Marso

“Ang mga karnero” sa ilustrasyon diha sa Mateo 25:31-36 nagrepresentar sa mga matarong panahon sa kataposan kinsa dunay yutan-ong paglaom—ang ubang mga karnero. Sila maunongong nagsuportar sa nahibilin sa dinihogang mga igsoon sa Kristo ilabina sa pagtabang kanila sa buluhatong pagsangyaw ug paghimog mga tinun-an sa tibuok kalibotan. (Mat. 24:14; 28:19, 20) Sa mga semana una pa ang tinuig nga Memoryal, gipakita sa ubang mga karnero ang ilang pagsuportar sa mga igsoon sa Kristo pinaagi sa bug-os nga pagpakigbahin sa tibuok kalibotang kampanya sa pagpangimbitar sa mga interesado nga motambong sa Memoryal. Motabang sab sila sa paghimog gikinahanglang mga kahikayan aron ang Memoryal mapahigayon sa tanang kongregasyon sa tibuok kalibotan. Ang ubang mga karnero malipay sa pagsuportar sa mga igsoon sa Kristo nianang mga paagiha. Nahibalo sila nga ang ilang ginahimo alang sa dinihogang mga igsoon ni Jesus isipon niya nga samag ginahimo alang kaniya mismo.​—Mat. 25:37-40. w22.01 22 ¶11-12

Sa dihang sundogon nato ang mga hiyas ni Jesus ug ang iyang paagi sa pagpakiglabot sa uban​—pananglitan, ang iyang kaluoy sa usa ka sanlahon, ang iyang empatiya sa usa ka babaye nga may grabeng sakit, ang iyang simpatiya sa mga namatyan—​gisundog sab nato si Jehova. (Mar. 1:40, 41; 5:25-34; Juan 11:33-35) Kon maningkamot ta sa pagsundog kang Jehova, mas masuod pa ta kaniya. Ang pagsunod sa mga tunob ni Jesus makatabang nato nga dili maimpluwensiyahan niining daotang kalibotan. Sa kataposang gabii ni Jesus dinhi sa yuta, siya miingon: “Gidaog na nako ang kalibotan.” (Juan 16:33) Iyang gipasabot nga wala niya tugoti nga maimpluwensiyahan siya sa panghunahuna, tumong, ug binuhatan sa kalibotan. Nagpokus si Jesus sa rason kon nganong gipadala siya sa yuta​—ang pagbalaan kang Jehova. Komosta sa atong bahin? Niining kalibotana, daghan kaayog puwedeng makaimpluwensiya kanato. Pero kon, sama kang Jesus, magpokus ta sa paghimo sa kabubut-on ni Jehova, ‘madaog’ sab nato ang kalibotan.​—1 Juan 5:5. w21.04 3-4 ¶7-8

Si apostol Pablo nahibalo sa saad ni Jesus nga “ang tanan nga magpakitag pagtuo [kang Jesus] . . . makabaton ug kinabuhing walay kataposan.” (Juan 3:16; Roma 6:23) Oo, si Pablo apil niadtong nagpakitag pagtuo sa lukat. Kombinsido siya nga si Jehova gusto gyong magpasaylo bisan niadtong nakahimog grabeng sala basta maghinulsol sila. (Sal. 86:5) Si Pablo may pagtuo sab sa gahom sa gugma sa Diyos nga gipakita pinaagi sa Kristo. Matikdi ang makapadasig nga mga pulong sa kataposan sa Galacia 2:20. Si Pablo miingon: “[Ang] Anak sa Diyos . . . nahigugma nako ug nagtugyan sa iyang kaugalingon alang kanako.” Wala maghunahuna si Pablo nga naay limitasyon ang gugma sa Diyos, nga sama bag miingon siya, ‘Makita nako ang rason kon nganong gimahal ni Jehova ang mga igsoon, pero imposible nga higugmaon ko niya.’ Gipahinumdoman ni Pablo ang mga taga-Roma: “Samtang kita makasasala pa, ang Kristo namatay para nato.” (Roma 5:8) Wa gyoy kinutoban ang gugma sa Diyos! Kombinsido gyod si Pablo sa gahom sa gugma sa Diyos. Nahibalo si Pablo nga si Jehova nagmapailobon pag-ayo sa mga Israelinhon. w21.04 22 ¶8-10

Dihang magdumalag pagtuon sa Bibliya, tabangi ang imong study nga makakat-on sa paghigugma kang Jehova. Sa unsang paagi? Pangitag mga kahigayonan nga mapasiugda ang mga hiyas ni Jehova. Tabangi ang imong study nga masabtan nga si Jehova usa ka malipayong Diyos nga nagatabang niadtong nahigugma kaniya. (1 Tim. 1:11; Heb. 11:6) Ipakita sa study nga makabenepisyo siya sa pagpadapat sa impormasyon, ug ipatin-aw nga kini nagpamatuod sa gugma ni Jehova kaniya. (Isa. 48:17, 18) Samtang nagkadako ang iyang gugma kang Jehova, mas mapalihok siya sa paghimo sa gikinahanglang mga kausaban. Aron mokuwalipikar sa bawtismo, ang study kinahanglang mohimog mga sakripisyo. Kinahanglan tingaling isakripisyo sa pipila ka study ang ilang materyal nga mga butang. Daghan tingali ang kinahanglang mobiya sa ilang mga higala nga wala mahigugma kang Jehova. Basin ang uban talikdan sa mga membro sa pamilya nga dili ganahan sa mga Saksi ni Jehova. Si Jesus nagsaad nga kadtong mosunod niya dili madismayar. Sila panalanginan ug mahigugmaong espirituwal nga pamilya.​—Mar. 10:29, 30. w21.06 4-5 ¶8-9

Gipakasama ni apostol Pablo ang buluhatong paghimog mga tinun-an sa pagpatubo ug mga tanom, nga nagpakitang dili igo ang pagpugas lang ug binhi. Iyang gipahinumdoman ang mga taga-Corinto: “Ako ang nagtanom, si Apolos ang nagbisbis . . . Kamo ang uma nga ginatikad sa Diyos.” (1 Cor. 3:6-9) Ingong mga magbubuhat sa ‘uma sa Diyos,’ dili lang ta magpugas ug binhi kondili magbisbis sab niini ug regular nga magsusi sa pagtubo niini. Pero nahibalo ta nga ang Diyos ang magpatubo sa binhi. Dako gyong pribilehiyo ang pagsangyaw ug pagtudlo sa kamatuoran ngadto sa uban! Kini nga buluhaton makapalipay gyod nato. Si Pablo, kinsa nakatabang sa daghang taga-Tesalonica nga mahimong mga tinun-an, mipahayag sa iyang gibati niining paagiha: “Unsa bay among paglaom o kalipay o korona sa kasadya atubangan sa atong Ginoong Jesus panahon sa iyang presensiya? Dili ba kamo? Kamo gayod ang among himaya ug kalipay.”​—1 Tes. 2:19, 20; Buh. 17:1-4 w21.07 3 ¶5; 7 ¶17

Gikabig ni Jehova ang matag usa kanato. (Juan 6:44) Hunahunaa kon unsay gipasabot niana. Samtang gisusi pag-ayo ni Jehova ang binilyong tawo niining kalibotana, duna siyay nakita nga bililhon diha kanimo​—sinserong kasingkasing nga puwedeng mahigugma kaniya. (1 Cron. 28:9) Si Jehova nakaila nimo, nakasabot nimo, ug nahigugma kanimo. Makapadasig gyod nâ! Gimahal kaayo ka ni Jehova, ug gimahal sab niya ang tanan nimong Kristohanong mga igsoon. Sa pag-ilustrar niini, gikomparar ni Jesus si Jehova sa usa ka magbalantayg karnero. Kon ang usa ka magbalantay dunay 100 ka karnero unya ang usa niana masaag, unsay iyang buhaton? Iyang “biyaan sa kabukiran ang 99 ug pangitaon ang usa nga nasaag.” Dihang makit-an na niya ang karnero, dili siya masuko niini. Siya malipay. Unsay leksiyon? Ang matag karnero importante kang Jehova. Si Jesus miingon: “Dili gayod buot sa akong Amahan nga anaa sa langit nga malaglag bisan usa lang niining ubos nga mga tawo.”​—Mat. 18:12-14. w21.06 20 ¶1-2

Dihang atong palandongon ang way paglubad nga gugma sa Diyos kanato, mas molalom ang atong gugma kang Jehova ug mas masuod ta kaniya. (Roma 8:38, 39) Mapalihok ta sa pagsundog kang Jesus. (1 Ped. 2:21) Sa mga adlaw una ang Memoryal, magpokus ta sa mga asoy sa Bibliya bahin sa kataposang semana ni Jesus dinhi sa yuta, sa iyang kamatayon, ug sa iyang pagkabanhaw. Dayon, sa gabii sa Memoryal, ang pakigpulong magpahinumdom nato sa gugma ni Jesus alang kanato. (Efe. 5:2; 1 Juan 3:16) Samtang basahon nato ang gihimo ni Jesus nga pagsakripisyo sa kaugalingon ug palandongon kana, mapalihok ta nga “magpadayon sa paglakaw sama sa iyang paglakaw.” (1 Juan 2:6) Mahimo tang mas determinado nga magpabilin sa gugma sa Diyos. (Jud. 20, 21) Makapabilin ta sa gugma sa Diyos pinaagi sa paghimo sa tanan natong maarangan sa pagtuman kaniya, pagbalaan sa iyang ngalan, ug paglipay sa iyang kasingkasing. (Prov. 27:11; Mat. 6:9; 1 Juan 5:3) Ang pagtambong sa Memoryal maghimo natong mas determinado nga magkinabuhi kada adlaw sa paagi nga sama bag giingnan nato si Jehova, ‘Gusto nakong magpabilin sa imong gugma hangtod sa hangtod!’ w22.01 23 ¶17; 25 ¶18-19

Si Jehova naghatag kanatog regalo—ang kagawasan sa pagpili. Makapili ta kon unsay buhaton nato sa atong kinabuhi. Ang atong mahigugmaong Diyos malipay kon mopili ta sa pag-alagad kaniya. (Sal. 84:11; Prov. 27:11) Magamit nato sa hustong paagi ang atong kagawasan sa pagpili diha sa daghang bahin sa atong kinabuhi. Masundog nato si Jesus kon unahon nato ang kaayohan sa uban imbes ang atoa. Dihay higayon nga si Jesus ug ang iyang mga apostoles gikapoy kaayo, ug miadto sila sa mingaw nga dapit aron mopahulay unta. Pero dili kanay nahitabo. Nangadto pod didto ang mga tawo, ug gusto kaayo nilang maminaw kang Jesus. Pero wala masuko si Jesus; naluoy hinuon siya sa mga tawo. Busa, unsay iyang gihimo? “Gitudloan niya sila ug daghang butang.” (Mar. 6:30-34) Dihang sundogon nato si Jesus pinaagi sa paggamit sa atong panahon ug kusog sa pagtabang sa uban, atong gihimaya ang atong langitnong Amahan.​—Mat. 5:14-16. w21.08 3 ¶7-8

Dili gusto ni Jehova nga magkaparehas ang tanan. Nahibalo ta niini kay lainlaing klase sa tanom, hayop, ug bisan mga tawo ang iyang gilalang. Ang matag usa kanato dili managsama. Busa si Jehova dili gyod magtandi nimo sa uban. Gisusi niya ang imong kasingkasing, ang imong tinuod nga pagkatawo. (1 Sam. 16:7) Nahibalo sab siya kon unsay imong kayang himoon, kon unsay imong mga limitasyon, ug kon unsay imong mga kaagi. Wala siya magdahom ug labaw sa imong mahimo. Kinahanglan natong sundogon si Jehova pinaagi sa paglantaw sa atong kaugalingon sama sa iyang paglantaw kanato. Kon ato nang himoon, makabaton tag “maayong panghunahuna,” nga dili mag-isip sa atong kaugalingon nga importante kaayo o kaha walay pulos. (Roma 12:3) Siyempre, makabenepisyo tingali ta sa pagpaniid sa maayong ehemplo sa usa ka matinumanong igsoon nga mabungahon sa ministeryo. (Heb. 13:7) Tingali makakat-on ta niyag mga paagi kon unsaon pagpauswag ang atong ministeryo. (Filip. 3:17) Pero dunay kalainan ang pagsundog sa maayong ehemplo sa usa ka igsoon ug ang pagtandi sa atong kaugalingon kaniya. w21.07 20 ¶1-2

Maugmad nimo ang imong pagtuo sa Maglalalang pinaagi sa pagpaniid sa mga hayop, tanom, ug bituon. (Sal. 19:1) Kon tun-an nimo ni pag-ayo, mas makombinsir ka nga si Jehova ang Maglalalang. Dihang magtuon bahin sa kalalangan, matikdi pag-ayo kon unsay gipadayag niana bahin sa atong Maglalalang. (Roma 1:20) Pananglitan, nahibalo tingali ka nga ang atong adlaw, gawas nga maghatag ug kainit nga importante sa kinabuhi, magpagawas sab ug makadaot nga enerhiya, ang ultraviolet rays. Kitang mga tawo kinahanglang maprotektahan batok niana. Ug naprotektahan gyod ta! Sa unsang paagi? Ang atong planetang yuta dunay kaugalingong proteksiyon​—ang ozone layer nga maoy mosala sa makadaot nga radyasyon. Samtang magkataas ang lebel sa ultraviolet nga radyasyon gikan sa adlaw, magkabaga pod ang ozone layer. Dili ba nagpakita ni nga duna gyoy naghimo niini nga proseso ug nga siya usa gyod ka mahigugmaon ug intelihente nga Maglalalang? w21.08 17 ¶9-10

Human mabawtismohi ang usa ka tawo, kinahanglan nga padayon nato siyang higugmaon ug tahoron. (1 Juan 4:20) Unsaon nato nâ paghimo? Ang usa ka paagi mao ang pagsalig kaniya. Pananglitan, dili ta maghunahuna nga duna siyay daotan o hakog nga mga motibo. Hinunoa, magpakita tag pagtahod sa atong igsoon, nga mag-isip kaniya nga labaw kay kanato. (Roma 12:10; Filip. 2:3) Sa pagkatinuod, angay tang magpakitag kaluoy ug kaayo sa tanang tawo. Kon gusto natong maapil niadtong dunay katungod nga motawag kang Jehova ingong ilang Amahan hangtod sa hangtod, kinahanglan natong ipadapat ang Pulong sa Diyos. Pananglitan, si Jesus nagtudlo nga angay tang magpakitag kaluoy ug kaayo sa tanang tawo, bisan sa atong mga kaaway. (Luc. 6:32-36) Usahay, malisdan tingali ta sa paghimo niini. Kon mao, kinahanglang makakat-on ta sa pagsundog sa panghunahuna ug binuhatan ni Jesus. Dihang himoon nato ang atong kinamaayohan sa pagtuman kang Jehova ug pagsundog kang Jesus, atong gipakita sa atong langitnong Amahan nga gusto natong mahimong bahin sa iyang pamilya hangtod sa hangtod. w21.08 6 ¶14-15

Pagkat-on nga mosalig kang Jehova. Siya nagsaad nga dagaya ta niyang panalanginan kon mosalig ta niya ug ihatag nato kaniya ang atong kinamaayohan. Ang Bibliya dunay daghang pananglitan niadtong naningkamot sa pag-alagad kang Jehova. Sa daghang kahimtang, kinahanglan silang mohimo sa unang tikang aron madawat ang espesyal nga mga panalangin gikan kang Jehova. Pananglitan, human lang nga mibiya si Abraham sa iyang balay​—“bisag wala mahibalo kon asa paingon”—​nga gipanalanginan siya ni Jehova. (Heb. 11:8) Human lang nga nakiglayog si Jacob sa anghel nga nakadawat siyag espesyal nga panalangin. (Gen. 32:24-30) Sa dihang ang nasod sa Israel hapit nang mosulod sa Yutang Saad, human lang nga ang mga saserdote mitunob sa kusog ug sulog nga Suba sa Jordan nga ang katawhan nakatabok. (Jos. 3:14-16) Makabenepisyo sab ka sa ehemplo sa mga Saksi karon nga misalig kang Jehova ug mihimog dugang pa sa pag-alagad kaniya. w21.08 29-30 ¶12-14

Kamong tigulang nga mga igsoon nahibalo gikan sa inyong kasinatian kon giunsa paghimo ang mga butang kaniadto. Pero nakita sab ninyo nga kinahanglan mong mo-adjust sa bag-ong mga kahimtang. Kamong mga tigulang nga bag-o lang nabawtismohan, daghan sad mog ikahatag. Malipay ang mga batan-on nga makadungog sa inyong mga eksperyensiya ug sa mga leksiyon nga inyong nakat-onan. Kon inyong ‘batasanon ang paghatag’ pinaagi sa paggamit sa inyong mga eksperyensiya sa pagtabang sa uban, panalanginan gyod mo ni Jehova. (Luc. 6:38) Sa dihang kamong minahal nga mga tigulang mas masuod sa mga batan-on, masuportahan ninyo ang usag usa. (Roma 1:12) Ang matag usa dunay nabatonan nga wala sa lain. Ang mga tigulang dunay kaalam ug eksperyensiya nga ilang nabatonan sa paglabay sa panahon. Ang mga batan-on dunay kusog. Sa dihang ang mga batan-on ug tigulang magtinabangay ingong managhigala, sila makadayeg sa atong mahigugmaong langitnong Amahan ug mahimong panalangin sa tanan diha sa kongregasyon. w21.09 8 ¶3; 13 ¶17-18

Nganong daghang Hudiyo ang napandol sa paagi nga namatay si Jesus? Para nila, ang kamatayon ni Jesus diha sa estaka nagpakita nga siya usa ka kriminal ug makasasala​—dili ang Mesiyas. (Deut. 21:22, 23) Kadtong mga Hudiyo nga napandol kang Jesus wala motuo nga siya inosente, sayop nga giakusahan, ug gitratar sa dili makataronganong paagi. Kadtong naghusay kang Jesus wala magpakabana sa hustisya. Ang korte suprema sa mga Hudiyo dihadiha nga nagtigom, ug ang paagi sa paghusay dili subay sa balaod. (Luc. 22:54; Juan 18:24) Imbes maminaw nga walay pagpihig sa mga sumbong ug ebidensiya batok kang Jesus, ang mga huwes mismo ang nangitag “bakak nga sumbong batok kang Jesus aron ipapatay siya.” (Mat. 26:59; Mar. 14:55-64) Ug human mabanhaw si Jesus, ang maong daotang mga huwes nagbayad ug “daghang pirasong plata” sa Romanong mga sundalo nga nagbantay sa iyang lubnganan, aron magpakaylap kinig dili tinuod nga balita kon nganong walay sulod ang lubnganan.​—Mat. 28:11-15. w21.05 11 ¶12-13

Puwedeng taposon ni Jehova kining daotang sistema sa mga butang bisan kanus-a. Pero panalangin gyod kanato ang iyang pagpailob! Ang tanang kaliwat ni Adan ug Eva dili hingpit dihang gipanganak sila. Bisan pa niana, sila gihigugma ug gipangga ni Jehova, ug siya nagsaad nga iyang taposon kining daotang sistema sa mga butang. (1 Juan 4:19) Ug nagtakda siyag panahon nga taposon ang tanang pag-antos sa tawo. Samtang wala pa moabot kanang panahona, ang atong gugma kang Jehova angayng magpalihok nato sa paglahutay uban kaniya. Si Jehova ang hingpit nga ehemplo sa paglahutay. Nasundog ni Jesus ang pagkamalahutayon sa iyang Amahan. Sa dinhi pa si Jesus sa yuta, iyang gilahutay ang pagsupak, kaulawan, ug estaka sa pagsakit alang kanato. (Heb. 12:2, 3) Ang ehemplo ni Jehova sa paglahutay seguradong nakatabang kang Jesus sa paglahutay. Makatabang sab nâ kanato. w21.07 12-13 ¶15-17

Adlaw-adlaw natong naeksperyensiyahan ang pagkamaluluy-on sa atong langitnong Amahan. (Sal. 103:10-14) Ang mga sumusunod ni Jesus dili hingpit, pero siya naluoy ug nagpasaylo kanila. Kinabubut-on pa gani niyang gihalad ang iyang kinabuhi aron mapasaylo ang atong mga sala. (1 Juan 2:1, 2) Mapalig-on nato ang atong gugma sa usag usa kon kita “kinasingkasing nga magpasaylo.” (Efe. 4:32) Siyempre, lisod usahay ang pagpasaylo sa uban, busa kinahanglan tang maningkamot. Gibati sa usa ka sister nga ang artikulo sa Bantayanang Torre nga “Kinabubut-on nga Magpasaylo sa Usag Usa” nakatabang gyod niya. Siya misulat: “[Ang artikulo] nag-ingon nga ang pagkaandam nga magpasaylo wala magpasabot nga imong gikonsentir ang ilang dili maayong binuhatan o gibalewala ang kadaot nga ipahinabo niini. Hinunoa, imong giwala ang bisan unsang kayugot tungod sa daotang gihimo sa uban ug nagpabiling malinawon.” Kon kinabubut-on tang magpasaylo sa atong mga igsoon, atong gipakita nga gimahal nato sila ug gisundog nato ang atong Amahan, si Jehova. w21.09 23-24 ¶15-16

Si Jesus nahigugma sa kamatuoran​—ang kamatuoran bahin sa Diyos ug sa Iyang mga katuyoan. Si Jesus nagkinabuhi sumala niana nga kamatuoran, ug gipaila niya kana sa uban. (Juan 18:37) Ang tinuod nga mga sumusunod ni Jesus nahigugma sab pag-ayo sa kamatuoran. (Juan 4:23) Gani, gitawag ni apostol Pedro ang Kristiyanidad ingong “dalan sa kamatuoran.” (2 Ped. 2:2) Kay gihigugma nila pag-ayo ang kamatuoran, ang mga Kristohanon sa unang siglo nagsalikway sa relihiyosong mga ideya, tradisyon, ug opinyon nga dili uyon sa kamatuoran. (Col. 2:8) Sa susama, ang tinuod nga mga Kristohanon karon naningkamot nga ‘magpadayon sa paglakaw sa kamatuoran’ pinaagi sa pagbase sa tanan nilang pagtulon-an ug sa ilang paagi sa pagkinabuhi diha sa Pulong ni Jehova. (3 Juan 3, 4) Ang katawhan sa Diyos karon wala mag-ingon nga bug-os na nilang nasabtan ang kamatuoran. Dihay mga higayon nga nasayop sila sa ilang pagpatin-aw sa usa ka pagtulon-an sa Bibliya ug sa ilang organisasyonal nga mga direksiyon. Dihang mas motin-aw ang kamatuoran, himoon nila ang gikinahanglang kausaban. w21.10 21-22 ¶11-12

Sama nga ang mga paril palibot sa karaang siyudad nanalipod sa mga molupyo niini, ang maunongong gugma ni Jehova naglibot kanato, nga naghatag natog espirituwal nga proteksiyon batok sa bisan unsa nga makadaot sa atong relasyon kaniya. Dugang pa, ang maunongong gugma ni Jehova maoy nagpalihok niya sa pagkabig kanato. (Jer. 31:3) Gihulagway sa salmistang si David sa laing paagi ang panalipod nga natagamtam sa katawhan sa Diyos. Siya misulat: “Ang Diyos mao ang akong luwas nga dangpanan, ang Diyos nga nagpakita kanakog maunongong gugma.” Si David miingon sab bahin kang Jehova: “Siya ang akong maunongong gugma ug salipdanan, ang akong luwas nga dangpanan ug manluluwas, ang akong taming ug ang Usa nga akong gidangpan.” (Sal. 59:17; 144:2) Nganong gipakasama ni David ang maunongong gugma ni Jehova sa usa ka dangpanan ug salipdanan? Bisag asa ta nagpuyo sa yuta, basta nag-alagad ta kaniya, si Jehova manalipod gyod kanato aron maampingan nato ang atong bililhong relasyon kaniya. w21.11 6 ¶14-15

Dihang si Jesus ug ang iyang mga tinun-an naabtan ug kusog nga unos diha sa dagat, gigamit ni Jesus ang maong hitabo sa pagtabang kanila nga makita kon unsang bahina sa ilang pagtuo ang kinahanglang palig-onon. (Mat. 8:23-26) Samtang mihuros ang unos ug nasudlag tubig ang sakayan, si Jesus nahinanok. Dihang ang iyang nangahadlok pag-ayo nga mga tinun-an nagpukaw niya ug naghangyo nga luwason sila, ang Ginoo nangutana kanila: “Nganong nangalisang man mo, kamong diyutay ug pagtuo?” Nag-atubang ba kag “kusog nga unos”? Tingali nag-antos ka tungod sa natural nga kalamidad. O basin nag-antos ka tungod sa simbolikal nga unos, sama sa grabeng sakit nga nakapaguol pag-ayo nimo ug wala ka mahibalo kon unsay buhaton. Usahay, mabalaka tingali ka, pero ayawg tugoti nga ang imong kabalaka makapugong nimo sa pagsalig kang Jehova. Pakigsuod kaniya pinaagi sa kinasingkasing nga pag-ampo. Palig-ona ang imong pagtuo pinaagi sa pagpamalandong sa mga higayon nga gitabangan ka ni Jehova. (Sal. 77:11) Makaseguro ka nga dili gyod ka niya pasagdan​—karon o sa umaabot. w21.11 22 ¶7, 10

Ang usa maghunahuna tingali nga basta dili niya kuhaon ang mga butang nga dili iyaha, gituman niya ang maong sugo. Pero posible nga nangawat siya sa ubang paagi. Pananglitan, ang negosyante nga naggamit ug dili tukmang timbangan o pangsukod aron limbongan ang iyang mga kustomer sa pagkatinuod nangawat kanila. Ang Levitico 19:13 naghisgot sa koneksiyon tali sa pagpangawat ug sa dili matinud-anong mga paagi sa pagnegosyo. Kini nag-ingon: “Ayawg tikasi ang inyong isigkatawo.” Busa kon ang usa nanikas diha sa iyang negosyo, siya nangawat. Ang ikawalong sugo nag-ingon nga sayop ang pagpangawat, pero ang mga detalye diha sa Levitico makatabang nato nga masabtan kon unsaon pagpadapat ang prinsipyo sa maong balaod. Makabenepisyo ta sa pagpamalandong sa panglantaw ni Jehova sa pagkadili-matinud-anon ug pagpangawat. Puwede natong pangutan-on ang kaugalingon: ‘Base sa Levitico 19:11-13, duna bay bahin sa akong kinabuhi nga kinahanglan nakong usbon, ilabina sa akong mga paagi sa pagnegosyo o pagtrabaho?’ w21.12 9-10 ¶6-8

Sa imong personal nga pag-ampo, hunahunaa ang espesipikong mga sayop nga imong nahimo nianang adlawa ug dayon pangayog pasaylo kang Jehova. Siyempre, kon nakahimo kag seryosong sala, gikinahanglan sab nimo ang tabang sa mga ansiyano. Sila maminaw nimo ug mohatag ug mahigugmaong tambag gikan sa Pulong sa Diyos. Sila mag-ampo uban nimo, nga maghangyo kang Jehova nga pasayloon ka pinasukad sa halad ni Jesus ‘aron maayo ka’ sa espirituwal. (Sant. 5:14-16) Dugang pa, makatabang sab ang pagpamalandong sa lukat. Tingali masakitan ka dihang maghunahuna ka sa pag-antos nga naeksperyensiyahan sa Anak sa Diyos. Pero kon mas palandongon nimo ang sakripisyo nga gihimo ni Jesus, mas molalom ang imong gugma kaniya ug sa iyang Amahan. Kada tuig, mas molalom ang atong apresasyon sa lukat pinaagi sa pagtambong sa Memoryal sa kamatayon ni Jesus ug sa madasigong pagdapit sa uban nga mouban kanato. Dako kaayong pribilehiyo ang gihatag ni Jehova kanato sa pagtudlo sa uban bahin sa iyang Anak! w21.04 18-19 ¶13-16

Hunahunaa ang gihimo ni Jesus dihang giduol siya sa daghang tawo didto sa bukid. Una pa niana, tibuok gabii nga nag-ampo si Jesus. Tingali gikapoy kaayo siya, pero pagkakita niya sa mga tawo, naluoy kaayo siya sa mga pobre ug masakiton. Gawas nga giayo niya sila, gihatag pod niya ang usa sa makapadasig kaayong pakigpulong sukad masukad​—ang Wali sa Bukid. (Luc. 6:12-20) Gisakripisyo pod ni Jesus ang panahon nga para unta sa iyang kaugalingon. Maimadyin ba nimo ang gibati ni Jesus pagkadungog niya nga gipunggotan ang iyang higala nga si Juan nga Tigbawtismo? Ang Bibliya nag-ingon: “Sa pagkadungog [nga namatay si Juan], si Jesus misakay ug sakayan paingon sa mingaw nga dapit aron mag-inusara.” (Mat. 14:10-13) Pero naa nay mga tawo nga nakaunag abot didto. (Mar. 6:31-33) Nakita niya nga nagkinahanglan gyod silag espirituwal nga pagdasig, ug iya dayon silang gitabangan.​—Luc. 9:10, 11. w22.02 21 ¶4, 6

Unsay angay natong buhaton kon maamgohan nato nga ang usa ka igsoon nahiubos kanato? Kinahanglang kinasingkasing tang moampo kang Jehova. Puwede nato siyang hangyoon nga panalanginan ang atong mga paningkamot nga makigdait sa atong igsoon. Kinahanglan pod tang maggahin ug panahon sa pagsusi sa atong kaugalingon. Puwede natong pangutan-on ang atong kaugalingon: ‘Andam ba kong moangkon sa akong sayop, mapainubsanong mangayog pasaylo, ug makigdait? Unsa kahay bation ni Jehova ug Jesus kon maningkamot ko nga makigdait sa akong igsoon?’ Ang mga tubag niana magpalihok nato sa pagpamati kang Jesus ug pagduol sa atong igsoon uban ang pagpaubos aron makigdait kaniya. Kon makigdait ta sa atong igsoon, kinahanglan tang magmapainubsanon. (Efe. 4:2, 3) Kinahanglan natong duolon ang igsoon nga nahiubos sa tuyo nga mahibalik ang atong maayong relasyon kaniya. Hinumdomi nga ang pagpakigdait sa imong igsoon mas importante kay sa pagpamatuod kon kinsay husto ug sayop.​—1 Cor. 6:7. w21.12 26 ¶13-16

Naguol si Jesus kay nahibalo siya nga kadaghanan sa mga Hudiyo dili modawat sa mensahe sa Gingharian. Tungod niana, ang Jerusalem malaglag ug ang mga Hudiyo nga wala mamatay mahimong binihag. (Luc. 21:20-24) Makapaguol nga sama sa giingon ni Jesus, kadaghanan sa mga tawo nagsalikway kaniya. Sa inyong lugar, unsay reaksiyon sa kadaghanang tawo sa mensahe sa Gingharian? Kon pipila ra ang midawat sa kamatuoran bisan pa sa imong mga paningkamot sa pagtudlo niana, unsay imong makat-onan sa paghilak ni Jesus? Gimahal ni Jehova ang mga tawo. Ang paghilak ni Jesus nagpahinumdom nato nga gimahal pag-ayo ni Jehova ang mga tawo. “Dili niya gusto nga naay malaglag kondili gusto niya nga ang tanan maghinulsol.” (2 Ped. 3:9) Karon, ikapakita nato nga gimahal nato ang atong isigkatawo pinaagi sa padayong pagpaningkamot nga matandog ang ilang kasingkasing sa maayong balita.​—Mat. 22:39. w22.01 16 ¶10-12

Ang imong pagtuo mas molig-on kon pamalandongon nimo ang mga butang nga gibuhat ni Jehova alang sa iyang katawhan ug alang kanimo. Pero ang pinakaimportante, mas molalom ang imong gugma kang Jehova. Labaw kay sa bisan unsang hiyas, ang gugma magpalihok nimo sa pagtuman kang Jehova, paghimog mga sakripisyo aron mapalipay siya, ug sa paglahutay sa bisan unsang mga kalisdanan. (Mat. 22:37-39; 1 Cor. 13:4, 7; 1 Juan 5:3) Wala nay mas bililhon pa kay sa suod, mahigugmaong relasyon uban kang Jehova! (Sal. 63:1-7) Hinumdomi nga ang pag-ampo, pagtuon, ug pagpamalandong maoy bahin sa atong pagsimba. Sama kang Jesus, pangitag hilom nga mga lugar ug higayon nga makauban si Jehova. Ayaw pagpabalda. Hangyoa si Jehova nga tabangan kang makapokus dihang makigbahin ka sa espirituwal nga mga kalihokan. Kon gamiton nimo ang imong panahon karon sa kinamaayohang paagi, panalanginan ka ni Jehova ug walay kataposang kinabuhi sa bag-ong kalibotan.​—Mar. 4:24. w22.01 30-31 ¶18-20

Ang atong panghunahuna makaimpluwensiya sa atong binuhatan. Kanay hinungdan nga gitudloan ta ni Jesus nga tangtangon sa atong hunahuna ang bisan unsa nga moresultag seryosong sala. (Mat. 5:21, 22, 28, 29) Gusto natong mapalipay ang atong langitnong Amahan, dili ba? Busa importante gyod nga wad-on dayon nato ang bisan unsang daotang butang nga mosulod sa atong hunahuna! Si Jesus miingon: “Ang mogula sa baba naggikan sa kasingkasing.” (Mat. 15:18) Oo, ang atong sinultihan nagpaila kon unsay naa sa atong kasingkasing. Busa pangutan-a ang imong kaugalingon: ‘Mosulti ba kog tinuod, bisan pag moresulta nig dili maayo para nako? Ingong minyo, dili ba ko makig-flirt sa uban? Gilikayan ba gyod nako ang bastos o dili maayong sinultihan? Kalmado ba kog tinubagan bisag gipalagot ko?’ Makatabang gyod ang pagpamalandong nianang mga pangutanaha. Kon maningkamot ka nga wad-on ang pagpamakak ug ang sakit, bastos, o dili maayong sinultihan, mas sayon ang paghukas sa daang personalidad. w22.03 5 ¶12-14

Kadtong mangayog tambag imbes maghulat nga tambagan sagad mas mouswag sa espirituwal kay niadtong dili mangayog tambag. Busa maayo gyod nga mangayog tambag. Kanus-a tingali ta mangayog tambag sa mga igsoon? Konsideraha ang mosunod nga mga pananglitan. (1) Ang sister mihangyo sa usa ka eksperyensiyadong igsoon nga mokuyog niya sa pag-Bible study ug human niana nangayo siyag tambag kon unsay angay niyang pauswagon sa iyang paagi sa pagtudlo. (2) Ang dalaga nga sister nangayog opinyon sa hamtong nga sister bahin sa slacks nga gusto niyang paliton. (3) Ang brader giasayn sa paghatag sa iyang unang pakigpulong publiko. Gihangyo niya ang usa ka eksperyensiyadong mamumulong nga maminaw pag-ayo sa iyang pakigpulong ug sultihan siya kon unsay angay niyang pauswagon. Bisan ang brader nga daghang tuig nang nagpakigpulong angay gihapong mangayog tambag sa eksperyensiyadong mga mamumulong ug ipadapat kini.​—Prov. 19:20. w22.02 13 ¶15-17

Kita gimahal ug giatiman ni Jehova, sama sa iyang gibuhat kang Jesus panahon sa lisod nga asaynment niini sa yuta. (Juan 5:20) Iyang gitagana ang tanang espirituwal, emosyonal, ug pisikal nga panginahanglan ni Jesus. Ug gipahayag gyod ni Jehova nga iyang gimahal ug giuyonan ang iyang Anak. (Mat. 3:16, 17) Kay nahibalo si Jesus nga makasalig siya sa iyang mahigugmaon nga langitnong Amahan, wala gyod siya mobating nag-inusara. Sama kang Jesus, naeksperyensiyahan natong tanan ang gugma ni Jehova sa daghang paagi. Hunahunaa ni: Si Jehova nagkabig nato ug naghatag kanatog mahigugmaon ug nagkahiusang espirituwal nga pamilya aron kita magmalipayon ug aron madasig ta panahon sa kagul-anan. (Juan 6:44) Kanunay sab tang gitagan-an ni Jehova ug makapadasig nga espirituwal nga pagkaon. Ug gitabangan pa gani ta niya nga makabaton sa atong materyal nga mga panginahanglan kada adlaw. (Mat. 6:31, 32) Dihang pamalandongon nato ang gugma ni Jehova kanato, mas molalom ang atong gugma kaniya. w21.09 22 ¶8-9

Unsay imong kinabuhi sa wala pa ka magpa-Bible study sa mga Saksi ni Jehova? Daghan nato ang dili ganahang maghunahuna bahin ana. Ang atong panghunahuna ug personalidad kaniadto tingali naimpluwensiyahan sa sukdanan sa kalibotan kon unsay husto ug sayop. Busa kita kaniadto “walay paglaom ug wala makaila sa Diyos.” (Efe. 2:12) Pero sa dihang nagtuon na ka sa Bibliya, nakat-onan nimo nga naa kay Amahan sa langit nga nagmahal pag-ayo nimo. Nasabtan nimo nga kon gusto nimong mapalipay si Jehova ug mahimong membro sa iyang pamilya, kinahanglang mohimo kag dagkong kausaban sa imong pagkinabuhi ug panghunahuna. Kinahanglan nimong makat-onan nga mosunod sa iyang taas nga mga sukdanan. (Efe. 5:3-5) Ang atong Maglalalang ug langitnong Amahan, si Jehova, naay katungod sa pagdesisyon kon unsay angayng panggawi sa mga membro sa iyang pamilya. Ug nagsugo siya nga sa dili pa ta magpabawtismo, maningkamot ta sa ‘paghukas sa daang personalidad apil sa mga buhat niini.’ w22.03 2 ¶1-3

Ang ubang mga karnero malipayng motambong sa Memoryal ug mamalandong sa ilang paglaom. Naghinamhinam silang maminaw sa pakigpulong sa Memoryal, kay magpokus ni sa kon unsay himoon sa Kristo ug sa iyang 144,000 nga kaubang magmamando alang sa matinumanong mga tawo panahon sa Usa ka Libo ka Tuig nga Pagmando. Ubos sa pagpanguna sa ilang Hari, si Jesu-Kristo, ang maong langitnong mga magmamando motabang sa paghimo sa yuta nga paraiso ug motabang sa katawhan nga mahimong hingpit. Makapalipay kaayo alang sa milyonmilyong tigpaniid panahon sa Memoryal nga imadyinon ang umaabot nga katumanan sa mga tagna sa Bibliya, sama nianang makita sa Isaias 35:5, 6; 65:21-23; ug Pinadayag 21:3, 4. Pinaagi sa pag-imadyin sa ilang kaugalingon nga naa na sa bag-ong kalibotan uban sa ilang mga minahal, gipalig-on nila ang ilang paglaom sa umaabot ug ang ilang determinasyon nga dili gyod mohunong sa pag-alagad kang Jehova.​—Mat. 24:13; Gal. 6:9. w22.01 21 ¶5-7

Unsa ang lukat? Ang bili nga gibayad ni Jesus aron mapalit ug balik ang giwala ni Adan. (1 Cor. 15:22) Nganong gikinahanglan nato ang lukat? Tungod kay sa sukdanan ni Jehova sa hustisya nga gitakda diha sa Balaod, ang kinabuhi kinahanglang bayran ug kinabuhi. (Ex. 21:23, 24) Giwala ni Adan ang iyang hingpit nga tawhanong kinabuhi. Aron masunod ang hustisya sa Diyos, gihalad ni Jesus ang iyang hingpit nga tawhanong kinabuhi. (Roma 5:17) Pinaagi niana, si Jesus nahimong “Amahang Walay Kataposan” sa tanang nagpakitag pagtuo sa lukat. (Isa. 9:6; Roma 3:23, 24) Si Jesus kinabubut-ong mihalad sa iyang kinabuhi tungod sa iyang dakong gugma sa iyang langitnong Amahan ug kanato. (Juan 14:31; 15:13) Tungod niana nga gugma, determinado siya sa pagpabiling matinumanon hangtod sa kamatayon ug sa pagtuman sa kabubut-on sa iyang Amahan. Ingong resulta, matuman ang orihinal nga katuyoan ni Jehova para sa katawhan ug sa yuta. w21.04 14 ¶2-3