Enero

Dihang membro pa si Moises sa harianong pamilya sa Ehipto, siya dili aghop. Gani, kay dali siyang masuko, napatay niya ang usa ka tawo nga iyang gihunahuna nga nagbuhat ug inhustisya. Naghunahuna si Moises nga uyonan ra ni Jehova ang iyang gihimo. Gitabangan ni Jehova si Moises sulod sa 40 ka tuig aron masabtan nga dili lang kaisog ang gikinahanglan sa pagpanguna sa mga Israelinhon; kinahanglan siyang magmaaghop. Ug aron mahimong aghop, kinahanglan sab siyang magpaubos, magpasakop, ug magmalumo. Iyang nakat-onan ang maong leksiyon ug nahimo siyang maayong lider. (Ex. 2:11, 12; Buh. 7:21-30, 36) Karon, angayng sundogon sa mga ulo sa pamilya ug sa mga ansiyano si Moises. Dihang dili respetohon, ayawg kasuko. Mapainubsanong dawata ang imong sayop. (Eccl. 7:9, 20) Sunda ang instruksiyon ni Jehova kon unsaon pagdumala ang mga problema. Ug kanunay nga himoang lumo ang tubag. (Prov. 15:1) Kon ingon ana ang mga ulo sa pamilya ug mga tigdumala, sila makapalipay kang Jehova, makatabang sa pagpatunhay sa kalinaw, ug makapakitag maayong ehemplo kon unsaon pagpabiling aghop. w19.02 8 ¶1; 10 ¶9-10

Matikdi ang rason kon nganong maluluy-on si Jesus. Iyang nakita nga ang mga tawo “nahisama sa mga karnero nga walay magbalantay.” Tingali nakita ni Jesus nga ang pipila kanila pobre ug naghago aron matagan-an ang pamilya. Ang uban basig namatyan ug minahal. Kon mao, makasabot si Jesus sa ilang kahimtang. Posibleng naatubang sab ni Jesus ang pipila niini nga mga problema. Mahunahunaon siya sa uban, ug napalihok siya sa paghupay nila. (Isa. 61:1, 2) Unsay atong makat-onan kang Jesus? Sama kang Jesus, ang mga tawo sa atong palibot “nahisama sa mga karnero nga walay magbalantay.” Daghan silag problema. Dala nato ang ilang gikinahanglan​—ang mensahe sa Gingharian. (Pin. 14:6) Busa ingong pagsundog sa atong Agalon, atong isangyaw ang maayong balita kay kita ‘naluoy sa timawa ug sa kabos.’ (Sal. 72:13) Naluoy ta sa mga tawo, ug gusto natong tabangan sila. w19.03 21-22 ¶6-7

Daghan tag rason nga higugmaon si Jehova. Siya wala lang magtagana nato sa maayong mga butang nga atong mapahimuslan matag adlaw kondili nagtudlo pod siya nato sa kamatuoran bahin sa iyang kaugalingon ug katuyoan. (Juan 8:31, 32) Pinaagi sa Kristohanong kongregasyon, siya naggiya ug nagtabang nato. Siya nagtabang nato nga maantos ang mga problema karon, ug siya nagtanyag nato sa paglaom nga mabuhi sa walay kataposan sa hingpit nga kahimtang. (Pin. 21:3, 4) Dihang atong pamalandongon kon unsa ka daghan ang nahimo ni Jehova aron ipakita ang pagmahal kanato, masuod ta niya. Ug dihang higugmaon nato si Jehova, mabatonan nato ang hustong matang sa kahadlok. Mahadlok ta nga pasakitan ang Usa nga nahigugma nato pag-ayo. Kon pirme nimong hunahunaon ang mga kaayohan sa pagpagiya kang Jehova, mas modako ang imong gugma kaniya ug sa iyang sukdanan. Dayon, walay tentasyon ni Satanas ang makapahunong nimo sa pag-alagad kang Jehova. Hunahunaa ang imong kaugalingon libolibo ka tuig gikan karon. Imong mahinumdoman nga ang pagpabawtismo mao ang pinakamaayong desisyon nga imong nahimo! w19.03 6 ¶14; 7 ¶19

Ang tibuok pamilya makabenepisyo kon ang matag usa magpakitag apresasyon. Mas magkasuod ang magtiayon kon pirme silang magpasalamat sa usag usa. Mas sayon na pod ang pagpasaylo sa usag usa. Ang bana nga nakaapresyar sa iyang asawa makamatikod sa maayong nasulti ug nahimo niini ug siya “mobangon [ug] magdayeg kaniya.” (Prov. 31:28) Ug sultian sa maalamong asawa ang iyang bana kon sa unsa siya mapasalamaton niini. Mga ginikanan, unsaon ninyo pagtudlo ang inyong mga anak sa pagpakitag apresasyon? Hinumdomi, sundogon sa inyong mga anak ang inyong isulti ug buhaton. Busa, mahimong maayong ehemplo pinaagi sa pagpasalamat kon makahimo silag maayo para ninyo. Dugang pa, tudloi sila sa pagpasalamat kon ang uban nakahimog maayo para nila. Tabangi silang masabtan nga kinahanglang kinasingkasing ang pagpasalamat ug dakog epekto ang ilang isulti. w19.02 17 ¶14-15

Importante kaayo ang maong mga pulong. Si Job wala magpadala sa pag-atake ni Satanas, ug masundog nato siya. Nganong naapil ka dihang gikuwestiyon ni Satanas si Job? Sama rag miingon siya nga wala gyod ka mahigugma kang Jehova nga Diyos, nga moundang kag alagad aron dili mamatay, ug nga dili tininuod ang imong pagkamatinumanon! (Job 2:4, 5; Pin. 12:10) Unsay imong pagbati ana? Sakit kaayo, dili ba? Pero hunahunaa ni: Si Jehova nagtugot kang Satanas nga sulayan ang imong pagkamatinumanon. May pagsalig si Jehova nimo, maong iya kang gihatagag kahigayonan nga ipakita ang imong pagkamatinumanon ug motabang sa pagpamatuod nga bakakon si Satanas. Ug nagsaad Siyang tabangan ka. (Heb. 13:6) Pribilehiyo gyod nga ang Magmamando sa uniberso may pagsalig nimo! Imo bang nakita kon nganong importante ang pagkamatinumanon? Pinaagi niini, atong mapamatud-ang bakakon si Satanas, mabayaw ang ngalan sa atong Amahan, ug masuportahan ang Iyang pagmando. w19.02 5 ¶9-10

Gisultian ni Jesus ang mga apostoles bahin sa mga pagsulay nga ilang maeksperyensiyahan. Dayon, aron dasigon sila nga sundogon siya, giingnan niya sila nga “magmaisogon!” (Juan 16:1-4a, 33) Katuigan sa ulahi, ang mga tinun-an ni Jesus nagsundog gihapon sa iyang pagsakripisyo sa kaugalingon ug nagpakitag kaisog. Bisag mag-antos sila, ilang gitabangan ang usag usa panahon sa mga pagsulay. (Heb. 10:33, 34) Karon sab, gisundog nato ang pagkamaisogon ni Jesus. Pananglitan, nagkinahanglag kaisog ang pagtabang sa atong mga igsoon nga gilutos. Usahay, sila gipriso nga dili makataronganon. Kon mahitabo nâ, kinahanglang buhaton nato ang atong maarangan sa pagtabang nila, apil na sa pagdepensa kanila. (Filip. 1:14; Heb. 13:19) Ang laing paagi nga ikapakita nato ang kaisog mao ang pagpadayon sa pagsangyaw “uban ang kaisog.” (Buh. 14:3) Sama kang Jesus, determinado tang isangyaw ang Gingharian, bisan pag supakon o lutoson. w19.01 22-23 ¶8-9

Unsay makatabang nimo aron makahatag ug makapadasig nga komento diha sa tigom? Ang pinakaimportante mao ang pagpangandam sa matag tigom. Kon magplano ka ug mangandam pag-ayo, mas may kompiyansa kang mokomento. (Prov. 21:5) Sa unsang paagi makapangandam pag-ayo sa tigom? Sugdi ang matag pagtuon pinaagi sa pagpangayo sa balaang espiritu ni Jehova. (Luc. 11:13; 1 Juan 5:14) Dayon paggahin ug pipila ka minuto sa pag-analisar sa ulohan, sub-ulohan, ilustrasyon, ug sa kahon. Dihang tun-an nimo ang matag parapo, basaha ang tanang gisitar nga teksto kon mahimo. Pamalandonga ang impormasyon, nga maghatag ug pagtagad sa mga punto nga gusto nimong komentohan. Kon mangandam ka pag-ayo, mas makabenepisyo ka ug mas sayon na para nimo ang pagkomento.​—2 Cor. 9:6. w19.01 9 ¶6; 11-12 ¶13-15

Pinaagi sa pag-inspirar kang Habacuc nga isulat ang iyang mga kabalaka, si Jehova nagtudlo natog importanteng leksiyon: Dili ta angayng mahadlok sa pagsulti Niya sa atong mga kabalaka o pagduhaduha. Gani, giawhag ta niya nga isulti kaniya ang atong gibati. (Sal. 50:15; 62:8) Si Habacuc mismo ang nakigsuod kang Jehova, ang iyang kasaligang Higala ug Amahan. Wala soloha ni Habacuc ang iyang problema, nga nagsalig lang sa iyang kaugalingong pagsabot. Hinunoa, giampo niya ang iyang mga kabalaka, nga nagpakitag maayong ehemplo kanato. Dugang pa, si Jehova, ang Tigpatalinghog sa pag-ampo, nag-awhag nato nga mosalig niya pinaagi sa pagsulti kaniya sa atong mga kabalaka. (Sal. 65:2) Kon ato nang buhaton, makita nato ang tubag ni Jehova sa atong mga pag-ampo​—ang iyang mainitong gakos pinaagi sa iyang mapinanggaong giya. (Sal. 73:23, 24) Tabangan ta niya nga mahibaloan ang iyang hunahuna bisag unsay atong giantos. Ang atong kinasingkasing nga pag-ampo maoy usa sa nindot kaayong mga paagi sa pagpakita sa atong pagsalig sa Diyos. w18.11 13 ¶2; 14 ¶5-6

Dili lang ang parehas niyag edad ang gipili ni David nga higalaon. Nahinumdom ka ba sa suod niyang higala nga “halangdon”? Siya si Jonatan. Gani, sa rekord sa Bibliya, ang ilang panaghigalaay maoy usa sa labing talagsaon. Pero, nahibalo ka ba nga si Jonatan magulang kang David ug mga 30 anyos? Busa, nganong suod kaayo sila? Tungod kana sa ilang pagtuo sa Diyos, pagtahod sa usag usa, ug sa ilang maisogong pagpakiggubat sa mga kaaway sa Diyos. (1 Sam. 13:3; 14:13; 17:48-50; 18:1) Sama kang David ug Jonatan, ‘malipay’ pod ta kon higugmaon nato ang nahigugma ug nagpakitag pagtuo kang Jehova. Si Kiera, nga nag-alagad sa Diyos sa daghang katuigan, miingon: “Nakighigala ko sa mga igsoon nga lainlaig kagikan ug kultura.” Kon buhaton nâ nimo, makita nimo nga makapahiusa gyod ang Pulong sa Diyos ug ang balaang espiritu. w18.12 26 ¶11-13

Ang ekspresyong “pakighilawas,” o seksuwal nga imoralidad naglakip sa lainlaing seksuwal nga sala sama sa pagpanapaw, prostitusyon, seksuwal nga relasyon tali sa dili minyo, homoseksuwalidad, ug pagpakigsekso sa hayop. Kon pananglitan ang usa ka minyong lalaki makahimog seksuwal nga imoralidad, ang asawa puwedeng modesisyon kon makigdiborsiyo ba siya o dili. Matikdi nga wala mag-ingon si Jesus nga kon ang kapikas makahimog seksuwal nga imoralidad (por·neiʹa) kinahanglang moresulta ni sa diborsiyo. Pananglitan, ang usa ka asawa tingali modesisyon nga dili makigdiborsiyo sa iyang bana bisan pag nakasala ni. Tingali nahigugma gihapon siya sa iyang bana ug andam siyang mopasaylo niini ug makigtinabangay aron molig-on ang ilang kaminyoon. Sa tinuod lang, kon makigdiborsiyo siya pero dili magminyo pag-usab, makaatubang siyag mga kalisdanan. Pananglitan, komosta ang iyang materyal ug seksuwal nga panginahanglan? Dili kaha siya magmingaw? Unsay epekto niana sa mga anak? (1 Cor. 7:14) Klaro, ang inosenteng kapikas nga makigdiborsiyo mag-atubang ug bug-at nga mga problema. w18.12 12 ¶10-11

Gidumtan ni Jehova ang pagkadili-matarong. (Isa. 61:8) Bisag nahibalo siya nga tungod sa atong pagkadili-hingpit duna tay tendensiya nga mohimog sayop, gitambagan ta niya nga dumtan ang pagkadili-matarong. Ang pagpamalandong kon nganong gidumtan ni Jehova ang pagkadaotan makatabang nato nga masundog ang iyang panghunahuna, ug mas makasukol sa daotang binuhatan. Ang pag-ugmad sa panglantaw ni Jehova bahin sa pagkadili-matarong makatabang nato nga mailhan ang pipila ka sayop nga buhat bisag walay espesipikong gihisgotan ang Pulong sa Diyos bahin niana. Pananglitan, ang lap dancing maoy law-ay nga buhat nga komon sa kalibotan karon. Bation tingali sa uban nga walay nalapas nga prinsipyo kay dili kuno ni sama sa aktuwal nga pagpakigsekso. Pero gipakita ba niini ang panghunahuna sa Diyos, kinsa nagdumot sa tanang klase sa pagkadaotan? Likayan nato ang pagkadaotan pinaagi sa pag-ugmad sa pagpugong sa kaugalingon ug pagdumot sa gidumtan ni Jehova.​—Roma 12:9. w18.11 25 ¶11-12

Nakita ni apostol Pablo nga importante kaayo ang pasalig ni Jehova maong katulo ni niya gikutlo sa iyang mga sulat! (Roma 1:17; Gal. 3:11; Heb. 10:38) Bisag unsa pay kalisdanan nga ginaantos sa matarong, kon siya may pagtuo ug pagsalig sa Diyos, makita niya ang katumanan sa Iyang mga saad. Giingnan ta ni Jehova nga magpokus sa umaabot. Ang Habacuc naghatag ug hinungdanong leksiyon alang kanato nga nagkinabuhi niining kataposang mga adlaw. Si Jehova nagsaad ug kinabuhi ngadto sa mga matarong nga motuo ug mosalig kaniya. Busa, magpadayon ta sa pagpalig-on sa atong pagtuo ug pagsalig sa Diyos, bisag unsa pang kalisdanan ug kabalaka ang atong giatubang. Pinaagi kang Habacuc, gipasaligan ta ni Jehova nga Siya motabang ug magluwas kanato. Gihangyo ta niya nga mosalig kaniya ug mapailobong maghulat sa iyang gitakdang panahon dihang magmando na sa yuta ang Gingharian. Nianang panahona, ang tibuok yuta mapuno sa malipayon ug malumo nga mga magsisimba.​—Mat. 5:5; Heb. 10:36-39. w18.11 16 ¶15-17

Sa unang siglo, ang pipila nga sa sinugdan midawat sa gitudlo ni Jesus wala magpadayon sa paglakaw sa kamatuoran. Pananglitan, human sa milagrosong pagpakaon ni Jesus sa usa ka dakong panon sa katawhan, sila misunod niya sa pikas bahin sa Dagat sa Galilea. Didto, dihay giingon si Jesus nga nakapakurat nila: “Gawas kon kamo mokaon sa unod sa Anak sa tawo ug moinom sa iyang dugo, kamo walay kinabuhi diha sa inyong kaugalingon.” Imbes mangutana kang Jesus kon unsay iyang gipasabot, sila napandol ug miingon: “Kining mga pulonga makapakugang; kinsa ang makapatalinghog niini?” Ingong resulta, “daghan sa iyang mga tinun-an ang namalik ngadto sa mga butang nga ilang gitalikdan ug wala na molakaw kauban niya.” (Juan 6:53-66) Makapasubo nga ang pipila karon wala makapadayon sa paglakaw sa kamatuoran. Ang uban napandol tungod sa gisulti o gibuhat sa usa ka iladong igsoon. Ang pipila nasakitan sa Kasulatanhong tambag nga ilang nadawat, o gibiyaan nila ang kamatuoran kay duna silay dili pagsinabtanay sa laing igsoon. w18.11 9 ¶3-5

Kon dili nato bug-os masabtan ang mga rason sa pipila ka kausaban sa organisasyon, maayong palandongon nato kon giunsa pagpanguna sa Kristo ang katawhan sa Diyos kaniadto. Sa adlaw ni Josue o sa unang siglo, ang Kristo kanunayng nagtaganag maalamong giya aron mapanalipdan ang katawhan sa Diyos, mapalig-on ang ilang pagtuo, ug magpabilin silang nahiusa. (Heb. 13:8) Ang tukma sa panahong giya nga gihatag sa “matinumanon ug maalamong ulipon” klarong nagpakita nga mahigugmaong naghunahuna si Jesus sa atong espirituwalidad. (Mat. 24:45) Dihang masabtan nato kon giunsa ta paggiya sa Kristo, atong makita nga gusto gyod niyang mouswag ta sa espirituwal. Gawas pa sa pag-atiman sa atong espirituwalidad, gitabangan ta sa Kristo nga magpokus sa labing importanteng buluhaton karon​—ang pagsangyaw.​—Mar. 13:10. w18.10 25 ¶13-16

Ang usa ka talagsaong pananglitan sa pagpakitag pagpugong sa kaugalingon dihang may mohagit nato mabasa sa 2 Samuel 16:5-13. Si David ug ang iyang mga alagad giinsulto ug giatake ni Simei, nga paryente ni Haring Saul. Giantos kana ni David bisag kaya unta nâ niyang pahunongon. Unsay gihimo ni David aron iyang makontrol ang kaugalingon? Ang superskripsiyon sa Salmo 3 nagpakita nga gikomposo ni dihang si David ‘mikalagiw tungod kang Absalom nga iyang anak.’ Ang bersikulo 1 ug 2 haom nga naghisgot sa mga panghitabo sa Ikaduhang Samuel kapitulo 16. Dayon gipasiugda sa Salmo 3:4 ang pagsalig ni David: “Motawag ako kang Jehova, ug siya motubag kanako.” Sa susama, makaampo ta dihang atakehon. Ingong tubag, si Jehova magtagana sa iyang balaang espiritu nga makatabang nato sa paglahutay. Makahunahuna ka bag situwasyon diin kinahanglan kang magpugong sa kaugalingon o magpasaylo niadtong nakapasakit nimo? Masaligon ba ka nga nakita ni Jehova ang imong kasakit ug panalanginan ka niya? w18.09 6 ¶16-17

Dihang magsangyaw, kinahanglang pirme tang magpakitag konsiderasyon ug pagtahod, ug nag-apil nâ sa pagkahimong pamilyar sa mga tawo sa atong teritoryo. Hinumdomi nga dihang mamalaybalay ta, wala magdahom ang mga tawo sa atong pagbisita. Busa, importante nga mobisita ta sa panahon nga mas andam silang makig-estorya! (Mat. 7:12) Pananglitan, ang mga tawo ba sa inyong teritoryo dugay mangmata kon Sabado ug Dominggo? Kon mao, puwede kang magsangyaw unâ sa kadalanan, mag-cart, o mobalikduaw sa mga tawo nga kabalo kang nagmata na anang panahona. Daghan ang puliki, busa mas maayong mubo lang ang imong pagpakig-estorya, ilabina sa sinugdan. (1 Cor. 9:20-23) Dihang makita sa mga tawo nga nakasabot ta sa ilang kahimtang o kapuliki, basin mas andam silang makig-estorya nato sa atong pagbalik. Klaro, angayng ipakita ang bunga sa espiritu sa Diyos diha sa atong ministeryo. Kon buhaton nato nâ, mahimo gyod tang “mga isigkamagbubuhat sa Diyos.” Basin gamiton pa gani ta ni Jehova sa pagdani sa mga tawo ngadto sa kamatuoran.​—1 Cor. 3:6, 7. w18.09 32 ¶15-17

Sa unsang paagi makapalipay ang pagkamalumo? Mausab ang mga tawo human makakat-on sa tukmang kahibalo sa kamatuoran. Sa una, sila tingali isog, palaaway, ug agresibo. Pero karon, sila nagsul-ob sa “bag-ong pagkatawo” ug nagpakitag “malumong mga pagmahal sa pagkamabination, kalulot, pagpaubos sa hunahuna, kalumo, ug hataas-nga-pailob.” (Col. 3:9-12) Ingong resulta, sila nagkinabuhi karon nga malinawon, mahigugmaon, ug mas malipayon. Dugang pa, ang Pulong sa Diyos nagsaad nga sila “magapanag-iya sa yuta.” (Sal. 37:8-10, 29) Sa unsang paagi ang mga malumo “magapanunod sa yuta”? Ang dinihogan sa espiritu nga mga tinun-an ni Jesus magapanunod sa yuta dihang mandoan nila kini ingong mga hari ug saserdote. (Pin. 20:6) Pero minilyon nga dili langitnon ug paglaom ang makapanunod sa yuta. Sa unsang paagi? Tugotan silang mopuyo niini sa walay kataposan nga hingpit, malinawon, ug malipayon. w18.09 19 ¶8-9

Si Jehova mismo ang pinakamaayong ehemplo ana. (Gen. 18:32; Jos. 10:14) Konsideraha ang atong makat-onan sa Exodo 32:11-14. Bisag wala kinahanglana ni Jehova ang opinyon ni Moises, gihatagan gihapon niya kinig kahigayonan sa pagsulti sa gibati niini. Mapailobon ka bang maminaw sa tawong masalaypon ug dayon sundon ang iyang giingon? Hinunoa, si Jehova mapailobong maminaw sa mga tawong nag-ampo niya nga may pagtuo. Maayong pangutan-on nato ang kaugalingon: ‘Kon si Jehova mapainubsanong maminaw sa mga tawo sama sa iyang gihimo kang Abraham, Raquel, Moises, Josue, Manoa, Elias, ug Ezequias, di ba angay pod nakong tahoron ang mga igsoon, dayegon sila, paminawon ang ilang opinyon, ug sundon pa gani ang ilang maayong mga ideya? May kakongregasyon ba ko o membro sa pamilya nga nagkinahanglan karon sa akong atensiyon? Unsay kinahanglan nakong himoon bahin ana?’​—Gen. 30:6; Maghu. 13:9; 1 Hari 17:22; 2 Cron. 30:20. w18.09 6 ¶14-15

Lisod tingaling magpadayon sa pagpanghatag kon ang mga tawo sa atong palibot mahunahunaon lang sa kaugalingon. Pero, nag-ingon si Jesus nga ang duha ka kinadak-ang sugo mao ang paghigugma kang Jehova sa tibuok kasingkasing, kalag, hunahuna, ug kusog ug paghigugma sa atong isigkatawo sama sa kaugalingon. (Mar. 12:28-31) Kadtong nahigugma kang Jehova nagsundog niya. Si Jehova ug Jesus parehong mahinatagon. Ug gidasig ta nila nga sundogon nato sila, kay mao nay tinuod nga makapalipay nato. Kon maningkamot ta nga magmahinatagon diha sa atong ginabuhat para sa Diyos ug sa isigkatawo, atong gipasidunggan si Jehova ug makabenepisyo ta ug ang uban. Seguradong naningkamot ka na sa pagpanghatag ug pagtabang sa uban, ilabina sa mga igsoon. (Gal. 6:10) Kon padayon nâ nimong buhaton, seguradong mahalon ug apresyahon ka, ug magmalipayon ka. w18.08 22 ¶19-20

Para kang Jehova, walay labaw nga rasa, kultura, nasod, tribo, o pinulongan. Dawaton niya si bisan kinsang lalaki o babaye nga nahadlok sa Diyos ug nagbuhat ug matarong. (Gal. 3:26-28; Pin. 7:9, 10) Seguradong nahibalo na ka niini. Pero komosta kon nagdako ka sa lugar o pamilya nga punog diskriminasyon? Bisag para nimo wala kay pagpihig, basig naa kay diskriminasyon sa sulod nimo. Bisan si Pedro, kinsa nakapribilehiyo sa pagpahayag sa pagkadili-mapihigon ni Jehova, nagpakitag diskriminasyon sa ulahi. (Gal. 2:11-14) Unsay atong buhaton aron mohunong na ta sa paghukom base sa panagway? Gamit ang Pulong sa Diyos, kinahanglan natong susihon pag-ayo ang kaugalingon kon naa bay nagpabiling diskriminasyon sa atong hunahuna o pagbati. (Sal. 119:105) Nagkinahanglan sab tingali tag mahigugmaong tabang sa uban kinsa nakamatikod nga nagpakita tag diskriminasyon, bisag wala nato ni mamatikdi sa atong kaugalingon. (Gal. 2:11, 14) Posibleng nakagamot na ni pag-ayo kanato nga dili na nato ni mamatikdan. w18.08 9 ¶5-6

Pangutan-a ang kaugalingon: ‘Makita ba sa uban nga maunongon ko kang Jehova? Nangita ba kog mga kahigayonan sa pagpaila nga Saksi ni Jehova ko?’ Maguol gyod si Jehova kon human nga mapili ta niya ingong iyang katawhan, magduhaduha ta sa pagpaila nga siyay tag-iya nato. (Sal. 119:46; Mar. 8:38) Makapaguol, dili kaayo makita diha sa pipila ang kalainan tali sa usa nga nag-alagad sa Diyos ug sa usa nga wala kay ilang gisundog ang “espiritu sa kalibotan.” (1 Cor. 2:12) Tungod niini nga espiritu, magpokus ang mga tawo sa “tinguha sa . . . unod.” (Efe. 2:3) Pananglitan, bisan pa sa daghang tambag, gipili gihapon sa pipila ang sininaan ug pamostura nga dili desente. Magsul-ob silag sinina nga fitting kaayo ug halos makita ang pribadong parte sa lawas, bisan panahon sa mga tigom. O kaha gisundog nila ang kalibotanon kaayong mga estilo sa buhok. (1 Tim. 2:9, 10) Ingong resulta, kon naa sila diha sa daghang tawo, lisod mailhan ang iya ni Jehova ug ang ‘higala sa kalibotan.’​—Sant. 4:4. w18.07 24-25 ¶11-12

Usa ka rason nga ‘managsoon’ ta kay kaliwat tang tanan ni Adan. (Buh. 17:26) Pero, naa pay laing rason. Sumala ni Jesus, managsoon ang iyang mga tinun-an kay giila nila si Jehova ingong ilang langitnong Amahan. (Mat. 12:50) Dugang pa, nahimo silang bahin sa usa ka dakong espirituwal nga pamilya, nga nahiusa sa gugma ug pagtuo. Maong sa ilang mga sulat, ang mga apostoles sagad nagtawag sa ilang kaubang mga tinun-an ingong “mga igsoon.” (Roma 1:13; 1 Ped. 2:17; 1 Juan 3:13) Human ipakita nga kinahanglan natong lantawon ang matag usa ingong igsoon, gipasiugda ni Jesus nga kinahanglang magpaubos. (Mat. 23:11, 12) Ang garbo maoy rason nga usahay dili magkahiusa ang iyang mga apostoles. Ug lagmit problema sab nila ang garbo sa rasa. Nahimo bang garboso ang mga Hudiyo kay kaliwat sila ni Abraham? Mao nay pagtuo sa daghang Hudiyo. Pero giingnan sila ni Juan Bawtista: “Ang Diyos adunay gahom sa pagpatunghag mga anak alang kang Abraham gikan niini nga mga bato.”​—Luc. 3:8. w18.06 10 ¶8-9

Kon balikbalik nga mahitabo ang makapasukong situwasyon o ang dili pagsinabtanay, ato bang gikontrolar ang atong baba ug ang atong kasuko? (Prov. 10:19; Mat. 5:22) Dihang pasuk-on ta sa uban, kinahanglang makakat-on ta sa ‘paghatag ug dapit sa kapungot.’ Kang kinsang kapungot? Kang Jehova. (Roma 12:17-21) Kon pirme tang magtan-aw kang Jehova, makapakita tag pagtahod niya pinaagi sa paghatag ug dapit sa iyang kasuko, nga mapailobong maghulat sa iyang paglihok kon gikinahanglan. Kon manimalos ta sa bisan unsang paagi, sama rag wala nato tahora si Jehova. Gisunod ba nato ang pinakabag-ong instruksiyon ni Jehova? Kon oo, dili nato himoon ang mga butang sa kinaraang paagi. Hinuon, mosunod dayon ta sa pinakabag-ong instruksiyon nga gitagana ni Jehova pinaagi sa iyang organisasyon. (Heb. 13:17) Sa samang panahon, mag-amping ta nga dili mosaylo “sa mga butang nga nahisulat.” (1 Cor. 4:6) Sa pagbuhat ana, pirme tang nagtan-aw kang Jehova. w18.07 15 ¶17-18

Dihang mouswag ka sa pagkahamtong, mas pabilhan nimo ang mga prinsipyo. Tungod kana kay ang balaod mapadapat lang sa espesipikong situwasyon, samtang ang prinsipyo mas dakog kapadapatan. Pananglitan, dili masabtan sa bata ang kapeligrohan sa dili maayong kauban, maong ang maalamong ginikanan maghatag ug instruksiyon para maproteksiyonan siya. (1 Cor. 15:33) Pero dihang mohamtong na ang bata, mouswag ang iyang katakos sa paghunahuna, ug makapangatarongan siya base sa mga prinsipyo sa Bibliya. Ingong resulta, makahimo na siyag maalamong desisyon sa pagpilig kauban. (1 Cor. 13:11; 14:20) Kon mangatarongan ta base sa mga prinsipyo sa Diyos, ang atong konsensiya mahimong mas kasaligang giya, nga nahiuyon sa panghunahuna sa Diyos. Gitagan-an ba ta sa tanan natong gikinahanglan aron makahimog maalamong mga desisyon nga makapalipay kang Jehova? Oo. Pinaagi sa paggamit kanunay sa mga balaod ug prinsipyo sa Pulong sa Diyos, mahimo tang “takos gayod, bug-os nga masinangkapan alang sa tanang maayong buhat.”​—2 Tim. 3:16, 17. w18.06 19 ¶14, 16; 20 ¶17

Gipakita ni Jesus nga matudloan sa usa ka Samarianhon ang mga Hudiyo sa kahulogan sa tinuod nga gugma sa silingan. (Luc. 10:25-37) Aron matuman ang gisugo kanila, kinahanglang wad-on sa mga tinun-an ni Jesus ang garbo ug diskriminasyon. Sa wala pa mosaka si Jesus sa langit, gisugo niya sila sa pagsangyaw “sa tibuok Judea ug Samaria ug hangtod sa kinalay-ang dapit sa yuta.” (Buh. 1:8) Giandam na sila ni Jesus sa maong dakong buluhaton pinaagi sa paghisgot sa maayong mga hiyas sa mga langyaw. Iyang gidayeg ang usa ka langyawng opisyal sa kasundalohan tungod sa talagsaong pagtuo niini. (Mat. 8:5-10) Sa iyang lungsod sa Nasaret, si Jesus naghisgot kon giunsa pagtabang ni Jehova ang mga langyaw, sama sa taga-Fenicia nga babayeng balo sa Zarepta ug sa sanlahong taga-Sirya nga si Naaman. (Luc. 4:25-27) Ug gawas sa pagsangyaw sa Samarianhong babaye, miestar pod si Jesus sa usa ka Samarianhong lungsod kay ang mga tawo nagpakitag interes sa iyang mensahe.​—Juan 4:21-24, 40. w18.06 10 ¶10-11

Ang atong kinabuhi ingong Kristohanon gipakasama ni apostol Pablo sa mga sundalo nga manomanong nakiggubat. Siyempre, espirituwal ang atong pagpakiggubat, dili literal. Bisan pa niana, tinuod ang atong mga kaaway. Si Satanas ug ang mga demonyo maoy hanas ug eksperyensiyadong mga manggugubat. Busa, morag mapildi gyod ta. Ang Kristohanong mga batan-on morag huyang tan-awon. Sa unsang paagi sila modaog batok nianang puwersado kaayo nga daotang mga espiritu? Sa pagkatinuod, ang mga batan-on posibleng modaog, ug nagmadaogon gyod sila! Ngano? Tungod kay sila ‘nagpadayon sa pagbaton ug gahom diha sa Ginoo.’ Gawas pa sa gahom nga gihatag sa Diyos, andam pod sila sa pagpakiggubat. Samag maayong pagkabansay nga mga sundalo, ilang ‘gisul-ob ang kompletong armadura gikan sa Diyos.’ (Efe. 6:10-12) Dihang gigamit ni Pablo kining ilustrasyona, lagmit naghunahuna siya bahin sa armadura sa mga sundalo sa Roma.​—Buh. 28:16. w18.05 27 ¶1-2

Ang pangunang rason kon nganong mosangyaw ta mao ang paghimaya kang Jehova ug pagbalaan sa iyang ngalan. (Juan 15:1, 8) Pero, dili nato mahimong mas balaan ang ngalan sa Diyos. Kini sagrado, o balaan, na sa bug-os nga diwa. Pero, matikdi ang giingon ni propetang Isaias: “Si Jehova sa mga panon​—siya ang Usa nga angay ninyong tagdon ingong balaan.” (Isa. 8:13) Ang usa ka paagi nga atong mabalaan ang ngalan sa Diyos mao ang pag-isip niini nga labaw sa uban pang ngalan ug sa pagtabang sa uban nga isipon kining balaan. Pananglitan, pinaagi sa pagsangyaw bahin sa talagsaong mga hiyas ni Jehova ug sa iyang dili mausab nga katuyoan sa katawhan, gidepensahan nato ang ngalan sa Diyos batok sa mga bakak ug pagbutangbutang ni Satanas. (Gen. 3:1-5) Dugang pa, dihang tabangan nato ang uban nga masabtang si Jehova ang angayan nga “modawat sa himaya ug sa dungog ug sa gahom,” atong gibalaan ang iyang ngalan.​—Pin. 4:11. w18.05 18 ¶3-4

Ang pangunang rason sa paghimog espirituwal nga mga tumong mao ang pagpakita kang Jehova sa atong pagkamapasalamaton sa iyang gugma ug sa iyang nahimo para nato. Ingong batan-on, hunahunaa ang tanang nahatag ni Jehova kanimo​—ang imong kinabuhi, pagtuo, ang Bibliya, kongregasyon, ug ang nindot nga paglaom sa umaabot. Ang pag-una sa espirituwal nga mga butang mao ang usa ka paagi sa pagpasalamat sa Diyos sa maong mga panalangin, ug kana makapasuod nimo kaniya. Dihang sugdan nimo pagkab-ot ang espirituwal nga mga tumong, makahimo ka nag rekord sa maayong mga buhat sa panan-aw ni Jehova. Kana mas makapasuod nimo kaniya. Si apostol Pablo nagsaad: “Ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan.” (Heb. 6:10) Makahimo kag espirituwal nga mga tumong bisag bata pa ka. Makahunahuna ka bag mga tumong nga importante nimo ug dayon sugdan ang pagkab-ot niana?​—Filip. 1:10, 11. w18.04 26 ¶5-6

Ang unang siglong mga Kristohanon nagpuyo sa Imperyo sa Roma diin ang mga tawo nagpasigarbo sa ilang kaugalingon ingong tigdepensa sa balaod, hustisya, ug kagawasan. Pero, naangkon niini ang gahom ug himaya tungod sa paghago sa mga ulipon. Dihay panahon nga mga 30 porsiyento sa populasyon mga ulipon. Walay duhaduha, gikabalak-an sa komon nga mga tawo, apil sa mga Kristohanon, ang pagpangulipon ug kagawasan. Ang mga sulat ni apostol Pablo daghag gihisgotan bahin sa kagawasan. Pero, dili tuyo sa iyang ministeryo ang pag-usab sa kahimtang sa komunidad ug politika​—nga maoy gipaningkamotan sa mga tawo niadtong panahona. Imbes modangop sa tawhanong mga magmamando o ahensiya aron makabatog kagawasan, si Pablo ug ang ubang Kristohanon nagkugi pag-ayo sa pagtabang sa mga tawo nga mahibaloan ang maayong balita sa Gingharian sa Diyos ug ang dili hitupngang bili sa halad lukat ni Kristo Jesus. Gigiyahan ni Pablo ang iyang mga igsoon ngadto sa Tuboran sa tinuod nga kagawasan. w18.04 8 ¶1-2

Sa gabii unâ mamatay si Jesus, gisulti niya kana kang apostol Pedro. Si Pedro maoy haligi sa unang Kristohanong kongregasyon. (Gal. 2:9) Gidasig niya ang iyang mga igsoon pinaagi sa iyang kaisog panahon sa Pentekostes ug human niana. Human sa daghang tuig nga pag-alagad, siya misulat sa iyang mga isigka-Kristohanon. Gipatin-aw niya kon ngano: “Gisulatan ko kamo sa pipila ka pulong, aron sa paghatag ug pagdasig ug usa ka matinuorong pagpamatuod nga kini ang matuod nga dili-takos nga kalulot sa Diyos; nga niana barog kamo nga malig-on.” (1 Ped. 5:12) Ang mga sulat ni Pedro nakapadasig sa mga Kristohanon sa iyang panahon. Gikinahanglan gyod nato nâ nga pagdasig samtang nagpaabot ta sa katumanan sa mga saad ni Jehova!​—2 Ped. 3:13. w18.04 17 ¶12-13

Morag kadaghanan sa mga tawo karon nagtinguha sa pagbuhat kon unsay ilang gusto ug pagkinabuhi sa paagi nga gusto nila. Apan, lisod matagbaw ang maong mga tinguha. Daghan ang morebelde, mohimog mga protesta ug demonstrasyon, ug magpahigayon pa ganig rebolusyon. Pero sa pagbuhat niana, naangkon ba nila ang gusto nilang resulta? Sagad wala. Miresulta hinuon kinig mga trahedya ug kamatayon. Kining tanan nagpamatuod sa giingon sa Diyos pinaagi kang Haring Solomon: “Ang tawo nagmando sa tawo alang sa iyang kadaotan.” (Eccl. 8:9) Sa teksto niining adlawa, gihisgotan ni Santiago kon sa unsang paagi mabatonan ang tinuod nga kalipay ug katagbawan. Si Jehova, nga maoy naghatag nianang hingpit nga balaod, nahibalo gyod sa gikinahanglan sa mga tawo aron makabatog tinuod nga kalipay ug katagbawan. Gihatagan niya ang unang magtiayon sa tanan nilang gikinahanglan aron magmalipayon​—apil na sa tinuod nga kagawasan. w18.04 3 ¶1-3