Abril

Si Aristarko, Kristohanon nga taga-Tesalonica, sa Macedonia, maoy maunongong higala ni Pablo. Ang unang paghisgot kang Aristarko sa Bibliya mabasa sa asoy sa pagbisita ni Pablo sa Efeso, sa iyang ikatulong biyahe ingong misyonaryo. Samtang nag-uban kang Pablo, si Aristarko gipugos ug dala sa suko kaayong panon. (Buh. 19:29) Dihang gibuhian na siya, wala siya mobiya aron luwason ang kaugalingon sa peligro, kondili miunong siya kang Pablo. Pipila ka bulan sa ulahi, sa Gresya, si Aristarko kauban gihapon ni Pablo bisag ang mga kaaway naningkamot gihapon sa pagpatay kang Pablo. (Buh. 20:2-4) Niadtong mga 58 C.E., dihang si Pablo gidala sa Roma ingong piniriso, giubanan siya ni Aristarko sa taas nga biyahe, ug silang duha nakasinatig pagkalunod. (Buh. 27:1, 2, 41) Sa Roma, dayag nga taudtaod pod niyang giubanan si Pablo sa prisohan. (Col. 4:10) Dili ikatingala nga nadasig ug nahupayan si Pablo sa iyang pagkamaunongon! Sama ni Aristarko, mapakita nato nga maunongon tang higala kon naa ta para sa mga igsoon dili lang sa panahon nga maayo ang kahimtang kondili “panahon [sab] sa kalisdanan.” w20.01 9 ¶4-5

Ang usa nga gidihogan basin mobating dili takos niining bililhong pribilehiyo. Pero dili gyod siya magduhaduha nga gipili siya ni Jehova. Siya malipay ug mapasalamaton dihang maghunahuna siya sa iyang paglaom. (1 Ped. 1:3, 4) Nagpasabot ba ni nga ang mga dinihogan gusto nang mamatay? Gitubag ni Pablo kanang pangutanaha. Iyang gikomparar ang ilang tawhanong lawas ngadto sa tolda, nga nag-ingon: “Sa pagkatinuod, kita nga ania niini nga tolda nag-agulo, nga nabug-atan, kay dili nato kini gustong hukason, apan gusto natong isul-ob ang lain, aron nga ang may kamatayon lamyon sa kinabuhi.” (2 Cor. 5:4) Kini nga mga Kristohanon wala laayi sa kinabuhi dinhi sa yuta, nga gusto na nilang mamatay. Hinunoa, sila malipayon sa ilang kinabuhi ug gusto nilang gamiton ang matag adlaw sa pag-alagad kang Jehova uban sa ilang pamilya ug mga higala. Pero bisag unsa pay ilang ginabuhat, pirme gyod silang maghunahuna sa ilang mahimayaong paglaom.​—1 Cor. 15:53; 2 Ped. 1:4; 1 Juan 3:2, 3. w20.01 23 ¶12-13

Ingong bahin sa pagbansay kanato, disiplinahon ta sa atong mahigugmaong Amahan kon gikinahanglan. Iya nang ginahimo sa daghang paagi. Pananglitan, naa tingali tay mabasa sa Bibliya o madungog sa atong mga tigom nga magtul-id kanato. O kaha ang tabang nga atong gikinahanglan maggikan sa mga ansiyano. Bisag unsa pay paagi ni Jehova sa pagdisiplina kanato, kanunay niya ning gibuhat kay gihigugma ta niya. (Jer. 30:11) Si Jehova nagsuportar nato aron makalahutay ta sa mga pagsulay. Ingon nga ang usa ka mahigugmaong tawhanong amahan magsuportar sa iyang mga anak panahon sa kalisdanan, suportahan sab ta sa atong langitnong Amahan panahon sa mga pagsulay. Siya naggamit sa iyang balaang espiritu aron panalipdan ta batok sa espirituwal nga kadaot. (Luc. 11:13) Tabangan sab ta ni Jehova dihang maluya ta. Pananglitan, siya naghatag natog nindot kaayong paglaom. Kana nga paglaom makatabang nato sa paglahutay sa mga kalisdanan. Konsideraha ni: Bisan unsa pang daotang butang ang mahitabo kanato, wad-on sa atong langitnong Amahan ang bisan unsang epekto niana. Ang bisan unsang pagsulay nga atong maagoman temporaryo lang, pero ang mga panalangin ni Jehova walay kataposan.​—2 Cor. 4:16-18. w20.02 5-6 ¶14-15

Masuklan nato ang kasina! Konsideraha ang mga igsoon ni Jose. Mga katuigan human nila daogdaoga si Jose, nagkita sila sa Ehipto. Sa wala pa magpaila si Jose sa iyang mga igsoon, iyang gisulayan sila kon nagbag-o na ba sila. Giimbitar niya sila sa pagpangaon ug gihatagan niyag mas daghang pagkaon ang iyang manghod nga si Benjamin. (Gen. 43:33, 34) Pero walay timailhan nga ang iyang mga igsoon nasina kang Benjamin. Hinunoa, gipakita nila nga gimahal gyod nila ang ilang igsoon ug ang ilang amahan, si Jacob. (Gen. 44:30-34) Kay wala na masina ang mga igsoon ni Jose, nakatabang sila nga mahibalik ang kalinaw sa ilang pamilya. (Gen. 45:4, 15) Sa susama, kon ibton nato ang kasina gikan sa atong kasingkasing, makatabang ta nga magmalinawon ang atong pamilya ug kongregasyon. Gusto ni Jehova nga suklan nato ang kasina ug palamboon ang kalinaw. Kon atong ugmaron ang pagkamapainubsanon, pagkakontento, ug pagkamapasalamaton, dili ta mahimong masinahon. w20.02 19 ¶17-18

Ang usa ka paagi nga mabalosan nimo ang gugma ni Jehova mao ang pag-ampo kaniya. Molawom ang imong gugma kaniya samtang isulti nimo ang imong mga kabalaka ug pasalamatan siya sa tanan niyang gihimo para nimo. Ug mas masuod ka kaniya dihang makita nimo kon giunsa niya pagtubag ang imong mga pag-ampo. Makombinsir ka nga nakasabot siya nimo. Pero aron masuod kang Jehova, kinahanglang masabtan nimo ang iyang panghunahuna. Ug kinahanglang mahibaloan nimo kon unsay gusto niyang ipabuhat nimo. Makat-onan lang nimo kana pinaagi sa pagtuon sa Bibliya. Busa, ugmara ang imong apresasyon niini. Diha lang sa Bibliya makita ang kamatuoran bahin kang Jehova ug sa iyang katuyoan para nimo. Imong ikapakita nga giapresyar nimo ang Bibliya pinaagi sa pagbasa niini kada adlaw, pagpangandam una mag-Bible study, ug pagpadapat sa imong nakat-onan. (Sal. 119:97, 99; Juan 17:17) Naa ba kay eskedyul sa pagbasa sa Bibliya? Ginasunod ba nimo kana ug naningkamot nga basahon ang Bibliya adlaw-adlaw? w20.03 5 ¶8-9

Kon dili na kaayo ka makalakawlakaw, mahimo kang molingkod sa lugar nga daghag tawo diin makasangyaw ka sa mga lumalabay. O tingali makasangyaw ka sa impormal, pinaagig sulat, o pinaagig telepono. Daghang magmamantala nga nalimitahan pag-ayo ang nalipay ug natagbaw niining paagiha sa pagsangyaw. Bisan pa sa mga problema sa panglawas, bug-os gihapon nimong matuman ang imong ministeryo. Si Pablo miingon: “Sa tanang butang ako adunay kusog pinaagi kaniya nga naghatag ug gahom kanako.” (Filip. 4:13) Gikinahanglan niya ang maong kusog dihang nasakit siya panahon sa usa sa iyang mga biyahe ingong misyonaryo. Iyang giingnan ang mga taga-Galacia: “Gumikan sa usa ka sakit sa akong unod nga ako nagpahayag sa maayong balita kaninyo sa unang higayon.” (Gal. 4:13) Sa susama, ang imong problema sa panglawas maghatag tingali nimog kahigayonan sa pagsangyaw, pananglitan ngadto sa mga doktor, nars, ug sa ubang tig-atiman. Daghan nila ang naa sa trabahoan dihang mobisita ang mga Saksi sa ilang balay. w19.04 4-5 ¶10-11

Niadtong 2018, kapig 223,000 ka magmamantala sa maayong balita ang nagpuyo sa mga lugar diin gidili o may restriksiyon ang atong espirituwal nga mga kalihokan. Dili ta angayng matingala niini. Dahomon sa matuod nga mga Kristohanon nga lutoson sila. Bisag asa ta nagpuyo, posibleng kalit tang did-an sa gobyerno sa pagsimba sa atong mahigugmaong Diyos, si Jehova. Kon idili sa gobyerno ang atong pagsimba, basin sayop tang makahunahuna nga ang Diyos wala malipay nato. Pero hinumdomi, ang paglutos wala magpasabot nga ang Diyos nasuko kanato. Tagda pananglitan si apostol Pablo. Seguradong giuyonan siya sa Diyos. Nakapribilehiyo siya sa pagsulat ug 14 ka sulat sa Kristohanon Gregong Kasulatan, ug siya usa ka apostol sa kanasoran. Bisan pa niana, siya nakaeksperyensiyag grabeng paglutos. (2 Cor. 11:23-27) Atong nakat-onan sa eksperyensiya ni apostol Pablo nga itugot ni Jehova nga lutoson ang iyang matinumanong mga alagad. w19.07 8 ¶1, 3

Ang usa ka makapatandog kaayong paagi nga gipakita ni Jehova ang iyang pagkamahunahunaon kanato mao ang iyang pagtabang nato nga masuklan ang atong mga kaaway. Ang panguna natong mga kaaway mao si Satanas ug ang mga demonyo. Gipasidan-an ta ni Jehova bahin nila, ug gihatag niya ang atong gikinahanglan aron masuklan sila. (Efe. 6:10-13) Kon dawaton nato ang tabang ni Jehova ug bug-os tang mosalig niya, masuklan nato ang Yawa. Magmasaligon ta sama kang apostol Pablo, kinsa misulat: “Kon ang Diyos dapig kanato, kinsa ang batok kanato?” (Roma 8:31) Ingong tinuod nga mga Kristohanon, wala nato hatagig dakong atensiyon si Satanas ug ang mga demonyo. Nagpokus ta sa pagkat-on bahin kang Jehova ug sa pag-alagad kaniya. (Sal. 25:5) Pero kinahanglan pod tang mahibalo sa ginahimo ni Satanas. Ngano? Aron dili ta niya mailad.​—2 Cor. 2:11. w19.04 20 ¶1-2

Dihang makig-estorya ta sa mga nagmagul-anon, maminaw ba ta pag-ayo? Wala ni magpasabot nga igo lang tang motan-aw sa atong kaestorya ug wala tay isulti. Makapakita tag simpatiya ug kaluoy samtang maminaw. Usahay, ang pipila ka mataktikanhon ug mabination nga mga pulong magpakita kon unsay atong gibati. Puwede kang moingon: “Naguol ko nga nahitabo nâ nimo!” Basin puwede nimong pangutan-on ang magul-anon nga higala aron maseguro nga nasabtan nimo ang iyang gisulti. Tingali mangutana ka, “Puwede ba ko nimong pasabton sa imong gisulti?” o “Mao ni ang akong pagsabot . . . Sakto ba ko?” Ang maong mahigugmaong mga pulong magpasalig niya nga naminaw ka pag-ayo ug naningkamot nga masabtan siya. (1 Cor. 13:4, 7) Pero paningkamoti nga ‘magmahinay sa pagsulti.’ Ayawg sagbat aron manambag o tul-iron ang iyang panghunahuna. Ug magmapailobon! Imbes mosulay sa paghatag ug solusyon sa iyang problema, magpakita tag simpatiya ug kaluoy.​—1 Ped. 3:8. w19.05 17-18 ¶15-17

Sa pamilya, angayng higugmaon sa bana ang iyang asawa “sama sa ginahimo sa Kristo sa kongregasyon.” (Efe. 5: 28, 29) Kinahanglang sundogon sa bana ang nagsakripisyong gugma sa Kristo pinaagi sa pag-una sa mga panginahanglan ug kaayohan sa iyang asawa. Ang pipila ka lalaki basin malisdan sa pagpakita niana nga gugma, tungod tingali kay nagdako sila sa kultura diin wala maandi ang pagtratar sa uban sa patas ug mahigugmaong paagi. Basin malisdan sila sa pagtul-id sa dili maayong batasan, pero kinahanglan nilang mohimog mga kausaban aron masunod ang balaod sa Kristo. Ang bana nga magpakitag nagsakripisyong gugma tahoron sa iyang asawa. Ang amahan nga tinuod nga nahigugma sa iyang mga anak dili mopasakit nila sa pulong o sa buhat. (Efe. 4:31) Hinunoa, ipakita niya sa iyang mga anak nga gihigugma ug giuyonan niya sila aron mobati silang luwas ug may kasegurohan. Maangkon sa maong amahan ang gugma ug pagsalig sa iyang mga anak. w19.05 6 ¶21

Unsay posibleng gihunahuna ni Maria dihang gisulti kana ni Gabriel? Naghunahuna kaha siya nga ang gisulti ni Gabriel nagpasabot nga pulihan ni Jesus si Haring Herodes​—o ang usa sa iyang mga manununod—​ingong hari sa Israel? Kon mahimong hari si Jesus, nan, si Maria nga iyang inahan mahimo pong rayna, ug ang ilang pamilya magpuyo sa palasyo. Pero, wala gyod tay mabasa nga nangayo si Maria ug pinaborang posisyon sa Gingharian. Si Maria mapainubsanon gayod! Hinumdoman nato ang atong pangunang tumong sa pagtuon sa Bibliya ug sa atong mga publikasyon​—mahimong mas masuod kang Jehova. Gusto sab natong mas mailhan ang kaugalingon, ‘kon unsa tang matanga sa tawo,’ ug kon unsang mga kausaban ang kinahanglan natong himoon aron malipay ang Diyos. (Sant. 1:22-25; 4:8) Busa sa matag higayon nga magtuon ta, kinahanglang sugdan nato ni sa pag-ampo, nga mangayo sa balaang espiritu ni Jehova. Hangyoon nato siya nga tabangan ta nga makabenepisyo pag-ayo sa atong gitun-an ug makahimo sa gikinahanglang kausaban. w19.05 30-31 ¶18-19

Usahay, magdungan pagtungha ang makapa-stress nga mga problema. Tagda ni nga mga pananglitan. Ang brader nga si John, kinsa nag-antos sa multiple sclerosis, naguol pag-ayo dihang gibiyaan siya sa iyang asawa human sa 19 ka tuig nga kaminyoon. Dayon, ang iyang duha ka anak nga babaye mihunong sa pag-alagad kang Jehova. Ang magtiayong Bob ug Linda lahig mga problema. Nawad-an silag trabaho, ug mihawa sila sa ilang balay kay dili na sila makabayad. Gawas pa ana, si Linda nadayagnos nga may sakit sa kasingkasing nga posibleng makapatay niya, ug may lain pa siyang sakit nga misugod nag daot sa iyang immune system. Makaseguro ta nga ang atong Maglalalang ug mahigugmaong Amahan, si Jehova, nakasabot kon unsay atong bation dihang ma-stress ta. Ug gusto ta niyang tabangan sa atong mga problema. (Fil. 4:6, 7) Ang Pulong sa Diyos dunay daghang pananglitan nga naghisgot bahin sa mga problema nga giatubang sa iyang mga alagad. Naghisgot pod ni kon giunsa sila pagtabang ni Jehova sa maong makapa-stress nga mga kahimtang. w19.06 14 ¶2-3

Dihang mohimo tag maayo niadtong wala nay kapikas, atong gipakita nga gimahal gyod nato sila. Mas gikinahanglan nila karon ang maayong mga higala. Unsaon nimo pagpakita nga higala ka nila? Puwede nimo silang imbitahon nga mangaon. Puwede sab nimo silang iuban sa paglingawlingaw o sa pagsangyaw, o kaha paapilon usahay sa inyong pamilyahanong pagsimba. Kon imo nang himoon, mapalipay nimo si Jehova, kay siya “duol niadtong mga dugmok ug kasingkasing” ug “tigpanalipod sa mga babayeng balo.” (Sal. 34:18; 68:5) Sa dili madugay, dihang ang Gingharian sa Diyos magmando na sa yuta, ang tanang “kasakit makalimtan.” Naghinamhinam gyod ta sa panahon dihang ‘ang kanhing mga butang dili na hinumdoman, ug dili na motungha sa kasingkasing.’ (Isa. 65:16, 17) Samtang nagpaabot nianang panahona, magtinabangay ta ug atong pamatud-an sa pulong ug buhat nga atong gimahal ang tanang membro sa atong espirituwal nga pamilya.​—1 Ped. 3:8. w19.06 25 ¶18-19

Katuigan kanhi, ang The Watchtower nag-ingon: “Ang tawo nga nakaila pag-ayo sa Diyos mosalig pag-ayo niya panahon sa pagsulay.” Tinuod gyod nâ! Aron makalahutay ta sa mga paglutos, kinahanglan tang mahigugma kang Jehova ug mosalig kaniya sa bug-os. (Mat. 22:36-38; Sant. 5:11) Basaha ang Bibliya kada adlaw aron mas masuod kang Jehova. (Sant. 4:8) Sa imong pagbasa, pagpokus sa nindot nga mga hiyas ni Jehova. Dihang magbasa ka sa iyang mga gisulti ug gihimo, hunahunaa kon unsa ka dako ang iyang gugma kanimo. (Ex. 34:6) Ang uban malisdan sa pagtuo nga gihigugma sila sa Diyos kay wala gyoy nagpakitag gugma kanila. Kon kanay imong gibati, sulayi paglista kada adlaw ang mga paagi nga si Jehova nagpakitag kaluoy ug pagkamaayo kanimo. (Sal. 78:38, 39; Roma 8:32) Samtang maghunahuna ka sa imong mga kasinatian ug mamalandong sa imong mga nabasa sa Pulong sa Diyos, tingali mas daghan kag malista nga mga butang nga nahimo ni Jehova para kanimo. Kon mas mapabilhan nimo ang mga gihimo ni Jehova, mas masuod ka kaniya.​—Sal. 116:1, 2. w19.07 2-3 ¶4-5

Si Jehova wala maghatag natog awtoridad nga modesisyon para sa uban. Ang naghimog wala kinahanglanang mga lagda wala manalipod sa iyang igsoon​—gihimo niya ang iyang kaugalingon nga agalon sa pagtuo sa iyang igsoon. Ang atong pangunang kaaway, si Satanas nga Yawa, dili mohunong sa paglutos sa matinumanong mga alagad ni Jehova. (1 Ped. 5:8; Pin. 2:10) Si Satanas ug ang iyang mga sakop maningkamot nga idili ang atong pagsimba kang Jehova. Pero dili ta angayng mangurog sa kahadlok! (Deut. 7:21) Si Jehova nag-uban kanato, ug padayon ta niyang tabangan bisag idili ang buluhaton. (2 Cron. 32:7, 8) Hinaot nga parehas tag determinasyon sa mga Kristohanon sa unang siglo, kinsa miingon sa mga magmamando sa ilang panahon: “Kamo nay mohukom kon husto ba sa panan-aw sa Diyos nga mamati kaninyo imbes sa Diyos. Apan alang kanamo, dili mi makahunong sa pagsulti bahin sa mga butang nga among nakita ug nadungog.”​—Buh. 4:19, 20. w19.07 13 ¶18-20

Dihang magsangyaw, kinahanglang maningkamot ta nga masabtan kon unsay nakaimpluwensiya sa panghunahuna sa mga tawo. Si apostol Pablo nagdako kauban sa mga Hudiyo. Segurado nga kinahanglan niyang ipahaom ang iyang paagi sa pagsangyaw ngadto sa mga Hentil, kinsa gamay rag nahibaloan o wala gyoy nahibaloan bahin kang Jehova ug sa Kasulatan. Kinahanglan tingali tang mag-research aron mas masabtan nato ang mga tawo sa atong teritoryo. (1 Cor. 9:20-23) Tumong nato ang pagpangita sa mga tawong “takos.” (Mat. 10:11) Aron molampos ta, pangayoon nato ang opinyon sa mga tawo ug dayon maminaw ta pag-ayo. Ang usa ka brader sa England mangayog opinyon sa mga tawo kon unsay buhaton aron magmalipayon ang kaminyoon, magmalamposon sa pagpadako sa mga anak, o masagubang ang inhustisya. Human mapaminawi ang ilang opinyon, mangutana siya, “Unsay imong hunahuna aning tambag nga nasulat mga 2,000 ka tuig kanhi?” Dayon, ipakita niya kanila ang haom nga mga teksto diha sa iyang gadyet, pero dili siya maghisgot sa pulong nga “Bibliya.” w19.07 21-22 ¶7-8

Unsa ka dako ang angay natong paghigugma sa Diyos? Giingnan ni Jesus ang usa ka Pariseo: “Higugmaa si Jehova nga imong Diyos sa tibuok mong kasingkasing, sa tibuok mong kalag, ug sa tibuok mong hunahuna.” (Mat. 22:36, 37) Gusto natong higugmaon ang Diyos sa tibuok natong kasingkasing. Ug gusto natong mas modako ang atong gugma kaniya kada adlaw. Kinahanglang makaila ta sa Diyos aron mahigugma niya. Ang Bibliya nag-ingon: “Bisan kinsa nga wala mahigugma wala makaila sa Diyos, kay ang Diyos gugma.” (1 Juan 4:8) Gipakita ni apostol Pablo nga ang atong gugma sa Diyos modako dihang makabaton tag “tukmang kahibalo ug bug-os nga pagsabot” bahin Kaniya. (Filip. 1:9) Dihang nagsugod ta pagtuon sa Bibliya, nakakat-on ta sa paghigugma sa Diyos bisag diyutay ra tag nahibaloan bahin sa iyang nindot kaayong mga hiyas. Pero samtang nagkalawom ang atong kahibalo kang Jehova, nagkadako sab ang atong gugma kaniya. Maoy hinungdan nga importante kaayo kanato ang regular nga pagtuon sa Bibliya ug ang pagpamalandong sa Pulong sa Diyos!​—Filip. 2:16. w19.08 9 ¶4-5

Kon naa ka sa bag-ong asaynment, kinahanglan kang mangitag bag-ong mga higala. Hinumdomi nga aron makabaton ug higala, kinahanglang mahigalaon ka. Isulti ang imong nindot nga mga eksperyensiya sa pag-alagad kang Jehova, ug ipakita ang imong kalipay sa pag-alagad. Kon kinahanglan kang mobiya sa imong asaynment tungod sa dili maayong panglawas sa imong kapikas, ayaw siyag basola. Sa laing bahin, kon ikaw mismo ang nasakit, ayawg kakonsensiya, nga maghunahunang gipakyas nimo ang imong kapikas. Hinumdomi nga kamo “usa ka unod,” ug misaad mo kang Jehova nga atimanon ang usag usa bisag unsa pay mahitabo. (Mat. 19:5, 6) Kon mibiya mo sa asaynment tungod sa pagmabdos nga wala sa plano, seguroa nga mahibalo ang inyong anak nga mas importante siya kay sa inyong asaynment kaniadto. Pasaligi ang bata nga giisip ninyo siya ingong “ganti” sa Diyos. (Sal. 127:3-5) Dugang pa, sultihi siya sa nindot ninyong mga eksperyensiya sa inyong asaynment kaniadto. Ang pagbuhat niana magpalihok sa inyong anak sa paggamit sa iyang kinabuhi sa malipayong pag-alagad kang Jehova sama kaninyo. w19.08 22 ¶10-11

Gipahinabo sa Bantogang Babilonya, ang tibuok kalibotang imperyo sa bakak nga relihiyon, nga daghan ang dili motahod sa ngalan sa Diyos. Nagtudlo siyag mga bakak bahin sa Diyos. Namampam siya sa espirituwal nga paagi kay nakig-alyansa siya sa mga magmamando sa yuta. Gigamit niya ang iyang gahom ug impluwensiya aron daogdaogon ug panguwartahan ang iyang mga membro. Ug daghan siyag gipabanaw nga dugo, apil ang dugo sa mga alagad sa Diyos. (Pin. 18:24; 19:2) Laglagon ni Jehova ang “bantogang pampam” pinaagi sa “10 ka sungay” sa “hayag-pula nga pintas nga mananap.” Kanang simbolikong mananap nagrepresentar sa United Nations. Ang 10 ka sungay nagrepresentar sa mga gobyerno karon nga nagsuportar niana nga organisasyon. Sa gitakdang panahon sa Diyos, ang maong mga gobyerno moatake sa Bantogang Babilonya. Ilang ‘laglagon ug huboan siya’ pinaagi sa pag-ilog sa iyang katigayonan ug pagyagyag sa iyang pagkadaotan. (Pin. 17:3, 16) Kanang kalit nga kalaglagan​—nga daw sa usa ra ka adlaw—​makapakurat niadtong nagsuportar niya, kay pirme siyang manghambog: “Dili gyod ko makatilawg pagbangotan.”​—Pin. 18:7, 8. w19.09 10 ¶10-11

Kana nga imbitasyon para sa tanan​—dili gayod isalikway ni Jesus si bisan kinsa nga dunay sinserong tinguha nga moalagad sa Diyos. (Juan 6:37, 38) Ang tanang sumusunod sa Kristo gihatagag pribilehiyo sa paghimo sa buluhaton nga gisugo ni Jehova kang Jesus. Makaseguro ta nga si Jesus kanunayng mag-uban kanato aron tabangan ta sa paghimo niana. (Mat. 28:18-20) Ang mapainubsanong mga tawo ganahang moduol kang Jesus. (Mat. 19:13, 14; Luc. 7:37, 38) Ngano? Tagda ang kalainan ni Jesus ug sa mga Pariseo. Ang maong mga lider sa relihiyon walay pagbati ug arogante. (Mat. 12:9-14) Si Jesus mahigugmaon ug mapainubsanon. Ang mga Pariseo ambisyoso ug mapasigarbohon sa ilang taas nga posisyon sa komunidad. Si Jesus nagsaway sa dili maayong ambisyon, ug gitudloan niya ang iyang mga tinun-an nga isipon ang kaugalingon ingong ubos nga mga alagad. (Mat. 23:2, 6-11) Ang mga Pariseo nagdominar sa uban pinaagig pagpanghulga. (Juan 9:13, 22) Si Jesus nagpalagsik sa uban pinaagig mahigugmaong mga buhat ug malumong mga pulong. Nakakat-on na ba ka niini nga mga leksiyon gikan kang Jesus? w19.09 20 ¶1; 21 ¶7-8; 23 ¶9

Ang mga tigom mas makapasuod nato kang Jehova. Ang atong pagtambong sa mga tigom magpaila kon makalahutay ba ta sa mga paglutos sa umaabot. (Heb. 10:24, 25) Ngano? Kon mopalta ta sa mga tigom karon tungod sa ginagmayng problema, unsa na man kon sa umaabot kinahanglan natong ipameligro ang kaugalingon aron magtigom uban sa mga igsoon? Sa laing bahin, kon determinado ta nga dili gyod mopalta sa mga tigom, dili ta madaog sa mga kaaway dihang did-an ta sa pagtigom. Karon pa lang, kinahanglang ganahan na tang motambong sa mga tigom. Kon ganahan tang motambong, ang mga pagsupak o pagdili sa gobyerno dili makapugong nato sa pagsugot sa Diyos imbes sa mga tawo. (Buh. 5:29) Memoryaha ang imong paboritong mga teksto. (Mat. 13:52) Dili perpekto ang imong memorya, pero mahimong gamiton ni Jehova ang iyang gamhanang balaang espiritu aron ipahinumdom kanimo ang maong mga teksto. (Juan 14:26) Makatabang nâ kanimo nga makapabiling suod kang Jehova ug makalahutay nga matinumanon. w19.07 3 ¶5; 4 ¶8-9

Natawo ka ba human sa 1914? Kon mao, nagkinabuhi ka sulod sa “kataposang mga adlaw” niining presenteng sistema sa mga butang. Kitang tanan nakabalita bahin sa mga panghitabo nga gitagna ni Jesus para niining panahona. Naglakip kini sa mga gubat, kanihit sa pagkaon, linog, kamatay, pag-uswag sa kalapasan, ug paglutos sa katawhan ni Jehova. (Mat. 24:3, 7-9, 12; Luc. 21:10-12) Nakita sab nato nga ang mga tawo migawi sama nianang gitagna ni apostol Pablo. Ingong mga magsisimba ni Jehova, kombinsido ta nga nagkinabuhi ta sa “kaulahiang bahin sa mga adlaw.” (Miq. 4:1) Kay taas na ang panahon nga milabay sukad niadtong 1914, ania na gyod ta sa ulahing bahin sa “kataposang mga adlaw.” Duol na kaayo ang kataposan, busa kinahanglang mahibaloan nato ang tubag sa pipila ka importanteng mga pangutana: Unsay mahitabo sa kataposan sa “kataposang mga adlaw”? Ug unsay gidahom ni Jehova nga atong buhaton samtang nagpaabot ta sa maong mga panghitabo? w19.10 8 ¶1-2

Ang atong paglahutay wala magdepende sa maayong kahimtang. Mapalig-on nato ang atong pagkamalahutayon pinaagi sa pagsalig kang Jehova. (Roma 12:12) Ang saad ni Jesus sa teksto karong adlawa nagpasabot nga kinahanglan tang magpabiling matinumanon bisag unsa pang kalisdanan ang atong giatubang. Kon molahutay ta sa matag pagsulay karon, mas molig-on ta sa dili pa magsugod ang dakong kasakitan. Sama sa paglahutay, mahimo tang tinuod nga maisogon kon mosalig ta kang Jehova. Sa unsang paagi mapalig-on nato ang atong pagsalig kaniya? Mapalig-on nato ni pinaagi sa pagbasa sa iyang Pulong kada adlaw ug pagpamalandong kon giunsa pagluwas ni Jehova ang iyang katawhan kaniadto. (Sal. 68:20; 2 Ped. 2:9) Dihang atakehon ta sa kanasoran panahon sa dakong kasakitan, ilabina gyong gikinahanglan nga magmaisogon ta ug mosalig kang Jehova. (Sal. 112:7, 8; Heb. 13:6) Kon mosalig ta kang Jehova karon, mabatonan nato ang kaisog nga atong gikinahanglan dihang atakehon ta ni Gog. Kombinsido ta nga kanunay tang luwas ilalom sa mahigugmaong proteksiyon ni Jehova.​—1 Cor. 13:8. w19.10 18 ¶15-16

Ang Yawa maoy nagkontrolar niining sistemaha sa mga butang, ug gigamit niya kini aron pukawon ang atong natural nga mga tinguha ug mga kahuyangan. (Efe. 2:1-3) Gusto niya nga mabahin ang atong kasingkasing aron dili na eksklusibo ang atong debosyon kang Jehova. Human magsulat bahin sa kataposan sa kalibotan ni Satanas ug sa pag-abot sa bag-ong kalibotan, si apostol Pedro miingon: “Mga minahal, sanglit nagpaabot mo niining mga butanga, buhata ang inyong maarangan aron sa kataposan makaplagan mo niya nga walay buling ug walay lama ug may malinawong relasyon kaniya.” (2 Ped. 3:14) Kon sundon nato ang maong tambag ug maningkamot ta sa pagpabiling hinlo sa moral ug espirituwal, atong gipakita nga eksklusibo ang atong debosyon kang Jehova. Si Satanas ug ang iyang sistema padayong magtental nato nga unahon ang ubang butang imbes si Jehova. (Luc. 4:13) Pero dili nato tugotan si bisan kinsa o ang bisan unsa nga mopuli kang Jehova diha sa atong kasingkasing. Determinado tang ihatag kang Jehova ang butang nga siya lang ang angayng modawat​—ang atong eksklusibong debosyon! w19.10 27 ¶4; 31 ¶18-19

Usahay, maayong mabalaka bahin sa pipila ka butang. Pananglitan, maayong mabalaka ta nga basig dili nato mapalipay si Jehova ug Jesus. (1 Cor. 7:32) Kon makahimo tag seryosong sala, mabalaka ta kon unsaon nga mahibalik ang atong suod nga relasyon sa Diyos. Mabalaka pod ta kon unsaon nga mapalipay ang atong kapikas ug maatiman ang atong pamilya ug mga igsoon sa pagtuo. (1 Cor. 7:33; 2 Cor. 11:28) Sa laing bahin, tungod sa sobrang kabalaka basig magsige na lang tag hunahuna kon duna ba tay igong pagkaon ug sinina. (Mat. 6:31, 32) Tungod niana, basin magpokus na ta sa pagbaton ug materyal nga mga butang. Kon tugotan nato kana, ang atong pagtuo kang Jehova mohuyang ug madaot ang atong espirituwalidad. (Mar. 4:19; 1 Tim. 6:10) O basin mabiktima ta sa sobrang pagkabalaka kon unsay hunahunaon sa uban. Basin mas mahadlok na tang bugalbugalan o lutoson sa mga tawo imbes mahadlok nga mapasuko si Jehova. Aron mapanalipdan ang atong kaugalingon batok niana nga kapeligrohan, kinahanglang hangyoon nato si Jehova nga hatagan tag pagtuo ug kaisog nga gikinahanglan sa pag-atubang niana.​—Prov. 29:25; Luc. 17:5. w19.11 15 ¶6-7

Dunay importanteng mga desisyon nga dili gyod nato usbon. Pananglitan, barogan nato ang atong desisyon nga moalagad kang Jehova, ug determinado ta nga magmaunongon sa atong kapikas. (Mat. 16:24; 19:6) Pero, ang ubang desisyon basin kinahanglang usbon. Ngano? Tungod kay mausab ang mga sirkumstansiya. Unsay makatabang nato sa paghimog kinamaayohang mga desisyon? Pag-ampo alang sa kaalam. Sa pipila ka bahin, kitang tanan “nakulangan ug kaalam.” Busa, salig kang Jehova dihang mohimog desisyon ug dihang kinahanglan nimo kanang usbon. Tabangan ka ni Jehova sa paghimog maalamong desisyon. Pag-research pag-ayo. Susiha ang Pulong sa Diyos, basaha ang mga publikasyon sa organisasyon, ug pakig-estorya sa mga tawo nga imong kasaligan. (Prov. 20:18) Importante ang pag-research sa dili pa modesisyon sa pagpangitag laing trabaho, pagbalhin, o pagpilig edukasyon nga makatabang nimo sa pagsuportar sa imong ministeryo. w19.11 27 ¶6-8

Ikalipay nga ang Diyos naghimog kahikayan aron kita maluwas o mapahigawas sa sala. Kini nga kagawasan nahimong posible tungod kang Jesus. Kapig 700 ka tuig sa wala pa moanhi si Jesus sa yuta, si propetang Isaias nagtagna ug nindot kaayong kagawasan. Kana nga kagawasan mas dakog malampos kay sa kagawasan panahon sa tuig sa Pagsadya sa Israel. Siya misulat: “Ang espiritu sa Soberanong Ginoong Jehova ania kanako, kay si Jehova nagdihog kanako sa pagpahayag sa maayong balita ngadto sa maaghop. Gipadala ko niya sa pag-ayo sa dugmok ug kasingkasing, sa pagmantala sa kagawasan sa mga binihag.” (Isa. 61:1) Kang kinsa mapadapat ang maong tagna? Kanang importanteng tagna bahin sa kagawasan nagsugod pagkatuman human sugdi ni Jesus ang iyang ministeryo. Dihang miadto si Jesus sa sinagoga sa iyang lungsod sa Nasaret, iyang gibasa ang maong tagna ni Isaias ngadto sa mga Hudiyo nga nagtigom didto ug gipadapat niya kini sa iyang kaugalingon.​—Luc. 4:16-19. w19.12 9-10 ¶6-8

Aron maatubang ang mga paglutos, nagkinahanglan kag kaisog. Kon gibati nimo nga dili ka maisogon, unsay imong mahimo? Hinumdomi, ang tinuod nga kaisog wala magdepende sa imong gidak-on, kusog, o abilidad. Tagda ang pananglitan sa batan-ong si David dihang giatubang niya si Goliat. Kon ikomparar sa maong higante, si David mas gamay, mas huyang, ug walay galamiton sa pagpakiggubat. Wala gani siyay espada. Pero isog kaayo siya. Si David maisogong midasdas aron makig-away niadtong hambogirong higante. Nganong isog kaayo si David? Siya lig-on kaayog pagtuo nga si Jehova nag-uban kaniya. (1 Sam. 17:37, 45-47) Wala siya magpokus kon unsa ka dako si Goliat kon ikomparar kaniya. Hinuon, nagpokus siya kon unsa ka gamay si Goliat kon ikomparar kang Jehova. Unsay atong makat-onan niini? Magmaisogon ta kon mosalig ta nga si Jehova nagauban kanato ug kon segurado ta nga ang atong mga kaaway wala ra sa kumingking sa Labing Gamhanang Diyos.​—2 Cron. 20:15; Sal. 16:8. w19.07 5 ¶11-13

Si Tiquico, kasaligan kaayo nga kauban ni apostol Pablo. (Buh. 20:4) Niadtong mga 55 C.E., si Pablo nag-organisar ug pagpangolektag kuwarta aron itabang sa Hudiyong mga Kristohanon, ug lagmit gipatabang niya si Tiquico niining importanteng asaynment. (2 Cor. 8:18-20) Sa ulahi, sa unang pagkapriso ni Pablo sa Roma, si Tiquico ang nahimo niyang mensahero. Siyay tigdala sa mga sulat ug mga pagdasig ni Pablo sa mga kongregasyon sa Asia. (Col. 4:7-9) Si Tiquico wala gyod mausab ingong kasaligang amigo ni Pablo. (Tito 3:12) Ang ubang Kristohanon kaniadto dili parehas kang Tiquico nga pirmeng masaligan. Niadtong mga 65 C.E., dihang napriso si Pablo sa ikaduhang higayon, siya misulat nga daghang Kristohanon sa probinsiya sa Asia ang wala na makig-uban niya, tingali kay nahadlok sila sa mga magsusupak. (2 Tim. 1:15) Apan si Pablo makasalig kang Tiquico ug gihatagan niya siyag dugang asaynment. (2 Tim. 4:12) Seguradong mapasalamaton si Pablo kay naa siyay kasaligang amigo nga sama kang Tiquico. w20.01 10 ¶7-8

Tingali naghunahuna ka kon gidihogan ka ba sa balaang espiritu. Kon mao, hunahunaa kining importanteng mga pangutana: Dako ba kaayo ang imong tinguha nga buhaton ang kabubut-on ni Jehova? Gibati ba nimo nga madasigon kaayo ka sa buluhatong pagsangyaw? Ganahan ka bang magtuon sa Pulong sa Diyos ug mosusi sa “lawom nga mga butang sa Diyos”? Gibati ba nimo nga gipalampos pag-ayo ni Jehova ang imong ministeryo? Gibati ba nimo nga duna kay dakong responsibilidad sa pagtabang sa uban sa espirituwal nga paagi? Nakita ba nimo ang pamatuod nga gitabangan ka ni Jehova sa daghang espesipikong paagi? Kon oo ang imong tubag niining tanang pangutana, nagpasabot ba ni nga sa langit na ang imong paglaom? Wala. Ngano? Tungod kay mahimong mobatig ingon niana ang tanang alagad sa Diyos. Sa tinuoray lang, kon nagduhaduha ka kon gidihogan ka ba sa balaang espiritu, nagpasabot kana nga wala ka dihogi. Kadtong gipili ni Jehova walay pagduhaduha kon gidihogan ba sila o wala! Segurado sila! w20.01 23 ¶14