Septiyembre

Si Jesus nagpakitag simpatiya kang Marta ug Maria. Dihang nakita niya ang ilang kaguol tungod sa kamatayon sa ilang igsoong si Lazaro, “si Jesus mihilak.” (Juan 11:32-35) Wala siya mohilak tungod kay dili na niya makauban ang iyang suod nga amigo. Sa ato nang nasayran, mianha siya aron banhawon si Lazaro. Si Jesus mihilak kay siya nakasabot ug natandog sa kaguol nga gibati sa iyang suod nga mga higala. Malipay gyod ta sa pagkahibalo nga si Jesus may simpatiya. Siyempre, dili ta sama niya nga hingpit. Pero, gimahal nato siya tungod sa iyang pagtratar sa uban. Madasig ta sa pagkahibalo nga naghari na siya sa Gingharian sa Diyos. Sa dili madugay, wad-on niya ang tanang pag-antos. Kay nabuhi siya kaniadto ingong tawo, siya ang labawng makatabang sa katawhan nga maulian sa tanang kasakit nga gipahinabo sa pagmando ni Satanas. Panalangin gyod nga ang atong Magmamando “mobati sa atong mga kaluyahon.”​—Heb. 2:17, 18; 4:15, 16. w19.03 17 ¶12-13

Motabang ta sa uban nga mailhan ang Diyos, pero dili kita ang nagahimo sa pinakaimportanteng bahin. (1 Cor. 3:6, 7) Si Jehova ang nagkabig sa mga tawo. Mahimong dawaton o dili sa usa ang maayong balita depende sa kahimtang sa iyang kasingkasing. (Mat. 13:4-8) Hinumdomi nga kadaghanan wala modawat sa mensahe ni Jesus​—ug siya ang labing bantogang Magtutudlo nga nabuhi sukad! Busa, dili ta angayng maluya kon kadaghanan sa gusto natong tabangan dili maminaw sa mensahe. Daghan ug kaayohan ang pagpakitag kaluoy diha sa ministeryo. Mas magmalipayon ta sa atong ministeryo. Atong maeksperyensiyahan ang dakong kalipay sa paghatag. Ug gihimo natong sayon para niadtong “hustong nakiling alang sa kinabuhing walay kataposan” nga dawaton ang maayong balita. (Buh. 13:48) Busa, “samtang kita may kahigayonan alang niini, buhaton nato ang maayo ngadto sa tanan.” (Gal. 6:10) Dayon atong masinati ang kalipay sa paghimaya sa atong langitnong Amahan.​—Mat. 5:16. w19.03 25 ¶18-19

Si Haring David misulat: “Si Jehova dako ug takos gayod nga pagadayegon.” (Sal. 145:3) Nahigugma siya kang Jehova, ug ang maong gugma nagpalihok niya sa pagdayeg sa Diyos “sa taliwala sa kongregasyon.” (1 Cron. 29:10-13; Sal. 40:5) Karon, ang usa ka paagi nga madayeg nato si Jehova maoy pinaagi sa pagkomento panahon sa tigom. Kitang tanan malipay nga makadungog ug nagkadaiyang komento diha sa tigom. Malipay ta sa simple, sinserong mga pulong sa usa ka bata. Matandog ta sa madasigong pagkomento sa usa bahin sa kamatuoran nga iyang nakat-onan. Ug makadayeg ta niadtong “nakabaton ug kaisog” sa pagkomento, bisan pag sila maulawon o bag-o pang nagtuon sa atong pinulongan. (1 Tes. 2:2) Unsaon nato pagpakitag apresasyon sa ilang paningkamot? Puwede nato silang pasalamatan sa ilang makapadasig nga komento human sa tigom. Ang laing paagi mao ang pagkomento sab nato. Busa, dili lang kita ang madasig panahon sa tigom kondili makadasig pod ta sa uban.​—Roma 1:11, 12. w19.01 8 ¶1-2; 9 ¶6

Ang 10 ka tawo desperado na. Sanlahon sila, ug morag wala nay paglaom. Pero usa ka adlaw niana, nakita nila sa layo si Jesus​—ang Bantogang Magtutudlo. Ilang nabalitaan nga naayo niya ang tanang klase sa sakit. Maong sila naninggit: “Jesus, Magtutudlo, kaluy-i kami!” Ang 10 ka tawo naayo. Seguradong mapasalamaton silang tanan sa kabuotan ni Jesus. Pero ang usa nila wala lang mobating mapasalamaton​—gipakita niya ang iyang apresasyon kang Jesus. Ang tawo nga naayo, kinsa usa ka Samarianhon, napalihok sa pagdayeg sa Diyos “uban sa makusog nga tingog.” (Luc. 17:12-19) Parehas niadtong Samarianhon, gusto natong magpasalamat niadtong nagpakitag kaayo. Si Jehova ang atong ehemplo sa pagpakitag apresasyon. Ang usa ka paagi nga gihimo niya kini mao ang pagpanalangin niadtong nakapalipay niya. (2 Sam. 22:21; Sal. 13:6; Mat. 10:40, 41) Ug ang Bibliya nagdasig nato nga “mahimong mga tigsundog sa Diyos, ingon nga hinigugmang mga anak.” (Efe. 5:1) Busa, magpakita tag apresasyon kay gusto natong sundogon si Jehova. w19.02 14 ¶1-2; 15 ¶4

Ang usa ka batang sister matinahorong nananghid sa maestra nga dili siya moapil sa usa ka selebrasyon nga dili makapalipay sa Diyos. Ang usa ka maulawon nga batan-ong brader nga namalaybalay nanuktok sa balay sa iyang eskolmet nga sa miagi nagyagayaga sa mga Saksi ni Jehova. Ang usa ka brader nga nagkugi aron suportahan ang iyang pamilya gisugo sa iyang amo nga manglimbong o mohimog butang nga supak sa balaod. Bisag mameligrong mawad-ag trabaho, nangatarongan siya nga kinahanglan siyang magmatinud-anon ug mosunod sa balaod kay mao nay gisugo sa Diyos sa Iyang mga alagad. (Roma 13:1-4; Heb. 13:18) Unsang hiyasa ang inyong nakita nilang tulo? Seguro nakakita mog pipila, sama sa kaisog ug pagkamatinud-anon. Pero ang importanteng hiyas nga ilabinang gipakita nila mao ang pagkamatinumanon. Matag usa nila nagmaunongon kang Jehova. Wala sila mokompromiso tungod sa ilang pagkamatinumanon. Seguradong gipasigarbo sila ni Jehova tungod sa ilang gihimo. Gusto pod natong ipasigarbo ta sa atong langitnong Amahan. w19.02 2 ¶1-2

Ang Balaod ilabinang nagprotektar niadtong dili makapanalipod sa kaugalingon sama sa mga walay amahan, balo, ug langyaw. Ang mga maghuhukom sa Israel gisugo: “Dili ka magtuis sa hukom sa langyaw nga pumoluyo o sa batang ilo-sa-amahan, ug dili ka magsakmit sa besti sa usa ka babayeng balo ingong garantiya.” (Deut. 24:17) Gipakita ni Jehova ang malumong personal nga interes ngadto sa labing huyang diha sa komunidad. Ug iyang gisilotan kadtong nagmaltratar nila. (Ex. 22:22-24) Gusto ni Jehova nga kadtong iyang gihatagag responsibilidad magpakitag mahigugmaong interes sa tanan nga ubos sa ilang pagdumala. Gidumtan niya ang seksuwal nga mga krimen ug gusto niya nga ang tanan, ilabina ang labing huyang, seguradong maprotektahan ug mahatagag hustisya. (Lev. 18:6-30) Kon kombinsido ta nga patas ang pagtratar ni Jehova kanato, mas modako ang atong gugma kaniya. Ug dihang higugmaon nato ang Diyos ug ang iyang matarong nga sukdanan, mapalihok ta sa paghigugma sa uban ug pagtratar nila sa patas nga paagi. w19.02 24-25 ¶22-26

Konsideraha ang usa ka pananglitan kon unsaon nato pagpanalipod ang kaugalingon batok sa impluwensiya ni Satanas. Si Jehova nagtudlo nato nga ang “pakighilawas [o, seksuwal nga imoralidad] ug ang tanang matang sa kahugawan . . . dili gayod angay hisgotan sa [atong] taliwala.” (Efe. 5:3) Pero unsay atong buhaton kon ang atong mga kauban sa trabaho o sa eskuwelahan maghisgot ug imoral nga mga butang? Ang atong tigbantay, ang konsensiya, lagmit magpasidaan nato. (Roma 2:15) Maminaw ba ta? Basin matental ta sa pagpaminaw sa atong mga kauban o sa pagtan-aw sa mga hulagway nga ilang ipakita. Pero kini ang panahon nga isira ang ganghaan, ingnon ta, pinaagi sa pag-usab sa topiko o pagbiya. Nagkinahanglag kaisog aron dili ta maimpluwensiyahan sa atong mga kauban sa paghunahuna o pagbuhat ug sayop. Seguradong nakita ni Jehova ang atong paningkamot, ug hatagan ta niyag kusog ug kaalam sa pagsukol sa panghunahuna ni Satanas.​—2 Cron. 16:9; Isa. 40:29; Sant. 1:5. w19.01 17-18 ¶12-13

Si Solomon, kinsa dato ug gamhanan kaayo, ‘misulay sa pagmaya ug sa pagpahimulos sa maayo.’ (Eccl. 2:1-10) Nagtukod siyag mga balay, naghimog mga hardin ug parke, ug gihimo niya kon unsay iyang gusto. Unsay iyang gibati pagkahuman? Nakontento ba siya, o kaha nalipay? Dili na ta angayng managna pa. Siya mismo ang miingon sa teksto karong adlawa. Puwersado kaayo nâ nga leksiyon! Inyo ba nang pamalandongon? Dili gusto ni Jehova nga unya ra mo makakat-on kon mag-antos na mo sa resulta sa inyong mga sayop. Tinuod, nagkinahanglag pagtuo ang pagtuman sa Diyos ug pag-una sa iyang kabubut-on. Importante kaayo ang pagtuo, ug dili gyod mo pakyason niini. Oo, dili gyod kalimtan ni Jehova “ang gugma nga inyong gipakita alang sa iyang ngalan.” (Heb. 6:10) Busa, paningkamot pag-ayo nga molig-on ang inyong pagtuo, ug personal ninyong maeksperyensiyahan nga gusto gyod sa inyong langitnong Amahan kon unsay makaayo ninyo.​—Sal. 32:8. w18.12 22 ¶14-15

Ang tawong espirituwal may pagtuo sa Diyos ug nagsundog sa Iyang panghunahuna. Magpagiya siya sa Diyos ug determinadong mosunod Kaniya. (1 Cor. 2:12, 13) Maayong ehemplo niana si David. Siya miawit: “Si Jehova mao ang bahin sa akong kabilin ug sa akong kopa.” (Sal. 16:5) Ang maong “bahin” nag-apil sa suod nga relasyon ni David sa Diyos, kang kinsa siya midangop. (Sal. 16:1) Unsay resulta? ‘Ako nagmalipayon,’ siya misulat. Oo, nakapalipay pag-ayo kang David ang iyang suod nga relasyon sa Diyos. (Sal. 16:9, 11) Ang kalipay nga gibati ni David dili matagamtam niadtong nagpokus sa kalingawan ug bahandi. (1 Tim. 6:9, 10) Ang pagpalig-on sa imong pagtuo kang Jehova ug pag-alagad kaniya mao ang makahatag nimog tinuod nga katagbawan. Sa unsang paagi molig-on ang imong pagtuo? Kinahanglang mogahin kag panahon uban niya, ingnon ta, pinaagi sa pagbasa sa iyang Pulong, pagpaniid sa iyang mga linalang, ug paghunahuna sa iyang mga hiyas​—apil ang iyang gugma kanimo.​—Roma 1:20. w18.12 25 ¶7-8

Si Pablo wala lang basta maghatag ug opinyon bahin sa kaminyoon. Hinunoa, ang maong teksto nagsugo sa mga Kristohanon nga magpakitag pasidungog sa kaminyoon, sa ato pa, pabilhan kini. Mao ba sab nay imong panglantaw sa kaminyoon ug sa imo mismong kaminyoon kon minyo ka? Kon imong gipasidunggan ang kaminyoon, gisundog nimo ang pinakamaayong ehemplo. Si Jesus nagpasidungog sa kaminyoon. Dihang nangutana kaniya ang mga Pariseo bahin sa diborsiyo, iyang gihisgotan ang gisulti sa Diyos bahin sa unang kaminyoon: “Tungod niini ang usa ka lalaki mobiya sa iyang amahan ug inahan, ug ang duha mahimong usa ka unod.” Siya midugang: “[Ang] gihiusa pagyugo sa Diyos ayaw ipabulag ni bisan kinsang tawo.” (Mar. 10:2-12; Gen. 2:24) Busa, uyon si Jesus nga kahikayan sa Diyos ang kaminyoon ug gipasiugda niya nga permanente kini. Wala ingna sa Diyos si Adan ug Eva nga puwedeng taposon ang kaminyoon pinaagig diborsiyo. Ang sukdanan nianang kaminyoon sa Eden maoy monogamiya (usa ray asawa), “ang duha” gihiusa hangtod sa hangtod. w18.12 10-11 ¶2-4

Dihang nakadangat ta sa kamatuoran, atong nakat-onan ang kaimportante sa pagtuman sa simpleng mga sugo ni Jehova. Pero samtang nagpadayon ta sa pag-uswag sa espirituwal, nakakat-on tag dugang bahin sa panghunahuna ni Jehova​—ang iyang gusto ug dili gusto, ug ang iyang panglantaw sa lainlaing butang. Ug kini mag-impluwensiya sa atong mga buhat ug desisyon. Bisan pag malipay tang mosundog kang Jehova, usahay dili ni sayon tungod sa atong pagkadili-hingpit. Pananglitan, malisdan tingali ta sa pagsabot sa panglantaw ni Jehova sa moral nga kahinlo, materyalismo, pagsangyaw, sayop nga paggamit sa dugo, o uban pa. Unsay atong mahimo? Sa unsang paagi makapadayon ta sa pagsundog sa panghunahuna sa Diyos? Mahimo nato kana pinaagi sa pagbag-o sa atong hunahuna. Nagkahulogan ni nga atong tun-an ug sabton ang Pulong sa Diyos, pamalandongon kini, ug sundogon ang panghunahuna ni Jehova. w18.11 23-24 ¶2-4

Si Habacuc nabuhi sa lisod kaayong panahon. Naguol siya pag-ayo kay daghan ang daotan ug bayolenteng mga tawo sa iyang palibot. Kanus-a matapos ang ilang pagkadaotan? Nganong dugay kaayong milihok si Jehova? Puro inhustisya ug pagdaogdaog na lang ang nakita ni Habacuc. Gibati niyang wala siyay mahimo. Busa nianang makapaguol kaayong panahon, gihangyo niya si Jehova nga molihok. Basin nagsugod paghunahuna si Habacuc nga wala magpakabana si Jehova. Morag dugay pa siyang molihok. Mibati ba sab kag ingon ana? Nawad-an bag pagsalig si Habacuc kang Jehova ug sa Iyang mga saad? Wala! Ang pagsulti niya kang Jehova sa iyang mga problema ug kabalaka imbes sa mga tawo nagpakita nga wala siya mawad-ig paglaom. Dayag nga naglibog siya kon nganong wala pa molihok si Jehova ug kon nganong gitugot Niya nga mag-antos siya pag-ayo. w18.11 14 ¶4-5

Dihang giimbitar ni Jesus ang mangingisdang si Pedro ug Andres aron mahimong “mangingisda ug mga tawo,” ilang “gibiyaan ang mga pukot.” (Mat. 4:18-20) Siyempre, kadaghanan sa nakakat-on sa kamatuoran karon dili bastabastang makabiya sa ilang trabaho. Naa silay binase sa Bibliyang obligasyon. (1 Tim. 5:8) Pero, ilang giusab ang ilang panglantaw sa materyal nga mga butang ug ang ilang prayoridad. Konsideraha ang pananglitan sa usa ka batan-ong babaye nga ginganlag Maria. Bahin na sa iyang kinabuhi ang golf, ug tumong niyang mahimong propesyonal sa maong sport. Dayon, misugod si Maria sa pag-Bible study, ug nalipay siya nga gibag-o sa kamatuoran ang iyang kinabuhi. Naamgohan ni Maria nga lisod dunganon ang pagpangitag espirituwal ug materyal nga bahandi. (Mat. 6:24) Iyang gisakripisyo ang dugay na niyang gipangandoy nga propesyon. Siya karon payunir ug matod niya, iyang natagamtam ang “labing malipayon ug makahuloganong kinabuhi.” w18.11 5 ¶9-10

Pag-edad ni Jesus ug 30, miundang siya sa pagpamanday kay nahibalo siyang mas importante ang pagkahimong ministro. Siya miingon nga ang pagsangyaw sa maayong balita sa Gingharian sa Diyos maoy usa ka rason nga gipadala siya sa yuta. (Mat. 20:28; Luc. 3:23; 4:43) Giuna ni Jesus ang ministeryo, ug gusto niyang motabang ang uban niana nga buluhaton. (Mat. 9:35-38) Dili tingali ta panday, pero seguradong mga ministro ta. Importante kaayo ni kay gitawag gani tag “mga isigkamagbubuhat sa Diyos.” (1 Cor. 3:9; 2 Cor. 6:4) Nahibalo ta nga “ang diwa sa . . . pulong [ni Jehova] maoy kamatuoran.” (Sal. 119:159, 160) Maong gusto natong seguroon nga “nagagamit [ta] sa pulong sa kamatuoran sa hustong paagi” diha sa atong ministeryo. (2 Tim. 2:15) Busa naningkamot tang mahimong mas hanas sa paggamit sa Bibliya, ang atong pangunang himan sa pagtudlo sa kamatuoran bahin kang Jehova, Jesus, ug sa Gingharian. w18.10 11 ¶1-2

Dihang sundogon sa bana ang iyang ulo, si Jesu-Kristo, gitabangan niya ang iyang asawa sa pag-ugmad ug “halawom nga pagtahod” kaniya. (Efe. 5:22-25, 33) Ug kon motahod niya ang iyang asawa, magpakita sab nig konsiderasyon niya. Dihang ang mga ginikanan magpakitag konsiderasyon sa usag usa, naghatag silag maayong ehemplo sa ilang mga anak. Siyempre, ang mga ginikanan ang dunay pangunang responsibilidad sa pagtudlo sa ilang mga anak kon unsaon pagpakitag konsiderasyon. Pananglitan, puwede silang tudloan nga dili magdagandagan sulod sa Kingdom Hall. Diha sa mga tapoktapok, mahimong sultian sila nga paunahon ang mga tigulang sa pagkuhag pagkaon. Dihang magpakita ang bata ug pagkamahunahunaon​—pinaagi tingali sa pag-abli sa pultahan para nato​—angay nato siyang komendahan. Maayo nag epekto sa bata, ug makat-onan niya nga “adunay labaw nga kalipay sa paghatag kay sa pagdawat.” w18.09 29 ¶5-6

Ingon sa gipakita sa iyang aktibong paggiya, ang atong naentronong Hari, si Jesu-Kristo, naglantaw gyod sa umaabot. Busa, maglipay ta sa mga kaayohan nga atong madawat tungod sa pagsunod sa bag-ong mga kausaban. Madasig mo dihang inyong hisgotan sa pamilyahanong pagsimba kon sa unsang paagi nakabenepisyo mo sa mga kausaban sa senemanang panagkatigom o sa ministeryo. Kon atong masabtan ang rason ug kaayohan sa mga instruksiyon nga atong madawat gikan sa organisasyon ni Jehova, lagmit malipay tang mosunod niana. Seguradong nasabtan nato nga nakadaginot tag kuwarta kay gimenosan ang gidaghanon sa literaturang giimprenta ug migamit tag bag-ong teknolohiya. Nakatabang pod ni nga mas daghan ang atong masangyawan. Busa, kanunayng gamita ang electronic nga mga publikasyon ug ang media kon posible. Pinaagi niini, gisundog nato ang hunahuna ni Jesus nga gamiton sa maalamong paagi ang kuwarta ug kabtangan sa organisasyon. Kon maningkamot ta sa pagsunod sa giya ni Jesu-Kristo, mapalig-on nato ang pagtuo sa uban ug mas mahiusa ta. w18.10 25-26 ¶17-19

Kon magmalumo ta, posibleng kita ang tubag sa pag-ampo sa igsoong na-depress. (2 Cor. 1:3-6) Pero ayaw pagdahom ug kahingpitan sa mga igsoon. Magmarealistiko sa imong panglantaw kanila. Kon dahomon nimo nga dili masayop ang mga igsoon, madismayar gyod ka. (Eccl. 7:21, 22) Hinumdomi, si Jehova realistiko sa gidahom niya sa iyang mga alagad. Kon sundogon nato siya, makapailob ta sa kasaypanan sa uban. (Efe. 4:2, 32) Dili nato gustong mobati sila nga kulang ang ilang paningkamot. Hinuon, komendahan nato sila sa ilang nahimo. Makadasig nâ nila. Ang sinserong komendasyon makapalig-on sa uban ug makatabang nila nga magmalipayon sa ilang pag-alagad. Mas maayong buhaton nato nâ imbes itandi sila sa uban.​—Gal. 6:4. w18.09 16 ¶16-17

Para kang Jesus, apil sa espirituwal nga pagkaon ang pagsunod sa giya sa Diyos. Sa unsang paagi nahisama nig pagkaon? Ang atong lawas mabusog ug mohimsog kon mokaon tag sustansiyadong pagkaon. Sa susama, madasig ta ug molig-on ang atong pagtuo sa kinabuhing walay kataposan kon buhaton nato ang kabubut-on sa Diyos. Ang pagtuman sa instruksiyon sa Diyos nagpasabot ug kaalam. (Sal. 107:43) Ug panalanginan gyod ang mga maalamon. “Ang tanang ubang butang nga makapahimuot kanimo dili makatumbas niini. . . . Kini maoy kahoy sa kinabuhi niadtong mga nagakupot niini, ug kadtong mga nagahawid niini pagatawgong malipayon.” (Prov. 3:13-18) Si Jesus miingon: “Kon nahibalo kamo niining mga butanga, malipayon kamo kon inyo kining buhaton.” (Juan 13:17) Magmalipayon ang mga tinun-an ni Jesus kon padayon nilang tumanon ang gisugo niya. Dili kay kausa ra nila gisunod ang gitudlo ug ehemplo ni Jesus. Nahimo ning bahin sa ilang kinabuhi. w18.09 4 ¶4-5

Ang Diyos naghatag sa unang magtiayon ug mga instruksiyon nga magpahunahuna unta nila sa kaayohan sa uban, bisan pag sila rang duha sa tanaman sa Eden. Gipanalanginan ni Jehova si Adan ug Eva ug gisugo nga magdaghan, pun-on ang yuta, ug gamhan kini. (Gen. 1:28) Ang Maglalalang interesado kaayo sa iyang mga linalang, busa angay untang interesado pod ang unang ginikanan sa kalipay sa ilang umaabot nga mga anak. Himoong paraiso ang tibuok yuta alang sa kaayohan sa mga kaliwat ni Adan. Aron molampos kanang dakong proyekto, kinahanglang magtinabangay ang iyang magkadako nga pamilya. Ang hingpit nga mga tawo kinahanglang makigkooperar kang Jehova aron mahimong paraiso ang tibuok yuta ug matuman ang iyang kabubut-on. Niining paagiha, makasulod sila sa iyang kapahulayan. (Heb. 4:11) Hunahunaa kon unsa unta ka makapatagbaw ug makapalipay ang maong proyekto! Ang paghunahuna sa kaayohan sa uban makahatag unta nilag daghang panalangin ug dakong katagbawan. w18.08 18 ¶2; 19-20 ¶8-9

Unsay imong himoon kon dunay mosultig bakak bahin nimo? Naeksperyensiyahan nâ ni Jesus ug Juan nga Tigbawtismo. (Mat. 11:18, 19) Unsay gihimo ni Jesus? Wala niya hutda ang iyang panahon ug kusog sa pagdepensa sa iyang kaugalingon. Hinuon, gidasig niya ang mga tawo sa pagsusi sa tinuod​—ang iyang gihimo ug gitudlo. Sama sa iyang giingon, “ang kaalam mapamatud-ang matarong pinaagi sa mga buhat niini.” (Mat. 11:19) May makat-onan tang importanteng leksiyon niini. Usahay, ang mga tawo tingali mosultig dili maayo bahin nato. Basin gusto natong mahatagag hustisya ug malimpiyohan ang namansahang reputasyon. Pero naa tay mahimo. Kon may magpakaylap ug bakak bahin nato, puwede tang magkinabuhi sa paagi nga mapamatud-ang dili tinuod ang iyang giestorya. Oo, sama kang Jesus, ang atong rekord ingong matarong nga Kristohanon makapamatuod nga bakak ang maong mga akusasyon. w18.08 6 ¶11-13

Ang mga estorya sa Bibliya bahin sa pagkadili-masinugtanon ni Cain, Solomon, ug sa mga Israelinhon sa Bukid sa Sinai dunay managsamang leksiyon nga maayong hinumdoman. Sila may kahigayonan sa ‘paghinulsol ug pagbalik.’ (Buh. 3:19) Klaro, dili gyod dayon talikdan ni Jehova kadtong nakahimog sayop. Sa kahimtang ni Aaron, gipasaylo siya ni Jehova. Karon, ang pasidaan ni Jehova puwedeng maggikan sa mga estorya sa Bibliya, publikasyon, o tambag sa usa ka igsoon. Kon atong paminawon ang mga pasidaan, seguradong kaluy-an ta ni Jehova. Dunay katuyoan ang dili hitupngang pagkamaayo ni Jehova. (2 Cor. 6:1) Maghatag ni natog kahigayonan “sa pagsalikway sa pagkadili-diyosnon ug sa kalibotanong mga tinguha.” (Tito 2:11-14) Samtang nagkinabuhi pa ta “niini nga sistema sa mga butang,” masulayan gyod ang atong eksklusibong debosyon kang Jehova. Hinaot kanunay tang andam sa pagdapig kaniya! w18.07 21 ¶20-21

Unsaon nato pagpalig-on ang atong determinasyon nga mailhan ni Jehova ug dili sa kalibotan? Kinahanglan natong hinumdoman kining duha ka importanteng kamatuoran. Una, si Jehova kanunayng nakaila niadtong matinumanong nag-alagad kaniya. (Heb. 6:10; 11:6) Giapresyar gyod ni Jehova ang matag usa sa iyang mga alagad, ug para niya, “dili-matarong” ang pagbalewala niadtong matinumanon kaniya. “Nahibalo [siya] sa dalan sa mga matarong” ug kon unsaon sila pagtabang panahon sa pagsulay. (Sal. 1:6; 2 Ped. 2:9) Ikaduha, mahimong ilhon ta ni Jehova sa mga paaging wala gyod nato damha. Kadtong mihimog maayo aron lang makita sa mga tawo giingnan nga wala gyod silay ganti gikan kang Jehova. Ngano? Tungod kay sila bug-os nang gigantihan. (Mat. 6:1-5) Pero si Jesus miingon nga ang iyang Amahan “nagatan-aw sa tago” niadtong wala mapasidunggi sa kaayo nga nahimo nila sa uban. Nakita niya ang maong mga buhat ug gantihan, o panalanginan, niya ang matag usa nila. w18.07 9 ¶8, 10

Naglibog si Pedro kon unsay gipasabot sa iyang nadunggan. Dayon, nangabot ang mga mensahero ni Cornelio. Human hatagig instruksiyon sa balaang espiritu, si Pedro miuban sa mga mensahero padulong sa balay ni Cornelio. Kon mihukom si Pedro base lang sa panagway, dili gyod unta siya mosulod sa balay ni Cornelio. Ang mga Hudiyo dili mosulod sa balay sa mga Hentil. Nganong miadto si Pedro bisan sa nakagamot nang diskriminasyon? Napalihok siya pag-ayo sa panan-awon nga iyang nakita ug sa pasalig nga gihatag sa balaang espiritu. Kay natandog si Pedro sa gisulti ni Cornelio, siya nakaingon: “Tinong naila ko nga ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.” (Buh. 10:34, 35) Nalipay gyod si Pedro nianang bag-ong pagsabot​—nga may dumalayong resulta! w18.08 9 ¶3-4

Likayan nato ang mga binuhatan nga gidumtan sa Diyos. Pero, may ubang kalihokan o bahin sa kinabuhi nga walay espesipikong balaod sa Kasulatan. Nianang mga situwasyona, unsaon nato pagkahibalo kon unsay dalawaton ug makapalipay sa Diyos? Diha na molihok ang atong nabansay sa Bibliya nga konsensiya. Mahigugmaong gihatag ni Jehova ang mga prinsipyo nga mogiya sa atong konsensiya. Siya nag-ingon: “Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan, ang Usa nga nagpalakaw kanimo sa dalan nga angay mong pagalaktan.” (Isa. 48:17, 18) Pinaagi sa paggamit sa atong hunahuna ug kasingkasing sa pagpangatarongan base sa mga prinsipyo sa Bibliya, atong matul-id, magiyahan, ug maadyas ang atong konsensiya. Makatabang nâ nato sa paghimog maalamong mga desisyon. Ang prinsipyo maoy pangunang kamatuoran o doktrina nga magamit ingong basehanan sa pagpangatarongan o paglihok. Aron masabtan ang usa ka prinsipyo, kinahanglang mahibaloan nato ang panghunahuna sa Tighatag sa balaod ug kon nganong gihatag niya kini. w18.06 17 ¶5; 18 ¶8-10

Ang mga sumusunod sa partido ni Herodes, nga maoy nagpatungha niini nga isyu, nagdahom nga kon moingon si Jesus nga dili kinahanglang mobayad ug buhis, mahimong akusahan siyag pagrebelde sa gobyerno. Kon moingon si Jesus nga kinahanglan ning bayran, mahimong mawad-an siyag mga sumusunod. Nag-amping si Jesus sa pagpabiling neyutral niini nga isyu. Siyempre, nahibalo si Jesus nga daghang tigkolektag buhis ang korap. Pero dili niya gustong matipas sa mas importanteng isyu​—ang Gingharian sa Diyos nga maoy tinuod nga solusyon sa mga problema. Busa, nagpakita siyag panig-ingnan sa tanan niyang sumusunod. Kinahanglang dili sila mag-apil-apil sa politikal nga mga isyu, bisan ug morag husto o makataronganon kana. Ang mga Kristohanon nagpokus sa Gingharian sa Diyos ug sa iyang pagkamatarong. Gibuhat nila kana imbes mokomento nga dapig, o kontra, sa pipila ka inhustisya. (Mat. 6:33) Daghan sa mga Saksi ni Jehova ang milampos sa pagbiya sa ilang politikal nga mga hunahuna kaniadto. w18.06 6 ¶9-11

Gawas sa paggamit ug imoralidad sa pagtental sa dili maunongong mga anghel, basin gisaaran pod sila ni Satanas nga mandoan nila ang mga tawo. Tingali tuyo niya nga babagan ang pag-abot sa gisaad nga ‘binhi sa babaye.’ (Gen. 3:15) Bisan unsa pa man, gitapos ni Jehova kanang tanang plano pinaagi sa Lunop​—nga nakapugong sa tanang paningkamot ni Satanas ug sa rebelyosong mga anghel nianang panahona. Busa, ayaw gyod pakamenosa ang paon sa imoralidad o garbo. Ang mga anghel nga midapig kang Satanas dugay nang nag-alagad atubangan sa Diyos. Pero gitugotan nila nga mogamot ug motubo sa ilang kasingkasing ang daotang mga tinguha. Sa susama, dugay na tingali tang nag-alagad sa Diyos. Pero bisan pa niining hinlo sa espirituwal nga palibot, posible gihapong mogamot sa atong kasingkasing ang hugawng mga tinguha. (1 Cor. 10:12) Busa, importante gyod nga susihon ang atong kasingkasing, isalikway ang imoral nga panghunahuna, ug wad-on ang pagkagarboso!​—Gal. 5:26; Col. 3:5. w18.05 25 ¶11-12

Naluya si Pablo tungod sa negatibong reaksiyon sa mga Hudiyo sa mensahe sa Gingharian. Bisan pa niana, wala siya mohunong ug sangyaw nila. Matikdi ang iyang giingon sa mga Kristohanon sa Roma bahin sa iyang pagbati sa maong mga Hudiyo: “Ang maayong kabubut-on sa akong kasingkasing ug ang akong pangamuyo sa Diyos alang kanila maoy, sa pagkatinuod, alang sa ilang kaluwasan. Kay ako nagpamatuod mahitungod kanila nga sila may kasibot sa Diyos; apan dili sumala sa tukmang kahibalo.” (Roma 10:1, 2) Gisulti ni Pablo kon nganong padayon siyang nagsangyaw nila. Napalihok siya sa “maayong kabubut-on sa [iyang] kasingkasing.” Gusto niyang maluwas sila. (Roma 11:13, 14) Siya nangamuyo nga tabangan sa Diyos ang mga Hudiyo nga dawaton unta nila ang mensahe sa Gingharian. Si Pablo miingon: “Sila may kasibot sa Diyos.” Iyang nakita ang maayo sa maong mga tawo. Nahibalo siya nga kon husto ang kasibot sa mga Hudiyo, posible silang mahimong dasig nga mga tinun-an ni Kristo. w18.05 13 ¶4; 15-16 ¶13-14

Angayng magmahunahunaon ang matag usa kon unsay “gikinahanglan” sa uban. Si Pablo nagtambag sa Hebreohanong mga Kristohanon: “Iisa ang mga kamot nga nahuyhoy ug ituyhad ang mahuyang nga mga tuhod, ug tul-ira ang mga alagianan sa inyong mga tiil, aron nga ang piang dili malisa, kondili mamaayo hinuon.” (Heb. 12:12, 13) Kitang tanan, apil ang mga bata, makapalig-on sa usag usa pinaagig mga pulong sa pagdasig. Si Pablo nagtambag: “Nan, kon aduna may pagdasig diha kang Kristo, kon aduna may pagpanghupay sa gugma, kon aduna may pag-inambitay sa espiritu, kon aduna may malumong mga pagmahal ug pagkamabination, himoang bug-os ang akong kalipay sa pagkaagi nga kamo managsama ug kaisipan ug may samang gugma, nga nahiusa diha sa kalag, nga magahupot sa usa ra ka hunahuna diha sa kaisipan, nga dili magabuhat ug bisan unsa tungod sa pagkamatigion o tungod sa pagpaimportante sa kaugalingon, kondili uban sa pagpaubos sa hunahuna nga magaisip nga ang uban labaw kay kaninyo, nga magatan-aw, dili lamang sa personal nga interes sa mga butang labot sa inyong kaugalingon, kondili sa personal nga interes usab sa uban.”​—Filip. 2:1-4. w18.04 22 ¶10; 23 ¶12

Gigamit ni Jehova si Jesus sa pagpahigawas nato gikan sa balaod sa sala ug kamatayon aron magkinabuhi ta ingong dedikadong “mga ulipon sa Diyos.” Ang kinamaayohang paagi nga malikayan ang sayop nga paggamit sa kagawasan ug maulipon pag-usab sa ambisyon ug tinguha sa kalibotan mao ang pagpokus sa espirituwal nga mga tumong. (Gal. 5:16) Pananglitan, konsideraha si Noe ug ang iyang pamilya. Nagpuyo sila sa bayolente ug imoral nga kalibotan. Pero, wala sila maimpluwensiyahi sa mga tinguha ug kalihokan sa mga tawo. Giunsa nila kana paghimo? Gituman nila ang tanang gipabuhat ni Jehova​—paghimo sa arka, pagtigom ug pagkaon, ug pagpasidaan sa uban. “Gibuhat ni Noe ang sumala sa tanan nga gisugo sa Diyos kaniya. Gibuhat niya ang ingon gayod.” (Gen. 6:22) Unsay resulta? Si Noe ug ang iyang pamilya naluwas dihang nalaglag ang maong kalibotan.​—Heb. 11:7. w18.04 10 ¶8; 11 ¶11-12

Gawas sa gobyerno, si Satanas ug ang iyang mga demonyo naggamit pod sa bakak nga relihiyon ug sa sistema sa negosyo aron mahisalaag ang “tibuok gipuy-ang yuta.” (Pin. 12:9) Pinaagi sa bakak nga relihiyon, si Satanas nagpasiugdag kabakakan bahin kang Jehova. Dugang pa, naningkamot ang Yawa sa pag-impluwensiya sa mga tawo aron malimtan ang ngalan sa Diyos. (Jer. 23:26, 27) Tungod niini, ang sinserong mga tawo nga nagtuong nagsimba sa Diyos nagsimba diay sa mga demonyo. (1 Cor. 10:20; 2 Cor. 11:13-15) Nagpasiugda pod ug kabakakan si Satanas pinaagi sa sistema sa negosyo. Pananglitan, kini nga sistema sagad nagtudlo nga aron magmalipayon, ang mga tawo kinahanglang magtigom ug daghang kuwarta ug kabtangan. (Prov. 18:11) Kadtong nagtuo niini nga bakak nag-alagad sa “Bahandi” imbes sa Diyos. (Mat. 6:24) Sa ngadtongadto, mawala ang ilang gugma sa Diyos tungod sa ilang paghigugma sa materyal nga mga butang.​—Mat. 13:22; 1 Juan 2:15, 16. w18.05 23 ¶6-7