Oktubre

Daghan tag pamatuod nga giprotektahan ni Jehova ang iyang katawhan karon. Konsideraha kini: Kita nagsangyaw ug nagtudlo sa kamatuoran sa tanang bahin sa yuta. (Mat. 28:19, 20) Ingong resulta, atong gipahibalo sa mga tawo ang daotang binuhatan sa Yawa. Segurado nga kon makahimo siya, pugngan niya ang atong buluhaton, pero wala nâ niya mahimo. Busa, dili ta angayng mahadlok sa daotang mga espiritu. Kon matinumanon ta kang Jehova, ang mga demonyo dili makahimog dumalayong kadaot kanato. Pero kinahanglang suklan natong tanan ang daotang mga espiritu ug mosalig ta kang Jehova. Kon buhaton nato kana, makadawat tag daghang panalangin ug dili ta malimbongan sa mga bakak ni Satanas. Dugang pa, dili ta mapugngan sa pag-alagad tungod sa kahadlok sa mga demonyo. Labaw sa tanan, mas masuod ta kang Jehova. “Sukli ang Yawa,” misulat ang tinun-ang si Santiago, “ug siya mokalagiw gikan kaninyo. Duol sa Diyos, ug siya moduol kaninyo.”​—Sant. 4:7, 8. w19.04 24 ¶15; 25 ¶18

Ang inyong mga anak regalo sa Diyos, “panulondon gikan ni Jehova.” Inyong responsibilidad nga panalipdan ang maong regalo. Sa unsang paagi ninyo mapanalipdan ang inyong mga anak batok sa pag-abuso? Una, edukaha ang kaugalingon bahin sa pag-abuso. Sayra kon unsang klaseha sa mga tawo ang nag-abuso ug mga bata ug ang mga taktika nga ilang gamiton sa pagpamiktima. Magmaalerto sa posibleng kapeligrohan. (Prov. 22:3; 24:3) Hinumdomi nga sagad suod sa bata ang tawo nga nag-abuso niya. Ikaduha, importante nga duna moy maayong komunikasyon sa inyong mga anak. (Deut. 6:6, 7; Sant. 1:19) Hinumdomi nga sagad ang mga bata mahadlok mosumbong bahin sa pag-abuso. Basin mahadlok sila nga dili sila tuohan, o tingali gihulga sila sa tig-abuso nga dunay dili maayong mahitabo kon mosumbong sila. Kon mamatikdan nimo nga dunay problema, pangutan-a sila sa mabinationg paagi ug mapailobong maminaw kanila. Ikatulo, tudloi ang inyong mga anak. Tudloi sila kon unsay isulti ug buhaton kon dunay magbinastos nila. w19.05 13 ¶19-22

Nganong gidumtan ni Jehova ang mga garboso? Ang usa ka rason mao nga kadtong nag-ugmad ug nagpasiugdag sobrang paghigugma sa kaugalingon mahimong mapahitas-on, sama kang Satanas. Hunahunaa lang, si Satanas nagtuo nga si Jesus​—ang usa nga gigamit sa Diyos sa paglalang sa tanang butang​—angayng mohapa ug mosimba niya! (Mat. 4:8, 9; Col. 1:15, 16) Kadtong ingon nianag panglantaw sa kaugalingon nagpamatuod nga ang kaalam sa kalibotan kabuangan para sa Diyos. (1 Cor. 3:19) Pero ang Bibliya nagtabang nato sa pagbaton ug balanseng panglantaw sa kaugalingon. Kini nag-ingon nga dili sayop ang pagbaton ug igong gugma sa kaugalingon. Si Jesus miingon: “Higugmaa ang imong isigkatawo sama sa imong kaugalingon,” nga nagpakitang angay tang mohatag ug rasonableng pagtagad sa atong mga panginahanglan. (Mat. 19:19) Pero ang Bibliya nagtudlo nga dili gyod ta angayng maghunahuna nga mas labaw ta sa uban. Hinuon, kini nag-ingon: “Likayi ang hilig nga makig-away o ang pagpakaimportante sa kaugalingon, apan magpaubos mo ug isipa ang uban nga labaw kay kaninyo.”​—Filip. 2:3; Roma 12:3. w19.05 24 ¶13-14

Hinumdomi ang mga kausaban nga kinahanglan nimong himoon dihang midawat ka sa kamatuoran sa Pulong sa Diyos ug midesisyon sa pag-alagad kang Jehova. Daghan kanato ang may daotang mga binuhatan kaniadto nga kinahanglang biyaan. (1 Cor. 6:9-11) Mapasalamaton gyod ta nga gitabangan ta ni Jehova sa pagbiya niana. Pero kinahanglang dili ta magkompiyansa. Bisag gihunong na nato ang seryosong mga sala nga atong ginahimo sa wala pa ta mabawtismohi, kinahanglang maningkamot gihapon ta sa paglikay sa bisan unsa nga makatental nato sa pagbuhat pag-usab niana. Duha ka butang ang kinahanglan natong himoon. Una, kinahanglang ‘mohunong ta sa pagpaimpluwensiya’ niining kalibotana. Ikaduha, kinahanglan tang ‘mag-usab’ pinaagi sa pagbag-o sa atong hunahuna. Ang pag-usab wala lang magtumong sa panggawas nga kausaban. Mag-apektar ni sa tibuok natong pagkatawo. Kinahanglang bug-os natong bag-ohon ang atong hunahuna​—atong panglantaw, pagbati, ug tinguha. w19.06 9 ¶4-6

Dihang ma-stress, mahibalik ang atong kadasig pinaagi sa pagtambong sa mga tigom. Dihang motambong ta, mahatagan nato si Jehova ug dugang kahigayonan nga mahimong atong “magtatabang ug maghuhupay.” Didto, iya tang palig-onon pinaagi sa iyang balaang espiritu, iyang Pulong, ug iyang katawhan. Sa mga tigom, duna tay kahigayonan nga “magdinasigay.” (Roma 1:11, 12) Usa ka sister nga ginganlag Sophia miingon: “Gitabangan ko ni Jehova ug sa mga igsoon nga makalahutay. Pinakaimportante nako ang mga tigom. Nakita nako nga kon mas magkugi ko sa ministeryo ug sa kongregasyon, mas masagubang nako ang stress ug kabalaka.” Dihang maluya ta, atong hinumdoman nga si Jehova wala lang magsaad nga bug-os niyang wad-on ang stress sa umaabot, kondili naghatag pod siyag tabang aron atong masagubang ang stress karon. Iyang ihatag kanato ang tinguha ug kusog sa pagsagubang sa kaluya ug kawalay-paglaom.​—Filip. 2:13. w19.06 19 ¶17-18

Segurado nga si Jesus may importante kaayong instruksiyon para sa iyang mga tinun-an, kay ang una niyang gihimo human siya mabanhaw mao ang paghikay niini nga tigom. Sa tigom nga gihikay ni Jesus, gihisgotan niya sa iyang mga tinun-an ang importanteng buluhaton nga ilang himoon niadtong panahona​—ang buluhaton nga ato pong ginahimo karon. Si Jesus miingon: “Adtoa ninyo ang mga tawo sa tanang kanasoran ug tudloi sila aron mahimong akong mga tinun-an. . . . Tudloi ninyo sila sa pagtuman sa tanan nakong gisugo kaninyo.” (Mat. 28:19, 20) Gusto ni Jesus nga ang tanan niyang sumusunod mosangyaw. Dili lang ang 11 ka matinumanong apostoles ang iyang gisugo niini. Nganong segurado ta niana? Aw, dihang gihatag ang sugo didto sa bukid sa Galilea, mga apostoles lang ba ang presente? Hinumdomi nga giingnan sa anghel ang mga babaye: “Makita ninyo siya [sa Galilea].” (Mat. 28:7) Busa posible nga dihay matinumanong mga babaye nga presente niana nga tigom. w20.01 2-3 ¶1-4

Gisaysay ni Jesus kon nganong angay tang magdahom nga supakon ta. Siya miingon nga dumtan ta kay dili ta bahin sa kalibotan. Ang paglutos wala magpasabot nga wala ta panalangini ni Jehova. Hinunoa, nagpakita ni nga husto ang atong ginahimo! Ang tawhanong mga magsusupak dili gyod makapahunong sa atong pagsimba sa labing gamhanang Diyos, si Jehova. Daghan ang misulay pero wala gyod molampos. Tagda ang nahitabo sa Gubat sa Kalibotan II. Nianang panahona, ang katawhan sa Diyos gilutos pag-ayo sa mga gobyerno sa daghang nasod. Ang buluhaton sa mga Saksi ni Jehova gidili, dili lang sa partidong Nazi sa Germany, kondili sa mga gobyerno sab sa Australia, Canada, ug sa ubang kayutaan. Pero matikdi kon unsay nahitabo. Niadtong 1939, pagsugod sa gubat, dihay 72,475 ka magmamantala sa tibuok kalibotan. Gipakita sa mga report nga dihang natapos ang gubat sa 1945, tungod sa panalangin ni Jehova, diha nay 156,299 ka magmamantala. Nahimong kapin sa duha ka pilo ang gidaghanon sa magmamantala! w19.07 9 ¶4-5

Bisag wala kay Bible study karon, makatabang ka sa paghimog mga tinun-an sa laing mga paagi. Pananglitan, puwede kang moabiabi ug makighigala sa mga interesado nga motambong sa tigom. Pinaagi niana, makatabang ka sa pagkombinsir nila nga ang gugma nagpaila nato ingong tinuod nga mga Kristohanon. Ang imong mga komento sa tigom, bisag mubo, magtudlo nila sa pagpahayag sa ilang pagtuo sa sinsero ug matinahorong paagi. Mahimo sab nimong ubanan ang usa ka bag-ong magmamantala diha sa ministeryo ug tabangan siya sa paggamit sa Kasulatan sa pagtudlo sa mga tawo. Sa pagbuhat niana, gitudloan nimo siya sa pagsundog sa Kristo. (Luc. 10:25-28) Daghang Kristohanon ang puliki kaayo sa pag-atiman sa importanteng mga responsibilidad. Bisan pa niana, naggahin silag panahon sa pagdumalag pagtuon sa Bibliya, ug malipayon kaayo sila. w19.07 17 ¶11, 13

Wala tugoti ni apostol Pablo nga malinga siya sa iyang nangaging mga kalamposan o kasaypanan. Gani, siya miingon nga kinahanglang ‘kalimtan ang mga butang sa luyo’ aron ‘makapangab-ot sa mga butang sa unahan,’ sa ato pa, mahuman ang lumba. Unsa ang pipila sa mga butang nga makalinga unta kang Pablo? Una, daghan siyag nahimong kalamposan sa Judaismo. Pero giisip to niya nga “mga basura.” (Filip. 3:3-8) Ikaduha, bisan tingalig nakonsensiya siya sa paglutos niya kaniadto sa mga Kristohanon, wala niya tugoti nga makapugong kana sa iyang pag-alagad. Ug ikatulo, wala siya maghunahuna nga igo na ang iyang nahimo para kang Jehova. Si Pablo daghag nalampos sa ministeryo bisan pag siya gibilanggo, gibunalan, gibato, ug nakasinatig pagkalunod, kagutom, ug kahubo. (2 Cor. 11:23-27) Pero bisag unsa pay iyang nalampos ug giantos, nahibalo si Pablo nga kinahanglan siyang mopadayon sa pag-alagad. Mao man usab kita. w19.08 3 ¶5

Daghan sa atong mga igsoon nagpuyo sa mga nasod diin wala silay kagawasan nga mosangyaw sa publiko o sa balay ug balay, busa nangita silag laing mga paagi sa pagsangyaw sa maayong balita. (Mat. 10:17-20) Sa usa niana nga mga nasod, misugyot ang usa ka tigdumala sa sirkito nga himoon sa kada magmamantala nga personal nga “teritoryo” ang iyang mga paryente, silingan, eskolmet, kauban sa trabaho, ug mga kaila. Sulod sa duha ka tuig, miuswag pag-ayo ang gidaghanon sa mga kongregasyon nianang sirkitoha. Tingali wala ta magpuyo sa nasod nga gidili ang pagsangyaw. Pero makakat-on ta sa gihimo sa atong mga igsoon: Pangita pirmeg mga paagi nga bug-os kang makapakigbahin sa ministeryo, nga masaligon nga hatagan ka ni Jehova sa kusog nga imong gikinahanglan aron makapadayon ka sa pagsangyaw bisan pa sa mga babag. (Filip. 2:13) Ilabina gyod karon, hinaot nga seguroon nato ang mas importanteng mga butang, paningkamotan nga walay ikasaway kanato, likayan nga makapandol sa uban, ug mamungag matarong nga bunga. Pinaagi niana, modagaya ang atong gugma ug makapasidungog ta sa atong mahigugmaong Amahan, si Jehova. w19.08 13 ¶17-18

Sagad dili ta ganahang makig-uban sa mga tawo nga pirmeng moinsistir sa ilang gusto ug dili modawat ug mga sugyot sa uban. Pero malipay tang makig-uban sa atong mga igsoon dihang sila magpakitag “simpatiya, inigsoong pagmahal, kaluoy, ug pagkamapainubsanon.” (1 Ped. 3:8) Kon ganahan ta sa maong mga tawo, lagmit ganahan pod sila nato​—basta mapainubsanon ta. Ang pagkamapainubsanon mas makapasayon sab sa atong kinabuhi. Sa tinuoray lang, makakita o makasinati tingali tag mga butang nga morag dili husto o makataronganon. Usahay ang mga tawong abilidaran kaayo dili makadawat ug pasidungog. Ug kadtong dili ra kaayo abilidaran maoy makadawat usahay ug mas dakong pasidungog. Bisan pa niana, si Solomon nag-ingon nga mas maayong dawaton na lang ang kamatuoran imbes magsigeg kaguol sa negatibong mga kahimtang. (Eccl. 6:9) Kon mapainubsanon ta, mas sayon natong dawaton ang maong kahimtang bisag dili pa nato ni gusto. w19.09 4-5 ¶9-10

Kadtong dunay awtoridad, sama sa mga amahan, dunay kahigayonan sa pagtabang sa uban. Gitudlo ni Jehova ang amahan ingong ulo sa pamilya, ug gidahom sa Diyos nga bansayon ug disiplinahon niya ang iyang pamilya. (1 Cor. 11:3) Pero may limitasyon ang awtoridad sa amahan​—kinahanglan siyang manubag kang Jehova, ang usa nga naglalang sa pamilya. (Efe. 3:14, 15) Ikapakita sa mga amahan nga sila nagpasakop kang Jehova pinaagi sa paggamit sa ilang awtoridad sa paagi nga makapalipay sa Diyos. Ayawg abusoha ang awtoridad nga gihatag ni Jehova. Angkona ang imong sayop, ug dawata ang binase sa Bibliyang mga tambag sa uban. Kon imo nang himoon, tahoron ka sa imong pamilya tungod sa imong pagkamapainubsanon. Dihang mag-ampo ka uban sa imong pamilya, ibubo ang imong kasingkasing kang Jehova​—padungga sila nga nagsalig gyod ka kaniya. Labaw sa tanan, isentro ang imong kinabuhi sa pag-alagad kang Jehova. (Deut. 6:6-9) Ang imong maayong ehemplo maoy usa sa labing bililhong mga regalo nga ikahatag nimo sa imong pamilya. w19.09 15 ¶8; 17 ¶14; 18 ¶16

Si Marcos malipayng motabang sa uban. Kadaghan niya alagari si Pablo ug Pedro samtang gihimo nila ang ilang responsibilidad. Posible nga giatiman ni Marcos ang ilang pisikal nga mga panginahanglan. (Buh. 13:2-5; 1 Ped. 5:13) Si Pablo miingon nga si Marcos usa sa iyang mga “isigkamagbubuhat para sa Gingharian sa Diyos” ug “nakapalig-on” kaniya. (Col. 4: 11, footnote) Si Marcos nahimong usa sa suod nga mga higala ni Pablo. Pananglitan, sa kataposang pagkapriso ni Pablo sa Roma sa mga 65 C.E., gisulatan niya si Timoteo sa ikaduhang higayon. Sa iyang sulat, gihangyo niya si Timoteo nga moadto sa Roma ug iuban si Marcos. (2 Tim. 4:11) Seguradong naapresyar ni Pablo ang tabang ni Marcos kaniadto, mao nga iyang gihangyo nga makauban niya si Marcos nianang importanteng panahon. Si Marcos mitabang kang Pablo sa praktikal nga mga paagi, tingali pinaagi sa pagtaganag pagkaon o mga butang nga gikinahanglan sa pagsulat. Ang tabang ug pagdasig nga nadawat ni Pablo lagmit nakatabang niya nga malahutay ang kataposang bahin sa iyang kinabuhi hangtod sa iyang kamatayon. w20.01 11 ¶12-13

Gipili nato ang kinabuhi diin kinahanglan tang magsakripisyo ug magkugi. Si Jesus nagpasidaan nga lutoson ta. Pero makadahom ta nga hatagan ta ni Jehova ug kusog sa paglahutay sa bisan unsang kalisdanan. Kon padayon tang molahutay, mas molig-on ta. (Sant. 1:2-4) Makadahom sab ta nga itagana ni Jehova ang atong panginahanglan, atimanon ta ni Jesus, ug dasigon ta sa atong mga igsoon. (Mat. 6:31-33; Juan 10:14; 1 Tes. 5:11) Ang babayeng gitalinug-an nga giayo ni Jesus mibatig kahayahay sa mismong adlaw nga naayo siya. (Luc. 8:43-48) Pero mobati lang siyag kahayahay hangtod sa hangtod kon nahimo siyang maunongong tinun-an sa Kristo. Unsa kahay iyang gihimo? Kon gisangon niya ang yugo ni Jesus, hunahunaa ang ganti​—pag-alagad uban ni Jesus sa langit! Ang bisan unsang sakripisyo nga iyang gihimo sa pagsunod sa Kristo balewala ra kon itandi niana nga panalangin. Bisag unsa pay atong paglaom​—kinabuhing walay kataposan sa langit man o sa yuta—​mapasalamaton gyod ta nga gidawat nato ang pagdapit ni Jesus: “Ari kamo kanako”! w19.09 25 ¶21-22

Kay nanginahanglag tabang, ang mga tawo ni David nangayog diyutayng pagkaon gikan sa datong Israelinhon nga si Nabal. Gibati nila nga puwede ra silang mangayo kay ilang gipanalipdan ang kahayopan ni Nabal didto sa kamingawan. Pero ang hakog nga si Nabal wala mohatag nilag bisan unsa. Nasuko pag-ayo si David ug gusto niyang patyon si Nabal ug ang tanang lalaki sa iyang panimalay. (1 Sam. 25:3-13, 22) Pero ang guwapang asawa ni Nabal nga si Abigail maalamon. Si Abigail maisogong miluhod sa tiilan ni David ug mihangyo kaniya nga dili manimalos aron dili siya mahimong sad-an sa dugo. Malumo niyang gisugyotan si David nga isalig kang Jehova ang tanan. Ang mapainubsanong mga pulong ni Abigail ug ang iyang pagkamaalamon nakatandog sa kasingkasing ni David. Naamgohan ni David nga si Jehova ang nagpadala kang Abigail. (1 Sam. 25:23-28, 32-34) Naugmad ni Abigail ang mga hiyas nga nakapahimo niyang mapuslanon kang Jehova. Sa susama, ang mga sister nga nakaugmad ug kalumo ug kaalam puwedeng gamiton ni Jehova sa pagpalig-on sa ilang pamilya ug sa uban diha sa kongregasyon.​—Tito 2:3-5. w19.10 23 ¶10

Kinahanglang paneguroon sa tanang matuod nga mga Kristohanon nga bulag gyod sila sa Bantogang Babilonya. Sa wala pa makakat-on sa kamatuoran, ang usa ka Bible study membro tingali sa bakak nga relihiyon. Tingali nagtambongan siya sa relihiyosong mga serbisyo niini ug nagaapil sa mga kalihokan niini. O basin naghatag siyag donasyon sa maong relihiyon. Sa dili pa siya maaprobahan ingong dili bawtismadong magmamantala, kinahanglang bug-os siyang mobulag sa bakak nga relihiyon. Kinahanglan siyang mosulat sa iyang kanhing relihiyon o sa bisan unsang organisasyon nga konektado sa Bantogang Babilonya o mohimog laing paagi sa pagpahibalo nga dili na siya membro niini. Kinahanglang seguroon sa matuod nga Kristohanon nga ang iyang sekular nga trabaho dili konektado sa Bantogang Babilonya. (2 Cor. 6:14-17) Nganong lig-on ang atong baroganan niini? Tungod kay dili nato gustong makaambit sa mga buhat ug sala sa relihiyosong mga organisasyon nga hugaw sa panglantaw sa Diyos.​—Isa. 52:11. w19.10 12 ¶16-17

Si Jeremias ang nagsulat sa basahon sa Jeremias, ug lagmit siya pod ang nagsulat sa Una ug Ikaduhang Hari. Kadto nga asaynment seguradong nakatabang niya nga mas makita ang pagkamaluluy-on ni Jehova sa dili hingpit nga mga tawo. Pananglitan, nahibalo si Jeremias nga dihang si Haring Ahab naghinulsol sa iyang daotang mga buhat, wala ipahinabo ni Jehova ang katalagman sa iyang panimalay samtang buhi pa siya aron dili niya kini makita. (1 Hari 21:27-29) Nahibalo pod si Jeremias nga mas grabe pa ang gibuhat ni Manases kay kang Ahab sa pagpasuko kang Jehova. Bisan pa niana, gipasaylo ni Jehova si Manases kay siya naghinulsol. (2 Hari 21:16, 17; 2 Cron. 33:10-13) Kadto nga mga asoy lagmit nakatabang kang Jeremias nga sundogon ang pailob ug pagkamaluluy-on sa Diyos. Konsideraha kon giunsa pagtabang ni Jeremias si Baruk dihang temporaryong nawala ang iyang pokus sa iyang asaynment. Imbes maghunahuna dayon nga dili na magbag-o si Baruk, iyang gitabangan si Baruk pinaagi sa pagsulti sa mahigugmaon pero prangkang mensahe sa Diyos para kaniya.​—Jer. 45:1-5. w19.11 6 ¶14-15

Sa Levitico, atong makat-onan nga ang usa ka Israelinhon makatanyag ug halad sa panag-ambit “ingong pagpasalamat.” (Lev. 7:11-13, 16-18) Magtanyag siya niini nga halad, dili tungod kay obligado siya, kondili tungod kay gusto niya. Sama sa mga halad sa panag-ambit, ang atong pag-alagad kang Jehova nagpakita kon unsay atong gibati kaniya. Atong ihatag kang Jehova ang atong kinamaayohan, ug ato nang himoon kay gimahal nato siya pag-ayo. Seguradong malipay si Jehova nga makita nga milyonmilyon ang kinabubut-ong nagsimba kaniya tungod sa ilang lawom nga gugma kaniya ug sa iyang mga paagi! Nakita ug gipabilhan ni Jehova dili lang ang atong ginahimo kondili ang ato pong motibo. Pananglitan, kon tigulang ka ug dili na nimo mahimo ang gusto nimong himoon, makaseguro ka nga si Jehova nakasabot sa imong kahimtang. Tingali mobati ka nga wala na kaayo kay ikahatag kang Jehova, pero nakita ni Jehova ang imong lawom nga gugma nga nagpalihok nimo sa paghimo sa kon unsay imong maarangan. Malipay siya sa pagdawat sa imong kinamaayohan. w19.11 22 ¶9; 23 ¶11-12

Importante nga mabatonan nato ang balanseng panglantaw sa trabaho. Si Haring Solomon gidasig sa pagsulat: “Dunay gitakdang panahon alang sa . . . matag kalihokan.” Naghisgot siyag pagtanom, pagtukod, paghilak, pagkatawa, pagsayaw, ug uban pang kalihokan. (Eccl. 3:1-8) Klaro nga ang trabaho ug pahulay maoy duha ka importanteng bahin sa kinabuhi. Si Jesus may balanseng panglantaw sa trabaho ug pahulay. Dihay higayon nga ang mga apostoles namauli gikan sa pagsangyaw. Sa ilang kapuliki, “wala silay higayon bisan sa pagpangaon.” Busa gisulti ni Jesus kanila ang mga pulong sa teksto karong adlawa. (Mar. 6:30-34) Bisag siya ug ang iyang mga tinun-an dili kanunayng makapahulay, nahibalo si Jesus nga silang tanan nagkinahanglag pahulay. Usahay, gikinahanglan ang pagpahulay o pag-usab sa atong adlaw-adlawng rutina. Makita nato kana sa kahikayan nga gihimo sa Diyos para sa iyang katawhan kaniadto​—ang senemanang Igpapahulay. Dili na ta ilalom sa Moisesnong Balaod, pero makabenepisyo ta sa pagkonsiderar kon unsay giingon niana bahin sa Igpapahulay. w19.12 3 ¶6-7

Si Jehova misaad nga iyang atimanon ang iyang maunongong mga alagad, ug gibati niya nga obligado siyang tumanon kana. (Sal. 31:1-3) Dugang pa, nahibalo si Jehova nga maguol kaayo ta kon dili niya atimanon kadtong membro sa iyang pamilya. Nagsaad siya nga iya tang tagan-an sa materyal ug espirituwal, ug walay makapugong kaniya sa pagtuman niana! (Mat. 6:30-33; 24:45) Dihang atong hinumdoman kon nganong tumanon ni Jehova ang iyang mga saad, makasalig ta nga iya tang tabangan dihang magkalisodlisod ta. Konsideraha ang pananglitan sa unang siglong mga Kristohanon. Dihang nahitabo ang grabeng paglutos sa kongregasyon sa Jerusalem, “ang tanan gawas sa mga apostoles nagkatibulaag.” (Buh. 8:1) Hunahunaa kon unsay epekto niana. Kalisod sa pinansiyal! Tingali ang mga Kristohanon nawad-ag mga balay ug negosyo. Pero wala sila biyai ni Jehova; wala sab sila mawad-ig kalipay. (Buh. 8:4; Heb. 13:5, 6; Sant. 1:2, 3) Gitabangan ni Jehova ang maong matinumanong mga Kristohanon, ug tabangan sab ta niya.​—Sal. 37:18, 19. w20.01 17-18 ¶14-15

Dihang gipanalipdan ni David ang mga karnero sa iyang amahan batok sa leyon ug oso, iyang giila nga si Jehova ang nagtabang niya aron iyang mapatay ang maong bangis nga mga mananap. Dihang iyang napildi ang higanteng manggugubat nga si Goliat, nakita niya nga si Jehova ang naggiya kaniya. (1 Sam. 17:37) Ug dihang nakaikyas siya sa masinahong hari nga si Saul, giila ni David nga si Jehova ang nagluwas kaniya. (Sal. 18, superskripsiyon) Kon garboso pa si David, lagmit maghunahuna siya nga nahimo niya kining tanan tungod sa iyang kaugalingong katakos. Pero mapainubsanon siya, maong iyang giila nga si Jehova ang nagtabang kaniya. Unsay atong makat-onan niana? Dili lang basta mangayo tag tabang kang Jehova. Kinahanglan sab natong ilhon kon kanus-a ug sa unsang paagi ta niya gitabangan. Kon ilhon nato ang atong limitasyon, ato gyong makita nga si Jehova nagtabang nato nga mahimo ang mga butang nga dili nato kayang himoon. Ug sa matag higayon nga makita nato nga gitabangan ta ni Jehova, mas molig-on ang atong relasyon kaniya. w19.12 20 ¶18-19

Dunay daghang rason kon nganong makatuo ta nga gipabilhan ta ni Jehova. Gikabig ta niya ug nakita niya ang atong pagdawat sa maayong balita. (Juan 6:44) Samtang nakigsuod ta kang Jehova, mas nakigsuod siya kanato. (Sant. 4:8) Si Jehova naggahin usab ug panahon ug kusog sa pag-edukar kanato, nga nagpakitang bililhon ta kaniya. Nahibalo siya kon unsa tang matanga sa mga indibiduwal karon ug kon unsay atong potensiyal. Ug siya nagdisiplina kanato kay gimahal ta niya. Pagkadakong pamatuod nga gipabilhan ta ni Jehova! Si Haring David giisip sa uban nga walay pulos, pero nahibalo siya nga gimahal ug gipaluyohan siya ni Jehova. Tungod niana, siya nakapabiling positibo samtang nag-atubang sa maong situwasyon. (2 Sam. 16:5-7) Dihang kita maguol o makasinatig mga problema, si Jehova makatabang nato sa pagpabiling positibo ug sa paglahutay sa bisan unsang kalisdanan. (Sal. 18:27-29) Dihang paluyohan ta ni Jehova, walay makapugong kanato sa pag-alagad kaniya nga malipayon.​—Roma 8:31. w20.01 15 ¶7-8

Dihang mag-Bible study, sugdi kini pinaagig pag-ampo. Ang pag-ampo una ug human magtuon mas maayong sugdan dayon, sagad mga pipila ka semana human sugdi ang regular nga pag-Bible study. Kinahanglang tabangan nato ang Bible study nga makaamgo nga masabtan lang nato ang Pulong sa Diyos pinaagi sa tabang sa espiritu sa Diyos. Aron ipasabot nga importante ang pag-ampo, basahon sa pipila ka magmamantala ang Santiago 1:5 nga nag-ingon: “Kon duna kaninyoy nakulangan ug kaalam, padayon siyang mangayo sa Diyos.” Dayon pangutan-on sa nagdumala ang Bible study, “Unsaon nato pagpangayo sa Diyos ug kaalam?” Lagmit mouyon ang Bible study nga angay tang mag-ampo sa Diyos. Tudloi ang imong Bible study kon unsaon pag-ampo. Pasaligi siya nga gustong madungog ni Jehova ang iyang kinasingkasing nga mga pag-ampo. Ipatin-aw kaniya nga sa atong personal nga mga pag-ampo, puwede natong isulti kang Jehova kon unsa gyoy atong gibati​—mga butang nga dili tingali nato kayang isulti sa uban. Ang tinuod, si Jehova nahibalo na niana.​—Sal. 139:2-4. w20.01 2 ¶3; 5 ¶11-12

Si Jehova ang magdesisyon kon kanus-a siya magpilig mga dinihogan. (Roma 8:28-30) Gisugdan ni Jehova ang pagpilig mga dinihogan human mabanhaw si Jesus. Dayag nga sa unang siglo, ang tanang tinuod nga mga Kristohanon mga dinihogan. Sa misunod nga gatosan ka tuig, kadaghanan niadtong nangangkon nga mga Kristohanon wala gyod magsunod sa Kristo. Bisan pa niana, niadtong panahona, gidihogan ni Jehova ang pipila nga tinuod nga Kristohanon. Parehas sila sa mga trigo nga giingon ni Jesus nga motubo taliwala sa mga bunglayon. (Mat. 13:24-30) Sa kataposang mga adlaw, si Jehova padayong nagpilig mga tawo nga mahimong bahin sa 144,000. Busa kon ang Diyos modesisyon nga mopilig pipila sa hapit na gyod ang kataposan, dili nato angayng kuwestiyonon ang iyang kaalam. (Roma 9:11) Magbantay ta nga dili ta mahisama sa mga mamumuo diha sa usa sa mga ilustrasyon ni Jesus. Nagreklamo sila sa gihimo sa tag-iya sa ubasan ngadto sa mga mamumuo nga ulahi nang misugod pagtrabaho.​—Mat. 20:8-15. w20.01 30 ¶14

Gusto ni Jehova nga magmalipayon ang iyang pamilya. Dunay daghang rason nga puwede tang magmalipayon karon, bisag duna tay mga kalisdanan. Pananglitan, segurado ta nga gimahal ta pag-ayo sa atong langitnong Amahan. Duna tay tukmang kahibalo sa Pulong sa Diyos, ang Bibliya. (Jer. 15:16) Ug bahin ta sa espesyal nga pamilya diin ang tanan nahigugma kang Jehova, sa iyang mga balaod, ug sa usag usa. (Sal. 106:4, 5) Makapabilin tang malipayon kay segurado ta nga nindot kaayo ang kinabuhi sa umaabot. Nahibalo ta nga sa dili madugay wad-on ni Jehova ang tanang pagkadaotan ug ubos sa iyang Gingharian, ang yuta mahimong Paraiso. Duna sab tay nindot nga paglaom nga ang mga patay banhawon ug makauban pag-usab sa ilang mga minahal. (Juan 5:28, 29) Pagkamakapalipay unya niana! Ug pinakaimportante sa tanan, segurado ta nga sa dili madugay ang tanan sa langit ug yuta maghatag sa atong mahigugmaong Amahan sa pasidungog, pagdayeg, ug pagsimba nga angay kaniya. w20.02 13 ¶15-16

Kon makahimo kag seryosong sala, ayaw kinig taboni. Hinunoa, itug-an kang Jehova sa pag-ampo ang tanan nimong nahimo. Pinaagi niana, makuhaan ang kabalaka nga imong gibati tungod sa nahasol nga konsensiya. Pero kon gusto gyod nimong mahibalik ang imong relasyon kang Jehova, dili lang pag-ampo ang kinahanglan nimong himoon. Kinahanglang dawaton nimo ang disiplina. Dihang gipadala ni Jehova si propetang Natan sa pagyagyag sa sala ni Haring David uban kang Bat-seba, wala ipakamatarong ni David ang iyang kaugalingon ug wala niya pakamenosa ang iyang sala. Giangkon dayon niya nga nakasala siya dili lang sa bana ni Bat-seba kondili, labaw sa tanan, kang Jehova. Gidawat ni David ang disiplina ni Jehova maong gipasaylo siya. (2 Sam. 12:10-14) Kon nakahimo tag seryosong sala, kinahanglan tang makig-estorya niadtong gitudlo ni Jehova sa pag-atiman kanato. (Sant. 5:14, 15) Ug kinahanglang likayan nato ang tendensiya nga ipakamatarong ang kaugalingon. Kon dawaton ug ipadapat dayon nato ang disiplina nga atong madawat, mabatonan sab dayon nato ang kalinaw ug kalipay. w20.02 24-25 ¶17-18

Ang “10 ka tawo” nagrepresentar niadtong dunay paglaom nga mabuhi sa walay kataposan dinhi sa yuta. Nahibalo sila nga gipili ni Jehova ang grupo sa mga dinihogan nga nagrepresentar sa “Hudiyo” ug gibati nila nga pribilehiyo ang pagsimba kang Jehova uban kanila. Bisag imposibleng mahibaloan ang ngalan sa kada usa sa mga dinihogan karon sa yuta, kadtong naglaom nga mabuhi sa yuta mahimong “mouban” kanila. Sa unsang paagi? Gitubag kana sa teksto niining adlawa. Matikdi nga ang teksto naghisgot ug usa ka Hudiyo. Pero ang mga pulong nga “ninyo” ug “kaninyo” nagpasabot nga dili siya usa lang ka tawo. Busa, kini nga Hudiyo nagrepresentar sa tibuok grupo sa mga dinihogan. Kadtong dili dinihogan nag-alagad kang Jehova kauban sa mga dinihogan. Pero wala nila isipa ang mga dinihogan ingong lider, kay nahibalo sila nga si Jesus ang ilang Lider.​—Mat. 23:10. w20.01 26 ¶1-2

Si Jesus miingon nga ang tinuod niyang mga tinun-an klarong mailhan kon ilang ipakita ang samang gugma nga iyang gipakita. Ang iyang giingon tinuod sa unang siglo ug tinuod sab karon. Busa importante gyod nga maghigugmaay ta bisan sa dihang lisod kining himoon. Pangutan-a ang kaugalingon: ‘Unsay akong makat-onan sa mga igsoon nga padayong nagpakitag gugma sa usag usa bisan sa dihang lisod kining himoon?’ Kay dili ta hingpit, malisdan ta sa paghigugma pag-ayo sa usag usa. Bisan pa niana, kinahanglan natong sundogon ang Kristo. Si Jesus nagtudlo kanato nga importante kaayong makigdait sa igsoon nga nahiubos kanato. (Mat. 5:23, 24) Iyang gipasiugda nga kinahanglang mentinahon ang maayong relasyon sa uban kon gusto natong mapahimut-an ang Diyos. Malipay si Jehova kon maningkamot ta pag-ayo sa pagpakigdait sa atong mga igsoon. Dili dawaton ni Jehova ang atong pagsimba kon padayon tang masuko sa usa ka tawo ug dili makigdait kaniya.​—1 Juan 4:20. w20.03 24 ¶1-4

Si Satanas, “ang amahan sa bakak,” naglimbong sa mga tawo sukad sa sinugdan sa kasaysayan. (Juan 8:44) Apil sa iyang mga bakak ang sayop nga mga pagtulon-an bahin sa kamatayon ug sa kinabuhi human sa kamatayon. Daghang komon nga mga kostumbre ug patuotuo ang gibase nianang bakak nga mga pagtulon-an. Nganong daghan kaayo ang nalimbongan? Gipahimuslan ni Satanas ang natural nga pagbati sa tawo bahin sa kamatayon. Kay gilalang ta aron mabuhi sa walay kataposan, dili nato gustong mamatay. (Eccl. 3:11) Giisip natong kaaway ang kamatayon. (1 Cor. 15:26) Bisan pa sa paningkamot ni Satanas, wala matago ang kamatuoran bahin sa kamatayon. Gani, mas daghan karon ang nahibalo ug nagsangyaw sa gitudlo sa Bibliya bahin sa kahimtang ug paglaom sa mga patay. (Eccl. 9:5, 10; Buh. 24:15) Kini makapahupay ug makatabang nato nga malikayan ang kahadlok ug pagduhaduha. w19.04 14 ¶1; 15 ¶5-6

Si Jehova nga Diyos kanunayng nahigugma sa iyang mga magsisimba. Gihigugma sab niya ang hustisya. (Sal. 33:5) Busa makaseguro ta niining duha ka butang: (1) Masakitan si Jehova dihang ang iyang mga alagad makasinatig dili patas nga pagtratar. (2) Seguroon niya nga matapos ang maong inhustisya. Ang Balaod nga gihatag sa Diyos sa Israel pinaagi kang Moises gibase sa gugma. Kini nag-awhag sa iyang katawhan nga magpakitag hustisya sa tanan, bisan niadtong dili makapanalipod sa kaugalingon. (Deut. 10:18) Gipakita sa maong Balaod kon unsa ka dako ang gugma ni Jehova sa iyang mga magsisimba. Ang Balaod ni Moises natapos niadtong 33 C.E. dihang natukod ang Kristohanong kongregasyon. Nagpasabot ba kana nga ang mga Kristohanon wala nay balaod nga gibase sa gugma ug nagpasiugda sa hustisya? Wala! Ang mga Kristohanon may bag-ong balaod​—“balaod sa Kristo.” Si Jesus wala maglista ug mga balaod alang sa iyang mga sumusunod, pero gihatagan niya silag mga instruksiyon, sugo, ug prinsipyo nga mogiya nila. Ang “balaod sa Kristo” nag-apil sa tanang gitudlo ni Jesus. w19.05 2-3 ¶1-3

Ang mga tawo dunay natural nga panginahanglan nga hupayon ug may talagsaong katakos sa paghupay sa uban. Pananglitan, dihang ang usa ka bata madagma ug mapangos ang tuhod samtang nagdula, siya mohilak ug moadto sa iyang mama o papa. Dili maalim sa ginikanan ang samad, pero mahupay nila siya. Mahimong pangutan-on nila siya kon unsay nahitabo, pahiran ang iyang mga luha, alam-alaman siya ug gakson, ug tambalan ang iyang samad. Dayon, ang bata dili na mohilak ug basin mobalik pa ganig dula. Paglabay sa panahon, maalim ang iyang samad. Pero usahay labaw pa ana ang maeksperyensiyahan sa mga bata. Ang uban seksuwal nga giabuso. Kini mahimong kas-a nahitabo o nagpadayon sulod sa daghang tuig. Bisan unsa pa man, ang grabeng kasakit nga resulta niini dili mawala. Sa pipila ka kahimtang, ang tig-abuso madakpan ug masilotan. Sa ubang kahimtang, ang tig-abuso morag wala ra masiloti. Pero bisag masilotan dayon siya, ang makadaot nga epekto sa pag-abuso mahimong madala hangtod sa pagkahamtong. w19.05 14 ¶1-2