Pebrero

Ilha pag-ayo ang mga igsoon. Pakig-estorya nila una ug human sa tigom, pakigpartner nila sa ministeryo, ug kon posible, imbitaha silag pangaon. Kon imo nang himoon, tingali mahibaloan nimo nga ang sister nga morag dili mahigalaon maulawon diay, ang brader nga abi nimog materyalistiko mahinatagon diay kaayo, o ang pamilya nga sagad maulahi sa tigom ginalutos diay. (Job 6:29) Siyempre, dili ta angayng ‘manghilabot sa kalihokan sa ubang tawo.’ (1 Tim. 5:13) Pero maayo nga naa tay mahibaloan bahin sa atong mga igsoon ug sa mga sirkumstansiya nga nakaimpluwensiya sa ilang personalidad. Kon mailhan nimo pag-ayo ang igsoon nga imong gikalagotan, tingali mas masabtan nimo siya. Gikinahanglan ang paningkamot aron mas mailhan ang mga igsoon. Pero kon sundon nimo ang tambag sa Bibliya nga buksan pag-ayo ang imong kasingkasing, imong gisundog si Jehova, kinsa nahigugma sa “tanang matang sa tawo.”—1 Tim. 2:3, 4; 2 Cor. 6:11-13. w20.04 16-17 ¶10-12

Sa gabii una sa iyang kamatayon, gipahinumdoman ni Jesus ang iyang mga tinun-an nga higugmaon ang usag usa. Nahibalo siya nga ang nagsakripisyong gugma motabang nila sa pagpabiling nahiusa ug sa paglahutay bisan pag gidumtan sa kalibotan. Konsideraha ang ehemplo sa kongregasyon sa Tesalonica. Sukad sa pagkatukod sa maong kongregasyon, ang mga membro niini gilutos. Bisan pa niana, ang mga igsoon didto nahimong ehemplo sa matinumanong paglahutay ug gugma. (1 Tes. 1:3, 6, 7) Gidasig sila ni Pablo nga magpadayon sa pagpakitag gugma “nga mas bug-os pa.” (1 Tes. 4:9, 10) Ang gugma magpalihok nila sa paghupay sa mga naguol ug pagtabang sa mga naluya. (1 Tes. 5:14) Ilang gisunod ang instruksiyon ni Pablo, kay sa iyang ikaduhang sulat nga gisulat mga usa ka tuig sa ulahi, si Pablo miingon: “Nagkadako . . . ang inyong gugma sa usag usa.” (2 Tes. 1:3-5) Ang ilang gugma nakatabang nila sa paglahutay sa mga kalisdanan ug paglutos. w21.03 22 ¶11

Kon gusto natong makadawat sa ganti nga kinabuhing walay kataposan, kinahanglang subayon nato ang Kristohanong dalan, o paagi sa pagkinabuhi. (Buh. 20:24; 1 Ped. 2:21) Pero dili gusto ni Satanas ug niadtong nagsunod kaniya nga mosubay ta sa Kristohanong dalan sa pagkinabuhi; gusto nila nga modagan ta uban kanila. (1 Ped. 4:4) Ilang gitamay ang dalan sa kinabuhi nga atong gisubay ug sila nag-ingon nga ang dalan nga ilang gisubay mas maayo ug makahatag ug kagawasan. Pero sayop kana. (2 Ped. 2:19) Importante gyod nga pilion nato ang hustong dalan! Gusto ni Satanas nga kitang tanan mohunong sa pagdagan diha sa hiktin nga dalan “padulong sa kinabuhi” ug mobalhin sa luag nga dalan nga maoy gisubay sa daghang tawo sa kalibotan. Daghan ang naa nianang dalana ug mas sayon kanang subayon. Pero kana “padulong sa kalaglagan.” (Mat. 7:13, 14) Aron makapabilin sa hustong dalan ug dili mahitipas, kinahanglang mosalig ta kang Jehova ug maminaw kaniya. w20.04 26 ¶1; 27 ¶5, 7

Sa di pa dugayng katuigan, ang Russia ug ang mga kaalyado niini misulod sab sa “yuta sa Dekorasyon.” (Dan. 11:41) Sa unsang paagi? Niadtong 2017, gidili sa Russia ang buluhaton sa katawhan ni Jehova ug gipapriso ang atong mga igsoon. Gidili sab niya ang atong mga publikasyon, apil na ang Bag-ong Kalibotang Hubad. Dugang pa, giembargo niya ang atong sangang buhatan sa Russia, maingon man ang mga Kingdom Hall ug Assembly Hall. Tungod niana, niadtong 2018, gipaila sa Nagamandong Lawas ang Russia ug ang mga kaalyado niini ingong hari sa amihanan. Pero bisan pag grabeng gilutos ang katawhan ni Jehova, wala sila makig-away sa gobyerno o maningkamot sa pag-usab niini. Hinunoa, ilang gisunod ang tambag sa Bibliya nga iampo ang “tanan nga taas ug katungdanan,” ilabina kon kadtong naa sa katungdanan maghimog mga desisyon nga makaapektar sa kagawasan sa pagsimba. w20.05 14 ¶9

Mga ginikanan, aron makombinsir ang inyong mga anak nga ilang nabatonan ang kamatuoran, kinahanglang masuod sila sa Diyos ug makombinsir nga tinuod ang gitudlo sa Bibliya. Aron matudloan ninyo ang inyong mga anak sa kamatuoran bahin sa Diyos, kinahanglang magpakita mog ehemplo pinaagi sa pagtuon pag-ayo sa Bibliya. Kinahanglang maggahin mog panahon sa pagpamalandong sa inyong nakat-onan. Kon inyo nang himoon, makatudlo mo sa inyong mga anak sa pagbuhat sab niana. Kinahanglang tudloan ninyo ang inyong mga anak sa paggamit sa mga galamiton sa pagtuon sa Bibliya, sama sa pagtudlo ninyo sa inyong Bible study. Sa pagbuhat niana, matabangan ninyo ang inyong mga anak sa paghigugma kang Jehova ug sa pagsalig sa gigamit ni Jehova sa pagtaganag espirituwal nga pagkaon—“ang matinumanon ug maalamong ulipon.” (Mat. 24:45-47) Dili igo nga tudloan lang ninyo ang inyong mga anak sa simpleng mga kamatuoran sa Bibliya. Tabangi sila sa pag-ugmad ug lig-ong pagtuo pinaagi sa pagtudlo kanila bahin sa “lawom nga mga butang sa Diyos,” nga haom sa ilang edad ug katakos.—1 Cor. 2:10. w20.07 11-12 ¶10, 12-13

Unsa ka daghang dili hingpit nga mga tawo ang nahimong suod nga higala ni Jehova? Milyonmilyon. Kining suod nga relasyon nahimong posible tungod sa ilang pagtuo sa halad lukat ni Jesus. Tungod sa halad lukat, puwede tang mahimong higala ni Jehova, magpahinungod sa atong kinabuhi kaniya, ug magpabawtismo. Dihang himoon nato kining importanteng mga lakang, maapil ta sa milyonmilyong dedikado ug bawtismadong mga Kristohanon nga nakatagamtam ug suod nga panaghigalaay sa kinalabwang Persona sa uniberso! Sa unsang paagi ikapakita nato ang atong apresasyon sa atong suod nga relasyon sa Diyos? Sama kang Abraham ug Job, kinsa nagpabiling matinumanon sa Diyos sa kapig 100 ka tuig, kita kinahanglang magpabiling matinumanon bisag unsa na ta ka dugay nga nag-alagad kang Jehova niining daang sistema. Sama kang Daniel, kinahanglan nga mas pabilhan nato ang atong suod nga relasyon sa Diyos kay sa atong kinabuhi. (Dan. 6:7, 10, 16, 22) Sa tabang ni Jehova, makalahutay ta sa bisan unsang pagsulay ug makapabiling suod kaniya.—Filip. 4:13. w20.05 27 ¶5-6

Si Haring David nakakitag minyong babaye nga naligo. Nahibalo siya sa sugo ni Jehova: ‘Ayawg tinguhaa ang asawa sa imong isigkatawo.’ (Ex. 20:17) Pero klaro nga nagpadayon siyag tan-aw. Ang iyang kasingkasing nabahin; kini nagtinguha kang Bat-seba ug nagtinguha sa pagpahimuot kang Jehova. Bisag si David dugay nang nahigugma ug nahadlok kang Jehova, siya nagpadaog sa iyang hakog nga tinguha. Tungod niana, nakahimo siyag daotan kaayo nga mga butang. Iyang gipasipalahan ang ngalan ni Jehova. Nagpahinabo sab si David ug grabeng kadaot sa inosenteng mga tawo, apil sa iyang kaugalingong pamilya. (2 Sam. 11:1-5, 14-17; 12:7-12) Gidisiplina ni Jehova si David, ug nahibalik ang iyang maayong relasyon Kaniya. (2 Sam. 12:13; Sal. 51:2-4, 17) Si David nahinumdom sa mga problema ug kagul-anan nga miresulta dihang gitugotan niya nga mabahin ang iyang kasingkasing. Ang iyang mga pulong diha sa Salmo 86:11 mahimo pong hubaron niining paagiha: “Hatagi kog kasingkasing nga wala mabahin.” Gitabangan ba ni Jehova si David nga makabaton ug kasingkasing nga bug-os, o wala mabahin? Oo, kay sa ulahi, ang Pulong ni Jehova nag-ingon nga ang kasingkasing ni David “bug-os kang Jehova nga iyang Diyos.”—1 Hari 11:4; 15:3. w20.06 11 ¶12-13

Sa Bibliya, ang gugma ni Jehova sa iyang katawhan gipakasama sa pisi. Ngano man? Konsideraha ni nga ilustrasyon: Imadyina nga hapit na kang malumos diha sa dagat ug naay miitsa nimog life jacket. Seguradong magpasalamat ka kay makatabang ni nga dili ka maunlod. Pero dili igo ang life jacket para maluwas ka. Ang tubig bugnaw, ug dili ka maluwas gawas kon makaabot ka sa sakayan. Kinahanglan nga naay moitsa nimog pisi ug mobitad nimo paingon sa sakayan. Sama sa giingon ni Jehova sa teksto karong adlawa, mahigugmaon niyang “ginabitad” ang mga Israelinhon nga mipalayo kaniya. Mao gihapon nay gibati sa Diyos niadtong miundang sa pag-alagad kaniya ug nag-atubang ug grabeng mga problema ug kabalaka. Gusto niya nga mahibalo sila nga gimahal niya sila. Gusto sab niyang mobalik sila kaniya. Ug puwede kang gamiton ni Jehova sa pagpakita sa iyang gugma kanila. Importante nga atong pasaligan ang mga dili aktibo nga gimahal sila ni Jehova ug gimahal sab nato sila. w20.06 27-28 ¶12-13

Sa dihang gipatay ang tinun-ang si Esteban, daghang Kristohanon ang mibiya sa Jerusalem ug “nagkatibulaag sa tibuok nga mga rehiyon sa Judea ug Samaria,” ug sa ulahi nakaabot pa gani sa Cipro ug Antioquia. (Buh. 7:58–8:1; 11:19) Dili gyod lalim ang mga kalisdanan nga ilang naeksperyensiyahan. Bisan pa niana, sila madasigong nagsangyaw sa maayong balita bisan asa sila miadto, ug ang mga kongregasyon natukod sa tibuok Imperyo sa Roma. (1 Ped. 1:1) Pero human niana, mas daghan pang kalisdanan ang ilang naeksperyensiyahan. Pananglitan, niadtong mga 50 C.E., ang Romanong emperador nga si Claudio nagpakanaog ug sugo nga papahawaon ang tanang Hudiyo sa Roma. Busa ang mga Hudiyo nga nahimong Kristohanon napugos pagbiya sa ilang mga balay ug pagbalhin sa laing mga lugar. (Buh. 18:1-3) Niadtong mga 61 C.E., si apostol Pablo misulat nga ang iyang mga isigka-Kristohanon gipakaulawan atubangan sa mga tawo, gipriso, ug giilogan sa ilang kabtangan. (Heb. 10:32-34) Ug sama sa uban, ang pipila ka Kristohanon pobre ug masakiton.—Roma 15:26; Filip. 2:25-27. w21.02 26-27 ¶2-4

Kon maningkamot ta sa pagpalig-on sa atong pagtuo, dili gyod ta mapugngan ni Satanas o sa iyang mga tigpaluyo sa paglakaw diha sa kamatuoran. (2 Juan 8, 9) Dahomon gyod nato nga dumtan ta sa kalibotan. (1 Juan 3:13) Si Juan nagpahinumdom kanato nga “ang tibuok kalibotan nailalom sa gahom sa usa nga daotan.” (1 Juan 5:19) Samtang magkaduol ang kataposan niining sistemaha, mas mosamot ang kasuko ni Satanas. Gawas nga naggamit siyag dili direktang mga pag-atake sama sa imoralidad ug mga bakak nga gipakaylap sa mga apostata, naggamit sab siyag direktang mga pag-atake sama sa grabeng paglutos. Si Satanas nahibalo nga mubo na lang kaayo ang nahibiling panahon sa pagpaningkamot nga mapahunong ang atong buluhatong pagsangyaw ug mapahuyang ang atong pagtuo. Busa dili ikatingala nga ang atong buluhaton, o ang pipila ka bahin niini, gidili diha sa ubang nasod. Bisan pa niana, ang atong mga igsoon sa maong mga nasod nagpadayon sa paglahutay. Gipamatud-an nila nga bisan unsa pay buhaton sa usa nga daotan, makapabilin tang matinumanon. w20.07 24 ¶12-13

Gusto ni Jehova nga ang mga tawo mabuhi sa walay kataposan diha sa nindot nga planeta nga iyang gilalang. Pero dihang si Adan ug Eva mirebelde sa ilang mahigugmaong Amahan, sila dili na puwedeng mabuhi hangtod sa hangtod. Sila ug ang ilang mga kaliwat sa ngadtongadto mamatay. (Roma 5:12) Unsay gihimo ni Jehova? Dihadiha, gisulti niya kon unsaon niya pagluwas ang katawhan. (Gen. 3:15) Ihatag ni Jehova ang iyang Anak, si Jesus, ingong halad lukat aron ang mga anak ni Adan ug Eva mahigawas gikan sa sala ug kamatayon. Pinaagi niana, mahatagan Niyag kinabuhing walay kataposan ang matag usa nga mopili sa pag-alagad Kaniya. (Juan 3:16; 1 Cor. 15:21, 22) Dihang banhawon ni Jehova pinaagi sa iyang Anak ang milyonmilyong tawo, makadahom ta nga dili sila dunganog banhaw. Ngano? Kay kon kalit nga modaghan ang mga tawo sa yuta, posibleng magkagubot. Ug si Jehova dili gyod mohimog bisan unsa nga dili organisado. Nahibalo siya nga kinahanglang organisado ang tanang butang aron dunay kalinaw.—1 Cor. 14:33. w20.08 14 ¶3; 15 ¶5

Ang study kinahanglang makasabot nga ang katuyoan sa pagtuon mao ang pagtabang kaniya nga mahimong Saksi ni Jehova. Ang sinserong Bible study anam-anam nga makakab-ot sa iyang tumong nga magpabawtismo. Una, ilhon ug higugmaon niya si Jehova ug magpakita siyag pagtuo Kaniya. (Juan 3:16; 17:3) Dayon, makigsuod siya kang Jehova ug sa mga igsoon sa kongregasyon. (Heb. 10:24, 25; Sant. 4:8) Ngadtongadto, biyaan niya ang daotang mga buhat ug maghinulsol siya sa iyang mga sala. (Buh. 3:19) Isulti sab niya sa uban ang kamatuoran. (2 Cor. 4:13) Dayon, magpahinungod siya kang Jehova ug simbolohan kana pinaagi sa pagpabawtismo. (1 Ped. 3:21; 4:2) Makapalipay gyod nang adlawa para sa tanan! Sa dihang himoon sa study ang maong mga butang, hatagi siyag kinasingkasing nga komendasyon ug dasiga siya nga padayon kanang himoon. w20.10 18 ¶12-13

Kon ikomparar nimo ang imong kaugalingon sa uban diha sa kongregasyon, basin maghunahuna ka nga dili ka bililhon. Ang pipila diha sa kongregasyon tingali maayong magtutudlo, tig-organisar, o magbalantay. Tingali mibati ka nga dili ka parehas ka maayo nila. Nagpakita ni nga mapainubsanon ug makasaranganon ka. (Filip. 2:3) Pero pagbantay. Kon kanunay nimong ikomparar ang imong kaugalingon niadtong dunay talagsaong mga katakos, basig maluya ka. Tingali mobati pa gani ka, sama sa gihisgotan ni apostol Pablo, nga wala gyod kay lunà sa kongregasyon. Si Jehova naghatag sa pipila ka Kristohanon sa unang siglo ug milagrosong mga gasa sa balaang espiritu, pero dili parehas ang mga gasa nga ilang nadawat. (1 Cor. 12:4-11) Pero ang matag Kristohanon bililhon. Karon, wala ta makadawat ug milagrosong mga gasa sa balaang espiritu, pero mao ra gihapon ang prinsipyo. Dili tingali ta parehas ug mga katakos, pero kitang tanan bililhon kang Jehova. w20.08 23 ¶13-15

Dihang mag-ampo ka alang sa kaisog, tubagon ni Jehova ang imong pag-ampo ug dili gyod ka niya pasagdan. (Buh. 4:29, 31) Naa siya kanunay aron tabangan ka. Hunahunaa kon sa unsang paagi gitabangan ka ni Jehova dihang may mga problema ka ug kon giunsa ka niya pagpalig-on aron makahimo kag mga kausaban sa imong pagkinabuhi. Ang Usa nga naggiya sa iyang katawhan latas sa Pulang Dagat seguradong makatabang nimo nga mahimong tinun-an sa Kristo. (Ex. 14:13) Batoni ang pagtuo nga susama nianang sa salmista kinsa miingon sa teksto niining adlawa. Si Jehova makatabang sab sa bag-ong mga magmamantala nga magmaisogon. Matikdi ang eksperyensiya sa sister nga si Tomoyo. Pagsugod niyag sangyaw sa balay ug balay, gisingkahan siya sa unang tagbalay nga iyang naatubang: “Dili ko ganahang makig-estorya sa mga Saksi ni Jehova!” Ug gilamba niini ang pultahan. Si Tomoyo wala mahadlok ug giingnan niya ang iyang partner: “Kadungog ka ato? Wâ pa gani ko kasulti, nahibalo na siya nga Saksi ni Jehova ko. Lipay kaayo ko!” Karon, si Tomoyo regular payunir na. w20.09 6 ¶13-14

Giingnan ni Asa ang mga tawo nga si Jehova ang ‘naghatag kanilag pahulay gikan sa tanan nilang kaaway sa palibot.’ (2 Cron. 14:6, 7) Si Asa wala maghunahuna nga kining panahon sa kalinaw maoy panahon sa pagpahayahay. Hinunoa, siya nagsugod pagtukod ug mga siyudad, paril, torre, ug ganghaan. Iyang giingnan ang katawhan sa Juda: “Kita pa ang nanag-iya sa yuta.” Unsay iyang gipasabot? Buot niyang ipasabot nga makaadto pa sila bisan asa sa ilang nasod ug makahimo sa pagpanukod kay wala pay mga kaaway. Iyang giawhag ang mga tawo nga pahimuslan kining panahon sa kalinaw. Gigamit sab ni Asa kining panahon sa kalinaw sa pagpalig-on sa iyang kasundalohan. (2 Cron. 14:8) Nagpasabot ba ni nga wala siyay pagsalig kang Jehova? Wala. Nahibalo si Asa nga iyang responsibilidad ingong hari ang pag-andam sa katawhan sa mga kalisdanan nga posible nilang maatubang. Nahibalo siya nga ang malinawong kahimtang sa Juda posibleng matapos, ug natinuod kini. w20.09 15 ¶4-5

Tungod kay gimahal sa usa ka ansiyano ang kongregasyon, maghimo tingali siyag mga balaod nga sa iyang hunahuna manalipod sa mga karnero sa Diyos. Pero, managlahi kaayo ang awtoridad sa ansiyano ug sa ulo sa pamilya. Pananglitan, gitudlo ni Jehova ang mga ansiyano ingong mga maghuhukom, ug gihatagan niya silag responsibilidad sa pagpalagpot sa dili mahinulsolong makasasala. (1 Cor. 5:11-13) Sa laing bahin, gihatagan ni Jehova ang mga ulo sa pamilya ug awtoridad nga wala niya ihatag sa mga ansiyano. Pananglitan, iyang gihatagan ug awtoridad ang ulo sa pamilya sa paghimo ug pagpatuman ug mga balaod para sa iyang pamilya. (Roma 7:2) Ang ulo sa pamilya dunay katungod nga modesisyon kon unsang orasa angayng mouli ang mga anak inigkagabii. May awtoridad sab siya sa pagdisiplina sa iyang mga anak kon dili sila mosunod sa maong balaod. (Efe. 6:1) Siyempre, ang mahigugmaong ulo sa pamilya mokonsulta sa iyang asawa sa dili pa mohimog mga balaod sa panimalay, kay silang duha “usa ka unod.”—Mat. 19:6. w21.02 16-18 ¶10-13

Ang usa ka rason kon nganong bililhon ang mga kamatuoran nga naa sa Pulong sa Diyos mao nga si Jehova nagpadayag niana ngadto lang sa mga tawong mapainubsanon nga “nakiling sa pagdawat sa kamatuoran.” (Buh. 13:48) Ilang gidawat nga ang matinumanon ug maalamong ulipon maoy nagtudlo karon sa maong mga kamatuoran. (Mat. 11:25; 24:45) Dili nato masabtan kini nga mga kamatuoran kon walay tabang, ug walay mas bililhon pa kay sa pagsabot niana. (Prov. 3:13) Gipiyal sab ni Jehova kanato ang pribilehiyo sa pagtudlo sa kamatuoran bahin kaniya ug sa iyang mga katuyoan. (Mat. 24:14) Ang mensahe nga atong gisangyaw bililhon kaayo kay kini makatabang sa mga tawo nga mahimong bahin sa pamilya ni Jehova ug maghatag kanilag kahigayonan nga mabuhi sa walay kataposan. (1 Tim. 4:16) Dako man o gamay ang atong mahimo sa ministeryo, kita nagsuportar sa labing importanteng buluhaton nga ginahimo karon. (1 Tim. 2:3, 4) Dako gyod nga pribilehiyo nga mahimong mga isigkamagbubuhat sa Diyos!—1 Cor. 3:9. w20.09 26-27 ¶4-5

Sa iyang biyahe paingon sa Roma, si apostol Pablo kadaghan nakadawat sa tabang ni Jehova pinaagi sa iyang mga isigkamagtutuo. Pananglitan, duha ka maunongong higala ni Pablo, si Aristarko ug Lucas, ang midesisyon nga mobiyahe uban kaniya paingon sa Roma. Ang Bibliya walay giingon nga gipasaligan ni Jesus si Aristarko ug Lucas nga luwas silang makaabot sa Roma. Busa gipameligro nila ang ilang kinabuhi niana nga biyahe. Pero, andam silang mohimo niana aron tabangan si Pablo. Ayha pa nila nahibaloi nga maluwas sila dihang gikusokuso sa bagyo ang ilang barko. Pagdunggo nila sa siyudad sa Sidon, gitugotan ni Julio si Pablo nga “moadto sa iyang mga higala ug makapahimulos sa ilang pag-atiman.” (Buh. 27:1-3) Ug sa ulahi, sa siyudad sa Puteoli, si Pablo ug ang iyang mga kauban ‘nakakaplag ug mga igsoon ug sila giawhag nga magpabilin sulod sa pito ka adlaw uban kanila.’ Samtang giatiman sa mga Kristohanon sa maong mga dapit ang panginahanglan ni Pablo ug sa iyang mga kauban, seguradong nakapalipay pag-ayo si Pablo kanila pinaagi sa pag-estoryag makapalig-ong mga eksperyensiya.—Itandi ang Buhat 15:2, 3. w20.11 15-16 ¶15-17

Mga igsoon, tudloi ninyo ang inyong mga anak sa pulong ug buhat nga gihigugma ninyo pag-ayo si Jehova. Hinumdomi nga ang kinalabwang regalo nga mahatag ninyo mao ang pagtabang kanila nga mahigugma kang Jehova. Tudloi sila kon sa unsang paagi mahimong regular ang ilang pagtuon, pag-ampo, pagtambong sa tigom, ug pagsangyaw. Usa kana sa labing importanteng mga leksiyon nga ikatudlo ninyo kanila. (1 Tim. 6:6) Siyempre, kinahanglang tagan-an ninyo ang inyong mga anak sa ilang materyal nga panginahanglan. (1 Tim. 5:8) Pero hinumdomi nga ang suod nga relasyon sa inyong mga anak kang Jehova, dili ang ilang materyal nga mga butang, ang makatabang nila nga maluwas sa kataposan niining daang sistema ug makaabot sa bag-ong kalibotan sa Diyos. (Ezeq. 7:19) Makapalipay gyong makita nga daghan kaayong Kristohanong ginikanan ang naghimog maayong mga desisyon nga nakatabang sa ilang mga anak nga masuod kang Jehova! Ang mga anak nga nagdako sa maong mga pamilya sagad magpadayon nianang maayo nga rutina hangtod managko sila, ug mapasalamaton sila sa ilang mga ginikanan!—Prov. 10:22. w20.10 28-29 ¶10-11

Dihay mga higayon nga si apostol Pedro nakasulti o nakahimog mga butang nga wala hunahunaa, ug iya ning gibasolan sa ulahi. Pananglitan, dihang gisultihan ni Jesus ang iyang mga apostoles nga siya mag-antos ug mamatay, gibadlong siya ni Pedro ug giingnan siya sa mga pulong sa teksto karong adlawa. (Mat. 16:21-23) Gitul-id ni Jesus si Pedro. Dihang may mga tawo nga miabot aron dakpon si Jesus, milihok dayon si Pedro ug iyang gitigbas ang dalunggan sa ulipon sa hataas nga saserdote. (Juan 18:10, 11) Gitul-id na sab ni Jesus si Pedro. Dugang pa, nanghambog si Pedro nga bisan pag ang ubang apostoles mobiya sa Kristo, dili gyod nâ niya himoon! (Mat. 26:33) Pero sobrag pagsalig si Pedro sa iyang kaugalingon. Wala madugay nianang gabhiona, nahadlok siya pag-ayo ug iyang gilimod ang iyang Agalon sa tulo ka higayon. Tungod sa grabeng kaguol, si Pedro “migawas ug mihilak pag-ayo.” (Mat. 26:69-75) Tingali naghunahuna siya kon mapasaylo pa ba siya ni Jesus. Pero wala tugoti ni Pedro nga maluya siya pag-ayo ug moundang na sa pag-alagad kang Jehova. Bisag nasipyat, naningkamot siya nga mahibalik ang iyang kadasig, ug sa ulahi kauban na sab siya sa ubang apostoles.—Juan 21:1-3; Buh. 1:15, 16. w20.12 20 ¶17-18

Ang ulo sa pamilya makapakitag pagkamapainubsanon sa daghang paagi. Pananglitan, dili siya magdahom ug kahingpitan gikan sa iyang asawa ug mga anak. Maminaw siya sa ilang opinyon ug konsiderahon kini bisag lahi ni sa iyaha. Dugang pa, ang mapainubsanong bana andam mohimo sa mga buluhaton sa balay, bisan pag sa ilang lugar giisip ni nga trabaho sa babaye. Dili nâ sayon. Ngano? “Sa among lugar,” miingon ang sister nga si Rachel, “kon ang bana motabang sa iyang asawa sa pagpanghugas sa plato o pagpanghinlo sa balay, kuwestiyonon sa iyang mga silingan ug paryente kon tinuod ba gyod siyang lalaki. Maghunahuna sila nga under siya sa iyang asawa.” Kon kana nga panghunahuna komon sa inyong dapit, hinumdomi nga gihugasan ni Jesus ang tiil sa iyang mga tinun-an bisan pag giisip kana ingong trabaho sa ulipon. Ang usa ka maayong ulo sa pamilya magtinguha, dili nga mobilib ang uban kaniya, kondili nga malipay ang iyang asawa ug mga anak. w21.02 2 ¶3; 4 ¶11

Ang maayong mga kasinatian regalo gikan kang Jehova; pero bisag unsa pa ka maayo ang atong kinabuhi kaniadto, mas maayo pa gyod ang atong kinabuhi sa bag-ong kalibotan. Mapasakitan tingali ta sa uban, pero kon magpasaylo ta, makapadayon ta sa pag-alagad kang Jehova. Ang sobrang pagkakonsensiya makapugong nato sa pag-alagad kang Jehova nga malipayon. Pero, sama kang apostol Pablo, kinahanglang kombinsido ta nga gipasaylo na ta ni Jehova. (1 Tim. 1:12-15) Duna tay paglaom nga mabuhi sa walay kataposan. Ug sa bag-ong kalibotan sa Diyos, dili na nato mahinumdoman pa ang makapaguol nga mga hitabo sa atong kinabuhi. Bahin nianang panahona, ang Bibliya nag-ingon: “Ang kanhing mga butang dili na hinumdoman.” (Isa. 65:17) Hunahunaa lang: Ang pipila kanato natigulang na sa pag-alagad kang Jehova, pero sa bag-ong kalibotan, mahibalik ta sa pagkabatan-on. (Job 33:25) Busa, magmadeterminado ta nga dili magsigeg hunahuna sa atong kinabuhi kaniadto. Hinunoa, magpokus ta sa umaabot nga bag-ong kalibotan ug buhaton ang tanan aron makapuyo ta didto! w20.11 24 ¶4; 29 ¶18-19

Unsay mahitabo sa umaabot? Panahon sa dakong kasakitan, luwason ta ni Jehova sa duha ka makapahinganghang paagi. Una, luwason niya ang iyang maunongong mga alagad dihang iyang ipahinabo nga ang mga hari sa yuta maglaglag sa Bantogang Babilonya, ang imperyo sa bakak nga relihiyon. (Pin. 17:16-18; 18:2, 4) Dayon, luwason niya ang iyang katawhan dihang laglagon niya ang nahibiling bahin sa kalibotan ni Satanas panahon sa Armagedon. (Pin. 16:14, 16) Kon magpabilin tang suod kang Jehova, si Satanas dili makapahinabo kanato ug permanenteng kadaot. Gani, siya ang makaagom ug permanenteng kadaot kay laglagon siya. (Roma 16:20) Busa isul-ob ang kompletong armadura—ug ayaw nig huboa! Ayaw pagpakiggubat nga mag-inusara. Tabangi ang imong mga igsoon. Ug sunda ang mando ni Jehova. Kon buhaton nimo kana, makasalig ka nga ang imong mahigugmaon nga langitnong Amahan magpalig-on ug manalipod kanimo.—Isa. 41:10. w21.03 30 ¶16-17

Unsaon nato pagpakita ang atong pagsalig kang Jehova? Pinaagi sa pagsunod sa giya ni Jehova. Ang Bibliya dunay daghang asoy nga nagpasiugda sa kaimportante sa pagpabiling kalmado ug pagsalig kang Jehova. Samtang tun-an nimo kini nga mga asoy, matikdi kon unsay nakatabang sa mga alagad sa Diyos sa pagpabiling kalmado bisan pa sa grabeng mga pagsupak. Pananglitan, dihang ang mga apostoles gibaoran sa korte suprema sa mga Hudiyo nga mohunong sa pagsangyaw, wala sila mahadlok. Hinunoa, sila maisogong miingon: “Kinahanglan namong sugton ang Diyos ingong magmamando imbes ang mga tawo.” (Buh. 5:29) Bisan human sila bunali, ang mga apostoles wala mahadlok. Ngano? Tungod kay nahibalo sila nga si Jehova dapig kanila. Nalipay siya kanila. Busa, nagpadayon sila sa pagsangyaw sa maayong balita. (Buh. 5:40-42) Sa susama, dihang hapit nang patyon ang tinun-ang si Esteban, siya nagpabiling malinawon ug kalmado kaayo nga ang iyang nawong nahimong “sama sa nawong sa anghel.” (Buh. 6:12-15) Ngano? Tungod kay segurado siya nga nalipay si Jehova kaniya. w21.01 4 ¶10-11

Kini nagpasabot nga duna silay hinlong konsensiya ug matarong nga baroganan atubangan kang Jehova. (Isa. 1:18) Sila dedikado, bawtismadong mga Kristohanon nga nagpakitag lig-ong pagtuo sa halad ni Jesus ug dunay suod nga relasyon kang Jehova. (Juan 3:36; 1 Ped. 3:21) Busa, sila kuwalipikado nga mobarog atubangan sa trono sa Diyos, nga maghatag kaniyag “sagradong pag-alagad adlaw ug gabii” diha sa yutan-ong bahin sa iyang espirituwal nga templo. (Pin. 7:15) Bisan karon, sila madasigong naghimo sa mas dakong bahin sa buluhatong pagsangyaw sa Gingharian ug paghimog mga tinun-an, nga nag-una sa Gingharian sa Diyos imbes sa ilang kaugalingon. (Mat. 6:33; 24:14; 28:19, 20) Ang dakong panon nga makalabang sa dakong kasakitan gipasaligan nga padayon silang atimanon sa Diyos, kay “ang Usa nga naglingkod sa trono magbuklad sa iyang tolda ibabaw kanila.” Ang saad nga dugay nang gipaabot sa ubang mga karnero nga matuman, mahitabo na gyod: “Pahiran [sa Diyos] ang matag luha sa ilang mga mata.”—Pin. 21:3, 4. w21.01 16 ¶9-10

Nalipay ta nga mahimong bahin sa pamilya ni Jehova, ug naningkamot ta nga tahoron ang kahikayan sa pagkaulo nga giestablisar ni Jehova. Gipakita sa Bibliya nga parehong gipabilhan ni Jehova ang mga babaye ug mga lalaki. Pananglitan, gipakita niini nga sa unang siglo, parehong gihatagan ni Jehova ug balaang espiritu ang mga babaye ug mga lalaki aron makahimo silag mga milagro, sama sa pagsultig lainlaing pinulongan. (Buh. 2:1-4, 15-18) Ang mga babaye ug mga lalaki gidihogan sa balaang espiritu ug may paglaom nga magmando uban sa Kristo. (Gal. 3:26-29) Ang mga babaye ug mga lalaki parehong makadawat sa ganti nga kinabuhing walay kataposan dinhi sa yuta. (Pin. 7:9, 10, 13-15) Ug sila parehong gisugo sa pagsangyaw ug pagpanudlo bahin sa maayong balita. (Mat. 28:19, 20) Pananglitan, ang basahon sa Buhat naghisgot sa usa ka sister nga ginganlag Priscila. Siya ug ang iyang bana nga si Aquila nagpatin-aw sa kamatuoran sa mas tukma nga paagi ngadto sa edukado kaayong tawo nga si Apolos.—Buh. 18:24-26. w21.02 14 ¶1; 15 ¶4

Mga ansiyano, duna moy importanteng responsibilidad sa pagtabang sa mga magmamantala nga mahimong epektibo sa ilang ministeryo, apil na sa ilang pagdumalag pagtuon sa Bibliya. Kon dunay igsoon nga maulawng modumalag pagtuon sa Bibliya kon naa ka, puwede nimo siyang ingnon nga ikaw ang modumala. Daghag mahimo ang mga ansiyano sa pagdasig sa mga nagdumalag pagtuon sa Bibliya. (1 Tes. 5:11) Tingali wala tay gidumalahag pagtuon sa Bibliya karon, pero makatabang gihapon ta sa usa ka study nga mouswag sa espirituwal. Bisag dili kita ang magsigeg estorya panahon sa pagtuon, ang atong maayong pagkaandam nga mga komento makatabang sa nagdumala sa pagtuon. Puwede tang makighigala sa mga study dihang motambong sila sa mga tigom, ug makapakita tag maayong ehemplo kanila. Ug ang mga ansiyano makadasig sa mga study pinaagi sa paggahin ug panahon kanila. Madasig pod nila ang mga nagdumalag pagtuon sa Bibliya pinaagi sa pagbansay ug paghatag kanilag komendasyon. Duna pa bay molabaw sa kalipay nga atong bation dihang makatabang ta, bisan sa gamayng paagi, sa usa ka tawo nga mahigugma ug moalagad sa atong Amahan, si Jehova? w21.03 13 ¶18-19

Gipamatud-an ni David nga siya responsable ug kasaligan. Pananglitan, sa batan-on pa siya, naghago siya aron maatiman ang mga karnero sa iyang amahan. Peligroso kadto nga asaynment. Sa ulahi, giingnan ni David si Haring Saul: “Dihang ang imong sulugoon nagbantay sa mga karnero sa iyang amahan, dihay miabot nga leyon, ug sa laing higayon dihay miabot nga oso, ug midagit kinig karnero gikan sa panon. Akong gigukod ug gihampak kini ug giluwas ang karnero gikan sa baba niini.” (1 Sam. 17:34, 35) Gibati ni David nga iyang responsibilidad ang pag-atiman sa mga karnero. Masundog sa mga batan-ong brader si David pinaagi sa pagkugi diha sa bisan unsang asaynment nga ihatag kanila. Ang batan-ong si David nakaugmad ug suod, personal nga relasyon kang Jehova. Ang maong relasyon mas importante kay sa kaisog ni David o sa iyang kahanas sa pagtugtog ug alpa. Si Jehova dili lang Diyos ni David, kondili iya pong suod nga Higala. Mga batan-ong brader, ang pinakaimportanteng butang nga inyong mahimo mao ang pagpalig-on sa inyong relasyon sa inyong langitnong Amahan. w21.03 3 ¶4-5