Marso

Dili nato gustong dumtan. Dili pod ta ganahang lutoson. Busa nganong puwede tang magmalipayon bisan pag gidumtan? Tagda ang tulo ka rason. Una, kon molahutay ta, malipay ang Diyos kanato. (1 Ped. 4:13, 14) Ikaduha, ang atong pagtuo mahimong mas dalisay ug lig-on. (1 Ped. 1:7) Ug ikatulo, madawat nato ang bililhon kaayong ganti—kinabuhing walay kataposan. (Roma 2:6, 7) Wala madugay human sa pagkabanhaw ni Jesus, naeksperyensiyahan sa mga apostoles ang kalipay nga iyang gihisgotan. Human sila bunali ug baori nga mohunong sa pagsangyaw, sila nagsadya. Ngano? “Kay giisip sila nga takos pakaulawan tungod sa . . . ngalan [ni Jesus].” (Buh. 5:40-42) Ang gugma nila sa ilang Agalon mas kusganon kay sa ilang kahadlok sa mga kaaway. Ug gipakita nila ang ilang gugma pinaagi sa pagsangyaw sa maayong balita nga ‘walay hunong.’ Daghan sa atong mga igsoon karon ang matinumanon gihapong nag-alagad bisan pa sa mga kalisdanan. Nahibalo sila nga dili kalimtan ni Jehova ang ilang mga buhat ug ang ilang gugma para sa iyang ngalan. w21.03 25 ¶18-19

Ang dinihogang mga Kristohanon wala ipanganak nga may langitnong paglaom. Ang Diyos maoy nagbutang niana sa ilang kasingkasing. Sila naghunahuna bahin sa ilang paglaom, nag-ampo bahin niini, ug naghinamhinam sa pagdawat sa ilang ganti sa langit. Wala sila mahibalo kon sama sa unsa ang ilang espirituwal nga lawas. (Filip. 3:20, 21; 1 Juan 3:2) Pero, ang nahibiling mga dinihogan naghinamhinam nga molingkod sa ilang trono sa langitnong Gingharian. Ang ubang mga karnero naghinamhinam nga mabuhi sa walay kataposan sa yuta. Mao ni natural nga tinguha sa tawo. Naghinamhinam sila sa adlaw nga makatabang sila sa paghimo sa tibuok yuta nga paraiso. Nangandoy sila sa panahon nga makatukod silag kaugalingong balay, makapananom, ug makapadakog mga anak nga hingpit ug panglawas. (Isa. 65:21-23) Eksayted silang liboton ang yuta—adtoon ang kabukiran, kalasangan, ug kadagatan—ug tun-an ang tanang butang nga gilalang ni Jehova. Labaw sa tanan, malipay silang mahibalo nga mas masuod pa sila kang Jehova. w21.01 18-19 ¶17-18

Human laglaga sa mga Babilonyanhon ang Jerusalem, ang mga tawo nakaingon: “Kini nga yuta umaw ug walay tawo ug mananap, ug gitugyan na kini sa kamot sa mga Caldeanhon.” (Jer. 32:43) Mga 200 ka tuig human isulat ang tagna ni Joel, may gipasulat pa si Jehova kang Jeremias bahin niini nga pag-atake. Siya miingon nga ang tanang Israelinhon nga naghimog daotan pangitaon gyod ug dakpon. “‘Ania, magpatawag kog daghang mangingisda,’ miingon si Jehova, ‘ug sila mangisda alang kanila. Human niana magpatawag kog daghang mangangayam, ug sila mangayam kanila sa matag bukid ug sa matag bungtod ug sa mga giwang sa dagkong bato. Bug-os nakong panimaslan ang tanan nilang kasaypanan ug sala.’” Ang kadagatan ug kalasangan dili gyod makatago sa dili mahinulsolong mga Israelinhon batok sa mosulong nga mga Babilonyanhon.—Jer. 16:16, 18. w20.04 5 ¶12-13

Sa importanteng panahon sa kinabuhi ni Lot, siya naglangaylangay sa pagtuman sa sugo ni Jehova. Tingali maghunahuna ta nga gibalewala ra o gisupak pa gani ni Lot ang sugo ni Jehova. Pero wala mohunong si Jehova sa pagtabang kaniya. “Tungod sa kaluoy ni Jehova kaniya,” gihawiran sa mga anghel ang kamot sa pamilya ug gidala sila sa gawas sa siyudad. (Gen. 19:15, 16) Tingali naluoy si Jehova kang Lot tungod sa daghang rason. Basig nagduhaduha pagbiya si Lot sa iyang balay kay nahadlok siya sa mga tawo sa gawas sa siyudad. Duna pay ubang kapeligrohan. Tingali nahibalo si Lot bahin sa duha ka hari nga nahulog sa mga bangag nga punog aspalto diha sa duol nga walog. (Gen. 14:8-12) Ingong bana ug amahan, seguradong nabalaka si Lot sa iyang pamilya. Dugang pa, dato si Lot busa posible nga duna siyay nindot nga balay sa Sodoma. (Gen. 13:5, 6) Siyempre, walay usa niana ang maayong rason nga dili dayon mosunod si Lot sa sugo ni Jehova. Pero wala magpokus si Jehova sa sayop ni Lot. Hinunoa, giisip niya siya nga “matarong.”—2 Ped. 2:7, 8. w20.04 18 ¶13-14

Mga batan-ong lalaki, kadtong nakaila ninyo sukad sa bata pa mo nagkinahanglan tingalig panahon una makaamgo nga dili na mo bata. Pero, makaseguro mo nga si Jehova wala lang magtan-aw sa inyong panggawas nga panagway. Nakaila siya kon kinsa mo ug kon unsay kaya ninyong himoon. (1 Sam. 16:7) Palig-ona ang inyong relasyon sa Diyos. Gihimo nâ ni David pinaagi sa pag-obserbar sa mga butang nga gilalang ni Jehova. Gipamalandong niya kon unsay gitudlo niini bahin sa Maglalalang. (Sal. 8:3, 4; 139:14; Roma 1:20) Ang laing butang nga inyong mahimo mao ang pagpangayog kusog kang Jehova. Pananglitan, ang pipila ba sa inyong mga eskolmet nagbugalbugal ninyo tungod kay Saksi ni Jehova mo? Kon mao, pag-ampo kang Jehova nga tabangan mo sa pag-atubang sa maong pagsulay. Ug ipadapat ang praktikal nga tambag sa iyang Pulong ug sa atong binase sa Bibliya nga mga publikasyon ug video. Matag higayon nga makita ninyo kon giunsa mo pagtabang ni Jehova nga maatubang ang usa ka pagsulay, modako ang inyong pagsalig kaniya. Dugang pa, dihang makita sa uban nga misalig mo kang Jehova, inyong mabatonan ang ilang pagsalig. w21.03 4 ¶7

Ang suod nga managhigala ganahang mag-estoryahay bahin sa ilang hunahuna ug pagbati. Ingon ba sab niana ang atong relasyon kang Jehova? Oo! Si Jehova makigsulti kanato pinaagi sa iyang Pulong, ug diha niana iyang gipadayag kanato ang iyang hunahuna ug pagbati. Kita makig-estorya kaniya pinaagi sa pag-ampo, ug ikasulti nato kaniya kon unsa gyoy atong gihunahuna ug gibati. Ingong mahigugmaong Higala, si Jehova dili lang basta maminaw sa atong mga pag-ampo, kondili tubagon sab niya kana. Usahay ang tubag moabot dayon. Sa ubang higayon, tingali kinahanglan tang magpadayon sa pag-ampo. Bisan pa niana, makasalig ta nga tubagon niya kana sa hustong panahon ug sa kinamaayohang paagi. Siyempre ang tubag sa Diyos basig lahi sa atong gidahom. Pananglitan, imbes kuhaon ang pagsulay, tingali hatagan ta niyag kaalam ug kusog aron ‘malahutay kini.’ (1 Cor. 10:13) Sa unsang paagi ikapakita nato ang atong apresasyon niining bililhon kaayong regalo, ang pag-ampo? Ang usa ka paagi mao ang pagsunod sa tambag ni Jehova nga ‘mag-ampo kanunay.’—1 Tes. 5:17. w20.05 27-28 ¶7-8

Ang mga magdadagan diha sa layog distansiya nga lumba magpokus sa ilang agian aron dili sila mapandol. Kon matumba man, sila mobangon ug mopadayon sa pagdagan. Magpokus sila, dili sa kon unsay nakapandol nila, kondili sa finish line ug sa premyo nga gilaoman nilang madaog. Sa atong lumba, kadaghan tingali tang mapandol, nga masayop sa atong isulti o buhaton. O ang kauban natong mga magdadagan makahimo tingalig mga sayop nga makapasakit kanato. Dili nâ ikatingala. Kitang tanan dili hingpit, ug nagdagan ta diha sa samang hiktin nga dalan padulong sa kinabuhi. Busa usahay “magkabanggaay” ta ug duna tay mahimo nga ‘ikareklamo’ sa uban. (Col. 3:13) Pero imbes magpokus sa kon unsay nakapandol nato, magpokus ta sa premyo sa unahan ug mopadayon sa pagdagan. Kon masuko ta ug dili na mobangon, dili ta makaabot sa finish line ug dili nato madawat ang premyo. Dugang pa, basin makababag ta sa uban nga naningkamot sa pagdagan diha sa hiktin nga dalan padulong sa kinabuhi. w20.04 26 ¶1; 28 ¶8-9

Si Daniel naghisgot sa sunodsunod nga gobyerno sa tawo nga nakaapektar sa katawhan sa Diyos. Kini nga mga gobyerno gihulagway ingong lainlaing parte sa usa ka dako kaayong metal nga estatuwa. Ang kataposang gobyerno nga gihisgotan sa tagna gihulagway ingong tiil nga gama sa puthaw nga naay sagol nga kulonon. Ang tiil nagrepresentar sa Anglo-Amerikanong Gahom sa Kalibotan. Ang maong tagna nagpakita nga kana gamando pa dihang laglagon sa Gingharian sa Diyos ang mga gobyerno sa tawo. Si apostol Juan naghisgot sab ug sunodsunod nga mga gahom sa kalibotan nga nagmando sa katawhan ni Jehova. Gihulagway ni Juan kini nga mga gobyerno ingong pintas nga mananap nga may pito ka ulo. Ang ikapitong ulo niana nga mananap nagrepresentar sa Anglo-Amerikanong Gahom sa Kalibotan. Importanteng mahibaloan kana kay wala nay laing ulo human niana. Ang ikapitong ulo niini nga mananap gamando pa dihang ang Kristo ug ang iyang langitnong kasundalohan maglaglag niana ug sa tanang bahin sa mananap.—Pin. 13:1, 2; 17:13, 14. w20.05 14 ¶11-12

Kini nga mga pulong nagpahinumdom nato sa importanteng kamatuoran: Ang Diyos, ang Tinubdan sa kinabuhi, mao sab ang Tinubdan sa gugma. Gihigugma ta ni Jehova! Tungod sa iyang gugma, kita mobating may kasegurohan, malipayon, ug kontento. Para sa mga Kristohanon, importante kaayo ang pagpakitag gugma. Kini usa ka sugo. (Mat. 22:37-40) Kon mailhan nato pag-ayo si Jehova, dili ta maglisod sa pagtuman sa unang sugo. Tungod kana kay si Jehova hingpit. Siya mahunahunaon ug maayo kaayo kanato. Pero basig maglisod tag tuman sa ikaduhang sugo. Ngano? Tungod kay ang atong mga igsoon—nga apil sa atong kinasuorang isigkatawo—dili hingpit. Busa usahay, sila tingali mosulti o mobuhat ug mga butang nga makapasakit kanato. Nahibalo si Jehova nga malisdan ta niini, busa gigiyahan niya ang pipila ka magsusulat sa Bibliya nga iapil ang espesipikong tambag kon ngano ug kon sa unsang paagi angay natong ipakita ang gugma sa usag usa. Ang usa sa maong mga magsusulat mao si apostol Juan.—1 Juan 3:11, 12. w21.01 8 ¶1-2

Bag-ohan man ta o dugay nang nag-alagad kang Jehova, kinahanglang pangutan-on nato ang atong kaugalingon, ‘Ginasuklan ba nako ang mga paningkamot ni Satanas sa pagbahin sa akong kasingkasing?’ Pananglitan, kon naa kay makita diha sa TV o Internet nga makapukaw ug imoral nga hunahuna, unsay imong himoon? Basin mangatarongan ka nga ang imong nakita dili pa man pornograpiya. Pero dili kaha nâ paagi ni Satanas nga mabahin ang imong kasingkasing? Kana nga hulagway samag atsa nga gamiton sa usa ka tawo sa pagsiak ug dakong kahoy. Iyang ipataop diha sa kahoy ang nipis ug hait nga parte sa atsa. Ug samtang magkalawom ang dulot niini, masiak ang kahoy. Dili ba ang mga hulagway nga makapukaw ug imoral nga hunahuna ikakomparar sa hait nga parte sa atsa? Ang pagtan-aw niining mga butanga morag dili ra makadaot, pero sa ngadtongadto, makabahin ni sa kasingkasing sa usa ug makaaghat niya sa paghimog sala. Busa ayaw gyod pasudla sa imong kasingkasing ang bisan unsa nga dili maayo! Padayong bug-osa ang imong kasingkasing aron mahadlok kini sa ngalan ni Jehova. w20.06 12 ¶14-15

Ang mga dili aktibo nagkinahanglan sa atong padayong tabang ug pagdasig. Sama sa nawalang anak sa ilustrasyon ni Jesus, sila tingali mibatig grabeng kasakit nga dugayng maulian. (Luc. 15:17-24) Ug tungod sa ilang mga naeksperyensiyahan sa kalibotan ni Satanas, tingali mobati sila nga dili na suod kang Jehova. Busa kinahanglang tabangan nato sila nga molig-on ang ilang pagtuo kaniya. Sa ilustrasyon bahin sa nawalang karnero, si Jesus miingon nga gipas-an sa magbalantay ang karnero ug gidala kini balik sa panon. Ang magbalantay migahin nag dakong panahon ug kusog sa pagpangita sa nawalang karnero. Pero nahibalo siya nga luya na kaayo ang karnero ug dili na niini kayang molakaw balik sa panon mao nga iya kining gipas-an. (Luc. 15:4, 5) Kinahanglan tingali tang mogahin ug panahon ug kusog sa pagtabang niadtong mga dili aktibo nga madaog ang ilang mga kahuyangan. Pero sa tabang sa espiritu ni Jehova, sa iyang Pulong, ug sa atong mga publikasyon, matabangan nato sila nga molig-on pag-usab sa espirituwal. Busa kon gihangyo ka nga mag-Bible study sa dili aktibong igsoon, dawata kana nga malipayon kon posible sa imong situwasyon. w20.06 28-29 ¶14-15

Ang matag usa kanato angayng magpakitag gugma—ang ilhanan sa tinuod nga mga Kristohanon. Pero nagkinahanglan sab tag “tukmang kahibalo ug bug-os nga pagsabot.” (Filip. 1:9) Kay kon wala ta ana, puwede tang maimpluwensiyahan sa ‘matag hangin sa pagtulon-an pinaagi sa pagpanglingla sa mga tawo,’ hasta sa mga apostata. (Efe. 4:14) Sa dihang daghan sa mga tinun-an ni Jesus ang mihunong sa pagsunod kaniya, gipahayag ni apostol Pedro ang iyang lig-ong kombiksiyon nga naa kang Jesus ang “mga pulong nga motultol sa kinabuhing walay kataposan.” (Juan 6:67, 68) Bisag niadtong panahona wala masabti ni Pedro ang tanang detalye sa maong mga pulong, nagpabilin siyang maunongon kay iyang nasabtan ang kamatuoran bahin sa Kristo. Mapalig-on sab nimo ang imong kombiksiyon nga tinuod ang gitudlo sa Bibliya. Kon buhaton nimo kana, ang imong pagtuo magpabiling lig-on bisag unsay mahitabo, ug makatabang ka sa pagpalig-on sa pagtuo sa uban.—2 Juan 1, 2. w20.07 8 ¶2; 13 ¶18

Aron matabangan nato ang atong mga igsoon sa pagpabilin diha sa kamatuoran, kinahanglan tang magmabination. (1 Juan 3:10, 11, 16, 17) Kinahanglang maghigugmaay ta dili lang sa maayong panahon kondili dihang motungha sab ang mga problema. Pananglitan, duna ba kay nailhan nga namatyag minahal ug nagkinahanglag paghupay o tabang? O duna ba kay nabalitaan nga mga igsoon nga nawad-ag kabtangan tungod sa kalamidad ug nagkinahanglag tabang aron matukod pag-usab ang ilang Kingdom Hall o balay? Ikapakita nato sa atong mga igsoon ang kalawom sa atong gugma ug pagkamabination dili lang sa pulong kondili, labaw sa tanan, sa buhat. Atong gisundog ang atong mahigugmaong langitnong Amahan sa dihang magpakita tag gugma sa usag usa. (1 Juan 4:7, 8) Ang usa ka importanteng paagi nga mapakita nato ang gugma mao ang pagpasaylo sa usag usa. Pananglitan, duna tingali nakapasakit nato pero nangayo siyag pasaylo. Mapakita nato ang gugma kon pasayloon nato siya ug kalimtan ang iyang nahimo.—Col. 3:13. w20.07 24 ¶14-15

Ang kada usa ba sa mga binanhaw dumalahag pagtuon, sama sa atong ginahimo karon? Iasayn ba silag mga kongregasyon ug bansayon sa pagtudlo niadtong mabanhaw human nila? Wala pa ta masayod. Pero nahibalo ta nga sa kataposan sa Usa ka Libo ka Tuig nga Pagmando sa Kristo, “ang yuta mapuno gayod sa kahibalo bahin kang Jehova.” (Isa. 11:9) Segurado nga malingaw gyod ta sa daghang buluhaton panahon sa usa ka libo ka tuig! Panahon sa Usa ka Libo ka Tuig nga Pagmando sa Kristo, ang tanang alagad ni Jehova sa yuta kinahanglang mohimog kausaban aron mapalipay siya. Busa silang tanan mobati gyod ug empatiya samtang tabangan nila ang mga binanhaw nga makasukol sa sayop nga hunahuna ug tinguha ug magkinabuhi sumala sa mga sukdanan ni Jehova. (1 Ped. 3:8) Walay duhaduha nga ang mga binanhaw masuod sa mapainubsanong katawhan ni Jehova, kinsa ‘maningkamot [sab] sa ilang kaugalingong kaluwasan.’—Filip. 2:12. w20.08 16 ¶6-7

Kon sundon nato ang tambag ni apostol Pablo ug susihon ang atong kaugalingon, posibleng makita nato nga duna tay mga gasa ug katakos nga wala sa uban. Pananglitan, ang usa ka ansiyano tingali dili kaayo maayong mopakigpulong, pero basin epektibo kaayo siya sa ministeryo. O tingali dili siya parehas sa ubang ansiyano nga maayo kaayong moorganisar, pero basin nailhan siya ingong mahigugmaong magbalantay nga sayon duolon sa mga igsoon para sa tambag. O kaha nailhan siya nga maabiabihon kaayo. (Heb. 13:2, 16) Kon klaro natong makita ang atong mga gasa ug katakos, malipay ta kay duna diay tay mahimo para sa kongregasyon. Ug basin dili na ta masina sa mga igsoon nga dunay mga gasa nga lahi sa atoa. Bisag unsa pay atong lunà sa kongregasyon, kitang tanan angayng maningkamot nga mouswag sa atong pag-alagad ug sa atong mga katakos. w20.08 24 ¶16-18

Ang makasaysayanhong pakigpulong nga nag-ulohang “Ang Dakong Pundok” gipahayag ni J. F. Rutherford niadtong 1935 sa usa ka kombensiyon sa Washington, D.C., U.S.A. Sa iyang pakigpulong, gipatin-aw ni Brader Rutherford kon kinsa ang mahimong bahin sa “dakong pundok” (King James Version), o “dakong panon,” nga gihisgotan sa Pinadayag 7:9. Una pa niana, kining grupoha gituohan ingong segundaryo nga langitnong matang nga dili kaayo matinumanon. Pinaagi sa Kasulatan, gipatin-aw ni Brader Rutherford nga ang dakong panon wala pilia nga mopuyo sa langit, kondili sila ang ubang mga karnero sa Kristo nga makalabang sa “dakong kasakitan” ug mabuhi sa walay kataposan sa yuta. (Pin. 7:14) Si Jesus misaad: “Ako dunay ubang mga karnero nga wala niining torila; kinahanglang giyahan usab nako sila, ug sila mamati sa akong tingog. Sila mahimong usa ka panon ubos sa usa ka magbalantay.” (Juan 10:16) Kining ubang mga karnero nagtumong sa maunongong mga Saksi ni Jehova nga may paglaom nga mabuhi sa walay kataposan sa Paraiso sa yuta.—Mat. 25:31-33, 46. w21.01 14 ¶1-2

Kita kinahanglan nga mahimong disiplinado aron makalahutay ta ug mahuman nato ang atong buluhatong pagsangyaw. (Mat. 28:19, 20) Wala ta matawo nga disiplinado. Sagad, gusto nato ang trabaho nga sayon kaayong himoon. Gikinahanglan ang pagpugong sa kaugalingon aron mahimong disiplinado. Busa nagkinahanglan tag tabang sa pagbansay sa atong kaugalingon sa paghimo sa mga butang nga lisod tingaling buhaton. Si Jehova naghatag sa maong tabang pinaagi sa iyang balaang espiritu. (Gal. 5:22, 23) Si apostol Pablo disiplinado. Pero miangkon siya nga kinahanglan niyang ‘makmakon’ ang iyang lawas aron mahimo niya kon unsay husto. (1 Cor. 9:25-27) Giawhag niya ang uban nga disiplinahon ang kaugalingon ug buhaton ang tanang butang nga “may kahapsay ug pinaagig kahikayan.” (1 Cor. 14:40) Kinahanglan tang mahimong disiplinado aron mapadayon ang maayong espirituwal nga rutina nga nag-apil sa regular nga pagpakigbahin sa buluhatong pagsangyaw.—Buh. 2:46. w20.09 6-7 ¶15-17

Sa daghang nasod karon, may kagawasan ta sa pagsangyaw. Ingon ba niana ang kahimtang sa inyong nasod? Kon mao, pangutan-a ang imong kaugalingon, ‘Giunsa nako paggamit kini nga kagawasan?’ Niining makapahinam nga kataposang mga adlaw, ang organisasyon ni Jehova naghimo sa kinadak-ang pagsangyaw ug pagpanudlo nga buluhaton sukad masukad. Daghan kaayog puwedeng buhaton ang katawhan ni Jehova. Sa unsang paagi mapahimuslan nimo ang panahon sa kalinaw? (2 Tim. 4:2) Puwede nimong konsiderahon kon ikaw o ang laing membro sa pamilya makapauswag ba sa inyong ministeryo, tingali makapayunir pa gani. Dili karon panahon sa pagtigom ug bahandi ug kabtangan—mga butang nga dili nato madala latas sa dakong kasakitan. (Prov. 11:4; Mat. 6:31-33; 1 Juan 2:15-17) Daghang magmamantala ang nagtuon ug bag-ong pinulongan aron magamit nila sa pagsangyaw ug pagpanudlo. Ang organisasyon sa Diyos nagtaganag daghang publikasyon nga makatabang nato sa pagsangyaw diha sa kapig 1,000 ka pinulongan! w20.09 16 ¶9-11

Ang usa ka maayong sundalo maunongon. Makig-away siya aron maprotektahan ang usa nga iyang gimahal o ang butang nga iyang gipabilhan. Si Pablo nagdasig kang Timoteo nga ugmaron ang iyang debosyon sa Diyos—sa ato pa, ang iyang pagkamaunongon sa Diyos. (1 Tim. 4:7) Samtang magkalawom ang atong gugma ug debosyon sa Diyos, magkadako ang atong tinguha nga panguptan ang kamatuoran. (1 Tim. 4:8-10; 6:6) Ang usa ka maayong sundalo kinahanglang duna poy disiplina sa kaugalingon aron kanunay siyang andam sa pagpakiggubat. Si Timoteo nakasukol sa impluwensiya ni Satanas kay iyang gisunod ang tambag ni Pablo nga isalikway ang daotang mga tinguha, ugmaron ang maayong mga hiyas, ug makig-uban sa mga igsoon. (2 Tim. 2:22) Nagkinahanglan nag disiplina sa kaugalingon. Gikinahanglan nato ang disiplina sa kaugalingon aron makadaog ta batok sa daotang mga tinguha. (Roma 7:21-25) Dugang pa, gikinahanglan nato ang disiplina sa kaugalingon aron mahukas nato ang daang personalidad ug masul-ob ang bag-o. (Efe. 4:22, 24) Ug dihang gikapoy ta human sa tibuok adlaw nga trabaho, kinahanglan tingali natong pugson ang atong kaugalingon sa pagtambong ug tigom.—Heb. 10:24, 25. w20.09 28 ¶9-11

Kinahanglan tang magmapailobon dihang tabangan nato ang study nga mokuwalipikar sa bawtismo. Pero, kinahanglan sab natong sayron kon gusto ba gyod niyang moalagad kang Jehova nga Diyos. Duna bay mga timailhan nga naningkamot siya sa pagsunod sa mga sugo ni Jesus, o gusto lang niyang makabaton ug kahibalo sa Bibliya? Regular nga susiha ang pag-uswag sa imong study. Pananglitan, ginasulti ba niya ang iyang pagbati bahin kang Jehova? Nagaampo ba siya kang Jehova? (Sal. 116:1, 2) Ganahan ba siyang mobasag Bibliya? (Sal. 119:97) Regular ba siya sa pagtambong sa mga tigom? (Sal. 22:22) Nakahimo na ba siyag mga kausaban sa iyang kinabuhi? Ginasulti na ba niya sa iyang pamilya ug mga higala ang iyang nakat-onan? (Sal. 9:1) Labaw sa tanan, gusto ba niyang mahimong Saksi ni Jehova? (Sal. 40:8) Kon ang study walay pag-uswag sa bisan hain niining mga bahina, mataktikanhong sayra kon ngano. Dayon, hisgoti kaniya ang maong butang sa mahigugmaon pero prangka nga paagi. w20.10 18 ¶14-15

Ang langitnong Amahan ni Jesus kanunayng naghimog maayong mga desisyon, ug ang iyang yutan-ong ginikanan naghimo sab ug maayong mga desisyon. Pero, samtang nagdako si Jesus, kinahanglan siyang mohimog kaugalingong mga desisyon. (Gal. 6:5) Sama kanatong tanan, siya may kagawasan sa pagpili. Puwede unta niyang unahon ang kaugalingong interes. Pero, gipili niya nga mamentinar ang maayong relasyon kang Jehova. Dihang nahibaloan ni Jesus kon unsay gusto ni Jehova nga ipahimo kaniya, siya midesisyon nga tumanon kana. (Juan 6:38) Nahibalo siya nga dumtan siya sa daghan. Bisag makapaguol kana, misunod gihapon siya kang Jehova. Sa dihang nabawtismohan si Jesus niadtong 29 C.E., ang pinakaimportante niya mao ang pagbuhat kon unsay gusto ni Jehova. (Heb. 10:5-7) Bisan dihang hapit na siyang mamatay sa estaka sa pagsakit, determinado gihapon siya nga tumanon ang kabubut-on sa iyang Amahan.—Juan 19:30. w20.10 29 ¶12; 30 ¶15

May nahibaloan ka bang mga igsoon sa inyong kongregasyon nga nag-antos tungod sa sakit o sa ubang mga problema? O tingali namatyan silag minahal. Kon mahibaloan nato nga dunay igsoon nga nanginahanglan, puwede tang moampo kang Jehova nga tabangan tang mosulti o mohimog maayo niana nga igsoon. Basin ang atong pulong ug buhat mao ang pagdasig nga gikinahanglan sa atong igsoon. (1 Ped. 4:10) Dili ta mahadlok kay si Jehova nagauban kanato. Siya nagtabang kanato pinaagi kang Jesus ug sa mga anghel. Dugang pa, kon uyon sa iyang katuyoan, puwede tang tabangan ni Jehova pinaagi sa mga tawong dunay awtoridad. Ug sama sa naeksperyensiyahan sa daghan kanato, si Jehova naggamit sa iyang balaang espiritu aron palihokon ang kasingkasing sa iyang mga alagad sa pagtabang sa ilang mga igsoon. Busa, sama kang apostol Pablo, duna tay maayong rason nga masaligong moingon: “Si Jehova ang akong magtatabang; dili ko mahadlok. Unsay mabuhat sa tawo kanako?”—Heb. 13:6. w20.11 17 ¶19-20

Ang mga apostoles dunay klarong ebidensiya nga si Jehova nag-uban kanila. Gihatagan niya silag gahom sa paghimog mga milagro. (Buh. 5:12-16; 6:8) Dili ingon niana ang atong kahimtang karon. Apan pinaagi sa iyang Pulong, si Jehova mahigugmaong nagpasalig kanato nga dihang kita mag-antos tungod sa pagkamatarong, siya malipay kanato ug ang iyang espiritu anaa kanato. (1 Ped. 3:14; 4:14) Busa dili ta angayng mabalaka kon unsay atong buhaton dihang lutoson ta sa umaabot. Hinunoa, kinahanglang buhaton nato ang atong kinamaayohan karon sa pagpalig-on sa atong pagsalig nga si Jehova makatabang ug makaluwas kanato. Kinahanglang mosalig ta sa saad ni Jesus: “Hatagan mo nakog mga pulong ug kaalam nga dili malalis o masupak sa tanan ninyong kaaway.” Gipasaligan sab ta niya: “Pinaagi sa inyong paglahutay, maluwas ang inyong kinabuhi.” (Luc. 21:12-19) Ug ayaw gyod kalimti nga si Jehova mahinumdom bisan sa kinagamyang detalye sa iyang mga alagad nga namatayng matinumanon kaniya. Gamiton niya ang maong kahibalo sa pagbanhaw kanila. w21.01 4 ¶12

Dili si apostol Pablo ang unang naghisgot bahin sa paglaom sa pagkabanhaw. Naghisgot pod niana ang patriarkang si Job. Masaligon siya nga hinumdoman ug banhawon siya sa Diyos. (Job 14:7-10, 12-15) “Ang pagbanhaw sa mga patay” maoy bahin sa “pundasyon,” o pangunang doktrina, sa tanang Kristohanong pagtulon-an. (Heb. 6:1, 2) Gihisgotan ni Pablo ang pagkabanhaw diha sa 1 Corinto kapitulo 15. Seguradong nadasig ang unang siglong mga Kristohanon sa iyang gisulat. Ug ang maong kapitulo makapadasig nato ug makapalig-on sa atong paglaom nga mahitabo gyod ang pagkabanhaw. Ang pagkabanhaw ni Jesu-Kristo nagpasalig nato nga kon mamatay ang atong mga minahal, dunay pagkabanhaw. Apil ni sa “maayong balita” nga gipahayag ni Pablo sa mga taga-Corinto. (1 Cor. 15:1, 2) Gani, miingon siya nga kon ang usa ka Kristohanon dili motuo sa pagkabanhaw, ang iyang pagtuo walay kapuslanan.—1 Cor. 15:17. w20.12 2 ¶2-4

Unsay nakatabang kang apostol Pedro nga mahibalik ang iyang kadasig? Si Jesus daan nang nag-ampo nga unta ang pagtuo ni Pedro dili moangka. Gitubag ni Jehova ang maong kinasingkasing nga pag-ampo. Sa ulahi, nagpakita si Jesus kang Pedro, tingali aron sa pagdasig kaniya. (Luc. 22:32; 24:33, 34; 1 Cor. 15:5) Nagpakita sab si Jesus sa tanang apostoles human sila mangisda sa tibuok gabii nga walay kuha. Niining panahona, gihatagan ni Jesus si Pedro ug kahigayonan nga ipahayag ang iyang gugma Kaniya. Gipasaylo ni Jesus ang iyang minahal nga higala ug gihatagan siyag dugang buluhaton. (Juan 21:15-17) Ang pagtratar ni Jesus kang Pedro nagpakita nga si Jesus maluluy-on kaayo, sama sa iyang Amahan. Busa kon masayop ta, dili ta angayng maghunahuna nga dili na gyod ta pasayloon ni Jehova. Angay natong hinumdoman nga mao nay gusto ni Satanas nga atong hunahunaon. Hinunoa, maningkamot ta nga lantawon ang atong kaugalingon—ug kadtong nakasala kanato—sama sa panglantaw sa atong maluluy-on ug mahigugmaon nga langitnong Amahan.—Sal. 103:13, 14. w20.12 20-21 ¶17-19

Makakuha tag leksiyon sa mga kasinatian niadtong wala makapabiling kalmado ug wala mosalig kang Jehova. Ang pagsusi nianang dili maayong mga ehemplo makatabang nato nga malikayan ang mga sayop nga ilang nahimo. Pananglitan, sa sayong bahin sa pagmando ni Haring Asa, siya misalig kang Jehova dihang nag-atubang ug mga problema. Pero sa ulahi, wala siya modangop sa Diyos alang sa tabang. Hinunoa, mipili siya nga sulbaron ang mga problema nga siyasiya ra. (2 Cron. 16:1-3, 12) Sa sinugdan, morag misaler ang pagpangayog tabang ni Asa sa mga Siryanhon aron moatras ang Israel. Pero wala magdugay ang kalinaw sa Juda. Giingnan siya ni Jehova pinaagi sa usa ka propeta: “Kay ikaw misalig sa hari sa Sirya ug wala mosalig kang Jehova nga imong Diyos, ang kasundalohan sa hari sa Sirya nakaikyas sa imong kamot.” (2 Cron. 16:7) Dili ta angayng maghunahuna nga masulbad nato ang atong mga problema bisag walay giya ni Jehova pinaagi sa iyang Pulong. Bisan sa mga higayon nga angay tang modesisyon dayon, kinahanglan nga kalmado tang mosalig kang Jehova, ug tabangan ta niya sa paghimog hustong desisyon. w21.01 6 ¶13-15

Karon, ang pipila sa mga alagad ni Jehova nag-antos sa kagutom tungod sa kalisod sa ekonomiya o ingong resulta sa kagubot ug mga gubat. Ang uban gipriso tungod sa ilang pagtuo. Pero, kadtong sakop sa dakong panon malipayng mahibalo nga dihang maluwas sila sa kalaglagan niining daotang sistema sa mga butang, kanunay silang makabaton ug abundang pisikal ug espirituwal nga pagkaon. Sa dihang laglagon na ang daotang sistema ni Satanas, ang dakong panon dili makasinati sa “makapagbang kainit” sa kasuko ni Jehova nga iyang ibubo sa kanasoran. Human sa dakong kasakitan, giyahan ni Jesus ang mga naluwas ngadto sa “mga tubig sa [walay kataposang] kinabuhi.” (Pin. 7:17) Hunahunaa ra: Ang dakong panon nindot kaayog paglaom. Sa binilyong tawo nga nabuhi sa yuta, posibleng dili na gyod sila mamatay! (Juan 11:26) Ang ubang mga karnero mapasalamaton kang Jehova ug Jesus tungod sa ilang nindot kaayong paglaom. w21.01 17 ¶11-12

Sa kataposang gabii ni Jesus dinhi sa yuta, siya naghunahuna sa mga kalisdanan nga maatubang sa iyang mga tinun-an. Tungod sa gugma niya sa iyang mga higala, gihangyo ni Jesus ang iyang Amahan nga ‘bantayan sila tungod sa usa nga daotan.’ (Juan 17:14, 15) Si Jesus nahibalo nga sa dihang mobalik na siya sa langit, si Satanas nga Yawa padayong makig-away niadtong gustong moalagad kang Jehova. Busa, ang katawhan ni Jehova kinahanglan gyong panalipdan. Karon, mas labaw natong gikinahanglan ang proteksiyon ni Jehova. Si Satanas gitambog sa yuta nga “may dakong kasuko.” (Pin. 12:12) Nakombinsir niya ang pipila sa paghunahuna nga sa dihang ila tang lutoson, sila naghimog “sagradong pag-alagad sa Diyos.” (Juan 16:2) Ang uban nga dili motuog Diyos naglutos kanato kay lahi ta sa kalibotan. Pero bisag unsa pa may hinungdan nga lutoson ta, dili ta mahadlok. Ngano? Ang tubag makita sa teksto karong adlawa. w21.03 26 ¶1, 3

Ang tanang gihimo ni Jehova gipalihok sa gugma. Mahigugmaon niyang gitagana ang tanan natong panginahanglan. Tungod sa gugma, gitagana ni Jehova kanato ang lukat. Kon bahin kang Jesus, gimahal kaayo ta niya maong gihatag niya ang iyang kinabuhi para kanato. (Juan 3:16; 15:13) Walay makapugong kang Jehova ug Jesus sa paghigugma niadtong maunongon kanila. (Juan 13:1; Roma 8:35) Sa susama, ang tanang himoon sa ulo sa pamilya angayng gipalihok sa gugma. Nganong importante kaayo nâ? Si apostol Juan mitubag: ‘Kon ang usa wala mahigugma sa iyang igsoon [o pamilya] nga iyang nakita, unsaon man niya paghigugma sa Diyos nga wala niya makita?’ (1 Juan 4:11, 20) Ang lalaki nga nahigugma sa iyang pamilya ug gustong mosundog kang Jehova ug Jesus magtagana sa espirituwal, emosyonal, ug materyal nga mga panginahanglan sa iyang pamilya. (1 Tim. 5:8) Iyang bansayon ug disiplinahon ang iyang mga anak. Padayon sab siyang maningkamot sa paghimog mga desisyon nga magpasidungog kang Jehova ug makahatag ug kaayohan sa iyang pamilya. w21.02 5 ¶12-13

Ang atong mahigugmaong langitnong Amahan nahibalo sa epekto sa atong dili maayong mga kasinatian ug negatibong panghunahuna. Pero nakita pod niya ang atong maayong mga hiyas—mga hiyas nga tingali wala nato makita sa atong kaugalingon. (1 Juan 3:19, 20) Ang usa nga naningkamot nga mahunong ang daotang buhat tingali makahimo na pod sa mao ra gihapon nga sayop ug madismayar sa iyang kaugalingon. Siyempre, natural lang nga makonsensiya ta dihang makasala. (2 Cor. 7:10) Pero dili ta angayng mobati ug sobrang pagkakonsensiya ug hukman ang kaugalingon, nga maghunahuna: ‘Pakyas gyod ko. Di na gyod ko mapasaylo ni Jehova.’ Dili kana maayo nga panghunahuna, ug basin makapahunong na hinuon nâ kanato sa pag-alagad kang Jehova. Busa “husayon nato ang mga butang” uban kang Jehova pinaagi sa pag-ampo ug pagpangayog pasaylo kaniya. (Isa. 1:18) Dihang makita ni Jehova nga naghinulsol gyod ka, pasayloon ka niya. Dugang pa, duol sa mga ansiyano. Mapailobon ka nilang tabangan aron maulian ka sa espirituwal.—Sant. 5:14, 15. w20.12 23 ¶5-6

Si Jesus nagpasidungog ug nagtahod sa mga babaye. Wala niya sundoga ang mga Pariseo, kinsa nagpakamenos sa mga babaye ug dili gani makig-estorya kanila sa publiko, ug labaw nang dili maghisgot sa Kasulatan uban kanila. Hinunoa, naghisgot siyag lawom nga espirituwal nga mga kamatuoran dili lang ngadto sa lalaking mga tinun-an kondili sa mga babaye usab. (Luc. 10:38, 39, 42) Gitugotan sab niya ang mga babaye nga mouban kaniya dihang magsangyaw siya sa lainlaing lugar. (Luc. 8:1-3) Ug gihatagan sila ni Jesus ug pribilehiyo nga ipahibalo sa mga apostoles nga gibanhaw na siya. (Juan 20:16-18) Si apostol Pablo nagpahinumdom kang Timoteo nga pasidunggan ang mga babaye. Giila ni Pablo nga ang mama ug lola ni Timoteo ang unang nagtudlo kang Timoteo “sa balaang mga sinulat.” (2 Tim. 1:5; 3:14, 15) Sa iyang sulat sa mga taga-Roma, espesipikong ginganlan ni Pablo ang mga sister nga iyang gipangomosta. Namatikdan niya ang paghago sa mga sister ug gipasalamatan ang ilang kakugi sa ministeryo.—Roma 16:1-4, 6, 12; Filip. 4:3. w21.02 15 ¶5-6