Nobyembre

Karon, daghang tawo nga giisip nga maalamon ang motamay sa tambag sa Bibliya bahin sa pagpakaimportante sa kaugalingon. Sila moingon nga kon isipon nimo ang uban nga mas labaw nimo, dali ra kang mabentahaan. Pero unsay mga resulta sa hakog nga panghunahuna nga gipasiugda sa kalibotan ni Satanas? Unsay imong namatikdan? Malipayon ba ang hakog nga mga tawo? Malipayon ba ang ilang pamilya? Duna ba silay tinuod nga mga higala? Suod ba sila sa Diyos? Sa imong nakita, hain niini ang kinamaayohag resulta​—ang pagsunod sa kaalam sa kalibotan o sa kaalam sa Pulong sa Diyos? (1 Cor. 3:19) Ang mga tawo nga nagsunod sa tambag niadtong giisip sa kalibotan nga maalamon nahisamag turista nga nangutanag direksiyon sa laing turista nga nasaag pod. Si Jesus miingon bahin sa mga “maalamon” sa iyang panahon: “Mga buta sila nga tiggiya. Kon ang buta giyahan ug buta, silang duha mangahulog sa gahong.” (Mat. 15:14) Tinuod gyod nga ang kaalam niining kalibotana kabuangan para sa Diyos. w19.05 24-25 ¶14-16

Sa di pa dugayng katuigan, ang nakig-ambit panahon sa Memoryal nagkadaghan. Angay ba tang mabalaka niini? Dili. “Si Jehova nakaila sa mga iyaha.” (2 Tim. 2:19) Dili sama kang Jehova , ang mga brader nga nag-ihap sa mga nakig-ambit panahon sa Memoryal wala mahibalo kon kinsay tinuod nga dinihogan. Busa apil sa ihap kadtong naghunahuna nga dinihogan sila pero dili diay. Pananglitan, ang pipila nga nakig-ambit kaniadto mihunong sa ulahi. Ang uban lagmit may sakit sa pangisip o emosyon mao nga nagtuo sila nga magmando sila uban sa Kristo didto sa langit. Klaro nga wala ta mahibalo kon pila gyoy dinihogan nga nahibilin sa yuta. Dunay mga dinihogan sa daghang dapit sa yuta dihang moabot si Jesus sa pagdala kanila sa langit. Ang Bibliya nag-ingon nga sa kataposang mga adlaw, diyutay na lang ang mga dinihogan nga mahibilin sa yuta. (Pin. 12:17) Pero wala ni mag-ingon kon pilay mahibilin inigsugod sa dakong kasakitan. w20.01 29-30 ¶11-13

Giilustrar ni Jesus kon unsa ka lawom ang inamahang pagmahal ni Jehova pinaagi sa pag-asoy bahin sa usa ka anak nga milayas. (Luc. 15:11-32) Ang amahan niana nga ilustrasyon wala gyod mawad-ig paglaom nga mobalik ang iyang anak. Dihang miuli ang anak, kinasingkasing niya kining gidawat. Kon mahitipas ta pero mahinulsolon, makaseguro ta nga ang atong mahigugmaong Amahan andam ug kinasingkasing nga modawat kanato. Ayohon sa atong Amahan ang tanang kadaot nga gipahinabo ni Adan. Human morebelde si Adan, si Jehova midesisyon nga magsagop ug 144,000 ka indibiduwal gikan sa katawhan aron mag-alagad ingong mga hari ug saserdote sa langit uban sa iyang Anak. Si Jesus ug ang kauban niyang mga magmamando motabang sa matinumanong mga tawo nga mahimong hingpit didto sa bag-ong kalibotan. Human sila makalabang sa kataposang pagsulay sa pagkamatinumanon, hatagan sa Diyos ang maong mga tawo ug kinabuhing walay kataposan. Ang atong Amahan malipay unya dihang iyang makita nga ang yuta mapuno sa hingpit niyang mga anak. Pagkanindot unya nianang panahona! w20.02 6-7 ¶17-19

Kitang tanan kinahanglang mangutana sa kaugalingon, ‘Ang mga kausaban ba nga akong ginahimo aron mahimong tinuod nga Kristohanon panggawas lang, o ginausab ba gyod nako ang akong hunahuna ug kasingkasing?’ Importante nga makita nato ang kalainan. Sa Mateo 12:43-45, gipakita ni Jesus kon unsay angayng buhaton. Kanang mga pulonga nagtudlog importanteng kamatuoran: Dili igo nga wad-on lang ang sayop nga mga hunahuna; kinahanglan nato kining pulihan ug mga hunahuna nga giuyonan sa Diyos. Posible ba gyong mausab ang atong panghunahuna o ang atong sulod nga pagkatawo? Ang Pulong sa Diyos nagtubag: “Isul-ob ang bag-ong personalidad nga gihimo sumala sa kabubut-on sa Diyos, nga nahiuyon sa tinuod nga pagkamatarong ug pagkamaunongon.” (Efe. 4:24) Oo, posibleng mausab nato ang atong hunahuna ug kasingkasing, pero dili ni sayon. Dili igo nga suklan lang nato ang sayop nga mga tinguha ug mohunong sa paghimog daotan. Kinahanglang bag-ohon nato ang atong “panghunahuna.” Apil niini ang pagbag-o sa atong mga tinguha, tendensiya, ug motibo. Nagkinahanglan nig padayong paningkamot. w19.06 9-10 ¶6-7

Si Jehova mabinationg nagpadalag mga anghel sa pagluwas kang Lot ug sa iyang pamilya. Pero si Lot “naglangaylangay.” Kinahanglan pang hawiran sa mga anghel ang iyang kamot ug tabangan siya ug ang iyang pamilya sa pagbiya sa siyudad. (Gen. 19:15, 16) Dayon giingnan siya sa mga anghel nga modagan ngadto sa kabukiran. Pero imbes mosunod kang Jehova, si Lot mihangyo nga moadto sa duol nga lungsod. (Gen. 19:17-20) Si Jehova mapailobong naminaw ug misugot nga moadto si Lot nianang lungsora. Sa ulahi, si Lot nahadlok sa iyang pagpuyo didto mao nga mibalhin siya sa kabukiran, nga maoy unang gipaadtoan ni Jehova kaniya. (Gen. 19:30) Pagkadako sa gipakitang pailob ni Jehova! Sama ni Lot, lagmit may usa ka membro sa atong espirituwal nga pamilya nga makahimog dili maayong desisyon nga moresultag seryosong mga problema. Kon mahitabo nâ, unsay atong himoon? Tingali makahunahuna tang sultihan siya nga iyang giani ang iyang gipugas, nga maoy tinuod. (Gal. 6:7) Pero naa tay mas maayong mahimo. Puwede natong sundogon ang paagi ni Jehova sa pagtabang kang Lot. w19.06 20-21 ¶3-5

Dihang idili sa mga kaaway ang atong pagsimba, gusto nila nga mahadlok ta sa pag-alagad kang Jehova. Gawas sa pagdili, basin ilang ipakaylap ang bakak nga mga estorya bahin kanato, ipa-search sa mga polis ang atong balay, o ila tang kasohan sa korte ug ipapriso pa gani. Nagdahom sila nga mahadlok ta kay napapriso nila ang pipila kanato. Kon mahadlok ta nila ug sa ilang buhaton kanato, basin maluya ta o moundang pa gani sa pag-alagad kang Jehova. Dili nato gusto nga maparehas ta niadtong giingon sa Levitico 26:36, 37. Dili nato tugotan nga maluya o moundang ta sa pag-alagad tungod sa kahadlok. Bug-os tang mosalig kang Jehova ug dili gyod mahadlok. (Isa. 28:16) Mangayo tag giya kang Jehova. Nahibalo ta nga sa tabang sa atong Diyos, bisan ang pinakagamhanang gobyerno sa tawo dili makapugong nato sa pagsimba kaniya nga matinumanon. Imbes makapahadlok nato, ang pagsupak mahimong makapalihok nato nga moalagad kang Jehova nga mas bug-os pa. w19.07 9-10 ¶6-7

Kon wala ka pa makakitag interesado nga gustong mahimong tinun-an, padayon sa pagpangita. Hinumdomi nga gipakasama ni Jesus sa pagpangisda ang paghimog mga tinun-an. Ang mga mananagat mogahin tingalig daghang oras ayha makakuhag isda. Sagad mangisda sila sa lawom nang gabii o kaha sayo sa buntag, ug usahay mobiyahe silag layo. (Luc. 5:5) Sa susama, ang pipila ka magsasangyaw mogahin ug daghang oras sa mapailobong “pagpangisda” sa lainlaing higayon ug dapit. Ngano? Aron mas dakog purohan nga makahibalag silag mga tawo. Kadtong naningkamot sa pagpangita sagad mapanalanginan kay makakita silag mga interesado. Puwede ba nimong sulayan ang pagsangyaw sa oras o dapit nga lagmit mas daghang tawo ang imong maestorya? Nganong nagkinahanglag pailob ang pag-Bible study? Tungod kay kinahanglan tang mohimog labaw pa kay sa pagtabang lang sa Bible study nga makakat-on ug mahigugma sa mga pagtulon-an sa Bibliya. Kinahanglang tabangan nato siya nga makaila ug mahigugma sa Awtor sa Bibliya, si Jehova. w19.07 18-19 ¶14-15

Ang pipila tingali kanato makonsensiya gihapon tungod sa nangaging kasal-anan. Kon mao, puwede natong tun-an ang mga topiko bahin sa halad lukat sa Kristo. Ang pagtuon, pagpamalandong, ug pag-ampo bahin nianang makapadasig nga topiko dakog ikatabang aron mahupayan ta sa walay basehanang pagbati nga sad-an gihapon ta. Makatabang pa gani ni nga dili na ta mobating sad-an sa mga sala nga gipasaylo na ni Jehova. Tagda ang laing leksiyon nga atong makat-onan kang Pablo. Ang pipila tingali kanato mibiya sa trabaho nga posibleng makapadato kay gusto natong unahon ang Gingharian. Kon mao, kalimtan nato ang mga butang sa luyo pinaagi sa dili paghunahuna sa mga butang nga ato untang mabatonan. (Num. 11:4-6; Eccl. 7:10) Ang “mga butang sa luyo” nag-apil sab sa mga butang nga atong nahimo sa pag-alagad o sa mga pagsulay nga atong nalahutay. Siyempre, ang paghunahuna kon giunsa ta pagpanalangin ug pagtabang ni Jehova sa nanglabayng katuigan mas makapasuod nato kaniya. Pero, dili gyod nato gustong maghunahuna nga igo na ang atong nahimo para kang Jehova.​—1 Cor. 15:58. w19.08 3 ¶5-6

Makaampo ta sa atong Diyos bisan kanus-a ug bisan asa ta. Dili siya sobra ka puliki nga dili na makapaminaw kanato; hinunoa kanunay siyang mamati sa atong mga pag-ampo. Kon atong makita nga si Jehova maminaw sa atong mga pag-ampo, mas masuod ta kaniya. Ang salmista miingon: “Gihigugma nako si Jehova kay siya mamati sa akong tingog.” (Sal. 116:1) Ang atong Amahan dili lang maminaw sa atong mga pag-ampo kondili motubag pod niini. Si apostol Juan nagpasalig kanato: ‘Bisan unsay atong pangayoon uyon sa kabubut-on sa Diyos, maminaw siya nato.’ (1 Juan 5:14, 15) Siyempre, dili tingali tubagon ni Jehova ang atong mga pag-ampo sa paagi nga atong gidahom. Nahibalo siya kon unsay pinakamaayo para nato, busa usahay dili niya ihatag ang atong gihangyo o usahay kinahanglan pa tang maghulat. (2 Cor. 12:7-9) Si Jehova nagtagana sa atong panginahanglan. Iyang gibuhat kon unsay iyang gisugo sa tanang amahan. (1 Tim. 5:8) Nagtagana siya sa materyal nga panginahanglan sa iyang mga anak. Dili niya gusto nga mabalaka ta bahin sa atong pagkaon, sinina, o puy-anan. (Mat. 6:32, 33; 7:11) Ingong mahigugmaon nga ginikanan, gipaneguro pa gani ni Jehova nga matagan-an ang tanan natong panginahanglan sa umaabot. w20.02 5 ¶10-12

Dili tanang dunay paglaom nga moadto sa langit ang bahin sa “matinumanon ug maalamong ulipon.” (Mat. 24:45-47) Sama sa unang siglo, si Jehova ug Jesus naggamit karon ug pipila ka brader sa pagpakaon, o pagtudlo, sa daghan. Pipila lang ka dinihogang Kristohanon sa unang siglo ang gigamit sa pagsulat sa Kristohanon Gregong Kasulatan. Karon, pipila lang ka dinihogan ang may responsibilidad sa paghatag sa katawhan sa Diyos ug “pagkaon sa hustong panahon.” Si Jehova nakadesisyon nga hatagag walay kataposang kinabuhi sa yuta ang kadaghanan sa iyang katawhan ug hatagag kinabuhi sa langit ang pipila nga magmando uban ni Jesus. Si Jehova naghatag ug ganti sa tanan niyang mga alagad​—sa “Hudiyo” ug sa “10 ka tawo”—​ug gisugo niya sila nga mosunod sa samang mga balaod ug magpabiling matinumanon. (Zac. 8:23) Ang tanan kinahanglang magmapainubsanon. Ang tanan kinahanglang magkahiusa sa pag-alagad kaniya. Ug ang tanan kinahanglang maningkamot nga mahuptan ang kalinaw sa kongregasyon. Samtang magkaduol ta sa kataposan, hinaot nga kitang tanan padayong mag-alagad kang Jehova ug mosunod sa Kristo ingong “usa ka panon.” w20.01 31 ¶15-16

Dili nato mapugos ang atong pamilya nga modawat sa maayong balita, pero makahimo ta sa pagdasig nila nga ablihan ang ilang hunahuna ug kasingkasing sa mensahe sa Bibliya. (2 Tim. 3:14, 15) Pagpakitag maayong ehemplo. Sagad, mas mamatikdan sa atong pamilya ang atong gihimo kay sa atong gisulti. Padayon sa pagtabang sa imong pamilya. Si Jehova naghatag natog ehemplo. “Balikbalik” niyang gihatagag kahigayonan ang mga tawo nga modawat sa maayong balita ug makabatog kinabuhi. (Jer. 44:4) Ug giingnan ni apostol Pablo si Timoteo nga magpadayon sa pagtabang sa uban. Ngano? Kay sa pagbuhat niana, maluwas niya ang iyang kaugalingon ug kadtong maminaw niya. (1 Tim. 4:16) Gimahal nato ang atong pamilya, maong gusto nato nga mahibalo sila sa kamatuoran sa Pulong sa Diyos. w19.08 14 ¶2; 16-17 ¶8-9

Maayong hinumdoman nato nga kon dunay motambag nato, lagmit mas bug-at ang atong kasaypanan kay sa atong gihunahuna. Nianang mga panahona, ang una tingali natong reaksiyon mao ang pagsalikway sa tambag. Tingali sawayon nato ang naghatag niana o ang paagi sa pagtambag. Pero kon mapainubsanon ta, maningkamot ta sa pagpakita sa hustong panghunahuna. Ang tawong mapainubsanon mapasalamaton sa tambag. Sa pag-ilustrar: Imadyina nga naa ka sa tigom. Human makig-estorya sa pipila ka igsoon, ang usa kanila misulti nimo sa pribado nga naa kay kiki. Seguradong maulaw ka. Pero dili ba mapasalamaton ka nga gisultian ka niya? Sa pagkatinuod, maghunahuna ka nga maayo untag may nakasulti dayon nimo! Sa susama, angay tang magmapainubsanon ug magmapasalamaton sa igsoon nga may kaisog sa paghatag ug tambag dihang gikinahanglan nato kini. Isipon nato ang maong igsoon ingong atong higala, dili kaaway.​—Prov. 27:6; Gal. 4:16. w19.09 5 ¶11-12

Gihatagan ni Jehova ang inahan ug dungganong papel diha sa pamilya ug awtoridad sa iyang mga anak. Sa pagkatinuod, ang ginahimo ug ginasulti sa inahan makaapektar sa iyang mga anak sa tibuok nilang kinabuhi. (Prov. 22:6) Matikdi kon unsay makat-onan sa mga inahan kang Maria, ang inahan ni Jesus. Si Maria pamilyar kaayo sa Kasulatan. Siya lawom ug pagtahod kang Jehova ug suod kaayo kaniya. Andam siyang magpasakop sa paggiya ni Jehova, bisan pag kini makausab sa tibuok niyang kinabuhi. (Luc. 1:35-38, 46-55) Mga inahan, masundog ninyo si Maria sa daghang paagi. Unsay puwede ninyong himoon? Una, kinahanglang magpabilin mong suod kang Jehova pinaagi sa personal nga pagtuon sa Bibliya ug pag-ampo. Ikaduha, kinahanglang andam mong mohimog kausaban sa inyong kinabuhi aron mapalipay si Jehova. w19.09 18 ¶17-19

Si apostol Juan nakadawat ug makapalipayng panan-awon. Niini, ang mga anghel giingnan nga pugngan ang malaglagong mga hangin sa dakong kasakitan hangtod nga mahuman ang kataposang pagselyo sa usa ka grupo sa mga ulipon. (Pin. 7:1-3) Ang maong grupo gilangkoban sa 144,000 nga magmando uban ni Jesus sa langit. (Luc. 12:32; Pin. 7:4) Dayon, naghisgot si Juan ug laing grupo. Kini dako kaayo nga siya nakaingon: “Tan-awa!”​—ekspresyon nga tingali nagpaila nga nakurat siya sa iyang nakita. Unsay nakita ni Juan? “Usa ka dakong panon, nga walay tawong makaihap, gikan sa tanang kanasoran ug tribo ug katawhan ug pinulongan, nga nagbarog atubangan sa trono ug atubangan sa Kordero.” (Pin. 7:9-14) Hunahunaa kon unsa ka malipayon si Juan dihang nahibaloan niya nga sa umaabot daghan kaayong tawo ang mosimba sa Diyos sa hustong paagi! Segurado nga ang maong panan-awon nakapalig-on sa pagtuo ni Juan. Angay nga mas makapalig-on kini sa atong pagtuo kay nagkinabuhi ta sa panahon nga nagakatuman kini nga panan-awon! Atong nakita ang pagtigom sa milyonmilyon nga naglaom nga makalabang buhi sa dakong kasakitan ug mabuhi sa yuta sa walay kataposan. w19.09 26 ¶2-3

Imadyina nga gihimo na sa mga lider sa kalibotan ang dugay na natong gipaabot nga pagdeklarar ug “kalinaw ug kasegurohan.” Manghambog tingali sila nga malinawon ug luwas na kaayo ang kalibotan. Patuohon ta nila nga nasulbad na nila ang tanang problema sa kalibotan. Pero dili nila mapugngan ang sunod nga mahitabo. Ang “Bantogang Babilonya” laglagon! (Pin. 17:5, 15-18) ‘Ibutang kini sa Diyos sa ilang kasingkasing aron buhaton ang iyang hunahuna.’ Unsa kana nga hunahuna? Ang paglaglag sa tibuok kalibotang imperyo sa bakak nga relihiyon, apil ang Kakristiyanohan. Ibutang sa Diyos ang iyang hunahuna ngadto sa kasingkasing sa “10 ka sungay” sa “hayag-pula nga pintas nga mananap.” Ang 10 ka sungay nagrepresentar sa tanang gobyerno nga nagsuportar sa “pintas nga mananap”​—ang United Nations. (Pin. 17:3, 11-13; 18:8) Dihang ang maong mga gobyerno mobalitok sa bakak nga relihiyon, ilhanan kana nga nagsugod na ang dakong kasakitan. Kini maoy kalit ug makahahadlok gayod nga panghitabo nga makaapektar sa tanan dinhi sa yuta. w19.10 14 ¶1, 3

Sa unang siglo, si Diotrefes nasina sa mga tigdumala sa kongregasyon. ‘Gusto niyang molabaw’ sa mga igsoon sa kongregasyon, mao nga nagpakaylap siyag daotang mga estorya aron daoton si apostol Juan ug ang ubang brader nga may mga katungdanan. (3 Juan 10) Bisag dili gyod nato buhaton ang gihimo ni Diotrefes, basig masina ta sa igsoon nga nakadawat sa asaynment nga atong gipangandoy​—ilabina kon gibati nato nga kuwalipikado sab ta sa maong responsibilidad. Ang kasina samag makamatay nga sagbot. Dihang ang binhi sa kasina makagamot na sa atong kasingkasing, mahimong lisod na ning patyon. Ang kasina mosamot tungod sa negatibong mga pagbati, sama sa pagselos, garbo, ug kahakog. Ang kasina makapugong sa pagtubo sa maayong mga hiyas, sama sa gugma, pagkamabination, ug pagkamaayo. Dihang makita nato nga nagsugod nag turok ang kasina, kinahanglan nato ning ibton sa atong kasingkasing. w20.02 15 ¶6-7

Miingon si apostol Pablo nga nag-atubang siyag usa ka matang sa kasakit. Giisip niya kini nga “samag anghel ni Satanas” nga nagsigeg ‘sagpa’ (‘bunal,’ footnote) kaniya. Tingali, si Satanas o ang mga demonyo dili maoy direktang nagpahinabo sa kalisdanan ni Pablo, nga samag nagbutang sa tunok diha sa iyang unod. Pero, dihang nakita nianang daotang mga espiritu ang “tunok,” tingali ila ning giduot, ingnon ta, aron mosamot ang pag-antos ni Pablo. Unsay gibuhat ni Pablo? Sa sinugdan, gusto ni Pablo nga mawala ang maong “tunok.” Siya miingon: “Katulo ko mihangyo sa Ginoo [kang Jehova] . . . nga mawala na unta kini kanako.” Bisan pa sa mga pag-ampo ni Pablo, ang tunok sa unod nagpabilin. Pero wala kini magpasabot nga wala dungga ni Jehova ang mga pag-ampo ni Pablo. Gidungog niya kini. Wala kuhaa ni Jehova ang kalisdanan, pero gihatagan niya si Pablo ug kusog aron makalahutay niini. Si Jehova miingon: “Mas kusgan ang akong gahom dihang huyang ka.” (2 Cor. 12:8, 9) Sa tabang sa Diyos, si Pablo nakapabiling malipayon ug kalmado!​—Filip. 4:4-7. w19.11 9 ¶4-5

Si Jehova takos sa atong eksklusibong debosyon kay siya ang atong Maglalalang ug Maghahatag ug Kinabuhi. (Pin. 4:11) Pero, dunay kapeligrohan. Bisag atong gihigugma ug gitahod si Jehova, basin dili nato mahatag ang eksklusibong debosyon nga angay kaniya. Sa Bibliya, ang paghatag ug debosyon sa Diyos nagpasabot nga gihigugma nato siya pag-ayo. Kon eksklusibo ang atong debosyon kang Jehova, siya lang ang atong simbahon. Dili nato tugotan si bisan kinsa o ang bisan unsa nga mopuli sa iyang dapit diha sa atong kasingkasing. (Ex. 34:14) Ang atong debosyon kang Jehova may lig-ong basehanan. Ngano? Tungod kay gibase kini sa kamatuoran nga atong nakat-onan bahin kaniya. Nakadayeg ta sa iyang nindot nga mga hiyas. Nahibalo ta kon unsay iyang gusto ug dili gusto, ug gisundog nato siya. Atong nasabtan ug gipaluyohan ang iyang katuyoan para kanato. Giisip natong pribilehiyo nga gitugotan ta niya nga mahimong iyang higala. (Sal. 25:14) Ang tanan nga atong nahibaloan bahin sa atong Maglalalang mas nakapasuod nato kaniya.​—Sant. 4:8. w19.10 26 ¶1-3

Karon, ang atong mga igsoon lainlaig giatubang nga kalisdanan. Pananglitan, daghan ang nag-antos sa mga katalagman nga gipahinabo sa kinaiyahan o sa tawo. Dihang mahitabo nâ, tingali ang uban kanato makahimo sa pagpapuyo sa atong mga igsoon sa atong balay. Ang uban sab tingali motabang sa pinansiyal. Pero kitang tanan makahimo sa pag-ampo kang Jehova nga tabangan ang atong mga igsoon. Kon masayran nato nga ang usa ka igsoon naluya, tingali dili ta mahibalo kon unsay isulti o buhaton. Pero kitang tanan makatabang. Pananglitan, puwede tang mogahin ug panahon nga ubanan ang atong higala. Puwede sab nga sinsero tang maminaw dihang mosulti siya sa iyang gibati. O kaha ipaambit nato kaniya ang atong paborito nga makapahupayng teksto. (Isa. 50:4) Ang pinakaimportante mao nga andam kang motabang sa imong mga higala dihang gikinahanglan ka nila. Kinahanglang determinado tang makigsuod pag-ayo sa atong mga igsoon karon ug maningkamot nga magpabiling suod kanila. Ang maong mga panaghigalaay magpabilin dili lang hangtod sa kataposan niining sistemaha, kondili hangtod sa hangtod! w19.11 7 ¶18-19

Kini maoy kinabubut-ong halad nga itanyag sa usa ka tawo kay gihigugma niya ang iyang Diyos, si Jehova. Ang naghalad, ang iyang pamilya, ug ang mga saserdote mokaon sa karne sa gihalad nga hayop. Pero may mga parte sa gihalad nga hayop nga para lang kang Jehova. Unsa kana? Para kang Jehova, ang tambok ang pinakamaayong parte sa usa ka hayop. Miingon sab siya nga espesyal kaayo ang importanteng mga organo, sama sa amimislon (o, kidney). (Lev. 3:6, 12, 14-16) Busa malipay gyod si Jehova dihang kinabubut-ong ihalad sa usa ka Israelinhon ang importanteng mga organo ug ang tambok. Gipakita sa Israelinhong naghalad niana nga gusto gyod niyang ihatag ngadto sa Diyos ang kinamaayohan. Sa samang paagi, kinabubut-ong gihalad ni Jesus kang Jehova ang iyang kinamaayohan pinaagi sa pag-alagad Kaniya nga bug-os kalag tungod sa iyang gugma Kaniya. (Juan 14:31) Para kang Jesus, makapalipay ang pagbuhat sa kabubut-on sa Diyos. (Sal. 40:8) Seguradong nalipay si Jehova nga makita si Jesus nga kinabubut-ong nag-alagad kaniya! w19.11 22-23 ¶9-10

Ang Pulong sa Diyos nag-ingon nga human sa unom ka “adlaw” sa paglalang, ang Diyos mihunong sa paglalang sa mga butang sa yuta. (Gen. 2:2) Pero, ganahan gyong motrabaho si Jehova, ug sa laing mga paagi siya “nagpadayon sa pagbuhat.” (Juan 5:17) Ang sugo nga senemanang Igpapahulay gibase sa pagpahulay ni Jehova sa ikapitong adlaw, nga gihisgotan sa Genesis. Ang Diyos miingon nga ang Igpapahulay maoy ilhanan tali kaniya ug sa Israel. (Ex. 31:12-14) Walay gitugotan nga motrabaho, apil ang mga bata, ulipon, ug bisan ang binuhing mga hayop. (Ex. 20:10) Pinaagi niini, ang mga tawo makahatag ug dugang pagtagad sa espirituwal nga mga butang. Daghang lider sa relihiyon sa panahon ni Jesus ang naghimog estrikto kaayong mga lagda bahin adlaw sa Igpapahulay. Miingon sila nga supak sa balaod ang pagpangutlog mga uhay o pag-ayog tawong masakiton panahon sa Igpapahulay. (Mar. 2:23-27; 3:2-5) Ang maong mga panglantaw supak sa panghunahuna sa Diyos, ug giklaro kana ni Jesus niadtong naminaw kaniya. w19.12 3-4 ¶8-9

Kon padayon tang mokat-on sa mga hiyas ni Jehova, mas masundog nato siya. Si David nakaila kaayo sa iyang langitnong Amahan, mao nga iyang nasundog Siya sa pagpakiglabot sa uban. Tungod sa maayo kaayong relasyon ni David kang Jehova, gimahal siya pag-ayo sa mga Israelinhon ug gigamit siya ni Jehova ingong sukdanan para sa ubang hari sa Israel. (1 Hari 15:11; 2 Hari 14:1-3) Unsay atong makat-onan niana? Kinahanglan natong ‘sundogon ang Diyos.’ Kon atong sundogon ang mga hiyas sa Diyos, atong gipamatud-an nga kita iyang mga anak. (Efe. 4:24) Ang atong pagkat-on kang Jehova walay kataposan. (Eccl. 3:11) Pero ang importante, dili kon unsa ka daghan ang atong nahibaloan kaniya, kondili kon unsay atong gihimo sa atong nakat-onan. Kon atong ipadapat ang atong nakat-onan ug maningkamot nga sundogon ang atong mahigugmaong Amahan, padayon siyang makigsuod kanato. (Sant. 4:8) Pinaagi sa iyang Pulong, iya tang gipasaligan nga dili gyod niya biyaan kadtong gustong makaila pag-ayo kaniya. w19.12 20 ¶20; 21 ¶21, 23

Gimahal ni Jacob ang tanan niyang anak nga lalaki, pero palangga kaayo niya ang 17 anyos nga si Jose. Unsay gibati sa mga igsoon ni Jose? Nasina sila kaniya, maong gidumtan nila siya. Busa, ilang gibaligya si Jose aron mahimong ulipon ug gibakakan ang ilang amahan, nga kuno gipatay sa bangis nga mananap ang iyang paboritong anak. Tungod sa kasina, gidaot nila ang kalinaw sa ilang pamilya ug gipaguol pag-ayo ang ilang amahan. (Gen. 37:3, 4, 27-34) Ang kasina giapil sa makamatayng “mga buhat sa unod” nga mahimong hinungdan nga ang usa dili makapanunod sa Gingharian sa Diyos. (Gal. 5:19-21) Sagad, ang kasina mao ang gamot sa makadaot nga mga bunga sama sa pagdumtanay, panag-away, ug pagsilaob sa kasuko. Ang gihimo sa mga igsoon ni Jose nagpakita kon sa unsang paagi ang kasina makadaot sa relasyon ug makatugaw sa kalinaw sa pamilya. Bisag dili gyod nato buhaton ang gihimo sa mga igsoon ni Jose, kitang tanan dunay dili hingpit ug malimbongon nga kasingkasing. Busa usahay, mobati tingali tag kasina. w20.02 14-15 ¶1-3

Sa usa ka higayon, gikuhaan ni Jehova ang balaang espiritu nga naa kang Moises ug gihatag kini sa usa ka grupo sa mga ansiyano sa Israel nga nagtindog duol sa tolda nga tagboanan. Wala madugay human niana, nabalitaan ni Moises nga may duha ka ansiyano nga wala didto sa tolda nga tagboanan nga nakadawat sab ug balaang espiritu ug migawi nga samag mga propeta. Unsa may iyang reaksiyon dihang giingnan siya ni Josue nga pugngan ang duha ka ansiyano? Si Moises wala masina sa pagtagad nga nadawat niining mga tawhana gikan kang Jehova. Nalipay hinuon siya sa nadawat nila nga pribilehiyo. (Num. 11:24-29) Unsay atong makat-onan kang Moises? Kon ansiyano ka, gihangyo ka na ba sukad sa pagbansay sa usa ka brader diha sa kongregasyon aron moatiman sa usa ka responsibilidad nga gimahal kaayo nimo? Pero kon mapainubsanon ka sama kang Moises, dili ka mobati nga dili na kaayo ka importante kay gihangyo ka sa pagbansay sa laing brader nga sa ngadtongadto maoy modumala niini. Angay hinuon kang malipay sa pagtabang sa maong brader. w20.02 17 ¶9-11

Ang sakit mahimong makaapektar sa atong emosyon. Maulaw tingali ta dihang mamatikdan sa mga tawo ang atong mga limitasyon o dihang magdepende ta sa tabang sa uban. Bisag wala mahibalo ang uban nga nasakit ta, basin mobati tag kaulaw kay limitado na kaayo ang atong mahimo. Nianang makapaguol nga kahimtang, dasigon ta ni Jehova. Sa unsang paagi? Sa Bibliya, si Jehova nagtipig ug daghang maayong mga pulong nga magpahinumdom kanato nga bililhon ta kaniya bisag masakiton ta. (Sal. 31:19; 41:3) Pinaagi sa maong mga teksto, tabangan ta ni Jehova sa pag-atubang sa negatibong mga emosyon nga atong bation tungod sa atong sakit. Makasalig ka nga si Jehova nahibalo sa imong gibati. Hangyoa siya nga tabangan ka nga makabatog saktong panglantaw sa imong kahimtang. Unya pangitaa sa Bibliya ang makapahupayng mga pulong ni Jehova para nimo. Pagpokus sa mga teksto nga nagpakita kon unsa ka dako ang pagpabili ni Jehova sa iyang mga alagad. Kon imo nang himoon, makita nimo nga si Jehova maayo sa tanan niyang matinumanong alagad.​—Sal. 84:11. w20.01 15-16 ¶9-10; 17 ¶12

Si Isaac dato, mao nga nasina niya ang mga Filistehanon. (Gen. 26:12-14) Ila pa ganing gitabonan ang mga atabay nga kuhaanag tubig ni Isaac para sa iyang kahayopan. (Gen. 26:15, 16, 27) Sama sa mga Filistehanon, may mga tawo karon nga nasina niadtong mas daghag materyal nga butang kay kanila. Wala lang nila tinguhaa ang nabatonan sa uban; nagtinguha sab sila nga mawad-an ang uban sa ilang nabatonan. Ang Hudiyong mga lider sa relihiyon nasina kang Jesus kay ganahan kaayo niya ang ordinaryong mga tawo. (Mat. 7:28, 29) Si Jesus representante sa Diyos ug nagtudlo sa kamatuoran. Bisan pa niana, ang maong mga lider sa relihiyon nagpakaylap ug daotan kaayong mga bakak aron daoton ang maayong ngalan ni Jesus. (Mar. 15:10; Juan 11:47, 48; 12:12, 13, 19) Unsay atong makat-onan niini? Kinahanglang suklan nato ang bisan unsang tendensiya nga masina sa mga igsoon nga dunay mga hiyas nga nakapasuod nila sa kongregasyon. Hinunoa, angay tang maningkamot sa pagsundog sa ilang mahigugmaong mga buhat.​—1 Cor. 11:1. w20.02 15 ¶4-5

Imadyina nga nabuhi ka sa Persia mga 2,500 ka tuig kanhi ug gusto nimong makig-estorya sa hari. Dili gyod ka mangahas sa pagduol sa hari kon wala ka niya hatagig permiso. Kay kon buhaton nâ nimo, posibleng patyon ka! Mapasalamaton kaayo ta nga si Jehova dili pareho nianang Persianong hari! Puwede tang makig-estorya niya bisan kanus-a. Gusto niya nga dili ta magpanuko sa pagduol kaniya. Pananglitan, bisag si Jehova may dungganong mga titulo sama sa Dakong Maglalalang, Labing Gamhanan, ug Soberanong Ginoo, gusto niyang makig-estorya ta niya gamit ang mabinationg pulong nga “Amahan.” (Mat. 6:9) Makapalipay gyod nga gusto ni Jehova nga mobati tang suod kaniya! Haom lang nga tawgon natong “Amahan” si Jehova kay siya ang Tuboran sa atong kinabuhi. (Sal. 36:9) Kay siya man ang atong Amahan, responsibilidad nato nga sundon siya. Kon atong buhaton ang iyang gipabuhat kanato, matagamtam nato ang nindot nga mga panalangin. (Heb. 12:9) Apil sa maong mga panalangin ang walay kataposang kinabuhi, sa langit man o sa yuta. w20.02 2-3 ¶1-3

Gusto natong tabangan ang atong Bible study nga mouswag sa espirituwal. (Efe. 4:13) Dihang ang usa mosugot nga magpa-Bible study, tingali naghunahuna lang siya kon sa unsang paagi kana makatabang kaniya. Pero samtang magkalawom ang iyang gugma kang Jehova, lagmit maghunahuna na siya kon unsaon niya pagtabang sa uban, apil niadtong sakop sa kongregasyon. (Mat. 22:37-39) Kon haom na sa panahon, ayaw pagduhaduha sa pagsulti kaniya bahin sa pribilehiyo sa paghatag ug donasyon para sa buluhaton sa Gingharian. Tudloi ang imong Bible study kon unsay himoon dihang motungha ang mga problema. Ibutang ta nga ang imong Bible study, nga usa na ka di bawtismadong magmamantala, miingon nga dunay nakapasilo niya sa kongregasyon. Imbes modapig, mahimo nimong ipatin-aw kon unsay giingon sa Bibliya nga angay niyang himoon. Mahimo niyang pasayloon ang igsoon, o kon dili niya kayang palabyon ang nahitabo, mahimo niyang duolon ang maong igsoon sa mahigugmaong paagi sa tuyo nga ‘makabig ang igsoon.’ (Itandi ang Mateo 18:15.) Tabangi ang imong Bible study sa pag-andam kon unsay isulti. w20.01 5-6 ¶14-15

Atong ikapakita nga gipabilhan nato ang pagpasaylo ni Jehova kon kita moampo bahin niini, modawat ug disiplina, ug maningkamot nga dili na himoon pag-usab ang samang mga sayop. Kon ato kanang buhaton, magmalinawon ta pag-usab. Makapadasig kaayo ang pagkahibalo nga “si Jehova duol niadtong mga dugmok ug kasingkasing; iyang luwason kadtong mga naluya ang buot.” (Sal. 34:18) Samtang magkaduol ang kataposan, lagmit mosamot ka daghan ang mga rason nga mabalaka ta. Kon mobati kag kabalaka, pag-ampo dayon kang Jehova para sa tabang. Pagkugi sa pagtuon sa Bibliya. Pagkat-on sa mga ehemplo ni Ana, apostol Pablo, ug Haring David. Hangyoa ang imong langitnong Amahan nga tabangan ka sa pag-ila sa hinungdan sa imong kabalaka. (Sal. 139:23) Itugyan kaniya ang imong mga kabalaka, ilabina maylabot sa mga butang nga wala kaayo o wala gyod kay mahimo. Kon imo nang himoon, mahisama ka sa salmista nga miawit kang Jehova: “Dihang nalumsan ko sa mga kabalaka, ang imong paghupay nakapalipay kanako.”​—Sal. 94:19. w20.02 24 ¶17; 25 ¶20-21

Ang Gregong pulong nga gihubad ug “gisulat pinaagi sa paggiya sa Diyos” sa literal nagpasabot ug “gihuypan sa Diyos.” Gigamit sa Diyos ang iyang espiritu aron ibutang ang iyang hunahuna sa hunahuna sa mga magsusulat sa Bibliya. Dihang atong basahon ang Bibliya ug pamalandongon ang atong nabasa, ang mga instruksiyon sa Diyos mosulod sa atong hunahuna ug kasingkasing. Kini magpalihok kanato sa pagpahiuyon sa atong kinabuhi sa kabubut-on sa Diyos. (Heb. 4:12) Pero aron bug-os nga makabenepisyo sa balaang espiritu, kinahanglan tang maggahin ug panahon para sa regular nga pagtuon sa Bibliya ug pagpamalandong sa atong nabasa. Dayon, ang Pulong sa Diyos mag-impluwensiya sa tanan natong isulti ug buhaton. Dugang pa, kinahanglang makig-uban ta sa mga igsoon sa pagsimba sa Diyos. (Sal. 22:22) Ang espiritu ni Jehova anaa sa atong mga tigom. (Pin. 2:29) Dihang magtigom ta uban sa mga igsoon sa pagsimba sa Diyos, kita nag-ampo alang sa balaang espiritu, nagkantag mga awit sa Gingharian nga gibase sa Pulong sa Diyos, ug naminaw sa binase sa Bibliyang mga instruksiyon nga gipahayag sa mga brader nga gitudlo sa balaang espiritu. Aron bug-os makabenepisyo sa balaang espiritu, kinahanglan tang mangandam aron makakomento sa mga tigom. w19.11 11 ¶13-14