Hulyo

Dihang sultihan tag sakit o himoag dili maayo, mabalaka tingali ta. Tinuod nâ ilabina kon suod natong higala o paryente ang nakapasakit nato. Kon bahin sa pag-atubang sa mga kabalaka, daghan tag makat-onan sa ehemplo ni Ana diha sa Bibliya, kinsa grabeng gibiaybiay sa ikaduhang asawa sa iyang bana. (1 Sam. 1:12) Sama kang Ana, puwede tang mogahin ug taas nga panahon sa pagpakig-estorya kang Jehova bahin sa atong mga kabalaka ug mga gikahadlokan. Ang atong mga pag-ampo dili kinahanglang balaknon o maayo kaayong pagkabalay. Basig mohilak pa gani ta usahay dihang isulti nato ang kapait nga atong gibati. Bisan pa niana, dili gyod kapoyon si Jehova sa pagpaminaw kanato. Gawas nga isulti nato ang atong mga problema, kinahanglan sab natong hinumdoman ang tambag nga nasulat sa Filipos 4:6, 7. Espesipikong gihisgotan ni apostol Pablo nga angay tang motanyag ug mga pag-ampo sa pagpasalamat. Daghan kaayo tag rason nga magpasalamat kang Jehova​—apil niana ang atong kinabuhi, ang nindot nga mga butang nga iyang gihimo, iyang maunongong gugma, ug ang nindot kaayong paglaom nga iyang gihatag kanato. w20.02 20-21 ¶3; 21-22 ¶6

Ang katakos sa pagsulti maoy gasa ni Jehova. (Ex. 4:10, 11; Pin. 4:11) Sa iyang Pulong, iya tang gitabangan nga masabtan kon unsaon paggamit niana nga gasa sa hustong paagi. Angay nga andam ta kanunay sa pagsulti bahin kang Jehova ug sa Gingharian. (Mat. 24:14; Roma 10:14) Nianang paagiha, atong gisundog si Jesus. Ang usa sa pangunang mga rason kon nganong mianhi si Jesus sa yuta mao ang pagsulti sa kamatuoran bahin sa iyang Amahan. (Juan 18:37) Pero angay natong hinumdoman nga importante sab ang paagi sa atong pagsulti. Busa sa dihang maghisgot bahin kang Jehova, kinahanglang himoon nato kana nga may “kalumo ug lawom nga pagtahod,” ug angay tang magpakitag konsiderasyon sa pagbati ug pagtuo sa uban. (1 Ped. 3:15) Nianang paagiha, wala lang ta magsulti, nagtudlo sab ta, ug posible nga matandog nato ang kasingkasing sa usa ka tawo. Ang mga ansiyano dili angayng magduhaduha sa pagsulti kon nakita nila nga ang usa ka igsoon nagkinahanglag tambag. Siyempre, mangita silag saktong panahon sa pagsulti aron dili nila mapakaulawan ang igsoon. w20.03 18-19 ¶2-4

Unsay atong iampo? Makaampo ta kang Jehova nga hatagan ta ug “dugang pa nga pagtuo.” (Luc. 17:5; Juan 14:1) Nagkinahanglan tag pagtuo kay sulayan ni Satanas ang tanang sumusunod ni Jesus. (Luc. 22:31) Sa unsang paagi ang pagtuo makatabang nato? Dihang mahimo na nato ang tanan sa pag-atubang sa kalisdanan, ang pagtuo magpalihok nato sa pagsalig kang Jehova. Kay masaligon ta nga mas nahibalo siya kon unsay angayng buhaton, magmalinawon ang atong hunahuna ug kasingkasing. (1 Ped. 5:6, 7) Ang pag-ampo makatabang aron magmalinawon ang atong hunahuna bisag unsa pay atong kalisdanan. Tagda pananglitan si Robert, usa ka matinumanong ansiyano nga kapig 80 anyos. Siya miingon: “Ang tambag sa Filipos 4:6, 7 nakatabang nako nga masagubang ang daghang kalisdanan. Nagkaproblema ko sa pinansiyal. Ug temporaryong nawala ang akong pribilehiyo ingong ansiyano.” Unsay nakatabang kang Robert nga magmalinawon? “Dihang magsugod na gani kog kabalaka, mag-ampo dayon ko,” siya miingon. “Kon pirme ug sinsero kong mag-ampo, mas malinawon ko.” w19.04 9-10 ¶5-7

Ang pag-abuso ug bata sala batok sa Diyos. Dihang ang usa ka tawo makasala batok sa laing tawo, makasala sab siya kang Jehova. Konsideraha ang usa ka pananglitan diha sa Balaod nga gihatag sa Diyos sa Israel. Sumala sa Balaod, ang tawong nangawat o nanglimbong sa uban “wala magmatinumanon kang Jehova.” (Lev. 6:2-4) Busa, kon ang usa diha sa kongregasyon nag-abuso ug bata​—nga nagkawat, o nagkuha, sa kasegurohan niini—​siya wala magmatinumanon sa Diyos. Ang tig-abuso nagpasipala sa ngalan ni Jehova. Busa, kinahanglan natong isipon ang pag-abuso ug bata ingong dakong sala batok sa Diyos ug angay natong dumtan kini. Ang mga artikulo sa Bantayanang Torre ug Pagmata! naghisgot kon sa unsang paagi ang mga giabuso mahupayan sa dugay na nilang gidaladala nga kasakit, kon sa unsang paagi ang uban makatabang ug makadasig nila, ug kon sa unsang paagi ang mga ginikanan makapanalipod sa ilang mga anak. Ang mga ansiyano gihatagan ug detalyadong instruksiyon nga binase sa Bibliya kon unsay buhaton dihang dunay mag-abuso ug bata. Ang organisasyon padayong nagsusi kon giunsa pag-atiman sa mga ansiyano ang kaso sa pag-abuso ug bata. w19.05 9 ¶8-9

Ang Pulong sa Diyos samag hait nga espada nga makapanghimakak sa giingon ni Satanas. (Efe. 6:17) Pananglitan, gipakita sa Bibliya nga dili tinuod nga ang mga patay puwedeng makig-estorya sa mga buhi. (Sal. 146:4) Nagpahinumdom sab ni nato nga si Jehova ra ang tinuod nga makatagna sa umaabot. (Isa. 45:21; 46:10) Kon pirme natong basahon ug pamalandongon ang Pulong sa Diyos, matabangan ta sa pagsalikway sa mga bakak nga gipatuo sa daotang mga espiritu ug dumtan kini. Busa likayi ang pagbuhat ug bisan unsa nga konektado sa espiritismo. Ingong tinuod nga mga Kristohanon, dili ta mohimog bisan unsang buhat sa espiritismo. Pananglitan, dili ta moduol ug espiritista o mangitag paagi aron maestorya ang mga patay. Dili ta moapil sa mga kostumbre sa paglubong nga gibase sa patuotuo nga buhi pa ang mga patay sa laing kalibotan. Ug dili ta mogamit ug astrolohiya o pagpanag-an aron mahibaloan ang umaabot. Nahibalo ta nga peligroso kaayo ang espiritismo ug pinaagi niana, direkta tang nakiglabot kang Satanas ug sa mga demonyo. w19.04 21-22 ¶8-9

Ang mga tawong nagsunod sa kaalam niining kalibotana nagtamay sa moral nga mga sukdanan sa Bibliya, nga nag-ingong kini dili realistiko. Sila tingali mangutana, ‘Nganong hatagan man ta sa Diyos ug seksuwal nga mga tinguha ug unya ingnon ta nga pugngan kini?’ Kining pangutanaha gibase sa sayop nga panghunahuna nga kinahanglang buhaton sa mga tawo bisag unsay ilang gusto. Pero lahi ang giingon sa Bibliya. Kini nagtudlo nga makahimo ta sa pagkontrolar sa dili maayong mga tinguha. (Col. 3:5) Dugang pa, gitagana ni Jehova ang regalo nga kaminyoon, usa ka kahikayan diin matagbaw ang atong dili sayop nga seksuwal nga mga tinguha sa dungganong paagi. (1 Cor. 7:8, 9) Lahi sa kaalam niining kalibotana, ang Bibliya nagpasiugda ug hustong panglantaw bahin sa sekso. Gipakita niini nga ang sekso mahimong makapalipay. (Prov. 5:18, 19) Pero ang Bibliya nag-ingon: “Ang matag usa ninyo kinahanglang mahibalo kon unsaon pagkontrolar sa iyang lawas aron magpabilin kining balaan ug dungganon. Ayawg sundoga ang mga tawo sa kanasoran nga wala makaila sa Diyos, kay sila hakog ug walay pagpugong sa ilang gana sa sekso.”​—1 Tes. 4:4, 5. w19.05 22-23 ¶7-9

Dili tugotan sa Diyos ang mga nasod sa paglaglag sa iyang katawhan. Sila mapasigarbohong nagdala sa iyang ngalan, ug ilang gituman ang iyang sugo sa paggula gikan sa Bantogang Babilonya. (Buh. 15:16, 17; Pin. 18:4) Nagkugi sab sila sa pagtabang sa uban sa paggula gikan sa Bantogang Babilonya. Busa ang mga alagad ni Jehova dili “makaagom sa iyang mga hampak.” Bisan pa niana, ang ilang pagtuo masulayan. (Ezeq. 38:2, 8) Human malaglag ang tanang bakak nga organisasyon sa relihiyon, ang katawhan sa Diyos magbarog nga samag nag-inusarang kahoy nga nakalahutay sa kusog nga bagyo. Siyempre, masuko pag-ayo si Satanas. Iyang ipahungaw ang iyang kasuko pinaagi sa paggamit ug demonyohanong propaganda​—“hugawng mga pahayag sa espiritu”—​nga makaaghat sa alyansa sa kanasoran sa pag-atake sa mga alagad ni Jehova. (Pin. 16:13, 14) Kana nga alyansa gitawag nga “Gog sa yuta sa Magog.” Dihang moatake ang mga nasod, magsugod na ang Armagedon.​—Pin. 16:16. w19.09 11 ¶12-13

Sa karaang Israel, gigamit ni Satanas ang bakak nga relihiyon sa pagpakaylap sa imoralidad. Mao gihapon nay iyang ginahimo karon. Gikonsentir sa bakak nga relihiyon ang imoral nga mga buhat ug gipasiugda pa gani kini. Busa, daghan nga nag-angkong nag-alagad sa Diyos mihunong na sa pagsunod sa iyang klaro nga sukdanan sa moral. Gisulti ni apostol Pablo diha sa iyang sulat sa mga taga-Roma ang resulta. (Roma 1:28-31) Apil sa “mga butang nga dili angay” ang tanang matang sa seksuwal nga imoralidad, nga naglakip sa homoseksuwalidad. (Roma 1:24-27, 32; Pin. 2:20) Importante gyod nga atong sundon ang klarong mga pagtulon-an sa Bibliya! Ang tawhanong kaalam nagbalewala o nagsupak sa matarong nga mga sukdanan ni Jehova. Kini wala magdasig nga ugmaron ang bunga sa espiritu kondili nagdasig sa paghimo sa “mga buhat sa unod.” (Gal. 5:19-23) Kini nag-aghat sa mga tawo nga mahimong garboso, ug ingong resulta sila nahimong “mahigugmaon sa kaugalingon.” (2 Tim. 3:2-4) Kini nga mga kinaiya kaatbang sa lumo, mapaubsanong hiyas nga gusto sa Diyos nga batonan sa iyang mga alagad.​—2 Sam. 22:28. w19.06 5-6 ¶12-14

Si Elias nag-alagad kang Jehova sa lisod nga mga panahon ug nakaatubang ug grabeng mga problema. Giingnan ni Jehova si Elias nga idelegar ang ubang trabaho kang Eliseo. Niining paagiha, si Jehova naghatag kang Elias ug maayong higala nga makatabang niya sa pagsagubang sa iyang mga problema. Kon makig-estorya pod ta sa usa ka kasaligang higala, matabangan ta niya sa pagsagubang sa atong mga problema. (2 Hari 2:2) Kon gibati nimo nga wala kay kasultihan sa imong mga problema, hangyoa si Jehova nga tabangan kang makakitag hamtong nga igsoon nga makadasig nimo. Sa daghang katuigan, gitabangan ni Jehova si Elias nga makasagubang sa stress ug makapabiling matinumanon. Ang eksperyensiya ni Elias naghatag natog paglaom. Tingali may mga panahon nga grabe tang ma-stress ug maluya sa pisikal ug emosyonal. Pero kon mosalig ta kang Jehova, hatagan ta niya sa kusog nga atong gikinahanglan aron padayon tang makaalagad kaniya.​—Isa. 40:28, 29. w19.06 15 ¶4; 16 ¶9-10

Mahimo tang mas maisogon karon kon isangyaw nato ang maayong balita sa Gingharian sa Diyos. Ngano? Kay ang pagsangyaw magtudlo nato nga mosalig kang Jehova ug dili mahadlok sa tawo. Sama nga mosamot ka lig-on ang atong kaunoran kon mag-ehersisyo ta, mosamot pod ang atong kaisog kon mosangyaw ta sa balay ug balay, sa publikong mga lugar, sa impormal, ug sa mga negosyohanan. Kon maisogon ta sa pagsangyaw karon, mas andam ta nga mosangyaw bisag idili ang atong buluhaton. (1 Tes. 2:1, 2) Daghan tag makat-onan sa ehemplo sa usa ka matinumanong sister nga maisogon kaayo. Si Nancy Yuen wala ray lima ka piye ang gitas-on, pero dili siya daling mahadlok. Wala gyod siya moundang ug sangyaw sa maayong balita sa Gingharian sa Diyos. Tungod niana, napriso siyag mga 20 ka tuig sa Komunistang China. Ang mga opisyales nga nagsukitsukit niya miingon nga siya ang “pinakagahig ulo” sa tibuok nasod! w19.07 5 ¶13-14

Ang pipila gustong makakat-on sa kamatuoran, pero daghan sa atong mahibalag ang morag dili interesado sa sinugdan. Kinahanglan tingali natong ugmaron ang ilang interes. Aron magmalamposon sa ministeryo, kinahanglan tang mangandam pag-ayo. Pagpilig espesipikong mga topiko nga lagmit makapainteres niadtong imong mahibalag. Dayon, hunahunaa kon unsaon nimo pagsugod ug hisgot ang maong topiko. Pananglitan, mahimong pangutan-on nimo ang tagbalay: “Puwede nakong mahibaloan ang imong opinyon? Daghan sa atong mga problema karon ang nakaapektar sa mga tawo sa tibuok kalibotan. Sa imong hunahuna, gikinahanglan ba ang usa ka gobyerno nga momando sa tibuok yuta aron masulbad ang mga problema sa kalibotan?” Dayon, mahimo nimong hisgotan ang Daniel 2:44. O puwede kang moingon: “Unsa kahay sekreto aron mahimong buotan ang mga anak? Puwede ba nakong mahibaloan ang imong opinyon?” Unya, hisgoti ang Deuteronomio 6:6, 7. Seguradong malipay ta pag-ayo dihang tabangan nato ang mga tawo nga mahimong mga tinun-an sa Kristo. w19.07 15 ¶4, 6-7

Usa ka brader nga daghan nag eksperyensiya sa pagsangyaw ngadto sa mga dili relihiyoso sa Far East miingon: “Kasagaran, kon dunay moingon, ‘Di ko motuog Diyos,’ iyang gipasabot nga dili siya motuo sa mga diyos nga gisimba sa kadaghanan diha sa ilang lugar. Busa sagad mouyon ko nga kadaghanan sa mga diyos hinimo sa tawo ug dili tinuod. Kasagaran basahon nako ang Jeremias 16:20, dayon mangutana ko: ‘Unsaon nato pag-ila ang kalainan sa tinuod ug dili tinuod nga diyos?’ Maminaw ko pag-ayo, ug dayon basahon nako ang Isaias 41:23: ‘Sultihi mi sa mga mahitabo sa umaabot, aron mahibalo mi nga kamo maoy mga diyos.’ Dayon mohatag kog pananglitan kon unsay gitagna ni Jehova bahin sa umaabot.” Ang laing brader miingon: “Akong ipakita kanila ang pipila ka praktikal nga mga prinsipyo sa Bibliya, natuman nga mga tagna sa Bibliya, ug mga balaod nga nagkontrolar sa uniberso. Dayon akong ipakita kanila nga kining tanan nagpamatuod nga dunay buhi ug maalamong Maglalalang. Kon makamatikod ko nga medyo mouyon siya nga dunay Diyos, ipakita nako kaniya ang giingon sa Bibliya bahin kang Jehova.” w19.07 23-24 ¶14-15

Apil sa importanteng mga butang ang pagbalaan sa ngalan ni Jehova, ang katumanan sa iyang mga katuyoan, ug ang kalinaw ug panaghiusa sa kongregasyon. (Mat. 6:9, 10; Juan 13:35) Kon kining mga butanga ang pinakaimportante sa atong kinabuhi, atong gipakita nga gihigugma nato si Jehova. Si apostol Pablo miingon sab nga kinahanglang “walay ikasaway” kanato. Wala ni magpasabot nga kinahanglang perpekto ta. Isipon ta ni Jehova nga walay ikasaway kon himoon nato ang atong kinamaayohan aron mapalalom ang atong gugma ug maseguro ang mas importanteng mga butang. Ang usa ka paagi nga ikapakita nato ang atong gugma mao ang pagpaningkamot nga dili makapandol sa uban. Ang tambag nga likayan nga makapandol sa uban sa pagkatinuod maoy pasidaan. Sa unsang paagi makapandol ta sa uban? Tingali pinaagi sa atong gipili nga kalingawan, sinina, o trabaho. Basin dili ra sayop ang atong gibuhat. Pero kon kana makahasol sa konsensiya sa uban ug makapandol niya, seryoso kaayo nâ.​—Mat. 18:6. w19.08 10 ¶9-11

Sukad sa 1935, nasabtan sa mga Saksi ni Jehova nga ang dakong panon sa panan-awon ni Juan gilangkoban sa matinumanong mga Kristohanon nga naglaom nga mabuhi sa yuta sa walay kataposan. (Pin. 7:9, 10) Aron maluwas sa dakong kasakitan, ang dakong panon kinahanglang tudloan bahin sa mga paagi ni Jehova una pa magsugod ang Milenyo. Sila kinahanglang magpakitag lig-ong pagtuo aron “makaikyas niining tanang butang nga kinahanglang mahitabo” sa dili pa ang Usa ka Libo ka Tuig nga Pagmando sa Kristo. (Luc. 21:34-36) Kadtong sakop sa dakong panon nalipay kaayo sa ilang paglaom. Nasabtan nila nga si Jehova ang magpili kon asa mag-alagad niya ang iyang matinumanong mga magsisimba, sa langit ba o sa yuta. Ang mga dinihogan ug ang dakong panon nahibalo nga ang ilang ganti naposible lang tungod sa dili hitupngang pagkamaayo ni Jehova pinaagi sa halad lukat ni Jesu-Kristo.​—Roma 3:24. w19.09 28 ¶10; 29 ¶12-13

Bag-o ba kag asaynment? Palamposa kana. Ayawg hunahunaa nga nausab ang imong asaynment kay dili ka epektibo sa imong kanhing asaynment o wala na kaayo ka kinahanglana. Hunahunaa ang daghang paagi nga gitabangan ka ni Jehova karon, ug padayon sa pagsangyaw. Sundoga ang matinumanong mga Kristohanon sa unang siglo. Bisag asa sila, “milibot [sila] sa kayutaan nga nagpahayag sa maayong balita bahin sa pulong.” (Buh. 8:1, 4) Ang imong paningkamot nga magpadayon sa pagsangyaw mahimong magpatunghag maayong mga resulta. Pananglitan, ang mga payunir nga gipapahawa sa usa ka nasod mibalhin sa silingang nasod diin gikinahanglan kaayo ang mga magsasangyaw nga nagsulti sa ilang pinulongan. Sulod sa pipila ka bulan, daghang grupo ang naporma ug paspas ang pag-uswag niini. Angay nga ang makahatag natog kinadak-ang kalipay mao ang atong relasyon kang Jehova. Busa, magpabiling suod kang Jehova, nga mosalig kaniya alang sa kaalam, giya, ug tabang. Hinumdomi nga gimahal nimo ang imong kanhing asaynment tungod kay gihimo nimo ang tanan sa pagtabang sa mga tawo didto. Himoa sab ang tanan diha sa imong asaynment karon ug tan-awa kon unsaon ka pagtabang ni Jehova nga mahalon pod kana.​—Eccl. 7:10. w19.08 24-25 ¶15-16

Angay tang magpasakop kang Jehova kay siya ang atong Maglalalang. Ingong Maglalalang, duna siyay katungod sa pagtakdag mga sukdanan para sa iyang mga linalang. (Pin. 4:11) Pero duna pay maayong rason nga mosunod ta niya​—ang iyang paagi sa pagmando mao ang kinamaayohan. Sa tibuok kasaysayan, daghang tawhanong magmamando ang nakabatog gahom ug awtoridad. Kon itandi kanila, si Jehova ang labing maalamon, mahigugmaon, maluluy-on, ug mabinationg Magmamando sa tanan. (Ex. 34:6; Roma 16:27; 1 Juan 4:8) Nagpasakop ta kang Jehova pinaagi sa paghimo sa atong kinamaayohan sa pagsunod kaniya sa tanang butang ug pinaagi sa pagsukol sa tendensiya nga mosalig sa atong kaugalingong pagsabot. (Prov. 3:5) Mas sayon para nato ang pagsunod kang Jehova kon mahibalo tag dugang sa iyang nindot nga mga hiyas. Ngano? Tungod kay kini nga mga hiyas makita sa tanan niyang ginahimo. (Sal. 145:9) Samtang magkalawom ang atong kahibalo kang Jehova, magkadako sab ang atong gugma kaniya. Ug kon gihigugma nato si Jehova, dili ta magkinahanglan ug daghang balaod nga mosulti nato kon unsay himoon ug dili himoon. w19.09 14 ¶1, 3

Gipabug-atag maayo ni Satanas ang mga tawo pinaagig mga bakak. Pananglitan, gusto niyang motuo ta nga dili pasayloon ni Jehova ang atong mga sala ug dili ta angayng mahalon. Makapahugno gyod kana nga bakak! (Juan 8:44) Dihang moduol ta sa Kristo, mapasaylo ang atong mga sala. (Mat. 11:28) Ug sa pagkatinuod, si Jehova nahigugma pag-ayo kanatong tanan. (Roma 8:32, 38, 39) Ang gipapas-an ni Jesus kanato lahi sa ubang butang nga angay natong pas-anon. Pananglitan, inigkahapon dihang mahuman na ang sekular nga trabaho, daghan ang kapoyon ug dili malipayon. Pero kita, human sa pipila ka oras nga pag-alagad kang Jehova ug sa Kristo, mobatig dakong kalipay. Tingali gikapoy ta ug kinahanglang pugson nato ang kaugalingon sa pagtambong sa tigom nianang gabhiona. Pero sagad inig-uli nato gikan sa tigom, hayahay na ang atong paminaw ug lagsik na ta. Ingon sab niana ang atong bation dihang maningkamot ta sa pagsangyaw ug sa paghimog personal nga pagtuon sa Bibliya​—mobati tag kahayahay ug kalagsik! w19.09 20 ¶1; 23-24 ¶15-16

Sa mubong panahon nga nahibilin una magsugod ang “adlaw” ni Jehova, gidahom niya nga magmapuliki ta sa pagsangyaw. Kinahanglang seguroon nato nga kita “puliki diha sa buluhaton sa Ginoo.” (1 Cor. 15:58) Dihang naghisgot si Jesus bahin sa tanang talagsaong butang nga mahitabo sa kataposang mga adlaw, siya miingon: “Dugang pa, ang maayong balita kinahanglang iwali una sa tanang kanasoran.” (Mar. 13:4, 8, 10; Mat. 24:14) Hunahunaa kini: Matag higayon nga mosangyaw ka, nakigbahin ka sa katumanan niana nga tagna sa Bibliya! Kada tuig, nagauswag ang buluhatong pagsangyaw sa Gingharian. Pananglitan, hunahunaa ang pagdaghan sa magmamantala sa Gingharian sa tibuok kalibotan panahon sa kataposang mga adlaw. Niadtong 1914, dihay 5,155 ka magmamantala sa 43 ka kayutaan. Karon, duna nay mga 8.5 ka milyong magmamantala sa 240 ka kayutaan! Bisan pa niana, wala pa mahuman ang atong buluhaton. Kinahanglang magpadayon ta sa pagmantala sa Gingharian sa Diyos ingong bugtong solusyon sa tanang problema sa katawhan.​—Sal. 145:11-13. w19.10 8 ¶3; 9-10 ¶7-8

Gigamit ni Jehova si Barzilai sa pagtabang kang Haring David. Si David ug ang iyang mga tawo “gigutom ug gikapoy ug giuhaw” samtang nangalagiw gikan kang Absalom nga iyang anak. Si Barzilai, nga tigulang na nianang panahona, nagpameligro sa iyang kinabuhi kauban ang ubang tawo aron matabangan si David ug ang mga kauban niini. Wala maghunahuna si Barzilai nga kay tigulang na siya, dili na siya mapuslanon kang Jehova. Iya hinuong gigamit kon unsay naa niya aron matabangan ang mga alagad sa Diyos nga nanginahanglan. (2 Sam. 17:27-29) Unsay atong makat-onan niana? Bisan unsa pay atong edad, puwede tang gamiton ni Jehova sa pagtabang sa atong mga igsoon nga nanginahanglan, sa ato mang lugar o sa laing nasod. (Prov. 3:27, 28; 19:17) Bisag dili ta personal nga makatabang nila, puwede tang mohatag ug donasyon sa worldwide work aron dunay magamit sa pagtabang sa atong mga igsoon nga nanginahanglan.​—2 Cor. 8:14, 15. w19.10 21 ¶6

Tingali malisdan ta sa pagsulti sa atong gibati ngadto sa uban tungod kay dihay nakapasakit nato kaniadto. (Prov. 18:19) O tingali naghunahuna ta nga wala tay igong panahon ug kusog sa pagpakigsuod sa uban. Pero dili ta angayng mosurender. Kon gusto natong tabangan ta sa mga igsoon panahon sa pagsulay, kinahanglang makakat-on ta karon sa pagsulti kanila sa atong hunahuna ug pagbati. Importante nâ aron maugmad ang tinuod nga panaghigalaay. (1 Ped. 1:22) Gipakita ni Jesus nga may pagsalig siya sa iyang mga higala kay wala siyay gitago kanila. (Juan 15:15) Masundog nato siya pinaagi sa pagsulti sa atong kalipay, kabalaka, ug kagul-anan ngadto sa uban. Paminaw pag-ayo dihang may makig-estorya nimo, ug tingali imong masayran nga daghan mog parehas nga hunahuna, pagbati, ug tumong. Kon isulti nimo sa uban ang imong gihunahuna ug gibati, lagmit mas magkasuod mo.​—Prov. 27:9. w19.11 4 ¶8-9

Panahon sa dakong kasakitan, ang mensahe nga atong isangyaw lagmit mausab. Karon, kita nagsangyaw sa maayong balita bahin sa Gingharian ug kita naningkamot sa paghimog mga tinun-an. Pero nianang panahona, basin magsangyaw na tag bug-at nga mensahe nga samag ulan nga yelo. (Pin. 16:21) Basin isangyaw nato nga hapit na gyong laglagon ang kalibotan ni Satanas. Sa takdang panahon, mahibaloan ra nato kon unsay atong mensahe ug kon unsaon nâ pagsangyaw. Gamiton kaha nato ang mao rang pamaagi o mogamit ba kaha tag ubang pamaagi? Wala ta mahibalo. Bisag unsa pay pamaagi, dayag nga duna tay pribilehiyo nga maisogong magmantala sa mensahe ni Jehova sa paghukom! (Ezeq. 2:3-5) Lagmit ang atong mensahe makaaghat sa mga lider sa kalibotan sa pagpahilom kanato sa dayon. Sama nga nagsalig ta sa tabang ni Jehova karon, kinahanglan pod tang mosalig kaniya nianang panahona. Makaseguro ta nga ang atong Diyos maghatag natog kusog sa pagtuman sa iyang kabubut-on.​—Miq. 3:8. w19.10 16 ¶8-9

Ang ekspresyong “mibiya sa pagtuo” nagpasabot nga posible tang malinga pinaagi sa pagpokus sa pagbaton sa mga butang nga wala nato kinahanglana. Dayon maugmad diha sa atong kasingkasing ang “daghang binuang ug makadaot nga tinguha.” (1 Tim. 6:9) Imbes tugotan nga maugmad ang maong mga tinguha diha sa atong kasingkasing, angay nato nang isipon ingong mga hinagiban nga makapahuyang sa atong pagtuo. Tingali duna tay ikapalit ug daghang materyal nga mga butang. Sayop ba nga mopalit tag mga butang nga gusto nato pero wala nato kinahanglana? Dili man. Pero hunahunaa kini: Bisan kon makaarang ta sa pagpalit sa usa ka butang, duna ba gyod tay panahon ug kusog sa paggamit ug pagmentinar niana? Dili kaha mahimo nang mas bililhon kanato ang atong kabtangan? Dili kaha nga tungod sa atong pagpabili sa materyal nga mga butang mahisama na ta sa batan-ong lalaki nga mibalibad sa imbitasyon ni Jesus nga pauswagon ang iyang pag-alagad sa Diyos? (Mar. 10:17-22) Mas maayo gyod nga magkinabuhi tang simple ug gamiton ang atong panahon ug kusog sa pagbuhat sa kabubut-on sa Diyos! w19.11 17-18 ¶15-16

Ang Diyos makahatag nimog kusog aron maimplementar nimo ang usa ka desisyon. (Filip. 2:13) Busa pag-ampo alang sa kusog sa paghimo niana. Pangayoa ang iyang balaang espiritu aron hatagan ka niini sa kusog nga imong gikinahanglan. Padayon sa pag-ampo bisag daw wala pa tubaga ang imong giampo. Si Jesus miingon: ‘Padayon sa pagpangayo, ug kamo hatagan [ug balaang espiritu].’ (Luc. 11:9, 13) Dugang pa, paghimog plano. Aron molampos ka sa bisan unsang proyekto, kinahanglan kang magplano. Dayon, kinahanglang sundon nimo ang imong giplano. Sa susama, dihang mohimo kag desisyon, isulat ang espesipikong mga butang nga kinahanglan nimong himoon aron maimplementar kana. Bahinbahina ang dagkong trabaho ngadto sa gagmayng buluhaton aron mas dali nimong makita ang imong pag-uswag. Gidasig ni apostol Pablo ang mga taga-Corinto nga maggahin ug amot “sa unang adlaw sa matag semana” imbes maghulat nga moabot siya ayha pa mangolekta. (1 Cor. 16:2) Kon imong bahinbahinon ang dagkong trabaho ngadto sa gagmayng buluhaton, dili sab ka mabug-atan. w19.11 29 ¶13-14

Makaingon ta nga ang usa ka tawo nahibalo bahin kang Jehova kon siya nahibalo sa ngalan sa Diyos o pamilyar sa mga butang nga Iyang gisulti o gihimo. Pero labaw pa ana ang gikinahanglan aron makaila pag-ayo kang Jehova. Kinahanglan tang mogahin ug panahon sa pagkat-on bahin kang Jehova ug sa iyang nindot nga mga hiyas. Kana ray paagi nga masabtan nato ang mga rason sa iyang mga gisulti ug gihimo. Makatabang nâ aron mahibaloan nato kon giuyonan ba niya ang atong mga opinyon, desisyon, ug binuhatan. Dihang mahibalo na ta kon unsay gusto ni Jehova para nato, kinahanglan natong ipadapat ang atong nakat-onan. Ang uban magbugalbugal tingali nato kay gusto tang moalagad kang Jehova, ug mograbe pa gani ang ilang pagsupak dihang makig-uban na ta sa iyang katawhan. Pero kon mosalig ta kang Jehova, dili gyod ta niya pasagdan. Makaugmad tag panaghigalaay uban sa Diyos nga molungtad hangtod sa hangtod. Posible ba gyod nga mailhan nato pag-ayo si Jehova? Oo! w19.12 16-17 ¶3-4

Usahay, mobati ang mga ginikanan nga lisod kaayo ang pagtudlo sa ilang mga anak, pero ang mga anak regalo gikan kang Jehova. Kanunay siyang andam sa pagtabang. Gusto kaayo siyang maminaw sa pag-ampo sa mga ginikanan. Ug tubagon niya ang ilang mga pag-ampo pinaagi sa Bibliya, mga publikasyon, ug sa mga ehemplo ug tambag sa hamtong nga mga ginikanan sa kongregasyon. Ang uban moingon nga ang pagbansay sa mga anak maoy 20 ka tuig nga proyekto. Pero ang tinuod, ang pagkaginikanan dili gyod maundang. Apil sa pinakamaayo nilang ikahatag sa ilang mga anak mao ang gugma, panahon, ug binase sa Bibliya nga pagbansay. Lainlaig reaksiyon ang mga bata sa pagbansay. Pero daghan niadtong gibansay sa mga ginikanang nahigugma kang Jehova mibati sama kang Joanna Mae, sister nga taga-Asia, kinsa miingon: “Mapasalamaton kaayo ko nga ang akong ginikanan nagdisiplina kanako ug nagtudlo nako sa paghigugma kang Jehova. Dili lang kinabuhi ang ilang gihatag nako, kondili malipayong kinabuhi.” (Prov. 23:24, 25) Minilyong mga igsoon ang mibatig sama kaniya. w19.12 27 ¶21-22

Daghan sa atong mga igsoon ang nagkinahanglag paghupay. Pero kinahanglan tang mohimog paagi sa paghupay sa uban bisag mobati tag kahadlok. Tingali mahadlok ta kay wala ta kabalo kon unsay atong isulti o buhaton niadtong naa sa lisod nga situwasyon. Pero makahupay ta sa uban kon ipakita nato nga gimahal nato sila. Samtang nagkaduol ta sa kataposan niining sistemaha sa mga butang, mas mograbe pa ang kahimtang niining kalibotana ug mosamot ka lisod ang kinabuhi. (2 Tim. 3:13) Ug kay masayop man ta tungod sa pagkadili-hingpit, padayon tang magkinahanglan ug paghupay. Si apostol Pablo nakapabiling matinumanon hangtod sa kataposan sa iyang kinabuhi, ug usa sa mga rason niana mao ang paghupay nga iyang nadawat gikan sa iyang mga isigka-Kristohanon. Kon ato silang sundogon, matabangan sab nato ang mga igsoon nga makapabiling matinumanon sa pag-alagad kang Jehova.​—1 Tes. 3:2, 3. w20.01 12-13 ¶17-19

Ang mga dinihogan dili magdahom nga trataron sila sa uban sa espesyal nga paagi. (Filip. 2:2, 3) Nahibalo sila nga dihang gidihogan sila ni Jehova, wala niya pahibaloa ang uban bahin niini. Busa ang usa ka dinihogan dili matingala kon ang uban dili dayon motuo nga siya gidihogan. Nahibalo siya nga ang Bibliya nag-awhag nga dili ta angayng motuo dayon kon dunay moingon nga gihatagan siya sa Diyos ug espesyal nga responsibilidad. Kay dili niya gustog espesyal nga atensiyon, dili sultihan sa usa ka dinihogan kadtong iyang makaila sa unang higayon nga dinihogan siya. Ug dili pod siya manghambog bahin niana. (1 Cor. 4:7, 8) Ang mga dinihogan dili mangita sa ubang dinihogan aron magkaestoryahay bahin sa ilang pagkahimong dinihogan o aron magpormag pribadong grupo sa pagtuon sa Bibliya. (Gal. 1:15-17) Ang kongregasyon dili magkahiusa kon himoon ni sa mga dinihogan. Supak kana sa paglihok sa balaang espiritu, nga nagtabang sa katawhan sa Diyos nga magmalinawon ug magkahiusa.​—Roma 16:17, 18. w20.01 28 ¶6-7

Posible nga ang mga tawo kansang mga relihiyon gilaglag masuko kay ang relihiyon sa mga Saksi ni Jehova wala malaglag. Seguradong ipahibalo nila sa uban ang ilang kalagot, pinaagi pananglitan sa social media. Ang mga lider sa kalibotan ug ang ilang magmamando, si Satanas, maglagot nato kay kita ray nahibilin nga relihiyon. Wala nila makab-ot ang ilang tumong nga wad-on ang tanang relihiyon sa yuta. Busa masentro kanato ang ilang atensiyon. Niining panahona, ang mga lider sa kalibotan mahimong Gog sa Magog. Maghiusa sila ug bug-os nilang atakehon ang katawhan ni Jehova. (Ezeq. 38:2, 14-16) Basig mabalaka ta sa paghunahuna sa mga posibleng mahitabo, ilabina kay wala ta mahibalo sa eksaktong mga detalye. Pero, usa ka butang ang segurado: Dili nato angayng kahadlokan ang dakong kasakitan. Hatagan ta ni Jehova ug mga instruksiyon aron maluwas ta.​—Sal. 34:19. w19.10 16-17 ¶10-11

Dili lang ta basta mobatig apresasyon; ipahayag sab nato ang atong apresasyon kang Jehova sa pulong ug buhat. Nagpakita ni nga lahi ta sa daghang tawo karon. Nagpuyo ta sa kalibotan diin ang mga tawo walay apresasyon sa tanang gihimo sa Diyos kanila. Gani, ang usa sa mga ilhanan nga nagkinabuhi na ta sa “kataposang mga adlaw” mao nga ang mga tawo dili mapasalamaton. (2 Tim. 3:1, 2) Hinaot nga dili nato sila sundogon! Gusto ni Jehova nga ang tanan niyang anak suod sa usag usa. Gani, ang atong gugma sa usag usa nagpaila nga kita tinuod nga mga Kristohanon. (Juan 13:35) Uyon ta sa salmista kinsa misulat: “Pagkamaayo ug pagkamakapalipay nga ang mga igsoon nag-uban nga may panaghiusa!” (Sal. 133:1) Kon gihigugma nato ang mga igsoon, gipakita nato kang Jehova nga gihigugma nato siya. (1 Juan 4:20) Makapalipay gyod nga mahimong bahin sa usa ka pamilya sa mga igsoon nga ‘nagpakitag kaayo sa usag usa ug nagmabination’!​—Efe. 4:32. w20.02 9 ¶6-7

Ang hinungdan sa kabalaka ni Ana wala dayon mawala. Kauban gihapon niya sa balay si Penina. Ug walay giingon ang Bibliya nga nagbag-o si Penina. Busa lagmit nga padayong giantos ni Ana ang sakit nga sinultihan sa iyang karibal. Pero wala na maguol si Ana. Human itugyan ni Ana kang Jehova ang iyang mga problema, wala na siya mabalaka. Gitugotan niya si Jehova sa paghupay kaniya. Sa ulahi, gitubag ni Jehova ang pag-ampo ni Ana ug gihatagan siyag mga anak! (1 Sam. 1:2, 6, 7, 17-20) Magmalinawon ta bisag naa gihapon ang hinungdan sa atong kabalaka. Bisag sinsero tang mag-ampo ug regular nga motambong sa mga tigom, ang ubang problema dili gihapon tingali mawala. Pero atong makat-onan sa eksperyensiya ni Ana nga walay makapugong kang Jehova sa paghupay sa atong naguol nga kasingkasing. Dili gyod ta kalimtan ni Jehova, ug sa madugay ug sa madali iyang gantihan ang atong pagkamatinumanon.​—Heb. 11:6. w20.02 22 ¶9-10

Ang mga ansiyano dili magduhaduha sa pagpaambit ug mga prinsipyo sa Bibliya nga makatabang sa uban sa paglihok nga maalamon. Nganong importante kaayo nga magmaisogon sila sa pagsulti kon gikinahanglan? Konsideraha ang kahimtang ni Eli: Ang Hataas nga Saserdoteng si Eli may duha ka anak nga lalaki nga pinangga kaayo niya. Pero ang iyang mga anak walay pagtahod kang Jehova. Importante ang ilang katungdanan ingong mga saserdote nga nag-alagad sa tabernakulo. Pero sila nag-abusar sa ilang awtoridad, walay pagtahod sa mga halad para kang Jehova, ug walay kaulaw nga naghimog seksuwal nga imoralidad. (1 Sam. 2:12-17, 22) Sumala sa Balaod ni Moises, ang mga anak ni Eli angayng mamatay, pero igo lang silang gibadlong ni Eli ug gitugotan gihapon sa pag-alagad sa tabernakulo. (Deut. 21:18-21) Unsay hunahuna ni Jehova sa gihimo ni Eli? Iyang giingnan si Eli: “Nganong padayon nimong gipasidunggan ang imong mga anak labaw kay kanako?” Unya si Jehova nakahukom nga patyon kining duha ka tawong daotan.​—1 Sam. 2:29, 34. w20.03 19 ¶4-5