Marso

Ang atong gugma sa Diyos ug sa iyang Pulong magpalig-on nato sa pagsunod kang Jehova bisan pag ang atong mga paryente o higala, nga maayo tingalig intensiyon, mopugos nato sa pag-apil sa supak sa Bibliya nga mga kostumbre bahin sa mga patay. Basin pakaulawan ta nila, tingali moingon sila nga wala ta mahigugma o magtahod sa namatay. O kaha moingon sila nga ang mga patay magpahinabog kadaot sa mga buhi kay wala ta mosunod sa kostumbre. Sa usa ka nasod sa Caribbean, daghan ang nagtuo nga human mamatay ang tawo, ang iyang “espiritu” magpabilin ug panimaslan kadtong nagmaltratar niya. Basin “magpahinabo pa gani kinig kasamok sa komunidad,” matod sa usa ka reperensiya. Kostumbre sa Africa nga tabonan ang mga samin diha sa balay sa namatay ug ipaatubang sa bungbong ang ilang letrato. Ngano? Ang uban nag-ingon nga kinahanglang dili makita sa mga patay ang ilang kaugalingon! Ingong mga alagad ni Jehova, dili gyod ta motuo sa mga patuotuo o mag-apil-apil sa mga kostumbre nga nagpasiugda sa mga bakak ni Satanas!​—1 Cor. 10:21, 22. w19.04 16 ¶11-12

Si Jesus nagtudlog mga prinsipyo nga makatabang sa iyang mga sumusunod sa pagtratar nga patas sa usag usa. Pananglitan, hunahunaa ang Bulawanong Lagda. Gusto natong tanan nga trataron nga patas. Busa, kinahanglang patas pod ang atong pagtratar sa uban. Kon buhaton nato kana, basin mapalihok sila sa pagtratar kanato sa samang paagi. Pero, komosta kon nakasinati tag inhustisya? Gitudloan usab ni Jesus ang iyang mga sumusunod sa pagsalig nga “hatagan [ni Jehova] ug hustisya [kadtong] nagatuaw kaniya adlaw ug gabii.” (Luc. 18:6, 7) Usa kana ka saad: Ang atong makataronganon nga Diyos nahibalo sa mga pagsulay nga atong giatubang niining kataposang mga adlaw, ug hatagan ta niyag hustisya sa iyang gitakdang panahon. (2 Tes. 1:6) Kon sundon nato ang mga prinsipyo nga gitudlo ni Jesus, atong trataron ang uban sa patas nga paagi. Ug kon nag-antos tag inhustisya niining kalibotan ni Satanas, mahupayan ta sa pagkahibalo nga hatagan ta ni Jehova ug hustisya. w19.05 5 ¶18-19

Estudyante ka ba? Tingali ang tanan nimong klasmet nagtuo ug ebolusyon. Gusto nimong depensahan ang pagtulon-an sa Bibliya, pero gibati tingali nimo nga dili ka makahimo niana. Busa, kinahanglan kang magtuon! Duha ang imong tumong: (1) aron molig-on ang imong pagtuo nga gilalang sa Diyos ang tanang butang ug (2) aron mouswag ang imong katakos sa pagdepensa sa kamatuoran. (Roma 1:20) Tingali pangutan-on una nimo ang kaugalingon, ‘Nganong nagtuo ug ebolusyon ang akong mga klasmet?’ Dayon pag-research bahin ana diha sa atong mga publikasyon. Maamgohan nimo nga dili ingon ana ka lisod ang pagdepensa sa imong pagtuo. Kadaghanan nagtuo ug ebolusyon tungod lang kay dunay tawo nga gitahod nila nga nag-ingong tinuod nâ. Kon duna kay ikasulti nga usa o duha ka punto, mahimong matubag nimo ang pangutana niadtong sinserong nangita sa kamatuoran.​—Col. 4:6. w19.05 29 ¶13

Dihang si propetang Elias miikyas kay nameligro ang iyang kinabuhi, siya naguol pag-ayo nga gusto na niyang mamatay. Gipadala ni Jehova ang usa ka gamhanang anghel aron bisitahon siya. Ang anghel naghatag niyag praktikal kaayo nga tabang. Iyang gihatagan si Elias ug init nga pagkaon ug mabinationg giingnan nga mokaon. (1 Hari 19:5-8) Gipakita niana nga asoy ang importanteng kamatuoran: Usahay ang simpleng butang nga atong himoon dakog ikatabang. Ikapakita nato nga gimahal nato ang atong igsoon nga nag-antos kon duna tay himoon para niya. Pananglitan, puwede nato siyang lutoan o hatagag regalo o kard nga may makapadasig nga mga pulong. Kon malisdan ta sa pagpakig-estorya sa igsoon bahin sa iyang personal o sakit nga kasinatian, makahatag gihapon tag praktikal nga tabang. Gitabangan ni Jehova si Elias sa milagrosong paagi aron makabaktas ug layo kaayo hangtod sa Bukid sa Horeb, diin dili na gyod siya maabtan niadtong gustong mopatay niya. Unsay atong makat-onan niini? Kon gusto natong hupayon ang mga biktima sa pag-abuso, kinahanglan tingaling tabangan una nato sila nga mobating luwas, diha man sa ilang balay o sa Kingdom Hall. w19.05 16 ¶11; 17 ¶13-14

Ibutang ta nga nagbasa ka sa kapitulo 12 sa Zacarias, nga nagtagna bahin sa kamatayon sa Mesiyas. (Zac. 12:10) Pag-abot sa bersikulo 12, imong nabasa nga “ang banay sa panimalay ni Natan” motiyabaw tungod sa kamatayon sa Mesiyas. Imbes palabyon lang ang maong detalye, pangutan-a una ang kaugalingon: ‘Unsay koneksiyon sa panimalay ni Natan ug sa Mesiyas?’ Aw, pag-research. Makita nimo sa marginal reference ang 2 Samuel 5:13, 14, diin imong masayran nga si Natan usa sa mga anak ni Haring David. Gipakita sa laing marginal reference, ang Lucas 3:23, 31, nga si Jesus kaliwat ni Natan pinaagi kang Maria. Mainteres dayon ka! Nahibalo ka nga si Jesus gitagna nga maggikan sa panimalay ni David. (Mat. 22:42) Pero kapin sa 20 ang anak nga lalaki ni David. Busa makapahingangha gyod nga partikular nga gihisgotan ni Zacarias ang panimalay ni Natan ingong dunay rason nga motiyabaw tungod sa kamatayon ni Jesus. w19.05 30 ¶17

Unsay kinahanglan natong buhaton? Pinaagi sa regular nga pagtuon, atong mapamatud-an sa atong kaugalingon ang mga kamatuoran nga atong nakat-onan sa Bibliya. Ug makaseguro ta nga husto ang mga sukdanan ni Jehova. Dayon, mahisama ta sa kahoy nga nakagamot pag-ayo, “lig-on” diha sa pagtuo. (Col. 2:6, 7) Hinumdomi, walay laing makahimo sa pagpalig-on sa imong pagtuo gawas kanimo, busa padayon sa pagbag-o sa imong panghunahuna. Pag-ampo pirme ug pangayoa ang tabang sa espiritu ni Jehova. Pamalandong pag-ayo ug padayong susiha ang imong hunahuna ug mga motibo. Pangitag maayong mga higala nga makatabang nimo sa pagbag-o sa imong panghunahuna. Pinaagi niana, imong masuklan ang makadaot nga epekto sa kalibotan ni Satanas ug molampos ka sa pagpukan sa ‘mga pangatarongan ug tanang tag-as nga butang nga batok sa kahibalo sa Diyos.’​—2 Cor. 10:5. w19.06 13 ¶17-18

Sama ni Ruth nga miunong sa biyudang si Noemi, kinahanglang padayon natong tabangan kadtong namatyag minahal. (Ruth 1:16, 17) Si Paula miingon: “Pagkamatay gyod sa akong bana, daghan ang mitabang nako. Paglabay sa panahon, na-busy na sila sa ilang adlaw-adlawng buluhaton. Pero nausab na pag-ayo ang akong kinabuhi. Busa makatabang gyod kon makaamgo ang uban nga ang tawong namatyan nanginahanglag tabang sulod sa daghang bulan o daghang tuig pa gani.” Siyempre, lainlain ang tawo. Naay dali rang makaadyas. Pero para sa uban, matag higayon nga himoon nila ang ilang ginahimo kaniadto uban sa ilang minahal, mahinumdom sila sa nahitabo. Lainlain ang paagi sa pagbangotan sa matag tawo. Atong hinumdoman nga si Jehova naghatag natog pribilehiyo ug responsibilidad nga atimanon kadtong namatyag kapikas. w19.06 24 ¶16

Panahon sa pagdili, kinahanglang mahibalo ta kon kanus-a ang “panahon sa paghilom.” (Eccl. 3:7) Angay natong protektahan ang mga impormasyon nga dili angayng ipahibalo, sama sa ngalan sa atong mga igsoon, dapit diin magtigom, paagi sa pagsangyaw, ug paagi sa pagdawat ug espirituwal nga pagkaon. Dili nato ni ipahibalo sa mga awtoridad; dili sab nato ni isulti sa atong mga higala o paryente diha sa atong nasod o sa ubang nasod. Kon ato ning ipahibalo, gipameligro nato ang atong mga igsoon. Ayawg tugoti nga mabahinbahin ta tungod sa ginagmayng problema. Si Satanas nahibalo nga ang nabahin nga pamilya dili makabarog. (Mar. 3:24, 25) Dili siya moundang sa iyang paningkamot nga magkabahinbahin ta. Gusto niya nga mag-awayay ta imbes makig-away ta niya. Bisan ang hamtong nga mga Kristohanon kinahanglang magbantay niini. Kon maningkamot ta nga mahusay ang mga dili pagsinabtanay, malikayan nato nga magkabahinbahin.​—Col. 3:13, 14. w19.07 11-12 ¶14-16

Sagad, ang mga tawo modawat sa atong mensahe, dili tungod sa kon unsay atong isulti, kondili sa paagi sa atong pagsulti niana. Maapresyar nila kini kon kita buotan, matinahoron, ug tinuod nga interesado kanila. Dili nato sila pugson sa pagpaminaw sa atong isulti. Hinunoa, maningkamot ta nga masabtan ang mga rason sa ilang opinyon bahin sa relihiyon ug maningkamot ta nga masabtan ang ilang gibati. Pananglitan, dihang nakig-estorya si Pablo sa mga Hudiyo, siya nangatarongan gamit ang Kasulatan. Pero, sa dihang nakig-estorya siya sa intelektuwal nga mga Grego sa Areopago, wala siya moingon nga gikan sa Bibliya ang iyang gisulti. (Buh. 17:2, 3, 22-31) Unsaon nato pagsundog si Pablo? Kon makahibalag kag tawo nga dili motuog Bibliya, mas maayo tingali nga dili nimo isulti nga gikan sa Bibliya ang imong giingon. Kon mamatikdan nimo nga dili niya gustong makit-an nga gipabasa siyag Bibliya, sulayi ang dili kaayo mamatikdang paagi, sama sa pagpabasa niya diha sa gadyet. w19.07 21 ¶5-6

Gitental ni Satanas ang mga Israelinhon sa pagsimbag diyosdiyos pinaagi sa iyang pagpahimulos sa ilang panginahanglag pagkaon. Dihang misulod ang mga Israelinhon sa Yutang Saad, kinahanglang usbon nila ang ilang mga paagi sa pagpanguma. Didto sa Ehipto, gigamit sa mga Israelinhon ang tubig sa Nilo aron matubigan ang ilang kaumahan. Pero walay dakong suba sa Yutang Saad, maong mag-agad sila sa ulan ug yamog aron motubo ang ilang mga tanom. (Deut. 11:10-15; Isa. 18:4, 5) Busa, kinahanglang makakat-on ang mga Israelinhon ug bag-ong mga paagi sa pagpanguma. Pero nganong nagpasidaan si Jehova batok sa pagsimbag mga diyosdiyos nga naghisgot man unta siya bahin sa bag-ong mga paagi sa pagpanguma? Nahibalo si Jehova nga ang iyang katawhan matental sa pagduol sa paganong mga tawo sa ilang palibot aron makakat-og mga paagi sa pagpanguma ug nga ang panghunahuna sa mga mag-uuma sa Canaan naimpluwensiyahan sa ilang pagtuo kang Baal.​—Num. 25:3, 5; Maghu. 2:13; 1 Hari 18:18. w19.06 3 ¶4-6

Pag-abot ni apostol Pablo, Silas, Lucas, ug Timoteo sa Filipos, nga kolonya sa Roma, daghan ang interesado sa mensahe sa Gingharian. Kining upat ka madasigong igsoon mitabang sa pagtukod ug kongregasyon, ug ang tanang bag-ong tinun-an nagsugod sa pagtigom, lagmit diha sa balay sa maabiabihong magtutuo nga si Lydia. (Buh. 16:40) Kining bag-ong kongregasyon nakasinati dayog kalisdanan. Giaghat ni Satanas ang mga kaaway sa kamatuoran aron babagan ang pagsangyaw niining maunongong mga Kristohanon. Si Pablo ug Silas gidakop, gibunalan, ug gibilanggo. Human sila buhii, gibisita nila ang bag-ong mga tinun-an ug gidasig sila. Dayon si Pablo, Silas, ug Timoteo mibiya sa siyudad samtang si Lucas dayag nga nagpabilin didto. Unsay gibuhat sa bag-ong natukod nga kongregasyon? Sa tabang sa espiritu ni Jehova, ang bag-ong mga tinun-an nagpadayon sa pag-alagad nga madasigon. (Filip. 2:12) Duna gyoy maayong rason si Pablo nga ipasigarbo sila! w19.08 8 ¶1-2

Bag-o ra ba kang mibalhin? Posibleng dakog galastohan ang pagbalhin, ug dali ra tingaling magkautang-utang. Busa aron dili ka maputos sa utang, ayaw pangutang aron mopalit ug mga butang nga wala gyod nimo kinahanglana. (Prov. 22:3) Kon naa tay problema, sama pananglitan dihang mag-atiman ta sa masakiton nga mga minahal, basin malisdan ta sa pagdesisyon kon pilay utangon. Sa maong mga situwasyon, hinumdomi nga ang “pag-ampo ug pangamuyo” makatabang nimo sa paghimog maalamong mga desisyon. Agig tubag sa imong mga pag-ampo, mahimong ihatag ni Jehova kanimo ang kalinaw nga ‘magbantay sa imong kasingkasing ug hunahuna,’ nga makatabang nimo sa pagpabiling kalmado aron makahunahuna ka kon unsay kinamaayohang buhaton. (Filip. 4:6, 7; 1 Ped. 5:7) Pakigsuod sa maayong mga higala. Isulti ang imong gibati ug mga eksperyensiya ngadto sa maayong mga higala, ilabina niadtong parehas nimog gibating kalipay ug kalisdanan. Mahimong makatabang ni nga moarang-arang ang imong gibati. (Eccl. 4:9, 10) Ang mga nahigala nimo sa wala pa ka mibalhin higala gihapon nimo. w19.08 22 ¶9-10

Nganong ang pangataposang dakong gubat gikonektar ni Jehova sa Megido? Tungod kay daghang gubat ang nahitabo sa Megido ug sa duol niini nga Walog sa Jezreel. Usahay, direktang mangilabot si Jehova sa maong mga gubat. Pananglitan, sa “daplin sa katubigan sa Megido,” gitabangan sa Diyos ang Israelinhong maghuhukom nga si Barak sa pagpildi sa Canaanhong kasundalohan nga gipangunahan sa usa ka pangulo, si Sisera. Si Barak ug ang propetang si Debora nagpasalamat kang Jehova sa ilang milagrosong kadaogan. Sila miawit: “Gikan sa langit ang mga bituon nakiggubat . . . kang Sisera. . . . Busa malaglag unta ang tanan nimong kaaway, Oh Jehova, apan kadtong mga nahigugma nimo mahisama unta sa adlaw nga misubang ug misidlak.” (Maghu. 5:19-21, 31) Sa Armagedon, ang mga kaaway sa Diyos malaglag sab, pero kadtong nahigugma sa Diyos maluwas. Pero dunay usa ka importanteng kalainan kining duha ka gubat. Sa Armagedon, ang katawhan sa Diyos dili makig-away. Dili gani sila maghupot ug armas! Mahimo silang kusgan pinaagi sa pagpabiling kalmado ug pagsalig kang Jehova ug sa iyang langitnong kasundalohan.​—Isa. 30:15; Pin. 19:11-15. w19.09 9 ¶4-5

Ang usa ka paagi sa pagduol kang Jesus mao ang pagpaningkamot pag-ayo nga makakat-on bahin sa mga butang nga iyang gisulti ug gibuhat. (Luc. 1:1-4) Walay laing makahimo niana para kanato​—responsibilidad nato nga tun-an kini nga mga asoy. Makaduol sab ta kang Jesus pinaagi sa pagdesisyon nga magpabawtismo ug mahimong tinun-an sa Kristo. Ang laing paagi sa pagduol kang Jesus mao ang pagduol sa mga ansiyano kon nanginahanglan tag tabang. Si Jesus naggamit niining “gasa nga mga lalaki” sa pag-atiman sa iyang mga karnero. (Efe. 4:7, 8, 11; Juan 21:16; 1 Ped. 5:1-3) Kinahanglang molihok ta aron mangayog tabang. Dili ta makadahom nga ang mga ansiyano makabasa sa atong hunahuna ug mahibalo sa atong mga panginahanglan. Tagda ang giingon sa brader nga si Julian: “Nangayo kog tabang, ug ang maong pagduaw maoy usa sa kinamaayohang regalo nga akong nadawat.” Ang maunongong mga ansiyano, sama niadtong duha nga miduaw kang Julian, makatabang nato nga mahibalo sa “panghunahuna sa Kristo,” buot ingnon, masabtan ug masundog ang iyang panghunahuna ug pagbati. (1 Cor. 2:16; 1 Ped. 2:21) Usa gyod ni sa kinamaayohang mga regalo nga mahatag nila kanato. w19.09 21 ¶4-5

Sa tibuok Kasulatan, atong mabasa ang matinumanong mga lalaki ug babaye nga gigiyahan sa balaang espiritu; pero dili sila apil sa 144,000. Usa kanila mao si Juan nga Tigbawtismo. (Mat. 11:11) Ang lain pa mao si David. (Buh. 2:34) Sila ug ang daghang uban pa banhawon aron mabuhi sa paraisong yuta. Silang tanan​—apil ang dakong panon—​duna unyay kahigayonan sa pagpakita sa ilang pagkamaunongon kang Jehova ug sa iyang pagkasoberano. Karon pa lang nahitabo sa kasaysayan nga gihiusa sa Diyos ang milyonmilyong tawo gikan sa tanang kanasoran. Sa langit man o sa yuta ang atong paglaom, kinahanglang tabangan nato ang pinakadaghan nga atong maarangan nga mahimong bahin sa dakong panon sa “ubang mga karnero.” Sa dili madugay, ipahinabo na ni Jehova ang gitagna nga dakong kasakitan nga maglaglag sa mga gobyerno ug relihiyon nga grabeng nagpaantos sa mga tawo. Pagkatalagsaon unya sa pribilehiyo niadtong sakop sa dakong panon​—ang pag-alagad kang Jehova sa yuta hangtod sa hangtod!​—Pin. 7:14. w19.09 31 ¶18-19

Samtang magkaduol ang kataposan sa sistema ni Satanas, makadahom ta nga makasinati tag mas lisod nga mga pagsulay sa atong pagkamaunongon sa Diyos ug sa iyang Gingharian. Lagmit padayon tang biaybiayon sa mga tawo. Ilabinang mahitabo ni kay wala ta mosuportar sa bisan unsang bahin sa kalibotan ni Satanas. Kinahanglan natong palig-onon ang atong pagkamaunongon karon aron makapabilin tang maunongon panahon sa dakong kasakitan. Panahon sa dakong kasakitan, dunay mahitabong kausaban maylabot sa mga brader nga nagapanguna dinhi sa yuta. Moabot ang panahon nga ang tanang dinihogan nga nia pa sa yuta moadto na sa langit aron moapil sa gubat sa Armagedon. (Mat. 24:31; Pin. 2:26, 27) Nagpasabot ni nga dili na nato kauban sa yuta ang Nagamandong Lawas. Pero ang dakong panon magpabiling organisado. Ang kuwalipikadong mga brader nga membro sa ubang mga karnero maoy manguna. Kinahanglan natong ipakita ang atong pagkamaunongon pinaagi sa pagsuportar niini nga mga brader ug pagsunod sa instruksiyon nga gihatag sa Diyos kanila. Magdepende niana ang atong kaluwasan! w19.10 17 ¶13-14

Si Noemi maoy maunongong babaye nga nahigugma kang Jehova. Apan human mamatay ang iyang bana ug duha ka anak, gusto niya nga ang iyang ngalan ilisag “Mara,” nga nagkahulogang “Pait.” (Ruth 1:3, 5, 20, footnote, 21) Ang umagad ni Noemi nga si Ruth miunong niya panahon sa iyang kalisdanan. Gawas sa paghatag ug praktikal nga tabang, gisultihan sab ni Ruth si Noemi ug makapahupayng mga pulong. Gipahayag ni Ruth ang iyang gugma ug pagsuportar kang Noemi sa simple ug sinserong mga pulong. Dihang ang membro sa atong espirituwal nga pamilya mamatyag kapikas, siya nagkinahanglan sa atong tabang. Ang magtiayon ikatandi sa duha ka kahoy nga nagtapad ug tubo. Paglabay sa panahon, ang mga gamot niini maglambod. Dihang maluka ug mamatay ang usa ka kahoy, grabeng maapektohan ang tapad niini nga kahoy. Sa susama, dihang ang usa mamatyag kapikas, siya maguol pag-ayo sa taas nga panahon. w19.06 23 ¶12-13

Angay tang mag-amping dili lang sa pagpilig klase sa kalingawan kondili sa gidaghanon sab sa panahon nga atong gigahin niana. Kay kon dili, mas daghang panahon ang magamit sa paglingawlingaw kay sa pag-alagad kang Jehova. Ang unang buhaton mao ang pagsusi kon unsa gyod ka daghang panahon ang imong gigugol niana. Sulayi kana pagrekord sulod sa usa ka semana. Isulat sa kalendaryo kon pila ka oras kang nagtan-awg TV, nag-Internet, ug nagdula diha sa imong gadyet. Kon gibati nimo nga daghan na kaayong panahon ang imong gigugol niana, sulayi ang paghimog eskedyul. Unahag eskedyul ang mas importanteng mga butang, ug dayon paggahin ug panahon para sa kalingawan. Sunod, hangyoa si Jehova nga tabangan ka nga masunod ang imong eskedyul. Nianang paagiha, makagahin kag panahon ug kusog para sa personal nga pagtuon sa Bibliya, pamilyahanong pagsimba, pagtambong sa mga tigom, ug pag-alagad kang Jehova diha sa kanataran. Ug mas malipay ka sa imong paglingawlingaw kay giuna nimo si Jehova. w19.10 30 ¶14, 16; 31 ¶17

Niadtong mga 55 C.E., ang mga taga-Corinto mihimog importanteng desisyon. Dihang nahibaloan nila ang panginahanglan sa ilang mga igsoon sa Jerusalem ug Judea, sila nangolektag kuwarta aron itabang kanila. (1 Cor. 16:1; 2 Cor. 8:6) Pero paglabay sa pipila ka bulan, nahibaloan ni apostol Pablo nga wala pa makahatag ang mga taga-Corinto sa donasyon nga ilang gisaad. Busa ang ilang gasa basig dili maapil pagdala sa Jerusalem kauban sa donasyon sa ubang kongregasyon. (2 Cor. 9:4, 5) Maayo ang nahimong desisyon sa mga taga-Corinto, ug gidayeg sila ni Pablo tungod sa ilang lig-ong pagtuo ug sa ilang tinguha nga mahimong mahinatagon. Pero gidasig sab niya sila nga taposon ang ilang nasugdan. (2 Cor. 8:7, 10, 11) Ang ilang kasinatian nagtudlo kanato nga bisan ang matinumanong mga Kristohanon maglisod tingali sa pag-implementar sa usa ka maayong desisyon. Ngano? Tungod kay dili ta hingpit, basig mag-unyaunya ta. O kaha malisdan ta sa pag-implementar sa atong desisyon tungod sa wala damhang mga panghitabo.​—Eccl. 9:11. w19.11 26-27 ¶3-5

Samag dakong taming nga manalipod sa dakong bahin sa lawas, ang imong pagtuo manalipod nimo batok sa imoral, bayolente, ug dili diyosnong mga impluwensiya niining daotang sistema sa mga butang. Ingong mga Kristohanon, kita may espirituwal nga pagpakiggubat ug apil sa atong mga kaaway ang daotang mga espiritu. (Efe. 6:10-12) Unsaon nimo pagseguro nga andam kang moatubang sa mga pagsulay? Una, kinahanglang mangayo kag tabang sa Diyos. Dayon, kinahanglan nimong gamiton ang Pulong sa Diyos aron matabangan ka sa paglantaw sa imong kaugalingon sama sa paglantaw ni Jehova kanimo. (Heb. 4:12) Ang Bibliya nag-ingon: “Salig kang Jehova sa bug-os nimong kasingkasing, ug ayawg salig sa kaugalingon nimong pagsabot.” (Prov. 3:5, 6) Karon, hunahunaa ang pipila sa mga desisyon nga bag-o pa nimong gihimo. Pananglitan, nakaatubang ka bag grabeng kalisod sa pinansiyal? Nahinumdoman ba nimo ang saad ni Jehova sa Hebreohanon 13:5: “Dili gyod ka nako biyaan, ug dili gyod ka nako talikdan”? Nakahatag ba nâ nimog kompiyansa nga tabangan ka ni Jehova? Kon mao, nagpakita kana nga giatiman nimo ang imong taming sa pagtuo. w19.11 14 ¶1, 4

Ang bata nagkinahanglag dakong panahon ug kusog sa iyang amahan ug sa iyang inahan, ug angay siyang hatagan niini. Busa kon sunodsunod ang mga anak sa magtiayon, basin maglisod silag hatag sa atensiyon nga gikinahanglan sa kada usa sa ilang mga anak. Ang ubang magtiayon nga ubay-ubay ang gagmayng anak miingon nga nabug-atan sila. Ang inahan pirme tingaling kapoyon. Tingali wala na siyay kusog para sa pagtuon, pag-ampo, ug pagsangyaw nga regular. Tingali dili na pod kaayo siya makapaminaw ug makabenepisyo sa mga tigom. Siyempre, ang mahigugmaong bana maningkamot sa pagtabang sa iyang asawa nga maatiman ang ilang mga anak diha sa tigomanan ug sa balay. Pananglitan, iya tingaling tabangan ang iyang asawa sa mga trabahoon sa balay. Seguroon niya nga ang tanan makabenepisyo sa regular nga pamilyahanong pagsimba. Ug regular siyang mosangyaw uban sa iyang pamilya. w19.12 24 ¶8

Sa unsang paagi nakabenepisyo ang mga Israelinhon sa tuig sa Pagsadya? Aw, ibutang ta nga ang usa ka Israelinhon nakautang, maong napugos siya pagbaligya sa iyang yuta aron mabayran kini. Sa tuig sa Pagsadya, ang yuta iuli kaniya. Busa ang tawo ‘makabalik sa iyang yuta,’ ug sa ulahi mapanunod sa iyang mga anak kanang yutaa. Sa laing kahimtang, ang usa ka tawo nga magkalisodlisod mapugos tingali sa pagbaligya sa iyang anak​—o bisan sa iyang kaugalingon—​sa pagkaulipon aron makabayad sa iyang utang. Sa tuig sa Pagsadya, ang ulipon “mouli sa iyang pamilya.” (Lev. 25:10) Walay usa nga mahimong ulipon hangtod sa hangtod, nga wala nay paglaom! Dugang pa, si Jehova miingon: “Walay mahimong pobre ninyo, kay panalanginan gyod mo ni Jehova sa yuta nga ihatag ni Jehova nga inyong Diyos ingong inyong panulondon.” (Deut. 15:4) Lahi gyod kana sa nagakahitabo sa kalibotan karon, diin ang mga dato mosamot ka dato ug ang pobre mosamot ka pobre! w19.12 8-9 ¶3-4

Dihang nag-atubang si Jesus ug mga pagsulay, siya miampo “sa kusog nga tingog nga inubanag mga luha.” (Heb. 5:7) Ang iyang sinserong mga pag-ampo naggikan sa maunongong kasingkasing ug kini nakapalig-on sa iyang tinguha nga magpabiling matinumanon. Para kang Jehova, ang mga pag-ampo ni Jesus samag alimyon sa humot nga insenso. Ang tibuok kinabuhi ni Jesus sa yuta nakapahimuot pag-ayo sa iyang Amahan ug nagbindikar sa Iyang pagkasoberano. Atong masundog si Jesus pinaagi sa paghimo sa atong maarangan sa pagsunod kang Jehova ug pag-unong Kaniya. Dihang makaatubag mga pagsulay, kinasingkasing tang mangayog tabang kang Jehova kay gusto natong pahimut-an siya. Nahibalo ta nga dili dawaton ni Jehova ang atong mga pag-ampo kon nagbuhat ta sa mga butang nga iyang gidumtan. Pero kon nagsunod ta sa mga sukdanan ni Jehova, makaseguro ta nga ang atong kinasingkasing nga mga pag-ampo mahisamag humot nga insenso para kang Jehova. Makaseguro sab ta nga ang atong pagkamatinumanon ug pagkamaunongon makapahimuot sa atong langitnong Amahan. w19.11 21-22 ¶7-8

Niadtong 1919, gitudlo ni Jesus ang gamayng grupo sa dinihogang mga brader ingong “matinumanon ug maalamong ulipon.” Kini nga ulipon nanguna sa buluhatong pagsangyaw ug naghatag sa mga sumusunod sa Kristo ug “pagkaon sa hustong panahon.” Si Satanas ug ang iyang kalibotan naningkamot sa pagpahunong sa buluhaton sa matinumanong ulipon. Kon wala pa ang tabang ni Jehova, imposibleng mahimo sa ulipon ang maong buluhaton. Bisan pa sa duha ka dagkong gubat sa kalibotan, way hunong nga paglutos, tibuok kalibotang kalisod sa ekonomiya, ug inhustisya, ang matinumanon ug maalamong ulipon padayong nagtaganag espirituwal nga pagkaon para sa mga sumusunod sa Kristo sa yuta. Hunahunaa kon unsa ka daghan ang espirituwal nga pagkaon nga libreng mabatonan karon sa kapig 900 ka pinulongan! Kini maoy klarong ebidensiya sa pagsuportar ni Jehova. Konsideraha ang laing ebidensiya sa panalangin sa Diyos: ang buluhatong pagsangyaw. Sa pagkatinuod, ang maayong balita ginasangyaw “sa tibuok yuta.”​—Mat. 24:14. w19.11 24 ¶15-16

Sa tinuig nga Adlaw sa Pagtabon sa Sala, kinahanglang magsunog ang hataas nga saserdote ug insenso una pa siya makatanyag ug mga halad. Nianang paagiha, iyang maseguro nga mabatonan niya ang pag-uyon sa Diyos dihang maghalad siya. Sa dinhi pa si Jesus sa yuta, may importanteng butang nga kinahanglan niyang himoon una pa niya ikahalad ang iyang kinabuhi. Mas importante pa kana kay sa pagtaganag kaluwasan sa katawhan. Unsa kana? Si Jesus kinahanglang magmaunongon kang Jehova sa tibuok niyang kinabuhi sa yuta aron dawaton ni Jehova ang iyang halad. Nianang paagiha, mapamatud-an ni Jesus nga ang pagsunod kang Jehova mao ang hustong paagi sa pagkinabuhi. Iyang mabindikar ang pagkasoberano, o paagi sa pagmando, sa iyang Amahan. Sa tibuok kinabuhi ni Jesus sa yuta, gisunod gayod niya ang matarong nga mga sukdanan ni Jehova. Walay tentasyon o pagsulay ang makapaluya sa iyang tinguha sa pagdepensa sa paagi sa pagmando sa iyang Amahan.​—Filip. 2:8. w19.11 21 ¶6-7

Sa tibuok ministeryo ni Jesus, ang matinumanong mga apostoles napamatud-ang tinuod nga mga higala. (Prov. 18:24) Gipabilhan sila pag-ayo ni Jesus. Panahon sa iyang ministeryo, walay bisan usa sa iyang mga igsoon sa unod ang mituo kaniya. (Juan 7:3-5) Sa usa ka higayon, nagtuo pa gani ang iyang mga paryente nga nabuang na siya. (Mar. 3:21) Sa laing bahin, si Jesus makaingon sa mga pulong sa teksto niining adlawa ngadto sa iyang matinumanong mga apostoles sa gabii una sa iyang kamatayon. May mga higayon nga nadismayar si Jesus sa iyang mga apostoles, pero wala siya magpokus sa ilang kasaypanan ug nakita niya ang ilang pagsalig kaniya. (Mat. 26:40; Mar. 10:13, 14; Juan 6:66-69) Sa gabii una siya mamatay, giingnan ni Jesus kining matinumanong mga sumusunod: “Gitawag ko kamong mga higala, tungod kay ang tanang butang nga akong nadungog gikan sa akong Amahan gipahibalo ko kaninyo.” (Juan 15:15) Walay duhaduha, ang mga higala ni Jesus nakadasig gyod kaniya. w19.04 11 ¶11-12

Unsaon pagkahibalo sa usa nga siya gidapit nga moadto sa langit? Ang tubag klarong makita diha sa giingon ni apostol Pablo sa mga taga-Roma nga “gitawag aron mahimong mga balaan.” Dugang sa iyang giingon sa teksto niining adlawa, siya miingon kanila: “Kamo wala makadawat ug espiritu sa pagkaulipon aron mahadlok mo pag-usab, apan kamo nakadawat sa espiritu nga nagsagop ninyo ingong mga anak, nga pinaagi niining espirituha kita nagatawag: ‘Abba, Amahan!’” (Roma 1:7; 8:15) Busa pinaagi sa iyang balaang espiritu, klarong ipaila sa Diyos sa mga dinihogan nga sila gidapit nga moadto sa langit. (1 Tes. 2:12) Paneguroon ni Jehova nga kadtong makadawat sa iyang imbitasyon nga moadto sa langit walay pagduhaduha diha sa ilang hunahuna ug kasingkasing. (1 Juan 2:20, 27) Ang mga dinihogan wala magkinahanglag kompirmasyon gikan sa uban nga sila dinihogan. w20.01 22 ¶7-8

“Ang balaod sa Kristo” gibase sa kinamaayohang pundasyon​—ang gugma. (Gal. 6:2) Ang tanang gibuhat ni Jesus gipalihok sa gugma. Ang kaluoy maoy usa ka pamatuod sa gugma. Tungod sa maong kaluoy, gitudloan ni Jesus ang katawhan, giayo ang mga masakiton, gipakaon ang mga gigutom, ug gibanhaw ang mga patay. (Mat. 14:14; 15:32-38; Mar. 6:34; Luc. 7:11-15) Kinabubut-ong giuna ni Jesus ang panginahanglan sa uban. Labaw sa tanan, nagpakita siyag dakong gugma pinaagi sa paghalad sa iyang kinabuhi. Masundog nato si Jesus kon unahon nato ang panginahanglan sa uban. Masundog sab nato siya kon maningkamot ta sa pagpakitag kaluoy sa mga tawo diha sa atong teritoryo. Dihang ang maong kaluoy magpalihok nato sa pagsangyaw ug pagtudlo sa maayong balita, atong gisunod ang balaod sa Kristo. w19.05 4 ¶8-10

Gitabangan ni Jesus ang mga tawo nga mahigawas sa sayop nga mga pagtulon-an sa mga lider sa relihiyon. Daghang Hudiyo kaniadto ang naulipon sa mga tradisyon ug sayop nga mga pagtulon-an. (Mat. 5:31-37; 15:1-11) Kadtong nag-angkong espirituwal nga mga tiggiya samag mga buta. Kay ilang gisalikway ang Mesiyas ug ang espirituwal nga kahayag nga iyang gitanyag, sila nagpabilin sa kangitngit ug sala. (Juan 9:1, 14-16, 35-41) Pinaagi sa pagtudlo sa kamatuoran ug paghatag ug maayong ehemplo, gipakita ni Jesus sa mapainubsanong mga tawo kon sa unsang paagi mahigawas sila sa bakak nga mga pagtulon-an. (Mar. 1:22; 2:23–3:5) Dugang pa, gipaposible ni Jesus nga ang mga tawo mahigawas sa pagkaulipon sa napanunod nga sala. Pinasukad sa halad ni Jesus, mahimong pasayloon sa Diyos ang mga sala niadtong nagpakitag pagtuo ug nagdawat sa lukat nga Iyang gitagana.​—Heb. 10:12-18. w19.12 10 ¶8; 11 ¶10-11

Gigamit ni Jehova ang iyang balaang espiritu aron klarong ipaila ngadto sa tanang dinihogang Kristohanon nga gipili niya sila. Niining paagiha, ang balaang espiritu gihatag kanila ingong “timaan [garantiya]” aron pasaligan sila nga sa umaabot sila mabuhi sa walay kataposan didto sa langit ug dili sa yuta. (2 Cor. 1:21, 22) Kon mahimong dinihogan ang usa ka Kristohanon, segurado na ba nga moadto siya sa langit? Dili. Segurado siya nga gipili siya nga moadto sa langit. Pero angay niyang hinumdoman kini nga tambag: “Mga igsoon, pagkugi pa gyod mo aron maseguro ninyo ang inyong pagkatinawag ug pagkapinili, kay kon padayon mong mohimo niini dili gyod mo mapakyas.” (2 Ped. 1:10) Busa bisan pag ang usa ka dinihogan gitawag aron moadto sa langit, madawat lang niya ang iyang ganti kon magpabilin siyang matinumanon.​—Filip. 3:12-14; Heb. 3:1; Pin. 2:10. w20.01 21-22 ¶5-6

Ang usa ka rason kon nganong ang tulo ka dili tinuod nga higala ni Job walay pagbati kaniya mao, wala nila sabta kon unsa gyoy nahitabo kaniya. Kini ang hinungdan nga nakahimo silag sayop nga konklusyon ug gihukman siya. Unsay atong himoon aron dili ta makahimo niana nga sayop? Angay natong masabtan nga si Jehova lang ang nahibalo sa tanan bahin sa kahimtang sa usa ka tawo. Paminawa pag-ayo ang isulti sa tawong nag-antos. Pero dili lang kana, paningkamoti nga bation nimo ang iyang kasakit. Nianang paagiha lang nga makapakita kag tinuod nga pagkamabination sa igsoon. Ang pagkamabination magpugong nato sa pagpakaylap ug makadaot nga tabi bahin sa mga problema nga giatubang sa uban. Ang manabi dili makapalig-on sa kongregasyon; siya makabungkag niini. (Prov. 20:19; Roma 14:19) Siya makapasamot sa kasakit sa tawong nag-antos. (Efe. 4:31, 32) Maayo gyod nga magpokus ta sa maayong mga hiyas sa maong tawo ug maghunahuna kon unsaon nato siya pagtabang sa pagsagubang sa iyang kalisdanan! w19.06 21-22 ¶8-9