Agosto

Kadto lang suod kang Jesus ang makabenepisyo sa iyang halad lukat. Si Jesus miingon nga siya “andam mohatag sa iyang kinabuhi alang sa iyang mga higala.” (Juan 15:13) Ang matinumanong mga tawo nga nabuhi sa wala pa moanhi si Jesus sa yuta kinahanglang mokat-on bahin kaniya ug mahigugma kaniya. Ang mga tawo sama nila banhawon, pero bisan kining matarong nga mga alagad ni Jehova kinahanglang makigsuod kang Jesus aron ilang madawat ang kinabuhing walay kataposan. (Juan 17:3; Buh. 24:15; Heb. 11:8-12, 24-26, 31) Kalipay nato ang pagpakig-uban kang Jesus sa pagsangyaw ug pagtudlo sa maayong balita sa Gingharian. Sa dinhi pa si Jesus sa yuta, siya usa ka magtutudlo. Ug sukad sa iyang pagbalik sa langit, si Jesus, ingong ulo sa kongregasyon, padayong naggiya sa buluhatong pagsangyaw ug pagpanudlo. Iyang nakita ug gipabilhan ang imong mga paningkamot sa pagtabang sa mga tawo nga makaila kaniya ug sa iyang Amahan. Ang tinuod, molampos lang ta niining buluhatona sa tabang ni Jehova ug Jesus.—Juan 15:4. w20.04 22 ¶7-8

Sa sinugdan, ang mga titulong “hari sa amihanan” ug “hari sa habagatan” gihatag ngadto sa mga magmamando nga nahimutang sa amihanan ug habagatan sa nasod sa Israel. (Dan. 10:14) Hangtod sa Pentekostes 33 C.E., ang nasod sa Israel mao ang katawhan sa Diyos. Pero sukad niadto, giklaro ni Jehova nga giisip niya ang matinumanong mga tinun-an ni Jesus ingong iyang katawhan. Busa, ang dakong bahin sa tagna diha sa Daniel kapitulo 11 naghisgot dili bahin sa nasod sa Israel kondili sa mga sumusunod sa Kristo. (Buh. 2:1-4; Roma 9:6-8; Gal. 6:15, 16) Ug lainlaing magmamando o gobyerno ang nahimong hari sa amihanan ug hari sa habagatan sa lainlaing panahon. Bisan pa niana, managsama sila sa pipila ka butang. Una, ang mga hari nakiglabot sa katawhan sa Diyos sa importanteng paagi. Ikaduha, gipakita nila sa ilang pagtratar sa katawhan sa Diyos nga ilang gidumtan ang matuod nga Diyos, si Jehova. Ug ikatulo, ang duha ka hari nag-ilogay sa gahom. w20.05 3 ¶3-4

Si Jehova mahimong bisan unsa nga gikinahanglan aron matuman niya ang iyang katuyoan. Ipahinabo sab ni Jehova nga ang iyang dili perpektong mga alagad sa yuta mahimong bisan unsa nga gikinahanglan aron sila makaalagad kaniya ug makatuman sa iyang katuyoan. (Isa. 64:8) Niining mga paagiha, ipahinabo ni Jehova nga matuman ang iyang kabubut-on. Walay makapugong niya sa pagpalampos sa iyang katuyoan. (Isa. 46:10, 11) Mapalawom nato ang atong apresasyon sa atong langitnong Amahan pinaagi sa pagpamalandong sa iyang mga gihimo ug sa iyang gipahinabo nga atong mahimo. Pananglitan, kon atong hunahunaon ang tanang butang nga iyang gilalang, mahingangha kaayo ta. (Sal. 8:3, 4) Ug kon atong pamalandongon kon giunsa ta pagtabang ni Jehova sa pagbuhat sa iyang kabubut-on, mas molawom ang atong pagtahod kaniya. Ang ngalang Jehova kahibulongan gyod kaayo! Nalakip niini ang tanang butang bahin sa atong Amahan, ang tanan niyang gihimo, ug ang tanan niyang himoon.—Sal. 89:7, 8. w20.06 9-10 ¶6-7

Ang oksiheno maoy usa ka gas nga gikinahanglan sa tawo ug mananap aron makapabiling buhi. Gibanabana nga ang mga tawo ug hayop mohanggab ug usa ka gatos ka bilyong tonelada nga oksiheno kada tuig. Sila sab magpagawas ug basura nga gas nga gitawag ug carbon dioxide. Pero dili nila mahurot ug hanggab ang tanang oksiheno, ug ang atmospera dili mapuno ug carbon dioxide. Ngano? Tungod kay si Jehova naglalang pod ug mga tanom—gikan sa dagkong kahoy ngadto sa gagmayng algae—nga mosuhop ug carbon dioxide ug mopagawas ug oksiheno. Sa literal nga paagi, ang siklo sa oksiheno nagpamatuod sa giingon sa teksto karong adlawa. Sa unsang paagi molawom ang atong apresasyon sa atong talagsaong planeta ug sa tanang maayong butang niini? (Sal. 115:16) Ang usa ka paagi mao ang pagpamalandong sa mga butang nga gihimo ni Jehova. Kana magpalihok nato sa pagpasalamat kaniya kada adlaw tungod sa maayong butang nga iyang gihatag kanato. Ug ikapakita nato ang atong apresasyon sa atong planeta pinaagi sa pagtabang nga mamentinar ang kahinlo sa dapit nga atong gipuy-an. w20.05 22 ¶5, 7

Sa pag-atubang ni Jehova sa isyu nga gipatungha ni Satanas, gipakita niya ang kaalam, pailob, ug hustisya. Gipakita sab niya ang iyang dili hitupngang gahom sa daghang paagi. Labaw sa tanan, gipakita niya ang iyang gugma sa tanan niyang gihimo. (1 Juan 4:8) Si Jehova padayong mihimog mga paagi aron mabalaan ang iyang ngalan. Si Satanas padayong nagpasipala sa ngalan sa Diyos karon. Iyang gilimbongan ang mga tawo sa pagduhaduha kon ang Diyos ba gamhanan, makataronganon, maalamon, ug mahigugmaon. Pananglitan, si Satanas naningkamot sa pagkombinsir sa mga tawo nga si Jehova dili mao ang Maglalalang. Ug kon modawat sila nga dunay Diyos, patuohon sila ni Satanas nga ang Diyos ug ang Iyang mga sukdanan estrikto ug dili makataronganon. Ginatudloan pa gani niya ang mga tawo nga si Jehova walay kasingkasing nga Diyos, nga nagsunog sa mga tawo sa impiyerno. Ug kon motuo sila niana nga mga bakak, sayon ra para nila nga isalikway ang matarong nga pagmando ni Jehova. Hangtod nga di pa malaglag si Satanas, puntiryahon sab ka niya. Molampos kaha siya? w20.06 5-6 ¶13-15

Sa daghang kongregasyon, dunay mga igsoon nga naningkamot sa pagkat-on ug bag-ong pinulongan. Tingali maglisod sila pagpahayag sa ilang gihunahuna. Pero kon dili ta magpokus sa ilang pagkadili-larino, makita nato ang ilang gugma kang Jehova ug ang ilang tinguha nga alagaran siya. Kon atong makita kining nindot nga mga hiyas, ato gyong pabilhan ug tahoron ang maong mga igsoon. Dili ta moingon “Wala ko magkinahanglan ninyo” tungod lang kay dili sila larino sa atong pinulongan. (1 Cor. 12:21) Si Jehova naghatag kanatog nindot nga pribilehiyo nga makabaton ug lunà diha sa kongregasyon. Kita man babaye o lalaki, tagsaanon o minyo, batan-on o tigulang, larino man o dili sa usa ka pinulongan, kita bililhon kang Jehova ug sa usag usa. (Roma 12:4, 5; Col. 3:10) Hinaot nga padayon tang mangitag dugang nga mga paagi aron mapabilhan ang atong lunà ug ang lunà sa uban diha sa kongregasyon ni Jehova. w20.08 31 ¶20-22

Si apostol Pablo wala maghunahuna nga dili na gyod mahimong tinun-an ang mga taga-Atenas, bisan tuod ang ilang siyudad napunog idolatriya, seksuwal nga imoralidad, ug paganong pilosopiya. Wala sab siya moundang ug sangyaw kanila bisag giinsulto nila siya. Si Pablo mismo nahimong Kristohanon, bisag kaniadto siya “tigpasipala, maglulutos, ug bagis.” (1 Tim. 1:13) Sama nga nakita ni Jesus nga puwedeng mahimong tinun-an si Pablo, nakita sab ni Pablo nga puwedeng mahimong tinun-an ang mga taga-Atenas. Ug wala siya masayop. (Buh. 9:13-15) Sa unang siglo, lainlaing matang sa tawo ang nahimong tinun-an ni Jesus. Dihang misulat si Pablo sa mga Kristohanon nga nagpuyo sa Gregong siyudad sa Corinto, siya miingon nga ang pipila ka membro sa kongregasyon maoy kanhing mga kriminal o imoral kaayo. Siya midugang: “Apan kamo nahugasan na.” (1 Cor. 6:9-11) Kon ikaw to, maghunahuna kaha ka nga magbag-o sila ug mahimong tinun-an? w20.04 12 ¶15-16

Ang mga ansiyano dili dayon maghunahuna nga daotan ang usa ka tawo nga nagduhaduha kon duna bay kaayohan ang pag-alagad kang Jehova. Sabton hinuon nila kon nganong nasulti o nabuhat kadto sa igsoon. Dayon, gamiton sa mga ansiyano ang Bibliya sa pagdasig kaniya. Si propetang Elias miikyas gikan kang Rayna Jezebel. (1 Hari 19:1-3) Mibati siya nga walay pulos ang iyang pag-alagad, ug gusto na niyang mamatay. (1 Hari 19:10) Imbes hukmang daotan si Elias, gipasaligan siya ni Jehova nga wala siya mag-inusara, nga siya makasalig sa gahom sa Diyos, ug duna pay daghang buluhaton nga ipahimo kaniya. Si Jehova naminaw pag-ayo sa mga kabalaka ni Elias ug naghatag kaniyag bag-ong mga asaynment. (1 Hari 19:11-16, 18) Unsay leksiyon? Kitang tanan, ilabina ang mga ansiyano, kinahanglang buotan sa mga karnero ni Jehova. Dihang ang usa mopahayag sa iyang kasuko o mobati nga dili na angayng kaluy-an ni Jehova, ang mga ansiyano maminaw samtang ibubo niya ang iyang kasingkasing. Dayon pasaligan nila siya nga gimahal siya ni Jehova. w20.06 21-22 ¶13-14

Gusto ni Jehova nga mag-enjoy ta uban sa atong mga higala ug pamilya. (Sal. 133:1) Si Jesus may suod nga mga higala. (Juan 15:15) Ang Bibliya naghisgot sa mga kaayohan kon duna tay tinuod nga mga higala. (Prov. 18:24) Ug nag-ingon ni nga dili maayong ilain nato ang kaugalingon. (Prov. 18:1) Daghan ang naghunahuna nga ang social media maoy paagi nga makabaton ug daghang higala ug dili magmingaw. Pero kinahanglan tang magbantay sa paggamit niini. Gipakita sa mga research nga ang pagsigeg tan-aw sa mga post diha sa social media moresulta hinuon sa kamingaw ug kaguol. Ngano? Ang usa ka posibleng rason mao nga ang mga tawo sagad mag-post diha sa social media sa mga letrato bahin sa importanteng mga hitabo sa ilang kinabuhi, nga magpakita lang sa kinanindotang mga letrato nila, sa ilang mga higala, ug sa nindot nga mga dapit nga ilang naadtoan. Ang tawo nga magsigeg tan-aw sa maong mga letrato makahunahuna tingali nga ang iyang kinabuhi laay ug way lami. w20.07 5-6 ¶12-13

Ang Oktubre 1, 1988 nga Bantayanang Torre nag-ingon: “Ilhon sa mga ansiano nga si Kristo, pinaagi sa balaang espiritu, makatultol sa kaisipan ni bisan kinsang ansiano sa lawas sa mga ansiano sa pagtagana sa prinsipyo sa Bibliya nga gikinahanglan sa pagsagubang sa bisan unsang kahimtang o sa paghimog importanteng desisyon. (Buhat 15:7-15) Walay usa ka ansiano ang nagbaton sa monopoliya sa espiritu sulod sa lawas.” Ang ansiyano nga nagtahod sa iyang kaubang mga ansiyano dili kanunayng mounag sulti panahon sa ilang miting. Likayan niya nga siya na lay magsigeg sulti, ug dili siya maghunahuna nga ang iyang opinyon kanunayng husto. Hinunoa, mapainubsanon niyang isulti ang iyang opinyon. Maminaw siya pag-ayo sa opinyon sa uban. Labaw sa tanan, malipay siyang maghisgot ug tambag sa Bibliya ug mosunod sa mga instruksiyon sa “matinumanon ug maalamong ulipon.” (Mat. 24:45-47) Kon ang mga ansiyano magpakitag gugma ug pagtahod dihang magmiting sila, ang balaang espiritu sa Diyos mag-uban kanila, ug kini mogiya nila sa paghimog hustong mga desisyon.—Sant. 3:17, 18. w20.08 27 ¶5-6

Ang mga kaaway ni apostol Pablo gamhanan kaayo kon itandi kaniya. Sagad, ila siyang bunalan ug prisohon. Dugang pa, si Pablo nakasinatig dili maayong pagtratar sa mga tawong higala unta niya. Ang pipila diha sa kongregasyon misupak pa gani niya. (2 Cor. 12:11; Filip. 3:18) Pero nagmadaogon si Pablo sa tanan nga misupak niya. Sa unsang paagi? Nagpadayon siya sa pagsangyaw bisan pa sa mga pagsupak. Nagmaunongon siya sa mga igsoon bisan dihang napasakitan nila siya. Ug labaw sa tanan, nagmatinumanon siya sa Diyos hangtod sa iyang kamatayon. (2 Tim. 4:8) Nahimo niya kanang tanan, dili tungod sa iyang kaugalingong kusog, kondili tungod kay misalig siya kang Jehova. Nakasinati ka bag mga panginsulto o paglutos? Tumong nimo ang pagtabang sa mga tawo nga makakat-on bahin kang Jehova ug sa Bibliya. Mahimo nimo kana pinaagi sa paggamit sa Bibliya sa pagtubag sa pangutana sa mga tawo, pinaagi sa pagpakitag pagtahod ug kaayo niadtong dili maayog pagtratar kanimo, ug pinaagi sa pagbuhat ug maayo sa tanan, bisan sa imong mga kaaway.—Mat. 5:44; 1 Ped. 3:15-17. w20.07 17-18 ¶14-15

Makaingon ba gyod ta nga mapainubsanon si Jehova? Oo, sama sa giingon ni David sa teksto karong adlawa. (Sal. 18:35) Tingali naghunahuna si David sa panahon nga si propetang Samuel miadto sa balay sa amahan ni David aron dihogan ang sunod nga hari sa Israel. Si David ang kamanghoran sa walo ka anak nga lalaki. Pero siya ang gipili ni Jehova nga mopuli kang Haring Saul. (1 Sam. 16:1, 10-13) Si David mouyon gyod sa giingon sa usa ka salmista bahin kang Jehova: “Siya moyuko aron mosud-ong sa langit ug sa yuta. Bangonon niya ang timawa gikan sa abog. Patindogon niya ang kabos . . . aron palingkoron siya uban sa mga halangdon.” (Sal. 113:6-8) Gipakita ni Jehova nga siya mapainubsanon diha sa iyang paagi sa pagtratar sa dili hingpit nga mga tawo. Gawas nga dawaton niya ang atong pagsimba, isipon sab ta niya ingong iyang mga higala. (Sal. 25:14) Aron mahimo nato siyang higala, si Jehova mihimo sa unang lakang pinaagi sa pagtagana sa iyang Anak ingong halad para sa atong mga sala. Maluluy-on ug mabination gyod si Jehova kanato! w20.08 8 ¶1-3

Si Jehova nakatakda nag adlaw ug oras kon kanus-a niya taposon kining daang sistema. (Mat. 24:36) Siya magpailob ug dili molihok hangtod moabot kanang panahona. Nangandoy siya sa pagbanhaw sa mga patay, pero nagpailob siya. (Job 14:14, 15) Nagpaabot siya sa hustong panahon nga banhawon sila. (Juan 5:28) Duna tay maayong mga rason nga pabilhan ang pailob ni Jehova. Hunahunaa ra: Tungod sa pailob ni Jehova, daghang tawo, apil na ta, ang nahatagag kahigayonan nga “maghinulsol.” Gusto ni Jehova nga daghang tawo kutob sa maarangan ang mahatagag kahigayonan nga mabuhi sa walay kataposan. Busa ipakita nato nga atong gipabilhan ang iyang pailob. Sa unsang paagi? Pinaagi sa pagpaningkamot nga makaplagan kadtong “nakiling sa pagdawat sa kamatuoran nga motultol sa kinabuhing walay kataposan” ug matabangan sila sa paghigugma kang Jehova ug sa pag-alagad kaniya. (Buh. 13:48) Pinaagi niana, sila makabenepisyo sa pailob ni Jehova sama kanato. w20.08 18 ¶17

Ang makat-onan sa Bible study sa pagtuon kinahanglang makaabot dili lang sa hunahuna kondili sa kasingkasing sab. Ngano? Ang atong kasingkasing—nga nag-apil sa atong tinguha, emosyon, ug pagbati—magpalihok nato sa pagpadapat sa atong nakat-onan. Si Jesus migamit ug lohikal nga pangatarongan nga nakapainteres sa mga tawo. Pero sila misunod kaniya kay natandog sab ang ilang kasingkasing. (Luc. 24:15, 27, 32) Kinahanglang makita sa imong Bible study nga si Jehova tinuod nga Persona nga puwede niyang masuod ug isipon ingong iyang Amahan, Diyos, ug Higala. (Sal. 25:5) Panahon sa pagtuon, ipasiugda ang nindot nga mga hiyas sa atong Diyos. (Ex. 34:5, 6; 1 Ped. 5:6, 7) Bisan unsa pay inyong hisgotan, hatagig pagtagad kon unsang klaseha sa Persona si Jehova. Tabangi ang Bible study nga maapresyar ang nindot nga mga hiyas ni Jehova—ang iyang gugma, pagkamaayo, ug pagkamabination. Si Jesus miingon nga “ang kinalabwan ug unang sugo” mao ang ‘paghigugma kang Jehova nga imong Diyos.’ (Mat. 22:37, 38) Tabangi ang imong Bible study nga higugmaon si Jehova. w20.10 10 ¶12

Si Jesus nagtahod sa tanang babaye. (Juan 4:27) Pero, mas dako pa siyag pagtahod sa mga babaye nga naghimo sa kabubut-on sa iyang Amahan. Sila giisip niya nga iyang mga igsoon ug gihisgotan uban sa mga lalaki nga iyang giisip nga bahin sa iyang espirituwal nga pamilya. (Mat. 12:50) Si Jesus sab tinuod nilang higala. Tagda ang iyang pagpakighigala kang Maria ug Marta, nga dayag mga dalaga. (Luc. 10:38-42) Sa pulong ug buhat, klaro nga gipabati ni Jesus kanila nga dali silang makaduol kaniya. Pananglitan, si Maria wala maulaw nga molingkod sa iyang tiilan ingong tinun-an. Ug si Marta, dihang naglagot kay wala tabangi ni Maria, wala magduhaduha sa pagsulti kang Jesus sa iyang gihunahuna. Sa maong tapoktapok, gitabangan ni Jesus ang duha ka babaye nga makakat-on ug importanteng mga leksiyon. Ug gipakita ni Jesus nga gimahal niya kini nga mga babaye ug ang ilang igsoon nga si Lazaro pinaagi sa pagbisita kanila sa uban pang higayon. (Juan 12:1-3) Busa dili ikatingala nga dihang grabeng nasakit si Lazaro, nahibalo si Maria ug Marta nga makapangayo silag tabang kang Jesus.—Juan 11:3. w20.09 20 ¶3; 21 ¶6

Ang mga tinun-an ni Jesus nagdahom nga ang Gingharian “madayag dayon” ug magluwas kanila gikan sa pagmando sa Roma. Kita nangandoy sa panahon dihang ang Gingharian sa Diyos magwagtang sa pagkadaotan ug magpatungha sa bag-ong kalibotan nga puno sa matarong nga mga tawo. (2 Ped. 3:13) Pero kinahanglan tang magmapailobon ug magpaabot sa gitakdang panahon ni Jehova. Gihatagan ni Jehova si Noe ug igong panahon sa pagtukod sa arka ug sa pag-alagad ingong “magwawali sa pagkamatarong.” (2 Ped. 2:5; 1 Ped. 3:20) Si Jehova namati dihang si Abraham balikbalik nga nangutana kaniya bahin sa Iyang desisyon nga laglagon ang daotang mga tawo sa mga siyudad sa Sodoma ug Gomora. (Gen. 18:20-33) Sa daghang katuigan, si Jehova mapailobon kaayo sa dili matinumanong nasod sa Israel. (Neh. 9:30, 31) Karon, makita nato nga si Jehova mapailobon kay naghatag siyag panahon nga “maghinulsol” ang tanan nga gusto niyang makabig. (2 Ped. 3:9; Juan 6:44; 1 Tim. 2:3, 4) Ang ehemplo ni Jehova naghatag natog maayong rason nga magmapailobon samtang nagpadayon ta sa pagsangyaw ug pagpanudlo. w20.09 10 ¶8-9

Dihang banhawon ni Jehova ang mga tawo, iyang ipasig-uli ang ilang panumdoman ug personalidad. Hunahunaa ra kon unsay gipasabot niana. Gimahal ka pag-ayo ni Jehova nga iyang ginatan-aw ug ginatiman-an ang tanan nimong gihunahuna, gibati, gisulti, ug gibuhat. Busa kon kinahanglan ka niyang banhawon, dali ra niyang mapasig-uli ang imong panumdoman, panghunahuna, ug personalidad. Si Haring David nahibalo nga nakaila pag-ayo si Jehova sa matag usa kanato. (Sal. 139:1-4) Sa unsang paagi ang pagkasayod niini makaapektar kanato karon? Dihang atong pamalandongon nga si Jehova nakaila pag-ayo kanato, dili ta angayng mabalaka. Ngano? Hinumdomi nga pinangga kaayo ta ni Jehova. Giisip niya nga espesyal ang matag usa kanato. Gitiman-an niya pag-ayo ang tanang nahitabo sa atong kinabuhi nga nakaimpluwensiya sa atong pagkatawo. Makapahupay kaayo na! Dili gyod ta angayng maghunahuna nga nag-inusara ta. Kada minuto, si Jehova naa tupad nato, nga nangitag kahigayonan sa pagtabang kanato.—2 Cron. 16:9. w20.08 17 ¶13-14

Si Jehova ganahan kaayong motudlo sa iyang katawhan. Gusto niya nga sila makaila kaniya, mahigugma kaniya, ug mabuhi sa walay kataposan ingong iyang pinalanggang mga anak. Kining tanan mahimong imposible kon wala ta niya tudloi. (Juan 17:3) Gigamit ni Jehova ang unang siglong kongregasyon sa pagtudlo sa iyang katawhan. (Col. 1:9, 10) Ang balaang espiritu—ang “magtatabang” nga gisaad ni Jesus—mitabang sab sa mga tinun-an. (Juan 14:16) Nakatabang ni kanila nga mas masabtan ang Pulong sa Diyos ug mahinumdoman ang tanang gisulti ug gitudlo ni Jesus, nga sa ulahi girekord diha sa mga Ebanghelyo. Kini nga kahibalo nakapalig-on sa pagtuo sa unang siglong mga Kristohanon ug sa ilang gugma sa Diyos, sa iyang Anak, ug sa usag usa. Si Jehova nagtagna nga “sa kaulahiang bahin sa mga adlaw,” ang katawhan sa tanang kanasoran manungas ngadto sa iyang simbolikong bukid aron matudloan bahin sa iyang mga dalan. (Isa. 2:2, 3) Nakita nato nga natuman ang maong tagna. w20.10 24 ¶14-15

Ngano kahang isalikway man sa usa ang maayong tambag gikan sa mahigugmaong higala? Tungod sa garbo. Gusto sa mga tawong garboso nga “gitikon [sa uban] ang ilang dalunggan.” Sila ‘dili maminaw sa kamatuoran.’ (2 Tim. 4:3, 4) Sila naghunahuna nga sila mas maalamon ug mas importante kay sa uban. Pero, si apostol Pablo misulat: “Kon ang usa naghunahuna nga importante siya apan ang tinuod dili diay, gilimbongan niya ang iyang kaugalingon.” (Gal. 6:3) Gipatin-aw kini ni Haring Solomon. Siya misulat: “Mas maayo pa ang bata nga kabos apan maalamon kay sa tigulang nga hari apan hungog, nga dili na mamati ug tambag.” (Eccl. 4:13) Hunahunaa ang gihimo ni apostol Pedro dihang gibadlong siya ni apostol Pablo atubangan sa tanan. (Gal. 2:11-14) Puwede untang masuko si Pedro sa giingon ni Pablo, nga magpokus sa iyang paagi sa pagsulti niana ug kon diin nâ niya gisulti. Pero maalamon si Pedro. Gidawat niya ang tambag ug wala siya magdumot kang Pablo. Hinunoa, gitawag niya si Pablo sa ulahi ingong ‘minahal nga igsoon.’—2 Ped. 3:15. w20.11 21 ¶9, 11-12

Unsay makatabang pag-ayo sa mga Bible study nga mouswag sa espirituwal? Ang pagtambong sa mga tigom. Ang binase sa Bibliya nga instruksiyon nga ilang madawat diha sa mga tigom makapalawom sa ilang kahibalo, makapalig-on sa ilang pagtuo, ug makapadako sa ilang gugma sa Diyos. (Buh. 15:30-32) Puwede sab sultihan sa magmamantala ang study nga napalihok siya sa pagsunod sa mga sugo sa Diyos tungod sa iyang nagkalawom nga gugma kang Jehova. (2 Cor. 7:1; Filip. 4:13) Ug dihang ang mga Bible study makailailag lainlaing matinumanong magmamantala, ang mga study makakat-on sa ilang ehemplo kon unsaon pagtuman ang sugo sa Kristo nga higugmaon ang Diyos ug ang isigkatawo. (Juan 13:35; 1 Tim. 4:12) Makita nila nga ang mga magmamantala nakasinatig mga kalisdanan nga susama sa ilang giatubang ug makat-onan nila nga kaya nilang himoon ang mga kausaban aron mahimong tinun-an sa Kristo. (Deut. 30:11) Ang matag usa diha sa kongregasyon dunay mahimo aron matabangan ang mga Bible study nga mouswag sa espirituwal.—Mat. 5:16. w20.11 5-6 ¶10-12

Tingali naghisgot si apostol Pablo bahin sa iyang pagpakigbugno ug tinuod nga mga mananap sa arena sa Efeso. (2 Cor. 1:8; 4:10; 11:23) O tingali ang iyang gitumong mao ang paglutos gikan sa mga Hudiyo o sa uban pa nga samag “bangis nga mga mananap.” (Buh. 19:26-34; 1 Cor. 16:9) Bisan unsa pa man, si Pablo nakasinatig grabeng mga kapeligrohan, pero positibo gihapon ang iyang panglantaw sa umaabot. (1 Cor. 15:30, 31; 2 Cor. 4:16-18) Nagkinabuhi ta sa peligrosong mga panahon. Ang pipila sa atong mga igsoon nabiktima sa krimen. Ang uban nagpuyo sa lugar diin dunay gubat ug mibating dili luwas. Sa ubang lugar, ang katawhan ni Jehova walay kagawasan sa pagsangyaw, ug sila nag-alagad kaniya bisag posibleng mapriso sila o mamatay. Bisan pa niana, kining tanang mga igsoon nagpadayon sa pagsimba kang Jehova, ug sila maayong ehemplo para nato. Wala sila mahadlok kay nahibalo sila nga bisag mamatay sila karon, si Jehova nagsaad nilag mas nindot nga kaugmaon. w20.12 9 ¶3-4

May higayon ba nga naluya ka kay ang mga tawo sa inyong teritoryo morag dili interesado o kay kadaghanan sa mga balay walay tawo? Sa ingon ana nga mga kahimtang, unsay atong himoon aron magpabilin tang malipayon o mahimo pa ganing mas malipayon? Importante nga mabatonan nato ang hustong panglantaw sa atong ministeryo. Unsay gipasabot niana? Padayong magpokus diha sa pagsangyaw sa ngalan sa Diyos ug sa Gingharian. Si Jesus klarong miingon nga pipila lang ang mosubay sa dalan sa kinabuhi. (Mat. 7:13, 14) Sa dihang magsangyaw ta, pribilehiyo nga makauban nato sa buluhaton si Jehova, Jesus, ug ang mga anghel. (Mat. 28:19, 20; Pin. 14:6, 7) Ginakabig ni Jehova kadtong gustong moalagad niya. (Juan 6:44) Busa kon ang usa ka tawo dili maminaw sa atong mensahe niining higayona, basin sa sunod maminaw na siya. “Ang kaluya sa buot mahimong gamiton ni Satanas ingong hinagiban aron mosurender ta,” miingon ang sister nga si Deborah. Pero ang mga hinagiban ni Satanas dili magsilbi kang Jehova nga Diyos. w20.12 26-27 ¶18-19, 21

Daghang maunongong Kristohanon ang kinahanglang motrabaho nga bug-os panahon aron masuportahan ang ilang kaugalingon ug ang ilang pamilya. Bisan pa niana, maunongong gisuportahan niini nga mga magmamantala ang organisasyon sa Diyos kutob sa ilang maarangan. Pananglitan, ang pipila nagtabang sa disaster relief, ang uban nagboluntaryo sa mga proyekto sa pagpanukod, ug ang tanan dunay kahigayonan nga moamot para sa tibuok kalibotang buluhaton. Ila kining gihimo tungod sa ilang gugma sa Diyos ug sa isigkatawo. Kada semana, atong gipamatud-an nga atong gimahal ang mga igsoon pinaagi sa pagtambong sa mga tigom ug pagpakigbahin niana. Bisag gikapoy tingali ta, motambong ta. Bisag gikulbaan tingali ta, mokomento ta. Ug bisag naa tay kaugalingong mga problema, dasigon nato ang uban una ug human sa tigom. (Heb. 10:24, 25) Mapasalamaton gyod ta sa mga gihimo sa atong minahal nga mga igsoon! w21.01 10 ¶11

Ang tawong garboso maglisod paghatag ug komendasyon, kay mas gusto niya nga siyay dayegon. Iyang itandi ang iyang kaugalingon sa uban ug maningkamot siya nga molabaw kanila. Imbes iyang bansayon ang uban ug hatagag awtoridad, tingali maghunahuna siya nga kinahanglang siyay mangunay sa paghimo sa usa ka butang, kay dili makapasar niya ang trabaho sa uban. Ang tawong garboso sagad ambisyoso ug masinahon. Kon namatikdan nato nga may pagkagarboso ta, kinahanglan nga kinasingkasing tang mohangyo kang Jehova nga tabangan ta nga ‘mabag-o ang atong hunahuna’ aron kining daotang kinaiya dili makagamot sa atong kasingkasing. (Roma 12:2) Mapasalamaton gyod ta sa ehemplo ni Jehova! (Sal. 18:35) Nakita nato ang iyang pagkamapainubsanon diha sa pagtratar niya sa iyang mga alagad, ug gusto nato siyang sundogon. Gusto sab natong sundogon ang maayong mga ehemplo diha sa Bibliya sa mga tawong makasaranganon nga nakapribilehiyo nga maglakaw uban sa Diyos. Hinaot kanunay natong ihatag kang Jehova ang pasidungog ug himaya nga angay kaniya.—Pin. 4:11. w20.08 13 ¶19-20

Ang kaminyoon hingpit nga regalo gikan sa Diyos, pero ang mga tawo dili hingpit. (1 Juan 1:8) Busa, ang Pulong sa Diyos nagpasidaan sa mga magtiayon nga sila makasinatig mga problema nga gitawag ug “kasakitan sa . . . unod.” Gidahom ni Jehova nga ang Kristohanong mga bana magtagana sa espirituwal, emosyonal, ug materyal nga panginahanglan sa ilang pamilya. (1 Tim. 5:8) Pero bisag ang minyong mga sister busy kaayo, kinahanglang maningkamot sila nga mogahin ug panahon kada adlaw sa pagbasa sa Pulong sa Diyos ug pagpamalandong niini ug sa pag-ampo kang Jehova nga kinasingkasing. Dili tingali ni sayon. Ang mga asawa daghag buluhaton, pero kinahanglan nga gahinan nila kinig panahon. Ngano? Tungod kay gusto ni Jehova nga ang matag usa kanato mahimo niyang higala ug magpabiling suod kaniya. (Buh. 17:27) Siyempre, ang asawa kinahanglan tingaling maningkamot pag-ayo sa pagpasakop sa iyang dili hingpit nga bana. Pero, mahimong mas sayon para niya ang pagtuman sa papel nga gihatag ni Jehova kaniya kon iyang masabtan ug dawaton ang mga rason diha sa Bibliya kon nganong angay siyang magpasakop. w21.02 9 ¶3, 6-7

Ang mga pagsulay puwedeng ipakasama sa kalayo nga gamiton sa pagsalsal ug sulab nga puthaw. Dihang ang sulab initon ug pabugnawon, ang puthaw mas molig-on. Sa susama, dihang kita molahutay sa mga pagsulay, ang atong pagtuo molig-on. Kanay rason nga si Santiago misulat: “Ipatapos sa pagkamalahutayon ang katuyoan niini, aron nga mahimo mong bug-os ug maayo sa tanang bahin.” (Sant. 1:4) Sa dihang makita nato nga ang mga pagsulay mas makapalig-on sa atong pagtuo, malahutay nato kini uban ang kalipay. Sa iyang sulat, gihisgotan sab ni Santiago ang pipila ka butang nga makapawala sa atong kalipay. Ang usa sa makapawala sa kalipay mao nga wala ta mahibalo kon unsay buhaton. Sa dihang makaatubang ug mga problema, gusto natong mangayog tabang kang Jehova sa paghimog mga desisyon nga makapalipay niya, makahatag ug kaayohan sa atong mga igsoon, ug makatabang nato sa pagpabiling matinumanon kang Jehova. (Jer. 10:23) Nagkinahanglan tag kaalam aron mahibalo kon unsay angay natong buhaton ug isulti dihang lutoson ta. Kon wala ta mahibalo kon unsay buhaton, basin mawad-an tag paglaom, ug dali rang mawala ang atong kalipay. w21.02 28 ¶7-9

Si Jehova nagpakitag ehemplo kanato. Gihigugma ta niya pag-ayo nga kon kita magmaunongon kaniya, walay makabulag nato kaniya. (Roma 8:38, 39) Ang Gregong pulong para sa “pag-ayo” dunay ideya nga mangab-ot o manlimbasog pa gani. Usahay kinahanglan tingali tang “mangab-ot” ug “manlimbasog” aron mobati tag mabinationg pagmahal sa usa ka igsoon. Sa dihang ang uban makapasuko nato, kinahanglang padayon tang “mag-inantosay tungod sa gugma, nga maningkamot pag-ayo nga makigdinaitay aron mamentinar ang panaghiusa nga [atong] nabatonan pinaagi sa balaang espiritu.” (Efe. 4:1-3) Dili ta magpokus sa kasaypanan sa mga igsoon ug maningkamot ta nga isipon sila sama sa pag-isip ni Jehova kanila. (1 Sam. 16:7; Sal. 130:3) Dili kanunayng sayon ang pagpakitag mabinationg pagmahal sa atong mga igsoon, ilabina dihang makita nato ang ilang kasaypanan. Dayag nga nalisdan pod niini ang unang siglong mga Kristohanon, sama sa nahitabo kang Euodia ug Sintique. Giawhag sila ni apostol Pablo sa “pagbaton ug samang panghunahuna diha sa Ginoo.”—Filip. 4:2, 3. w21.01 22-23 ¶10-11

Giapresyar pag-ayo sa edarang mga igsoon kamong mga batan-ong lalaki nga nag-alagad kang Jehova uban kanila! (Sof. 3:9) Gipabilhan nila ang inyong kadasig ug kalagsik sa paghimo sa mga buluhaton nga gihatag kaninyo. Gimahal gyod mo nila! Mga batan-ong brader, ayawg kalimti nga si Jehova nagmahal ug nagsalig kaninyo. Siya nagtagna nga sa kataposang mga adlaw, dunay daghang batan-ong lalaki nga kinabubut-ong magtanyag sa ilang kaugalingon. (Sal. 110:1-3) Siya nahibalo nga kamo nahigugma kaniya ug gustong moalagad kaniya kutob sa inyong maarangan. Busa magmapailobon sa uban, ug magmapailobon sa inyong kaugalingon. Kon masayop mo, dawata ang pagbansay ug disiplina nga ihatag kaninyo, nga mag-isip niini ingong gikan kang Jehova. (Heb. 12:6) Magkugi diha sa bisan unsang asaynment nga ihatag kaninyo. Ug labaw sa tanan, sa bisan unsa nga inyong buhaton, lipaya ang inyong langitnong Amahan.—Prov. 27:11. w21.03 7 ¶17-18

Daghag rason kon nganong maluya ta—usahay tungod sa atong kaugalingon, usahay tungod sa uban. Apil tingali niana ang atong kasaypanan, kahuyangan, ug dili maayong panglawas. O maluya tingali ta kay wala ihatag kanato ang asaynment nga gusto natong madawat diha sa pag-alagad kang Jehova, o kay ang kadaghanan sa mga tawo sa atong teritoryo dili maminaw sa mensahe nga atong gisangyaw. Dali ra kaayo tang mobatig sobrang kaguol tungod sa atong kasaypanan ug kahuyangan. Busa, maghunahuna tingali ta nga tungod sa atong kasaypanan, dili na ta papuy-on ni Jehova sa Paraiso. Peligroso ang maong panghunahuna. Gipakita sa Bibliya nga gawas kang Jesu-Kristo, ang tanang tawo “nakasala.” (Roma 3:23) Pero ang Awtor sa Bibliya dili magpokus sa atong kasaypanan o magdahom ug kahingpitan. Hinuon, siya usa ka mahigugmaong Amahan nga gustong motabang nato. Mapailobon sab siya. Nakita niya ang atong mga paningkamot nga madaog ang atong kahuyangan ug ang atong sobrang kaguol tungod sa atong kasaypanan, ug andam siyang motabang kanato.—Roma 7:18, 19. w20.12 22 ¶1-3

Kitang tanan samag nagbiyahe. Ang atong destinasyon, o tumong, mao ang pagpuyo sa bag-ong kalibotan ubos sa mahigugmaong pagmando ni Jehova. Kada adlaw, naningkamot ta sa pagsubay sa dalan nga motultol sa kinabuhi. Pero sama sa giingon ni Jesus, ang maong dalan gamay ug usahay lisod subayon. (Mat. 7:13, 14) Kita dili hingpit, ug dali ra tang mahitipas sa maong dalan. (Gal. 6:1) Aron makapabilin ta sa gamayng dalan nga motultol sa kinabuhi, kinahanglang andam tang mohimog kausaban sa atong panghunahuna, pagbati, ug binuhatan. Si apostol Pablo nagdasig kanato “sa paghimog gikinahanglang mga kausaban.” Dili sayon ang pagsusi sa atong panghunahuna ug pagbati. Ngano? Tungod kay ang atong kasingkasing malimbongon, ug busa lisod tingali natong mahibaloan kon unsay ipabuhat niini kanato. (Jer. 17:9) Dali ra tang malimbongan sa “bakak nga pangatarongan.” (Sant. 1:22) Busa, kinahanglan natong gamiton ang Pulong sa Diyos sa pagsusi sa atong kaugalingon. Ipadayag sa Pulong sa Diyos kon unsa gyod ta, ang atong kinasulorang “mga hunahuna ug mga intensiyon.”—Heb. 4:12, 13. w20.11 18 ¶1-3

Kon kita mapainubsanon ug makasaranganon, mahimo tang mas malipayon. Ngano? Kon atong giila ang atong mga limitasyon, mapasalamaton ta sa bisan unsang tabang nga ihatag sa uban. Pananglitan, hunahunaa ang higayon dihang giayo ni Jesus ang 10 ka sanlahon. Usa lang kanila ang mibalik aron pasalamatan si Jesus sa pag-ayo sa iyang makahahadlok nga sakit. Kining mapainubsanon ug makasaranganon nga tawo nahibalo nga dili siya maulian kon wala ang tabang ni Jesus, busa mapasalamaton siya sa tabang nga iyang nadawat, ug iyang gihimaya ang Diyos tungod niini. (Luc. 17:11-19) Ang tawong mapainubsanon ug makasaranganon posibleng makabaton ug maayong relasyon sa uban ug masuod kanila. Ngano? Iyang giila nga ang uban dunay maayong mga hiyas ug siya may pagsalig kanila. Malipay siya dihang molampos ang uban sa bisan unsang asaynment nga ilang madawat, ug dali siyang mohatag ug komendasyon ug pasidungog kanila. w20.08 12 ¶17-18