Abril

Nag-atubang ba kag bug-at nga problema? Tingali dunay igsoon nga nakapasakit nimo. (Sant. 3:2) O basin gibugalbugalan ka sa imong mga kauban sa trabaho o sa eskuwelahan kay nag-alagad ka kang Jehova. (1 Ped. 4:3, 4) O kaha gipugngan ka sa imong pamilya sa pagtambong sa tigom o sa pagpakig-estorya sa uban bahin sa imong pagtuo. (Mat. 10:35, 36) Kon bug-at kaayo ang problema, basin maghunahuna ka nga mohunong na lang sa pag-alagad kang Jehova. Pero makasalig ka nga bisag unsa pang problema ang imong maatubang, hatagan ka ni Jehova ug kaalam sa paghimog maayong mga desisyon ug kusog sa paglahutay niini. Sa Bibliya, gipasulat ni Jehova ang mga pananglitan kon sa unsang paagi nalahutay sa dili hingpit nga mga tawo ang bug-at nga mga problema. Ngano? Aron makakat-on ta kanila. Kanay gipasulat ni Jehova kang apostol Pablo. Ang pagbasa niini nga mga asoy makahatag natog paghupay ug paglaom. Pero aron makabenepisyo, dili igo nga mobasa lang ta sa Bibliya. Kinahanglang tugotan nato ang Kasulatan sa pag-umol sa atong hunahuna ug pagtandog sa atong kasingkasing. w21.03 14 ¶1-2

Ang imo bang panglantaw sa mga tawo nga imong ginasangyawan sama sa mga lugas nga anihonon na? Kon mao, tulo ka butang ang mahitabo. Una, mas magkugi kag sangyaw. Ang ting-ani mubo lang, busa dili angayng sayangan ang panahon. Ikaduha, malipay ka dihang makita nimo nga maminaw ang mga tawo sa maayong balita. Ang Bibliya nag-ingon: ‘Ang katawhan nagsadya sa ting-ani.’ (Isa. 9:3) Ug ikatulo, isipon nimo ang matag tawo ingong umaabot nga tinun-an ni Jesus, busa ipahaom nimo ang imong paagi sa pagsangyaw aron makuha ang iyang interes. Ang pipila sa mga sumusunod ni Jesus naghunahuna nga ang mga Samarianhon dili gyod mahimong tinun-an, pero lahi si Jesus. Naghunahuna siya nga puwede silang mahimong tinun-an. Kinahanglan nga ingon sab niana ang atong panglantaw sa mga tawo sa atong teritoryo. Si apostol Pablo naghatag kanatog maayong ehemplo. Siya nahibalo sa gituohan sa iyang mga gisangyawan, kon unsay makapainteres kanila, ug kon nganong naghunahuna siya nga puwede silang mahimong tinun-an ni Jesus. w20.04 8-9 ¶3-4

Imbes hukman ang mga lihok sa usa ka tawo, paningkamoti nga masabtan ang iyang gibati. Si Jehova lang ang bug-os nakasabot kanato. Busa hangyoa siya nga tabangan kang makita kon unsay iyang nakita sa uban ug masabtan kon sa unsang paagi magmabination ka kanila. Dili maayong pilion lang nimo kon kinsa sa mga igsoon ang imong pakitaag pagkamabination. Silang tanan nag-atubang ug mga problema, nga daghan niana susama sa naeksperyensiyahan ni Jonas, Elias, Agar, ug Lot. Sa daghang higayon, sila ra poy nakaingon sa ilang problema. Ang tinuod, may mga higayon nga nahitabo pod nâ kanato. Busa makataronganon nga hangyoon ta ni Jehova sa pagpakitag simpatiya sa usag usa. (1 Ped. 3:8) Kon sundon nato si Jehova, mapalig-on nato ang panaghiusa sa atong nindot kaayo nga tibuok kalibotang pamilya. Busa sa atong pagtratar sa uban, hinaot nga magmadeterminado tang maminaw, magkat-on, ug magmabination. w20.04 18-19 ¶15-17

Si Jesus nagpakitag hingpit nga ehemplo sa pagtuman kang Jehova. Busa ang usa ka importanteng paagi nga matuman nato si Jehova mao ang pagsunod sa ehemplo ni Jesus kutob sa maarangan. (Juan 8:29) Aron makapadayon sa paglakaw diha sa kamatuoran, kinahanglang kombinsido ta nga si Jehova ang Diyos sa kamatuoran, nga tinuod ang tanang gisulti niya kanato diha sa iyang Pulong, ang Bibliya. Ug kinahanglang kombinsido sab ta nga si Jesus ang gisaad nga Mesiyas. Karon daghan ang nagduhaduha nga si Jesus gidihogan ingong Hari sa Gingharian sa Diyos. Si Juan nagpasidaan nga naay “daghang maglilimbong” nga posibleng magpahisalaag niadtong walay lig-ong pagtuo kang Jehova ug Jesus. (2 Juan 7-11) Si Juan misulat: “Kinsa man ang bakakon? Dili ba kadtong naglimod nga si Jesus ang Kristo?” (1 Juan 2:22) Ang bugtong paagi nga dili ta malimbongan mao ang pagtuon sa Pulong sa Diyos. Kon buhaton nato kana, atong mailhan si Jehova ug Jesus. (Juan 17:3) Ug makombinsir ta nga atong nabatonan ang kamatuoran. w20.07 21 ¶4-5

Ang usa ka paagi nga dili ta “makapandol” sa atong kaubang mga magdadagan mao ang pagtugot kanila sa paghimo sa ilang gusto kon posible imbes ipugos nato ang atong gusto. (Roma 14:19-21; 1 Cor. 8:9, 13) Niining importanteng paagi, dili ta sama sa magdadagan sa literal nga lumba nga maningkamot nga siyay makadawat sa premyo. Ang maong mga magdadagan kaugalingon ray gihunahuna. Busa tingali ilang wahingon ang uban aron silay makauna. Pero sa atong bahin, wala ta magkompetensiyahay. (Gal. 5:26; 6:4) Tumong nato nga daghan tag matabangan kutob sa mahimo nga makaabot sa finish line kauban nato ug makadawat sa premyo nga kinabuhi. Busa maningkamot ta sa pagpadapat sa tambag nga ‘tan-awon dili lang ang kaugalingong kaayohan, kondili ang kaayohan sab sa uban.’ (Filip. 2:4) Sa lumba nga atong giapilan, si Jehova mahigugmaong nagtanyag sa iyang katawhan ug seguradong ganti alang niadtong makatapos sa lumba—kinabuhing walay kataposan, sa langit man o sa paraisong yuta. w20.04 28 ¶10; 29 ¶12

Minilyon pang Kristohanong mga lalaki ug babaye ang makapuyo sa bag-ong kalibotan. Ilang makita ang laing kadaogan batok sa kamatayon—ang pagbanhaw sa bilyonbilyong tawo nga nangamatay kaniadto. Imadyina kon unsa ka malipayon kanang panahona! (Buh. 24:15) Ug ang tanan nga bug-os nga magmaunongon kang Jehova magmadaogon sab batok sa napanunod nga kamatayon. Sila mahimong mabuhi sa walay kataposan. Ang tanang Kristohanon nga buhi karon angayng magmapasalamaton sa makapahupayng mga pulong bahin sa pagkabanhaw nga gisulat ni Pablo ngadto sa mga taga-Corinto. Duna tay maayong mga rason nga sundon ang tambag ni Pablo nga himoon ang atong maarangan “diha sa buluhaton sa Ginoo.” (1 Cor. 15:58) Kon kanunay natong buhaton ang atong maarangan niana nga buluhaton, makalaom ta sa usa ka malipayon kaayo nga kinabuhi sa umaabot. Kana nga kinabuhi mas nindot pa kay sa bisan unsa nga atong maimadyin. Seguradong magpamatuod nâ nga wala makawang ang atong paghago may kalabotan sa Ginoo. w20.12 13 ¶16-17

Kon ang tagna sa Ezequiel 38:10-23; Daniel 2:43-45; 11:44–12:1; ug Pinadayag 16:13-16, 21 naghisgot sa samang yugto sa panahon ug mga panghitabo, makadahom ta nga mahitabo ang mosunod. Human sa pagsugod sa dakong kasakitan, ang “mga hari sa tibuok gipuy-ang yuta” mag-alyansa. (Pin. 16:13, 14) Ang maong alyansa sa kanasoran gitawag sa Kasulatan ug “Gog sa yuta sa Magog.” (Ezeq. 38:2) Kini nga alyansa moatake sa katawhan sa Diyos ug maningkamot sa paglaglag kanila. Sa paghisgot niini nga panahon, nakita ni apostol Juan nga ang mga kaaway sa Diyos gipaulanan ug dagko kaayong yelo. Ang maong simbolikong pag-ulan ug yelo mahimong magtumong sa bug-at nga mensahe sa paghukom nga ipahayag sa katawhan ni Jehova ug kini mag-aghat kang Gog sa Magog sa pag-atake sa katawhan sa Diyos sa tuyo nga puohon sila.—Pin. 16:21. w20.05 14-15 ¶13-14

Ang balaang espiritu sa Diyos maoy regalo nga angay natong apresyahon. Mas molawom ang atong apresasyon sa balaang espiritu kon hunahunaon nato kon unsay ginahimo niini sa atong panahon. Sa wala pa mosaka si Jesus sa langit, iyang giingnan ang iyang mga tinun-an: “Makadawat mog gahom dihang mokunsad kaninyo ang balaang espiritu, ug kamo mahimong akong mga saksi . . . hangtod sa kinalay-ang bahin sa yuta.” (Buh. 1:8) Sa tabang sa balaang espiritu, mga walo ka milyon ug tunga nga mga magsisimba ni Jehova ang natigom gikan sa tanang dapit sa yuta. Dugang pa, kita nagtagamtam ug espirituwal nga paraiso tungod kay ang espiritu sa Diyos nagtabang nato nga maugmad ang nindot nga mga hiyas sama sa gugma, kalipay, kalinaw, taas nga pailob, pagkabuotan, pagkamaayo, pagtuo, kalumo, ug pagpugong sa kaugalingon. Kini nga mga hiyas maoy naglangkob sa “bunga sa espiritu.” (Gal. 5:22, 23) Bililhon gyod nga regalo ang balaang espiritu! w20.05 28 ¶10; 29 ¶13

Daghag rason nga makadahom ta nga kadtong moabiabi sa mga binanhaw makaila sa ilang mga minahal. Pananglitan, base sa nahitabo na nga pagpamanhaw, makadahom ta nga lalangon pag-usab ni Jehova ang mga tawo aron nga ang ilang hitsura, sinultihan, ug panghunahuna parehas sa kon unsa sila una sila mamatay. Hinumdomi nga ang kamatayon gipakasama ni Jesus sa pagkatulog, ug ang pagkabanhaw gipakasama sa pagmata gikan sa pagkatulog. (Mat. 9:18, 24; Juan 11:11-13) Dihang ang mga tawo momata, ang ilang hitsura, sinultihan, ug panumdoman parehas nianang sa dayon na nilang pagkatulog. Konsideraha si Lazaro. Upat ka adlaw na siyang patay. Busa nagsugod nag kadugta ang iyang lawas. Pero sa dihang gibanhaw siya ni Jesus, nailhan dayon siya sa iyang mga igsoon. Ug dayag nga siya nahinumdom nila.—Juan 11:38-44; 12:1, 2. w20.08 14 ¶3; 16 ¶8

Ang mga dinihogan ug ang ubang mga karnero importante sa Diyos. Kining duha ka grupo parehong gihigugma niya. Nahibalo ta niini kay ang iyang gibayad sa pagpalit sa mga dinihogan ug sa ubang mga karnero parehas ra, ang kinabuhi sa iyang minahal nga Anak. Ang duha ka grupo lainlaig paglaom, pero silang duha kinahanglang magmaunongon sa Diyos ug sa Kristo. (Sal. 31:23) Ug hinumdomi nga si Jehova mohatag sa iyang balaang espiritu sa matag usa sumala sa kon unsay gikinahanglan, sakop man siya sa mga dinihogan o sa ubang mga karnero. Gihatagan ni Jehova ang tanan niyang dedikadong mga alagad ug nindot nga paglaom. (Jer. 29:11) Ang Memoryal sa kamatayon sa Kristo naghatag sa matag usa kanato ug talagsaong kahigayonan sa pagdayeg sa Diyos ug sa Kristo tungod sa ilang gibuhat para kanato aron makatagamtam tag walay kataposang kinabuhi. Walay duhaduha nga ang Memoryal mao ang labing importanteng panagkatigom sa tinuod nga mga Kristohanon kada tuig. w21.01 18 ¶16; 19 ¶19

Ang kadaghanan sa manambong sa Memoryal yutan-og paglaom. Busa, nganong motambong man sila? Ang ilang rason parehas nianang sa mga tawo nga motambong sa kasal sa ilang higala. Gusto nilang ipakita nga ilang gimahal ug gisuportahan ang kaslonon. Sa susama, ang ubang mga karnero motambong sa Memoryal kay gusto nilang ipakita nga ilang gimahal ug gisuportahan ang Kristo ug ang mga dinihogan. Motambong sab sila aron ipakita ang ilang apresasyon sa halad ni Jesus nga nagpaposible nga mabuhi sila sa walay kataposan sa yuta. Ang laing importanteng rason kon nganong ang ubang mga karnero motambong sa Memoryal maoy aron tumanon ang sugo ni Jesus. Sa dihang gisugdan ni Jesus kanang espesyal nga panihapon uban sa iyang matinumanong mga apostoles, siya miingon kanila: “Ipadayon ninyo ang pagbuhat niini sa paghandom kanako.” (1 Cor. 11:23-26) Busa padayon silang motambong sa Panihapon sa Ginoo samtang naa pay dinihogan sa yuta. w21.01 17-18 ¶13-14

Aron mahimong tinuod ang gugma, kinahanglang ubanan nig mga buhat. (Itandi ang Santiago 2:17, 26.) Pananglitan, gimahal ta ni Jehova. (1 Juan 4:19) Ug gipahayag niya ang iyang gugma pinaagi sa nindot nga mga pulong nga narekord sa Bibliya. (Sal. 25:10; Roma 8:38, 39) Pero kombinsido ta nga gimahal ta sa Diyos dili lang tungod sa iyang giingon kondili tungod sab sa iyang gibuhat. Gitugotan ni Jehova nga ang iyang minahal nga Anak mag-antos ug mamatay para kanato. (Juan 3:16) Magduhaduha pa ba ta nga gimahal ta ni Jehova? Mapamatud-an nato nga atong gihigugma si Jehova ug Jesus pinaagi sa pagtuman sa ilang mga sugo. (Juan 14:15; 1 Juan 5:3) Ug gisugo ta ni Jesus nga higugmaon ang usag usa. (Juan 13:34, 35) Angay natong ipakita ang atong gugma sa mga igsoon dili lang sa pulong kondili sa buhat usab.—1 Juan 3:18. w21.01 9 ¶6; 10 ¶8

Kadtong gidihogan sa balaang espiritu dunay paglaom nga makauban si Jesus hangtod sa hangtod ug magmando kauban niya sa Gingharian sa Diyos. Makita gyod nila siya, makaestorya, ug makagahin silag panahon uban kaniya. (Juan 14:2, 3) Kadtong dunay yutan-ong paglaom makadawat sab sa gugma ug atensiyon ni Jesus. Tinuod, dili nila makita si Jesus, pero mas masuod pa sila kaniya samtang matagamtam nila ang kinabuhi nga gipaposible ni Jehova ug Jesus para kanila. (Isa. 9:6, 7) Dihang dawaton nato ang imbitasyon ni Jesus nga mahimo niyang higala, makadawat tag daghang panalangin. Pananglitan, iya tang higugmaon ug suportahan karon. Mabatonan nato ang paglaom nga mabuhi hangtod sa hangtod. Ug labaw sa tanan, ang atong pagpakighigala kang Jesus moresultag kinamaayohang panalangin—masuod ta sa Amahan ni Jesus, si Jehova. Pagkadakong pribilehiyo nga mahimong higala ni Jesus! w20.04 25 ¶15-16

Ang sulat ni apostol Pablo maoy para sa dinihogang mga Kristohanon sa Corinto, kinsa banhawon ngadto sa langit. Ang maong mga Kristohanon “nabalaan ug nahiusa kang Kristo Jesus, nga gitawag aron mahimong mga balaan.” Ug gihisgotan ni Pablo “kadtong nangatulog sa kamatayon nga nahiusa sa Kristo.” (1 Cor. 1:2; 15:18; 2 Cor. 5:17) Sa laing sulat, si Pablo miingon nga kadtong “namatay sama [kang Jesus] . . . banhawon sama niya, ug niining mga paagiha [sila] nahiusa kaniya.” (Roma 6:3-5) Si Jesus gibanhaw ingong espiritu ug miadto sa langit. Busa mao nay mahitabo sa tanan nga “nahiusa sa Kristo,” sa ato pa, sa tanang dinihogan sa espiritu nga mga Kristohanon. Si Pablo misulat nga ang Kristo gibanhaw ingong “unang bunga niadtong mga nangatulog sa kamatayon.” (1 Cor. 15:20) Si Jesus ang unang gibanhaw ingong espiritu ug ang unang nakadawat ug walay kataposang kinabuhi. w20.12 5-6 ¶15-16

Ang mga dinihogan karon nga mamatay banhawon dayon ngadto sa langit. Gipamatud-an ni sa giingon ni apostol Pablo sa 1 Corinto 15:51, 52. Dihang mabanhaw kining mga igsoon sa Kristo, sila magmalipayon gayod. Gisultihan ta sa Bibliya kon unsay buhaton didto sa langit niadtong mangausab “sa pagpamilok sa mata.” Si Jesus miingon kanila: “Sa usa nga magmadaogon ug magtuman sa akong mga buhat hangtod sa kataposan, ihatag nako kaniya ang awtoridad ibabaw sa kanasoran, sama sa awtoridad nga akong nadawat gikan sa akong Amahan. Ug bantayan niya ang katawhan pinaagig bunal nga puthaw aron mangadugmok sila samag kulonon nga mga sudlanan.”—Pin. 2:26, 27. w20.12 12 ¶14-15

Sa pagtawag kang Jesus nga “unang bunga,” gipasabot ni apostol Pablo nga duna pay ubang tawo nga banhawon ngadto sa langit human kang Jesus, nga mao, ang mga apostoles ug ang uban nga “nahiusa sa Kristo.” (1 Cor. 15:18) Sa ngadtongadto, maeksperyensiyahan nila ang pagkabanhaw nga sama nianang kang Jesus. Ang pagkabanhaw ngadto sa langit niadtong “nahiusa sa Kristo” wala pa magsugod dihang misulat si Pablo sa mga taga-Corinto. Gipakita ni Pablo nga sa umaabot pa ni mahitabo: “Ang matag usa banhawon diha sa iyang kaugalingong turno: ang Kristo ang unang bunga, pagkahuman kadtong mga iya sa Kristo panahon sa iyang presensiya.” (1 Cor. 15:23; 1 Tes. 4:15, 16) Karon nagkinabuhi ta nianang gitagna nga “presensiya” sa Kristo. Ang mga apostoles ug ang ubang dinihogan sa espiritu nga mga Kristohanon nga nangamatay kinahanglang maghulat niana nga presensiya aron madawat ang langitnong ganti ug ‘mabanhaw sama [kang Jesus] ug mahiusa kaniya.’—Roma 6:5. w20.12 5 ¶12; 6 ¶16-17

Ang gitumong ni apostol Pablo mao ang tawo nga gibanhaw ug gihatagag lawas nga mabuhi sa langit, sa ato pa, “espirituhanon.” (1 Cor. 15:43, 44) Sa dinhi pa si Jesus sa yuta, duna siyay unodnong lawas. Pero dihang siya gibanhaw, siya “nahimong espiritu nga nagahatag ug kinabuhi” ug mibalik sa langit. Sa susama, ang dinihogang mga Kristohanon banhawon ngadto sa espirituhanong kinabuhi. Si Pablo nagpatin-aw: “Sama nga nabatonan nato ang larawan sa usa nga hinimo sa abog, mabatonan usab nato ang larawan sa usa nga langitnon.” (1 Cor. 15:45-49) Matikdi nga si Jesus wala banhawa nga may unodnong lawas. Sa hapit nang matapos ang paghisgot ni Pablo, iya kanang gipatin-aw: “Ang unod ug dugo dili makapanunod sa Gingharian sa Diyos” didto sa langit. (1 Cor. 15:50) Ang mga apostoles ug ang ubang dinihogan dili banhawon ngadto sa langit sa lawas nga unod ug dugo, nga madugta. w20.12 10-11 ¶10-12

Gigiyahan sa Diyos ang pipila ka tinun-an ni Jesus sa unang siglo sa pagsulat bahin sa langitnong paglaom. Si apostol Juan mipatin-aw: “Kita mga anak na sa Diyos, apan wala pa ipadayag kon mahimong unsa unya kita. Pero nahibalo ta nga dihang ipadayag na siya, kita mahisama niya.” (1 Juan 3:2) Busa ang dinihogang mga Kristohanon wala mahibalo kon unsa unyay ilang kinabuhi dihang mabanhaw sila ngadto sa langit nga may espirituhanong lawas. Pero, makita nila si Jehova dihang madawat nila ang ilang ganti. Ang Bibliya naghatag ug pipila ka impormasyon bahin niana. Ang mga dinihogan makauban ni Jesus dihang iyang ‘wagtangon ang tanang gobyerno ug tanang awtoridad ug gahom.’ Apil niana “ang kataposang kaaway, ang kamatayon.” Sa kataposan, si Jesus ug ang iyang kaubang mga magmamando magpasakop sa ilang kaugalingon ug sa tanang butang ngadto kang Jehova. (1 Cor. 15:24-28) Nindot gyod kaayo nang panahona! w20.12 8 ¶2

Ang maunongong mga Kristohanon nga walay paglaom nga mabuhi sa langit uban sa Kristo duna poy paglaom nga mabanhaw. Ang Bibliya nag-ingon nga si apostol Pablo ug ang uban nga moadto sa langit apil niadtong makadawat ug “mas sayo nga pagkabanhaw.” (Filip. 3:11) Dili ba nagpakita kana nga dunay laing pagkabanhaw nga mosunod? Nahiuyon kana sa giingon ni Job nga mahitabo kaniya sa umaabot. (Job 14:15) “Kadtong mga iya sa Kristo panahon sa iyang presensiya” makauban ni Jesus sa langit dihang iyang wagtangon ang tanang gobyerno, awtoridad, ug gahom. Bisan “ang kataposang kaaway, ang kamatayon,” pagawagtangon. Kadtong banhawon ngadto sa langit dili na gyod mamatay. (1 Cor. 15:23-26) Kadtong dunay yutan-ong paglaom makalaom sa giingon ni Pablo nga makita sa teksto karong adlawa. Klaro nga walay dili matarong nga makasulod sa langit, busa ang maong mga pulong nagpakita nga dunay umaabot nga pagkabanhaw dinhi sa yuta. w20.12 6-7 ¶18-19

Maghunahuna tingali ta, ‘Unsaon nato pagseguro nga andam si Jehova sa pagpasaylo kanato?’ Ang pagpangutana niana nagpakita nga mapasaylo ta ni Jehova. Katuigan kanhi, ang The Watchtower nag-ingon: “[Tingali] balikbalik natong mahimo ang mao rang sayop. Basin wala pa gyod nato mawala ang kahuyangan nga naa nato sa wala pa ta mag-alagad sa Diyos. . . . Ayawg hunahunaa nga nakahimo kag sala nga dili gyod mapasaylo. Kanay gusto ni Satanas nga imong hunahunaon. Sa pagkatinuod, ang imong kaguol ug pagkadismayar nagpakita nga dili ka daotan ug nga mapasaylo ka ni Jehova. Magpabiling mapainubsanon ug padayon sa pag-ampo sa Diyos nga pasayloon ka, nga hatagan kag hinlong konsensiya, ug tabangan ka nga dili na maotro ang maong sayop.” Sa wala pa mahimong Kristohanon, si apostol Pablo nakahimog pipila ka seryosong sala. Nahinumdom siya sa iyang nahimo. (1 Tim. 1:12-15) Pero giisip niya ang lukat ingong regalo sa Diyos kaniya. Busa nalikayan ni Pablo ang lit-ag sa sobrang pagkakonsensiya, ug sukad niadto, nagpokus na siya sa paghatag sa iyang kinamaayohan ngadto kang Jehova. w20.11 27 ¶14; 29 ¶17

Si Satanas daghag ginagamit sa pagtental kanato. Unsay atong himoon? Sayon rang mangatarongan. Pananglitan, maghunahuna tingali ta: ‘Aw, dili ra ko ma-disfellow ani, maong dili ra ni seryoso.’ Kana nga pangatarongan sayop kaayo. Mas maayong pangutan-on nato ang kaugalingon ug sama niini nga mga pangutana: ‘Dili kaha ni gamiton ni Satanas aron mabahin ang akong kasingkasing? Kon magpadaog ko sa tentasyon, dili kaha mapasipalahan ang ngalan ni Jehova? Kon ako ning himoon, mas masuod kaha ko sa Diyos, o mapalayo ko niya?’ Pamalandonga kanang mga pangutanaha. Pag-ampo nga hatagan kag kaalam aron matubag nimo kana nga matinud-anon. Kon imo nang himoon, mapanalipdan gyod ka. Kana makatabang nimo nga mahimong determinado sa pagsukol sa tentasyon, sama sa gihimo ni Jesus dihang siya miingon: “Pahawa, Satanas!” (Mat. 4:10) Hinumdomi, dili gyod maayo kon mabahin ang kasingkasing. w20.06 12-13 ¶16-17

Mapainubsanon tang mosunod sa mga sukdanan ni Jehova, kay atong nasabtan nga siya kanunayng nahibalo kon unsay labing maayo para kanato. (Efe. 4:22-24) Ang pagkamapainubsanon magpalihok nato sa pag-una sa kabubut-on ni Jehova imbes sa atoa ug sa pag-isip sa uban nga labaw kay kanato. Ingong resulta, masuod ta kang Jehova ug sa atong mga igsoon. (Filip. 2:3) Pero kon dili ta mag-amping, puwede tang maimpluwensiyahan sa mga tawo sa kalibotan kinsa hambogiro ug kaugalingon ray gihunahuna. Morag may pipila ka Kristohanon sa unang siglo C.E. nga naimpluwensiyahan sa kalibotan, kay si apostol Pablo misulat sa mga taga-Roma: “Sultihan ta mo nga dili maghunahuna nga importante kaayo mo, kondili magbaton ug maayong panghunahuna.” Giila ni Pablo nga kinahanglang duna tay pagtahod sa kaugalingon. Pero ang pagkamapainubsanon motabang kanato nga mahimong balanse sa atong panglantaw sa kaugalingon ug dili maghunahuna nga importante kaayo ta. w20.07 2 ¶1-2

Sa mga adlaw ni Haring Asa, ang panahon sa kalinaw natapos ra. Misulong gikan sa Etiopia ang dakong kasundalohan, nga ang gidaghanon kapig usa ka milyon. Ang ilang komander nga si Zera nagtuo nga mapildi ang Juda. Pero si Asa misalig, dili sa gidaghanon sa iyang kasundalohan, kondili sa iyang Diyos, si Jehova. Siya miampo: “Tabangi mi, Oh Jehova nga among Diyos, kay kami nagasalig kanimo, ug sa imong ngalan kami mianhi batok niini nga katawhan.” (2 Cron. 14:11) Ang Etiopianhong kasundalohan halos doble sa gidaghanon sa mga sundalo ni Asa, pero nahibalo si Asa nga si Jehova gamhanan ug makahimo sa pagtabang sa Iyang katawhan. Ug wala siya pakyasa ni Jehova. Ang Etiopianhong kasundalohan napildi. (2 Cron. 14:8-13) Wala ta mahibalo kon unsa gyoy mahitabo sa matag usa kanato sa umaabot, pero nahibalo ta nga ang kalinaw nga natagamtam sa katawhan sa Diyos dili magdugay. Gani, si Jesus nagtagna nga sa kataposang mga adlaw, ang iyang mga tinun-an ‘dumtan sa tanang kanasoran.’—Mat. 24:9. w20.09 17-18 ¶14-16

Walay usa kanato ang gustong insultohon. Pero, kon insultohon ta sa atong mga kaaway ug maapektohan kaayo ta sa ilang isulti, mahimong maluya ta. (Prov. 24:10) Busa unsay angay natong panglantaw sa ilang mga panginsulto? Sama kang apostol Pablo, puwede natong ‘ikalipay ang mga panginsulto.’ Ngano? Tungod kay ang mga panginsulto ug pagsupak maoy mga timailhan nga kita tinuod nga mga tinun-an ni Jesus. (1 Ped. 4:14) Si Jesus miingon nga ang iyang mga sumusunod pagalutoson. (Juan 15:18-20) Nahitabo kana sa unang siglo. Niadtong panahona, kadtong naimpluwensiyahan sa kultura sa Gresya nag-isip sa mga Kristohanon ingong way grado ug ubos. Ug taliwala sa mga Hudiyo, ang mga Kristohanon giisip ingong “ordinaryong mga tawo ug dili edukado,” sama kang apostol Pedro ug Juan. (Buh. 4:13) Ang mga Kristohanon morag huyang tan-awon. Wala silay politikal nga impluwensiya o militaryong gahom, ug ang mga tawo nagsalikway kanila. Gitugotan ba sa unang mga Kristohanon nga mahunong ang ilang buluhaton tungod sa negatibong panglantaw sa ilang mga magsusupak? Wala. w20.07 14-15 ¶3-4

Gihigugma pag-ayo ni apostol Juan ang mga igsoon ug gusto niya nga makabaton silag lig-ong pagtuo. Ang iyang gugma ug kabalaka makita sa tambag nga iyang gihatag kanila diha sa iyang tulo ka sulat. Makapadasig gyod ang pagkahibalo nga ang mga lalaki ug babaye nga sama niya gidihogan aron magmando kauban sa Kristo! (1 Juan 2:27) Hinaot nga palandongon nato pag-ayo ang tambag nga iyang gihatag. Magmadeterminado ta sa paglakaw diha sa kamatuoran pinaagi sa pagsunod kang Jehova sa tanang bahin sa atong kinabuhi. Tun-i ang iyang Pulong, ug salig niini. Palig-ona ang imong pagtuo kang Jesus. Isalikway ang tawhanong mga ideya ug ang pagtulon-an sa mga apostata. Likayi ang dobleng pagkinabuhi ug ayawg padaog sa sala. Pagkinabuhi subay sa taas nga moral nga sukdanan ni Jehova. Ug tabangi ang mga igsoon sa pagpabiling lig-on pinaagi sa pagpasaylo niadtong nakapasakit nato ug pagtabang niadtong nanginahanglan. Pinaagi niana, makapadayon ta sa paglakaw diha sa kamatuoran bisan pa sa mga kalisdanan. w20.07 24-25 ¶15-17

Si Jehova mahigugmaong naghatag sa matag usa sa iyang matinumanong mga alagad ug lunà diha sa kongregasyon. Bisag lainlain tag papel, kitang tanan bililhon, ug gikinahanglan nato ang usag usa. Gipasiugda ni apostol Pablo nga walay usa kanato ang makaingon sa ubang alagad ni Jehova: “Wala ko magkinahanglan ninyo.” (1 Cor. 12:21) Aron magmalinawon ang kongregasyon, kinahanglan natong pabilhan ang usag usa ug magtinabangay. (Efe. 4:16) Kon magtinabangay ta ug magkahiusa, ang tanan mobating gihigugma ug molig-on ang kongregasyon. Ang tanang ansiyano sa kongregasyon gitudlo pinaagi sa balaang espiritu ni Jehova. Pero lainlain silag gasa ug katakos. (1 Cor. 12:17) Ang pipila tingali bag-o pang natudlo nga ansiyano ug wala pa kaayoy eksperyensiya. Ang uban sab limitado na tingalig mahimo tungod sa pangedaron ug problema sa panglawas. Pero ang usa ka ansiyano dili angayng maghunahuna bahin sa iyang kaubang mga ansiyano: “Wala ko magkinahanglan ninyo.” Hinunoa, angayng sundon sa matag ansiyano ang tambag ni Pablo sa Roma 12:10. w20.08 26 ¶1-2; 27 ¶4

Si Jehova naggiya kanato diha sa dalan nga motultol sa kinabuhi pinaagi sa yutan-ong bahin sa iyang organisasyon. Segurado nga mosunod dayon ta sa binase sa Bibliya nga direksiyon nga atong madawat bahin sa mga doktrina o moral nga mga sukdanan. Pero unsay atong buhaton kon ang organisasyon sa Diyos mohimog mga kausaban nga makaapektar sa ubang bahin sa atong kinabuhi, sama sa pagbaligya sa Kingdom Hall nga atong ginatambongan? Padayon tang magmalipayon kon atong hinumdoman nga ang tanan natong ginahimo alang kang Jehova, ug siya maoy naggiya sa iyang organisasyon. (Col. 3:23, 24) Si Haring David nagpakitag maayong ehemplo dihang miamot siya para sa pagtukod sa templo. Siya miingon: “Kinsa ba ko ug kinsa ang akong katawhan nga kami makahatag ug kinabubut-ong mga halad sama niini? Kay ang tanang butang gikan kanimo, ug ang among gihatag gikan mismo sa imong kamot.” (1 Cron. 29:14) Dihang moamot ta, gihatag sab nato kang Jehova kon unsay gihatag niya kanato. Bisan pa niana, pabilhan ni Jehova ang panahon, kusog, ug kuwarta nga atong iamot sa pagsuportar sa iyang buluhaton.—2 Cor. 9:7. w20.11 22-23 ¶14-16

Ingong mga Saksi ni Jehova, ang atong kalamposan wala mag-agad sa gidaghanon sa tawo nga atong madala sa organisasyon sa Diyos. (Luc. 8:11-15) Kon molahutay ta sa pagsangyaw sa maayong balita ug sa pagtudlo sa uban, isipon ta ni Jehova nga malamposon. Ngano? Tungod kay padayon natong ginahimo ang gipabuhat kanato ni Jehova ug sa iyang Anak. (Mar. 13:10; Buh. 5:28, 29) Duna tay dugang rason nga mosangyaw karon: Hapit na gyong matapos kining sistemaha! Mubo na lang kaayo ang panahong nahibilin sa pagsangyaw sa maayong balita nga makaluwas ug kinabuhi. Ayaw paglangan o ayaw paghulat nga mahimong maayo ang tanan ayha ka makigbahin niining importanteng buluhaton. Lihok na karon aron molig-on ang imong tinguha nga mosangyaw, molawom ang imong kahibalo sa Bibliya, ug mahimo kang mas maisogon ug disiplinado. Duyog sa kapig walo ka milyong mangingisdag tawo ug imong masinati ang kalipay nga gikan kang Jehova. (Neh. 8:10; Luc. 5:10) Himoa ang tanan nimong maarangan sa pagsangyaw hangtod moingon si Jehova nga kini natapos na. w20.09 7 ¶18-20

Dili ta angayng magtinguha ug dugang materyal nga mga butang. “Ang pagkamalimbongon sa bahandi” makatuok sa atong gugma kang Jehova, sa atong apresasyon sa Pulong sa Diyos, ug sa atong tinguha nga isulti kini sa uban. (Mat. 13:22) Aron atong maprotektahan ang mga butang nga gipiyal ni Jehova kanato, kinahanglan tang molihok dayon kon makakita tag kapeligrohan. Puwede tang mangandam kon unsay atong buhaton kon kalit nga motungha ang imoral nga esena, grabeng kapintasan, o apostatang impormasyon samtang nag-Internet ta o nagtan-awg sine o salida sa TV. Kon mangandam ta sa posibleng mahitabo, makalikay dayon ta sa espirituwal nga kadaot ug makapabiling hinlo sa atubangan ni Jehova. (Sal. 101:3; 1 Tim. 4:12) Kinahanglan natong bantayan ang bililhong mga butang nga gipiyal ni Jehova kanato—ang mga kamatuoran sa Bibliya ug ang pribilehiyo sa pagtudlo niini sa uban. Kon buhaton nato kana, mabatonan nato ang hinlong konsensiya, ang makapatagbaw nga kinabuhi, ug ang kalipay sa pagtabang sa uban nga makaila kang Jehova. w20.09 30 ¶16-19

Bawtismado ka ba? Kon mao, gipahayag na nimo sa publiko ang imong pagtuo kang Jehova ug ang imong pagkaandam nga moalagad uban sa iyang organisasyon. Karon, si Jehova naggiya sa iyang organisasyon sa paagi nga nagpakita sa iyang personalidad, katuyoan, ug mga sukdanan. Matikdi ang tulo ka hiyas ni Jehova nga atong makita sa iyang organisasyon. Una, “ang Diyos dili mapihigon.” (Buh. 10:34) Tungod sa gugma, gihatag ni Jehova ang iyang Anak ingong “lukat para sa tanan.” (1 Tim. 2:6; Juan 3:16) Si Jehova naggamit sa iyang katawhan sa pagsangyaw sa maayong balita ngadto sa tanan nga maminaw, aron daghan ang matabangan nga makabenepisyo sa lukat. Ikaduha, si Jehova maoy Diyos sa kahapsay ug kalinaw. (1 Cor. 14:33, 40) Busa, makadahom ta nga ang iyang mga magsisimba mag-alagad niya ingong hapsay ug malinawon nga grupo. Ikatulo, si Jehova ang “Dakong Instruktor.” (Isa. 30:21) Busa, ang iyang organisasyon naningkamot sa pagtudlo sa uban bahin sa iyang Pulong, ang Bibliya, diha sa kongregasyon ug sa publikong ministeryo. w20.10 20 ¶1-3