Hulyo

Nagkinabuhi ta sa “makuyaw nga mga panahong lisod sagubangon,” ug magkalisod ang kinabuhi samtang wala pa laglaga ang mga daotan ug mahibalik ang tinuod nga kalinaw sa yuta. (2 Tim. 3:1) Busa maayong pangutan-on ang kaugalingon, ‘Asa man ko nangitag tabang ug giya?’ Gatosan ka tuig kanhi, gipakita sa usa ka salmista nga kinahanglan gyong motan-aw kang Jehova dihang manginahanglag tabang. (Sal. 123:1-4) Gipakasama niya ang atong pagtan-aw kang Jehova ngadto sa usa ka alagad nga nagtan-aw sa iyang agalon. Unsay gipasabot sa salmista? Aw, ang usa ka alagad dili lang motan-aw sa iyang agalon aron mahatagag pagkaon ug proteksiyon. Kanunay pod siyang motan-aw sa iyang agalon aron iyang masabtan kon unsay ipabuhat sa iyang agalon ug tumanon kini. Sa samang paagi, kinahanglang magbasa ta sa Pulong sa Diyos kada adlaw aron masabtan kon unsay gustong ipabuhat ni Jehova kanato ug tumanon kana. Pinaagi lang ana nga makaseguro tang pakitaan tag pabor ni Jehova dihang manginahanglag tabang. w18.07 12 ¶1-2

Si Jesus naghisgot bahin sa kagawasan gikan sa kinagrabehang pagkaulipon ug pagdaogdaog nga nasinati sa tawo​—ang ‘pagkaulipon sa sala.’ (Juan 8:34) Ang sala mag-aghat nato sa pagbuhat ug daotan. Kini magpugong sab nato sa pagbuhat sa atong nahibaloan nga matarong o sa paghimo sa atong nahibaloan nga kaya natong buhaton. Nianang paagiha kita naulipon sa sala, ug ang resulta mao ang kapakyasan, kasakit, pag-antos, ug sa ulahi, kamatayon. (Roma 6:23) Ayha pa nato matagamtam ang tinuod nga kagawasan nga nabatonan sa atong unang ginikanan sa sinugdan kon makalingkawas na ta sa pagkaulipon sa sala. Sa pag-ingon ni Jesus: “Kon magpabilin kamo sa akong pulong,” siya nagpasabot nga dunay pipila ka kinahanglanon o limitasyon aron mahatagan niyag kagawasan. (Juan 8:31) Ingong dedikadong mga Kristohanon, gidumilian na nato ang kaugalingon ug midesisyon ta nga magkinabuhi sumala sa mga pagtulon-an ni Kristo. (Mat. 16:24) Ingon sa gisaad ni Jesus, tinuod tang mahigawas kon bug-os nang ipadapat kanato ang mga benepisyo sa iyang halad lukat. w18.04 7 ¶14-16

Si Jehova mahunahunaon sa pagbati sa iyang katawhan​—bisag usahay sayop ang ilang panghunahuna. Tagda ang kahimtang ni Jonas. Gipadala siya sa Diyos aron ipahayag ang paghukom ngadto sa mga taga-Nineve. Dihang naghinulsol sila, wala sila laglaga sa Diyos. Pero, si Jonas wala malipay niini. Siya “nanginit sa kasuko” kay wala matuman ang iyang tagna nga laglagon ang Nineve. Apan, gipailoban ni Jehova si Jonas ug gitabangan siya nga mausab ang iyang panghunahuna. (Jon. 3:10–4:11) Sa ulahi, nasabtan ra ni Jonas ang rason, ug gigamit pa gani siya ni Jehova sa pagsulat niini nga hitabo para sa atong kaayohan. (Roma 15:4) Ang pakiglabot ni Jehova sa iyang katawhan nagpasalig nato nga siya may empatiya nila. Nahibalo siya sa kasakit ug pag-antos sa matag usa kanato. Nakasabot siya sa tanan natong panghunahuna, pagbati, ug limitasyon. Ug “dili niya itugot nga tentalon [ta] nga labaw sa [atong] maantos.” (1 Cor. 10:13) Makapahupay gyod nâ nga pasalig! w19.03 16 ¶6-7

Ilalom sa Balaod ni Moises, responsibilidad sa tinudlong mga ansiyano ang paghukom dili lang sa mga butang maylabot sa pagsimba kang Jehova, kondili sa mga away ug krimen usab. Tagda ang pipila ka pananglitan. Kon ang usa ka Israelinhon makapatay, dili dayon siya patyon. Imbestigahan sa mga ansiyano sa iyang siyudad ang panghitabo una modesisyon kon haom ba ang silot nga kamatayon. (Deut. 19:2-7, 11-13) Ang mga ansiyano maghukom sab sa lainlaing bahin sa kinabuhi​—gikan sa paghusay sa away tungod sa kabtangan hangtod sa problema sa magtiayon. (Ex. 21:35; Deut. 22:13-19) Dihang ang mga ansiyano patas ug ang mga Israelinhon nagsunod sa Balaod, ang tanan nakabenepisyo, ug ang nasod nagpasidungog kang Jehova. (Lev. 20:7, 8; Isa. 48:17, 18) Gipakita niana nga ang tanang bahin sa atong kinabuhi importante kang Jehova. Gusto niyang patas ug mahigugmaon ta sa pagpakiglabot sa uban. Ug mahibalo siya sa atong isulti ug buhaton, bisag mag-inusara ta sa atong balay. w19.02 23 ¶16-18

Dihang ma-stress ta, lisod nga magmaaghop. Tingali sakit na tang manulti ug dili na maayog tinagdan. Kon na-stress ka, hunahunaa ang ehemplo ni Jesus. Panahon sa iyang kataposang mga bulan dinhi sa yuta, na-stress pag-ayo si Jesus. Siya nahibalo nga siya patyon ug paantoson pag-ayo. (Juan 3:14, 15; Gal. 3:13) Pipila ka bulan una sa iyang kamatayon, siya miingon nga naguol kaayo siya. (Luc. 12:50) Ug pipila ka adlaw una sa iyang kamatayon, si Jesus miingon: “Ang akong kalag nabalisa.” Atong makita ang iyang pagkamapainubsanon ug pagpasakop sa Diyos dihang gisulti niya ang iyang pagbati diha sa pag-ampo. (Juan 12:27, 28) Dihang miabot ang adlaw sa iyang kamatayon, maisogong gitugyan ni Jesus ang iyang kinabuhi ngadto sa mga kaaway sa Diyos, kinsa nagpatay niya sa sakit kaayo ug makauulawng paagi. Bisan pag na-stress ug nag-antos pag-ayo, gituman ni Jesus ang kabubut-on sa Diyos. Walay duhaduha, si Jesus ang pinakamaayong ehemplo sa kaaghop bisag na-stress!​—Isa. 53:10. w19.02 11 ¶14-15

Aron regular nga makatambong, basin kinahanglan tang magmaisogon sa pag-atubang sa mga kalisdanan. Ang pipila ka igsoon nanambong gihapon sa tigom bisag nagbangotan, nadismayar, o nasakit. Ang uban mitambong gihapon bisan sa grabeng paglutos sa mga membro sa pamilya o gobyerno. Hunahunaa ang epekto sa atong ehemplo ngadto sa mga igsoon nga napriso tungod sa pagtuo. (Heb. 13:3) Dihang mahibaloan nila nga nagpadayon ta sa pag-alagad bisan pa sa mga kalisdanan, mas molig-on ang ilang pagtuo, ug sila magmaisogon ug magmatinumanon. Dihang napriso si Pablo sa Roma, malipay siya kon makabalita siya nga nagmatinumanon ang iyang mga igsoon. (Filip. 1:3-5, 12-14) Wala madugay o kaha human siya pagawsa, gisulatan ni Pablo ang mga Hebreohanon. Niana nga sulat, gidasig niya sila nga dili pasagdan ang panagkatigom.​—Heb. 10:25. w19.01 28 ¶9

Gusto ni Satanas nga mahisama ta niya​—usa ka rebeldeng wala magpabili sa sukdanan ni Jehova ug kaugalingon ray gihunahuna. Palibotan ta niyag mga tawo nga naimpluwensiyahan na niya ug gusto niyang madaot nila ang atong hunahuna ug binuhatan. (1 Cor. 15:33) Sulayan sab ni Satanas pag-impluwensiya ang atong kasingkasing pinaagi sa pagpatuo nato nga mas kasaligan ang tawhanong kaalam imbes ang panghunahuna ni Jehova. (Col. 2:8) Tagda pananglitan ang usa ka ideya nga gipasiugda ni Satanas​—nga ang pagkahimong dato mao ang labing importante. Kadtong maghunahuna niana lagmit madato, o kaha dili. Bisan unsa pa man, mameligro sila. Ngano? Tungod kay mahimong magpokus sila pag-ayo sa pagpangitag kuwarta nga masakripisyo na ang ilang panglawas, relasyon sa pamilya, ug bisan ang ilang relasyon sa Diyos aron lang makab-ot ang ilang tumong. (1 Tim. 6:10) Mapasalamaton ta nga gitabangan ta sa atong langitnong Amahan nga makabaton ug balanseng panglantaw sa kuwarta.​—Eccl. 7:12; Luc. 12:15. w19.01 15 ¶6; 17 ¶9

Bisan niadtong wala pa moanhi sa yuta ang Anak ni Jehova ug maghatag ug hingpit nga ehemplo sa pagdasig, ang matinumanong mga alagad ni Jehova nahibalo na nga gikinahanglan ang pagdasig. Dihang gihulga sa mga taga-Asirya, gitigom ni Ezequias ang mga pangulo sa kasundalohan ug ang katawhan sa Juda sa pagdasig kanila. “Ug ang katawhan misalig sa [iyang] mga pulong.” (2 Cron. 32:6-8) Bisag nagkinahanglan siyag pagdasig, gitudloan ni Job ang iyang tulo ka “samokan nga mga maghuhupay” bahin sa pagdasig. Giingnan niya sila nga kon siya ang naa sa ilang kahimtang, iya silang ‘lig-onon pinaagi sa mga pulong sa iyang baba, ug ang paghupay sa iyang mga ngabil makapuypoy’ nila. (Job 16:1-5) Sa ulahi, si Job gidasig ni Elihu ug ni Jehova mismo.​—Job 33:24, 25; 36:1, 11; 42:7, 10. w18.04 16 ¶6; 17 ¶8-9

Gihisgotan na ni Isaias kon unsaon pagpalig-on ni Jehova ang iyang katawhan pinaagi sa pag-ingon: “[Si] Jehova moabot ingong usa nga kusganon, ug ang iyang bukton magmando alang kaniya.” (Isa. 40:10) Sa Bibliya, ang “bukton” sagad nagsimbolo sa gahom. Busa, ang ekspresyong ang “bukton [ni Jehova] magmando” magpahinumdom nato nga si Jehova usa ka gamhanang Hari. Gigamit niya ang iyang dili mapilding gahom sa pagtabang ug pagdepensa sa iyang mga alagad kaniadto, ug siya padayong nagpalig-on ug nanalipod niadtong nagsalig niya karon. (Deut. 1:30, 31; Isa. 43:10) Ilabina dihang lutoson ta sa mga kaaway, tumanon ni Jehova ang iyang saad: “Ako magapalig-on kanimo.” Sa pipila ka dapit sa kalibotan karon, ang atong mga kaaway naningkamot pag-ayo aron pahunongon ang buluhatong pagsangyaw o idili ang atong organisasyon. Bisan pa niana, wala ta mabalaka pag-ayo sa maong mga pag-atake. Gipasaligan ta ni Jehova maong lig-on ug masaligon ta. Siya nagsaad: “Bisan unsa nga hinagiban nga buhaton batok kanimo dili magmalamposon.”​—Isa. 54:17. w19.01 5-6 ¶12-13

Dili sama sa mga hayop, duna moy espirituwal nga panginahanglan​—nga ang Maglalalang ray makatagana. (Mat. 4:4) Kon maminaw mo niya, mahimo mong masinabtanon, maalamon, ug malipayon. Ang Diyos nagtagana sa inyong espirituwal nga panginahanglan pinaagi sa iyang Pulong ug sa “matinumanon ug maalamong ulipon,” nga nag-andam ug abundang espirituwal nga pagkaon. (Mat. 24:45) Ug nagkadaiya gyod ang maong pagkaon! (Isa. 65:13, 14) Ang espirituwal nga pagkaon nga gitagana sa Diyos maghatag ninyog kaalam ug katakos sa panghunahuna, nga manalipod ninyo sa daghang paagi. (Prov. 2:10-14) Pananglitan, kini nga mga hiyas makatabang ninyo nga mailhan ang bakak nga mga pagtulon-an, sama sa panghunahuna nga walay Maglalalang ug sekreto kuno sa kalipay ang kuwarta ug kabtangan. Tabangan sab mo niana nga mailhan ug malikayan ang sayop nga mga tinguha ug ang mga panggawi nga makadaot sa kaugalingon. Busa, padayon sa pagpangita sa kaalam ug sa katakos sa panghunahuna, nga isipon kining bahandi! w18.12 20 ¶6-7

Moabot ba ang panahon dihang ang atong mga adlaw “mahisama sa mga adlaw sa usa ka kahoy”? Ang pipila ka kahoy mabuhig linibo ka tuig. Ang mga tawo kinahanglang himsog aron mabuhi ug ingon ana ka dugay. Kon mabuhi sila sa kahimtang nga sama sa gitagna ni Isaias, katumanan gyod nâ sa damgo, usa ka paraiso! Ug matuman gyod nâ! Palandonga kon nganong ang mga saad nagpakita nga may umaabot nga paraiso: Ang mga tawo sa tibuok yuta panalanginan sa Diyos. Walay mabalaka nga atakehon sila sa mga hayop o sa samag hayop nga mga tawo. Ang mga buta, bungol, ug bakol maayo. Ang mga tawo makatukod ug kaugalingong balay ug makapananom. Mas taas silag kinabuhi kay sa mga kahoy. Oo, gipakita sa Bibliya nga mahitabo kana sa umaabot. Pero may moingon tingali nga kining mga tagnaa wala magpasabot nga dunay umaabot nga paraiso. Unsay imong lig-ong rason nga molaom nga duna unyay tinuod nga paraiso sa yuta? Ang labing bantogang tawo nga nabuhi sukad naghatag ug lig-ong rason.​—Luc. 23:43. w18.12 5 ¶13-15

Ang hunahuna nagausab-usab ug padayong nagabag-o. Kasagaran, ang maong kausaban nagdepende kon unsay gipasulod nato sa hunahuna ug gipamalandong. Pinaagi sa pagpamalandong sa panghunahuna ni Jehova, makombinsir ta nga husto ang iyang panglantaw. Dayon, mahimo nang natural nato ang pagsundog sa iyang panghunahuna. Pero matikdi nga aron masundog ang panghunahuna ni Jehova, kinahanglan tang ‘mohunong sa pagpaumol sumala niining sistemaha.’ Kinahanglang dili na ta maghunahuna sa mga ideya o panglantaw nga supak sa Diyos. Puwede natong ikailustrar sa pagkaon ang kaimportante niini. Ang tawong gustong mohimsog kinahanglang mokaon ug sustansiyadong pagkaon. Pero unsay kapuslanan niana kon pirme pod siyang mokaon ug daot nga pagkaon? Sa susama, mahimong walay kapuslanan ang atong paningkamot sa pagsundog sa panghunahuna ni Jehova kon magsige tag hunahuna sa mga ideya sa kalibotan. w18.11 21 ¶14-15

Kinahanglan tang magmadeterminado sa pagkinabuhi uyon sa kamatuoran kada adlaw. Ibakos ang kamatuoran. Sa kapanahonan sa Bibliya, ang bakos sa usa ka sundalo manalipod sa iyang hawak ug tiyan. Pero, aron makahatag ug proteksiyon ang bakos, kinahanglang hugot kini. Ang luag nga bakos dili makahatag ug proteksiyon. Sa unsang paagi ang espirituwal nga bakos makapanalipod nato? Kon hugot natong gibakos ang kamatuoran, kini manalipod nato batok sa sayop nga pangatarongan ug makatabang nato sa paghimog maayong mga desisyon. Dihang tentalon o sulayan ta, ang kamatuoran magpalig-on sa atong determinasyon sa pagbuhat kon unsay husto. Ingon nga ang sundalo dili gyod moadto sa gubat nga walay bakos, kinahanglang determinado ta nga dili paluagan o tangtangon ang bakos sa kamatuoran. Kinahanglang hugot nato ning ibakos pinaagi sa pagkinabuhi sumala sa kamatuoran. w18.11 12 ¶15

Dili nato mabatonan ang kamatuoran sa Pulong sa Diyos kon dili ta maningkamot. Kinahanglang andam tang mohimog bisan unsang sakripisyo aron mabatonan kini. Sama sa giingon sa maalamong magsusulat sa Proverbio, dihang atong ‘mapalit,’ o mabatonan, ang “kamatuoran,” kinahanglang mag-amping ta nga dili ni “ibaligya,” o mawala. Bisag libre ang usa ka butang, makagasto gihapon ka. Ang Hebreohanong pulong nga gihubad ug “palita” diha sa Proverbio 23:23 nagkahulogan sab ug “batoni.” Kanang mga pulonga nagpasabot nga ang usa maningkamot o may isakripisyo para sa usa ka importanteng butang. Ikailustrar tingali nato ang ideya sa pagpalit sa kamatuoran niining paagiha. Ibutang ta nga nag-advertise ang usa ka merkado ug “Libreng Saging.” Motungha ra bag kalit ang saging sa atong lamesa? Dili. Kinahanglang maningkamot ta sa pag-adto sa merkado aron kuhaon nâ. Libre ba ang saging? Oo, pero kinahanglan tang maningkamot ug mogahig panahon sa pag-adto sa merkado. Sa susama, dili kinahanglan ang kuwarta sa pagpalit sa kamatuoran. Pero, kinahanglan tang maningkamot aron mabatonan kana. w18.11 4 ¶4-5

Gipauban ni Jesus si Pedro, Santiago, ug Juan sa pag-adto sa tumoy sa bukid. Didto, ilang nakita ang usa ka talagsaong panan-awon. Ang nawong ni Jesus misidlak ug ang iyang sinina migilak. Dihay duha ka persona, nga nagrepresentar kang Moises ug Elias, nga nakig-estorya kang Jesus bahin sa iyang umaabot nga kamatayon ug pagkabanhaw. (Luc. 9:29-32) Dayon, usa ka hayag nga panganod ang mitabon nila, ug nakadungog silag tingog gikan sa panganod​—tingog sa Diyos! Ang panan-awon nagpakita sa umaabot nga himaya ug gahom ni Jesus ingong Hari sa Gingharian sa Diyos. Seguradong ang Kristo nadasig ug nalig-on sa pag-atubang sa umaabot nga pag-antos ug sakit nga kamatayon. Kana nakapalig-on pod sa pagtuo sa mga tinun-an sa pag-atubang sa mga pagsulay ug dakong buluhaton sa umaabot. Mga 30 ka tuig sa ulahi, gihisgotan ni Pedro ang transpigurasyon, nga nagpakitang klaro pa gihapon kana sa iyang hunahuna.​—2 Ped. 1:16-18. w19.03 10 ¶7-8

Unsa ang usa ka paagi nga lahi ang tinuod nga mga Kristohanon sa mga membro sa bakak nga relihiyon? ‘Mosulti ta nga matinud-anon.’ (Zac. 8:16, 17) Mosulti ta sa tinuod​—ginagmay ug dinagko​—ngadto sa dili nato kaila, sa atong katrabaho, amigo, ug minahal. Komosta kon batan-on ka nga dili gustong malahi sa imong mga kaedad? Seguroa nga dili doble ang imong pagkinabuhi, nga matarong tan-awon kon kauban sa imong pamilya ug sa kongregasyon pero molihok nga lahi kaayo kon kauban sa mga batan-on sa kalibotan ug diha sa social media. Kabakakan ang maong pagkinabuhi, nga naglimbong sa inyong mga ginikanan, igsoon sa pagtuo, ug sa Diyos. (Sal. 26:4, 5) Si Jehova nahibalo kon ‘nagpasidungog lang ta niya pinaagi sa atong mga ngabil, apan ang atong mga kasingkasing halayo kaayo niya.’ (Mar. 7:6) Mas maayo kon atong himoon ang giingon sa panultihon: “Ayaw itugot nga masina ang imong kasingkasing sa mga makasasala, kondili magmahadlokon ka kang Jehova sa tibuok adlaw.”​—Prov. 23:17. w18.10 9 ¶14-15

Ang katawhan sa Diyos maoy usa ka espirituwal nga pamilya nga nahigugma sa usag usa. (1 Juan 4:21) Usahay mohimo silag dagkong sakripisyo para sa mga igsoon. Pero, sagad gipakita nila ang ilang gugma sa ginagmayng paagi, sama sa mahunahunaong mga pulong ug maayong mga buhat. Kon magpakita tag kaayo ug konsiderasyon, kita “mahimong mga tigsundog sa Diyos, ingon nga hinigugmang mga anak.” (Efe. 5:1) Si Jesus hingpit nga nagsundog sa iyang Amahan. Siya miingon: “Umari kanako, kamong tanang nabudlayan ug nabug-atan, ug ako magapalagsik kaninyo . . . , kay ako malumog-buot ug mapainubsanon sa kasingkasing.” (Mat. 11:28, 29) Kon sundogon nato ang Kristo pinaagi sa “pagkamahunahunaon [o, pagpakitag konsiderasyon] sa timawa,” malipay ang atong langitnong Amahan ug malipay sab ta. (Sal. 41:1) Busa, ipasundayag nato ang atong gugma pinaagi sa padayong pagpakitag konsiderasyon diha sa pamilya, kongregasyon, ug sa ministeryo. w18.09 28 ¶1-2

Panahon sa katalagman, ang katawhan sa Diyos may kahigayonan sa pagbuhat uban niya pinaagi sa pagtabang sa mga igsoon sa praktikal nga paagi. Pananglitan, makahatag silag donasyon para niadtong naapektohan. (Juan 13:34, 35; Buh. 11:27-30) Makatabang pod sila sa pagpanglimpiyo o pagpanukod. Tagda si Gabriela, usa ka sister nga taga-Poland. Naguba ang iyang balay tungod sa baha. Pero nadasig siya dihang gitabangan siya sa mga igsoon gikan sa mga kongregasyong duol sa ila. “Dili ko ganahang maghisgot bahin sa nawala nako​—materyal ra to nga mga butang,” miingon siya. “Hinuon, gusto nakong hisgotan ang akong nadawat. Kini nga eksperyensiya nagpasalig nako nga ang pagkahimong bahin sa kongregasyon maoy talagsaong pribilehiyo ug makapalipay kaayo.” Daghan niadtong natabangan human sa katalagman ang nakaingon nga mas nadasig sila. Ug kadtong nagbuhat uban kang Jehova pinaagi sa pagtabang sa uban malipayon sab kaayo.​—Buh. 20:35; 2 Cor. 9:6, 7. w18.08 26 ¶12

Aron maampingan nato ang kasingkasing, kinahanglang mailhan nato ang kapeligrohan ug molihok dayon sa pagpanalipod sa kaugalingon. Ang pulong nga “ampingi,” o bantayi, magpahinumdom nato sa trabaho sa tigbantay. Sa panahon ni Haring Solomon, ang mga tigbantay magbarog diha sa paril sa siyudad aron magpahibalo kon may kapeligrohan. Ang paghunahuna niana makatabang nato nga masabtan kon unsay angay natong himoon aron dili maimpluwensiyahan ni Satanas ang atong hunahuna. Kaniadto, ang mga tigbantay makigkooperar sa mga magbalantay sa ganghaan. (2 Sam. 18:24-26) Sila magtinabangay sa pagpanalipod sa siyudad pinaagi sa pagsegurong sirado ang ganghaan kon dunay moatakeng mga kaaway. (Neh. 7:1-3) Ang atong nabansay sa Bibliya nga konsensiya maoy magsilbing tigbantay nato ug magpasidaan dihang mosulay si Satanas sa pag-atake sa atong kasingkasing​—sa ato pa, dihang mosulay siya sa pag-impluwensiya sa atong hunahuna, pagbati, motibo, o tinguha. Inigpasidaan sa atong konsensiya, kinahanglang maminaw ta ug isira dayon ang ganghaan, ingnon ta. w19.01 17 ¶10-11

Tan-awon ang kuwalipikasyon sa batabatang mga brader, dili base sa personal nga opinyon o kultura, kondili base sa sukdanan sa Pulong sa Diyos. (2 Tim. 3:16, 17) Dili maayo ang epekto kon ibase sa kultura, dili sa Bibliya, ang pagtudlog kuwalipikadong brader. Sa usa ka nasod, may kuwalipikadong ministeryal nga gipaatiman ug bug-at nga mga responsibilidad. Bisag mouyon ang mga ansiyano nga nakab-ot sa batabatang brader ang kuwalipikasyon sa Bibliya, wala gihapon siya marekomendar ingong ansiyano. Ang pipila ka edarang ansiyano miingon nga bata ra kaayo siyag hitsura para isipong ansiyano. Makapaguol, ang brader wala matudlo tungod lang sa iyang hitsura. Gipakita sa mga report nga komon kana nga panghunahuna sa daghang nasod. Busa, importante gyong mosalig ta sa Bibliya imbes sa atong kaugalingong opinyon! Kana ray paagi nga masunod si Jesus ug dili mohukom base sa makita.​—Juan 7:24. w18.08 12 ¶16-17

May kapeligrohan ang pagpasa dayog e-mail ug text. Sa pipila ka nasod, gilimitahan o gidili ang atong buluhaton. Tingali, ang mga oposer nianang mga nasora tinuyong magpakaylap ug mga balita aron mahadlok ta o magduda sa usag usa. Konsideraha ang nahitabo sa kanhing Soviet Union. Ang mga secret police, nga nailhang KGB, nagpakaylap ug estorya nga gitraydor kuno sa pipila ka prominenteng mga brader ang katawhan ni Jehova. Daghan ang mituo, ug ingong resulta, mibiya sila sa organisasyon ni Jehova. Pagkamakapaguol! Maayo na lang kay daghan nila ang mibalik sa ulahi. Pero, ang pipila wala na gyod mobalik ug nadaot ang ilang pagtuo. (1 Tim. 1:19) Unsaon nato paglikay nianang peligrosong resulta? Ayaw pagpakaylap ug negatibo o dili kasaligang impormasyon. Ayaw dayog tuo sa tanan nimong madunggan. Seguroang nahibalo ka sa tinuod nga impormasyon. w18.08 4 ¶8

Sa labing karaan nga Gregong mga manuskrito nga naa pa karon, wala gamita pirme ang punctuation. Busa, motungha ang pangutana: Miingon ba si Jesus, “Ako magaingon kanimo, karong adlawa ikaw makauban nako sa Paraiso”? O miingon ba siya, “Ako magaingon kanimo karong adlawa, Ikaw makauban nako sa Paraiso”? Hinumdomi nga una pa niana, giingnan ni Jesus ang iyang mga sumusunod: “Ang Anak sa tawo maanaa sa kasingkasing sa yuta tulo ka adlaw ug tulo ka gabii.” (Mat. 12:40; 16:21; 17:22, 23; Mar. 10:34; Buh. 10:39, 40) Busa, si Jesus wala moadto sa Paraiso sa adlaw nga siya ug ang kriminal namatay. Siya didto sa “Hades” [o, Lubnganan] sulod sa pipila ka adlaw, hangtod nga gibanhaw siya sa Diyos. (Buh. 2:31, 32) Ang kriminal nga hapit nang mamatay wala mahibalo nga may pakigsaad si Jesus sa iyang matinumanong mga apostoles nga makauban niya sila sa langitnong Gingharian. (Luc. 22:29) Dugang pa, ang kriminal wala pa gani mabawtismohi. (Juan 3:3-6, 12) Busa, ang gisaad ni Jesus usa gyod ka yutan-ong paraiso nga sa umaabot pa matuman. w18.12 6 ¶17-18, 20-21

Wala madugay ang mga Israelinhon nagsimba nag bulawang baka! Bisan pa niining klaro kaayong pagsupak, gipatuo sa mga Israelinhon ang ilang kaugalingon nga dapig gihapon sila kang Jehova. Gitawag pa gani ni Aaron ang pagsimba sa baka ingong “usa ka pista alang kang Jehova”! Unsay reaksiyon ni Jehova? Mibati siyang giluiban. Giingnan ni Jehova si Moises nga ang katawhan “migawi sa ikadaot” ug “mitipas sa dalan nga gisugo [Niya] kanila nga pagalaktan.” ‘Nasuko’ pag-ayo si Jehova, nga naghunahuna pa gani siyang paphaon ang bag-ong natukod nga nasod, ang Israel. (Ex. 32:5-10) Pero midesisyon si Jehova nga dili laglagon ang mga Israelinhon. (Ex. 32:14) Bisan pag miapil si Aaron sa paghimog idolo, siya naghinulsol ug miuban sa mga Levihanon sa pagdapig kang Jehova. Nianang adlawa, linibo ang namatay tungod sa idolatriya. Pero, kadtong midapig kang Jehova gisaarag panalangin.​—Ex. 32:26-29. w18.07 20 ¶13-16

Unsa ang kinamaayohang pag-ila nga atong gipaningkamotang madawat? Dili kini ang atensiyon nga gustong madawat sa mga tawo gikan sa eskuylahan, negosyo, ug kalingawan. Hinunoa, kini ang pag-ila nga gihisgotan ni Pablo: “Karon nga kamo nakaila na sa Diyos, o hinuon karon nga kamo nailhan na sa Diyos, naunsa bang namalik na man hinuon kamo pag-usab sa mahuyang ug walay bili nga paninugdang mga butang ug buot magpaulipon niini pag-usab?” (Gal. 4:9) Dako kaayong pribilehiyo nga ‘mailhan sa Diyos,’ ang Kinalabwang Magmamando sa uniberso! Gusto niya nga masuod ta pag-ayo niya. Sumala pa sa usa ka eskolar, gusto sa Diyos nga pakitaan tag pabor. Kon ilhon ta ni Jehova ingong iyang mga higala, atong nakab-ot ang rason kon nganong nabuhi ta.​—Eccl. 12:13, 14. w18.07 8 ¶3-4

Aron makabenepisyo ta sa mga balaod sa Diyos, kinahanglang molalom ang atong gugma ug pagtahod niini. (Amos 5:15) Unsaon nato ni pagbuhat? Kinahanglan natong sundogon ang panglantaw ni Jehova. Sa pag-ilustrar: Ibutang ta nga maglisod kag tulog. Giingnan ka sa imong doktor nga kinahanglan kang mokaog sustansiyadong pagkaon, mag-ehersisyo, ug magbag-o sa imong pagkinabuhi. Human nimo ni buhata, nakita nimo nga epektibo ni! Maapresyar gyod tingali nimo ang doktor sa pagtabang nimo nga mouswag ang imong pagkinabuhi. Sa susama, ang atong Maglalalang naghatag ug mga balaod nga makapanalipod nato gikan sa dili maayong resulta sa sala ug makapauswag sa atong kinabuhi. Hunahunaa lang ang benepisyo sa pagsunod sa mga balaod sa Bibliya maylabot sa pagpamakak, pagpanglimbong, pagpangawat, seksuwal nga imoralidad, kapintasan, ug espiritismo. (Prov. 6:16-19; Pin. 21:8) Kon matagamtam nato ang maayong resulta sa pagsunod kang Jehova, molalom ang atong gugma ug apresasyon kaniya ug sa iyang mga balaod. w18.06 17 ¶5-6

Tingali nahadlok ang gobernador nga magpahinabo si Jesus ug kagubot sa politika, nga maoy problema panahon sa pagmando ni Pilato. Si Jesus mitubag: “Ang akong gingharian dili bahin niining kalibotana.” (Juan 18:36) Dili mag-apil-apil si Jesus sa politika, kay didto sa langit ang iyang Gingharian. Giingnan niya si Pilato nga ang iyang buluhaton sa yuta mao ang ‘pagpamatuod sa kamatuoran.’ (Juan 18:37) Kon sama kang Jesus klaro natong masabtan ang gisugo kanato, dili ta mosuportar sa mga kalihokan aron maindependente, bisan diha sa atong kasingkasing. Tingali, dili ni sayon. “Sa among lugar, nagkadaghan ang nahimong ekstremista,” matod pa sa usa ka tigdumala sa sirkito. “Ang mga tawo nasyonalistiko kaayo, ug daghan ang nagtuo nga moarang-arang ang ilang kinabuhi kon maindependente sila sa gobyerno. Maayo na lang kay nagpabiling nahiusa ang mga igsoon pinaagi sa pagpokus diha sa pagsangyaw sa maayong balita sa Gingharian. Sila naglaom nga sulbaron sa Diyos ang inhustisya ug ang uban natong problema.” w18.06 4-5 ¶6-7

Tulo lang ka basahon sa Hebreohanong Kasulatan​—1 Cronicas, Job, ug Zacarias​—ang naghisgot sa ngalang Satanas, nga nagkahulogang “Magsusukol.” Nganong gamay rag mabasa bahin sa atong kaaway sa wala pa ang Mesiyas? Lagmit, dili gusto ni Jehova nga hatagag importansiya si Satanas pinaagi sa pagsigeg hisgot kaniya ug sa iyang mga kalihokan diha sa Hebreohanong Kasulatan. Ang pangunang katuyoan ni Jehova sa pagpasulat sa maong bahin sa Kasulatan mao ang pagpaila sa Mesiyas ug paggiya sa katawhan sa Diyos ngadto kaniya. (Luc. 24:44; Gal. 3:24) Dihang nahitabo na kana ug miabot na ang Mesiyas, siya ug ang iyang mga tinun-an gigamit ni Jehova aron ipaila si Satanas ug ang mga anghel nga miduyog niini. Haom kini kay gamiton ni Jehova si Jesus ug ang mga dinihogan sa pagdugmok kang Satanas ug sa mga sumusunod niini. (Roma 16:20; Pin. 17:14; 20:10) Hinumdomi, limitado lang ang gahom sa Yawa. Gipaluyohan ta ni Jehova, Jesus, ug sa matinumanong mga anghel. Sa ilang tabang, masuklan nato ang atong kaaway. w18.05 22-23 ¶2-4

Lantawon lang ta ni Jehova ingong iyang mga alagad kon kita magmabungahon. (Mat. 13:23; 21:43) Busa sa ilustrasyon sa Juan 15:1-5, ang bunga nga kinahanglang ipatungha sa mga Kristohanon wala magtumong sa bag-ong mga tinun-an nga atong natabangan. (Mat. 28:19) Kon maohon, ang matinumanong mga Saksi nga wala makahimog tinun-an kay dili madinawaton ang mga tawo sa ilang teritoryo mahisama sa wala mamungang sanga sa ilustrasyon. Pero dili nâ husto! Ngano? Tungod kay dili nato mapugos ang mga tawo nga mahimong tinun-an. Ug si Jehova mahigugmaon. Busa, dili gyod ta niya pabuhaton sa dili nato mahimo. Ang tanang sugo ni Jehova kaya natong sundon. (Deut. 30:11-14) Busa, unsang bunga ang angay natong ipatungha? Klaro, ang bunga nagtumong sa buluhaton nga makaya nato. Unsa kana nga buluhaton? Ang pagsangyaw sa maayong balita sa Gingharian sa Diyos.​—Mat. 24:14. w18.05 14 ¶8-9

Pastor man, pari, rabbi, o bisan unsay ilang titulo, daghan kaayo ang mga lider sa relihiyon karon. Sama sa mga lider sa relihiyon sa unang siglo, sila “nagsugpo sa kamatuoran” sa Pulong sa Diyos ug “nagbaylo sa kamatuoran sa Diyos alang sa bakak.” (Roma 1:18, 25) Sila nagpasiugda sa bakak nga mga pagtulon-an sama sa “kon luwas na, pirme nang luwas,” imortalidad sa kalag, reinkarnasyon, ug binuang nga ideyang mouyon ra ang Diyos sa homoseksuwal nga pagkinabuhi ug pagminyo sa samag sekso. Ang mga politiko mamakak aron limbongan ang mga tawo. Madunggan sa umaabot ang usa sa kinadak-ang bakak dihang iproklamar sa mga tawo nga nakab-ot na nila ang “kalinaw ug kasegurohan!” Pero “ang kalit nga kalaglagan modangat dihadiha kanila.” Hinaot dili ta motuo sa ilang gipanulti nga morag dili mameligro kining sistemaha sa mga butang! Ang tinuod, kita “nahibalo pag-ayo nga ang adlaw ni Jehova moabot sama sa kawatan sa kagabhion.”​—1 Tes. 5:1-4. w18.10 7-8 ¶6-8

Si Jesu-Kristo, pinaagi sa iyang dinihogang mga igsoon ug sa matinabangong “mga prinsipe” sa ubang mga karnero, nagdasig ug naggiya sa mga naguol ug naluya. Mao nay angayng buhaton, kay kini nga mga ansiyano dili “mga agalon” sa pagtuo sa uban, kondili “mga isigkamagbubuhat” alang sa kalipay sa ilang mga igsoon. (Isa. 32:1, 2; 2 Cor. 1:24) Si Pablo nagpakitag ehemplo nga maayong sundogon. Misulat siya sa gilutos nga mga Kristohanon sa Tesalonica: “Kay may malumong pagmahal kaninyo, kami nahimuot nga ipaambit kaninyo, dili lamang ang maayong balita sa Diyos, kondili usab ang among kaugalingong mga kalag, tungod kay kamo nahimo man nga among hinigugma.” (1 Tes. 2:8) Sa pagpakita nga usahay dili igo ang pulong sa pagdasig, gisulti ni Pablo sa mga ansiyano sa Efeso ang teksto niining adlawa. w18.04 21 ¶6-8

Aron matagamtam ug makabenepisyo niana nga kagawasan, angay tang “modangop kang Jehova,” o makigsuod kaniya. (2 Cor. 3:16) Dihang nakiglabot si Jehova sa mga Israelinhon sa kamingawan, wala nila kana lantawa sa espirituwal nga paagi. Ang ilang kasingkasing ug hunahuna sama rag gitaptapan ug migahi, nga nagpokus lang sa paggamit sa ilang kagawasan sa Ehipto sa pisikal, o unodnon, nga paagi. (Heb. 3:8-10) Pero ang kagawasan nga ihatag sa espiritu ni Jehova dili lang kagawasan gikan sa literal nga pagkaulipon. Labaw pa sa gipaningkamotang makab-ot sa tawo, ang espiritu ni Jehova maghatag ug kagawasan gikan sa pagkaulipon sa sala ug kamatayon, ingon man gikan sa pagkaulipon sa bakak nga pagsimba ug sa mga tulumanon niini. (Roma 6:23; 8:2) Maayo gyod nâ nga kagawasan! Makabenepisyo niana nga kagawasan bisan kadtong napriso o literal nga naulipon.​—Gen. 39:20-23. w18.04 9 ¶3-5