Marso

Dihang magbasa sa unang duha ka kapitulo sa Genesis, mahibaloan dayon nato nga natagamtam ni Adan ug Eva ang matang sa kagawasan nga pangandoy na lang para sa mga tawo karon​—kagawasan gikan sa kawalad-on, kahadlok, ug pagdaogdaog. Ang unang magtiayon dili gyod mabalaka bahin sa pagkaon, trabaho, sakit, ug kamatayon. (Gen. 1:27-29; 2:8, 9, 15) Pero maylabot sa kagawasan, importanteng hinumdoman nato nga si Jehova lang ang dunay bug-os ug walay limitasyong kagawasan. Ngano? Tungod kay siya ang Maglalalang sa tanang butang ug ang labing gamhanang Magmamando sa uniberso. (1 Tim. 1:17; Pin. 4:11) Busa, ang kagawasan nga natagamtam sa tanang linalang sa langit ug sa yuta relatibo lang o dili bug-os. Kinahanglang ilhon nila nga si Jehova lang ang may awtoridad sa pagdesisyon kon unsa nga mga limitasyon ang patas, kinahanglanon, ug makataronganon. Sa pagkatinuod, gihimo na kana ni Jehova dihang gilalang niya ang tawo. w18.04 4 ¶4, 6

Niining sistemaha, makalahutay lang ta sa tabang ni Jehova. (2 Cor. 4:7, 8) Pero hunahunaa kadtong naglisod sa pagkinabuhi niining kalibotana nga dili suod kang Jehova. Sama kang Jesus, maluoy ta nila, ug mapalihok ta nga isulti kanila ang “maayong balita sa butang nga mas maayo.” Busa, magmapailobon sa imong gitudloan. Hinumdomi nga lagmit wala gyod nila mahunahunai ang pipila ka kamatuoran sa Bibliya nga atong nahibaloan. Ug daghan ang kombinsido kaayo sa ilang gituohan. Gibati tingali nila nga ang ilang relihiyon maoy nakapahiusa nila sa ilang pamilya ug komunidad, ug mao nay ilang naandan. Sa dili pa nato sultihan ang mga tawo nga biyaan ang ilang gimahal pag-ayo pero “daan” nga tinuohan, tabangan una nato sila nga makat-onan ug mahalon ang “bag-ong” kamatuoran nga wala pa nila mahibaloi sa sinugdan. Lagmit nianang panahona andam na silang biyaan ang daang pagtulon-an. Mahimong magkinahanglag taas nga panahon sa pagtabang nila nga mohimog kausaban.​—Roma 12:2. w19.03 22 ¶10; 23 ¶12-13

Ang ehemplo ni Jehova sa pagsulti sa iyang gugma ug pag-uyon magpahinumdom nato sa pagpangitag mga kahigayonan sa pagdasig sa uban. (Juan 5:20) Mouswag ta dihang ang atong minahal nagpakitag gugma ug naghatag ug komendasyon sa atong maayong nahimo. Sa susama, ang atong mga igsoon sa pagtuo ug membro sa pamilya nagkinahanglan sa atong gugma ug pagdasig. Dihang komendahan nato ang uban, atong gipalig-on ang ilang pagtuo ug gitabangan sila nga magmaunongon kang Jehova. Ilabinang kinahanglang dasigon sa mga ginikanan ang ilang mga anak. Dihang ang mga ginikanan maghatag ug komendasyon ug magpakitag pagmahal, gitabangan nila ang ilang mga anak nga mouswag. Ang mga pulong: “Giuyonan ko ikaw” nagpakita nga masaligon si Jehova nga matinumanong buhaton ni Jesus ang kabubut-on sa iyang Amahan. Masaligon kaayo si Jehova sa iyang Anak, busa makasalig pod ta nga tumanon ni Jesus ang tanang saad ni Jehova. (2 Cor. 1:20) Dihang atong konsiderahon ang ehemplo ni Jesus, mas determinado tang makakat-on niya ug sundogon siya.​—1 Ped. 2:21. w19.03 8 ¶3; 9 ¶5-6

Dihang mahibaloan nato ang tinuod nga bili sa mahalong regalo, mapalihok ta sa pagpakita sa atong pasalamat sa naghatag. Wala apresyaha sa mga Israelinhon ang kagawasan nga gihatag ni Jehova kanila dihang giluwas niya sila sa Ehipto. Pipila lang ka bulan human sila luwasa, sila misugod sa pagpangandoy sa pagkaon ug ilimnon nga ilang natagamtam sa Ehipto ug mireklamo sa tagana ni Jehova. Gusto pa gani nilang mobalik didto. Hunahunaa ra, mas gipili nila ang isda, pepino, pakwan, sibuyas dahon, bombay, ug ahos kay sa kagawasan sa pagsimba sa tinuod nga Diyos, si Jehova. Maong dili ikatingala nga nasuko pag-ayo si Jehova sa iyang katawhan! (Num. 11:5, 6, 10; 14:3, 4) Leksiyon gyod nâ alang kanato! Si Pablo nag-awhag sa tanang Kristohanon nga dili balewalaon ang kagawasan nga mahigugmaong gihatag ni Jehova kanato pinaagi sa iyang Anak, si Jesu-Kristo.​—2 Cor. 6:1. w18.04 9-10 ¶6-7

Kitang tanan gustong mahalon ug trataron nga patas. Kon pirme tang dili mahalon ug dili hatagag hustisya, lagmit mobati tang walay pulos ug walay paglaom. Si Jehova nahibalo nga nangandoy tag gugma ug hustisya. (Sal. 33:5) Makaseguro ta nga siya nagmahal nato ug gusto niyang trataron tang patas. Klaro ning makita dihang atong konsiderahon ang Balaod nga gihatag niya sa Israel pinaagi kang Moises. Samtang tun-an nato ang Balaod ni Moises, atong mahibaloan ang pagkamahigugmaon ni Jehova. (Roma 13:8-10) Mamatikdan nato nga ang Balaod ni Moises gibase sa gugma kay ang tanang ginahimo ni Jehova gipalihok sa gugma. (1 Juan 4:8) Gibase ni Jehova ang Balaod sa duha ka importanteng sugo​—higugmaa ang Diyos, ug higugmaa ang imong silingan. (Lev. 19:18; Deut. 6:5; Mat. 22:36-40) Ang matag usa sa kapig 600 ka sugo diha sa Balaod magtudlo nato bahin sa gugma ni Jehova. w19.02 20-21 ¶1-4

Nag-amping si Job sa iyang pagpakiglabot sa mga babaye. (Job 31:1) Nahibalo siya nga sayop ang paghatag ug romantikong interes kang bisan kinsang babaye gawas sa iyang asawa. Karon, nagkinabuhi ta sa kalibotang daghag maninental. Sama kang Job, likayan ba nato nga makahatag ug dili angayng pagtagad kang bisan kinsa nga dili nato kapikas? Likayan ba sab nato ang pagtan-awg bastos o pornograpikong mga letrato, bisan asa man ni makita? (Mat. 5:28) Kon maningkamot tang pugngan ang kaugalingon kada adlaw, mas determinado tang magmatinumanon. Si Job masinugtanon sab kang Jehova kon bahin sa iyang panglantaw sa materyal nga mga butang. Nasabtan niya nga kon mosalig siya sa iyang kabtangan, siya makasala ug angayng silotan. (Job 31:24, 25, 28) Karon, nagkinabuhi ta sa kalibotan nga materyalistiko kaayo. Kon maugmad nato ang hustong panglantaw sa kuwarta ug kabtangan, nga maoy gitambag sa Bibliya, mas determinado tang magmatinumanon.​—Prov. 30:8, 9; Mat. 6:19, 20. w19.02 6 ¶13-14

Hingpit nga gisundog ni Jesus ang dakong gugma ni Jehova kanato diha sa tanan niyang gibuhat. (1 Juan 4:8-10) Labaw sa tanan, ang gugma ni Jesus nagpalihok niya sa paghalad sa iyang kinabuhi alang kanato. Kita man bahin sa mga dinihogan o sa “ubang mga karnero,” makabenepisyo ta sa gugma nga gipakita ni Jehova ug sa iyang Anak pinaagi sa maong halad. (Juan 10:16; 1 Juan 2:2) Hunahunaa sab ang mga emblema; nagpadayag nâ sa gugma ug konsiderasyon ni Jesus sa iyang mga tinun-an. Sa unsang paagi? Gipakita ni Jesus ang gugma para sa iyang dinihogang mga sumusunod pinaagi sa paghimo sa maong okasyon nga simple, imbes komplikadong rituwal. Paglabay sa panahon, ang dinihogang mga tinun-an magselebrar sa Memoryal kada tuig diha sa lainlaing kahimtang, bisan pa ganig napriso sila. (Pin. 2:10) Natuman ba nila ang sugo ni Jesus? Oo! Hangtod karon, ang tinuod nga mga Kristohanon naningkamot sa paghandom sa kamatayon ni Jesus. w19.01 24 ¶13-15

Ang maong kagawasan nag-apil sa kagawasan gikan sa bakak nga relihiyon, kakulag kahibalo, ug patuotuo. Ug dili kay kana ra. Sa umaabot mag-apil kana sa “mahimayaong kagawasan sa mga anak sa Diyos.” (Roma 8:21) Bisan karon matagamtam ninyo ang maong kagawasan kon ‘magpabilin kamo sa pulong’ sa Kristo, o sa iyang mga pagtulon-an. (Juan 8:31) Nianang paagiha, kamo “mahibalo sa kamatuoran” dili lang pinaagi sa pagtuon niini kondili sa pagpadapat sab niini. Niining daang sistema, bisan ang gitawag ug maayong kinabuhi walay kasegurohan ug mubo ra. Wala ta mahibalo kon unsay naa sa ugma. (Sant. 4:13, 14) Busa, maalamon gyod nga magpabilin diha sa dalan nga motultol sa “tinuod nga kinabuhi”​—kinabuhing walay kataposan. (1 Tim. 6:19) Siyempre, dili ta pugson sa Diyos nga mosubay nianang dalana. Kita ang modesisyon. Himoa si Jehova nga imong “bahin.” (Sal. 16:5) Pabilhi ang daghang “maayong butang” nga gihatag niya kanimo. (Sal. 103:5) Ug magmasaligon nga magmalipayon ka hangtod sa hangtod.​—Sal. 16:11. w18.12 28 ¶19, 21

Ang tanang Kristohanon angayng maningkamot nga pabilhan ang kaminyoon, sama kang Jehova ug Jesus. Pero, ang pipila tingali wala makahimo niana tungod sa pagkadili-hingpit. (Roma 7:18-23) Busa dili ta angayng makurat kon may mga Kristohanon sa unang siglo nga gubot ang kaminyoon. Si Pablo nagsulat nga “ang asawa dili gayod mobiya sa iyang bana,” pero usahay mahitabo kana. (1 Cor. 7:10) Wala ipatin-aw ni Pablo kon unsay hinungdan sa maong panagbulag. Pero masabtan nato nga dili seksuwal nga imoralidad ang problema. Kay kon maohon, may basehanan unta ang asawa sa pagpakigdiborsiyo ug pagminyo pag-usab. Si Pablo nag-ingon nga ang asawa nga nakigbulag kinahanglang ‘magpabiling dili-minyo o makig-uli ba hinuon sa iyang bana.’ Busa, sa panan-aw sa Diyos minyo gihapon sila. Si Pablo nagtambag nga bisag unsay problema, kon dili kini seksuwal nga imoralidad, angay nga himoong tumong ang pagpakig-uli. Silang duha puwedeng mangayog tabang sa mga ansiyano. w18.12 13 ¶14-15

Karon, gusto sa Diyos nga ang iyang katawhan makigsuod niya ug makigbahin sa buluhatong pagsangyaw kutob sa maarangan. (Mat. 28:19, 20; Sant. 4:8) Ang mga tawong maayog intensiyon mosulay tingali sa pagpatipas nato gikan niana nga tumong. Pananglitan, basin tanyagan ka sa imong amo ug promosyon ug patas-an ang imong suweldo pero mababagan ang imong espirituwal nga kalihokan. O kon nag-eskuyla ka, tingali tanyagan kag oportunidad nga mokuhag dugang edukasyon sa lugar nga layo sa inyo. Niana pa bang panahona nga mag-research ka, mokonsulta sa uban, ug modesisyon? Nganong dili sayron karon ang panglantaw ni Jehova sa maong mga butang ug maningkamot sa pagsundog niana? Dayon, kon dunay motanyag nimo ana, dili na ka madani. Mahibalo na ka kon unsay angayng buhaton kay nakadesisyon ka na nga magpokus sa pag-alagad kang Jehova. w18.11 27 ¶18

Si Solomon nahimong hari sa Israel dihang batan-on pa. Sa sayong bahin sa iyang pagmando, si Jehova nagpakita kaniya sa damgo ug miingon: “Hangyo kon unsay akong ihatag kanimo.” Si Solomon mitubag: “Ako usa lamang ka gamayng bata. Ako dili mahibalo kon unsaon paggawas ug unsaon pagsulod [o, kulag eksperyensiya].. . . Hatagi ang imong alagad ug usa ka kasingkasing nga masinugtanon aron sa paghukom sa imong katawhan.” (1 Hari 3:5-10) “Usa ka kasingkasing nga masinugtanon”​—mapaubsanon gyod kadto nga hangyo! Mao diay nga gimahal ni Jehova si Solomon. (2 Sam. 12:24) Ang atong Diyos nalipay kaayo sa tubag sa batan-ong hari nga iya kining gihatagan ug “usa ka maalamon ug masinaboton nga kasingkasing.” (1 Hari 3:12) Samtang nagmatinumanon si Solomon, nakadawat siyag daghang panalangin. Nakapribilehiyo siya sa pagtukod ug usa ka templo “alang sa ngalan ni Jehova nga Diyos sa Israel.” (1 Hari 8:20) Nailado siya tungod sa hinatag sa Diyos nga kaalam. Ug ang mga butang nga iyang gisulti samtang siya gigiyahan sa Diyos narekord sa tulo ka basahon sa Bibliya. Usa niini ang Proverbio. w19.01 14 ¶1-2

Ang pipila ka tawo dili ganahan nga dunay moimpluwensiya sa ilang panghunahuna. Sila moingon, “Akoy magbuot sa akong kaugalingon.” Lagmit gusto nila nga silay modesisyon para sa kaugalingon, ug nga katungod nila kana. Dili sila ganahan nga dunay mokontrol nila o magsunodsunod na lang sila sa buhaton sa uban. Pero, makasalig ta nga bisag sundogon nato ang panghunahuna ni Jehova, makahimo gihapon tag kaugalingong opinyon. Sama sa giingon sa 2 Corinto 3:17, “kon asa gani ang espiritu ni Jehova, adunay kagawasan.” May kagawasan ta sa pagpili kon unsa nga personalidad ang gusto nato. Makadesisyon ta kon unsay atong gusto ug makapainteres nato. Gidisenyo ta ni Jehova nga ingon ana. Pero, may limitasyon ang atong kagawasan. (1 Ped. 2:16) Kon bahin sa husto ug sayop, gusto ni Jehova nga magpagiya ta sa iyang panghunahuna nga makita diha sa iyang Pulong. w18.11 19 ¶5-6

Dihang nakat-onan nato ang kamatuoran, nahimo natong prayoridad ang espirituwal nga mga tumong imbes ang materyal nga mga butang. Nalipay ta sa pagsakripisyo sa materyal nga mga butang aron makalakaw sa kamatuoran. Pero paglabay sa panahon, lagmit nakita nato ang uban nga namalit ug bag-ong mga gadyet o ubang mahalong butang. Tingali gusto pod natong makabaton ug susamang mga butang. Kay dili na ta kontento sa atong nabatonan, basin unahon na nato ang materyal nga mga butang imbes ang espirituwal nga mga tumong. Magpahinumdom ni nato kang Demas. Tungod sa iyang gugma sa presenteng “sistema sa mga butang,” gibiyaan niya ang pag-alagad uban kang apostol Pablo. Nganong gibuhat kadto ni Demas? Wala hisgoti sa Bibliya ang rason. Pero lagmit mas gihigugma niya ang materyal nga mga butang kay sa espirituwal. Posible sab nga dili na siya andam mosakripisyo aron mag-alagad uban kang Pablo. Dili gyod nato gustong maugmad ang sayop nga tinguha sa materyal nga mga butang ug mawala ang atong gugma sa kamatuoran. w18.11 10 ¶9

Ang pagpamakak ni Satanas daotag motibo kay nahibalo siya nga kon si Eva motuo niya ug mokaon sa bunga, kini mamatay. Si Eva ug Adan parehong misupak sa sugo ni Jehova, ug sa ulahi namatay. (Gen. 3:6; 5:5) Labaw pa niana, tungod sa maong sala, “ang kamatayon mikaylap sa tanang tawo.” Gani, “ang tanang tawo giharian sa kamatayon bisan kadtong wala makasala sama sa pagpakasala ni Adan.” (Roma 5:12, 14, Ang Bag-ong Maayong Balita Biblia) Karon, imbes makatagamtam ug hingpit, walay kataposang kinabuhi​—sumala sa orihinal nga katuyoan sa Diyos​—maayo na lang kon ang tawo mabuhig ‘70 ka tuig o kon tungod sa talagsaong kabaskog, 80 ka tuig.’ Bisan pa niana, ang maong kinabuhi sagad punog ‘kasamok ug mga butang nga makadaot.’ (Sal. 90:10) Makapaguol gyod ang resulta sa bakak ni Satanas! Sa pagpatin-aw sa binuhatan sa Yawa, si Jesus miingon: “Siya wala mobarog nga lig-on diha sa kamatuoran, tungod kay ang kamatuoran wala kaniya.” (Juan 8:44) Ang kamatuoran wala gihapon kang Satanas kay siya padayong “nagpahisalaag sa tibuok gipuy-ang yuta” pinaagi sa iyang mga bakak. (Pin. 12:9) Dili nato gustong malimbongan sa Yawa. w18.10 6-7 ¶1-4

Kadtong mangitag paagi nga makigdait dunay rason nga magmalipayon. Ang tinun-ang si Santiago miingon: “Ang bunga sa pagkamatarong may binhi nga gipugas ubos sa malinawong mga kahimtang alang niadtong nagapakigdait.” (Sant. 3:18) Kon may dili ta ikasinabot diha sa kongregasyon o sa pamilya, makapangayo tag tabang sa Diyos aron makigdait. Ingong resulta, ihatag ni Jehova ang iyang balaang espiritu, makapakita tag maayong panggawi, ug magmalipayon ta. Gipasiugda ni Jesus ang kaimportante sa pagpangitag paagi nga makigdait dihang siya miingon: “Kon ikaw nagadala sa imong gasa ngadto sa halaran ug didto mahinumdom ka nga ang imong igsoon may butang nga batok kanimo, biyai ang imong gasa didto atubangan sa halaran, ug lakaw; pakigdait una sa imong igsoon, ug unya, sa makabalik ka na, ihalad ang imong gasa.”​—Mat. 5:23, 24. w18.09 21 ¶17

Sa iyang kataposang gabii uban sa iyang mga tinun-an, gihisgotan ni Jesus ang gugma halos 30 ka beses. Giingnan niya ang iyang mga tinun-an nga kinahanglang “maghigugmaay [sila] sa usag usa.” (Juan 15:12, 17) Mahimong talagsaon kaayo ang ilang gugma nga kini klarong magpaila nila ingong iyang tinuod nga mga sumusunod. (Juan 13:35) Kini nga gugma dili kay pagbati lang. Gitumong ni Jesus dinhi ang kinamaayohang hiyas​—ang nagsakripisyo sa kaugalingon nga gugma. Siya miingon: “Walay usa nga may gugmang labaw pa kay niini, nga ang usa magtugyan sa iyang kalag alang sa iyang mga higala. Kamo akong mga higala kon inyong buhaton ang ginasugo ko kaninyo.” (Juan 15:13, 14) Ang mga alagad ni Jehova karon nailhan sa ilang tinuod, nagsakripisyo sa kaugalingon nga gugma ug dili mabungkag nga panaghiusa. (1 Juan 3:10, 11) Mapasalamaton gyod ta nga ang gugmang sama nianang kang Jesus makita diha sa mga alagad ni Jehova bisag unsay rasa, tribo, pinulongan, o kagikan! w18.09 12 ¶1-2

Gidahom ni Jehova nga atimanon sa iyang mga alagad ang ilang pamilya. Pananglitan, kinahanglan tingali kang magtrabaho aron matagan-an sa pinansiyal ang imong mga minahal. Daghang inahan ang magpabilin sa balay aron atimanon ang gagmayng anak. Ug atimanon tingali sa pipila ka dagko nang anak ang ilang luya nang ginikanan. Importante ni nga mga buluhaton. Kon may responsibilidad ka sa pamilya, lagmit dili ka makagahig dakong panahon sa pag-alagad. Pero ayawg kaluya! Malipay si Jehova dihang tagan-an nimo ang imong pamilya. (1 Cor. 10:31) Kon wala kay bug-at nga responsibilidad sa pamilya, makatabang ka ba sa mga igsoon nga nag-atimag masakiton ug niadtong luya na, tigulang, o may ubang panginahanglan? Tan-awa kon kinsay nanginahanglag tabang sa inyong kongregasyon. Kon imo nang himoon, nakigkooperar ka kang Jehova sa pagtubag sa usa ka pag-ampo.​—1 Cor. 10:24. w18.08 24 ¶3, 5

Mga 17 anyos si Jose dihang gibaligya siya sa iyang mga igsoon ingong ulipon. Nasina sila kay si Jose ang paborito sa ilang amahan. (Gen. 37:2-4, 23-28) Sulod sa mga 13 ka tuig, kinahanglang antoson ni Jose ang pagkaulipon ug pagkabilanggo sa Ehipto, nga layo sa iyang minahal nga amahang si Jacob. Pero wala siya mawad-ig paglaom ug masuko. Unsay nakatabang kang Jose? Samtang nag-antos sa prisohan, lagmit nagpokus si Jose sa mga ebidensiya nga gipanalanginan siya ni Jehova. (Gen. 39:21; Sal. 105:17-19) Ang matagnaong mga damgo ni Jose sa bata pa siya nagpasalig sab niya nga giuyonan siya ni Jehova. (Gen. 37:5-11) Lagmit kadaghan niyang gitugyan kang Jehova ang iyang kasakit. (Sal. 145:18) Ingong tubag sa kinasingkasing nga mga pag-ampo ni Jose, si Jehova naghatag niyag kombiksiyon nga Siya “nag-uban kaniya” sa tanan niyang kalisdanan. w18.10 28 ¶3-4

Ang materyal nga bahandi maoy usa ka butang nga makaapektar sa atong panglantaw sa uban. Pero sa unsang paagi ang kadato o kapobre sa usa makaapektar sa atong panglantaw kaniya? Ang balaang espiritu nagpalihok kang Solomon sa pagsulat sa makapaguol nga kamatuoran bahin sa dili hingpit nga tawo ingon sa gipakita sa teksto karong adlawa. Unsay gitudlo niini kanato? Kon dili ta magbantay, basin tinguhaon nato nga makighigala sa mga igsoon nga dato samtang likayan ang mga pobre. Nganong peligroso nga lantawon ang uban base lang sa ilang bahandi? Kay kon buhaton nato kana, basin makapahinabo tag pagkabahinbahin sa kongregasyon. Ang tinun-ang si Santiago nagpasidaan nga kining problemaha nakapabahin sa pipila ka kongregasyon sa unang siglo. (Sant. 2:1-4) Dili gyod nato tugotan nga maapektohan ang atong kongregasyon sa maong panghunahuna ug maningkamot pag-ayo nga dili nato mahukman ang uban base sa makita. w18.08 10 ¶8-10

Mapakita nato ang pagkamapasalamaton kang Jehova sa espesyal nga pagpakighigala niya pinaagi sa pagtratar nato sa atong mga igsoon sa pagtuo. Si Jehova poy tag-iya nila. Kon hinumdoman nato ni nga kamatuoran, kanunay natong pakitaag kaayo ug gugma ang atong mga igsoon. (1 Tes. 5:15) Si Jesus miingon sa iyang mga sumusunod: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:35) Makapainteres nga gihisgotan ni Malaquias si Jehova ingong ‘nagtagad ug namati’ samtang ang Iyang katawhan nag-estoryahanay. (Mal. 3:16) “Si Jehova nakaila sa mga iyaha.” (2 Tim. 2:19) Kabalo gyod siya sa tanan natong buhaton ug isulti. (Heb. 4:13) Kon dili kaayo ta mahunahunaon sa atong mga igsoon, si Jehova nagtan-aw ug naminaw. Dihang maabiabihon, mahinatagon, mapinasayloon, ug mahunahunaon ta sa usag usa, makaseguro ta nga nakita pod nâ ni Jehova.​—Heb. 13:16. w18.07 26 ¶15, 17

Importante gyod ang pag-unong kang Jehova. Wala nay mas gamhanan, maalamon, o mahigugmaon kay sa atong Diyos! Kinsa bay dili gustong modapig niya? (Sal. 96:4-6) Pero ang pipila ka magsisimba sa Diyos napakyas sa pagbuhat niana dihang nag-atubag situwasyon nga kinahanglang modapig kang Jehova. Konsideraha ang nahitabo kang Cain. Wala siya mag-alagad ug laing diyos gawas kang Jehova. Pero wala dawata sa Diyos ang iyang pagsimba. Ang pagkadaotan miturok sa iyang kasingkasing. (1 Juan 3:12) Gipasidan-an ni Jehova si Cain: “Kon magbuhat ka ug maayo, dili ba adunay pagbayaw? Apan kon dili ka magbuhat ug maayo, adunay sala nga naghupo sa ganghaan, ug ikaw ang gipangandoy niini; ug makabuntog ka ba niini?” (Gen. 4:6, 7) Sama rag gisultihan ni Jehova si Cain, “Kon maghinulsol ka ug modapig nako, modapig pod ko nimo.” Pero wala siya maminaw sa tambag. w18.07 17 ¶1, 3; 18 ¶4

Ang usa ka paagi nga mapasidlak ang atong kahayag mao ang pagsangyaw sa maayong balita ug paghimog mga tinun-an. (Mat. 28:19, 20) Dugang pa, mahimaya nato si Jehova pinaagi sa atong Kristohanong panggawi. Makita sa mga tagbalay ug lumalabay ang atong pamatasan. Ang atong mahigalaong pahiyom ug mainitong timbaya dakog ikasulti kon kinsa ta ug kon unsang matanga sa Diyos ang atong ginasimba. Giingnan ni Jesus ang iyang mga tinun-an: “Inigsulod ninyo sa balay, paghatag ug katahoran sa panimalay.” (Mat. 10:12) Sa lugar nga sagad magsangyaw si Jesus ug ang mga apostoles, normal lang nga pasudlon sa balay ang dili nila kaila. Karon, dili na ni ang naandan sa daghang lugar. Pero, ang imong positibo ug mahigalaong paagi sa pagsaysay kon nganong mibisita ka sagad makawala sa kabalaka o kasuko sa tagbalay. Ang tam-is nga pahiyom sagad mao ang pinakamaayong introduksiyon. Tinuod pod nâ dihang ang atong mga igsoon makigbahin sa publikong pagsangyaw gamit ang cart. Mamatikdan tingali nimo nga ang mga tawo sagad mosanong sa nindot nga pahiyom ug timbaya. w18.06 22 ¶4-5

Naandan na ni apostol Pedro nga makig-uban lang sa mga Hudiyo. Pero dihang giklaro sa Diyos nga dili angayng magpakitag diskriminasyon ang mga Kristohanon, gisangyawan ni Pedro si Cornelio nga usa ka Romanong sundalo. (Buh. 10:28, 35) Human niadto, si Pedro mokaon na uban sa Hentil nga mga magtutuo ug makig-uban nila. Pero pipila ka tuig sa ulahi, may higayon nga si Pedro miundang ug kaon kauban sa dili Hudiyong mga Kristohanon sa siyudad sa Antioquia. (Gal. 2:11-14) Tungod niadto, si Pablo naghatag niyag haom nga pagbadlong, nga iya pong gidawat. Sa unang sulat ni Pedro sa Hudiyo ug Hentil nga mga Kristohanon sa Asia Minor, kinasingkasing siyang naghisgot bahin sa tibuok kapunongan sa mga igsoon. (1 Ped. 1:1; 2:17) Klaro, ang mga apostoles nakakat-on kang Jesus sa paghigugma “sa tanang matang sa mga tawo.” (Juan 12:32; 1 Tim. 4:10) Bisag dili dihadiha, nausab nila ang ilang paagi sa paghunahuna. Kay nagsul-ob ug “bag-ong pagkatawo,” nakakat-on ang unang mga Kristohanon nga isipong patas ang tanan sa panan-aw sa Diyos.​—Col. 3:10, 11. w18.06 11 ¶15-16

Ang usa ka matang sa panagang sa dughan nga gigamit sa Romanong sundalo dunay mga piraso sa nagsapaw nga puthaw. Kinahanglan niyang tan-awon pirme kon sakto ba ang pagkataod sa matag piraso aron maproteksiyonan ang iyang kasingkasing ug ang ubang importanteng parte sa dughan. Haom gayod kana nga ilustrasyon kon sa unsang paagi ang matarong nga mga sukdanan ni Jehova manalipod sa atong simbolikong kasingkasing! (Prov. 4:23) Dili gyod mosugot ang sundalo nga ang iyang puthaw nga panagang pulihag ubos ug kalidad nga metal. Sa susama, dili pod nato gusto nga ang matarong nga sukdanan ni Jehova pulihan sa atoang sukdanan. Ang atong kaalam dili igo aron maproteksiyonan ta. (Prov. 3:5, 6) Busa, angay natong susihon pirme kon ang atong panagang sa dughan nanalipod pa ba sa atong kasingkasing. Ug kon gimahal nato pag-ayo ang kamatuoran sa Diyos, mas daling isul-ob ang “panagang sa dughan,” sa ato pa, ang pagkinabuhi sa matarong nga mga sukdanan sa Diyos.​—Sal. 111:7, 8; 1 Juan 5:3. w18.05 28 ¶3-4, 6-7

Bisan pa sa taas nga rekord ni Moises sa mahigugmaong pagpanguna, ang mga tawo nagreklamo dili lang tungod sa kakulag tubig kondili bahin sab kang Moises, nga morag siyay hinungdan niana. (Num. 20:1-5, 9-11) Tungod sa iyang kasuko, nawala ang kaaghop ni Moises. Imbes sultihan ang bato, sumala sa gisugo ni Jehova, gikasab-an ni Moises ang mga tawo ug giingnan nga maghimo siyag milagro. Dayon, gihapak niyag kaduha ang bato ug migawas ang tubig. Nahimo niya kadtong seryosong sayop tungod sa garbo ug kasuko. (Sal. 106:32, 33) Tungod sa temporaryong pagkawala sa iyang kaaghop, wala tugoti si Moises nga mosulod sa Yutang Saad. (Num. 20:12) Niining hitaboa, makakat-on tag importanteng mga leksiyon. Una, kinahanglang kanunay natong ugmaron ug mentinahon ang kaaghop. Kon mohunong ta sa pagpakita niini bisag kadiyot lang, dali ra tang mahimong garboso ug kita makasulti ug makabuhat ug mga butang nga dili maayo. Ikaduha, ang stress makapaluya nato, busa angay tang maningkamot nga magmaaghop, bisag presyuron. w19.02 12-13 ¶19-21

Bug-at ba ang pagsunod sa sugo ni Jesus nga mosangyaw? Dili! Human isulti ang ilustrasyon bahin sa punoan sa ubas, si Jesus miingon nga ingong mga magsasangyaw sa Gingharian, makatagamtam tag kalipay. (Juan 15:11) Gani, siya nagpasalig nga maatoa ang iyang kalipay. Sa unsang paagi? Gikomparar ni Jesus ang iyang kaugalingon sa punoan sa ubas ug ang iyang mga tinun-an sa mga sanga. (Juan 15:5) Tagan-an sa punoan ang panginahanglan sa mga sanga. Basta dili putlon ang sanga, ang punoan makatagana niinig tubig ug sustansiya. Sa susama, basta magpabilin tang nahiusa kang Kristo pinaagi sa pagsunod pag-ayo sa iyang mga tunob, atong matagamtam ang kalipay nga iyang gibati sa pagbuhat sa kabubut-on sa iyang Amahan. (Juan 4:34; 17:13; 1 Ped. 2:21) Si Hanne, nga kapig 40 ka tuig nang payunir, miingon, “Ang kalipay nga kanunay nakong bation human ko magsangyaw nakapadasig nako nga mopadayon sa pag-alagad kang Jehova.” Oo, ang tinuod nga kalipay makahatag natog kusog nga padayong magsangyaw bisan pag dili maminaw ang mga tawo.​—Mat. 5:10-12. w18.05 17 ¶2; 20 ¶14

Sa unang siglo, lagmit si Pablo ang apostol nga kinadaghanag nahimo sa pagdasig sa iyang mga igsoon. Gipadala siya sa balaang espiritu aron sangyawan ang mga Grego, Romano, ug uban pa nga nagsimbag daghang diyos. (Gal. 2:7-9) Si Pablo miadto sa mga lugar nga nailhan karong Turkey, Greece, ug Italy. Siya nagsangyaw sa mga dili Hudiyo nianang mga lugara, nga nagtukod ug Kristohanong mga kongregasyon. Kining bag-ong mga Kristohanon “nag-antos usab diha sa mga kamot sa [ilang] kaugalingong mga katagilungsod” ug nagkinahanglag pagdasig. (1 Tes. 2:14) Niadtong mga 50 C.E., misulat si Pablo sa bag-ong kongregasyon sa Tesalonica: “Kami nagpasalamat kanunay sa Diyos sa dihang kami naghisgot kaninyong tanan sa among mga pag-ampo, kay kami walay-hunong nga nahinumdom sa inyong buhat sa pagtuo ug sa inyong mahigugmaong paghago ug sa inyong pag-antos.” (1 Tes. 1:2, 3) Gidasig pod niya sila sa pagpalig-on sa usag usa, nga nag-ingon: “Magpadayon sa paghupay sa usag usa ug sa paglinig-onay sa usag usa.”​—1 Tes. 5:11. w18.04 18-19 ¶16-17

Kon gusto sa usa ka batan-on nga malipay si Jehova, unahon niya ang ministeryo. Kay dinalian kaayo ang pagsangyaw, kinahanglang una ni sa atong mga prayoridad. Puwede ba nimong himoong tumong nga mahimong mas regular sa pagsangyaw? Puwede ba kang magpayunir? Pero unsa may imong buhaton kon dili kaayo ka ganahang mosangyaw? Ug sa unsang paagi mahimo kang mas epektibo sa pagsangyaw? Duha ka simpleng paagi ang makatabang: Pangandam pag-ayo, ug ayawg surender sa pagsulti sa uban sa imong nahibaloan. Masorpresa gyod ka sa kalipay nga imong bation dihang magsangyaw. Puwede kang magsugod sa pagtubag sa komon nga mga pangutana sa imong mga eskolmet, sama sa “Nganong nagtuo kag Diyos?” Ang atong website nga jw.org may mga artikulo nga makatabang sa mga batan-on sa pagtubag sa maong pangutana. Makita nimo diha ang worksheet nga “Nganong Nagtuo Kog Diyos?” Makatabang nimo ang maong worksheet sa pag-andam sa imong tubag. w18.04 27 ¶10-11

Bisag sa sinugdan natagamtam ni Adan ug Eva ang daghang matang sa kagawasan, dihay mga limitasyon nga gipatuman kanila. Ang pipila niana natural o kinaiyanhon, pero mga limitasyon gihapon. Pananglitan, nahibalo ang atong unang ginikanan nga aron padayong mabuhi, kinahanglan silang moginhawa, mokaon, matulog, ug uban pa. Bation ba nila nga nawad-an silag kagawasan sa paghimo niana? Dili, kay giseguro ni Jehova nga bisan sa paghimo niana nga mga rutina, sila magmalipayon ug magmakontento. (Sal. 104:14, 15; Eccl. 3:12, 13) Si Jehova espesipikong nagsugo kang Adan ug Eva nga pun-on ang yuta ug atimanon kini. Nawad-an ba silag kagawasan tungod niini nga sugo? Siyempre wala! Gihatag kini aron ang mga tawo mahimong bahin sa katuyoan sa ilang Maglalalang​—himoong paraiso ang yuta nga puy-an sa hingpit nga mga tawo hangtod sa hangtod. (Sal. 127:3; Isa. 45:18) Posible untang magmalipayon si Adan ug Eva sa ilang kaminyoon ug pamilya hangtod sa hangtod. w18.04 4-5 ¶7-8

Kon magmapailobon ta sa atong sangyawan, dili ta magdahom nga masabtan o dawaton dayon nila ang kamatuoran sa Bibliya sa unang higayon. Pananglitan, konsideraha kon unsaon nato pagpangatarongan bahin sa kinabuhing walay kataposan sa paraisong yuta. Daghan ang nagtuo nga ang kamatayon mao ang kataposan sa tanan o nga ang tanang maayong tawo moadto sa langit. Gisulti sa usa ka brader ang usa ka paagi nga nakita niyang epektibo. Una, basahon niya ang Genesis 1:28. Dayon, mangutana siya sa tagbalay kon asa gusto sa Diyos nga mabuhi ang mga tawo ug sa unsang kahimtang. Sagad ang tubag, “Dinhi sa yuta, sa maayong kahimtang.” Unya, basahon niya ang Isaias 55:11 ug mangutana siya kon nausab ba ang katuyoan sa Diyos. Ang tagbalay sagad motubag ug wala. Dayon, basahon sa brader ang Salmo 37:10, 11 ug mangutana siya kon unsay kaugmaon sa mga tawo. Niining paagiha, daghan ang iyang natabangan nga makasabot nga gusto gihapon sa Diyos nga ang mga tawo mabuhi sa walay kataposan sa Paraisong yuta. w19.03 24 ¶14-15; 25 ¶19

Giklaro ni Jehova nga gusto niya nga kita maminaw ug mosunod sa gisulti sa iyang Anak. Mahigugmaong gitudloan ni Jesus ang iyang mga sumusunod kon unsaon pagsangyaw sa maayong balita, ug balikbalik niyang gipahinumdoman sila nga magpadayon sa pagbantay. (Mat. 24:42; 28:19, 20) Iyang gidasig sila sa pagpaningkamot pag-ayo ug paglahutay. (Luc. 13:24) Gipasiugda ni Jesus sa iyang mga sumusunod nga kinahanglan silang maghigugmaay, magkahiusa, ug mosunod sa iyang mga sugo. (Juan 15:10, 12, 13) Kana nga tambag mapuslanon karon, sama sa panahon ni Jesus. Si Jesus miingon: “Ang matag usa nga dapig sa kamatuoran mamati sa akong tingog.” (Juan 18:37) Atong gipakita nga namati ta niya dihang kita “magpadayon sa pag-antos sa usag usa ug kinabubut-on nga magpasaylo sa usag usa.” (Col. 3:13; Luc. 17:3, 4) Gipakita pod nato nga namati ta niya pinaagi sa madasigong pagsangyaw sa maayong balita “sa paborableng panahon [ug] sa masamok nga panahon.”​—2 Tim. 4:2. w19.03 10 ¶9-10