sa Pulong sa Diyos? Basin dili ka hilig magtuon. Apan hinumdomi nga si Jehova motabang nimo kon magpatabang ka. Makatabang siya nga ‘maugmad nimo ang pagpangandoy’ sa iyang Pulong. (1 Ped. 2:2) Una, hangyoa si Jehova nga tabangan ka sa pagdisiplina sa kaugalingon aron makatuon ka sa iyang Pulong. Dayon, lihok uyon sa imong pag-ampo. Tingali makasugod ka pinaagi sa paggahin ug pipila ka minutos sa matag pagtuon. Ngadtongadto, mahimo nang mas sayon ug mas makalingaw ang pagtuon. Oo, maapresyar nimo ang hilom nga mga panahon dihang mamalandong ka sa bililhong mga hunahuna ni Jehova.​—1 Tim. 4:15. w18.03 29 ¶5-6

Unâ mabawtismohan ang usa ka Bible study, kinahanglang duna siyay pagtuo base sa tukmang kahibalo sa Diyos, Iyang katuyoan, ug Iyang kahikayan sa kaluwasan. (1 Tim. 2:3-6) Tungod niana nga pagtuo, iyang likayan ang mga buhat nga dili makapalipay sa Diyos, ug magkinabuhi siya subay sa matarong nga mga sukdanan ni Jehova. (Buh. 3:19) Kana nagpasabot nga dili siya makahimog balidong dedikasyon sa Diyos kon padayon siyang mobuhat sa mga butang nga gidumtan sa Diyos. (1 Cor. 6:9, 10) Pero dili igo ang pagsunod sa taas nga moral nga sukdanan ni Jehova. Ang tawong naningkamot sa pagbuhat ug matarong kanunayng motambong sa tigom, mosangyaw, ug manudlo. (Buh. 1:8) Kon mahimo na kana sa bag-ong tinun-an, makahimo na siyag balidong dedikasyon kang Jehova pinaagig pribadong pag-ampo ug dayon simbolohan kana pinaagi sa pagpabawtismo atubangan sa publiko. w18.03 6 ¶12

Nganong gipili ni Jehova si Maria nga mahimong inahan ni Jesus? Tungod kay mahunahunaon siya sa espirituwal. Siya nagpakitag klarong ebidensiya sa iyang pagkamahunahunaon sa espirituwal diha sa iyang nindot nga mga pulong sa pagdayeg dihang mibisita siya sa iyang mga paryenteng si Zacarias ug Elisabet. (Luc. 1:46-55) Ang gisulti ni Maria nagpakita nga gimahal niya pag-ayo ang Pulong sa Diyos ug sinati kaayo siya sa Hebreohanong Kasulatan. (Gen. 30:13; 1 Sam. 2:1-10; Mal. 3:12) Matikdi sab nga bisag bag-o silang kasal ni Jose, naghulat sila nga matawo si Jesus unâ sila magdulog. Nagpakita kini nga giisip nila nga mas importante ang kabubut-on ni Jehova kay sa pagtagbaw sa ilang personal nga tinguha. (Mat. 1:25) Samtang nagdako si Jesus, maampingong gitiman-an ni Maria ang mga panghitabo sa kinabuhi ni Jesus ug namati siya sa maalamong mga pulong nga gisulti ni Jesus. Klaro nga gipabilhan niya ang katuyoan sa Diyos maylabot sa Mesiyas. Ang ehemplo ni Maria motabang nato sa paghunahuna kon unsaon nato pag-una ang kabubut-on sa Diyos. w18.02 21 ¶11

Unsaon nato pagsundog ang pagtuo ug pagkamatinumanon ni Job? Bisag unsay atong kahimtang, himoon natong sentro kanunay sa atong kinabuhi si Jehova, nga padayong mosalig ug motuman niya sa tibuok natong kasingkasing. Oo, mas daghan tag rason nga buhaton kana kay kang Job! Hunahunaa: Daghan tag nahibaloan bahin kang Satanas ug sa iyang mga taktika. (2 Cor. 2:11) Sa Bibliya, ilabina sa basahon sa Job, nahibaloan nato kon nganong gitugotan sa Diyos ang pag-antos. Sa tagna ni Daniel, atong nasabtan nga ang Gingharian sa Diyos maoy usa ka gobyerno nga si Kristo Jesus ang magmando. (Dan. 7:13, 14) Ug nahibaloan nato nga sa dili madugay ang maong Gingharian magtapos sa tanang pag-antos. Ang kaagi ni Job magpahinumdom pod nato sa pagpakitag pagkamabination sa atong mga igsoon sa pagtuo nga nakasinatig kalisdanan. Sama kang Job, ang pipila makasulti tingalig dili maayo. (Eccl. 7:7) Pero imbes hukman sila, ato silang sabton ug kaluy-an. Pinaagi niana, atong gisundog ang atong mahigugmaon ug maluluy-ong Amahan, si Jehova.​—Sal. 103:8. w18.02 6 ¶16; 7 ¶19-20

Ang pipila ka tawo nahimong garboso tungod sa ilang maayong hitsura, pagkainila, talento sa musika, pagkakusgan, o taas nga posisyon. Si David nakabaton dili lang usa sa maong mga hiyas kondili nianang tanan; pero, nagmapainubsanon siya sa tibuok niyang kinabuhi. Human mapatay ni David si Goliat, si Haring Saul miingon nga puwedeng pangasaw-on ni David ang anak sa hari. Pero si David miingon: “Kinsa ba ako . . . , nga mahimo akong umagad sa hari?” (1 Sam. 18:18) Sama kang David, ang katawhan ni Jehova karon naningkamot sa pagpaubos. Nahingangha ta sa pagkahibalo nga si Jehova, ang kinalabwan sa uniberso, nagpakitag pagkamapainubsanon. Atong gipadapat ang inspiradong tambag: “Isul-ob ninyo ang malumong mga pagmahal sa pagkamabination, kalulot, pagpaubos sa hunahuna, kalumo, ug hataas-nga-pailob.” (Col. 3:12) Nahibalo sab ta nga ang gugma “dili manghambog, dili magpaburot.” (1 Cor. 13:4) Kon magpaubos ta, ang mga tawo mahimong madani kang Jehova. w18.01 28 ¶6-7

Hangyoon tingali ta nga moamot para sa espesipikong katuyoan. (Buh. 4:34, 35; 1 Cor. 16:2) Pananglitan, tukoran ba ug bag-ong Kingdom Hall ang inyong kongregasyon? Tingali nahibalo ta nga nagkinahanglag pinansiyal nga tabang ang kombensiyon nga atong tambongan o ang atong mga igsoon nga nakasinatig katalagman. Moamot pod ta sa pagsuportar niadtong nagtrabaho sa hedkuwarter ug sa mga sangang buhatan sa tibuok kalibotan. Ang atong mga donasyon nagsuportar sa mga misyonaryo, espesyal payunir, ug niadtong naa sa sirkitong buluhaton. Kitang tanan makasuportar sa buluhaton ni Jehova niining kataposang mga adlaw. Kadaghanan sa naghatag ug donasyon wala magpaila. Dili nato ipahibalo kon pilay atong gihulog sa contribution box sa Kingdom Hall, o gihatag nga donasyon online pinaagi sa jw.org. Mobati tingali ta nga wala kaayoy ikatabang ang atong gamayng donasyon. Pero, kadaghanan sa donasyon karon naggikan sa gagmayng regalo imbes sa dagkong amot. w18.01 19 ¶10-11

Gikinahanglan ang bawtismo para sa mga Kristohanon, ug importante kini aron maluwas. (Mat. 28:19, 20) Ang imong pagpabawtismo maoy simbolo sa imong pagpahinungod. Usa kana ka seryosong panaad kang Jehova nga higugmaon siya ug unahon ang iyang kabubut-on. Ang paghatag sa imong kinabuhi kang Jehova dili gyod sayop nga desisyon. Hunahunaa kon dili nâ nimo buhaton! Ang tawong wala magpasakop kang Jehova nailalom sa pagmando ni Satanas. Dili gusto sa Yawa nga maluwas ka. Sa pagkatinuod, malipay siya kon mawad-an ka sa imong paglaom nga mabuhi sa walay kataposan kay midapig ka niya ug mirebelde sa pagmando ni Jehova. Sukwahi sa pagdapig kang Satanas, tagda ang mga panalangin nga imong nadawat ingong dedikado ug bawtismadong Kristohanon. Karon nga gihatag na nimo ang imong kinabuhi kang Jehova, mas kombinsido kang moingon: “Si Jehova dapig kanako; dili ako mahadlok. Unsay arang mabuhat sa yutan-ong tawo kanako?” (Sal. 118:6) Walay makalabaw sa pribilehiyo sa pagkahimong dapig ug inuyonan sa Diyos. w17.12 23-24 ¶1-3

May mga higayon nga dili ta ganahan sa gisulti o gibuhat sa atong mga igsoon​—o sila ang masuko nato. Basin malisdan ta niini nga pagsulay. Pero sama sa ubang pagsulay, si Jehova naghatag natog kahigayonan sa pagpamatuod sa atong pagkamaunongon. Sa unsang paagi? Pinaagi sa pagpaningkamot nga mahiusa sa atong mga igsoon diha sa buluhaton, kay sila gihigugma ni Jehova bisan pa sa ilang kahuyangan. Gipakita sa kaagi ni Jose nga dili pugngan ni Jehova nga sulayan ang iyang mga alagad. Sa batan-on pa si Jose, siya gibaligya sa iyang nasinang mga igsoon sa amahan ingong ulipon, ug gidala sa Ehipto. (Gen. 37:28) Nakita ni Jehova ang nahitabo ug seguradong naguol siya kon giunsa pagtratar ang iyang matarong nga higala. Bisan pa niana, wala kana pugngi ni Jehova. Sa ulahi, dihang giakusahan si Jose sa asawa ni Potipar ug panglugos ug dayon gibilanggo, wala gihapon kana pugngi ni Jehova. Pero gipasagdan ba siya sa Diyos? Wala. Ang Bibliya nag-ingon: “Ang . . . ginabuhat [ni Jose] gipalampos ni Jehova.”​—Gen. 39:21-23. w18.01 9-10 ¶12-14

Unsa may pangunang mga pagtulon-an sa inyong relihiyon? Seguradong ipasiugda nimo nga si Jehova ang Maglalalang ug Maghahatag ug Kinabuhi. Lagmit hisgotan nimo nga mituo ka kang Jesu-Kristo, kinsa namatay ingong lukat. Ug malipay sad kang maghisgot bahin sa umaabot nga paraisong yuta, diin ang katawhan sa Diyos mabuhi sa walay kataposan. Apan hisgotan ba nimo ang pagkabanhaw ingong usa sa imong gipabilhang pagtulon-an? Duna tay maayong mga katarongan nga iapil ang pagkabanhaw sa atong pangunang pagtulon-an bisan pag naglaom ta nga maluwas sa dakong kasakitan ug mabuhi sa yuta sa walay kataposan. Hinungdanon sa atong pagtuo ang pagkabanhaw. Kon wala pa banhawa si Kristo, dili unta siya ang atong Hari, ug walay kapuslanan ang atong pagpanudlo bahin sa pagmando ni Kristo. (1 Cor. 15:12-19) Apan, nahibalo ta nga nabanhaw si Jesus, ug lig-on ang atong pagtuo sa pagkabanhaw.​—Mar. 12:18; Buh. 4:2, 3; 17:32; 23:6-8. w17.12 8 ¶1-2

Ang mga Pariseo nagpokus sa nabuhat sa nakasala, imbes sa pagkatawo niini. Dihang nakita sa mga Pariseo si Jesus nga nagkaon sa balay ni Mateo, ilang gipangutana ang iyang mga tinun-an: “Nganong ang inyong magtutudlo makigpangaon man uban sa mga maniningil ug buhis ug sa mga makasasala?” Si Jesus mitubag: “Ang mga tawong himsog wala magkinahanglan ug mananambal, kondili ang mga masakiton. Nan, lakaw ug tun-i ninyo ang kahulogan niini, ‘Buot ko ug kaluoy, ug dili halad.’ Kay ako mianhi aron sa pagtawag, dili sa mga tawong matarong, kondili sa mga makasasala.” (Mat. 9:9-13) Gikonsentir ba ni Jesus ang mga makasasala? Wala. Gani, apil sa pangunang mensahe ni Jesus ang pagdasig sa paghinulsol sa mga sala. (Mat. 4:17) Hinunoa, si Jesus nahibalo nga gustong magbag-o ang pipila niining “maniningil ug buhis ug mga makasasala.” Wala lang sila moadto sa balay ni Mateo aron mokaon. Hinunoa, ‘daghan kanila ang misugod sa pagsunod [kang Jesus].’ (Mar. 2:15) Makapaguol nga wala makita sa mga Pariseo ang nakita ni Jesus sa maong mga tawo. w17.11 13 ¶2; 16 ¶15

Kitang tanan mouyon nga panalangin gyod nga mahimong bahin sa Kristohanong kongregasyon. Ang atong pagtuon sa Pulong sa Diyos diha sa tigom ug ang kaayo ug gugma nga atong gipakita sa usag usa nagtabang nato sa paghunahuna pirme sa ganti. Bisan pa niana, usahay ang dili pagsinabtanay mahimong moresultag problema tali sa mga igsoon sa kongregasyon. Kon dili nato sulbaron ang maong problema, mahimong moresulta kinig pagdumot. (1 Ped. 3:8, 9) Unsay atong buhaton aron dili ta mapugngan sa pagdumot sa pagdawat sa ganti? Si Pablo nag-awhag sa mga taga-Colosas: “Ingon nga mga pinili sa Diyos, balaan ug hinigugma, isul-ob ninyo ang malumong mga pagmahal sa pagkamabination, kalulot, pagpaubos sa hunahuna, kalumo, ug hataas-nga-pailob. Magpadayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain. Ingon nga si Jehova kinabubut-on nga nagpasaylo kaninyo, buhata usab ninyo ang ingon.”​—Col. 3:12, 13. w17.11 26-27 ¶7-8

Dihang makahimog aksidenteng pagpatay, ang nakapatay kinahanglan unang ‘mopahayag sa iyang mga pulong [o, kaso] sa igdulungog sa mga ansiyano’ diha sa ganghaan sa siyudad nga napili niyang dangpan. Ug kinahanglan siyang atimanon. Pipila ka panahon sa ulahi, ipaatubang siya sa mga ansiyano sa siyudad diin nahitabo ang pagpatay, ug hukman nila ang kaso. (Num. 35:24, 25) Kon ilang madesisyonan nga aksidente ang nahitabo, pabalikon nila siya sa siyudad nga dalangpanan. Nganong kinahanglang moduol sa mga ansiyano? Obligasyon nila nga magpabiling hinlo ang Israel ug matabangan ang wala tuyoang nakapatay nga makabenepisyo sa kaluoy ni Jehova. Usa ka eskolar sa Bibliya ang misulat nga kon ang miikyas dili moduol sa mga ansiyano, “gipameligro niya ang iyang kaugalingon . . . kay wala niya pahimusli ang proteksiyon nga gitagana sa Diyos kaniya.” Kon dili siya modangop sa usa sa mga siyudad nga gigahin ni Jehova, puwede siyang patyon sa kinadul-ang paryente sa namatay. w17.11 9 ¶6-7

Karon, gigamit gihapon ni Jehova ang mga anghel aron proteksiyonan ug palig-onon ang iyang katawhan. (Mal. 3:6; Heb. 1:7) Sukad nahigawas ang espirituwal nga Israel sa simbolikong pagkabihag sa Dakong Babilonya niadtong 1919, kusog kaayo ang pag-uswag sa tinuod nga pagsimba bisan pa sa grabeng pagsupak. (Pin. 18:4) Kay giproteksiyonan ta sa mga anghel, dili ta angayng mahadlok nga ang organisasyon ni Jehova mailalom pag-usab sa espirituwal nga pagkabihag. (Sal. 34:7) Hinuon, makaseguro ta nga padayong mouswag sa espirituwal ang mga alagad sa Diyos sa tibuok kalibotan. Dapig nato ang kasundalohan ni Jehova. Panahon sa dakong kasakitan, ang mga anghel ni Jehova mangabot aron proteksiyonan ang iyang katawhan ug laglagon kadtong mosupak sa iyang pagmando. (2 Tes. 1:7, 8) Pagkatalagsaon nianang adlawa! w17.10 28 ¶10-11

Kon may membro sa pamilya nga mapalagpot o magpadis-asosyet, sama kinig dunggab sa espada. Unsay imong buhaton aron maagwanta ang kasakìt? Importante nga padayonon ang imong espirituwal nga rutina. Palig-ona ang kaugalingon pinaagi sa regular nga pagbasa sa Bibliya, pagpangandam ug pagtambong sa mga tigom, pagsangyaw, ug pag-ampo aron mahatagan kag kusog sa paglahutay. (Jud. 21) Komosta kon gibuhat na nimo ning tanan pero nasakitan gihapon ka? Ayawg surender! Ang maayong espirituwal nga rutina makatabang nimo sa pagkontrolar sa imong hunahuna ug pagbati. Konsideraha ang eksperyensiya sa magsusulat sa Salmo 73. May panahon nga sayop ang iyang panglantaw ug naguol siya pag-ayo. Pero nahibalik ang iyang hustong panglantaw dihang misulod siya sa dapit sa pagsimba sa Diyos. (Sal. 73:16, 17) Makatabang sab nimo ang imong matinumanong pag-alagad kang Jehova. w17.10 16 ¶17-18

Sa tanaman sa Eden, nagpakaaron-ingnon si Satanas nga naghunahuna sa kaayohan ni Eva, pero ang iyang gibuhat nagpakita nga siya hakog ug salingkapaw. (Gen. 3:4, 5) Sa panahon ni David, ang pagpakighigala ni Ahitopel sa hari napamatud-ang salingkapaw. Si Ahitopel nahimong traydor dihang gibati niya nga makabentaha siya. (2 Sam. 15:31) Karon usab, ang mga apostata ug uban pa nga nagpahinabog pagkabahinbahin sa kongregasyon naggamit ug “maulog-ulogong mga pulong ug madayegong sinultihan” aron ingnon nga mahigugmaon sila, pero sa tinuoray, kaugalingon ray ilang gihunahuna. (Roma 16:17, 18) Daotan ang salingkapaw nga gugma. Sukwahi kini sa diyosnong hiyas nga nagsakripisyo sa kaugalingong gugma. Posibleng malimbongan niini ang mga tawo, pero dili si Jehova. Gani, si Jesus miingon nga ang mga salingkapaw silotan sa “hilabihan gayod.” (Mat. 24:51) Busa, kinahanglan natong pangutan-on ang kaugalingon, ‘Pirme bang tinuod ang akong gugma, nga wala masagolig kahakog ug panglimbong?’ w17.10 8 ¶6-8

Kon direkta natong basahon ang Pulong sa Diyos diha sa pagsangyaw, samag gitugotan nato si Jehova nga moestorya sa tagbalay. Ang maayong pagkapili nga teksto mas puwersado kay sa bisan unsang pulong nga puwede natong isulti. (1 Tes. 2:13) Pangutan-a ang kaugalingon, ‘Naningkamot ba kong mabasahan ug teksto ang akong gisangyawan?’ Siyempre, dili igo nga basahan lang natog teksto ang atong gisangyawan. Ngano? Kay daghan ang gamay lag nasabtan o walay nahibaloan bahin sa Bibliya. Kanay kahimtang niadtong unang siglo, ug ingon niana sab karon. Busa dihang mabasahan natog teksto ang atong kaestorya, dili ta angayng magdahom nga masabtan dayon niya ang punto niini. Kinahanglang mogahin tag panahon aron ipasiugda ang pipila ka punto sa teksto​—lagmit basahog usab ang importanteng pulong—​ug ipatin-aw ang kahulogan niini. Pinaagi niana, ang mensahe sa Pulong sa Diyos matisok sa hunahuna ug kasingkasing sa atong kaestorya.​—Luc. 24:32. w17.09 25 ¶7-8

Aron masundog nato si Jesus, kinahanglan tang magmabination sa mga igsoon ug sa uban. (Juan 13:34, 35) Ang usa ka kahulogan sa pagkamabination mao ang “pagduyog sa pag-antos sa uban.” Ang tawo nga mabination andam nga mohupay sa uban, lagmit pinaagi sa pagtabang panahon sa ilang kalisdanan. Pangita ug mga paagi nga mahimo kana! Daghan ang naluoy tungod sa kalisdanan niadtong mga biktima sa kalamidad. Ilado ang katawhan ni Jehova sa pagtabang kon dunay katalagman. (1 Ped. 2:17) Sa Japan, usa ka sister ang nagpuyo sa lugar nga grabeng naigo sa linog ug tsunami niadtong 2011. Siya miingon nga “nadasig ug nahupayan” gyod siya tungod sa paningkamot sa mga boluntaryo gikan sa ubang lugar sa Japan ug sa laing nasod aron ayohon ang nadaot nga mga balay ug Kingdom Hall. Siya misulat: “Kini nakatabang nako nga makita ang pagmahal ni Jehova. Ug ang mga igsoon naghunahuna sa usag usa. Giampo pod mi sa mga igsoon sa tibuok kalibotan.” w17.09 11 ¶12-13

Nganong gusto natong pugngan ang kaugalingon? Konsideraha ang duha ka rason. Una, ang mga tawo nga makakontrolar sa ilang mga gana kasagaran wala kaayoy dagkong problema. Mas makontrolar nila ang ilang emosyon, maayo ang ilang relasyon sa uban, ug dili sila daling masuko ug ma-depress. Ikaduha, mahimong inuyonan sa Diyos ang tawo nga makasukol sa tentasyon ug makakontrolar sa iyang gana. Ang nahitabo kang Adan ug Eva nagpakita sa pait nga mga resulta kon walay pagpugong sa kaugalingon. (Gen. 3:6) Ug hunahunaa lang ang pag-antos sa mga tawo nga walay pagpugong sa kaugalingon. Kay dili hingpit, walay tawo ang bug-os makapugong sa kaugalingon. Si Jehova nahibalo nga dili pod ni sayon para sa iyang mga alagad. Maong gusto niya nga tabangan sila sa pagkontrolar sa ilang makasasalang mga tendensiya.​—1 Hari 8:46-50. w17.09 4 ¶3-4

Sa South Africa, dihay panahon nga ang mga Saksi ni Jehova nga lainlaig kolor sa panit wala tugoting mag-uban. Apan, niadtong Dominggo sa Disyembre 18, 2011, makapalipayng makita ang kapig 78,000 ka igsoon nga lainlaig rasa gikan sa South Africa ug sa silingan nga mga nasod. Sila nagtigom diha sa kinadak-ang estadyum sa siyudad sa Johannesburg aron sa pagpamati sa espirituwal nga programa. Mikomento ang usa sa mga manedyer sa estadyum: “Kamo ang pinakamaayog batasan nga grupo nga migamit niini nga estadyum. Ang tanan desenteg sinina. Ug gilimpiyohan ninyo pag-ayo ang estadyum. Apan labaw sa tanan, wala moy gipalabi nga rasa.” Ang maong mga komento gikan sa mga dili Saksi nagpakita nga talagsaon ang atong internasyonal nga panag-igsoonay. (1 Ped. 5:9) Busa, unsa may nakapalahi nato sa uban nga organisasyon? Sa tabang sa Pulong sa Diyos ug sa balaang espiritu, naningkamot ta pag-ayo sa ‘paghukas sa daang pagkatawo.’ Dayon, atong ‘gisul-ob ang bag-ong pagkatawo.’​—Col. 3:9. w17.08 17-18 ¶2-3

Ang Bibliya nag-ingon nga ang pagpailob maoy bahin sa balaang espiritu; kon wala ang tabang sa Diyos, ang dili hingpit nga mga tawo malisdan sa pagpakitag nahiangayng pailob. Ang pagpailob regalo gikan sa Diyos ug maoy importanteng paagi sa pagpakita sa atong gugma kaniya. Kini maoy pagpahayag usab sa atong gugma sa uban. Kon dili ta mapailobon, mohuyang ang atong gugma; ang pagpailob makapalig-on niana. (1 Cor. 13:4; Gal. 5:22) Ang pagpailob konektado sa uban pang importanteng Kristohanong mga hiyas. Pananglitan, konektado kini sa pagkamalahutayon, nga makatabang nato sa pag-atubang sa mga kalisdanan ug sa pagpabiling positibo. (Col. 1:11; Sant. 1:3, 4) Konektado sab kini sa pagkamainantoson, nga dili manimalos ug magpabiling lig-on bisag unsay mahitabo. Dugang pa, ang Bibliya nag-awhag kanato nga magmaandam sa paghulat. Gipasiugda kining bahina sa pagpailob diha sa Santiago 5:7, 8. w17.08 4 ¶4

Mga batan-on, lagmit mouyon mo nga sa dili pa mobiyahe, mas maayong magplano daan kon asa moadto. Ang kinabuhi sama sa pagbiyahe, ug ang panahon sa pagplano mao ang panahon sa inyong pagkabatan-on. Siyempre, dili sayon ang magplano. Pero, magmaisogon. Tagda ang giingon ni Jehova sa teksto karong adlawa. Si Jehova nag-awhag nimo nga magmaalamon sa pagplano sa imong kaugmaon. (Eccl. 12:1; Mat. 6:20) Gusto niyang magmalipayon ka. Dayag kini diha sa imong makita, madungog, ug matilawan. Tagda sab ang iyang pag-atiman ug pagtudlo kanato sa kinamaayohang paagi sa pagkinabuhi. Niadtong wala modawat sa iyang tambag, si Jehova miingon: “Inyong gipili ang butang nga ako walay kahimuot. . . . Tan-awa! Ang akong mga alagad managmaya, apan kamo manag-antos sa kaulawan. Tan-awa! Ang akong mga alagad managhugyaw sa kalipay tungod sa maayong kahimtang sa kasingkasing.” (Isa. 65:12-14) Madayeg si Jehova kon mohimog maalamong desisyon ang iyang katawhan.​—Prov. 27:11. w17.07 22 ¶1-2

Kon nahibalo ang Diyos sa detalye sa matag bituon, nakaila sab siya nimo​—kon asa ka, kon unsay imong gibati, ug kon unsay imong gikinahanglan sa matag situwasyon! Dili lang kay interesado si Jehova nimo, siya usab may gahom ug empatiya nga makatabang nimo sa pagsagubang sa mga problema. (Sal. 147:5) Mobati ka tingali nga lisod kaayo ang imong situwasyon o bug-at ra kaayo ang imong problema. Nakasabot ang Diyos sa imong limitasyon, ‘nga nahinumdom nga ikaw abog.’ (Sal. 103:14) Kay dili hingpit, balikbalik natong mahimo ang mao rang sayop. Magbasol gyod ta dihang makasulti tag sakit, makahunahunag dili maayo, o masina sa uban! Wala kana maeksperyensiyahi ni Jehova, pero makasabot gyod siya sa atong gibati! (Isa. 40:28) Tingali naeksperyensiyahan na nimo nga gitabangan ka ni Jehova sa imong problema.​—Isa. 41:10, 13. w17.07 18 ¶6-8

Usa ka brader nga taga-Sri Lanka, kinsa nagpuyo na karon sa laing nasod, ang nagpagamit sa iyang propidad didto sa Sri Lanka alang sa mga tigom ug asembliya, ug aron puy-an sa bug-os panahong mga alagad. Sakripisyo gyod ni sa pinansiyal sa maong brader pero dako kinig natabang sa lokal nga mga magmamantala nga pobre. Sa mga nasod diin may restriksiyon sa atong buluhaton, gibuksan sa mga igsoon ang ilang mga balay aron gamitong Kingdom Hall. Tungod niana, nakatabang sila sa daghang payunir ug sa uban nga nagkalisod sa pinansiyal aron dili na kini magbayad ug abang. Usa ka sister nga tighatagan ug donasyon para sa buluhaton sa Gingharian naghisgot sa panalangin nga iyang nadawat: “Tungod sa pagkamahinatagon, naeksperyensiyahan nako ang talagsaong kausaban sa akong kaugalingon sulod sa milabayng mga tuig. Akong nakita nga kon mas mahinatagon ko, mas maayo pod ang akong pagpakiglabot sa uban. Nahimo kong mas mapinasayloon, mapailobon, ug mas sayon na para nako ang pagdawat sa mga kapakyasan ug tambag.” w17.07 9 ¶9-10

Bisag sa ngadtongadto mas nasabtan ni Job ang rason sa iyang mga pag-antos, basin may mga higayon nga maghunahuna siya kon nganong kinahanglan man siyang mag-antos pag-ayo. Bisag unsay iyang gihunahuna, mahimong palandongon niya ang tambag sa Diyos. Ang pagbuhat niana makatabang niya sa pagbaton ug hustong panglantaw ug, sa baylo, maghupay kaniya. (Sal. 94:19) Mahimong mabatonan usab nato ang hustong panglantaw ug paghupay gikan sa kasinatian ni Job. Kon buot hunahunaon, gipasulat kana ni Jehova “alang sa pagtudlo kanato, aron nga pinaagi sa atong pag-antos ug pinaagi sa paghupay gikan sa mga Kasulatan kita makabatog paglaom.” (Roma 15:4) Unsay atong makat-onan niini? Ang panguna mao: Dili ta sobrang maghunahuna sa atong mga problema nga makalimtan na hinuon kining hinungdanong isyu​—ang pagbindikar sa pagkasoberano ni Jehova. Ug angay natong masabtan nga ang atong papel niining hinungdanong isyu naglakip sa pagpabiling matinumanon bisan sa lisod nga mga kahimtang, sama sa gibuhat ni Job. w17.06 24 ¶9; 25 ¶13-14

Gipakita ni Jesus nga gikinahanglan usahay ang pagpahulay. Human sa usa ka makugihong pagsangyaw, giingnan niya ang iyang mga tinun-an sa mga pulong sa teksto karong adlawa. Sa pagkatinuod, ang paglingawlingaw ug kalingawan makatabang nato nga makapahulay ug makarelaks. Pero, anaa ang kapeligrohan nga ang paglingawlingaw mahimong panguna sa atong kinabuhi. Sa unang siglo, daghan ang may panglantaw nga “mangaon kita ug manginom, kay ugma kita mangamatay.” (1 Cor. 15:32) Karon, komon usab kana nga panglantaw sa daghang bahin sa kalibotan. Unsay makatabang nato sa pagkahibalo kon timbang ba ang atong panglantaw maylabot sa paglingawlingaw? Sulod sa usa ka semana, puwede natong ilista kon pila ka oras ang atong gigugol sa espirituwal nga kalihokan. Dayon, itandi nato kana sa gidaghanon sa oras nga atong gigugol nianang semanaha sa kalingawan, sama sa esport, mga hilig, pagtan-awg TV, o pagdulag mga video game. Kinahanglan bang mohimog kausaban?​—Efe. 5:15, 16. w17.05 24-25 ¶11-13

Sa ilustrasyon ni Jesus, ang magpapatigayon, o negosyante nakakita ug perlas nga espesyal kaayo. Pero aron mapalit kana, kinahanglan niyang ibaligya ang tanan niyang kabtangan. Mahunahuna ba nimo kon unsa ka bililhon para niya ang maong perlas? Ang kamatuoran sa Gingharian sa Diyos pareho nianang bililhong perlas. Kon gimahal nato kana sama sa pagmahal sa negosyante sa perlas, andam tang biyaan ang tanang butang aron mahimo ug magpabiling sakop sa Gingharian. (Mar. 10:28-30) Pananglitan, si Zaqueo midato pinaagi sa pagpangilkil. (Luc. 19:1-9) Pero, dihang nadunggan nianang makasasalang tawo ang gisangyaw ni Jesus bahin sa Gingharian, nakita niya ang pagkabililhon sa iyang nadungog ug milihok dayon siya. Siya miingon: “Tan-awa! Ang katunga sa akong mga kabtangan, Ginoo, ipanghatag ko sa mga kabos, ug pasig-ulian ko ug upat ka pilo ang bisan unsa nga gipangilkil ko kang bisan kinsa.” Andam siyang iuli ang iyang bahandi nga gikan sa pagpanikas ug talikdan ang iyang kahakog sa materyal nga mga butang. w17.06 10 ¶3-5

Kadtong gipili sa mga ginikanan nga motabang sa ilang mga anak kinahanglang magdasig sa mga bata nga motahod sa ilang ginikanan, nga mosultig positibo bahin kanila, ug dili pulihan ang ilang responsabilidad. Dugang pa, kadtong motabang kinahanglang maglikay sa panggawi nga mahimong isipon sa mga Saksi ug dili Saksi ingong kuwestiyonable sa moral. (1 Ped. 2:12) Bisag makapangayog tabang ang mga ginikanan, ila gihapong responsabilidad ang espirituwal nga pagbansay sa ilang mga anak. Kinahanglang mahibalo sila sa ginahimong tabang sa uban ug padayon nilang tudloan ang ilang mga anak. Mga ginikanan, pag-ampo kang Jehova alang sa tabang, ug buhata ang inyong kinamaayohan. (2 Cron. 15:7) Unaha ang relasyon sa inyong anak kang Jehova imbes ang inyong kaayohan. Buhata ang inyong maarangan aron makaabot gayod sa kasingkasing sa inyong anak ang Pulong sa Diyos. Ayawg wad-a ang inyong paglaom nga mahimo silang maayong alagad ni Jehova. w17.05 12 ¶19-20

Hunahunaa ang hitabo. Ang usa ka amahan giakusahan nga nakahimog sala nga takos sa kamatayon. Nakurat ug nadismayar ang iyang pamilya ug higala dihang gihukman siyang sad-an base sa bakak nga testimonya sa mga testigos nga iladong mga tawong walay silbi. Ang mga nahigugma sa hustisya nasakitan pag-ayo samtang nakita nilang gisentensiyahag kamatayon ang maong inosenteng tawo ug iyang mga anak. Kini nga asoy dili hinimohimo. Eksperyensiya kini sa matinumanong alagad ni Jehova nga si Nabot, kinsa nabuhi panahon sa pagmando ni Haring Ahab sa Israel. (1 Hari 21:11-13; 2 Hari 9:26) Dihang gustong paliton ni Haring Ahab ang parasan ni Nabot o pulihan kinig mas maayong parasan, wala mosugot si Nabot. Ngano? Mibalibad si Nabot kay si Jehova nagsugo sa nasod sa Israel nga dili permanenteng ibaligya ang panulondon sa ilang pamilya. (Lev. 25:23; Num. 36:7) Klaro, ang panglantaw ni Nabot sama nianang kang Jehova. w17.04 23 ¶1; 24 ¶4

Kinsay magpabilin dihang mawala na ang mga daotan? Si Jehova nagsaad: “Ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.” Dayon, ang maong salmo nag-ingon: “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.” (Sal. 37:11, 29) Kinsa man ang mga “maaghop” ug “matarong”? Ang mga maaghop mao kadtong mapainubsanong midawat sa pagtudlo ug paggiya ni Jehova; ang mga matarong mao kadtong gustong mobuhat sa husto sa panan-aw ni Jehova. Karon, mas daghan ang daotan kay sa matarong. Pero sa bag-ong kalibotan, ang mga maaghop ug matarong dili na mao ang kinagamyan o kinadaghanan; sila na lang ang magpabiling buhi. Oo, himoon sa maong katawhan ang yuta nga usa ka paraiso! w17.04 10-11 ¶5-6

Ang “gugma sa Diyos” magpalihok nato sa paghigugmaay, ilabina sa malisod nga kahimtang. (1 Juan 3:17, 18) Dihang nakasinatig kanihit sa pagkaon ang mga Kristohanon sa Judea niadtong unang siglo, ang kongregasyon nag-organisar ug tabang. (Buh. 11:28, 29) Si apostol Pablo ug Pedro nag-awhag sab sa mga Kristohanon sa pag-abiabi sa usag usa. (Roma 12:13; 1 Ped. 4:9) Kon abiabihon ang nagaduawng mga brader, labi pang angayng abiabihon ang mga igsoon kansang kinabuhi nameligro o gilutos tungod sa ilang pagtuo! Di pa dugay, libolibo ka Saksi ang kinahanglang mamakwet tungod sa paggubatay ug paglutos sa sidlakang Ukraine. Ikasubo, may pipila nga namatay. Apan, kadaghanan nila gipapuyo sa balay sa mga igsoon sa laing dapit sa Ukraine ug sa Russia. Nianang duha ka nasod, sila nagpabiling neyutral, nga “dili . . . bahin sa kalibotan,” ug madasigong “nagpahayag sa maayong balita bahin sa pulong.”​—Juan 15:19; Buh. 8:4. w17.05 4 ¶6-7