Septiyembre

Si Pedro migamit ug medyo lahi nga mga pulong dihang iyang gikutlo ang tagna ni Joel. (Buh. 2:16, 17) Imbes sugdan kini sa mga pulong nga “human niana,” si Pedro miingon: “Ug sa kataposang mga adlaw”—niini nga konteksto nagpasabot sa kataposang mga adlaw sa Hudiyong sistema sa mga butang—ang espiritu sa Diyos ibubo ngadto “sa tanang matang sa tawo.” Gipakita niini nga milabay pa ang taastaas nga panahon una natuman ang tagna ni Joel. Human ibubo sa Diyos ang iyang espiritu sa mga Kristohanon sa unang siglo, mas miuswag pa ang buluhatong pagsangyaw. Sa sulat ni apostol Pablo sa mga taga-Colosas niadtong mga 61 C.E., nakaingon siya nga ang maayong balita nasangyaw na “sa tibuok kalibotan.” (Col. 1:23) Sa panahon ni Pablo, ang “tibuok kalibotan” nagtumong sa mga lugar nga maadtoan sa mga tawo. Sa tabang sa gamhanang balaang espiritu ni Jehova, ang pagsangyaw mas mikaylap pa sa atong panahon—“hangtod sa mga kinatumyan sa yuta”!—Buh. 13:47. w20.04 6-7 ¶15-16

Gimahal ni Jehova ang matag usa kanato, apil si bisan kinsang karnero nga mipalayo sa iyang kongregasyon. (Mat. 18:12-14) Ang Diyos nagsaad nga iyang pangitaon ang iyang mga karnero nga nawala ug tabangan sila nga mabalik ang ilang maayong relasyon kaniya. Ug iyang gisulti kon unsay iyang himoon, parehas sa himoon sa Israelinhong magbalantay dihang mawala ang usa ka karnero. (Ezeq. 34:12-16) Una, pangitaon sa magbalantay ang karnero, ug kini nagkinahanglag dakong panahon ug paningkamot. Dihang iya na kining makit-an, iya kining dad-og balik sa panon. Ug kon ang karnero nasamdan o gigutom, tabangan sa magbalantay ang naluya nga karnero, bugkosan ang samad niini, kugoson kini, ug pakan-on. Ang mga ansiyano, nga maoy magbalantay sa “panon sa Diyos,” kinahanglan sab nga mohimo niini aron tabangan si bisan kinsa nga mipalayo sa kongregasyon. (1 Ped. 5:2, 3) Pangitaon sila sa mga ansiyano, tabangan nga makabalik sa kongregasyon, ug pakitaag gugma pinaagi sa pagtabang kanila nga masuod pag-usab kang Jehova. w20.06 20 ¶10

Naghunahuna ba si Jesus nga ang kaumahan anihonon na kay nagdahom siya nga ang kadaghanan mosunod kaniya? Wala. Gitagna sa Kasulatan nga dili kaayo daghan ang magpakitag pagtuo kaniya. (Juan 12:37, 38) Ug si Jesus dunay gahom sa pagbasa sa kasingkasing. (Mat. 9:4) Bisan pa niana, nagpokus siya sa pipila nga motuo, ug madasigon siyang nagsangyaw sa tanan. Busa kita, kinsa dili makabasag kasingkasing, dili gyod angayng mohukom sa usa ka teritoryo o sa usa ka tawo. Hinunoa, maghunahuna ta nga ang mga tawo puwedeng mahimong tinun-an. Hinumdomi ang giingon ni Jesus sa iyang mga tinun-an. Ang kaumahan hinog na aron anihon. Ang mga tawo puwedeng magbag-o ug mahimong tinun-an sa Kristo. Si Jehova naghunahuna nga kining mga tawhana puwedeng mahimong tinun-an ug giisip niya sila ingong “bililhong mga butang.” (Hag. 2:7) Kon gilantaw nato ang mga tawo sama sa paglantaw ni Jehova ug Jesus kanila, maghunahuna ta bahin sa ilang pamilya, edukasyon, eksperyensiya, ug sa mga butang nga makapainteres kanila. Lantawon nato sila, dili ingong mga estranghero, kondili ingong umaabot natong mga igsoon. w20.04 13 ¶18-19

Ang Pulong sa Diyos klarong nagtudlo nga kinahanglang higugmaon nato si Jesus ug mentinahon ang maong gugma aron mapalipay nato si Jehova. Ang usa ka butang nga atong mahimo aron mahimong higala ni Jesus mao ang pag-ila kaniya. Mahimo nato ni pinaagi sa pagbasa sa mga basahon sa Bibliya nga Mateo, Marcos, Lucas, ug Juan. Samtang atong pamalandongon ang mga asoy sa Bibliya bahin sa kinabuhi ni Jesus, makakat-on ta sa paghigugma ug pagtahod kaniya tungod sa iyang maayong pagtratar sa mga tawo. Pananglitan, bisag Agalon siya sa iyang mga tinun-an, wala niya sila tratara ingong mga ulipon. Iya hinuong gisulti kanila ang iyang mga hunahuna ug pagbati. Gibati ni Jesus ang ilang kasakit ug mihilak siya uban kanila. (Juan 11:32-36) Bisan ang iyang mga magsusupak nakaingon nga higala siya niadtong midawat sa iyang mensahe. (Mat. 11:19) Dihang sundogon nato ang pagtratar ni Jesus sa iyang mga tinun-an, mas masuod ta sa uban, mahimo tang mas kontento ug malipayon, ug mas molawom ang atong apresasyon sa Kristo. w20.04 22 ¶9-10

Pagka-1870, ang Britain nahimong kinadak-ang imperyo sa yuta, ug nabatonan niini ang labing puwersadong kasundalohan. Ang maong imperyo gihulagway ingong gamay nga sungay nga nagpildi sa tulo pa ka sungay—ang France, Spain, ug Netherlands. (Dan. 7:7, 8) Ug kini nahimong hari sa habagatan hangtod sa Gubat sa Kalibotan I. Niini pong panahona, ang United States of America nahimong kinadatoan nga nasod sa kalibotan ug nagsugod sa pagpakigkooperar sa Britain. Panahon sa Gubat sa Kalibotan I, ang United States ug Britain naghiusa sa pagpakig-away ug nahimong puwersado kaayo. Nianang panahona, ang Britain ug ang kanhing kolonya niini nahimong Anglo-Amerikanong Gahom sa Kalibotan. Sumala sa gitagna ni Daniel, kini nga hari may “dako kaayong panon sa gamhanang kasundalohan.” Sa tibuok yugto sa kataposang mga adlaw, ang Anglo-Amerikanong alyansa mao ang hari sa habagatan. w20.05 4 ¶7-8

Tungod kay ang yuta naa sa saktong distansiya gikan sa adlaw, kini dunay saktong temperatura aron ang tubig mahimong likido. Kon ang yuta maduolduol ug gamay sa adlaw, ang tanang tubig moalisngaw ug ang yuta mahimong init ug uga kaayo, ug walay mabuhi niini. Kon kini malayo-layog gamay, ang tanang tubig mobantok ug ang yuta mapunog yelo. Kay ang yuta gibutang ni Jehova sa saktong lokasyon, ang siklo sa tubig niini makasuportar ug kinabuhi. Tungod sa adlaw, ang tubig sa kadagatan ug sa yuta moinit, moalisngaw, ug mahimong panganod. Kada tuig, ang adlaw makapaalisngaw ug mga 500,000 kilometro kubiko nga tubig. Ang tubig magpabilin sa atmospera sulod sa 10 ka adlaw sa dili pa kini mahimong ulan o snow. Dayon, ang tubig mobalik sa dagat o ubang mga katubigan, ug magsugod na pod ang siklo. Kining maayong pagkadisenyo ug way hunong nga siklo nagpamatuod nga si Jehova maalamon ug gamhanan.—Job 36:27, 28. w20.05 22 ¶6

Si Jesus nag-awhag kanato nga padayong pangayoon ang balaang espiritu. (Luc. 11:9, 13) Si Jehova naggamit sa iyang balaang espiritu sa paghatag kanatog “gahom nga labaw sa kasarangan.” (2 Cor. 4:7) Sa tabang sa espiritu sa Diyos, makalahutay ta sa bisan unsang pagsulay nga ato tingaling giatubang. Ang balaang espiritu makatabang sab kanato sa paghimo sa atong mga asaynment diha sa pag-alagad sa Diyos ug makapauswag sa atong mga katakos. Nahibalo ta nga ang maayong resulta sa atong mga paningkamot nahimo lang posible tungod sa tabang sa espiritu sa Diyos. Ikapakita nato ang atong apresasyon sa balaang espiritu sa Diyos pinaagi sa pag-ampo nga tabangan ta niini sa pagsusi kon duna ba tay sayop nga mga hunahuna o tinguha. (Sal. 139:23, 24) Kon moampo ta niana, tabangan ta ni Jehova pinaagi sa iyang espiritu nga mahibalo sa sayop nga mga hunahuna o tinguha. Busa, angay nga pangayoon nato sa Diyos ang iyang espiritu aron hatagan tag kusog sa pagsukol niana. Sa ingon, ikapakita nato nga determinado ta nga likayan ang bisan unsa nga mahimong hinungdan nga dili na ta tabangan ni Jehova pinaagi sa iyang balaang espiritu.—Efe. 4:30. w20.05 28-29 ¶10-12

Dihang atong depensahan ang ngalan ni Jehova, atong gisundog si Jesu-Kristo. Gipaila ni Jesus ang ngalan sa iyang Amahan dili lang pinaagi sa paggamit nianang ngalana kondili pinaagi sab sa pagdepensa sa reputasyon ni Jehova. Pananglitan, tungod sa mga Pariseo, ang mga tawo nagtuo nga si Jehova mangtas, sobra ka estrikto, way pagbati, ug way kaluoy. Pero gitabangan ni Jesus ang mga tawo nga makasabot nga ang iyang Amahan makataronganon, mapailobon, mahigugmaon, ug mapinasayloon. Gitabangan sab niya sila nga makaila kang Jehova pinaagi sa pagsundog sa mga hiyas sa iyang Amahan sa iyang adlaw-adlawng pagkinabuhi. (Juan 14:9) Sama kang Jesus, mahimo natong isulti ang atong nahibaloan bahin kang Jehova, nga magtudlo kanila kon unsa Siya ka mahigugmaon ug ka buotan nga Diyos. Pinaagi niana, atong mapamatud-an nga dili tinuod ang mga bakak nga gisulti bahin kang Jehova. Atong mahinloan ang ngalan ni Jehova, nga maghimo niining balaan diha sa hunahuna ug kasingkasing sa mga tawo. Pinaagi sa pulong ug buhat, atong ipakita kon unsa gyong klaseha sa Diyos si Jehova. Atong mabindikar kanang ngalana pinaagi sa pagtabang sa mga tawo nga matul-id ang ilang sayop nga mga ideya bahin kang Jehova. w20.06 6 ¶17-18

Magamit nato ang social media sa maayong paagi, pananglitan sa pagpakigkomunikar sa pamilya ug mga higala. Pero namatikdan ba nimo nga ang pipila ka tawo mag-post diha sa social media aron dayegon sila sa uban? Sama rag miingon sila, “Tan-awa ko.” Ang pipila mag-post pa ganig bastos ug law-ay nga mga comment sa ilang letrato o nianang sa uban. Ang mga Kristohanon dili mohimo niana kay giawhag sila sa pag-ugmad sa pagkamapainubsanon ug simpatiya. (1 Ped. 3:8) Kon mogamit kag social media, pangutan-a ang kaugalingon: ‘Ang ako bang i-post nga mga comment, letrato, o video makahatag ug impresyon nga nanghambog ko? Dili kaha ko makaaghat sa uban nga masina?’ Ang mga Kristohanon dili mobati nga kinahanglan silang magpaimportante. Ilang gisunod ang tambag sa Bibliya nga narekord sa teksto karong adlawa. Ang pagkamapainubsanon makatabang nato nga dili maimpluwensiyahan niana nga kinaiya sa kalibotan.—1 Juan 2:16. w20.07 6-7 ¶14-15

Sa wala pa si apostol Pablo mahimong tinun-an sa Kristo, siya usa ka bagis nga batan-on nga naglutos sa mga sumusunod ni Jesus. Niadtong panahona, siya nailhan ingong Saulo. (Buh. 7:58) Si Jesus mismo ang mipugong kang Pablo sa paglutos sa kongregasyon. Si Jesus nakigsulti kang Pablo gikan sa langit ug gibutaan niya kini. Aron maulian, si Pablo kinahanglang mangayog tabang sa mismong mga tawo nga iyang gilutos. Mapainubsanon niyang gidawat ang tabang sa tinun-ang si Ananias nga maoy nagpasig-uli sa iyang panan-aw. (Buh. 9:3-9, 17, 18) Sa ulahi, si Pablo nahimong iladong membro sa kongregasyon, pero wala gyod siya malimot sa leksiyon nga gitudlo kaniya ni Jesus diha sa dalan paingon sa Damasco. Si Pablo nagpabiling mapainubsanon, ug kinabubut-on niyang gidawat ang tabang sa mga igsoon. Siya miingon nga sila “nakapalig-on” kaniya.—Col. 4:10, 11, footnote. w20.07 18-19 ¶16-17

Bisag si Jehova ang labing gamhanan, naghatag siyag awtoridad sa uban. Pananglitan, gitudlo niya si Jesus ingong Hari sa Gingharian, ug hatagan sab Niyag awtoridad ang 144,000 nga mahimong kaubang magmamando ni Jesus. Siyempre, gibansay ni Jehova si Jesus nga mahimong Hari ug Hataas nga Saserdote. (Heb. 5:8, 9) Gibansay sab niya ang kaubang mga magmamando ni Jesus. Pero dili niya kontrolahon kon unsaon nila paghimo ang ilang buluhaton. Hinunoa, may pagsalig siya nga ilang buhaton ang iyang kabubut-on. (Pin. 5:10) Kon ang atong langitnong Amahan—kinsa wala magkinahanglan ug tabang—naghatag ug awtoridad sa uban, ilabina gyod nga ato nang himoon! Pananglitan, ulo ka ba sa pamilya o ansiyano sa kongregasyon? Sunda ang ehemplo ni Jehova pinaagi sa paghatag ug buluhaton sa uban ug ayaw kontrolaha kon unsaon nila kana paghimo. Kon sundogon nimo si Jehova, mahuman ang buluhaton, mabansay nimo ang uban, ug matabangan nimo sila nga makabaton ug dugang nga kompiyansa.—Isa. 41:10. w20.08 9 ¶5-6

Unsay gusto ni Jehova nga bation nato sa iyang mga karnero nga nawala? Makakat-on ta sa ehemplo ni Jesus. Nahibalo siya nga gipabilhan ni Jehova ang tanan Niyang karnero, maong gibuhat ni Jesus ang tanan niyang maarangan sa pagtabang sa “nawalang mga karnero sa nasod sa Israel” nga makabalik kang Jehova. (Mat. 15:24) Ingong maayong magbalantay, gihimo sab ni Jesus ang tanan niyang maarangan aron dili siya mawad-an ug bisan usa sa mga karnero ni Jehova. (Juan 6:39) Gidasig ni apostol Pablo ang mga ansiyano sa kongregasyon sa Efeso nga sundogon ang ehemplo ni Jesus. Siya miingon: “Kinahanglang tabangan ninyo kadtong mga luya ug hinumdoman ang mga pulong ni Ginoong Jesus, dihang siya miingon: ‘Dunay labaw nga kalipay sa paghatag kay sa pagdawat.’” (Buh. 20:17, 35) Klarong gipakita niini nga ang mga ansiyano karon dunay importanteng responsibilidad sa pag-atiman sa katawhan ni Jehova. Si Salvador, nga ansiyano sa Spain, miingon: “Dihang maghunahuna ko kon unsa ka dako ang pagmahal ni Jehova sa iyang nawalang mga karnero, madasig ko sa paghimo sa tanan nakong maarangan sa pagtabang kanila. Kombinsido ko nga gusto ni Jehova nga atimanon nako sila.” w20.06 23 ¶15-16

Si Jehova mapailobong magpaabot hangtod matapos ang usa ka libo ka tuig una siya magdahom nga hingpit na ta. Sa dili pa moabot kanang panahona, si Jehova andam mopasaylo sa atong mga sala. Busa, naa tay maayong rason nga magpokus sa maayong mga hiyas sa uban ug magmapailobon kanila. Si Jesus ug ang mga anghel nalipay dihang gilalang ang yuta. Pero imadyina kon unsa unya sila ka malipayon dihang ilang makita ang yuta nga mapuno sa hingpit nga mga tawo, nga nahigugma ug nag-alagad kang Jehova. Imadyina ang kalipay niadtong magmando uban sa Kristo didto sa langit dihang ilang makita nga ang katawhan nagpahimulos sa ilang ginabuhat. (Pin. 4:4, 9-11; 5:9, 10) Ug imadyina ang kinabuhi dihang ang mga luha sa kasakit mapulihan nag mga luha sa kalipay, dihang ang sakit, kagul-anan, ug kamatayon mawala na sa dayon. Samtang magpaabot niana, magmadeterminado nga sundogon ang imong mahigugmaon, maalamon, ug mapailobon nga Amahan. Kon imo nang himoon, mamentinar nimo ang imong kalipay bisan unsa pang kalisdanan ang imong maatubang. (Sant. 1:2-4) Mapasalamaton gyod ta sa saad ni Jehova nga “duna unyay pagkabanhaw”!—Buh. 24:15. w20.08 19 ¶18-19

Ang Bibliya maoy mahigugmaong regalo gikan sa Diyos. Ang atong langitnong Amahan naggamit ug mga tawo sa pagsulat niini tungod kay gimahal ta niya pag-ayo. Pinaagi sa Bibliya, si Jehova nagtubag sa pinakaimportante natong mga pangutana, sama sa: Diin ta gikan? Unsa ang katuyoan sa kinabuhi? Ug unsay mahitabo sa umaabot? Gusto ni Jehova nga mahibaloan sa tanan niyang anak ang tubag sa maong mga pangutana, busa sa gatosan na ka katuigan, naggamit siyag mga tawo sa paghubad sa Bibliya ngadto sa daghang pinulongan. Karon, ang tibuok Bibliya o ang mga bahin niini mabatonan na sa kapig 3,000 ka pinulongan! Ang Bibliya mao ang kinadaghanag hubad ug labing kaylap nga napanagtag nga basahon sa tibuok kasaysayan. Ikapakita nato nga atong giapresyar ang Bibliya pinaagi sa pagbasa niini adlaw-adlaw, pagpamalandong sa gitudlo niini, ug pagpaningkamot nga mapadapat ang atong nakat-onan. Dugang pa, ikapakita nato ang atong pagpasalamat sa Diyos pinaagi sa pagpaningkamot sa pagsulti sa mensahe niini ngadto sa daghang tawo kutob sa atong maarangan.—Sal. 1:1-3; Mat. 28:19, 20. w20.05 24-25 ¶15-16

Si propetang Jeremias giasayn sa lisod kaayo nga teritoryo. Dihay higayon nga naluya kaayo siya nga gusto na niyang mosurender. Pero wala nâ niya buhata. Ngano? Ang “pulong ni Jehova” nahisamag nagdilaab nga kalayo sa kasingkasing ni Jeremias, ug dili niya kini mapugngan! (Jer. 20:9) Mahisama ta niya kon atong pun-on ang atong hunahuna ug kasingkasing sa Pulong sa Diyos pinaagi sa pagtuon sa Bibliya kada adlaw ug pagpamalandong niana. Ingong resulta, madugangan ang atong kalipay, ug posible nga mas daghan ang maminaw kanato. (Jer. 15:16) Busa dihang maluya ka, pangayog tabang kang Jehova. Tabangan ka niya nga madaog ang imong kasaypanan, kahuyangan, o sakit. Tabangan ka niya nga makabaton ug balanseng panglantaw bahin sa mga pribilehiyo sa pag-alagad. Ug tabangan ka niya nga makabaton ug positibong panglantaw sa imong ministeryo. Dugang pa, pag-ampo sa imong langitnong Amahan ug isulti kaniya kon unsa gyoy imong gibati. Sa iyang tabang, madaog nimo ang kaluya sa buot. w20.12 27 ¶20-21

Para sa pipila ka sister, ang mga tigom maoy pangunang kahigayonan nga makauban nila ang mga igsoon. Busa angay natong gamiton ang maong mga higayon sa pag-abiabi kanila, pagpakigsulti kanila, ug pagpakita nga gimahal nato sila. Sama kang Jesus, mahimo tang mogahin ug panahon nga makauban ang mga sister. (Luc. 10:38-42) Pananglitan, puwede nato silang imbitahon sa atong balay alang sa pagpangaon o sa paglingawlingaw. Sa dihang himoon nato kana, seguroon nato nga makapadasig ang panag-estoryahay. (Roma 1:11, 12) Ang mga ansiyano angayng mosundog sa panghunahuna ni Jesus. Nahibalo siya nga lisod para sa pipila ang pagpabiling tagsaanon, pero giklaro niya nga ang tinuod nga kalipay wala magdepende sa pagminyo o sa pagbaton ug mga anak. (Luc. 11:27, 28) Hinunoa, nagdepende ni sa pag-una sa pag-alagad kang Jehova. (Mat. 19:12) Ang mga ansiyano ilabinang angayng magtratar sa mga sister ingong ilang igsoon ug inahan. Ang mga ansiyano angayng mogahin ug panahon una o human sa tigom aron makig-estorya sa mga sister. w20.09 21-22 ¶7-9

Sa Israel, ang mag-uuma mananom human sa ulan sa tinglarag ug mangani human sa ulan sa tingpamulak. (Mar. 4:28) Maalamon ta kon atong sundogon ang pagkamapailobon sa mag-uuma. Pero, dili tingali ni sayon. Sagad, ang dili hingpit nga mga tawo gusto dayong makakitag resulta sa ilang gihimo. Pero kon gusto nato nga ang atong uma magpatunghag ani, kinahanglan nga kanunay nato kining atimanon. Kita magkalot, magpugas, mangibot ug sagbot, ug mamisbis. Ang paghimog mga tinun-an nagkinahanglan sab ug padayong paghago. Nagkinahanglag panahon ang pagtabang nato sa atong mga Bible study nga mahimong mahigugmaon ug dili mapihigon. Ang pagkamapailobon makatabang nga dili ta maluya dihang ang mga tawo dili maminaw. Bisan dihang may mga tawo nga andam maminaw ug mokat-on, kinahanglan gihapon tang magmapailobon. Dili nato mapugos ang usa ka Bible study nga makabatog pagtuo. Gani, may mga higayon nga ang mga tinun-an ni Jesus wala dayon makasabot sa iyang gitudlo. (Juan 14:9) Atong hinumdoman nga bisag kita ang nagtanom ug nagbisbis, ang Diyos maoy magpatubo.—1 Cor. 3:6. w20.09 11 ¶10-11

Gusto natong tanan nga ang atong mga Bible study mouswag ug magpabawtismo. Ang usa ka importanteng paagi nga matabangan nato sila mao ang pagdasig kanila sa pagtambong sa mga tigom. Sagad ang mga Bible study nga motambong dayon sa mga tigom paspas kaayong mouswag. Sultian sa ubang igsoon ang ilang Bible study nga madugangan pa gyod ang iyang kahibalo sa Bibliya kon motambong siya sa mga tigom. Basaha ang Hebreohanon 10:24, 25 uban sa imong Bible study, ug ipatin-aw kaniya ang mga kaayohan sa pagtambong sa mga tigom. Isulti kaniya kon unsay imong nakat-onan sa tigom nga nakapalipay kaayo nimo. Mas makapalihok nâ niya sa pagtambong kay sa pag-imbitar lang kaniya sa tigom. Ang maeksperyensiyahan sa imong Bible study sa una niyang pagtambong mas maayo kay sa bisan unsa nga iyang naeksperyensiyahan sa ubang relihiyosong tigom. (1 Cor. 14:24, 25) Mailaila niya ang mga igsoon nga magsilbing maayong ehemplo kaniya ug makatabang niya nga mouswag ug magpabawtismo. w20.10 10-11 ¶14-15

Ang espiritu sa Diyos motabang nimo sa pagpadapat sa imong nabasa ug nakat-onan sa Bibliya. Pag-ampo sama sa salmista, kinsa miingon: “Oh Jehova, tudloi ko bahin sa imong dalan. Mosubay ko sa imong kamatuoran. Bug-osa ang akong kasingkasing aron mahadlok ko sa imong ngalan.” (Sal. 86:11) Busa padayong pahimusli ang espirituwal nga pagkaon nga gitagana ni Jehova pinaagi sa iyang Pulong ug sa iyang organisasyon. Siyempre, ang imong tumong dili lang ang pagkuhag kahibalo. Gusto nimo nga ang kamatuoran masilsil sa imong kasingkasing ug mapadapat sa imong kinabuhi. Ang espiritu ni Jehova makatabang nimo sa paghimo niana. Gusto sab nimong dasigon ang mga igsoon. (Heb. 10:24, 25) Ngano? Tungod kay bahin sila sa imong espirituwal nga pamilya. Pangayoa ang espiritu sa Diyos aron makahatag kag kinasingkasing nga mga komento sa tigom ug mahimo nimo ang imong kinamaayohan kon duna kay bahin. Pinaagi niini imong gipakita kang Jehova ug sa iyang Anak nga gimahal nimo ang ilang bililhong “mga karnero.” (Juan 21:15-17) Busa paminawa ang imong Dakong Instruktor pinaagi sa pagpahimulos pag-ayo sa tanang impormasyon nga iyang gitagana. w20.10 24-25 ¶15-17

Giunsa pagtratar ni Jesus ang iyang mga apostoles dihang sila temporaryong naluya? Wala madugay human sa iyang pagkabanhaw, giingnan ni Jesus ang pipila niya ka sumusunod: “Ayaw mog kahadlok! Lakaw, sultihi ang akong mga igsoon [nga nabanhaw na ko].” (Mat. 28:10a) Wala isalikway ni Jesus ang iyang mga apostoles. Bisag gitalikdan nila siya, gitawag gihapon niya sila ug “akong mga igsoon.” Sama kang Jehova, si Jesus maluluy-on ug mapinasayloon. (2 Hari 13:23) Sa susama, nabalaka sab ta pag-ayo niadtong wala na makigbahin sa ministeryo. Sila atong mga igsoon, ug gimahal nato sila! Mahinumdom pa ta sa tanan nilang paghago kaniadto para kang Jehova—ang pipila kanila naghimo niana sulod sa daghang katuigan. (Heb. 6:10) Gimingaw gyod ta nila! (Luc. 15:4-7) Busa dasiga ang mga dili aktibo nga motambong sa mga tigom. Ug kon dunay dili aktibo nga motambong sa tigom, kinahanglan nga kitay mouna sa pag-abiabi kaniya. w20.11 6 ¶14-17

Si Santiago ug Juan, uban sa ilang inahan, miduol kang Jesus ug nangayog pribilehiyo nga wala siyay katungod sa paghatag. Si Jesus miingon dayon nga ang iya lang langitnong Amahan ang makadesisyon kon kinsay molingkod sa tuo ug sa wala ni Jesus diha sa Gingharian. (Mat. 20:20-23) Gipakita ni Jesus nga nahibalo siya sa iyang mga limitasyon. Siya makasaranganon. Wala siya mobuhat ug bisan unsa nga wala isugo ni Jehova kaniya. (Juan 12:49) Unsaon nato pagsundog si Jesus? Masundog nato si Jesus pinaagi sa pagpadapat sa tambag sa Bibliya nga makita sa teksto karong adlawa. Busa kon dunay mangayog tambag, dili gyod nato ipugos ang atong opinyon o isulti dayon ang bisan unsa nga atong mahunahunaan. Hinunoa, atong ipakita kaniya ang tambag gikan sa Bibliya ug sa atong binase sa Bibliya nga mga publikasyon. Niining paagiha, atong giila ang atong mga limitasyon ug giisip nga labaw gyod ang “matarong nga mga mando” sa Labing Gamhanan.—Pin. 15:3, 4. w20.08 11 ¶14-15

Kon gibati nimo nga kinahanglan nimong tambagan ang usa ka higala, unsay angay nimong hinumdoman? Sa dili pa ka makig-estorya sa imong higala, pangutan-a ang kaugalingon, ‘Ako ba naghinobra sa pagkamatarong?’ Ang tawo nga naghinobra sa pagkamatarong mohukom sa uban, dili sumala sa sukdanan ni Jehova, kondili sa iyang kaugalingong sukdanan, ug tingali dili kaayo siya maluluy-on. Human nimo masusi ang kaugalingon unya makita nimo nga kinahanglan gihapon kang makig-estorya sa imong higala, isulti kaniya kon unsay problema ug paggamit ug mga pangutana aron masabtan niya kon unsay iyang nahimong sayop. Seguroa nga ang imong isulti gibase sa Kasulatan, ug hinumdomi nga ang imong higala manubag, dili kanimo, kondili kang Jehova. (Roma 14:10) Gamita ang kaalam nga naa sa Pulong sa Diyos, ug dihang magtambag ka, sundoga ang pagkamaluluy-on ni Jesus. (Prov. 3:5; Mat. 12:20) Ngano? Tungod kay si Jehova magtratar kanato sa paagi nga gitratar nato ang uban.—Sant. 2:13. w20.11 21 ¶13

Ganahan ba ka nga hukman ka sa mga tawo base sa kolor sa imong panit, porma sa imong nawong, o gidak-on sa imong lawas? Seguradong dili. Busa malipay ta kay dili ta hukman ni Jehova base sa makita sa mga tawo kanato! Pananglitan, dihang nakita ni Samuel ang mga anak ni Jese, wala niya makita ang nakita ni Jehova. Giingnan ni Jehova si Samuel nga usa sa mga anak ni Jese ang mahimong hari sa Israel. Pero kinsa? Pagkakita ni Samuel sa kamagulangang anak ni Jese nga si Eliab, siya miingon: “Seguradong siya ang dinihogan ni Jehova.” Si Eliab morag angayan nga mahimong hari. “Apan si Jehova miingon kang Samuel: ‘Ayaw pagtan-aw sa iyang panagway ug sa iyang gitas-on, kay dili siya ang akong gipili.’” Unsay leksiyon? Si Jehova mipadayon: “Ang tawo nagatan-aw kon unsay makita sa mga mata, apan si Jehova nagatan-aw sa kasingkasing.” (1 Sam. 16:1, 6, 7) Maayong sundogon nato si Jehova sa atong pagtratar sa mga igsoon. w20.04 14 ¶1; 15 ¶3

Si Jesus nagbaktas sa kaumahan, ug tingali linghod pa ang natanom nga mga sebada. (Juan 4:3-6) Mga upat pa ka bulan ang molabay ayha ni anihon. Pero may gisulti si Jesus nga makapatingala: “Lantawa ang kaumahan. Kini hinog na aron anihon.” (Juan 4:35, 36) Unsay iyang gipasabot? Dayag nga ang gitumong ni Jesus mao ang simbolikong pagpanganig mga tawo. Konsideraha kon unsay bag-o rang nahitabo. Bisan tuod ang mga Hudiyo maglikay sa mga Samarianhon, gisangyawan ni Jesus ang usa ka babayeng Samarianhon—ug naminaw kini! Gani, samtang naghisgot si Jesus nga ang kaumahan “hinog na aron anihon,” dihay panon sa mga Samarianhon, kinsa nakadungog bahin kang Jesus gikan sa babaye, nga nagpaingon kaniya aron mokat-on ug dugang. (Juan 4:9, 39-42) Ang usa ka komentaryo bahin niini nga asoy nag-ingon: “Ang kahinam sa mga tawo . . . nagpakita nga sama silag mga lugas nga anihonon na.” w20.04 8 ¶1-2

Ang atong mga tigom makatabang nato sa pagpauswag sa atong kahanas sa pagpakiggubat, ingnon ta, pinaagi sa pagtabang nato nga mahimong mas maayong magsasangyaw ug magtutudlo. Pananglitan, gitudloan ta sa paggamit sa mga himan sa atong Teaching Toolbox sa epektibong paagi. Busa pangandam pag-ayo para sa mga tigom sa kongregasyon. Panahon sa tigom, paminaw pag-ayo. Human sa tigom, ipadapat ang pagbansay nga imong nadawat. Sa pagbuhat niana, mahimo kang “maayong sundalo ni Kristo Jesus.” (2 Tim. 2:3) Gitabangan sab ta sa milyonmilyong gamhanan nga mga anghel. Hunahunaa kon unsay mahimo bisan sa usa lang ka anghel! (Isa. 37:36) Karon hunahunaa kon unsay mahimo sa daghan kaayong gamhanan nga mga anghel. Walay tawo o demonyo ang makabarog batok sa gamhanang kasundalohan ni Jehova. Siya gamhanan kaayo. Busa, kon kauban nato si Jehova, mas kusgan ta kay sa atong mga magsusupak, bisag unsa pa sila ka daghan. (Maghu. 6:16) Tinuod gyod nâ! Hinumdomi nâ dihang masakitan ka sa gisulti o gihimo sa imong kauban sa trabaho, eskolmet, o dili Saksi nga paryente. Hinumdomi nga wala ka mag-inusara niini nga pagpakiggubat. Ikaw nagsunod sa mando ni Jehova. w21.03 29 ¶13-14

Tingali gikutlo ni apostol Pablo ang Isaias 22:13, nga naghisgot sa panglantaw sa mga Israelinhon. Imbes makigsuod sa Diyos, mas gusto nilang maglipaylipay. Ang maong mga Israelinhon naghunahuna nga kinahanglan silang mag-enjoy sa ilang kinabuhi karon, kay basig ugma mamatay na sila. Klaro nga ang kamatuoran nga si Jehova makabanhaw sa mga patay angayng mag-impluwensiya sa atong pagpilig mga higala. Kinahanglang likayan sa mga igsoon sa Corinto ang pagpakig-uban niadtong dili motuo sa pagkabanhaw. Duna ni leksiyon para kanato: Wala gyoy maayong resulta ang kanunayng pagpakig-uban niadtong mga tawo nga puro lipaylipay lang ang gusto ug wala maghunahuna sa umaabot. Ang pirmeng pagpakig-uban kanila makadaot sa panglantaw ug pamatasan sa tinuod nga Kristohanon. Posible pa ganing maimpluwensiyahan siya sa paghimo sa mga butang nga gidumtan sa Diyos. Busa, si Pablo puwersadong nag-awhag: “Hunahunaa ninyog maayo aron makaamgo mo ug buhata ang matarong ug ayaw pagpakasala.”—1 Cor. 15:33, 34. w20.12 9 ¶3, 5-6

Kining tekstoha naghisgot kon sa unsang paagi giorganisar ni Jehova ang iyang pamilya sa langit ug sa yuta. Ang pagkaulo dunay duha ka importanteng bahin—awtoridad ug tulubagon. Si Jehova mao “ang ulo,” o ang kinalabwang awtoridad, ug ang tanan niyang mga anak—mga anghel ug mga tawo—manubag kaniya. (Roma 14:10; Efe. 3:14, 15) Gihatagan ni Jehova si Jesus ug awtoridad ibabaw sa kongregasyon, pero si Jesus manubag kang Jehova sa iyang paagi sa pagtratar kanato. (1 Cor. 15:27) Gihatagan sab ni Jehova ang bana ug awtoridad ibabaw sa iyang asawa ug mga anak. Sa unsang paagi mahimo siyang maayong ulo sa pamilya? Kinahanglang masabtan una niya kon unsay gustong ipabuhat ni Jehova kaniya. Kinahanglan sab niyang mahibaloan kon nganong giestablisar ni Jehova ang kahikayan sa pagkaulo ug kon unsaon niya pagsundog ang ehemplo ni Jehova ug Jesus. Nganong importante nga mahibaloan niya kini? Tungod kay gihatagan ni Jehova ug awtoridad ang mga ulo sa pamilya, ug gidahom niya nga gamiton nila kana sa maayong paagi.—Luc. 12:48b. w21.02 2 ¶1-3

Maayo sab nga atong sundogon si Jehova nga kalimtan ang mga butang nga angayng kalimtan. Pananglitan, si Jehova hingpit ug panumdoman, pero kon mahinulsolon ta, iyang pasayloon ug kalimtan ang atong mga kasaypanan. (Sal. 25:7; 130:3, 4) Ug gusto niya nga mao pod nay atong himoon sa uban dihang mangayo silag pasaylo sa sayop nga ilang nahimo nga nakapasakit kanato. (Mat. 6:14; Luc. 17:3, 4) Ikapakita nato nga giapresyar nato ang atong katingalahang utok pinaagi sa paggamit niini sa pagpasidungog sa Usa nga naghatag niini kanato. Ang pipila naggamit sa ilang utok para sa hakog nga katuyoan—ang pagtakdag kaugalingong sukdanan kon unsay husto ug sayop. Pero kay si Jehova ang naglalang nato, makadahom gyod ta nga ang iyang mga sukdanan mas maayo kay sa bisan unsang sukdanan nga atong mahimo para sa atong kaugalingon. (Roma 12:1, 2) Kon magkinabuhi ta sumala sa iyang mga sukdanan, kita magmalinawon. (Isa. 48:18) Ug ang atong kinabuhi dunay klarong katuyoan—ang pagpasidungog sa atong Maglalalang ug Amahan ug ang paglipay kaniya.—Prov. 27:11. w20.05 23-24 ¶13-14

Unsaon nato pag-ugmad ug mabinationg pagmahal sa mga igsoon karon? Kon mas mailhan nato ang mga igsoon, mas dali nato silang masabtan ug mas maugmad nato ang mabinationg pagmahal kanila. Ang edad ug kagikan dili angayng mahimong babag. Hinumdomi nga si Jonatan magulang kang David ug mga 30 anyos, pero nasuod siya kaniya. Duna bay igsoon sa kongregasyon nga mas magulang o mas bata kanimo nga mahimo nimong suoron? Kon buhaton nimo kana, ikapakita nimo nga imong ‘gihigugma ang tanang igsoon.’ (1 Ped. 2:17) Ang pagbaton bag mabinationg pagmahal sa mga igsoon nagpasabot nga mobati tag parehas nga kasuod sa tanan diha sa kongregasyon? Wala. Dili nâ realistiko. Normal lang nga mas masuod ta sa pipila ka tawo tungod kay parehas tag interes nila. Gitawag ni Jesus ang tanan niyang apostoles ug “mga higala,” pero suod kaayo siya kang Juan. (Juan 13:23; 15:15; 20:2) Hinunoa, si Jesus wala magpakitag paboritismo kang Juan.—Mar. 10:35-40. w21.01 23 ¶12-13

Ang pagpresentar ni apostol Pablo sa iyang mensahe ngadto sa mga Hentil sa Atenas lahi sa iyang pagpresentar niini sa mga Hudiyo sa sinagoga. Giobserbahan niya pag-ayo ang palibot ug ang relihiyosong mga kostumbre sa mga tawo. (Buh. 17:23) Dayon, gisugdan niya paghisgot ang mga kamatuoran sa Kasulatan base sa mga butang nga gidawat sa iyang mamiminaw. Busa si Pablo andam sa pagpahaom sa iyang paagi sa pagsangyaw. Iyang giingnan ang mga taga-Atenas nga ang iyang mensahe naggikan sa “Diyos nga Wala Mailhi,” kinsa ilang ginasimba. Bisag ang mga Hentil dili pamilyar sa Kasulatan, si Pablo wala mosurender. Hinuon, giisip niya sila ingong mga lugas nga anihonon na, ug gipahaom niya ang iyang paagi sa pagsangyaw sa maayong balita. Sama kang Pablo, maayong maniid ka. Pangitag mga timailhan kon unsay gituohan sa mga tawo sa inyong teritoryo. Unsay dekorasyon sa balay o sakyanan sa tagbalay? Mailhan ba nimo sa iyang ngalan, sininaan, hitsura, o bisan sa iyang sinultihan kon unsay iyang relihiyon? w20.04 9-10 ¶7-8