Nobyembre

Kay kulang tag kahibalo bahin kang Jonas, maghunahuna tingali ta nga siya dili kasaligan, ug dili pa gani maunongon. Direkta siyang gisugo ni Jehova sa pagpahayag ug paghukom sa Nineve. Imbes mosunod, si Jonas misakay ug barko paingon sa laing direksiyon, ‘palayo kang Jehova.’ (Jon. 1:1-3) Hatagan pa kaha nimog kahigayonan si Jonas sa paghimo sa iyang asaynment? Tingali dili na. Pero si Jehova nakakitag mga rason nga hatagan pa siyag kahigayonan. (Jon. 3:1, 2) Diha sa mga pag-ampo ni Jonas, makita kon unsa gyod siyang matanga sa tawo. (Jon. 2:1, 2, 9) Kana nga pag-ampo—nga walay duhaduhang usa lang sa daghang pag-ampo ni Jonas—makatabang nato nga makita kon unsa gyoy iyang personalidad, imbes isipon lang siya ingong usa ka tawo nga miikyas sa iyang asaynment. Ang iyang mga pulong nagpakita nga siya mapainubsanon, mapasalamaton, ug determinadong mosunod kang Jehova. Dili ikatingala nga si Jehova wala magpokus sa iyang sayop. Iya hinuong gitubag ang pag-ampo ni Jonas ug padayon niya siyang gigamit ingong propeta! Importante gyod nga ang matag ansiyano “maminaw” sa dili pa motambag! w20.04 15 ¶4-6

Ang mga tinun-an sa unang siglo midawat sa Kristohanong mga pagtulon-an ug misalig sa balaang espiritu sa pagtabang kanila nga masabtan ang Pulong sa Diyos. Nag-research sila aron maseguro nga kini nga mga pagtulon-an gibase sa Kasulatan. (Buh. 17:11, 12; Heb. 5:14) Wala nila ibase ang ilang pagtuo sa pagbati lang, ug wala sila mag-alagad kang Jehova tungod lang kay malipay sila dihang makig-uban sa mga igsoon. Hinunoa, ang ilang pagtuo gibase sa “tukmang kahibalo sa Diyos.” (Col. 1:9, 10) Ang mga kamatuoran sa Pulong sa Diyos dili mausab. (Sal. 119:160) Pananglitan, kini dili mausab kon ang usa ka igsoon makapasakit nato o makahimog seryosong sala. Ug dili ni mausab dihang makasinati tag mga kalisdanan. Busa kinahanglan nga nakasabot kaayo ta sa mga pagtulon-an sa Bibliya ug kombinsido nga tinuod ni. Ang atong lig-ong pagtuo nga gibase sa mga kamatuoran sa Bibliya makatabang nga dili ta matarog panahon sa mga pagsulay, sama ra nga ang angkla makatabang nga dili matarog ang barko panahon sa kusog nga bagyo. w20.07 9 ¶6-7

Giisip ni Jesus ang atong pagsuportar sa iyang dinihogang mga igsoon ingong pagsuportar nato kaniya. (Mat. 25:34-40) Ang pangunang paagi nga nagsuportar ta sa mga dinihogan mao ang bug-os nga pagpakigbahin sa buluhaton nga gisugo ni Jesus sa iyang mga sumusunod—ang paghimog mga tinun-an. (Mat. 28:19, 20) Sa tabang lang sa “ubang mga karnero” nga mahimo sa mga igsoon sa Kristo kining dakong buluhaton sa tibuok kalibotan. (Juan 10:16) Kon apil ka sa ubang mga karnero, matag higayon nga makigbahin ka niining buluhatona, gipakita nimo ang imong gugma dili lang sa mga dinihogan kondili kang Jesus usab. Nakighigala pod ta kang Jehova ug Jesus pinaagi sa paggamit sa atong materyal nga mga butang sa pagsuportar sa buluhaton nga ilang gidumala. (Luc. 16:9) Pananglitan, makahatag tag donasyon sa tibuok kalibotang buluhaton, ug kini nga mga donasyon gigamit sa paghatag ug hinabang niadtong biktima sa kalamidad o trahedya. Makahatag pod tag donasyon para sa galastohan sa atong kongregasyon ug makatabang niadtong nahibaloan nato nga nanginahanglan.—Prov. 19:17. w20.04 24 ¶12-13

Ingong katumanan sa tagna, ang hari sa amihanan wala “magtagad sa Diyos sa iyang mga amahan.” Sa unsang paagi? Gusto sa Soviet Union nga wagtangon ang mga relihiyon, busa gisulayan niini pagkuha ang ilang gahom. Aron mahimo kana, dihay gipagawas nga mando ang Soviet Union niadtong 1918 nga nahimong basehanan nga itudlo diha sa mga eskuwelahan nga walay diyos. Sa unsang paagi ang hari sa amihanan ‘naghimaya sa diyos sa mga kuta’? Ang Soviet Union migasto ug dako kaayong kantidad sa pagtigom ug kasundalohan ug sa paghimog libolibo ka nukleyar nga mga armas aron molig-on ang iyang pagmando. Sa ngadtongadto ang hari sa amihanan ug hari sa habagatan nakatigom ug igong armas nga makapatayg bilyonbilyon! Ang hari sa amihanan ug hari sa habagatan nagtinabangay sa paghimo sa usa ka importanteng butang—ang ‘pagpahimutang sa dulumtanang butang nga magpahinabog kalaglagan,’ nga mao ang United Nations.—Dan. 11:31. w20.05 6-7 ¶16-17

Kinsay makatabang sa pagpangita sa mga dili aktibo? Kitang tanan—mga ansiyano, payunir, membro sa pamilya, ug magmamantala. Naa ba kay higala o paryente nga nahimong dili aktibo? Naa ba kay nakit-ang dili aktibo dihang nagsangyaw ka sa balay ug balay o kaha nag-public witnessing? Ipatin-aw kaniya nga kon gusto niyang magpaduaw, malipay ka sa paghatag sa iyang adres o numero sa cellphone ngadto sa mga ansiyano. Ang ansiyano nga si Thomas miingon: “Ako unang pangutan-on ang lainlaing igsoon kon nahibalo ba sila kon asa na nagpuyo ang mga dili aktibo. O kaha pangutan-on nako ang mga igsoon kon naa ba silay nahinumdoman nga dili na tigtambongan ug tigom. Dayon, dihang akong duawon ang mga igsoon nga dili aktibo, mangutana ko bahin sa ilang mga anak o mga paryente. Tingali ginadala nila kaniadto ang ilang mga anak sa tigom, ug tingali ang ilang mga anak nahimo pong mga magmamantala kaniadto. Sila sab puwedeng tabangan nga makabalik kang Jehova.” w20.06 24 ¶1; 25 ¶6-7

Sa tanang linalang sa yuta, tawo lang ang dunay katakos sa pagkat-on ug mga leksiyon bahin sa moral pinaagi sa paghinumdom ug pag-analisar sa nangaging mga panghitabo. Tungod niana, makakat-on tag mas maayong mga sukdanan ug mabag-o nato ang atong paagi sa paghunahuna ug pagkinabuhi. (1 Cor. 6:9-11; Col. 3:9, 10) Sa pagkatinuod, mabansay nato ang atong konsensiya sa pag-ila kon unsay maayo ug daotan. (Heb. 5:14) Kita makakat-on sa pagpakitag gugma, pagkamabination, ug kaluoy. Ug makakat-on ta sa pagsundog sa hustisya ni Jehova. Ang usa ka paagi nga makapakita tag apresasyon sa atong katakos sa paghinumdom mao ang pagpaningkamot nga mahinumdom sa tanang higayon nga si Jehova nagtabang ug naghupay kanato sa nangagi. Kini magpalig-on sa atong pagsalig nga tabangan sab ta niya sa umaabot. (Sal. 77:12; 78:4, 7) Ang laing paagi mao ang paghinumdom ug pagpasalamat sa maayong mga butang nga gihimo sa ubang tawo kanato. Nakita sa mga researcher nga ang mga tawong mapasalamaton sagad mas malipayon. w20.05 23 ¶12-13

Imadyina kon unsay gibati ni Moises dihang nagtago siya sa lungag sa usa ka dakong bato ug nakita niya ang panan-awon sa himaya ni Jehova nga miagi. Ang Pagtugkad sa Kasulatan nag-ingon nga posible nga kini ang “labing makahahadlok [o, makapahingangha] nga kasinatian ni bisan kinsang tawo sa wala pa moabot si Jesu-Kristo.” Nadungog ni Moises ang mga pulong nga dayag nga gisulti sa usa ka anghel: “Si Jehova, si Jehova, Diyos nga maluluy-on ug mabination, dili daling masuko ug dagaya sa maunongong gugma ug kamatuoran, nagapakitag maunongong gugma sa linibo ka henerasyon, nagapasaylo sa kasaypanan ug kalapasan ug kasal-anan.” (Ex. 33:17-23; 34:5-7) Posibleng nahinumdom si Moises sa maong hitabo dihang iyang gigamit ang ngalang Jehova pagsulti niya sa mga pulong sa teksto karong adlawa. Dihang maghunahuna ta sa ngalan ni Jehova, angay sab natong pamalandongon kon unsang klaseha siya sa persona. Angay natong hinumdoman ang iyang mga hiyas, sama sa gahom, kaalam, hustisya, ug gugma. Ang pagpamalandong niana ug sa uban pa niyang mga hiyas makatabang nga molawom pa ang atong pagtahod kaniya.—Sal. 77:11-15. w20.06 8-9 ¶3-4

Si Jesus miingon nga ang iyang mga tinun-an mailhan pinaagi sa ilang gugma sa usag usa. (Juan 13:34, 35) Pero labaw pa ang gikinahanglan aron molig-on ang atong pagtuo. Ang atong pagtuo dili lang sa Kristohanong gugma angayng ibase. Ngano? Ibutang ta nga ang usa ka igsoon—tingali ansiyano pa gani o kaha payunir—nakahimog seryosong sala. O komosta kon napasakitan ka sa usa ka igsoon? O tingali dunay nahimong apostata nga moinsistir nga wala nato ang kamatuoran. Kon mahitabo na, mapandol ka ba ug mohunong sa pag-alagad kang Jehova? Kini ang leksiyon: Kon ibase lang nimo ang imong pagtuo sa kon unsay gibuhat sa uban imbes sa imong relasyon kang Jehova, ang imong pagtuo dili molig-on. Ang imong pagbati kang Jehova ug sa iyang katawhan makatabang nimo sa pagpalig-on sa imong pagtuo, pero importante sab kaayo nga imong tun-an pag-ayo ang Bibliya, sabton ang imong nakat-onan, ug mag-research aron makombinsir ka nga tinuod ang imong nakat-onan bahin kang Jehova.—Rom. 12:2. w20.07 8 ¶2-3

Daghang eksperyensiya ang nagpakita nga ang mga anghel nagtabang nato sa pagpangita sa mga dili aktibo nga gustong mobalik kang Jehova. (Pin. 14:6) Pananglitan, si Silvio, nga taga-Ecuador, nag-ampo kang Jehova nga tabangan siya nga makabalik sa kongregasyon. Samtang nag-ampo pa siya, dihay duha ka ansiyano nga nag-doorbell. Niana nga pagduaw, malipayong gisugdan sa mga ansiyano ang pagtabang kaniya. Malipay kaayo ta dihang atong tabangan ang mga luya sa espirituwal nga makabalik kang Jehova. Matikdi ang giingon ni Salvador, payunir nga naningkamot pag-ayo sa pagtabang sa mga dili aktibo: “Usahay makahilak ko sa kalipay. Malipay kaayo kong maghunahuna nga giluwas ni Jehova ang iyang pinalanggang karnero gikan sa kalibotan ni Satanas ug nakapribilehiyo ko nga motabang Niya sa paghimo niana.” Kon dili ka aktibo sa pag-alagad kang Jehova, makasalig ka nga gimahal gihapon ka niya. Si Jehova nagpaabot sa imong pagbalik, ug malipay kaayo siyang modawat nimo. w20.06 29 ¶16-18

Ingong atong “Dakong Instruktor,” si Jehova naghatag ug mga ehemplo diha sa iyang Pulong aron matudloan ta. (Isa. 30:21) Makakat-on ta dihang atong pamalandongon ang mga asoy sa Bibliya bahin niadtong nagpakitag mga hiyas nga makapalipay sa Diyos. Makakat-on sab ta dihang atong susihon kon unsay nahitabo niadtong wala magpakita nianang maayo nga mga hiyas. (Sal. 37:37; 1 Cor. 10:11) Hunahunaa kon unsay nahitabo kang Haring Saul. Sa sinugdan, makasaranganon siya. Sa batan-on pa siya, nahibalo siya sa iyang mga limitasyon ug nagduhaduha pa gani siyag dawat ug dugang nga responsibilidad. (1 Sam. 9:21; 10:20-22) Pero sa ngadtongadto, si Saul nahimong mapangahason. Milutaw ning dili maayong kinaiya wala madugay human siya mahimong hari. Dihay higayon nga nawad-an siyag pailob samtang nagpaabot kang propetang Samuel ug mitanyag siyag halad nga sinunog bisag wala siyay katungod sa paghimo niana. Ingong resulta, si Saul nawad-an sa pag-uyon ni Jehova ug ngadtongadto, sa iyang pagkahari. (1 Sam. 13:8-14) Maalamon ta kon makakat-on tag leksiyon gikan niining daotang panig-ingnan ug likayan ang pagkamapangahason. w20.08 10 ¶10-11

Tinuod nga pinaagi sa Kristo, gihatagan ni Jehova ang Iyang kongregasyon ug “gasa nga mga lalaki.” (Efe. 4:8) Apil niining “gasa nga mga lalaki” ang mga membro sa Nagamandong Lawas, katabang sa Nagamandong Lawas, membro sa Komite sa Sangang Buhatan, tigdumala sa sirkito, field instructor, ansiyano, ug ministeryal nga alagad. Ang maong mga brader gitudlo sa balaang espiritu sa pag-atiman sa bililhong mga karnero ni Jehova ug sa pagpalig-on sa kongregasyon. (1 Ped. 5:2, 3) Ang mga brader gitudlo sa balaang espiritu sa pag-atiman sa lainlaing responsibilidad. Maingon nga ang lainlaing parte sa lawas, sama sa kamot ug tiil, nagtinabangay alang sa kaayohan sa tibuok lawas, ang mga brader nga gitudlo sa balaang espiritu naningkamot pag-ayo aron makabenepisyo ang tibuok kongregasyon. Gihimo nila ni dili aron dayegon sila, kondili aron palig-onon ang mga igsoon. (1 Tes. 2:6-8) Mapasalamaton ta kang Jehova tungod nianang kuwalipikadong mga brader nga nag-una sa panginahanglan sa uban! w20.08 21 ¶5-6

Ang usa ka rason kon nganong mosangyaw ta mao nga ang mga tawo “pinanitan ug nagkatibulaag” ug kinahanglan kaayong makakat-on sa kamatuoran bahin sa Gingharian. (Mat. 9:36) Gusto ni Jehova nga ang tanang matang sa tawo makakat-on sa tukmang kahibalo sa kamatuoran ug maluwas. (1 Tim. 2:4) Mapalihok ta sa pagsangyaw kon atong hunahunaon ang epekto niini. Atong maluwas ang kinabuhi sa mga tawo. (Roma 10:13-15; 1 Tim. 4:16) Kita sab nagkinahanglag saktong galamiton sa atong pagsangyaw. Ug kinahanglang mahibalo ta kon unsaon kana paggamit. Si Jesus naghatag sa iyang mga tinun-an ug klarong mga instruksiyon. Giingnan niya sila kon unsay dad-on, kon asa mosangyaw, ug kon unsay isulti. (Mat. 10:5-7; Luc. 10:1-11) Karon, ang organisasyon ni Jehova nagtagana sa Teaching Toolbox nga dunay epektibong mga galamiton. Ug gitudloan ta kon unsaon paggamit ang maong mga galamiton. Kana nga pagbansay makatabang nato nga makabaton ug kompiyansa ug kahanas aron mahimong epektibo sa atong buluhaton.—2 Tim. 2:15. w20.09 4 ¶6-7, 10

Maimadyin ba nimo kon unsa ka malipayon si apostol Juan dihang iyang nabalitaan nga kadtong iyang natabangan nga makakat-on sa kamatuoran nagpadayon sa pag-alagad kang Jehova nga matinumanon? Nag-atubang silag daghang problema, ug naningkamot si Juan sa pagpalig-on sa pagtuo niining maunongong mga Kristohanon kinsa giisip niya ingong iyang espirituwal nga mga anak. Sa susama, malipay ta dihang ang atong mga anak o kadtong atong gitabangan sa espirituwal magpahinungod sa ilang kaugalingon kang Jehova ug magpadayon sa pag-alagad kaniya. (3 Juan 3) Niadtong mga 98 C.E., ang balaang espiritu ni Jehova nagpalihok kang Juan sa paghimog tulo ka sulat. Tuyo sa maong mga sulat nga dasigon ang maunongong mga Kristohanon nga magpabilin sa ilang pagtuo kang Jesus ug magpadayon sa paglakaw diha sa kamatuoran. Si Juan nabalaka sa epekto sa bakak nga mga magtutudlo diha sa mga kongregasyon. (1 Juan 2:18, 19, 26) Ang maong mga apostata nag-angkon nga nakaila sa Diyos, pero wala nila sunda ang iyang mga sugo. w20.07 20 ¶1-3

May pagtuo ta sa mensahe nga atong gisangyaw, busa gusto nato ning isulti sa daghang tawo kutob sa atong maarangan. Kita may pagsalig sa mga saad diha sa Pulong sa Diyos. (Sal. 119:42; Isa. 40:8) Nakita nato ang mga tagna sa Bibliya nga natuman sa atong panahon. Nakita nato nga nabag-o ang kinabuhi sa mga tawo dihang gipadapat nila ang mga tambag sa Bibliya. Tungod niini nga mga ebidensiya, segurado ta nga ang maayong balita sa Gingharian kinahanglang madungog sa tanan. May pagtuo sab ta kang Jehova, ang Tuboran sa mensahe nga atong gisangyaw, ug sa iyang gientrono nga Hari sa Gingharian, si Jesus. Bisag unsay mahitabo kanato, si Jehova mao gyod ang atong kusog ug dangpanan. (Sal. 46:1-3) Dugang pa, masaligon ta nga, gikan sa langit, si Jesus naggiya sa buluhatong pagsangyaw gamit ang gahom ug awtoridad nga gihatag ni Jehova kaniya. (Mat. 28:18-20) Ang pagtuo magpalig-on sa atong pagsalig nga panalanginan ni Jehova ang atong mga paningkamot. w20.09 12-13 ¶15-17

Usahay, ang mga sister nagkinahanglan tingalig modepensa ug motabang nila dihang mag-atubang silag espesipikong problema. (Isa. 1:17) Pananglitan, ang usa ka biyuda o diborsiyada nga sister basin nagkinahanglag motabang niya sa mga buluhaton nga gihimo kaniadto sa iyang bana. Ang usa ka tigulang nga sister nagkinahanglan tingalig tabang sa pagpakig-estorya sa mga doktor. O ang usa ka payunir nga sister nga nagboluntaryo sa ubang teokratikanhong buluhaton nagkinahanglan tingalig modepensa niya dihang sawayon siya kay dili kaayo siya makasangyaw sama sa ubang payunir. Konsideraha ang ehemplo ni Jesus. Si Jesus midepensa dayon sa mga babaye dihang nasaypan silag sabot. Pananglitan, gidepensahan niya si Maria dihang gisaway kini ni Marta. (Luc. 10:38-42) Ug gidepensahan niya si Maria sa ikaduhang higayon dihang gisaway kini sa uban tungod sa ilang gihunahuna nga sayop nga desisyon. (Mar. 14:3-9) Nasabtan ni Jesus ang motibo ni Maria ug gikomendahan kini. Gitagna pa gani ni Jesus nga ang maayong buhat ni Maria isulti “bisan asa sa kalibotan nga isangyaw ang maayong balita.” w20.09 24 ¶15-16

Ang maayong magbalantay nakasabot nga ang karnero puwede gyong mawala. Ug kon mahitabo nâ, dili silotan sa magbalantay ang karnero. Konsideraha ang ehemplo nga gihatag sa Diyos sa pagtabang sa pipila niya ka alagad nga temporaryong mibiya kaniya. Si propetang Jonas wala motuman sa iyang asaynment. Bisan pa niana, si Jehova wala maghunahuna nga dili na tabangan si Jonas. Samag maayong magbalantay, giluwas ni Jehova si Jonas ug gitabangan siya nga makabaton sa kusog nga iyang gikinahanglan sa pagtuman sa iyang asaynment. (Jon. 2:7; 3:1, 2) Sa ulahi, ang Diyos naggamit ug tanom nga upo aron tabangan si Jonas nga makasabot nga bililhon ang kinabuhi sa matag tawo. (Jon. 4:10, 11) Unsay leksiyon? Ang mga ansiyano dili maghunahuna nga dili na tabangan ang mga igsoon nga nahimong dili aktibo. Maningkamot hinuon sila sa pagsabot kon nganong ang karnero mipalayo sa kongregasyon. Ug dihang ang maong karnero mobalik kang Jehova, atimanon siya sa mga ansiyano ug pakitaag gugma. w20.06 20-21 ¶10-12

Human mahugno ang Soviet Union niadtong 1991, ang katawhan sa Diyos nianang dakong rehiyon nakaeksperyensiyag ‘diyutayng tabang’—usa ka yugto sa kagawasan. Tungod niana, may kagawasan na sila sa pagsangyaw, ug wala madugay ang mga magmamantala sa mga nasod nga bahin kaniadto sa Soviet Union miabot ug gatosan ka libo. Pero paglabay sa pipila ka tuig, ang Russia ug ang mga kaalyado niini nahimong hari sa amihanan. Ang usa ka gobyerno mahimong hari sa amihanan o hari sa habagatan kon buhaton niini ang tulo ka butang: (1) siya makiglabot sa katawhan sa Diyos, (2) iyang ipakita nga kaaway siya ni Jehova ug sa Iyang katawhan, ug (3) siya makigkompetensiya sa karibal nga hari. Ang Russia ug ang mga kaalyado niini nakiglabot sa katawhan sa Diyos, nga nagdili sa buluhatong pagsangyaw ug naglutos sa gatosan ka libong igsoon. Ang ilang gihimo nagpakita nga gidumtan nila si Jehova ug ang iyang katawhan. Ug sila nakigkompetensiya sa hari sa habagatan, ang Anglo-Amerikanong Gahom sa Kalibotan. w20.05 12-13 ¶3-4

Kay ang pagtudlo konektado sa paghimog tinun-an, gusto nato nga maayo kaayo ang atong paagi sa pagtudlo. Sa tibuok kalibotan, milyonmilyon ang gidumalahag pagtuon. Ganahan kaayo ta sa atong ginatudlo gikan sa Pulong sa Diyos. Busa gusto tingali nato nga magsigeg estorya bahin niana. Pero, magdumala man ta sa Pagtuon sa Bantayanang Torre, Pagtuon sa Kongregasyon sa Bibliya, o mag-Bible study, kinahanglan nga dili kita ang magsigeg estorya. Aron ang Bibliya maoy magtudlo, kinahanglan nga magpugong ta sa kaugalingon ug dili nato isulti ang tanan natong nahibaloan bahin sa usa ka teksto o topiko sa Bibliya. (Juan 16:12) Itandi ang imong kahibalo sa Bibliya karon sa imong nahibaloan niadtong gibawtismohan ka. Tingali sa una, pangunang doktrina lang ang imong nasabtan. (Heb. 6:1) Gidangtag daghang tuig una nimo makat-oni ang imong nahibaloan karon, busa ayaw paulanig daghang impormasyon ang imong study. w20.10 14-15 ¶2-4

Si Jehova mipilig maayo kaayong ginikanan para kang Jesus. (Mat. 1:18-23; Luc. 1:26-38) Ang kinasingkasing nga mga pulong ni Maria nga narekord sa Bibliya nagpakita sa iyang dakong gugma kang Jehova ug sa Iyang Pulong. (Luc. 1:46-55) Ug ang pagsunod ni Jose sa instruksiyon ni Jehova nagpakita nga siya nahigugma sa Diyos ug gusto niya nga malipay ang Diyos. (Mat. 1:24) Matikdi nga si Jehova wala magpilig dato nga ginikanan para kang Jesus. Ang halad nga gitanyag ni Jose ug Maria human matawo si Jesus nagpakita nga pobre sila. (Luc. 2:24) Tingali ang ilang kinabuhi simple lang, ilabina dihang midako na ang pamilya ug nahimo nang pito o kapin pa ang mga anak. (Mat. 13:55, 56) Gipanalipdan ni Jehova si Jesus sa pipila ka kapeligrohan, pero wala niya protektahi ang iyang Anak sa tanang problema. (Mat. 2:13-15) Pananglitan, may mga paryente si Jesus nga sa sinugdan wala motuo nga siya ang Mesiyas. (Mar. 3:21; Juan 7:5) Tingali nasakitan pod kaayo si Jesus dihang namatay ang iyang amaama nga si Jose. w20.10 26-27 ¶4-6

Mibati ka na ba sukad nga nag-inusara, nga walay makatabang nimo sa imong problema? Daghan ang mibatig ingon niana, apil na ang matinumanong mga alagad ni Jehova. (1 Hari 19:14) Kon mahitabo nâ nimo, hinumdomi ang saad ni Jehova: “Dili gyod ka nako biyaan, ug dili gyod ka nako talikdan.” Busa masaligon tang makaingon: “Si Jehova ang akong magtatabang; dili ko mahadlok.” (Heb. 13:5, 6) Gisulat ni apostol Pablo kanang mga pulonga ngadto sa mga Kristohanon sa Judea niadtong mga 61 C.E. Ang iyang giingon magpahinumdom nato sa gisulat sa salmista diha sa Salmo 118:5-7. Sama sa salmista, nahibalo si Pablo nga si Jehova ang iyang Magtatabang kay kadaghan na siya tabangi ni Jehova. Pananglitan, kapig duha ka tuig una siya mosulat sa mga Hebreohanon, si Pablo mibiyahe latas sa dagat nga gikusokuso sa kusog nga bagyo. (Buh. 27:4, 15, 20) Sa maong biyahe ug sa mga tuig una pa niana, gitabangan ni Jehova si Pablo sa lainlaing paagi. w20.11 12 ¶1-2

Nganong dili maalamon nga magsige tag hunahuna nga mas maayo pa ang atong kinabuhi kaniadto? Kay kon himoon nato nâ, ang ato lang mahinumdoman mao ang maayong mga butang sa nangagi. Tagda pananglitan ang mga Israelinhon kaniadto. Pagbiya nila sa Ehipto, nalimot dayon sila kon unsa ka lisod ang ilang kinabuhi didto. Nagpokus lang sila sa lami nga mga pagkaon. Sila miingon: “Gimingaw na mi sa mga isda nga libre namong gikaon sa Ehipto, sa mga pepino, pakwan, sibuyas dahon, bombay, ug ahos!” (Num. 11:5) Pero, “libre” ba gyod tong ilang gikaon? Dili. Dako kaayog gibayad niana ang mga Israelinhon; sila gidaogdaog pag-ayo ingong mga ulipon sa Ehipto. (Ex. 1:13, 14; 3:6-9) Bisan pa niana, nalimot sila sa maong mga kalisdanan ug nangandoy sa kagahapon. Sila nagpokus sa maayong mga butang sa nangagi imbes magpokus sa maayong mga butang nga bag-o pang gihimo ni Jehova para kanila. Si Jehova wala malipay sa ilang panghunahuna.—Num. 11:10. w20.11 25 ¶5-6

Usahay, maghunahuna tingali ta nga ang kinabuhi mubo ra ug “punog kasakit.” (Job 14:1) Maong may mga higayon nga mobati tag kaluya sa buot. Daghang alagad ni Jehova kaniadto ang mibatig sama niana. Ang uban gusto pa ganing mamatay. (1 Hari 19:2-4; Job 3:1-3, 11; 7:15, 16) Pero si Jehova—ang Diyos nga ilang gisaligan—kanunayng naghupay ug nagpalig-on kanila. Ang ilang mga kasinatian gisulat aron sa paghupay ug pagtudlo kanato. (Roma 15:4) Tagda si Jose, nga anak ni Jacob. Sa mubo nga panahon, nausab pag-ayo ang kinabuhi ni Jose, gikan sa usa ka anak nga pinangga sa amahan ngadto sa usa ka ubos nga ulipon sa paganong opisyal sa palasyo sa Ehipto. (Gen. 37:3, 4, 21-28; 39:1) Dayon, ang asawa ni Potipar nag-akusar kang Jose nga gisulayan kuno siyag lugos niini. Pero wala susiha ni Potipar kon unsay tinuod nga nahitabo. Iya hinuong gipabilanggo si Jose, ug didto gikadenahan kini. (Gen. 39:14-20; Sal. 105:17, 18) May rason gyod si Jose nga mobatig kaluya! w20.12 16-17 ¶1-4

Mao nay giingon ni Jesus nga usa sa pinakaimportanteng butang nga angay natong iampo. Pero unsay gipasabot ni Jesus? Ang pagbalaan sa usa ka butang nagpasabot nga himoon kining balaan, hinlo, o dalisay. Pero ang uban mangutana tingali, ‘Di ba ang ngalan ni Jehova daan nang balaan, hinlo, ug dalisay?’ Sa pagtubag niana, kinahanglan nga maghunahuna ta kon unsay nalakip sa usa ka ngalan. Ang ngalan dili lang basta mga letra nga isulat o isulti. Matikdi ang giingon sa Bibliya: “Ang maayong ngalan mao ang pilion imbes ang daghang bahandi.” (Prov. 22:1; Eccl. 7:1) Nganong ingon ana ka bililhon ang ngalan? Tungod kay kini naglakip sa reputasyon, o sa kon unsay gihunahuna sa uban, sa usa nga nagbaton nianang ngalana. Busa ang pagkasulat o bisan ang pagkalitok sa usa ka ngalan dili mao ang pinakaimportante, kondili kon unsay mahunahunaan sa ubang tawo dihang ilang makita o madungog kanang ngalana. Dihang ang mga tawo mosultig bakak bahin kang Jehova, ilang ginadaot ang iyang reputasyon. Dihang daoton nila ang iyang reputasyon, gidaot sab nila ang iyang ngalan. w20.06 3 ¶5-7

Tungod sa grabeng mga problema, basig magsige na lang tag kabalaka. Pananglitan, mabalaka tingali ta nga ang atong kita dili makasapar sa atong mga panginahanglan, o kaha masakit ta ug dili makatrabaho o mawad-an pa ganig trabaho. Mabalaka sab tingali ta nga dili ta makapabiling matinumanon dihang tentalon sa pagsupak sa balaod sa Diyos. Sa dili madugay, palihokon ni Satanas ang mga tawong ilalom sa iyang pagmando sa pag-atake sa katawhan sa Diyos, busa mabalaka tingali ta kon unsay atong buhaton dihang mahitabo kana. Makapangutana tingali ta, ‘Sayop ba nga mabalaka ko nianang mga butanga?’ Nahibalo ta nga giingnan ni Jesus ang iyang mga sumusunod: “Ayaw na mog kabalaka.” (Mat. 6:25) Gipasabot ba ni Jesus nga dili na gyod ta angayng mabalaka sa bisan unsa? Wala! Kon buot hunahunaon, ang pipila sa maunongong mga alagad ni Jehova kaniadto mibatig kabalaka, pero wala sila mawad-i sa pag-uyon ni Jehova. (1 Hari 19:4) Sa pagkatinuod, gipasaligan ta ni Jesus. Dili niya gustong mabalaka ta pag-ayo sa atong mga panginahanglan nga maapektohan na hinuon ang atong pag-alagad sa Diyos. w21.01 3 ¶4-5

Ang bana manubag kang Jehova ug Jesus sa iyang paagi sa pagtratar sa iyang pamilya. (1Ped. 3:7) Ingong Ulo sa iyang pamilya sa langit ug sa yuta, si Jehova dunay awtoridad sa paghimog mga balaod kon sa unsang paagi angayng mogawi ang iyang mga anak, ug ipatuman niya kana. (Isa. 33:22) Si Jesus, ang ulo sa Kristohanong kongregasyon, duna poy katungod sa paghimo ug pagpatuman ug mga balaod. (Gal. 6:2; Col. 1:18-20) Sama kang Jehova ug Jesus, ang ulo sa usa ka Kristohanong pamilya dunay awtoridad sa paghimog mga desisyon para sa iyang pamilya. (Roma 7:2; Efe. 6:4) Pero, ang iyang awtoridad dunay mga limitasyon. Pananglitan, ang iyang mga balaod kinahanglang ibase sa mga prinsipyo sa Pulong sa Diyos. (Prov. 3:5, 6) Ug ang ulo sa pamilya walay awtoridad sa paghimog mga balaod para niadtong dili sakop sa iyang pamilya. (Roma 14:4) Dugang pa, dihang ang iyang mga anak managko na ug mobiya sa balay, sila motahod gihapon niya, pero dili na sila ilalom sa iyang pagkaulo.—Mat. 19:5. w21.02 2-3 ¶3-5

Ang usa ka importanteng paagi nga mapamatud-an sa ulo sa pamilya nga gimahal niya ang iyang pamilya mao ang pagtagana sa ilang materyal nga panginahanglan. Pero kinahanglan niyang hinumdoman nga ang materyal nga mga butang dili makatagbaw sa espirituwal nga panginahanglan sa iyang pamilya. (Mat. 5:3) Samtang si Jesus himalatyon diha sa estaka sa pagsakit, gusto niyang maseguro nga matagan-an ang panginahanglan ni Maria. Bisag nag-antos sa grabeng kasakit, gihangyo ni Jesus si apostol Juan nga atimanon si Maria. (Juan 19:26, 27) Ang brader nga ulo sa pamilya daghan tingalig bug-at nga responsibilidad. Kinahanglang magkugi siya sa iyang sekular nga trabaho aron dili mapasipalahan si Jehova. (Efe. 6:5, 6; Tito 2:9, 10) Ug posibleng duna siyay mga responsibilidad sa kongregasyon, sama sa pag-shepherding ug pagpanguna sa buluhatong pagsangyaw. Sa samang higayon, importante nga regular siyang magtuon sa Bibliya uban sa iyang asawa ug mga anak. Maapresyar gyod nila ang iyang mga paningkamot nga matagan-an sila sa pisikal, emosyonal, ug espirituwal.—Efe. 5:28, 29; 6:4. w21.01 12 ¶15, 17

Bahin sa maayo kaayong asawa, ang Pulong sa Diyos nag-ingon nga siya makadumala sa mga buluhaton sa balay, makapalit ug makabaligyag propidad, ug makahimog mga transaksiyon sa negosyo. (Prov. 31:15, 16, 18) Dili siya ulipon kinsa walay katungod nga mosulti sa iyang opinyon. Hinunoa, ang iyang bana mosalig kaniya ug maminaw sa iyang mga opinyon. (Prov. 31:11, 26) Kon pakitaan sa bana ug ingon niana nga pagtahod ang iyang asawa, ang asawa malipay sa pagpasakop kaniya. Bisan pa sa mga kalamposan ni Jesus, wala siya maghunahuna nga ang pagpasakop sa pagkaulo ni Jehova magpakamenos kaniya. (1 Cor. 15:28; Filip. 2:5, 6) Sa susama, ang maayo kaayong asawa nga nagsunod sa ehemplo ni Jesus dili maghunahuna nga ang pagpasakop niya sa iyang bana magpakamenos kaniya. Suportahan niya ang iyang bana dili lang tungod kay gimahal niya kini kondili tungod kay gimahal ug gitahod niya si Jehova. Ang mapinasakopon nga Kristohanong asawa dili mosuportar sa iyang bana kon duna ni ipabuhat kaniya nga supak sa mga balaod o prinsipyo sa Bibliya. w21.02 11 ¶14-15; 12 ¶19

Ang gugma kang Jehova kanunayng nakatabang sa iyang mga alagad sa paglahutay sa mga paglutos. Pananglitan, sa dihang gibaoran ang mga apostoles sa gamhanang korte suprema sa mga Hudiyo nga mohunong sa pagsangyaw, ang ilang gugma sa Diyos nagpalihok nila nga “sugton ang Diyos ingong magmamando imbes ang mga tawo.” (Buh. 5:29; 1 Juan 5:3) Kining lig-ong gugma kang Jehova nakatabang sab sa atong mga igsoon karon nga magpabiling matinumanon bisan pag gilutos sa pintas ug gamhanang mga gobyerno. Imbes maluya, giisip natong pribilehiyo ang paglahutay bisan pag gidumtan ta sa kalibotan. (Buh. 5:41; Roma 5:4, 5) Ang usa sa pinakalisod tingaling atubangon nga pagsulay mao ang pagsupak gikan sa atong pamilya. Sa dihang mamatikdan nila nga gusto tang mokat-on bahin kang Jehova, ang pipila ka membro sa atong pamilya maghunahuna tingali nga nalimbongan ta. Ang uban basin maghunahuna nga nabuang na ta. (Itandi ang Marcos 3:21.) Tingali pasakitan pa gani ta nila. Dili ta angayng matingala niini. Si Jesus miingon: “Ang mga kaaway sa usa ka tawo mao unya ang mga sakop sa iyang kaugalingong panimalay.”—Mat. 10:36. w21.03 21 ¶6-7

Sa dihang ubanan nimo ang usa ka magmamantala sa iyang Bible study, paminaw pag-ayo samtang mag-estorya ang nagdumala ug ang study. Pinaagi niana, mahimo kang andam sa pagtabang kon gikinahanglan. Siyempre, kinahanglang mamalandong una ka kon unsay angayng himoon. Pananglitan, dili ka magsigeg estorya, mosagbat sa nagdumala samtang nagpatin-aw siya, o magsugod ug lahi nga topiko. Pero makahatag kag mubong komento, ilustrasyon, o pangutana aron mas masabtan ang punto nga gihisgotan. Usahay, mobati tingali ka nga wala kaayo kay ikasulti bahin sa topiko. Pero kon imong komendahan ang study ug pakitaan siyag personal nga interes, dako kag matabang aron mouswag siya. Kon haom, puwede nimong isulti sa study kon sa unsang paagi imong nakat-onan ang kamatuoran, nadaog ang usa ka pagsulay, o nakita ang tabang ni Jehova sa imong kinabuhi. (Sal. 78:4, 7) Ang imong eksperyensiya basin maoy kinahanglang madunggan sa study. Basin makapalig-on ni sa iyang pagtuo o makadasig niya nga padayong mouswag ug magpabawtismo. w21.03 10 ¶9-10

Kinsay angayng pasidunggan sa bisan unsa nga nalampos nato sa ministeryo? Gitubag kana ni Pablo dihang gisulatan niya ang kongregasyon sa Corinto. Siya miingon: “Ako ang nagtanom, si Apolos ang nagbisbis, apan ang Diyos ang nagpadayon sa pagpatubo niini, busa ang nagtanom dili mao ang pasidunggan o ang nagbisbis, kondili ang Diyos nga maoy nagpatubo niini.” (1 Cor. 3:6, 7) Sama kang Pablo, kinahanglan nga ihatag nato kanunay kang Jehova ang pasidungog sa bisan unsa nga nalampos nato sa ministeryo. Sa unsang paagi ikapakita nato ang atong apresasyon sa pribilehiyo nga mahimong “isigkamagbubuhat” sa Diyos, sa Kristo, ug sa mga anghel? (2 Cor. 6:1) Mahimo nato kana pinaagi sa pagpaningkamot nga makakitag kahigayonan sa pagsangyaw sa maayong balita. Dili lang ta basta magpugas ug mga binhi sa kamatuoran kondili bisbisan sab nato kana. Kon dunay magpakitag interes, maningkamot ta nga balikan siya sa tuyo nga makasugod ug pagtuon sa Bibliya. Samtang magpadayon ang pagtuon, malipay ta dihang makita nato nga ginatabangan ni Jehova ang Bible study nga mabag-o ang iyang kasingkasing ug hunahuna. w20.05 30-31 ¶14, 16-18