Abril

Komosta sa atong bahin? Ang ato bang panghunahuna parehas nianang sa Diyos o sa kalibotan? Tinuod, naningkamot na tingali ta sa pagsunod sa mga sugo sa Diyos. Pero komosta ang atong panghunahuna? Gisundog ba nato ang panghunahuna ug panglantaw ni Jehova? Nagkinahanglan nag paningkamot. Sa laing bahin, dali ra kaayo natong masundog ang panghunahuna sa kalibotan kay komon kaayo ni. (Efe. 2:2) Dugang pa, makapadani ang panghunahuna sa kalibotan kay sagad nagdasig nig pagkamahunahunaon sa kaugalingon. Oo, lisod ang pagsundog sa panghunahuna ni Jehova pero dali ra kaayong sundogon ang iya sa kalibotan. Pero kon magpaimpluwensiya ta sa panghunahuna sa kalibotan, lagmit unahon nato ang kaugalingon ug dili na ta magpagiya sa Diyos sa pagdesisyon kon unsay husto ug sayop. (Mar. 7:21, 22) Busa, importante gyong sundogon ang ‘panghunahuna sa Diyos,’ dili ang “sa mga tawo.” w18.11 18 ¶1; 19 ¶3-4

Seguradong nadasig gyod si Jesus dihang giila siya ni Jehova sa tulo ka higayon pinaagi sa direktang pagsulti gikan sa langit. Human dayon sa bawtismo ni Jesus sa Suba sa Jordan, gisulti ni Jehova ang teksto karong adlawa. Tingali si Juan Bawtista lang ang laing tawo nga nakadungog niini. Dayon, mga usa ka tuig una sa kamatayon ni Jesus, nadunggan sa tulo ka apostoles ang giingon ni Jehova bahin kang Jesus: “Kini mao ang akong Anak, ang hinigugma, kinsa akong giuyonan; patalinghogi ninyo siya.” (Mat. 17:5) Sa ulahi, pipila ka adlaw una mamatay si Jesus, nakig-estorya na pod si Jehova sa iyang Anak gikan sa langit. (Juan 12:28) Bisag nahibalo si Jesus nga siya akusahan ingong tigpasipala ug makasinatig makauulawng kamatayon, siya miampo nga matuman unta ang kabubut-on ni Jehova ug dili ang iyaha. (Mat. 26:39, 42) “Siya nag-antos sa estaka sa pagsakit, nga wala igsapayan ang kaulaw,” nga wala magtinguha nga ilhon sa kalibotan, kondili ilhon sa iyang Amahan.​—Heb. 12:2. w18.07 10-11 ¶15-16

Human sa Panihapon sa Ginoo, nagpakita si Jesus ug dakong kaisog. Sa unsang paagi? Gidawat niya ang kabubut-on sa iyang Amahan para niya, bisag nahibalo siya nga ang pagbuhat niana magpasabot nga patyon siya tungod sa makauulawng krimen nga pagpasipala. (Mat. 26:65, 66) Si Jesus nagmatinumanon gayod aron mapasidunggan ang ngalan ni Jehova, mabayaw ang pagkasoberano sa Diyos, ug mahimong posible nga ang mahinulsolong katawhan mabuhi sa walay kataposan. Sa samang higayon, giandam ni Jesus ang iyang mga sumusunod sa hapit na nilang maeksperyensiyahan. Nagpakita pod ug kaisog si Jesus pinaagi sa pagpokus, dili sa iya tingaling mga kabalaka, kondili sa panginahanglan sa iyang matinumanong mga apostoles. Ang simpleng okasyon, nga gisugdan ni Jesus human niya pagawsa si Judas, magpahinumdom niadtong mahimo niyang dinihogan nga mga sumusunod sa mga benepisyo sa iyang giulang dugo ug sa pagkahimo nilang bahin sa bag-ong pakigsaad.​—1 Cor. 10:16, 17. w19.01 22 ¶7-8

Ingong tubag, ang Amahan ni Jesus misulti gikan sa langit: “Gihimaya ko na kini ug pagahimayaon ko kini pag-usab.” Naguol pag-ayo si Jesus tungod sa iyang dakong responsibilidad nga magmatinumanon kang Jehova. Si Jesus nahibalo nga antoson niya ang grabeng paglatigo ug sakit nga kamatayon. (Mat. 26:38) Labaw sa tanan, gusto niyang himayaon ang ngalan sa iyang Amahan. Giakusahan si Jesus ug pasipala, ug naguol siya nga ang iyang kamatayon magpakaulaw sa Diyos. Pareho ni Jesus, mabalaka tingali ta nga basig mapakaulawan ang ngalan ni Jehova. Tingali sama ni Jesus, biktima ta sa dili patas nga pagtratar. O natugaw tingali ta sa bakak nga mga estorya bahin kanato nga gipakaylap sa mga magsusupak. Ato tingaling gihunahuna ang pagpakaulaw niini sa ngalan ni Jehova. Nianang mga panahona, makapahupay nato ang gisulti ni Jehova. Kanunay gyong himayaon ni Jehova ang iyang ngalan.​—Sal. 94:22, 23; Isa. 65:17. w19.03 11-12 ¶14-16

Ang mga tinun-an ni Jesus dili katuo sa ilang nadunggan. Si Jesus, nga ilang gidahom nga maoy mopasig-uli sa gingharian sa Israel, miingon nga hapit na siyang mag-antos ug mamatay. Si apostol Pedro misulti: “Magmaluloton ka sa imong kaugalingon, Ginoo; dili gayod mahitabo kanimo kini nga dulnganan.” Giingnan siya ni Jesus: “Magpalikod ka kanako, Satanas! Ikaw maoy kapandolan kanako, tungod kay ikaw naghunahuna, dili sa mga hunahuna sa Diyos, kondili nianang sa mga tawo.” (Mat. 16:22, 23; Buh. 1:6) Sa maong mga pulong, gipakita ni Jesus ang kalainan sa panghunahuna sa Diyos ug nianang sa kalibotan nga gikontrolar ni Satanas. (1 Juan 5:19) Giawhag ni Pedro si Jesus nga magmahunahunaon sa kaugalingon sama sa kalibotan. Pero kabalo si Jesus nga lahi ang panghunahuna sa iyang Amahan. Sa iyang tubag kang Pedro, klarong gipili ni Jesus ang panghunahuna ni Jehova imbes ang sa kalibotan. w18.11 18 ¶1-2

Hunahunaa kon unsay makita ni Jehova dihang minilyon ang magtigom sa tibuok kalibotan para sa Panihapon sa Ginoo. Dili lang ang ka daghan sa manambong ang iyang makita; iyang makita ang matag indibiduwal nga motambong. Pananglitan, makita niya kadtong matinumanong nagatambong kada tuig. Apil niana kadtong naningkamot sa pagtambong bisan pa sa grabeng paglutos. Ang uban dili regular nga makatambong sa ubang tigom pero giisip nilang obligasyon ang pagtambong sa Memoryal. Makita pod ni Jehova kadtong motambong sa Memoryal sa unang higayon, tingali nainteres sila kon unsay ginahimo nianang okasyona. Seguradong malipay si Jehova nga daghan kaayo ang motambong sa Memoryal. (Luc. 22:19) Pero mas interesado siya sa rason sa ilang pagtambong; mas importante kaniya ang motibo. Ganahan ba tang matudloan ni Jehova ug sa organisasyon nga iyang gigamit?​—Isa. 30:20; Juan 6:45. w19.01 26 ¶1-3

Si Jesus andam mamatay para sa iyang mga tinun-an ug sa pag-una sa ilang kaayohan. Pananglitan, nakig-uban siya sa iyang mga sumusunod bisag gikapoy o naguol. (Luc. 22:39-46) Ug nagpokus siya sa iyang ikatabang sa uban, dili sa kon unsay ilang mahimo para niya. (Mat. 20:28) Bahin ta sa tinuod nga Kristohanong panag-igsoonay, ug malipay ta sa pag-imbitar sa uban nga mahimong kauban nato. Pero ilabinang naghunahuna ta sa pagtabang sa “atong kabanay sa pagtuo” nga nahimong dili aktibo. (Gal. 6:10) Atong mapamatud-an ang atong gugma nila pinaagi sa pagdasig nila sa pagtambong sa mga tigom, ilabina sa Memoryal. Parehas ni Jehova ug Jesus, malipay kaayo ta dihang mobalik sila kang Jehova.​—Mat. 18:14. w19.01 29 ¶12, 14; 30 ¶15

Dihang gisugdan ni Jesus ang Memoryal sa iyang kamatayon, gigamit niya ang tinapay sa Paskuwa ug ang bino nga tua didto. Giingnan ni Jesus ang iyang mga apostoles nga kini nagsimbolo sa iyang hingpit nga lawas ug dugo, nga hapit na niyang ihalad para nila. Lagmit wala na matingala ang mga apostoles sa kasimple niining importante ug bag-ong okasyon. Ngano? Pipila ka bulan una pa niana, dihang mibisita siya sa iyang suod nga mga higala​—si Lazaro, Marta, ug Maria​—si Jesus nagsugod sa pagpanudlo. Didto si Marta, pero puliki kaayo siya sa pagpangandam ug daghang pagkaon para sa iyang espesyal nga bisita. Dihang namatikdan kini ni Jesus, mabination niyang gibadlong si Marta, nga gitabangan siya nga masabtang dili pirmeng gikinahanglan ang daghang pagkaon. (Luc. 10:40-42) Sa ulahi, pipila ka oras una sa iyang kamatayon, gipadapat ni Jesus ang iyang tambag. Gihimo niyang simple ang Memoryal. w19.01 20-21 ¶3-4

Gipasidunggan ni Jehova si Jesus sa wala damhang paagi pinaagi sa pagbanhaw niini nga may “labaw nga katungdanan” ug paghatag niini sa pribilehiyo nga wala pa madawat ni bisan kinsa hangtod nianang panahona​—ang imortal nga espiritung kinabuhi! (Filip. 2:9; 1 Tim. 6:16) Pagkanindot nga pag-ila ang nadawat ni Jesus tungod sa iyang pagkamatinumanon! Unsay makatabang aron dili nato tinguhaon ang pag-uyon sa kalibotan? Hinumdomi nga kanunayng ilhon ni Jehova ang iyang matinumanong mga alagad, ug sagad gantihan niya sila sa wala damhang mga paagi. Kinsay nasayod kon unsang wala damhang mga panalangin ang naghulat nato sa umaabot? Pero karon, samtang atong lahutayon ang mga kalisod ug pagsulay niining daotang kalibotan, atong hinumdoman nga kining kalibotana mahanaw ra. (1 Juan 2:17) Ang atong mahigugmaong Amahan, si Jehova, ‘dili kay dili-matarong nga kalimtan ang atong buhat ug ang gugma nga atong gipakita alang sa iyang ngalan.’​—Heb. 6:10. w18.07 11 ¶17-18

Si Jesus nabalaka bahin sa panaghiusa panahon sa iyang kataposang panihapon uban sa iyang mga apostoles. Sa iyang pag-ampo uban nila, iyang gisulti nga gusto niyang magkahiusa ang tanan niyang tinun-an, sama nga siya ug ang iyang Amahan usa. Ang ilang panaghiusa mahimong lig-on ug klarong pamatuod nga gipadala ni Jehova si Jesus dinhi sa yuta aron buhaton ang kabubut-on sa Diyos. Gugma ang mahimong ilhanan sa tinuod nga mga tinun-an ni Jesus, nga makatabang aron magkahiusa sila. (Juan 13:34, 35) Masabtan nato kon nganong gipasiugda ni Jesus ang panaghiusa. Iyang namatikdan nga wala kaayo magkahiusa o magkasinabot ang mga apostoles, sama niadtong sa kataposan niyang panihapon uban nila. Sama sa nahitabo kaniadto, naglalis sila “bahin sa kon kinsa kanila ang labing dako.” (Luc. 22:24-27; Mar. 9:33, 34) Sa laing higayon, si Santiago ug Juan mihangyo kang Jesus nga ihatag kanila ang prominenteng posisyon tupad niya sa iyang Gingharian.​—Mar. 10:35-40. w18.06 8 ¶1-2

Gusto ni Jehova nga ang mga magtiayon maghigugmaay pag-ayo sa tibuok nilang kinabuhi. (Mat. 19:3-6) Ang pagpanapaw maoy usa sa mga krimen nga nagpakitag kawalay gugma. Mao diay nga ang ikapito sa 10 ka Sugo nagdili sa pagpanapaw. (Deut. 5:18) Kini maoy sala “batok sa Diyos” ug dili gyod maayong buhaton ngadto sa kapikas. (Gen. 39:7-9) Ang giluiban tingali mag-antos sa kasakit sa taas nga panahon. Si Jehova mahunahunaon sab sa kaayohan sa mga anak. Gisugo niya ang mga ginikanan sa pagtagana sa ilang mga anak sa pisikal ug espirituwal nga panginahanglan niini. Maningkamot ang mga ginikanan sa pagtabang sa ilang mga anak nga apresyahon ang Balaod ni Jehova ug higugmaon siya. (Deut. 6:6-9; 7:13) Ang mga ginikanan angayng mag-isip sa mga anak, dili ingong usa ka butang nga puwede rang pasagdan o abusohan, kondili ingong panulondon​—usa ka regalo gikan kang Jehova nga angayng mahalon.​—Sal. 127:3. w19.02 21 ¶5, 7

Si Job nakapabiling matinumanon pinaagi sa paghunahuna nga panalanginan siya sa Diyos. Masaligon siya nga importante sa Diyos ang iyang pagkamatinumanon. Bisan sa mga pagsulay, masaligon si Job nga panalanginan ra siya ni Jehova. Ang maong pagsalig nakatabang gyod niya nga magmatinumanon. Nalipay kaayo si Jehova sa pagkamatinumanon ni Job maong dagaya Niyang gipanalanginan siya bisag dili hingpit! (Job 42:12-17; Sant. 5:11) Sa umaabot, makadawat si Job ug mas nindot nga mga panalangin. Ang atong Diyos wala mausab. (Mal. 3:6) Kon atong hinumdoman nga importante niya ang atong pagkamatinumanon, magpabiling buhi sa atong kasingkasing ang atong paglaom sa usa ka nindot nga kaugmaon. (1 Tes. 5:8, 9) Usahay, bation seguro nimo nga ikaw ray nagmatinumanon, pero wala gyod ka mag-inusara. Kauban nimo ang milyonmilyong matinumanon sa tibuok kalibotan. Maapil sab ka sa grupo sa mga lalaki ug babaye nga nagmatinumanon kaniadto, bisag nag-atubang sa kamatayon.​—Heb. 11:36-38; 12:1. w19.02 7 ¶15-16

Dihang molabay na ang Memoryal, maayong pangutan-on nato ang kaugalingon: ‘Sa unsang paagi masundog pa nako si Jesus sa pagpakitag gugma? Mas naghunahuna ba ko sa panginahanglan sa mga igsoon kay sa akoa? Mas labaw ba ang akong gidahom sa mga igsoon kay sa ilang mahimo, o gikonsiderar nako ang ilang mga limitasyon?’ Hinaot sundogon nato kanunay si Jesus ug magpakitag “pagbati alang sa isigkaingon.” Sa dili madugay, hunongon na ang paghandom sa kamatayon sa Kristo. Dihang “moabot” si Jesus panahon sa dakong kasakitan, tigomon niya didto sa langit ang nahibilin sa “mga pinili,” ug ang Memoryal dili na saulogon. (1 Cor. 11:26; Mat. 24:31) Bisag dili na saulogon ang Memoryal, makaseguro ta nga hinumdoman gihapon sa katawhan ni Jehova kanang simpleng okasyon ingong simbolo sa dili hitupngang pagkamapainubsanon, kaisog, ug gugma nga gipakita sa usa ka tawo. w19.01 25 ¶17-19

Konsideraha kon sa unsang paagi ang pisikal nga kahimsog mag-ilustrar sa kaimportante sa pagpabiling himsog sa espirituwal. Una, aron makapabiling himsog, kinahanglan tang mokaon ug sustansiyadong pagkaon ug mag-ehersisyo pirme. Sa susama, aron makapabiling himsog sa espirituwal, kinahanglan tang mokaon ug makapalig-on sa espirituwal nga pagkaon ug kanunay natong ipakita nga may pagtuo ta kang Jehova. Apil niana ang pagpadapat sa atong nakat-onan ug pagsulti bahin sa atong pagtuo. (Roma 10:8-10; Sant. 2:26) Ikaduha, himsog tingali tang tan-awon, pero masakiton diay. Sa samang paagi, base sa atong espirituwal nga rutina, maghunahuna tingali tang lig-on ang atong pagtuo, pero basig nagsugod na pagtubo ang sayop nga mga tinguha. (1 Cor. 10:12; Sant. 1:14, 15) Angay natong hinumdoman nga gustong impluwensiyahan ni Satanas ang atong kasingkasing. w19.01 15 ¶4-5

Mahimong pangutan-on nato ang kaugalingon: ‘Gibuhat ba sab nako nâ? Gisundog ba nako ang maluluy-ong Samarianhon?’ (Luc. 10:30-35) ‘Mas makapakita ba kog kaluoy ug makahimog maayong mga buhat para niadtong nag-antos? Pananglitan, makatabang ba ko sa mga igsoong tigulang, biyuda, ug niadtong dili Saksi ang ginikanan? Puwede ba nakong hupayon ang nagmagul-anon?’ (1 Tes. 5:14; Sant. 1:27) Kon maluluy-on ta sa uban, matagamtam nato ang kalipay sa paghatag. Dugang pa, kabalo ta nga makapalipay ta kang Jehova. (Buh. 20:35; Heb. 13:16) Bahin sa usa nga maluluy-on, si Haring David miingon: “Si Jehova magabantay kaniya ug magatipig kaniya nga buhi. Siya ipahayag nga malipayon dinhi sa yuta.” (Sal. 41:1, 2) Kon magmaluluy-on ta, kaluy-an pod ta ni Jehova, nga moresultag walay kataposang kalipay.​—Sant. 2:13. w18.09 19 ¶11-12

Usa ka matinumanong sister nga si Yoshiko ang nakadawat ug dili maayong balita. Gitagalan siya sa iyang doktor ug pipila na lang ka bulan. Unsa may iyang reaksiyon? Si Yoshiko nakahinumdom ug usa ka paboritong teksto, ang teksto karong adlawa. Dayon, kalmado niyang giingnan ang doktor nga wala siya mahadlok, kay gigunitan ni Jehova ang iyang kamot. Ang makapahupayng mensahe niana nga teksto nakatabang sa atong minahal nga sister nga bug-os mosalig kang Jehova. Makatabang pod nâ nato sa pagpabiling kalmado dihang mag-atubang ug grabeng kalisdanan. Sa sinugdan, gipasulat ni Jehova kang Isaias ang maong mensahe aron hupayon ang mga Hudiyo nga mabihag unya sa Babilonya. Pero, gipasulat nâ ni Jehova dili lang para sa nabihag nga mga Hudiyo kondili sa tanan pod niyang katawhan hangtod karon. (Isa. 40:8; Roma 15:4) Nagkinabuhi ta sa “makuyaw nga mga panahong lisod sagubangon,” ug mas gikinahanglan nato ang pagdasig diha sa basahon sa Isaias.​—2 Tim. 3:1. w19.01 2 ¶1-2

Sa maong panagbulag, silang duha magtiayon gihapon ug, bisag magbulag silag puyo, makaatubang gihapon silag mga problema. Si Pablo naghatag niini nga rason kon nganong dili magbulag: “Ang bana nga dili-magtutuo ginabalaan labot sa iyang asawa, ug ang asawa nga dili-magtutuo ginabalaan labot sa igsoon nga lalaki; kay kon wala pa, ang inyong mga anak sa pagkatinuod mahugaw, apan karon sila mga balaan.” (1 Cor. 7:14) Daghang maunongong Kristohanon ang wala makigbulag sa ilang dili magtutuong kapikas bisag lisod kaayo ang kahimtang. Makapamatuod sila nga maayo gyod nga ila ning gihimo ilabina dihang na-Saksi ra ang ilang kapikas. (1 Cor. 7:16; 1 Ped. 3:1, 2) Sa tibuok kalibotan karon, daghan ang malamposong kaminyoon diha sa kongregasyon. Lagmit daghan kag makita nga malipayong magtiayon diha sa inyong kongregasyon diin ang matag usa maunongon ug nahigugma sa ilang kapikas. Silang tanan nagpakita nga puwedeng mahimong dungganon ang kaminyoon.​—Heb. 13:4. w18.12 14 ¶18-19

Ang Eden nagpasabot ug “Kalipay,” ug makapalipay gyod ang maong tanaman. Dihay daghang pagkaon, nindot nga talan-awon, ug makapalipayng pagpakig-uban sa daghang mananap. (Gen. 1:29-31) Ang Hebreohanong pulong para sa “tanaman” gihubad ug pa·raʹdei·sos sa Grego. Ang Cyclopaedia ni M’Clintock ug Strong nag-ingon bahin sa pa·raʹdei·sos: “Usa ka lapad, luag nga parke, nga giprotektahan batok sa kadaot, pero may natural nga kanindot, tag-as nga kahoy, nga daghan niana mamunga, tin-awng mga sapa, diin sa daplin niini nagsuroysuroy ang dagkong panon sa antelope o karnero​—mao ni ang mosantop sa hunahuna sa usa ka Gregong biyahedor.” (Itandi ang Genesis 2:15, 16.) Gibutang sa Diyos si Adan ug Eva niana nga paraiso, pero nahimo silang dili takos nga mopuyo niana kay misupak sila sa Diyos. Busa, sila ug ang ilang mga anak wala na makapuyo sa Paraiso. (Gen. 3:23, 24) Pero, bisag wala nay tawong nagpuyo, ang maong tanaman lagmit nagpabilin hangtod sa Lunop sa adlaw ni Noe. w18.12 3-4 ¶3-5

Ang mga ginikanan naningkamot sa pagtudlog maayong pamatasan sa ilang mga anak. Kon modesisyon sila nga sundon ang maayong pamatasan nga gitudlo sa ilang ginikanan, lagmit mas makahimo silag mga desisyon nga dili nila basolan sa ulahi. Ingong resulta, malikayan nila ang daghang problema ug kabalaka. Parehas sa maayong ginikanan, gusto gyod ni Jehova nga magmalamposon ang iyang mga anak. (Isa. 48:18) Busa, naghatag siyag simpleng mga prinsipyo bahin sa maayong panggawi ug pagpakiglabot sa uban. Gidasig ta niya sa pagsundog sa iyang panghunahuna ug mga prinsipyo. Imbes pugngan ta, makatabang ni nato nga mangatarongan sa hustong paagi. (Sal. 92:5; Prov. 2:1-5; Isa. 55:9) Makatabang ni nato sa paghimog mga desisyon nga makapalipay ug sa samang higayon makapauswag sa atong pagkatawo. (Sal. 1:2, 3) Oo, ang pagsundog sa panghunahuna ni Jehova makaayo gyod! w18.11 19-20 ¶7-8

Aron makapadayon sa paglakaw sa kamatuoran, kinahanglang dili ta magpapresyur sa uban. Dihang misugod ta sa paglakaw sa kamatuoran, nausab ang atong relasyon sa dili Saksing mga kauban ug membro sa pamilya. Ang pipila morespeto sa atong tinuohan pero ang uban tingali mosupak. Tingali presyuron ta sa mga membro sa pamilya, kauban sa trabaho, ug eskolmet nga moapil sa ilang mga selebrasyon. Unsay atong himoon aron dili ta madala sa presyur nga moapil sa mga kostumbre ug selebrasyon nga gidumtan ni Jehova? Mahimo nato kana kon kanunay natong hunahunaon ang panglantaw ni Jehova niana nga mga buhat. Makatabang sab ang pag-research diha sa atong mga publikasyon kon unsay sinugdanan sa maong mga selebrasyon. Dihang pamalandongon nato ang Kasulatanhong mga rason kon nganong dili ta magselebrar niana, kombinsido ta nga kita nagalakaw sa paagi nga “dalawaton sa Ginoo.” (Efe. 5:10) Kon mosalig ta kang Jehova ug sa iyang Pulong, dili ta ‘mangurog tungod sa mga tawo.’​—Prov. 29:25. w18.11 11 ¶10, 12

Sa dihang mag-atubang tag kalit nga mga kausaban, mahimong mabalaka ta pag-ayo sa umaabot. Puwede unta kining mahitabo kang Jose. Hinunoa, gibuhat niya ang kinamaayohan nga iyang mahimo sa iyang kahimtang, busa gipanalanginan siya ni Jehova. Bisag binilanggo, si Jose naningkamot sa pagtuman bisan unsay ipatrabaho kaniya sa pangulong opisyal, sama sa iyang gibuhat dihang nagtrabaho siya sa panimalay ni Potipar. (Gen. 39:21, 22) Sama ni Jose, makasinati sab tingali tag kahimtang nga dili gyod nato makontrolar. Pero, kon magmapailobon ta ug maningkamot nga himoon ang atong kinamaayohan sa atong kahimtang, panalanginan ta ni Jehova. (Sal. 37:5) Tinuod, may mga panahon tingali nga ‘maglibog’ ta, pero dili ta mobating sama sa giingon ni apostol Pablo, nga “bug-os . . . walay kalingkawasan.” (2 Cor. 4:8) Mahitabo kana sa atong kahimtang, ilabina kon magpokus ta sa atong ministeryo. w18.10 29 ¶11, 13

Unsay imong bation kon ang tawo nga imong nailhan ug gitahod nalimot sa imong ngalan o, mas grabe pa, wala gani makaila nimo? Makapaguol gyod kana. Ngano? Tungod kay natural nga tinguha sa matag usa kanato nga dawaton sa uban. Pero gusto nato nga dili lang basta mailhan ta sa uban. Gusto natong mahibalo sila kon kinsa ta ug kon unsay atong nalampos. (Num. 11:16; Job 31:6) Pero sama sa ubang natural nga mga tinguha, ang atong tinguha nga apresyahon posibleng mahimong dili balanse, nga maapektohan sa atong pagkadili-hingpit. Tungod niini, tinguhaon nato ang sayop nga klase sa pag-ila. Sugnoran sa kalibotan ni Satanas ang atong tinguha nga mahimong inila ug importante. Kon mahitabo kana, dili na nato mahatag sa atong langitnong Amahan, si Jehova nga Diyos, ang pag-ila ug pagsimba nga takos kaniya.​—Pin. 4:11. w18.07 7 ¶1-2

Busa dili ta matingala kon si Satanas ug ang iyang mga demonyo mag-impluwensiya niadtong tag-as ug posisyon sa ‘pagsultig bakak.’ (1 Tim. 4:1, 2) Ang mga lider sa relihiyon nga namakak ilabinang manubag kay gipameligro nila ang kaugmaon niadtong motuo sa ilang bakak. Kon ang usa ka tawo modawat sa bakak nga pagtulon-an ug maghimog butang nga gidumtan sa Diyos, posible nga dili na siya mabuhi sa walay kataposan. (Os. 4:9) Si Jesus nahibalo nga nanglimbong ang mga lider sa relihiyon kaniadto. Giprangkahan niya sila: “Alaot kamo, mga eskriba ug mga Pariseo, mga salingkapaw! tungod kay ginatadlas ninyo ang dagat ug ang mamalang yuta aron makahimog usa ka kinabig, ug sa dihang siya mahimo na, inyong ginahimo siya nga doble pa kaangayan nga mahiagom sa Gehenna [walay kataposang kalaglagan] kay kaninyo.” (Mat. 23:15) Gisaway pag-ayo ni Jesus ang maong bakakong mga lider. Tinuod gyod nga ‘gikan sila sa ilang amahan nga Yawa, nga usa ka mamumuno.’​—Juan 8:44. w18.10 7 ¶5-6

Unsay gipasabot ni Jesus? Siya nagpadayon: “Pagmaya ug lukso sa kalipay, sanglit dako ang inyong ganti sa mga langit; kay nianang paagiha sila naglutos sa mga manalagna nga nauna kaninyo.” (Mat. 5:12) Dihang ang mga apostoles gibunalan ug gipahunong sa pagsangyaw, “sila milakaw gikan sa atubangan sa Sanhedrin, nga nagmaya.” Siyempre, wala nila ikalipay ang pagbunal kanila. Pero sila nagmalipayon “kay giisip sila nga takos pakaulawan tungod sa . . . ngalan [ni Jesus].” (Buh. 5:41) Karon, ang katawhan ni Jehova nakalahutay sab uban ang kalipay dihang sila nag-antos tungod sa ngalan ni Jesus o dihang sila nag-atubag kalisdanan. (Sant. 1:2-4) Parehas sa mga apostoles, dili nato ikalipay ang bisan unsang pag-antos. Pero kon magmatinumanon ta kang Jehova panahon sa kalisdanan, tabangan ta niya nga makalahutay uban ang kaisog. Kon maangkon nato ang pabor sa “malipayong Diyos,” magmalipayon ta bisan pa sa paglutos o pagsupak sa pamilya.​—1 Tim. 1:11. w18.09 21 ¶18-20

Kay daghan niining ‘makuyaw nga mga panahon’ ang nag-antos sa lainlaing kagrabehon sa kagul-anan, daghan ang morag mosurender na. (2 Tim. 3:1-5) Gibanabana nga kapig 800,000 ka tawo ang maghikog kada tuig​—usa sa matag 40 segundos. Ikasubo nga gihimo sab nâ sa pipila ka igsoon. Bisan tingalig ang atong mga igsoon wala maghunahunang mosurender, daghan ang nagmagul-anon ug kinahanglang palig-onon pinaagi sa gugma. Ang pipila gilutos ug gibugalbugalan. Ang uban gisaway o gilibak diha sa ilang trabahoan. O kaha gikapoy sila tungod sa pag-obertaym o sa walay kahumanang mga deadline. Ang uban usab naluya tungod sa mga problema sa pamilya, tingali gilutos sa dili Saksing bana. Ingong resulta, daghan ang naluya sa pisikal ug emosyonal. w18.09 13 ¶3, 5

Ang Kristohanong mga ginikanan nakigkooperar kang Jehova dihang tabangan nila ang ilang mga anak sa paghimog tumong sa pag-alagad. Daghang ginikanan ang nagbuhat ana. Tungod niini, ang ilang mga anak bug-os panahong nag-alagad, bisan sa mga lugar nga layo sa ilaha. Ang pipila mga misyonaryo; ang uban nagpayunir sa mga lugar nga nagkinahanglag dugang magsasangyaw; ug ang uban nag-alagad sa Bethel. Tungod sa gilay-on, dili na tingali pirmeng magkauban ang pamilya. Pero, ang nagsakripisyo sa kaugalingong mga ginikanan modasig sa ilang mga anak sa paglahutay diha sa ilang asaynment. Ngano? Tungod kay malipay ug matagbaw gyod sila sa pagkahibalo nga giuna sa ilang mga anak ang Gingharian. Gibati tingali sa daghan nila ang gibati ni Ana, kinsa “nagpahulam” sa iyang anak nga si Samuel kang Jehova. Isipon ni sa maong mga ginikanan ingong bililhong pribilehiyo. Ug mao gyod nay gusto nila.​—1 Sam. 1:28. w18.08 24 ¶4

Wala moingon si Jesus nga imposible kini. Siya miingon usab: “Malipayon kamong mga kabos, tungod kay inyoha ang gingharian sa Diyos.” (Luc. 6:20) Pero wala ni magpasabot nga naminaw kang Jesus ang tanang pobre ug nahatagan silag espesyal nga panalangin. Daghang pobre ang wala modawat kang Jesus. Mao ni ang punto: Dili nato mahukman ang relasyon sa usa ngadto kang Jehova base sa iyang kabtangan. Panalangin gyod nga daghan tag mga igsoon, dato ug pobre, nga nahigugma ug nag-alagad kang Jehova sa tibuok kasingkasing. Ang Kasulatan nagsugo sa mga dato nga “magbutang sa ilang paglaom, dili sa walay-kasegurohang bahandi, kondili sa Diyos.” (1 Tim. 6:17-19) Sa samang higayon, ang Bibliya nagtambag sa tanang alagad sa Diyos, dato ug pobre, nga mag-amping nga dili mahigugma sa kuwarta. (1 Tim. 6:9, 10) Oo, kon buksan nato ang atong mata ug sundogon ang pagtan-aw ni Jehova sa atong mga igsoon, dili ta matental nga hukman sila base lang sa kadaghan o kagamay sa ilang kabtangan. w18.08 10-11 ¶11-12

Gusto gyod natong ipakita ang atong pagkamapasalamaton kang Jehova sa pribilehiyo nga mahimong iyang katawhan. Atong nakita nga maalamon gyong ilhon nga siyay tag-iya nato pinaagi sa kinabubut-ong pagpahinungod sa atong kinabuhi kaniya. Atong gisuklan ang pagkadaotan. Ug atong gihigugma ug gitahod ang atong mga igsoon kay gipanag-iya pod sila ni Jehova. (Roma 12:10) Ang Bibliya nagsaad: “Si Jehova dili motalikod sa iyang katawhan.” (Sal. 94:14) Lig-on ni nga garantiya bisag mag-antos pa tag katalagman. Bisan ang kamatayon dili makapugong sa gugma ni Jehova kanato. (Roma 8:38, 39) “Kon kita mabuhi ug kon kita mamatay, kita iya ni Jehova.” (Roma 14:8) Naghinamhinam ta sa panahon nga banhawon ni Jehova ang tanan niyang maunongong higala nga namatay. (Mat. 22:32) Bisan karon, atong gitagamtam ang daghang panalangin. Sama sa giingon sa Bibliya, “malipayon ang nasod kansang Diyos mao si Jehova, ang katawhan nga gipili niya ingon nga iyang panulondon.”​—Sal. 33:12. w18.07 26 ¶18-19

Gibati sa uban nga kay personal nga butang ang pagpili diha sa pipila ka bahin sa kinabuhi, sama sa edukasyon, trabaho, o karera, kinahanglang may kagawasan silang mopili sa ilang gusto basta itugot sa ilang konsensiya. Tingali, naa sa ilang hunahuna ang giingon ni Pablo sa mga Kristohanon sa Corinto: “Nganong ang akong kagawasan hukman man pinaagi sa tanlag sa laing tawo?” (1 Cor. 10:29) Oo, may kagawasan ta sa paghimo niining personal nga pagpili, pero kinahanglan pod natong hinumdoman nga dili bug-os ang atong kagawasan ug ang tanan natong desisyon may mga resulta. Tungod niana, gisugdan ni Pablo ang iyang gisulti sa mga pulong sa teksto niining adlawa. Makatabang nâ nato sa pagsabot nga dihang gamiton nato ang atong kagawasan sa tanang bahin sa atong kinabuhi, dunay mas importanteng mga butang nga angayng konsiderahon kay sa atong gusto. w18.04 10 ¶10

Ang mga Kristohanon karon posibleng nagsubay sa daotang dalan bisag nag-angkong nagsimba kang Jehova. (Jud. 11) Pananglitan, magsige tingali siyag hunahuna bahin sa imoral nga tinguha, kahakog, o pagdumot ngadto sa isigka-Kristohanon. (1 Juan 2:15-17; 3:15) Ang maong panghunahuna moresulta sa pagpakasala. Sa samang higayon, siya tingali aktibo gihapon sa ministeryo ug regular sa mga tigom. Ang uban wala tingali mahibalo sa atong panghunahuna o binuhatan, pero si Jehova nakakita sa tanan ug nahibalo kon kinasingkasing ba tang nagdapig niya. (Jer. 17:9, 10) Dili dayon ta talikdan ni Jehova. Dihang ang usa mibiya sa Diyos, giawhag siya ni Jehova: “Balik kanako.” Ilabina dihang ginasuklan nato ang kahuyangan, gusto ni Jehova nga padayon natong suklan ang pagkadaotan. (Isa. 55:7) Kon himoon nato nâ, modapig siya nato pinaagi sa paghatag ug espirituwal, emosyonal, ug pisikal nga kusog aron ‘mabuntog,’ o masuklan, nato ang makasasalang tinguha.​—Gen. 4:7. w18.07 18 ¶5-6