Oktubre

Dili ta sama ni Jehova ug Jesus nga makabasag kasingkasing. Pero, puwede tang maningkamot nga masabtan ang pagbati ug panginahanglan sa uban. (2 Cor. 11:29) Dili sama sa mga tawo sa atong palibot nga kaugalingon ray gihunahuna, maningkamot ta sa ‘pagtan-aw, dili lamang sa atong personal nga interes, kondili sa personal nga interes usab sa uban.’ (Filip. 2:4) Ilabinang importante sa mga ansiyano ang pagpakitag simpatiya. Sila nahibalo nga manubag sila kang Jehova sa ilang pag-atiman sa mga karnero. (Heb. 13:17) Aron matabangan ang mga igsoon, ang mga ansiyano kinahanglang magmasinabtanon. Sa unsang paagi sila makapakitag simpatiya? Ang ansiyano nga may simpatiya mogahin ug panahon sa mga igsoon. Mangutana siya ug mapailobong mamati nila. Ilabinang importante ni kon dunay gustong mosulti sa ilang hunahuna ug pagbati pero maglisod sa pagpahayag ana. (Prov. 20:5) Kon ang ansiyano andam mogahin ug panahon, ang mga igsoon mas mosalig ug masuod niya, ug mahalon nila siya.​—Buh. 20:37. w19.03 17 ¶14-17

Ang apresasyon morag lami nga pagkaon​—mas ganahan ka kon may kasalo. Dihang mobati tang giapresyar, malipay ta. Dihang ipakita nato ang apresasyon, mapalipay nato ang uban. Ang atong gipasalamatan nahibalo nga ang iyang gihimo o gihatag nakatabang nato. Ingong resulta, masuod ta nianang tawhana. Ang pagpasalamat bililhon kaayo, ingon sa gipakita sa teksto karong adlawa. Hunahunaa kon unsa ka nindot ang mansanas nga bulawan diha sa plata nga butanganan! Ug hunahunaa kon unsa nâ ka bililhon! Unsay imong bation kon makadawat kag ingon ana nga regalo? Aw, ingon niana ka bililhon ang pagpasalamat ngadto sa uban. Ug konsideraha ni: Ang mansanas nga hinimo sa bulawan magpabilin sa taas nga panahon. Ingon ana pod ang pagpakitag apresasyon. Kini mahinumdoman ug pabilhan sa midawat niini sa tibuok niyang kinabuhi. w19.02 15 ¶5-6

Dihang mikaon si Adan ug Eva sa bunga sa kahoy sa kahibalo sa maayo ug sa daotan, kini ang klaro nilang gipakita: Wala sila mosalig kang Jehova ug sa iyang sukdanan. Gipili nilang maghimog kaugalingong sukdanan sa maayo ug daotan. Pero hunahunaa kon unsay nawala nila. Nawala ang ilang maayong relasyon kang Jehova. Nawala sab ang kahigayonan nga mabuhi sa walay kataposan, ug gipasa nila sa ilang mga anak ang sala ug kamatayon. (Roma 5:12) Itandi ang panghunahuna ni Adan ug Eva nianang sa Etiopianhong eunuko nga gisangyawan ni Felipe. Gipabilhan pag-ayo sa eunuko ang gihimo ni Jehova ug Jesus para kaniya nga nagpabawtismo dayon siya. (Buh. 8:34-38) Dihang gidedikar nato ang kaugalingon sa Diyos ug, sama sa eunuko, nagpabawtismo, kini ang klaro natong gipakita: Mapasalamaton ta sa gihimo ni Jehova ug Jesus para kanato. Gipakita sab nato nga misalig ta kang Jehova ug giila nato nga siya ang angayng magtakda kon unsay maayo ug daotan. w19.03 2 ¶1-2

Unsaon pagpakita sa mga alagad sa Diyos ang pagkamatinumanon? Mapakita nila kana pinaagi sa tibuok kasingkasing ug way paglubad nga gugma kang Jehova ug, tungod niana, sila kanunayng mobuhat sa makapalipay niya. Sa Bibliya, ang Hebreohanong pulong nga gihubad ug matinumanon (o, integridad), nagkahulogang kompleto, walay depekto, o tibuok. Pananglitan, ang mga hayop nga gihalad kang Jehova kinahanglang walay depekto. (Lev. 22:21, 22) Ang katawhan sa Diyos dili puwedeng mohalad ug hayop nga kulang ug tiil, dalunggan, o mata. Dili pod puwede ang masakiton. Para kang Jehova, ang hayop kinahanglang kompleto, walay depekto, o tibuok. (Mal. 1:6-9) Atong masabtan kon ngano. Kon mopalit ta, tingali usa ka prutas, libro, o gamit, dili gyod nato pilion kadtong dagkog lungag o kulang ug parte. Pilion nato kadtong kompleto, walay depekto, o tibuok. Mao pod nay bation ni Jehova sa atong gugma ug pagkamaunongon kaniya. Kini kinahanglang kompleto, walay depekto, o tibuok. w19.02 3 ¶3

Aron maampingan ang kasingkasing, dili lang nato kini sirad-an batok sa daotang impluwensiya kondili ablihan sab kini aron makasulod ang maayong impluwensiya. Sa pinarilang mga siyudad sa una, ang magbalantay magsira sa ganghaan aron dili makasulod ang mga kaaway, pero sa ubang panahon ablihan niya kini aron makasulod ang pagkaon ug ubang suplay. Kon dili ablihan ang ganghaan, ang mga tawo sa siyudad magutman. Sa susama, kinahanglang ablihan nato kanunay ang kasingkasing aron makasulod ang panghunahuna sa Diyos. Makita diha sa Bibliya ang panghunahuna ni Jehova, busa matag higayon nga basahon nato kini, atong gitugotan nga maimpluwensiyahan niana ang atong panghunahuna, pagbati, ug binuhatan. Sa unsang paagi makabenepisyo ta pag-ayo sa atong pagbasa sa Bibliya? Hinungdanon ang pag-ampo aron matabangan tang makita ang “katingalahang mga butang” sa iyang Pulong. (Sal. 119:18) Kinahanglan sab tang mamalandong sa atong nabasa. Dihang kita moampo, magbasa, ug mamalandong, ang Pulong sa Diyos modulot sa ‘atong kasingkasing,’ ug mahigugma ta sa panghunahuna ni Jehova.​—Prov. 4:20-22. w19.01 18 ¶14-15

Nahibalo si Jehova nga managlahi tag katakos ug kahimtang, ug gipabilhan niya pag-ayo ang atong mga sakripisyo. Konsideraha ang klase sa mga halad nga iyang giuyonan. May mga Israelinhon nga makahalad ug karnero o kanding. Apan ang usa ka pobreng Israelinhon motanyag tingalig “duha ka tukmo o duha ka piso sa salampati.” Ug kon dunay dili makaarang sa pagpalit ug duha ka langgam, modawat si Jehova ug “ikanapulo sa usa ka ephah sa pinong harina.” (Lev. 5:7, 11) Mas barato ang harina, pero gipabilhan gihapon kana ni Jehova, basta kini maoy “pinong harina.” Mao gihapon nay gibati karon sa atong mahigugmaong Diyos. Dihang mokomento ta, dili siya magdahom nga sama ta ka larino ni Apolos o ka maayong mangombinsir sama ni Pablo. (Buh. 18:24; 26:28) Gusto ni Jehova nga ihatag nato ang kinamaayohang komento​—kutob sa maarangan. Hinumdomi ang babayeng balo nga mihulog ug duha ka gagmayng sensilyo. Bililhon siya kang Jehova kay gihatag niya ang iyang kinamaayohan.​—Luc. 21:1-4. w19.01 8-9 ¶3-5

Ingong mga sumusunod sa Kristo, gidahom na nato nga dumtan ta. Gitagna na ni Jesus nga sa kataposang mga adlaw ang iyang mga tinun-an makasinatig grabeng paglutos. (Mat. 24:9; Juan 15:20) Ang tagna sa Isaias nagpasidaan nato nga ang atong mga kaaway dili lang magdumot nato; mogamit silag lainlaing hinagiban batok nato. Apil sa maong mga hinagiban ang dili daling mamatikdan nga panglimbong, klarong kabakakan, ug grabeng paglutos. (Mat. 5:11) Dili pugngan ni Jehova ang atong mga kaaway sa pag-atake kanato gamit ang maong mga hinagiban. (Efe. 6:12; Pin. 12:17) Pero dili ta angayng mahadlok. Si Jehova nag-ingon nga “dili magmalamposon” ang “bisan unsa nga hinagiban” nga gamiton batok kanato. (Isa. 54:17) Sama nga ang paril manalipod nato batok sa kusog kaayong bagyo, proteksiyonan pod ta ni Jehova batok sa “huros sa mga malupigon.” (Isa. 25:4, 5) Ang atong mga kaaway dili gyod makahimog permanenteng kadaot kanato. (Isa. 65:17) Ang tanang kaaway sa katawhan sa Diyos “mahimong sama sa wala ug malaglag.”​—Isa. 41:11, 12. w19.01 6-7 ¶13-16

Mga batan-on, gimahal ni Jehova ang kagawasan, ug gibutang niya ang maong pagmahal sa inyong kasingkasing. Pero sa samang panahon, gusto niyang gamiton ninyo ang inyong kagawasan sa maalamong paagi, nga makapanalipod ninyo. Tingali may nailhan mong nagtan-awg pornograpiya o naghimog seksuwal nga imoralidad, nag-apil-apil sa peligrosong mga sport, o nagdroga ug naghuboghubog. Siyempre, nakatagamtam silag temporaryong kalipay. Pero sagad dili maayo ang resulta niana, sama sa sakit, pagkaadik, o kamatayon pa gani. (Gal. 6:7, 8) Oo, dili tinuod ang ilang “kagawasan.” (Tito 3:3) Sa pagkomparar, pila may nahibal-an ninyo nga nasakit tungod sa pagsunod sa Bibliya? Klaro, ang pagsunod kang Jehova makaayo ug makahatag ug kagawasan. (Sal. 19:7-11) Dugang pa, kon gamiton ninyo ang inyong kagawasan sa maalamong paagi​—nga dili molapas sa hingpit nga balaod ug prinsipyo sa Diyos​—inyong gipakita sa Diyos ug sa inyong ginikanan nga puwede mong hatagag dugang kagawasan.​—Roma 8:21. w18.12 22-23 ¶16-17

Ang sala ni Adan nagpahinabog mga kausaban. Usa niana ang kamatayon, nga makaapekto sa kaminyoon. Ato nang nasabtan sa gisulat ni Pablo dihang gipatin-aw niya nga ang mga Kristohanon wala mailalom sa Balaod ni Moises. Iyang gipakita nga ang kamatayon magtapos sa kaminyoon ug ang buhi pa nga kapikas makaminyo pag-usab. (Roma 7:1-3) Ang Balaod nga gihatag sa Diyos ngadto sa Israel nagtaganag mga detalye bahin sa kaminyoon. Gitugot niini ang poligamiya (daghag asawa), nga naglungtad na sa wala pa ang Balaod. Bisan pa niana, ang poligamiya may mga limitasyon, nga nagdili sa pag-abuso. Pananglitan, kon ang usa ka Israelinhon mangasawag ulipon ug sa ulahi mokuhag ikaduhang asawa, itagana gihapon niya sa unang asawa ang pagkaon, sinina, ug seksuwal nga panginahanglan niini nga sama sa nangagi. Ang Diyos nagsugo sa bana nga padayon kining protektahan ug atimanon. (Ex. 21:9, 10) Wala na ta mailalom sa Balaod, pero makita nato niana ang pagpabili ni Jehova sa kaminyoon. Seguradong makatabang nâ nimo sa pagpabili sa kaminyoon. w18.12 10 ¶3; 11 ¶5-6

Human masulti kang Jehova ang iyang mga kabalaka, lagmit naghunahuna si Habacuc kon sa unsang paagi molihok si Jehova. Ingong mabination ug masinabtanong Amahan, wala siya kasab-i ni Jehova sa iyang sinserong reklamo. Nahibalo ang Diyos nga si Habacuc nag-antos ug nangayog tabang. Sa mga pulong nga gitumong ngadto sa masinupakong mga Hudiyo, gisultian ni Jehova si Habacuc kon unsay hapit nang mahitabo. Lagmit si Habacuc ang unang gipahibalo ni Jehova nga hapit na Niyang silotan ang mga daotan. Gipakita ni Jehova kang Habacuc nga andam Siyang molihok. Hapit na niyang silotan kanang bayolente ug daotang henerasyon. Pinaagi sa pag-ingong “sa inyong mga adlaw,” gipakita ni Jehova nga ang paghukom mahitabo gyod samtang buhi pa si Habacuc ug ang iyang mga kontemporaryo. Ang tubag ni Jehova dili maoy gidahom ni Habacuc. Mao ba ni tubag sa iyang reklamo? Ang gisulti ni Jehova klarong nagpasabot nga mograbe ang pag-antos sa Juda. w18.11 15 ¶7-8

Unsay imong panglantaw sa lainlaing matang sa tawo nga wala pa mahibalo sa kamatuoran? Bisag miadto si apostol Pablo sa mga sinagoga aron tudloan kadtong may kahibalo na bahin sa Diyos, dili lang mga Hudiyo ang iyang gisangyawan. Sa unang misyonaryong biyahe ni Pablo, sila ni Bernabe nasaypan sa mga taga-Licaonia ingong mga superhero​—ilang mga diyosdiyos nga si Zeus ug Hermes nga nahimong tawo. Gipahimuslan ba ni Pablo ug Bernabe ang maong oportunidad? Giisip ba nila kini ingong kahigayonan nga makapahulay sa mga paglutos nga ilang naeksperyensiyahan sa duha ka siyudad nga ilang gibisita? Naghunahuna ba sila nga ang pagkasikat makatabang sa pagpakaylap sa maayong balita? Wala gyod! Hinunoa, ila dayong gigisi ang ilang sinina ug gisinggitan ang mga tawo: “Nganong nagabuhat kamo niining mga butanga? Kami usab mga tawo nga sama ra kaninyog mga kaluyahon.”​—Buh. 14:8-15. w18.09 5 ¶8-9

Aron mapadapat ang mga prinsipyo sa Bibliya nga atong nakat-onan, kinahanglang andam tang bag-ohon ang atong panghunahuna ug panggawi. Matikdi ang giingon ni Pedro bahin niini: “Ingong masinugtanong mga anak, hunong na sa pagpaumol sumala sa mga tinguha nga inyong nabatonan kanhi sa inyong kawalay-alamag, apan . . . magmabalaan usab kamo sa tanan ninyong panggawi.” (1 Ped. 1:14, 15) Para sa mga tawo diha sa imoral nga siyudad sa Corinto, ang pagpalit sa kamatuoran nagpasabot ug paghimog dagkong kausaban sa ilang pagkinabuhi. Sa susama, daghan pod karon ang kinahanglang mobiya sa dili maayong panggawi aron mapalit ang kamatuoran. Si Pedro nagpadayon sa iyang tambag sa mga Kristohanon kaniadto: “Ang panahong miagi igo na alang kaninyo sa pagbuhat sa kabubut-on sa mga nasod sa dihang kamo nagpadayon sa mga buhat sa malaw-ayng panggawi, kaulag, pagpatuyang sa bino, hudyaka, palabwanay sa inom, ug sa gidiling mga idolatriya.”​—1 Ped. 4:3. w18.11 6 ¶13

Unsaon nato pag-ila kon kinsa ang “hustong nakiling alang sa kinabuhing walay kataposan”? Niadtong unang siglo, pagsangyaw lang ang paagi aron makit-an sila. Busa, kinahanglan natong sundon ang sugo ni Jesus: “Sa bisan unsang siyudad o balangay nga kamo mosulod, pangitaa kon kinsa didto ang takos.” (Mat. 10:11) Siyempre, dili nato dahomon nga maminaw sa maayong balita ang mga tawong dili sinsero, mapahitas-on, o walay pagpakabana sa espirituwal. Gipangita nato kadtong matinud-anon, mapaubsanon, ug uhaw sa kamatuoran. Pareho ni sa gihimo ni Jesus ingong panday. Siya nangita ug hustong klase sa kahoy nga himoong muwebles (furniture), pultahan, yugo, o uban pa. Dihang makit-an niya ang haom nga materyales, kuhaon niya ang toolbox, ug gamiton ang iyang nahibaloan sa paghimog mapuslanong butang. Kinahanglang buhaton sab nato nâ dihang maningkamot sa pagtabang sa mga tawo nga mahimong tinun-an.​—Mat. 28:19, 20. w18.10 12 ¶3-4

Si Felipe nga tig-ebanghelyo maoy maayong ehemplo sa pagpokus sa ministeryo bisag nag-usab-usab ang kahimtang. Sa Jerusalem, nahitabo ang grabeng paglutos human sa kamatayon ni Esteban ingong martir. Nianang panahona, nakadawat si Felipe ug bag-ong pribilehiyo. (Buh. 6:1-6) Pero dihang nagkatibulaag ang mga sumusunod sa Kristo, gusto ni Felipe nga magpabiling puliki sa pag-alagad. Misangyaw siya sa Samaria, usa ka siyudad diin daghan pa ang wala masangyawi niadtong panahona. (Mat. 10:5; Buh. 8:1) Andam moadto si Felipe bisag asa siya ipadala sa espiritu sa Diyos, maong gigamit siya ni Jehova sa pag-adto sa mga dapit nga wala pa masangyawi. Ang iyang dili mapihigong paagi sa pagpakig-estorya nakapahupay sa mga Samarianhon, kinsa pirmeng tamayon sa mga Hudiyo. Mao diay nga ang panon “nagkahiusa” sa pagpaminaw niya! (Buh. 8:6-8) Si Felipe nagpokus sa iyang ministeryo. Tungod niana, siya ug ang iyang pamilya abundang gipanalanginan ni Jehova.​—Buh. 21:8, 9. w18.10 30 ¶14-16

Dihang didto si Jesus sa Decapolis, ang mga tawo ‘nagdalag usa ka tawong bungol ug may babag sa pagsulti.’ (Mar. 7:31-35) Imbes ayohon siya atubangan sa mga tawo, gidala siya ni Jesus sa unahan, nga layo nila, ug giayo siya. Ngano? Basig dili siya komportable atubangan sa mga tawo tungod sa iyang kahimtang. Seguradong nasabtan ni Jesus ang iyang pagbati, ug giayo siya nga sila rang duha. Siyempre, dili ta makahimog milagro. Pero puwede tang maghunahuna​—ug angayng maghunahuna​—sa panginahanglan ug pagbati sa atong mga igsoon. Nasabtan ni Jesus ang gibati sa tawong bungol ug gipakitaan siyag konsiderasyon. Sa susama, angay sab tang magpakitag konsiderasyon sa mga tigulang ug maluya. Ang timailhan sa kongregasyon dili ang kahanas, kondili ang gugma. (Juan 13:34, 35) Tungod sa maong gugma, andam tang mosakripisyo sa pagtabang sa mga tigulang ug maluya nga makatambong sa tigom ug makasangyaw. Buhaton nato nâ bisag limitado ra ang ilang mahimo.​—Mat. 13:23. w18.09 29-30 ¶7-8

Ang tanang karnero ni Jehova bililhon kaayo kaniya ug kang Jesus, kinsa nagtagana sa halad lukat. (Gal. 2:20) Gimahal nato pag-ayo ang mga igsoon. Ug gusto natong trataron sila sa malumo ug mahigugmaong paagi. Aron makapadasig ta, “atong tinguhaon ang mga butang nga mopatunghag pakigdait ug ang mga butang nga makapalig-on sa usag usa.” (Roma 14:19) Nagpaabot ta sa panahon dihang, sa umaabot nga Paraiso, wala na gyoy rason nga madismayar ta! Wala nay sakit, gubat, napanunod nga kamatayon, paglutos, problema sa pamilya, ug kapakyasan. Human sa usa ka libo ka tuig, hingpit na ang katawhan. Unya, kadtong makapasar sa kataposang pagsulay sagopon ni Jehova ingong yutan-ong mga anak ug makabaton sa “mahimayaong kagawasan sa mga anak sa Diyos.” (Roma 8:21) Hinaot padayon natong ipakita ang gugma nga makapalig-on ug tabangan ang usag usa nga madawat kanang makapalipayng panalangin. w18.09 14 ¶10; 16 ¶18

Ang pagtuon sa Pulong sa Diyos wala lang magpasabot ug paspas nga pagbasa sa impormasyon ug paglinya sa mga tubag. Dihang magtuon, kinahanglan natong konsiderahon kon unsay atong makat-onan bahin kang Jehova, sa iyang paagi, ug sa iyang hunahuna. Maningkamot tang masabtan kon nganong gipabuhat sa Diyos ang usa ka butang ug gipalikayan ang lain. Hunahunaon sab nato kon unsay angay natong bag-ohon sa atong kinabuhi ug panghunahuna. Dili nato makonsiderar kining tanan matag pagtuon. Pero makabenepisyo ta kon mogahin tag panahon​—tingali katunga sa gidugayon sa atong pagtuon​—sa pagpamalandong sa atong gibasa. (1 Tim. 4:15) Samtang regular tang mamalandong sa Pulong sa Diyos, atong ‘mapamatud-an sa atong kaugalingon’ nga hingpit ang panghunahuna ni Jehova. Atong masabtan ang iyang panglantaw ug mouyon ta ana. Ang atong panghunahuna ‘mabag-o,’ ug makabaton tag bag-ong paagi sa paghunahuna. (Roma 12:2) Sa ngadtongadto, masundog nato ang panghunahuna ni Jehova. w18.11 24 ¶5-6

Sa unang siglo C.E., gitawag ni Pablo ang kaugalingon ug ang pipila niya ka kauban ingong “mga isigkamagbubuhat sa Diyos” kay sila nagtanom ug nagbisbis sa binhi sa kamatuoran sa Gingharian. (1 Cor. 3:6) Karon, mahimo sab tang “mga isigkamagbubuhat sa Diyos” pinaagi sa kinasingkasing nga paggamit sa atong panahon, kuwarta, ug kusog diha sa buluhatong pagsangyaw nga gisugo sa Diyos. Dako kaayo nâ nga pribilehiyo! Makapalipay gyod ang kinasingkasing nga paggamit sa atong panahon ug kusog diha sa pagsangyaw ug paghimog mga tinun-an. Mao nay giingon niadtong nakadumalag progresibong mga Bible study. Makapalipay kaayong makita dihang ang giestadihan makasabot sa kamatuoran, mas molig-on ang pagtuo, mohimog kausaban, ug mosugod pagsangyaw. Gibati sab nâ ni Jesus dihang ang 70 ka magsasangyaw nga iyang gipadala “namauli uban ang kalipay” tungod sa ilang maayong mga eksperyensiya.​—Luc. 10:17-21. w18.08 20 ¶11-12

Kon mosalig ta pag-ayo sa kaugalingong pagsabot, posible ning mahimong bitik. Mobati tingali ta nga masabtan nato ang situwasyon bisag wala nato mahibaloi ang tanang impormasyon. Malisdan pod ta sa pagtimbangtimbang sa usa ka situwasyon kon duna tay dili pagsinabtanay sa usa ka igsoon. Kon pirme tang maghunahuna ana, basin magduda dayon ta sa atong igsoon. Busa, kon makadungog tag negatibong balita bahin niya, mahimong motuo dayon ta. Unsay leksiyon? Kon may kalagot ta sa atong igsoon, makahimo tag sayop nga konklusyon. (1 Tim. 6:4, 5) Malikayan nato nâ kon dili nato tugtan ang kasina nga mogamot sa atong kasingkasing. Imbes magpadala sa negatibong pagbati, mas maayong hunahunaon nato ang atong obligasyon nga higugmaon ug kinasingkasing nga pasayloon ang atong igsoon.​—Col. 3:12-14. w18.08 6 ¶15; 7 ¶18

Kay si Jehova man ang naghimo sa mga tawo, iya ta ni Jehova. (Sal. 100:3; Pin. 4:11) Pero, sa tibuok kasaysayan, ang Diyos nagpilig espesipikong mga grupo sa katawhan nga nahimong iya sa espesyal nga paagi. Pananglitan, ang Salmo 135 nagtawag sa matinumanong mga magsisimba ni Jehova sa karaang Israel ingong “iyang linaing katigayonan.” (Sal. 135:4) Dugang pa, ang basahon sa Oseas nagtagna nga dunay dili mga Israelinhon nga mahimong katawhan ni Jehova. (Os. 2:23) Ang tagna ni Oseas natuman dihang giapil ni Jehova ang mga dili Hudiyo nga mahimong kaubang magmamando sa Kristo. (Buh. 10:45; Roma 9:23-26) Kanang “balaang nasod” maoy “linaing pagpanag-iya” ni Jehova sa talagsaong paagi, kay ang mga membro niini gidihogan sa balaang espiritu ug gipili nga mabuhi sa langit. (1 Ped. 2:9, 10) Komosta ang kadaghanang Kristohanon karon nga may paglaom nga mabuhi sa yuta? Gitawag pod sila ni Jehova nga iyang “katawhan” ug iyang “pinili.”​—Isa. 65:22. w18.07 22 ¶1-2

Ang matuod nga mga Kristohanon nagsundog sa Kristo, kinsa naghatag ug hingpit nga ehemplo kon sa unsang paagi magmahinatagon ang tawo. (Mat. 20:28) Maayong pangutan-on nato ang kaugalingon, ‘Mas masundog pa ba nako si Jesus?’ (1 Ped. 2:21) Maangkon nato ang pabor ni Jehova kon sundogon nato siya ug ang Kristo, kon magpakita tag interes sa uban, ug kon mangita tag mga paagi sa pag-atiman sa ilang panginahanglan. Gani, diha sa ilustrasyon bahin sa buotang Samarianhon, klarong gipakita ni Jesus nga gusto niyang ang iyang mga sumusunod motabang sa uban, bisan niadtong lahig kagikan. (Luc. 10:29-37) Nahinumdom ka ba kon nganong giestorya ni Jesus ang maong ilustrasyon? Tungod kadto sa pangutana sa usa ka Hudiyo: “Kinsa ba gayod ang akong silingan?” Gipakita sa tubag ni Jesus nga sama sa Samarianhon kinahanglang andam tang magmahinatagon aron maangkon ang pabor sa Diyos. w18.08 19 ¶5-6

Padayon bang gipakitaan ni Jehova si Maria ug haom nga pasidungog tungod sa iyang matinumanong pag-atiman ug pagpadako kang Jesus? Oo. Giseguro sa Diyos nga marekord sa Bibliya ang gibuhat ug gisulti ni Maria. Lagmit, dili makahimo si Maria sa pag-uban-uban kang Jesus sa tulo ka tuig ug tunga nga ministeryo niini. Tingali kay biyuda siya, kinahanglan niyang magpabilin sa Nasaret. Pero bisan pag wala niya maeksperyensiyahi ang daghang pribilehiyo, kauban siya ni Jesus panahon sa kamatayon niini. (Juan 19:26) Sa ulahi, si Maria didto sa Jerusalem uban ang mga tinun-an hangtod sa Pentekostes dihang gibubo ang balaang espiritu. (Buh. 1:13, 14) Lagmit apil siya sa gidihogan niadtong panahona. Kon mao, magpasabot nâ nga makapribilehiyo siya nga makauban si Jesus sa langit hangtod sa hangtod. Pagkanindot nga panalangin tungod sa iyang matinumanong pag-alagad! w18.07 9 ¶11; 10 ¶14

Sa tibuok ministeryo ni Jesus, iyang gitudlo ang pangunang kamatuoran nga makatabang sa iyang mga tinun-an nga mahibaloan ang resulta sa pipila ka panghunahuna o aksiyon. Pananglitan, iyang gitudlo nga ang pagdumot moresultag kapintasan ug ang imoral nga hunahuna moresultag panapaw. (Mat. 5:21, 22, 27, 28) Aron mabansay pag-ayo ang atong konsensiya, kinahanglang magpagiya ta sa mga prinsipyo sa Diyos ug sa ingon, mahimaya nato siya. Sa pipila ka kahimtang, ang duha ka Kristohanon nga may nabansay sa Bibliya nga konsensiya tingali magkalahig desisyon. Konsideraha ang pag-inom ug makahubog nga ilimnon. Wala idili sa Bibliya ang pag-inom. Pero nagpasidaan ni batok sa sobrang pag-inom, apil ang paghuboghubog. (Prov. 20:1; 1 Tim. 3:8) Nagpasabot ba ni nga dili na angayng konsiderahon sa usa ka Kristohanon ang ubang prinsipyo basta dili lang sobra ang iyang pag-inom? Wala. Bisag wala siya hasola sa iyang konsensiya, angay sab niyang konsiderahon ang konsensiya sa uban. w18.06 18 ¶10-11

Gipasidan-an ni Jesus ang iyang mga tinun-an nga likayan ang mga pagtulon-an, o lebadura, nga gipasiugda sa mga Pariseo, Saduseo, ug mga sumusunod sa partido ni Herodes. (Mat. 16:6, 12) Makapainteres nga gihimo nâ ni Jesus wala madugay human sa panghitabo diin gusto siyang himoong hari sa mga tawo. Dihang ang relihiyon mag-apil-apil sa politika, sagad mahitabo ang kapintasan. Nagtudlo si Jesus sa iyang mga tinun-an nga kinahanglan silang magpabiling neyutral. Usa nâ ka rason kon nganong gustong patyon si Jesus sa pangulong mga saserdote ug sa mga Pariseo. Giisip nila siya ingong karibal sa politika ug sa relihiyon nga magpameligro sa ilang posisyon. Sila miingon: “Kon pasagdan lang nato siya niini, silang tanan magbutang ug pagtuo kaniya, ug moanhi ang mga Romano ug kuhaon ang atong dapit ug ang atong nasod.” (Juan 11:48) Busa ang Hataas nga Saserdoteng si Caifas nanguna sa plano nga patyon si Jesus.​—Juan 11:49-53; 18:14. w18.06 6-7 ¶12-13

Ang usa ka epektibong paon nga gigamit ni Satanas mao ang interes bahin sa espiritismo. Aron mainteres ang mga tawo sa mga demonyo, gigamit niya karon dili lang ang bakak nga relihiyon kondili ang mga kalingawan usab. Gihimong morag makalingaw ang espiritismo diha sa mga pelikula, elektronikong dula, ug ubang media. Unsay atong himoon aron dili ta mabitik niini? Dili ta magdahom nga hatagan ta sa organisasyon sa Diyos ug listahan sa maayo ug dili maayong kalingawan. Kinahanglang bansayon sa kada usa nato ang atong konsensiya aron mahiuyon kini sa mga sukdanan sa Diyos. (Heb. 5:14) Makahimo tag maalamon nga desisyon kon atong ipadapat ang tambag ni apostol Pablo. Mahimong pangutan-on nato ang kaugalingon: ‘Gipakita ba sa akong gipili nga kalingawan nga morag salingkapaw ko? Kon makita sa akong mga Bible study o balikduaw ang akong kalingawan, maghunahuna ba silang gihimo nako ang akong gitudlo?’ Kon sundon nato ang mga prinsipyo nga atong gitudlo sa uban, dili ta daling mabitik ni Satanas.​—1 Juan 3:18. w18.05 25 ¶13

Unsaon nato pagsundog si Pablo? Una, padayon natong pangitaon kadtong “hustong nakiling alang sa kinabuhing walay kataposan.” Ikaduha, mangamuyo ta kang Jehova nga ablihan ang kasingkasing sa sinserong mga tawo. (Buh. 13:48; 16:14) Si Silvana, nga halos 30 ka tuig nang payunir, miingon: “Sa di pa ko manuktok sa usa ka balay, moampo ko kang Jehova nga unta magmapositibo ko.” Mag-ampo pod ta nga giyahan ta sa mga anghel aron makita ang mga matinud-anog kasingkasing. (Mat. 10:11-13; Pin. 14:6) Si Robert, nga kapig 30 ka tuig nang payunir, miingon: “Eksayting kaayong magsangyaw uban sa mga anghel kinsa nahibalo sa kahimtang sa mga tagbalay.” Ikatulo, maningkamot tang makita ang maayo sa mga tawo ug ang posibilidad nga mahimo silang alagad. Si Carl, nga usa ka ansiyano, miingon: “Mangita kog bisan gamayng timailhan nga sinsero ang usa ka tawo, tingali usa ka pahiyom, buotan nga tinan-awan, o matinud-anong pangutana.” Oo, sama ni Pablo, mahimo tang mamunga uban ang paglahutay. w18.05 15 ¶13; 16 ¶15

Malipay tang mabalitaan nga nagmatinumanon kadtong natabangan nato. Mao sab nay gibati ni apostol Juan. Siya misulat: “Wala nay labaw nga hinungdan sa akong pagkamapasalamaton kay niining mga butanga, nga akong madungog nga ang akong mga anak nagpadayon sa paglakaw diha sa kamatuoran.” (3 Juan 4) Daghang payunir ang makapamatuod nga nadasig kaayo sila dihang mahibaloan nga ang pipila niadtong natabangan nilang makadangat sa kamatuoran nagmatinumanon ug tingali nagpayunir pa gani. Ang pagpahinumdom sa naluyang payunir sa iyang maayong eksperyensiya kaniadto makadasig kaayo niya. Daghang tigdumala sa sirkito ang nag-ingon nga nadasig gyod sila ug ang ilang asawa human makadawat ug bisag mubo nga sulat pasalamat tungod sa ilang pagduaw sa kongregasyon. Mao sab nay bation sa mga ansiyano, misyonaryo, payunir, ug Bethelite nga makadawat ug pulong sa apresasyon tungod sa ilang matinumanong pag-alagad. w18.04 23 ¶14-15

Misupak si Solomon, ug miabot ug 700 ang iyang asawa. Diha pod siyay 300 ka puyopuyo. (1 Hari 11:3) Daghan sa iyang asawa dili Israelinhon, nga nagsimbag mga diyosdiyos. Busa, gisupak pod ni Solomon ang balaod sa Diyos nga dili magminyog tagalaing nasod. (Deut. 7:3, 4) Tungod sa anam-anam nga pagpalayo ni Solomon sa mga sugo ni Jehova, siya nakahimog grabeng sala. Nagtukod siyag halaran para sa diyosang si Astoret ug laing halaran para sa diyosdiyos nga si Kemos. Didto, miuban siya sa iyang mga asawa sa paganong pagsimba. Sa kadaghan sa lugar, didto pa gyod niya gitukod ang maong mga halaran sa bukid atbang sa Jerusalem​—diin iyang gitukod ang templo ni Jehova! (1 Hari 11:5-8; 2 Hari 23:13) Tingali gipatuo ni Solomon ang iyang kaugalingon nga palabyon ni Jehova ang iyang pagkamasinupakon basta padayon pod siyang maghalad sa templo. Pero dili gyod balewalaon ni Jehova ang sala. w18.07 18-19 ¶7-9

Apil sa “nagdilaab nga mga udyong” nga ipuntirya ni Satanas nimo mao ang mga bakak bahin kang Jehova​—nga wala ka Niya mahala ug walay nagmahal nimo. Ang 19 anyos nga si Ida mibating way pulos. Siya miingon: “Pirme kong mobati nga dili ko suod kang Jehova ug dili niya gustong makigsuod nako.” Unsay iyang gibuhat? “Nakapalig-on gyod sa akong pagtuo ang mga tigom,” matod ni Ida. “Sa una, igo lang kong motambong ug dili gyod mokomento kay naghunahuna kong way ganahang maminaw sa akong isulti. Pero karon, mangandam na ko para sa tigom ug maningkamot nga makakomentog kaduha o katulo.” Gipakita sa eksperyensiya ni Ida ang importanteng kamatuoran: Ang gidak-on sa literal nga taming dili mausab, pero ang taming sa atong pagtuo mahimong mogamay o modako. Nagdepende ra nâ nato. (Mat. 14:31; 2 Tes. 1:3) Busa, importante kaayo nga palig-onon nato ang atong pagtuo! w18.05 29-30 ¶12-14

Ang magbalantay nausab ug nangayog tabang pagkahuman sa linog. (Buh. 16:25-34) Sa susama, ang pipila nga dili modawat kaniadto sa mensahe sa Bibliya nausab ug nangayog tabang dihang kalit nga natay-og ang ilang kalibotan. Tingali nakurat sila dihang kalit silang nawad-an sa ilang dugay nang trabaho. Ang uban naguol pag-ayo human madayagnos ug grabeng sakit o mamatyan ug minahal. Basin mangutana sila kon unsay kahulogan sa kinabuhi​—nga wala ra nila hunahunaa kaniadto. Tingali makapangutana pa gani sila, ‘Unsay kinahanglan nakong buhaton aron maluwas?’ Dihang maestorya nato sila, basig gusto na nilang maminaw sa mensahe sa paglaom. Busa, pinaagi sa padayong pagsangyaw, makahatag ta nilag paghupay sa panahon nga andam na silang modawat niana.​—Isa. 61:1. w18.05 19-20 ¶10-12

Kadaghanan karon nabutaan gihapon sa diyos niini nga sistema sa mga butang ug naulipon sa sistema sa relihiyon, ekonomiya, ug komunidad. (2 Cor. 4:4) Pribilehiyo nato ang pagsundog kang Jesus sa pagtabang sa mga tawo aron ilang mailhan ug simbahon si Jehova, ang Diyos sa kagawasan. (Mat. 28:19, 20) Dili nâ sayon, ug makaatubang tag daghang problema. Sa pipila ka lugar, nagkadaghan ang dili maminaw, ang uban masuko pa gani. Busa, angayng pangutan-on sa matag usa ang kaugalingon, ‘Magamit ba nako ang akong kagawasan aron mas makasuportar sa buluhaton sa Gingharian?’ Makapadasig kaayong makita nga daghan ang mibati sa pagkadinalian sa atong panahon ug nagpasimple sa ilang kinabuhi aron makasangyaw nga bug-os panahon. (1 Cor. 9:19, 23) Ang pipila nag-alagad diha sa ilang mga teritoryo; ang uban namalhin sa lugar nga nagkinahanglag dugang magsasangyaw. Maayo kaayo ni nga resulta sa maalamong paggamit sa kagawasan sa pag-alagad kang Jehova!​—Sal. 110:3. w18.04 11-12 ¶13-14