Enero

Ang pagtuo ni Timoteo gibase sa mga kamatuoran nga nakapasuod niya kang Jehova. Busa kinahanglan sab nimong tun-an ang Bibliya ug makombinsir nga tinuod ang gitudlo niini bahin kang Jehova. Aron mahimo kana, kinahanglan nimong pamatud-an sa imong kaugalingon ang labing menos tulo ka importanteng kamatuoran. Una, kinahanglang kombinsido ka nga si Jehova nga Diyos ang Maglalalang sa tanang butang. (Ex. 3:14, 15; Heb. 3:4; Pin. 4:11) Ikaduha, kinahanglang pamatud-an nimo sa imong kaugalingon nga ang Bibliya mao ang mensahe sa Diyos para sa mga tawo. (2 Tim. 3:16, 17) Ug ikatulo, kinahanglan nimong seguroon nga si Jehova dunay organisadong grupo sa katawhan nga nagsimba kaniya ubos sa pagpanguna sa Kristo, ug nga kanang grupoha mao ang mga Saksi ni Jehova. (Isa. 43:10-12; Juan 14:6; Buh. 15:14) Wala ni magpasabot nga kinahanglang mahibalo ka sa tanan bahin sa Bibliya. Angay nga ang imong tumong mao ang paggamit sa imong “gahom sa pagpangatarongan” aron mapalig-on ang imong kombiksiyon nga nabatonan nimo ang kamatuoran.—Roma 12:1. w20.07 10 ¶8-9

Kini nga tagna naghisgot bahin sa mga dulon nga may nawong sa tawo ug may gisul-ob nga “morag korona nga bulawan.” (Pin. 9:7) Ilang gisakit ang “mga tawo [mga kaaway sa Diyos] nga walay selyo sa Diyos diha sa ilang mga agtang.” Gihimo nila ni sulod sa lima ka bulan, ang kasagarang gitas-on sa kinabuhi sa dulon. (Pin. 9:4) Dayag nga kini nagtumong sa dinihogang mga alagad ni Jehova. Maisogon nilang gipahayag ang mga paghukom sa Diyos batok niining daotang sistema sa mga butang, ug ingong resulta, kadtong nagsuportar niini nga sistema mibatig grabeng kasakit. Buot bang ipasabot nga ang mga dulon sa Joel 2:7-9 lahi sa mga dulon sa Pinadayag? Oo. Sa Bibliya, usahay ang usa ka simbolo lainlaig kahulogan depende sa pagkagamit niini. Pananglitan, sa Pinadayag 5:5, si Jesus gitawag nga “Leyon sa tribo ni Juda,” pero sa 1 Pedro 5:8, ang Yawa gitawag nga “leyon nga nagngulob.” w20.04 3 ¶8; 4 ¶10

Si Agar, nga sulugoon ni Sarai, may gihimong dili maayo human siya maasawa ni Abram. Dihang nagmabdos siya, iyang gitamay si Sarai, kinsa walay anak. Gubot kaayo ang situwasyon nga sa ulahi, milayas si Agar kay gipakaulawan siya ni Sarai. (Gen. 16:4-6) Kay dili ta hingpit, maghunahuna tingali ta nga angay lang kang Agar ang nahitabo niya tungod sa iyang pagkagarbosa. Pero lahi ang hunahuna ni Jehova kang Agar. Nagpadala siyag anghel ngadto kaniya. Dihang nakita sa anghel si Agar, iyang gitabangan si Agar nga mag-usab sa iyang kinaiya ug gipanalanginan siya. Naamgohan ni Agar nga si Jehova nagtan-aw kaniya ug nahibalo sa tanan bahin sa iyang situwasyon. Tungod niana, napalihok siya sa pagtawag kang Jehova ingong “Diyos nga makakita sa tanan, . . . nga nakakita kanako.” (Gen. 16:7-13) Unsay nakita ni Jehova kang Agar? Nahibalo siya pag-ayo sa kaagi ni Agar ug sa tanang naeksperyensiyahan niini. Nahibalo si Jehova nga sayop ang pagtamay ni Agar kang Sarai, pero gikonsiderar niya ang gibati ug ang situwasyon ni Agar maong gipakitaan niya siyag kaayo. w20.04 16 ¶8-9

Si apostol Pablo miingon nga ang tanang tinuod nga Kristohanon naa sa usa ka lumba. (Heb. 12:1) Ug kitang tanan, bata man o tigulang, baskog pa o luya na, kinahanglang molahutay hangtod sa kataposan kon gusto natong madawat ang ganti nga gitanyag ni Jehova. (Mat. 24:13) Si Pablo may kagawasan sa pagtambag kay ‘natapos niya ang lumba.’ (2 Tim. 4:7, 8) Pero unsa ang lumba nga gihisgotan ni Pablo? Si Pablo maghisgot usahay ug mga butang nga ginahimo sa mga dula sa karaang Gresya aron magtudlog importanteng mga leksiyon. (1 Cor. 9:25-27; 2 Tim. 2:5) Sa daghang higayon, iyang gitandi ang kinabuhi sa usa ka Kristohanon ngadto sa pagdagan diha sa usa ka lumba. (1 Cor. 9:24; Gal. 2:2, footnote; Filip. 2:16) Ang usa mosugod sa pagdagan niini nga “lumba” dihang siya magpahinungod kang Jehova ug magpabawtismo. (1 Ped. 3:21) Makaabot siya sa finish line dihang ihatag na ni Jehova kaniya ang ganti nga kinabuhing walay kataposan.—Mat. 25:31-34, 46; 2 Tim. 4:8. w20.04 26 ¶1-3

“Ang Ginoo kasaligan, ug kamo iyang lig-onon ug panalipdan batok sa usa nga daotan.” (2 Tes. 3:3) Sa unsang paagi panalipdan ta ni Jehova? Si Jehova nagtaganag armadura nga manalipod nato sa mga pag-atake ni Satanas. (Efe. 6:13-17) Ang maong espirituwal nga armadura lig-on ug epektibo! Pero makapanalipod lang nato ang maong armadura kon atong isul-ob ang matag bahin niini—ug dili ni huboon. Pananglitan, ang bakos sa kamatuoran nagrepresentar sa mga kamatuoran diha sa Pulong sa Diyos, ang Bibliya. Nganong kinahanglan nato ning isul-ob? Tungod kay si Satanas mao “ang amahan sa bakak.” (Juan 8:44) Iya nang na-master ang pagpamakak sulod sa libolibo ka katuigan ug iyang napahisalaag ang “tibuok gipuy-ang yuta”! (Pin. 12:9) Pero ang mga kamatuoran diha sa Bibliya makatabang nato nga dili malimbongan. Unsaon nato pagsul-ob kining bakos sa kamatuoran? Mahimo nato kana pinaagi sa pagkat-on sa kamatuoran bahin kang Jehova, pagsimba kaniya “sa espiritu ug kamatuoran,” ug pagkahimong matinud-anon sa tanang butang.—Juan 4:24; Efe. 4:25; Heb. 13:18. w21.03 26-27 ¶3-5

Ang maong yuta espesyal kaayo kay diha niana gihimo ang matuod nga pagsimba. Sukad sa Pentekostes 33 C.E., ang “yuta sa Dekorasyon” dili na usa ka espesipikong dapit sa yuta. Makataronganon ni kay ang katawhan ni Jehova naa na sa tibuok kalibotan. Busa, ang “yuta sa Dekorasyon” karon mao ang paagi sa pagkinabuhi sa katawhan ni Jehova nga nag-apil sa ilang pagsimba kaniya pinaagi sa mga tigom ug sa ministeryo. Panahon sa kataposang mga adlaw, ang hari sa amihanan kadaghan misulod sa “yuta sa Dekorasyon.” Pananglitan, dihang ang Nazi Germany mao ang hari sa amihanan, ilabina panahon sa ikaduhang gubat sa kalibotan, siya misulod sa “yuta sa Dekorasyon” pinaagi sa paglutos ug pagpatay sa katawhan sa Diyos. Human sa Gubat sa Kalibotan II dihang ang Soviet Union nahimong hari sa amihanan, siya misulod sa “yuta sa Dekorasyon” pinaagi sa paglutos sa katawhan sa Diyos ug pagpugos kanila sa pagbalhin sa Siberia. w20.05 13 ¶7-8

Konsideraha ang pipila ka lalaki nga nahimong higala sa Diyos sa wala pa ang Kristohanong panahon. Ang usa ka pananglitan mao si Abraham. Siya nagpakitag lig-on kaayong pagtuo. Kapig 1,000 ka tuig human mamatay si Abraham, si Jehova nagtawag niya nga “akong higala.” (Isa. 41:8) Nagpasabot ni nga bisag patay na ang usa ka tawo, isipon gihapon siya ni Jehova ingong suod nga higala. Si Abraham buhi gihapon sa panumdoman ni Jehova. (Luc. 20:37, 38) Ang laing pananglitan mao si Job. Atubangan sa nagtigom nga mga anghel didto sa langit, si Jehova mapasigarbohon kang Job. Gitawag niya si Job ingong “tawong matarong ug may integridad, mahinadlokon sa Diyos ug nagsalikway sa pagkadaotan.” (Job 1:6-8) Ug unsay gibati ni Jehova kang Daniel, kinsa matinumanong nag-alagad kaniya sa mga 80 ka tuig diha sa nasod diin ang mga tawo wala magsimba kang Jehova? Tulo ka beses nga gipasaligan sa mga anghel ang maong tigulang nga tawo nga siya “gimahal pag-ayo” sa Diyos. (Dan. 9:23; 10:11, 19) Makaseguro ta nga gusto gyod ni Jehova nga banhawon ang iyang minahal nga mga higala nga patay na.—Job 14:15. w20.05 26-27 ¶3-4

Ang maayong estudyante makakat-on tingali sa mga balaod sa Diyos ug makaapresyar pa gani niana. Pero motuman kaha siya kang Jehova tungod sa iyang gugma Kaniya? Hinumdomi, si Eva nahibalo sa balaod sa Diyos, pero wala gyod siya mahigugma kaniya; mao pod si Adan. (Gen. 3:1-6) Busa dili lang nato basta itudlo sa uban ang matarong nga mga sugo ug sukdanan sa Diyos. Ang mga sugo ug sukdanan ni Jehova kanunayng makaayo kanato. (Sal. 119:97, 111, 112) Pero basig dili makahunahuna niana ang atong mga Bible study, gawas kon ilang makita nga gihatag ni Jehova ang maong mga sugo tungod kay gihigugma ta niya. Busa mahimo nato silang pangutan-on: “Para nimo, ngano kahang gisugo sa Diyos ang iyang mga alagad sa paghimo niini o sa paglikay niini? Unsay atong makat-onan niini bahin kaniya?” Kon atong tabangan ang atong mga Bible study sa paghunahuna bahin kang Jehova ug sa pag-ugmad ug tinuod nga gugma para sa iyang mahimayaong ngalan, mas dakog purohan nga matandog ang ilang kasingkasing. Ilang higugmaon dili lang ang mga balaod kondili si Jehova sab. Molig-on ang ilang pagtuo ug matabangan sila nga makalahutay sa lisod unya nga mga pagsulay.—1 Cor. 3:12-15. w20.06 10-11 ¶10-11

Angay tang magmapailobon kay ang mga dili aktibo nagkinahanglag panahon aron maulian sa espirituwal. Daghang dili aktibo kaniadto miadmitir nga milihok lang sila human sa balikbalik nga pagduaw sa mga ansiyano ug sa ubang igsoon sa kongregasyon. Ang sister nga si Nancy, nga taga-Southeast Asia, misulat: “Naa koy suod nga amiga sa kongregasyon nga mitabang pag-ayo nako. Giisip ko niya nga morag iyang magulang. Gipahinumdoman ko niya sa maayo namong mga eksperyensiya sa una. Mapailobon siyang maminaw dihang isulti nako ang akong gibati, ug dili siya magduhaduha sa pagtambag nako. Tinuod gyod siyang amiga kay andam siyang motabang sa tanang panahon.” Ang empatiya samag epektibong tambal; kini makaayo sa kasingkasing nga samaran. Ang pipila ka dili aktibo napasakitan kaniadto sa usa ka igsoon. Ug bisag daghang tuig na ang milabay, wala gihapon mawala ang ilang kasuko. Kini nga pagbati nakapugong nila sa pagbalik kang Jehova. Ang uban naghunahuna tingali nga biktima sila sa inhustisya. Basig nagkinahanglan silag maminaw nila ug mosabot sa ilang gibati. w20.06 26-27 ¶10-11

Sa matag higayon nga suklan nimo ang tentasyon, mahimong mas sayon ang pagbuhat kon unsay matarong. Hinumdomi sab nga ang sayop nga panglantaw niining kalibotana bahin sa sekso naggikan kang Satanas. Busa kon dili ka mokompromiso, imong ‘madaog ang usa nga daotan.’ Giila nato nga si Jehova ang may katungod nga magtakda kon unsay matawag nga sala. Ug naningkamot gyod ta nga dili mohimog sala. Pero kon makasala ta, ato kanang itug-an kang Jehova pinaagig pag-ampo. (1 Juan 1:9) Ug kon makahimo tag seryosong sala, mangayo tag tabang sa mga ansiyano, kinsa gitudlo ni Jehova sa pag-atiman kanato. (Sant. 5:14-16) Pero dili ta angayng mahasol sa nangagi natong kasaypanan. Ngano? Tungod kay gitagana sa atong mahigugmaong Amahan ang halad lukat sa iyang Anak aron mapasaylo ang atong mga sala. Dihang miingon si Jehova nga iyang pasayloon ang mahinulsolong mga makasasala, buhaton gyod nâ niya. Busa gipaposible ni Jehova nga makaalagad ta niya nga may hinlong konsensiya.—1 Juan 2:1, 2, 12; 3:19, 20. w20.07 22-23 ¶9-10

Dihay panahon nga si Jehova nag-inusara. Pero wala siya magmagul-anon. Wala siya magkinahanglag kauban aron magmalipayon. Bisan pa niana, gusto sa Diyos nga ang uban makabaton ug kinabuhi ug magmalipayon. Tungod sa gugma, si Jehova nagsugod sa paglalang. (1 Juan 4:19) Una, gilalang ni Jehova ang iyang Anak, si Jesus. Dayon, pinaagi sa iyang Anak, “ang tanang ubang butang gihimo,” apil ang milyonmilyong anghel. (Col. 1:16) Si Jesus nalipay kaayo nga makauban ang iyang Amahan sa pagtrabaho. (Prov. 8:30) Ug ang mga anghel nalipay sab. Nakasaksi sila dihang gihimo ni Jehova ug sa iyang Batid nga Magbubuhat, si Jesus, ang langit ug yuta. Unsay reaksiyon sa mga anghel? Sila “misinggit sa pagdayeg” dihang gilalang ang yuta, ug padayon silang nagdayeg kang Jehova dihang nakita nila ang uban pang butang nga iyang gilalang, ilabina ang mga tawo. (Job 38:7; Prov. 8:31, footnote) Ang matag usa niini nga mga linalang nagpakita sa gugma ug kaalam ni Jehova.—Sal. 104:24; Roma 1:20. w20.08 14 ¶1-2

Si Jehova naglalang kanato aron mahigugma ug higugmaon. Busa dihang dumtan ta, kita masakitan ug tingali mahadlok pa gani. Usa ka brader misulat: “Dihang gikulata ko sa mga sundalo, giinsulto, ug gihulga tungod kay Saksi ni Jehova ko, ako nahadlok ug naulaw.” Sakit kaayo kon dumtan ta, pero dili ni ikatingala. Si Jesus nagtagna nga kita pagadumtan. Nganong ang kalibotan nagdumot sa mga sumusunod ni Jesus? Tungod kay sama kang Jesus, kita “dili . . . bahin sa kalibotan.” (Juan 15:17-19) Busa, bisag gitahod nato ang gobyerno sa tawo, dili ta mosimba nila o sa mga simbolo sa ilang nasod. Si Jehova lang ang atong gisimba. Atong gisuportahan ang katungod sa Diyos sa pagmando sa katawhan—katungod nga gikuwestiyon ni Satanas ug sa iyang “kaliwat.” (Gen. 3:1-5, 15) Atong gisangyaw nga ang Gingharian sa Diyos mao ang bugtong paglaom sa katawhan ug sa dili madugay, kini maglaglag sa tanang supak niini. (Dan. 2:44; Pin. 19:19-21) Kana nga mensahe maayong balita para sa mga maaghop, pero dili maayong balita para sa mga daotan. w21.03 20 ¶1-2

Gihatagan ni Jehova ang mga sister ug importanteng lunà diha sa kongregasyon. Maayo silang ehemplo sa kaalam, pagtuo, kadasig, kaisog, pagkamahinatagon, ug maayong mga buhat. (Luc. 8:2, 3; Buh. 16:14, 15; Roma 16:3, 6; Filip. 4:3; Heb. 11:11, 31, 35) Malipay sab ta nga dunay daghang tigulang sa kongregasyon. Sila tingali may mga problema sa panglawas tungod sa pangedaron. Pero gihimo nila ang ilang maarangan sa ministeryo ug sa pagdasig ug pagbansay sa uban. Ug nakabenepisyo ta sa ilang mga eksperyensiya. Matahom gyod sila kang Jehova ug kanato. (Prov. 16:31) Hunahunaa sab ang mga batan-on sa atong kongregasyon. Daghan silag kalisdanan niining kalibotan nga gimandoan ni Satanas nga Yawa ug impluwensiyado sa iyang daotang mga ideya. Pero madasig ta dihang makita nato sila nga mokomento sa mga tigom, mosangyaw, ug maisogong modepensa sa ilang pagtuo. Oo, kamong mga batan-on dunay importanteng lunà sa kongregasyon ni Jehova.—Sal. 8:2. w20.08 22 ¶9-11

Dihang mosugod tag sangyaw ug magpaila ingong mga Saksi ni Jehova, posibleng makaatubang ta ug samag unos nga mga kahimtang. Tingali lutoson ta sa atong pamilya, bugalbugalan ta sa atong mga higala, ug dili paminawon ang atong mensahe. Sa unsang paagi mahimo kang mas maisogon? Una, kinahanglang kombinsido ka nga, gikan sa langit, si Jesus padayong naggiya sa buluhatong pagsangyaw. (Juan 16:33; Pin. 14:14-16) Dayon, palig-ona ang imong pagtuo sa saad ni Jehova nga iyang itagana ang imong panginahanglan. (Mat. 6:32-34) Kon mas lig-on ang imong pagtuo, mas maisogon ka. Nagpakita kag dakong pagtuo dihang imong giingnan ang imong mga kaila ug pamilya nga nagpa-Bible study ka na sa mga Saksi ni Jehova ug nagtambongan sa ilang mga tigom! Seguradong nakahimo ka nag mga kausaban sa imong panggawi ug pagkinabuhi aron masunod ang matarong nga mga sukdanan ni Jehova. Kana nagpakita sab nga duna kay pagtuo ug kaisog. Samtang padayon kang magpakitag kaisog, makasalig ka nga “si Jehova nga imong Diyos magauban kanimo bisan asa ka moadto.”—Jos. 1:7-9. w20.09 5 ¶11-12

Si Haring Asa maoy maayo kaayong ehemplo sa usa nga nagmaalamon pinaagi sa bug-os nga pagsalig kang Jehova. Siya nag-alagad kang Jehova dili lang sa panahon sa kalisdanan kondili sa panahon sab sa kalinaw. “Ang kasingkasing ni Asa bug-os ug debosyon kang Jehova sa tibuok niyang kinabuhi.” (1 Hari 15:14, footnote) Ang usa ka paagi nga si Asa nagpakita sa iyang debosyon mao ang pagwagtang sa bakak nga pagsimba sa Juda. Ang Bibliya nag-ingon nga “iyang gipanguha ang mga halaran sa langyawng mga diyos ug ang tag-as nga dapit, gidugmok ang sagradong mga haligi, ug giputol ang sagradong mga poste.” (2 Cron. 14:3, 5) Gitangtang pa gani niya ang iyang lola nga si Maaca gikan sa taas nga posisyon niini sa gingharian. Ngano? Tungod kay giawhag niini ang mga tawo sa pagsimbag idolo. (1 Hari 15:11-13) Si Asa mihimog labaw pa kay sa pagwagtang sa bakak nga pagsimba. Iyang gipalambo ang putli nga pagsimba pinaagi sa pagtabang sa gingharian sa Juda nga mobalik kang Jehova. Si Asa ug ang mga Israelinhon gipanalanginan ni Jehova ug panahon sa kalinaw. Sulod sa 10 ka tuig panahon sa pagmando ni Asa, “ang yuta may kalinaw.”—2 Cron. 14:1, 4, 6. w20.09 14 ¶2-3

Sagad ipiyal nato sa uban ang atong bililhong mga butang. Pananglitan, ideposito tingali nato ang atong kuwarta sa bangko. Kon himoon nato kana, magdahom ta nga ang atong kuwarta maampingan ug dili mawala o makawat. Gipahinumdoman ni apostol Pablo si Timoteo nga nakadawat kinig bililhong butang—ang tukmang kahibalo bahin sa katuyoan sa Diyos alang sa katawhan. Gisalig, o gipiyal, sab kang Timoteo ang pribilehiyo nga “isangyaw ang pulong” ug ‘himoon ang buluhaton sa tig-ebanghelyo.’ (2 Tim. 4:2, 5, footnote) Giawhag ni Pablo si Timoteo nga bantayan ang gisalig kaniya. Sama kang Timoteo, gipiyalan tag bililhong mga butang. Si Jehova mahigugmaong naghatag kanato ug tukmang kahibalo bahin sa bililhong mga kamatuoran nga makita diha sa iyang Pulong, ang Bibliya. Bililhon kini nga mga kamatuoran kay kini nagtudlo kanato kon sa unsang paagi makabaton ug maayong relasyon kang Jehova ug kon unsay makahatag ug tinuod nga kalipay. Kon atong dawaton ang maong mga kamatuoran ug sundon kana, dili na ta maulipon sa bakak nga mga pagtulon-an ug sa imoral nga mga buhat.—1 Cor. 6:9-11. w20.09 26 ¶1-3

Kinahanglang makita sa study ang imong kadasig ug madungog ang imong kombiksiyon bahin sa mga kamatuoran nga gitudlo sa Bibliya. Mahimong makatabang nâ niya nga maeksayted sa iyang ginatun-an. Tingali imo siyang sultihan kon sa unsang paagi ang pagsunod sa mga prinsipyo sa Bibliya nakatabang nimo. Pinaagi niana, makita niya nga ang Bibliya dunay praktikal nga giya nga makahatag sab niyag kaayohan. Panahon sa pagtuon, estoryahi ang imong study bahin sa mga igsoon nga parehas niyag problema ug milampos sa paghimog kausaban. Puwede kang mag-uban ug igsoon nga dunay personal nga eksperyensiya nga makatabang sa imong study. Tabangi ang imong study nga makita nga maayo gyong ipadapat ang mga prinsipyo sa Bibliya. Kon minyo ang imong study, nagtuon pod ba ang iyang kapikas? Kon wala, imbitaha ang kapikas nga moapil sa pagtuon. Dasiga ang imong study nga isulti sa iyang pamilya ug mga higala ang iyang nakat-onan.—Juan 1:40-45. w20.10 16 ¶7-9

Ang ginikanan ni Jesus nagtabang niya nga modako ingong inuyonan sa Diyos; ilang gisunod ang mga instruksiyon ni Jehova sa mga ginikanan. (Deut. 6:6, 7) Si Jose ug Maria nahigugma pag-ayo kang Jehova, ug prayoridad nila nga dasigon ang ilang mga anak nga ugmaron sab kana nga gugma. Si Jose ug Maria midesisyon nga regular nga mosimba kang Jehova uban ang ilang mga anak. Segurado nga tigtambongan sila sa senemanang mga tigom sa sinagoga sa Nasaret ug sa tinuig nga Paskuwa sa Jerusalem. (Luc. 2:41; 4:16) Posibleng gigamit nila ang maong mga biyahe paingon sa Jerusalem sa pagtudlo kang Jesus ug sa mga igsoon niini bahin sa kasaysayan sa katawhan ni Jehova. Samtang nagpaingon didto, tingali giadto nila ang mga lugar nga gihisgotan sa Kasulatan. Dihang nadugangan ang mga anak, tingali dili gyod sayon para kang Jose ug Maria ang pagmentinar ug maayong espirituwal nga rutina. Pero, gipanalanginan gyod sila! Ang ilang pamilya himsog kaayo sa espirituwal kay giuna nila ang pagsimba kang Jehova. w20.10 28 ¶8-9

Kon paubanon ka sa usa ka pagtuon sa Bibliya, maayo kon mangandam ka sa topiko nga tun-an. Si Dorin, usa ka espesyal payunir, miingon: “Malipay ko kon ang akong kauban mangandam para sa pagtuon, kay makahatag siyag maayong mga komento.” Dugang pa, posibleng mamatikdan sa study nga kamong duha nangandam pag-ayo, ug maghatag nig maayong ehemplo kaniya. Kon dili ka makapangandam pag-ayo, maayong mahibaloan nimo bisag ang panguna lang nga mga punto sa topiko. Ang pag-ampo maoy importanteng bahin sa usa ka pagtuon sa Bibliya, busa hunahunaa daan ang imong isulti kon paampoon ka. Pinaagi niana, ang imong pag-ampo mahimong mas espesipiko. (Sal. 141:2) Si Hanae, nga taga-Japan, nahinumdom sa mga pag-ampo sa sister nga kauban sa nagdumala niyag pagtuon. Si Hanae miingon: “Gibati nako nga suod kaayo siya kang Jehova, ug gusto kong maparehas niya. Gibati sab nako nga gimahal ko niya dihang giapil niya ang akong ngalan sa iyang mga pag-ampo.” w21.03 9-10 ¶7-8

Gipasaligan ni Jesus si apostol Pablo nga makaabot siya sa Roma. Pero, dihay pipila ka Hudiyo sa Jerusalem nga nagplanong atangan si Pablo aron patyon. Sa dihang ang komander sa militar sa Roma nga si Claudio Lisias nahibalo bahin sa plano, gitabangan niya si Pablo. Gipadala dayon ni Claudio si Pablo—uban ang daghang sundalo—ngadto sa Cesarea. Didto, si Gobernador Felix nagsugo nga “pabantayan [si Pablo] didto sa palasyo ni Herodes.” Layo na siya niadtong gustong mopatay niya. (Buh. 23:12-35) Pero si Felix gipulihan ni Festo ingong gobernador, kinsa “nagtinguhang mauyonan sa mga Hudiyo.” Nangutana siya kang Pablo: “Gusto ba nimong motungas sa Jerusalem ug hukman didto atubangan kanako?” Nahibalo si Pablo nga posibleng patyon siya didto sa Jerusalem. Siya miingon: “Moapelar ko sa Cesar!” Giingnan ni Festo si Pablo: “Sa Cesar ka miapelar; sa Cesar ka moadto.” Sa ngadtongadto, si Pablo makaabot na sa Roma—nga layo sa mga Hudiyo nga gustong mopatay niya.—Buh. 25:6-12. w20.11 13 ¶4; 14 ¶8-10

Kitang tanan makonsensiya usahay. Pananglitan, ang uban nakonsensiya tungod sa ilang nahimo sa wala pa sila makakat-on sa kamatuoran. Ang uban nakonsensiya sa mga sayop nga ilang nahimo human sila mabawtismohi. (Roma 3:23) Siyempre, gusto natong buhaton kon unsay husto. Pero, “kitang tanan mapandol sa makadaghan.” (Sant. 3:2; Roma 7:21-23) Bisag dili makapalipay ang pagbati nga makonsensiya, duna ni kaayohan. Ngano? Tungod kay makapalihok ni nato nga magbag-o ug maningkamot nga dili na usbon ang atong sayop. (Heb. 12:12, 13) Sa laing bahin, posible nga mobati tag sobrang pagkakonsensiya—nga makonsensiya gihapon bisag naghinulsol na ta ug gipakita na ni Jehova nga gipasaylo ta niya. Kanang matanga sa pagkakonsensiya makadaot. (Sal. 31:10; 38:3, 4) Busa mag-amping ta nga dili malit-agan sa sobrang pagkakonsensiya. Ngano? Tungod kay malipay kaayo si Satanas kon mohunong ta sa pag-alagad, bisag gipasaylo na ta ni Jehova.—Itandi ang 2 Corinto 2:5-7, 11. w20.11 27 ¶12-13

Ang usa ka Levihanong salmista nasina sa mga daotan ug sa mga mapahitas-on, dili tungod kay gusto niyang mohimog daotan, kondili tungod kay morag mas maayo ang ilang kinabuhi. (Sal. 73:2-9, 11-14) Morag naa nila ang tanan—kuwarta, maayong kinabuhi, ug walay mga kabalaka. Kinahanglang sundogon sa Levihanong salmista ang panglantaw ni Jehova. Dihang iya ning gihimo, wala na siya matugaw, ug malipayon na siya. Siya miingon: “Gawas [kang Jehova], wala na koy gitinguha sa yuta.” (Sal. 73:25) Sa susama, dili gyod ta angayng masina sa mga daotan nga morag malamposon sa kinabuhi. Ang ilang kalipay dili tinuod ug temporaryo lang. (Eccl. 8:12, 13) Kon masina ta nila, maluya ta, ug basig madaot pa gani ang atong relasyon kang Jehova. Busa kon masina ka sa morag malamposon nga kinabuhi sa mga daotan, buhata ang gihimo sa Levihanon. Sunda ang mahigugmaong tambag sa Diyos, ug pakig-uban niadtong nagabuhat sa kabubut-on ni Jehova. Kon higugmaon nimo si Jehova labaw kay sa bisan unsa, mabatonan nimo ang tinuod nga kalipay. Ug makapabilin ka sa dalan padulong sa “tinuod nga kinabuhi.”—1 Tim. 6:19. w20.12 19 ¶14-16

Sa dihang itugyan nimo kang Jehova ang imong mga kabalaka pinaagi sa pag-ampo, ayaw gyod kalimot sa pagpasalamat. Maayong hunahunaon ang mga panalangin nga atong nadawat, bisan dihang lisod kaayo ang atong kahimtang. Kon usahay dili nimo masulti ang imong grabeng pagbati, hinumdomi nga tubagon ni Jehova ang imong pag-ampo bisag moingon lang kag ‘Palihog tabangi ko!’ (2 Cron. 18:31) Salig sa kaalam ni Jehova, dili sa imong kaalam. Sa ikawalong siglo B.C.E., ang katawhan sa Juda nahadlok nga atakehon sa mga Asiryanhon. Kay dili nila gustong masakop sa mga Asiryanhon, nagpakitabang sila sa paganong mga Ehiptohanon. (Isa. 30:1, 2) Gipasidan-an sila ni Jehova nga ang ilang pagsalig sa mga Ehiptohanon moresultag katalagman. (Isa. 30:7, 12, 13) Pinaagi kang Isaias, gisultihan ni Jehova ang katawhan kon unsay ilang buhaton aron mobati silag tinuod nga kasegurohan. Ang propeta miingon: “Mahimo mong kusgan kon magpabilin mong kalmado ug mosalig mo” kang Jehova.—Isa. 30:15b. w21.01 3-4 ¶8-9

Ingong ganti sa ilang pagkamatinumanon, ang dinihogang mga igsoon sa Kristo mahimong mga hari ug mga saserdote uban kaniya sa langit. (Pin. 20:6) Kadtong bahin sa pamilya sa Diyos sa langit malipay gyod sa dihang madawat na sa 144,000 nga mga dinihogan ang ilang langitnong ganti. Human maghisgot si apostol Juan bahin niining 144,000 ka hari ug saserdote, nahingangha siya sa sunod niyang nakita, “usa ka dakong panon” nga naluwas sa Armagedon. Dili parehas sa unang grupo, kining ikaduha mas dako ug walay eksaktong gidaghanon. (Pin. 7:9, 10) Sila nagsul-ob ug “puting tag-as nga mga besti,” nga nagpasabot nga wala sila mahugawi sa kalibotan ni Satanas ug nagpabilin silang maunongon sa Diyos ug sa Kristo. (Sant. 1:27) Sila naninggit nga naluwas sila tungod sa gihimo ni Jehova ug Jesus, ang Kordero sa Diyos. Naggunit sab silag mga palwa sa palma, nga nagpakita nga malipayon nilang gidawat si Jesus ingong tinudlong Hari ni Jehova.—Itandi ang Juan 12:12, 13. w21.01 15-16 ¶6-7

Ang lalaki mahimong maayong ulo sa pamilya pinaagi sa pagsundog sa paagi nga gigamit ni Jehova ug Jesus ang ilang awtoridad. Pananglitan, konsideraha ang hiyas nga pagkamapainubsanon. Si Jehova ang pinakamaalamong Persona, pero maminaw siya sa opinyon sa iyang mga alagad. (Gen. 18:23, 24, 32) Si Jehova hingpit, pero sa pagkakaron, wala siya magdahom ug kahingpitan kanato. Hinunoa, iyang gitabangan ang dili hingpit nga mga tawo nga molampos sa pag-alagad kaniya. (Sal. 113:6, 7) Gani, ang Bibliya nagtawag kang Jehova ingong “magtatabang.” (Sal. 27:9; Heb. 13:6) Si Haring David miingon nga milampos lang siya sa dakong buluhaton nga gihatag kaniya tungod sa pagkamapainubsanon ni Jehova. Tagda ang ehemplo ni Jesus. Bisag siya Ginoo ug Agalon sa iyang mga tinun-an, iyang gihugasan ang ilang mga tiil. Si Jesus mismo miingon: “Naghatag kog sumbanan kaninyo, nga kon unsay akong gihimo kaninyo, angay usab ninyong himoon.” (Juan 13:12-17) Bisag duna siyay dakong awtoridad, si Jesus wala magdahom nga alagaran. Hinunoa, siya ang nag-alagad sa uban.—Mat. 20:28. w21.02 3-4 ¶8-10

Mga batan-ong brader, daghan kaayo mog mahimo. Kasagaran ninyo baskog ug lagsik. Dako kaayo mog ikatabang sa kongregasyon. Tingali nangandoy mo sa panahon nga itudlo mo ingong ministeryal nga alagad. Pero tingali, gibati ninyo nga ang uban naghunahuna nga bata pa mo ug kulag eksperyensiya maong dili pa puwedeng hatagag importanteng asaynment. Bisag batan-on pa mo, naa moy mahimo karon aron mabatonan ang pagsalig ug pagtahod sa mga igsoon sa inyong kongregasyon. Kamong mga batan-ong lalaki, duna ba moy kahanas nga magamit ninyo sa pagtabang sa uban diha sa kongregasyon? Daghan kaninyo ang duna niana. Pananglitan, namatikdan tingali ninyo nga maapresyar sa pipila ka tigulang kon tudloan sila kon unsaon paggamit ang ilang mga tablet ug ubang gadyet para sa personal nga pagtuon ug sa mga tigom. Ang inyong kahibalo niini dakog tabang sa maong mga tigulang. Sa bisan unsa nga inyong buhaton, lipaya ang inyong langitnong Amahan. w21.03 2 ¶1, 3; 7 ¶18

Bisag ang asawa mas edukado kay sa bana, responsibilidad sa bana ang pagpanguna sa pamilyahanong pagsimba ug sa ubang espirituwal nga kalihokan. (Efe. 6:4) Ang asawa kinahanglang magpasakop sa iyang bana, pero responsibilidad gihapon niya ang pag-atiman sa iyang espirituwalidad. Busa, kinahanglan siyang maggahin ug panahon para sa personal nga pagtuon ug pagpamalandong. Makatabang nâ niya nga mamentinar ang iyang gugma ug pagtahod kang Jehova ug magmalipayon sa pagpasakop niya sa iyang bana. Ang mga asawa nga nagpasakop sa ilang bana tungod sa gugma kang Jehova mas malipayon ug kontento kon itandi niadtong nagsalikway sa kahikayan ni Jehova sa pagkaulo. Sila naghatag sab ug maayong ehemplo para sa mga batan-ong lalaki ug babaye. Ug makatabang sila sa pagpalambo sa gugma ug kalinaw, dili lang sa ilang pamilya, kondili sa kongregasyon usab. (Tito 2:3-5) Karon, mga babaye ang kadaghanan niadtong maunongong nag-alagad kang Jehova.—Sal. 68:11. w21.02 13 ¶21-23

Si apostol Pablo maoy maayo kaayong ehemplo sa kaisog ug paglahutay. May mga higayon nga mibati siyag kaluya. Pero nakalahutay si Pablo kay misalig siya nga hatagan siya ni Jehova sa kusog nga iyang gikinahanglan. (2 Cor. 12:8-10; Filip. 4:13) Mabatonan nato ang maong kusog ug kaisog kon mapainubsanon natong ilhon nga gikinahanglan nato ang tabang ni Jehova. (Sant. 4:10) Makaseguro ta nga ang mga pagsulay nga atong giatubang dili silot gikan kang Jehova. Ang tinun-ang si Santiago nagpasalig kanato: “Dihang ang usa anaa sa pagsulay, dili siya angayng moingon: ‘Gisulayan ko sa Diyos.’ Kay ang Diyos dili masulayan sa pagbuhat ug daotan, ni siya mosulay kang bisan kinsa pinaagi sa pagbuhat ug daotan.” (Sant. 1:13) Kon kombinsido ta niana, mas masuod ta sa atong mahigugmaon nga langitnong Amahan. Si Jehova “dili mausab.” (Sant. 1:17) Gitabangan niya ang unang siglong mga Kristohanon nga makalahutay sa mga pagsulay, ug tabangan sab niya ang matag usa kanato karon. Kinasingkasing nga hangyoa si Jehova nga tabangan kang makabaton ug kaalam, pagtuo, ug kaisog. Tubagon niya ang imong mga pag-ampo. w21.02 31 ¶19-21

Madasig nimo ang Bible study nga nagtambongan na sa tigom pinaagi sa pagpakitag personal nga interes kaniya. (Filip. 2:4) Puwede nimo siyang komendahan sa pag-uswag nga iyang nahimo ug komostahon ang iyang pagtuon sa Bibliya, pamilya, ug trabaho. Pero likayi ang mga pangutana nga makapaulaw niya. Kini nga mga panag-estoryahay makapasuod ninyo sa usag usa. Kon mahigala nimo ang study, matabangan nimo siya nga mouswag ug magpabawtismo. Samtang ang study padayong mouswag, tabangi siya nga mobating bahin siya sa kongregasyon. Mahimo nimo kini pinaagi sa pagpakitag pagkamaabiabihon. (Heb. 13:2) Sa dihang ang Bible study mokuwalipikar na nga mahimong magmamantala, puwede nimo siyang dapiton nga mouban nimo sa ministeryo. Si Diego, usa ka magmamantala nga taga-Brazil, miingon: “Daghang brader ang nagdapit nako nga mouban nila sa ministeryo. Kini ang kinamaayohang paagi nga mailhan sila pag-ayo. Samtang gibuhat to nako, daghan kog nakat-onan, ug mas nasuod ko kang Jehova ug Jesus.” w21.03 12 ¶15-16

Gisugo ni Jesus ang iyang mga sumusunod nga higugmaon ang ilang mga kaaway. (Mat. 5:44, 45) Sayon ba nang buhaton? Dili gyod! Pero posible nâ sa tabang sa balaang espiritu sa Diyos. Apil sa bunga sa espiritu sa Diyos ang gugma maingon man ang taas nga pailob, pagkabuotan, kalumo, ug pagpugong sa kaugalingon. (Gal. 5:22, 23) Kini nga mga hiyas motabang nato sa paglahutay bisan pag gidumtan. Daghang magsusupak ang nausab tungod kay ang usa ka magtutuong bana, asawa, anak, o silingan nagpakita sa maong mga hiyas. Ug daghan kanila ang nahimo pa gani natong minahal nga mga igsoon. Busa kon nalisdan ka sa paghigugma niadtong nagdumot nimo tungod lang kay alagad ka ni Jehova, pag-ampo nga hatagan kag balaang espiritu. (Luc. 11:13) Ug magmakombinsido nga ang paagi sa Diyos mao gyod ang kinamaayohan. (Prov. 3:5-7) Ang pagdumot kusganon ug makapasakit, pero ang gugma mas kusganon. Kini makatandog sa kasingkasing. Ug kini makapalipay kang Jehova. Pero bisan pag padayon tang dumtan sa mga magsusupak, puwede gihapon tang magmalipayon. w21.03 23 ¶13; 24 ¶15, 17

Si propetang Joel nagtagna bahin sa pagsulong sa mga sundalo. (Joel 2:1, 8, 11) Si Jehova miingon nga gamiton niya ang iyang “dakong panon sa kasundalohan” (kasundalohan sa Babilonya) sa pagsilot sa masinupakong mga Israelinhon. (Joel 2:25) Ang misulong nga kasundalohan haom nga gitawag ug “taga-amihanan” kay ang mga Babilonyanhon mosulong sa Israel gikan sa amihanan. (Joel 2:20) Kana nga kasundalohan gipakasama sa organisado kaayong panon sa mga dulon. Bahin kanila, si Joel miingon: “Ang matag [sundalo] mosubay sa iyang kaugalingong dalan. . . . Moatake sila sa siyudad . . . Mosulod sila sa mga balay, moagi sila sa mga bentana samag mga kawatan.” (Joel 2:8, 9) Maimadyin ba nimo kining hitaboa? Dunay mga sundalo bisan asa. Walay katagoan. Walay makaikyas sa espada sa mga Babilonyanhon! Sama sa mga dulon, ang mga Babilonyanhon (o, mga Caldeanhon) misulong sa Jerusalem niadtong 607 B.C.E. Ang Bibliya nag-ingon: ‘Ang hari sa mga Caldeanhon wala maluoy sa batan-ong lalaki o babaye, tigulang o luyahon.’—2 Cron. 36:17. w20.04 5 ¶11-12