Oktubre

Dihang mailhan nato si Jesus, atong sundogon ang iyang panghunahuna ug binuhatan. Ug samtang magkalawom ang atong kahibalo bahin sa iyang panghunahuna ug mas maningkamot ta nga sundogon siya, mas masuod ta kaniya. Unsaon nato pagsundog si Jesus? Niay usa ka pananglitan. Mas gihunahuna ni Jesus kon unsaon pagtabang sa uban kay sa pagpahimuot sa iyang kaugalingon. (Mat. 20:28; Roma 15:1-3) Tungod niana, andam siyang magsakripisyo ug magpasaylo. Dili siya daling masilo sa isulti sa uban bahin kaniya. (Juan 1:46, 47) Ug wala niya tugoti nga maapektohan ang iyang pagtratar sa usa ka tawo tungod sa sayop nga dugay nang nahimo niini. (1 Tim. 1:12-14) Si Jesus miingon: “Kon kamo dunay gugma sa usag usa, ang tanan makaila nga kamo akong mga tinun-an.” (Juan 13:35) Maayong pangutan-on nimo ang kaugalingon, “Gisundog ba nako si Jesus pinaagi sa paghimo sa tanan nakong maarangan aron mamentinar ang malinawong relasyon uban sa mga igsoon?” w20.04 24 ¶11

Bisag ang kalibotan napuno sa mga tawo nga nagpasipala sa ngalan ni Jehova, makahimo ka sa pagdepensa sa iyang ngalan pinaagi sa pagsulti sa mga tawo nga si Jehova balaan, matarong, maayo, ug mahigugmaon. Makahimo ka sa pagsuportar sa iyang pagmando. Mahimo nimong tabangan ang mga tawo nga makasabot nga ang pagmando lang ni Jehova ang tinuod nga matarong ug kini lang ang makahatag ug kalinaw ug kalipay sa tanang linalang. (Sal. 37:9, 37; 146:5, 6, 10) Dihang magtudlo ta sa kamatuoran sa Bibliya ngadto sa uban, sagad ipasiugda nato ang pagkasoberano sa Diyos, nga si Jehova ang may katungod sa pagmando sa uniberso, ug tinuod gayod kini. Pero bisag importante ang pagtudlo kanila bahin sa mga balaod sa Diyos, ang atong pangunang tumong mao ang pagtabang kanila nga mahigugma sa atong Amahan, si Jehova, ug magmaunongon kaniya. Busa kinahanglan natong itudlo ang makapatandog nga mga hiyas ni Jehova, nga magpasiugda kon unsa siyang klaseha sa Persona. (Isa. 63:7) Kon ingon niana ang atong paagi sa pagtudlo, matabangan nato ang uban nga mahigugma kang Jehova ug mosunod kaniya tungod sa ilang tinguha nga magmaunongon kaniya. w20.06 6 ¶16; 7 ¶19

Ang utok sa tawo maayo kaayong pagkadisenyo. Dihang tua pa ka sa tiyan sa imong inahan, ang imong utok naporma sumala sa pagkadisenyo niini, ug kada minuto, linibo ka bag-ong selula sa utok ang maporma. Gibanabana sa mga researcher nga ang utok sa hamtong nga tawo dunay duolan sa 100 ka bilyong espesyal nga selula nga gitawag ug neuron—nga giasembol diha sa atong utok ug may gibug-aton nga 1.5 ka kilo. Ang usa sa katingalahang mga katakos sa utok nalangkit sa pagsulti. Sa matag pulong nga imong isulti, kinahanglang palihokon sa imong utok sa saktong pagkasunodsunod ang mga 100 ka kaunoran sa imong dila, tutonlan, ngabil, apapangig, ug dughan. Importante nâ aron masabtan ang imong isulti. Ang usa ka research nga gi-release niadtong 2019 nagpakita nga ang bag-ong natawo nga mga bata makasabot sa tagsatagsa ka pulong. Kini nagpamatuod nga sakto ang gituohan sa mga researcher, nga kita natawo nga may katakos sa pagsabot ug pagkat-on ug mga pinulongan. Sa pagkatinuod ang atong katakos sa pagsulti maoy regalo gikan sa Diyos. w20.05 22-23 ¶8-9

Kinabubut-ong gibiyaan ni Abraham ang iyang komportableng kinabuhi sa siyudad sa Ur. Ngano? Tungod kay nagpaabot siya sa “siyudad nga may tinuod nga mga pundasyon.” (Heb. 11:8-10, 16) Ang siyudad nga gipaabot ni Abraham mao ang Gingharian sa Diyos. Ang mga hari niana nga Gingharian mao si Jesu-Kristo ug ang 144,000 ka dinihogang mga Kristohanon. Kini nga Gingharian gitawag ni Pablo nga “siyudad sa buhing Diyos, ang langitnong Jerusalem.” (Heb. 12:22; Pin. 5:8-10; 14:1) Gitudloan ni Jesus ang iyang mga tinun-an nga iampo ang maong Gingharian, nga maghangyo nga moabot kini aron matuman ang kabubut-on sa Diyos sa yuta sama sa pagkatuman niini sa langit. (Mat. 6:10) Nahibalo ba si Abraham sa mga detalye kon unsaon pag-organisar ang Gingharian sa Diyos? Wala. Sulod sa taas kaayong panahon, ang maong mga detalye maoy “sagradong tinago.” (Efe. 1:8-10; Col. 1:26, 27) Pero nahibalo si Abraham nga ang pipila sa iyang mga kaliwat mahimong mga hari, tungod kay mao nay gisaad ni Jehova kaniya.—Gen. 17:1, 2, 6. w20.08 2-3 ¶2-4

Kinahanglang isalikway nato ang pagtulon-an sa mga apostata. Sukad sa pagkatukod sa Kristohanong kongregasyon, ang Yawa kanunayng naningkamot sa pagpahuyang sa pagtuo sa matinumanong mga alagad sa Diyos. Busa kinahanglang mailhan nato ang kalainan sa tinuod ug bakak. Mahimong gamiton sa atong mga kaaway ang Internet o social media aron mawala ang atong pagsalig kang Jehova ug ang atong gugma sa mga igsoon. Hinumdomi kon kinsay nagpaluyo niana, ug isalikway kana! (1 Juan 4:1, 6; Pin. 12:9) Aron masuklan nato ang mga pag-atake ni Satanas, kinahanglang palig-onon nato ang atong pagsalig kang Jesus ug sa iyang papel diha sa katuyoan sa Diyos. Kinahanglan sab tang mosalig niadtong gigamit ni Jehova karon sa pagdumala sa iyang organisasyon. (Mat. 24:45-47) Mapalig-on nato ang maong pagsalig pinaagi sa regular nga pagtuon sa Pulong sa Diyos. Ingong resulta, ang atong pagtuo mahisama sa kahoy nga nakagamot pag-ayo. Susama niana ang giingon ni apostol Pablo dihang gisulat niya ang teksto karong adlawa. w20.07 23-24 ¶11-12

Kay dili hingpit, kitang tanan may tendensiya nga hukman ang uban base sa ilang hitsura. (Juan 7:24) Pero gamay ra ang atong mahibaloan sa usa ka tawo kon magbase lang ta sa atong makita. Sa pag-ilustrar, bisan ang maayo kaayo ug eksperyensiyado nga doktor gamay rag mahibaloan bahin sa pasyente kon igo ra niya kining tan-awon. Kinahanglang maminaw siya pag-ayo aron mahibaloan niya ang nangaging problema sa panglawas sa pasyente, ang gibati niini bahin sa iyang kahimtang, o ang mga simtomas niini. Morekomendar pa gani siya nga magpa-X-ray ang pasyente aron makita ang sulod sa lawas niini. Kay kon dili, posibleng sayop nga tambal ang iyang mareseta. Sa susama, dili nato bug-os masabtan ang mga igsoon kon magbase lang ta sa ilang hitsura. Kinahanglang ilhon nato kon unsa gyod ang ilang tinuod nga personalidad. Siyempre, dili ta makabasag kasingkasing. Pero puwede natong himoon ang atong maarangan sa pagsundog kang Jehova. Siya maminaw sa iyang mga alagad. Siya magkonsiderar sa ilang kahimtang ug sa tanang butang nga nakaimpluwensiya kanila. Ug siya magpakitag kaluoy kanila. w20.04 14-15 ¶1-3

Angay natong ugmaron ang pagkamapainubsanon kay ang mga mapahitas-on walay “maayong panghunahuna.” Ang mga mapahitas-on makilalison ug gustong magpaimportante. Ang ilang panghunahuna ug panggawi sagad makapasakit kanila ug sa uban. Kon dili sila magbag-o, ang ilang hunahuna mabutaan ug mapahisalaag ni Satanas. (2 Cor. 4:4; 11:3) Ang tawong mapainubsanon maayog panghunahuna. Siya balanseg panglantaw sa kaugalingon, ug iyang giila nga sa daghang paagi, ang uban mas labaw kay kaniya. (Filip. 2:3) Ug nahibalo siya nga “ang Diyos batok sa mga mapahitas-on, apan pakitaan niyag dili hitupngang pagkamaayo ang mga mapainubsanon.” (1 Ped. 5:5) Kadtong maayog panghunahuna dili gusto nga mahimo nilang kaaway si Jehova. Aron makapabiling mapainubsanon, kinahanglang ipadapat nato ang tambag sa Bibliya nga ‘hukason ang daang personalidad apil ang mga buhat niini, ug isul-ob ang bag-ong personalidad.’ Angay natong tun-an ang ehemplo ni Jesus, ug maningkamot ta nga sundogon siya kutob sa atong maarangan.—Col. 3:9, 10; 1 Ped. 2:21. w20.07 7 ¶16-17

Pagkadakong pribilehiyo nga nahimo tang bahin sa kongregasyon ni Jehova! Naa ta sa espirituwal nga paraiso nga puno sa malinawon ug malipayong mga tawo. Unsay imong lunà sa kongregasyon? Gikomparar ni apostol Pablo ang kongregasyon ngadto sa lawas. Gikomparar sab niya ang matag indibiduwal diha sa kongregasyon ngadto sa mga parte sa lawas. (Roma 12:4-8; 1 Cor. 12:12-27; Efe. 4:16) Ang usa ka leksiyon nga atong makat-onan sa ilustrasyon ni Pablo mao kini: Ang matag usa kanato dunay importanteng lunà sa pamilya ni Jehova. Gisugdan ni Pablo ang iyang ilustrasyon pinaagi sa pag-ingon: “Sama nga ang atong lawas daghag parte, apan kini nga mga parte dili parehas ug kagamitan, kita pod, bisan tuod daghan, usa ra ka lawas nga nahiusa sa Kristo, apan ingong mga indibiduwal nagdepende ta sa usag usa.” (Roma 12:4, 5) Unsay gipasabot ni Pablo? Ang matag usa kanato lainlaig papel sa kongregasyon, pero ang matag usa importante. w20.08 20 ¶1-2; 21 ¶4

Mga ginikanan, unsaon ninyo pagsundog ang pagkamapainubsanon ni Jehova? Kon haom, pangayog opinyon sa inyong mga anak kon unsaon paghimo ang usa ka buluhaton. Ug kon nahiangay, sunda ang ilang mga sugyot. Si Jehova nagpakita sab ug ehemplo sa pagkamapailobon, bisan dihang ang iyang mga alagad nangutana bahin sa iyang mga desisyon. Naminaw siya dihang gisulti ni Abraham ang iyang mga kabalaka bahin sa desisyon nga laglagon ang Sodoma ug Gomora. (Gen. 18:22-33) Ug hinumdomi kon giunsa pagtratar ni Jehova ang asawa ni Abraham nga si Sara. Wala siya malain o masuko dihang gikataw-an ni Sara ang iyang saad nga kini magmabdos bisag tigulang na. (Gen. 18:10-14) Hinunoa, gipakitaan niyag dignidad si Sara. Mga ginikanan ug mga ansiyano, unsay inyong makat-onan kang Jehova? Konsideraha kon unsay inyong gibuhat dihang ang inyong mga anak o ang pipila diha sa kongregasyon wala mouyon sa inyong desisyon. Gidepensahan ba dayon ninyo ang inyong desisyon? O gisulayan ba ninyog sabot ang ilang panglantaw? Ang mga pamilya ug kongregasyon seguradong makabenepisyo kon kadtong dunay awtoridad mosundog kang Jehova. w20.08 10 ¶7-9

Sa dihang nagsugod ta pagpakig-uban sa katawhan ni Jehova, tingali dali ra tang modawat ug tabang sa uban kay nahibalo ta nga bag-o pa ta sa kamatuoran ug daghan pa tag angayng makat-onan. (1 Cor. 3:1, 2) Pero komosta karon? Kon dugay na tang nag-alagad kang Jehova ug taas nag kasinatian, tingali dili na ta daling modawat ug tabang, ilabina kon ang nagtanyag niana dili nato sama ka dugay sa kamatuoran. Pero sagad gamiton ni Jehova ang mga igsoon sa pagpalig-on kanato. (Rom. 1:11, 12) Kon gusto tang makadawat ug kusog gikan kang Jehova, kinahanglang dawaton nato ang tabang sa mga igsoon. Ang kalamposan wala magdepende sa kaugalingong kusog, edukasyon, bahandi, ug kagikan, kondili sa atong pagkamapainubsanon ug pagsalig kang Jehova. Hinaot nga maningkamot tang tanan nga mouswag pinaagi sa (1) pagsalig kang Jehova, (2) pagkat-on gikan sa mga ehemplo sa Bibliya, ug (3) pagdawat sa tabang sa mga igsoon. Pinaagi niana, bisag mobati tang huyang, si Jehova makahimo natong gamhanan! w20.07 14 ¶2; 19 ¶18-19

Ang usa ka kahimtang diin maglisod tingali ta sa pagpakitag pailob maoy sa dihang magsangyaw ta sa dili Saksing mga membro sa atong pamilya. Ang prinsipyo sa Ecclesiastes 3:1, 7 makatabang kanato. Kini nag-ingon: “Dunay . . . panahon sa paghilom ug panahon sa pagsulti.” Pinaagi sa atong maayong panggawi, hilom tang makapamatuod, pero kinahanglan nga kanunay tang mangitag kahigayonan sa pagsulti sa kamatuoran. (1 Ped. 3:1, 2) Kinahanglang magmadasigon ta sa pagsangyaw ug pagpanudlo, pero angay tang magmapailobon sa tanan, apil sa atong pamilya. Makakat-on ta sa pagpakitag pailob gikan sa matinumanong mga alagad sa kapanahonan sa Bibliya ug sa modernong panahon. Si Habacuc nangandoy nga matapos ang pagkadaotan, pero masaligon siyang miingon: “Magpadayon ko sa pagtindog sa akong puwesto.” (Hab. 2:1) Si apostol Pablo miingon nga gusto niyang “mahuman” ang iyang ministeryo. Pero mapailobon siyang nagpadayon sa ‘bug-os nga pagpamatuod sa maayong balita.’—Buh. 20:24. w20.09 12 ¶12-13

Bisag si Jesus ikaduha kang Jehova, wala siya maghunahuna nga importante kaayo siya. Ingong pagsundog kang Jesus, ang mapainubsanong mga alagad ni Jehova magpakitag gugma sa usag usa, nga maoy ilhanan sa matuod nga katawhan sa Diyos. (Luc. 9:48; Juan 13:35) Unsay angay nimong buhaton kon morag dunay problema sa kongregasyon ug gibati nimo nga wala ni atimana sa mga ansiyano? Imbes magreklamo, ikapakita nimo ang pagkamapainubsanon pinaagi sa pagsuportar niadtong mga nagapanguna. (Heb. 13:17) Aron matabangan ka sa paghimo niana, pangutan-a ang kaugalingon: ‘Ang mga problema ba nga akong nakita seryoso kaayo nga kinahanglan gyong tul-iron? Mao ba ni ang hustong panahon sa pagtul-id niana? Ako bang responsibilidad ang paghimo niana? Sa tinuoray lang, naningkamot ba gyod ko nga magkahiusa ang kongregasyon, o gusto lang nakong ipakita nga importante kaayo ko?’ Mas gipabilhan ni Jehova ang pagkamapainubsanon kay sa katakos, ug ang panaghiusa kay sa kalamposan. Busa himoa ang imong maarangan sa pag-alagad kang Jehova nga mapainubsanon. Sa pagbuhat niana, makatabang ka nga mahiusa ang kongregasyon.—Efe. 4:2, 3. w20.07 4-5 ¶9-11

Gipabilhan ni Jesus ang tabang nga iyang nadawat gikan sa diyosnong mga babaye kinsa nag-alagad kaniya “pinaagi sa ilang mga kabtangan.” (Luc. 8:1-3) Gipadayag niya kanila ang lawom nga espirituwal nga mga kamatuoran. Pananglitan, giingnan niya sila nga siya mamatay ug pagabanhawon. (Luc. 24:5-8) Giandam niya sila para sa umaabot nga mga pagsulay, sama sa iyang gihimo sa mga apostoles. (Mar. 9:30-32; 10:32-34) Angayng hinumdoman nga bisag mibiya ang mga apostoles dihang gidakop si Jesus, ang pipila sa mga babaye nga mitabang niya miunong kaniya samtang himalatyon siya sa estaka sa pagsakit. (Mat. 26:56; Mar. 15:40, 41) Ang diyosnong mga babaye maoy unang nakakita sa iyang pagkabanhaw. Gisugo niya sila nga sultihan ang mga apostoles nga nabanhaw na siya. (Mat. 28:5, 9, 10) Ug sa Pentekostes 33 C.E., posibleng may mga babaye dihang gibubo ang balaang espiritu ug ang tanan didto nakadawat sa katakos sa pagsultig langyawng mga pinulongan ug sa pagsangyaw bahin sa “halangdong mga butang sa Diyos.”—Buh. 1:14; 2:2-4, 11. w20.09 23 ¶11-12

Ang paghimog tinun-an makaluwas ug kinabuhi! Giunsa nato pagkahibalo? Sa dihang gihatag ni Jesus ang sugo diha sa Mateo 28:19, 20, siya miingon: “Adtoa ninyo ang mga tawo . . . ug tudloi sila aron mahimong akong mga tinun-an. Bawtismohi sila.” Unsa ka importante ang pagpabawtismo? Kinahanglanon ni aron ang usa maluwas. Ang magpabawtismo kinahanglang motuo nga ang kaluwasan naposible lang tungod kay si Jesus namatay alang kanato ug gibanhaw. Kanay hinungdan nga giingnan ni apostol Pedro ang mga isigka-Kristohanon: ‘Ang bawtismo nagaluwas kaninyo karon pinaagi sa pagkabanhaw ni Jesu-Kristo.’ (1 Ped. 3:21) Busa kon ang usa ka bag-ong tinun-an magpabawtismo, may paglaom siya nga maluwas. Sa paghimog tinun-an, kinahanglang ugmaron nato ang “maayong paagi sa pagpanudlo.” (2 Tim. 4:1, 2) Ngano? Tungod kay si Jesus nagsugo kanato: “Adtoa ninyo ang mga tawo . . . ug tudloi sila aron mahimong akong mga tinun-an.” Si apostol Pablo miingon nga ‘magpadayon’ ta nianang buluhatona, ‘kay sa pagbuhat niini maluwas nato ang atong kaugalingon ug kadtong maminaw nato.’ w20.10 14 ¶1-2

Ang tinun-ang si Pedro ganahang mangisdag tawo. Ug sa tabang ni Jehova, si Pedro nahimong maayo kaayo nianang buluhatona. (Buh. 2:14, 41) Mosangyaw ta kay gimahal nato si Jehova. Mao nay atong pangunang rason sa pagbuhat niana. Ang atong gugma kang Jehova makapalihok nato sa pagsangyaw bisag mobati tang dili kuwalipikado. Sa dihang gidapit ni Jesus si Pedro nga mahimong mangingisdag tawo, siya miingon: “Ayaw nag kahadlok.” (Luc. 5:8-11) Si Pedro wala mahadlok sa posibleng mahitabo kon mahimo siyang tinun-an. Hinunoa, si Pedro nakurat sa kadaghan sa isda nga ilang nakuha tungod sa milagro nga gihimo ni Jesus, ug mibati siya nga dili siya kuwalipikado nga mahimong kauban ni Jesus sa buluhaton. Sa susama, mabalaka tingali ka nga dili nimo mahimo ang tanang gikinahanglan aron mahimong tinun-an sa Kristo. Kon mao, palig-ona ang imong gugma kang Jehova, kang Jesus, ug sa imong isigkatawo, ug mapalihok ka sa pagdawat sa pagdapit ni Jesus nga mahimong mangingisdag tawo.—Mat. 22:37, 39; Juan 14:15. w20.09 3 ¶4-5

Andam tang mogamit sa atong panahon, kusog, ug materyal nga mga butang aron makita kadtong “nakiling sa pagdawat sa kamatuoran nga motultol sa kinabuhing walay kataposan.” (Buh. 13:48) Kon buhaton nato kini, gisundog nato si Jesus. Siya miingon: “Ang akong pagkaon mao ang pagbuhat sa kabubut-on sa usa nga nagpadala kanako ug ang paghuman sa iyang buluhaton.” (Juan 4:34; 17:4) Mao pod nay gusto natong buhaton. Gusto natong humanon ang buluhaton nga gisalig kanato. (Juan 20:21) Ug gusto nato nga ang uban, apil ang mga dili aktibo, molahutay niining buluhatona uban kanato. (Mat. 24:13) Tinuod, dili sayon ang paghimo sa buluhaton nga gisugo ni Jesus kanato. Pero wala ta mag-inusara niining buluhatona. Si Jesus nagsaad nga siya mag-uban kanato. Sa dihang magsangyaw ta ug maghimog mga tinun-an, kita “mga isigkamagbubuhat sa Diyos” ug gihimo nato ni ‘kauban ang Kristo.’ (1 Cor. 3:9; 2 Cor. 2:17) Busa, molampos ta sa paghimo niini. Dako gyong pribilehiyo ug kalipay ang pagtuman niini nga asaynment ug ang pagtabang sa uban nga mohimo sab niini!—Filip. 4:13. w20.11 7 ¶19-20

Sagad, ang desisyon sa ginikanan makaapektar sa mga anak sa taas nga panahon. Kon dili maayo ang desisyon sa ginikanan, mahimong moresulta nig mga problema ngadto sa mga anak. Pero kon maayo ang ilang desisyon, matabangan nila ang ilang mga anak nga magmalipayon. Siyempre, ang mga anak kinahanglan pong mohimog maayong mga desisyon. Ang pinakamaayong desisyon nga mahimo sa usa mao ang pag-alagad sa atong mahigugmaon nga langitnong Amahan, si Jehova. (Sal. 73:28) Ang ginikanan ni Jesus gustong motabang sa ilang mga anak sa pag-alagad kang Jehova, ug ang ilang mga desisyon nagpamatuod nga mao nay ilang pangunang tumong. (Luc. 2:40, 41, 52) Si Jesus pod mihimog maayong mga desisyon nga nakatabang niya sa pagtuman kon unsay gipabuhat ni Jehova kaniya. (Mat. 4:1-10) Si Jesus midako nga buotan, maunongon, ug maisogon nga tawo—ang klase sa anak nga ikapasigarbo ug makapalipay ni bisan kinsang mahinadlokon sa Diyos nga ginikanan. w20.10 26 ¶1-2

Hunahunaa kining tulo ka kahimtang. Ang usa ka tigulang nga sister naghunahuna sa malipayong mga hitabo sa batabata pa siya. Bisag medyo lisod na ang iyang kinabuhi karon, gihimo niya ang iyang kinamaayohan para kang Jehova. (1 Cor. 15:58) Kada adlaw, mag-imadyin siya nga kauban niya ang iyang mga minahal sa gisaad nga bag-ong kalibotan. Ang laing sister nahinumdom nga napasakitan siya sa usa ka igsoon, pero nakadesisyon siya nga dili na magsigeg hunahuna niana. (Col. 3:13) Ang usa ka brader nahinumdom sa iyang nahimong kasaypanan pero nagpokus siya sa pagpabiling matinumanon karon. (Sal. 51:10) Unsay parehong gihimo niining tulo ka igsoon? Bisag nahinumdom sila sa nangagi, wala sila magsigeg hunahuna niana. Hinunoa, nagpokus sila sa umaabot. Nganong importante kana? Sama nga ang usa ka tawo dili makatarong ug lakaw kon magsige siyag lingi sa luyo, dili pod ta makapadayon sa pag-alagad kang Jehova kon magsige tag lingi sa nangagi.—Luc. 9:62. w20.11 24 ¶1-3

Si David giisip nga huyang sa kusgan kaayong manggugubat nga si Goliat. Kon buot hunahunaon, si Goliat mas dako, mas armado, ug mas anad sa pagpakiggubat. Sa laing bahin, si David usa lang ka batan-on nga walay kasinatian sa pagpakiggubat ug kulag armas. Pero si David misalig kang Jehova alang sa kusog ug napildi niya ang iyang kaaway. (1 Sam. 17:41-45, 50) Giatubang ni David ang laing problema nga posibleng makapabati niyang huyang. Si David maunongong nag-alagad sa tinudlo ni Jehova nga hari sa Israel, si Saul. Sa sinugdan, gitahod ni Haring Saul si David. Sa ulahi, tungod sa garbo, si Saul nasina kaniya. Dili na maayo ang pagtratar ni Saul kang David. Gani misulay siya sa pagpatay kang David. (1 Sam. 18:6-9, 29; 19:9-11) Bisan pa sa dili maayong pagtratar ni Haring Saul, si David padayong nagtahod sa hari nga gitudlo ni Jehova. (1 Sam. 24:6) Nangayo siyag kusog kang Jehova aron malahutay ang maong lisod nga pagsulay.—Sal. 18:1, superskripsiyon. w20.07 17 ¶11-13

Ang dakong bahin sa tagna bahin sa hari sa amihanan ug hari sa habagatan natuman na, busa makasalig ta nga ang nahibiling bahin niana matuman usab. Aron masabtan ang tagna sa Daniel kapitulo 11, angay natong hinumdoman nga kini nagtumong lang sa mga magmamando o gobyerno nga may direktang pakiglabot sa katawhan sa Diyos. Ug bisag ang mga alagad sa Diyos maoy gamay lang nga bahin sa populasyon sa kalibotan, sagad sila ang sentro sa dagkong panghitabo sa kalibotan. Ngano? Tungod kay si Satanas ug ang iyang entirong sistema may usa ka pangunang tumong—ang paglaglag niadtong nag-alagad kang Jehova ug Jesus. (Gen. 3:15; Pin. 11:7; 12:17) Dugang pa, ang tagna sa Daniel kinahanglang mahiuyon sa ubang tagna sa Pulong sa Diyos. Ang tinuod, masabtan lang nato sa hustong paagi ang tagna ni Daniel kon itandi nato kini sa ubang bahin sa Kasulatan. w20.05 2 ¶1-2

Daghang tawo karon ang dunay personal nga opinyon kon unsay mahitabo sa tawo human sa kamatayon. Pero unsay gitudlo sa Bibliya? Dihang ang usa mamatay, ang iyang lawas madugta. Pero ang Usa nga naglalang sa uniberso gikan sa wala makabanhaw nianang tawhana ug makahatag kaniya sa lawas nga iyang gikinahanglan. (Gen. 1:1; 2:7) Si apostol Pablo migamit ug ilustrasyon aron ipakita nga dili kinahanglang ibalik sa Diyos ang mao ra nga lawas. Hunahunaa ang ‘usa ka lugas,’ o “binhi.” Ang binhi nga gitanom motubo ug mahimong bag-ong tanom. Ang bag-ong tanom lahi kaayo sa gamayng binhi. Gigamit ni Pablo kini nga pagtandi aron ipakita nga ang atong Maglalalang ‘makahatag ug lawas sumala sa iyang kabubut-on.’ Miingon sab si Pablo nga “dunay mga lawas nga langitnon ug mga lawas nga yutan-on.” Sa unsang paagi? Aw, sa yuta, unodnon ang atong lawas. Pero sa langit, dunay espirituhanong mga lawas, sama nianang sa mga anghel.—1 Cor. 15:36-41. w20.12 9-10 ¶7-9

Kitang tanan gustog kalmado ug malinawon nga kinabuhi. Walay usa nato ang gustong mabalaka. Pero usahay, mobati tingali tag grabeng kabalaka ug makapangutanag susama nianang gisukna ni Haring David kang Jehova sa atong teksto karong adlawa. Daghang butang ang makapabalaka nato ug dili nato mapugngan nga mahitabo ang pipila niini. Pananglitan, dili nato mapugngan ang pagsaka sa presyo sa pagkaon, sinina, ug puy-anan kada tuig; dili sab nato makontrolar kon kanus-a ta tentalon sa atong mga kauban sa trabaho o sa eskuwelahan sa paghimog dili matinud-anon o imoral nga mga buhat. Ug dili nato mapugngan ang mga tawo sa paghimog krimen diha sa atong dapit. Nag-atubang ta niini nga mga problema kay nagkinabuhi ta sa kalibotan diin ang panghunahuna sa kadaghanan wala ibase sa mga prinsipyo sa Bibliya. Si Satanas, ang Diyos niining kalibotana, nahibalo nga dunay pipila nga dili moalagad kang Jehova tungod sa “mga kabalaka sa kinabuhi niini nga sistema sa mga butang.” (Mat. 13:22; 1 Juan 5:19) Dili ikatingala nga kining kalibotana puno kaayog makapa-stress nga mga kahimtang! w21.01 2 ¶1, 3

Giawhag ta ni apostol Juan nga dili magdumot sa atong mga igsoon. Kon dili nato sundon ang maong tambag, basig maimpluwensiyahan ta ni Satanas. (1 Juan 2:11) Nahitabo ni sa pipila sa hinapos sa unang siglo C.E. Nianang panahona, naningkamot si Satanas nga ang katawhan sa Diyos magdumtanay ug magkabahinbahin. Sa dihang gisulat ni Juan ang iyang mga sulat, may mga tawong nagsundog kang Satanas nga nahimong membro sa kongregasyon. Pananglitan, si Diotrefes nagpahinabog grabeng pagkabahinbahin diha sa usa ka kongregasyon. (3 Juan 9, 10) Wala siyay tahod sa mga ansiyano nga gipadala sa nagamandong lawas. Misulay pa gani siya nga papahawaon sa kongregasyon kadtong nag-abiabi sa mga igsoon nga dili niya ganahan. Pagkaarogante! Si Satanas naningkamot gihapon nga magkabahinbahin ang katawhan sa Diyos karon. Hinaot dili nato tugotan ang pagdumot nga makapabulag nato sa usag usa. w21.01 11 ¶14

Sa unang gubat sa kalibotan, ang gobyerno sa Germany ug ang gobyerno sa Britain naglutos sa mga alagad sa Diyos, kinsa midumili sa pagpakiggubat. Ug ang gobyerno sa U.S. nagbilanggo niadtong nanguna sa buluhatong pagsangyaw. Kini nga paglutos nagtuman sa tagna sa Pinadayag 11:7-10. Dayon, sa katuigan sa 1930 ug ilabina panahon sa ikaduhang gubat sa kalibotan, way kaluoy nga giatake sa hari sa amihanan ang katawhan sa Diyos. Gidili ni Hitler ug sa iyang mga sumusunod ang buluhaton sa katawhan sa Diyos. Ilang gipatay ang gatosan ka alagad ni Jehova ug gibilanggo ang linibo pa diha sa mga kampo konsentrasyon. Ang hari sa amihanan milampos sa ‘pagpasipala sa sangtuwaryo’ ug sa ‘pagkuha sa inadlaw nga halad’ pinaagi sa pagdili sa buluhatong pagsangyaw. (Dan. 11:30b, 31a) Ang lider niini, si Hitler, nanumpa pa gani nga iyang puohon ang katawhan sa Diyos sa Germany. w20.05 6 ¶12-13

Aron makapakita tag mabinationg pagmahal sa usag usa, dili ta makigkompetensiya sa uban diha sa kongregasyon. Hinumdomi nga si Jonatan wala makigkompetensiya kang David, nga nag-isip kaniya ingong karibal sa trono. (1 Sam. 20:42) Masundog natong tanan ang ehemplo ni Jonatan. Ayawg kasina sa mga igsoon tungod sa ilang mga abilidad, “apan magpaubos mo ug isipa ang uban nga labaw kay kaninyo.” (Filip. 2:3) Hinumdomi nga ang matag usa kanato dunay mahimo nga makatabang sa kongregasyon. Pinaagi sa pagpabiling mapainubsanon, makita nato ang maayong mga hiyas sa mga igsoon ug makabenepisyo ta sa ilang pagkamatinumanon. (1 Cor. 12:21-25) Sa dihang magpakita tag mabinationg pagmahal sa usag usa, mapalig-on nato ang panaghiusa sa katawhan sa Diyos. Mapamatud-an nato nga kita mga tinun-an ni Jesus, ug kini makadani sa sinserong mga tawo sa matuod nga pagsimba. Labaw sa tanan, mahimaya nato “ang Amahan nga malumo ug maluluy-on ug ang Diyos sa tanang paghupay,” si Jehova.—2 Cor. 1:3. w21.01 24 ¶14; 25 ¶16

Karon, ang pipila ka tawo nagtamay sa mga Saksi ni Jehova ug nag-isip kanatong way grado ug ubos. Ngano? Tungod kay ang atong panglantaw lahi nianang sa kalibotan. Naningkamot ta nga mahimong mapainubsanon, lumo, ug masinundanon. Pero ang mga tawo karon ganahan sa mga hambogiro, mapahitas-on, ug rebelyoso. Dugang pa, dili ta mag-apil-apil sa politika ug dili ta magsundalo. Lahi ta sa mga tawo sa kalibotan maong giisip ta nilang ubos. (Roma 12:2) Bisag unsa pay hunahuna sa kalibotan kanato, si Jehova naggamit nato sa paghimog talagsaong mga butang. Sa iyang tabang nagmalamposon ang kinadak-ang buluhatong pagsangyaw sa kasaysayan sa tawo. Ang iyang mga alagad karon nag-imprenta sa kinadaghanag hubad ug naapod-apod nga mga magasin sa tibuok kalibotan, ug gigamit nila ang Bibliya sa pagtabang sa milyonmilyong tawo sa pagpauswag sa ilang kinabuhi. Si Jehova ang angayng pasidunggan niining dakong mga kalamposan. w20.07 15 ¶5-6

Si Jesus nagpasakop kang Jehova, pero dili tungod kay kulang siyag kahibalo o kahanas. Ang iyang simple ug klaro nga paagi sa pagpanudlo nagpakita nga siya intelihente kaayo. (Juan 7:45, 46) Nahibalo si Jehova sa katakos ni Jesus, maong gitugotan Niya si Jesus sa pagbuhat uban Niya dihang gilalang ni Jehova ang uniberso. (Prov. 8:30; Heb. 1:2-4) Ug sukad sa pagkabanhaw ni Jesus, gihatag ni Jehova kaniya ang “tanang awtoridad sa langit ug sa yuta.” (Mat. 28:18) Bisag si Jesus daghag abilidad, nagpagiya gihapon siya kang Jehova. Ngano? Tungod kay gimahal niya ang iyang Amahan. Kinahanglang hinumdoman kana sa mga bana. Si Jehova nagsugo sa mga asawa sa pagpasakop sa ilang bana dili tungod kay giisip Niya ang mga babaye nga ubos kay sa mga lalaki. Gipamatud-an nâ ni Jehova pinaagi sa pagpilig mga babaye ug mga lalaki nga magmando uban ni Jesus. (Gal. 3:26-29) Si Jehova nagpakitag pagsalig sa iyang Anak pinaagi sa paghatag kaniyag awtoridad. Sa susama, ang maalamong bana maghatag sa iyang asawa ug awtoridad. w21.02 11 ¶13-14

Ang Pulong sa Diyos samag salamin, nga makatabang nato nga makita kon unsay kinahanglan natong pauswagon ug kon sa unsang paagi mahimo kana. (Sant. 1:23-25) Pananglitan, human sa pagtuon sa Pulong sa Diyos, makita tingali nato nga kinahanglan natong kontrolahon ang atong kasuko. Sa tabang ni Jehova, makakat-on ta kon unsaon sa pagpabiling kalmado dihang dunay mga tawo o problema nga makapasuko kanato. Mas makahunahuna tag tarong ug makahimog mas maayong mga desisyon. (Sant. 3:13) Importante gyod nga sinati kaayo ta sa Bibliya! Usahay, ayha pa ta makakat-on kon unsay dili angayng buhaton kon nasayop na ta. Ang mas maayong paagi sa pagkuhag kaalam mao ang pagkat-on gikan sa mga kalamposan ug kasaypanan sa uban. Mao nga gidasig ta ni Santiago nga susihon ang mga ehemplo sa Bibliya sama kang Abraham, Rahab, Job, ug Elias. (Sant. 2:21-26; 5:10, 11, 17, 18) Ang maong maunongong mga alagad ni Jehova nakalahutay sa mga kalisdanan nga makapawala unta sa ilang kalipay. Ang ilang ehemplo sa paglahutay nagpakita nga sa tabang ni Jehova makalahutay sab ta. w21.02 29-30 ¶12-13

Sa usa ka pagtuon sa Bibliya, pangunang responsibilidad sa nagdumala ang pagtabang sa study nga makasabot sa Pulong sa Diyos. Kon paubanon ka sa nagdumala, angay nimong isipon ang kaugalingon ingong iyang partner. Papel nimo ang pagtabang kaniya. (Eccl. 4:9, 10) Unsay imong mahimo aron makatabang ka nga molampos ang pagtuon? Pangandam para sa pagtuon. Una, pangayo sa nagdumala ug pipila ka detalye bahin sa study. Unsay imong nahibaloan bahin sa study? Unsang topiko ang inyong tun-an? Unsay gusto nimong makat-onan sa study niini nga pagtuon? Duna ba koy angay o dili angayng buhaton o isulti panahon sa pagtuon? Unsaon kaha nako pagdasig ang study nga mouswag? Siyempre, ang nagdumala dili mosulti nimog kompidensiyal nga impormasyon, pero ang iyang isulti mahimong makatabang. Ang misyonaryang si Joy miingon: “Kini nga panaghisgot makatabang sa akong kauban nga mainteres sa akong Bible study ug sa pagkahibalo kon unsay iyang isulti panahon sa pagtuon.” w21.03 9 ¶5-6

Usahay, dumtan ta kay nagkinabuhi ta subay sa matarong nga mga sukdanan sa Diyos. Kini nga mga sukdanan lahi kaayo sa ubos nga sukdanan sa kalibotan maylabot sa moralidad. Pananglitan, daghan karon ang miuyon sa grabeng imoral nga mga buhat nga sama niadtong sa Sodoma ug Gomora nga gilaglag sa Diyos! (Jud. 7) Kay nagsunod ta sa mga sukdanan sa Bibliya maylabot sa maong mga buhat, daghan ang nagbiaybiay nato ug nag-ingon nga panatiko ra kaayo ta. (1 Ped. 4:3, 4) Unsay makatabang nato sa paglahutay sa dihang dumtan ug insultohon ta sa mga tawo? Nagkinahanglan tag lig-ong pagtuo nga tabangan ta ni Jehova. Samag taming, ang atong pagtuo ‘makapalong sa tanang nagdilaab nga pana sa daotan.’ (Efe. 6:16) Pero dili igo ang pagtuo lang. Gikinahanglan sab nato ang gugma. Ngano? Tungod kay ang gugma “dili masuk-anon.” Kini moantos ug molahutay sa tanang makapasakit nga mga butang. (1 Cor. 13:4-7, 13) Ang atong gugma kang Jehova, sa mga igsoon, ug bisan sa atong mga kaaway makatabang nato sa paglahutay bisan pag gidumtan ta. w21.03 21 ¶3-4

Usahay, mapamatud-an nato ang atong gugma sa mga igsoon pinaagi sa kon unsay dili nato buhaton. Pananglitan, dili ta mahiubos dayon sa ilang isulti. Tagda ang nahitabo sa hinapos nga bahin sa kinabuhi ni Jesus dinhi sa yuta. Giingnan niya ang iyang mga tinun-an nga aron makabaton silag kinabuhi, kinahanglan silang mokaon sa iyang unod ug moinom sa iyang dugo. (Juan 6:53-57) Daghan sa iyang mga tinun-an ang gingil-aran sa iyang giingon, maong mibiya sila kaniya. Pero miunong niya ang iyang tinuod nga mga higala. Wala nila masabti ang giingon ni Jesus, ug tingali nakurat pod sila niana. Pero ang maunongong mga higala ni Jesus wala maghunahuna nga sayop ang iyang giingon ug wala sila mahiubos. Hinunoa, misalig sila kaniya kay nahibalo sila nga siya nagsulti sa kamatuoran. (Juan 6:60, 66-69) Importante gyod nga dili dayon ta mahiubos sa isulti sa atong mga higala! Hinunoa, hatagan nato silag kahigayonan nga ipatin-aw kon unsay ilang buot ipasabot.—Prov. 18:13. w21.01 11 ¶13