Pebrero

Sa Bibliya, ang “hustisya” nagpasabot ug paghimo sa giingon sa Diyos nga husto ug pagbuhat niana nga walay diskriminasyon. Hunahunaa kon sa unsang paagi ang mga gibuhat ni Jesus nagpakitag hustisya. Sa iyang panahon, ang Hudiyong mga lider sa relihiyon nagdumot sa mga dili Hudiyo, nagtamay sa ordinaryong mga Hudiyo, ug wala magtahod sa mga babaye. Pero si Jesus walay diskriminasyon ug kanunayng patas ang iyang pagtratar sa tanan. Gidawat niya ang mga dili Hudiyo nga mituo niya ug gustong mosunod kaniya. (Mat. 8:5-10, 13) Gisangyawan niya ang tanan, dato ug pobre. (Mat. 11:5; Luc. 19:2, 9) Maayo ang iyang pagtratar sa mga babaye. Siya may pagtahod kanila, bisan niadtong gitamay sa uban. (Luc. 7:37-39, 44-50) Atong masundog si Jesus kon wala tay diskriminasyon ug kon sangyawan nato ang tanan nga andam mamati​—bisag unsay ilang relihiyon o kahimtang sa kinabuhi. Masundog sa mga brader si Jesus pinaagi sa pagpakitag pagtahod sa mga babaye. w19.05 2 ¶1; 5 ¶15-17

Ang maunongong mga ansiyano karon mahimong mogamit ug mabinationg mga pulong dihang hupayon nila kadtong nanginahanglag tabang pinaagi sa Bibliya. Mga ansiyano lang ba ang makahupay sa mga biktima sa pag-abuso? Dili. Kitang tanan may responsibilidad nga ‘padayong hupayon ang usag usa.’ (1 Tes. 4:18) Ang hamtong nga mga sister ilabinang makadasig sa mga sister nga nanginahanglag paghupay. Haom lang nga gipakasama ni Jehova nga Diyos ang iyang kaugalingon sa inahan nga naghupay sa iyang anak. (Isa. 66:13) Sa Bibliya, may mga pananglitan sa mga babaye nga naghupay niadtong anaa sa kasakitan. (Job 42:11) Nalipay gyod si Jehova nga makita ang mga sister karon nga naghupay sa mga sister nga nag-antos! Sa pipila ka kahimtang, mahimong hangyoon sa usa o duha ka ansiyano sa pribado ang usa ka hamtong nga sister nga tabangan ang sister nga nag-antos. Siyempre, dili ta angayng mangutana sa atong igsoon bahin sa mga butang nga dili niya gustong estoryahan.​—1 Tes. 4:11. w19.05 16-17 ¶10-12

Sa dili pa magporma ang mga ansiyano ug hudisyal nga komite, nganong gikinahanglan ang labing menos duha ka testigos? Tungod kay apil ni sa taas nga sukdanan sa Bibliya sa hustisya. Kon dili moangkon ang giakusahan, gikinahanglan ang duha ka testigos nga mopamatuod sa akusasyon una magporma ang mga ansiyano ug hudisyal nga komite. (Deut. 19:15; 1 Tim. 5:19) Kon moingon ang akusado nga dili tinuod ang akusasyon, paminawon sa mga ansiyano ang mga testigos. Kon labing menos duha ka tawo​—ang nag-akusar ug ang lain pa nga makapamatuod nga ang akusado nag-abuso niining bataa o sa laing bata—​ang makapamatuod sa akusasyon, pormahon ang hudisyal nga komite. Wala magpasabot nga kon usa ray testigos, dili tinuod ang akusasyon. Bisag walay ikaduhang testigos, ang mga ansiyano nahibalo nga ang akusado lagmit nakahimog seryosong sala. Ang mga ansiyano padayong maghupay ug magpaluyo niadtong nasakitan sa maong hitabo ug magmabinantayon aron mapanalipdan ang kongregasyon sa posibleng kadaot nga ipahinabo sa maong akusado.​—Buh. 20:28. w19.05 11 ¶15-16

Importante nga tudloan ang mga anak kon unsaon pagtuon. Pananglitan, kinahanglang makakat-on sila kon unsaon pagpangandam para sa mga tigom o kon unsaon pag-research bahin sa problema nga mitungha sa eskuylahan. (Heb. 5:14) Kon mogahin silag panahon sa pagtuon diha sa balay, mas sayon nila ang pagpaminaw ug pagsabot sa materyal nga hisgotan diha sa mga tigom, asembliya, ug kombensiyon. Siyempre, ang gitas-on sa matag pagtuon magdepende sa edad ug personalidad sa mga bata. Ang atong mga Bible study kinahanglan pong makakat-on kon unsaon pagtuon. Kon bag-o pa silang nagtuon, malipay ta kon badlisan nila ang tubag agig pagpangandam sa ilang pagtuon sa Bibliya o sa mga tigom. Pero, kinahanglan nato silang tudloan kon unsaon pag-research ug pagtuon pag-ayo nga silasila ra. Busa kon motungha ang mga problema, mahibalo na sila kon unsaon pagpangitag impormasyon nga makatabang nila pinaagi sa pag-research diha sa atong mga publikasyon. w19.05 26 ¶2; 28 ¶10-11

Determinado si Satanas nga bag-ohon ang atong hunahuna. Gamiton niya ang tanang matang sa ideya aron kontrahon ang impluwensiya sa Pulong sa Diyos. Si Satanas padayong naggamit sa samang pangutana nga iyang gisukna kang Eva sa tanaman sa Eden: “Tinuod ba nga miingon ang Diyos . . . ?” (Gen. 3:1) Sa kalibotan nga gikontrolar ni Satanas, sagad makadungog tag mga pangutana nga makapaduhaduha nato, sama sa: ‘Tinuod ba nga dili mouyon ang Diyos nga magminyo ang parehong lalaki o parehong babaye? Tinuod ba nga dili gusto sa Diyos nga magselebrar mog Pasko ug adlawng natawhan? Tinuod ba nga gidahom sa inyong Diyos nga dili mo magpaabonog dugo? Tinuod ba nga gidahom sa usa ka mahigugmaong Diyos nga dili mo makig-uban sa na-disfellowship nga mga minahal?’ Kinahanglang kombinsido ta sa atong mga pagtulon-an. Kon dili nato susihon ang tubag sa importanteng mga pangutana bahin sa atong pagtulon-an, basin magsugod na ta pagduhaduha. Ngadtongadto, ang atong pagduhaduha makadaot sa atong panghunahuna ug pagtuo. w19.06 12-13 ¶15-17

Gimahal kaayo ta ni Jehova. (Juan 3:16) Gusto natong sundogon ang atong mahigugmaong Amahan. Busa naningkamot ta sa pagpakitag “simpatiya, inigsoong pagmahal, [ug] kaluoy” ngadto sa tanan apan ilabina sa “atong mga igsoon sa pagtuo.” (Gal. 6:10) Dihang ang mga membro sa atong espirituwal nga pamilya mag-atubag makapa-stress nga mga problema, gusto nato silang tabangan. Unsaon nato paghupay kadtong namatyag kapikas? Ang unang butang nga angay natong himoon mao ang pagpakig-estorya niya bisag dili ta segurado o komportable sa atong isulti. Si Paula, kansang bana kalit nga namatay, miingon: “Nakasabot ko nga dili komportable ang mga tawo bahin sa kamatayon. Mabalaka sila kay basig malain ang uban sa ilang isulti. Pero arang-arang na lang nang makadungog kag dili kaayo nindot paminawon kay sa wala gyod kay madungog.” Ang tawong nagbangotan lagmit wala magdahom nga nindot kaayo tag isulti. Si Paula miingon: “Maapresyar gyod nako bisag moingon lang ang akong higala ug ‘Naguol ko sa nahitabo.’” w19.06 20 ¶1; 23 ¶14

Kon idili ang atong buluhaton, ang mga ansiyano mohimog mga paagi aron makatigom mo nga dili ra mamatikdan sa uban. Tingali mohatag silag instruksiyon nga magtigom mo sa ginagmayng grupo ug lagmit usab-usabon nila ang eskedyul ug dapit sa tigom. Kon bahin sa pagsangyaw, lainlain ang kahimtang sa kada lugar. Pero kay gihigugma nato si Jehova ug ganahan tang maghisgot bahin sa iyang Gingharian, mangita tag paagi nga makasangyaw. (Luc. 8:1) Bahin sa mga Saksi ni Jehova sa kanhing Soviet Union, ang historyano nga si Emily B. Baran miingon: “Dihang giingnan sa gobyerno ang mga magtutuo nga dili sila makasangyaw bahin sa ilang pagtuo, ang mga Saksi nakig-estorya sa ilang mga silingan, kauban sa trabaho, ug higala. Dihang napriso sila sa mga kampo sa pinugos nga pagtrabaho tungod niini, ang mga Saksi nagsangyaw sa ubang piniriso.” Bisag gidid-an, ang mga igsoon didto wala moundang ug sangyaw. Hinaot nga ingon pod niana ang imong determinasyon! w19.07 11 ¶12-13

Unsaon nato pagtabang ang mga dili relihiyoso nga makakat-on sa paghigugma sa Diyos ug mahimong mga tinun-an sa Kristo? Kinahanglan natong ilhon nga ang reaksiyon sa usa ka tawo sa atong mensahe lagmit magdepende kon asa siya nagdako. Pananglitan, ang mga tawo nga nagdako sa Europe lahi tingalig reaksiyon niadtong nagdako sa Asia. Ngano? Sa Europe, daghan ang may kahibalo sa Bibliya ug nakadungog sa ideya nga gilalang sa Diyos ang tanang butang. Pero sa Asia, ang kadaghanan gamay rag nahibaloan o wala gyoy nahibaloan sa Bibliya, ug tingali dili sila motuo nga dunay Maglalalang. Busa magmapositibo. Kada tuig, dunay mga dili relihiyoso nga mahimong Saksi ni Jehova. Daghan sa mga dili relihiyoso ang taas nag moral nga sukdanan ug nakasaway pag-ayo sa pagpakaaron-ingnon sa relihiyon. Ang uban kanila ubos ug moral nga sukdanan ug daghan ang may mga bisyo nga angayng biyaan. Sa tabang ni Jehova, makaseguro ta nga atong makita kadtong “nakiling sa pagdawat sa kamatuoran nga motultol sa kinabuhing walay kataposan.”​—Buh. 13:48; 1 Tim. 2:3, 4. w19.07 20-21 ¶3-4

Bisag unsay atong paglaom​—kinabuhing walay kataposan man sa langit o sa paraisong yuta—​kinahanglan nga padayon tang maningkamot pag-ayo nga makab-ot ang maong tumong. Bisan unsay atong kahimtang, kinahanglang dili ta molingi sa mga butang sa luyo ug dili sab nato tugotan ang bisan unsa nga makababag sa atong pag-alagad. (Filip. 3:16) Morag nalangan tingali ang katumanan sa atong mga gidahom, o kaha nagkaluya na ta. Basin nakasinati tag kalisdanan ug paglutos sulod sa daghang katuigan. Bisag unsay imong kahimtang, “ayawg kabalaka sa bisan unsa.” Hinunoa, ipahibalo sa Diyos ang imong mga hangyo pinaagi sa pag-ampo ug pangamuyo, ug ihatag niya kanimo ang kalinaw nga labaw pa sa imong gidahom. (Filip. 4:6, 7) Sama sa magdadagan nga naningkamot pag-ayo samtang gidagan niya ang kataposang hugna sa lumba, hinaot magpokus ta pag-ayo sa tumong nga matapos nato ang lumba sa kinabuhi. Kutob sa atong maarangan ug sa itugot sa atong kahimtang, hinaot maningkamot ta pag-ayo ug padayong magpokus sa nindot nga mga butang sa unahan. w19.08 7 ¶16-17

Tingali, malisdan ta kon unsay atong isulti niadtong nagmagul-anon. Usahay, mas dakog epekto ang atong mga luha kay sa atong isulti. Dihang si Lazaro nga higala ni Jesus namatay, si Maria, Marta, ug ang uban mihilak kay nawad-an silag minahal nga igsoon ug higala. Pag-abot ni Jesus upat ka adlaw sa ulahi, “mihilak” sab siya, bisag nahibalo siya nga banhawon na niya si Lazaro. (Juan 11:17, 33-35) Ang mga luha ni Jesus nagpakita kon unsa poy gibati sa iyang Amahan. Nagpamatuod sab nâ nga gimahal ni Jesus ang maong pamilya, ug seguradong nahupayan niini si Maria ug Marta. Sa susama, dihang bation sa mga igsoon nga ato silang gimahal ug gihunahuna, maamgohan nila nga wala sila mag-inusara kondili gilibotan sa mahunahunaon ug matinabangong mga higala. Usahay, kinahanglan lang tang maminaw pag-ayo kaniya. Tugoti ang igsoon sa pagpahayag sa iyang gibati, ug ayawg kalain kon mosulti siyag ‘mga pulong nga pinasagad.’ (Job 6:2, 3) Basin nadugangan ang iyang stress tungod sa presyur gikan sa dili Saksing mga paryente. Busa pag-ampo uban niya. Hangyoa ang “Tigpatalinghog sa pag-ampo” nga hatagan siyag kusog ug maayong panghunahuna.​—Sal. 65:2. w19.04 18-19 ¶18-19

Nag-alagad man ta sa field o sa Bethel, makakat-on ta sa pagmahal pag-ayo sa mga tawo ug bisan sa lugar diin ta nag-alagad. Busa, maguol kaayo ta kon kinahanglan na tang mobiya sa atong asaynment. Mingawon ta sa mga igsoon, ug mabalaka ta nila, ilabina kon mobiya ta tungod sa paglutos. (Mat. 10:23; 2 Cor. 11:28, 29) Dugang pa, ang pagdawat ug laing asaynment​—o bisan ang pagpauli sa atong lugar—​sagad magpasabot nga kinahanglan tang moadyas sa bag-ong kultura. Ang pipila nga nakadawat ug bag-ong asaynment lagmit makaatubang ug wala damhang mga galastohan. Basin mabalaka kaayo sila ug mawad-ag kadasig. Unsay makatabang? Magpabiling suod kang Jehova. (Sant. 4:8) Sa unsang paagi mahimo nato kana? Pinaagi sa pagsalig kaniya ingong “Tigpatalinghog sa pag-ampo.” (Sal. 65:2) Si Jehova “makahimo gayod ug labaw pa kay sa atong gipangayo o gihunahuna.” (Efe. 3:20) Siya dili lang magtagana sa espesipiko natong gipangayo diha sa pag-ampo. Mahimong buhaton sab niya ang wala nato damha, nga labaw pa sa bisan unsa nga ato tingaling gihunahuna, aron masulbad ang atong mga problema. w19.08 21 ¶5-6

Ang pipila ka tawo nagtuo nga ang “Armagedon” usa ka nukleyar nga gubat o natural nga katalagman. Pero ang Bibliya nag-ingon nga ang Armagedon maoy maayong balita nga makahatag ug kalipay! (Pin. 1:3) Ang gubat sa Armagedon dili magpuo sa katawhan kondili maghatag ug kaluwasan! Sa unsang paagi? Pinaagi sa pagtapos sa pagmando sa tawo. Wagtangon niini ang mga daotan ug luwason ang mga matarong. Panalipdan sab niini ang atong planeta aron dili kini madaot. (Pin. 11:18) Ang pulong nga “Armagedon” kausa lang makita sa Kasulatan, ug kini naggikan sa Hebreohanong pulong nga nagkahulogang “Bukid sa Megido.” (Pin. 16:16; footnote) Ang Megido maoy siyudad sa karaang Israel. (Jos. 17:11) Pero ang Armagedon wala magtumong sa bisan unsang literal nga dapit sa yuta. Sa pagkatinuod, kini nagtumong sa kahimtang diin ang “mga hari sa tibuok gipuy-ang yuta” tigomon batok kang Jehova.​—Pin. 16:14. w19.09 8 ¶1-3

Ang babaye nagkinahanglan gyod ug tabang. Daghan na siyag naadtoang doktor aron maayo unta siya. Human mag-antos ug 12 ka tuig, wala gihapon siya maayo. Sumala sa Balaod, siya hugaw. (Lev. 15:25) Unya nakabalita siya nga si Jesus makaayo sa mga nag-antos, busa gipangita niya kini. Dihang nakita niya si Jesus, gihikap niya ang bitaybitay sa sidsid sa besti niini, ug dihadiha siya naayo! Pero dili kay kana ray gihimo ni Jesus​—gibalik sab niya ang dignidad sa babaye. Pananglitan, samtang nakig-estorya kaniya, gigamit ni Jesus ang makapatandog ug matinahorong pulong nga “anak.” Segurado nga kana nakapalagsik, o nakapalig-on, sa babaye! (Luc. 8:43-48) Matikdi nga ang babaye miadto kang Jesus. Milihok siya. Tinuod sab nâ karon​—kinahanglan tang maningkamot sa pagduol kang Jesus. Karon, dili ayohon ni Jesus sa milagrosong paagi ang mga sakit niadtong moduol kaniya. Pero siya nagdapit gihapon: “Ari kamo kanako, . . . ug ako magpalagsik kaninyo.”​—Mat. 11:28. w19.09 20 ¶2-3

Si propetang Zacarias daan nang nagtagna ug susama niana. Siya misulat: “Nianang panahona 10 ka tawo gikan sa tanang pinulongan sa mga nasod ang mogunit pag-ayo sa sinina sa usa ka Hudiyo, ug moingon: ‘Gusto ming mouban ninyo, kay nakadungog mi nga ang Diyos nagauban kaninyo.’” (Zac. 8:23) Naamgohan sa mga Saksi ni Jehova nga aron matigom ang mga tawo gikan sa tanang pinulongan, ang maayong balita kinahanglang isangyaw sa daghang pinulongan. Karon atong ginahimo ang kinadak-ang buluhaton sa paghubad sukad, nga miabot nag gatosan ka pinulongan. Klaro nga si Jehova naghimog milagro sa atong panahon​—ang pagtigom sa dakong panon gikan sa tanang kanasoran. Tungod kay mabatonan na ang espirituwal nga pagkaon sa nagkadaghang pinulongan, kini nga grupo nagkahiusa sa pagsimba kang Jehova, bisag naggikan sila sa lainlaing dapit sa kalibotan. Ug ang mga Saksi nailhan sa ilang kadasig sa pagsangyaw ug sa ilang inigsoong gugma. Makapadasig kaayo kana!​—Mat. 24:14; Juan 13:35. w19.09 30-31 ¶16-17

Panahon sa dakong kasakitan, ang mga tawo makurat dihang makita nila nga magsugod nag kahugno ang mga butang nga ilang gisaligan. Sila maguol ug mahadlok nga basig mamatay sila nianang kinalisdang panahon sa kasaysayan sa tawo. (Sof. 1:14, 15) Nianang panahona, lagmit mahimong mas lisod pa ang kinabuhi bisan para sa katawhan ni Jehova. Kay nagpabilin tang dili bahin sa kalibotan, lagmit makasinati tag mga kalisdanan. Basin dili nato mabatonan ang pipila ka pangunang panginahanglan. Ginaandam ta sa “matinumanon ug maalamong ulipon” aron makapabilin tang matinumanon panahon sa dakong kasakitan. (Mat. 24:45) Ginahimo ni sa daghang paagi, ug usa niini mao ang tukma sa panahong mga programa sa kombensiyon gikan sa 2016 hangtod sa 2018. Pinaagi niana nga mga programa, gidasig ta sa pagpalig-on sa mga hiyas nga atong gikinahanglan samtang nagkaduol ta sa adlaw ni Jehova. w19.10 14 ¶2; 16 ¶10; 17 ¶12

Dihang tunlon na nato ang pagkaon, kini awtomatikong maproseso ug ang mga sustansiya niini sa ngadtongadto makaapektar sa atong lawas. Ang maayong pagkaon mas makapahimsog nato; ang dili maayong pagkaon makadaot sa atong panglawas. Dili tingali dayon mamatikdan ang epekto, pero makita ni paglabay sa panahon. Sa susama, dihang mopili tag kalingawan, makapili tag unsay isulod sa atong hunahuna. Human niana, kini awtomatikong maproseso ug maapektohan ang atong hunahuna ug kasingkasing. Ang maayong kalingawan makaayo kanato; ang dili maayong kalingawan makadaot kanato. (Sant. 1:14, 15) Dili tingali dayon mamatikdan ang epekto sa dili maayong kalingawan, pero makita ni paglabay sa panahon. Kanay hinungdan nga ang Bibliya nagpasidaan kanato: “Kon unsay gipugas sa usa ka tawo, mao pod ang iyang anihon; kay siya nga nagpugas maylabot sa iyang unod moanig daotan nga resulta sa iyang makasasalang mga tinguha.” (Gal. 6:7, 8) Busa importante gyod nga likayan nato ang tanang kalingawan nga nagpasiugda sa mga butang nga gidumtan ni Jehova!​—Sal. 97:10. w19.10 30 ¶12-14

Gipamatud-an ni Jehova ang iyang gugma kanato pinaagi sa paghatag sa iyang Anak aron lukaton ta. (Juan 3:16) Unsaon nato pagsundog ang gugma ni Jehova? Isipon nato nga bililhon ang matag usa sa atong mga igsoon, ug andam tang modawat pag-usab sa “nawalang karnero” nga mibalik kang Jehova. (Sal. 119:176; Luc. 15:7, 10) Gipamatud-an nato nga atong gimahal ang mga igsoon pinaagi sa paghatag kanila sa atong panahon ug kusog, sama sa pagtabang kanila dihang manginahanglan sila. (1 Juan 3:17) Gisugo ni Jesus ang iyang mga sumusunod sa pagpakitag nagsakripisyong gugma. (Juan 13:34, 35) Bag-o ni nga sugo kay ang maong gugma wala isugo diha sa Balaod nga gihatag sa Diyos sa Israel. Nagsugo ni nga higugmaon ang mga igsoon sama sa paghigugma ni Jesus kanato. Kana nagkinahanglag nagsakripisyong gugma. Kinahanglan natong higugmaon ang mga igsoon nga labaw pa gani sa atong kaugalingon. Angay natong higugmaon sila pag-ayo nga andam natong ihatag ang atong kinabuhi para nila, sama sa gibuhat ni Jesus. w19.05 4 ¶11-13

Aron madawat ang tabang sa balaang espiritu, kinahanglan tang magsigeg ampo bahin niini. (Luc. 11:13) Ang ilustrasyon ni Jesus sa Lucas 11:5-9 makatabang sab kanato nga masabtan kon nganong hatagan ta ni Jehova ug balaang espiritu. Ang tawo diha sa ilustrasyon gustong moatiman sa iyang bisita. Gibati niya nga kinahanglan niyang dalitan ug pagkaon ang iyang bisita nga gabii na kaayong miabot, pero wala siyay ikahatag. Si Jesus miingon nga ang silingan mihatag ug tinapay kay ang tawo nagsigeg hangyo. Unsay punto ni Jesus? Kon ang dili hingpit nga tawo andam motabang sa silingan nga nagsigeg hangyo, labaw na gyong motabang ang atong buotan nga Amahan sa langit niadtong magsigeg pangayo niya ug balaang espiritu! Busa, makaseguro ta nga tubagon ni Jehova ang atong pag-ampo alang sa balaang espiritu. (Sal. 10:17; 66:19) Kita makaseguro nga modaog gyod ta bisan pa sa kanunayng paningkamot ni Satanas nga mapildi ta. w19.11 13 ¶17-19

Nahibalo si Jesus nga siya ug ang mga apostoles kinahanglang mopahulay usahay. Pero, daghang tawo niadtong panahona ug karon ang susama sa dato nga tawo sa ilustrasyon ni Jesus. Ang maong tawo miingon sa iyang kaugalingon: “Pahayahay, kaon, inom, ug paglipaylipay.” (Luc. 12:19; 2 Tim. 3:4) Nagpokus siya sa pagpahulay ug paglingawlingaw. Sa laing bahin, si Jesus ug ang mga apostoles wala magpokus sa paglingawlingaw. Karon, naningkamot ta sa pagsundog kang Jesus pinaagi sa paggamit sa atong day off sa trabaho dili lang sa pagpahulay kondili sa pagbuhat ug maayo pinaagi sa pagsangyaw ug pagtambong sa mga tigom. Gani importante kaayo para nato ang paghimog mga tinun-an ug pagtambong sa tigom, maong naningkamot ta nga regular nga mahimo kining sagradong mga buluhaton. (Heb. 10:24, 25) Bisan dihang magbakasyon ta, padayon natong ginahimo ang atong espirituwal nga rutina sa pagtambong sa mga tigom bisan asa ta, ug nangita tag mga kahigayonan nga makasangyaw sa atong mahibalag.​—2 Tim. 4:2. w19.12 7 ¶16-17

Si Jehova nagtugot kanato sa pagdesisyon kon unsaon nato pagkinabuhi. Nagtudlo siya kanato kon unsaon paghimog maayong mga desisyon, ug tabangan ta niya nga molampos dihang mohimo tag mga desisyon nga makapalipay kaniya. (Sal. 119:173) Kon atong ipadapat ang kaalam nga naa sa Pulong sa Diyos, makahimo tag mas maayong mga desisyon. (Heb. 5:14) Pero bisag makahimo tag maalamong desisyon, usahay maglisod ta pagtapos sa atong nasugdan. Tagda ni nga mga pananglitan: Ang usa ka batan-ong brader midesisyon nga basahon ang tibuok Bibliya. Nahimo niya kana sulod sa pipila ka semana, unya miundang siya. Ang usa ka sister midesisyon nga mag-regular payunir pero pirme niyang iirog ang petsa kon kanus-a siya magsugod. Ang mga ansiyano midesisyon nga i-shepherding ang mga igsoon sa kongregasyon. Pero daghang bulan na ang milabay, wala gihapon nila ni mahimo. Lainlain ni nga mga situwasyon, pero dunay bahin nga magkaparehas kining tulo. Ang mga desisyon wala bug-os maimplementar. w19.11 26 ¶1-2

Gipakasama ni Jesus ang atong panahon “sa mga adlaw ni Noe,” ug walay duhaduha nga nagkinabuhi ta sa “mga panahong lisod sagubangon.” (Mat. 24:37; 2 Tim. 3:1) Tungod niini, ang ubang magtiayon midesisyon nga dili dayon manganak aron mas dako silag panahon sa pag-alagad. Dihang magdesisyon ang magtiayon kon manganak ba sila ug kon pilay ilang gustong anak, maalamon nga ilang “kuwentahon ang gasto.” (Luc. 14:28, 29) Ang pamilyadong mga magtiayon nahibalo nga sa pagpadakog mga anak, gawas nga mogasto silag dakong kantidad, mogasto pod silag dakong panahon ug kusog. Busa importanteng hisgotan sa magtiayon ang mga pangutana nga sama niini: ‘Kinahanglan bang manarbaho ming duha aron masuportahan ang pangunang panginahanglan sa among pamilya? Nagkasinabot ba mi kon unsay among “pangunang panginahanglan”? Kon manarbaho ming duha, kinsay moatiman sa mga bata? Kinsay mag-impluwensiya sa ilang hunahuna ug binuhatan?’ Kon hisgotan sa magtiayon kining mga pangutanaha sa kalmadong paagi, ilang gipadapat ang giingon sa teksto karong adlawa. w19.12 23-24 ¶6-7

Si apostol Pablo kadaghan nakaatubang ug mga situwasyon nga nakapameligro sa iyang kinabuhi. (2 Cor. 11:23-28) Duna pod siyay “tunok sa unod” nga kinahanglang sagubangon, tingali problema sa panglawas. (2 Cor. 12:7) Ug naguol pod siya dihang ang kanhi niyang kauban nga si Demas mibiya kaniya “tungod kay gihigugma [ni Demas] ang presenteng sistema sa mga butang.” (2 Tim. 4:10) Si Pablo maoy maisogong dinihogan nga mahigugmaong nagtabang sa uban, pero may mga panahon nga nadismayar siya. (Roma 9:1, 2) Nadawat ni Pablo ang paghupay ug tabang nga iyang gikinahanglan. Sa unsang paagi? Way duhaduha, si Jehova naghupay niya pinaagi sa Iyang balaang espiritu. (2 Cor. 4:7; Filip. 4:13) Gigamit sab ni Jehova ang ubang Kristohanon sa paghupay kaniya. Si Pablo miingon nga ang ubang igsoon “nakahupay pag-ayo” kaniya. (Col. 4:11) Apil sa iyang gihisgotan si Aristarko, Tiquico, ug Marcos. Gipalig-on nila si Pablo ug gitabangan nga makalahutay. w20.01 8 ¶2-3

Gipakita ni Jesus nga imposibleng mapatin-aw sa bug-os ngadto sa dili dinihogan kon unsay bation sa usa nga ‘gipanganak pag-usab,’ o “gipanganak sa espiritu.” (Juan 3:3-8) Unsang kausaban sa panghunahuna ang mahitabo dihang dihogan ang mga Kristohanon? Sa wala pa sila dihogi, sila naglaom nga mabuhi sa walay kataposan dinhi sa yuta. Naghinamhinam sila sa panahon dihang wagtangon ni Jehova ang tanang pagkadaotan ug himoon ang yuta nga paraiso. Tingali giimadyin nila ang ilang kaugalingon nga nagsugat sa namatay nilang membro sa pamilya o higala. Pero human sila madihogi, lahi na ang ilang panghunahuna. Ngano? Dili tungod kay dili na sila ganahan sa yutan-ong paglaom. Wala mausab ang ilang hunahuna tungod sa kaguol o grabeng pag-antos. Dili pod tungod kay kalit nilang nahunahunaan nga laay ang pagkinabuhi sa walay kataposan dinhi sa yuta. Hinunoa, gigamit ni Jehova ang iyang balaang espiritu aron usbon ang ilang paagi sa paghunahuna ug ang ilang paglaom. w20.01 22 ¶9-11

Ubos sa Balaod nga gihatag sa Diyos sa Israel, dumalahon sa tinudlong mga lalaki dili lang ang may kalabotan sa espirituwal nga mga butang kondili ang sibil ug kriminal sab nga mga kaso. Pero ubos sa “balaod sa Kristo,” ang papel sa mga ansiyano mao ang pagdumala sa mga bahin nga may kalabotan sa pagsimba. (Gal. 6:2) Ilang giila nga ang sekular nga awtoridad gihatagan sa Diyos ug responsibilidad sa pagdumala sa sibil ug kriminal nga mga kaso. Apil niana ang awtoridad sa pagpahamtang ug silot sama sa multa o pagkapriso. (Roma 13:2-4) Unsay buhaton sa mga ansiyano kon dunay makahimog seryosong sala diha sa kongregasyon? Gamiton nila ang Kasulatan sa pagtimbangtimbang niana ug sa pagdesisyon. Hinumdoman nila nga gugma ang pundasyon sa balaod sa Kristo. Ang gugma magpalihok sa mga ansiyano sa pagkonsiderar niini: Unsay kinahanglang buhaton sa pagtabang kang bisan kinsa diha sa kongregasyon nga nahimong biktima sa sala? Maylabot sa nakasala, ang gugma magpalihok sa mga ansiyano sa pagkonsiderar sa mosunod: Mahinulsolon ba siya? Matabangan ba namo siya nga mahibalik sa espirituwal nga kahimsog? w19.05 7 ¶23-24

Giila ni Jesus nga ang iyang amahan mao ang Tuboran ug Tigsustento sa iyang kinabuhi dihang iyang gisulti ang mga pulong sa ibabaw. Si Jesus bug-os nga misalig sa iyang Amahan, ug si Jehova nagtagana sa iyang pisikal nga mga panginahanglan. Labaw sa tanan, giatiman ni Jehova si Jesus sa espirituwal. (Mat. 4:4) Si Jehova nagtagana sab sa atong espirituwal nga panginahanglan. Pinaagi sa iyang Pulong, iyang gipadayag ang kamatuoran bahin kaniya, sa iyang katuyoan, sa kahulogan sa kinabuhi, ug sa umaabot. Gipakitaan ta niyag personal nga pagtagad dihang nagsugod ta pagkat-on sa kamatuoran, nga naggamit sa atong ginikanan o ubang igsoon aron tudloan ta bahin kaniya. Ug padayon ta niyang gitabangan pinaagi sa mahigugmaong mga ansiyano ug sa ubang hamtong nga mga igsoon. Dugang pa, gitudloan ta ni Jehova pinaagi sa atong mga tigom, diin makakat-on ta kauban sa atong espirituwal nga pamilya. Niini ug sa uban pang paagi, gipakita ni Jehova ang iyang inamahan nga pagmahal kanatong tanan.​—Sal. 32:8. w20.02 3 ¶8; 5 ¶13

Ang kalinaw dili molambo kon tugotan nato nga motubo ang kasina. Kinahanglan natong ibton ang kasina gikan sa atong kasingkasing ug dili magtisok ug kasina diha sa uban. Unsay atong mahimo aron matabangan ang uban nga masuklan ang kasina, ug sa unsang paagi mapalambo nato ang kalinaw? Ang atong panghunahuna ug mga lihok makaimpluwensiya pag-ayo sa uban. Gusto sa kalibotan nga ‘ipasigarbo’ nato ang mga butang nga atong nabatonan. (1 Juan 2:16) Pero kana makapukaw sa kasina. Malikayan nato nga masina ang uban kon dili ta magsigeg sulti bahin sa mga butang nga atong nabatonan o giplanong paliton. Ang laing paagi nga dili ta makapukaw ug kasina mao ang pagpakitag balanseng panglantaw maylabot sa atong mga pribilehiyo sa kongregasyon. Kon magsige tag estorya bahin niini, sama rag gihimo natong tabunok ang yuta diin mahimong moturok ang kasina. Pero kon magpakita tag tinuod nga interes sa uban ug ilhon ang maayo nilang nahimo, matabangan nato sila nga mahimong kontento ug mapalambo nato ang panaghiusa ug kalinaw sa kongregasyon. w20.02 18-19 ¶15-16

Makakat-on ka bahin kang Jehova pinaagi sa iyang mga linalang. (Pin. 4:11) Pamalandonga ang kaalam ni Jehova nga klaro kaayong makita diha sa disenyo sa mga tanom ug hayop. Pagkat-og diyutay kon unsa ka katingalahan ang pagkahimo sa imong lawas. (Sal. 139:14) Ug hunahunaa kon unsa ka dakong enerhiya ang gibutang ni Jehova sa adlaw, nga kon buot hunahunaon, ang adlaw usa lang sa bilyonbilyong bituon. (Isa. 40:26) Kon imo nang himoon, molawom ang imong pagtahod kang Jehova. Pero bisag importante ang pagkahibalo nga si Jehova maalamon ug gamhanan, kinahanglan kang makakat-on ug dugang bahin kaniya aron molig-on ang imong gugma kaniya. Kinahanglang kombinsido ka nga gimahal gyod ka ni Jehova. Hinumdomi nga “kon imo siyang pangitaon, iyang itugot nga makaplagan nimo siya.” (1 Cron. 28:9) Si Jehova nag-ingon: “Ikaw akong gikabig nganhi kanako.” (Jer. 31:3) Samtang magkalawom ang imong apresasyon sa tanang gibuhat ni Jehova kanimo, magkalawom sab ang imong gugma kaniya. w20.03 4 ¶6-7

Si apostol Pablo naghatag ug maayong panig-ingnan sa pag-una sa ministeryo. Dihang didto siya sa Corinto panahon sa iyang ikaduhang misyonaryong biyahe, hapit nang mahurot ang iyang kuwarta maong nanarbaho siya ingong tighimog tolda. Nanarbaho siya para masuportahan ang kaugalingon sa ministeryo ug mapahayag ang maayong balita sa mga taga-Corinto nga “walay bayad.” (2 Cor. 11:7) Bisag kinahanglang manarbaho si Pablo, padayon niyang giuna ang ministeryo, ug magsangyaw siya panahon sa Igpapahulay. Dihang miarang-arang ang kahimtang, si Pablo nakahatag ug dugang panahon sa pagsangyaw. Siya nahimong “okupado kaayo sa pulong, nga nagpamatuod ngadto sa mga Hudiyo nga si Jesus mao ang Kristo.” (Buh. 18:3-5; 2 Cor. 11:9) Sa ulahi, dihang duha ka tuig siyang gipriso sa iyang balay sa Roma, siya mosangyaw sa mga bisita ug maghimog mga sulat. (Buh. 28:16, 30, 31) Determinado si Pablo nga dili mababagan ang iyang ministeryo. w19.04 4 ¶9