Disyembre

Matag karon ug unya, malisdan tingali ta sa pagsabot sa usa ka punto sa Bibliya. O tingali wala tubaga ni Jehova ang atong mga pag-ampo sa paagi nga atong gidahom. Posibleng makapatungha nig pagduhaduha, nga kon pasagdan makapahuyang sa atong pagtuo ug makadaot sa atong relasyon kang Jehova. (Sant. 1:7, 8) Ug basin mahimo pa gani ning hinungdan nga mawad-an tag paglaom sa umaabot. Gipakasama ni apostol Pablo ang atong paglaom ngadto sa usa ka angkla. (Heb. 6:19) Ang angkla makatabang nga ang barko dili maanod panahon sa bagyo ug makapugong niini nga dili mapadpad ngadto sa kabatoan. Pero ang angkla mapuslanon lang kon ang kadena niini nga gitaod ngadto sa barko dili maputol. Sama nga ang taya makapagabok sa kadena sa angkla, ang napasagdan nga mga pagduhaduha makapahuyang sa atong pagtuo. Sa dihang makasinatig mga problema, ang tawo nga may mga pagduhaduha posibleng mawad-ag pagtuo nga tumanon ni Jehova ang iyang mga saad. Kon mawala ang atong pagtuo, mawala pod ang atong paglaom. Ang maong tawo posibleng dili gyod magmalipayon! w21.02 30 ¶14-15

Tingali kapin nag 70 anyos si Abraham dihang siya ug ang iyang pamilya mibiya sa Ur. (Gen. 11:31–12:4) Ug sulod sa mga usa ka gatos ka tuig, siya nagpuyo sa mga tolda diha sa lainlaing dapit sa Canaan. Si Abraham namatay pag-edad niyag 175. (Gen. 25:7) Pero wala niya makita nga natuman ang gisaad ni Jehova nga ihatag ngadto sa iyang mga kaliwat ang yuta nga iyang gilaktan. Ug patay na siya dihang natukod ang siyudad, o Gingharian sa Diyos. Bisan pa niana, ang Bibliya nag-ingon nga si Abraham namatay “human makapahimulos ug taas ug malipayong kinabuhi.” (Gen. 25:8) Bisan pa sa mga kalisdanan, namentinar ni Abraham ang lig-ong pagtuo ug malipayon siyang nagpaabot kang Jehova. Nganong nakalahutay siya? Tungod kay sa tibuok kinabuhi ni Abraham, gipanalipdan siya ni Jehova ug gitratar ingong higala. (Gen. 15:1; Isa. 41:8; Sant. 2:22) Sama ni Abraham, kita nagpaabot sa siyudad nga may tinuod nga mga pundasyon. (Heb. 11:10) Pero wala ta magpaabot nga matukod kana. Ang Gingharian sa Diyos natukod niadtong 1914 ug nagmando na sa langit. (Pin. 12:7-10) Pero nagpaabot ta nga magmando ni sa yuta. w20.08 4-5 ¶11-12

Aron makapaminaw pag-ayo sa uban, kinahanglang mapaubsanon ta ug mapailobon. Dunay labing menos tulo ka rason kon nganong angay nato kanang himoon. Una, malikayan nato ang paghunahunag dili maayo bahin sa uban. Ikaduha, masabtan nato ang gibati ug motibo sa atong igsoon, ug kana makatabang nato nga mahimong mas mabination kaniya. Ug ikatulo, kon ato siyang pasultihon, basin duna pa gani siyay mahibaloan bahin sa iyang kaugalingon. Usahay masabtan lang nato ang atong pagbati kon masulti na nato kini. Ang pipila sa atong mga igsoon malisdan sa pagsulti sa ilang gibati tungod sa ilang kaagi, kultura, o personalidad. Tingali nagkinahanglag panahon una sila mahimong komportable sa pagpakigsulti kanato. Pero kon mapailobon ta sama kang Jehova, sa ngadtongadto mosalig na sila kanato ug mosulti sa ilang gibati. Unya kon mosulti na sila, kinahanglan tang maminaw pag-ayo. w20.04 15-16 ¶6-7

Sagad, ang mga isda naa sa dapit diin ganahan sila sa tubig ug daghag pagkaon. Importante ba kon unsang orasa mangisda ang mangingisda? Kon bahin sa kinamaayohang panahon nga mangisda, matikdi ang giingon sa usa ka Saksi sa isla sa Pasipiko dihang gihagad niyag pangisda ang usa ka misyonaryo. Ang misyonaryo miingon, “Magkita tag alas nuybe sa buntag ugma.” Ang igsoon miingon, “Dili ingon ana. Dili kitay magbuot kon kanus-a ta mangisda. Ang isda maoy atong agdon.” Sa susama, ang mga mangingisdag tawo sa unang siglo miadto sa mga dapit diin makita ang mga tawo, ug sa panahon nga posibleng tua didto ang mga tawo. Pananglitan, ang mga sumusunod ni Jesus nagsangyaw sa templo ug sa mga sinagoga, sa balay ug balay, ug sa merkado. (Buh. 5:42; 17:17; 18:4) Kita sab kinahanglang pamilyar sa mga tawo sa atong teritoryo. Kinahanglan tang mopasibo ug mosangyaw kon asa ug kon kanus-a posibleng makita ang mga tawo.—1 Cor. 9:19-23. w20.09 4 ¶8-9

Ang usa ka paagi sa pagpakighigala kang Jesus mao ang pagsuportar sa mga kahikayan sa kongregasyon. Mas masuod ta kang Jesus, ang ulo sa kongregasyon, kon mokooperar ta niadtong gihatagag responsibilidad sa pag-atiman kanato sa espirituwal. (Efe. 4:16) Pananglitan, gipaningkamotan gyod nato karon nga magamit pag-ayo ang tanang Kingdom Hall. Busa, gitapo ang pipila ka kongregasyon. Tungod niini, dako ang nadaginot sa organisasyon. Pero tungod sab niini, ang pipila ka magmamantala kinahanglang mo-adjust sa bag-ong mga kahimtang. Ang maong matinumanong mga magmamantala tingali dugay na sa usa ka kongregasyon ug nasuod na pag-ayo sa mga igsoon didto. Pero karon, gihangyo sila sa pagbalhin sa laing kongregasyon. Seguradong malipay si Jesus dihang makita niya ang iyang maunongong mga tinun-an nga nakigkooperar niini nga kahikayan! w20.04 24 ¶14

Ang hari sa amihanan ug hari sa habagatan padayong nagkompetensiyahay kay gusto sa matag usa nila nga modominar sa kalibotan. Pananglitan, konsideraha ang nahitabo human sa Gubat sa Kalibotan II dihang ang Soviet Union ug ang mga kaalyado niini misugod sa pagdominar sa dakong bahin sa Europe. Ang gihimo sa hari sa amihanan nagpugos sa hari sa habagatan sa pagpakig-alyansa sa ubang kanasoran, ug kini nga alyansa gitawag ug NATO. Ang hari sa amihanan ug hari sa habagatan naggastog dako aron magpalabwanayg armas. Ang hari sa amihanan nakig-away sab pinaagi sa pagsuportar sa mga kaaway sa karibal niini sa Africa, Asia, ug Latin America. Sa di pa dugayng katuigan, ang Russia ug ang mga kaalyado niini nahimong gamhanan kaayo sa tibuok kalibotan. Nakig-away sab sila sa hari sa habagatan gamit ang mga computer. Ang duha ka hari nag-akusahay, nga ang matag usa kanila naggamit kunog mga programa sa computer aron daoton ang ekonomiya ug politikal nga sistema sa usag usa. Ug sumala sa gitagna ni Daniel, ang hari sa amihanan padayong nag-atake sa katawhan sa Diyos.—Dan. 11:41. w20.05 13 ¶5-6

“Malimot ba ang usa ka inahan sa iyang masuso?” Gipangutana kana ni Jehova sa panahon ni propetang Isaias. “Bisag kini nga mga babaye makalimot, ako dili gayod makalimot kanimo,” giingnan niya ang iyang katawhan. (Isa. 49:15) Sagad, dili niya itandi ang iyang kaugalingon sa usa ka inahan. Pero nianang panahona, iya kanang gihimo. Gigamit ni Jehova ang dako kaayong gugma sa inahan ngadto sa anak niini aron ipakita kon unsa ka dako ang iyang gugma sa iyang mga alagad. Ang kadaghanang inahan parehas ug gibati sa sister nga ginganlag Jasmin, kinsa miingon, “Dihang pasusohon nimo ang imong bata, mobati kag espesyal nga kasuod kaniya nga magpabilin sa tibuok nimong kinabuhi.” Si Jehova nahibalo kon ang usa sa iyang mga anak dili na motambong ug tigom ug dili na mosangyaw. Daghan niining minahal nga mga igsoon nga nahimong dili aktibo ang mibalik sa kongregasyon, ug nalipay kaayo ta niana! Gusto ni Jehova nga mobalik sila, ug mao pod nay atong gusto.—1 Ped. 2:25. w20.06 18 ¶1-3

Dili tanang bahandi makita. Gani, ang labing bililhong mga bahandi dili makita. Sa Wali sa Bukid, gihisgotan ni Jesus ang langitnong mga bahandi nga mas bililhon kay sa materyal nga mga butang. Dayon, siya midugang: “Kon asa ang imong bahandi, atua usab ang imong kasingkasing.” (Mat. 6:19-21) Kon giisip nato nga bililhon kaayo ang usa ka butang, maningkamot gyod ta nga mabatonan kana. Kita magtigom ug “mga bahandi sa langit” pinaagi sa pagpaningkamot nga makabaton ug maayong ngalan, o baroganan, atubangan sa Diyos. Matod ni Jesus, kini nga mga bahandi dili gyod madaot o makawat. Si apostol Pablo nag-awhag kanato nga ‘itutok ang atong mga mata sa mga butang nga dili makita.’ (2 Cor. 4:17, 18) Apil niining mga butang o bahandi nga dili makita ang mga panalangin nga atong matagamtam sa bag-ong kalibotan sa Diyos. Gipakita ba nato nga atong giapresyar kining dili makita nga mga bahandi? w20.05 26 ¶1-2

Ang gitudlo ni Moises sa mga Israelinhon nakapalagsik ug nakaparepresko kanila, samag ulan nganha sa mga tanom. Unsaon nato pagseguro nga ingon niana ang atong paagi sa pagtudlo? Dihang mamalaybalay ta o mag-public witnessing, magamit nato ang Bibliya aron ipakita sa mga tawo ang ngalan sa Diyos nga Jehova. Puwede nato silang tanyagan ug nindot nga mga literatura, video, ug materyal sa atong website nga nagpaila kang Jehova. Sa trabahoan, eskuwelahan, o samtang nagbiyahe, tingali makakita tag kahigayonan sa pagpakig-estorya bahin sa Diyos nga atong gihigugma ug kon unsa siyang klaseha sa Diyos. Puwede nato silang sultihan bahin sa nindot nga katuyoan ni Jehova para sa mga tawo ug sa yuta. Dihang madungog nila kini, tingali makahunahuna sila sa unang higayon nga gimahal kaayo ta ni Jehova. Kon sultihan nato ang uban sa kamatuoran bahin sa atong mahigugmaong Amahan, makatabang ta sa pagbalaan sa ngalan sa Diyos. Makatabang ta nga masabtan sa mga tawo nga natudloan silag daghang bakak bahin kaniya. Ang atong ginatudlo sa mga tawo gikan sa Bibliya mao ang labing makapalagsik ug makaparepresko nga butang nga ilang makat-onan.—Isa. 65:13, 14. w20.06 10 ¶8-9

Unsang mga hiyas ang atong gikinahanglan aron atong matabangan kadtong gustong mobalik kang Jehova? Matikdi ang pipila ka leksiyon nga atong makat-onan sa ilustrasyon ni Jesus bahin sa anak nga mibiya sa ilang balay. (Luc. 15:17-24) Ang anak nakaamgo sa iyang sayop ug midesisyon nga mopauli. Ang amahan midagan aron sugaton ang iyang anak ug gigakos kini pag-ayo, mao nga mibati ang anak nga gimahal gihapon siya sa iyang amahan. Ang anak nakonsensiya kaayo sa iyang gihimo ug naghunahuna nga dili na siya angayng isipon nga anak. Gisulti niya ang iyang gibati, ug nasabtan gyod siya sa iyang amahan. Dayon may gihimo ang amahan nga nagpakita nga gidawat niya ang iyang anak ingong minahal nga membro sa pamilya. Aron pamatud-an kana, ang amahan naghikay ug salosalo ug gihatagan niyag nindot nga sinina ang iyang mahinulsolong anak. Si Jehova sama nianang amahan diha sa ilustrasyon. Gimahal niya ang atong dili aktibong mga igsoon ug gusto niya nga mobalik sila kaniya. Pinaagi sa pagsundog kang Jehova, matabangan nato sila sa pagbalik. Aron mahimo kini, gikinahanglan nato ang pailob, empatiya, ug gugma. w20.06 25-26 ¶8-9

Si Jesus miingon nga ang pipila ‘malipayng’ modawat sa kamatuoran, pero ang ilang pagtuo mohuyang dihang masulayan. (Mat. 13:3-6, 20, 21) Tingali wala nila masabti nga kadtong mosunod kang Jesus makasinatig mga kalisdanan. (Mat. 16:24) O tingali naghunahuna sila nga ang pagkahimong Kristohanon nagpasabot nga ang ilang kinabuhi pulos lang panalangin, walay problema. Pero niining kalibotana, duna gyoy mga problema. Ang mga kahimtang mahimong mausab, ug makuhaan ang atong kalipay. (Sal. 6:6; Eccl. 9:11) Ang kadaghanan sa atong mga igsoon nagpamatuod nga kombinsido sila nga ilang nabatonan ang kamatuoran. Sa unsang paagi? Ang ilang kombiksiyon dili mohuyang bisan pag dunay igsoon nga makapasakit nila o makasala. (Sal. 119:165) Sa matag higayon nga masulayan ang ilang pagtuo, kini mas molig-on imbes mohuyang. (Sant. 1:2-4) Kinahanglang ugmaron nato ang ingon niana ka lig-on nga pagtuo. w20.07 8 ¶1; 9 ¶4-5

Sa dili pa ka magsugod ug basa sa Bibliya, pangayog tabang kang Jehova aron imong makita kon sa unsang paagi makabenepisyo ka sa imong mabasa. Pananglitan, kon nagkinahanglan kag tambag sa pag-atubang sa usa ka problema, pangayog tabang kang Jehova nga makita nimo ang mga prinsipyo diha sa iyang Pulong nga makagiya nimo. (Filip. 4:6, 7) Si Jehova naghatag natog talagsaong katakos sa pag-imadyin. Aron mahimong buhi ang usa ka asoy sa Bibliya, imadyina ang esena ug nga ikaw ang pangunang karakter sa imong gibasa. Imadyina nga imong nakita ang mga butang nga iyang nakita ug gibati ang mga emosyon nga iya tingaling gibati. Dayon, pamalandong. Ang pagpamalandong nagpasabot ug paghunahuna pag-ayo bahin sa imong nabasa ug kon sa unsang paagi mapadapat nâ kanimo. Makatabang ni nimo sa pagkonektar sa mga ideya ug sa pagsabot pag-ayo sa imong nabasa. Ang pagbasa sa Bibliya nga walay pagpamalandong sama rag pagtan-aw sa mga piraso sa jigsaw puzzle nga dili ni asembolon. Ang pagpamalandong makatabang aron makita nimo ang katibuk-ang hulagway. w21.03 15 ¶3-5

Puwede untang magpokus si apostol Pablo sa nangagi, nga maghunahuna nga kon wala pa siya mopili nga mahimong Kristohanon, dili unta siya mapriso. Puwede unta siyang magdumot sa mga lalaki sa distrito sa Asia nga mibiya niya, ug mawad-ag pagsalig sa uban niyang higala. Pero dili nâ maoy reaksiyon ni Pablo. Bisag nahibalo siya nga hapit na siyang patyon, wala gyod malimot si Pablo kon unsay pinakaimportante—ang paghimaya kang Jehova. Ug padayon siyang naghunahuna kon unsaon niya pagdasig ang uban. Misalig siya kang Jehova pinaagi sa regular nga pag-ampo. Imbes magsigeg hunahuna niadtong mga mibiya niya, mapasalamaton kaayo siya sa iyang mga higala nga mahigugmaong mitabang ug miunong kaniya. Dugang pa, si Pablo padayong nagtuon sa Pulong sa Diyos. (2 Tim. 3:16, 17; 4:13) Labaw sa tanan, bug-os ang iyang pagsalig nga si Jehova ug Jesus nahigugma kaniya. w21.03 18 ¶17-18

Human sa 100 C.E., nagkadaghan ang bakak nga mga Kristohanon nga misulod sa Kristohanong kongregasyon. Sila nagtudlo ug bakak nga relihiyosong mga ideya ug nagtago sa kamatuoran sa Pulong sa Diyos. Sukad nianang panahona hangtod sa 1870, walay organisadong grupo sa mga alagad sa Diyos dinhi sa yuta. Ang bakak nga mga Kristohanon midaghan samag mga bunglayon diha sa uma. Tungod niana, lisod nang mailhan kon kinsa ang tinuod nga mga Kristohanon. (Mat. 13:36-43) Nganong importanteng mahibaloan nato kini? Kini nagpakita nga ang atong nabasa sa Daniel kapitulo 11 bahin sa hari sa amihanan ug sa hari sa habagatan dili puwedeng magtumong sa mga magmamando o gingharian nga naghupot ug gahom human sa tuig 100 ngadto sa 1870. Walay organisadong grupo sa katawhan sa Diyos nga puwede nilang atakehon. Pero posible nga duna nay hari sa amihanan ug hari sa habagatan human sa 1870. w20.05 3 ¶5

Si Joel nagtagna nga ang yuta sa Israel daoton sa panon sa mga dulon, ug kaonon niining hangol nga mga insekto ang tanan nilang makita! (Joel 1:4) Sa daghang katuigan, nagtuo ta nga kanang tagnaa simbolikong nagtumong sa padayong pagsangyaw sa katawhan ni Jehova, samag mga dulon nga dili mapugngan. Nagtuo ta nga kining buluhatona nagpahinabog kadaot sa “yuta,” o sa mga tawo nga kontrolado sa mga lider sa relihiyon. Pero kon atong susihon ang konteksto, atong makita nga kinahanglan natong usbon ang atong pagsabot. Matikdi ang saad ni Jehova bahin sa pag-atake sa mga dulon: “Ipahilayo nako kaninyo ang taga-amihanan [mga dulon].” (Joel 2:20) Kon ang mga dulon nagrepresentar sa mga Saksi ni Jehova nga nagsunod sa sugo ni Jesus nga magsangyaw ug maghimog mga tinun-an, nganong nagsaad man si Jehova nga iyang ipahilayo, o abogon, sila? (Ezeq. 33:7-9; Mat. 28:19, 20) Klaro nga ang abogon ni Jehova, dili ang iyang matinumanong mga alagad, kondili kadtong mokontra sa iyang katawhan. w20.04 2-3 ¶3-5

Unsay angay natong buhaton dihang mobati ta nga wala pa tubaga ni Jehova ang atong pag-ampo? Si Santiago miingon nga kinahanglang ‘padayon tang mangayo’ sa Diyos. Si Jehova dili samokan dihang magsige tag pangayo niya ug kaalam. Dili siya masuko. Ang atong langitnong Amahan ‘madagayaong magahatag’ dihang mangayo tag kaalam aron makalahutay sa mga pagsulay. (Sal. 25:12, 13) Makita niya ang atong mga problema, maluoy siya nato, ug gusto niyang motabang kanato. Makapalipay gyod nâ! Pero sa unsang paagi hatagan ta ni Jehova ug kaalam? Pinaagi sa iyang Pulong. (Prov. 2:6) Aron mabatonan kana, kinahanglan natong tun-an ang Pulong sa Diyos ug ang binase sa Bibliya nga mga publikasyon. Pero dili igo nga magtuon lang ta. Kinahanglan natong ipadapat ang kaalam sa Diyos pinaagi sa pagsunod sa iyang tambag. Si Santiago misulat: “Mahimong mga magtutuman sa pulong ug dili tigpaminaw lang.” (Sant. 1:22) Sa dihang ipadapat nato ang tambag sa Diyos, mahimo tang mas makigdaiton, makataronganon, ug maluluy-on. (Sant. 3:17) Ang maong mga hiyas makatabang nato sa paglahutay sa bisan unsang pagsulay uban ang kalipay. w21.02 28-29 ¶10-11

Ang usa ka Bible study dakog purohan nga mouswag ug magpabawtismo dihang makadawat siyag tabang gikan sa uban diha sa kongregasyon. Ang matag magmamantala makatabang sa pag-uswag sa kongregasyon. Ang usa ka payunir miingon: “Ang usa ka panultihon nag-ingon nga gikinahanglan ang tibuok baryo sa pagpadako sa usa ka bata. Ingon ana pod ang paghimog mga tinun-an. Gikinahanglan ang tibuok kongregasyon sa pagtabang sa usa nga makadangat sa kamatuoran.” Ang mga membro sa pamilya, higala, ug magtutudlo makatabang sa usa ka bata nga mohamtong. Mahimo nila kini pinaagi sa pagdasig sa bata ug pagtudlo kaniyag importanteng mga leksiyon. Sa susama, ang mga igsoon sa kongregasyon makatambag, makadasig, ug makahatag ug maayong ehemplo sa mga Bible study, nga makatabang nila nga mouswag ug magpabawtismo. (Prov. 15:22) Nganong ang magmamantala nga nagdumala sa pagtuon sa Bibliya angayng malipay sa dihang tabangan sa ubang igsoon ang iyang Bible study? Tungod kay makatabang sila nga mouswag sa espirituwal ang study. w21.03 8 ¶1-3

Kinahanglang likayan sa tanang Kristohanon, bata ug tigulang, ang dobleng pagkinabuhi. Si apostol Juan miingon nga dili puwedeng maglakaw ta diha sa kamatuoran ug sa samang higayon magkinabuhing imoral. (1 Juan 1:6) Aron mabatonan nato ang pag-uyon sa Diyos karon ug sa umaabot, kinahanglan natong hinumdoman kanunay nga makita ni Jehova ang tanan natong ginahimo. Sa pagkatinuod, walay sekretong sala, kay ang tanan natong buhaton makita ni Jehova. (Heb. 4:13) Kinahanglang isalikway nato ang panglantaw sa kalibotan maylabot sa sala. Sa panahon ni Juan, ang mga apostata nag-ingon nga ang usa puwedeng mohimog sala ug magpabilin gihapong higala sa Diyos. Karon, ang mga tawo sa atong palibot susamag panglantaw. Daghan ang nag-ingon nga nagtuo sila sa Diyos, pero dili sila mouyon sa panglantaw sa Diyos bahin sa sala, ilabina maylabot sa sekso. Ang gilantaw ni Jehova nga sala, giisip nilang dalawaton ug gitawag nga alternative lifestyle. w20.07 22 ¶7-8

Depensahan ba nimo ang mga sister dihang gikinahanglan nila kini? Tagda ang mosunod nga situwasyon. Namatikdan sa pipila ka igsoon nga ang usa ka sister nga dili Saksi ug bana sagad maulahi sa tigom ug mobiya dayon inigkahuman. Namatikdan sab nila nga panagsa ra niyang dad-on ang iyang mga anak. Busa gisaway nila siya kay naghunahuna sila nga angay siyang moinsistir sa iyang bana nga tugotan siyang dad-on ang iyang mga anak. Pero ang tinuod, gibuhat sa sister ang iyang maarangan. Dili siya makabuot sa iyang eskedyul, ug wala pod siyay mahimo kon dili pakuyogon sa bana ang ilang mga anak. Kon imong komendahan ang sister sa iyang paningkamot ug isulti ngadto sa uban nga gibuhat niya ang iyang maarangan, tingali maundang ang ilang pagpanaway. Ang mga ansiyano nahibalo nga importante kang Jehova kon giunsa pagtratar ang mga babaye. (Sant. 1:27) Busa gisundog nila ang pagkamakataronganon ni Jesus, nga dili maghimog mga lagda kon mas nahiangay ang pagpakitag kaayo ug konsiderasyon. (Mat. 15:22-28) Kon ang mga ansiyano maningkamot sa paghatag ug tabang, ang mga sister mobati nga gimahal sila ni Jehova ug sa iyang organisasyon. w20.09 24-25 ¶17-19

Si propetang Daniel mapainubsanon ug kanunayng nangayog giya kang Jehova. Pananglitan, dihang gigamit siya ni Jehova sa paghubad sa damgo ni Nabucodonosor, wala siya moingon nga naggikan kaniya ang interpretasyon. Hinunoa, gihatag niya ang tanang pasidungog kang Jehova. (Dan. 2:26-28) Unsay atong makat-onan niini? Kon ang mga igsoon ganahang maminaw sa atong mga pakigpulong o kon duna tay nindot nga mga eksperyensiya sa ministeryo, angay natong ihatag ang tanang pasidungog kang Jehova. Angay natong ilhon nga dili nato ni mahimo kon walay tabang ni Jehova. (Filip. 4:13) Kon buhaton nato nâ, ato pong gisundog si Jesus. Si Jesus misalig kang Jehova. (Juan 5:19, 30) Wala gyod siya mangilog sa awtoridad sa iyang langitnong Amahan. Ang Filipos 2:6 nag-ingon nga si Jesus “wala maghunahuna nga mangilog, nga mahimong katumbas sa Diyos.” Ingong mapinasakopong Anak, si Jesus nahibalo sa iyang mga limitasyon ug nagtahod sa awtoridad sa iyang Amahan. w20.08 11 ¶12-13

Ang pipila nga nagdagan diha sa dalan padulong sa kinabuhi nag-atubang ug kalisdanan nga wala tingali mahibaloi o masabti sa uban. Kon naa kay problema sa panglawas ug mibati ka nga walay nakasabot nimo, madasig tingali ka sa ehemplo ni Mepiboset. (2 Sam. 4:4) Lisod ang iyang kahimtang kay baldado siya, ug nasaypan sab siyag sabot ni Haring David. Pero imbes mahimong negatibo, iyang giapresyar ang maayong mga butang nga nahitabo kaniya. Mapasalamaton siya sa kaayo nga gipakita ni David kaniya sa miagi. (2 Sam. 9:6-10) Busa dihang nasaypan siyag sabot ni David, gikonsiderar ni Mepiboset ang tibuok nga situwasyon. Wala siya masuko kang David tungod sa sayop niini. Ug wala niya basola si Jehova sa nahimo ni David. Si Mepiboset nagpokus sa kon unsay iyang mahimo sa pagsuportar sa hari nga gipili ni Jehova. (2 Sam. 16:1-4; 19:24-30) Giparekord ni Jehova sa Bibliya ang maayo kaayong ehemplo ni Mepiboset aron makakat-on ta.—Roma 15:4. w20.04 26 ¶3; 30 ¶18-19

Ang pipila diha sa kongregasyon itudlo tingali ingong misyonaryo, espesyal payunir, o regular payunir. Midesisyon sila nga mahimong bug-os panahon sa buluhatong pagsangyaw ug paghimog tinun-an. Bisag kadaghanan nila gamay rag kuwarta ug kabtangan, gipanalanginan sila pag-ayo ni Jehova. (Mar. 10:29, 30) Gipabilhan gyod nato kining minahal nga mga igsoon, ug mapasalamaton ta nga bahin sila sa kongregasyon! Kadto lang bang tinudlo nga mga brader ug kadtong naa sa bug-os panahong ministeryo ang dunay lunà sa kongregasyon? Dili! Ang matag magmamantala sa maayong balita importante sa Diyos ug sa kongregasyon. (Roma 10:15; 1 Cor. 3:6-8) Tungod kini kay usa sa labing importanteng mga tumong sa kongregasyon mao ang paghimog mga tinun-an sa atong Ginoong Jesu-Kristo. (Mat. 28:19, 20; 1 Tim. 2:4) Ang tanang magmamantala sa kongregasyon, bawtismado man o dili, naghimo niining buluhatona nga prayoridad.—Mat. 24:14. w20.08 21 ¶7-8

Sumala sa gipakita sa teksto karong adlawa, kon makasinati tag mga problema, si Jesus motabang nato. Gani, makapadasig kanato ang gisulti ni Jesus. Ngano? Tungod kay may mga adlaw nga malisdan ta sa paglahutay. Pananglitan, dihang mamatay ang usa ka minahal, mobati tag kaguol dili lang sulod sa pipila ka adlaw kondili sulod tingali sa daghang katuigan. Ang pipila dunay lisod nga mga adlaw tungod sa ilang katigulangon. Ug ang uban dunay lisod kaayo nga mga adlaw tungod sa depresyon. Bisan pa niana, nakalahutay ta kay nahibalo ta nga si Jesus nagauban kanato “sa tanang adlaw,” apil na sa lisod kaayong mga adlaw, sa atong kinabuhi. (Mat. 11:28-30) Ang Pulong sa Diyos nagpasalig kanato nga si Jehova motabang nato pinaagi sa iyang mga anghel. (Heb. 1:7, 14) Pananglitan, ang mga anghel motabang ug mogiya kanato dihang isangyaw nato ang “maayong balita sa Gingharian” ngadto sa mga tawo sa “matag nasod ug tribo ug pinulongan.”—Mat. 24:13, 14; Pin. 14:6. w20.11 13-14 ¶6-7

Gusto natong masabtan sa atong study nga ang iyang gitun-an naggikan sa Pulong sa Diyos. (1 Tes. 2:13) Unsaon nato nâ paghimo? Dasiga ang imong study nga mosulti bahin sa mga butang nga iyang nakat-onan. Imbes ikaw ang kanunayng mopatin-aw sa teksto, hangyoa siya nga siyay mosaysay sa pipila ka teksto. Tabangi siya nga makita kon sa unsang paagi ang Pulong sa Diyos mapadapat kaniya. Pagsuknag mga pangutana nga motabang niya sa pagpahayag kon unsay iyang hunahuna ug pagbati sa teksto nga iyang gibasa. (Luc. 10:25-28) Pananglitan, pangutan-a siya: “Sa unsang paagi kining tekstoha nakatabang nimo nga makita ang usa sa mga hiyas ni Jehova?” “Sa unsang paagi makabenepisyo ka niini nga kamatuoran sa Bibliya?” “Unsay imong gibati sa bag-o lang nimong nakat-onan?” Ang pinakaimportante, dili kon unsa ka daghan ang nahibaloan sa study, kondili kon unsa ka dako ang iyang pagpabili niini ug kon giunsa niya kini pagpadapat. Ang Bibliya maoy patudloa. Kinahanglan nga magmapainubsanon ka aron mouswag sa imong pagpanudlo. w20.10 15-16 ¶5-6

Makaseguro ta nga ang buluhatong pagsangyaw matapos sa gitakdang panahon. Konsideraha ang nahitabo sa adlaw ni Noe. Gipamatud-an ni Jehova nga siya ang hingpit nga Tigtakda ug Panahon. Mga 120 ka tuig una ang Lunop, gitakda na ni Jehova kon kanus-a kini mahitabo. Katuigan sa ulahi, gisugo ni Jehova si Noe sa pagtukod ug arka. Sulod sa mga 40 o 50 ka tuig una ang Lunop, si Noe nagpadayon sa paghago. Bisan pag ang mga tawo wala maminaw, siya nagpadayon sa pagpahayag ug pasidaan hangtod nga miingon si Jehova nga panahon na nga mosulod sa arka. Dayon, sa gitakdang panahon, “gisirhan ni Jehova ang pultahan.” (Gen. 6:3; 7:1, 2, 16) Sa dili madugay, taposon na ni Jehova ang buluhatong pagsangyaw. Iyang laglagon ang daotang sistema ni Satanas ug pulihan kinig matarong nga bag-ong kalibotan. Sa dili pa kana moabot, hinaot nga dili nato papahulayon ang atong kamot, sama sa gibuhat ni Noe ug sa uban. Hinaot nga kita magpadayon sa pag-una sa buluhatong pagsangyaw, magmapailobon, ug magbaton ug lig-ong pagtuo kang Jehova ug sa iyang mga saad. w20.09 13 ¶18-19

Kon dili klaro kon kinsay dunay awtoridad, ang pamilya ni Jehova magkagubot ug dili magmalipayon. Pananglitan, maglibog sila kon kinsay mohimo sa kataposang mga desisyon ug kon kinsay angayng manguna sa pagpatuman sa maong mga desisyon. Kon maayo kaayo ang kahikayan sa Diyos bahin sa pagkaulo, nganong daghan kaayong babaye karon ang mibating gidaogdaog niini? Tungod kay gibalewala sa daghang lalaki ang mga sukdanan ni Jehova para sa pamilya ug mipili sila nga sundon ang mga kostumbre o tradisyon sa ilang lugar. Abusohan sab tingali nila ang ilang mga asawa aron matagbaw ang ilang hakog nga mga tinguha. Pananglitan, ang usa ka bana magdominar tingali sa iyang asawa tungod sa iyang garbo o aron pamatud-an sa uban nga siya “tinuod nga lalaki.” Maghunahuna tingali siya nga dili niya mapugos ang iyang asawa nga mahalon siya, pero naa siyay mahimo aron mahadlok ni kaniya. Ug tingali gamiton niya ang maong kahadlok aron kontrolon ang iyang asawa. Ang mga lalaki nga ingon nianag panghunahuna ug naghimo nianang mga butanga klaro nga wala maghatag sa mga babaye sa pasidungog ug pagtahod nga angay kanila, ug dili ni maoy gusto ni Jehova nga ilang himoon.—Efe. 5:25, 28. w21.02 3 ¶6-7

Ang mga Kristohanon nga nag-atubang ug problema makaampo kang Jehova alang sa tabang. Ingong tubag sa imong mga pag-ampo, mahimong madawat nimo “ang kalinaw nga gikan sa Diyos, nga labaw sa tanang [tawhanong] pagsabot.” (Filip. 4:6, 7) Ihatag ni Jehova ang maong kalinaw pinaagi sa iyang gamhanan nga balaang espiritu. (Gal. 5:22) Dihang mag-ampo ka kang Jehova, isulti kaniya ang tanan nimong gibati. Magmaespesipiko. Isulti kaniya ang problema ug kon unsay imong gibati niana. Kon posibleng masulbad ang problema, pangayog kaalam aron mahibaloan kon unsay imong buhaton ug kusog sa pagbuhat niana. Kon wala kay mahimo sa pagsulbad sa problema, pangayog tabang kang Jehova aron dili ka sobrang mabalaka niana. Kon espesipiko ang imong mga pag-ampo, sa ngadtongadto mas makita nimo kon giunsa nâ pagtubag ni Jehova. Kon dili dayon matubag ang imong ginaampo, ayawg surender. Gawas nga gusto ni Jehova nga magmaespesipiko ka sa imong mga pag-ampo, gusto pod niya nga magpadayon ka sa pag-ampo.—Luc. 11:8-10. w21.01 3 ¶6-7

Sa kongregasyon karon, dunay mga magtiayon ug pamilya. Pero naa poy mga igsoon nga dili minyo. Unsay atong hunahuna sa mga igsoon nga tagsaanon? Matikdi ang panghunahuna ni Jesus bahin sa pagkatagsaanon. Sa iyang ministeryo sa yuta, si Jesus wala magminyo. Iyang gipokus ang iyang panahon ug atensiyon sa iyang asaynment. Wala gyod siya magtudlo nga kinahanglang magminyo o magpabiling tagsaanon. Pero miingon siya nga ang pipila ka Kristohanon modesisyon nga dili magminyo. (Mat. 19:12) Gitahod ni Jesus ang mga dili minyo. Wala siya maghunahuna nga sila ubos o dunay nakulang nila. Sama kang Jesus, si apostol Pablo nagpabiling tagsaanon panahon sa iyang ministeryo. Siya wala gyod magtudlo nga sayop ang pagminyo. Nahibalo siya nga personal ni nga desisyon. w20.08 28 ¶7-8

Si apostol Juan taas ug kinabuhi ug daghag eksayting nga kasinatian. Nasinati pod niya ang daghang kalisdanan nga makapahuyang unta sa iyang pagtuo. Pero kanunay niyang gihimo ang iyang maarangan sa pagtuman sa mga sugo ni Jesus, apil na ang sugo nga higugmaon ang iyang mga igsoon. Tungod niana, segurado si Juan nga gimahal siya ni Jehova ug Jesus, ug nga hatagan nila siyag kusog nga iyang gikinahanglan aron malahutay ang bisan unsang kalisdanan. (Juan 14:15-17; 15:10) Si Satanas o ang iyang kalibotan wala gyod makapugong kang Juan nga mobati, mopahayag, ug mopakitag gugma. Sama kang Juan, nagkinabuhi ta sa kalibotan nga gimandoan ni Satanas, ang madumtanong diyos niining sistemaha. (1 Juan 3:1, 10) Gusto niya nga dumtan nato ang atong mga igsoon, pero dili nâ mahitabo gawas kon tugotan nato siya. Hinaot magmadeterminado ta nga higugmaon ang atong mga igsoon, ipahayag ang maong gugma pinaagi sa pulong, ug pamatud-an ang maong gugma pinaagi sa buhat. Kon buhaton nato kana, malipay ta nga nahimo tang bahin sa pamilya ni Jehova, ug mahimong makapatagbaw ang atong kinabuhi.—1 Juan 4:7. w21.01 13 ¶18-19

Ang kinabuhi niining kalibotana nga gikontrolar ni Satanas lisod sagubangon, ug usahay maglibog pa gani ta kon unsay buhaton. (2 Tim. 3:1) Pero dili ta angayng mabalaka o mahadlok. Nahibalo si Jehova sa mga problema nga atong giatubang. Kon matumba ta, siya nagsaad nga hawiran ta niya sa iyang kusgan nga tuong kamot. (Isa. 41:10, 13) Makaseguro ta nga tabangan ta ni Jehova, ug ang Bibliya makapalig-on nato aron madaog ang bisan unsang problema. Ang atong mga video, audio drama, ug ang seryeng “Sundoga ang Ilang Pagtuo” makatabang nga mahimong buhi ang mga asoy sa Bibliya. Sa dili pa nimo tan-awon, paminawon, o basahon kini nga mga asoy, pangayog tabang kang Jehova aron makita nimo ang espesipikong mga punto nga ikapadapat nimo. Imadyina nga ikaw ang pangunang karakter sa asoy. Pamalandonga kon unsay gihimo niining matinumanong mga alagad ni Jehova ug kon giunsa niya sila pagtabang nga madaog ang ilang mga problema. Dayon ipadapat ang mga leksiyon sa imong kahimtang. Pasalamati si Jehova sa tabang nga iya nang gihatag kanimo. Ug ipakita nga mapasalamaton ka sa iyang tabang pinaagi sa pagpangitag mga kahigayonan sa pagdasig ug pagtabang sa uban. w21.03 19 ¶22-23

Kon magtiayon mo ug gusto ninyong manganak, pangutan-a ang kaugalingon: ‘Kami ba mapainubsanon ug nahigugma kang Jehova ug sa iyang Pulong? Pilion kaha mi ni Jehova sa pag-atiman ug bag-ong natawo nga bata?’ (Sal. 127:3, 4) Kon ginikanan ka na, pangutan-a ang kaugalingon: ‘Ako bang ginatudloan ang akong mga anak nga importanteng maghago?’ (Eccl. 3:12, 13) ‘Gihimo ba nako ang akong maarangan sa pagpanalipod sa akong mga anak batok sa pisikal ug moral nga mga kapeligrohan?’ (Prov. 22:3) Dili ninyo maprotektahan ang inyong mga anak sa tanang problema. Pero anam-anam ninyo silang maandam sa pag-atubang sa mga problema sa kinabuhi pinaagi sa mahigugmaong pagtudlo kanila nga mosalig sa Pulong sa Diyos alang sa giya. (Prov. 2:1-6) Pananglitan, kon dunay paryente nga mohunong sa pag-alagad, tabangi ang inyong mga anak nga makakat-on gikan sa Pulong sa Diyos kon nganong importante kaayo nga magmaunongon kang Jehova. (Sal. 31:23) O kon dunay minahal nga mamatay, ipakita sa inyong mga anak kon unsaon paggamit ang Pulong sa Diyos aron mahupayan sila ug magmalinawon.—2 Cor. 1:3, 4; 2 Tim. 3:16. w20.10 27 ¶7