Mayo

Sa di pa dugayng katuigan, daghan ang namakwet sa laing nasod. Nganong dili nimo tun-an ang timbaya sa pinulongan nga komong ginasulti sa mga bakwet sa inyong lugar? Dugang pa, nganong dili nimo tun-an ang pipila ka ekspresyon nga makapainteres nila? Dayon, puwede nimong ipakita nila ang jw.org ug ang lainlaing video ug publikasyon diha sa ilang pinulongan. Si Jehova mahigugmaong nagtagana sa Kinabuhi ug Ministeryo nga Tigom aron mahimo tang mas epektibo sa pagsangyaw. Ang praktikal nga instruksiyon gikan niini nga tigom makahatag natog dugang kompiyansa sa pagbalikduaw ug pag-Bible study. Mga ginikanan, tabangi ang inyong mga anak nga mapalamdag ang ilang kahayag pinaagi sa pagtudlo nila sa pagkomento sa ilang kaugalingong pulong. Ang ilang simple ug kinasingkasing nga komento makatabang sa mga interesado nga mailhan ang kamatuoran.​—1 Cor. 14:25. w18.06 22-23 ¶7-9

Maayong hinumdoman nga dihay higayon nga kitang tanan “estranyo,” o langyaw, ug dili suod sa Diyos. (Efe. 2:12) Pero gikabig ta ni Jehova “pinaagi sa mga pisi sa gugma.” (Os. 11:4; Juan 6:44) Ug gidawat ta ni Kristo. Samag giablihan niya ang pultahan aron mahimo tang bahin sa pamilya sa Diyos. Kay mahigugmaon tang gidawat ni Jesus bisag dili ta hingpit, dili gyod ta angayng maghunahuna nga isalikway ang uban! Seguradong mograbe pa ang pagkabahinbahin, diskriminasyon, ug pagdumot samtang nagkaduol ang kataposan niining daotang sistema. (Gal. 5:19-21; 2 Tim. 3:13) Pero ingong mga alagad ni Jehova, mangayo ta sa iyang kaalam. Kini walay gidapigan ug makapauswag sa kalinaw. (Sant. 3:17, 18) Malipay ta sa pagpakighigala niadtong tagalaing nasod, sa pagdawat sa lainlaing kultura, ug tingali sa pagkat-on pa gani sa ilang pinulongan. Kon buhaton nato ni, ang kalinaw moagos samag suba, ug ang hustisya samag balod sa dagat.​—Isa. 48:17, 18. w18.06 12 ¶18-19

Ang Romanong sundalo nga wala magsandalyas dili andam moadto sa panggubatan. Ang iyang sandalyas may tulo ka sapaw sa panit, busa lig-on kaayo ni. Ug kini komportable sab maong ang sundalo makalakaw nga may kompiyansa ug dili maeslayd. Samtang ang literal nga sandalyas sa mga sundalo makatabang nila sa pagpakiggubat, ang simbolikong sandalyas sa mga Kristohanon makatabang nila sa pagdala sa mensahe sa kalinaw. (Isa. 52:7; Roma 10:15) Bisan pa niana, nagkinahanglag kaisog ang pagsangyaw. “Mahadlok kong mosangyaw sa akong mga klasmet,” matod sa 20 anyos nga si Bo. “Morag maulaw ko. Ambot nganong gibati to nako. Karon, ganahan na kong mosangyaw sa akong mga kaedad.” Daghang batan-on ang nag-ingon nga kon andam silang mosangyaw, mas komportable silang buhaton kana. w18.05 29 ¶9-11

Giingnan ni Jesus ang iyang mga apostoles: “Ihatag ko kaninyo ang akong kalinaw.” (Juan 14:27) Sa unsang paagi ang maong regalo​—iyang kalinaw​—makatabang nato sa pagpamunga? Samtang magpadayon ta sa pagsangyaw, atong matagamtam ang dumalayong kalinaw kay nahibalo ta nga giuyonan ta ni Jehova ug Jesus. (Sal. 149:4; Roma 5:3, 4; Col. 3:15) Human moingon si Jesus nga gusto niyang “mabug-os” ang kalipay nga natagamtam sa iyang mga apostoles, iyang gisaysay nila ang kaimportante sa gugma nga andam mosakripisyo. (Juan 15:11-13) Dayon, siya miingon: “Gitawag ko kamong mga higala.” Pagkabililhong regalo nga mahimong higala ni Jesus! Unsay kinahanglang buhaton sa mga apostoles aron magpabiling iyang mga higala? Kinahanglan silang ‘magpadayon sa pagpamunga.’ (Juan 15:14-16) Mga duha ka tuig unâ pa niana, si Jesus nagsugo sa iyang mga apostoles: “Sa inyong pagpanglakaw, pagwali, nga magaingon, ‘Ang gingharian sa mga langit haduol na.’” (Mat. 10:7) Busa sa gabii una sa iyang kamatayon, iyang gidasig sila sa paglahutay sa buluhaton nga ilang gisugdan.​—Mat. 24:13; Mar. 3:14. w18.05 20-21 ¶15-16

Mga batan-on, magmadeterminado nga ipokus ang inyong kinabuhi sa pag-alagad kang Jehova. Kini nagpasabot sa pag-una sa espirituwal nga mga tumong. Ang ubang batan-on lagmit nagpokus sa paglipaylipay, ug basin hagaron kang moapil nila. Ngadtongadto, kinahanglan gyod nimong ipakita nga determinado kang tumanon ang imong gipiling tumong. Ayaw kalimti ang imong tumong dihang presyuron. Naay daghang paagi aron dili ka madala sa presyur. Pananglitan, likayi ang mga situwasyon nga matental ka. (Prov. 22:3) Ug pahinumdomi ang kaugalingon sa pait nga mga resulta kon sundogon ang daotang panggawi sa uban. Makatabang sab kon dawaton nimo nga nagkinahanglan kag tambag. Kon mapainubsanon ka, paminawon nimo ang isulti sa imong ginikanan ug ubang hamtong sa espirituwal diha sa kongregasyon. (1 Ped. 5:5, 6) Mapainubsanon ba nimong dawaton ang maayong tambag? w18.04 28-29 ¶14-16

Sa iyang mensahe sa pipila ka kongregasyon sa Asia Minor, gipakita ni Jesus ang iyang apresasyon sa nahimo sa iyang mga sumusunod. Pananglitan, gisugdan niya ang iyang mensahe sa kongregasyon sa Tiatira sa pag-ingon: “Nahibalo ako sa imong mga buhat, ug sa imong gugma ug pagtuo ug ministeryo ug paglahutay, ug nga ang imong ulahing mga buhat mas labaw pa kay sa mga nahauna.” (Pin. 2:19) Gihisgotan ni Jesus ang ilang pag-uswag. Gidayeg pod niya sila sa ilang maayong mga hiyas nga nagpalihok nila sa pagbuhat ug maayo. Bisag kinahanglan niyang tambagan ang pipila diha sa Tiatira, iya gihapong gisugdan ug gitapos ang iyang mensahe pinaagig pagdasig. (Pin. 2:27, 28) Hunahunaa ang awtoridad ni Jesus ingong ulo sa kongregasyon. Dili siya kinahanglang magpasalamat sa atong nahimo para niya. Pero, gipakita gihapon niya ang iyang apresasyon. Maayo gyod siyang ehemplo para sa mga ansiyano! w19.02 16 ¶10

Ang unang siglong nagamandong lawas nagdasig sa mga nagapanguna ug sa mga Kristohanon sa katibuk-an. Gipadala nila ang duha sa ilang membro, si Pedro ug Juan, sa pag-ampo para sa bag-ong mga igsoon aron makadawat kini sa balaang espiritu. (Buh. 8:5, 14-17) Seguradong nadasig si Felipe ug ang bag-ong mga igsoon tungod sa pagpaluyo sa nagamandong lawas! Karon, ang Nagamandong Lawas sa mga Saksi ni Jehova nagdasig sa mga Bethelite, sa ubang special full-time servant, ug sa pagkatinuod, sa tanang tinuod nga Kristohanon sa tibuok kalibotan. Ug ang resulta sama pod sa unang siglo​—nagmalipayon tungod sa maong pagdasig! Dugang pa, niadtong 2015 gitagana sa Nagamandong Lawas ang brosyur nga Balik Kang Jehova, nga nakapadasig gyod sa daghan sa tibuok kalibotan. w18.04 19 ¶18-20

Ang mga tawo maghunahuna tingali nga kon mas daghan silag kagawasan, mas maayo ang ilang kahimtang. Pero sa tinuod lang, ang kagawasan nga walay limitasyon samag duhay sulab nga espada. Hadlok hunahunaon ang kahimtang sa kalibotan kon walay mga limitasyon. Tungod niini, ang The World Book Encyclopedia nag-ingon: “Ang mga balaod sa matag organisadong katilingban nagpatunghag komplikado nga sistema sa balanseng mga kagawasan ug restriksiyon.” Husto gyod ang pulong nga “komplikado” para ana. Hunahunaa lang kon unsa ka daghang libro bahin sa balaod ang gisulat sa tawo, ug kon unsa ka daghang abogado ug huwes ang gikinahanglan sa pagpatin-aw ug pagpatuman niana. Aron mabatonan ang tinuod nga kagawasan, si Jesus naghisgot ug duha ka kinahanglanon: Una, dawaton ang kamatuoran nga iyang gitudlo, ug ikaduha, mahimong iyang tinun-an. Ang pagbuhat niana makahatag ug tinuod nga kagawasan. Pero kagawasan gikan sa unsa? Si Jesus nagpadayon: “Ang matag mamumuhat sa sala maoy ulipon sa sala. . . . Kon ang Anak magpagawas kaninyo, kamo tinuod nga mahigawas.”​—Juan 8:34, 36. w18.04 6-7 ¶13-14

Ganahan tang makauban ang mga tawo nga mahunahunaon sa pagbati ug kaayohan sa uban. Naningkamot sila nga ibutang ang kaugalingon sa atong situwasyon, aron masabtan kon unsay atong gihunahuna ug gibati. Makita nila ang atong panginahanglan ug motabang sila bisag wala pa gani ta mohangyo nila. Maapresyar nato ang mga tawo nga nagpakita natog “simpatiya.” Ingong mga Kristohanon, gusto natong magpakitag empatiya, o simpatiya. Pero dili ni sayon. Ngano? Ang usa ka rason mao, dili ta hingpit. (Roma 3:23) Busa kinahanglan natong suklan ang natural nga tendensiya nga maghunahuna lang sa kaugalingon. Dugang pa, ang pipila nato malisdan tingali sa pagpakitag empatiya tungod sa pagpadako kanato o sa atong kaagi. Ug puwede tang maimpluwensiyahan sa panghunahuna sa mga tawo sa atong palibot. Niining kataposang mga adlaw, daghan ang dili mahunahunaon sa pagbati sa uban. Sila ‘mahigugmaon sa kaugalingon.’ (2 Tim. 3:1, 2) Pero mapauswag nato ang pagpakitag simpatiya kon sundogon nato si Jehova ug ang iyang Anak, si Jesu-Kristo. w19.03 14 ¶1-3

Ang kataposan sa 10 ka Sugo nagdili sa pagtinguha sa dili ato. (Deut. 5:21; Roma 7:7) Si Jehova naghatag niini nga sugo sa pagtudlog importanteng leksiyon​—kinahanglang ampingan sa iyang katawhan ang ilang kasingkasing, sa ato pa, ang ilang hunahuna ug pagbati. Nahibalo siya nga ang daotang mga buhat magsugod sa daotang hunahuna ug pagbati. Pananglitan, si Haring David nakahimo ana nga sayop. Sa katibuk-an, siya usa ka maayong tawo. Pero dihay higayon nga gitinguha niya ang asawa sa lain. Ang iyang tinguha miresulta sa pagpakasala. (Sant. 1:14, 15) Siya nanapaw, misulay sa paglimbong sa bana sa babaye, ug dayon nagpapatay niini. (2 Sam. 11:2-4; 12:7-11) Dili lang panggawas nga panagway ang makita ni Jehova. Iya pong makita kon unsay naa sa atong kasingkasing. (1 Sam. 16:7) Walay hunahuna, pagbati, ug buhat nga matago gikan kaniya. Siya nagpokus sa atong maayong mga hiyas ug nagdasig nato sa pagpauswag niana. Pero gusto niya nga atong ilhon ug kontrolahon ang daotang panghunahuna sa dili pa ni moresultag sayop nga buhat.​—2 Cron. 16:9; Mat. 5:27-30. w19.02 21 ¶9; 22 ¶11

Ang Bibliya nag-ingon nga si Moises “ang labing maaghop sa tanang tawo sa ibabaw sa nawong sa yuta.” (Num. 12:3) Nagpasabot ba ni nga siya huyang, maglisod pagdesisyon, ug dili ganahag komprontasyon? Mao tingali nay mahunahunaan sa uban kon maghisgot ug tawong aghop. Pero sayop ang maong ideya. Si Moises lig-on, determinado, ug maisogon nga alagad sa Diyos. Sa tabang ni Jehova, iyang giatubang ang gamhanang magmamando sa Ehipto, gipangulohan ang lagmit 3,000,000 ka tawo agi sa desyerto, ug gitabangan ang nasod sa Israel sa pagpildi sa mga kaaway. Wala ta mag-atubang ug mga problema nga parehas kang Moises, pero kada adlaw makaatubang tag mga tawo o situwasyon diin lisod ipakita ang kaaghop. Bisan pa niana, duna tay lig-ong rason sa pag-ugmad niining hiyasa. Si Jehova nagsaad nga “ang mga maaghop magapanag-iya sa yuta.” (Sal. 37:11) Matawag ba nimo ang kaugalingon nga aghop? Mao ba sab nay hunahuna sa uban nimo? w19.02 8 ¶1-2

Ang mga tawo dunay konsensiya sukad lalanga ang tawo dinhi sa yuta. Human supaka ni Adan ug Eva ang balaod ni Jehova, sila nagtago. Nagpakita kana nga gihasol sila sa ilang konsensiya. Kon ang atong konsensiya wala kaayo mabansay, sama ta sa barkong nagnabigar gamit ang guba nga kompas. Delikadong magbiyahe kon dili sakto ang kompas. Ang hangin ug balod dali rang makapadpad sa barko sa sayop nga direksiyon. Ang saktong pagkaadyas nga kompas makatabang sa kapitan aron ang barko makapabilin sa hustong direksiyon. Ang atong konsensiya mahimong ipakasama sa moral nga kompas. Kini ang katakos sa pagkahibalo sa maayo ug daotan, nga makagiya nato sa hustong direksiyon. Pero aron mahimong epektibong giya ang atong konsensiya, kinahanglang sakto ning pagkaadyas. Kon ang atong konsensiya wala mabansay sa hustong paagi, dili ni makapugong nato sa paghimog daotan. (1 Tim. 4:1, 2) Patuohon pa gani ta niana nga “ang daotan maoy maayo.” w18.06 16-17 ¶1-3

Angay sab natong mailhan ug isalikway ang panghunahuna sa kalibotan dihang ipasiugda kini sa paagi nga dili kaayo mailhan. Pananglitan, ang pipila ka balita ipresentar tingali sa paagi nga mopabor sa usa ka politikal nga opinyon. May mga estorya sab nga nagpasiugda sa kalibotanong panglantaw maylabot sa mga tumong ug kalamposan. Ang pipila ka salida ug libro nagpasiugda sa “ako usâ” ug “pamilya usâ” nga mga pilosopiya, nga naghimo niining morag rasonable, makapadani, ug husto pa gani. Ang maong mga panglantaw nagbalewala sa giingon sa Bibliya nga kita ug ang atong pamilya tinuod nga magmalipayon kon mas labaw natong gihigugma si Jehova. (Mat. 22:36-39) Wala ni magpasabot nga dili na ta moapil sa maayong kalingawan. Pero, kinahanglang pangutan-on nato ang kaugalingon: ‘Nailhan ba nato ang mga ideya sa kalibotan bisag gipresentar ni sa dili kaayo klarong paagi? Naningkamot ba ta nga dili maimpluwensiyahan ang atong mga anak​—ug kita mismo​—sa pipila ka programa o basahon? Gitabangan ba nato ang atong mga anak nga masundog ang panglantaw ni Jehova dihang makadungog o makakita silag panghunahuna sa kalibotan?’ w18.11 22 ¶18-19

Gipakita ni Jehova nga siya uban kanato pinaagi sa paghatag sa iyang bug-os nga atensiyon ug mainitong pagmahal. Matikdi kon giunsa niya pagpahayag ang iyang pagbati kanato. Si Jehova miingon: “Ikaw bililhon sa akong mga mata, ikaw giisip nga dungganon, ug ako nahigugma kanimo.” (Isa. 43:4) Walay bisan unsa sa uniberso ang makapugong kang Jehova sa paghigugma kanato. Maunongon kaayo siya nato. (Isa. 54:10) Si Jehova wala magsaad nga wad-on ang mga kalisdanan, pero dili niya tugotan nga malumsan ta sa “kasubaan” sa mga problema o makahimog permanenteng kadaot kanato ang “kalayo” sa mga pagsulay. Siya nagpasalig nga ubanan ta niya, nga tabangan tang “molatas” niana nga mga problema. Unsay buhaton ni Jehova? Iyang wad-on ang atong kahadlok aron makapabilin tang matinumanon kaniya, bisag mag-atubang tag kamatayon. (Isa. 41:13; 43:2) Kon mosalig ta sa saad sa Diyos nga “ako uban kanimo,” mahimo pod tang maisogon ug lig-on samtang nag-atubang sa mga pagsulay. w19.01 3 ¶4-6

Kon batan-on ka, lagmit gidasig ka sa mga maestro, guidance counselor, o sa uban sa pagkuhag taas nga edukasyon ug maayong trabaho. Pero lahi ang gitambag ni Jehova. Siyempre, gusto niyang magkugi ka sa imong pag-eskuyla aron duna kay ikasuportar sa kaugalingon iniggraduwar. (Col. 3:23) Pero dihang modesisyon bahin sa imong prayoridad, gidasig ka niya nga magpagiya sa iyang mga prinsipyo, nga nag-apil sa iyang katuyoan ug kabubut-on para nato niining panahon sa kataposan. (Mat. 24:14) Nahibalo siya kon unsay mahitabo niining kalibotana ug kon unsa ka duol na ning taposon. (Isa. 46:10; Mat. 24:3, 36) Nakaila sab siya nato​—kon unsay tinuod nga makapatagbaw ug makapalipay nato, ingon man sa mga hinungdan sa kapakyasan ug kagul-anan. Busa, bisan unsa ka rasonable ang tambag, kon wala ni ibase sa Pulong sa Diyos, dili gyod ni tinuod nga kaalam. w18.12 19 ¶1-2

Pero “ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.” Giinspirar sab si David sa pagtagna: “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.” (Sal. 37:11, 29; 2 Sam. 23:2) Unsa kahay epekto niana nga pasalig niadtong gustong mobuhat sa kabubut-on sa Diyos? Makadahom sila nga, kon pulos matarong ang magpuyo sa yuta, sa ngadtongadto mapasig-uli ang paraiso nga sama niadtong sa Eden. Paglabay sa panahon, kadaghanan sa mga Israelinhon nga nag-angkong nag-alagad kang Jehova mibiya kaniya ug sa matuod nga pagsimba. Busa gitugotan sa Diyos nga sakopon ang iyang katawhan sa Babilonya, daoton ang ilang yuta, ug bihagon sila. (2 Cron. 36:15-21; Jer. 4:22-27) Bisan pa niana, ang mga propeta sa Diyos nagtagna nga human sa 70 ka tuig, ang iyang katawhan mobalik sa ilang nasod. Natuman kana. Pero, may kahulogan sab nâ kanato​—usa ka umaabot nga paraiso sa yuta. w18.12 4-5 ¶9-10

Kadaghanan sa mga tambag sa kalibotan karon supak sa mga prinsipyo sa Bibliya. Pero, may pipila ba niana nga praktikal sa atong panahon? Si Jesus miingon: “Ang kaalam mapamatud-ang matarong pinaagi sa mga buhat niini.” (Mat. 11:19) Dako nag pag-uswag ang kalibotan kon bahin sa teknolohiya, pero wala masulbad niini ang dagkong problema sama sa gubat, diskriminasyon, ug krimen. Ug komosta ang bahin sa luag nga panghunahuna maylabot sa moralidad? Daghan ang nakaingon nga wala ni makasulbad sa mga problema kondili mao hinuoy hinungdan sa pagkabungkag sa pamilya, sakit, ug sa uban pang dili maayong kahimtang. Sa laing bahin, ang mga Kristohanon nga nagsundog sa panglantaw sa Diyos nagtagamtam ug mas malipayong pamilya, maayong panglawas tungod sa moral nga kahinlo, ug malinawong relasyon uban sa katawhan ni Jehova sa tibuok kalibotan. (Isa. 2:4; Buh. 10:34, 35; 1 Cor. 6:9-11) Dili ba nagpakita ni nga labaw gyod ang panghunahuna ni Jehova kay nianang sa kalibotan? w18.11 20 ¶8-10

Bisag maningkamot ta nga makabaton ug maayong relasyon sa mga membro sa atong pamilya ug trataron sila sa maayong paagi, kinahanglang mag-amping ta nga dili ikompromiso ang kamatuoran aron lang malipay sila. Bisag maningkamot ta nga mamentinar ang atong maayong relasyon sa mga membro sa atong pamilya, kinahanglang makigsuod lang ta niadtong nahigugma kang Jehova. Aron makalakaw sa kamatuoran, kinahanglan tang magmabalaan. (Isa. 35:8; 1 Ped. 1:14-16) Dihang nakadangat ta sa kamatuoran, kinahanglan tang mohimog mga kausaban aron masunod ang matarong nga mga sukdanan sa Bibliya. Ang uban mihimog dagkong kausaban. Bisan unsa pa man, dili gyod nato ibaylo ang atong hinlong baroganan sa imoral nga pagkinabuhi niining kalibotana. Sa unsang paagi malikayan nato ang imoral nga mga buhat? Pamalandonga kon unsa ka dako ang gisakripisyo ni Jehova aron mahimo tang balaan​—ang bililhong kinabuhi sa iyang Anak, si Jesu-Kristo. (1 Ped. 1:18, 19) Aron mamentinar ang hinlong baroganan atubangan kang Jehova, kanunay natong pamalandongon ang bili sa halad lukat ni Jesus. w18.11 11 ¶10-11

Daghang bug-os panahong mga alagad ang makapamatuod nga ang pagpokus sa ministeryo nakatabang nila sa pagpabiling balanse bisag mag-usab-usab ang kahimtang. Sama sa gipakita niini nga mga ehemplo, kon himoon nato ang atong kinamaayohan sa atong kahimtang ug masaligong maghulat kang Jehova, magmalinawon ang atong hunahuna. Basin maamgohan pa gani nato nga mas mapalig-on ang atong espirituwalidad tungod sa atong pag-adyas sa bag-ong kahimtang. Kon kalit nga mausab ang imong kinabuhi​—tungod man sa mga asaynment sa organisasyon, sakit, o bag-ong responsibilidad sa pamilya​—makasalig ka nga atimanon ka ni Jehova ug tabangan ka sa hustong panahon. (Heb. 4:16; 1 Ped. 5:6, 7) Sa kasamtangan, padayong buhata ang imong kinamaayohan sa imong kahimtang. Pakigsuod sa imong langitnong Amahan pinaagig pag-ampo, ug isalig ang imong kaugalingon sa iyang mapinanggaong mga kamot. Niining paagiha, magmalinawon ang imong hunahuna bisag mag-usab-usab ang imong kahimtang. w18.10 30 ¶17; 31 ¶19, 22

Ang Bibliya may daghang ehemplo sa pagpakita ni Jehova ug konsiderasyon sa iyang mga alagad. Pananglitan, matikdi ang pagkamahunahunaon sa Diyos dihang iyang gitabangan si Samuel sa pagdalag mensahe sa paghukom ngadto sa Hataas nga Saserdoteng si Eli nga narekord sa 1 Samuel 3:1-18. Ang Balaod ni Jehova nagsugo sa mga anak nga tahoron ang mga tigulang, ilabina kadtong may awtoridad. (Ex. 22:28; Lev. 19:32) Moadto kaha si Samuel kang Eli pagkabuntag ug maisogong isulti kaniya ang bug-at nga mensahe sa paghukom sa Diyos? Siyempre dili! Gani, ang Bibliya nag-ingon nga “nahadlok si Samuel nga isulti kang Eli” ang bahin sa panan-awon. Pero, giklaro sa Diyos kang Eli nga Iyang gitawag si Samuel. Tungod niana, giingnan dayon ni Eli si Samuel sa pagsulti ug nga walay ililong kaniya bisag “usa ka pulong.” Misunod si Samuel ug ‘gisugilon kaniya ang tanan’ ug ang gipamulong niini parehas sa unang mensahe nga nadawat ni Eli. (1 Sam. 2:27-36) Kini nga estorya bahin kang Samuel ug Eli nagpakita nga si Jehova maalamon ug nagpakitag konsiderasyon. w18.09 23 ¶2; 24 ¶4-5

Komon kaayo karon ang pagpamakak. Sumala sa giingon ni Y. Bhattacharjee sa artikulong “Nganong Mamakak Mi,” “nabatasan na sa tawo ang pagpamakak.” Ang mga tawo sagad mamakak aron proteksiyonan o kaha bayawon ang kaugalingon. Mamakak sila aron itago ang ilang sala ug sayop nga binuhatan o aron makabentaha. Sumala pa sa artikulo, may mga tawo nga “dali ra kaayong makapamakak​—ginagmay ug dinagko​—ngadto sa dili nila kaila, sa ilang katrabaho, amigo, ug minahal.” Unsay resulta niining tanang pagpamakak? Mawala ang pagsalig ug mahimong mabungkag ang mga relasyon. Si salmistang David miampo kang Jehova: “Ikaw nagkalipay sa pagkamatinud-anon diha sa kahiladmang mga bahin.” (Sal. 51:6) Si David nahibalo nga ang atong pagkamatinud-anon naggikan sa sulod nato, sa atong kasingkasing. Sa tanang bahin sa kinabuhi, ang tinuod nga mga Kristohanon ‘mosulti nga matinud-anon sa usag usa.’​—Zac. 8:16. w18.10 7 ¶4; 8 ¶9-10; 10 ¶19

Dihang mibiya ang mga Israelinhon sa Ehipto niadtong 1513 B.C.E., tingali miabot silag kapin sa tulo ka milyon. Niining tulo o upat ka henerasyon, may mga bata, tigulang, ug seguradong diha poy mga masakiton o baldado. Aron magiyahan ang ingon ka daghan sa pagbiya sa Ehipto, seguradong gikinahanglan ang masinabtanon ug mahunahunaong Lider. Klarong gipakita nâ ni Jehova pinaagi kang Moises. Tungod niana, mibating luwas ang mga Israelinhon dihang mibiya sila sa ilang pinuy-anan. (Sal. 78:52) Unsay gihimo ni Jehova aron mobating luwas ang iyang katawhan? Una, gigiyahan niya sila sa pagbiya sa Ehipto sa organisado kaayong paagi, nga samag “nahan-ay alang sa gubat.” (Ex. 13:18) Seguradong nagpasalig nâ sa mga Israelinhon nga kontrolado sa Diyos ang situwasyon. Gipakita pod ni Jehova ang iyang presensiya pinaagi sa “usa ka panganod sa maadlaw ug . . . kahayag sa kalayo” sa gabii. (Sal. 78:14) Sama rag miingon si Jehova: “Ayawg kahadlok. Ubanan ta mo aron giyahan ug proteksiyonan.” w18.09 26 ¶11-12

Sa kapanahonan sa Bibliya, may pipila ka matinumanong alagad sa Diyos nga nabug-atan pag-ayo sa ilang mga problema ug gusto nang mamatay. Pananglitan, tungod sa grabeng kasakit, si Job miingon: “Gisalikway ko [ang akong kinabuhi]; hangtod sa panahong walay tino ako dili buot mabuhi.” (Job 7:16) Si Jonas nadismayar pag-ayo nga siya miingon: “Karon, Oh Jehova, kuhaa, palihog, ang akong kalag gikan kanako, kay mas maayo pa nga ako mamatay kay sa ako mabuhi.” (Jon. 4:3) Dugang pa, dihay higayon nga nawad-ag paglaom ang matinumanong propeta nga si Elias maong mihangyo siya kang Jehova: “Igo na! Karon, Oh Jehova, kuhaa ang akong kalag.” (1 Hari 19:4) Bisan pa niana, gimahal ni Jehova ang maong maunongong mga alagad ug gusto niyang mabuhi sila. Imbes badlongon, gitabangan niya sila nga mawala ang ilang tinguha nga mamatay. Gipalig-on niya sila pinaagi sa gugma aron magmaunongon sila sa pag-alagad kaniya. w18.09 13 ¶4

Ang mga isigkamagbubuhat sa Diyos nailhang maabiabihon. Sa Kristohanon Gregong Kasulatan, ang pulong nga gihubad ug “pagkamaabiabihon” nagkahulogan ug “pagpakitag kaayo sa mga estranyo.” (Heb. 13:2) Diha sa Bibliya, may mga estoryang nagtudlo nato sa pagpakita sa maong gugma. (Gen. 18:1-5) Kinahanglang kanunay tang motabang sa uban ug mangitag mga kahigayonan sa pagbuhat niana, sila man “atong kabanay sa pagtuo” o dili. (Gal. 6:10) Makabuhat ba ka uban sa Diyos pinaagi sa pag-abiabi sa bug-os panahong mga alagad nga mobisita? (3 Juan 5, 8) Sagad oportunidad kana sa “pagdinasigay.” (Roma 1:11, 12) Ang Pulong sa Diyos nagdasig sa mga brader sa kongregasyon sa pagbuhat uban kang Jehova pinaagi sa pagkab-ot ug mga pribilehiyo sa pag-alagad ug pagpanguna. (1 Tim. 3:1, 8, 9; 1 Ped. 5:2, 3) Kadtong mohimo niana makatabang sa uban sa praktikal ug espirituwal nga paagi. (Buh. 6:1-4) Ug kadtong nag-atiman sa importanteng mga buluhaton sa kongregasyon makaingon gyod nga makapalipay kaayo ang pagtabang sa uban. w18.08 24 ¶6; 25 ¶7, 10

Bisag gihatagan si Timoteo ug awtoridad ibabaw sa maong tigulang nga mga igsoon, kinahanglan niyang trataron sila uban ang pagkamabination ug pagtahod. Pero, hangtod asa nato ipadapat ang maong prinsipyo? Pananglitan, obligado ba tang uyon-uyonan ang usa ka tigulang bisag tinuyo siyang naghimog sala o nagpasiugdag butang nga makapasuko kang Jehova? Si Jehova dili mohukom base sa makita ug dili niya balewalaon ang tinuyong pagpakasala tungod lang kay tigulang ang nagbuhat ana. Matikdi ang prinsipyong makita sa Isaias 65:20: “Kon bahin sa makasasala, bisan tuod usa ka gatos ka tuig ang panuigon siya panghimaraoton.” Makita sab nâ nga prinsipyo sa panan-awon ni Ezequiel. (Ezeq. 9:5-7) Busa, kanunay gyod natong unahon ang pagpakitag pagtahod sa Karaan sa mga Adlaw, si Jehova nga Diyos. (Dan. 7:9, 10, 13, 14) Kon buhaton nato nâ, dili ta mahadlok sa pagbadlong ug pagtambag sa usa ka tawo, bisag unsa pay iyang edad.​—Gal. 6:1. w18.08 11 ¶13-14

Ingong tinuod nga mga Kristohanon, kinahanglan natong makat-onan kon unsaon pagtimbangtimbang ang impormasyon ug paghimog hustong konklusyon. (Prov. 3:21-23; 8:4, 5) Kon dili nato nâ himoon, dali tang maimpluwensiyahan ni Satanas ug sa iyang kalibotan. (Efe. 5:6; Col. 2:8) Siyempre, makahimo lang tag hustong konklusyon kon nabatonan nato ang tinuod nga impormasyon. Karon, nagbaha ang impormasyon. Naa ni sa Internet, TV, ug ubang media. Daghan pod tag madawat nga impormasyon pinaagig e-mail, text, o balita gikan sa maayog intensiyon nga mga higala ug kaila. Kay komon na ang tinuyong pagpakaylap ug sayop ug tinuis nga impormasyon, kinahanglan gyod tang magbantay ug timbangtimbangon pag-ayo ang atong madunggan. w18.08 3 ¶1, 3

Dihang panahon na nga ipakatawo ang Anak sa Diyos, gipili ni Jehova ang mapainubsanong ulay nga si Maria aron mahimong inahan niining espesyal nga bata. Si Maria nagpuyo sa gamayng siyudad sa Nasaret, nga layo sa Jerusalem ug sa nindot nga templo niini. (Luc. 1:26-33) Gipakita ni Maria nga hamtong siya sa espirituwal dihang nakig-estorya siya sa iyang paryenteng si Elisabet. (Luc. 1:46-55) Oo, dugay nang giobserbahan ni Jehova si Maria, ug gihatagan niya kinig wala damhang pribilehiyo tungod sa pagkamatinumanon niini. Dihang gipanganak ni Maria si Jesus, wala pasidunggi ni Jehova si bisan kinsang prominenteng opisyal o magmamando sa Jerusalem ug Betlehem kay wala sila pahibaloa sa nahitabo. Ang mga anghel nagpakita sa mapainubsanong mga magbalantay nga nagpasibsib sa mga karnero sa gawas sa Betlehem. (Luc. 2:8-14) Dayon, ang mga magbalantay mibisita sa bag-ong natawo nga bata. (Luc. 2:15-17) Seguradong nasorpresa ug nalipay si Maria ug Jose dihang ilang nakita nga gipasidunggan si Jesus niining paagiha! w18.07 9-10 ¶11-12

Unsa ka grabe ang pagpasuko ni Solomon kang Jehova? Ang Bibliya nag-ingon: “Tungod kay ang iyang kasingkasing misimang gikan kang Jehova . . . , ang usang nagpakita kaniya sa makaduha. Ug labot niining butanga siya nagsugo kaniya nga dili mosunod sa ubang mga diyos; apan wala niya tumana ang gisugo ni Jehova.” Ingong resulta, wala na siya uyoni ug tabangi sa Diyos. Nabahin ang gingharian sa Israel panahon sa iyang mga manununod ug nakaeksperyensiya silag dagkong problema sulod sa gatosan ka tuig. (1 Hari 11:9-13) Sama sa kahimtang ni Solomon, ang usa sa makadaot pag-ayo sa atong espirituwalidad mao ang pagpakighigala niadtong wala mahibalo o magtahod sa mga sukdanan ni Jehova. Ang pipila tingali membro sa kongregasyon pero huyang sa espirituwal. Tingali ang uban atong mga paryente, silingan, katrabaho, o eskolmet nga dili magsisimba ni Jehova. Sa bisan unsang kahimtang, kon suod ta niadtong wala magsunod sa mga sukdanan ni Jehova, anam-anam nga madaot ang atong maayong relasyon sa Diyos. w18.07 19 ¶9-10

Si Satanas naggamit sa mga pelikula ug salida sa TV aron ipakaylap ang iyang panghunahuna. Nahibalo siya nga malingaw ta sa mga estorya. Kini magtudlo nato kon unsay hunahunaon, bation, ug buhaton. Si Jesus kanunayng naggamit niining paagiha sa pagpanudlo. Tagda pananglitan ang iyang ilustrasyon bahin sa buotang Samarianhon ug sa anak nga milayas ug nagwaldas sa iyang panulondon. (Mat. 13:34; Luc. 10:29-37; 15:11-32) Pero, kadtong naimpluwensiyahan sa panghunahuna ni Satanas makagamit sa mga estorya sa pag-impluwensiya nato. Kinahanglan tang mahimong balanse. Puwede tang malingaw ug makakat-on sa mga pelikula ug salida sa TV nga dili mahugawan ang atong hunahuna. Pero kinahanglan tang magbantay. Dihang mopilig kalingawan, maayong pangutan-on ang kaugalingon, ‘Kini ba nga pelikula o salida magtudlo nako nga puwede ra kong magpadala sa akong unodnong tinguha?’ (Gal. 5:19-21; Efe. 2:1-3) Unsay imong himoon kon mamatikdan nimo nga ang usa ka programa nagpasiugda sa panghunahuna ni Satanas? Likayi ni sama sa mananakod nga sakit! w19.01 15-16 ¶6-7

Maingon nga ang helmet manalipod sa utok, ang “paglaom sa kaluwasan” manalipod sa atong hunahuna. (1 Tes. 5:8; Prov. 3:21) Unsay posibleng buhaton ni Satanas aron huboon nato ang atong helmet? Tagda ang gibuhat niya kang Jesus. Seguradong nahibalo si Satanas nga si Jesus mahimong magmamando sa katawhan. Pero kinahanglang maghulat si Jesus sa panahon nga gitakda ni Jehova. Ug sa dili pa nâ mahitabo, kinahanglan siyang mag-antos ug mamatay. Busa gitanyagan ni Satanas si Jesus ug kahigayonan nga matuman dayon ang maong paglaom. Gisaaran niya si Jesus nga kon mohimo kinig usa ka buhat sa pagsimba, si Jesus mahimo dayong magmamando sa kalibotan. (Luc. 4:5-7) Sa susama, nahibalo si Satanas nga gitanyagan ta ni Jehova ug materyal nga mga kaayohan sa bag-ong sistema. Pero kinahanglan tang maghulat ug tingali mag-antos pa gani. Busa nagtanyag si Satanas ug makapadaning kahigayonan nga matagamtam ang maong kinabuhi karon. Gusto niyang unahon nato ang materyal nga kaayohan, nga magkinabuhi nang komportable karon, ug ikaduha na lang ang Gingharian.​—Mat. 6:31-33. w18.05 30-31 ¶15-17

Oo, gusto ni Jehova nga magmalipayon ka ingong batan-on. Pagpokus sa espirituwal nga mga tumong, nga iapil si Jehova sa tanan nimong plano. Kon sayo nimo ning himoon, mas dali pod nimong makita ang giya, proteksiyon, ug panalangin ni Jehova. Hunahunaa ang tanang maayong tambag sa Pulong sa Diyos, ug ipadapat ang tambag: “Hinumdomi, karon, ang imong Dakong Maglalalang sa mga adlaw sa imong pagkabatan-on.” (Eccl. 12:1) Ang mga batan-on sa kongregasyon angayan gyod sa kinasingkasing nga komendasyon kay determinado sila nga magpokus sa pag-alagad kang Jehova. Gihimo ni sa mga batan-on pinaagi sa pagkab-ot ug espirituwal nga mga tumong ug pag-una sa pagsangyaw. Dugang pa, determinado silang dili kalimtan ang ilang espirituwal nga mga tumong bisan pa sa impluwensiya sa kalibotan. Makaseguro ang mga batan-on nga dili makawang ang ilang paningkamot. Maangkon nila ang mahigugmaong pagsuportar sa mga igsoon. Ug kon unahon nila si Jehova, molampos ang ilang mga plano. w18.04 29 ¶17, 19