Nobyembre

Dihang moalagad ta kang Jehova, duna tay paglaom nga mapahimuslan ang tanan nga giwala ni Adan ug Eva, apil ang kahigayonan nga mabuhi hangtod sa hangtod. Si Adan ug Eva midesisyon nga dili alagaran si Jehova kay wala nila maugmad ang dakong gugma kaniya. Bisan pa niana, gitugotan sila ni Jehova nga mabuhig taastaas nga panahon aron makabatog mga anak ug maghimog kaugalingong sukdanan sa pagpadako sa mga bata. Ang resulta sa ilang desisyon nga magmaindependente nagpakita nga sayop gyod sila. Gipatay sa ilang kamagulangang anak ang inosenteng igsoon niini, ug wala madugay ang yuta napuno sa kapintasan ug kahakog. (Gen. 4:8; 6:11-13) Pero may paagi si Jehova aron maluwas ang tanang kaliwat ni Adan ug Eva nga gustong moalagad niya. (Juan 6:38-40, 57) Dihang imong mahibaloan kon unsa ka mahigugmaon ug mapailobon si Jehova, lagmit modako ang imong gugma kaniya. Dili nimo sundogon ang gihimo ni Adan ug Eva, ug gusto nimong idedikar ang kaugalingon kang Jehova. w19.03 2 ¶3; 4 ¶9

Aron makapakitag simpatiya, paningkamoti nga masabtan ang kalisdanan nga giatubang sa imong pamilya ug sa mga igsoon sa pagtuo. Hatagig atensiyon ang mga tin-edyer, masakiton, tigulang, ug ang namatyag minahal. Komostaha sila. Pamati pag-ayo sa ilang isulti nimo. Ipabati kanila nga nakasabot gyod ka sa ilang kahimtang. Tabangi sila kutob sa imong mahimo. Kon buhaton nato nâ, atong gipakita ang tinuod nga gugma. (1 Juan 3:18) Importante nga kabalo tang moadyas dihang motabang sa uban. Ngano? Tungod kay ang mga tawo lainlaig reaksiyon sa kalisdanan. Ang uban ganahang moestorya, ang uban dili. Mao nga bisag gusto natong motabang, dili ta angayng mangutana bahin sa personal kaayong mga butang. (1 Tes. 4:11) Bisag ang uban ganahang moestorya, dili sa tanang higayon nga parehas tag panglantaw. Pero, angay natong hinumdoman nga mao nay ilang gibati. Kinahanglang magmaabtik ta sa pagpaminaw ug magmahinay sa pagsulti.​—Mat. 7:1; Sant. 1:19. w19.03 19 ¶18-19

Mahadlok ba kang mosulti sa publiko bahin sa kamatuoran? Hinumdomi si Nehemias. Nag-alagad siya sa palasyo sa usa ka gamhanang hari. Naguol si Nehemias kay nahibaloan niya nga guba gihapon ang paril ug ganghaan sa Jerusalem. (Neh. 1:1-4) Hunahunaa ang kakulba nga iyang gibati dihang gipasulti siya sa hari sa hinungdan sa iyang kaguol! Si Nehemias miampo dayon ug mitubag. Ingong sanong, gitabangan pag-ayo sa hari ang katawhan sa Diyos. (Neh. 2:1-8) Hunahunaa sab si Jonas. Dihang gisugo siya ni Jehova nga pasidan-an ang mga taga-Nineve, nahadlok pag-ayo si Jonas maong miadto siya sa laing direksiyon. (Jon. 1:1-3) Apan sa tabang ni Jehova, milampos si Jonas sa iyang asaynment. Ug ang iyang gisulti nakahatag ug kaayohan sa mga taga-Nineve. (Jon. 3:5-10) Atong nakat-onan kang Nehemias ang kahinungdanon sa pag-ampo sa dili pa motubag. Ug nakat-onan nato kang Jonas nga si Jehova motabang nato nga makaalagad niya bisag mobati tag grabeng kahadlok. w19.01 11 ¶12

Dihang gipili nato nga magkinabuhi sumala sa kamatuoran sa Bibliya, mausab tingali ang atong relasyon sa atong mga amigo ug paryente. Ngano? Si Jesus miampo bahin sa iyang mga sumusunod: “Balaana sila pinaagi sa kamatuoran; ang imong pulong maoy kamatuoran.” (Juan 17:17) Ang pag-ingong “balaana sila” mahimong magpasabot ug “ilain sila.” Dihang gidawat nato ang kamatuoran, gilain ta kay wala na man ta magpaimpluwensiya sa kalibotan. Mausab na ang panglantaw sa mga tawo nato kay lahi na man tag prinsipyo. Nagsunod na ta sa mga prinsipyo sa Bibliya. Bisag dili nato gustong mahimong rason sa pagkabahinbahin, ang pipila ka amigo ug membro sa pamilya mopalayo tingali nato o mosupak pa gani sa atong bag-ong tinuohan. Dili nâ ikatingala. Si Jesus miingon: “Sa pagkatinuod, ang mga kaaway sa usa ka tawo mao unya ang mga tawo sa iyang kaugalingong panimalay.” (Mat. 10:36) Siya nagpasalig pod nga ang mga panalangin tungod sa pagpalit sa kamatuoran mas labaw kon ikomparar sa atong isakripisyo. w18.11 6 ¶11

Giapresyar pag-ayo ni apostol Pablo ang mga igsoon ug makita ni sa iyang paagi sa paghisgot nila. Sa iyang pag-ampo, kanunay siyang magpasalamat sa Diyos tungod nila. Gisulti pod niya ang iyang apresasyon diha sa iyang mga sulat. Sa unang 15 ka bersikulo sa Roma 16, gihisgotan ni Pablo ang ngalan sa 27 ka Kristohanon. Espesipikong gisulti ni Pablo nga si Prisca ug Aquila “nagpameligro sa ilang mga liog” para niya, ug siya miingon nga si Febe “tigpanalipod sa daghan,” apil kang Pablo. Iyang gidayeg ang maong minahal ug kugihang mga igsoon. (Roma 16:1-15) Nahibalo si Pablo nga ang mga igsoon dili hingpit, pero nagpokus siya sa ilang maayong mga hiyas. Walay duhaduha nga nadasig ang maong mga igsoon dihang gibasa sa kongregasyon ang giingon ni Pablo bahin nila! Ug lagmit mas nasuod sila kang Pablo. Gipakita ba nimo pirme ang imong apresasyon sa maayong nasulti o nahimo sa mga igsoon? w19.02 16 ¶8-9

Angay ba tang maghunahuna nga kinahanglang hingpit ta aron magmatinumanon? Kon buot hunahunaon, mobati tang depektoso, kay masayop ta pirme. Pero, dili ta angayng mahadlok kay si Jehova dili magpokus sa atong mga sayop. Ang iyang Pulong nag-ingon: “Kon mga kasaypanan mao pa ang imong gibantayan, Oh Jah, Oh Jehova, kinsa ba ang makabarog?” (Sal. 130:3) Nasayod siya nga kita dili hingpit ug makasasala, ug kanunay siyang nagpasaylo nato. (Sal. 86:5) Dugang pa, nahibalo si Jehova sa atong mga limitasyon, ug dili siya magdahom ug labaw sa atong makaya. (Sal. 103:12-14) Para sa mga alagad ni Jehova, ang sekreto sa pagkamatinumanon mao ang gugma. Ang atong gugma ug maunongong debosyon sa atong langitnong Amahan kinahanglang kompleto, walay depekto, o tibuok. Kon ang atong gugma dili molubad bisag gisulayan ta, kita nagmatinumanon. (1 Cron. 28:9; Mat. 22:37) Nahibalo ta nga si Jehova dunay matarong nga sukdanan, ug ang atong hunahuna napokus sa kon unsay makapalipay sa atong langitnong Amahan. Kay gihigugma nato si Jehova, kanunay tang maghunahuna kaniya sa dili pa modesisyon. Niining paagiha, nagmatinumanon ta. w19.02 3 ¶4-5

Matag higayon nga atong makita ang mga benepisyo sa pagbuhat ug maayo, mas molig-on ang atong pagtuo. (Sant. 1:2, 3) Nindot ang atong bation kay ikapasigarbo ta ni Jehova ingong iyang mga anak, ug mas molalom ang atong tinguha nga mapalipay siya. (Prov. 27:11) Ang matag pagsulay mahimong kahigayonan sa pagpamatuod sa atong bug-os nga tinguha sa pag-alagad sa atong mapinanggaong Amahan. (Sal. 119:113) Dugang pa, mapamatud-an nato nga bug-os kasingkasing natong gimahal si Jehova ug determinado tang sundon ang iyang mga sugo ug tumanon ang iyang kabubut-on. (1 Hari 8:61) Masayop ba gihapon ta? Oo, kay dili ta hingpit. Kon masayop ta, hinumdoman nato si Haring Ezequias. Nasayop pod siya. Pero siya naghinulsol ug nakapadayon sa pag-alagad kang Jehova “uban sa bug-os nga kasingkasing.” (Isa. 38:3-6; 2 Cron. 29:1, 2; 32:25, 26) Hinaot suklan nato ang paningkamot ni Satanas sa pag-impluwensiya sa atong hunahuna. Mag-ampo ta aron maugmad ang “kasingkasing nga masinugtanon” ug makapabiling matinumanon kang Jehova.​—1 Hari 3:9; Sal. 139:23, 24. w19.01 18-19 ¶17-18

Makabenepisyo ta dihang mokomento ta sa tigom. (Isa. 48:17) Sa unsang paagi? Una, kon magplano tang mokomento, madasig ta nga mangandam pag-ayo para sa tigom. Kon mangandam ta pag-ayo, makabaton tag lawom nga pagsabot sa Pulong sa Diyos. Ug samtang magkalawom ang atong pagsabot, mas sayon ang pagpadapat sa atong nakat-onan. Ikaduha, mas malingaw ta sa tigom kay apil ta sa panaghisgot. Ikatulo, tungod sa paningkamot nga mokomento, sagad dili nato makalimtan ang mga punto. Dugang pa, madayeg nato si Jehova dihang atong ipahayag ang atong pagtuo. Makaseguro ta nga si Jehova maminaw nato ug magpabili pag-ayo sa atong paningkamot nga makakomento. (Mal. 3:16) Iyang ipakita ang iyang apresasyon pinaagi sa pagpanalangin nato dihang maningkamot ta sa paglipay niya. (Mal. 3:10) Klaro, daghan tag maayong rason sa pagkomento diha sa tigom. w19.01 8 ¶3; 10 ¶7-9

Maalamon kaayo ang paagi sa pagtratar ni Jehova sa iyang mga alagad. Imbes hatagan tag daghang balaod, mapailobon siyang nagtudlo nato sa pagsunod sa balaod sa gugma. Gusto niyang magkinabuhi ta uyon sa iyang mga prinsipyo ug dumtan kon unsay daotan. Ang Wali sa Bukid maoy maayo kaayong pananglitan niana, kay kini naghisgot kon unsa gyoy hinungdan sa kasaypanan. (Mat. 5:27, 28) Sa bag-ong kalibotan, ingong Hari sa Gingharian sa Diyos, ang Kristo padayong magtudlo nato aron masundog ang iyang panghunahuna bahin sa pagkamatarong ug pagkadaotan. (Heb. 1:9) Himoon niyang hingpit ang atong lawas ug hunahuna. Hunahunaa lang, wala nay motental ninyo sa pagpakasala ug dili na pod mo mag-antos sa makapaguol nga epekto sa sala. Dayon sa kataposan, matagamtam ninyo ang “mahimayaong kagawasan” nga gisaad ni Jehova. (Roma 8:21) Siyempre, dili gyod puwedeng mahimong bug-os ang atong kagawasan. Matagamtam lang nato ang tinuod nga kagawasan dihang sundogon nato ang gugma sa Diyos.​—1 Juan 4:7, 8. w18.12 23 ¶19-20

Puwedeng diborsiyohan sa usa ka Israelinhon ang iyang asawa kon ‘siya may nakaplagan diha kaniya nga butang nga malaw-ay.’ Ang Balaod wala maghisgot kon unsa ning butang nga “malaw-ay.” Seguradong kini makauulaw o seryoso, dili ginagmayng kasaypanan. (Deut. 23:14) Makapasubo, sa panahon ni Jesus daghang Hudiyo ang nakigdiborsiyo “sa bisan unsang matang sa pasikaranan.” (Mat. 19:3) Seguradong dili nato gustong sundogon ang ilang panglantaw. Gisulti ni propetang Malaquias ang panglantaw sa Diyos bahin sa diborsiyo. Panahon kadto nga komon kaayo sa mga lalaki ang pagdiborsiyo sa ilang ‘asawa sa pagkabatan-on’ aron magminyog mas batan-on, paganong mga babaye. Bahin sa panglantaw sa Diyos, si Malaquias misulat: “Iyang gidumtan ang pagdiborsiyo.” (Mal. 2:14-16) Uyon ni sa giingon sa Pulong sa Diyos bahin sa unang kaminyoon: “[Ang lalaki] kinahanglang moipon sa iyang asawa ug sila mahimong usa ka unod.” (Gen. 2:24) Gisuportahan ni Jesus ang panglantaw sa iyang Amahan dihang siya miingon: “[Ang] gihiusa pagyugo sa Diyos ayaw ipabulag ni bisan kinsang tawo.”​—Mat. 19:6. w18.12 11 ¶7-8

Dunay pipila ka igsoon nga makahimo sa pagboluntaryo sa laing mga dapit. Sama silag panghunahuna ni propetang Isaias. Sa pagtubag sa pangutana ni Jehova, “Kinsa ang akong ipadala, ug kinsa ang moadto alang kanamo?” siya mitubag: “Ania ako! Ipadala ako.” (Isa. 6:8) Makahimo ka ba niana? Bahin sa pagsangyaw ug paghimog mga tinun-an, si Jesus miingon: “Busa, pangamuyo kamo sa Agalon sa pagpangani nga magpadalag mga mamumuo ngadto sa iyang pagpangani.” (Mat. 9:38) Makaalagad ba ka sa lugar nga nanginahanglag dugang magsasangyaw, tingali ingong payunir? O makatabang ba ka sa uban sa pagbuhat ana? Gibati sa daghang igsoon nga ang pinakamaayong paagi sa paghigugma sa Diyos ug sa silingan mao ang pagpayunir sa mga lugar nga nanginahanglag dugang mangangani. Makahunahuna ba kag laing mga paagi sa pagpauswag sa imong pag-alagad? Kon imo nang buhaton, magmalipayon gyod ka. w18.08 27 ¶14-15

Ang Ebanghelyo klarong nagpakita sa panghunahuna ni Jehova sa materyal nga mga butang. Gipili mismo sa Diyos ang tawhanong ginikanan nga maoy magpadako sa iyang Anak​—usa ka magtiayong dili dato. (Lev. 12:8; Luc. 2:24) Dihang natawo si Jesus, “gipahigda siya [ni Maria] sa pasungan, tungod kay wala nay dapit alang kanila sa lawak nga abotanan.” (Luc. 2:7) Kon gusto ni Jehova, makatagana siya ug mas maayong sak-anan para sa pagkatawo sa iyang Anak. Pero gusto niya nga si Jesus magdako sa pamilya nga nag-una sa espirituwal nga mga butang. Mao nay labing importante niya. Niini nga asoy, atong masabtan ang panglantaw ni Jehova sa materyal nga mga butang. Ang pipila ka ginikanan naghunahuna nga mas makaayo sa ilang mga anak ang pag-una sa materyal nga mga butang, bisan pag maapektohan niini ang espirituwalidad sa ilang anak. Pero para kang Jehova, ang pinakaimportante mao ang espirituwal nga mga butang. Nasundog ba nimo ang panghunahuna ni Jehova niining bahina? Unsay gipakita sa imong binuhatan? w18.11 24 ¶7-8

Ang Diyos mao ang Tuboran sa kalipay, busa gusto niyang magmalipayon ta, ug gihatagan ta niyag daghang rason nga magmalipayon. (Deut. 12:7; Eccl. 3:12, 13) Pero karon, lisod tingaling magmalipayon. Ngano? Makapawala sa kalipay ang makapaguol nga mga hitabo, sama nianang ang minahal mamatay o ma-disfellowship o dihang magdiborsiyo o mawad-ag trabaho. Ang problema sa pamilya ug dili pagsinabtanay makapawala sab sa kalipay. Ang pagbugalbugal sa mga katrabaho o klasmet, paglutos, o pagkapriso makapawala pod sa kalipay​—ingon man ang nagkaluyang panglawas, grabeng sakit, o depresyon. Bisan pa niana, si Jesu-Kristo, ang “malipayon ug bugtong Magmamando,” gustong mohatag ug paghupay ug kalipay sa mga tawo. (1 Tim. 6:15; Mat. 11:28-30) Sa iyang Wali sa Bukid, gihisgotan ni Jesus ang pipila ka hiyas nga makatabang nato nga magmalipayon bisan sa mga problema sa kalibotan ni Satanas. w18.09 17-18 ¶1-3

Ang usa sa kinalisdang sakripisyo mao ang pagbiya sa kostumbre ug mga buhat nga supak sa Bibliya. (Prov. 23:23) Ang pipila tingali wala malisdi sa pagdawat ug pagpadapat sa giingon sa Bibliya bahin niana. Pero ang uban basig magduhaduha sa paghimog sakripisyo tungod sa presyur gikan sa pamilya, katrabaho, ug suod nga mga higala. Mas lisod ni ilabina kon apil sa kostumbre ang pagpasidungog sa namatayng mga paryente. Ang kaisog nga gipakita sa uban makatabang nato sa paghimo niana nga kausaban. Aron mapalit ang kamatuoran, unsay kinahanglang himoon sa bag-ong nakabig nga mga Kristohanon sa Efeso nga kaniadto nagahimog madyik, usa ka buhat nga supak sa Bibliya? Ang Bibliya miingon: “[Sila] nagtapok sa ilang mga basahon ug nagsunog niini atubangan sa tanan. Ug ilang gikuwenta sa tingob ang bili niini ug ilang nakaplagan nga kini mikabat ug [50,000] ka pirasong plata.” (Buh. 19:19, 20) Ang maong matinumanong mga Kristohanon mihimog dakong pinansiyal nga sakripisyo ug gipanalanginan ni Jehova. w18.11 7 ¶15-16

Wala madugay human motabok ang Israel sa Jordan, si Josue nakasugat ug tawo nga nagdalag espada. Siya diay ang “prinsipe [o, pangulo] sa kasundalohan ni Jehova,” kinsa andam manalipod sa katawhan sa Diyos. (Jos. 5:13-15) Ang anghel naghatag kang Josue ug klarong instruksiyon kon unsaon pagsakop ang siyudad sa Jerico. Sa sinugdan, ang pipila ka instruksiyon morag dili maayong estratehiya. Pananglitan, nagsugo si Jehova nga tulion ang tanang lalaki. Magpasabot ni nga dili sila makapakiggubat ug pipila ka adlaw. (Gen. 34:24, 25; Jos. 5:2) Lagmit, naghunahuna ang maong mga sundalo kon unsaon nila pagpanalipod ang ilang pamilya kon sulngon sa mga kaaway ang ilang kampo nga luya na man sila. Apan sa kalit lang, nabalitaan nila nga ang Jerico “tinakpan pag-ayo tungod sa mga anak sa Israel.” (Jos. 6:1) Seguradong napalig-on nianang wala damhang panghitabo ang ilang pagsalig sa giya sa Diyos! w18.10 23 ¶5-7

Unsaon nato pagsundog ang pagkamapainubsanon ni Pablo? Una, dili ta angayng magdahom o modawat ug pagdayeg tungod sa atong nalampos sa tabang ni Jehova. Maayong pangutan-on nato ang kaugalingon: ‘Giunsa nako paglantaw ang akong gisangyawan? May diskriminasyon ba ko sa pipila ka grupo sa mga tawo?’ Makapalipay nga ang mga Saksi ni Jehova sa tibuok kalibotan nangitag mga tawo sa ilang teritoryo nga maminaw sa maayong balita. Usahay, kinahanglan silang mokat-on sa pinulongan ug kostumbre sa mga tawo nga gipakaubos sa kadaghanan. Ang mga Saksi wala gyod maghunahuna nga labaw sila. Hinunoa, gusto nilang masabtan ang matag tawo aron matandog kini sa mensahe sa Gingharian. w18.09 5 ¶9, 11

Gipapatay sa mga Romano si Judas. Gawas kang Judas ug sa ubang ekstremista, ang ordinaryong mga Hudiyo mahinamong nagpaabot sa usa ka politikal nga Mesiyas. Nagdahom sila nga inig-abot sa Mesiyas, mahigawas sila sa pagmando sa Roma ug mahimo na sad nga dakong nasod ang Israel. (Luc. 2:38; 3:15) Daghan ang nagtuo nga ang Mesiyas magtukod ug gingharian dinhi sa yuta, sa Israel. Kon mahitabo nâ, ang milyonmilyong Hudiyo nga namuyo sa lainlaing nasod mamalik sa ilang yutang natawhan. Hinumdomi, dihay higayong si Juan Bawtista nangutana kang Jesus: “Ikaw ba ang Usa nga Moanhi, o magpaabot pa ba kamig lain?” (Mat. 11:2, 3) Lagmit gustong mahibaloan ni Juan kon may lain bang motuman sa gidahom sa mga Hudiyo. Sa ulahi, duha ka tinun-an ang nakaestorya sa nabanhawng si Jesus diha sa dalan paingon sa Emmaus. Wala sad matuman ang ilang gidahom bahin sa Mesiyas. (Luc. 24:21) Wala madugay human niana, ang mga apostoles ni Jesus nangutana: “Ginoo, ipasig-uli mo ba ang gingharian sa Israel niining panahona?”​—Buh. 1:6. w18.06 4 ¶3-4

Ilabinang magmabinantayon ta dihang makadungog ug balita bahin sa katawhan ni Jehova. Ayawg kalimti nga si Satanas ang magsusumbong sa matinumanong mga alagad sa Diyos. (Pin. 12:10) Busa, nagpasidaan si Jesus nga ang mga magsusupak mosultig “binakak [ug] tanang matang sa kadaotan” batok kanato. (Mat. 5:11) Kon seryosohon nato ang maong pasidaan, dili ta makurat dihang makadungog ug gipasobrahang mga balita bahin sa katawhan ni Jehova. Hilig ka bang mag-email ug mag-text sa imong mga higala ug kaila? Dihang makakita kag bag-ong balita sa media o makadungog ug eksperyensiya, gibati ba nimo nga sama kag reporter nga gustong makauna sa pagpahibalo sa eksayting nga balita? Sa dili ka pa mag-text o mag-email, pangutan-a ang kaugalingon: ‘Segurado ba ko nga tinuod ni nga impormasyon?’ Kon dili ka segurado, posibleng makapakaylap kag sayop nga impormasyon sa mga igsoon. Busa kon nagduhaduha ka, i-click ang delete, dili ang send. w18.08 3 ¶3; 4 ¶6-7

Gusto ni Jesus nga magmalipayon ta pinaagi sa pagkamahinatagon. Daghan ang makaapresyar niana. Siyempre, dili tanan ang positibog reaksiyon sa atong pagkamahinatagon, pero kon mapasalamaton sila, madasig sab sila nga magmahinatagon. Busa, batasana ang pagpanghatag​—apresyahon man ni o dili. Kinsay nasayod kon unsa ka dako ang epekto bisan sa usa lang ka buhat sa pagkamahinatagon. Ang tinuod nga mahinatagon dili magdahom nga balosan silag hatag. Kanay gihunahuna ni Jesus dihang siya miingon: “Dihang maghikay ka ug usa ka kombira, dapita ang mga tawong kabos, mga baldado, mga bakol, mga buta; ug magmalipayon ka, tungod kay wala silay ikabalos kanimo.” (Luc. 14:13, 14) “Siya nga maluloton sa mata [o, mahinatagon] panalanginan,” miingon ang usa ka magsusulat sa Bibliya. Ang lain miingon: “Malipayon siya nga nagabuhat uban ang pagkamahunahunaon sa timawa.” (Prov. 22:9; Sal. 41:1) Busa, kinahanglan tang mohatag kay magmalipayon ta kon motabang ta sa uban. w18.08 21-22 ¶15-16

Lisod karon ang pagkuhag tinuod nga impormasyon ug ang pagtimbangtimbang niini tungod sa kadaghan sa dili kasaligan ug dili kompleto nga impormasyon, ug sa atong pagkadili-hingpit. Unsay makatabang nato? Kinahanglan natong mahibaloan ug ipadapat ang mga prinsipyo sa Bibliya. Usa sa mga prinsipyo nag-ingon nga kabuangan ug makauulaw ang pagtubag kon wala pa mahibaloi ang kompletong impormasyon. (Prov. 18:13) Ang laing prinsipyo nagpahinumdom nato nga dili gyod tuohan ang tanang madunggan kon wala pa nato ni masusi. (Prov. 14:15) Ug kataposan, bisag unsa na ta ka dugay sa pag-alagad, dili gyod ta angayng mosalig sa kaugalingong pagsabot. Ang mga prinsipyo sa Bibliya manalipod nato kon atong gamiton ang kasaligang impormasyon sa paghimog hustong konklusyon ug maalamong desisyon. w18.08 7 ¶19

Pinaagi sa pagpabawtismo sa tubig, pormal natong gipakita sa publiko nga si Jehova ang tag-iya nato ug kinabubut-on tang nagpasakop niya. Kana say gihimo ni Jesus panahon sa iyang bawtismo, nga samag miingon siya kang Jehova: “Sa pagbuhat sa imong kabubut-on, Oh Diyos ko, ako nagakalipay.” (Sal. 40:7, 8) Unsay gibati ni Jehova sa pagpabawtismo ni Jesus? Ang Bibliya nag-ingon: “Human mabawtismohi, si Jesus mihaw-as gilayon sa tubig; ug, tan-awa! ang mga langit nabuksan, ug iyang nakita nga mikunsad diha kaniya ang espiritu sa Diyos ingon sa usa ka salampati. Tan-awa! Dihay tingog usab gikan sa mga langit nga nag-ingon: ‘Kini mao ang akong Anak, ang hinigugma, nga akong giuyonan.’” (Mat. 3:16, 17) Bisag si Jesus gipanag-iya na sa iyang langitnong Amahan, nalipay si Jehova nga makitang andam ang iyang Anak sa pagbuhat sa Iyang kabubut-on. Sa susama, malipay si Jehova nga dawaton ang atong pagpahinungod, ug iya tang panalanginan.​—Sal. 149:4. w18.07 23 ¶4-5

Sa paggamit sa pulong nga “kami,” si Moises lagmit nagtumong nila ni Aaron. Kanang mga pulonga nagpakitag kawalay pagtahod kang Jehova​—nga mao ang tinuod nga naghimo sa milagro. Morag gikompirmar ni nga posibilidad diha sa usa ka salmo: “Ang katawhan sa Ginoo nakapasuko kaniya didto sa mga tuboran sa Meriba, ug nahasol si Moises tungod sa ilang gibuhat. Nakapasuko sila pag-ayo kang Moises ug nakasulti siyag mga butang nga dili unta niya angay nga isulti.” (Italiko amoa; Sal. 106:32, 33, Ang Bag-ong Maayong Balita Biblia; Num. 27:14) Bisan unsa pa man, wala mahatag ni Moises ang pasidungog nga para kang Jehova. Giingnan ni Jehova si Moises ug Aaron: “Kamo misukol batok sa akong sugo.” (Num. 20:24) Seryoso gyod to nga sala! Sa miagi, wala tugoti ni Jehova nga makasulod sa Yutang Saad ang usa ka henerasyon sa mga Israelinhon tungod sa ilang pagrebelde. (Num. 14:26-30, 34) Maong haom ug patas lang nga ipahamtang ni Jehova ang samang paghukom kang Moises tungod sa pagsupak niini. Wala siya makasulod sa Yutang Saad. w18.07 14-15 ¶9, 12-13

Andam ba nimong isakripisyo ang imong katungod aron dili mapandol ang igsoon nga lahig konsensiya nimo? Buhaton gyod nimo kana. Sa wala pa mahibaloi ang kamatuoran, pipila sa atong mga igsoon ang grabeng moinom, pero karon determinado silang likayan kana. Seguradong dili nato gustong kita ang hinungdan nga mobalik ang atong igsoon sa iyang kanhing bisyo nga makadaot niya! (1 Cor. 6:9, 10) Busa, dili mahigugmaon kon ang nangimbitar mamugos sa pagpainom sa igsoon dihang mibalibad na kini. Dihang mga 20 anyos si Timoteo, siya nagpatuli bisag sakit kini. Dili niya gustong makapandol siya sa mga Hudiyo nga iyang sangyawan. Ang iyang panghunahuna sama nianang kang apostol Pablo. (Buh. 16:3; 1 Cor. 9:19-23) Sama ni Timoteo, andam ka bang mosakripisyo para sa kaayohan sa uban? w18.06 18 ¶12-13

Si Jehova ang nagkabig niadtong gusto niyang mahimong bahin sa iyang espirituwal nga pamilya, nga nagdani sa sinserong mga tawo sa tinuod nga pagsimba. (Juan 6:44) Dihang makailaila kag dili Saksi, unsay imong nahibaloan bahin niya? Gawas sa iyang ngalan ug hitsura, wala na kay nahibal-an pa. Pero lahi kon mailaila nimo ang usa nga nakaila ug nahigugma kang Jehova. Bisag lahi siyag kagikan, nasod, tribo, o kultura, daghan na kag nahibaloan bahin niya, ug daghan pod siyag nahibaloan bahin nimo! Pananglitan, mailhan dayon ninyo ang inyong “pinulongan”​—ang “putli nga pinulongan” sa kamatuoran. Ingong resulta, nahibalo mo kon unsay inyong gituohan bahin sa Diyos, moralidad, paglaom sa umaabot, ug uban pa. Dugang pa, kana ang importante kaayong mahibal-an bahin sa usa ka tawo​—mga butang nga makatabang ninyo nga mosalig sa usag usa. Mahimo pod nang pundasyon sa maayo ug dumalayong panaghigalaay. w18.12 21 ¶9-10

Gigiyahan sa Kristo ang nagamandong lawas sa pagpatin-aw nga dili kinahanglang tulion ang dili Hudiyong mga Kristohanon. (Buh. 15:19, 20) Pero paglabay sa katuigan, daghang Hudiyong Kristohanon ang nagpatuli gihapon sa ilang mga anak. Tingali, makapangutana ta, ‘Nganong gitugotan man ni Jesus nga dugayng mahusay ang maong isyu nga giwagtang na man unta ang Moisesnong Balaod tungod sa iyang kamatayon?’ (Col. 2:13, 14) Para sa pipila, nagkinahanglag panahon ang pag-adyas sa bag-ong pagsabot. Ang Hudiyong mga Kristohanon nagkinahanglag igong panahon sa pag-usab sa ilang panglantaw. (Juan 16:12) Ang pipila nalisdan sa pagdawat nga ang pagpatuli dili na ilhanan sa usa ka espesyal nga relasyon uban sa Diyos. (Gen. 17:9-12) Ang uban nahadlok nga basig lutoson sila diha sa Hudiyong mga komunidad kay lahi na ang ilang baroganan. (Gal. 6:12) Apan sa ngadtongadto, ang Kristo nagtaganag dugang giya pinaagi sa mga sulat ni Pablo.​—Roma 2:28, 29; Gal. 3:23-25. w18.10 24-25 ¶10-12

Si Caifas nagpadalag mga sundalo panahon sa kagabhion aron dakpon si Jesus. Nahibalo si Jesus niining makauulawng plano, busa panahon sa iyang kataposang panihapon uban sa mga apostoles, giingnan niya sila sa pagdalag espada. Igo na ang duha aron tudloan silag importanteng leksiyon. (Luc. 22:36-38) Dihang lapas na sa tungang gabii, gitigbas ni Pedro ang usa ka tawo nga kauban niadtong gustong modakop kang Jesus. Seguradong naglagot siya sa inhustisya sa pagdakop kang Jesus. (Juan 18:10) Pero giingnan ni Jesus si Pedro: “Ibalik ang imong espada sa sakoban niini, kay ang tanang mogamit sa espada mamatay pinaagi sa espada.” (Mat. 26:52, 53) Kining importanteng leksiyon nahiuyon sa giampo ni Jesus sayosayo pa nianang gabhiona​—kinahanglang dili sila bahin sa kalibotan. (Juan 17:16) Diyos lang ang may katungod sa pagwagtang sa inhustisya. Tungod niana, nagpabilin tang malinawon ug nahiusa. Ug samtang giobserbahan ni Jehova nga nagkabahinbahin ang mga tawo, malipay gyod siyang makita nga nagkahiusa ang iyang katawhan.​—Sof. 3:17. w18.06 7 ¶13-14, 16

Gawas sa mga paon, presyuron sab ta ni Satanas aron mobiya ta kang Jehova. Pananglitan, mahimong maniobrahon niya ang mga gobyerno aron idili ang atong buluhatong pagsangyaw. O kaha gamiton niya ang atong mga kauban sa trabaho o eskuylahan aron bugalbugalan ta tungod sa pagsunod nato sa moral nga sukdanan sa Bibliya. (1 Ped. 4:4) Mahimong impluwensiyahan pod niya ang mga membro sa pamilya aron dili ta patambongon ug tigom. (Mat. 10:36) Unsay atong buhaton? Una, kinahanglang dahomon nato kining direkta nga pag-atake​—si Satanas nakig-away kanato. (Pin. 2:10) Ikaduha, kinahanglan natong hinumdoman ang tinuod nga isyu​—si Satanas nangangkon nga moalagad lang ta kang Jehova kon hayahay ang atong kahimtang. Miingon siya nga kon presyuron ta, talikdan nato ang Diyos. (Job 1:9-11; 2:4, 5) Ikatulo, kinahanglang mangayo tag kusog kang Jehova aron maatubang kini nga isyu. Hinumdomi, dili ta niya pasagdan.​—Heb. 13:5. w18.05 26 ¶14

Bisan pag morag wala matandog ang kasingkasing sa mga tawo sa atong mensahe, dili gyod nato pakamenoson ang epekto sa atong gipugas. Oo, daghan ang dili maminaw, pero naniid diay sila nato. Ilang mamatikdan ang atong desenteng sininaan, pagkamatinahoron, ug ang atong tam-is nga pahiyom. Sa ngadtongadto, ang atong panggawi mahimong makabag-o sa ilang negatibong panghunahuna bahin kanato. Si Sergio ug Olinda, nga mga payunir, miingon: “Tungod sa sakit, taudtaod ming wala makaadto sa plasa. Pagbalik namo, ang mga lumalabay nangutana, ‘Unsay nahitabo? Gimingaw baya mi ninyo.’” Oo, kon dili nato ‘papahulayon ang atong kamot’ sa pagpugas sa binhi sa Gingharian, dako tag mabuhat sa “pagpamatuod ngadto sa tanang kanasoran.” (Mat. 24:14) Labaw sa tanan, malipay gyod ta sa pagkahibalo nga giuyonan ta ni Jehova, kay gihigugma niya ang “magapamunga uban ang paglahutay”!​—Luc. 8:15. w18.05 16 ¶16-18

Sukad makasala ang mga tawo ug nahimong dili hingpit, gipakita ni Jehova nga siya Diyos nga nagahatag ug pagdasig. Human dayon sa rebelyon sa Eden, gihatagan niya ang umaabot nga mga kaliwat ni Adan ug rason nga magmaisogon ug makabatog paglaom. Ang tagna sa Genesis 3:15 maghatag sa katawhan ug paglaom nga sa ngadtongadto malaglag “ang orihinal nga halas,” si Satanas nga Yawa, ug mahanaw ang tanan niyang daotang buhat. (Pin. 12:9; 1 Juan 3:8) Ang alagad ni Jehova nga si Noe nagpuyo sa dili diyosnong kalibotan diin ang mga membro lang sa iyang pamilya ang nagsimba kang Jehova. Kay kaylap kaayo ang kapintasan ug imoralidad, posibleng maluya si Noe. (Gen. 6:4, 5, 9, 11; Jud. 6) Pero giingnan ni Jehova si Noe nga laglagon Niya ang maong daotang kalibotan. Gihatagan sab siyag instruksiyon kon unsay kinahanglang buhaton aron maluwas ang iyang pamilya. (Gen. 6:13-18) Gipakita ni Jehova kang Noe nga Siya Diyos sa pagdasig. w18.04 15 ¶1-2

Sayop ang paghunahuna nga dili ta makadasig kay hilomon ta. Sa tinuoray lang, dili lisod ang pagdasig sa uban. Tingali puwede nimong pahiyoman ang usa. Kon dili siya mobalos ug pahiyom, basin naa siyay giatubang nga problema. Puwedeng mahupay nimo siya pinaagi sa pagpamati kaniya. (Sant. 1:19) Makadasig ta sa usa ka igsoon nga nagkinahanglag paghupay. Si Haring Solomon misulat: “Ang usa ka pulong sa hustong panahon Oh pagkamaayo! Ang kasanag sa mga mata [o, ang pagpahiyom] makapalipay sa kasingkasing; ang usa ka maayong taho makapatambok sa kabukogan.” (Prov. 15:23, 30) Gipakita ni Pablo nga bisan ang pagkantag awit sa Gingharian uban sa naguol makapadasig usab. (Buh. 16:25; Col. 3:16) Ang pagdinasigay mahimong mas importante pa samtang ‘magkaduol’ ang adlaw ni Jehova.​—Heb. 10:25. w18.04 23 ¶16; 24 ¶18-19