Pebrero

Si Jehova interesado kaayo sa kaayohan sa tanan niyang magsisimba. Siya duol sa matag usa kanato, ug makita niya dihang kita maguol o madismayar. (Sal. 145:18, 19) Tagda kon unsa ka mahunahunaon si Jehova sa iyang propeta nga si Elias. Ang maong matinumanong tawo nabuhi sa lisod nga panahon sa kasaysayan sa Israel. Ang gamhanang mga tawo sa Israel nga wala mahigugma kang Jehova naglutos sa iyang mga magsisimba, ilabina kang Elias, ug gusto nila ning patyon. (1 Hari 19:1, 2) Ug tingali nadugangan sab ang kaguol ni Elias kay nagtuo siya nga siya na lang ang nahibiling propeta nga nag-alagad kang Jehova. (1 Hari 19:10) Gitabangan dayon sa Diyos si Elias. Si Jehova nagpadalag anghel aron pasaligan ang iyang propeta nga wala kini mag-inusara—nga duna pay daghang mahinadlokon sa Diyos nga mga Israelinhon! (1 Hari 19:5, 18) Mabinationg gipasaligan ni Jesus ang iyang mga tinun-an nga makabaton silag dakong espirituwal nga pamilya. (Mar. 10:29, 30) Ug si Jehova, ang Ulo sa atong espirituwal nga pamilya, nagsaad nga iyang tabangan kadtong gustong moalagad kaniya.​—Sal. 9:10. w21.06 8-9 ¶3-4

Daghan ang nagsalikway kanato tungod kay ang atong binase sa Bibliya nga mga pagtulon-an nagyagyag sa bakak nga relihiyosong mga ideya. Ang mga lider sa relihiyon nagtudlo sa ilang mga sumusunod nga ang Diyos nagsilot sa mga daotan diha sa impiyerno. Ilang gigamit ang maong bakak nga pagtulon-an aron makontrolar ang mga tawo. Ingong mga alagad ni Jehova, kinsa nagsimba sa Diyos sa gugma, atong giyagyag kanang bakak nga pagtulon-an. Ang mga lider sa relihiyon nagtudlo sab nga ang kalag dili mamatay. Atong giyagyag nga pagano ang sinugdanan sa maong doktrina. Kon tinuod pa kana, dili kinahanglan ang pagkabanhaw. Ug lahi sa pagtulon-an sa kapalaran nga gituohan sa daghang relihiyon, atong gitudlo nga ang tawo dunay kagawasan sa pagpili ug makapili sa pag-alagad sa Diyos. Unsay reaksiyon sa mga lider sa relihiyon? Sagad, masuko sila! Kon gihigugma nato ang kamatuoran, kinahanglan natong dawaton ang mga pulong sa Diyos. (Juan 8:45, 46) Dili sama kang Satanas nga Yawa, kita mobarog dapig sa kamatuoran. Dili gyod nato ikompromiso ang atong pagtuo. (Juan 8:44) Ang Diyos nagsugo sa iyang katawhan nga ‘dumtan pag-ayo ang daotan ug buhaton gyod ang maayo,’ sama sa gihimo ni Jesus.​—Roma 12:9; Heb. 1:9. w21.05 10 ¶10-11

Komosta kon atong mamatikdan nga nahimo na tang garboso o hakog? Puwede tang magbag-o! Si apostol Pablo miingon nga kadtong “nadakpang buhi” sa Yawa makaikyas gihapon sa lit-ag. (2 Tim. 2:26) Ayaw gyod kalimot nga si Jehova mas gamhanan kay kang Satanas. Busa kon dawaton nato ang tabang ni Jehova, makaikyas ta sa bisan unsang lit-ag o bitik sa Yawa. Siyempre, imbes maningkamot nga makaikyas sa mga lit-ag o bitik ni Satanas, mas maayong likayan gyod nato kana. Mahimo lang nato kana sa tabang sa Diyos. Busa hangyoa si Jehova kada adlaw nga tabangan ka sa pagsusi kon ang maong dili maayong mga hiyas nagsugod na sa pag-impluwensiya sa imong hunahuna ug mga lihok. (Sal. 139:23, 24) Ayaw gyod pagpadaog niana! Sulod sa linibo na ka tuig, si Satanas ang mangangayam. Pero sa dili madugay, siya gaposon ug ngadtongadto laglagon. (Pin. 20:1-3, 10) Naghinamhinam ta nianang adlawa. Pero samtang wala pa nâ moabot, pagbantay sa mga lit-ag ni Satanas. Paningkamot nga dili ka madaog sa garbo o kahakog. Magmadeterminado nga ‘suklan ang Yawa, ug siya mokalagiw gikan kanimo.’ w21.06 19 ¶15-17

Si Jehova malipay dihang ang usa ka tawo modawat sa kamatuoran sa Bibliya ug mosulti sa uban bahin niana. (Prov. 23:15, 16) Seguradong malipay kaayo si Jehova nga makita nga ang iyang katawhan madasigong nagsangyaw ug nanudlo! Pananglitan, bisan pa sa tibuok kalibotang pandemic panahon sa 2020 nga tuig sa pag-alagad, 7,705,765 ka Bible study ang gidumala, nga nakatabang sa 241,994 ka tawo nga idedikar ang ilang kinabuhi kang Jehova ug magpabawtismo. Ug kining bag-ong mga tinun-an magdumala pod ug mga pagtuon sa Bibliya ug maghimog dugang mga tinun-an. (Luc. 6:40) Seguradong malipay si Jehova sa dihang makigbahin ta sa buluhatong paghimog mga tinun-an. Dili sayon ang paghimog mga tinun-an, pero sa tabang ni Jehova makahimo ta sa pagtudlo sa mga interesado nga mahigugma sa atong langitnong Amahan. Puwede ba natong himoong tumong ang pagsugod ug pagdumalag bisag usa lang ka pagtuon sa Bibliya? Masorpresa tingali ta sa mahitabo kon atong gamiton ang tanang kahigayonan aron tanyagag pagtuon ang mga tawo nga atong maestorya. w21.07 6-7 ¶14-16

Si Haring David mihatag ug dako kaayong donasyon gikan sa iyang kaugalingong bahandi aron suportahan ang pagtukod sa templo. (1 Cron. 22:11-16) Kon dili na nato kayang moapil sa mga proyekto sa pagpanukod sa organisasyon, makapadayon ta sa pagsuportar niini pinaagi sa atong mga donasyon, sumala sa atong maarangan. Ug makatabang ta sa mga batan-on nga makakat-on sa atong kasinatian. Maylabot sa pagkamahinatagon, konsideraha ang ehemplo ni Pablo. Gidapit niya si Timoteo nga mouban kaniya sa misyonaryong buluhaton, ug gitudloan ni Pablo si Timoteo sa iyang mga pamaagi sa pagsangyaw ug pagpanudlo. (Buh. 16:1-3) Ang pagbansay ni Pablo kang Timoteo nakatabang niini nga mahimong epektibo sa pagsangyaw sa maayong balita. (1 Cor. 4:17) Dayon, gigamit ni Timoteo ang mga pamaagi ni Pablo sa pagbansay sa uban. w21.09 12 ¶14-15

Unsay atong makat-onan sa tinun-ang si Apolos ug kang apostol Pablo? Silang duha parehong daghag nahibaloan bahin sa Kasulatan. Pareho silang ilado ug maayong mga magtutudlo. Ug daghan silag natabangan nga mahimong mga tinun-an. Pero wala sila masina sa usag usa. (Buh. 18:24) Gani, paglabayg pipila ka panahon human mobiya si Apolos sa Corinto, giawhag siya ni Pablo nga mobalik didto. (1 Cor. 16:12) Gigamit ni Apolos ang iyang mga abilidad sa maayong paagi—sa pagsangyaw sa maayong balita ug pagpalig-on sa mga igsoon. Makaseguro sab ta nga si Apolos mapainubsanon. Pananglitan, wala tay mabasa sa Bibliya nga siya nahiubos dihang si Aquila ug Priscila ‘mas tukma nga nagpatin-aw kaniya sa dalan sa Diyos.’ (Buh. 18:24-28) Nahibalo si Pablo sa maayo nga nahimo ni Apolos. Pero wala siya masina kang Apolos. Ang pagkamapainubsanon, pagkamakasaranganon, ug pagkamakataronganon ni Pablo makita diha sa iyang tambag sa kongregasyon sa Corinto.—1 Cor. 3:4-6. w21.07 18-19 ¶15-17

Angay lang nga dili na mahimong bahin sa pamilya ni Jehova si Adan ug Eva kay tinuyo silang misupak sa Diyos. Pero komosta ang ilang mga anak? Si Jehova mahigugmaong naghimog kahikayan sa pagsagop sa masinugtanong mga kaliwat ni Adan ug Eva aron mahimo silang bahin sa iyang pamilya. Gihimo niya kini pinaagi sa halad lukat sa iyang bugtong Anak. (Juan 3:16) Tungod sa halad ni Jesus, 144,000 ka matinumanong mga tawo ang gisagop ingong mga anak sa Diyos. (Roma 8:15-17; Pin. 14:1) Gawas pa niana, milyonmilyon pa ka matinumanong mga tawo ang nagbuhat sa kabubut-on sa Diyos. Duna silay paglaom nga mahimong bahin sa pamilya sa Diyos human sa kataposang pagsulay sa kataposan sa Milenyo. (Sal. 25:14; Roma 8:20, 21) Bisan karon, ila nang gitawag si Jehova, ang ilang Maglalalang, ingong ilang “Amahan.” (Mat. 6:9) Ang mga binanhaw hatagan sab ug kahigayonan nga makakat-on kon unsay gidahom ni Jehova kanila. Sa ngadtongadto, kadtong motuman kaniya mahimo pong mga membro sa iyang pamilya. w21.08 5 ¶10-11

Sa daghang katuigan, gipakita ni apostol Pablo nga pinakaimportante sa iyang kinabuhi ang ministeryo nga gihatag kaniya. Nagsangyaw siya “sa publiko ug sa balay ug balay.” (Buh. 20:20) Gani, iyang gipahimuslan ang tanang kahigayonan sa pagsangyaw! Pananglitan, samtang naghulat siya sa iyang mga kauban didto sa Atenas, naa siyay gisangyawan nga prominenteng mga tawo ug maayo ang resulta niini. (Buh. 17:16, 17, 34) Bisan dihang “gibilanggo” siya, iyang gisangyawan kadtong iyang mga naestorya. (Filip. 1:13, 14; Buh. 28:16-24) Gigamit ni Pablo ang iyang panahon sa pinakamaayong paagi. Sagad, naa siyay iuban sa iyang pagministeryo. Pananglitan, sa iyang unang biyahe ingong misyonaryo, iyang giuban si Juan Marcos, ug sa ikaduhang biyahe, si Timoteo. (Buh. 12:25; 16:1-4) Seguradong naningkamot si Pablo nga tudloan sila kon unsaon pag-organisar ug kongregasyon, kon unsaon pag-atiman ang mga igsoon, ug kon unsaon nga mahimong maayong magtutudlo.​—1 Cor. 4:17. w22.03 27 ¶5-6

Ang uban moingon nga dili sila motuog Maglalalang kay motuo lang sila sa mga butang nga ilang makita. Pero sa tinuod lang, nagtuo sila sa mga butang nga dili nila makita, pananglitan, sa grabidad, kay naay ebidensiya nga tinuod ni. Sa susama, ang klase sa pagtuo nga gihisgotan sa Bibliya gibase sab sa mga ebidensiya nga tinuod ang uban pang butang nga ‘gituohan bisag kini dili makita.’ (Heb. 11:1) Nagkinahanglag panahon ug paningkamot ang pagsusi sa mga ebidensiya, ug daghan ang dili ganahang maghago sa pagbuhat niana. Ang tawo nga dili mosusi sa mga ebidensiya mohinapos tingali nga walay Diyos. Human tun-i ang mga ebidensiya, ang pipila ka siyentista nakombinsir nga gilalang sa Diyos ang uniberso. Sa sinugdan, ang pipila tingali nagtuo nga walay Maglalalang kay ang paglalang wala gyod itudlo sa unibersidad. Pero karon, sila nakakat-on bahin kang Jehova ug nahigugma kaniya. Sa pagkatinuod, angay natong palig-onon ang atong pagtuo sa Diyos, bisag unsa pay atong nakab-ot nga edukasyon. w21.08 14 ¶1; 15-16 ¶6-7

Gigamit ni Jesus ang ilustrasyon bahin sa milayas nga anak aron masabtan nato nga gusto kaayo ni Jehova nga magpakitag kaluoy. Ang anak mibiya sa ilang balay ug “giwaldas ang iyang katigayonan pinaagi sa pagkinabuhing mapatuyangon.” (Luc. 15:13) Sa ulahi, siya naghinulsol sa iyang imoral nga binuhatan, nagpaubos, ug mipauli sa ilang balay. Unsay reaksiyon sa iyang amahan? Si Jesus miingon: “Samtang layo pa [ang anak] sa balay, nalantawan siya sa iyang amahan ug naluoy pag-ayo kaniya. Ang amahan midagan ug migakos sa iyang anak ug mapinanggaong mihalok kaniya.” Wala pakaulawi sa amahan ang iyang anak. Nagpakita hinuon siyag kaluoy pinaagi sa pagpasaylo sa batan-on ug pagdawat kaniyag balik ingong bahin sa pamilya. Ang milayas nga anak nakahimog dako kaayong sala, pero tungod sa iyang paghinulsol, gipasaylo siya sa iyang amahan. Ang maluluy-ong amahan diha sa ilustrasyon nagrepresentar kang Jehova. Niining makapatandog nga paagi, gipakita ni Jesus nga si Jehova andam mopasaylo niadtong mga makasasala nga sinserong maghinulsol.​—Luc. 15:17-24. w21.10 8 ¶4; 9 ¶6

Karon, daghang lider sa relihiyon ang naningkamot pag-ayo nga itago ang kamatuoran nga ang Diyos dunay personal nga ngalan. Ila ning gitangtang sa ilang mga hubad sa Bibliya ug, sa pipila ka kahimtang, gidili ang paggamit niining ngalana sa ilang relihiyosong mga serbisyo. Klaro nga ang mga Saksi ni Jehova lang ang naghatag ug nahiangayng pagtahod ug pasidungog sa ngalan ni Jehova. Wala nay laing relihiyon gawas nato ang nagpaila pag-ayo sa ngalan sa Diyos! Naningkamot ta pag-ayo nga barogan ang atong ngalan​—mga Saksi ni Jehova. (Isa. 43:10-12) Nakaimprenta tag kapin sa 240 ka milyong kopya sa Bag-ong Kalibotang Hubad sa Balaang Kasulatan, nga naggamit sa ngalan ni Jehova diha sa mga teksto diin kana gitangtang sa ubang maghuhubad sa Bibliya. Ug kita nag-imprentag binase sa Bibliya nga mga publikasyon nga naggamit sa ngalan ni Jehova diha sa kapig 1,000 ka pinulongan! w21.10 20-21 ¶9-10

Nagsimba ta kang Jehova dihang motabang ta sa mga igsoon nga nanginahanglan. Si Jehova nagsaad nga iyang panalanginan ang mga Israelinhon nga mahinatagon kaayo sa mga pobre. (Deut. 15:10) Oo, sa matag higayon nga atong tabangan ang igsoon nga nanginahanglan, isipon ni ni Jehova nga atong regalo Kaniya. (Prov. 19:17) Pananglitan, dihang ang mga Kristohanon sa Filipos nagpadalag regalo kang Pablo sa napriso siya, gitawag niya ni nga “makapalipay nga halad para sa Diyos.” (Filip. 4:18) Hunahunaa ang mga igsoon sa kongregasyon ug pangutan-a ang imong kaugalingon, ‘Naa ba koy puwedeng tabangan?’ Malipay si Jehova dihang makita niya nga gigamit nato ang atong panahon, kusog, abilidad, ug materyal nga mga butang sa pagtabang sa mga nanginahanglan. Giisip niya ni nga bahin sa atong pagsimba. (Sant. 1:27) Ang pagsimba kang Jehova nagkinahanglag panahon ug paningkamot. Pero dili ni makapabug-at. (1 Juan 5:3) Ngano man? Kay gihimo nato ni tungod sa atong gugma kang Jehova ug sa mga igsoon. w22.03 24 ¶14-15

Una ta makapakitag kaluoy sa mga igsoon, kinahanglan natong hunahunaon kon unsang mga problema ang ilang giatubang. Pananglitan, ang usa ka sister tingali dunay grabeng sakit. Bisag wala siya magsigeg hisgot bahin sa iyang problema, posibleng maapresyar niya kon dunay motabang niya. Makatabang ba ta niya sa paglutog pagkaon o pagpanghinlo sa iyang balay? O ang usa ka brader tingali nawad-ag trabaho. Makahatag ba tag gamayng kantidad, nga tingali dili magpahibalo nga gikan ni kanato, aron matabangan siya hangtod nga makakita siyag bag-ong trabaho? Dili ta angayng maghulat nga ang atong mga igsoon mangayog tabang nato una ta magpakitag kaluoy. Sama kang Jehova, makatabang ta nila bisag wala sila mohangyo. Hunahunaa ra, kada adlaw niyang gipasubang ang adlaw nga dili na ta kinahanglang mohangyo kaniya! Ug ang kainit sa adlaw nakahatag ug kaayohan sa tanan, dili lang niadtong mapasalamaton. Seguradong mouyon ka nga pinaagi sa pagtagana sa atong panginahanglan, gipakita ni Jehova ang iyang gugma kanato. Gimahal gyod nato si Jehova tungod sa iyang pagkamaayo ug pagkamahinatagon! w21.09 22-23 ¶12-13

Ang maunongong gugma sa Diyos nagpalihok niya nga magmapinasayloon. Dihang makita ni Jehova nga ang usa ka makasasala naghinulsol ug mibiya sa iyang daotang binuhatan, ang maunongong gugma magpalihok Niya nga magmapinasayloon. Ang salmistang si David miingon bahin kang Jehova: “Wala siya magpahamtang kanatog silot sumala sa atong kasal-anan, ug wala niya kita paningli sumala sa kon unsay angay sa atong kasaypanan.” (Sal. 103:8-11) Si David mismo nahibalo gikan sa iyang pait nga kasinatian nga bug-at kaayo ang bation sa usa kon hasolon siya sa iyang konsensiya. Pero nakat-onan sab niya nga si Jehova “andam sa pagpasaylo.” Unsay nagpalihok kang Jehova nga magmapinasayloon? Ang tubag mabasa sa teksto karong adlawa. Oo, sama sa giingon ni David sa iyang pag-ampo, si Jehova magpasaylo tungod kay dagaya ang iyang maunongong gugma alang niadtong tanan nga nagatawag kaniya. Sa dihang makasala ta, haom lang​—ug maayo pa gani—​nga maguol ta sa atong nahimo. Magpalihok ni nato sa paghinulsol ug pagtul-id sa atong mga sayop. w21.11 5 ¶11-12

Gimahal ni Jehova ang iyang ngalan, ug gusto niya nga tahoron kini sa tanan. (Isa. 42:8) Pero sulod na sa mga 6,000 ka tuig, ang iyang maayong ngalan gipasipalahan. (Sal. 74:10, 18, 23) Nagsugod ni dihang ang Yawa (nagkahulogang “Tigbutangbutang”) miingon nga gihikaw kuno sa Diyos kang Adan ug Eva ang butang nga makahatag nilag kalipay. (Gen. 3:1-5) Sukad niadto, si Jehova sayop nga giakusahan nga gihikawan kuno niya ang mga tawo sa kon unsa gyoy ilang gikinahanglan. Si Jesus nabalaka kay ang ngalan sa iyang Amahan gipasipalahan. Si Jehova lang ang may katungod nga magmando sa mga langit ug sa yuta, ug ang iyang paagi sa pagmando mao ang kinamaayohan. (Pin. 4:11) Pero naningkamot ang Yawa nga malimbongan ang mga anghel ug mga tawo sa paghunahuna nga ang Diyos wala niana nga katungod. Sa dili madugay, kini nga isyu bug-os nga mahusay. Si Jehova mabindikar kay mapamatud-an niya nga ang iyang Gingharian lang ang makapatunghag tinuod nga kalinaw ug kasegurohan sa yuta. w21.07 9 ¶5-6

Natural lang nga gusto sa usa ka ulo sa pamilya nga matagan-ag pagkaon, sinina, ug puy-anan ang iyang asawa ug mga anak. Naglisod ka ba sa pinansiyal? Kon mao, dili gyod nâ lalim. Pero bisag lisod ang imong kahimtang, magamit nimo kining panahona sa pagpalig-on sa imong pagtuo. Pag-ampo kang Jehova ug basaha ang giingon ni Jesus sa Mateo 6:25-34 ug palandonga kana. Hunahunaa ang mga pananglitan sa atong panahon nga nagpamatuod nga si Jehova nagtagana sa panginahanglan niadtong nagkugi sa pag-alagad kaniya. (1 Cor. 15:58) Ang paghimo niana magpalig-on sa imong pagsalig nga sama nga ang imong langitnong Amahan nagtabang sa uban nga parehas nimog kahimtang, tabangan sab ka niya. Nahibalo siya kon unsay imong gikinahanglan, ug nahibalo siya kon unsaon kana pagtagana. Dihang maeksperyensiyahan nimo ang tabang ni Jehova, mas molig-on ang imong pagtuo ug makalahutay ka sa mas lisod nga mga pagsulay sa umaabot. w21.11 20 ¶3; 21 ¶6

Ang pagtuo sa daghang Kristohanon napalig-on sa pagtulon-an sa lukat. Sila nakapadayon sa pagsangyaw bisan pa sa pagsupak ug nakalahutay sa tanang matang sa pagsulay sa tibuok nilang kinabuhi. Konsideraha ang ehemplo ni apostol Juan. Maunongon siyang nagsangyaw sa kamatuoran bahin sa Kristo ug sa lukat, tingali sa kapig 60 ka tuig. Bisag hapit na siyang mag-100 anyos, ang gobyerno sa Roma naghunahuna nga peligroso kaayo siya nga tawo maong gipriso nila siya didto sa isla sa Patmos. Unsay iyang sala? Ang “pagsulti bahin sa Diyos ug . . . pagpamatuod bahin kang Jesus.” (Pin. 1:9) Maayo gyod siyang ehemplo sa pagtuo ug paglahutay! Sa mga basahon sa Bibliya nga gisulat ni Juan, gipahayag niya ang iyang dakong gugma kang Jesus ug ang iyang apresasyon sa lukat. Kapig 100 ka beses siyang naghisgot bahin sa lukat o sa mga kaayohan nga naposible tungod niini. (1 Juan 2:2) Klaro nga gipabilhan pag-ayo ni Juan ang lukat. w21.04 17 ¶9-10

Gidahom ni Jehova nga ang iyang katawhan magpakitag kaayo niadtong dunay depekto sa lawas. Pananglitan, dili angayng tunglohon sa mga Israelinhon ang tawong bungol. Ang maong pagtunglo naglakip sa pagpanghulga o pagsultig daotan kaniya. Dili gyod nâ maayong buhaton ngadto sa tawong bungol! Dili siya makadungog sa gisulti bahin kaniya, busa dili siya makadepensa sa iyang kaugalingon. Dugang pa, sa Levitico 19:14, atong makat-onan nga ang mga alagad sa Diyos dili angayng ‘magbutang ug babag sa agian sa buta.’ Ang usa ka basahon nag-ingon nga sa karaang Middle East, ang mga tawo nga dunay depekto sa lawas sagad abusohan ug trataron nga dili patas. Tingali ang tawong way kaluoy magbutang ug babag sa agian sa tawong buta aron pasakitan kini o himoong kataw-anan. Pagkadaotan niana! Pinaagi niini nga sugo, gitabangan ni Jehova ang iyang katawhan nga masabtan nga angay silang magpakitag kaluoy niadtong dunay depekto. w21.12 8-9 ¶3-4

Si Jacob nabalaka nga basig ang iyang igsoon naghambin pag kasuko kaniya. Busa kinasingkasing nâ niyang giampo kang Jehova. Dayon, nagpadala siyag daghang regalo kang Esau. (Gen. 32:9-15) Ug dihang nagkita na sila, si Jacob nagpakitag pagtahod kang Esau. Siya miyukbo kang Esau, dili lang kausa o kaduha, kondili kapito! Pinaagig pagpaubos ug pagtahod, si Jacob nakigdait sa iyang igsoon. (Gen. 33:3, 4) Duna tay makat-onan sa gihimo ni Jacob una siya makig-atubang ug dihang nakig-atubang na siya kang Esau. Si Jacob mapainubsanong nangayog tabang kang Jehova. Dayon milihok siya uyon sa iyang pag-ampo pinaagi sa paghimo sa iyang maarangan aron mahimong maayo ang iyang pagpakigkita sa iyang igsoon. Dihang nagkita na sila, si Jacob wala makiglalis kang Esau bahin sa kon kinsay husto ug sayop. Ang tumong ni Jacob mao ang pagpakigdait sa iyang igsoon. Unsaon nimo siya pagsundog?​—Mat. 5:23, 24. w21.12 25 ¶11-12

Sa dihang maghunahuna ka nga si Jesus namatay para sa imong mga sala, tingali moingon ka, ‘Dili ko takos nga modawat nianang bililhon nga gasa.’ Ngano tingaling mobati kag ingon niana? Ang atong dili hingpit nga kasingkasing maglimbong tingali nato, nga mopabati natong wala tay pulos o dili angayng higugmaon. (1 Juan 3:19) Sa dihang mobati tag ingon niana, angay natong hinumdoman nga “ang Diyos mas labaw sa atong kasingkasing.” Ang gugma ug pagpasaylo sa atong langitnong Amahan mas kusganon kay sa bisan unsang negatibong pagbati nga naa tingali sa atong kasingkasing. Kinahanglan natong kombinsihon ang atong kaugalingon nga gimahal ta ni Jehova. Aron mahimo kana, kinahanglan nga kanunay tang magtuon sa iyang Pulong, mag-ampo kaniya, ug makig-uban sa iyang maunongong katawhan. Nganong importante ang paghimo niana? Mas makita nimo ang nindot kaayo nga mga hiyas ni Jehova. Imong mahibaloan kon unsa ka dako ang iyang gugma kanimo. Ang pagpamalandong sa usa ka bahin sa Pulong sa Diyos kada adlaw makatabang nimo sa “pagtul-id” sa imong hunahuna ug kasingkasing.​—2 Tim. 3:16. w21.04 23-24 ¶12-13

Aron molig-on ang pagtuo, labaw pa ang gikinahanglan kay sa pagkuha lang ug kahibalo. Kinahanglan tang mamalandong sa atong nakat-onan. Konsideraha ang eksperyensiya sa magsusulat sa Salmo 77. Naguol siya kay gibati niya nga siya ug ang iyang mga isigka-Israelinhon nawad-an sa pag-uyon ni Jehova. Nabalaka kaayo siya maong dili na siya makatulog. (Bersikulo 2-8) Unsay iyang gibuhat? Iyang giingnan si Jehova: “Akong pamalandongon ang tanan nimong kalihokan ug hunahunaon pag-ayo ang imong mga pakiglabot.” (Bersikulo 12) Siyempre, nahibalo pag-ayo ang salmista sa mga butang nga gihimo ni Jehova para sa Iyang katawhan kaniadto, pero naghunahuna gihapon siya: “Nakalimot na ba ang Diyos sa pagpakitag pag-uyon, o nawala na ba ang iyang kaluoy tungod sa iyang kasuko?” (Bersikulo 9) Gipamalandong sa salmista ang mga kalihokan ni Jehova ug ang iyang pagpakitag kaluoy kaniadto. (Bersikulo 11) Unsay resulta? Ang salmista nakombinsir nga dili biyaan ni Jehova ang Iyang katawhan. (Bersikulo 15) w22.01 30-31 ¶17-18

Unsay pagbati ni Jehova niadtong matinumanong mga lalaki ug babaye nga nangamatay? Nangandoy siyang makita sila pag-usab! (Job 14:15) Seguradong naghinamhinam si Jehova nga makita pag-usab ang iyang higalang si Abraham. (Sant. 2:23) O si Moises, kang kinsa siya “direktang nakigsulti.” (Ex. 33:11) Ug seguradong naghinamhinam siyang madungog si David ug ang ubang salmista nga mokanta sa ilang nindot nga mga awit sa pagdayeg! (Sal. 104:33) Bisag nangamatay na ang maong mga higala ni Jehova, siya wala malimot kanila. (Isa. 49:15) Naa sa iyang panumdoman ang tanang detalye sa ilang personalidad. Moabot ang adlaw nga banhawon niya sila, ug sa makausa pa, iyang madungog ang ilang kinasingkasing nga mga pag-ampo ug dawaton ang ilang pagsimba. Kon namatyan kag minahal, hinaot nga mahupay ka niini nga mga kamatuoran. Sa dihang nagsugod ang rebelyon sa Eden, nahibalo si Jehova nga ang kahimtang mograbe pa una kini moarang-arang. Gidumtan ni Jehova ang pagkadaotan, inhustisya, ug kapintasan sa kalibotan karon. w21.07 10 ¶11; 12 ¶12

Sa dihang ipakita nato ang maong gugma, gipakita sab nato ang atong apresasyon sa lukat. Ngano? Tungod kay gihatag ni Jesus ang iyang kinabuhi, dili lang para kanato, kondili sa ato pong mga igsoon. Kon andam siyang mamatay para kanila, klaro nga gimahal niya sila pag-ayo. (1 Juan 3:16-18) Mapakita nato ang atong gugma sa mga igsoon sa paagi sa atong pagtratar kanila. (Efe. 4:29, 31–5:2) Pananglitan, tabangan nato sila sa dihang sila masakit o makaatubang ug grabeng mga kalisdanan, sama sa mga kalamidad. Pero unsay atong buhaton kon ang usa ka igsoon dunay nahimo o nasulti nga nakapasakit kanato? Malisdan ba ka usahay sa pagpasaylo? (Lev. 19:18) Kon mao, sunda kini nga tambag: “Padayon sa pagpailob sa usag usa ug kinasingkasing nga magpinasayloay kon ang usa dunay reklamo batok sa lain. Sama nga si Jehova kinasingkasing nga nagpasaylo kaninyo, kinahanglang buhaton sab ninyo kana.” (Col. 3:13) Matag higayon nga atong pasayloon ang atong igsoon, atong gipamatud-an sa atong langitnong Amahan nga gipabilhan gyod nato ang lukat. w21.04 18 ¶12-13

Tingali nagkugi ta para kang Jehova, ug basin daghan tag natabangan nga mouswag ug mabawtismohan. Pero nahibalo ta nga nagmalamposon lang ta tungod sa tabang ni Jehova. Duna tay laing makat-onan kang Apolos ug kang apostol Pablo​—kon mas daghan tag responsibilidad sa kongregasyon, mas dako tag kahigayonan sa pagpalambo sa kalinaw. Mapasalamaton gyod ta sa dihang ang gitudlo nga mga lalaki magpalambo sa kalinaw ug panaghiusa pinaagi sa pagbase sa ilang tambag diha sa Pulong sa Diyos ug sa paghatag sa pasidungog, dili sa ilang kaugalingon, kondili sa atong ehemplo, si Kristo Jesus! (1 Cor. 4:6, 7) Ang matag usa kanato dunay hinatag sa Diyos nga talento o abilidad. Mobati tingali ta nga gamay ra tag mahimo. Pero ang ginagmayng butang nga atong himoon sa pagpalambo sa panaghiusa samag gagmayng tahi diha sa tela aron kini mahimong sinina. Hinaot nga maningkamot ta nga wad-on sa atong kaugalingon ang bisan unsang tendensiya nga makigkompetensiya. Ug magmadeterminado ta nga himoon ang tanan sa pagpalambo sa kalinaw ug panaghiusa diha sa kongregasyon.​—Efe. 4:3. w21.07 19 ¶18-19

Makaseguro ka nga makita nimo pag-usab ang imong mga minahal nga namatay. Ang paghilak ni Jesus dihang gihupay niya ang iyang naguol nga mga higala nagpamatuod nga gusto gyod niyang banhawon ang mga patay! (Juan 11:35) Makatabang ka niadtong namatyag minahal. Si Jesus wala lang mohilak uban kang Marta ug Maria; siya naminaw ug naghupay sab kanila. (Juan 11:25-27) Mahimo sab nato kana alang niadtong namatyag minahal. Si Dan, ansiyano nga nagpuyo sa Australia, miingon: “Pagkamatay sa akong asawa, nagkinahanglan kog tabang. Daghang magtiayon ang andam maminaw nako adlaw ug gabii. Pasagdan ko nila nga mapakita ang akong kaguol, ug dili sila maulaw dihang mohilak ko. Tabangan sab ko nila sa mga buluhaton, sama sa paghinlo sa akong sakyanan, pagpamalit, ug pagluto dihang dili ko makahimo niana. Ug pirme silang mag-ampo uban nako. Tinuod gyod silang mga higala ug mga igsoon nga ‘masaligan panahon sa kalisdanan.’”​—Prov. 17:17. w22.01 16 ¶8-9

Gusto ni Jehova ang pinakamaayo para nato. (Prov. 4:20-22) Dihang iya tang tambagan pinaagi sa iyang Pulong, sa binase sa Bibliya nga publikasyon, o sa hamtong nga igsoon, iyang gipakita ang iyang gugma kanato. (Heb. 12:9, 10) Pagpokus sa tambag, dili sa paagi sa pagtambag. Usahay maghunahuna tingali ta nga dili maayo ang paagi sa pagtambag kanato. Siyempre, ang magtambag angayng mangitag paagi nga sayon dawaton ang iyang tambag. (Gal. 6:1) Pero kon kita ang tambagan, angay tang magpokus sa kon unsay gitambag​—bisan pag mobati ta nga dili kaayo maayo ang paagi sa pagtambag. Puwede natong pangutan-on ang atong kaugalingon: ‘Bisag di ko ganahan sa iyang paagi sa pagtambag, naa ba koy mapadapat sa iyang giingon? Unsa kaha kon akong palabyon ang iyang mga sayop ug ipadapat ang iyang tambag?’ Maayo gyod kon mangita tag paagi nga makabenepisyo sa bisan unsang tambag nga atong madawat. w22.02 12 ¶13-14

Si Jehova nahibalo nga nagkinahanglag panahon ug paningkamot ang pagsukol sa sayop nga panghunahuna ug dili maayong mga kinaiya. (Sal. 103:13, 14) Pero pinaagi sa iyang Pulong, balaang espiritu, ug organisasyon, si Jehova naghatag natog kaalam, kusog, ug tabang aron mabag-o nato ang atong kaugalingon. Gamita ang Bibliya aron masusi nimo pag-ayo ang imong kaugalingon. Ang Pulong sa Diyos morag samin; kini makatabang nimo nga masusi ang imong panghunahuna, sinultihan, ug binuhatan. (Sant. 1:22-25) Ug si Jehova kanunayng andam sa pagtabang nimo. Siya ang makahatag ug pinakamaayong tabang kay nahibalo siya kon unsay naa sa imong kasingkasing. (Prov. 14:10; 15:11) Busa paningkamoti nga mabatasan nimo nga mag-ampo ug magtuon sa iyang Pulong kada adlaw. Angayng kombinsido ka nga ang mga sukdanan ni Jehova mao ang pinakamaayo. Ang tanang gipahimo ni Jehova makaayo nato. Kadtong nagsunod sa iyang mga sukdanan naay pagtahod sa kaugalingon, katuyoan sa kinabuhi, ug tinuod nga kalipay.​—Sal. 19:8-11. w22.03 4 ¶8-10

Nagsimba ta kang Jehova dihang magtukod ug magmentinar tag mga dapit sa pagsimba. Ang Bibliya nag-ingon nga ang paghimo sa tabernakulo ug sa mga galamiton niini maoy “balaang buluhaton.” (Ex. 36:1, 4) Karon pod, giisip ni Jehova ingong sagradong pag-alagad ang pagtukod ug mga Kingdom Hall ug ubang pasilidad sa organisasyon. Ang ubang igsoon naggahin ug dako kaayong panahon niini nga mga buluhaton. Di ba naapresyar kaayo nato ang ilang importanteng nahimo para sa Gingharian? Siyempre, mosangyaw pod sila. Ang uban gusto pa ganing magpayunir. Ang mga ansiyano makapakita sa ilang pagsuporta sa buluhatong pagpanukod pinaagi sa pag-approve niining kugihang mga brader ug sister ingong payunir kon kuwalipikado sila. Hanas man ta sa pagpanukod o dili, kitang tanan makatabang sa paghinlo ug pagmentinar niini nga mga pasilidad. w22.03 22 ¶11-12