Pebrero

Si Jesus naluoy kaayo sa mga tawo. Gibati nila nga gihigugma niya sila ug nakatabang ni aron maminaw sila sa iyang mensahe bahin sa Gingharian. Kon masundog nato ang iyang pagbati sa mga tawo, mahimo tang mas epektibo sa atong pagsangyaw. Unsay makatabang nato sa pagpakitag kaluoy sa atong sangyawan? Ibutang nato ang kaugalingon sa situwasyon sa atong gisangyawan ug trataron sila sa paagi nga gusto natong trataron ta. (Mat. 7:12) Hunahunaa ang panginahanglan sa matag indibiduwal. Ayaw paggamit ug parehong introduksiyon sa tanan nimong sangyawan. Hinunoa, konsideraha ang kahimtang ug panglantaw sa matag usa. Pangutan-a ang usa ka tawo sa mataktikanhong paagi. (Prov. 20:5) Kon mangutana ta nila, gitugotan nato sila sa pagsulti kon nganong gikinahanglan nila ang maayong balita. Dihang masayran nato kana, makapakita tag simpatiya ug makatabang nila, sama sa gihimo ni Jesus.​—Itandi ang 1 Corinto 9:19-23. w19.03 20 ¶2; 22 ¶8-9

Gipakita ni Adan ug Eva nga wala silay apresasyon sa tanang gihimo ni Jehova para nila. Kitang tanan may kahigayonan nga ipakita kang Jehova nga dili ta sama kanila. Pinaagi sa pagpabawtismo, atong gipakita nga nagtuo ta nga siya lang ang may awtoridad sa pagtakda ug sukdanan sa husto ug sayop. Gipamatud-an nato nga kita nahigugma ug nagsalig sa atong Amahan. Human sa bawtismo, kinahanglan tang magsunod sa sukdanan ni Jehova, dili sa atoa. Minilyon karon ang nagkinabuhi nianang paagiha. Mahisama ka nila kon padayon nimong palalomon ang imong pagsabot sa Pulong sa Diyos, ang Bibliya; pirme kang makig-uban sa mga igsoon; ug madasigon nimong isulti ang imong nakat-onan bahin sa imong mahigugmaong Amahan. (Heb. 10:24, 25) Dihang mohimo kag desisyon, pamati sa tambag ni Jehova pinaagi sa iyang Pulong ug organisasyon. (Isa. 30:21) Ug ang tanan nimong buhaton magmalamposon.​—Prov. 16:20. w19.03 7 ¶17-18

Si Jehova naghatag natog abundang espirituwal nga pagkaon. Pananglitan, makadawat tag mapuslanong instruksiyon pinaagi sa mga tigom, magasin, ug website. Duna bay pakigpulong, artikulo sa magasin, o programa sa broadcasting diin nakaingon ka, ‘Mao gyod nay akong gikinahanglan’? Unsaon nato pagpakitag apresasyon kang Jehova? (Col. 3:15) Ang usa ka paagi mao ang kanunayng pagpasalamat niya diha sa pag-ampo tungod nianang maayong mga regalo. Mapakita sab nato ang atong apresasyon kang Jehova pinaagi sa pagmentinar sa kahinlo ug kahapsay sa atong mga dapit sa pagsimba. Kanunay tang motabang sa paglimpiyo ug pagmentinar sa Kingdom Hall, ug kadtong mogamit sa sound ug video equipment mag-amping pag-ayo aron dili ni madaot. Kon maayong pagkamentinar ang Kingdom Hall, mapuslan ni sa taastaas nga panahon ug gamay rag ayohonon. Pinaagi niana, magamit ang ubang kuwarta sa pagtukod ug pag-renovate sa ubang Kingdom Hall sa tibuok kalibotan. w19.02 18 ¶17-18

Migahin si Job ug panahon sa pagpamalandong sa kalalangan ni Jehova. (Job 26:7, 8) Nahingangha siya dihang iyang gihunahuna ang yuta, langit, panganod, ug dalugdog, ug naamgohan niya nga gamay ra siyag nahibaloan sa kalalangan ni Jehova. Gipabilhan sab niya ang pulong ni Jehova. Miingon si Job: “Akong gitipigan ang mga pulong sa iyang baba.” (Job 23:12) Si Job nahingangha ug nagtahod kang Jehova. Nahigugma siya sa iyang Amahan ug gusto niyang lipayon siya. Ingong resulta, mas determinado si Job nga magmatinumanon. Kinahanglan natong sundogon si Job. Karon, mas daghan tag nahibaloan bahin sa kalalangan. Ug naa tay kompletong Bibliya nga motabang nato nga mas mailhan si Jehova. Ang tanan natong makat-onan makapahingangha nato. Sa baylo, ang atong kahingangha ug pagtahod kang Jehova magpalihok nato nga higugmaon ug sundon siya ug mas maningkamot ta nga magmatinumanon.​—Job 28:28. w19.02 5 ¶12

Sukad sa una, ang tawhanong mga magmamando naglutos sa katawhan ni Jehova. Lagmit ila tang pasanginlag lainlaing “krimen,” pero ang tinuod nga hinungdan mao ang atong ‘pagsugot sa Diyos ingong magmamando inay sa mga tawo.’ (Buh. 5:29) Tingali kita pakaulawan, prisohon, o dagmalan. Pero sa tabang ni Jehova, dili ta manimalos kondili magpabiling lumo bisan sa paglutos. Tagda pananglitan ang ehemplo sa tulo ka Hebreohanong binihag​—si Hananias, Misael, ug Azarias. Sa malumong paagi, ilang gipatin-aw sa hari kon nganong dili sila mosimba sa larawan nga iyang gihimo. Andam silang modawat sa bisan unsang resulta nga itugot ni Jehova. (Dan. 3:1, 8-28) Dihang sulayan ang atong pagkamaunongon sa Diyos, sa unsang paagi nato masundog ang tulo ka Hebreohanon? Mapainubsanon tang mosalig kang Jehova nga atimanon ta niya. (Sal. 118:7) Atong tubagon ang nag-akusar nato sa maaghop ug matinahorong paagi. (1 Ped. 3:15) Ug dili gyod nato ikompromiso ang atong relasyon sa atong mahigugmaong Amahan. w19.02 10-11 ¶11-13

Makahatag natog kaisog ang paghunahuna bahin sa paglaom nga nahimong posible tungod sa halad sa Kristo. (Juan 3:16; Efe. 1:7) Sa mga semana una ang Memoryal, may espesyal tang kahigayonan nga mas maapresyar ang lukat. Nianang higayona, sunda ang eskedyul sa pagbasa sa Bibliya panahon sa Memoryal. Pamalandonga sab ang mga panghitabo panahon sa kamatayon ni Jesus. Dayon, dihang magtigom ta alang sa Panihapon sa Ginoo, mas masabtan nato ang kahulogan sa mga emblema ug ang talagsaong sakripisyo nga girepresentahan niana. Dihang atong masabtan ang gihimo ni Jesus ug Jehova para nato ug ang benepisyo niana kanato ug sa atong mga minahal, mas molig-on ang atong paglaom, ug mapalihok ta sa paglahutay nga maisogon hangtod sa kataposan. (Heb. 12:3) Mapasalamaton gyod ta nga padayong gipakita ni Jesus kining mga hiyasa ingong atong langitnong Hataas nga Saserdote, kinsa mangamuyo alang kanato! (Heb. 7:24, 25) Aron ikapakita ang atong kinasingkasing nga apresasyon, kinahanglang kanunay natong handomon ang kamatayon ni Jesus, sama sa iyang gisugo.​—Luc. 22:19, 20. w19.01 22 ¶8; 23-24 ¶10-11

Si Jehova naghatag natong tanan sa pribilehiyo nga madayeg siya. Ang atong mga komento maoy bahin sa atong “halad sa pagdayeg,” ug dili puwedeng ang uban maoy motanyag ana para nato. (Heb. 13:15) Nag-ingon ba si Jehova nga kinahanglang parehas tag kalidad sa halad, o komento? Wala gayod! Isipa ang tigom ingong usa ka salosalo kauban sa suod nga mga higala. Ibutang ta nga may pipila ka igsoon sa kongregasyon nga nagplanog tapoktapok ug gihangyo ka sa pagdalag simpleng pagkaon. Unsay imong buhaton? Basig mabalaka ka, pero maningkamot gyod ka nga ang imong dad-on magustohan sa tanan. Si Jehova, ang Tagbalay, nag-andam ug lamesa nga puno sa maayong mga butang alang kanato panahon sa tigom. (Sal. 23:5; Mat. 24:45) Ug malipay siya kon magdala tag simpleng regalo, nga maoy atong kinamaayohan. Busa pangandam pag-ayo, ug komento kutob sa imong mahimo. Dayon wala lang ka mokaon sa lamesa ni Jehova, kondili nagdala sab kag regalo para sa kongregasyon. w19.01 8 ¶3; 13 ¶20

Sa kapanahonan sa Bibliya, ang bakak nga pagsimba sagad nag-apil ug seksuwal nga imoralidad. (Os. 4:13, 14) Segurado nga ang maong pagsimba nagtagbaw sa unodnong tinguha. Pero wala kadto makahatag ug tinuod nga kalipay. Si David miingon nga modaghan ang kasakit niadtong mosunod sa laing diyos. Daghan pong bata ang gisakripisyo tungod niana. (Isa. 57:5) Gidumtan gyod ni Jehova ang ilang kawalay-kaluoy! (Jer. 7:31) Sagad gikonsentir sab karon sa bakak nga pagsimba ang seksuwal nga imoralidad, bisan ang homoseksuwalidad. Pero, mao ra gihapon ang resulta sa ilang pagpatuyang nianang gituohan nilang moral nga kagawasan. (1 Cor. 6:18, 19) Lagmit namatikdan nimo nga midaghan ang ilang kasakit. Busa mga batan-on, paminaw sa inyong langitnong Amahan. Magmasaligon nga makahatag ninyog kaayohan ang pagsunod kaniya. Hinumdomi nga balewala ra ang temporaryong kalipay nga inyong bation tungod sa kadaot nga resulta sa pagpakasala.​—Gal. 6:8. w18.12 27-28 ¶16-18

Kon ang usa ka Kristohanon makahimog imoralidad, ang inosenteng kapikas kinahanglang modesisyon. Si Jesus miingon nga ang inosenteng kapikas may basehanan nga makigdiborsiyo ug dayon makaminyo pag-usab. (Mat. 19:9) Sa laing bahin, mahimo sab siyang magpasaylo. Dili kana sayop. Gikuhag balik ni Oseas si Gomer. Dihang mibalik na si Gomer kang Oseas, giingnan siya nga dili makigrelasyon sa ubang lalaki. Si Oseas taudtaod nga wala makigdulog kang Gomer. (Os. 3:1-3) Pero sa ngadtongadto, lagmit nakigdulog siyag balik sa iyang asawa. Nagpakita ni sa pagkaandam sa Diyos nga dawaton pag-usab ang iyang katawhan ug padayong makiglabot kanila. (Os. 1:11; 3:4, 5) Unsay atong makat-onan niana bahin sa kaminyoon? Kon ang inosenteng kapikas modesisyon nga dili makigbulag, ang pagpakigdulog pag-usab nagpakita nga napasaylo na ang nakasalang kapikas. (1 Cor. 7:3, 5) Nawala na ang basehanan sa pagpakigdiborsiyo. Human niana, ingong magtiayon, maningkamot sila nga sundogon ang panglantaw sa Diyos bahin sa kaminyoon. w18.12 13 ¶13

Dihang magtuon, angay natong pamalandongon ang panghunahuna ni Jehova sa mga situwasyon nga mahimong maatubang nato sa umaabot. Nianang paagiha, kon makaatubang tag mga situwasyon diin kinahanglan dayon tang modesisyon, kabalo ta kon unsay buhaton. Pinaagi sa pagbalibad dayon sa panental sa asawa ni Potipar, gipakita ni Jose nga iyang gipamalandong daan ang panghunahuna ni Jehova bahin sa pagkamaunongon diha sa kaminyoon. (Gen. 39:8, 9) Dugang pa, ang iyang tubag sa asawa ni Potipar: “Unsaon ko pagbuhat kining dakong pagkadaotan ug makasala gayod batok sa Diyos?” nagpakita nga gisundog niya ang panglantaw sa Diyos. Komosta sa atong bahin? Ibutang ta nga duna kay kauban sa trabaho nga misugod ug flirt nimo. O kaha gipadalhan kag law-ay nga mga mensahe o letrato diha sa imong cellphone. Mas sayon nga magmatinumanon kon ato nang nahibaloan ug gisundog ang panghunahuna ni Jehova ug nakadesisyon na ta kon unsay himoon. w18.11 25 ¶13-14

Ang pipila ka eksperto naghunahuna nga kining bersikuloha literal nga nagpasabot, “Ako molukso sa kalipay diha sa Ginoo; ako magsayawsayaw sa kalipay diha sa Diyos.” Pagkanindot nga pasalig kanato! Si Jehova wala lang maghatag nato ug nindot nga mga saad, kondili nagpasalig siya nga duna siyay ginahimo karon aron matuman ang iyang mga saad. Walay duhaduha, ang importanteng mensahe ni Habacuc mao ang pagsalig kang Jehova. (Hab. 2:4) Aron padayon tang mosalig kang Jehova, kinahanglang palig-onon nato ang atong relasyon kaniya pinaagi sa (1) paglahutay diha sa pag-ampo, nga isulti kang Jehova ang tanan natong kabalaka; (2) pagpamati pag-ayo sa Pulong ni Jehova ug sa bisan unsang instruksiyon gikan sa iyang organisasyon; ug (3) matinumanon ug mapailobong paghulat kang Jehova. Mao nay gibuhat ni Habacuc. Bisag magul-anon siya sa sinugdan sa iyang basahon, sa kataposan niini, siya masaligon ug malipayon. Hinaot sundogon nato siya aron mahupayan sab ta sa mabinationg gakos ni Jehova! May lain pa bang makahupay nato niining daotang kalibotan? w18.11 17 ¶18-19

Ang tinuod nga mga Kristohanon may rason sab nga madani sa gugma sa Diyos: Iyang “gihigugma pag-ayo . . . ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Pagkadako usab sa gugma nga gipakita ni Jesus sa paghatag sa iyang kinabuhi para nato! Ug ang maong gugma makapalig-on gyod nato! Ang Pulong sa Diyos nagsaad nga bisan ang ‘kasakitan o kagul-anan’ dili ‘makabulag nato gikan sa gugma sa Kristo.’ (Roma 8:35, 38, 39) Dihang mag-atubang tag kalisdanan nga makapaluya sa pisikal, emosyonal, o espirituwal, ang kadako sa gugma ni Jesus makahatag natog kusog aron makalahutay. (2 Cor. 5:14) Ang iyang gugma makapalig-on ug makatabang nato nga dili mosurender bisan pa sa kalisdanan sama sa mga katalagman, paglutos, pagkadismayar, o kabalaka. w18.09 14 ¶8-9

Aron makalakaw sa kamatuoran, kinahanglan natong dawaton ug sundon ang tanang sugo ni Jehova. Kinahanglang unahon nato ang kamatuoran ug magkinabuhi ta uyon sa mga prinsipyo sa Bibliya. Sama kang David, kinahanglang determinado ta nga padayong maglakaw sa kamatuoran sa Diyos. Kon dili nato nâ buhaton, lagmit masayangan ta sa atong gisakripisyo alang sa kamatuoran ug lagmit matental ta sa pagbawi sa pipila niana. Imbes himoon kana, panguptan nato pag-ayo ang tanang kamatuoran. Dili puwedeng pilion nato kon unsa nga kamatuoran ang dawaton o isalikway. Kinahanglang maglakaw ta diha sa “tibuok nga kamatuoran.” (Juan 16:13) Aron dili ta maanod palayo sa kamatuoran, kinahanglang magmaalamon ta sa paggamit sa atong panahon. Kon dili ta mag-amping, basig daghan na kaayo tag panahon sa kalingawan ug mga hilig, pag-Internet, o pagtan-awg TV. Bisag dili ni daotan, basin maapil niini ang panahon nga ato untang gigahin para sa personal nga pagtuon ug ubang espirituwal nga mga kalihokan. w18.11 10 ¶7-8

Dihang kalit nga mausab ang atong kahimtang, tingali mabalaka ta ug ma-stress. (Prov. 12:25) Basin malisdan pa gani ta sa pagdawat sa maong mga kausaban. Niana nga kahimtang, unsaon nato pagpabiling kalmado ug malinawon? (Sal. 131:1-3) Bisan pa sa lisod kaayong kahimtang, mahupayan ta tungod sa “kalinaw sa Diyos” nga nagbantay sa atong gahom sa pangisip. (Filip. 4:6, 7) Busa, kon modangop ta kang Jehova dihang mabug-atan ta sa mga kabalaka, ang kalinaw sa Diyos makapalig-on sa atong determinasyon nga mokab-ot ug espirituwal nga mga tumong ug masuklan ang tendensiya nga mohunong sa pag-alagad. Gawas pa sa pagtabang nato nga mahimong kalmado, ang espiritu sa Diyos magpahinumdom nato sa mga teksto nga motabang nato sa pag-una sa espirituwal nga mga butang.​—Juan 14:26, 27. w18.10 27 ¶2; 28 ¶5, 8

Unsang “imbensiyon” ang nakadaot pag-ayo sa tawo? Ang bakak! Kini mao ang tinuyong pagsultig dili tinuod aron limbongan ang uban. Ug kinsay nagsulti sa unang bakak? Gipaila ni Jesu-Kristo ang “Yawa” ingong “amahan sa bakak.” (Juan 8:44) Kanus-a niya gisulti ang unang bakak? Nahitabo ni linibo ka tuig kanhi sa hardin sa Eden. Ang unang magtiayon, si Adan ug Eva, malipayong nagkinabuhi sa Paraiso nga gitagana sa ilang Maglalalang. Dayon, ang Yawa misulod sa esena. Siya nahibalo nga gidid-an sa Diyos ang magtiayon sa pagkaon sa bunga sa “kahoy sa kahibalo sa maayo ug sa daotan.” Kon supakon nila ang Diyos, sila mamatay. Bisan pa niana, pinaagig bitin, giingnan ni Satanas si Eva: “Dili gayod kamo mamatay [ang unang bakak nga gisulti sukad]. Kay nasayod ang Diyos nga sa mismong adlaw nga kamo mokaon gikan niini ang inyong mga mata mangabuka ug kamo mahisama sa Diyos, nga mahibalo sa maayo ug sa daotan.”​—Gen. 2:15-17; 3:1-5. w18.10 6 ¶1-2

Aron magpabiling putli ang atong kasingkasing, kinahanglang hinlo ang atong hunahuna ug mga tinguha. Kinahanglang pirmeng hinlo ang atong hunahuna aron dili mahugawan ang atong debosyon kang Jehova. (2 Cor. 4:2; 1 Tim. 1:5) Pero, sa unsang paagi “makakita sa Diyos” ang mga putli sa kasingkasing nga ‘wala may tawong makakita sa Diyos ug mabuhi pa’? (Ex. 33:20) Ang Gregong pulong nga gihubad ug “makakita” mahimong magpasabot ug “pagkakita pinaagi sa hunahuna, pagsabot, pagkahibalo.” Ang makakita sa Diyos pinaagi sa “mga mata sa . . . kasingkasing” mao kadtong nakaila niya, nga nakaapresyar sa iyang mga hiyas. (Efe. 1:18) Gawas sa pagkahibalo sa mga hiyas sa Diyos, ang tinuod nga mga magsisimba “makakita sa Diyos” pinaagi sa pagpaniid sa iyang mga nahimo para nila. (Job 42:5) Gipokus sab nila ang ‘ilang mga mata sa kasingkasing’ sa nindot nga mga panalangin nga gisaad sa Diyos niadtong naningkamot sa pagpabiling putli ug maunongon. w18.09 20 ¶13, 15-16

Kon buhaton nato ang atong nahibaloan nga husto, makadawat tag daghang panalangin. Bisag ang kaalam gibase sa kahibalo, nag-apil kini sa mga desisyon nga atong himoon dili lang sa impormasyon nga atong nasabtan. Bisan ang mga hulmigas nagpakitag kaalam. Gipakita nila ang natural nga kaalam pinaagi sa pagpangandam ug pagkaon panahon sa ting-init. (Prov. 30:24, 25) Ang Kristo, “ang kaalam sa Diyos,” pirmeng nagbuhat sa mga butang nga makapalipay sa Amahan. (1 Cor. 1:24; Juan 8:29) Nahibalo ang Diyos sa kalainan tali sa paghimog hustong desisyon ug pagbuhat sa maong desisyon. Ug iyang panalanginan ang mga mapainubsanon, malahutayon, ug ang nagpadapat sa ilang nahibaloan nga husto. (Mat. 7:21-23) Busa, paningkamoti nga ang kongregasyon mahimong dapit diin ang tanan mapainubsanong nag-alagad kang Jehova. Ang pagpadapat sa atong nahibaloan nga husto nagkinahanglag panahon ug pailob, pero timailhan nâ sa pagkamapainubsanon nga makahatag ug kalipay karon ug hangtod sa kahangtoran. w18.09 7 ¶18

Ang Maglalalang naghunahuna nga ang hingpit nga mga tawo motabang niya sa pagpalampos sa iyang katuyoan. Bisag dili na hingpit ang tawo karon, ang matinumanong katawhan puwede gihapong magbuhat uban kang Jehova kada adlaw. Pananglitan, mahimo tang “mga isigkamagbubuhat sa Diyos” pinaagi sa pagsangyaw sa maayong balita sa Gingharian ug paghimog mga tinun-an. (1 Cor. 3:5-9) Pribilehiyo gyod nga gipili ta sa labing gamhanang Maglalalang nga motabang sa buluhatong giisip niyang importante! Pero, dili lang ang pagsangyaw ug paghimog tinun-an ang mga paagi nga magbuhat ta uban kang Jehova. Ang ubang mga paagi sa pagbuhat niana mao ang pagtabang sa atong pamilya ug mga igsoon sa pagtuo, pag-abiabi, pagboluntaryo sa mga proyekto sa organisasyon, ug pagpauswag sa atong sagradong pag-alagad. (Col. 3:23) Pero, ayawg ikomparar ang imong mabuhat para kang Jehova nianang sa uban. Hinumdomi nga managlahi ang atong edad, kahimsog, sirkumstansiya, ug abilidad. w18.08 23 ¶1-2

Gipasaligan ni Jehova si Habacuc nga matubag ra ang iyang sinserong mga pangutana. Hapit nang matapos ang tanan niyang gikabalak-an. Sama rag giingnan sa Diyos ang propeta: “Pailob lang. Salig nako. Moabot ra ang akong tubag bisan pag mora nig nalangan!” Gipahinumdoman ni Jehova si Habacuc nga may gitakda Siyang panahon sa pagtuman sa Iyang mga saad. Gitambagan niya si Habacuc nga maghulat sa katumanan sa Iyang mga saad. Busa, dili gyod madismayar ang propeta. Ang mapailobong paghulat kang Jehova ug pagpamati kaniya maghatag natog pagsalig ug kalinaw sa hunahuna bisan pa sa mga kalisdanan. Miingon si Jesus nga makasalig ta kang Jehova ingong Dakong Tigtakda sa Panahon, nga dili ta magpokus sa “mga panahon o mga yugto sa panahon” nga wala pa ipadayag sa Diyos. (Buh. 1:7) Busa, dili gyod ta mosurender kondili maghulat nga mapainubsanon, masaligon, ug mapailobon, nga pahimuslan ang higayon pinaagi sa pag-alagad kang Jehova kutob sa atong mahimo.​—Mar. 13:35-37; Gal. 6:9. w18.11 16 ¶13-14

Parehas sa ubang Hudiyo niadtong panahona, nagdako si Pedro nga nagtuong hugaw ang mga Hentil. Pero, may nahitabo nga nakapausab sa iyang panghunahuna. Pananglitan, nakakita siyag milagrosong panan-awon. (Buh. 10:9-16) Sama kang Pedro, kinahanglan natong susihon pag-ayo ang kaugalingon ug andam tang modawat ug tabang aron makita ang bisan unsang diskriminasyon nga nagpabilin sa atong kasingkasing. Unsa pay atong mahimo? Kon buksan nato pag-ayo ang atong kasingkasing, gitugotan nato nga pulihan sa gugma ang diskriminasyon. (2 Cor. 6:11-13) Nabatasan ba nimong makig-uban lang niadtong pareho nimog rasa, kultura, nasod, tribo, o pinulongan? Kon mao, pakig-uban sab sa uban. Puwede ba nimong hangyoon kadtong lahig kagikan nga makigpartner nimo sa pagsangyaw? Puwede ba nimo silang imbitahon sa imong balay para sa pagpangaon o tapoktapok? (Buh. 16:14, 15) Kon buhaton nâ nimo, mapuno ug gugma ang imong kasingkasing nga wala nay luna ang diskriminasyon. w18.08 9 ¶3, 6; 10 ¶7

May pipila ka Saksi nga wala kaayo magsalikway sa kalibotanong panggawi. Panahon sa party, ang ilang sinayawan ug linihokan dili dalawaton para sa mga Kristohanon. Diha sa social media, mag-post silag mga letrato ug comment nga nagpakitang dili sila hamtong sa espirituwal. Busa, posibleng mahimo silang negatibong impluwensiya sa mga igsoon nga naningkamot nga mamentinar ang maayong panggawi ingong bahin sa katawhan ni Jehova. (1 Ped. 2:11, 12) Gipasiugda pag-ayo sa kalibotan “ang tinguha sa unod ug ang tinguha sa mga mata ug ang mapagawalong pagpasundayag sa mga kahinguhaan sa kinabuhi.” (1 Juan 2:16) Pero kay iya man ta ni Jehova, gitambagan ta “sa pagsalikway sa pagkadili-diyosnon ug sa kalibotanong mga tinguha ug sa pagkinabuhi uban ang maayong panghunahuna ug pagkamatarong ug diyosnong pagkamahinalaron taliwala niini nga sistema sa mga butang.” (Tito 2:12) Ang atong sinultihan, batasan sa pagkaon ug pag-inom, sininaan ug pamostura, ug batasan sa trabaho​—ang tanan natong himoon​—kinahanglang magpakita sa uban nga eksklusibo ang atong debosyon kang Jehova. w18.07 25 ¶13-14

Kon padayong nagtan-aw kang Jehova ang atong simbolikong mata, dili nato tugotan nga masuko ta pag-ayo o madaot ang atong relasyon kaniya tungod sa binuhatan sa uban. Ilabinang importante ni kon, sama kang Moises, may responsibilidad ta diha sa organisasyon sa Diyos. Siyempre, ang matag usa nato kinahanglang ‘magpadayon sa pagpanlimbasog sa atong kaugalingong kaluwasan uban ang kahadlok ug pagpangurog,’ pero angay pod natong hinumdoman nga dili ta hukman ni Jehova base sa usa ka estrikto kaayong sukdanan. (Filip. 2:12) Hinuon, kon mas dako ang atong responsibilidad, mas dako pod ang atong tulubagon. (Luc. 12:48) Pero kon gihigugma gyod nato si Jehova, walay makapandol nato o makapabulag nato sa iyang gugma. (Sal. 119:165; Roma 8:37-39) Niining malisod nga panahon, hinaot nga ang atong mata padayong magtan-aw sa Usa nga “nagapuyo sa kalangitan,” aron atong masabtan ang iyang kabubut-on. (Sal. 123:1) Hinaot dili nato tugotan nga madaot ang atong relasyon kang Jehova tungod sa binuhatan sa uban. w18.07 16 ¶19-20

Makapalipay gyong madungog ang pag-uswag sa katawhan ni Jehova! Niadtong 2017, nakadumala tag kapin sa 10,000,000 ka Bible study. Nagpakita gyod ni nga gipalamdag sa mga alagad sa Diyos ang ilang kahayag! Ug hunahunaa lang ang minilyong interesado nga mitambong sa Memoryal. Ilang nahibaloan ang gipakitang gugma sa Diyos pinaagi sa lukat. (1 Juan 4:9) Sa tibuok kalibotan, ang katawhan ni Jehova lainlaig pinulongan. Pero, wala ni makapugong nato sa paghatag ug nahiusang pagdayeg sa atong Amahan, si Jehova. (Pin. 7:9) Bisag unsay atong pinulongan o gipuy-an, mahimo tang mosidlak “ingong mga magbabanwag sa kalibotan.” (Filip. 2:15) Ang pag-uswag nga atong naeksperyensiyahan, ang panaghiusa nga atong natagamtam, ug ang atong paningkamot nga magpadayon sa pagbantay nakatabang nato sa paghimaya kang Jehova. w18.06 21 ¶1-3

Ang tubag ni Jesus nagpakita nga nagpokus gyod siya sa espirituwal nga panaghisgot, nga puwede ra siyang dili mokaon. Ang pagsangyaw​—bisan sa Samarianhong babaye​—mao ang kabubut-on sa iyang Amahan, ug para niya, sama kinig pagkaon. (Juan 4:32-34) Wala masabti ni Santiago ug Juan ang maong leksiyon. Dihang nagbiyahe kauban ni Jesus agi sa Samaria, ang mga tinun-an nangitag kapalabyan sa gabii diha sa usa ka Samarianhong baryo. Wala sila dawata sa mga Samarianhon, maong nasuko si Santiago ug Juan ug misugyot nga magpakanaog silag kalayo gikan sa langit aron laglagon ang maong baryo. Gibadlong sila ni Jesus. (Luc. 9:51-56) Basin dili ingon ana ang reaksiyon ni Santiago ug Juan kon ang wala mag-abiabi nila mao ang ilang lugar sa Galilea. Lagmit ang ilang diskriminasyon maoy hinungdan sa ilang kasuko. Posibleng naulaw si apostol Juan sa iyang reaksiyon dihang sa ulahi, nagmalamposon ang iyang pagsangyaw sa mga Samarianhon.​—Buh. 8:14, 25. w18.06 10-11 ¶12-13

Kon hugot natong pagkabakos ang kamatuoran sa Bibliya, mapalihok ta sa pagkinabuhi uyon niini ug sa pagsulti sa kamatuoran sa tanang panahon. Nganong dili ta mamakak? Tungod kay ang bakak maoy usa sa epektibo kaayong armas ni Satanas. Ang bakak parehong makadaot sa nagsulti ug sa mituo niana. (Juan 8:44) Busa, bisag dili ta hingpit, maningkamot ta nga dili mamakak. (Efe. 4:25) Pero usahay lisod nang buhaton. Ang 18 anyos nga si Abigail miingon: “Usahay, dili maayong mosulti sa tinuod, ilabina kon ang pagpamakak motabang nimo nga makalingkawas sa lisod nga situwasyon.” Busa, nganong mosulti man sa tinuod? Si Victoria, nga 23 anyos, miingon: “Kon mosulti ka sa tinuod ug mobarog sa imong tinuohan, posibleng i-bully ka. Pero maayo gyod ang resulta ana: May kompiyansa ka sa kaugalingon, masuod ka kang Jehova, ug tahoron ka sa imong mga minahal.” Busa, importante gyod ‘nga baksan ninyo ang inyong hawak sa kamatuoran’ sa tanang panahon. w18.05 28 ¶3, 5

Samtang nagkagrabe kining kritikal nga panahon, kinahanglan tang magpadayon sa pagbantay. Dihang molihok si Jehova, untop gyod ni sa panahon. (Mat. 24:42-44) Samtang magpaabot, magmapailobon ug magmabinantayon. Basaha ang Pulong sa Diyos kada adlaw, ug padayon sa pag-ampo. (1 Ped. 4:7) Konsideraha ang maayong mga ehemplo sa mga igsoon nga nagmalipayon pinaagi sa pagpadayon sa pagbantay ug pagpalamdag sa ilang kahayag. Himoang makapalig-on ang imong mga kalihokan ug pagpakig-uban. Makahatag nâ nimog dakong kalipay, ug morag paspas nga molabay ang panahon. (Efe. 5:16) Makapalig-on sa pagtuo ang pagkahibalo nga makaalagad ta kang Jehova bisag dili ta hingpit. Busa, apresyaha ang tagana ni Jehova nga “gasa nga mga lalaki,” ang mga ansiyano sa kongregasyon. (Efe. 4:8, 11, 12) Dihang may mobisita nimong ansiyano, pahimusli ang kahigayonan nga makakuhag kaalam ug makabenepisyo sa iyang tambag. w18.06 24-25 ¶15-18

Giingnan ni Jesus ang iyang mga tinun-an nga kinahanglan silang “magpabilin sa [iyang] gugma.” Ngano? Tungod kay ang padayong pagkinabuhi ingong tinun-an ni Kristo nagkinahanglag paglahutay. Gani, diha sa Juan 15:4-10, kadaghan gigamit ni Jesus ang pulong nga “magpabilin” aron ipasiugda ang kaimportante sa paglahutay. Unsaon nato pagpakita nga gusto tang magpabilin sa gugma ni Kristo ug padayon niyang uyonan? Mapakita nato nâ pinaagi sa pagsunod sa mga sugo ni Jesus. Sa simpleng pagkasulti, giingnan ta ni Jesus, ‘Sunda ko ninyo.’ Pero, gipabuhat lang ni Jesus ang iyang gibuhat, kay siya midugang: “Ingon nga ako nagsunod sa mga sugo sa Amahan ug nagpabilin sa iyang gugma.” Busa, siya mismo ang nagpakitag ehemplo. (Juan 13:15) Pinaagi sa pagsunod sa sugo ni Jesus nga mosangyaw, atong gipakita nga gimahal nato ang Diyos kay ang mga sugo ni Jesus nagpakita sa panghunahuna sa iyang Amahan. (Mat. 17:5; Juan 8:28) Kay gimahal nato si Jehova ug Jesus, padayon pod ta nilang mahalon. w18.05 18 ¶5-7

Ang mga batan-on kinahanglang modesisyon bahin sa edukasyon, trabaho, ug uban pa. Kon kabalo ka sa imong tumong, mas sayon pod ang paghimog maayong desisyon. Kon mas sayo kang magplano pinaagi sa paghimog maayong mga tumong, mas dali kang molampos. Libolibo ka batan-on sa mga kongregasyon sa tibuok kalibotan ang angayan sa kinasingkasing nga pagdayeg. Giuna nila si Jehova ug ang ilang espirituwal nga mga tumong. Ilang natagamtam ang malipayon kaayong kinabuhi ug sa samang higayon nakakat-on sila sa pagsunod sa giya ni Jehova sa tanang butang apil na sa pamilyahanong kinabuhi. “Salig kang Jehova sa bug-os mong kasingkasing,” miingon si Solomon. “Sa tanan mong mga dalan tagda siya, ug siya magatul-id sa imong mga alagianan.” (Prov. 3:5, 6) Ang mga batan-on sa kongregasyon bililhon kang Jehova, kinsa nagmahal pag-ayo nila ug naghatag nilag proteksiyon, giya, ug panalangin. w18.04 26 ¶7; 27 ¶9

Si apostol Juan haligi sa unang Kristohanong kongregasyon. Ang iyang makapainteres nga Ebanghelyo sa ministeryo ni Jesus nakapadasig sa mga Kristohanon sa daghang katuigan​—hangtod karon. Sa iyang Ebanghelyo lang mabasa ang gisulti ni Jesus nga ang gugma maoy ilhanan sa iyang tinuod nga mga tinun-an. (Juan 13:35) Ang tulo ka sulat ni Juan naghatag ug dugang bililhon nga mga kamatuoran. Dihang mabug-atan ta tungod sa sala, dili ba makapahupayng mabasa nga “ang dugo ni Jesus . . . nagahinlo kanato gikan sa tanang sala”? (1 Juan 1:7) Ug kon padayon tang hasolon sa atong kasingkasing, dili ba mahupayan ta ug magmapasalamaton dihang atong mabasa nga “ang Diyos mas labaw kay sa atong mga kasingkasing”? (1 Juan 3:20) Si Juan lang ang nagsulat nga “ang Diyos gugma.” (1 Juan 4:8, 16) Ang iyang ikaduha ug ikatulong sulat naghatag ug komendasyon sa mga Kristohanon nga padayong “nagalakaw diha sa kamatuoran.”​—2 Juan 4; 3 Juan 3, 4. w18.04 18 ¶14-15