Enero

Gusto sa tanang matinumanong alagad sa Diyos nga makakat-on kon unsaon ‘pagtuman sa bug-os’ ang ministeryo nga gisugo kanila. (2 Tim. 4:5) Sa pagkatinuod, kini nga buluhaton mas importante ug dinalian kay sa bisan unsang buluhaton. Pero, malisdan tingali ta sa paggahin ug dakong panahon sa ministeryo. Ang ubang importanteng buluhaton nagkinahanglan sa atong panahon ug kusog. Tingali kinahanglan tang motrabahog daghang oras kada adlaw aron matagan-an ang atong panginahanglan ug nianang sa atong pamilya. Basin malisdan ta sa pag-atiman sa ubang responsibilidad sa pamilya, o kaha nasakit ta, na-depress, o nag-antos sa katigulangon. Kon nalimitahan ang atong panahon sa pag-alagad kang Jehova tungod sa atong kahimtang, dili ta angayng maluya. Nahibalo si Jesus nga ang matag usa kanato dili makapatunghag parehas nga gidaghanon sa bunga sa Gingharian. (Mat. 13:23) Pabilhan pag-ayo ni Jehova ang tanan natong buhaton sa pag-alagad kaniya basta himoon nato ang atong kinamaayohan.​—Heb. 6:10-12. w19.04 2 ¶1-3

Ang mga bakak ni Satanas bahin sa mga patay nagpasipala kang Jehova. Apil niana ang bakak nga pagtulon-an nga ang mga patay nag-antos sa nagkalayong impiyerno. Pasipala gyod kana sa Diyos! Ngano? Tungod kay magtuo ang mga tawo nga ang Diyos sa gugma sama ka bangis sa Yawa. (1 Juan 4:8) Unsay imong pagbati niana? Labaw sa tanan, unsay pagbati ni Jehova niana? Kon buot hunahunaon, gidumtan niya ang tanang matang sa kabangis. (Jer. 19:5) Ang mga bakak ni Satanas bahin sa kamatayon nagpakamenos sa halad lukat sa Kristo. (Mat. 20:28) Laing bakak ni Satanas ang pagtulon-an nga ang tawo may kalag nga dili mamatay. Kon tinuod nâ, ang tanan mabuhi sa walay kataposan. Ug dili na kinahanglang ihalad sa Kristo ang iyang kinabuhi aron kita malukat ug mabuhi sa walay kataposan. Hinumdomi nga ang halad ni Jesus mao ang kinadak-ang pagpahayag sa gugma ngadto sa katawhan. (Juan 3:16; 15:13) Hunahunaa kon unsay bation ni Jehova ug sa iyang Anak sa mga pagtulon-an nga nagbalewala nianang bililhong regalo! w19.04 14 ¶1; 16 ¶8-9

Asa narekord ang mga gitudlo ni Jesus? Daghan sa mga butang nga gisulti ug gibuhat ni Jesus sa yuta narekord sa upat ka Ebanghelyo. Ang ubang bahin sa Kristohanon Gregong Kasulatan nagtabang sab nato nga masabtan ang panghunahuna ni Jesus kay gisulat kini sa mga tawo nga gigiyahan sa balaang espiritu ug nakabaton sa “panghunahuna sa Kristo.” Ang mga gitudlo ni Jesus makatabang diha sa tanang bahin sa kinabuhi. Busa ang “balaod sa Kristo” naggiya sa atong ginabuhat diha sa balay, sa trabahoan o eskuylahan, ug sa kongregasyon. (Gal. 6:2) Makat-onan nato kini nga balaod pinaagi sa pagbasa ug pagpamalandong sa Kristohanon Gregong Kasulatan. Gisunod nato ang maong balaod dihang magkinabuhi ta uyon sa mga instruksiyon, sugo, ug prinsipyo nga narekord sa maong mga basahon sa Bibliya. Kon sundon nato ang balaod sa Kristo, gisunod nato ang atong mahigugmaong Diyos, si Jehova, kang kinsa naggikan ang tanang gitudlo ni Jesus.​—Juan 8:28. w19.05 3 ¶6-7

Makapasubo dihang ang mga tawo mobuhat sa kon unsay gusto sa Yawa. Pero si Jehova nahibalo sa mga taktika ni Satanas. Nahibalo siya kon unsa ka pait ang atong giantos, ug makatagana siya sa paghupay nga atong gikinahanglan. Panalangin gyod nga nag-alagad ta sa “Diyos sa tanang paghupay, kinsa nagahupay kanato sa tanan natong pagsulay aron makahupay ta sa uban nga nag-atubang ug bisan unsang matang sa pagsulay pinaagi sa paghupay nga atong nadawat sa Diyos.” (2 Cor. 1:3, 4) Kadtong wala panalipdi sa ilang ginikanan o giabuso niadtong suod nila ilabinang nagkinahanglag paghupay. Ang salmistang si David nahibalo nga makasalig ta nga si Jehova kanunayng mohupay nato. (Sal. 27:10) Kombinsido si David nga sagopon ni Jehova kadtong gisalikway sa ilang mga minahal. Sa unsang paagi? Himoon niya kana pinaagi sa iyang matinumanong mga alagad. Ang mga igsoon mao ang atong espirituwal nga pamilya. Pananglitan, si Jesus miingon nga kadtong miduyog niya sa pagsimba kang Jehova mao ang iyang mga igsoon ug inahan.​—Mat. 12:48-50. w19.05 15-16 ¶8-9

Unsay atong unahog tuon? Kinahanglang mogahin tag panahon kada adlaw sa pagtuon sa Pulong sa Diyos. Gimenosan karon ang gidaghanon sa bersikulo nga gieskedyul para sa senemanang pagbasa sa Bibliya aron duna tay dugang panahon sa pagpamalandong sa atong gibasa ug sa pag-research. Angay nga ang atong tumong, dili lang ang pagbasa sa gieskedyul para nianang semanaha, kondili nga matandog ang atong kasingkasing sa mensahe sa Bibliya ug mas masuod kang Jehova. (Sal. 19:14) Ang Pagtuon sa Bantayanang Torre maoy pagtuon sa Bibliya. Busa, hatagig pagtagad ang mga teksto, ilabina kadtong basahon dihang tun-an sa kongregasyon ang artikulo. Matikdi pag-ayo kon sa unsang paagi ang importanteng mga pulong diha sa teksto mosuportar sa pangunang punto diha sa parapo. Dugang pa, paggahin ug panahon sa pagpamalandong sa mga teksto nga imong gibasa ug kon unsaon nimo ni pagpadapat.​—Jos. 1:8. w19.05 27 ¶5; 28 ¶9

Si Jesus naghatag ug kinamaayohang ehemplo sa iyang panglantaw sa ministeryo. Ang pinakaimportante sa iyang kinabuhi mao ang pagsangyaw sa Gingharian sa Diyos. Mibaktas siyag gatosan ka kilometro aron masangyawan ang daghang tawo kutob sa mahimo. Gipahimuslan niya ang tanang kahigayonan nga maestorya sila​—sa publiko man o sa balay. Ang tibuok kinabuhi ni Jesus nasentro sa iyang ministeryo. Masundog nato ang Kristo pinaagi sa pagpangitag kahigayonan nga makasangyaw sa maayong balita bisag asa ug bisag kanus-a. Andam tang isakripisyo ang personal nga kahayahay aron makasangyaw. (Mar. 6:31-34; 1 Ped. 2:21) Ang pipila ka igsoon nakaalagad ingong espesyal, regular, o oksilyare payunir. Ang uban nagtuon ug laing pinulongan o mibalhin sa lugar nga nagkinahanglag dugang magsasangyaw. Pero, ang dakong bahin sa pagsangyawng buluhaton ginahimo sa mga magmamantala nga naningkamot kutob sa ilang mahimo. Bisan unsa pa man, wala mangayo si Jehova ug labaw sa atong maarangan. w19.04 4 ¶7-8

Pangutan-a ang imong kaugalingon: ‘Duna ba koy gamayng kasina sa akong kasingkasing?’ (1 Ped. 2:1) ‘Gibati ba nakong mas maayo ko sa uban tungod sa akong kagikan, edukasyon, o kahimtang sa kinabuhi?’ (Prov. 16:5) ‘Ubos ba ang akong pagtan-aw niadtong lahi nakog kahimtang o rasa?’ (Sant. 2:2-4) ‘Ganahan ba ko sa mga butang nga gitanyag sa kalibotan ni Satanas?’ (1 Juan 2:15-17) ‘Malingaw ba ko sa imoral ug bayolente nga mga kalingawan?’ (Sal. 97:10; 101:3; Amos 5:15) Ang tubag niini nga mga pangutana mahimong magpaila kon unsay angay nimong bag-ohon. Ang atong mga higala dakog impluwensiya kanato. (Prov. 13:20) Sa trabahoan o eskuylahan, lagmit gilibotan ta niadtong dili makatabang nato sa pag-ugmad sa panghunahuna sa Diyos. Pero sa atong mga tigom makakita tag pinakamaayong mga higala. Didto madasig ta, o mapalihok, “sa pagpakitag gugma ug sa paghimog maayong mga buhat.”​—Heb. 10:24, 25. w19.06 12 ¶13-14

Dili katuyoan ni Jehova nga kita makaatubag mga problema ug ma-stress. Busa masabtan nato kon ang usa ka matinumanong alagad ni Jehova magpasagad ug sulti dihang ma-stress pag-ayo. (Job 6:2, 3) Bisan pag makasulti siyag dili mao bahin kang Jehova o kanato, dili dayon ta masuko o mohukom niya tungod sa iyang gisulti. Usahay, ang tawong nag-atubang ug makapa-stress nga problema nagkinahanglan pod ug tambag o disiplina. (Gal. 6:1) Unsaon kini paghimo sa mga ansiyano? Angay nilang sundogon si Elihu, kinsa mabinationg naminaw kang Job. (Job 33:6, 7) Ayha pa mitambag si Elihu dihang nasabtan na niya ang hunahuna ni Job. Ang mga ansiyano nga nagsundog kang Elihu maminaw pag-ayo ug maningkamot nga masabtan ang situwasyon sa maong tawo. Unya, dihang motambag sila, mas dakog posibilidad nga maabot nila ang kasingkasing sa ilang tambagan. w19.06 22-23 ¶10-11

Unsaon nimo pagpadayon sa pagsimba kang Jehova dihang idili ang buluhaton? Ang sangang buhatan maghatag sa inyong mga ansiyano ug mga instruksiyon ug praktikal nga mga sugyot. Kon dili makontak sa sangang buhatan ang mga ansiyano, nan ang mga ansiyano maoy motabang nimo ug sa tibuok kongregasyon aron makapadayon mo sa pagsimba kang Jehova. Mohatag silag giya nga binase sa Bibliya ug sa atong mga publikasyon. (Mat. 28:19, 20; Heb. 10:24, 25) Si Jehova nagsaad nga ang iyang mga alagad matagan-an sa tanan nilang espirituwal nga panginahanglan. (Isa. 65:13, 14; Luc. 12:42-44) Busa makaseguro ka nga himoon sa iyang organisasyon ang tanan aron itagana kon unsay imong gikinahanglan aron makapabilin kang matinumanon. Pero unsa poy imong mahimo? Dihang idili ang buluhaton, pangitag maayong katagoan sa imong Bibliya ug sa ubang espirituwal nga pagkaon. Ayaw ibutang ang maong importante kaayong mga basahon​—inimprenta man o digital format​—sa lugar nga dali rang makit-an. Ang matag usa kinahanglang mohimog mga paagi aron makapabiling lig-on sa espirituwal. w19.07 10 ¶10-11

Sa linibo ka katuigan, ang kadaghanan sa mga tawo sa kalibotan dunay relihiyon. Pero dunay dakong kausaban niining milabayng katuigan. Nagkadaghan ang walay relihiyon. Gani, sa pipila ka nasod, ang kadaghanan sa populasyon nag-ingon nga dili sila relihiyoso. (Mat. 24:12) Ngano? Ang pipila tingali nagpokus sa mga kalingawan o sa mga problema. (Luc. 8:14) Dunay nahimong mga ateyista. Ang uban nagtuog Diyos pero naghunahuna nga ang relihiyon kinaraan na, dili na praktikal, ug wala mahiuyon sa siyensiya ug lohikal nga panghunahuna. Tingali madungog nila sa ilang mga higala, magtutudlo, o sa inilang mga tawo sa media nga ang kinabuhi nagsugod pinaagig ebolusyon, pero panagsa ra silang makadungog ug maayong mga rason nga motuo sa Diyos. Ang uban naglagot sa mga lider sa relihiyon nga hakog sa kuwarta ug gahom. Sa pipila ka dapit, ang mga gobyerno naghimog mga balaod nga nagdili sa relihiyosong kalihokan. w19.07 20 ¶1-2

Dili kinahanglan nga lig-on ka sa pisikal aron padayon kang molig-on sa espirituwal. Gani, daghan niadtong luya na sa pisikal ang determinado gihapon nga himoon ang ilang kinamaayohan para kang Jehova. (2 Cor. 4:16) Tingali dugay ka nang nag-alagad kang Jehova ug karon tungod sa dili maayong panglawas dili na nimo mahimo ang parehas kaniadto. Kon mao, ayawg kaluya. Magmasaligon nga dili kalimtan ni Jehova ang imong matinumanon nga pag-alagad kaniadto. (Heb. 6:10) Ug sa pagkakaron, hinumdomi nga dili ang gidaghanon sa atong mahimo sa pag-alagad kang Jehova ang magpakita sa kalalom sa atong gugma kaniya. Hinunoa, mapakita nato kana pinaagi sa pagbaton ug positibong panghunahuna ug paghimo sa tanan nga atong maarangan. (Col. 3:23) Masabtan ni Jehova ang atong mga limitasyon ug wala siya magdahom ug labaw pa kay sa atong mahimo.​—Mar. 12:43, 44. w19.08 3 ¶6; 5 ¶11-12

Si Jehova nagkabig sa mga tawo pinaagi sa “maayong mga buhat” sa Kristohanong kongregasyon. (Mat. 5:14, 15; 1 Ped. 2:12) Kon ang imong kapikas dili Saksi ni Jehova, may nakaila na ba siya sa inyong kongregasyon? Imbitaha ang imong kapikas sa pagtambong sa tigom kauban nimo. (1 Cor. 14:24, 25) Naglaom ta nga ang tanang membro sa atong pamilya moduyog nato sa pag-alagad kang Jehova. Pero, bisan pa sa tanan natong paningkamot sa pagtabang sa atong pamilya nga mahimong alagad sa Diyos, basin dili gihapon sila makadangat sa kamatuoran. Kon mahitabo nâ, dili nato angayng basolon ang atong kaugalingon sa ilang desisyon. Sa pagkatinuod, dili nato mapugos si bisan kinsa sa pagdawat sa atong pagtuo. Pero, kon makita sa imong pamilya nga malipayon kaayo ka sa pag-alagad kang Jehova, basig dako nig epekto kanila. Iampo sila. Magmataktikanhon sa pagpakigsulti kanila. Ayawg hunong! (Buh. 20:20) Magmasaligon nga panalanginan ni Jehova ang imong mga paningkamot. Ug kon ang imong pamilya modesisyon nga maminaw nimo, sila maluwas! w19.08 18-19 ¶15-17

Unsay gipasabot ni Jesus? Gipasabot niya nga kinahanglan tang magpokus sa usa ka tumong, o katuyoan, nga dili magpabalda. Si Jesus mismo naghatag ug ehemplo pinaagi sa pagpokus diha sa ministeryo, ug gitudloan niya ang mga tinun-an nga unahon ang pag-alagad kang Jehova ug ang Gingharian. Atong masundog si Jesus pinaagi sa pagpokus sa atong ministeryo, nga ‘pangitaon pag-una ang Gingharian ug ang pagkamatarong sa Diyos.’ (Mat. 6:33) Ang usa ka paagi nga makapokus ta sa atong ministeryo mao ang pagpasimple sa atong kinabuhi aron mas dako tag panahon sa pagtabang sa uban nga mailhan ug higugmaon si Jehova. Pananglitan, makaadyas ba ta sa atong oras sa pagtrabaho aron makasangyaw ta sa ubang adlaw sa semana? Puwede ba natong ibanan ang pipila ka kalingawan nga tingali makahurot ug panahon? w19.04 5-6 ¶12-13

Sa di pa dugayng katuigan, daghang dugay na sa pag-alagad ang nakadawat ug kausaban sa asaynment. Ang maong mga kausaban dili sayon para niini nga mga igsoon. Dayag nga gimahal nila pag-ayo ang ilang kanhing asaynment, nga sagad nabatonan nila sa daghang katuigan. Ang pipila naguol pag-ayo samtang nag-adyas sa ilang bag-ong kahimtang. Pero sa ngadtongadto, nakaadyas ra sila. Ang pangunang nakatabang nila mao ang ilang gugma kang Jehova. Nahibalo sila nga sila nagpahinungod sa Diyos​—dili sa trabaho, titulo, o asaynment. (Col. 3:23) Nalipay sila nga makapadayon sa pag-alagad kang Jehova nga mapainubsanon sa bisan unsang asaynment. Ilang ‘gitugyan kaniya ang tanan nilang kabalaka,’ kay nahibalo sila nga gimahal niya sila. (1 Ped. 5:6, 7) Dihang ugmaron nato ang nindot nga hiyas nga pagkamapaubsanon, makabenepisyo ta ug ang uban. Mas malahutay nato ang mga problema. Labaw sa tanan, mas masuod ta sa atong langitnong Amahan. w19.09 6-7 ¶15-17

Gitudlo ni Jehova si David ingong ulo, dili lang sa iyang pamilya, kondili sa tibuok nasod sa Israel. Ingong hari, dakog gahom si David. Usahay, dili husto ang paggamit niya sa iyang gahom ug nakahimo siyag grabeng mga sayop. (2 Sam. 11:14, 15) Pero gipakita niya nga nagpasakop siya kang Jehova pinaagi sa pagdawat ug disiplina. Gibubo niya ang iyang kasingkasing kang Jehova sa pag-ampo. Ug naningkamot siya sa pagsunod sa tambag ni Jehova. (Sal. 51:1-4) Dugang pa, mapainubsanon siyang midawat ug maayong tambag dili lang gikan sa mga lalaki kondili sa mga babaye usab. (1 Sam. 19:11, 12; 25:32, 33) Si David nakakat-on sa iyang mga sayop ug gipokus niya ang iyang kinabuhi sa pag-alagad kang Jehova. Nahibalo siya sa mga benepisyo sa pagpasakop kang Jehova. Karon, atong makita ang kalainan niadtong nagpasakop kang Jehova ug niadtong nagsalikway sa iyang mahigugmaong tambag. Kadtong nagpasakop kang Jehova ‘naninggit sa kalipay tungod sa maayong kahimtang sa kasingkasing.’​—Isa. 65:13, 14. w19.09 17 ¶15; 19 ¶21

Niadtong 1935, nasabtan sa mga Saksi ni Jehova nga ang pagbarog sa dakong panon “atubangan sa trono ug atubangan sa Kordero” dili literal nga sa langit. Himoon nila kini sa simbolikong paagi. Bisag magpuyo sa yuta, ang dakong panon makabarog “atubangan sa trono” pinaagi sa pag-ila sa awtoridad ni Jehova ug pagpasakop sa iyang pagkasoberano. (Isa. 66:1) Makabarog sila “atubangan sa Kordero” pinaagi sa pagpakitag pagtuo sa halad lukat ni Jesus. Sa susama, sa Mateo 25:31, 32, “ang tanang kanasoran”​—apil ang mga daotan—​gihisgotan nga “tigomon sa . . . atubangan” ni Jesus diha sa iyang mahimayaong trono. Klaro nga kining mga nasora nia sa yuta, wala sa langit. Makataronganon kana nga kausaban sa pagsabot. Kanay hinungdan kon nganong ang Bibliya wala mag-ingon nga ang dakong panon dad-on sa langit. Usa lang ka grupo ang gisaarag walay kataposang kinabuhi sa langit​—ang 144,000 nga “magmando ingong hari ibabaw sa yuta” uban ni Jesus.​—Pin. 5:10. w19.09 28 ¶9

Gidahom ni Jehova nga ang iyang mga magsisimba mobulag sa Bantogang Babilonya. Pero dili igo ang pagbiya lang sa bakak nga relihiyon. Kinahanglang determinado ta nga paluyohan ang tinuod nga relihiyon​—ang putling pagsimba kang Jehova. Tagda ang duha ka paagi nga mahimo nato kana. Una, kinahanglang sundon gyod nato ang matarong nga moral nga mga sukdanan ni Jehova. Dili gyod ta mouyon sa imoral nga panggawi sa kalibotan. Pananglitan, dili ta mouyon sa bisan unsang seksuwal nga imoralidad, apil sa pagminyo sa duha ka tawo nga parehas ug sekso ug sa ubang homoseksuwal nga buhat. (Mat. 19:4, 5; Roma 1:26, 27) Ikaduha, kinahanglang padayon tang magsimba kauban sa atong mga isigka-Kristohanon. Himoon nato ni bisan asa nga posible, sa Kingdom Hall man o, kon gikinahanglan, sa pribadong mga balay o bisan sa tinagotago. Bisag unsay mahitabo, dili gyod ta moundang sa pagtambong sa tigom. Gani, kinahanglan tang magtigom “ilabina gyod samtang makita [nato] nga ang adlaw nagkaduol na.”​—Heb. 10:24, 25. w19.10 16 ¶6-7

Gusto ni Jehova nga magmalipayon ta, ug ang kalingawan makatabang nato nianang bahina. Gani, ang Pulong sa Diyos nag-ingon nga “wala nay mas maayo pa alang sa tawo kay sa mokaon ug moinom ug malipay sa iyang paghago.” (Eccl. 2:24) Pero, kadaghanan sa kalingawan sa kalibotan dili maayog epekto kanato. Kini makapaubos sa moral nga mga sukdanan sa tawo, nga mag-awhag nila sa pagkonsentir​—o paghigugma pa gani—​sa mga butang nga gihukman sa Pulong sa Diyos. Gusto natong ihatag kang Jehova ang eksklusibong debosyon, busa dili puwede nga mokaon ta sa “lamesa ni Jehova” ug sa “lamesa sa mga demonyo.” (1 Cor. 10:21, 22) Ang pagkaon uban sa usa ka tawo sagad maoy timailhan nga managhigala mo. Kon mopili tag kalingawan nga nagpasiugdag kapintasan, espiritismo, imoralidad, o ubang unodnong tinguha ug panghunahuna, sama rag nakigsalo ta sa mga kaaway sa Diyos ug mikaon sa pagkaon nga ilang gipreparar. Makadaot ni dili lang sa atong kaugalingon kondili sa ato pong relasyon kang Jehova. w19.10 26 ¶2; 29-30 ¶11-12

Aron makabenepisyo sa hangin, dunay duha ka butang nga kinahanglang himoon sa tiglawig. Una, iyang ipaapupa sa hangin ang barko. Dili moabante ang barko kon ang tiglawig magpabilin sa pantalan nga dili apupa sa hangin. Ikaduha, kinahanglan niyang bukharon pag-ayo ang layag. Siyempre, bisag naghuros ang hangin, moabante lang ang barko kon ang layag maigo sa hangin. Sa susama, makalahutay lang ta sa pag-alagad kang Jehova kon tabangan ta sa balaang espiritu. Aron makabenepisyo ta sa balaang espiritu, dunay duha ka butang nga kinahanglan natong himoon. Una, kinahanglan tang “magpaapupa” sa balaang espiritu pinaagi sa pagpakigbahin sa mga buluhaton nga gipahimo niana. Ikaduha, kinahanglan natong “bukharon ang atong mga layag” kutob sa mahimo pinaagi sa bug-os nga pagpakigbahin niana nga mga buluhaton kutob sa atong maarangan. (Sal. 119:32) Iduso ta sa balaang espiritu aron atong malatas ang mga balod sa paglutos ug kalisdanan ug tabangan ta nga magmatinumanon. w19.11 9 ¶8; 10 ¶11

Sa iyang kataposang adlaw dinhi sa yuta, nabalaka si Jesus. Hapit na niyang antoson ang sakit nga kamatayon sa kamot sa daotang mga tawo. Pero dili lang ang iyang nagsingabot nga kamatayon ang nakapabalaka niya. Nahigugma siya pag-ayo sa iyang Amahan ug gusto niya nga malipay Siya. Nahibalo si Jesus nga kon magmatinumanon siya niining lisod nga pagsulay, iyang mabindikar (o, madepensahan) ang ngalan ni Jehova. Nahigugma sab si Jesus sa mga tawo, ug nahibalo siya nga ang atong paglaom nga mabuhi sa walay kataposan magdepende sa iyang pagkamatinumanon dinhi sa yuta. Bisag nabalaka pag-ayo si Jesus, nagmalinawon siya. Nabatonan niya ang “kalinaw sa Diyos,” ang pagkakalmado ug pagkamalinawon nga bation niadtong dunay suod nga relasyon kang Jehova. Nakatabang nâ kang Jesus nga magmalinawon. (Filip. 4:6, 7) Walay usa kanato ang makasinatig kalisdanan nga sama nianang kang Jesus, pero ang tanan niyang sumusunod makaatubang ug mga kalisdanan. (Mat. 16:24, 25; Juan 15:20) Ug sama kang Jesus, usahay mabalaka ta. w19.04 8 ¶1-3

Maayong pangutan-on nato ang kaugalingon, ‘Mapasalamaton ba ko nga nakig-uban ko sa yutan-ong bahin sa organisasyon ni Jehova?’ Si Jehova naghatag kanatog makapakombinsir nga ebidensiya nga gipanalanginan niya ang iyang katawhan karon. Daghan gyod tag angayng pasalamatan kang Jehova. (1 Tes. 5:18) Unsaon nato pagpakita ang atong pagsuportar sa organisasyon nga gigamit ni Jehova? Pinaagi sa pagsunod sa binase sa Bibliyang instruksiyon nga gihatag kanato diha sa atong mga publikasyon ug sa atong mga tigom, asembliya, ug kombensiyon. Dugang pa, atong ikapakita ang atong pagsuportar pinaagi sa paghimo sa bug-os natong maarangan diha sa buluhatong pagsangyaw ug pagpanudlo. (1 Cor. 15:58) Hinaot mabatonan nato ang pag-uyon ni Jehova aron dawaton niya ang atong mga halad. Hinaot mag-alagad ta kang Jehova tungod sa atong pagkamapasalamaton kaniya. Hinaot magpadayon ta sa paghatag kang Jehova sa atong kinamaayohan kay gihigugma nato siya sa bug-os natong kasingkasing. Ug hinaot himoon nato ang atong maarangan sa pagsuportar sa organisasyon nga iyang gigamit karon. Nianang mga paagiha, atong ikapakita kang Jehova nga atong gipabilhan ang pribilehiyo sa pag-alagad kaniya ingong iyang mga Saksi! w19.11 25 ¶17-18

Wala ipasabot ni Jesus nga maghimo tag mga milagro sama kaniya. Hinuon, ang iyang mga sumusunod magsangyaw ug manudlo sa mas daghang dapit, mas daghang tawo, ug sa mas taas nga panahon. Kon duna kay sekular nga trabaho, pangutan-a ang kaugalingon: ‘Nailhan ba ko sa trabahoan ingong kugihan nga trabahante? Ginahuman ba nako ang akong trabaho sa hustong oras ug ginahimo ang akong kinamaayohan?’ Kon makatubag kag oo niana, lagmit saligan ka sa imong amo. Ug tingali mas maminaw sa mensahe sa Gingharian ang imong mga kauban sa trabaho nga naniid nimo. Kon bahin sa pagsangyaw ug pagpanudlo, pangutan-a ang kaugalingon: ‘Nailhan ba ko nga kugihang mosangyaw? Mangandam ba ko pag-ayo para sa unang pagduaw? Mobalik ba ko dayon sa mga interesado? Ug regular ba kong nakigbahin sa lainlaing paagi sa pagsangyaw?’ Kon makatubag kag oo niana, magmalipayon ka sa imong ministeryo. w19.12 5 ¶14-15

Kon ang magtiayon modesisyon nga manganak, maayong hisgotan nila kining duha ka importanteng pangutana: Una, kanus-a nila gustong manganak? Ikaduha, pila ka anak ang ilang gusto? Kanus-a maayong hisgotan sa magtiayon kining mga pangutanaha? Ug nganong importante kaayo nga ila ning hisgotan? Kasagaran, maayong hisgotan kining butanga sa dili pa sila magminyo. Ngano? Kay importante nga parehas silag hunahuna bahin niini. Kinahanglan pod nilang konsiderahon kon andam ba sila niini nga responsibilidad. Ang uban midesisyon nga maghulat ug usa o duha ka tuig human sa kasal una manganak kay ang pagkahimong ginikanan nagkinahanglag dakong panahon ug kusog. Naghunahuna sila nga kon dili dayon sila manganak, makatabang ni aron makaadyas una sila sa kinabuhing minyo ug mas magkasuod. w19.12 23 ¶4-5

Sa tibuok kalibotan, daghang alagad ni Jehova ang nag-atubang ug mga situwasyon nga makapa-stress o makapaguol. Dunay mga igsoon nga grabeg sakit o namatyag minahal. Ang uban nasakitan pag-ayo kay dunay membro sa ilang pamilya o suod nga higala nga mibiya sa kamatuoran. Ug ang uban nag-antos tungod sa mga epekto sa katalagman. Ang maong mga igsoon nagkinahanglag paghupay. Unsaon nato sila pagtabang? Ipakita nga maunongon kang higala. Ang maunongong mga higala andam mosakripisyo para sa mga igsoon. Pananglitan, ang brader nga si Peter nadayagnos nga may grabeng sakit nga makamatay. Ang iyang asawa nga si Kathryn miingon: “Usa ka magtiayon sa among kongregasyon nagdala namo sa doktor, ug didto, nahibaloan namo ang sakit ni Peter. Midesisyon sila nga dili gyod mi nila biyaan niining lisod nga kahimtang, ug naa sila pirme dihang gikinahanglan namo sila.” Makapahupay gyod nga duna tay tinuod nga mga higala nga motabang nato sa paglahutay! w20.01 8 ¶1; 9 ¶5; 10 ¶6

Kon usa ka sa mga tinun-an nga nagtigom niadtong adlawa sa lawak sa itaas niadtong Pentekostes 33 C.E, dili gyod ka magduhaduha nga gidihogan ka sa balaang espiritu. (Buh. 2:5-12) Pero ang tanan bang gidihogan sa balaang espiritu nakadawat niana sa talagsaong paagi ug sa samang higayon sa ilang kinabuhi? Wala. Matikdi kon kanus-a lagmit dihogan ang usa ka tawo. Ang maong grupo sa mga 120 ka Kristohanon dili lang maoy gidihogan sa balaang espiritu nianang adlawa. Sa ulahing bahin nianang adlawa, mga 3,000 pa ang nakadawat sa gisaad nga balaang espiritu. Gidihogan sila dihang sila gibawtismohan. (Buh. 2:37, 38, 41) Apan sa misunod nga mga tuig, dili tanang dinihogang Kristohanon ang gidihogan panahon sa ilang bawtismo. Ang mga Samarianhon gidihogan paglabay sa pipila ka panahon human sa ilang bawtismo. (Buh. 8:14-17) Ug sa talagsaon kaayong kahimtang, si Cornelio ug ang iyang panimalay gidihogan bisag wala pa mabawtismohi.​—Buh. 10:44-48. w20.01 20-21 ¶2-4

Sa upat ka Ebanghelyo, halos 200 ka beses nga gitawag ni Jesus si Jehova ingong “Amahan.” Nganong pirmeng maghisgot si Jesus bahin kang Jehova? Ang usa ka rason maoy aron makombinsir ang mga tawo nga si Jehova usa ka mahigugmaong Amahan. (Juan 17:25) Konsideraha kon unsay atong makat-onan bahin kang Jehova sa iyang paagi sa pagtratar sa iyang Anak, si Jesus. Kanunayng namati si Jehova sa mga pag-ampo ni Jesus. Pero wala lang siya mamati sa mga pag-ampo ni Jesus; iya sab ning gitubag. (Juan 11:41, 42) Bisag unsang pagsulay ang giatubang ni Jesus, kanunay niyang gibati ang gugma ug pagsuportar sa iyang Amahan. (Luc. 22:42, 43) Ingong mahigugmaong Amahan, gipaneguro ni Jehova nga mahibalo si Jesus nga gisuportahan siya sa iyang Amahan. (Mat. 26:53; Juan 8:16) Bisan tuod wala panalipdi ni Jehova si Jesus batok sa tanang kadaot, Iyang gitabangan siya nga makalahutay sa mga pagsulay. Nahibalo si Jesus nga ang bisan unsang kadaot nga iyang maagoman temporaryo lang. (Heb. 12:2) Gipakita ni Jehova nga iyang gimahal si Jesus pinaagi sa pagpaminaw kaniya, pagtagana sa iyang panginahanglan, pagbansay kaniya, ug pagsuportar kaniya.​—Juan 5:20; 8:28. w20.02 3 ¶6-7, 9

Dihang modesisyon kon moapil ba o dili sa usa ka kostumbre o tradisyon, angay natong hunahunaon kon unsay epekto sa atong desisyon diha sa konsensiya sa uban, ilabina sa mga igsoon sa pagtuo. Dili gyod nato gustong makapandol! (Mar. 9:42) Kon mahimo, likayan nato nga masuko ang mga dili Saksi. Ang gugma magpalihok nato sa pagsulti kanila sa matinahorong paagi, nga maghimaya kang Jehova. Siyempre, dili ta makig-away sa mga tawo o magbugalbugal sa ilang mga tradisyon. Hinumdomi, gamhanan ang gugma! Kon magpakita tag gugma sa mahunahunaon ug matinahorong paagi, basig dili na masuko nato ang mga magsusupak. Ipahibalo sa inyong komunidad nga Saksi ka. (Isa. 43:10) Lagmit dili kaayo ka malisdan sa pagpakiglabot sa nasuko nimong mga paryente ug silingan kon sultian nimo sila daan nga Saksi ka. Hinaot nga dili ta maulaw sa pagdepensa sa kamatuoran.​—Roma 1:16. w19.04 17-18 ¶14-16

Ang 12 ka apostoles kauban ni Jesus panahon sa iyang ministeryo sa yuta, pero si apostol Pablo nahimo lang Kristohanon human mamatay ug mabanhaw si Jesus. Bisag sa ulahi natudlo siya ingong “apostol sa kanasoran,” si Pablo wala mokuwalipikar sa espesyal nga pribilehiyo nga mahimong usa sa 12 ka apostoles. (Roma 11:13; Buh. 1:21-26) Imbes masina sa maong 12 ka lalaki ug sa ilang pagpakig-uban kaniadto kang Jesus, si Pablo nagpabiling kontento sa iyang nabatonan. Kon kita kontento ug mapainubsanon sama kang Pablo, magpakita tag pagtahod sa awtoridad nga gihatag ni Jehova sa uban. (Buh. 21:20-26) Si Jehova naghimog kahikayan nga dunay mga ansiyano nga magdumala sa kongregasyon. Bisag dili sila hingpit, giisip sila ni Jehova ingong “gasa nga mga lalaki.” (Efe. 4:8, 11) Kon tahoron nato ang mga ansiyano ug mapainubsanon tang mosunod sa ilang instruksiyon, makapabilin tang suod kang Jehova ug makabatog malinawong relasyon sa atong mga igsoon. w20.02 17-18 ¶13-14

Sa wala pa ka magpa-Bible study sa mga Saksi ni Jehova, tingali gitahod na nimo pag-ayo ang Bibliya. Ug tingali gimahal na nimo si Jesus. Karon nga nailhan na nimo ang mga Saksi ni Jehova, tingali ganahan kang makig-uban nila. Pero bisag gimahal ug giapresyar nimo ang maong mga butang, dili kana igo aron mapalihok ka sa pagpahinungod sa imong kaugalingon kang Jehova ug sa pagpabawtismo. Ang panguna nimong motibo sa pagpabawtismo mao ang imong gugma kang Jehova nga Diyos. Kon gihigugma nimo si Jehova labaw sa tanan, dili ka magpapugong sa bisan unsa o kang bisan kinsa sa pag-alagad kaniya. Ang imong gugma kang Jehova magpalihok nimo sa pagpabawtismo ug makatabang nimo sa pagpabiling matinumanon human sa bawtismo. Si Jesus miingon nga kinahanglang higugmaon nato si Jehova sa tibuok natong kasingkasing, kalag, hunahuna, ug kusog. (Mar. 12:30) Sa unsang paagi maugmad nimo ang lawom nga gugma ug pagtahod kang Jehova? Ang pagpamalandong kon unsa ka dako ang gugma ni Jehova kanato makapalihok nato sa paghigugma sab kaniya. w20.03 4 ¶4-5

Unsay ipasabot sa bug-os nga pagtuman sa atong ministeryo? Sa simpleng pagkasulti, aron bug-os nga matuman ang atong ministeryo, kinahanglan tang mosangyaw ug manudlo kutob sa mahimo. Pero dili lang gidaghanon sa oras ang gitumong niini. Importante kang Jehova ang atong motibo. Kay gimahal nato si Jehova ug ang atong silingan, bug-os kalag tang nagahimo sa atong ministeryo. (Mar. 12:30, 31; Col. 3:23) Ang bug-os kalag nga pag-alagad sa Diyos nagpasabot ug paggamit sa atong kusog sa pag-alagad kaniya kutob sa atong mahimo. Dihang maapresyar nato nga usa ka pribilehiyo ang pagsangyaw, maningkamot ta nga sultian ang mga tawo sa maayong balita. Tingali limitado ang atong panahon sa pagsangyaw. Pero, mao nay gusto natong buhaton. Naningkamot tang mouswag ang atong paagi sa pagsangyaw sa maayong balita aron maabot ang kasingkasing sa mga tawo. Prayoridad nato ang pagsangyaw. w19.04 2 ¶3; 3 ¶4, 6

Ang mga bakak ni Satanas makapasamot sa kaguol ug pag-antos sa mga tawo. Ang mga ginikanan nga namatyag bata lagmit sultian nga gikuha kini sa Diyos, tingali aron mahimong anghel sa langit. Kini ba nga bakak makapamenos sa ilang kaguol o makapasamot hinuon? Ang bakak nga pagtulon-an bahin sa impiyernong kalayo gigamit aron ipakamatarong ang pagpaantos, apil na ang pagsunog diha sa estaka niadtong mosupak sa mga doktrina sa simbahan. Sumala sa basahon bahin sa Spanish Inquisition, ang pipila nga naghimo niini nga kabangis nagtuo tingali nga gipatilaw lang nila kadtong mosupak sa simbahan “kon sama sa unsa ang nagkalayong impiyerno” aron maghinulsol sila una mamatay ug dili maimpiyerno. Sa daghang nasod, ang mga tawo naobligar sa pagsimba sa ilang namatay nang katigulangan, sa pagpasidungog kanila, o sa pagpangayo sa ilang panalangin. Ang uban mangitag paagi nga malipay ang ilang katigulangan aron dili sila silotan niini. Ikasubo, ang mga pagtulon-an nga gibase sa mga bakak ni Satanas dili makahatag ug tinuod nga kahupayan. Makapasamot hinuon kini sa kabalaka o bisan sa kahadlok. w19.04 14 ¶1; 16 ¶10