Hunyo

Seguradong nalig-on niini nga saad ang mga apostoles! Bisag wala kaayo nila masabti nga hapit nang matapos ang kinabuhi sa ilang Lider dinhi sa yuta, dili sila pasagdan. Andam si Jehova sa pagtubag sa ilang mga pag-ampo ug pagtabang nila nga matuman ang sugo nga isangyaw ang Gingharian. Ug tuod man, wala madugay human niadto, naeksperyensiyahan nila nga gitubag ni Jehova ang ilang mga pag-ampo. (Buh. 4:29, 31) Mao man usab karon. Samtang padayon tang mamunga, magpabilin tang higala ni Jesus. Dugang pa, makaseguro tang andam si Jehova sa pagtubag sa atong mga pag-ampo aron maatubang ang mga problema samtang magsangyaw ta sa maayong balita. (Filip. 4:13) Mapasalamaton gyod ta nga tubagon ni Jehova ang atong mga pag-ampo ug magpabiling higala ni Jesus! Kini nga mga regalo ni Jehova magpalig-on nato aron padayon tang mamunga.​—Sant. 1:17. w18.05 21 ¶17-18

Sulod lang sa lima ka tuig, makita sa Hudiyong mga Kristohanon nga nagpuyo sa Jerusalem nga magkaduol ang “adlaw ni Jehova.” Ug makita nila ang ilhanan nga gihatag ni Jesus nga kinahanglan na silang mobiya sa siyudad. (Buh. 2:19, 20; Luc. 21:20-22) Ang maong adlaw ni Jehova miabot sa 70 C.E. dihang gipahamtang sa mga Romano ang paghukom ni Jehova diha sa Jerusalem. Karon, may katarongan gyod tang motuo nga haduol na ang “dako ug makalilisang kaayo” nga adlaw ni Jehova. (Joel 2:11) Si propetang Sofonias miingon: “Ang dakong adlaw ni Jehova haduol na. Kini haduol na, ug nagadali sa hilabihan.” (Sof. 1:14) Ang maong pasidaan mapadapat usab sa atong panahon. Kay haduol na ang adlaw ni Jehova, giingnan ta ni Pablo nga “magmahunahunaon kita sa usag usa aron sa pagdasig ngadto sa paghigugma ug sa maayong mga buhat.” (Heb. 10:24) Busa, kinahanglang magpakita tag dugang interes sa atong mga igsoon, aron makadasig ta nila kon gikinahanglan. w18.04 20 ¶1-2

Makapalig-on kaayo ang pagdasig nga gihatag ni Jehova kang Josue sa wala pa papuy-a ang Iyang katawhan sa Yutang Saad! Dili lang matag indibiduwal ang gidasig ni Jehova. Gidasig pod niya ang iyang katawhan ingong grupo. Sa tagna nga maghatag ug pagdasig sa mga Hudiyong nabihag sa Babilonya, si Jehova miingon: “Ayaw kahadlok, kay ako uban kanimo. Ayaw iliraw ang imong panan-aw, kay ako imong Diyos. Ako magapalig-on kanimo. Ako sa pagkatinuod magatabang kanimo. Ako sa pagkatinuod magahawid kanimo sa akong tuong kamot sa pagkamatarong.” (Isa. 41:10) Gipasaligan pod ang unang mga Kristohanon, ug mao man usab ang katawhan sa Diyos karon. (2 Cor. 1:3, 4) Si Jesus nakadawat pod ug pagdasig gikan sa iyang Amahan. Human sa iyang bawtismo, nakadungog siyag tingog gikan sa langit nga nag-ingon: “Kini mao ang akong Anak, ang hinigugma, nga akong giuyonan.” (Mat. 3:17) Seguradong nakapalig-on kana kang Jesus sa iyang ministeryo dinhi sa yuta! w18.04 16 ¶3-5

Dihang mabasa ang sugo ni Jehova kang Adan, daghan ang moingon nga gikuhaan si Adan ug kagawasan sa pagbuhat kon unsay iyang gusto. Sa pag-ingon niana, nagtuo sila nga ang kagawasan sa pagpili parehas ra sa katungod sa pagdesisyon kon unsay maayo ug daotan. Tinuod, si Adan ug Eva may kagawasan sa pagdesisyon kon tumanon ba nila ang Diyos o dili. Pero, si Jehova lang ang may bug-os nga katungod nga modesisyon kon unsay maayo ug daotan, ingon sa gisimbolohan sa “kahoy sa kahibalo sa maayo ug sa daotan” diha sa tanaman sa Eden. (Gen. 2:9) Pinaagi sa iyang sugo, mahigugmaong gitudloan ni Jehova si Adan ug Eva kon unsaon pagpakita ang tinuod nga kagawasan. Sa ato nang nasayran, ang atong unang ginikanan wala motuman. Nakahatag bag dugang kagawasan ang desisyon ni Adan ug Eva? Ikasubo nga wala. Sa paningkamot nga magmaindependente, nawad-an sila sa tinuod nga kagawasan nga gihatag kanila. w18.04 5-6 ¶9-12

Dili lang kay maluoy ra si Jehova sa iyang mga alagad nga nag-antos. Molihok sab siya sa pagtabang nila. Pananglitan, dihang ang mga Israelinhon nag-antos ingong mga ulipon sa Ehipto, nasabtan ni Jehova ang ilang kasakit ug napalihok siya sa paghupay kanila. Siya miingon kang Moises: “Sa walay duhaduha nakita ko ang kasakitan sa akong katawhan . . . , ug nadungog ko ang ilang pagtuaw . . . ako nahibalo pag-ayo sa mga kasakit nga ilang giantos. Ug manaog ako sa pagluwas kanila gikan sa kamot sa mga Ehiptohanon.” (Ex. 3:7, 8) Kay naluoy si Jehova sa iyang katawhan, gipagawas niya sila sa pagkaulipon. Gatosan ka tuig sa ulahi, sa Yutang Saad, ang mga Israelinhon giatake sa mga kaaway. Unsay gibati ni Jehova? Siya naluoy nila “tungod sa ilang mga pag-agulo tungod sa mga nanglupig kanila ug sa mga nagdaogdaog kanila.” Sa makausa pa, ang empatiya nagpalihok kang Jehova sa pagtabang sa iyang katawhan. Nagpadala siyag mga maghuhukom aron luwason ang mga Israelinhon gikan sa ilang mga kaaway.​—Maghu. 2:16, 18. w19.03 15 ¶4-5

Ang una ug ikaduha sa 10 ka Sugo nag-ingon nga si Jehova lang ang simbahon ug nagpasidaan ni batok sa pagsimbag mga diyosdiyos. (Ex. 20:3-6) Ang maong mga sugo dili para sa kaayohan ni Jehova, kondili para sa iyang katawhan. Dihang sila misimba sa mga diyos sa ubang nasod, sila nag-antos. Sa laing bahin, panalanginan niya ang iyang katawhan kon sila magmaunongon niya ug magtratar nga patas sa usag usa. (1 Hari 10:4-9) Dili mabasol si Jehova kon ang mga nag-angkong nag-alagad niya nagsalikway sa iyang mga sukdanan ug nagdaot sa iyang katawhan. Hinunoa, gimahal ta ni Jehova ug nahibalo siya dihang nag-antos tag inhustisya. Mas labaw ang kasakit nga iyang bation kon itandi nianang bation sa inahan para sa iyang masuso nga nag-antos. Bisan tingalig dili dayon siya mangilabot, sa iyang gitakdang panahon hukman niya ang dili mahinulsolong mga makasasala sa ilang pagtratar sa uban. w19.02 22 ¶13-15

Sa mga semana una sa Memoryal, ang atong mga tigom sagad magpokus sa ehemplo ni Jesus ug sa pagpaubos nga iyang gipakita pinaagi sa paghatag sa iyang kinabuhi ingong lukat. Mapalihok ta sa pagsundog sa iyang pagkamapainubsanon ug sa pagbuhat sa kabubut-on ni Jehova, bisan pag lisod ang paghimo niana. Atong gihunahuna ang gipakitang kaisog ni Jesus sa mga adlaw una ang iyang kamatayon. Nahibalo siya pag-ayo nga hapit na siyang pakaulawan, dagmalan, ug patyon sa iyang mga kaaway. (Mat. 20:17-19) Bisan pa niana, andam siyang mamatay. Dihang miabot ang maong panahon, giingnan niya ang iyang matinumanong mga apostoles nga kauban niya sa Getsemane: “Bangon kamo, manglakaw na kita. Tan-awa! Ang akong magbubudhi nagsingabot na.” (Mat. 26:36, 46) Ug dihang miabot ang armadong mga tawo aron dakpon siya, nagpakita ug nagpaila dayon siya nila, unya giingnan niya ang mga sundalo nga palakwon ang iyang mga apostoles. (Juan 18:3-8) Maisogon gyod si Jesus! Karon, ang mga dinihogan ug ubang mga karnero naningkamot sa pagsundog sa kaisog ni Jesus. w19.01 27-28 ¶7-8

Sama sa pintor nga mogamit ug lainlaing nindot nga kolor aron makahimo ug painting, kinahanglan pod natong ipakita ang lainlaing nindot nga hiyas aron mahimong aghop. Ang pipila niini mao ang pagpaubos, pagpasakop, kalumo, ug kaisog. Ang mapainubsanon lang ang magpasakop sa kabubut-on sa Diyos. Bahin sa iyang kabubut-on nga magmalumo ta. (Mat. 5:5; Gal. 5:23) Kon buhaton nato ang kabubut-on sa Diyos, masuko si Satanas. Busa bisag kita mapainubsanon ug lumo, daghan diha sa kalibotan ni Satanas ang masuko nato. (Juan 15:18, 19) Maong gikinahanglan nato ang kaisog aron makasukol kang Satanas. Ang kaatbang sa tawong aghop mao ang tawong hambogiro, dili makapugong sa kasuko, ug wala magsunod kang Jehova. Ingon gyod ana si Satanas. Mao diayng gidumtan niya ang mga maaghop! Ilang gipakita kon unsa siya ka daotan kay sila dunay mga hiyas nga wala niya. Ug labaw sa tanan, ilang gipamatud-an nga bakakon si Satanas. Ngano? Kay bisag unsay iyang isulti o buhaton, dili niya mapugngan ang mga maaghop sa pag-alagad kang Jehova!​—Job 2:3-5. w19.02 8-9 ¶3-5

Nahibalo si Jehova nga ang mga nagpuyo sa Babilonya mahimong mahadlok. Ang Babilonya atakehon sa gamhanang kasundalohan sa Medo-Persia. Gamiton ni Jehova ang maong kasundalohan aron ipahigawas ang iyang katawhan sa pagkabihag sa Babilonya. (Isa. 41:2-4) Dihang nahibaloan sa mga taga-Babilonya ug sa mga tawo sa ubang nasod nga atakehon na sila, naningkamot silang magmaisogon pinaagi sa pag-ingon sa usag usa: “Magmakusganon.” Naghimo pod silag daghan pang diyosdiyos, kay abi nilag proteksiyonan sila niini. (Isa. 41:5-7) Sa kasamtangan, gipakalma ni Jehova ang nabihag nga mga Hudiyo pinaagi sa pag-ingon: “[Dili sama sa ubang nasod] ikaw, Oh Israel, ang akong alagad . . . Ayawg kabalaka, kay ako imong Diyos.” (Isa. 41:8-10) Matikdi nga si Jehova miingon: “Ako imong Diyos.” Pinaagi nianang mga pulonga, gipasaligan ni Jehova ang iyang maunongong mga magsisimba nga wala siya malimot kanila ug nga sila iya gihapong katawhan. Iyang giingnan sila: “Ako magpas-an ug maghatag ug kaikyasan [kaninyo].” Kana nga pasalig seguradong nagpalig-on sa nabihag nga mga Hudiyo.​—Isa. 46:3, 4. w19.01 4 ¶8

Sa Marcos 1:9-11, atong mabasa ang una sa tulo ka higayon nga misulti si Jehova gikan sa langit. Si Jehova miingon: “Ikaw mao ang akong Anak, ang hinigugma; giuyonan ko ikaw.” Seguradong natandog si Jesus nga madunggan ang iyang Amahan nga nagpahayag sa Iyang gugma ug pagsalig kaniya! Ang gisulti ni Jehova nagpamatuod sa tulo ka importanteng kamatuoran bahin kang Jesus. Una, si Jesus iyang Anak. Ikaduha, si Jehova nahigugma sa iyang Anak. Ug ikatulo, giuyonan ni Jehova ang iyang Anak. Sa pag-ingong “Ikaw mao ang akong Anak,” gipakita ni Jehova nga ang iyang pinalanggang Anak, si Jesus, duna nay bag-ong relasyon kaniya. Sa didto pa si Jesus sa langit, siya usa ka espirituhanong anak sa Diyos. Pero sa iyang bawtismo, siya gidihogan sa balaang espiritu. Nianang panahona, gipakita sa Diyos nga si Jesus ingong iyang dinihogang Anak may paglaom nang mobalik sa langit aron mahimong iyang tinudlong Hari ug Hataas nga Saserdote. (Luc. 1:31-33; Heb. 1:8, 9; 2:17) Busa, dihang gibawtismohan si Jesus, ang iyang Amahan makaingon: “Ikaw mao ang akong Anak.”​—Luc. 3:22. w19.03 8-9 ¶3-4

Ang sayop nga tambag nagsugod sa sayong bahin sa kasaysayan sa tawo dihang misulod si Satanas sa esena. Ingong mapangahason ug mabuotbuotong magtatambag, giingnan niya si Eva nga mahimong mas malipayon siya ug ang iyang bana kon silay magbuot sa ilang kinabuhi. (Gen. 3:1-6) Kaugalingon ray gihunahuna ni Satanas. Gusto niya nga si Adan ug Eva​—ug ang ilang umaabot nga kaliwat​—magpasakop ug mosimba niya imbes kang Jehova. Si Jehova ang naghatag sa tanan nilang nabatonan​—ang usag usa, ang nindot nga tanaman nga ilang gipuy-an, ug ang ilang hingpit nga lawas nga mabuhi unta sa walay kataposan. Makapaguol, si Adan ug Eva misupak sa Diyos. Sa paghimo niana, ilang giputol ang ilang relasyon sa Diyos. Aw, nahibalo na ta nga dili gyod maayo ang resulta. Sama sa bulak nga giputol gikan sa tanom, sila anam-anam nga nalaya ug namatay. Ang ilang mga anak nag-antos pod sa tunglo sa sala. (Roma 5:12) Bisan pa niana, kadaghanan karon mipili gihapon nga dili magpasakop sa Diyos. Gusto nilang silay magbuot sa ilang kinabuhi. (Efe. 2:1-3) Klarong gipakita sa mga resulta ang pagkatinuod sa teksto karong adlawa. w18.12 20 ¶3-4

Si apostol Pablo intelihente ug edukado, ug makasulti siyag labing menos duha ka pinulongan. (Buh. 5:34; 21:37, 39; 22:2, 3) Bisan pa niana, kon bahin sa pagdesisyon kon unsay husto ug sayop, wala niya sunda ang kaalam sa kalibotan. Hinunoa, gibase niya sa Kasulatan ang iyang mga pangatarongan. (Buh. 17:2; 1 Cor. 2:6, 7) Ingong resulta, nagmalamposon siya sa iyang ministeryo ug nagpaabot ug walay kataposang panalangin. (2 Tim. 4:8) Klaro nga labaw gyod ang panghunahuna sa Diyos kay nianang sa kalibotan. Ang pagkinabuhi sumala sa iyang panghunahuna moresultag tinuod nga kalipay ug kalamposan. Pero dili mamugos si Jehova nga sundogon nato ang iyang panghunahuna. “Ang matinumanon ug maalamong ulipon” dili mokontrolar sa panghunahuna sa matag usa, ug dili pod nâ buhaton sa mga ansiyano. (Mat. 24:45; 2 Cor. 1:24) Responsibilidad sa matag Kristohanon ang pagpaningkamot nga masundog ang panghunahuna sa Diyos. w18.11 20-21 ¶12-13

Ang Diyos nagtagna pinaagi kang Isaias nga dihang makabalik na ang Iyang katawhan sa ilang nasod, walay kadaot nga modangat nila ug dili sila atakehon sa bangis nga mga hayop o sa samag hayop nga mga tawo. Mahimong luwas ang tanan. (Isa. 11:6-9; 35:5-10; 51:3) Si Isaias nagtagna sab nga ang tibuok yuta​—dili lang ang Israel​—“mapuno sa kahibalo kang Jehova ingon sa katubigan nga nagtabon sa dagat mismo.” Gipasiugda pa ni Isaias nga ang mga mamalik dili atakehon sa mga hayop o tawo. Ang ilang yuta mopatunghag abundang pagkaon, tungod sa dagayang suplay sa tubig, sama sa Eden. (Gen. 2:10-14; Jer. 31:12) Mao ra ba nâ ang katumanan sa tagna? Walay ebidensiya nga ang namalik gikan sa pagkabihag milagrosong nangaayo. Pananglitan, ang mga buta wala makakita pag-usab. Busa gipakita sa Diyos nga sa umaabot pa ang literal nga pagpang-ayo. w18.12 5 ¶11-12

Gusto natong magpadayon sa paglakaw diha sa kamatuoran hangtod sa hangtod. Sa unsang paagi mapalig-on ang atong determinasyon nga magpadayon sa paglakaw diha sa kamatuoran? Padayon sa pagtuon ug pagpamalandong sa bililhong kamatuoran sa Pulong sa Diyos. Oo, palita ang kamatuoran pinaagi sa regular nga paggahin ug panahon sa pagtuon sa Pulong sa Diyos. Pinaagi niini, mas mapabilhan nimo ang kamatuoran ug mas determinado kang dili ni ibaligya. Gawas pa sa pagpalit sa kamatuoran, ang Proverbio 23:23 nag-ingon nga kinahanglan sab natong paliton ang “kaalam ug ang disiplina ug ang pagsabot.” Dili igo ang kahibalo. Kinahanglang ipadapat nato ang kamatuoran. Kon duna tay pagsabot, atong makita ang koneksiyon sa tanang gipamulong ni Jehova. Ang kaalam magpalihok nato sa pagpadapat sa atong nahibaloan. Usahay, ang kamatuoran magdisiplina nato, nga magpakita nato kon unsay angayng bag-ohon. Hinaot nga sundon nato ang maong giya. Mas bililhon kana kay sa plata.​—Prov. 8:10. w18.11 9 ¶3; 11 ¶13-14

Unsa ang imong labing bililhong gipanag-iya? Andam ka bang ibaylo kana sa butang nga dili kaayo bililhon? Para sa dedikadong mga alagad ni Jehova, simple ra ang tubag nianang mga pangutanaha. Ang atong labing bililhong gipanag-iya mao ang atong relasyon kang Jehova, ug dili nato nâ ibaylo sa bisan unsa. Gipabilhan sab nato ang kamatuoran sa Bibliya, nga nakatabang nato nga maugmad ang suod nga relasyon sa atong langitnong Amahan. (Col. 1:9, 10) Hunahunaa lang ang tanang gitudlo sa atong Dakong Instruktor diha sa iyang Pulong, ang Bibliya! Siya nagpadayag sa kamatuoran bahin sa kaimportante sa iyang ngalan ug sa iyang nindot nga mga hiyas. Gisultian ta niya bahin sa talagsaong tagana sa lukat, nga mahigugmaon niyang gihatag kanato pinaagi sa iyang Anak, si Jesus. Si Jehova nagtudlo sab nato bahin sa Mesiyanikong Gingharian ug sa paglaom nga makapuyo sa Paraiso. Iya tang gitudloan kon unsaon nato pagkinabuhi. Gipabilhan nato ang maong mga kamatuoran kay nakatabang nâ nato nga masuod sa atong Maglalalang. Naghatag nag direksiyon sa atong kinabuhi. w18.11 3 ¶1-2

Ang malimbongong mga tawo walay matago kang Jehova, kay “ang tanang butang hubo ug binuksan” kaniya. (Heb. 4:13) Ingong pananglitan, si Ananias ug Sapira nagplanong limbongan ang mga apostoles. Nagbaligya silag propidad pero bahin lang sa halin ang ilang gihatag sa mga apostoles. Gusto sa magtiayon nga magpabilib sa kongregasyon, nga morag mahinatagon kaayo sila sa ilang donasyon pero dili gyod diay. Apan nakita ni Jehova ang ilang gibuhat, ug sila gisilotan. (Buh. 5:1-10) Unsay pagbati ni Jehova sa pagpamakak? Si Satanas​—apil ang tanang dili mahinulsolon ug daotag motibong mga bakakon nga nagsundog niya​—itambog sa “linaw nga kalayo.” (Pin. 20:10; 21:8; Sal. 5:6) Kita nahibalo nga si Jehova “dili usa ka tawo nga siya mamakak.” Gani, “dili gayod mahimo nga mamakak ang Diyos.” (Num. 23:19; Heb. 6:18) “Ginadumtan ni Jehova [ang] bakakon nga dila.” (Prov. 6:16, 17) Aron maangkon ang iyang pag-uyon, kinahanglan natong sundon ang iyang sukdanan sa pagkamatinud-anon. w18.10 8 ¶10-13

Ibutang ta nga paamoton ka sa imong amo para sa usa ka selebrasyon nga konektado sa bakak nga pagsimba. Unsay imong buhaton? Imbes maghulat nga mahitabo ang ingon ani nga mga situwasyon, nganong dili pamalandongon karon ang panghunahuna ni Jehova nianang mga butanga? Unya, kon duna may mahitabo nga ingon ana, mas sayon na nimo ang pagbuhat ug pagsulti kon unsay husto. Ang pagpamalandong daan sa panghunahuna ni Jehova makatabang sab nato nga magmatinumanon dihang dunay medikal nga emerhensiya. Siyempre, determinado tang dili magpaabonog kompletong dugo o usa sa upat ka pangunang sangkap niini, pero dunay pipila ka procedure nga naglangkit sa dugo ug nagkinahanglag personal nga desisyon base sa mga prinsipyo sa Bibliya. (Buh. 15:28, 29) Seguradong dili sa ospital ang saktong panahon sa pagpamalandong niana, tingali dihang nag-antos na ta sa kasakit ug gipresyur nga modesisyon dayon. Karon na ang panahon nga mag-research, kompletohon ang legal nga mga dokumento nga nagpakita sa imong gusto, ug estoryahon ang imong doktor. w18.11 24 ¶5; 26 ¶15-16

Si Jehova usa ka mahigugmaong magbalantay nga mapinanggaong naggakos sa iyang katawhan, nga nanalipod nila batok sa ilang mga kaaway. Pagkanindot niini nga pasalig kanato samtang nagkaduol ang kataposan niining sistemaha sa mga butang! Si Jehova padayong mag-atiman sa iyang katawhan sa nagkaduol nga dakong kasakitan. (Pin. 7:9, 10) Busa, bata man o tigulang, himsog o baldado, ang katawhan sa Diyos dili mahadlok panahon sa dakong kasakitan. Gani, lahi kaayo ang ilang himoon! Ilang hinumdoman ang gisulti ni Jesu-Kristo: “Tindog nga tul-id ug ihangad ang inyong mga ulo, tungod kay ang inyong kaluwasan nagakaduol na.” (Luc. 21:28) Magmasaligon sila bisag moatake na ang Gog​—ang alyansa sa gamhanang kanasoran. (Ezeq. 38:2, 14-16) Nganong magmasaligon ang katawhan sa Diyos? Tungod kay nahibalo sila nga dili mausab si Jehova. Kanunay niyang pamatud-an nga siya usa ka Manluluwas nga mahigugmaon ug nagpakitag konsiderasyon.​—Isa. 26:20. w18.09 26 ¶15-16

Seguradong nadasig ang matinumanong mga Israelinhon dihang gisulti ni Jehova kanila ang maong mga pulong. Ingong usa sa mga alagad ni Jehova, makaseguro sab ka nga gimahal ka niya pag-ayo. Ang Pulong sa Diyos nagsaad niadtong nagsunod sa putling pagsimba: “Ingong Usa nga gamhanan, siya magaluwas. Siya magasadya tungod kanimo uban ang pagmaya.” (Sof. 3:16, 17) Bisag unsang kalisdanan ang atubangon sa iyang katawhan, si Jehova nagsaad nga lig-onon ug hupayon niya sila. “Sama sa usa ka bata magsuso ka ug kugoson ka niya ug hagwahagwaon. Sama sa anak nga lipayon sa iyang inahan, lipayon ko usab kamo.” (Isa. 66:12, 13, Ang Bag-ong Maayong Balita Biblia) Pagkamakapatandog nga esena​—usa ka mahigugmaong inahan nga nagkugos sa iyang gamayng bata o naghagwahagwa niini! Nianang paagiha giilustrar ni Jehova ang kadako sa iyang gugma alang sa iyang matuod nga mga magsisimba. Ayaw gyod pagduhaduha nga ikaw bililhon kaayo ug gimahal ni Jehova.​—Jer. 31:3. w18.09 13-14 ¶6-7

Sa kasaysayan sa karaang Israel, may lainlaing kahigayonan sa pagboluntaryo. (Ex. 36:2; Neh. 11:2) Karon, daghan pod kag oportunidad sa pagboluntaryo gamit ang imong panahon, kuwarta, ug abilidad sa pagtabang sa mga igsoon. Ug magmalipayon ug mapanalanginan gyod ka tungod sa imong pagboluntaryo. Kadtong nagboluntaryo sa mga proyekto sa organisasyon sagad makailailag bag-ong mga higala. Pananglitan, ang sister nga si Margie nakaboluntaryo sa pagpanukod ug Kingdom Hall sulod sa 18 ka tuig. Nianang mga panahona, ubay-ubay nga batabatang sister ang iyang nabansay. Para niya, kini maoy maayong paagi sa pagdinasigay. (Roma 1:12) Dihang mag-atubag problema, dasigon siya sa iyang mga naamiga sa maong mga proyekto. Nakaboluntaryo na ba ka sa pagpanukod? w18.08 25 ¶9, 11

Dihang gisulat ni Pablo kanang mga pulonga, si Timoteo lagmit kapig 30 anyos. Pero giasayn na siya ni Pablo sa pag-atiman sa bug-at nga mga responsibilidad. Bisag unsa may rason niini nga tambag, klaro ang punto. Dili nato hukman ang batabatang mga brader base lang sa ilang edad. Maayong hinumdoman nato nga nahuman ni Ginoong Jesus ang iyang ministeryo dinhi sa yuta sa edad nga 33. Bahin tingali ta sa kultura nga ubos ang pagtan-aw sa batabatang mga lalaki. Kon mao, basin magduhaduha ang mga ansiyano sa kongregasyon sa pagrekomendar sa kuwalipikado nga batabatang mga brader nga mahimong ministeryal o ansiyano. Kinahanglang hinumdoman sa tanang ansiyano nga wala maghatag ang Bibliya ug espesipikong edad una marekomendar ang usa ingong ministeryal nga alagad o ansiyano.​—1 Tim. 3:1-10, 12, 13; Tito 1:5-9. w18.08 11-12 ¶15-16

Aron makahimog maayong mga desisyon, nagkinahanglan tag kasaligang impormasyon. Busa, magmapilion gyod ta sa mga impormasyon nga atong basahon. (Filip. 4:8, 9) Dili angayng hutdon nato ang atong panahon sa pagtan-awg kuwestiyonableng mga balita sa Internet o pagbasag dili kasaligang impormasyon nga gipakaylap pinaagig e-mail. Ug importante gyod nga likayan ang website sa mga apostata. Gusto nilang paluyahon ang katawhan sa Diyos ug tuison ang kamatuoran. Ang dili kasaligang impormasyon moresultag dili maayong desisyon. Ayawg pakamenosa ang epekto sa sayop nga impormasyon diha sa imong hunahuna ug kasingkasing. Konsideraha ang nahitabo sa panahon ni Moises dihang ang 10 sa 12 ka espiyang gipadala sa Yutang Saad nagdalag dili maayong balita. (Num. 13:25-33) Ang ilang gipasobrahang balita nakapaluya sa katawhan sa Diyos. (Num. 14:1-4, 6-10) Imbes susihon kon unsay tinuod ug magpakitag pagsalig kang Jehova, mituo sila sa dili maayong balita. w18.08 4 ¶4-5

Kadaghanang tawo dunay pipila ka maayong kinaiya, ug daghang dili Saksi ang wala maghimog grabeng pagkadaotan. Kon ingon ana ang imong mga higala, makaingon ba ka nga maayo silang kauban? Hunahunaa ang ilang epekto diha sa imong relasyon kang Jehova. Makatabang ba sila nga mas masuod ka kang Jehova? Unsay naa sa ilang kasingkasing? Pananglitan, ang ila bang ginaestorya bahin lang sa uso nga sinina ug pamostura, kuwarta, gadyet, kalingawan, o ubang materyal nga butang? Ang ila bang ginasulti sagad mag-apil ug pagpanglibak o bastos nga mga komedya? Si Jesus nagpasidaan: “Gikan sa kadagaya sa kasingkasing ang baba mosulti.” (Mat. 12:34) Kon naamgohan nimo nga ang imong mga kauban makadaot sa imong relasyon kang Jehova, lihok dayon pinaagi sa paghimog limitasyon ug, kon gikinahanglan, pagtapos sa maong panaghigalaay.​—Prov. 13:20. w18.07 19 ¶11

Dihang 80 anyos na si Moises, gisugo siya ni Jehova sa pagluwas sa Israel gikan sa pagkabihag sa Ehipto. (Ex. 3:10) Kadaghan mibalibad si Moises. Pero nagpailob si Jehova ug gihatagan pa gani niyag gahom si Moises sa paghimog mga milagro. (Ex. 4:2-9, 21) Puwede unta niyang hadlokon si Moises aron motuman dayon. Pero, si Jehova mapailobon ug buotan, nga nagdasig sa iyang makasaranganon ug mapaubsanong alagad. Milampos ba ang iyang paagi? Oo! Si Moises nahimong maayong lider nga nagpakitag kalumo ug konsiderasyon sama kang Jehova. Kon naa kay awtoridad importante gyong sundogon nimo ang pagpakitag konsiderasyon, pagkabuotan, ug pagpailob ni Jehova sa imong pagtratar niadtong ilalom sa imong awtoridad. (Col. 3:19-21; 1 Ped. 5:1-3) Kon maningkamot ka sa pagsundog kang Jehova ug sa Dakong Moises, si Jesu-Kristo, dali kang duolon ug makapadasig ka sa uban.​—Mat. 11:28, 29. w18.09 24-25 ¶7-10

Paningkamot sa paghatag ug maayong impluwensiya​—nga makapalig-on sa panaghiusa sa kongregasyon. Maayo kon gibuhat na nimo kini. Pero puwede ka bang “magpasangkad” pinaagi sa paghimo niini nga labaw pa ug mas makanunayon? (2 Cor. 6:11-13) Puwede ka bang maningkamot pa sa pagpalamdag sa kahayag sa kamatuoran diha sa imong mga silingan? Ang imong maayong sinultihan ug panggawi tingali makadani sa imong silingan ngadto sa kamatuoran. Pangutan-a ang kaugalingon: ‘Unsay panglantaw sa akong mga silingan kanako? Limpiyo ba pirme ang akong balay ug kabtangan nga makahatag ug maayong impresyon sa mga silingan? Mangita ba kog paagi nga makatabang sa uban?’ Kon makig-estorya sa ubang Saksi, puwede ba nimo silang pangutan-on kon unsay epekto sa ilang pagkabuotan ug maayong panggawi ngadto sa ilang mga paryente, silingan, kauban sa trabaho, o eskolmet? Lagmit makadungog kag maayong mga eksperyensiya.​—Efe. 5:9. w18.06 24 ¶13-14

Tinuod kana nga pasidaan alang niadtong mipatay sa tinun-ang si Esteban, ug tinuod sab nâ sa uban nga sama nila. (Buh. 6:8, 12; 7:54-60) Daghang panatiko sa relihiyon nga naghimog krimen, sama sa pagpatay, ang nagsupak sa mga balaod sa Usa nga ilang giangkon nga gisimba! (Ex. 20:13) Klaro, dili maayong giya ang ilang mga konsensiya! Unsay atong buhaton aron mahimong maayong giya ang atong konsensiya? Ang mga balaod ug prinsipyo sa Pulong sa Diyos “mapuslanon sa pagpanudlo, sa pagpamadlong, sa pagpanul-id sa mga butang, sa pagdisiplina diha sa pagkamatarong.” (2 Tim. 3:16) Busa, pinaagi sa makugihong pagtuon sa Bibliya ug pagpamalandong ug pagpadapat sa giingon niini, mabansay nato ang atong konsensiya. Kini mas mahiuyon sa panghunahuna sa Diyos ug mahimong kasaligan nga giya. w18.06 16-17 ¶3-4

Ang espada nga gigamit sa Romanong mga sundalo sa panahon ni Pablo may gitas-ong 50 sentimetros ug gidisenyo para sa manomanong pagpakig-away. Hanas kaayo ang maong mga sundalo kay magpraktis sila kada adlaw. Gipakasama ni Pablo ang Pulong sa Diyos sa espada nga gihatag ni Jehova kanato. Pero kinahanglang mahimo una tang hanas sa paggamit niana aron sa pagdepensa sa atong pagtuo​—o sa pag-adyas sa atong panghunahuna. (2 Cor. 10:4, 5; 2 Tim. 2:15) Dili ta angayng mahadlok kang Satanas ug sa mga demonyo. Gamhanan sila, pero puwedeng mapildi. Ug sila may kamatayon. Sa dili madugay, sulod sa Usa ka Libo ka Tuig nga Pagmando sa Kristo, sila bilanggoon ug dili na makahimog kadaot sa katawhan. Human niana, sila pagalaglagon. (Pin. 20:1-3, 7-10) Nakaila ta sa atong kaaway, sa iyang mga taktika, ug sa iyang tuyo. Sa tabang ni Jehova, makasukol ta sa atong kaaway! w18.05 30 ¶15; 31 ¶19-21

Si Adan seguradong nahibalo nga ang mga bitin dili makasulti. Maong nakahunahuna tingali siya nga usa ka espiritung linalang ang nakig-estorya kang Eva pinaagi sa bitin. (Gen. 3:1-6) Si Adan ug Eva wala kaayo makaila niini nga espiritu. Pero gipili ni Adan nga talikdan ang iyang mahigugmaon ug langitnon nga Amahan ug moduyog niini nga espiritu sa pagsupak sa kabubut-on sa Diyos. (1 Tim. 2:14) Dihadiha, gipaila ni Jehova kon kinsa kini nga kaaway nga nag-impluwensiya kang Adan ug Eva. Nagsaad sab si Jehova nga sa ngadtongadto kini nga daotan pagalaglagon. Pero nagpasidaan pod si Jehova nga ang maong espiritu, nga nakig-estorya pinaagi sa bitin, maglutos niadtong nahigugma sa Diyos. (Gen. 3:15) Wala gyod isulti ni Jehova kanato ang personal nga ngalan sa anghel nga mirebelde kaniya. Ug ayha pa gipaila sa Diyos ang mahulagwayong ngalan sa maong kaaway mga 2,500 ka tuig human sa unang pagrebelde.​—Job 1:6. w18.05 22 ¶1-2

Kon maluya ka dihang magsangyaw sa dili madinawatong mga teritoryo, imong masabtan si apostol Pablo. Sulod sa mga 30 ka tuig nga pagsangyaw, daghan siyag natabangan nga nahimong tinun-an ni Kristo. (Buh. 14:21; 2 Cor. 3:2, 3) Bisan pa niana, gamay rang Hudiyo ang nahimong alagad sa Diyos. Daghan ang wala maminaw kang Pablo, ug ang uban naglutos pa gani niya. (Buh. 14:19; 17:1, 4, 5, 13) Unsay epekto kang Pablo sa negatibong reaksiyon sa mga Hudiyo? Siya miingon: “Ako nagsulti sa tinuod diha kang Kristo . . . ako adunay dakong kaguol ug walay-hunong nga kasakit sa akong kasingkasing.” (Roma 9:1-3) Nganong gibati nâ ni Pablo? Tungod kay gimahal niya ang pagsangyaw. Gisangyawan niya ang mga Hudiyo kay gimahal niya sila. Maong sakit para kang Pablo nga makitang wala nila dawata ang kaluoy sa Diyos. Sama ni Pablo, nagsangyaw ta sa mga tawo tungod sa atong gugma kanila.​—Mat. 22:39; 1 Cor. 11:1. w18.05 13 ¶4-5

Gipakita ni Pablo nga bisan kadtong may responsibilidad sa pagdasig sa uban kinahanglan pong dasigon. Misulat siya sa mga Kristohanon sa Roma: “Ako nangandoy sa pagpakigkita kaninyo, aron ako makahatag kaninyo ug espirituwal nga gasa aron mapalig-on kamo; o, labi pang maayo, aron adunay pagdinasigay sa inyong taliwala, pinaagi sa pagtuo sa tagsatagsa, sa inyo ug sa akoa.” (Roma 1:11, 12) Oo, bisag daghan ang gidasig ni Pablo, may mga higayon nga kinahanglan sab siyang dasigon. (Roma 15:30-32) Ang mga igsoon nga nagsakripisyo sa kaugalingon angayng komendahan. Kinahanglan pong dasigon ang mga igsoon nga nagpabiling tagsaanon kay gituman nila ang tambag nga magminyo “lamang diha sa Ginoo.” (1 Cor. 7:39) Nagkinahanglan sab ug pagdasig ang mga Kristohanon nga nagmatinumanon bisan sa paglutos o sakit.​—2 Tes. 1:3-5. w18.04 21 ¶3-5