Hunyo

Si Ana, nga inahan ni propetang Samuel, nag-atubang ug bug-at nga mga problema. Sulod sa daghang tuig, dili siya makaanak. (1 Sam. 1:2) Sa kultura sa mga Israelinhon, ang babayeng baog giisip nga tinunglo. Busa naulaw kaayo siya. (Gen. 30:1, 2) Mas grabe pa, ang iyang bana may mga anak sa laing asawa nga si Penina. Gibiaybiay ni Penina si Ana bahin niini. Naguol kaayo si Ana sa iyang situwasyon. Tungod niana, “siya mohilak ug dili mokaon.” “Pait kaayo ang gibati ni Ana.” (1 Sam. 1:7, 10) Sa unsang paagi nahupayan siya? Gisulti ni Ana kang Jehova sa pag-ampo kon unsa gyoy iyang gibati. Human niana, iyang gisulti sa hataas nga saserdoteng si Eli ang iyang situwasyon. Unya giingnan siya ni Eli: “Lakaw nga malinawon, ug hinaot ihatag sa Diyos sa Israel ang imong gihangyo.” Unsay resulta? Si Ana “milakaw ug mikaon, ug ang iyang nawong dili na magul-anon.” (1 Sam. 1:17, 18) Ang pag-ampo nakatabang kang Ana nga magmalinawon. w20.02 21 ¶4-5

Hapit nang taposon ni Jehova kining sistemaha. Kadto lang “nakiling sa pagdawat sa kamatuoran nga motultol sa kinabuhing walay kataposan” ang maluwas. (Buh. 13:48) Busa natural lang nga gusto sab nato nga ang atong pamilya moduyog nato sa pag-alagad kang Jehova. Ang atong mahigugmaong Amahan, si Jehova, “dili . . . gusto nga naay malaglag kondili gusto niya nga ang tanan maghinulsol.” (2 Ped. 3:9) Kinahanglang hinumdoman nato nga dunay husto ug sayop nga paagi sa pagpaambit sa mensahe sa kaluwasan. Bisan tuod mataktikanhon tingali ta dihang mosangyaw sa dili nato kaila, basin prangka ra kaayo ta dihang mosangyaw sa atong pamilya. Kon hinumdoman nato ang unang higayon nga misangyaw ta sa atong pamilya, daghan tingali kanato ang magbasol sa atong paagi sa pagsangyaw, ug maghunahuna ta nga unta dili ingon niadto ang atong gihimo. Maayong hinumdoman ang tambag ni apostol Pablo, nga gihisgotan sa teksto karong adlawa, dihang makig-estorya ta sa atong pamilya. Kay kon dili, basin masuko sila imbes maminaw. w19.08 14-15 ¶3-5

Unsay imong reaksiyon sa dihang nakat-onan nimo ang mosunod nga mga kamatuoran bahin sa Anak? Si Jesus ang ikaduha nga labing importanteng persona sa uniberso. Siya ang atong Manlulukat. Kinabubut-on niyang gihatag ang iyang kinabuhi alang kanato. Sa dihang ipakita nato sa atong mga binuhatan nga nagtuo ta sa lukat, kita mahimong mapasaylo sa atong mga sala, makaugmad ug suod nga relasyon sa Diyos, ug makabatog kinabuhing walay kataposan. (Juan 3:16) Si Jesus ang atong Hataas nga Saserdote. Gusto ta niyang tabangan nga makabenepisyo sa lukat ug masuod sa Diyos. (Heb. 4:15; 7:24, 25) Ingong Hari sa Gingharian sa Diyos, siya ang gamiton ni Jehova sa pagbalaan sa Iyang ngalan, pagtapos sa pagkadaotan, ug paghatag ug walay kataposang mga panalangin sa umaabot nga Paraiso. (Mat. 6:9, 10; Pin. 11:15) Si Jesus mao ang atong sulondan. Nagpakita siyag ehemplo kanato sa paggamit sa iyang kinabuhi sa pagbuhat sa kabubut-on sa Diyos. (Juan 4:34) Kon dawaton nimo ang gitudlo sa Bibliya bahin kang Jesus, makakat-on ka sa paghigugma sa pinalanggang Anak sa Diyos. Ang maong gugma magpalihok nimo sa paggamit sa imong kinabuhi sa pagbuhat sa kabubut-on sa Diyos, sama sa gihimo ni Jesus. w20.03 10 ¶12-13

Kadaghan nag-ampo si Jesus sa iyang kataposang adlaw sa yuta. Dihang gipakita niya sa mga tinun-an kon unsaon paghandom ang iyang kamatayon, nag-ampo siya para sa tinapay ug bino. (1 Cor. 11:23-25) Una mobiya sa lugar diin sila nagsaulog sa Paskuwa, nag-ampo siya uban sa mga tinun-an. (Juan 17:1-26) Pag-abot nila sa Bukid sa mga Olibo niadtong gabhiona, kadaghan siyang nag-ampo. (Mat. 26:36-39, 42, 44) Ug ang iyang kataposang mga pulong una mamatay maoy pag-ampo. (Luc. 23:46) Giampo ni Jesus kang Jehova ang tanang importanteng panghitabo niadtong adlawa. Ang usa sa mga rason nga nakalahutay si Jesus mao ang iyang pag-ampo kanunay sa iyang Amahan. Sa laing bahin, ang mga apostoles wala magpadayon sa pag-ampo niadtong gabhiona. Ingong resulta, naluya sila dihang gisulayan. (Mat. 26:40, 41, 43, 45, 56) Dihang makaatubang tag kalisdanan, makapabilin lang tang matinumanon kon atong sundogon si Jesus ug “mag-ampo nga mapinadayonon.” w19.04 9 ¶4-5

Gidumtan ni Jehova ang espiritismo! Iyang giingnan ang mga Israelinhon: “Walay makaplagan diha kanimo nga bisan kinsang magpaagi sa iyang anak nga lalaki o sa iyang anak nga babaye sa kalayo, bisan kinsa nga nagapanag-an, usa ka salamangkero o bisan kinsa nga nagapangitag mga tilimad-on o usa nga barangan, o usa nga tigpangdaot o bisan kinsa nga nagakonsultag espiritista o tigpanagna sa mga hitabo o bisan kinsa nga nagapakisayod sa mga patay. Kay bisan kinsa nga nagabuhat niining mga butanga dulumtanan kang Jehova.” (Deut. 18:10-12) Ang mga Kristohanon dili na ilalom sa Balaod nga gihatag ni Jehova sa mga Israelinhon. Pero kabalo ta nga wala mausab ang iyang pagbati sa espiritismo. Si Jehova nagpasidaan kanato bahin sa espiritismo kay nahibalo siya nga gigamit nâ ni Satanas aron daoton ang mga tawo. Gigamit niya ang espiritismo aron ipasiugda ang kabakakan​—apil niana ang bakak nga pagtulon-an nga ang mga patay buhi gihapon sa laing kalibotan. (Eccl. 9:5) Gigamit sab nâ ni Satanas aron mahadlok ang mga tawo ug mopalayo sila kang Jehova. Gusto niyang mosalig ang mga tawo sa daotang mga espiritu imbes kang Jehova. w19.04 21 ¶5-6

Grabeng sala ang pag-abuso ug bata. Gipasakitan pag-ayo sa tig-abuso ang bata. Iyang gitraydor ang bata ug gipabati kining dili luwas. Ang mga bata kinahanglang protektahan batok nianang daotan kaayong buhat, ug ang mga biktima kinahanglang hupayon ug tabangan. (1 Tes. 5:14) Kon ang usa diha sa kongregasyon mag-abuso ug bata, siya nagpakaulaw sa kongregasyon. (Mat. 5:16; 1 Ped. 2:12) Dili nato tugotan nga magpabilin sa kongregasyon kadtong dili mahinulsolong naghimog daotang mga butang ug nagdaot sa reputasyon sa kongregasyon. Kon dunay usa diha sa kongregasyon nga nakahimog krimen, sama sa pag-abuso ug bata, nakasala siya sa sekular nga awtoridad. (Itandi ang Buhat 25:8.) Ang mga ansiyano wala awtorisahi sa pagpatuman sa balaod sa gobyerno, pero dili nila protektahan ang nag-abuso ug bata batok sa silot nga ipahamtang sa balaod. w19.05 9 ¶4-7

Malamposon natong maatubang ang bisan unsang kalisdanan kay si Jehova ang atong Dakong Instruktor. (Isa. 30:20, 21) Ang iyang Pulong nagtudlo kanato sa tanan natong gikinahanglan aron kita makabaton ug “igong katakos” ug mahimong “andam gayod sa matag maayong buhat.” (2 Tim. 3:17) Kon magkinabuhi ta sumala sa mga pagtulon-an sa Bibliya, mahimo tang mas maalamon kay sa mga tawo nga nagpasiugda sa “kaalam niining kalibotana.” (Sal. 119:97-100) Ikasubo, ang kaalam sa kalibotan sagad makadani sa atong hakog nga mga tinguha. Busa malisdan tingali ta sa pagsukol sa tendensiya nga maghunahuna ug molihok sama niadtong naa sa kalibotan. Tungod niana, ang Bibliya nag-ingon: “Pagbantay nga dili mo malit-agan sa uban pinaagi sa pilosopiya ug sayop nga mga pangatarongan nga gibase sa tradisyon sa mga tawo.” (Col. 2:8) Sumala sa gitagna sa Bibliya, ang mga tawo sa kataposang mga adlaw mahimong “mahigugmaon sa kalipayan.” (2 Tim. 3:4) Ang pagdaghan sa sakit nga mapasa pinaagig pakigsekso, sama sa AIDS, maoy usa lang sa mga pamatuod nga kabuangan ang kaalam sa kalibotan.​—2 Ped. 2:19. w19.05 21 ¶1-2; 22 ¶4-5

Gipatuo ni Satanas ang mga Israelinhon nga aron maabunda ang ilang abot, kinahanglang sundon nila ang mga kostumbre sa paganong mga tawo sa ilang palibot. Ang maong mga tawo nagtuo nga magpaulan lang ang ilang mga diyos kon mohimo silag mga rituwal. Kadtong walay pagtuo kang Jehova naghunahuna nga kini lang ang paagi nga malikayan ang taas nga hulaw, busa naghimo silag paganong mga rituwal sa pagsimba sa bakak nga diyos, si Baal. Gipukaw sab ni Satanas ang imoral nga tinguha. Ang paganong mga nasod nagsimba sa ilang mga diyos pinaagi sa paghimog luod kaayong imoral nga mga buhat. Apil niining imoral nga paagi sa pagsimba ang pagpamampam sa mga babaye ug lalaki diha sa templo. Ang homoseksuwalidad ug ubang klase sa seksuwal nga imoralidad wala lang tugoti kondili nahimo nang normal! (Deut. 23:17, 18; 1 Hari 14:24) Nagtuo ang mga pagano nga kini nga mga rituwal mag-aghat sa ilang mga diyos sa paghimo sa yuta nga tambok. Daghang Israelinhon ang nadani sa imoral nga mga rituwal sa mga pagano ug sa pagsimba sa bakak nga mga diyos. w19.06 2 ¶3; 4 ¶7-8

Linibo ka bug-os panahong mga alagad, apil niadtong nag-alagad sa Bethel, ang nakadawat ug bag-ong mga asaynment. Mahimong malisdan kining matinumanong mga igsoon sa pagbiya sa asaynment nga gimahal nila pag-ayo. Kon usa ka kanila, unsay makatabang nimo sa pag-adyas niini nga kausaban? Pabiling suod kang Jehova pinaagi sa pagbasa sa Kasulatan kada adlaw ug pagpalandong niini. Dugang pa, padayong himoa ang imong maarangan sa pagsangyaw sa maayong balita diha sa imong bag-ong kongregasyon. Hinumdoman ni Jehova kadtong padayong nag-alagad kaniya nga matinumanon, bisan pag dili na nila mahimo ang sama sa nahimo nila kaniadto. Pabiling simple. Ayaw tugoti nga ang mga kabalaka sa kalibotan ni Satanas ‘motuok’ sa imong espirituwal nga kalihokan. (Mat. 13:22) Ayawg papresyur sa kalibotan o sa mga higala o paryente nga tingali motambag nimo nga kinahanglan kang mokitag dako aron moarang-arang ang imong kinabuhi. (1 Juan 2:15-17) Salig kang Jehova, kinsa nagsaad nga itagana ang tanan natong panginahanglan sa espirituwal, emosyonal, ug materyal ‘dihang manginahanglan ta’ niana.​—Heb. 4:16; 13:5, 6. w19.08 20 ¶4; 21-22 ¶7-8

Naa ba kay problema nga nakapa-stress nimo? Makapahupay gyong mahibalo nga si Jehova nakasabot sa atong giatubang nga mga problema. Nahibalo siya sa atong mga limitasyon, bisan gani sa atong gihunahuna ug gibati. (Sal. 103:14; 139:3, 4) Kon mosalig ta kang Jehova, makadawat tag tabang sa pag-atubang sa mga problema nga nakapa-stress nato. Ang stress makapanegatibo sa imong hunahuna ug makapaluya nimo. Kon mahitabo nâ, hinumdomi nga tabangan ka ni Jehova sa pagsagubang sa stress. Unsaon ka niya pagtabang? Siya nag-awhag nga imong isulti kaniya ang imong mga kabalaka, ug iyang tubagon ang imong pagpangayog tabang. (Sal. 5:3; 1 Ped. 5:7) Busa iampo pirme kang Jehova ang imong mga problema. Dili siya direktang makig-estorya, pero siya makig-estorya nimo pinaagi sa iyang Pulong, ang Bibliya, ug pinaagi sa iyang organisasyon. Ang mga asoy nga imong mabasa sa Bibliya makapahupay nimo ug makahatag nimog paglaom. Ang mga igsoon makadasig sab nimo.​—Roma 15:4; Heb. 10:24, 25. w19.06 16 ¶7-8

Dihang lutoson, mag-ampo kang Jehova, “ibubo ang imong kasingkasing [kaniya] sama sa tubig,” ug isulti sa imong mahigugmaong Amahan ang tanan nimong gikahadlokan ug gikabalak-an. (Lam. 2:19) Kon moampo ka kang Jehova nianang paagiha, mas masuod ka kaniya. (Roma 8:38, 39) Magmasaligon nga ang tanang panalangin sa Gingharian sa Diyos matuman. (Num. 23:19) Kon wala gyod ka motuo niining mga saara, dali ra kang hadlokon ni Satanas ug sa iyang mga sakop. (Prov. 24:10; Heb. 2:15) Paggahin ug panahon sa pagtuon sa mga saad sa Diyos bahin sa iyang Gingharian ug sa mga rason kon nganong makaseguro ka nga matuman kini. Sa unsang paagi makatabang kana? Tagda ang pananglitan ni Stanley Jones, nga naprisog pito ka tuig tungod sa iyang pagtuo. Unsay nakatabang niya nga makalahutay nga matinumanon? Siya miingon: “Sanglit ginapalig-on sa kahibalo mahitungod sa gingharian sa Dios, sanglit nakaseguro ako niini, nga wala gayuy pagduhaduha bisan diyutay, ako wala gayud matarug.” Kon lig-on ang imong pagtuo sa mga saad sa Diyos, dili ka madaog sa kahadlok.​—Prov. 3:25, 26. w19.07 2 ¶1; 3 ¶6-7

Nganong importante kaayo ang paghimog mga tinun-an? Tungod kay mga tinun-an lang sa Kristo ang puwedeng mahimong higala sa Diyos. Dugang pa, kadtong nagsunod sa Kristo mas maayog kinabuhi karon ug may paglaom nga mabuhi sa walay kataposan sa umaabot. (Juan 14:6; 17:3) Oo, gipiyalan ta ni Jesus ug importanteng responsibilidad, pero dili kay kitakita ray naghimo niining buluhatona. Si apostol Pablo misulat bahin sa iyang kaugalingon ug sa pipila niya ka suod nga kauban: “Kami mga isigkamagbubuhat sa Diyos.” (1 Cor. 3:9) Pagkadakong pribilehiyo ang gihatag ni Jehova ug ni Jesu-Kristo ngadto sa dili hingpit nga mga tawo! Dugang pa, ang paghimog mga tinun-an makahatag natog dakong kalipay. Ang unang lakang nga atong himoon sa paghimog mga tinun-an mao ang ‘pagpangita’ niadtong gustong makakat-on bahin kang Jehova. Atong mapamatud-an nga tinuod ta nga mga Saksi ni Jehova kon sangyawan nato ang tanan nga atong mahibalag. Atong mapamatud-an nga tinuod ta nga mga Kristohanon kon tumanon nato ang sugo sa Kristo nga magsangyaw. w19.07 15 ¶3-5

Daghan ang unang mainteres sa praktikal nga kaalam sa Bibliya. Sa New York, usa ka sister nga nagsangyaw sa mga tawong nagsultig Mandarin miingon: “Naningkamot ko nga magpakitag interes sa mga tawo ug maminaw nila. Kon mahibaloan nako nga bag-o lang silang mibalhin gikan sa laing nasod, mangutana ko: ‘Komosta ang imong pagbalhin dinhi? Nakakita ka na bag trabaho? Okey ra ba ang pagtratar sa mga tawo nimo?’” Usahay makatabang ni aron makasugod siyag sangyaw. Kon haom, ang sister moingon: “Unsa kahay angayng buhaton aron makasinabot nato ang mga tawo? Puwede ba nakong ipakita nimo ang usa ka panultihon sa Bibliya? Kini nag-ingon: ‘Ang pagsugod ug away samag pag-ablig ganghaan sa tubig; sa dili pa modako ang away, biya na.’ Sa imong hunahuna, makatabang kaha ni aron naa tay maayong relasyon sa uban?” (Prov. 17:14) Kini nga pagpakig-estorya makatabang nato sa pag-ila kon kinsay interesadong magpaduaw pag-usab. w19.07 23 ¶13

Kadtong mibalhin sa bag-ong asaynment nagkinahanglag pagsabot, dili kaluoy. Tingali sila o ang membro sa ilang pamilya nag-atubag problema sa panglawas. Basin nagbangotan sila tungod sa kamatayon sa usa ka minahal. Ug basin naguol kaayo sila, bisan sa tago lang, tungod kay gimingaw sila sa mga igsoon sa ilang asaynment kaniadto. Nagkinahanglan silag panahon sa pag-atubang niining nagsagol nga pagbati. Sa kasamtangan, ang imong pagsuportar ug ehemplo makatabang nila sa pag-adyas. “Sa akong asaynment kaniadto, nagdumala kog mga Bible study kada adlaw,” miingon ang usa ka sister nga nag-alagad sa laing nasod sa daghang katuigan. “Sa akong bag-ong asaynment, halos dili gani ko makaablig Bibliya o makapakitag video diha sa ministeryo. Pero paubanon ko sa mga igsoon sa ilang mga balikduaw ug study. Tungod niini, nakabaton kog mas positibong panglantaw. Nakakat-on ko sa pagsugod ug panaghisgot dinhi sa bag-ong teritoryo. Kining tanan nakatabang nga mahibalik ang akong kalipay.” w19.08 22 ¶10; 24 ¶13-14

Sama ni Euodia ug Sintique, usahay malisdan kaayo ta sa pagpakitag gugma sa uban kay nagpokus ta sa kasaypanan. Kitang tanan masayop kada adlaw. Kon magpokus ta sa kasaypanan sa uban, mobugnaw ang atong gugma kanila. Pananglitan, kon ang usa ka igsoon malimot sa pagtabang nato sa paghinlo sa Kingdom Hall, basig maglagot ta. Kon magsugod tag hunahuna sa uban pang sayop sa maong brader, basin mosamot tag kalagot ug ang atong gugma niya mobugnaw. Kon ingon niana ang imong kahimtang, maayong pamalandongon kini: Nakita ni Jehova ang atong kasaypanan ug nianang sa atong igsoon. Bisan pa niana, gihigugma gihapon ta niya ug ang atong igsoon. Busa kinahanglan natong sundogon ang gugma ni Jehova ug magpokus sa maayong mga hiyas sa atong mga igsoon. Kon maningkamot ta sa paghigugma sa atong mga igsoon, atong mapalig-on ang atong panaghiusa.​—Filip. 2:1, 2. w19.08 9-10 ¶7-8

Si Jehova nahigugma sa mga mapainubsanon. Kadto lang tinuod nga mapainubsanon ang puwedeng makabaton ug suod, personal nga relasyon kaniya. Sa laing bahin, “halayo [si Jehova] sa mapahitas-on.” Gusto natong tanan nga mapalipay si Jehova ug matagamtam ang iyang mainitong gugma. Busa may maayo tang mga rason nga ugmaron ang pagkamapainubsanon. Ang tawong mapainubsanon dili maghunahuna nga mas importante siya sa uban, ug dili siya hambogiro. Gipakita sa Bibliya nga ang tawong mapainubsanon may hustong panglantaw sa iyang relasyon kang Jehova nga Diyos ug sa iyang isigkatawo. Giila niya nga ang matag usa mas labaw kaniya sa pipila ka paagi. (Filip. 2:3, 4) Ang pipila mapainubsanon lang tan-awon. Tingali maulawon sila o hilomon. O kaha matinahoron sila tungod sa ilang kultura ug sa pagpadako kanila. Pero tingali sa tinuoray, hambogiro kaayo sila. Sa madugay o sa madali, madayag kon unsa gyod sila.​—Luc. 6:45. w19.09 2 ¶1, 3-4

Ang “maayong balita bahin sa atong Ginoong Jesus” naglakip sa tanang kamatuoran nga gitudlo ni Jesus. Atong masunod ang maayong balita kon ato ning ipadapat. Apil sa maong pagsunod ang pag-una sa intereses sa Gingharian, pagkinabuhi subay sa matarong nga mga sukdanan sa Diyos, ug pagpahayag sa Gingharian sa Diyos. (Mat. 6:33; 24:14) Apil sab niini ang pagsuportar sa dinihogang mga igsoon sa Kristo samtang ilang ginatuman ang ilang bug-at nga mga responsibilidad. (Mat. 25:31-40) Sa dili madugay sila magbalos sa kaayo nga gipakita kanila sa “ubang mga karnero.” (Juan 10:16) Sa unsang paagi? Sa dili pa magsugod ang gubat sa Armagedon, ang tanang membro sa 144,000 naa na sa langit ingong imortal nga espiritung mga persona. Unya mahimo silang bahin sa langitnong kasundalohan nga bug-os nga maglaglag kang Gog ug manalipod sa “dakong panon” sa katawhan ni Jehova. (Pin. 2:26, 27; 7:9, 10) Oo, pagkadakong pribilehiyo sa dakong panon nga nakatabang sila sa dinihogang mga alagad ni Jehova sa dinhi pa sa yuta ang mga dinihogan! w19.09 12-13 ¶16-18

Nganong mobati tag kahayahay kon buhaton nato ang gisugo ni Jesus? Tungod kay duna tay pinakamaayong mga tigdumala. Si Jehova, ang atong Kinalabwang Tigdumala, dili bangis nga agalon nga walay apresasyon sa iyang mga alagad. Gipabilhan niya ang atong ginahimo. (Heb. 6:10) Ug gihatagan ta niya sa kusog nga atong gikinahanglan sa pagtuman sa atong mga responsibilidad. (2 Cor. 4:7; Gal. 6:5, footnote) Si Jesus, ang atong Hari, naghatag natog pinakamaayong ehemplo kon unsaon pagtratar ang uban. (Juan 13:15) Ug ang mga ansiyano nga nag-atiman kanato naningkamot sa pagsundog kang Jesus, ang “maayo kaayong magbalantay.” (Heb. 13:20; 1 Ped. 5:2) Naningkamot silang mahimong buotan, makapadasig, ug maisogon samtang sila nag-atiman ug nagprotektar kanato. Gawas pa, duna tay pinakamaayong mga higala. Walay laing nakabaton ug mahigugmaong mga higala ug makapalipayng buluhaton nga sama sa atong nabatonan. Hunahunaa lang: Pribilehiyo nato nga makauban sa buluhaton ang mga tawo nga dunay kinatas-ang sukdanan sa moral pero wala magpakamatarong sa kaugalingon. Giisip nila ang uban nga mas labaw kanila. Giisip sab ta nila ingong mga higala, dili lang ingong kauban sa buluhaton. Ug suod kaayo ta nila nga andam nilang ihatag ang ilang kinabuhi para kanato! w19.09 20 ¶1; 23 ¶12-14

Sa iyang tambag, si apostol Pablo naghisgot bahin sa “adlaw ni Jehova.” (1 Tes. 5:1-6) Niining tekstoha, kini nagtumong sa yugto sa panahon nga magsugod dihang atakehon ang “Bantogang Babilonya,” ang tibuok kalibotang imperyo sa bakak nga relihiyon, ug matapos sa Armagedon. (Pin. 16:14, 16; 17:5) Gisultian sab ta ni Pablo kon unsay angay natong buhaton aron mahimo tang andam sa “adlaw ni Jehova.” Dili ta angayng “mangatulog sama sa uban.” Kinahanglan nga ‘pabilin tang magmata’ ug magmaalerto sa kapeligrohan nga makompromiso ang atong neyutralidad pinaagi sa pag-apil-apil sa politikal nga mga isyu sa kalibotan. Kon mag-apil-apil ta niana, mahimo tang “bahin sa kalibotan.” (Juan 15:19) Nahibalo ta nga ang Gingharian sa Diyos lang ang makapatunghag kalinaw sa kalibotan. Gusto sab natong tabangan ang uban nga makamata maylabot sa gitagna sa Bibliya nga mahitabo sa kalibotan. Sa dihang magsugod na ang dakong kasakitan, ulahi na ang tanan para sa mga tawo sa pag-alagad kang Jehova. Kanay hinungdan nga dinalian kaayo ang atong buluhatong pagsangyaw! w19.10 8 ¶3; 9 ¶5-6

Pag-abot sa panahon nga ipadayag na ang nasulat sa linukot nga basahon, si Jeremias kinahanglang mosalig sa iyang higalang si Baruk sa pagsulti sa mensahe ngadto sa mga tawo. (Jer. 36:5, 6) Maisogong gituman ni Baruk ang iyang peligrosong asaynment. Maimadyin ba nimo ang kalipay ni Jeremias dihang miadto si Baruk sa hawanan sa templo ug gibasa niya ang linukot nga basahon atubangan sa mga tawo? (Jer. 36:8-10) Ang mga prinsipe sa Juda nakabalita sa gihimo ni Baruk, ug gisugo nila siya nga basahog kusog ngadto kanila ang linukot nga basahon! (Jer. 36:14, 15) Ang mga prinsipe midesisyon nga isulti kang Haring Jehoiakim ang giingon ni Jeremias. Si Haring Jehoiakim nasuko pag-ayo pagkadungog niya sa mga pulong nga gisulat ni Jeremias mao nga iyang gisunog ang linukot nga basahon ug siya nagsugo nga dakpon si Jeremias ug Baruk. Pero mikuha si Jeremias ug laing linukot nga basahon ug gihatag kini kang Baruk. Samtang gidiktar ni Jeremias ang mensahe ni Jehova, gisulat ni Baruk “ang tanang pulong sa linukot nga basahon nga gisunog ni Haring Jehoiakim sa Juda.”​—Jer. 36:26-28, 32. w19.11 3-4 ¶4-6

Si Jehova mahimong bisan unsa nga gikinahanglan sa pagtuman sa iyang katuyoan. Pananglitan, si Jehova nahimong Magtutudlo, Maghuhupay, ug Ebanghelisador, sa paghisgot lag pipila sa iyang mga papel. (Isa. 48:17; 2 Cor. 7:6; Gal. 3:8) Pero sagad, mogamit siyag mga tawo sa pagtuman sa iyang mga katuyoan. (Mat. 24:14; 28:19, 20; 2 Cor. 1:3, 4) Si Jehova makahatag sab kang bisan kinsa kanato sa kaalam ug kusog nga atong gikinahanglan aron mahimo tang bisan unsa nga gikinahanglan sa pagtuman sa iyang kabubut-on. Kining tanan apil sa kahulogan sa ngalan ni Jehova, sumala sa gisugyot sa ubay-ubayng mga eskolar. Gusto natong tanan nga mahimong mapuslanon kang Jehova, pero ang uban nagduhaduha kon gigamit ba sila ni Jehova. Ngano? Tungod kay gibati nila nga nalimitahan sila sa ilang edad, sirkumstansiya, o katakos. Sa laing bahin, ang uban tingali kontento na sa ilang ginahimo ug mibati nga dili na sila kinahanglang mohimog labaw pa. w19.10 20 ¶1-2

Ang materyalismo puwedeng mahimong hinungdan nga malinga ta ug mohuyang ang atong pagtuo. Si apostol Pablo miingon: “Walay tawo nga nagserbisyo ingong sundalo ang mosulod ug mga negosyo, aron uyonan siya sa nagdawat niya.” (2 Tim. 2:4) Gani, ang Romanong mga sundalo wala tugoti sa pagdawat ug ubang trabaho. Samag maayong mga sundalo, dili gyod ta magpalinga sa atong pangunang tumong​—ang pagkahimong inuyonan sa atong mga Komander, si Jehova ug Jesu-Kristo. Giisip nato kana nga mas bililhon kay sa bisan unsang butang nga atong makuha sa kalibotan ni Satanas. Paneguroon nato nga duna tay panahon ug kusog sa pag-alagad kang Jehova ug sa pagmentinar sa atong taming sa pagtuo ug sa uban pa natong espirituwal nga armadura. Kinahanglan nga kanunay tang magbantay. Ngano? Si apostol Pablo nagpasidaan nga “kadtong determinadong madato” mahisalaag gikan sa pagtuo.​—1 Tim. 6:9, 10. w19.11 17-18 ¶12, 14-15

Ang pagproklamar ug “kalinaw ug kasegurohan” mahitabo sa dili pa ang “adlaw ni Jehova.” (1 Tes. 5:1-6) Sa 1 Tesalonica 5:2, ang “adlaw ni Jehova” nagtumong sa “dakong kasakitan.” (Pin. 7:14) Unsaon nato pagkahibalo nga magsugod na ang maong kasakitan? Ang Bibliya nag-ingon nga dunay talagsaon kaayong proklamasyon. Kini magsilbing ilhanan nga magsugod na ang dakong kasakitan. Mao kana ang gitagna nga pagproklamar ug “kalinaw ug kasegurohan.” Moapil ba ang mga lider sa relihiyon? Posible. Bisan unsa pa man, nahibalo ta nga kini nga proklamasyon bakak, nga naggikan gayod sa mga demonyo. Apan peligroso kaayo kini nga bakak kay magtuo ang mga tawo nga luwas sila, pero sa pagkatinuod magsugod na ang kinagrabehang kasakitan sa kasaysayan sa tawo. Oo, “ang kalit nga kalaglagan modangat kanila sama sa kasakit nga bation sa babayeng manganakay.” Komosta ang maunongong mga alagad ni Jehova? Lagmit makuratan sila sa kalit nga pagsugod sa adlaw ni Jehova, pero andam sila niana. w19.09 9 ¶7-8

Dihang mohimog desisyon, magmaespesipiko. Kon mas espesipiko ka, mas dakog purohan nga imong matapos ang imong nasugdan. Pananglitan, nakadesisyon tingali ka nga himoong mas regular ang imong pagbasa sa Bibliya. Pero kon wala kay espesipikong eskedyul, lagmit dili ka molampos sa imong tumong. O ang mga ansiyano sa usa ka kongregasyon midesisyon tingali nga himoong mas regular ang pag-shepherding sa mga igsoon, pero milabay na lang ang taastaas nga panahon, wala gihapon nila maimplementar ang ilang desisyon. Aron molampos, mahimo nilang isukna ang mga pangutana nga sama niini: “Naghimo ba mig listahan sa mga igsoon nga makabenepisyo sa among pagduaw? Naghimo ba mig espesipikong eskedyul sa pagduaw kanila?” Dugang pa, magmarealistiko. Walay usa kanato ang dunay panahon, kabtangan, o kusog sa paghimo sa tanan nga gusto natong buhaton. Busa, magmarealistiko ug magmakataronganon. Basin kinahanglan nimong usbon ang desisyon nga dili nimo maimplementar. w19.11 29 ¶11-12

Ang kinabuhi sa yuta nianang panahona gitagna sa Isaias 65:21-23. Kini nga kinabuhi wala magpasabot nga wala na tay buhaton. Hinuon, gipakita sa Bibliya nga ang katawhan sa Diyos duna unyay mapuslanon ug makapatagbawng buluhaton. Inigkatapos sa Usa ka Libo ka Tuig nga Pagmando, makaseguro ta nga “ang kalalangan ipagawas sab gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.” (Roma 8:21) Sama nga si Jehova mihimog kahikayan aron dunay panahon ang mga Israelinhon sa pagtrabaho ug sa pagpahulay, mao pod nay iyang himoon sa iyang katawhan sa Usa ka Libo ka Tuig nga Pagmando sa Kristo. Segurado nga duna unyay panahon para sa espirituwal nga mga kalihokan. Ang pagsimba sa Diyos gikinahanglan aron magmalipayon ta karon, ug sa bag-ong kalibotan duna tay panahon para niana. Oo, ang tanang may pagtuo magmalipayon panahon sa Usa ka Libo ka Tuig nga Pagmando sa Kristo kay kitang tanan duna unyay makapatagbawng buluhaton ug espirituwal nga kalihokan. w19.12 12 ¶15; 13 ¶17-18

Ang “pagsilsil” nagpasabot ug “pagtudlo ug balikbalik nga pagpahinumdom.” Aron mahimo kana, ang mga ginikanan kinahanglang regular nga mogahin ug panahon sa ilang mga anak. Usahay kapoyon ang mga ginikanan kay kinahanglan nilang balikbalikog pahinumdom ang ilang mga anak. Pero puwede nila ning isipon ingong kahigayonan aron tabangan ang ilang mga anak nga masabtan ang Pulong sa Diyos ug ipadapat kini. Busa ilha pag-ayo ang imong mga anak. Sa Salmo 127, ang mga anak gipakasama sa udyong, o bala sa pana. (Sal. 127:4) Sama nga ang udyong lainlaig materyales ug gidak-on, ang mga bata dili sab magkaparehas. Busa kinahanglang hibaloon sa mga ginikanan kon unsaon pagbansay ang kada usa sa ilang mga anak. Ang magtiayong taga-Israel nga milampos sa pagtabang sa ilang duha ka anak sa pag-alagad kang Jehova misulti kon unsay nakatabang nila. Sila miingon, “Gitagsatagsa namo sila pag-Bible study.” Siyempre, ang ulo sa pamilya maoy modesisyon kon gikinahanglan o posible ba ni nga paagi sa pag-study. w19.12 26-27 ¶18-20

Dihang naa ta sa kalisdanan, mapasalamaton gyod ta niadtong mohatag natog praktikal nga tabang! “Daghang adlaw-adlaw nga buluhaton ang lisod kaayong himoon kon naa ka sa kasakit,” miingon si Ryan, nga namatyag amahan tungod sa aksidente. “Makapahupay gyod kon naay motabang bisan sa ginagmayng butang.” Hinumdomi nga bisan sa ginagmayng butang, makahupay ka pag-ayo sa uban. Ingong Kristohanon, daghag responsibilidad ang tinun-an sa unang siglo nga si Marcos. Pero si Marcos migahig panahon sa paghupay kang apostol Pablo, ug nahibalo si Pablo nga makapangayo siyag tabang kang Marcos. Si Angela, kinsa naguol pag-ayo dihang gipatay ang iyang lola, mapasalamaton niadtong mga mihupay kaniya. Siya miingon, “Kon ang mga igsoon gusto gyong motabang, dali ra silang duolon. Dili sila mag-ukon-ukon o magduhaduha sa pagtabang nimo.” Puwede natong pangutan-on ang kaugalingon, ‘Nailhan ba ko nga andam mohimog praktikal nga mga paagi sa paghupay sa mga igsoon?’ w20.01 11-12 ¶14-16

Sa unsang paagi ang usa ka dinihogan makaambit nga “dili takos” panahon sa Memoryal? Mahitabo kana kon siya mokaon ug moinom sa mga emblema pero wala siya magkinabuhi subay sa matarong nga mga sukdanan ni Jehova. (Heb. 6:4-6; 10:26-29) Ang mga dinihogan nahibalo nga angay silang magpabiling matinumanon aron ilang madawat ang “ganti nga kinabuhi sa langit nga ihatag sa Diyos niadtong iyang gitawag pinaagi ni Kristo Jesus.” (Filip. 3:13-16) Ang balaang espiritu ni Jehova nagtabang sa iyang katawhan nga mahimong mapainubsanon, dili garboso. (Efe. 4:1-3; Col. 3:10, 12) Busa ang mga dinihogan dili maghunahuna nga mas maayo sila kay sa uban. Nahibalo sila nga dili tungod kay dinihogan sila, gihatagan na sila ni Jehova ug mas daghang balaang espiritu kay sa ubang alagad. Dili sila maghunahuna nga mas lawom silag pagsabot sa mga kamatuoran sa Bibliya kay sa uban. Ug dili gyod nila ingnon ang uban nga dinihogan sab sila ug kinahanglan silang makig-ambit sa Memoryal. Hinunoa, mapainubsanon nilang giila nga si Jehova lang ang magdapit sa mga tawo sa pag-adto sa langit. w20.01 27 ¶4-5

Gusto ni Jehova nga makigsuod ug makig-estorya ta kaniya. Giawhag ta niya nga ‘dili mohunong sa pag-ampo,’ ug kanunay siyang maminaw kanato. (Roma 12:12) Dili siya puliki kaayo o kapoy kaayo nga dili na siya mamati kanato. Sa baylo, maminaw ta niya pinaagi sa pagbasa sa iyang Pulong, ang Bibliya, ug sa mga publikasyon nga motabang nato sa pagsabot niini. Maminaw sab ta kaniya pinaagi sa pagpamati pag-ayo sa atong mga tigom. Ang regular nga komunikasyon kang Jehova makatabang nato sa pagpabiling suod kaniya. Gusto ni Jehova nga isulti nato kaniya ang naa sa atong kasingkasing. (Sal. 62:8) Maayong pangutan-on ang kaugalingon: ‘Ang ako bang mga pag-ampo samag taphaw, kinopya lang nga mensahe, o kini ba samag kinasingkasing, personal nga sulat?’ Walay duhaduha nga gihigugma nimo pag-ayo si Jehova, ug gusto nimong magpabiling lig-on ang imong relasyon kaniya. Busa kinahanglang regular kang makigsulti kaniya. Isulti kaniya kon unsa gyoy imong gibati​—ang imong mga kalipay ug kasakit. Makasalig ka nga makapangayo kag tabang kaniya. w20.02 8-9 ¶4-5

Si Jehova naghatag sa mga ansiyano ug importanteng responsibilidad sa pag-atiman sa iyang katawhan. Ang mga ansiyano daghag makat-onan sa paagi ni Nehemias sa pagtratar sa katawhan ni Jehova. Ingong gobernador sa Juda, si Nehemias dakog awtoridad. (Neh. 1:11; 2:7, 8; 5:14) Hunahunaa ang pipila sa mga kalisdanan nga giatubang ni Nehemias. Iyang nahibaloan nga gihugawan sa mga tawo ang templo ug wala na sila maghatag ug pinansiyal nga tabang sa mga Levihanon sumala sa gitakda sa Balaod. Gilapas sa mga Hudiyo ang balaod sa Igpapahulay, ug dihay mga lalaki nga nangasawag mga langyaw. Kinahanglan nga may himoon si Gobernador Nehemias maylabot nianang lisod nga situwasyon. (Neh. 13:4-30) Wala gamita ni Nehemias ang iyang awtoridad aron pugson ang katawhan sa Diyos sa pagsunod sa iyang kaugalingong mga sukdanan. Hinunoa, kinasingkasing siyang nag-ampo kang Jehova nga giyahan siya, ug gitudloan niya ang katawhan sa Balaod ni Jehova. (Neh. 1:4-10; 13:1-3) Si Nehemias mapainubsanong nagtrabaho uban sa katawhan, nga mitabang pa gani kanila sa pagtukod pag-usab sa paril sa Jerusalem.​—Neh. 4:15. w19.09 16 ¶9-10