Mayo

Unsay mahimo sa mga ginikanan sa pagtabang sa ilang mga anak nga mahigugma kang Jehova? Pag-ampo alang sa tabang ni Jehova sama sa gibuhat ni Manoa. Dugang pa, tudloi ang inyong mga anak pinaagig ehemplo. Importante ang inyong ginasulti, pero ang inyong ginabuhat lagmit mas dakog epekto sa inyong mga anak. Segurado ta nga si Jose ug Maria maayong ehemplo sa ilang mga anak, apil kang Jesus. Si Jose nagkugi sa pagtrabaho para sa iyang pamilya. Gidasig sab niya ang iyang panimalay nga pabilhan ang espirituwal nga mga butang. (Deut. 4:9, 10) Ginadala niya ang iyang pamilya sa Jerusalem “matag tuig” aron saulogon ang Paskuwa. (Luc. 2:41, 42) Ang ubang amahan niadtong panahona tingali naghunahuna nga hago, kalas sa panahon, ug gastoso kon ilang iuban sa biyahe ang tibuok pamilya. Pero klaro nga giapresyar ni Jose ang espirituwal nga mga butang, ug gitudloan niya ang iyang mga anak nga apresyahon sab kana. Dugang pa, si Maria pamilyar kaayo sa Kasulatan. Sa pulong ug buhat, seguradong gitudloan niya ang iyang mga anak nga higugmaon ang Pulong sa Diyos. w19.12 24-25 ¶9-12

Makita nato ang pamatuod nga gihigugma ta ni Jehova sa iyang gihimo dihang unang mitungha ang problema sa iyang pamilya sa yuta. Dihang misupak si Adan sa iyang langitnong Amahan, dili na siya bahin sa malipayong pamilya ni Jehova, hasta ang iyang mga kaliwat. (Roma 5:12) Pero dihay gihimo si Jehova aron tabangan ang mga kaliwat ni Adan. Gisilotan ni Jehova si Adan, pero naghatag siyag paglaom para sa mga kaliwat niini. Nagsaad dayon siya nga ang matinumanong mga tawo mahimong bahin pag-usab sa iyang pamilya. (Gen. 3:15; Roma 8:20, 21) Si Jehova naghimo niini nga kahikayan pinaagi sa halad lukat sa iyang pinalanggang Anak, si Jesus. Pinaagi sa paghatag sa iyang Anak para kanato, gipamatud-an ni Jehova nga gihigugma ta niya pag-ayo. (Juan 3:16) Siya ang kinamaayohang Amahan. Siya maminaw sa atong mga pag-ampo ug nagtagana sa atong mga panginahanglan, sa materyal ug espirituwal. Siya nagbansay ug nagsuportar kanato. Nag-andam pod siyag nindot kaayong mga panalangin para kanato. Malipay ta sa pagkahibalo nga gihigugma ug gipangga ta sa atong Amahan! w20.02 6 ¶16-17; 7 ¶20

Mibati ka na ba sukad ug grabeng kabalaka? Tingali nabalaka ka tungod sa gisulti o gihimo sa uban, o sa imong gisulti o gibuhat. Pananglitan, basig may nahimo kang sayop, ug nabalaka ka nga dili na gyod ka pasayloon ni Jehova. Ug mas grabe pa, kay nalumsan ka sa kabalaka, naghunahuna tingali ka nga kulang kag pagtuo ug daotan ka. Pero konsideraha ang pipila ka pananglitan sa Bibliya. Si Ana, nga inahan ni propetang Samuel, dakog pagtuo. Pero, nadaog siya sa kabalaka dihang ang usa ka membro sa ilang pamilya dili maayog pagtratar kaniya. (1 Sam. 1:7) Si apostol Pablo lig-og pagtuo, pero mibati siyag dakong ‘kabalaka alang sa tanang kongregasyon.’ (2 Cor. 11:28) Si Haring David lig-on kaayog pagtuo nga tungod niana gihigugma siya pag-ayo ni Jehova. (Buh. 13:22) Bisan pa niana, si David nakahimog mga kasaypanan nga nakapabalaka pag-ayo kaniya. (Sal. 38:4) Gihupay ni Jehova ang matag usa kanila. w20.02 20 ¶1-2

Sa dihang magpahinungod ka kang Jehova, kinasingkasing kang moampo ug mosulti kaniya nga gamiton nimo ang imong kinabuhi sa pag-alagad kaniya hangtod sa hangtod. Sa dihang magpahinungod ka sa Diyos, imong “dumilian” ang kaugalingon. Iya ka na ni Jehova, ug dako kini nga pribilehiyo. (Roma 14:8) Sultian nimo siya nga sugod nianang adlawa, magpokus ka na sa pag-alagad kaniya ug dili sa pagpahimuot sa imong kaugalingon. Ang imong pagpahinungod maoy seryosong panaad nimo sa Diyos. Dili ta pugson ni Jehova sa paghimo niana nga panaad. Pero kon himoon nato kana, dahomon niya nga tumanon nato ang atong gisaad. (Sal. 116:12, 14) Ang imong pagpahinungod maoy personal ug pribado; tali lang nâ kanimo ug kang Jehova. Ang bawtismo maoy publiko; himoon ni atubangan sa uban, sagad panahon sa asembliya o kombensiyon. Sa dihang magpabawtismo ka, imong gipakita sa uban nga nagpahinungod ka na kang Jehova. Busa ang imong bawtismo magpahibalo sa uban nga gihigugma nimo si Jehova nga imong Diyos sa tibuok nimong kasingkasing, kalag, hunahuna, ug kusog ug determinado kang moalagad kaniya hangtod sa hangtod.​—Mar. 12:30. w20.03 9 ¶4-5

Gipahinabo ni Satanas nga malimtan si Jehova. Human sa kamatayon sa mga apostoles ni Jesus, ang pipila nga nag-angkong Kristohanon nagsugod pagpakaylap ug bakak nga mga pagtulon-an. (Buh. 20:29, 30) Ang maong mga apostata nagsugod sa paghimog mga paagi aron dili mailhan ang bugtong matuod nga Diyos. Pananglitan, wala na sila mogamit sa ngalan sa Diyos diha sa ilang Bibliya ug migamit silag mga ekspresyon sama sa “Ginoo.” Kay ilang gitangtang ang ngalan sa Diyos ug gipulihag “Ginoo,” lisod na para sa magbabasa sa Bibliya nga makita ang kalainan ni Jehova sa ubang “ginoo” nga gihisgotan sa Kasulatan. (1 Cor. 8:5) Si Jehova ug Jesus pareho nilang gitawag ug “Ginoo,” maong lisod nang masabtan nga lahi si Jehova ug si Jesus. (Juan 17:3) Kini nga kalibog maoy usa sa mga hinungdan nga namugna ang doktrina sa Trinidad, nga wala itudlo sa Pulong sa Diyos. Ingong resulta, daghan ang nagtuo nga ang Diyos misteryoso ug imposibleng mailhan. Bakak gayod kana!​—Buh. 17:27. w19.06 4 ¶11

Ang usa ka paagi nga bug-os natong matuman ang ministeryo mao ang pagpauswag sa atong paagi sa pagsangyaw. (Prov. 1:5; 1 Tim. 4:13, 15) Pribilehiyo gyod nga gitugotan ta ni Jehova nga mahimong iyang “mga isigkamagbubuhat”! (1 Cor. 3:9) Kon imong unahon “ang mas hinungdanong mga butang” ug magpokus ka sa ministeryo, ‘makaalagad ka kang Jehova uban ang pagmaya.’ (Filip. 1:10; Sal. 100:2) Ingong usa sa mga alagad sa Diyos, makaseguro ka nga hatagan ka niyag gahom nga imong gikinahanglan aron matuman ang imong ministeryo bisag unsa pay imong problema o limitasyon. (2 Cor. 4:1, 7; 6:4) Gamay man o dako ang imong mahimo sa pagsangyaw, ikaw “may hinungdan sa pagsadya” kon bug-os kalag nimong tumanon ang imong ministeryo. (Gal. 6:4) Kon buhaton nâ nimo, gipakita nimo ang imong gugma kang Jehova ug sa isigkatawo. “Sa pagbuhat niini pagaluwason mo ang imong kaugalingon ug kadtong mamati kanimo.”​—1 Tim. 4:16. w19.04 6 ¶15; 7 ¶17

Ang pangunang paagi nga si Satanas ug ang mga demonyo naglimbong sa mga tawo maoy pinaagi sa espiritismo. Ang nagahimo niana nangangkon nga sila makahibalo o makakontrol sa mga butang nga dili mahimo sa ordinaryong tawo. Pananglitan, ang pipila nangangkon nga mahibalo sila sa umaabot pinaagi sa pagpanagna o astrolohiya. Ipakita tingali sa uban nga morag nakig-estorya sila sa patay. Ang pipila nagahimog madyik, ug ang uban mamarang. Ang usa ka surbi nga gihimo diha sa 18 ka nasod sa Latin America ug Caribbean nagpakita nga mga 1 sa matag 3 ka tawo nga gisurbi ang nagtuo sa madyik ug pagpamarang. Halos ingon pod ana ka daghan ang nagtuo nga posible ang pagpakig-estorya sa mga espiritu. May surbi pod nga gihimo diha sa 18 ka nasod sa Africa. Didto, kapin sa katunga sa gisurbi ang nagtuo sa pagpamarang. Siyempre, bisan asa ta nagpuyo, kinahanglang likayan nato ang espiritismo. w19.04 20-21 ¶3-4

Si Jehova nga Diyos nagdumot sa tanang klase sa pagkadaotan. (Sal. 5:4-6) Gidumtan gyod niya ang seksuwal nga pag-abuso ug bata, nga daotan kaayong buhat! Ingong pagsundog kang Jehova, kita nga iyang mga Saksi nagdumot sa pag-abuso ug bata ug wala magtugot niana sulod sa kongregasyon. (Roma 12:9) Ang bisan unsang klase sa pag-abuso ug bata supak gayod sa “balaod sa Kristo”! (Gal. 6:2) Ang tanang gitudlo ni Jesus sa pulong ug buhat gibase sa gugma ug nagpasiugda sa hustisya. Kay gigiyahan niana nga balaod, ang tinuod nga mga Kristohanon nagtratar sa mga bata sa paagi nga mobati silang luwas ug gimahal pag-ayo. Pero ang pag-abuso ug bata sayop ug dili mahigugmaon nga buhat nga mopabati sa bata nga dili luwas ug wala mahala. Makapaguol, naapektohan niana ang tinuod nga mga Kristohanon. Ngano? Kay daghan “ang mga tawong daotan ug mga impostor,” ug ang pipila kanila mosulay sa pagpakig-uban sa mga igsoon. (2 Tim. 3:13) Dugang pa, ang pipila nga nag-angkong bahin sa kongregasyon nagpadala sa dili natural nga unodnong tinguha ug nag-abuso ug mga bata. w19.05 8 ¶1-3

Kadtong naguol pag-ayo basin mobating dili takos moduol kang Jehova sa pag-ampo. Ang usa ka paagi nga mahupay nato siya mao ang pag-ampo uban niya, nga hisgotan ang iyang ngalan. Puwede natong isulti kang Jehova nga kita ug ang kongregasyon nagmahal pag-ayo niya. Mahimo natong hangyoon si Jehova nga tabangan ang iyang bililhong karnero nga makabatog kalinaw sa hunahuna ug mahupayan. Ang maong pag-ampo makapahupay gayod. Paghunahuna sa dili pa mosulti. Ang mga pulong nga wala hunahunaa makapasakit. Ang maayong mga pulong makaayo. (Prov. 12:18) Busa pag-ampo kang Jehova nga tabangan kang makagamit ug mga pulong nga maayo ug makapahupay. Hinumdomi nga wala nay mas gamhanan pa kay sa mga pulong ni Jehova nga anaa sa Bibliya. (Heb. 4:12) Dihang hupayon nato ang uban, atong gipahinumdom kanila nga gimahal sila ni Jehova. Ug dili gyod nato kalimtan nga si Jehova Diyos pod sa hustisya. Walay matago kaniya nga daotang buhat sa pag-abuso. Nakita ni Jehova ang tanan, ug iyang seguroon nga masilotan ang tanang tig-abuso nga dili mahinulsolon.​—Num. 14:18. w19.05 18 ¶18; 19 ¶19, 21

Gusto ni Satanas nga mobiya ta kang Jehova. Aron molampos siya, sulayan niya pag-impluwensiya o pagkontrolar ang atong panghunahuna. Maningkamot siya nga danihon o limbongan ta sa pagsunod kaniya pinaagi sa pagpukaw sa atong mga tinguha. (Col. 2:4) Nameligro ba gyod ta nga malimbongan ni Satanas? Oo! Hinumdomi nga ang pasidaan diha sa Colosas 2:8 wala isulat ni Pablo ngadto sa mga dili magtutuo. Gisulat niya kini ngadto sa mga Kristohanon nga gidihogan sa balaang espiritu. (Col. 1:2, 5) Ang maong mga Kristohanon nameligrong malimbongan, ug labaw na gyod ta karon. (1 Cor. 10:12) Ngano? Si Satanas gitambog dinhi sa yuta, ug naningkamot siya sa paglimbong sa maunongong mga alagad sa Diyos. (Pin. 12:9, 12, 17) Dugang pa, nagkinabuhi ta sa panahon diin ang mga daotan ug mga impostor “mosamot pa ka daotan.”​—2 Tim. 3:1, 13. w19.06 2 ¶1-2

Nahadlok si Elias dihang gihulga siya ni Rayna Jezebel nga patyon. Busa miikyas siya ngadto sa Beer-seba. Tungod sa grabeng kaguol, ‘mihangyo siya nga mamatay na unta.’ Nganong mibati siya niana? Tungod kay si Elias dili hingpit, usa ka “tawong may pagbati nga sama kanato.” (Sant. 5:17) Basin wala na niya makaya ang stress ug grabeng kakapoy. Tingali naghunahuna si Elias nga way pulos ang iyang paningkamot sa pagtabang sa mga tawo sa pagsimba kang Jehova, wala moarang-arang ang kahimtang sa Israel, ug siya na lay nag-alagad kang Jehova. (1 Hari 18:3, 4, 13; 19:10, 14) Nasabtan ni Jehova ang gibati ni Elias ug wala niya kasab-i si Elias sa pagpahungaw niana. Iya hinuong gitabangan si Elias nga maulian sa kusog niini. (1 Hari 19:5-7) Dayon, sa mahigugmaong paagi, gitul-id ni Jehova ang panghunahuna ni Elias pinaagi sa pagpakita sa Iyang katingalahang gahom. Unya si Jehova miingon nga duna pay 7,000 sa Israel nga wala magsimba kang Baal. (1 Hari 19:11-18) Niining mga paagiha, gipakita ni Jehova nga gimahal niya si Elias. w19.06 15-16 ¶5-6

Sunda kanunay ang instruksiyon. Kon sundon nato ang instruksiyon sa kasaligang mga brader nga nanguna, malikayan nato ang mga problema. Pananglitan, sa nasod diin gidili ang buluhaton, ang nagapangunang mga brader naghatag ug instruksiyon sa mga magmamantala nga dili magtanyag ug literatura dihang magsangyaw. Pero dihay payunir nga brader nga wala mosunod niana, ug nagtanyag siyag literatura. Unsay resulta? Igo lang sila nakahuman sa impormal nga pagsangyaw, gisukitsukit sila sa mga polis. Gisundan diay sila sa mga polis ug gipanguha ang naapod-apod nilang literatura. Unsay atong makat-onan niini? Kinahanglan tang mosunod sa instruksiyon bisag dili ta uyon niana. Panalanginan ta ni Jehova dihang makigkooperar ta sa mga igsoon nga gitudlo niya sa pagpanguna kanato.​—Heb. 13:7, 17. w19.07 12 ¶17

Sa gabii una patya ang atong Ginoong Jesus, siya miingon nga ang tanan nga gustong mahimong iyang mga tinun-an pagadumtan. (Juan 17:14) Hangtod karon, ang matinumanon nga Kristohanong mga Saksi ni Jehova gilutos niadtong supak sa matuod nga pagsimba. Samtang magkaduol ang kataposan niining sistemaha, makadahom ta nga mosamot pa ang paglutos. (Mat. 24:9) Unsaon nato pagpangandam alang sa paglutos? Dili kinahanglang hunahunaon nato ang tanang daotang butang nga posibleng mahitabo kanato. Kay kon ato nang himoon, madaog ta sa kahadlok ug kabalaka. Mahimong mapildi na ta bisag wala pa ang tinuod nga pagsulay. (Prov. 12:25; 17:22) Ang kahadlok maoy epektibong hinagiban nga sulayan paggamit sa atong “kaaway, ang Yawa,” batok kanato. (1 Ped. 5:8, 9) Busa importante nga palig-onon nato ang atong relasyon kang Jehova ug himoon na kana karon. w19.07 2 ¶1-3

Seguradong eksayted kaayo ang mga apostoles dihang nagtigom sila sa usa ka bukid. Gihikay ni Jesus human siya mabanhaw nga makigkita siya kanila nianang dapita. (Mat. 28:16) Lagmit, mao nang panahona nga “siya nagpakita sa kapin sa 500 ka igsoon sa usa ka higayon.” (1 Cor. 15:6) Nganong nakigkita man si Jesus sa iyang mga tinun-an? Aron ihatag kining makapalipay nga sugo: “Busa adtoa ninyo ang mga tawo sa tanang kanasoran ug tudloi sila aron mahimong akong mga tinun-an.” (Mat. 28:18-20) Ang mga tinun-an nga nakadungog sa gisulti ni Jesus sa ulahi nahimong bahin sa unang siglong kongregasyon. Ang pangunang responsibilidad sa maong kongregasyon mao ang paghimog dugang nga mga tinun-an sa Kristo. Karon, dunay tinagpulo ka libong kongregasyon sa tibuok yuta, ug mao gihapon nay ilang pangunang responsibilidad. w19.07 14 ¶1-2

Usa ka nagapanawng tigdumala sa Norway nag-ingon nga ang mga tawo nga dili ganahang makig-estorya bahin sa Diyos sagad gustong makig-estorya bahin sa kahimtang sa kalibotan. Human timbayaon ang mga tawo, siya moingon: “Sa imong hunahuna, kinsa kahay makahatag nato ug mas maayong kaugmaon? Ang mga politiko ba, siyentipiko, o duna pay lain?” Human maminaw pag-ayo, siya mobasa o mokutlo ug teksto nga naghisgot bahin sa maayong kaugmaon. Ang uban mainteres sa saad sa Bibliya nga ang yuta magpabilin hangtod sa hangtod ug ang maayong mga tawo magpuyo niini sa walay kataposan. (Sal. 37:29) Angay tang mogamit ug lainlaing paagi sa pagpakig-estorya. Ngano? Tungod kay ang makapainteres sa usa dili makapainteres sa uban. Ang pipila mosugot ra nga maghisgot dayon ta bahin sa Diyos o sa Bibliya, pero ang uban mas gusto nga maghisgot una tag laing butang. Bisag unsa pa man, pahimuslan nato ang kahigayonan nga maestorya ang tanang matang sa tawo. (Roma 1:14-16) Si Jehova ang magpatubo sa kamatuoran diha sa kasingkasing niadtong nahigugma niana.​—1 Cor. 3:6, 7. w19.07 22-23 ¶10-11

Ang dakong gugma sa Diyos kanato magpalihok nato sa paghigugma sa atong mga igsoon. (1 Juan 4:20, 21) Maghunahuna tingali ta nga sayon rang higugmaon ang atong mga igsoon. Tungod kini kay nagsimba ta kang Jehova ug naningkamot nga sundogon ang iyang maayong mga hiyas. Nagsunod ta sa ehemplo ni Jesus, nga sa kadako sa iyang gugma gihatag niya ang iyang kinabuhi para nato. Pero usahay lisod ang pagsunod sa sugo nga maghigugmaay. Si Euodia ug Sintique maoy madasigong mga sister nga nag-alagad uban kang Pablo. Pero tingali kay wala sila magkasinabot, nadaot ang ilang maayong relasyon. Sa sulat ni Pablo ngadto sa kongregasyon diin nag-alagad ang maong mga sister, espesipiko niyang ginganlan si Euodia ug Sintique ug gihatagan silag prangkang tambag nga ‘magbaton ug samang panghunahuna.’ (Filip. 4:2, 3) Gibati sab ni Pablo nga kinahanglan niyang tambagan ang tibuok kongregasyon: “Padayon sa pagbuhat sa tanang butang nga walay pagbagulbol ug panaglalis.”​—Filip. 2:14. w19.08 9 ¶6-7

Ikalipay nga daghang kongregasyon ug indibiduwal ang nagtabang niadtong naa sa bug-os panahong pag-alagad aron makapabilin sila sa ilang asaynment. Gibuhat nila kini pinaagi sa pagdasig kanila nga magpadayon diha sa ilang buluhaton, paghatag sa ilang materyal nga panginahanglan, o pagtabang kanila sa pag-atiman sa mga membro sa ilang pamilya nga tua sa layo. Kon kadtong naa sa bug-os panahong pag-alagad maasayn sa inyong kongregasyon, ayawg hunahunaa nga nareasayn sila kay sila dili epektibo sa ilang asaynment o kaha gidisiplina. Tabangi hinuon sila nga mas daling makaadyas. Abiabiha sila pag-ayo ug komendahi sa ilang nahimo, bisan pag limitado lang ang ilang mahimo karon tungod sa dili maayong panglawas. Suora sila. Pagkat-on sa tanan nilang nahibaloan, kahanas, ug eksperyensiya. Sa sinugdan, kadtong nakadawat ug bag-ong asaynment magkinahanglan tingali sa imong tabang sa pagpangitag kapuy-an ug trabaho, sa transportasyon, ug sa ubang panginahanglan. w19.08 23-24 ¶12-13

Si Gog mosalig sa iyang “bukton nga unod”​—ang iyang militaryong gahom. (2 Cron. 32:8, footnote) Kita mosalig kang Jehova nga atong Diyos​—usa ka baroganan nga isipon sa mga nasod ingong kabuangan. Kay kon buot hunahunaon, ang mga diyos sa Bantogang Babilonya, nga gamhanan kaniadto, wala gani makaluwas niya gikan sa “pintas nga mananap” ug sa “10 ka sungay” niini! (Pin. 17:16) Busa si Gog magdahom nga dali ra ta niyang pildihon. “Samag kapanganoran nga nagtabon sa yuta,” siya moatake sa katawhan ni Jehova. Pero maamgohan unya ni Gog nga nalit-agan siya ug dili na makaikyas. Sama sa Paraon didto sa Pulang Dagat, maamgohan ni Gog nga nakig-away siya batok kang Jehova. (Ex. 14:1-4; Ezeq. 38:3, 4, 18, 21-23) Ang Kristo ug ang iyang langitnong kasundalohan manalipod sa katawhan sa Diyos ug bug-os nga maglaglag kang Gog ug sa iyang kasundalohan. (Pin. 19:11, 14, 15) Pero komosta man ang pangunang kaaway ni Jehova, si Satanas, kansang bakak nga propaganda nag-aghat sa mga nasod sa pag-atake sa katawhan sa Diyos diha sa gubat sa Armagedon? Siya ug ang iyang mga demonyo itambog ni Jesus sa kahiladman, diin bilanggoon sila sulod sa usa ka libo ka tuig.​—Pin. 20:1-3. w19.09 11-12 ¶14-15

Siyempre, naglaom ta sa maayong mga butang nga gisaad ni Jehova. Pero, kon morag nalangan ang pagkatuman sa atong mga pagdahom, mahimong mawad-an tag kadasig, maluya pa gani. (Prov. 13:12) Nahitabo ni dihang nagsingabot ang 1914. Nianang panahona, daghang dinihogang Kristohanon ang nagdahom nga moadto na sila sa langit pagka-1914. Sa dihang wala nâ mahitabo, unsay gibuhat sa mga matinumanon? Wala sila mohunong sa lumba sa kinabuhi kay nagpokus sila sa matinumanong pagbuhat sa kabubut-on sa Diyos, dili sa pagdawat sa ganti. Determinado silang molahutay sa lumba. Walay duhaduha, nangandoy pod kang makita nga ibindikar ni Jehova ang iyang ngalan ug pagkasoberano ug tumanon ang tanan niyang saad. Makaseguro ka nga mahitabo kini sa panahon nga gitakda ni Jehova. Sa dili pa kana mahitabo, hinaot magmapuliki ta sa pag-alagad sa Diyos, nga dili gayod tugotan nga maluya ta tungod sa wala dayon matuman nga mga pagdahom. w19.08 4-5 ¶9-10

Pangutan-a ang kaugalingon: ‘Nailhan ba ko nga lumo ug mapainubsanon? Mohimo ba kog ubos nga mga trabaho sa pag-alagad sa uban? Buotan ba ko?’ Gihimo ni Jesus nga malinawon ug makapalipay ang kahimtang sa pagbuhat uban kaniya, ug nalipay siya sa pagbansay sa iyang mga kauban. (Luc. 10:1, 19-21) Gidasig niya ang iyang mga tinun-an sa pagpangutana, ug gusto niyang madungog ang ilang mga opinyon. (Mat. 16:13-16) Samag mga tanom nga gipanalipdan batok sa dili maayong klima, ang mga tinun-an mitubo, o miuswag. Ilang nasabtan ang mga leksiyon nga gitudlo ni Jesus ug sila namungag maayong mga buhat. Duna ba kay awtoridad? Kon mao, pangutan-a ang kaugalingon: ‘Giunsa nako pagtratar ang uban diha sa trabahoan ug sa balay? Naningkamot ba ko nga mahimong malinawon ug makapalipay ang kahimtang? Gidasig ba nako ang uban sa pagpangutana? Ug andam ba kong maminaw sa ilang mga opinyon?’ Dili gyod nato gustong sundogon ang mga Pariseo, nga nasuko niadtong nangutana nila ug naglutos niadtong lahi nilag opinyon.​—Mar. 3:1-6; Juan 9:29-34. w19.09 20 ¶1; 23 ¶9-11

Ang mga lider sa kalibotan mogamit usahay ug susamang ekspresyon dihang maghisgot sila bahin sa pagpauswag sa relasyon tali sa mga nasod. Pero lahi niana ang pagdeklarar sa “kalinaw ug kasegurohan” nga giingon sa Bibliya. Ngano? Dihang mahitabo kini, daghan ang maghunahuna nga ang mga lider sa kalibotan milampos sa paghimo sa kalibotan nga mas luwas. Pero sa pagkatinuod, magsugod na ang “dakong kasakitan” ug unya mahitabo ang “kalit nga kalaglagan.” (Mat. 24:21) Wala ta mahibalo kon unsay makaaghat sa mga lider sa pagdeklarar niana o kon sa unsang paagi himoon nila kana. Ug wala ta mahibalo kon kana ba kas-a lang nga deklarasyon o sunodsunod ba nga pahibalo. Bisan unsa pay mahitabo, mao ni atong nahibaloan: Dili ta angayng malimbongan sa paghunahuna nga makab-ot gyod sa mga lider ang kalinaw sa tibuok kalibotan. Hinunoa, ilhanan kana nga magsugod na ang “adlaw ni Jehova”!​—1 Tes. 5:2. w19.10 8-9 ¶3-4

Ang gubat sa Armagedon mao ang kataposang panghitabo nga magtapos niining sistemaha sa mga butang. Pero wala tay angayng kahadlokan. Ngano? Tungod kay ang Diyos maoy makig-away. (Prov. 1:33; Ezeq. 38:18-20; Zac. 14:3) Dihang ihatag na ni Jehova ang mando, pangunahan ni Jesu-Kristo ang kasundalohan sa Diyos sa pagpakiggubat. Kauban niya ang nabanhawng mga dinihogan ug ang tinagpulo ka libong mga anghel. Sila makig-away kang Satanas, sa iyang mga demonyo, ug sa ilang kasundalohan sa yuta. (Pin. 6:2; 17:14) Si Jehova nagpasalig: “Walay hinagiban nga gibuhat batok kanimo ang magmalamposon.” (Isa. 54:17) “Usa ka dakong panon” sa matinumanong mga magsisimba ni Jehova ang makalabang sa dakong kasakitan! Unya padayon silang maghatag kaniyag sagradong pag-alagad. (Pin. 7:9, 13-17) Ang Bibliya naghatag natog daghang rason sa pagsalig nga maluwas ta sa umaabot. Nahibalo ta nga “panalipdan ni Jehova ang mga matinumanon.” (Sal. 31:23) Ang tanang nahigugma ug nagdayeg kang Jehova malipay dihang makita nila nga ibindikar niya ang iyang balaang ngalan.​—Ezeq. 38:23. w19.10 18-19 ¶17-18

Samtang magkaduol ang kataposan sa “kataposang mga adlaw,” mahimong makasinati tag grabeng mga kalisdanan. (2 Tim. 3:1) Pananglitan, human sa eleksiyon sa usa ka nasod sa kasadpang Africa, dihay nahitabong kagubot ug grabeng pag-awayay. Sa kapig unom ka bulan, delikado kaayo ang kahimtang sa mga igsoon. Unsay nakatabang nila nga makalahutay sa maong mga kalisdanan? Ang uban midangop sa balay sa mga igsoon sa medyo luwas nga dapit. Usa ka brader ang miingon: “Sa maong kahimtang, naapresyar gyod nako nga kauban nako ang akong mga higala. Nagkadinasigay mi.” Dihang mahitabo ang “dakong kasakitan,” maapresyar gyod nato kon duna tay mga higala nga nahigugma kanato. (Pin. 7:14) Busa kinahanglan nga makigsuod na ta karon sa mga igsoon. (1 Ped. 4:7, 8) Ngano? Tungod kay ang atong mga kaaway maningkamot nga magkabahinbahin ta pinaagi sa sayop nga mga impormasyon. Gusto nilang mawad-an tag pagsalig sa usag usa ug dili magtinabangay. Pero dili sila molampos. Dili nila mabungkag ang atong gugma sa usag usa. w19.11 2 ¶1-2; 7 ¶19

Si Satanas, “ang amahan sa bakak,” naggamit niadtong ilalom sa iyang pagkontrolar aron magpakaylap ug mga bakak bahin kang Jehova ug sa atong mga igsoon. (Juan 8:44) Pananglitan, ang mga apostata nagpakaylap ug mga bakak ug tinuis nga mga impormasyon bahin sa organisasyon ni Jehova diha sa mga website, TV, ug ubang klase sa media. Kana nga mga bakak apil sa “nagdilaab nga [mga] pana” ni Satanas. Unsay angay natong buhaton kon sultihan tag bakak nga sama niana? Dili ta maminaw! Ngano? Tungod kay duna tay pagtuo kang Jehova ug pagsalig sa atong mga igsoon. Sa pagkatinuod, likayan nato ang bisan unsang kontak sa mga apostata. Dili ta makiglalis nila sa bisan unsang butang o bisan unsang rason, bisag tuyo lang nato nga mahibaloan kon unsay ilang isulti. Dili sab nato tugotan si bisan kinsa o ang bisan unsa nga makapahuyang sa atong pagtuo. Napugngan ba nimo ang imong kaugalingon sa pagpaminaw ug pagpakiglalis sa mga apostata bahin sa mga bakak nga ilang gipakaylap? Dalayegon kana. Pero kinahanglan tang magbantay kay si Satanas dunay laing mga hinagiban nga sulayan niyag gamit batok kanato. w19.11 15 ¶8; 16-17 ¶11

Dihang mohimog desisyon, analisaha ang imong mga motibo. Gusto ni Jehova nga magmatinud-anon ta sa tanang butang. Busa dihang modesisyon ta, gusto sab natong magmatinud-anon sa kaugalingon ug sa uban bahin sa atong mga motibo. Kon dili ta magmatinud-anon, lagmit malisdan ta sa pag-implementar sa atong desisyon. Pananglitan, ang usa ka batan-ong brader nakadesisyon tingali nga mag-regular payunir. Pero paglabay sa panahon, naglisod siya sa pagkab-ot sa kinahanglanong oras ug dili na kaayo siya malipayon sa iyang ministeryo. Tingali naghunahuna siya nga ang iyang pangunang motibo sa pagpayunir mao ang iyang tinguha nga malipay si Jehova. Pero, posible kaha nga nagpayunir siya tungod lang kay gusto niyang malipay ang iyang ginikanan o ang laing tawo nga iyang gidayeg? Tagda ang kahimtang sa usa ka Bible study nga nakadesisyon sa paghunong sa pagpanigarilyo. Sa sinugdan, nakigbisog siya, nga wala manigarilyo sulod sa usa o duha ka semana. Apan unya, nakapanigarilyo na pod siya. Pero sa kataposan, nakahunong ra gyod siya! Ang iyang gugma kang Jehova ug ang iyang tinguha nga mapalipay Siya nakatabang niya sa pagbiya sa maong bisyo.​—Col. 1:10; 3:23. w19.11 27 ¶9; 29 ¶10

Si apostol Pablo masaligon nga iyang mahuman ang lumba ug makab-ot ang iyang tumong. Ingong dinihogang Kristohanon, naglaom siya nga madawat ang “ganti nga kinabuhi sa langit nga ihatag sa Diyos.” Pero aron makab-ot ang maong tumong, naamgohan niya nga kinahanglan siyang ‘maningkamot pag-ayo.’ (Filip. 3:14) Si Pablo migamit ug makapainteres nga ilustrasyon aron tabangan ang mga taga-Filipos sa pagpokus sa ilang tumong. Gipahinumdoman ni Pablo ang mga taga-Filipos nga ang ilang pagkalungsoranon maoy langitnon. (Filip. 3:20) Nganong angay nâ nilang hinumdoman? Niadtong panahona, gipabilhan pag-ayo ang Romanhong pagkalungsoranon. Pero, mas labaw ang pagkalungsoranon sa dinihogang mga Kristohanon kay kini mas daghag benepisyo. Wala ra sa kumingking ang mga benepisyo sa Romanhong pagkalungsoranon! Ang dinihogang mga Kristohanon karon nagpakitag maayong ehemplo samtang naningkamot sila pag-ayo sa pagkab-ot sa ilang tumong, ang walay kataposang kinabuhi sa langit. w19.08 6 ¶14-15

Kana nga kagawasan mas labaw gayod kay sa bisan unsa nga puwedeng mabatonan sa mga Israelinhon sa tuig sa Pagsadya! (Lev. 25:8-12) Pananglitan, ang tawo nga napahigawas sa tuig sa Pagsadya puwedeng maulipon pag-usab, ug sa ngadtongadto, siya mamatay. Niadtong Pentekostes 33 C.E., gidihogan ni Jehova ug balaang espiritu ang mga apostoles ug ang ubang matinumanong lalaki ug babaye. Iyang gisagop sila ingong iyang mga anak aron nga sa umaabot, sila mabanhaw ngadto sa langit ug maghari kauban ni Jesus. (Roma 8:2, 15-17) Sila ang unang nakabenepisyo sa kagawasan nga gimantala ni Jesus sa sinagoga sa Nasaret. (Luc. 4:16-19, 21) Sila wala na maulipon sa sayop nga mga pagtulon-an ug dili Kasulatanhong mga kostumbre sa Hudiyong mga lider sa relihiyon. Giisip pod sila sa Diyos nga napahigawas na sa sala nga moresultag kamatayon. Ang simbolikong tuig sa Pagsadya nga nagsugod dihang gidihogan ang mga sumusunod sa Kristo niadtong 33 C.E. matapos dihang mahuman na ang Usa ka Libo ka Tuig nga Pagmando ni Jesus. w19.12 11 ¶11-12

Mga ginikanan, tabangi ang inyong mga anak sa pagpilig maayong mga higala. Ang amahan ug inahan kinahanglang mahibalo kon kinsay mga kauban sa ilang anak ug kon unsay ilang ginahimo. Nagpasabot ni nga kinahanglan pong mahibalo ang ginikanan kon kinsay ka-chat o kaestorya sa ilang anak diha sa social media ug cellphone. Ang mga kauban sa ilang anak makaimpluwensiya sa hunahuna ug binuhatan niini. Daghang ginikanan ang naghimog mga paagi aron makauban sa ilang mga anak ang mga igsoon nga maayong ehemplo sa pag-alagad sa Diyos. Pananglitan, ang magtiayong taga-Côte d’Ivoire nga si N’Déni ug Bomine sagad magpaestar sa tigdumala sa sirkito sa ilang balay. Si N’Déni miingon: “Maayo kaayo nig epekto sa among anak. Nagpayunir siya ug karon nag-alagad na ingong substitute nga tigdumala sa sirkito.” Mas maayo ang resulta kon sugdan pagbansay sa mga ginikanan ang ilang mga anak samtang bata pa kini. (Prov. 22:6) Kanay nahitabo kang Timoteo. Gitudloan siya sa iyang inahang si Eunice ug sa iyang lola nga si Loida ‘sukad sa iyang pagkatawo.’​—2 Tim. 1:5; 3:15. w19.12 25 ¶14; 26 ¶16-17

Paningkamot nga mahimong kasaligang higala. Pananglitan, imbes pasaligan lang natog tabang ang mga igsoon nga nanginahanglan, mohimo pod tag praktikal nga mga butang sa pagtabang kanila. (Mat. 5:37; Luc. 16:10) Kon kadtong nanginahanglag tabang nahibalo nga makasalig sila nato, mahupayan gyod sila. Usa ka sister misulti kon ngano. Siya miingon, “Dili na madugangan ang imong stress kay nahibalo ka nga kadtong misaad ug tabang moabot gyod aron tumanon ang iyang giingon.” Kadtong nag-atubag kalisdanan o naa sa kagul-anan sagad mahupay kon ila ning masulti sa usa ka kasaligang higala. Pero aron mahimo tang kasaligang higala nga kasultihan sa uban, kinahanglan natong ugmaron ang pailob. Si Zhanna, nga gibiyaan sa iyang bana, nahupayan dihang gisulti niya sa iyang suod nga mga higala ang iyang gibati. Siya miingon, “Mapailobon silang naminaw nako bisag balikbalik na lang tingali ang akong gipanulti.” Mapakita sab nimo nga maayo kang higala kon mapailobon kang maminaw. w20.01 10-11 ¶9-11

Sa Bibliya, daghang tawo nga may pagtuo ang nakadawat ug balaang espiritu; pero, ang ilang paglaom dili sa langit. Si David gigiyahan sa balaang espiritu. (1 Sam. 16:13) Ang balaang espiritu nagtabang kaniya nga makasabot sa lawom nga mga butang bahin kang Jehova ug naggiya kaniya sa pagsulat sa pipila ka bahin sa Bibliya. (Mar. 12:36) Bisan pa niana, si apostol Pedro miingon nga si David “wala mosaka sa kalangitan.” (Buh. 2:34) Si Juan nga Tigbawtismo ‘napuno sa balaang espiritu.’ (Luc. 1:13-16) Si Jesus miingon nga walay tawong labaw kang Juan, pero miingon siya nga si Juan dili bahin sa langitnong Gingharian. (Mat. 11:10, 11) Gigamit ni Jehova ang iyang balaang espiritu sa paghatag kanilag gahom sa paghimog talagsaong mga butang, pero wala niya gamita ang maong espiritu sa pagpili kanila aron mopuyo sa langit. Nagpasabot ba ni nga dili kaayo sila matinumanon? Wala. Nagpasabot kana nga banhawon sila ni Jehova aron magpuyo sa Paraiso dinhi sa yuta.​—Juan 5:28, 29; Buh. 24:15. w20.01 23 ¶15

Si Jehova nagdapit kanato nga mahimong bahin sa iyang pamilya sa mga magsisimba. Ang atong pamilya gilangkoban niadtong nagpahinungod sa ilang kaugalingon sa Diyos ug nagpakitag pagtuo sa halad lukat sa iyang Anak. Kita malipayon nga pamilya. Ang atong kinabuhi karon mapuslanon, ug nalipay ta sa paglaom nga mabuhi sa walay kataposan​—sa langit man o sa Paraiso sa yuta. Tungod sa gugma, si Jehova mihimog dakong sakripisyo aron mabuksan ang kahigayonan nga mahimo tang bahin sa iyang pamilya. (Juan 3:16) Kita ‘gipalit sa usa ka bili.’ (1 Cor. 6:20) Pinaagi sa lukat, gipaposible ni Jehova nga masuod ta kaniya. Kadungganan nato nga matawag ug Amahan ang kinalabwang Persona sa uniberso. Ug si Jehova ang kinamaayohang Amahan. Sama sa usa ka magsusulat sa Bibliya, tingali makapangutana ta: “Unsay akong ibalos kang Jehova sa tanang maayo nga iyang gibuhat alang kanako?” (Sal. 116:12) Ang tinuod, dili gyod ta bug-os makabalos sa kaayo sa atong langitnong Amahan. Pero makahimo ta sa paghigugma kaniya. w20.02 8 ¶1-3