Disyembre

Kon dili nato kontrolahon ang atong pagsulti, lagmit moresulta nig grabeng kadaot. Pananglitan, kon duna kay makaila nga nagpuyo sa lugar diin gidili ang atong buluhaton, pangutan-on ba nimo siya sa mga kahikayan sa atong buluhaton nianang nasora? Segurado nga maayo kag motibo. Gihigugma nato ang atong mga igsoon ug interesado ta sa nagakahitabo kanila. Gusto sab nato nga mahimong espesipiko sa atong pag-ampo bahin kanila. Pero niining panahona, kinahanglan natong pugngan ang pagsulti. Kon atong pugson ang usa sa pagsultig kompidensiyal nga impormasyon, wala ta magpakitag gugma kaniya ug sa mga igsoon kinsa nagsalig nga dili siya mosulti bahin sa ilang buluhaton. Segurado nga dili nato gustong dugangan ang kalisdanan sa mga igsoon nga nagpuyo sa mga nasod diin gidili ang atong buluhaton. Sa susama, dili gayod isulti sa mga igsoon sa maong mga lugar ang mga detalye kon giunsa paghimo sa mga Saksi didto ang ilang ministeryo o Kristohanong mga buluhaton. w20.03 21-22 ¶11-12

Dili katuyoan sa Diyos nga mamatay ang tawo. Pero aron mabuhi sa walay kataposan, kinahanglang sundon ni Adan ug Eva si Jehova, kinsa naghatag nilag simpleng sugo: “Kon bahin sa kahoy sa kahibalo sa maayo ug sa daotan dili ka gayod mokaon gikan niini, kay sa adlaw nga mokaon ka gikan niini mamatay ka gayod.” (Gen. 2:16, 17) Dayon, may gihimo si Satanas. Pinaagi sa bitin, gisulti niya kang Eva ang mga pulong sa teksto karong adlawa. Ikasubo, mituo si Eva sa maong bakak ug mikaon sa prutas. Sa ulahi, mikaon pod ang iyang bana. (Gen. 3:6) Niining paagiha, nagsugod ang sala ug kamatayon. (Roma 5:12) Si Adan ug Eva namatay, sumala sa giingon sa Diyos. Pero, wala mohunong si Satanas sa pagpamakak bahin sa kamatayon. Sa ulahi, nagsulti pa siyag laing mga bakak. Ang usa niana mao ang pagtulon-an nga ang lawas mamatay pero dunay bahin niini nga magpabiling buhi, tingali ingong espiritu. Ang lainlaing bersiyon sa maong bakak naglimbong sa mga tawo hangtod karon.​—1 Tim. 4:1. w19.04 14-15 ¶3-4

Ang mga bata wala pa kaayoy katakos sa paghunahuna, pagpangatarongan, o sa pag-ila ug paglikay sa kapeligrohan. Busa sayon ra silang limbongan ug abusohan. Sultian sa tig-abuso ang bata ug makadaot nga mga bakak, sama sa ideya nga ang bata maoy mabasol, nga dili isumbong ang pag-abuso, nga walay maminaw o motabang kon mosumbong siya, o nga ang seksuwal nga mga buhat tali sa hamtong ug bata maoy normal nga pagpahayag sa gugma. Dangtan pag daghang tuig una masabtan sa bata nga bakak kanang tanan. Magdako siya nga naghunahuna nga siya walay pulos, hugaw, ug dili takos higugmaon o hupayon. Busa dili ikatingala nga ang giabuso mahimong mag-antos sulod sa dugayng panahon. Nagkinabuhi ta sa kataposang mga adlaw, diin daghan ang “walay pagmahal sa isigkatawo” ug “ang mga tawong daotan ug mga impostor mosamot pa ka daotan.”​—2 Tim. 3:1-5, 13. w19.05 15 ¶7-8

Sa unsang mga paagi nanudlo si Jesus? Una, nanudlo siya pinaagi sa iyang gisulti. Puwersado ang iyang mga pulong kay kini naghisgot sa kamatuoran bahin sa Diyos, nagtudlo sa tinuod nga katuyoan sa kinabuhi, ug nagpasiugda sa Gingharian ingong solusyon sa tanang pag-antos sa tawo. (Luc. 24:19) Nagtudlo sab si Jesus pinaagig ehemplo. Sa iyang pagkinabuhi, gipakita niya sa iyang mga sumusunod kon sa unsang paagi sila angayng magkinabuhi. (Juan 13:15) Kanus-a nanudlo si Jesus? Nanudlo siya panahon sa iyang ministeryo sa yuta. (Mat. 4:23) Gibuhat sab niya kana wala madugay human siya mabanhaw. Pananglitan, nagpakita siya sa usa ka grupo sa mga tinun-an​—tingali kapig 500 ang gidaghanon—​ug gisugo sila sa ‘paghimog mga tinun-an.’ (Mat. 28:19, 20; 1 Cor. 15:6) Ingong ulo sa kongregasyon, si Jesus padayong naghatag ug instruksiyon sa iyang mga tinun-an dihang mibalik siya sa langit. Pananglitan, sa mga 96 C.E., gisugo sa Kristo si apostol Juan sa pagdasig ug pagtambag sa dinihogang mga Kristohanon.​—Col. 1:18; Pin. 1:1. w19.05 3 ¶4-5

Karon, gikinahanglan ang dakong paningkamot sa pagpanginabuhi. Daghan sa atong mga igsoon ang motrabahog daghang oras aron matagan-an ang panginahanglan sa ilang pamilya. Ang uban mogahin ug ubay-ubayng oras kada adlaw sa pagbiyahe paingon sa trabahoan ug pagpauli. Daghan ang mohimog hago nga trabaho aron masuportahan ang kaugalingon. Human sa tibuok adlawng pagtrabaho, kining kugihan nga mga igsoon kapoy na kaayo nga dili na sila makatuon. Pero ang tinuod, kinahanglan tang mangitag panahon sa seryosong pagtuon sa Pulong sa Diyos ug sa atong mga publikasyon. Nagdepende niana ang atong relasyon kang Jehova ug ang atong paglaom nga mabuhi sa walay kataposan! (1 Tim. 4:15) Ang pipila momatag sayo kada adlaw ug magtuon dihang hilom pa ang palibot ug relaks ang hunahuna. Ang uban mogahin ug pipila ka minuto inigkahapon aron sa pagtuon ug pagpamalandong, sa panahon nga walay makadisturbo nila. w19.05 26 ¶1-2

Kini nga mga kausaban dili awtomatikong mahitabo. Tingali kinahanglan tang ‘maningkamot pag-ayo’ sulod sa daghang katuigan. (2 Ped. 1:5) Kinahanglan tang maningkamot pag-ayo nga bag-ohon ang atong sulod nga pagkatawo. Ang unang importanteng paagi mao ang pag-ampo. Kinahanglan tang moampo sama sa gibuhat sa salmista: “Putlia ang akong kasingkasing, Oh Diyos, ug hatagi kog espiritu nga bag-o ug lig-on.” (Sal. 51:10) Angay natong ilhon nga kinahanglan tang magbag-o sa atong panghunahuna ug mangayog tabang kang Jehova. Ang ikaduhang importanteng paagi mao ang pagpamalandong. Sa atong pagbasa sa Pulong sa Diyos kada adlaw, kinahanglan tang mogahin ug panahon sa pagpamalandong, o paghunahuna pag-ayo, kon unsang hunahuna ug pagbati ang angay natong usbon. (Sal. 119:59; Heb. 4:12; Sant. 1:25) Angay natong susihon kon duna tay mga hunahuna ug pagbati nga naimpluwensiyahan sa kalibotanong panghunahuna. Kinahanglan nga matinud-anon natong dawaton nga duna tay mga kahuyangan ug dayon maningkamot ta nga wad-on kana. w19.06 8 ¶1; 10 ¶10; 12 ¶11-12

Dihang magdesisyon, kinahanglan kang mopilig panahon kon kanus-a nimo iimplementar ang imong desisyon ug sunda kana. Ayawg hulata nga moabot ang maayo kaayong kahimtang ayha ka molihok, kay lagmit dili gyod nâ moabot. (Eccl. 11:4) Ayawg tugoti nga mahurot ang imong panahon sa dili kaayo importanteng mga butang, nga wala na hinuon kay panahon ug kusog para sa mas importanteng mga butang. (Filip. 1:10) Kon posible, pilia ang panahon nga wala kaayoy makabalda nimo. Sultihi ang uban nga kinahanglan kang magpokus. Basig puwedeng patyon una nimo ang imong cellphone ug dili una mag-check sa imong email o sa social media. Ang resulta sa imong desisyon ikatandi nato sa destinasyon dihang magbiyahe. Kon gusto gyod kang makaabot sa imong destinasyon, mopadayon ka bisan pag kinahanglan kang moagig laing dalan tungod sa mga babag. Sa susama, kon magpokus ta sa maayong mga resulta sa atong desisyon, dili dayon ta mosurender dihang makaeksperyensiya tag mga babag.​—Gal. 6:9. w19.11 30 ¶17-18

Unsay angayng basehanan sa imong desisyon nga magpabawtismo? Ingong resulta sa imong seryosong pagtuon sa Bibliya, daghan kag nakat-onan bahin kang Jehova​—sa iyang personalidad ug mga paagi. Tungod sa imong nakat-onan bahin kaniya, ang imong kasingkasing natandog ug napalihok sa paghigugma pag-ayo kaniya. Ang imong gugma kang Jehova angay nga maoy pangunang basehanan sa imong desisyon nga magpabawtismo. Ang imong desisyon nga magpabawtismo angay sab nga ibase sa mga kamatuoran sa Bibliya nga imo nang gidawat. Tagda ang giingon ni Jesus sa dihang gihatag niya ang sugo nga maghimog mga tinun-an. (Mat. 28:19, 20) Sumala kang Jesus, kadtong magpabawtismo kinahanglang mohimo niana “sa ngalan sa Amahan ug sa Anak ug sa balaang espiritu.” Unsay gipasabot niini? Kinahanglang tibuok kasingkasing kang motuo sa mga kamatuoran sa Bibliya bahin kang Jehova; sa iyang Anak, si Jesus; ug sa balaang espiritu. Kini nga mga kamatuoran gamhanan kaayo ug mahimong makapatandog pag-ayo sa imong kasingkasing. w20.03 9 ¶8-9

Si Jehova nagpadalag mga anghel dili lang aron pasidan-an si Lot kondili aron tabangan sab siya sa pag-ikyas sa katalagman nga ipahamtang sa Sodoma. (Gen. 19:12-14, 17) Sa susama, kinahanglan tingali natong pasidan-an ang atong igsoon kon makita nato nga naa siyay ginabuhat nga iyang ikadaot. Bisan kon dili dayon niya ipadapat ang nadawat niyang tambag gikan sa Bibliya, kinahanglan tang magpailob. Sundoga ang duha ka anghel. Imbes mosurender dayon ug mopalayo sa atong igsoon, kinahanglang mangita tag praktikal nga mga paagi sa pagtabang kaniya. (1 Juan 3:18) Kinahanglan tingali nato siyang hawiran sa kamot, sa ato pa, tabangan siya sa pagpadapat sa maayong tambag nga gihatag kaniya. Puwede untang magpokus si Jehova sa kasaypanan ni Lot. Pero dili kanay iyang gihimo. Gani, sa ulahi iyang gigiyahan si apostol Pedro sa pagsulat nga si Lot maoy matarong nga tawo. (Sal. 130:3) Masundog ba nato ang panglantaw ni Jehova kang Lot? Kon magpokus ta sa maayong mga hiyas sa mga igsoon, mahimo tang mas mapailobon kanila. Lagmit mas dali nilang dawaton ang tabang nga atong itanyag. w19.06 21 ¶6-7

Kon idili sa gobyerno sa inyong nasod ang atong pagsimba, tingali maghunahuna ka kon angay ka bang mobalhin sa nasod diin may kagawasan ka sa pag-alagad kang Jehova. Personal ni nga desisyon. Sa dili pa modesisyon, mahimong konsiderahon sa usa ang gihimo sa mga Kristohanon sa unang siglo dihang gilutos sila. Ang mga tinun-an sa Jerusalem mibalhin sa lainlaing dapit sa Judea ug Samaria ug nakaabot pa gani sa Fenicia, Cipro, ug Antioquia. (Mat. 10:23; Buh. 8:1; 11:19) Pero, dihang nahitabo ang laing paglutos, si apostol Pablo midesisyon nga magpabilin sa mga lugar diin gisupak ang pagsangyaw. (Buh. 14:19-23) Unsay atong makat-onan niini? Ang matag ulo sa pamilya maoy modesisyon kon angay bang mobalhin. Sa dili pa modesisyon, angay siyang mag-ampo ug iyang konsiderahon pag-ayo ang kahimtang sa iyang pamilya ug ang maayo ug dili maayong epekto sa pagbalhin. Dili nato angayng hukman ang uban sa ilang desisyon. w19.07 10 ¶8-9

Si Jesus nagsugo nato nga ‘adtoon ang mga tawo sa tanang kanasoran ug tudloan sila aron mahimong mga tinun-an.’ (Mat. 28:19) Ug gawas pa sa pagtudlo sa Bible study kon unsay gisugo ni Jesus sa iyang mga tinun-an, kinahanglan nato siyang tabangan nga mahibalo kon unsaon pagkinabuhi ingong tinuod nga Kristohanon. Kinahanglang mapailobon tang motabang niya samtang naningkamot siya sa pagpadapat sa mga prinsipyo sa Bibliya. Ang pipila nakahimo sa pagbag-o sa ilang hunahuna ug batasan sulod lang sa pipila ka bulan; ang uban nagkinahanglag mas taas nga panahon. Ang eksperyensiya sa usa ka misyonaryo sa Peru nagpakita sa maayong resulta sa pagpailob. “Duha na ka libro ang among natun-an sa akong Bible study nga si Raúl,” matod sa misyonaryo. “Pero nag-atubang gihapon siyag dagkong problema. Gubot ang iyang kaminyoon, himalikas siya, ug way tahod niya ang iyang mga anak. Pero, tigtambongan siya sa tigom, mao nga padayon nako siyang giduaw aron tabangan siya ug ang iyang pamilya. Kapig tulo ka tuig human sa among pagkaila, mikuwalipikar siya sa bawtismo.” w19.07 15 ¶3; 19 ¶15-17

Tagda kon unsang paningkamot ang gihimo ni apostol Pablo dihang misulat siya sa mga taga-Filipos. Gipriso siya diha sa usa ka balay sa Roma. Dili siya makagawas aron mosangyaw. Bisan pa niana, puliki siya sa pagsangyaw sa mga bisita ug sa pagsulat ngadto sa lagyong kongregasyon. Nahibalo si Pablo nga, sama sa Kristo, kinahanglan siyang maningkamot pag-ayo hangtod sa kataposan. Busa, gikomparar niya ang Kristohanong kinabuhi sa usa ka lumba. (1 Cor. 9:24-27) Ang magdadagan sa usa ka lumba magpokus sa finish line ug dili magpalinga sa bisan unsa. Pananglitan kon ang lumba himoon sa siyudad, maagian sa mga magdadagan ang mga tindahan ug ang ubang butang nga posibleng makalinga nila. Sa imong hunahuna, mohunong kaha ang usa ka magdadagan aron motan-aw sa mga baligya nga gidispley? Dili, kon gusto niyang modaog! Sa lumba sa kinabuhi, dili sab ta angayng magpalinga. Kon magpokus ta sa atong tumong, nga maningkamot sama kang Pablo, atong madawat ang ganti! w19.08 3 ¶4; 4 ¶7

Dihang ipahiuyon nato ang atong kinabuhi sa mga sukdanan sa Diyos, lagmit malisdan ang atong pamilya sa pagdawat sa atong bag-ong pagtuo ug pagkinabuhi. Sagad, una nilang mamatikdan nga dili na ta moapil sa ilang relihiyosong mga selebrasyon ug sa politika. Sa sinugdan, ang pipila kanila lagmit masuko kanato. (Mat. 10:35, 36) Pero dili ta angayng maghunahuna nga dili na gyod sila mausab. Kon moundang ta sa pagtabang nila nga masabtan ang atong pagtuo, sama rag gihukman nato sila nga dili sila takos modawat sa kinabuhing walay kataposan. Wala ihatag ni Jehova kanato ang katungod nga mohukom​—gihatag nâ niya kang Jesus. (Juan 5:22) Kon mapailobon ta, basin maminaw ra ang atong pamilya. Kinahanglan tang magmalig-on pero magpakitag kaayo, bisan pag makaatubang tag mga pagsulay. (1 Cor. 4:12b) Tingali dili dayon masabtan sa atong pamilya kon unsa ka importante kanato ang pag-alagad kang Jehova. w19.08 17 ¶10, 13; 18 ¶14

“Dihang maghunahuna ko sa pagsulay nga akong nalahutay, makaingon ko nga dili gyod to nako mahimo kon ako ra.” Nakasulti ka na bag ingon niana? Daghan kanato ang nakaingon ug sama niana. Tingali imo nang nasulti human nimo palandonga kon sa unsang paagi nakalahutay ka sa grabeng sakit o sa kamatayon sa usa ka minahal. Gibati nimo nga nakalahutay ka sa matag adlaw tungod kay ang balaang espiritu ni Jehova naghatag nimog “gahom nga labaw sa kasarangan.” (2 Cor. 4:7-9) Gikinahanglan sab nato ang balaang espiritu sa pagsukol sa impluwensiya niining daotang kalibotan. (1 Juan 5:19) Dugang pa, kinahanglan tang makigbisog batok sa “daotang espiritung mga puwersa.” (Efe. 6:12) Ang balaang espiritu ni Jehova motabang kanato pinaagi sa paghatag nato sa gahom, o kusog, sa pagtuman sa atong mga responsibilidad bisan pa sa mga kalisdanan. Gibati ni apostol Pablo nga nakapadayon siya sa pag-alagad ug sa pagtuman sa iyang ministeryo bisan pa sa mga kalisdanan tungod kay misalig siya sa “gahom sa Kristo.”​—2 Cor. 12:9. w19.11 8 ¶1-3

Ang Bibliya lang ang dunay tukmang rekord nga nagpatin-aw sa gihimo ni Jesus para nimo. Ugmara ang imong gugma kang Jesus, ug molawom ang imong gugma kang Jehova. Ngano? Tungod kay hingpit nga gisundog ni Jesus ang mga hiyas sa iyang Amahan. Busa samtang magkalawom ang imong kahibalo bahin kang Jesus, magkalawom sab ang imong pagsabot ug apresasyon kang Jehova. Hunahunaa ang pagkamabination ni Jesus sa mga tinamay​—mga pobre, masakiton, ug kadtong dili makapanalipod sa kaugalingon. Hunahunaa sab ang praktikal nga tambag nga iyang gihatag nimo ug kon sa unsang paagi miuswag ang imong kinabuhi tungod sa pagsunod niana. (Mat. 5:1-11; 7:24-27) Ang imong gugma kang Jesus lagmit mas molig-on kon pamalandongon nimo pag-ayo ang paghalad niya sa iyang kinabuhi aron mapasaylo ang atong mga sala. (Mat. 20:28) Sa dihang imong masabtan nga si Jesus kinabubut-ong namatay para nimo, tingali mapalihok ka sa paghinulsol ug pagpangayog pasaylo kang Jehova. (Buh. 3:19, 20; 1 Juan 1:9) Ug sa dihang mahigugma ka kang Jesus ug kang Jehova, mas gusto nimong makig-uban sa mga tawo nga nahigugma sab kanila. w20.03 5-6 ¶10-12

Ang usa ka brader mahimong maghunahuna nga siya ang labing kuwalipikado sa usa ka asaynment. O ang usa ka asawa maghunahuna tingali, ‘Mas kuwalipikado man ang akong bana kay nianang bradera!’ Pero kon tinuod ta nga mapainubsanon, dili ta maghunahunag ingon niana. Makakat-on ta sa reaksiyon ni Moises dihang ang uban nakadawat ug pribilehiyo. Giapresyar ni Moises ang iyang asaynment sa pagpanguna sa nasod sa Israel. Unsay reaksiyon ni Moises dihang gitugotan ni Jehova ang uban sa pag-alagad uban kaniya? Wala siya masina. (Num. 11:24-29) Kon bahin sa paghukom sa katawhan, mapainubsanon niyang gitugotan ang uban nga motabang niya. (Ex. 18:13-24) Tungod niini, mas daghan na ang makatabang kang Moises sa pag-atiman sa mga kaso sa mga Israelinhon. Nagpakita ni nga mas giuna ni Moises ang kaayohan sa uban kay sa iyang mga pribilehiyo. Maayo gyod ni nga ehemplo para kanato! Atong hinumdoman nga aron mahimo tang mapuslanon kang Jehova, mas importante ang pagkamapainubsanon kay sa atong abilidad. w19.09 5-6 ¶13-14

Wala ta mahibalo sa mga rason nga ihatag unya sa mga lider sa kalibotan aron pakamatarongon ang ilang pag-atake sa Bantogang Babilonya. Tingali moingon sila nga ang relihiyosong mga organisasyon babag sa kalinaw ug pirmeng mag-apil-apil sa politika. O basin moingon sila nga ang maong mga relihiyon nakatigom ug daghang bahandi ug propidad. (Pin. 18:3, 7) Morag makataronganon nga kini nga pag-atake dili magpasabot nga ilang laglagon ang tanang membro sa maong mga relihiyon. Hinunoa, lagmit ang ilang laglagon mao ang relihiyosong mga organisasyon. Dihang malaglag na ang maong mga organisasyon, maamgohan sa kanhing mga membro niini nga gipakyas sila sa ilang mga lider ug lagmit mobulag na sila sa maong mga relihiyon. Ang paglaglag sa Bantogang Babilonya mahitabo sa mubo ra nga panahon. (Pin. 18:10, 21) Si Jehova nagsaad nga “pamub-on niya ang mga adlaw” niana nga kasakitan aron nga ang iyang “mga pinili” ug ang tinuod nga relihiyon magpabilin.​—Mar. 13:19, 20. w19.10 15 ¶4-5

Mga inahan, tingali ang inyong ginikanan dali kaayong masuko ug mosingka sa ilang mga anak. Busa tingali nagtuo mo nga normal ra ni nga pagtratar sa mga anak. Bisag nakakat-on na mo bahin sa mga sukdanan ni Jehova, tingali malisdan gihapon mo sa pagpabiling kalmado ug pagpailob sa inyong mga anak, ilabina kon dili sila mopatuo ninyo dihang gikapoy mo. (Efe. 4:31) Nianang mga panahona, importante kaayo nga mangayo mog tabang kang Jehova. (Sal. 37:5) Ang pipila ka inahan tingali nag-atubang ug laing kalisdanan​—maglisod sila sa pagpahayag sa ilang gugma sa ilang mga anak. Sila nagdako tingali sa panimalay diin ang ginikanan dili suod sa ilang mga anak. Kon mao nay imong kahimtang, ayawg sundoga ang sayop sa imong ginikanan. Ang inahan nga nagpasakop sa kabubut-on ni Jehova tingali kinahanglang mokat-on kon unsaon niya pagpahayag ang iyang gugma sa iyang mga anak. Malisdan tingali siya sa paghimog kausaban. Pero mahimo niya kini, ug makahatag kinig kaayohan kaniya ug sa iyang mga anak. w19.09 18-19 ¶19-20

Ang usa nga nagsimba kang Jehova pero naggugol sab ug daghan kaayong panahon ug kusog aron madato sama rag nag-alagad sa duha ka agalon. Wala niya ihatag kang Jehova ang eksklusibong debosyon. Sa hinapos sa unang siglo C.E., ang mga membro sa kongregasyon sa siyudad sa Laodicea nanghambog: “Dato ko ug nakabatog mga bahandi ug wala na manginahanglan ug bisan unsa pa.” Pero sa panglantaw ni Jehova ug Jesus, sila “alaot, makaluluoy, kabos, buta, ug hubo.” Gitambagan sila ni Jesus, dili tungod kay dato sila, kondili tungod kay ang ilang gugma sa bahandi nakadaot sa ilang relasyon kang Jehova. (Pin. 3:14-17) Kon atong mamatikdan nga nagsugod na pagturok sa atong kasingkasing ang tinguha sa pagpangagpas ug bahandi, kinahanglang molihok dayon ta sa pagtul-id sa atong panghunahuna. (1 Tim. 6:7, 8) Kay kon dili, ang atong kasingkasing mabahin ug dili dawaton ni Jehova ang atong pagsimba. Siya “nangayog eksklusibong debosyon.”​—Deut. 4:24. w19.10 27 ¶5-6

Ang Gregong pulong nga gihubad ug “gigiyahan” sa literal nagkahulogan ug “giagak,” o gidala. Si Lucas, ang magsusulat sa Buhat, migamit ug susamang Gregong pulong sa paghisgot bahin sa barko nga “gipadpad,” o giduso, sa hangin. (Buh. 27:15) Busa dihang miingon si apostol Pedro nga ang mga magsusulat sa Bibliya “giagak,” o gidala, siya migamit ug ekspresyon nga makapahunahuna sa mga tawo bahin sa paglawig, matod pa sa usa ka eksperto sa Bibliya. Buot ingnon ni Pedro nga samag barko nga giduso sa hangin aron makaabot sa destinasyon, ang mga propeta ug magsusulat sa Bibliya gigiyahan sa balaang espiritu aron molampos sa ilang asaynment. Ang maong eksperto miingon: “Sama rag gibukhad sa mga propeta ang ilang layag.” Gihimo ni Jehova ang kinahanglan niyang buhaton. Iyang gitagana “ang hangin,” o balaang espiritu. Ang mga magsusulat sa Bibliya mihimo sa kinahanglan nilang buhaton. Nagpagiya sila sa maong espiritu. Sama sa paborableng hangin diha sa unoson nga kadagatan, ang balaang espiritu motabang nato karon nga makalabang sa samag bagyo nga mga kalisdanan aron luwas nga makaabot sa bag-ong kalibotan nga gisaad sa Diyos. w19.11 9 ¶7-9

Usahay, madismayar ta. Pero dili nato angayng tugotan ang atong mga problema nga magdominar sa atong hunahuna. Kay kon magsige tag hunahuna niana, basin makalimtan na nato ang nindot nga paglaom nga gisaad ni Jehova. (Pin. 21:3, 4) Unya madismayar ta pag-ayo ug tungod niana maluya ta ug mohunong sa pag-alagad kang Jehova. Tagda kon sa unsang paagi nagpabiling lig-on ang pagtuo sa usa ka sister sa United States samtang nag-atiman sa iyang bana nga grabeng nasakit. Siya misulat: “Usahay ma-stress ug madismayar mi tungod sa among kahimtang, pero lig-on ang among paglaom. Mapasalamaton kaayo ko sa impormasyon nga among nadawat aron sa pagpalig-on sa among pagtuo ug pagdasig kanamo. Gikinahanglan gyod namo ni nga tambag ug pagdasig. Nakatabang ni namo nga makapadayon sa pag-alagad kang Jehova ug makalahutay.” Makat-onan nato sa giingon sa sister nga puwede natong madaog ang pagkadismayar! Sa unsang paagi? Isipa ang imong mga kalisdanan ingong pagsulay gikan kang Satanas. Ilha si Jehova ingong Tuboran sa paghupay. Ug apresyaha ang espirituwal nga pagkaon nga iyang gitagana. w19.11 16 ¶9-10

Ilabinang importante nga ipadapat sa mga ansiyano kini nga prinsipyo sa Bibliya. Nahibalo ang usa ka ansiyano nga dili niya isulti ang “kompidensiyal nga mga butang” bahin sa mga igsoon sa kongregasyon. Kon iya nang himoon, mawad-an silag pagsalig niya ug madaot ang iyang reputasyon. Kadtong dunay responsibilidad sa kongregasyon kinahanglang “dili duhay sinultihan,” o malimbongon. (1 Tim. 3:8; footnote) Buot ipasabot, dili sila manglimbong sa uban o manabi. Kon gihigugma sa ansiyano ang iyang asawa, dili niya siya pabug-atan pinaagi sa paghatag kaniyag impormasyon nga dili niya angayng mahibaloan. Ang asawa makatabang nga mamentinar ang maayong reputasyon sa iyang bana kon dili niya siya pugson sa pagsulti sa kompidensiyal nga mga butang. Sa dihang ipadapat kini sa asawa, gisuportahan niya ang iyang bana ug gitahod niya kadtong misultig kompidensiyal nga butang ngadto sa iyang bana. Labaw sa tanan, mapalipay niya si Jehova kay nakaamot siya sa kalinaw ug panaghiusa sa kongregasyon.​—Roma 14:19. w20.03 22 ¶13-14

Niadtong 1512 B.C.E., dihang ang tabernakulo gipatindog sa tiilan sa Bukid sa Sinai, gipangunahan ni Moises ang seremonyas diin giordinahan ingong mga saserdote si Aaron ug ang iyang mga anak. (Ex. 40:17; Lev. 9:1-5) Giunsa pagpakita ni Jehova ang iyang pag-uyon niining bag-ong natudlo nga mga saserdote? Samtang gipanalanginan ni Aaron ug Moises ang katawhan, si Jehova nagpadalag kalayo aron bug-os nga masunog ang halad diha sa halaran. (Lev. 9:23, 24) Unsay gipakita sa kalayo gikan sa langit? Pinaagi niana, gipakita ni Jehova nga bug-os niyang gisuportahan ang natudlo nga mga saserdote, si Aaron ug ang iyang mga anak. Dihang nakita sa mga Israelinhon kining klarong ebidensiya sa pagsuportar ni Jehova sa mga saserdote, duna gyod silay maayong rason nga bug-os nga mosuportar kanila. Nganong ang pag-uyon ni Jehova sa mga saserdote sa Israel importante kanato karon? Kay kana nga pagkasaserdote nagrepresentar sa mas maayo ug mas importante nga pagkasaserdote​—ang 144,000 nga mag-alagad uban sa Kristo sa langit. (Heb. 4:14; 8:3-5; 10:1) Sa walay duhaduha, si Jehova naggiya ug dagayang nagpanalangin sa iyang organisasyon karon. w19.11 23 ¶13-14; 24 ¶16

Samtang didto sa Corinto, si apostol Pablo miestar sa balay ni Aquila ug Priscila ug ‘mitrabaho uban kanila kay pareho man silag pangita nga mao ang paghimog tolda.’ Ang pag-ingon nga si Pablo nagtrabaho “adlaw ug gabii” wala magpasabot nga wala siyay undang-undag trabaho. May mga higayon nga dili siya manghimog tolda, sama pananglitan sa Igpapahulay. Kanang adlawa naghatag niyag kahigayonan nga makasangyaw sa mga Hudiyo, nga wala sab magtrabaho panahon sa Igpapahulay. (Buh. 13:14-16, 42-44; 16:13; 18:1-4) Si Pablo kinahanglang motrabaho, pero giseguro niya nga regular siyang makapakigbahin sa “balaang buluhaton sa maayong balita sa Diyos.” (Roma 15:16; 2 Cor. 11:23) Giawhag niya ang uban sa pagbuhat sab niana. Busa si Aquila ug Priscila maoy mga ‘isigkamagbubuhat niya sa buluhaton ni Kristo Jesus.’ (Roma 12:11; 16:3) Si Pablo nag-awhag sa mga taga-Corinto ‘nga kanunayng magmapuliki diha sa buluhaton sa Ginoo.’ (1 Cor. 15:58; 2 Cor. 9:8) Gigiyahan pa gani ni Jehova si Pablo sa pagsulat: “Kon naay dili gustong magtrabaho, ayaw siyag pakan-a.”​—2 Tes. 3:10. w19.12 5 ¶12-13

Dihang gilalang ni Jehova ang unang magtiayon, gihatagan niya silag tinguha nga makabaton ug mga anak. Pero, kinsay magdesisyon kon manganak ba ang usa ka magtiayon ug kon kanus-a sila manganak? Sa ubang kultura, gidahom nga manganak dayon ang mga bag-ong minyo. Tingali presyuron sila sa ilang pamilya ug sa uban. Si Jethro, brader nga taga-Asia, miingon, “Sa kongregasyon, ang mga magtiayong walay anak presyuron sa ubang pamilyadong mga igsoon nga manganak.” Si Jeffrey, brader nga taga-Asia sab, miingon, “Sultihan sa uban ang mga magtiayong walay anak nga walay moatiman nila inigkatigulang nila.” Pero ang magtiayon ang angayng magdesisyon kon manganak ba sila. Ila nang responsibilidad. (Gal. 6:5) Siyempre, gusto sa mga higala ug pamilya nga magmalipayon ang bag-ong minyo. Pero angayng hinumdoman sa tanan nga ang magtiayon maoy magdesisyon kon manganak ba sila.​—1 Tes. 4:11. w19.12 22 ¶1-3

Malisdan ka ba sa paghunahuna sa Diyos ingong imong Amahan? Ang uban mobati tingali nga ubos kaayo sila kon itandi kang Jehova ug dili sila importante kaniya. Magduhaduha sila nga ang Diyos nga Labing Gamhanan nagmahal kanila ingong indibiduwal. Pero, dili gusto sa atong mahigugmaong Amahan nga mobati tag ingon niana. Gihatagan ta niyag kinabuhi ug gusto niya nga masuod ta kaniya. Human isulti ni apostol Pablo kini nga kamatuoran, gipatin-aw niya sa iyang mga mamiminaw sa Atenas nga si Jehova “dili layo sa matag usa kanato.” (Buh. 17:24-29) Gusto sa Diyos nga makig-estorya ta niya sama sa usa ka bata nga makig-estorya gyod sa iyang mahigugmaon ug mapinanggaong ginikanan. Ang uban malisdan sa paghunahuna kang Jehova ingong ilang Amahan kay wala kaayo o wala gyod sila pakitaig pagmahal sa ilang tawhanong amahan. Ang usa ka sister miingon: “Sakit kaayong manulti ang akong amahan. Pagsugod nakog tuon sa Bibliya, nalisdan ko sa pagpakigsuod sa usa ka langitnong Amahan.” Mibati ba sab kag ingon niana? Kon mao, ayawg kadismayar. Sa ngadtongadto, bation sab nimo nga si Jehova ang kinamaayohang Amahan. w20.02 3 ¶4-5

Gitudloan ta ni Jesus nga bisag para nato limitado ra ang atong katakos o gamay ra tag mahimo samtang magkatigulang ta, pabilhan ni Jehova ang bisan unsa nga atong mahimo sa pag-alagad kaniya. (Sal. 92:12-15; Luc. 21:2-4) Busa pagpokus sa imong mahimo. Pananglitan, makahimo ka sa pagsangyaw bahin kang Jehova, pag-ampo para sa mga igsoon, ug pagdasig sa uban nga magpabiling matinumanon. Giisip ka ni Jehova nga iyang isigkamagbubuhat, dili tungod sa imong mahimo, kondili sa imong pagkaandam motuman kaniya. (1 Cor. 3:5-9) Mapasalamaton kaayo ta nga nagsimba ta kang Jehova nga Diyos, kinsa nagpabili gayod niadtong nag-alagad kaniya! Gilalang ta niya aron buhaton ang iyang kabubut-on, ug ang matuod nga pagsimba mao ang nakahatag natog tinuod nga katagbawan. (Pin. 4:11) Bisan tingalig isipon ta sa kalibotan nga walay pulos, dili ta ikaulaw ni Jehova. (Heb. 11:16, 38) Dihang mabug-atan ta tungod sa sakit, kalisod sa pinansiyal, o pagkatigulang, atong hinumdoman nga walay makabulag kanato sa gugma sa atong langitnong Amahan.​—Roma 8:38, 39. w20.01 18 ¶16; 19 ¶18-19

Masuklan nato ang kasina pinaagi sa pag-ugmad sa pagkamapainubsanon ug pagkakontento. Kon ang atong kasingkasing puno niining maayo nga mga hiyas, wala nay katuboan ang kasina. Ang pagkamapainubsanon makatabang nga dili ta maghunahuna nga labaw ta sa uban. Ang tawong mapainubsanon dili maghunahuna nga angayan siyang makadawat ug labaw kay sa uban. (Gal. 6:3, 4) Ang tawong kontento malipay kon unsay naa niya ug dili niya ikomparar ang iyang kaugalingon sa uban. (1 Tim. 6:7, 8) Ang tawong mapainubsanon ug kontento malipay dihang makita niya nga ang uban nakadawat ug maayong mga butang. Nagkinahanglan ta sa tabang sa balaang espiritu sa Diyos aron malikayan ang kasina ug maugmad ang pagkamapainubsanon ug pagkakontento. (Gal. 5:16; Filip. 2:3, 4) Ang balaang espiritu ni Jehova makatabang nato sa pagsusi kon unsa gyoy atong hunahuna ug motibo. Sa tabang sa Diyos, ang makadaot nga mga hunahuna ug pagbati atong mapulihag mga butang nga makapadasig.​—Sal. 26:2. w20.02 15 ¶8; 17 ¶9

Ang pagpahinungod maoy usa ka panaad ug gidahom ni Jehova nga imo ning tumanon. Busa, magpabiling suod sa kongregasyon. Ang mga igsoon sa kongregasyon mao ang imong espirituwal nga pamilya. Pinaagi sa regular nga pagtambong sa mga tigom, mas masuod ka kanila. Basaha ang Pulong sa Diyos ug palandonga kini adlaw-adlaw. (Sal. 1:1, 2) Paggahin ug panahon sa paghunahuna pag-ayo sa imong nabasa. Pinaagi niana, matandog ang imong kasingkasing. “Padayon . . . sa pag-ampo.” (Mat. 26:41) Ang imong kinasingkasing nga mga pag-ampo mas makapasuod nimo kang Jehova. “Unaha kanunay ang pagpangita sa Gingharian.” (Mat. 6:33) Mahimo nimo kana kon himoon nimong prayoridad ang buluhatong pagsangyaw. Pinaagi sa regular nga pagsangyaw, padayong molig-on ang imong pagtuo. Ang bisan unsang kalisdanan nga imong maatubang niining daan nga kalibotan “kadiyot lang ug gaan.” (2 Cor. 4:17) Pero, ang imong pagpahinungod ug pagpabawtismo magbukas sa dalan ngadto sa mas malipayong kinabuhi karon ug sa “tinuod nga kinabuhi” sa umaabot. Angayan ba kana sa imong paglahutay ug pagsakripisyo? Oo!​—1 Tim. 6:19. w20.03 13 ¶19-21

Kon ang imong Bible study walay ginahimong mga kausaban, tingali moabot ang panahon nga kinahanglang pangutan-on nimo ang imong kaugalingon, ‘Angay ba nakong undangon ang pag-study?’ Sa dili pa ka modesisyon, pangutan-a ang kaugalingon: ‘Duna ba siyay pag-uswag nga haom sa iyang kahimtang?’ ‘Nagsugod na ba siya “sa pagtuman,” o pagpadapat, sa iyang nakat-onan?’ (Mat. 28:20) Makapaguol, ang ubang Bible study parehas sa mga Israelinhon sa panahon ni Ezequiel. Bahin kanila, si Jehova miingon kang Ezequiel: “Tan-awa! Alang kanila nahisama kag awit sa gugma, nga giawit sa usa nga nindot ug tingog ug maayong pagkaduyog sa dekuwerdas nga instrumento. Sila mamati sa imong mga pulong, apan walay usa nga mobuhat niini.” (Ezeq. 33:32) Maglisod tingali tag ingon sa atong Bible study nga undangon na nato ang pagtuon. Pero “ang panahong nabilin mubo na.” Imbes gamiton ang atong panahon sa pag-study niadtong walay pag-uswag, kinahanglan natong pangitaon kadtong nagpakitag ebidensiya nga sila “nakiling sa pagdawat sa kamatuoran nga motultol sa kinabuhing walay kataposan.”​—Buh. 13:48. w20.01 6 ¶17; 7 ¶20

Sagad, ang Kakristiyanohan wala magtudlo sa kamatuoran sa Bibliya nga sa umaabot ang matinumanong mga tawo magpuyo sa yuta hangtod sa hangtod. (2 Cor. 4:3, 4) Karon, ang kadaghanang relihiyon sa Kakristiyanohan nagtudlo nga ang tanang maayong tawo moadto sa langit inigkamatay nila. Pero lahi ang gitudlo sa gamayng grupo sa mga Estudyante sa Bibliya nga nagpatik sa Watch Tower sukad sa 1879. Ilang nasabtan nga ipasig-uli sa Diyos ang Paraiso sa yuta ug milyonmilyon nga matinumanong mga tawo ang magpuyo dinhi sa yuta​—dili sa langit. Pero milabay pa ang panahon una nila masabti kon kinsa gyod ning matinumanong mga tawo. Siyempre, nasabtan sab sa mga Estudyante sa Bibliya gikan sa Kasulatan nga dunay ‘paliton gikan sa yuta’ aron magmando uban ni Jesus sa langit. (Pin. 14:3) Kanang grupoha langkoban sa 144,000 ka madasigon ug maunongong mga Kristohanon nga matinumanong nag-alagad sa Diyos samtang dinhi pa sa yuta. w19.09 27 ¶4-5