Disyembre

Ang usa sa makapatandog kaayong bahin sa personalidad ni Jesus mao nga makasabot siya sa atong mga problema nga resulta sa atong pagkadili-hingpit. Sa dinhi pa siya sa yuta, siya ‘nagmaya uban sa mga tawong nagmaya’ ug ‘mihilak uban sa mga tawong nanghilak.’ (Roma 12:15) Pananglitan, dihang ang iyang 70 ka tinun-an mibalik nga malipayon human sa ilang malamposong pagsangyaw, si Jesus “nalipay sa hilabihan diha sa balaang espiritu.” (Luc. 10:17-21) Sa laing bahin, dihang nakita niya nga naguol ang mga nagmahal kang Lazaro tungod sa kamatayon niini, si Jesus “miagulo diha sa espiritu ug naguol.” (Juan 11:33) Bisag hingpit, nganong maluluy-on ug mabination man kaayo si Jesus sa makasasalang mga tawo? Una sa tanan, gimahal niya ang mga tawo. Iyang “gikalipayan ang mga anak sa mga tawo.” (Prov. 8:31) Ang maong gugma nagpalihok niya nga sabton pag-ayo ang ilang panghunahuna. Si apostol Juan miingon: “Siya nahibalo kon unsa ang anaa sa tawo.”​—Juan 2:25. w19.03 20 ¶1-2

Giwagtang ni Satanas ang tanang gipanag-iya ni Job, gipatay ang iyang mga ulipon, ug gidaot ang iyang reputasyon. Sunod, gipatay niya ang 10 ka pinanggang anak ni Job. Dayon gihatagan niya si Job ug grabeng hubag gikan sa ulo hangtod sa tiil. Naguol pag-ayo ang asawa ni Job maong iya ning giingnan nga tunglohon ang Diyos ug magpakamatay. Gusto pod ni Job nga mamatay, pero nagmatinumanon gihapon siya. Dayon misulay si Satanas ug laing paagi. Gigamit niya ang tulo ka amigo ni Job. Pipila ka adlaw silang nakig-uban kang Job, pero wala nila siya hupaya. Ila hinuong gikasab-an siya. Sila miingon nga ang Diyos maoy hinungdan sa iyang pag-antos ug wala pabilhi sa Diyos ang iyang pagkamatinumanon. Miingon pa gani sila nga daotan si Job ug angay lang mag-antos!​—Job 1:13-22; 2:7-11; 15:4, 5; 22:3-6; 25:4-6. w19.02 4 ¶7-8

Ang pipila ka matang sa kahadlok makaayo nato. Pananglitan, kinahanglang mahadlok ta nga mapasuko si Jehova. Kon naugmad pa ni Adan ug Eva ang maong kahadlok, wala unta sila morebelde kang Jehova. Human sa ilang pagrebelde, nabuka ang ilang mga mata sa pagkaagi nga nahibaloan nila nga sila makasasala. Ilang napasa ang sala ug kamatayon ngadto sa ilang mga anak. Kay sila nakakita, o nakasabot, sa ilang kahimtang, sila naulaw sa ilang pagkahubo ug naghimog sinina. (Gen. 3:7, 21) Bisan tuod mahadlok ta nga mapasuko si Jehova, dili ta angayng mahadlok pag-ayo sa kamatayon. Dunay gihimo si Jehova aron mabuhi ta sa walay kataposan. Kon kita makasala pero kinasingkasing nga maghinulsol, pasayloon ta ni Jehova. Pasayloon ta niya tungod sa atong pagtuo sa halad lukat sa iyang Anak. Ang usa sa pangunang paagi sa pagpakitag pagtuo mao ang pagdedikar sa atong kaugalingon ngadto sa Diyos ug pagpabawtismo.​—1 Ped. 3:21. w19.03 5-6 ¶12-13

Ang mga Israelinhon daghag rason sa pagpakitag apresasyon. Sila gipagawas sa pagkaulipon human ipahinabo ni Jehova ang 10 ka Silot sa Ehipto. Dayon, giluwas sila pinaagi sa paglaglag sa tibuok kasundalohan sa Ehipto didto sa Pulang Dagat. Ang mga Israelinhon mapasalamaton kaayo maong nakakanta silag awit sa kadaogan sa pagdayeg kang Jehova. Pero nakapabilin ba silang mapasalamaton? Dihang nakaatubang ang mga Israelinhon ug bag-ong problema, nalimtan dayon nila ang tanang maayong butang nga nahimo ni Jehova. Dayon ilang gipakita ang ilang kawalay apresasyon. (Sal. 106:7) Sa unsang paagi? “Ang tibuok katigoman sa mga anak sa Israel nagbagulbol batok kang Moises ug kang Aaron”​—nga maoy pagbagulbol kang Jehova mismo. (Ex. 16:2, 8) Nadismayar siya sa kawalay apresasyon sa iyang katawhan. Sa ulahi, iyang gitagna nga ang maong henerasyon sa mga Israelinhon mamatay sa kamingawan, gawas kang Josue ug Caleb.​—Num. 14:22-24. w19.02 17 ¶12-13

Si Jesus wala magtinguha nga dayegon pinaagi sa paghimog komplikadong seremonyas sa paghandom sa iyang kamatayon. Hinunoa, giingnan niya ang iyang mga tinun-an nga kada tuig kinahanglang handomon nila siya pinaagi sa simpleng okasyon. (Juan 13:15; 1 Cor. 11:23-25) Kining simple pero haom nga okasyon nagpakita nga si Jesus dili hambogiro. Malipay ta nga ang pagkamapainubsanon maoy usa sa nindot nga mga hiyas sa atong langitnong Hari. (Filip. 2:5-8) Unsaon nato pagsundog ang pagkamapainubsanon ni Jesus? Pinaagi sa pag-una sa kaayohan sa uban. (Filip. 2:3, 4) Hunahunaa ang kataposang gabii ni Jesus dinhi sa yuta. Nahibalo siya nga sa dili madugay makaeksperyensiya siyag sakit nga kamatayon. Pero naghunahuna gihapon siya sa iyang matinumanong mga apostoles, kinsa hapit nang magbangotan para niya. Busa, gigamit niya ang kataposang gabii sa paghatag nilag instruksiyon, pagdasig, ug pasalig. (Juan 14:25-31) Si Jesus mapainubsanong naghunahuna sa kaayohan sa uban imbes sa iyaha. Maayo gyod siyang ehemplo kanato! w19.01 21 ¶5-6

Kulbaan ka ba matag higayon nga gusto kang mokomento? Kon mao, wala ka mag-inusara. Ang tinuod, kadaghanan nato mobatig kahadlok dihang mokomento. Sa tinuod lang, posibleng may maayong hinungdan ang maong kahadlok. Nagpaila nâ nga mapainubsanon ka ug giisip nimo ang uban nga labaw nimo. Gusto ni Jehova ang maong hiyas. (Sal. 138:6; Filip. 2:3) Apan gusto sab niyang dayegon nimo siya ug dasigon nimo ang mga igsoon diha sa tigom. (1 Tes. 5:11) Nahigugma siya nimo ug hatagan ka niya sa kaisog nga imong gikinahanglan. Konsideraha ang pipila ka Kasulatanhong mga pahinumdom. Ang Bibliya nag-ingon nga kitang tanan masayop sa pulong ug buhat. (Sant. 3:2) Si Jehova ug ang atong mga igsoon wala magdahom ug kahingpitan kanato. (Sal. 103:12-14) Sila ang atong espirituwal nga pamilya, ug nahigugma sila nato. (Mar. 10:29, 30; Juan 13:35) Nasayod sila nga usahay dili nato masulti ang gusto natong isulti. w19.01 8 ¶3; 10-11 ¶10-11

Karong panahona, dili nâ kanunayng sayon, pero posible. Gusto ni Jehova nga matagamtam ninyo ang malamposon ug malipayong kinabuhi. Sa tabang sa Diyos, molampos mo, dili lang panahon sa inyong pagkabatan-on kondili sa tibuok ninyong kinabuhi. Aron mas masabtan kana, konsideraha kon unsay atong makat-onan sa pagsakop sa mga Israelinhon sa Yutang Saad. Dihang hapit nang mosulod ang mga Israelinhon sa Yutang Saad, wala sila sugoa sa Diyos nga magbansay alang sa gubat. (Deut. 28:1, 2) Hinunoa, giingnan niya sila nga kinahanglan nilang sundon ang iyang mga sugo ug mosalig niya. (Jos. 1:7-9) Sa tawhanong panglantaw, morag dili maayo ang maong tambag! Pero, mao kadto ang kinamaayohang tambag. Balikbalik nga gitabangan ni Jehova ang iyang katawhan nga magmadaogon batok sa mga Canaanhon. (Jos. 24:11-13) Oo, ang pagsunod sa Diyos nagkinahanglag pagtuo, pero ang maong pagtuo kanunayng moresultag kalamposan. Tinuod nâ kaniadto, ug mao man usab karon. w18.12 25 ¶3-4

Ang pipila karon napandol tungod sa kausaban sa pagsabot sa usa ka teksto. Ang uban midapig sa mga apostata ug magsusupak nga nagtuis sa kamatuoran. Ingong resulta, ang pipila tinuyong ‘nagpahilayo’ kang Jehova ug sa kongregasyon. (Heb. 3:12-14) Mas maayo unta kon sila nagmatinumanon ug padayong misalig kang Jesus, sama kang Pedro! Ang uban anam-anam nga nahilayo sa kamatuoran, nga tingali wala gani makamatikod niini. Ang tawong anam-anam nga nahilayo sa kamatuoran maoy sama sa baroto nga hinayhinayng naanod palayo gikan sa daplin sa suba. Kanang anam-anam nga kausaban gitawag sa Bibliya ug ‘pagkaanod.’ (Heb. 2:1) Lahi sa tawong tinuyo nga nagpahilayo sa kamatuoran, ang naanod wala makamatikod niini. Pero madaot o posibleng mawala ang iyang relasyon kang Jehova. w18.11 9 ¶5-6

Gusto ba kang modawat ug dugang pagbansay aron makaalagad kang Jehova nga mas bug-os pa? Kon oo, puwede kang moaplay sa School for Kingdom Evangelizers. Kini magbansay sa hamtong sa espirituwal nga mga brader ug sister nga bug-os panahong nag-alagad aron mas magamit sila sa organisasyon. Kadtong gustong moeskuyla kinahanglang andam modawat sa bisan unsang asaynment nga ihatag iniggraduwar nila. Gusto ba nimong pahimuslan ang maong kahigayonan sa pagkab-ot ug dugang pribilehiyo sa pag-alagad? (1 Cor. 9:23) Kay katawhan ta ni Jehova, kita mahinatagon, maayo, buotan, ug mahigugmaon. Mahunahunaon pod ta sa uban kada adlaw. Kon buhaton nato nâ, moresulta nag kalinaw ug kalipay. (Gal. 5:22, 23) Bisag unsay imong kahimtang, magmalipayon ka pinaagi sa pagsundog sa pagkamahinatagon ni Jehova ug sa pagkahimong iyang pinanggang isigkamagbubuhat!​—Prov. 3:9, 10. w18.08 27 ¶16-18

May mangutana tingali, ‘Puwede ba gyong makigdiborsiyo ang usa ka Kristohanon ug magminyo pag-usab?’ Aw, si Jesus nagpahayag sa iyang panglantaw sa diborsiyo: “Si bisan kinsa nga makigdiborsiyo sa iyang asawa ug magminyog lain makapanapaw batok kaniya, ug kon ugaling ang usa ka babaye, human makigdiborsiyo sa iyang bana, magminyog lain, siya makapanapaw.” (Mar. 10:11, 12; Luc. 16:18) Klaro nga gipasidunggan ni Jesus ang kaminyoon ug gusto niyang mao pod nay himoon sa uban. Ang usa ka lalaking makigdiborsiyo sa iyang maunongong asawa (o usa ka babaye, sa iyang maunongong bana) tungod sa mabawng rason ug magminyo pag-usab nakapanapaw. Tinuod kini kay ang basta pagdiborsiyo lang sa kapikas wala magpasabot nga natapos na ang kaminyoon. Sa panan-aw sa Diyos, silang duha “usa [gihapon] ka unod.” Dugang pa, si Jesus miingon nga ang pagdiborsiyo sa usa ka lalaki sa iyang inosenteng asawa, magpameligro niini nga makapanapaw. Sa unsang paagi? Kaniadto, ang gidiborsiyohang babaye lagmit mapugos sa pagminyo pag-usab aron dunay mosuportar niya sa pinansiyal. Ang maong kaminyoon sama rag pagpanapaw. w18.12 11 ¶8-9

Ang pagpakig-estorya ni Habacuc kang Jehova nakahatag niyag kalinaw sa hunahuna. Busa determinado siyang magpadayon sa paghulat nga molihok si Jehova. Dili ni kinalitkalit nga reaksiyon, kay gipakita niya pag-usab ang iyang determinasyon dihang siya miingon: “Sa hilom ako maghulat sa adlaw sa kasakit.” (Hab. 3:16) Unsay atong makat-onan sa determinasyon ni Habacuc? Una, dili gyod ta mohunong sa pag-ampo kang Jehova, bisag unsa pay atong kalisdanan. Ikaduha, kinahanglang mamati ta kang Jehova pinaagi sa iyang Pulong ug organisasyon. Ikatulo, kinahanglang mapailobon tang maghulat kang Jehova, nga bug-os mosalig nga hupayon niya sa iyang gitakdang panahon ang atong kasakit. Kon padayon tang makig-estorya, mamati, ug maghulat kang Jehova, sama kang Habacuc, makabaton sab tag kalinaw sa hunahuna, nga makatabang nato sa paglahutay. Ang atong paglaom makatabang nato nga magmapailobon ug magmalipayon bisan pa sa atong kalisdanan. Ang paglaom maghatag natog pagsalig nga molihok ang atong langitnong Amahan.​—Roma 12:12. w18.11 15-16 ¶11-12

Unsay panghunahuna sa Diyos bahin sa usa nga nakapandol sa uban? Si Jesus miingon: “Si bisan kinsa nga magapandol sa usa niining mga gagmay nga nagatuo, mas maayo pa alang kaniya kon ang iyang liog higtan ug galingan nga bato sama nianang ginabiyo sa asno ug siya igatambog ngadto sa dagat.” (Mar. 9:42) Bug-at kini nga mga pulong! Kay si Jesus parehas gyod sa iyang Amahan, makaseguro ta nga mao sab nay gibati ni Jehova niadtong tawo nga wala maghunahuna nga ang iyang gibuhat makapandol sa usa sa mga sumusunod ni Jesus. (Juan 14:9) Gisundog ba nato ang panglantaw ni Jehova ug Jesus? Unsay gipakita sa atong binuhatan? Pananglitan, ibutang ta nga ganahan ta sa usa ka estilo sa sinina o pamostura. Pero lagmit dunay mapandol ana diha sa atong kongregasyon o makapukaw nag imoral nga panghunahuna sa uban. Ang ato bang gugma sa mga igsoon mas importante kay sa atong gusto? w18.11 25 ¶9-10

Nganong kinahanglan tang magmatinumanon? Tungod kay gikuwestiyon ni Satanas si Jehova, ug gikuwestiyon sab ka niya. Ang maong rebelyosong anghel nagdaot sa reputasyon ni Jehova pinaagi sa pag-ingong ang Diyos daotan, kaugalingon ray gihunahuna, ug dili matinud-anong Magmamando. Ikasubo, si Adan ug Eva midapig kang Satanas ug mirebelde kang Jehova. (Gen. 3:1-6) Ang kinabuhi sa Eden naghatag nilag daghang kahigayonan sa pagpalig-on sa ilang gugma kang Jehova. Pero sa panahon nga gisulayan sila ni Satanas, ang ila diayng gugma depektoso, dili kompleto, o dili tibuok. Sa ulahi, mitungha ang laing pangutana: Duna bay mga tawo nga magmaunongon kang Jehova tungod sa gugma? Sa laing pagkasulti, kaya ba sa mga tawo nga magmatinumanon? Mitungha ang maong pangutana sa panahon ni Job. (Job 1:8-11) Sama nato, dili siya hingpit. Nasayop sab siya. Pero, gimahal siya ni Jehova tungod sa iyang pagkamatinumanon. w19.02 3-4 ¶6-7

Sa pagpakita nga importante kaayo ang kamatuoran sa Gingharian sa Diyos alang niadtong nakakaplag niana, gihisgotan ni Jesus ang usa ka negosyante nga nagapangita ug maayog klase nga mga perlas. Siya nakakitag usa nga maayo kaayog klase nga iyang ‘gibaligya dayon’ ang tanan niyang nabatonan aron paliton kini. (Mat. 13:45, 46) Sa susama, ang kamatuoran nga atong nakaplagan​—ang kamatuoran sa Gingharian sa Diyos ug ang ubang importanteng mga kamatuoran nga atong nakat-onan sa Pulong sa Diyos​—bililhon kaayo para nato nga mihimo dayon tag sakripisyo aron mabatonan kini. Kon gipabilhan nato ang kamatuoran, ‘dili [gyod] nato kini ibaligya.’ (Prov. 23:23) Pero makapasubo nga dunay pipila ka alagad sa Diyos nga nawad-ag pagpabili sa kamatuoran​—ug gibaligya pa gani kini. Dili unta nâ mahitabo nato! Aron ipakita ang atong pagpabili sa kamatuoran ug nga dili gyod nato ni ibaligya, kinahanglang sundon nato ang tambag sa Bibliya nga ‘magpadayon sa paglakaw diha sa kamatuoran.’ (3 Juan 2-4) Ang paglakaw sa kamatuoran nagpasabot sa pag-una niini sa atong kinabuhi ug pagkinabuhi uyon niini. w18.11 9 ¶3

Giingnan ang mga Israelinhon nga dili nila atakehon ang Jerico. Hinunoa, momartsa sila libot sa siyudad kas-a kada adlaw sulod sa unom ka adlaw ug kapito sa ikapitong adlaw. Tingali may mga sundalong naghunahuna, ‘Usik-usik ra man nâ sa panahon ug hagohago lang!’ Pero ang dili makitang Lider sa Israel nahibalo gyod sa iyang gibuhat. Ang iyang estratehiya nakapalig-on sa pagtuo sa mga Israelinhon ug dili na sila kinahanglang makig-away sa gamhanang kasundalohan sa Jerico. (Jos. 6:2-5) Unsay atong makat-onan niini? Usahay, dili nato bug-os masabtan ang mga rason sa bag-ong mga kahikayan sa organisasyon. Pananglitan, sa sinugdan gikuwestiyon tingali nato ang paggamit ug mga gadyet sa personal nga pagtuon, pagsangyaw, ug sa tigom. Karon, lagmit nakita nato ang mga kaayohan sa paggamit niana kon posible. Kon makita nato ang positibong resulta sa maong mga pag-uswag bisan pa sa mga pagduhaduha, molig-on ang atong pagtuo ug mas mahiusa ta. w18.10 23 ¶8-9

Tingali tungod sa mga pagdahom bahin sa Mesiyas, sama nianang sa mga tinun-an ni Jesus, gusto sa mga Galileanhon nga mahimong ilang hari si Jesus. Lagmit naghunahuna sila nga si Jesus mahimong kinamaayohang lider. Siya maayo kaayong manulti, makaayog mga masakiton, ug makapakaon pa gani sa mga gigutom. Human mapakaon ni Jesus ang mga 5,000 ka lalaki, iyang namatikdan kon unsay ilang gusto. “Si Jesus, kay nahibalo nga sila moduol na ug mosakmit kaniya aron himoon siyang hari, mipahawa na usab paingon sa bukid nga nag-inusara.” (Juan 6:10-15) Pagkaugma, sa pikas tampi sa Dagat sa Galilea, lagmit mikalma na ang mga tawo. Dayon, gipatin-aw ni Jesus kanila ang tinuod nga rason sa iyang pag-anhi​—ang pagtaganag espirituwal, dili materyal, nga kaayohan sa kanasoran. Siya miingon: “Hagoi ninyo, dili ang pagkaon nga mahanaw, kondili ang pagkaon nga magpabilin alang sa kinabuhing walay kataposan.”​—Juan 6:25-27. w18.06 4 ¶4-5

Nakasabot si Jesus sa gibati niadtong samag gupok nga tangbo o pabilo sa lampara nga nag-awop na. Tungod ana, siya mahunahunaon, buotan, ug mapailobon. (Mar. 10:14) Siyempre, dili ta makasabot o makatudlo sa mga tawo nga sama gyod kang Jesus! Pero puwede​—ug angay​—tang magpakitag konsiderasyon sa mga tawo sa atong teritoryo. Apil ana ang atong paagi sa pagpakigsulti, kon kanus-a ni buhaton, ug kon unsa ka dugay. Karon, minilyon ang “pinanitan ug nagkatibuagsa” tungod sa korap ug way kasingkasing nga mga lider sa negosyo, politika, ug relihiyon. (Mat. 9:36) Ingong resulta, daghan ang nawad-ag pagsalig ug paglaom. Busa, importante gyod nga magpakita tag kaayo ug konsiderasyon diha sa atong isulti ug gikusgon sa tingog! Gani, daghan ang nadani sa atong mensahe dili lang tungod sa atong kahibalo sa Bibliya o pagkamaayong mangatarongan kondili tungod sa atong sinserong interes kanila ug pagkamahunahunaon. w18.09 31-32 ¶13-14

Unsaon nato pagpakita nga mahunahunaon ta niana nga panginahanglan? Mahimo nato nâ pinaagi sa pagkuhag espirituwal nga pagkaon, pagpabili sa espirituwal nga mga butang, ug pag-una sa pagsimba sa malipayong Diyos. Kon buhaton nato nâ, mahimo tang mas malipayon. Mas molig-on ang atong pagtuo nga matuman ang mga saad sa Diyos. (Tito 2:13) Importante ang pagpakigsuod kang Jehova aron tinuod nga magmalipayon. Si apostol Pablo gigiyahan sa Diyos sa pagsulat: “Pagmaya kanunay diha sa Ginoo [si Jehova]. Sa makausa pa ako magaingon, Pagmaya!” (Filip. 4:4) Aron masuod sa Diyos, gikinahanglan nato ang iyang kaalam. (Prov. 3:13, 18) Pero, aron magpabiling malipayon, dili igo ang pagbasa sa Pulong sa Diyos. Kinahanglan pod nato ning ipadapat. Aron ipakita ang kaimportante sa pagpadapat sa atong nakat-onan, si Jesus miingon: “Kon nahibalo kamo niining mga butanga, malipayon kamo kon inyo kining buhaton.” (Juan 13:17; Sant. 1:25) Importante kini aron matagbaw ang atong espirituwal nga panginahanglan ug magpabiling malipayon. w18.09 18 ¶4-6

Nailhan pag-ayo ni Epafras ang mga igsoon, ug gimahal gyod niya sila. Bisag “isigkabinilanggo” siya ni Pablo, wala niya kalimti ang espirituwal nga panginahanglan sa uban. (Filem. 23) Ug may gibuhat siya bahin ana. Di ba wala lang siya maghunahuna sa kaugalingon? Dako gyod ug epekto ang pag-ampo para sa atong mga igsoon, ilabina kon hinumdoman nato ang matag usa kanila, nga hisgotan pa gani ang ilang ngalan. (2 Cor. 1:11; Sant. 5:16) Hunahunaa kon kang kinsang ngalan ang imong hisgotan diha sa pag-ampo. Sama ni Epafras, daghan sa atong mga igsoon ang nag-ampo para sa mga kakongregasyon ug pamilya nga may bug-at nga responsibilidad o nag-atubag seryosong mga desisyon o tentasyon. Dugang pa, iampo pod nato kadtong namatyan, nakaeksperyensiyag katalagman ug gubat, ug naglisod sa pinansiyal. Oo, daghan sa atong mga igsoon ang nagkinahanglan sa atong mga pag-ampo ug makabenepisyo niini. w18.09 5-6 ¶12-13

Wala lang magtumong si Pablo sa pagpanghatag ug materyal nga mga butang. Nag-apil sab nâ sa pagdasig, paggiya, ug pagtabang niadtong nanginahanglan niana. (Buh. 20:31-35) Pinaagi sa pulong ug buhat, gitudloan ta sa apostol nga magmahinatagon​—sa atong panahon, kusog, atensiyon, ug gugma. Ang mga tig-research bahin sa panggawi sa tawo nakaobserbar pod nga makapalipay ang pagpanghatag. Sumala sa usa ka artikulo, “ang mga tawo nag-ingon nga mas malipayon sila human makahimog maayo sa uban.” Matod pa sa mga tig-research, kon motabang ta sa uban, bation nato nga ang atong kinabuhi may direksiyon ug mapuslanon “kay natagan-an nato ang panginahanglan sa tawo.” Busa, nagsugyot ang mga eksperto nga mohimog serbisyo publiko ang mga tawo aron mahimong mas himsog ug malipayon. Dili ni ikatingala niadtong modawat sa Bibliya ingong Pulong sa mahigugmaong Maglalalang, si Jehova.​—2 Tim. 3:16, 17. w18.08 22 ¶17-18

Pinaagi sa iyang tagna bahin sa atong Ginoong Jesu-Kristo, si Isaias nagdasig ug nagpasalig nato. Siya nagtagna nga si Jesus “dili mohukom sumala sa makita lamang sa iyang mga mata, ni mobadlong sumala sa butang nga nadungog” ug “uban sa pagkamatarong siya magahukom sa mga timawa.” (Isa. 11:3, 4) Nganong makapadasig ni? Tungod kay nagkinabuhi ta sa kalibotan nga punog diskriminasyon. Nangandoy gyod ta sa hingpit nga Maghuhukom, kinsa dili mohukom base sa panggawas nga panagway! Kada adlaw, mohimo tag opinyon bahin sa mga tawo. Pero kay dili ta hingpit, dili nato masundog ang hingpit nga paghukom ni Jesus. Dali tang maimpluwensiyahan sa atong makita. Bisan pa niana, dihang dinhi pa si Jesus sa yuta, siya nagsugo nato nga dili maghukom pinasukad “sa panggawas nga panagway,” kondili maghukom “uban ang matarong nga paghukom.” Klaro, gusto ni Jesus nga sundogon nato siya ug dili hukman ang uban base sa ilang panagway. w18.08 8 ¶1-2

Tinuod, dili nato madunggan nga mosulti ang Diyos gikan sa langit. Pero gitagana niya ang iyang Pulong, ang Bibliya, diin pinaagi niana siya naghatag ug instruksiyon. Dugang pa, ang espiritu ni Jehova nagpalihok sa “matinumanong piniyalan” aron padayong magtaganag espirituwal nga pagkaon sa Iyang mga alagad. (Luc. 12:42) Daghan kaayo tag nadawat nga naimprenta ug online nga materyal, video, ug audio nga mga publikasyon! Hinaot ang pulong sa Diyos, nga narekord sa Bibliya, magpasalig nato nga kontrolado ni Jehova ang tanan ug wad-on niya ang tanang kadaot nga gihimo kanato ni Satanas ug sa iyang daotang kalibotan. Ug hinaot magmadeterminado ta nga mamati pag-ayo kang Jehova. Kon buhaton nato kana, makalahutay ta sa bisan unsang problema karon ug sa kalisdanan sa umaabot. Ang Bibliya nagpahinumdom kanato: “Gikinahanglan nga kamo molahutay, aron nga, human kamo makabuhat sa kabubut-on sa Diyos, kamo makadawat sa katumanan sa saad.”​—Heb. 10:36. w19.03 13 ¶17-18

Kay si Moises ang lider sa Israel sa taas kaayong panahon, naghunahuna tingali si Josue kon sundon ba sa katawhan sa Diyos ang iyang pagpanguna. (Deut. 34:8, 10-12) Usa ka reperensiya sa Bibliya ang nag-ingon bahin sa Josue 1:1, 2: “Kaniadto ug karon ang pag-ilis ug lider maoy usa sa peligroso kaayong panahon para sa usa ka nasod.” Lagmit may katarongan si Josue nga mabalaka, pero sulod sa pipila ka adlaw milihok dayon siya. (Jos. 1:9-11) Wala gyod masayop si Josue sa pagsalig sa Diyos. Sumala sa gipakita sa Bibliya, gigiyahan ni Jehova si Josue ug ang Iyang katawhan, ang Israel, pinaagi sa usa ka anghel. Makataronganon ang paghunahuna nga kini nga anghel mao ang Pulong, ang panganayng Anak sa Diyos. (Ex. 23:20-23; Juan 1:1) Sa tabang ni Jehova, ang Israel nakaadyas sa kausaban sa pagpanguna​—gikan kang Moises ngadto kang Josue. w18.10 22-23 ¶1-4

Ilhon ni Jehova kadtong kinabubut-ong nag-alagad niya, ug isulat ang ilang ngalan diha sa iyang “basahon sa handomanan.” Dihang masulat ang atong ngalan sa “basahon sa handomanan” ni Jehova ingong Iyang katawhan, may obligasyon pod ta. Sumala ni Malaquias, kinahanglan tang ‘mahadlok kang Jehova ug mamalandong sa iyang ngalan.’ Kon mosimba ta sa lain, tangtangon ang atong ngalan sa simbolikong basahon sa kinabuhi ni Jehova. (Ex. 32:33; Sal. 69:28) Busa, ang atong pagpahinungod kang Jehova dili lang kutob sa seryosong panaad nga buhaton ang iyang kabubut-on ug sa pagpabawtismo. Kadiyot ra ning mahitabo, ug mahimo nang bahin sa kagahapon. Ang atong pagdapig kang Jehova ingong iyang katawhan nagkinahanglag padayong pagpakita nga maunongon ta niya​—karon, sa umaabot, ug samtang buhi ta.​—1 Ped. 4:1, 2. w18.07 23-24 ¶7-9

Dili ni awtomatiko. Kinahanglang padayon tang maningkamot nga ‘mouswag.’ Aron mouswag sa pagkahamtong, kinahanglang madugangan ang atong kahibalo ug pagsabot. Maong pirme tang gidasig sa pagbasa sa Bibliya kada adlaw. (Sal. 1:1-3) Gihimo ba nimo ning tumong? Ang pagbuhat niana makatabang aron molalom ang imong pagsabot sa mga balaod ug prinsipyo ni Jehova. Ang pinakaimportanteng balaod para sa mga Kristohanon mao ang balaod sa gugma. Giingnan ni Jesus ang iyang mga tinun-an: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:35) Si Santiago, nga igsoon ni Jesus sa inahan, nagtawag sa gugma ingong “harianong balaod.” (Sant. 2:8) Si Pablo miingon: “Ang gugma mao ang katumanan sa balaod.” (Roma 13:10) Kini nga pagpasiugda sa gugma dili katingalahan, kay ang Bibliya nag-ingon nga “ang Diyos gugma.”​—1 Juan 4:8. w18.06 19 ¶14-15

Bisag si Jehova ang gipasuko sa mga Israelinhon, si Moises ang nasuko pag-ayo. Kay nawad-ag pagpugong sa kaugalingon, wala niya hunahunaa ang resulta sa iyang isulti. Gitugotan ni Moises nga mabalda ang iyang pagtan-aw kang Jehova tungod sa binuhatan sa uban. Sa unang hitabo, husto ang paagi sa pagsulbad ni Moises. (Ex. 7:6) Pero tungod tingali sa daghang tuig nga pagsigeg rebelde sa mga Israelinhon, siya gikapoy ug naglagot. Naghunahuna ra kaha si Moises sa iyang pagbati imbes sa pagdayeg kang Jehova? Kon ang maong matinumanong propeta nabalda ug nakasala, posibleng mahitabo pod nâ nato. Sama kang Moises, hapit na tang mosulod sa usa ka simbolikong yuta, ang bag-ong kalibotan nga gisaad ni Jehova. (2 Ped. 3:13) Gusto natong tanan nga matilawan ang maong espesyal nga pribilehiyo. Aron mahimo kana, kinahanglang pirme tang magtan-aw kang Jehova, nga maningkamot sa pagbuhat sa iyang kabubut-on.​—1 Juan 2:17. w18.07 15 ¶14-16

Dili mapugos ni Satanas ang mga tawo sa pagbuhat sa dili nila gusto. (Sant. 1:14) Daghan ang wala mahibalo nga midapig diay sila kang Satanas. Pero dihang mahibaloan nila ang kamatuoran, makapili sila kon kinsay ilang alagaron. (Buh. 3:17; 17:30) Kon determinado ta sa pagbuhat sa kabubut-on sa Diyos, dili mabungkag ni Satanas ang atong integridad. (Job 2:3; 27:5) Naa pay dili mabuhat ni Satanas ug sa mga demonyo. Pananglitan, walay giingon ang Bibliya nga makabasa sila sa hunahuna o kasingkasing sa tawo. Si Jehova ug Jesus lang ang gihisgotan nga makahimo niana. (1 Sam. 16:7; Mar. 2:8) Kon maningkamot ta sa pagsulti ug pagbuhat subay sa kabubut-on ni Jehova, makasalig ta nga dili niya tugotan ang Yawa sa pagbuhat ug permanenteng kadaot kanato. (Sal. 34:7) Kinahanglang makaila ta sa atong kaaway, pero dili ta angayng mahadlok niya. Sa tabang ni Jehova, bisan ang dili hingpit nga mga tawo makapildi kang Satanas. Kon suklan nato siya, mopalayo siya nato.​—Sant. 4:7; 1 Ped. 5:9. w18.05 26 ¶15-17

Hunahunaa nga moadto ka sa layong lungsod para sa usa ka importanteng okasyon. Aron makaabot didto, kinahanglan kang mosakayg bus. Sa terminal, daghan kaayong bus. Kinahanglang mosakay ka sa bus nga mopaingon sa imong adtoan! Kon mosakay kag lahi nga bus, dad-on gyod ka sa laing direksiyon. Susama niana ang kahimtang sa mga batan-on karon: Layo ang ilang biyahe​—dili diha sa bus kondili sa kinabuhi. Usahay maglibog sila sa mga oportunidad ug sa mga desisyon nga kinahanglang himoon. Mga batan-on, mas sayon ang pagdesisyon kon kabalo na mo sa direksiyon sa inyong kinabuhi. Ipokus ba ninyo ang inyong kinabuhi sa paglipay kang Jehova? Nagpasabot kana nga iapil siya sa tanang bahin sa kinabuhi​—sa edukasyon, trabaho, responsibilidad sa pamilya, ug uban pa. Ug kana nagpasabot sa pagkab-ot ug espirituwal nga mga tumong. Kon ang mga batan-on magpokus sa pag-alagad, makaseguro sila nga panalanginan sila ni Jehova ug malamposong kinabuhi. w18.04 25 ¶1-3

Gituman ni Jepte ang iyang saad ug gipadala sa Shilo ang iyang ulay nga anak aron mag-alagad sa tabernakulo sa tibuok niining kinabuhi. (Maghu. 11:30-35) Bisan pag lisod ni kang Jepte, mas lisod tingali ni sa iyang anak, kinsa kinabubut-ong mituman sa desisyon sa iyang amahan. (Maghu. 11:36, 37) Sa pagbuhat niana, iyang gisakripisyo ang iyang katungod sa pagminyo, pagpanganak, ug pagpreserbar sa ngalan ug panulondon sa pamilya. Busa, gikinahanglan gyod niya ang paghupay ug pagdasig. Ang Bibliya nag-ingon: “Kini nahimong regulasyon sa Israel: Sa matag tuig ang mga anak nga babaye sa Israel moadto sa pagpasidungog sa anak nga babaye ni Jepte nga Gileadnon, upat ka adlaw sa usa ka tuig.” (Maghu. 11:39, 40) Ang dili minyong mga Kristohanon nga naggamit sa ilang pagkatagsaanon aron mas mabuhat ang “mga butang sa Ginoo” angay pong hatagag komendasyon ug pagdasig.​—1 Cor. 7:32-35. w18.04 17 ¶10-11

Ubay-ubayng anghel ang miuban kang Satanas sa pagrebelde. Sa wala pa ang Lunop, natental ni Satanas ang pipila kanila sa pagpakigsekso sa mga babaye. Gipadayag kini sa Bibliya sa simbolikong paagi. Kini nag-ingon nga ang dragon nga gitambog sa yuta nagbitad sa ikatulong bahin sa mga bituon sa langit. (Gen. 6:1-4; Pin. 12:3, 4) Dihang gibiyaan sa maong mga anghel ang pamilya sa Diyos, nagpasakop sila sa pagmando ni Satanas. Kini nga mga rebelde maoy usa ka organisadong grupo. Si Satanas nagtukod ug kaugalingong gingharian diin siya ang hari. Sa espiritung kalibotan, giorganisar ni Satanas ang mga demonyo, gihatagag awtoridad, ug gihimong mga magmamando sa kalibotan. (Efe. 6:12) Pinaagi sa iyang espirituhanong organisasyon, gimandoan ni Satanas ang tanang gobyerno sa tawo. w18.05 23 ¶5-6

Usahay, ipakita sa Diyos ang iyang gugma pinaagi sa pagtul-id nato, sama nianang buhaton sa usa ka amahan. Gipabilhan kana ni David. Gipalandong niya ang mga hunahuna sa Diyos, gisundog kini ug nagpaimpluwensiya niini. Kon buhaton nâ nimo, mas modako sab ang imong gugma sa Diyos ug ang tinguha nga sundon siya. Mohamtong pod ka sa espirituwal. Ang sister nga si Christin miingon: “Kon mag-research ko ug mamalandong sa akong nabasa, bation nako nga kini gipasulat ni Jehova para nako!” Dili paghinobra ang pag-ingon nga ang pagkamahunahunaon sa espirituwal maghatag sab nimog talagsaong kahibalo ug pagsabot. Kay pinaagi niana, masundog nimo ang panglantaw sa Diyos bahin sa kalibotan ug sa umaabot niini. Nganong gihatagan ka sa Diyos sa maong kahibalo ug pagsabot? Gusto niyang magtakda kag mga prayoridad, makahimog maayong mga desisyon, ug makalantaw sa umaabot nga masaligon!​—Isa. 26:3. w18.12 26 ¶9-10