Enero

Maisogong gisaway ni Jesus ang salingkapaw nga relihiyosong mga tradisyon sa iyang panahon. Pananglitan, iyang giyagyag ang pagkasalingkapaw sa mga Pariseo, kinsa naghunahuna nga mas importante ang paagi sa ilang pagpanghunaw kay sa pag-atiman sa ilang mga ginikanan. (Mat. 15:1-11) Wala tugoti ni Jesus ang negatibong reaksiyon sa relihiyosong mga lider sa pagpugong kaniya nga isulti ang kamatuoran. Giyagyag sab ni Jesus ang bakak nga relihiyosong mga pagtulon-an. Wala siya moingon nga ang tanang relihiyosong pagtulon-an dalawaton sa Diyos. Hinunoa, siya miingon nga daghan ang mosubay sa luag nga dalan padulong sa kalaglagan, pero diyutay lang ang mosubay sa gamay nga dalan padulong sa kinabuhi. (Mat. 7:13, 14) Giklaro niya nga ang pipila magpakaaron-ingnong nag-alagad sa Diyos pero wala diay. Siya nagpasidaan: “Pagbantay sa bakak nga mga propeta nga manganha kaninyo nga magpakaaron-ingnong karnero, apan sa pagkatinuod sila maoy mga lobo nga manunukob. Pinaagi sa ilang mga bunga kamo makaila kanila.”​—Mat. 7:15-20. w21.05 9 ¶7-8

Si Ana naminyo sa usa ka Levihanon nga si Elkana, kinsa nahigugma pag-ayo kaniya. Pero si Elkana may laing asawa, si Penina. Gimahal ni Elkana si Ana labaw kay kang Penina, pero “si Penina may mga anak, apan si Ana wala.” Tungod niini, si Penina “kanunayng magbiaybiay kaniya aron pasakitan siya.” Nasakitan kaayo si Ana! “Siya mohilak ug dili mokaon.” Pero walay giingon ang Bibliya nga si Ana nanimalos. Hinunoa, gisulti niya kang Jehova ang tanan niyang kaguol, ug misalig siya nga tabangan siya ni Jehova. (1 Sam. 1:2, 6, 7, 10) Unsay atong makat-onan kang Ana? Kon dunay makigkompetensiya nimo, hinumdomi nga duna kay mahimo. Puwede nimong malikayan ang pagpakigkompetensiya kaniya. Imbes manimalos, paningkamot nga makigdait sa maong tawo. (Roma 12:17-21) Bisag dili siya magbag-o, mabatonan gihapon nimo ang kalinaw sa hunahuna. w21.07 17 ¶13-14

Tungod sa kahakog, gibudhian ni Judas Iskariote si Jesus. Pero dili siya daotan sa sinugdan. (Luc. 6:13, 16) Dayag nga si Judas may katakos ug kasaligan, kay siyay gipiyalan sa kahon sa kuwarta. Pero paglabay sa panahon, si Judas misugod sa pagpangawat, bisan pag kadaghan niya nadungog ang pasidaan ni Jesus bahin sa kahakog. (Mar. 7:22, 23; Luc. 11:39) Nadayag ang kahakog ni Judas sa usa ka hitabo dihang hapit nang mamatay si Jesus. Si Jesus ug ang iyang mga tinun-an, apil na si Maria ug ang igsoon niini nga si Marta, maoy mga bisita ni Simon nga sanlahon. Samtang nangaon, si Maria mitindog ug iyang gibubo sa ulo ni Jesus ang humot ug mahal kaayo nga lana. Puwerteng sukoa ni Judas ug sa ubang tinun-an. Gibati tingali sa ubang tinun-an nga mas maayong ibaligya ang lana ug ang halin gamiton diha sa ministeryo. Pero lahi ang hinungdan sa kasuko ni Judas. “Siya kawatan,” ug gusto niyang mangawat ug kuwarta gikan sa kahon.​—Juan 12:2-6; Mat. 26:6-16; Luc. 22:3-6. w21.06 18 ¶12-13

Gibati ba nimo nga nabug-atan ka sa daghang responsibilidad ug dili nimo mahimo ang tanan nga kinahanglan nimong buhaton? Kon mao, masabtan nimo ang gibati ni Pablo. Nabalaka siya dili lang sa usa ka kongregasyon, kondili “sa tanang kongregasyon.” (2 Cor. 11:23-28) Duna ka bay mga problema sa panglawas nga nakapawala sa imong kalipay? Si Pablo nag-antos sa “tunok sa unod,” nga tingali usa ka problema sa panglawas, ug gusto niya nga mawala kini. (2 Cor. 12:7-10) Maluya ka ba usahay tungod sa imong mga kahuyangan? Gibati sab nâ ni Pablo. Giisip niya ang iyang kaugalingon nga “makaluluoy” tungod kay pirme siyang makigbisog sa iyang mga kahuyangan. (Roma 7:21-24) Bisan pag nakasinati si Pablo ug lainlaing mga pagsulay ug makapaluya nga mga kahimtang, nagpadayon siya sa pag-alagad kang Jehova. Nganong nahimo niya kana? Bisag nahibalo siya sa iyang mga kahuyangan, duna siyay lig-ong pagtuo sa lukat. w21.04 21-22 ¶7-8

Sa dihang ang hingpit nga tawong si Adan nakasala, nawad-an siyag kahigayonan nga mabuhi sa walay kataposan, hasta ang iyang umaabot nga mga anak. Sayop gyod ang gihimo ni Adan. Ang iyang sala tinuyo. Pero komosta ang iyang mga anak? Wala silay nahimong sala, ug wala nila hayloa si Adan sa pagpakasala. (Roma 5:12, 14) Naa pa bay mahimo aron maluwas sila gikan sa sentensiya nga kamatayon nga maoy angayang silot kang Adan? Oo! Wala madugay human makasala si Adan, anam-anam nga gipadayag ni Jehova kon unsaon niya pagluwas ang minilyong kaliwat ni Adan gikan sa tunglo sa sala ug kamatayon. (Gen. 3:15) Tungod sa lukat, puwede tang makabaton ug suod nga relasyon kang Jehova bisag dili ta hingpit. Tungod sa lukat, ang mga buhat sa Yawa gub-on sa bug-os. (1 Juan 3:8) Tungod sa lukat, matuman ang orihinal nga katuyoan ni Jehova para sa yuta. Ang tibuok yuta mahimong paraiso. w21.04 14 ¶1; 19 ¶17

Daghang lalaki ug babaye gikan sa lainlaing nasod ug nagsultig lainlaing pinulongan ang nangabot sa Jerusalem. Dunay talagsaong nahitabo nianang adlawa. Kalit lang nga ang usa ka grupo sa ordinaryong mga Hudiyo makasulti na sa lainlaing pinulongan sa mga bisita! Nahingangha ang mga tawo, pero mas nahingangha pa gyod sila sa giingon sa mga Hudiyo kanila ug sa giingon ni apostol Pedro sa tanan. Apil niini ang mensahe nga puwede silang maluwas kon magpakita silag pagtuo kang Jesu-Kristo. Natandog pag-ayo ang mga tawo niana nga mensahe. Gani, sila nangutana: “Unsay angay namong buhaton?” Si Pedro mitubag: “Ang matag usa kaninyo magpabawtismo.” (Buh. 2:37, 38) Talagsaon kaayo ang sunod nga nahitabo. Mga 3,000 ang nabawtismohan nianang adlawa ug nahimong mga tinun-an sa Kristo. Kini ang sinugdanan sa dakong buluhaton sa paghimog mga tinun-an nga gisugo ni Jesus sa iyang mga sumusunod. Kana nga buluhaton nagpadayon hangtod sa atong panahon. w21.06 2 ¶1-2

Lisod tingali ang pagsugod ug mga pagtuon sa Bibliya diha sa atong teritoryo. Ang pipila tingali dili interesado sa atong mensahe o supak pa gani niini. Unsay makatabang nato nga magpabiling positibo sa ingon niana nga teritoryo? Hinumdomi nga ang kahimtang sa mga tawo niining gubot nga kalibotan posibleng kalit nga mausab, ug kadtong dili tingali interesado sa una mahimo nang mahunahunaon sa ilang espirituwal nga panginahanglan. (Mat. 5:3) Ang pipila nga dili gyod modawat kaniadto sa atong mga basahon, sa ulahi magpa-Bible study na. Nahibalo sab ta nga si Jehova ang Agalon sa pagpangani. (Mat. 9:38) Gusto niya nga magpadayon ta sa pagtanom ug pagbisbis, pero siya ang magpatubo. Ug makapadasig gyod ang paghinumdom nga bisag wala tay gidumalahag pagtuon sa Bibliya karon, panalanginan ta ni Jehova base sa atong mga paningkamot, dili sa mga resulta niini! w21.07 6 ¶14

Si Jehova naghatag sa mga tawo ug katakos nga makabatog mga anak, maingon man ang responsibilidad nga tudloan sila sa paghigugma ug pag-alagad kaniya. Ang mga anghel gihatagan ni Jehova ug daghang nindot nga mga katakos, pero wala niya sila hatagig katakos nga makabatog mga anak. Busa, angayng pabilhan sa mga ginikanan ang ilang pribilehiyo nga makapadakog mga anak. Ang mga ginikanan gihatagan ug importanteng responsibilidad sa pagmatuto sa ilang mga anak diha “sa disiplina ug tambag ni Jehova.” (Efe. 6:4; Deut. 6:5-7) Aron tabangan ang mga ginikanan, ang organisasyon sa Diyos nagtaganag daghang binase sa Bibliya nga mga galamiton, sama sa mga publikasyon, video, musika, ug online nga mga artikulo. Klaro nga gimahal sa atong langitnong Amahan ug sa iyang Anak ang mga bata. (Luc. 18:15-17) Sa dihang ang mga ginikanan mosalig kang Jehova ug mohimo sa ilang kinamaayohan sa pag-atiman sa ilang bililhong mga anak, si Jehova malipay. Gihatagan sab nila ang ilang mga anak ug kahigayonan nga mahimong bahin sa pamilya ni Jehova hangtod sa hangtod! w21.08 5 ¶9

Ang pipila naghunahuna nga ang pagtuo nagpasabot nga motuo ta sa usa ka butang bisag walay ebidensiya. Pero sumala sa Bibliya, dili nâ tinuod nga pagtuo. Matikdi nga ang pagtuo sa dili makitang mga realidad, sama kang Jehova, Jesus, ug sa langitnong Gingharian, gibase sa makapakombinsir nga ebidensiya. (Heb. 11:3) Ang usa ka Saksi nga biochemist miingon: “Ang atong pagtuo dunay basehanan. Wala nato balewalaa ang mga butang nga napamatud-an sa siyensiya.” Mangutana tingali ta, ‘Kon may lig-ong ebidensiya nga dunay Maglalalang, nganong daghan ang dili motuo nga ang Diyos maoy naglalang sa kinabuhi?’ Tungod kay wala susiha sa pipila ang ebidensiya. Si Robert, nga karon Saksi ni Jehova na, miingon: “Kay ang eskuwelahan wala man magtudlo bahin sa paglalang, abi nakog dili ni tinuod. Kapig 20 anyos na ko dihang nadunggan nako ang lohikal ug makapakombinsir nga mga pangatarongan gikan sa Bibliya nga ang Diyos maoy naglalang sa tanang butang.” w21.08 15 ¶4-5

Masayran nato kon unsa ka maayo si Jehova pinaagi sa pagbasa sa Bibliya, maingon man sa pagpaminaw sa uban nga maghisgot bahin sa mga panalangin nga ilang nadawat. Pero masabtan lang gyod nato kon unsa ka maayo si Jehova sa dihang ‘matilawan’ nato mismo ang iyang pagkamaayo. Sa pag-ilustrar, ibutang ta nga gusto natong makigbahin sa usa ka matang sa bug-os panahong pag-alagad. Pero aron makab-ot ang maong tumong, kinahanglan natong pasimplehon ang atong kinabuhi. Nahibalo ta sa saad ni Jesus nga kon unahon nato ang Gingharian, si Jehova magtagana sa mga butang nga ato gyong gikinahanglan. Pero wala pa gyod nato maeksperyensiyahi ang katumanan niana nga saad. (Mat. 6:33) Apan kay mituo ta sa saad ni Jesus, gimenosan nato ang atong galastohan ug sekular nga trabaho ug giuna nato ang atong ministeryo. Samtang gihimo nato kana, naeksperyensiyahan nato mismo nga si Jehova magtagana gyod sa atong mga panginahanglan. ‘Natilawan’ nato mismo ang pagkamaayo ni Jehova. w21.08 26 ¶2

Ingon ana ba sab ang kahimtang karon? Oo. Daghang lider sa relihiyon ang malipay dihang dunay magpamembro sa ilang relihiyon nga prominente, dato, ug giisip sa kalibotan nga maalamon. Gidawat nila kining bag-ong mga membro bisan pag ang moralidad ug paagi sa pagkinabuhi niini supak sa mga sukdanan sa Diyos. Pero ang maong mga lider sa relihiyon nagtamay sa madasigon, hinlog moralidad nga mga alagad ni Jehova tungod kay dili sila prominente sumala sa panglantaw sa kalibotan. Si Pablo miingon nga gipili sa Diyos kadtong “gipakamenos.” (1 Cor. 1:26-29) Ug bililhon kang Jehova ang tanan niyang matinumanong mga alagad. Unsay atong buhaton aron dili ta malimbongan sa panghunahuna sa kalibotan? (Mat. 11:25, 26) Ayaw pagpaimpluwensiya sa panglantaw niini sa mga alagad sa Diyos. Hinumdomi nga mapainubsanong mga tawo lang ang gigamit ni Jehova sa paghimo sa iyang kabubut-on. (Sal. 138:6) Ug hunahunaa kon unsa ka daghan ang napalampos ni Jehova pinaagi sa paggamit niadtong giisip sa kalibotan nga dili maalamon o utokan. w21.05 8 ¶1; 9 ¶5-6

Si apostol Pablo mapasalamaton sa tabang sa mga igsoon. Mapainubsanon niya kining gidawat. (Filip. 2:19-22) Mga tigulang, ikapakita ninyo sa daghang paagi ang inyong pagkamapasalamaton sa mga batan-on sa inyong kongregasyon. Kon gusto nilang motabang ninyo sa pagpamalit o sa pagtaganag transportasyon ug sa ubang panginahanglan, mapasalamatong dawata ang ilang tabang. Isipa kana ingong pamatuod sa gugma ni Jehova kaninyo. Mahimong masuod pa gani mo niadtong nagtabang ninyo. Ipakita kanunay nga interesado mo sa espirituwal nga pag-uswag sa mga batan-on, ug sultihi sila nga nalipay kaayo mo nga makita nga nangab-ot silag dugang pribilehiyo sa pag-alagad diha sa kongregasyon. Ug pakig-uban nila ug iestorya kanila ang inyong mga kasinatian sa kinabuhi. Kon buhaton nâ ninyo, inyong ‘gipakita nga mapasalamaton mo’ kang Jehova tungod sa mga batan-on nga iyang gikabig sa kongregasyon.​—Col. 3:15; Juan 6:44; 1 Tes. 5:18. w21.09 11-12 ¶12-13

Gimahal ni Jehova ang atong mga igsoon sa pagtuo. Pero dili tingali kanunayng sayon nga mobati ug mopakitag gugma kanila. Usahay lisod ni kay lainlain tag kultura ug kahimtang nga gidak-an. Ug kitang tanan makahimog sayop, nga makapalagot o makapaguol sa uban. Pero, mapalig-on gihapon nato ang atong gugma sa usag usa. Sa unsang paagi? Pinaagi sa pagsundog sa atong Amahan sa pagpakitag gugma sa atong mga igsoon. (Efe. 5:1, 2; 1 Juan 4:19) Ang tawong maluluy-on mangitag mga paagi nga makatabang ug makahupay sa uban. Gisundog ni Jesus ang pagkamaluluy-on ni Jehova sa iyang paagi sa pagtratar sa mga tawo. (Juan 5:19) Usa ka higayon niana, dihang nakita ni Jesus ang mga tawo, siya “naluoy kanila kay sila pinanitan ug nagkatibulaag samag mga karnero nga walay magbalantay.” (Mat. 9:36) Gawas nga naluoy si Jesus, milihok sab siya sa pagtabang kanila. Iyang giayo ang mga masakiton ug gipalagsik kadtong “gikapoy ug nabug-atan.”​—Mat. 11:28-30; 14:14. w21.09 22 ¶10-11

Si Jehova gustong magpakitag kaluoy. Si apostol Pablo misulat nga ang Diyos “maluluy-on kaayo.” Niini nga konteksto, gipatin-aw ni Pablo nga ang Diyos maluluy-on kay gihatagan niyag paglaom nga mabuhi sa langit ang iyang dili hingpit, dinihogang mga alagad. (Efe. 2:4-7) Pero dili kay sila lang ang gipakitaan ni Jehova ug kaluoy. Si salmistang David misulat: “Si Jehova maayo sa tanan, ug ang iyang kaluoy madayag sa tanan niyang buhat.” (Sal. 145:9) Kay gimahal ni Jehova ang mga tawo, siya nagpakitag kaluoy matag higayon nga makakita siyag basehanan sa paghimo niana. Labaw kay kang bisan kinsa, si Jesus nahibalo nga gusto kaayo ni Jehova nga magpakitag kaluoy. Sila magkauban sa langit sulod sa libolibong katuigan una mianhi si Jesus sa yuta. (Prov. 8:30, 31) Sa daghang higayon, nakita ni Jesus kon sa unsang paagi ang iyang Amahan nagpakitag kaluoy sa makasasalang mga tawo. (Sal. 78:37-42) Sa iyang pagpanudlo, daghang higayon nga gipasiugda ni Jesus kining nindot nga hiyas sa iyang Amahan. w21.10 8-9 ¶4-5

Gitubag mismo ni Jehova ang maong pag-ampo pinaagig kusog nga tingog gikan sa langit, nga nagsaad nga iyang himayaon ang iyang ngalan. Sa tibuok niyang ministeryo, gihimaya ni Jesus ang ngalan sa iyang Amahan. (Juan 17:26) Busa, ang tinuod nga mga Kristohanon angay lang mobati nga dakong pribilehiyo ang paggamit sa ngalan sa Diyos ug pagpahibalo niini sa uban. Sa unang siglo C.E., wala madugay human matukod ang Kristohanong kongregasyon, “giliso [ni Jehova] ang iyang pagtagad ngadto sa kanasoran aron magkuha gikan kanila ug usa ka katawhan alang sa iyang ngalan.” (Buh. 15:14) Ang maong mga Kristohanon mibati nga usa ka dakong pribilehiyo ang paggamit sa ngalan sa Diyos ug ang pagpaila niini ngadto sa uban. Kanunay nilang gigamit ang ngalan sa Diyos diha sa ilang ministeryo ug sa ilang mga sinulat. Pinaagi niini, ilang gipamatud-an nga sila ang katawhan nga nagpaila sa ngalan sa Diyos. (Buh. 2:14, 21) Ang mga Saksi ni Jehova pod karon mao ang katawhan nga nagpaila sa ngalan ni Jehova. w21.10 20-21 ¶8-10

Ang maunongong gugma sa Diyos molungtad hangtod sa hangtod. Kining importanteng deskripsiyon sa maunongong gugma mabasag 26 ka beses diha sa Salmo 136. Sa unang bersikulo niini, atong mabasa: “Magpasalamat kamo kang Jehova, kay siya maayo; ang iyang maunongong gugma molungtad hangtod sa hangtod.” (Sal. 136:1) Sa bersikulo 2 ngadto sa 26, atong mabasa ang pamulong nga “kay ang iyang maunongong gugma molungtad hangtod sa hangtod.” Samtang basahon nato kini nga salmo, mahingangha ta sa daghang paagi nga gipakita ni Jehova​—sa walay hunong—​ang iyang maunongong gugma. Ang pamulong nga “kay ang iyang maunongong gugma molungtad hangtod sa hangtod” nagpasalig nato nga ang gugma sa Diyos alang sa iyang katawhan dili mausab. Nadasig gyod ta sa pagkahibalo nga si Jehova dili dayon mohunong sa paghigugma sa iyang mga alagad! Makigsuod hinuon siya niadtong nag-alagad kaniya ug mounong siya kanila, ilabina panahon sa mga kalisdanan. Ang pagkahibalo nga si Jehova mounong kanato nakahatag natog kalipay ug kusog nga atong gikinahanglan aron makalahutay sa mga problema ug padayong makasubay sa dalan sa kinabuhi.​—Sal. 31:7. w21.11 4 ¶9-10

Mabalaka ka ba usahay dihang maghunahuna bahin sa mga butang nga hapit nang mahitabo​—ang kalaglagan sa bakak nga relihiyon, pag-atake ni Gog sa Magog, ug ang gubat sa Armagedon? Nakapangutana ka na ba sa imong kaugalingon, ‘Dihang moabot na kining makahahadlok nga panahon, makapabilin kaha kong matinumanon?’ Kon misantop nâ sa imong hunahuna, ang giingon ni Jesus, nga narekord sa teksto karong adlawa, makatabang gyod nimo. Giingnan ni Jesus ang iyang mga tinun-an: “Ayaw mog kabalaka. Pagpakita mog pagtuo.” Ang lig-ong pagtuo makatabang nato sa pagpabiling kalmado bisag unsa pay mahitabo sa umaabot. Kon hunahunaon nato ang atong ginahimo karon dihang makaatubang tag mga pagsulay, mapalig-on nato ang atong pagtuo aron makalahutay ta sa umaabot nga mga pagsulay. Unya, mahibaloan nato kon unsang mga bahina sa atong pagtuo ang kinahanglan natong palig-onon. Matag higayon nga malahutay nato ang usa ka pagsulay, mas molig-on ang atong pagtuo. Makatabang ni nato nga malahutay ang umaabot nga mga pagsulay. w21.11 20 ¶1-2

Si apostol Pablo nagdasig kang Timoteo ug sa tanang Kristohanon sa pagtuman sa bug-os sa ilang ministeryo. (2 Tim. 4:5) Pero usahay, dili nâ sayon. Pananglitan, hunahunaa ang atong mga igsoon sa mga lugar diin ang atong buluhaton dunay restriksiyon o gidili pa gani. Ang katawhan ni Jehova nag-atubang ug lainlaing makapaluya nga mga problema. Pananglitan, daghan ang kinahanglang motrabahog daghang oras aron lang matagan-an ang panginahanglan sa ilang pamilya. Gusto nilang mohimog labaw pa diha sa ministeryo, pero kapoy na kaayo sila sa hinapos sa semana. Ang uban nalimitahan pag-ayo sa ilang mahimo tungod sa grabeng sakit o sa pagkatigulang; basin ganig dili sila makagawasgawas sa balay. Ang uban pa gyod kanunayng mobati nga dili sila bililhon kang Jehova. Bisag unsay atong problema, si Jehova makahatag natog kusog aron makapadayon ta sa pag-alagad kaniya kutob sa atong mahimo. w21.05 20 ¶1-3

Usahay, ang uban magpresyur tingali nato nga moapil sa mga kalihokan nga makabalda sa atong pagsimba. Dihang mahitabo kana, kinahanglan tang mohimog importanteng desisyon. Tagda ang usa ka makapainteres nga prinsipyo diha sa Levitico 19:19 nga sa bahin nag-ingon: “Ayaw pagsul-ob ug besti nga hinimo sa duha ka klase sa hilo.” Ang maong balaod nakatabang aron ang mga Israelinhon mahimong lahi sa palibot nga mga nasod. Karon, dili ra sayop kon ang usa ka Kristohanon magsul-ob ug sinina nga gama sa gisagol nga materyal, sama sa cotton ug polyester. Pero dili nato gustong sundogon ang mga tawo kansang pagtulon-an ug binuhatan supak sa Bibliya. Siyempre, gimahal nato ang atong mga paryente ug ang atong isigkatawo. Pero maylabot sa importanteng mga bahin sa kinabuhi, gusto natong mahimong lahi sa mga tawo nga wala mag-alagad kang Jehova. Importante kaayo ni kon gusto natong magmabalaan.​—2 Cor. 6:14-16; 1 Ped. 4:3, 4. w21.12 5 ¶14; 6 ¶16

Puwedeng makaplagan ang dalan nga motultol sa kinabuhi. Si Jesus miingon: “Kon kanunay ninyong tumanon ang akong gitudlo, kamo ako gyong mga tinun-an, ug kamo mahibalo sa kamatuoran, ug ang kamatuoran magpahigawas kaninyo.” (Juan 8:31, 32) Maayo nga wala ka mosunod sa ginabuhat sa kadaghanan; hinunoa, nangita ka sa kamatuoran. Imong gitun-an pag-ayo ang Pulong sa Diyos aron mahibaloan kon unsay gusto niya nga buhaton nato, ug namati ka sa mga gitudlo ni Jesus. Imong nakat-onan nga gidahom ni Jehova nga isalikway nato ang mga pagtulon-an sa bakak nga relihiyon ug hunongon ang mga selebrasyon nga paganog sinugdanan. Nakat-onan sab nimo nga dili sayon ang paghimo sa kabubut-on ni Jehova ug pagbiya sa mga buhat nga wala niya uyoni. (Mat. 10:34-36) Tingali nalisdan ka sa paghimo niini nga mga kausaban. Pero, padayon kang naningkamot kay gihigugma nimo ang imong langitnong Amahan. Seguradong napalipay nimo siya!​—Prov. 27:11. w21.12 22 ¶3; 23 ¶5

Si Moises maayo nga ehemplo kay dihang gitul-id siya tungod sa seryosong sayop, iya ning gidawat. Kas-a, nasuko siya pag-ayo ug wala niya pasidunggi si Jehova. Tungod ani, nawad-an siyag pribilehiyo nga makasulod sa Yutang Saad. (Num. 20:1-13) Dihang mihangyo si Moises nga usbon ni nga desisyon, giingnan siya ni Jehova: “Ayaw na kog estoryahi bahin aning butanga.” (Deut. 3:23-27) Imbes masuko, gidawat ni Moises ang desisyon ni Jehova, ug padayon siyang gigamit ni Jehova sa pagpanguna sa Israel. (Deut. 4:1) Si Moises maayo gyong sundogon kon bahin sa pagdawat ug tambag. Gipamatud-an ni Moises nga gidawat niya ang tambag ni Jehova kay nagpabilin siyang matinumanon bisag wala niya madawat ang pribilehiyo nga iyang gipangandoy. Naay kaayohan kon atong sundogon ang ehemplo sa matinumanong mga tawo sama ni Moises. (Prov. 4:11-13) Ug mao gyod nay gihimo sa daghang igsoon. w22.02 11 ¶9-10

Sa tingtugnaw sa 32 C.E., ang suod nga higala ni Jesus nga si Lazaro nasakit ug namatay. (Juan 11:3, 14) Si Lazaro may duha ka igsoon, si Maria ug Marta, ug gimahal pag-ayo ni Jesus kining pamilyaha. Dihang nahibaloan ni Marta nga nagsingabot si Jesus, migula dayon siya aron sa pagsugat kaniya. Imadyina ang kaguol nga gibati ni Marta dihang siya miingon: “Ginoo, kon dinhi pa ka, dili unta mamatay ang akong igsoon.” (Juan 11:21, 32, 33) Seguradong mihilak si Jesus dihang nakita niya nga naapektohan pag-ayo si Maria ug Marta sa kamatayon sa ilang igsoon. Kon namatyan kag minahal, nakasabot si Jehova sa imong gibati. Si Jesus mao “ang eksaktong larawan” sa iyang Amahan. (Heb. 1:3) Dihang mihilak si Jesus, iyang gipakita ang pagbati sa iyang Amahan. (Juan 14:9) Kon namatyan kag minahal, makaseguro ka nga nakita ug nasabtan ni Jehova ang kaguol nga imong gibati. Gusto niyang ayohon ang imong dugmok nga kasingkasing.​—Sal. 34:18; 147:3. w22.01 15 ¶5-7

Kon mogahin kag panahon sa pagpakig-estorya, pagpaminaw, ug paghunahuna bahin kang Jehova, makabenepisyo ka pag-ayo. Una, makahimo kag mas maayong mga desisyon. Ang Bibliya nagpasalig nato nga “ang naglakaw uban sa mga maalamon mahimong maalamon.” (Prov. 13:20) Ikaduha, mahimo kang mas maayong magtutudlo. Dihang magdumalag pagtuon sa Bibliya, ang usa sa atong pinakaimportanteng mga tumong mao ang pagtabang sa atong study nga masuod kang Jehova. Kon kanunay tang makigkomunikar sa atong langitnong Amahan, mas molalom ang atong gugma kaniya ug mahimo tang mas epektibo sa pagtudlo sa atong study nga mahigugma kaniya. Hunahunaa ang ehemplo ni Jesus. Gipaila niya ang iyang Amahan sa makapadasig ug mahigugmaong paagi mao nga ang iyang matinumanong mga sumusunod nakakat-on sab sa paghigugma kang Jehova. (Juan 17:25, 26) Ikatulo, mas molig-on ang imong pagtuo. Konsideraha kon unsay mahitabo dihang mangayo ka sa Diyos ug giya, paghupay, o tabang. Matag higayon nga tubagon ni Jehova ang maong mga pag-ampo, mas molig-on ang imong pagtuo kaniya.​—1 Juan 5:15. w22.01 30 ¶15-17

Si Jehova nagdasig nato nga wad-on ang sayop nga panghunahuna ug dili maayong mga kinaiya kay gimahal ta niya pag-ayo ug gusto niyang magmalipayon ta. (Isa. 48:17, 18) Nahibalo siya nga kon magpadaog ta sa sayop nga mga tinguha, mapasakitan nato ang atong kaugalingon ug ang uban. Ug masakitan siya nga makita nga gipasakitan nato ang atong kaugalingon ug ang ubang tawo. Yagayagaan tingali ta usahay sa atong mga higala o pamilya kay naningkamot tang bag-ohon ang atong personalidad. (1 Ped. 4:3, 4) Moingon tingali sila nga naa tay katungod nga himoon bisan unsay atong gusto ug di ta angayng magpadiktar sa uban. Pero kadtong wala magsunod sa mga sukdanan ni Jehova walay tinuod nga kagawasan. Ang tinuod, nagpaimpluwensiya sila sa kalibotan nga gimandoan ni Satanas. (Roma 12:1, 2) Kitang tanan kinahanglang mohimog desisyon: Ipadayon ba nato ang daang personalidad, nga naimpluwensiyahan sa sala ug sa kalibotan ni Satanas, o tugotan ba nato si Jehova nga bag-ohon ta aron mahimong maayong tawo?​—Isa. 64:8. w22.03 3 ¶6-7

Makabaton tag hustong panglantaw sa atong kahimtang pinaagi sa pagpamalandong sa Pulong sa Diyos. Konsideraha kon sa unsang paagi ang Bibliya nakatabang sa usa ka magul-anong biyuda. Giingnan siya sa usa ka ansiyano nga daghan siyag makat-onan sa basahon sa Job. Sa dihang gibasa niya kini, nakasaway dayon siya sa sayop nga panghunahuna ni Job. Sa iyang hunahuna, iyang giingnan si Job: “Job! Negatibo ra kaayo ka!” Pero nakaamgo siya nga parehas diay kang Job ang iyang panghunahuna. Tungod niini, nausab ang iyang panglantaw ug nakalahutay siya sa kaguol tungod sa kamatayon sa iyang bana. Ang laing tagana ni Jehova sa pagpalig-on sa mga Kristohanon mao ang mga isigkamagtutuo. Si Pablo misulat nga nangandoy siya nga ‘magkadinasigay’ uban sa mga igsoon.​—Roma 1:11, 12. w21.05 22 ¶10; 24 ¶11-12

Sa karaang panahon, ang mga Israelinhon giingnan: “Katulo sa usa ka tuig, ang tanang lalaki kinahanglang moatubang kang Jehova nga inyong Diyos sa dapit nga iyang pilion.” (Deut. 16:16) Kinahanglan nilang biyaan ang ilang mga balay ug uma nga walay magbantay. Pero gisaaran sila ni Jehova: “Walay bisan kinsa nga magtinguha sa inyong yuta samtang manungas mo aron moatubang kang Jehova nga inyong Diyos.” (Ex. 34:24) Tungod sa ilang lig-ong pagtuo kang Jehova, ang mga Israelinhon mitambong sa tinuig nga mga pista. Daghan nig kaayohan kanila. Pananglitan, mas milawom ang ilang kahibalo sa Balaod sa Diyos, nakapamalandong sila sa iyang pagkamaayo, ug nalipay sila sa pagpakig-uban niadtong nahigugma pod kang Jehova. Ingon ana pod ang atong makuhang mga kaayohan kon mohimo tag mga sakripisyo sa pagtambong sa mga tigom. Ug ma-imagine ba nimo kon unsa ka malipayon si Jehova dihang mohatag tag mubo ug maayong pagkaandam nga mga komento? w22.03 22 ¶9

Gibansay ni Jehova si Jesus sa umaabot nga papel niini ingong atong Hataas nga Saserdote. Naeksperyensiyahan ni Jesus kon unsa ka lisod ang pagsunod sa Diyos ilalom sa grabeng pagsulay. Nalisdan siya pag-ayo nga nag-ampo siya alang sa tabang uban “sa kusog nga tingog nga inubanag mga luha.” Busa kay nakasinati si Jesus ug grabeng kaguol, makasabot siya sa atong mga panginahanglan ug “makatabang siya” kanato dihang kita “ginasulayan.” Mapasalamaton gyod ta kang Jehova sa pagtudlog maluluy-on nga Hataas nga Saserdote kinsa “makasabot sa atong mga kahuyangan”! (Heb. 2:17; 4:14-16; 5:7-10) Gitugotan ni Jehova si Jesus nga mag-antos pag-ayo aron matubag ang usa ka importanteng pangutana: Ang mga tawo ba makapabiling matinumanon kang Jehova bisag nailalom sa grabeng pagsulay? Para kang Satanas, dili! Siya nangangkon nga ang mga tawo nag-alagad lang sa Diyos tungod sa hakog nga mga motibo ug nga wala sila mahigugma kang Jehova. (Job 1:9-11; 2:4, 5) Si Jesus nagpabiling matinumanon ug gipamatud-an niya nga bakakon si Satanas. w21.04 17 ¶7-8

Sa dili pa mabawtismohan, kinahanglang ipadapat sa Bible study ang iyang nakat-onan sa Bibliya. Kon ipadapat sa study ang iyang nakat-onan, maparehas siya sa “tawong maalamon” sa ilustrasyon ni Jesus kinsa nagkalot ug lawom ug nagtukod sa iyang balay diha sa bato. (Mat. 7:24, 25; Luc. 6:47, 48) Tabangi ang study nga makahimog mga kausaban sa iyang kinabuhi. (Mar. 10:17-22) Nahibalo si Jesus nga lisod para sa tawong dato nga ibaligya ang tanan niyang kabtangan. (Mar. 10:23) Pero giingnan ni Jesus ang tawo sa paghimo niining dakong kausaban sa iyang kinabuhi. Ngano? Tungod kay gimahal siya ni Jesus. Usahay, magduhaduha tingali ta sa pagdasig sa study nga ipadapat ang iyang nakat-onan kay naghunahuna ta nga dili pa siya andam sa paghimo sa gikinahanglang kausaban. (Col. 3:9, 10) Pero kon sultian dayon nimo siya sa kausaban nga kinahanglan niyang himoon, posibleng makasugod dayon siya sa pagbag-o. Pinaagi niana, imong gipakita nga gimahal nimo siya.​—Sal. 141:5; Prov. 27:17. w21.06 3-4 ¶3, 5

Si apostol Pedro espesipikong naghisgot sa maayong ehemplo ni Jesus sa paglahutay. Pero duna pay daghang paagi nga masundog nato si Jesus. (1 Ped. 2:18-25) Sa pagkatinuod, ang tibuok kinabuhi ni Jesus​—ang tanan niyang gisulti ug gihimo—​maoy ehemplo nga angay natong sundon. Ingong dili hingpit nga mga tawo, masundog ba gyod nato ang ehemplo ni Jesus? Oo. Si Pedro wala moingon nga kinahanglang sundon nato ang mga tunob ni Jesus sa hingpit nga paagi. Hinunoa, siya nag-awhag kanato nga ‘sundon [kini] pag-ayo.’ Kon sundon nato pag-ayo ang iyang mga tunob, nga maghimo sa atong maarangan bisag dili ta hingpit, atong gipadapat ang giingon ni apostol Juan: ‘Magpadayon sa paglakaw sama sa paglakaw’ ni Jesus. (1 Juan 2:6) Ang pagsunod sa mga tunob ni Jesus mas makapasuod nato kang Jehova. Nganong makaingon ta niana? Si Jesus naghatag ug maayo kaayong ehemplo kon unsaon pagkinabuhi sa paagi nga makapalipay sa Diyos. (Juan 8:29) Busa, pinaagi sa pagsunod sa mga tunob ni Jesus, mapalipay nato si Jehova. Ug makaseguro ta nga ang atong langitnong Amahan makigsuod niadtong naningkamot nga mahimo niyang mga higala.​—Sant. 4:8. w21.04 3 ¶4-6

Nakita ni Jehova ang atong maayong mga hiyas; nakita niya ang atong potensiyal, ug gitabangan ta niya nga mahimong iyang mga higala. Kon magmatinumanon ta kaniya, siya magpabiling suod kanato hangtod sa hangtod! (Juan 6:44) Kon kombinsido ta nga gimahal ta ni Jehova, mapalihok ta nga moalagad kaniya nga kinasingkasing bisan pa sa mga kalisdanan. Pero kon magduhaduha ta nga gimahal ta sa Diyos, “modiyutay ang [atong] kusog.” (Prov. 24:10) Ug sa dihang maluya ta ug maghunahuna nga wala ta mahala sa Diyos, dili ta makasukol sa mga pag-atake ni Satanas. (Efe. 6:16) Ang pipila ka matinumanong Kristohanon sa atong panahon naluya sa espirituwal tungod sa mga pagduhaduha. Unsay angay natong buhaton dihang mosantop sa atong hunahuna ang pagduhaduha nga gimahal ta sa Diyos? Kinahanglang isalikway dayon nato kana! Pangayog tabang kang Jehova aron ang imong “makapatugaw nga [mga] hunahuna” mapulihan sa ‘kalinaw nga gikan sa Diyos nga magbantay sa imong kasingkasing ug hunahuna.’ (Sal. 139:23; footnote; Filip. 4:6, 7) Ug hinumdomi nga dili kay ikaw ray mibatig ingon niana. w21.04 20 ¶1, 4; 21 ¶5-6

Sa unsang paagi nahimo kang Saksi ni Jehova? Una, nadungog nimo “ang maayong balita”​—tingali gikan sa imong ginikanan, kauban sa trabaho, eskolmet, o dihang may nagsangyaw sa inyong balay. (Mar. 13:10) Dayon, may naggahin ug dakong panahon ug kusog aron dumalahan kag pagtuon sa Bibliya. Sa inyong pagtuon, nakakat-on ka sa paghigugma kang Jehova ug nahibaloan nimo nga gimahal ka niya. Gikabig ka ni Jehova sa kamatuoran, ug karon, ingong tinun-an ni Jesu-Kristo, duna kay paglaom nga mabuhi sa walay kataposan. (Juan 6:44) Seguradong mapasalamaton ka kang Jehova kay duna Siyay gigamit sa pagtudlo kanimo sa kamatuoran ug gidawat ka Niya ingong usa sa Iyang mga alagad. Karon nga nahibalo na ta sa kamatuoran, duna tay pribilehiyo nga tabangan ang uban nga moduyog kanato sa dalan paingon sa kinabuhi. Sayon ra tingali para nato ang pagsangyaw sa balay ug balay, pero basin malisdan ta sa pagtanyag ug pagdumalag pagtuon sa Bibliya. w21.07 2 ¶1-2