Agosto

Si Jesus nagmalinawon bisag gilutos kay nahibalo siya nga iyang napalipay ang iyang Amahan. Nagmatinumanon siya sa panahon nga lisod ang paghimo niana. Iyang gihigugma ang Amahan ug giuna ang pag-alagad kang Jehova. Sa wala pa siya moanhi sa yuta, siya ang “batid nga magbubuhat.” (Prov. 8:30) Ug samtang dinhi sa yuta, madasigon niyang gitudloan ang uban bahin sa iyang Amahan. (Mat. 6:9; Juan 5:17) Ang maong buluhaton nakapalipay pag-ayo kang Jesus. (Juan 4:34-36) Masundog nato si Jesus pinaagi sa pagsunod kang Jehova ug sa ‘pagkahimong puliki diha sa buluhaton sa Ginoo.’ (1 Cor. 15:58) Kon “okupado kaayo” ta sa pagsangyaw, makabaton tag positibong panglantaw sa atong mga problema. (Buh. 18:5) Pananglitan, ang mga tawo nga atong maestorya sa ministeryo kasagaran mas grabe pag problema. Pero dihang makakat-on sila sa paghigugma kang Jehova ug pagpadapat sa iyang tambag, mouswag ang ilang pagkinabuhi ug mahimo silang mas malipayon. Sa matag higayon nga makita nato kana, mas makasalig ta nga atimanon ta ni Jehova. w19.04 10-11 ¶8-9

Gisuklan gyod nila ang daotang mga espiritu. Ang ilang mga libro sa madyik mahal kaayo. Pero ila nang gisunog imbes ihatag o ibaligya. Mas naghunahuna sila nga mapalipay si Jehova imbes maghunahuna sa kantidad sa maong mga libro. Unsaon nato pagsundog ang unang siglong mga Kristohanon? Maayong idespatsar nato ang bisan unsang butang nga konektado sa espiritismo. Apil niini ang mga anting-anting, panagang, o ubang butang nga gisul-ob o gitipigan sa mga tawo aron maprotektahan sila batok sa daotang mga espiritu. (1 Cor. 10:21) Susiha pag-ayo ang imong piliong kalingawan. Pangutan-a ang kaugalingon: ‘Duna ba koy kalingawan nga konektado sa espiritismo?’ Pilia gyod tong makatabang nimo nga makalikay sa bisan unsa nga gidumtan ni Jehova. Gusto natong buhaton ang atong pinakamaayo aron magpabiling hinlo ang atong konsensiya atubangan sa Diyos.​—Buh. 24:16. w19.04 22-23 ¶10-12

Ang mga ansiyano daghag angayng konsiderahon kon mahibaloan nila nga dunay nakahimog seryosong sala. Panguna nilang tumong nga magpabiling balaan ang ngalan sa Diyos. (Lev. 22:31, 32; Mat. 6:9) Importante pod kaayo nila ang espirituwal nga kaayohan sa mga igsoon ug ang pagtabang sa mga biktima sa seryosong sala. Dugang pa, kon ang usa nga nakasala maoy bahin sa kongregasyon, gusto sa mga ansiyano nga tabangan siya nga mapasig-uli kon posible. (Sant. 5:14, 15) Masakiton sa espirituwal ang usa ka Kristohanon nga magpadala sa sayop nga tinguha ug makahimog seryosong sala. Nagpasabot ni nga wala na siyay maayong relasyon kang Jehova. Ang mga ansiyano samag espirituwal nga doktor. Maningkamot sila nga ‘ayohon ang masakiton,’ niining bahina, ang nakasala. Ang ilang binase sa Bibliya nga tambag makatabang niya nga mapasig-uli ang maayong relasyon sa Diyos, pero posible lang ni kon tinuod siyang maghinulsol.​—Buh. 3:19; 2 Cor. 2:5-10. w19.05 10 ¶10-11

Si Jehova makahatag nato sa tinguha nga mobuhat sa iyang gusto. Tingali nakadungog ta nga may panginahanglan diha sa atong kongregasyon o sa ubang kongregasyon. Tungod niana, basin mangutana ta sa atong kaugalingon, ‘Unsa kahay akong mahimo aron makatabang?’ O tingali gihatagan tag lisod nga asaynment, ug naghunahuna ta kon mahimo ba nato kini. O human makabasag pipila ka teksto sa Bibliya, tingali namalandong ta, ‘Unsaon nako paggamit kining tekstoha sa pagtabang sa uban?’ Dihang makita ni Jehova nga namalandong ta kon unsay atong mahimo, hatagan ta niya sa tinguha nga buhaton ang atong gihunahuna. Si Jehova makahatag sab nato sa kusog aron atong mabuhat ang iyang gusto. (Isa. 40:29) Pinaagi sa iyang balaang espiritu, iyang mapauswag ang atong natural nga mga katakos. (Ex. 35:30-35) Pinaagi sa iyang organisasyon, tudloan ta ni Jehova kon unsaon paghimo ang pipila ka buluhaton. Kon dili ka segurado unsaon pagtuman ang imong asaynment, pangayog tabang. Puwede nimong pangayoon sa atong mahinatagong langitnong Amahan ang “gahom nga labaw sa kasarangan.”​—2 Cor. 4:7; Luc. 11:13. w19.10 21 ¶3-4

Ang kalibotan nagpasiugdag hakog nga panghunahuna. Ang usa ka reperensiya nag-ingon nga sa katuigan sa 1970 midaghan ang basahon nga naghatag ug tambag kon sa unsang paagi magmalamposon. Ang pipila niana “nag-awhag sa mga magbabasa sa pag-ila ug pagdawat sa ilang kaugalingon ug sa pagpasigarbo kon kinsa sila.” Pananglitan, matikdi ang giingon sa usa nianang mga basahona: “Mahala ang labing hitsuraan, makalingaw, dalayegon nga tawo nga nabuhi sukad​—ikaw.” Ang maong basahon nag-ingon nga ang usa maoy modesisyon kon sa unsang paagi siya mogawi, ug buhaton niya kon unsay iyang gihunahuna nga husto ug kombenyente. Nakadungog na ba ka niini nga ideya? Giawhag ni Satanas si Eva sa paghimog susama niana. Siya miingon nga si Eva puwedeng ‘maparehas sa Diyos, nga mahibalo sa maayo ug daotan.’ (Gen. 3:5) Karon, daghan ang taas kaayog panglantaw sa ilang kaugalingon nga para nila walay makasulti nila kon unsay husto ug sayop, bisan ang Diyos. Pananglitan, kana nga panghunahuna ilabinang makita sa panglantaw sa mga tawo bahin sa kaminyoon. w19.05 23 ¶10-11

May mga panahon nga si Haring David grabe pong na-stress. Hunahunaa ang iyang giatubang nga kalisdanan. Nakonsensiya kaayo siya sa daghan niyang kasaypanan. (Sal. 40:12) Mirebelde niya ang iyang pinalanggang anak nga si Absalom, ug sa ulahi kini namatay. (2 Sam. 15:13, 14; 18:33) Gitraydor sab siya sa usa sa iyang kinasuorang mga higala. (2 Sam. 16:23–17:2; Sal. 55:12-14) Daghan sa mga salmo ni David ang nagpakita sa iyang gibating kaluya ug sa iyang lig-ong pagsalig kang Jehova. (Sal. 38:5-10; 94:17-19) Sa ulahi, dihay salmistang nasina sa pagkinabuhi sa mga daotan. Lagmit siya kaliwat sa Levihanong si Asap ug nag-alagad sa “dakong sangtuwaryo sa Diyos.” Kini nga salmista na-stress, mao nga siya dili malipayon ug dili kontento. Naghunahuna na gani siya nga dili igo ang mga panalangin sa pag-alagad sa Diyos.​—Sal. 73:2-5, 7, 12-14, 16, 17, 21. w19.06 17 ¶12-13

Pahimuslan ni Satanas ang atong natural nga mga tinguha. Naa tay natural nga tinguha nga mokat-on ug praktikal nga kahanas nga makatabang aron matagan-an nato ang kaugalingon ug ang atong pamilya. (1 Tim. 5:8) Sagad, makat-onan nato kana pinaagi sa pag-eskuyla ug sa pagkugi sa pagtuon. Pero kinahanglan tang magbantay. Sa sistema sa edukasyon sa daghang nasod, dili lang praktikal nga kahanas ang ginatudlo kondili tawhanong kaalam usab. Ang mga estudyante ginatudloan nga kuwestiyonon kon duna bay Diyos ug dili tahoron ang Bibliya. Sila sultihan nga ang tanang intelihenteng tawo nagtuo nga ang kinabuhi nagsugod pinaagig ebolusyon. (Roma 1:21-23) Kana nga mga pagtulon-an supak sa “kaalam sa Diyos.” (1 Cor. 1:19-21; 3:18-20) Magmadeterminado nga dili ka malit-agan “pinaagi sa pilosopiya ug sayop nga mga pangatarongan” sa kalibotan ni Satanas. (Col. 2:8) Padayon sa pagbantay batok sa mga taktika ni Satanas. (1 Cor. 3:18) Ayawg tugoti nga molampos siya sa pag-impluwensiya nimo nga kalimtan si Jehova. Sunda ang taas nga sukdanan ni Jehova maylabot sa moral. Ug ayawg tugoti si Satanas sa paglimbong nimo nga balewalaon ang tambag ni Jehova. w19.06 5 ¶13; 7 ¶17

Bisag unsa nga topiko ang imong hisgotan, hunahunaa ang mga tawo nga maminaw nimo. Hunahunaa kon sa unsang paagi makabenepisyo sila dihang ilang mahibaloan kon unsa gyoy gitudlo sa Bibliya. Dihang makig-estorya nila, importante nga maminaw ka nila ug respetohon ang ilang opinyon. Nianang paagiha, mas masabtan nimo sila, ug lagmit maminaw sila nimo. Sa dili pa makadesisyon ang usa nga magpa-Bible study, nagkinahanglan tingali kag panahon ug paningkamot sa pagbalikduaw. Ngano? Tungod kay basig inigbalik nimo, wala diha ang tagbalay o dili nimo siya puwedeng maestorya. Dugang pa, kinahanglan tingali nga kadaghan kang mobalikduaw ayha magpa-Bible study ang tagbalay. Hinumdomi, dakog purohan nga motubo ang tanom kon pirmeng bisbisan. Sa susama, dakog purohan nga motubo ang gugma sa usa ka interesado para kang Jehova ug sa Kristo kon regular tang makighisgot niya bahin sa Pulong sa Diyos. w19.07 14 ¶1; 15-16 ¶7-8

Unsay gipasabot ni Jesus? Wala ipasabot ni Jesus nga gusto sa mga Kristohanon nga dumtan sila sa mga tawo. Nagpasidaan lang siya kon unsay mahitabo kanato. Dili ta bahin sa kalibotan. Kita nagsunod sa mga pagtulon-an ni Jesus ug nagsangyaw sa mensahe nga iyang gisangyaw. Tungod niana, ang kalibotan nagdumot kanato. (Juan 15:18-21) Gusto natong lipayon si Jehova. Kon dumtan ta sa mga tawo kay gihigugma nato ang atong Amahan, dili ta angayng maguol. Dili ta angayng maghunahuna nga wala tay pulos kon dili ganahan ang mga tawo kanato. Wala ta kabalo kon kanus-a ta makasinatig paglutos o kon kanus-a idili sa gobyerno ang atong buluhaton. Pero nahibalo ta nga makapangandam ta karon pinaagi sa pagpalig-on sa atong relasyon kang Jehova, pagkat-on nga mahimong mas maisogon, ug dili pagpadala sa pagdumot sa mga tawo. Ang atong pagpangandam karon makatabang nato sa pagbarog nga malig-on sa umaabot. w19.07 6 ¶17-18; 7 ¶21

Dihang mag-Bible study ta sa mga tawo nga dili relihiyosog kagikan, kinahanglang padayon natong palig-onon ang ilang pagtuo nga dunay Diyos. Angay sab nato silang tabangan nga molig-on ang ilang pagtuo sa Bibliya. Mahimong magpasabot ni nga balikbalikon nato pagtudlo ang pipila ka kamatuoran. Sa matag higayon nga mag-Bible study ta kanila, lagmit kinahanglan natong hisgotan ang mga ebidensiya nga ang Bibliya Pulong sa Diyos pinaagi sa pagpakita kanila sa natuman nga mga tagna, pagkatukma sa Bibliya maylabot sa siyensiya ug kasaysayan, o sa praktikal nga mga prinsipyo niini. Matabangan nato ang mga tawo nga mahimong tinun-an sa Kristo pinaagi sa pagpakitag gugma kanila, relihiyoso man sila o dili. (1 Cor. 13:1) Sa pagtudlo nato kanila, tumong nato nga ipakita nga ang Diyos nahigugma nato ug gusto niya nga ato siyang higugmaon. Kada tuig, libolibo niadtong kaniadto gamay ra o wala gyoy interes bahin sa relihiyon ang mabawtismohan kay nakakat-on sila sa paghigugma sa Diyos. Busa magmapositibo, ug pagpakitag gugma ug personal nga interes sa tanang matang sa tawo. Paminawa ug sabta sila. Pinaagi sa imong ehemplo, tudloi sila nga mahimong tinun-an sa Kristo. w19.07 24 ¶16-17

Ang mga anak nga babaye ni Salum apil niadtong gigamit ni Jehova sa pagtukod pag-usab sa paril sa Jerusalem. (Neh. 2:20; 3:12) Bisag prinsipe ang ilang amahan, andam silang mobuhat nianang lisod ug peligrosong trabaho. (Neh. 4:15-18) Karon sab, may mga sister nga andam ug malipay nga motabang diha sa linaing klase sa sagradong pag-alagad​—ang pagtukod ug pagmentinar sa mga bilding nga gipahinungod kang Jehova. Ang ilang kahanas, kadasig, ug pagkamaunongon importante aron magmalamposon kining buluhatona. Si Jehova nagpalihok kang Tabitha sa paghimog daghang “maayong buhat ug gasa sa kaluoy,” ilabina para sa mga babayeng balo. (Buh. 9:36) Tungod sa iyang talagsaong pagkamahinatagon ug pagkamaayo, daghan ang nanghilak dihang siya namatay. Pero nalipay kaayo sila dihang gibanhaw siya ni apostol Pedro. (Buh. 9:39-41) Unsay atong makat-onan kang Tabitha? Kita man bata o tigulang, lalaki o babaye, makahatag ta ug praktikal nga tabang sa atong mga igsoon. w19.10 23 ¶11-12

Sa unsang paagi mahimong makapandol ta sa uban? Imadyina kini nga situwasyon. Human sa dugayng pakigbisog, nahunong ra gyod sa usa ka Bible study ang iyang pagkaalkoholiko. Naamgohan niya nga kinahanglan gyod siyang maglikay sa alkoholikong ilimnon, mouswag, ug magpabawtismo. Sa ulahi, may brader nga nangimbitar niya sa usa ka tapoktapok ug gitanyagan siyag ilimnon, ug miingon: “Kon naa kay pagpugong sa kaugalingon, kaya ra nimong moinom ug diyutay.” Makapaguol gyod kon ang bag-ohang brader maminaw nianang sayop nga tambag ug mahimo na pong alkoholiko! Ang atong mga tigom makatabang nato sa pagpadapat sa tambag sa teksto karong adlawa. Kini nagpahinumdom nato kon unsay mas importante kang Jehova ug kon unsaon pagpadapat ang atong nakat-onan aron walay ikasaway kanato. Kini sab nagdasig nato sa paghigugma sa Diyos ug sa atong mga igsoon. Kon mapuno ang atong kasingkasing niining duha ka talagsaong gugma, maningkamot ta pag-ayo nga dili makapandol sa atong mga igsoon. w19.08 10 ¶9; 11 ¶13-14

May mga tawo nga kon tan-awon may kompiyansa sa kaugalingon o prangka pero dili diay hambogiro. (Juan 1:46, 47) Bisan unsa may atong personalidad, kitang tanan angayng maningkamot nga maugmad ang pagkamapainubsanon. Tagda ang ehemplo ni apostol Pablo. Gigamit siya pag-ayo ni Jehova sa pagtukod ug bag-ong mga kongregasyon sa lainlaing siyudad. Posible nga mas daghan siyag nahimo diha sa ministeryo kay sa ubang apostoles ni Jesu-Kristo. Bisan pa niana, wala siya maghunahuna nga labaw siya sa mga igsoon. Siya miingon nga nabatonan niya ang maayong baroganan atubangan kang Jehova, dili tungod sa iyang mga hiyas o buhat, kondili sa dili hitupngang pagkamaayo sa Diyos. (1 Cor. 15:10) Nagpakita gyod si Pablo ug maayong ehemplo sa pagkamapainubsanon diha sa iyang sulat sa mga taga-Corinto​—ilabina kon atong hinumdoman nga dihay pipila ka lalaki sa kongregasyon nga nagtinguhang pamatud-an ang ilang kaugalingon nga labaw kang Pablo.​—2 Cor. 10:10. w19.09 3 ¶5-6

Ang usa ka rason nga malisdan tingali ta sa pagpasakop kang Jehova mao ang atong napanunod nga sala ug pagkadili-hingpit. Busa naa tay tendensiya nga dili mosunod sa Diyos. Human morebelde si Adan ug Eva sa Diyos ug mokaon sa gidiling bunga, sila nagtakdag kaugalingong mga sukdanan. (Gen. 3:22) Karon, kadaghanan sa mga tawo wala sab moila kang Jehova ug silay nagbuot kon unsay husto ug sayop. Bisan kadtong nakaila ug nahigugma kang Jehova maglisod usahay sa pagpasakop kaniya. Si apostol Pablo nakaeksperyensiya niana. (Roma 7:21-23) Sama kang Pablo, gusto natong buhaton kon unsay husto sa panglantaw ni Jehova. Pero angay natong suklan kanunay ang tendensiya sa paghimo ug daotan. Ang laing rason kon nganong lisod usahay ang pagpasakop kang Jehova mao ang impluwensiya sa kultura nga atong gidak-an. Daghang ideya sa mga tawo ang supak sa kabubut-on ni Jehova, busa kinahanglan nga padayon tang maningkamot sa pagsalikway sa maong mga panghunahuna. w19.09 15 ¶4-6

Kinahanglang realistiko ta. Ang atong kusog may limitasyon. Busa hunahunaon natog maayo kon unsay atong himoon. Pananglitan, basig masayang ang atong kusog sa pagtigom ug materyal nga mga butang. Matikdi ang giingon ni Jesus sa dato nga batan-on, kinsa nangutana: “Unsay kinahanglan nakong himoon aron makapanunod ug kinabuhing walay kataposan?” Lagmit maayo siyang tawo kay ang Ebanghelyo ni Marcos nag-ingon nga si Jesus “mibatig gugma kaniya.” Gidapit siya ni Jesus, sumala sa giingon sa teksto niining adlawa. Gusto sa batan-on nga mosunod kang Jesus, pero dayag nga dili niya kayang biyaan ang iyang ‘daghang kabtangan.’ (Mar. 10:17-22) Busa iyang gibalibaran ang yugo nga gitanyag ni Jesus kaniya ug padayon siyang nagpaulipon “sa Bahandi.” (Mat. 6:24) Kon ikaw tong batan-on, unsay imong pilion? Matag karon ug unya, maayong susihon nato kon unsay atong mga prayoridad. Ngano? Aron maseguro nato nga atong gigamit ang atong kusog sa hustong paagi. w19.09 24 ¶17-18

Ayha ra matapos ang atong pagsangyaw sa Gingharian kon moingon na si Jehova nga nahuman na kana. Unsa na lang ka mubo ang nahibiling panahon aron ang mga tawo makaila kang Jehova nga Diyos ug kang Jesu-Kristo? (Juan 17:3) Wala ta mahibalo. Pero nahibalo ta nga hangtod dili pa magsugod ang dakong kasakitan, si bisan kinsa nga “nakiling sa pagdawat sa kamatuoran nga motultol sa kinabuhing walay kataposan” puwede pang modawat sa maayong balita. (Buh. 13:48) Sa unsang paagi matabangan nato kining mga tawhana sa dili pa ulahi ang tanan? Pinaagi sa iyang organisasyon, si Jehova naghatag kanato sa tanan natong gikinahanglan sa pagtudlo sa mga tawo sa kamatuoran. Pananglitan, kada semana gibansay ta diha sa midweek nga tigom. Kini nga tigom nagtabang kanato nga mahibaloan kon unsay isulti sa unang pagduaw ug sa pagbalikduaw. Ug kon binlan nimog tract o magasin ang usa ka interesado human mo magkaestorya, naa siyay mabasa hangtod nga magkaestorya mog balik. Responsibilidad nato nga magmapuliki kada bulan sa pagsangyaw sa Gingharian. w19.10 10 ¶7, 9-10

Si Jehova nagsaad kang Simeon, usa ka maunongong tigulang sa Jerusalem, nga dili siya mamatay hangtod dili niya makita ang Kristo. Seguradong napalig-on pag-ayo si Simeon sa maong saad, kay dugay na siyang nagpaabot sa Mesiyas. Gipanalanginan siya tungod sa iyang pagtuo ug paglahutay. Usa ka adlaw niana, “ilalom sa paggiya sa espiritu,” siya misulod sa templo. Didto iyang nakita ang batang si Jesus, ug gigamit ni Jehova si Simeon aron magtagna bahin sa bata nga maoy mahimong Kristo. (Luc. 2:25-35) Bisag namatay si Simeon lagmit sa wala pa sugdi ni Jesus ang iyang ministeryo sa yuta, siya mapasalamaton sa maong pribilehiyo, ug sa umaabot siya makadawat pag daghang panalangin. Sa bag-ong kalibotan, makita niining matinumanong tawo kon sa unsang paagi ang pagmando ni Jesus magdalag panalangin sa tanang pamilya sa yuta. (Gen. 22:18) Mapasalamaton sab ta sa bisan unsang pribilehiyo nga ihatag ni Jehova kanato sa pag-alagad kaniya. w19.10 22 ¶7; 23 ¶12

Dato man ta o pobre, kinahanglan natong bantayan ang atong kasingkasing. Sa unsang paagi? Ayawg ugmara ang gugma sa bahandi. Ug ayawg tugoti nga mahimong mas importante ang imong sekular nga trabaho kay sa imong pag-alagad kang Jehova. Unsaon nimo pagkahibalo nga ingon niana na ang imong kahimtang? Puwede nimong pangutan-on ang imong kaugalingon: ‘Pirme ba kong maghunahuna sa akong sekular nga trabaho panahon sa tigom o sa ministeryo? Magsige ba kog kabalaka kon duna pa ba koy igong kuwarta sa umaabot? Nakaapektar ba sa akong kaminyoon ang kuwarta ug kabtangan? Andam ba kong modawat ug trabaho nga gipakamenos sa uban aron makagugol kog mas dakong panahon sa pag-alagad kang Jehova?’ (1 Tim. 6:9-12) Dihang atong konsiderahon kanang mga pangutanaha, angay natong hinumdoman nga si Jehova nagmahal kanato ug nagsaad niadtong naghatag ug debosyon kaniya: “Dili gyod ka nako biyaan, ug dili gyod ka nako talikdan.” Kanay rason nga si apostol Pablo misulat: “Ayaw ninyog higugmaa ang kuwarta.”​—Heb. 13:5, 6. w19.10 29 ¶10

Kon makig-uban ta sa atong mga igsoon diha sa buluhaton ug maobserbahan ang ilang nindot nga mga hiyas, kita makakat-on kanila ug mas masuod kanila. Pananglitan, unsay imong bation kon samtang nagsangyaw ka madungog nimo ang imong higala nga maisogong midepensa sa iyang pagtuo o kinasingkasing nga mipahayag sa iyang kombiksiyon bahin kang Jehova ug sa iyang katuyoan? Lagmit mas mahalon nimo siya. Si Adeline, nga 23 anyos, mihangyo sa usa sa iyang mga amiga, si Candice, nga mag-uban sila sa pagsangyaw sa teritoryo nga panagsa rang masangyawan. “Gusto namong mas madasig ug mas ma-enjoy sa ministeryo,” siya miingon. “Pareho ming nanginahanglag pagdasig aron padayon namong mahatag kang Jehova ang among kinamaayohan.” Sa unsang paagi sila nakabenepisyo sa ilang pag-ubanay? Si Adeline miingon, “Human sa tibuok adlawng pagsangyaw, maghisgot mi kon unsay among gibati, kon sa unsang paagi nadasig mi sa among pagpakig-estorya sa mga tawo, ug kon nganong makaingon mi nga gigiyahan ni Jehova ang among ministeryo. Na-enjoy gyod namo ang among panag-estoryahay ug mas nagkasuod mi.” w19.11 5 ¶10-11

Sa karaang panahon, ang usa ka sundalo maulawan kon mouli siya nga walay taming. Ang Romanong historyano nga si Tacitus misulat: “Kon mabiyaan ang taming, dako kaayo ni nga kaulawan.” Usa ni sa mga rason nga kuptan pag-ayo sa mga sundalo ang ilang taming. Makuptan nato pag-ayo ang atong taming sa pagtuo pinaagi sa regular nga pagtambong sa Kristohanong mga tigom ug pinaagi sa pagsangyaw sa ngalan ni Jehova ug sa iyang Gingharian. (Heb. 10:23-25) Dugang pa, mainampoon natong basahon ang Pulong sa Diyos matag adlaw ug ipadapat ang tambag ug instruksiyon niini sa tanan natong buhaton. (2 Tim. 3:16, 17) Pinaagi niana, walay hinagiban nga gamiton ni Satanas batok kanato ang makapahinabog permanenteng kadaot. (Isa. 54:17) Ang atong “dakong taming sa pagtuo” manalipod kanato. Lig-on tang makabarog uban sa atong mga igsoon. Ug gawas nga makadaog ta sa adlaw-adlaw natong pagpakiggubat, dungog nato nga maanaa sa kiliran ni Jesus dihang makadaog siya sa gubat batok kang Satanas ug sa mga sumusunod niini.​—Pin. 17:14; 20:10. w19.11 19 ¶18-19

Kon imong isulat ang imong mga plano, mas sayon ang pag-implementar niini. (1 Cor. 14:40) Pananglitan, ang mga ansiyano gihatagag instruksiyon nga mag-asayn ug ansiyano nga magrekord sa matag desisyon nga ilang mahimo, apil na kon kinsay gitudlo nga moimplementar niana ug kon kanus-a kana taposon. Kon ila nang sundon, mas sayon nilang maimplementar ang ilang mga desisyon. Puwede pod nâ nimong sundon sa imong personal nga mga kalihokan. Pananglitan, puwede kang maghimog listahan sa mga kinahanglan nimong himoon kada adlaw, ug unaha pagsulat ang mga butang nga una nimong buhaton. Makatabang ni aron matapos nimo ang imong nasugdan ug mas daghan kag malampos. Pero kinahanglan kang magkugi. Kinahanglan ang paningkamot aron maimplementar ang imong mga plano ug matapos ang imong nasugdan. (Roma 12:11) Gisultihan ni apostol Pablo si Timoteo nga ‘magpadayon sa pagkugi’ aron mahimong mas maayong magtutudlo. Kana nga tambag mapadapat sab sa ubang espirituwal nga mga tumong.​—1 Tim. 4:13, 16. w19.11 29-30 ¶15-16

Dihang gisugo si Moises sa pagpanguna sa nasod sa Israel sa paggawas sa Ehipto, wala siyay pagsalig sa kaugalingon ug balikbalik niyang giingnan si Jehova nga mibati siyang dili kuwalipikado. Ang tubag sa Diyos nagpakita sa Iyang pagkamaluluy-on kay Iyang nasabtan ang gibati ni Moises ug gitabangan siya. (Ex. 4:10-16) Ingong resulta, si Moises nakahimo sa pagsulti ug bug-at nga mga mensahe sa paghukom ngadto sa Paraon. Unya nakita ni Moises nga gigamit ni Jehova ang Iyang gahom dihang Iyang giluwas ang mga Israelinhon ug gilaglag ang Paraon ug ang iyang kasundalohan sa Pulang Dagat. (Ex. 14:24-28; Sal. 136:15) Human makagawas ang mga Israelinhon sa Ehipto sa pagpanguna ni Moises, nagsige silag reklamo. Bisan pa niana, naobserbahan ni Moises ang dakong pailob ni Jehova sa katawhan nga Iyang gipagawas sa pagkaulipon. (Sal. 78:40-43) Nakita sab niya ang talagsaong pagkamapainubsanon ni Jehova dihang giusab Niya ang Iyang hunahuna human mohangyo si Moises. (Ex. 32:9-14) Human sa paggawas sa Ehipto, si Moises nasuod pag-ayo kang Jehova, nga samag nakita niya ang iyang langitnong Amahan.​—Heb. 11:27. w19.12 17-19 ¶7-9

Kadaghanan sa mga tinun-an ni Jesus taga-Galilea. Busa mas sayon nga tigomon ang daghang tawo sa bukid sa Galilea imbes sa usa ka balay sa Jerusalem. Dugang pa, human mabanhaw si Jesus, siya nakigkita na sa iyang 11 ka apostoles sa usa ka balay sa Jerusalem. Kon para lang sa mga apostoles ang sugo nga magsangyaw ug maghimog tinun-an, gisulti na unta to niya sa Jerusalem imbes paadtoon pa sa Galilea ang mga apostoles, ang mga babaye, ug ang uban pa. (Luc. 24:33, 36) Ang sugo ni Jesus nga maghimog mga tinun-an dili lang para sa mga Kristohanon sa unang siglo. Giunsa nato pagkahibalo? Gitapos ni Jesus ang iyang mga instruksiyon sa iyang mga sumusunod niining mga pulonga: “Ako magauban kaninyo sa tanang adlaw hangtod sa hinapos sa sistema sa mga butang.” (Mat. 28:19, 20) Karon, daghan ang nagtudlo sa mga tawo aron mahimong mga tinun-an. Hunahunaa ra, kada tuig halos 300,000 ang mabawtismohan ingong mga Saksi ni Jehova ug mahimong mga tinun-an ni Jesu-Kristo! w20.01 2 ¶1; 3 ¶5-6

Batan-on, pero giingnan sa doktor nga dunay grabeng sakit. Nagkatigulang ug walay makitang trabaho. Tigulang ug anam-anam nga nalimitahan sa imong mahimo sa pag-alagad kang Jehova. Kon nakasinati kag susamang mga problema, bation tingali nimo nga wala na kay pulos. Ang maong mga situwasyon makawala sa imong kalipay, makapanegatibo sa imong panglantaw sa kaugalingon, ug makaapektar sa imong relasyon sa uban. Gisundog niining kalibotana ang panglantaw ni Satanas sa kinabuhi sa tawo. Kanunayng gitratar ni Satanas ang mga tawo nga daw wala silay pulos. Wala siyay kasingkasing kay giingnan niya si Eva nga mahimo ning gawasnon kon supakon niini ang Diyos, bisan pag nahibalo siya nga kamatayon ang silot niana. Kanunayng gikontrolar ni Satanas kining kalibotana. Busa dili ikatingala nga daghang lider niini nagsundog sa iyang kawalay-pagtahod sa kinabuhi ug dignidad sa tawo. Sa laing bahin, gusto ni Jehova nga positibo tag panglantaw sa kaugalingon, ug tabangan ta niya dihang mag-atubang tag mga situwasyon nga makapabati natong walay pulos.​—Roma 12:3. w20.01 14-15 ¶1-4

Sulod sa labing menos 40 ka tuig, si Jeremias nagkinabuhi taliwala sa mga tawong dili maunongon, nga nag-apil sa mga silingan ug tingali pipila ka paryente gikan sa ilang lungsod sa Anatot. (Jer. 12:6) Pero, wala niya ilain ang iyang kaugalingon. Gani, gipahayag niya ang iyang gibati ngadto sa iyang maunongong sekretaryo nga si Baruk ug kanato usab. (Jer. 8:21; 9:1; 20:14-18; 45:1) Atong maimadyin nga samtang gisulat ni Baruk ang mga panghitabo sa kinabuhi ni Jeremias, milalom ang ilang gugma ug pagtahod sa usag usa. (Jer. 20:1, 2; 26:7-11) Sa daghang katuigan, si Jeremias maisogong nagpasidaan sa mga Israelinhon bahin sa mahitabo sa Jerusalem. (Jer. 25:3) Sa dugang nga paningkamot ni Jehova nga mapalihok ang mga tawo sa paghinulsol, iyang gisugo si Jeremias sa pagsulat sa Iyang mga pasidaan diha sa linukot nga basahon. (Jer. 36:1-4) Samtang nagkauban si Jeremias ug Baruk niining hinatag sa Diyos nga buluhaton, nga lagmit mikabat ug pipila ka bulan, seguradong nag-estoryahanay sila bahin sa mga butang nga nakapalig-on sa ilang pagtuo. w19.11 2-3 ¶3-4

Unsaon nato pagtratar ang dinihogan natong mga igsoon? Sayop gyod kon sobra kaayo ang atong pagdayeg sa usa ka tawo, bisan pag siya dinihogang igsoon sa Kristo. (Mat. 23:8-11) Dihang maghisgot ang Bibliya bahin sa mga ansiyano, kini nagdasig kanato nga ‘sundogon ang ilang pagtuo,’ pero wala ni mag-ingon nga himoon natong lider ang si bisan kinsang tawo. (Heb. 13:7) Tinuod, ang Bibliya nag-ingon nga ang pipila “takos sa dobleng pasidungog.” Pero tungod ni kay sila “nagdumala sa maayong paagi” ug “naghago sa pagpanulti ug pagpanudlo,” dili tungod kay sila dinihogan. (1 Tim. 5:17) Kon hatagan nato ang mga dinihogan ug sobrang pagdayeg ug atensiyon, basin maulaw sila. O mas grabe pa, basig kitay hinungdan nga mahimo silang mapahitas-on. (Roma 12:3) Dili gyod nato gustong mobuhat ug bisan unsa nga tungod niana makahimo na hinuog seryosong sala ang usa ka dinihogang igsoon sa Kristo.​—Luc. 17:2. w20.01 28 ¶8

Si apostol Pablo daghag rason nga mabalaka. Nabalaka kaayo siya sa mga problema sa mga igsoon. (2 Cor. 2:4) Siya gidagmalan sa mga magsusupak ug gipapriso. Nakaatubang sab siyag mga kalisdanan nga nakapabalaka niya, sama sa “kawalad-on.” (Filip. 4:12) Ug kay nakasinati siyag pagkalunod labing menos tulo ka higayon, maimadyin nato ang iyang kabalaka dihang mosakay siyag barko. (2 Cor. 11:23-27) Unsay nakatabang kang Pablo dihang mabalaka siya? Si Pablo nabalaka sa mga igsoon dihang may mga problema sila, pero wala niya sulbara ang tanan nilang problema nga siyasiya ra. Nahibalo siya nga dili ni niya mahimo sa kaugalingon niyang katakos. Nagpatabang siya sa uban, sa kasaligang mga lalaki sama ni Timoteo ug Tito, sa pag-atiman sa kongregasyon. Segurado nga ang nahimo sa maong mga brader nakapamenos sa kabalaka ni Pablo.​—Filip. 2:19, 20; Tito 1:1, 4, 5. w20.02 22-23 ¶11-12

Gidahom sab ni Jehova nga magmasinugtanon ta kaniya. Takos siya sa atong pagkamasinugtanon kay siya ang atong Maglalalang, ang Tigsustento sa atong kinabuhi, ug ang labing maalamon sa tanang ginikanan. Pero ang pangunang rason nga magmasinugtanon ta kang Jehova mao ang atong gugma kaniya. (1 Juan 5:3) Bisag daghan ug rason nga angay tang magmasinugtanon kang Jehova, wala ta niya pugsa sa paghimo niana. Si Jehova naghatag kanatog kagawasan sa pagpili, busa malipay siya dihang mopili ta nga magmasinugtanon kaniya tungod sa atong gugma kaniya. Gusto sa mga ginikanan nga luwas ang ilang mga anak. Kanay hinungdan nga maghimo silag mga lagda. Dihang ang mga anak mosunod niana, ilang gipakita nga sila may pagsalig ug pagtahod sa ilang ginikanan. Labaw na gyod nga angay tang mahibalo sa mga lagda sa atong langitnong Amahan ug mosunod niana. Dihang buhaton nato kana, atong gipakita nga gihigugma ug gitahod nato si Jehova ug makahatag pod nag kaayohan kanato. (Isa. 48:17, 18) Pero kon atong isalikway si Jehova ug ang iyang mga lagda, moresulta kana sa atong kadaot.​—Gal. 6:7, 8. w20.02 9-10 ¶8-9

Sama kang Abigail, kinahanglang magmaisogon ta sa pagsulti kon makita nato nga dunay ginahimo ang usa nga moresulta sa seryosong sala. (Sal. 141:5) Kinahanglan tang magmatinahoron, pero kinahanglan sab tang magmaisogon. Kon mahigugmaon natong ihatag sa usa ka tawo ang gikinahanglang tambag, atong mapamatud-an nga tinuod tang higala. (Prov. 27:17) Ilabinang importante nga ang mga ansiyano dunay kaisog sa pagsulti sa membro sa kongregasyon nga nakahimog sayop nga lakang. (Gal. 6:1) Mapainubsanon nilang giila nga dili sab sila hingpit ug basin magkinahanglan pod unyag tambag. Pero dili nila kana tugotan nga mopugong kanila sa pagbadlong niadtong nagkinahanglag disiplina. (2 Tim. 4:2; Tito 1:9) Sa dihang tambagan nila ang usa ka tawo, mataktikanhon ug mapailobon nilang tudloan siya gamit ang ilang gasa sa pagsulti. Gihigugma nila ang ilang igsoon, ug kana nga gugma magpalihok nila sa pagtabang kaniya. (Prov. 13:24) Pero ang panguna nilang gihunahuna mao ang pagpasidungog kang Jehova pinaagi sa pagsunod sa iyang sukdanan ug pagpanalipod sa kongregasyon batok sa kadaot.​—Buh. 20:28. w20.03 20-21 ¶8-9

Gihimo ni Jehova si Moises nga manluluwas sa mga Israelinhon. Pero kanus-a siya gigamit ni Jehova nianang paagiha? Niadto bang gibati ni Moises nga kuwalipikado siya kay “natudloan [siya] sa tanang kaalam sa mga Ehiptohanon”? (Buh. 7:22-25) Dili. Ayha pa gigamit ni Jehova si Moises human niya kini tabangi nga mahimong mapaubsanon ug lumo nga tawo. (Buh. 7:30, 34-36) Gihatagan ni Jehova si Moises ug kaisog sa pag-atubang sa labing gamhanang magmamando sa Ehipto. (Ex. 9:13-19) Base niini, makita nato nga si Jehova naggamit niadtong naningkamot sa pagsundog sa iyang mga hiyas ug nagsalig niya alang sa kusog. Latas sa kasaysayan, gigamit ni Jehova ang iyang mga alagad sa lainlaing paagi. Sa unsang paagi gamiton ka ni Jehova? Nagdepende gyod kana kon unsa ka ka andam nga maghago. (Col. 1:29) Kon andam kang magpagamit, puwede kang himoon ni Jehova nga madasigong ebanghelisador, epektibong magtutudlo, maayong maghuhupay, hanas nga magbubuhat, matinabangong higala, o bisan unsa nga iyang gikinahanglan sa pagtuman sa iyang kabubut-on. w19.10 21 ¶5; 25 ¶14

Ang maayong mga higala makatabang nato nga magmaunongon kang Jehova. Ug ang pinakamaayong paagi aron makakitag maayong higala mao ang pagkahimong maayong higala. (Mat. 7:12) Pananglitan, ang Bibliya nagdasig nga gamiton ang atong panahon ug kusog sa pagtabang sa uban, ilabina sa mga “nanginahanglan.” (Efe. 4:28) Kon pirme tang motabang sa uban, mas dakog posibilidad nga magmalipayon ta. (Buh. 20:35) Ang atong mga higala makasuportar nato panahon sa kalisdanan ug makatabang nato nga magmalinawon. Sama nga naminaw si Elihu dihang naghisgot si Job sa iyang kalisdanan, ang atong mga higala makatabang nato pinaagi sa mapailobong pagpaminaw kanato. (Job 32:4) Dili ta magdahom nga silay modesisyon para nato, pero maalamon ta kon maminaw ta sa ilang tambag nga gikan sa Bibliya. (Prov. 15:22) Sama nga si Haring David mapainubsanong midawat sa tabang sa iyang mga higala, mapainubsanon sab natong dawaton ang tabang sa atong mga higala. (2 Sam. 17:27-29) Sa pagkatinuod, regalo gikan kang Jehova ang maayong mga higala.​—Sant. 1:17. w19.04 11 ¶12; 12 ¶14-15