Septiyembre

Ang panig-ingnan ba nga gipakita ni Jehova ug Jesus sa pagtrabaho pag-ayo nagpasabot nga dili na ta kinahanglang mopahulay? Wala. Si Jehova dili gyod kapoyon, busa dili siya kinahanglang mopahulay. Pero ang Bibliya nag-ingon nga human lalanga ni Jehova ang langit ug yuta, “siya nagpahulay.” (Ex. 31:17) Dayag nga nagpasabot kana nga si Jehova mihunong sa pagpanglalang ug migahig panahon nga kalipayan ang iyang gihimo. Ug bisag si Jesus nagtrabaho pag-ayo samtang dinhi sa yuta, migahin gihapon siyag panahon sa pagpahulay ug sa pagpangaon uban sa iyang mga higala. (Mat. 14:13; Luc. 7:34) Ang Bibliya nagdasig sa katawhan sa Diyos nga magmalipayon sa pagtrabaho. Ang iyang mga alagad angayng magkugi imbes magtinapolan. (Prov. 15:19) Tingali nagtrabaho ka aron matagan-an ang imong pamilya. Ug ang tanang tinun-an sa Kristo dunay responsibilidad sa pagsangyaw sa maayong balita. Pero, nagkinahanglan sab kag igong pahulay. w19.12 2 ¶2; 3 ¶4-5

Likayi ang pag-estorya bahin sa mga demonyo. Niining bahina, gusto natong sundogon si Jesus. Sa wala pa moanhi sa yuta, si Jesus nabuhi na sa langit, ug daghan siyag nahibaloan bahin kang Satanas ug sa mga demonyo. Pero wala siya mag-estorya bahin sa ginahimo nianang daotang mga espiritu. Gusto ni Jesus nga mahimong tigpamatuod bahin kang Jehova, dili kang Satanas. Masundog nato si Jesus kon dili ta mag-estorya bahin sa mga demonyo. Ato hinuong ipakita sa atong isulti nga “napukaw ang [atong] kasingkasing sa usa ka maayong butang,” nga mao ang kamatuoran. (Sal. 45:1) Ayawg kahadlok sa daotang mga espiritu. Niining kalibotana, mahimong mahitabo kanato ang daotang mga butang, sama sa aksidente, sakit, o kamatayon pa gani. Pero dili ta angayng maghunahuna nga ang daotang mga espiritu maoy responsable niana. Ang Bibliya nag-ingon nga “ang panahon ug ang wala damhang panghitabo” modangat kang bisan kinsa. (Eccl. 9:11) Kon bahin sa mga demonyo, gipakita ni Jehova nga mas gamhanan siya kay kanila. w19.04 23-24 ¶13-14

Mosunod ba ang mga ansiyano sa mga balaod bahin sa pagsumbong ngadto sa awtoridad kon dunay giakusahan nga nag-abuso ug bata? Oo. Sa mga dapit diin anaa kana nga mga balaod, ang mga ansiyano maningkamot sa pagsunod niana. Ang maong mga balaod dili supak sa balaod sa Diyos. (Buh. 5:28, 29) Busa kon mahibaloan sa mga ansiyano nga dunay giakusahan, mangayo dayon silag direksiyon sa sangang buhatan kon unsay buhaton aron matuman nila ang mga balaod bahin sa pagsumbong niana. Pasaligan sa mga ansiyano ang mga biktima ug ang mga ginikanan niini ug ang uban nga nahibalo sa maong hitabo nga puwede silang mosumbong sa sekular nga awtoridad. Pero komosta kon ang usa nga giakusahan maoy bahin sa kongregasyon ug mahibaloan sa komunidad ang nahitabo? Angay bang bation sa Kristohanong nagsumbong niana nga nakapasipala siya sa ngalan sa Diyos? Dili. Ang tig-abuso maoy nagpasipala sa ngalan sa Diyos. w19.05 10 ¶13-14

Ang Bibliya nagsugo sa bana ug asawa sa pagpasidungog sa usag usa ug sa pagtuman sa ilang panumpa sa kaminyoon. Kini nagdasig sa magtiayon nga magmadeterminado nga mounong sa usag usa, nga nag-ingon: “Ang lalaki mobiya sa iyang amahan ug inahan ug siya moipon sa iyang asawa, ug sila mahimong usa ka unod.” (Gen. 2:24) Pero kadtong naimpluwensiyahan sa kaalam sa kalibotan nagpasiugdag lahi nga panglantaw, nga nag-ingon nga ang bana o asawa angayng magpokus sa iyang kaugalingong mga panginahanglan. Ang usa ka basahon bahin sa diborsiyo nag-ingon: “Sa pipila ka seremonyas sa kasal, ang naandang panumpa nga magpabiling minyo ‘samtang kita buhi pa’ gipulihan ug mas limitadong saad nga magpabiling minyo ‘samtang kita nagkahigugmaay pa.’” Kay giisip sa mga tawo nga ang kaminyoon dili permanente, daghang pamilya ang nabungkag ug nasakitan pag-ayo. Klaro gyod nga kabuangan ang panglantaw sa kalibotan bahin sa kaminyoon. w19.05 23 ¶12

Si Pablo nabalaka kay ang pipila ka Kristohanon dayag nga naimpluwensiyahan sa sayop nga mga pangatarongan ug pilosopiya nga gipasiugda sa kalibotan ni Satanas. (Efe. 4:17-19) Puwede sab nang mahitabo kang bisan kinsa kanato. Si Satanas, ang diyos niining sistemaha sa mga butang, naggamit ug lainlaing taktika sa paningkamot nga mahilayo ta kang Jehova. Pananglitan, kon gusto tang mahimong inila, pahimuslan niya kana aron motalikod ta kang Jehova. Gamiton pa gani niya ang atong eksperyensiya, kultura, o edukasyon aron sundogon nato ang iyang panghunahuna. Posible bang matangtang nato ang mga butang nga “lig-ong naparilan” o nakagamot na pag-ayo sa atong hunahuna? (2 Cor. 10:4) Matikdi ang tubag ni Pablo: “Gipukan namo ang mga pangatarongan ug ang tanang tag-as nga butang nga batok sa kahibalo sa Diyos, ug gibihag namo ang tanang hunahuna aron himoon kining masinugtanon sa Kristo.” (2 Cor. 10:5) Oo, sa tabang ni Jehova matangtang nato ang sayop nga panghunahuna. w19.06 8 ¶1-3

Bisag naguol pag-ayo, si Ana, David, ug ang usa ka salmista misalig kang Jehova alang sa tabang. Ilang giampo kang Jehova ang ilang mga kabalaka. Way pagduhaduha nilang gisulti kaniya ang mga rason kon nganong na-stress kaayo sila. Ug padayon silang miadto sa dapit sa pagsimba kang Jehova. (1 Sam. 1:9, 10; Sal. 55:22; 73:17; 122:1) Mabinationg gitubag ni Jehova ang matag usa kanila. Si Ana nakabatog kalinaw sa hunahuna. (1 Sam. 1:18) Si David misulat: “Daghan ang kalisdanan sa matarong, apan luwason siya ni Jehova gikan nianang tanan.” (Sal. 34:19) Ug ang salmista nga lagmit kaliwat ni Asap mibati sa ulahi nga si Jehova ‘nagkupot sa iyang tuong kamot,’ nga naggiya kaniya pinaagig mahigugmaong tambag. (Sal. 73:23, 24) Unsay atong makat-onan sa maong mga pananglitan? Usahay, mabug-atan ta sa mga problema nga makapa-stress nato. Pero masagubang nato ni kon mamalandong ta kon giunsa pagtabang ni Jehova ang uban, kon mosalig ta niya pinaagig pag-ampo, ug kon motuman ta sa tanan niyang isulti kanato.​—Sal. 143:1, 4-8. w19.06 17-18 ¶14-15

Ayawg tugoti nga tungod sa isulti o buhaton sa mga tawo, ikaulaw nimo ang pagkahimong Saksi ni Jehova. (Miq. 4:5) Hunahunaa ang gihimo sa mga apostoles sa Jerusalem human patya si Jesus. Nahibalo sila nga gidumtan sila pag-ayo sa Hudiyong mga lider sa relihiyon. (Buh. 5:17, 18, 27, 28) Pero kada adlaw, padayon silang miadto sa templo ug gipaila ang ilang kaugalingon ingong mga tinun-an ni Jesus pinaagi sa pagsangyaw. (Buh. 5:42) Wala sila mouk-ok sa kahadlok. Madaog sab nato ang pagkahadlok sa tawo kon atong ipaila ang kaugalingon ingong mga Saksi ni Jehova​—sa trabahoan, sa eskuwelahan, o sa mga silingan. (Buh. 4:29; Roma 1:16) Nganong malipayon ang mga apostoles? Nahibalo sila kon nganong gidumtan sila, ug giisip nilang kadungganan nga himoan silag daotan tungod sa pagbuhat sa kabubut-on ni Jehova. (Luc. 6:23; Buh. 5:41; 1 Ped. 2:19-21) Dihang masabtan nato nga gidumtan ta kay nagbuhat tag matarong, dili gyod ta mohunong sa pag-alagad kang Jehova tungod sa pagdumot sa mga tawo kanato. w19.07 7 ¶19-20

Si Jesus ug ang iyang Hudiyong mga sumusunod nagsunod sa Igpapahulay kay sila ilalom sa Moisesnong Balaod. Pero gipakita ni Jesus sa pulong ug buhat nga ang pagsunod sa Igpapahulay kinahanglang rasonable, ug dili sayop ang paghimog maayo o pagtabang sa uban. (Mat. 12:9-11) Wala niya isipa nga supak sa Igpapahulay ang pagpakitag kaayo ug pagtabang sa uban. Ang mga gibuhat ni Jesus nagpasiugda sa importanteng rason kon nganong gisugo sa Diyos ang pagpahulay. Ang katawhan sa Diyos makapokus sa espirituwal nga mga butang kay mipahulay sila sa ilang adlaw-adlawng buluhaton. Si Jesus nagdako sa pamilya nga seguradong naggamit sa Igpapahulay para sa espirituwal nga mga kalihokan. Makita nâ diha sa atong mabasa bahin kang Jesus dihang didto siya sa iyang lungsod sa Nasaret: “Sumala sa . . . naandan [ni Jesus] sa adlawng Igpapahulay, siya misulod sa sinagoga ug mitindog aron mobasa.” (Luc. 4:15-19) Dugang pa, gitahod gyod sa mga tinun-an ang balaod sa Igpapahulay maong gihunong nila ang pagpangandam sa mga yerba para sa patayng lawas ni Jesus hangtod nahuman ang adlaw sa Igpapahulay.​—Luc. 23: 55, 56. w19.12 4 ¶10

Ang matag Kristohanong ministro makatabang sa pagpangitag mga interesado. Ikakomparar nato kini sa pagpangita sa usa ka bata nga nawala. Sa unsang paagi? Hunahunaa ang nahitabo sa usa ka tres anyos nga batang lalaki nga nawala. Mga 500 ka tawo ang nangita niya. Human sa mga 20 ka oras, ang usa kanila nakakita sa bata diha sa maisan. Pero wala angkona sa maong tawo nga siya ray nakakita sa bata. Siya miingon: “Nakit-an ang bata kay gatosan ka tawo ang nagtinabangay sa pagpangita.” Daghang tawo ang sama nianang bataa. Mora silag nawala. Wala silay paglaom, pero gusto nilag tabang. Kapig walo ka milyon kanato ang nagtinabangay sa pagpangita niining mga tawhana. Tingali wala kay makitang Bible study. Pero, ang ubang magmamantala nga nagsangyaw sa samang teritoryo basin makakitag interesado nga gustong mokat-on sa kamatuoran. Dihang ang usa ka magmamantala makakitag interesado ug mahimo ning tinun-an sa Kristo, ang tanang mitabang sa pagpangita angayng malipay. w19.07 16-17 ¶9-10

Gipahinumdoman ni apostol Pablo ang mga Kristohanon sa Filipos nga kinahanglan silang mopadayon sa pagdagan nga may paglahutay. Ang kongregasyon gilutos sukad sa pagkatukod niini. Nagsugod ang tanan dihang si Pablo ug Silas miabot sa Filipos niadtong mga 50 C.E., agig sanong sa pagdapit sa Diyos kanila nga moadto sa Macedonia. (Buh. 16:9) Didto nahibalag nila si Lydia, kinsa “naminaw [kanila] . . . , ug gibuksan pag-ayo ni Jehova ang iyang kasingkasing” sa maayong balita. (Buh. 16:14) Wala madugay, siya ug ang iyang panimalay nabawtismohan. Pero milihok dayon ang Yawa. Ang mga tawo sa siyudad nagdala kang Pablo ug Silas ngadto sa mga mahistrado ug sayop silang giakusahan nga nagpahinabog kagubot. Ingong resulta, si Pablo ug Silas gibunalan, gibilanggo, ug sa ulahi gihangyo nga mobiya sa siyudad. (Buh. 16:16-40) Misurender ba sila? Wala gayod! Ug komosta ang mga igsoon sa bag-ong natukod nga kongregasyon? Ikalipay, sila milahutay sab! Walay duhaduha, nadasig kaayo sila sa maayong ehemplo ni Pablo ug Silas. w19.08 2 ¶1-2

Segurado nga apil niining “matarong nga bunga” ang ilang gugma kang Jehova ug sa iyang katawhan. Apil sab niini ang atong pagsulti sa uban bahin sa atong pagtuo kang Jesus ug sa atong nindot nga paglaom. Nagapamunga tag “matarong nga bunga” kon aktibo tang makigbahin sa importante kaayong buluhaton, ang paghimog mga tinun-an. (Mat. 28:18-20) Bisan unsay atong kahimtang, puwede tang mosidlak nga samag kahayag. Usahay, ang mga butang nga morag makababag nato sa pagsangyaw mahimo diay nga kahigayonan sa pagsangyaw. Pananglitan, si Pablo gipriso diha sa usa ka balay sa Roma dihang gisulatan niya ang mga taga-Filipos. Pero bisag napriso, padayon siyang nagsangyaw sa mga guwardiya ug mga bisita. Madasigon siyang nagsangyaw bisan niini nga kahimtang, ug nakahatag ni sa mga igsoon ug kompiyansa ug kaisog sa “pagsulti sa pulong sa Diyos nga walay kahadlok.”​—Filip. 1:12-14; 4:22. w19.08 12 ¶15-16

Kini ang labing importanteng rason kon nganong ugmaron nato ang pagkamapainubsanon​—makapalipay ni kang Jehova. Giklaro kini ni apostol Pedro dihang iyang gisulat ang teksto niining adlawa. Ingong komento sa giingon ni Pedro, ang librong “Umari Ka, Mahimong Akong Sumusunod,” sa kapitulo 3, parapo 23, nag-ingon: “Ang pagkamapahitas-on nahisamag hilo. Mahimong daotan kaayo ang epekto niini. Kini maoy hiyas nga makahimo sa abilidaran kaayong tawo nga walay-kapuslanan alang sa Diyos. Sa laing bahin, ang pagkamapainubsanon makahimo bisan sa labing ubos nga tawo nga mapuslanon kaayo kang Jehova. . . . [Siya] . . . malipay sa pagganti kanimo tungod sa imong pagkamapainubsanon.” Oo, ang labing maayo nga atong mahimo mao ang paglipay sa kasingkasing ni Jehova. (Prov. 23:15) Gawas nga mapalipay nato si Jehova, makadawat tag daghang benepisyo kon ugmaron nato ang pagkamapainubsanon. Kon mapainubsanon ta, ganahang makigsuod nato ang uban. Aron masabtan kon ngano, ibutang ang imong kaugalingon sa kahimtang sa uban.​—Mat. 7:12. w19.09 4 ¶8-9

Ang mga ansiyano magkugi para sa kaayohan sa mga igsoon. Ug dili nila tugotan nga mahimo silang garboso tungod sa ilang awtoridad. Ila hinuong panggaon ang kongregasyon. (1 Tes. 2:7, 8) Tungod sa ilang lawom nga gugma ug pagkamapainubsanon, lumo silang makig-estorya sa uban. Si Andrew, nga dugay nang ansiyano, miingon: “Nakita nako nga matandog ang mga igsoon kon ang ansiyano buotan ug mahigalaon. Kini nga mga hiyas magpalihok sa mga igsoon nga mokooperar sa mga ansiyano.” Si Tony, nga dugay na pong ansiyano, miingon: “Naningkamot ko sa pagpadapat sa tambag sa Filipos 2:3, nga isipon ang uban nga labaw kanako. Kini nakatabang nga dili ko mahimong morag diktador.” Ang mga ansiyano kinahanglang magmapainubsanon, sama nga si Jehova mapainubsanon. Bisag si Jehova ang Soberano sa uniberso, siya “moyuko” aron bangonon “ang timawa gikan sa abog.” (Sal. 18:35; 113:6, 7) Gani, gidumtan ni Jehova ang mga garboso ug hambogiro. w19.09 16-17 ¶11-12

Aron mobati tag kahayahay ilalom sa yugo ni Jesus, kinahanglan natong mentinahon ang hustong panglantaw. Buluhaton ni Jehova ang atong ginahimo, busa angay ning himoon sumala sa gusto ni Jehova. Kita ang tigbuhat sa buluhaton, ug si Jehova ang Agalon. (Luc. 17:10) Kon himoon nato ang iyang buluhaton sumala sa atong gusto, gilisodlisod nato ang atong kaugalingon. Pero kon sundon nato ang giya ni Jehova, mahimo nato ang mga butang nga daw imposible ug maatubang nato ang mga kalisdanan nga daw dili nato kaya. Hinumdomi, walay makapugong niya sa pagtuman sa iyang kabubut-on! (Roma 8:31; 1 Juan 4:4) Tumong nato nga mahimaya ang atong mahigugmaong Amahan, si Jehova. Ang mga tawo sa unang siglo nga hakog o kaugalingon ray gihunahuna, sa wala madugay, nahimong masulub-on ug gibiyaan nila ang yugo ni Jesus. (Juan 6:25-27, 51, 60, 66; Filip. 3:18, 19) Pero kadtong nahigugma sa Diyos ug sa ilang isigkatawo labaw sa ilang kaugalingon malipayong nagpas-an sa yugo sa tibuok nilang kinabuhi dinhi sa yuta, nga may paglaom nga mag-alagad uban sa Kristo didto sa langit. Sama kanila, magpabilin tang malipayon kon husto tag motibo sa pagpas-an sa yugo ni Jesus. w19.09 20 ¶1; 24-25 ¶19-20

Hunahunaa ang mga panalangin nga imong natagamtam kay napahigawas na ka sa dili Kasulatanhong mga pagtulon-an. Makapalipay gyod nâ nga kagawasan! Makadahom ka ug mas labawng kagawasan sa umaabot. Sa dili madugay, laglagon ni Jesus ang tanang bakak nga relihiyon ug ang daotang pagmando sa tawo. Panalipdan sa Diyos ang “usa ka dakong panon” nga nag-alagad kaniya, ug iyang ipatagamtam kanila ang mga panalangin sa paraisong yuta. (Pin. 7:9, 14) Daghan kaayo ang banhawon ug hatagag kahigayonan nga mahigawas sa tanang epekto sa sala ni Adan. (Buh. 24:15) Panahon sa Usa ka Libo ka Tuig nga Pagmando, tabangan ni Jesus ug sa iyang kaubang mga magmamando ang katawhan nga mahimong hingpit sa pisikal ug espirituwal. Kini nga panahon sa pagpasig-uli ug sa kagawasan mahisama sa tuig sa Pagsadya sa Israel. Ang tanang maunongong alagad ni Jehova mahimo na unyang hingpit, walay sala. w19.12 12-13 ¶14-16

Sa unang siglo C.E., dihay usa ka mahinatagong tawo, si Jose, (gianggaag Bernabe) nga andam magpagamit kang Jehova. (Buh. 4:36, 37) Dihang si Saulo nahimong magtutuo, daghang igsoon ang nahadlok nga moduol niya tungod sa iyang paglutos kanhi sa mga kongregasyon. Pero, ang mabinationg si Bernabe mitabang kang Saulo. (Buh. 9:21, 26-28) Sa ulahi, nakita sa mga ansiyano sa Jerusalem nga kinahanglang dasigon ang mga igsoon nga nagpuyo sa layo, didto sa Antioquia sa Sirya. Kinsay ilang gipadala? Si Bernabe! Sakto ang ilang pagpili kaniya. Ang Bibliya nag-ingon nga “gidasig [ni Bernabe] silang tanan nga padayong magmaunongon sa Ginoo uban ang determinadong kasingkasing.” (Buh. 11:22-24) Karon sab, puwede tang tabangan ni Jehova nga mahimong “anak sa paghupay” ngadto sa atong mga igsoon. Pananglitan, mahimong gamiton ta niya sa paghupay niadtong namatyag mga minahal. O tingali palihokon ta niya sa pagbisita o pagtawag niadtong nasakit o na-depress aron makahatag ug paghupay. Tugotan ba nimo si Jehova sa paggamit kanimo sama sa iyang paggamit kang Bernabe?​—1 Tes. 5:14. w19.10 22 ¶8

Usahay, dihang makig-uban ta sa atong mga higala, dili lang ang ilang maayong mga hiyas ang atong makita, kondili ang ila pong mga kahuyangan. Unsay makatabang nato aron dili ni makaapektar sa atong relasyon sa atong mga higala? Sa pagkatinuod, dili ta makadahom nga dili masayop ang atong mga igsoon. Busa kon naa tay bag-ong masuod, kinahanglang maningkamot ta nga magpabiling suod kanila. Kon masayop ang atong mga higala, tingali kinahanglan nato silang hatagag mahigugmaon pero prangkang tambag base sa Pulong sa Diyos. (Sal. 141:5) Ug kon mapasakitan ta nila, kinahanglan nato silang pasayloon. Kon gipasaylo na nato sila, dili na nato balikbalikog estorya ang ilang nahimo. Importante kaayo niining lisod nga mga panahon nga magpokus ta sa maayong mga hiyas sa atong mga igsoon imbes sa ilang mga kahuyangan! Pinaagi niana, mas masuod ta kanila, ug magkinahanglan tag suod nga mga higala panahon sa dakong kasakitan. w19.11 6 ¶13, 16

Samtang magdumala tag Bible study, kinahanglang maningkamot ta sa paghimog mga tinun-an, nga ‘magtudlo kanila sa pagtuman sa tanang gisugo ni Jesus.’ Kinahanglang tabangan nato ang mga tawo nga masabtan nga importanteng mobarog sila dapig kang Jehova ug sa iyang Gingharian. Nagpasabot ni nga maningkamot ta sa pagdasig sa mga tawo nga magpadapat sa ilang nakat-onan, magpahinungod sa ilang kinabuhi kang Jehova, ug magpabawtismo. Nianang paagiha lang nga maluwas sila sa adlaw ni Jehova. (1 Ped. 3:21) Mubo na lang kaayo ang panahon nga nahibilin una matapos kining sistemaha sa mga butang. Tungod niana, wala tay panahon nga magsigeg Bible study sa mga tawo nga wala mohimog mga kausaban aron mahimong mga tinun-an sa Kristo. (1 Cor. 9:26) Dinalian ang atong buluhaton! Daghan pa ang kinahanglang makadungog sa mensahe sa Gingharian sa dili pa ulahi ang tanan. w19.10 11-12 ¶14-15

Sa tinuig nga Adlaw sa Pagtabon sa Sala, ang katawhan sa Israel magtigom, ug ang hataas nga saserdote maghalad ug mga hayop. Ang maong mga halad magpahinumdom sa mga Israelinhon nga kinahanglang mahinloan ang ilang mga sala! Pero kinahanglang ibubo una sa hataas nga saserdote ang balaang insenso diha sa baga ug ang lawak mapunog humot nga alimyon. Unsay atong makat-onan niana? Gipakita sa Bibliya nga ang dalawatong mga pag-ampo sa matinumanong mga alagad ni Jehova samag insenso. (Sal. 141:2; Pin. 5:8) Matinahoron kaayo ang hataas nga saserdote dihang dad-on niya ang insenso sa presensiya ni Jehova. Sa susama, angayng matinahoron sab kaayo ta dihang mag-ampo kang Jehova. Giapresyar kaayo nato nga gitugotan ta sa atong Maglalalang sa pagduol ug pagpakigsuod kaniya, samag anak ngadto sa amahan. (Sant. 4:8) Dawaton ta niya ingong iyang mga higala! (Sal. 25:14) Gipabilhan gyod nato kini maong dili nato gustong mohimog bisan unsa nga makapasuko kaniya. w19.11 20-21 ¶3-5

Unsay panglantaw sa kadaghanang tawo sa trabaho? Sa daghang nasod, ang mga tawo naggugol ug mas taas nga oras sa pagtrabaho kay sukad masukad. Ang mga tawo nga nasobrahag trabaho sagad wala nay panahon sa pagpahulay, pagpakig-uban sa pamilya, o sa pagtagbaw sa ilang espirituwal nga panginahanglan. (Eccl. 2:23) Sa laing bahin, ang uban dili gyod ganahang motrabaho ug daghan silag pasumangil aron dili makatrabaho. (Prov. 26:13, 14) Lahi sa dili balanseng panglantaw sa kalibotan, tagda kon unsay panglantaw ni Jehova ug Jesus sa trabaho. Nahibalo ta nga si Jehova ganahan gyong motrabaho. Giklaro kana ni Jesus dihang siya miingon: “Ang akong Amahan nagpadayon sa pagbuhat hangtod karon, ug ako usab nagpadayon sa pagbuhat.” (Juan 5:17) Hunahunaa ang tanang gibuhat sa Diyos dihang gilalang niya ang daghan kaayong espiritung linalang ug ang lapad kaayong uniberso. Makita sab nato ang daghang nindot nga butang nga gilalang sa Diyos dinhi sa yuta. w19.12 2 ¶1-2

Nganong si David nasuod pag-ayo kang Jehova? Si David nagkat-on bahin kang Jehova pinaagi sa mga butang nga Iyang gilalang. Sa batan-on pa si David, pirme siyang naa sa gawas kay nagbantay sa mga karnero sa iyang amahan. Tingali nianang mga panahona siya nagsugod ug pamalandong sa mga butang nga gihimo ni Jehova. Pananglitan, samtang nagtan-aw si David sa langit panahon sa kagabhion, tingali dili lang mga bituon ang iyang nakita. Nakita pod niya ang mga hiyas sa Usa nga naghimo niana. (Sal. 19:1, 2) Dihang gihunahuna ni David ang katingalahang pagkahimo ni Jehova sa mga tawo, iyang nakita kon unsa ka maalamon si Jehova. (Sal. 139:14) Sa iyang pagpamalandong sa mga nahimo ni Jehova, nakita niya kon unsa siya ka gamay kon itandi sa Diyos. (Sal. 139:6) Unsay atong makat-onan niana? Sa adlaw-adlaw, palandonga kon unsay imong makat-onan bahin kang Jehova gikan sa kalalangan​—mga tanom, hayop, ug mga tawo. Pinaagi niana, madugangan kada adlaw ang imong kahibalo bahin sa imong mahigugmaong Amahan. (Roma 1:20) Ug kada adlaw imong makita nga magkalawom ang imong gugma kaniya. w19.12 19-20 ¶15-17

Si Moises milihok base sa iyang nakat-onan. Dihang mga 40 anyos si Moises, gipili niyang makig-uban sa katawhan sa Diyos, ang mga Hebreohanon, imbes mailhang “apo sa Paraon.” Iyang gibiyaan ang iyang taas nga posisyon. Dihang misuportar si Moises sa mga Hebreohanon nga mga ulipon sa Ehipto, nahibalo siya nga masuko gyod ang Paraon, usa ka gamhanang magmamando nga giisip ingong diyos. Pagkadako sa iyang gipakitang pagtuo! Si Moises misalig kang Jehova. Kana nga pagsalig maoy lig-ong rason kon nganong si Moises suod kang Jehova sa tibuok niyang kinabuhi. (Prov. 3:5) Unsay atong makat-onan niana? Sama kang Moises, kitang tanan kinahanglang modesisyon: Pilion ba natong moalagad sa Diyos ug makig-uban sa iyang katawhan? Kinahanglan tingali tang mohimog mga sakripisyo aron makaalagad sa Diyos, ug tingali lutoson ta niadtong wala makaila kang Jehova. Pero kon mosalig ta sa atong langitnong Amahan, makaseguro ta nga iya tang tabangan! w19.12 17 ¶5-6

Bisag hinimo ta gikan sa abog sa yuta, bililhon kaayo ta. Hunahunaa ang pipila ka rason kon nganong nahibalo ta nga bililhon ta kang Jehova. Iyang gilalang ang tawo nga may katakos sa pagsundog sa iyang mga hiyas. (Gen. 1:27) Sa pagbuhat niana, gihimo ta niyang kinalabwan sa tanan niyang linalang sa yuta, ug gihatagan ta niyag responsibilidad sa pag-atiman sa yuta ug sa mga hayop. (Sal. 8:4-8) Bisan human makasala si Adan, gipabilhan gihapon ni Jehova ang mga tawo. Dako kaayo ang iyang pagpabili kanato nga gihatag niya ang iyang pinalanggang Anak, si Jesus, ingong lukat sa atong mga sala. (1 Juan 4:9, 10) Sa pagpadapat sa mga kaayohan sa lukat, banhawon ni Jehova kadtong nangamatay tungod sa sala ni Adan​—‘mga matarong ug dili matarong.’ (Buh. 24:15) Gipakita sa iyang Pulong nga bililhon ta kaniya bisag kita masakiton, pobre, o tigulang na.​—Buh. 10:34, 35. w20.01 15 ¶5-6

Ang paglaom nga mabuhi sa langit wala mapanunod sa mga dinihogan gikan sa ilang pamilya. Ila ning nadawat gikan sa Diyos. (1 Tes. 2:12) Busa likayan nato ang makapasakit nga mga pangutana. Pananglitan, dili nato pangutan-on ang asawa sa usa ka dinihogan kon unsay iyang pagbati nga mabuhi siya sa walay kataposan sa yuta nga dili kauban ang iyang bana. Segurado ta nga sa bag-ong kalibotan, ‘tagbawon ni Jehova ang tinguha sa tanang buhing linalang.’ (Sal. 145:16) Kon dili nato trataron ang mga dinihogan nga mas importante sila kay sa uban, maprotektahan sab nato ang atong kaugalingon. Ngano? Ang Bibliya nag-ingon nga ang pipila ka dinihogan tingali dili magmatinumanon. (Mat. 25:10-12; 2 Ped. 2:20, 21) Pero kon likayan nato ang ‘pagdayeg ug mga personalidad,’ dili gyod ta magsunodsunod sa uban, bisan sa mga dinihogan o sa iladong mga igsoon o sa dugay nang mga alagad ni Jehova. (Jud. 16, footnote) Busa kon dili sila magmatinumanon o mobiya sila sa kongregasyon, dili ta mawad-ag pagtuo kang Jehova o mohunong sa pag-alagad kaniya. w20.01 29 ¶9-10

Ingong “minahal nga mga anak” ni Jehova, himoon nato ang atong maarangan sa pagsundog kaniya. Atong masundog ang iyang mga hiyas pinaagi sa pagkahimong mahigugmaon, buotan, ug mapinasayloon sa uban. Dihang ang atong maayong panggawi makita niadtong wala makaila sa Diyos, basin mapalihok sila sa pagkat-og dugang bahin kaniya. (1 Ped. 2:12) Ang Kristohanong mga ginikanan dunay maayong rason sa pagsundog kang Jehova sa ilang pagtratar sa ilang mga anak. Kon ilang sundogon si Jehova, posible nga tinguhaon sab sa ilang mga anak nga makigsuod sa atong mahigugmaong Amahan. Kita mapasigarbohon sa atong langitnong Amahan, si Jehova, ug gusto nato nga ang uban makaila kaniya. Sa atong kasingkasing, kitang tanan parehas ug gibati ni Haring David, kinsa misulat: “Ipanghambog nako si Jehova.” (Sal. 34:2) Pero komosta man kon maulawon ta? Sa unsang paagi mahimo tang maisogon? Mahimo nato kana kon maghunahuna ta sa kalipay nga bation ni Jehova ug sa kaayohan nga makuha sa uban dihang mosulti ta bahin kaniya. Hatagan ta ni Jehova sa kaisog nga atong gikinahanglan. Iyang gitabangan ang mga Kristohanon sa unang siglo nga magmaisogon, ug iya sab tang tabangan.​—1 Tes. 2:2. w20.02 11 ¶12-13

Daghang Bible study ang miuswag ug nagpabawtismo. Pero ang uban nga regular nga gina-Bible study lagmit nagduhaduha nga mahimong tinun-an. Ganahan silang mag-study, pero wala silay pag-uswag. Kon naa kay Bible study, seguradong gusto nimo siyang tabangan nga mapadapat ang iyang nakat-onan ug mahimong tinun-an sa Kristo. Gusto ni Jehova nga alagaron siya sa mga tawo tungod sa ilang gugma kaniya. Busa tumong nato nga masabtan sa atong mga Bible study nga gimahal sila pag-ayo ni Jehova ingong indibiduwal. Gusto nato silang tabangan nga makita si Jehova ingong ‘amahan sa mga wala nay amahan ug tigpanalipod sa mga babayeng balo.’ (Sal. 68:5) Dihang masabtan sa inyong mga Bible study nga gimahal sila pag-ayo sa Diyos, lagmit matandog sila ug mahigugma kaniya. Busa, tabangi silang makasabot nga gusto sa atong mahigugmaong Diyos nga makabaton silag kinabuhing walay kataposan, ug andam siyang motabang kanila nga makab-ot kana. w20.01 3 ¶7-8

Si Pablo mapainubsanon, maong nangayo ug midawat siyag pagdasig gikan sa iyang mga higala. Wala siya mabalaka nga isipon siya nga huyang kon ilhon niya nga gihupay siya sa uban panahon sa kalisdanan. (Col. 4:7-11) Kon mapainubsanon natong dawaton nga nagkinahanglan tag pagdasig, ang atong mga igsoon malipay sa paghatag sa tabang nga atong gikinahanglan. Si Pablo nahibalo nga ang Kasulatan makahupay niya. (Roma 15:4) Kini makahatag sab niyag kaalam sa pagsagubang sa bisan unsang pagsulay. (2 Tim. 3:15, 16) Dihang napriso si Pablo sa Roma sa ikaduhang higayon, nahibalo siya nga hapit na siyang mamatay. Iyang gihangyo si Timoteo nga adtoon dayon siya ug dad-on ang “mga linukot nga basahon.” (2 Tim. 4:6, 7, 9, 13) Ngano? Kay ang maong mga basahon lagmit bahin sa Hebreohanong Kasulatan nga magamit ni Pablo sa iyang personal nga pagtuon sa Bibliya. Kon sundogon nato si Pablo pinaagi sa regular nga pagtuon sa Pulong sa Diyos, gamiton ni Jehova ang Kasulatan sa paghupay kanato​—bisag unsang kalisdanan ang atong maatubang. w20.02 23-24 ¶14-15

Si Elipaz, Bildad, ug Zopar wala maghunahuna kon unsaon pagtabang si Job. Hinunoa, naghunahuna sila kon unsaon nila pagpamatuod nga nakahimog sayop si Job. Sakto ang uban nilang gipanulti, pero kadaghanan sa ilang giingon bahin kang Job ug kang Jehova sakit paminawon o sayop. Gihukman nila pag-ayo si Job. (Job 32:1-3) Unsay gibati ni Jehova? Nasuko kaayo siya sa tulo ka lalaki. Gitawag niya sila nga buangbuang ug gipaadto niya sila kang Job aron hangyoon si Job nga mag-ampo para kanila. (Job 42:7-9) Daghan tag makuhang leksiyon sa dili maayong ehemplo ni Elipaz, Bildad, ug Zopar. Una, dili nato angayng hukman ang mga igsoon. (Mat. 7:2-5) Hinunoa, angay tang maminaw pag-ayo sa dili pa mosulti. Nianang paagiha lang nga masabtan nato ang ilang kahimtang. (1 Ped. 3:8) Ikaduha, kon mosulti ta, seguroon nato nga kini mabination ug sakto. (Efe. 4:25) Ug ikatulo, si Jehova interesado kaayo sa atong isulti sa usag usa. w20.03 22-23 ¶15-16

Sagad, mas mailhan nato si Jehova dihang magtudlo ta bahin kaniya. Pananglitan, atong makita ang pagkamaluluy-on ni Jehova dihang tabangan ta niya nga makaplagan ang mga tawong gustong makigsuod kaniya. (Juan 6:44; Buh. 13:48) Makita nato nga naglihok ang gahom sa Pulong sa Diyos dihang ang atong mga Bible study mobiya sa ilang daotang mga buhat ug mosugod sa pagsul-ob sa bag-ong personalidad. (Col. 3:9, 10) Ug makita nato ang pailob sa Diyos kay naghatag siyag daghang kahigayonan sa mga tawo sa atong teritoryo nga makakat-on bahin kaniya ug maluwas. (Roma 10:13-15) Pero, bisag unsa na ta ka dugayng nag-alagad kang Jehova, angay natong pabilhan ang atong relasyon kaniya. Ang usa ka paagi nga mapakita nato kana mao ang pagpakig-estorya kaniya sa pag-ampo. Ang maayong komunikasyon importante aron molig-on ang relasyon. Busa pag-ampo kanunay sa Diyos aron masuod ka kaniya, ug ayawg kahadlok sa pagpahayag kon unsa gyoy imong gihunahuna ug gibati. w19.12 19 ¶11, 13-14

Makapahupay gyod nâ kanato! Ingong Hari sa Gingharian sa Diyos, wad-on ni Jesus ang tanang kadaot nga atong naeksperyensiyahan tungod kang Satanas ug sa iyang sistema. (Isa. 65:17; 1 Juan 3:8; Pin. 21:3, 4) Nindot gyod kana nga paglaom! Ug bisan pag gihatagan ta ni Jesus ug lisod nga buluhaton, siya nagauban kanato, nga motabang nato nga makalahutay niining kataposang mga adlaw. (Mat. 28:19, 20) Makapalig-on gyod kana! Ang kahupayan, paglaom, ug kaisog maoy pipila sa importanteng mga butang nga makatabang nato nga magmalinawon. Busa, sa unsang paagi magmalinawon ang imong hunahuna bisag nag-atubang kag grabeng kalisdanan? Mahimo nimo kana pinaagi sa pagsundog kang Jesus. Una, pag-ampo ug padayon kining himoa bisag unsay mahitabo. Ikaduha, sunda si Jehova ug sangyaw nga madasigon bisag may mga panahon nga lisod ning buhaton. Ug ikatulo, pangayog tabang sa imong mga higala. Dayon ang kalinaw sa Diyos magbantay sa imong hunahuna ug kasingkasing. (Filip. 4:6, 7) Ug sama kang Jesus, magmadaogon ka sa bisan unsang pagsulay.​—Juan 16:33. w19.04 13 ¶16-17