Agosto

Diha sa mga tigom, kanunay tang gipahinumdoman sa nahimo ni Jehova ug Jesus para nato. Kay mapasalamaton, naningkamot ta sa pagsundog kang Jesus diha sa atong adlaw-adlawng pagkinabuhi. (2 Cor. 5:14, 15) Dugang pa, ang atong gugma magpalihok nato sa pagdayeg kang Jehova tungod sa pagtagana sa lukat. Ang usa ka paagi sa pagdayeg niya mao ang paghatag ug kinasingkasing nga komento diha sa tigom. Atong mapakita ang ka dako sa atong gugma kang Jehova ug sa iyang Anak pinaagi sa pagkaandam mosakripisyo para nila. Sagad, kinahanglan tang mohimog lainlaing sakripisyo para makatambong sa tigom. Daghang kongregasyon ang magtigom sa gabii, diin sagad gikapoy na ta. Ang laing tigom himoon sa Sabado o Dominggo, nga tingpahulay sa daghan. Nakita ba ni Jehova nga mitambong gihapon ta bisag gikapoy? Oo! Gani, kon mas dako ang atong paningkamot, mas apresyahon ni Jehova ang atong gipakitang gugma kaniya.​—Mar. 12:41-44. w19.01 29 ¶12-13

Si Jesus mismo nakasinati sa pipila ka problema nga giatubang sa mga tawo. Pananglitan, dayag nga nagdako si Jesus sa pobre nga pamilya. Pinaagi sa pagtrabaho uban sa iyang amaama nga si Jose, si Jesus nakakat-og hago nga trabaho. (Mat. 13:55; Mar. 6:3) Posibleng namatay na si Jose sa wala pa matapos ang ministeryo ni Jesus. Busa lagmit gibati ni Jesus ang kasakit dihang mamatyan ug minahal. Ug nahibalo siya sa kahimtang diin ang pamilya lainlaig relihiyosong panglantaw. (Juan 7:5) Ang maong mga sirkumstansiya ug ang uban pa nakatabang kang Jesus nga masabtan ang mga problema ug pagbati sa ordinaryong mga tawo. Ang pagkamahunahunaon ni Jesus ilabinang nakita dihang naghimo siyag mga milagro. Dili siya obligadong buhaton kana. Pero, siya “giabot ug kaluoy” niadtong nag-antos. (Mat. 20:29-34; Mar. 1:40-42) Misimpatiya si Jesus sa mga tawo ug gusto niyang tabangan sila.​—Mar. 7:32-35; Luc. 7:12-15. w19.03 16 ¶10-11

Kadto maoy kataposang gabii ni Jesus sa yuta. Hunahunaa ang stress nga iyang gibati niadtong gabhiona. Makapabilin kaha siyang matinumanon hangtod sa kamatayon? Nagdepende niya ang kinabuhi sa bilyonbilyong tawo. (Roma 5:18, 19) Mas importante pa, mahimong maapektohan ang reputasyon sa iyang Amahan. (Job 2:4) Dayon, panahon sa kataposang panihapon uban sa iyang suod nga mga higala​—ang mga apostoles​—sila naglalis “kon kinsa kanila ang labing dako.” Makapainteres, si Jesus wala masuko. Hinunoa, kalmado gihapon siya. Sa malumo pero prangka nga paagi, gipatin-aw pag-usab ni Jesus ang kinaiya nga angay unta nilang mabatonan. Dayon gikomendahan niya ang iyang mga higala sa ilang pag-unong niya. (Luc. 22:24-28; Juan 13:1-5, 12-15) Masundog nato si Jesus ug makapabilin tang kalmado bisag na-stress kon atong hinumdoman nga kitang tanan makasulti ug makabuhat ug mga butang nga makapalagot sa uban. (Prov. 12:18; Sant. 3:2, 5) Ug kanunayng komendahi ang uban sa ilang maayong mga hiyas.​—Efe. 4:29. w19.02 11-12 ¶16-17

Gilimitahan sa Moisesnong Balaod ang posibilidad nga sayop nga maakusahan ang usa ka tawo. Ang giakusahan may katungod nga mahibalo kon kinsay nag-akusar niya. (Deut. 19:16-19; 25:1) Ug sa dili pa siya hukmang sad-an, labing menos duha ka testigos ang kinahanglang mohatag ug ebidensiya. (Deut. 17:6; 19:15) Komosta kon ang usa ka Israelinhon nakahimog krimen ug usa ray testigos? Dili siya maghunahuna nga dili siya masilotan sa iyang nahimo. Nakita ni Jehova ang iyang gibuhat. Oo, si Jehova nagpakitag hingpit nga panig-ingnan; wala siyay buhaton nga dili patas. Iyang panalanginan ang maunongong nagsunod sa iyang sukdanan, pero silotan kadtong nag-abuso sa ilang gahom. (2 Sam. 22:21-23; Ezeq. 9:9, 10) Ang uban tingali mobuhat ug daotan ug morag wala masiloti, pero dihang moabot ang gitakdang panahon ni Jehova, hukman niya sila. (Prov. 28:13) Kon dili sila maghinulsol, ila rang maamgohan nga “makahahadlok nga mahulog ngadto sa mga kamot sa buhing Diyos.”​—Heb. 10:30, 31. w19.02 23-24 ¶20-21

Si Moises seguradong mitan-aw kang Jehova para sa instruksiyon ug giya. Gani, “siya nagpabiling lig-on nga daw nakakita sa Usa nga dili-makita.” (Heb. 11:24-27) Wala ray duha ka bulan human makabiya sa Ehipto ang mga Israelinhon, nahitabo ang seryosong problema​—bisan sa wala pa sila makaabot sa Bukid sa Sinai. Ang mga tawo mireklamo kay walay tubig. Misugod silag bagulbol kang Moises, ug kay nasuko pag-ayo ang mga tawo, si Moises miampo kang Jehova: “Unsay akong buhaton niini nga katawhan? Hapit na nga sila magbato kanako!” (Ex. 17:4) Ingong tubag, gihatagan siya ni Jehova ug klarong instruksiyon​—kuhaon niya ang iyang sungkod ug ihapak sa bato sa Horeb, ug mogawas niana ang tubig. Atong mabasa: “Gibuhat kadto ni Moises atubangan sa mga mata sa mga ansiyano sa Israel.” Natagbaw ang kauhaw sa mga Israelinhon ug nasulbad ang problema.​—Ex. 17:5, 6. w18.07 13 ¶4-5

Ang usa sa gigamit ni Jehova sa pagpalig-on kanato pinaagi sa gugma mao ang kongregasyon. Mabalosan nato ang iyang gugma kon atong higugmaon ug palig-onon ang mga igsoon sa espirituwal ug emosyonal nga paagi. (1 Juan 4:19-21) Si apostol Pablo nag-awhag sa mga Kristohanon: “Magpadayon sa paghupay sa usag usa ug sa paglinig-onay sa usag usa, ingon gayod sa inyong ginabuhat.” (1 Tes. 5:11) Oo, ang tanan sa kongregasyon​—dili lang mga ansiyano​—makasundog kang Jehova ug Jesus pinaagi sa paghupay ug pagpalig-on sa mga igsoon. (Roma 15:1, 2) Ang pipila diha sa kongregasyon nga may grabeng depresyon o kabalaka magkinahanglan tingalig tambal ug tabang sa doktor. (Luc. 5:31) Ang mga ansiyano ug ang uban diha sa kongregasyon nahibalo nga dili sila propesyonal nga mga doktor. Pero, may mahimo sila​—ang ‘paghupay sa magul-anong mga kalag, pagbulig sa mga maluya, ug pagpailob sa tanan.’​—1 Tes. 5:14. w18.09 14-15 ¶10-11

Mas mosalig ta kang Jehova kon mas mailhan nato siya. Ang bugtong paagi nga mailhan nato pag-ayo ang Diyos mao ang pagbasa sa Bibliya ug dayon pagpamalandong sa atong nabasa. Sa Bibliya, mabasa nato ang kasaligang rekord kon giunsa pagpanalipod ni Jehova ang iyang katawhan sa una. Ang maong rekord makahatag natog pagsalig nga atimanon pod ta niya. Konsideraha ang usa ka pananglitan sa nindot nga paghulagway ni Isaias sa pagpakita kon unsaon ta pagpanalipod ni Jehova. Iyang gihisgotan si Jehova ingong magbalantay ug ang mga alagad sa Diyos ingong mga karnero. Si Isaias miingon bahin kang Jehova: “Pinaagi sa iyang bukton iyang tapokon ang mga nating karnero; ug sa iyang sabakan iya silang kugoson.” (Isa. 40:11) Dihang bation nato nga gigakos ta sa kusgang bukton ni Jehova, mobati tang luwas ug kalmado. Aron tabangan kang makapabiling kalmado bisan pa sa mga problema nga imo tingaling atubangon, pamalandonga ang pasalig nga gihisgotan sa teksto karong adlawa. Palig-onon ka niana dihang mag-atubang kag mga kalisdanan sa umaabot. w19.01 7 ¶17-18

Naa ba moy mga tumong nga gipangab-ot? Basin naningkamot mong mabasa ang Bibliya kada adlaw. O kaha naningkamot mong mouswag sa paghatag ug bahin, pagkomento, ug pagpanudlo. Bisan unsa pa man, dihang makita ninyo ang positibong mga resulta​—o makita nâ sa uban ug komendahan mo​—unsay inyong bation? Seguradong malipay kaayo mo. Ug kana gyoy angay ninyong bation kay giuna ninyo ang kabubut-on sa Diyos, ingong pagsundog kang Jesus. (Prov. 27:11) Pinaagi sa pagpangab-ot ug espirituwal nga mga tumong, nagahimo pod mog makapatagbawng buluhaton kay dili ni masayang. Si apostol Pablo misulat: “Magmalig-on, dili matarog, nga kanunayng puliki diha sa buluhaton sa Ginoo, nga nahibalo nga ang inyong paghago dili makawang may kalabotan sa Ginoo.” (1 Cor. 15:58) Ingong pagkomparar, ang kinabuhi nga nagpokus sa mga ambisyon ug tumong niining kalibotana​—bisag mora pa nig malamposon​—walay kapuslanan.​—Luc. 9:25. w18.12 22 ¶12-13

Si David nagtumong sa panahon diin ang mga tawo sa yuta magkinabuhi sumala sa matarong nga mga sukdanan sa Diyos. (2 Ped. 3:13) Ang Isaias 65:22 nag-ingon: “Ang mga adlaw sa akong katawhan mahisama sa mga adlaw sa usa ka kahoy.” Nagpasabot ni nga ang mga tawo mabuhig libolibo ka katuigan. Sumala sa Pinadayag 21:1-4, panalanginan sa Diyos ang katawhan, ug ang usa sa mga panalangin mao ang pagwagtang sa kamatayon. Giwala ni Adan ug Eva ang Paraiso sa Eden, pero wala nâ mahanaw sa dayon. Sumala sa gisaad sa Diyos, panalanginan niya ang katawhan sa yuta. Giinspirar si David sa pagsulat nga ang mga maaghop ug matarong magapanag-iya sa yuta ug mabuhi niana sa walay kataposan. (Sal. 37:11) Tungod sa mga tagna sa Isaias, maghinamhinam ta sa nindot nga kahimtang sa umaabot. (Isa. 11:6-9; 35:5-10; 65:21-23) Kanus-a nâ mahitabo? Dihang matuman na ang gisaad ni Jesus sa Hudiyong kriminal. (Luc. 23:43) Makapuyo ka niana nga Paraiso. w18.12 7 ¶22-23

Malikayan ba nato ang tanang panghunahuna sa kalibotan? Dili, kay dili ta literal nga makahawa sa kalibotan. Makadungog gyod tag pipila niana nga mga ideya. (1 Cor. 5:9, 10) Bisan dihang magsangyaw, makadungog tag sayop nga mga pagtulon-an. Pero, puwedeng dili nato ni paminawon o dawaton. Parehas ni Jesus, kinahanglang isalikway dayon nato ang panghunahuna ni Satanas. Dugang pa, maprotektahan nato ang kaugalingon sa mga situwasyon nga posible tang maimpluwensiyahan sa kalibotan. Pananglitan, kinahanglan tang mag-amping sa pagpilig suod nga mga higala. Ang Bibliya nagpasidaan nga kon pirme tang makig-uban niadtong wala magsimba kang Jehova, masundog nato ang ilang panghunahuna. (Prov. 13:20; 1 Cor. 15:12, 32, 33) Kinahanglan pod tang mag-amping sa pagpilig kalingawan. Pinaagi sa paglikay sa mga kalingawan nga nagpasiugdag ebolusyon, kabangis, o imoralidad, wala ta magpasulod sa atong hunahuna ug makadaot nga mga ideya nga “batok sa kahibalo sa Diyos.”​—2 Cor. 10:5. w18.11 21 ¶16-17

Sa unsang paagi mapalig-on nato ang atong determinasyon nga magpadayon sa paglakaw diha sa kamatuoran? Ang usa ka paagi mao ang pagtudlo sa kamatuoran ngadto sa uban kutob sa mahimo. Niining paagiha, makuptan nimo pag-ayo ang espirituwal nga espada, nga mao “ang pulong sa Diyos.” (Efe. 6:17) Makapaningkamot tang tanan nga mouswag ingong magtutudlo, nga “nagagamit sa pulong sa kamatuoran sa hustong paagi.” (2 Tim. 2:15) Samtang atong gigamit ang Bibliya sa pagtabang sa uban nga paliton ang kamatuoran ug isalikway ang kabakakan, atong gisilsil ang kamatuoran sa atong hunahuna ug kasingkasing. Niining paagiha, molig-on ang atong determinasyon nga magpadayon sa paglakaw diha sa kamatuoran. Ang kamatuoran maoy bililhong regalo gikan kang Jehova. Pinaagi niana, nakabaton tag suod nga relasyon sa atong langitnong Amahan, ang atong labing bililhong gipanag-iya. Daghan nag gitudlo si Jehova nato, pero sinugdanan pa lang nâ! Ang Diyos nagsaad nga padayon ta niyang tudloan hangtod sa hangtod. Busa, pabilhi ang kamatuoran sama sa usa ka maayong perlas. Padayong “palita ang kamatuoran ug ayaw [gyod] kana ibaligya.”​—Prov. 23:23. w18.11 8 ¶2; 12 ¶15-17

Sa wala pa ang Lunop, seguradong nagsangyaw si Noe bahin sa umaabot nga kalaglagan. Matikdi ang giingon ni Jesus: “Kay ingon nga sila niadtong mga adlawa sa wala pa ang baha, ang mga lalaki nangaon ug nanginom, nagminyo ug ang mga babaye gihatag sa kaminyoon, hangtod sa adlaw nga misulod si Noe sa arka; ug wala sila magtagad hangtod nga miabot ang baha ug gibanlas silang tanan, mao man usab unya ang presensiya sa Anak sa tawo.” (Mat. 24:38, 39) Bisag dili madinawaton ang mga tawo, si Noe matinumanong nagsangyaw sa pasidaan nga gihatag kaniya. Karon, nagsangyaw ta aron hatagan ang mga tawo ug kahigayonan nga mahibalo sa kabubut-on sa Diyos para sa katawhan. Sama kang Jehova, nanghinaot tang dawaton sa mga tawo ang mensahe ug “mabuhi.” (Ezeq. 18:23) Sa samang higayon, dihang magsangyaw sa kabalayan ug sa publikong mga lugar, naningkamot tang mapasidan-an ang mga tawo nga ang Gingharian sa Diyos moabot na ug magtapos niining dili diyosnong kalibotan.​—Ezeq. 3:18, 19; Dan. 2:44; Pin. 14:6, 7. w18.05 19 ¶8-9

Unsay imong himoon kon idili sa awtoridad ang buluhaton sa Gingharian sa inyong lugar ug ipatawag ka aron pangutan-on bahin sa imong mga igsoon? Isulti ba nimo ang tanan nimong nahibaloan? Unsay gihimo ni Jesus dihang gisukitsukit siya sa gobernador sa Roma? Uyon sa Kasulatanhong prinsipyo nga dunay “panahon sa paghilom ug panahon sa pagsulti,” si Jesus usahay dili motubag! (Eccl. 3:1, 7; Mat. 27:11-14) Sa ingon ana nga kahimtang, kinahanglang magmaalamon ta aron dili nato mapameligro ang atong mga igsoon. (Prov. 10:19; 11:12) Unsay imong himoon kon ang usa ka suod nga amigo o paryente nimo makahimog seryosong sala ug nahibalo ka niana? Isulti ang tinuod. Imong responsibilidad nga isulti sa mga ansiyano ang tibuok kamatuoran​—nga walay usbon. May katungod sila nga mahibalo sa tanang impormasyon aron matabangan nila sa pinakamaayong paagi ang nakasala nga mahibalik sa maayong relasyon kang Jehova.​—Sant. 5:14, 15. w18.10 10 ¶17-18

Sa unsang paagi makapalig-on ta sa uban pinaagi sa gugma? Ang usa ka paagi mao ang pagkahimong maayong mamiminaw. (Sant. 1:19) Ang pagpaminaw nga may empatiya maoy pagpakitag gugma. Puwede kang mangutana sa mataktikanhon ug mabinationg paagi aron masabtan ang gibati sa usa nga naluya. Dayon, makapakita kag empatiya ug mapalig-on nimo ang imong igsoon. Ipakita diha sa ekspresyon sa imong nawong ang imong pagkasinsero ug gugma. Dihang kinahanglan niyang idetalye ang iyang gibati, magmapailobon ug ayawg sagbat. Kon maminaw ka pag-ayo, lagmit mas masabtan nimo ang iyang gibati. Unya ang maong igsoon mosalig na nimo ug mas andam mamati sa imong isulti. Dihang ipakita nimo nga gusto nimo siyang tabangan, mahupay gyod siya. w18.09 14 ¶10; 15 ¶13

Ang panahon maoy angayng ibayad sa tanan nga gustong mopalit sa kamatuoran. Kinahanglan tang mogahig panahon sa pagpaminaw sa mensahe sa Gingharian, pagbasa sa Bibliya ug mga publikasyon, paghimog personal nga pagtuon, ug pagpangandam ug pagtambong sa tigom. Angay natong ‘paliton,’ o kuhaon, ang maong panahon gikan sa ubang dili kaayo importanteng kalihokan. (Efe. 5:15, 16) Unsa ka dakong panahon ang atong igahin aron makakat-on sa tukmang kahibalo sa simpleng mga pagtulon-an sa Bibliya? Nagdepende kana sa atong kahimtang. Daghan kaayo tag puwedeng makat-onan bahin sa kaalam, pamaagi, ug buluhaton ni Jehova. (Roma 11:33) Ang unang isyu sa Watch Tower nagkomparar sa kamatuoran ngadto sa “gamayng bulak,” ug miingon: “Ayawg katagbaw sa usa lang ka bulak sa kamatuoran. Kon igo na ang usa, wala na untay lain. Padayon sa pagtigom, pangita pag dugang.” Bisag mabuhi ta sa walay kataposan, duna gyod gihapon tay makat-onan bahin kang Jehova. Karon, importante kaayong gamiton sa maalamong paagi ang atong panahon aron makapalit tag daghang kamatuoran kutob sa mahimo. w18.11 5 ¶7

Ang mga bana giawhag nga trataron ang ilang asawa “sumala sa kahibalo”​—nga mahimong magpasabot ug “pagpakita kanilag konsiderasyon; pagsabot kanila.” (1 Ped. 3:7) Dili puwedeng magbulag ang pagsabot ug konsiderasyon. Pananglitan, ang bana nga masinaboton nahibalo nga ang iyang asawa, ingong iyang katimbang, lahi kaniya sa daghang paagi, pero dili gyod siya ubos. (Gen. 2:18) Busa ang bana magmahunahunaon sa pagbati sa iyang asawa, nga pakitaan kinig dignidad ug pasidungog. Ang banang mahunahunaon magpakita sab ug konsiderasyon sa pagbati sa iyang asawa dihang makiglabot sa ubang babaye. Dili siya mo-flirt o magpakitag dili haom nga interes kanila; dili pod nâ niya buhaton diha sa social media o sa Internet. (Job 31:1) Oo, magmaunongon siya sa iyang asawa, dili lang tungod kay nahigugma siya niini kondili kay nahigugma siya sa Diyos ug nagdumot sa pagkadaotan.​—Sal. 19:14; 97:10. w18.09 29 ¶3-4

Nganong lisod ang pagpadapat sa atong nakat-onan sa Pulong sa Diyos? Usa ka rason niana mao nga kinahanglan tang magpaubos aron mahimo kon unsay husto, ug posibleng mawala ang atong pagkamapainubsanon. Niining “kataposang mga adlaw,” daghan ang ‘mahigugmaon sa kaugalingon, mahigugmaon sa salapi, mapagawalon, mapahitas-on, ug walay pagpugong-sa-kaugalingon.’ (2 Tim. 3:1-3) Dihang ang hakog nga panggawi mabalita ug mapopular pa gani, ang alagad sa Diyos lagmit makasaway ana pero masina siya sa daw maayong mga resulta. (Sal. 37:1; 73:3) Tingali makapangutana ka: ‘Duna ba gyoy kaayohan kon unahon nako ang uban imbes ang kaugalingon? Kon mogawi ko ingong “mas ubos,” tahoron kaha ko sa mga tawo?’ Kon magpaimpluwensiya ta niana nga espiritu sa kalibotan, madaot ang atong maayong relasyon sa mga igsoon ug ang atong ilhanan ingong Kristohanon. Apan kon tun-an nato ang maayong mga ehemplo diha sa Bibliya ug sundogon kana, mapanalanginan ta. w18.09 3 ¶1

Bisag dihay panahon nga nag-inusara si Jehova sa wala pa siya magsugod pagpanglalang, wala siya maghunahuna sa kaugalingon lang. Gani, giregalohan niyag kinabuhi ang intelihenteng mga linalang, espirituhanon ug tawhanon. Ang “malipayong Diyos,” si Jehova, ganahang mohatag ug maayong mga butang. (1 Tim. 1:11; Sant. 1:17) Ug kay gusto niyang magmalipayon ta, gitudloan ta niya nga magmahinatagon. (Roma 1:20) Ang Diyos naghimo sa tawo sumala sa iyang larawan. (Gen. 1:27) Nagpasabot ni nga gilalang ta aron sundogon ang iyang mga hiyas. Busa, aron magmalipayon ug mapanalanginan ta, kinahanglang sundogon nato si Jehova pinaagi sa pagpakitag interes sa uban ug sa pagkahimong mahinatagon. (Filip. 2:3, 4; Sant. 1:5) Ngano? Tungod kay si Jehova mahigugmaong nagdisenyo nato nga ingon niana. Bisag dili ta hingpit, masundog nato ang pagkamahinatagon ni Jehova. Gusto ni Jehova nga sundogon nato siya, busa malipay siya kon magmahinatagon ta.​—Efe. 5:1. w18.08 18 ¶1-2; 19 ¶4

Gipakita sa mga sumusunod ni Jesus nga namati sila niya dili lang pinaagi sa pagpaminaw sa iyang mga pulong kondili pinaagi sab sa pagpadapat niana. Wala makababag nila ang “mga kabalaka sa kinabuhi.” (Luc. 21:34) Hinunoa, giuna nila ang mga sugo ni Jesus, bisan sa kalisdanan. Bisan pa niana, ang atong mga igsoon nagmatinumanon kang Jehova bisag unsa pay mahitabo. Ang laing paagi nga ikapakita nato nga namati ta kang Jesus maoy pinaagi sa pagpakigkooperar niadtong gitudlo niya nga manguna kanato. (Heb. 13:7, 17) Dili pa dugay, ang organisasyon sa Diyos naghimog daghang kausaban, apil ana ang paggamit sa bag-ong mga tool ug paagi sa pagsangyaw, bag-ong format sa midweek nga tigom, ug bag-ong paagi sa pagtukod, pag-renovate, ug pagmentinar sa mga Kingdom Hall. Mapasalamaton kaayo ta nianang mahigugmaon ug gihunahuna pag-ayong giya! Makaseguro tang panalanginan ni Jehova ang atong paningkamot sa pagsunod sa tukma sa panahong instruksiyon. w19.03 10-11 ¶11-12

Ang estoryang 10 porsiyento ray tinuod maoy 100 porsiyentong dili kasaligan. Konsideraha ang nahitabo sa mga Israelinhong nagpuyo sa kasadpang bahin sa Suba sa Jordan sa panahon ni Josue. (Jos. 22:9-34) Nakadawat silag balita nga ang mga Israelinhong nagpuyo sa sidlakang bahin naghimog dako kaayong halaran. Tinuod nâ nga bahin sa balita. Base niining dili kompletong impormasyon, ang mga taga-kasadpan naghunahuna nga ang ilang mga igsoon mirebelde kang Jehova. (Jos. 22:9-12) Maayo na lang, kay sa wala pa sila moatake, nagpadala silag kasaligang mga lalaki aron kuhaon ang kompletong impormasyon. Unsay ilang nahibaloan? Ang halaran gitukod, dili aron maghalad ngadto sa mga diyosdiyos, kondili ingong handomanan, aron sa umaabot ang tanan mahibalo nga matinumanon pod silang nag-alagad kang Jehova. Mapasalamaton gyod ang maong mga Israelinhon nga wala nila pamatya ang ilang mga igsoon base sa dili kompletong impormasyon! w18.08 5 ¶9-10

Sama sa giingon ni Pablo, bisan ang tinuod nga mga magsisimba posibleng makasala. Kadtong nagpadala sa tentasyon tingali naghunahuna nga maayo gihapon ang ilang relasyon kang Jehova. Pero aron tinuod nga uyonan ni Jehova, dili igo ang pag-ingon sa usa nga gusto niyang mahimong higala ni Jehova o ang pag-angkon nga maunongon siya niya. (1 Cor. 10:1-5) Sama sa mga Israelinhon nga nabalaka kay dugay nakalugsong si Moises sa Sinai, ang mga Kristohanon karon mabalaka tingali kay morag dugay pa ang adlaw sa paghukom ni Jehova ug ang bag-ong kalibotan. Ang katumanan niini nga mga saad morag dugay pa kaayo o dili katuohan. Kon dili ta magbantay, ang maong panghunahuna makaimpluwensiya nato nga unahon ang kaugalingong tinguha, dili ang kabubut-on ni Jehova. Anam-anam tang mahilayo kang Jehova ug kadugayan, mahimo na nato ang mga butang nga wala gyod nato hunahunaang buhaton dihang himsog pa ta sa espirituwal. w18.07 21 ¶17-18

Makadawat pod tag nindot nga mga panalangin kon personal tang nailhan ni Jehova. Pero unsay atong buhaton aron mailhan ta ni Jehova? Mailhan ta niya kon higugmaon nato siya ug ipahinungod ang atong kinabuhi kaniya. (1 Cor. 8:3) Pero, kinahanglan natong mentinahon ang atong bililhong relasyon sa atong langitnong Amahan. Sama sa mga Kristohanon sa Galacia nga gisulatan ni Pablo, kinahanglang dili ta magpaulipon sa “mahuyang ug walay bili nga paninugdang mga butang” niining kalibotana, apil ang tinguha nga dayegon niini. (Gal. 4:9) Kadtong unang siglong mga Kristohanon nakaila na sa Diyos ug nailhan pod sila sa Diyos. Pero, si Pablo miingon nga ang maong mga igsoon ‘namalik hinuon’ sa way pulos nga mga butang. Sama rag miingon si Pablo: “Karon nga daghan na mog nalampos, nganong mamalik man mo sa binuang ug way pulos nga mga butang nga inyong gibiyaan?” w18.07 8 ¶5-6

Maayo na lang nga dili ta kinahanglang mag-antos sa resulta sa pagsupak sa mga balaod sa Diyos unâ maleksiyon. Sa Pulong sa Diyos, makakuha tag leksiyon niadtong nakahimog sala. Oo, madawat nato ang pinakamaayong instruksiyon gikan sa Diyos dihang magbasa ug mamalandong ta sa mga asoy sa Bibliya. Pananglitan, hunahunaa ang kasakit nga gibati ni Haring David human niya supaka ang sugo ni Jehova ug manapaw kang Bat-seba. (2 Sam. 12:7-14) Samtang magbasa ug mamalandong sa maong asoy, mahimong pangutan-on nato ang kaugalingon: ‘Unsa untay buhaton ni Haring David aron malikayan ang kasakit nga resulta sa iyang pagpanapaw kang Bat-seba? Kon makaatubag samang tentasyon, determinado ba kong likayan kana? Molikay ba ko sama ni Jose, o magpatental sama ni David?’ (Gen. 39:11-15) Kon hunahunaon nato ang daotang resulta sa sala, mas determinado tang ‘dumtan ang daotan.’​—Amos 5:15. w18.06 17 ¶5, 7

Sagad, ang inhustisya makaaghat sa mga tawo sa pag-apil sa politika. Sa panahon ni Jesus, init nga politikal nga isyu ang pagbayad ug buhis. Ang mga sakop sa Roma, apil ang mamiminaw ni Jesus, kinahanglang mobayad ug mga buhis sama nianang sa kabtangan, yuta, ug balay. Ug nabug-atan pa ang mga tawo tungod sa korapsiyon sa mga tigkolektag buhis. Usahay, bayran sa mga tigkolektag buhis ang mga opisyales sa gobyerno aron makakuhag posisyon ug dayon gamiton ang ilang awtoridad sa pagpanguwarta. Si Zaqueo, nga pangulong tigkolektag buhis sa Jerico, nadato pinaagi sa pagpangilkil. (Luc. 19:2, 8) Lagmit daghan pod ang naghimo ana. Ang mga kaaway ni Jesus misulay sa pagbitik kaniya aron mag-apil-apil siya sa isyu bahin sa pagbayad ug buhis. Nangutana sila bahin sa “buhis por ulo” nga nagkantidad ug usa ka denario. Kinahanglan ning bayran sa tanang sakop sa Roma. (Mat. 22:16-18) Gikalagotan ni pag-ayo sa mga Hudiyo kay magpahinumdom ni nila nga kontrolado sila sa Roma. w18.06 5-6 ¶8-10

Kanunayng daotan ang resulta sa pagdapig kang Satanas. (Job 21:7-17; Gal. 6:8) Unsay kaayohan sa pagkahibalo kon unsa ka dako ang impluwensiya ni Satanas? Makatabang ni nato nga mahimong balanse sa atong panglantaw sa gobyerno sa tawo ug magdasig nato sa pagsangyaw. Nasabtan nato nga gusto ni Jehova nga tahoron ang gobyerno sa tawo. (1 Ped. 2:17) Ug gidahom niya nga sundon nato ang ilang balaod basta dili kini supak sa iyang mga sukdanan. (Roma 13:1-4) Pero kinahanglang neyutral ta, nga dili mopabor sa usa ka partido o politiko. (Juan 17:15, 16; 18:36) Kay nahibalo ta sa gustong himoon ni Satanas sa ngalan ug reputasyon ni Jehova, mas nadasig ta sa pagtudlo sa uban sa kamatuoran bahin sa Diyos. Mapasigarbohon natong gidala ug gigamit ang iyang ngalan, kay nahibalo ta nga mas daghag panalangin ang paghigugma kaniya kay sa paghigugma sa kuwarta o mga butang.​—Isa. 43:10; 1 Tim. 6:6-10. w18.05 24 ¶8-9

Kon dunay mga problema sa kaminyoon, makataronganon bang magbulag? Ang Bibliya wala maghisgot ug lainlaing basehanan sa panagbulag. Si Pablo misulat: “Ang usa ka babaye nga may bana nga dili-magtutuo, apan uyon siya nga makigpuyo uban kaniya, ayaw siya pabiyaa sa iyang bana.” (1 Cor. 7:12, 13) Mapadapat sab nâ karon. Tinuod, may mga higayon nga gipakita sa ‘banang dili magtutuo’ nga dili siya ‘uyon nga makigpuyo’ sa iyang asawa. Tingali bayolente kaayo siya, nga lagmit bation sa asawa nga mameligro ang iyang panglawas o kinabuhi. Basin dili siya mohatag ug sustento sa iyang asawa ug mga anak o tingali pugngan niya kini sa pag-alagad kang Jehova. Sa maong mga kaso, ang pipila ka asawa nakahinapos nga ang ilang bana dili ‘uyon nga makigpuyo’ uban nila ug gikinahanglan ang panagbulag bisag unsa pa tingali isulti sa bana. Pero ang ubang Kristohanon nga susamag kahimtang wala makigbulag; milahutay sila ug naningkamot nga molig-on ang ilang kaminyoon. w18.12 13 ¶14, 16; 14 ¶17

Sa ilustrasyon sa magpupugas nga makita sa Lucas 8:5-8, 11-15, ang binhi mao “ang pulong sa Diyos,” o mensahe sa Gingharian. Ang yuta nagrepresentar sa simbolikong kasingkasing sa tawo. Ang binhi nga nahulog sa maayong yuta migamot, migitib, ug ‘mipatunghag bunga nga usa ka gatos ka pilo.’ Sama sa maayong yuta sa ilustrasyon ni Jesus, atong gidawat ang mensahe ug gipatubo kini. Ingong resulta, ang samag binhi nga mensahe sa Gingharian migamot ug nahimong punoan sa trigo, ug sa ulahi andam nang mamunga. Ug maingon nga ang punoan sa trigo mamungag bag-ong binhi, dili bag-ong punoan, kita mamunga sab ug bag-ong binhi sa Gingharian, dili bag-ong tinun-an. Unsaon nato pagpatunghag bag-ong binhi sa Gingharian? Matag higayon nga isulti nato ang mensahe sa Gingharian, sama rag atong gisabwag ang binhi nga mitubo sa atong kasingkasing. (Luc. 6:45; 8:1) Busa, kini nga ilustrasyon nagtudlo nga kon padayon natong isangyaw ang mensahe sa Gingharian, kita ‘mamunga uban ang paglahutay.’ w18.05 14 ¶10-11

Dili lang andam si Pablo sa pagdasig sa iyang mga igsoon kondili andam sab siyang ‘ihatag ang tanan nga anaa kaniya lakip ang iyang kaugalingon aron sa pagtabang’ kanila. (2 Cor. 12:15, Ang Bag-ong Maayong Balita Biblia) Sa susama, ang mga ansiyano dili lang magdasig ug maghupay sa mga igsoon pinaagig mga pulong kondili magpalig-on sab kanila pinaagi sa pagpakitag sinserong personal nga interes. (1 Cor. 14:3) Ang pagpalig-on sa mga igsoon mahimong mag-apil ug pagtambag. Pero angay gihapong sundon sa mga ansiyano ang ehemplo diha sa Bibliya kon unsaon pagtambag sa makapadasig nga paagi. Gihatag ni Jesus ang maayong ehemplo niana human sa iyang kamatayon ug pagkabanhaw. Bug-at ang iyang mga tambag sa pipila ka kongregasyon sa Asia Minor, pero matikdi kon giunsa ni niya paghimo. Sa wala pa sila tambagi, gihatagan niyag kinasingkasing nga komendasyon ang mga kongregasyon sa Efeso, Pergamo, ug Tiatira. (Pin. 2:1-5, 12, 13, 18, 19) Maayong sundogon sa mga ansiyano si Kristo dihang magtambag. w18.04 21-22 ¶8-9

Mga ginikanan, seguradong naningkamot mo aron dili masakit ang inyong mga anak. Pirme mong manghinlo sa balay ug ipanglabay ang bisan unsa nga makahatag ug sakit. Sa samang paagi, kinahanglang panalipdan ninyo ang inyong mga anak batok sa mga pelikula, salida sa TV, electronic game, ug website nga lagmit gamiton ni Satanas sa pag-impluwensiya nila. Gihatagan mo ni Jehova ug awtoridad sa pagpanalipod sa espirituwal nga kahimsog sa inyong mga anak. (Prov. 1:8) Busa, ayaw mog kahadlok sa paghimog balaod nga gibase sa sukdanan sa Bibliya. Sultii ang inyong mga anak kon unsay puwede ug dili puwede nilang tan-awon, ug tabangi sila nga masabtan kon nganong mao nay inyong desisyon. (Mat. 5:37) Samtang magdako sila, bansaya sila nga masabtan ang husto ug sayop sumala sa sukdanan ni Jehova. (Heb. 5:14) Ug hinumdomi, daghag makat-onan ang inyong mga anak sa inyong ginahimo.​—Deut. 6:6, 7; Roma 2:21. w19.01 16 ¶8

Kon batan-on ka, puwede ba nimong himoong tumong ang pagpakitag interes sa mga edaran? Mahimo nimong ipaestorya nila ang ilang eksperyensiya sa pag-alagad sa daghang tuig. Makapadasig gyod ni nimo ug kanila, ug mas makatabang ninyo sa pagpalamdag sa kahayag sa kamatuoran. Kitang tanan angayng maningkamot sa pag-abiabi niadtong motambong sa atong mga tigom. Kon naasayn ka sa pagdumalag tigom para sa pagsangyaw, dako kag matabang sa mga tigulang aron makasangyaw. Naa ba silay haom nga teritoryo? Sa pipila ka kahimtang, puwede kang mag-asayn ug batabatang igsoon aron makauban ug makatabang sa tigulang. Mahimo pod nimong konsiderahon kadtong limitadog mahimo tungod sa panglawas ug sirkumstansiya. Oo, ang imong konsiderasyon ug pagsabot makatabang sa mga bata ug tigulang, eksperyensiyado ug dili eksperyensiyado, nga magmadasigon sa pagsangyaw sa maayong balita.​—Lev. 19:32. w18.06 23 ¶10-12

Dili gyod nato balewalaon nga gipahigawas ta ni Jehova gikan sa pagkaulipon sa sala ug kamatayon. Pinaagi sa lukat, makaalagad ta sa Diyos nga hinlo ang konsensiya ug magmalipayon sa pagbuhat niana. (Sal. 40:8) Pero gawas sa pagpasalamat, kinahanglan tang mag-amping nga dili gyod gamiton sa sayop nga paagi ang atong kagawasan. Si apostol Pedro nagpasidaan maylabot sa paggamit sa atong kagawasan ingong rason sa pagtagbaw sa atong unodnong mga tinguha. Dili ba kana nga pasidaan magpahinumdom nimo sa nahitabo sa mga Israelinhon didto sa kamingawan? Ug naa gihapon karon ang maong kapeligrohan, tingali mas grabe pa gani. Si Satanas ug ang iyang kalibotan nagtanyag ug mas makapadaning kapilian sa sinina ug pamostura, pagkaon ug ilimnon, kalingawan ug lingawlingaw, ug uban pang butang. Ang hanas nga mga tig-advertise sagad mogamit ug hitsuraang mga modelo aron malimbongong ipasiugda ang mga butang nga kinahanglanon kuno nato bisag dili. Dali ra gyong mabiktima niana nga mga panglimbong ug magamit sa sayop nga paagi ang atong kagawasan! w18.04 10 ¶7-8