Abril

Gipakita ni Jesus ang dakong gugma pinaagi sa kinabubut-ong paghatag sa iyang kinabuhi alang kanato. (Juan 15:13) Dili gyod nato mabayran si Jehova ug si Jesus sa gugma nga ilang gipakita. Pero ikapakita nato ang atong pagkamapasalamaton diha sa paagi sa atong pagkinabuhi kada adlaw. (Col. 3:15) Gipabilhan sa mga dinihogan ang lukat kay tungod niana, nabatonan nila ang nindot kaayong paglaom. (Mat. 20:28) Tungod sa ilang pagtuo sa halad sa Kristo, gipahayag sila ni Jehova nga matarong ug gisagop ingong iyang mga anak. (Roma 5:1; 8:15-17, 23) Ang ubang mga karnero mapasalamaton sab sa lukat. Tungod sa ilang pagtuo sa giulang dugo sa Kristo, nakabaton silag hinlong baroganan atubangan sa Diyos ug naay paglaom nga ‘makalabang sa dakong kasakitan.’ (Pin. 7:13-15) Ikapakita sa duha ka grupo ang ilang pagkamapasalamaton sa lukat pinaagi sa pagtambong sa Memoryal kada tuig. w22.01 23 ¶14-15

Naguol si Jesus sa sumbong nga maoy gibasehan sa pagpatay kaniya. Sayop siyang giakusahan ingong tigpasipala—tawo nga walay pagtahod sa Diyos o sa ngalan sa Diyos. (Mat. 26:64-66) Naguol pag-ayo si Jesus sa maong sumbong mao nga gihangyo niya ang iyang Amahan nga dili unta Niya tugotan nga mahitabo kini nga kaulawan. (Mat. 26:38, 39, 42) Si Jesus kinahanglang ilansang diha sa estaka aron mapahigawas ang mga Hudiyo gikan sa tunglo. (Gal. 3:10) Nanaad sila nga sundon ang Balaod sa Diyos, pero wala nila kini tumana. Busa, gawas nga takos sila sa kamatayon kay kaliwat sila sa makasasalang si Adan, nailalom pod sila niini nga tunglo. (Roma 5:12) Ang Balaod sa Diyos nag-ingon nga ang tawo nga nakahimog sala nga takos sa kamatayon kinahanglang patyon. Sa pipila ka kahimtang, ang patayng lawas ibitay diha sa estaka. (Deut. 21:22, 23; 27:26) Busa kay si Jesus gilansang diha sa estaka, nahimong posible nga ang mismong nasod nga nagsalikway kaniya makabenepisyo sa iyang halad. w21.04 16 ¶5-6

Imadyina ang nahitabo sa kataposang adlaw ni Jesus dinhi sa yuta. Walay kaluoy siyang gikulata sa Romanong mga sundalo. (Mat. 26:52-54; Juan 18:3; 19:1) Migamit silag latigo nga nakagisi sa iyang kaunoran. Sa ulahi, gipapas-an nila siyag bug-at nga kahoyng estaka bisag nagkadugo na ang iyang likod. Gisugdan pagguyod ni Jesus ang estaka paingon sa dapit diin siya ilansang, pero wala madugay, dihay tawo nga gipugos sa Romanong mga sundalo nga mopuli niya sa pagpas-an. (Mat. 27:32) Pag-abot ni Jesus sa dapit diin siya patyon, gilansang sa mga sundalo ang iyang kamot ug tiil diha sa estaka. Tungod sa kabug-at sa lawas ni Jesus, nagisi ang samad nga inagian sa lansang. Ang iyang mga higala naguol pag-ayo ug ang iyang inahan naghilak, pero ang kadagkoan sa mga Hudiyo nagbugalbugal kaniya. (Luc. 23:32-38; Juan 19:25) Si Jesus nag-antos sulod sa pipila ka oras. Naapektohan pag-ayo ang iyang kasingkasing ug baga, maong nag-anam ka lisod ang iyang pagginhawa. Nahibalo si Jesus nga nagmatinumanon siya, ug sa hapit na siyang mabugtoi sa gininhawa, nag-ampo siya kang Jehova sa kataposang higayon. Dayon, siya miduko ug namatay. (Mar. 15:37; Luc. 23:46; Juan 10:18; 19:30) Dugay gyod siyang nag-antos, ug ang iyang kamatayon sakit kaayo ug makauulaw! w21.04 16 ¶4

Gisultihan ni Jesus ang iyang 11 ka matinumanong apostoles bahin sa duha ka pakigsaad, o kasabotan​—ang bag-ong pakigsaad ug ang pakigsaad sa Gingharian. (Luc. 22:20, 28-30) Kini nga mga pakigsaad nagpaposible nga ang maong mga apostoles ug ang limitadong gidaghanon sa uban pa mahimong mga hari ug saserdote sa langit. (Pin. 5:10; 14:1) Ang nahibiling mga dinihogan, kinsa apil niining duha ka pakigsaad, mao ray makig-ambit sa tinapay ug bino panahon sa Memoryal. Si Jehova naghatag nilag talagsaong paglaom​—sila makabaton ug imortal ug dili madunot nga kinabuhi didto sa langit, magmando kauban sa nahimayang si Jesu-Kristo ug sa ubang membro sa 144,000 ug, labaw sa tanan, mag-alagad diha sa presensiya mismo ni Jehova nga Diyos! (1 Cor. 15:51-53; 1 Juan 3:2) Ang mga dinihogan nahibalo nga kinahanglan silang magmatinumanon hangtod sa kamatayon.​—2 Tim. 4:7, 8. w22.01 21 ¶4-5

Duha ka kriminal ang gilansang tupad kang Jesus. (Luc. 23:40, 41) Usa kanila ang miingon kang Jesus: “Hinumdomi ko inig-abot nimo sa imong Gingharian.” (Luc. 23:42) Kay nahibalo si Jesus nga ang iyang Amahan maluluy-on, gisulti niya ang mga pulong nga naghatag ug paglaom sa himalatyon nga kriminal. (Sal. 103:8; Heb. 1:3) Si Jehova gustong mopasaylo ug magpakitag kaluoy kanato. Pero iya lang nang himoon kon tinuod tang maghinulsol sa daotang mga butang nga atong nahimo ug magpakita tag pagtuo nga mapasaylo ang atong mga sala pinaagi sa halad lukat ni Jesu-Kristo. (1 Juan 1:7) Ang pipila malisdan tingali pagtuo nga mapasaylo sila ni Jehova. Kon mobati ka usahay ug ingon niana, hunahunaa kini: Sa hapit nang mamatay si Jesus, gipakitaan niyag kaluoy ang gihukmang kriminal nga bag-o pa lang nagpakitag pagtuo kaniya. Labaw nang pakitaan ni Jehova ug kaluoy ang iyang matinumanong mga magsisimba!—Sal. 51:1; 1 Juan 2:1, 2. w21.04 9 ¶5-6

Pinaagi sa pagpabiling matinumanon hangtod sa kamatayon, daghag nalampos si Jesus. Una, gipamatud-an niya nga bakakon si Satanas. Gipakita ni Jesus nga ang usa ka hingpit nga tawo makapabiling matinumanon bisag unsa pay buhaton ni Satanas kaniya. Ikaduha, gihatag ni Jesus ang iyang kinabuhi ingong lukat. Kay gihalad niya ang iyang kinabuhi, nahimong posible para sa dili hingpit nga mga tawo nga makabaton ug maayong baroganan atubangan sa Diyos ug makabatog paglaom nga mabuhi sa walay kataposan. Ikatulo, gipamatud-an ni Jesus nga si Jehova maoy matarong nga magmamando ug iyang gihinloan sa tanang pasipala ang ngalan sa iyang Amahan. Hinaot magkinabuhi ta kada adlaw nga samag mao ni ang atong kataposang higayon sa pagpabiling matinumanon! Dayon, kon ugaling mag-atubang tag kamatayon, makaingon ta, “Jehova, nahimo na nako ang akong kinamaayohan sa paghupot sa akong integridad, sa pagpamatuod nga bakakon si Satanas, ug sa pagbindikar sa imong ngalan ug pagkasoberano!” w21.04 12 ¶13-14

Human siya akusahi ug hukming sad-an sa krimen nga wala niya buhata, si Jesus gibugalbugalan, gisakit pag-ayo, ug dayon gilansang sa estaka. Ang mga lansang milapos sa iyang kamot ug tiil. Matag higayon nga moginhawa siya, matag higayon nga mosulti siya, mobati siyag grabeng kasakit. Pero kinahanglan siyang mosulti—naa pay importanteng mga butang nga kinahanglan niyang isulti. Pagkanindot nga mga leksiyon ang atong nakat-onan sa kataposang mga pulong ni Jesus! Gipahinumdoman ta nga kinahanglan tang magpasaylo sa uban ug mosalig nga pasayloon ta ni Jehova. Pribilehiyo nato nga duna tay mapinanggaong espirituwal nga pamilya nga andam motabang nato. Pero kon magkinahanglan tag tabang, angay nato silang sultihan. Nahibalo ta nga tabangan ta ni Jehova nga makalahutay sa bisan unsang pagsulay nga atong maatubang. Ug nasabtan nato ang kaimportante sa pagkinabuhi kada adlaw nga samag mao ni ang atong kataposang higayon sa pagpamatuod sa atong pagkamatinumanon, nga masaligon nga banhawon ta ni Jehova kon ugaling mamatay ta. w21.04 8 ¶1; 13 ¶17

Ang pagsunod sa mga tunob ni Jesus moresultag kinabuhing walay kataposan. Sa dihang ang usa ka dato nga batan-ong lalaki nangutana kang Jesus kon unsay kinahanglan niyang buhaton aron makabatog kinabuhing walay kataposan, si Jesus mitubag: “Kuyog nako ug mahimong akong sumusunod.” (Mat. 19:16-21) Ngadto sa pipila ka Hudiyo nga wala motuo nga siya ang Kristo, si Jesus miingon: “Ang akong mga karnero . . . mosunod kanako. Hatagan nako silag kinabuhing walay kataposan.” (Juan 10:24-29) Kita nagpakitag pagtuo kang Jesus pinaagi sa pagpadapat sa iyang gitudlo ug pagsundog sa iyang ehemplo. Kon ato nang himoon, makabaton tag kinabuhing walay kataposan. (Mat. 7:14) Aron makasunod ta pag-ayo sa mga tunob ni Jesus, kinahanglan una tang makaila kaniya. Ang ‘pagkaila’ kang Jesus maoy padayong proseso. Kinahanglang padayon tang mokat-on bahin kaniya​—sa iyang mga hiyas, panghunahuna, ug mga sukdanan. Bisag unsa na ta ka dugay sa kamatuoran, kinahanglang padayon tang maningkamot nga mailhan si Jehova ug ang iyang Anak. w21.04 4 ¶9-10

Tingali dihay mga panahon nga gihasol si apostol Pablo sa iyang konsensiya tungod sa iyang mga gihimo kaniadto. Dili ikatingala nga giisip niya ang iyang kaugalingon nga “kinalabwan” sa tanang makasasala. (1 Tim. 1:15) Sa wala pa makakat-on si Pablo sa kamatuoran, iyang gilutos pag-ayo ang mga Kristohanon sa lainlaing siyudad, nga nagpabilanggo sa pipila ka Kristohanon ug miuyon nga patyon ang uban. (Buh. 26:10, 11) Maimadyin ba nimo ang gibati ni Pablo kon ugaling duna siyay nakaila nga batan-ong Kristohanon kansang ginikanan gipatay ubos sa iyang pagtugot? Nagbasol pag-ayo si Pablo sa iyang nangaging kasaypanan, pero nahibalo siya nga wala na siyay mahimo sa nahitabo. Gidawat niya nga ang Kristo namatay para niya, ug uban ang bug-os nga pagsalig, siya misulat: “Pinaagi sa dili hitupngang pagkamaayo sa Diyos nahimo kong apostol.” (1 Cor. 15:3, 10) Unsay atong makat-onan? Dawata nga ang Kristo namatay para nimo ug gipaposible niya nga makabaton kag suod nga relasyon kang Jehova. (Buh. 3:19) Ang importante sa Diyos mao ang atong ginahimo karon ug ang atong himoon sa umaabot, dili ang mga sayop nga atong nahimo kaniadto.​—Isa. 1:18. w21.04 23 ¶11

Bisan pag daghang Hudiyo sa adlaw ni Jesus ang wala magdahom nga kinahanglang mamatay ang Mesiyas, matikdi kon unsay gitagna sa Kasulatan: “Gihatag niya ang iyang kinabuhi bisan hangtod sa kamatayon ug giisip siya nga usa sa mga malapason; gipas-an niya ang sala sa daghang tawo, ug nagpataliwala siya alang sa mga malapason.” (Isa. 53:12) Busa ang mga Hudiyo walay rason nga mapandol dihang si Jesus gipatay nga samag makasasala. Karon, kinahanglang sayron nato kon unsay tinuod aron dili mawala ang atong pagtuo. Sa iyang Wali sa Bukid, gipasidan-an ni Jesus ang iyang mga mamiminaw nga sila “butangbutangan sa tanang matang sa buhat nga daotan.” (Mat. 5:11) Kini nga mga bakak naggikan kang Satanas. Giimpluwensiyahan niya ang mga magsusupak sa pagpakaylap ug makadaot nga mga estorya bahin niadtong nahigugma sa kamatuoran. (Pin. 12:9, 10) Kinahanglan natong isalikway ang mga bakak nga gipakaylap sa atong mga kaaway. Dili gyod nato tugotan ang maong mga bakak nga makapahadlok kanato o makapahuyang sa atong pagtuo. w21.05 11 ¶14; 12 ¶16

Tabangi ang imong Bible study nga mosalig kang Jehova. Gipasaligan ni Jesus ang iyang mga tinun-an nga tabangan sila ni Jehova kay gimahal Niya sila. (Mat. 10:19, 20, 29, 30) Pahinumdomi ang imong study nga tabangan sab siya ni Jehova. Matabangan nimo siya nga mosalig kang Jehova pinaagi sa paghisgot sa iyang mga tumong dihang mag-ampo ka uban niya. “Dihang mag-ampo ang nag-study nako, pirme niyang iapil ang akong mga tumong,” miingon si Franciszek, nga taga-Poland. “Sa dihang nakita nako nga gitubag ni Jehova ang pag-ampo sa nag-study nako, misugod dayon ko sa pag-ampo. Gibati nako nga gitabangan gyod ko ni Jehova dihang kinahanglan kong mananghid nga mo-day off sa akong bag-ong trabaho aron motambong sa mga tigom ug kombensiyon.” Gimahal kaayo ni Jehova ang atong mga Bible study. Nahibalo siya nga naningkamot pag-ayo ang Kristohanong mga magtutudlo sa pagtabang sa mga tawo nga masuod kaniya, ug gimahal niya sila tungod niana. (Isa. 52:7) Kon wala kay gidumalahag pagtuon sa Bibliya karon, makatabang gihapon ka sa mga Bible study nga mouswag ug magpabawtismo pinaagi sa pagkuyog sa ubang magmamantala sa ilang mga study. w21.06 7 ¶17-18

Ikapakita nato nga atong giapresyar ang pribilehiyo nga nabatonan nato ang Pulong sa Diyos pinaagi sa regular nga pagbasa niini. Kinahanglan tang mag-eskedyul ug panahon sa pagtuon sa Bibliya, dili kay mobasa lang niini kon makalugar. Kon sundon nato ang atong eskedyul sa pagtuon, padayon natong mapalig-on ang atong pagtuo. Dili sama sa “mga maalamon ug makinaadmanon” niining kalibotana, duna tay lig-ong pagtuo nga gibase sa Pulong sa Diyos. (Mat. 11:25, 26) Tungod sa atong pagtuon nianang sagrado nga basahon, nahibaloan nato kon nganong nagkagrabe ang kahimtang sa yuta ug kon unsay buhaton ni Jehova niini. Busa magmadeterminado ta nga palig-onon ang atong pagtuo ug tabangan ang mas daghang tawo kutob sa mahimo nga motuo sa atong Maglalalang. (1 Tim. 2:3, 4) Ug padayon natong paaboton ang panahon dihang ang tanang buhi dinhi sa yuta mosulti sa mga pulong sa Pinadayag 4:11: “Takos ka, Jehova nga among Diyos, nga modawat sa himaya . . . kay gilalang nimo ang tanang butang.” w21.08 19 ¶18-20

Ingong mga magbalantay, ang mga ansiyano naay responsibilidad nga motambag kon gikinahanglan. Angay silang maningkamot nga mohatag ug tambag nga praktikal, makapadasig, ug “makapalipay sa kasingkasing.” (Prov. 27:9) Gihigugma sa mga ansiyano ang mga igsoon. Usahay, ipakita nila ang ilang gugma pinaagi sa pagtambag niadtong nameligro ang espirituwalidad. (Gal. 6:1) Pero sa dili pa motambag ang ansiyano, iyang pamalandongon ang pipila ka butang nga gihisgotan ni apostol Pablo bahin sa gugma. “Ang gugma taas ug pailob ug maayo. . . . Kini moantos sa tanang butang, motuo sa tanang butang, molaom sa tanang butang, molahutay sa tanang butang.” (1 Cor. 13:4, 7) Pinaagi sa pagpamalandong niini nga mga teksto, maseguro sa ansiyano nga husto ang iyang motibo ug ang iyang paagi sa pagtambag. Kon ang gitambagan mobati nga gihigugma siya sa ansiyano, mas dakog posibilidad nga iyang dawaton ang tambag. w22.02 14 ¶3; 15 ¶5

Gilalang ni Jehova ang iyang espirituhanon ug tawhanong mga anak nga hingpit ug walay bisan unsang depekto. Pero ang rebeldeng anghel nga si Satanas (nagkahulogang “Magsusupak”) misupak kang Jehova ug gikombinsir niya ang hingpit nga mga tawo, si Adan ug Eva, nga morebelde sab. Ang ubang anghel ug mga tawo mirebelde pod. (Jud. 6) Gibati ni Jehova nga giluiban siya. Pero milahutay siya, ug padayon siyang molahutay hangtod moabot ang panahon nga laglagon niya ang tanang mirebelde kaniya. Kana maghatag ug kahupayan sa iyang maunongong katawhan, kinsa nagmalahutayon uban niya niining daotang sistema sa mga butang! Giakusahan ni Satanas si Job ug ang tanang matinumanong alagad ni Jehova nga sila nagsimba lang sa Diyos tungod sa hakog nga mga rason. (Job 1:8-11; 2:3-5) Ang Yawa padayong nag-akusar sa mga tawo hangtod karon. (Pin. 12:10) Makatabang ta sa pagpamatuod nga bakakon si Satanas kon molahutay ta sa atong mga kalisdanan ug magmaunongon kang Jehova tungod sa atong gugma Kaniya. w21.07 9 ¶7-8

Si apostol Pablo migamit ug ilustrasyon aron tudloan ta nga importante kaayo ang paghimog kausaban. Misulat siya nga kinahanglan natong ilansang “sa estaka” ang daang personalidad. (Roma 6:6) Sa ato pa, gusto natong sundon ang ehemplo sa Kristo. Kinahanglan natong patyon ang mga kinaiya ug binuhatan nga gidumtan ni Jehova. Pinaagi lang sa paghimo niana nga makabaton tag hinlong konsensiya ug paglaom nga mabuhi sa walay kataposan. (Juan 17:3; 1 Ped. 3:21) Dili bag-ohon ni Jehova ang iyang mga sukdanan aron lang malipay ta. Kita ang kinahanglang magbag-o ug mosunod sa iyang mga sukdanan. (Isa. 1:17, 18; 55:9) Bisan dihang bawtismado na ka, kinahanglang padayon nimong suklan ang sayop nga mga tinguha. Pag-ampo nga tabangan ka ni Jehova, ug salig sa iyang balaang espiritu, dili sa imong kaugalingong kusog. (Gal. 5:22; Filip. 4:6) Kinahanglan tang maningkamot nga mahukas ang daang personalidad ug dili na ni mabalik ug sul-ob. w22.03 6 ¶15-17

Si Jehova nagsaad nga iyang itagana ang atong pagkaon, sinina, ug puy-anan kon atong unahon ang iyang Gingharian ug sundon ang iyang matarong nga mga sukdanan. (Mat. 6:33) Kon mosalig ta niana nga saad, dili ta maghunahuna nga ang materyal nga mga butang niining kalibotana makahatag natog kasegurohan ug kalipay hangtod sa hangtod. Nahibalo ta nga makabaton lang tag tinuod nga kalinaw sa hunahuna kon buhaton nato ang kabubut-on ni Jehova. (Filip. 4:6, 7) Bisag makapalit tag daghang butang, angay natong konsiderahon kon duna ba gyod tay panahon o kusog sa paggamit ug pag-atiman niana. Posible kaha nga ang materyal nga mga butang mahimo nang pinakaimportante sa atong kinabuhi? Hinumdomi nga gihatagan ta sa Diyos ug buluhaton ingong membro sa iyang pamilya. Nagpasabot nâ nga dili nato tugotan nga malinga ta. Dili nato gustong maparehas sa tawo nga nawad-ag kahigayonan nga makaalagad kang Jehova ug mahimong usa sa iyang sinagop nga mga anak​—tungod lang kay mas importante kaniya ang pipila ka materyal nga kabtangan!​—Mar. 10:17-22. w21.08 6 ¶17

Samtang magtuon ka sa Kasulatan, makita nimo ang personalidad ug mga hiyas ni Jehova—ang samang mga hiyas nga imong nakita dihang nagtuon ka sa kalalangan. Kini nga mga hiyas klarong nagpakita nga si Jehova tinuod nga Persona ug dili kay imahinasyon lang. (Ex. 34:6, 7; Sal. 145:8, 9) Samtang mas mailhan nimo si Jehova, molig-on ang imong pagtuo kaniya, molawom ang imong gugma kaniya, ug mas masuod ka kaniya. Isulti sa uban ang imong pagtuo sa Diyos. Pero komosta kon ang imong gisangyawan mangutana nimo kon duna ba gyoy Diyos ug wala ka kabalo kon unsaon pagtubag? Pangitag binase sa Bibliya nga tubag niana nga pangutana diha sa usa sa atong mga publikasyon, ug dayon hisgoti ni uban kaniya. Makapangayo pod kag tabang sa usa ka eksperyensiyadong igsoon. Modawat man ang tawo o dili sa tubag sa Bibliya, makabenepisyo ka sa imong pag-research. Mas molig-on ang imong pagtuo. w21.08 18 ¶14-15

Dili nato kinahanglang biyaan ang tanang butang nga atong gikalipayan aron mapahimut-an si Jehova. (Eccl. 5:19, 20) Apan, kon magduhaduha ta sa paghimog dugang pa sa pag-alagad sa Diyos aron lang makalikay sa mga sakripisyo, basin mahimo nato ang sayop sa tawo diha sa ilustrasyon ni Jesus kinsa naghago aron makabaton ug daghang butang pero wala magpakabana sa Diyos. (Luc. 12:16-21) Dihang makaatubang tag mga problema, mag-ampo ta alang sa tabang ug maghunahuna pag-ayo kon unsay maayong buhaton niana. (Prov. 3:21) Si Jehova nagpanalangin kanato sa daghang paagi. Ikapakita nato nga mapasalamaton kaayo ta sa maong mga panalangin pinaagi sa paghimo sa tanan natong maarangan sa pagdayeg kaniya. (Heb. 13:15) Mahimong mag-apil kana sa pagpalapad sa atong ministeryo, ug tungod niana, posibleng makadawat tag dugang mga panalangin. Kada adlaw, mangita tag mga paagi nga ‘matilawan ug [makita] nga si Jehova maayo.’ (Sal. 34:8) Kon buhaton nato kana, mahisama ta kang Jesus, kinsa miingon: “Ang akong pagkaon mao ang pagbuhat sa kabubut-on sa usa nga nagpadala kanako ug ang paghuman sa iyang buluhaton.”​—Juan 4:34. w21.08 30-31 ¶16-19

Gusto ni Satanas nga mahimo tang garboso. Nahibalo siya nga kon mahimo tang garboso, mahisama ta niya, ug dili nato maangkon ang kinabuhing walay kataposan. Busa, si apostol Pablo nagpasidaan nga ang usa posible nga mahimong “mapasigarbohon ug makadawat sab sa paghukom nga nadawat sa Yawa.” (1 Tim. 3:6, 7) Puwede nang mahitabo kang bisan kinsa kanato, bag-o man ta sa kamatuoran o dugay nang nag-alagad kang Jehova. Ang tawong garboso hakog. Naningkamot si Satanas nga mahimo tang hakog pinaagi sa pag-impluwensiya kanato aron magpokus ta sa atong kaugalingon imbes kang Jehova, ilabina sa dihang mag-atubang tag mga problema. Pananglitan, ikaw ba sayop nga giakusahan? O gitratar ka ba nga dili patas? Gusto ni Satanas nga basolon nimo si Jehova o ang mga igsoon. Ug gusto sa Yawa nga maghunahuna ka nga ang bugtong solusyon sa problema mao ang paghimo sa mga butang sa imong paagi imbes sundon ang giya ni Jehova diha sa iyang Pulong.​—Eccl. 7:16, 20. w21.06 15 ¶4-5

Si propetang Haggeo nakadawat ug importanteng sugo gikan kang Jehova. Si Haggeo posibleng apil sa mga binihag sa Babilonya nga namalik sa Jerusalem niadtong 537 B.C.E. Wala madugay human sa pag-abot nianang matinumanong mga magsisimba sa Jerusalem, gipahimutang nila ang pundasyon sa balay, o templo, ni Jehova. (Esd. 3:8, 10) Pero wala madugay, dihay nahitabo nga dili maayo. Nadismayar sila ug mihunong sa pagtukod tungod sa pagsupak. (Esd. 4:4; Hag. 1:1, 2) Busa pagka-520 B.C.E., gisugo ni Jehova si Haggeo sa pagdasig kanila nga humanon ang pagtukod pag-usab sa templo. (Esd. 6:14, 15) Ang katuyoan sa mensahe ni Haggeo mao ang pagpalig-on sa pagtuo sa mga Hudiyo kang Jehova. Ang ekspresyong “Jehova sa mga panon” seguradong nakadasig nila. Si Jehova dunay awtoridad ibabaw sa dako kaayong panon sa mga anghel, busa ang mga Hudiyo kinahanglang mosalig niya aron molampos. w21.09 15 ¶4-5

Karon, ang mga Saksi ni Jehova sa tibuok kalibotan nakatagamtam ug tinuod nga gugma ug panaghiusa. Lahi ta sa ubang mga organisasyon kay suod kaayo ang atong panag-igsoonay bisan pag lainlain tag nasod ug kultura. Makita nato ang ebidensiya sa tinuod nga gugma diha sa atong mga tigom, asembliya, ug kombensiyon. Ang maong ebidensiya nakatabang nato nga mas makombinsir nga ang atong paagi sa pagsimba mao ang giuyonan ni Jehova. (Juan 13:34) Ang Bibliya nag-awhag kanato nga ‘batonan ang init nga gugma sa usag usa.’ (1 Ped. 4:8) Ang usa ka paagi nga ikapakita nato ang maong gugma mao ang pagpasaylo ug pagpailob sa kasaypanan sa usag usa. Mangita sab tag mga kahigayonan nga mahimong mahinatagon ug maabiabihon sa tanan diha sa kongregasyon, bisan niadtong nakapahiubos tingali kanato. (Col. 3:12-14) Dihang ipakita nato ang maong gugma, atong gipamatud-an nga kita tinuod nga mga Kristohanon. w21.10 22 ¶13-14

Ang pagpalagpot ba makatabang sa dili mahinulsolong makasasala nga magbag-o ug maghinulsol? Posible. Daghan niadtong nakahimog seryosong sala ang miingon nga ang pagpalagpot nakatabang nila nga makaamgo, magbag-o, maghinulsol, ug mobalik sa mapinanggaong mga bukton ni Jehova. (Heb. 12:5, 6) Tagda ni nga ilustrasyon. Ang magbalantay nakamatikod nga ang usa sa iyang mga karnero nasakit. Nahibalo siya nga aron maayo ang karnero niining sakita, kinahanglan kining ibulag sa panon. Pero ang mga karnero ganahang makig-uban sa panon, ug dili tingali sila mahimutang kon mabulag sila. Apan nagpasabot ba nâ nga ang magbalantay pintas o way kaluoy kay iyang gilain ang karnero? Wala. Nahibalo siya nga kon iyang tugotan ang masakitong karnero nga makig-uban sa panon, matakdan ang uban. Pinaagi sa paglain sa masakitong karnero, iyang giprotektahan ang tibuok panon. w21.10 10 ¶9-10

Dako gyong pribilehiyo nga mahimong bahin sa usa ka mahigugmaong internasyonal nga pamilya. Gusto nato nga mas daghan pa ang moduyog kanato sa pagsimba sa atong Diyos. Busa, angay tang mag-amping nga dili gyod mohimog bisan unsa nga makadaot sa reputasyon sa katawhan ni Jehova o sa atong langitnong Amahan. Maningkamot ta nga mogawi sa paagi nga madani ang mga tawo sa maayong balita. Usahay, ang pipila tingali magbiaybiay o maglutos pa gani nato tungod kay atong gisunod ang atong langitnong Amahan. Unsay atong mahimo kon mahadlok tang makig-estorya sa uban bahin sa atong pagtuo? Makasalig ta sa tabang ni Jehova ug sa iyang Anak. Gipasaligan ni Jesus ang iyang mga tinun-an nga dili sila angayng mabalaka kon unsay isulti o kon unsaon pagsulti. Ngano? “Makadawat mog tabang nianang higayona,” miingon si Jesus, “kay dili lang kamo ang mosulti kondili ang espiritu sa inyong Amahan maoy mosulti pinaagi kaninyo.”​—Mat. 10:19, 20. w21.09 24 ¶17-18

Susama niana ang paghulagway ni Moises kang Jehova. (Sal. 90:1, footnote) Dugang pa, sa hapit na siyang mamatay, si Moises naghisgot ug laing makapatandog nga detalye. Siya miingon: “Ang Diyos maoy dangpanan sukad pa sa karaang panahon, ang iyang mga bukton nga magpabilin hangtod sa hangtod magsapnay kanimo.” (Deut. 33:27) Unsay atong makat-onan bahin kang Jehova sa mga pulong nga “ang iyang mga bukton nga magpabilin hangtod sa hangtod magsapnay kanimo”? Kon si Jehova ang atong Dangpanan, mobati tang luwas. Pero usahay, maluya tingali ta ug malisdan sa pagsukol niini nga pagbati. Nianang mga panahona, unsaon ta pagtabang ni Jehova? (Sal. 136:23) Siya magsapnay kanato, hinayhinayng magbangon kanato, ug motabang kanato nga makabarog pag-usab. (Sal. 28:9; 94:18) Ang pagkahibalo nga dili gyod ta pasagdan sa Diyos makatabang nato sa paghinumdom niining duha ka panalangin: Una, duna tay luwas nga dapit nga kadangpan bisag asa pa ta nagpuyo. Ikaduha, ang atong mahigugmaong langitnong Amahan nagmahal gyod kanato. w21.11 6 ¶15-16

Si Jesus nahibalo nga ang inhustisya magsulay sa pagtuo sa iyang mga tinun-an. Aron tabangan sila sa pag-atubang niana, naghatag siyag ilustrasyon nga narekord sa basahon sa Lucas. Si Jesus nag-estorya bahin sa usa ka babayeng balo nga nagsigeg hangyo sa usa ka dili matarong nga maghuhukom nga hatagan siyag hustisya. Masaligon siya nga magbunga ra ang iyang pagsigeg hangyo. Ngadtongadto, gihatagan ra gyod siya sa maghuhukom ug hustisya. Unsay atong makat-onan? Si Jehova maoy Diyos sa hustisya. Busa si Jesus miingon: “Labaw nang hatagan sa Diyos ug hustisya ang iyang mga pinili nga nagatuaw kaniya adlaw ug gabii.” (Luc. 18:1-8) Dayon, siya midugang: “Inig-abot sa Anak sa tawo, makaplagan ba gayod niya kini nga pagtuo sa yuta?” Dihang mag-antos tag inhustisya, kinahanglan natong pamatud-an pinaagi sa atong pagpailob ug paglahutay nga lig-on ang atong pagtuo sama nianang sa babayeng balo. Kon duna ta niana nga pagtuo, makasalig ta nga sa madugay o sa madali, tabangan ta ni Jehova. Kinahanglan sab tang mosalig sa gahom sa pag-ampo. w21.11 23 ¶12; 24 ¶14

Mga batan-on, mobati ba mo usahay nga estrikto ra kaayo ang mga prinsipyo ni Jehova? Kanay gusto ni Satanas nga inyong hunahunaon. Gusto niya nga magpokus mo sa ginahimo niadtong nagsubay sa luag nga dalan kay morag malipayon kaayo sila. Gusto niya nga maghunahuna mo nga laay ang inyong kinabuhi kon itandi nianang sa inyong mga klasmet o sa mga tawo nga inyong makita sa Internet. Patuohon mo ni Satanas nga ang mga prinsipyo ni Jehova nakapugong ninyo nga ma-enjoy pag-ayo ang kinabuhi. Pero hinumdomi ninyo kini: Dili gusto ni Satanas nga makita niadtong nagsubay sa iyang dalan kon asa paingon kanang dalana. (Mat. 7:13, 14) Sa laing bahin, klarong gipakita ni Jehova kaninyo kon unsay nagpaabot niadtong magpabilin sa dalan sa kinabuhi.​—Sal. 37:29; Isa. 35:5, 6; 65:21-23. w21.12 23 ¶6-7

Nahibalo ta nga angay tang magpasaylo; mao nay hustong buhaton. Pero maglisod gihapon tingali ta sa paghimo niana. Posible nga si apostol Pedro mibati usahay ug sama niana. (Mat. 18:21, 22) Unsay makatabang? Una, palandonga kon unsa ka dako ang pagpasaylo ni Jehova kanimo. (Mat. 18:32, 33) Dili ta niya takos pasayloon, pero andam siyang mohimo niana. (Sal. 103:8-10) Sa samang higayon, “obligado [sab] ta nga higugmaon ang usag usa.” Busa, ang pagpasaylo dili opsiyonal. Obligasyon nato nga pasayloon ang atong mga igsoon. (1 Juan 4:11) Ikaduha, palandonga kon unsay mahitabo dihang magpasaylo ta. Mahimong matabangan nato ang tawo nga nakasala kanato, mahiusa ang kongregasyon, mapanalipdan ang atong relasyon kang Jehova, ug mahupayan ta. (2 Cor. 2:7; Col. 3:14) Ug ikatulo, pag-ampo ngadto sa Usa nga nag-awhag nato sa pagpasaylo. Ayawg tugoti nga bungkagon ni Satanas ang imong maayong relasyon sa mga igsoon. (Efe. 4:26, 27) Gikinahanglan nato ang tabang ni Jehova aron dili ta mabitik ni Satanas. w21.06 22 ¶11; 23 ¶14

Si David nagtagotago kay gusto siyang patyon ni Saul, ang gamhanang hari sa Israel. Dihang si David nagkinahanglag pagkaon, mihapit siya sa siyudad sa Nob, diin nangayo siyag lima lang ka tinapay. (1 Sam. 21:1, 3) Sa ulahi, siya ug ang iyang mga sundalo nanago sa usa ka langob. (1 Sam. 22:1) Nganong nahitabo man ni kang David? Si Saul nasina pag-ayo kang David kay daghan ang ganahan kang David ug daghang gubat ang iyang nadaog. Nahibalo sab si Saul nga gisalikway siya ni Jehova ingong hari sa Israel tungod sa iyang pagkamasinupakon ug nga gipili ni Jehova si David nga mopuli niya. (1 Sam. 23:16, 17) Kay si Saul pa ang hari sa Israel, duna siyay daghang kasundalohan ug mga tigsuportar, busa kinahanglang moikyas si David. Naghunahuna kaha si Saul nga mapugngan niya ang Diyos sa paghimo kang David nga hari? (Isa. 55:11) Walay giingon ang Bibliya, pero makaseguro ta niini: Gipameligro ni Saul ang iyang kaugalingon. Kadtong makig-away sa Diyos mapildi gyod! w22.01 2 ¶1-2

Si Jesus nagkugi sa ministeryo. Gipakita niya ang iyang gugma sa katawhan pinaagi sa kanunayng pagtudlo kanila. (Luc. 19:47, 48) Unsay nagpalihok niya sa paghimo niana? Si Jesus naluoy kanila. Dihay mga higayon nga daghan kaayo ang gustong maminaw kang Jesus nga siya ug ang iyang mga tinun-an “wala na makakaon.” (Mar. 3:20) Ug dihang may gustong makig-estorya kang Jesus panahon sa kagabhion, andam siyang makigkita niini. Kadaghanan niadtong naminaw kang Jesus wala mahimong iyang mga tinun-an. Pero ang tanan nga nakadungog kaniya nahatagag bug-os nga pamatuod. Karon, gusto natong hatagan ang tanan ug kahigayonan nga makadungog sa maayong balita. (Buh. 10:42) Aron mahimo kana, kinahanglan tingali tang mohimog kausaban sa atong paagi sa pagsangyaw. Imbes mosangyaw lang sa panahon nga kombenyente nato, kinahanglang mosangyaw ta sa panahon nga posibleng daghan tag maestorya. Kon ato nang himoon, makaseguro ta nga malipay si Jehova. w22.01 17 ¶13-14

Karon, daghan ang wala kaayoy pagsalig sa mga tawo nga naay awtoridad. Nakita nila nga ang mga gobyerno ug mga balaod sagad mopabor sa mga dato ug impluwensiyado, ug dili mohatag ug hustisya sa mga pobre. Naa poy mga lider sa relihiyon nga dili maayog binuhatan. Tungod niini, ang ubang tawo nawad-ag pagsalig sa Diyos. Busa kon naay magpa-Bible study nato, kinahanglan nato siyang tabangan nga mosalig kang Jehova ug sa mga representante Niya dinhi sa yuta. Siyempre, dili lang ang mga Bible study ang kinahanglang makakat-on sa pagsalig kang Jehova ug sa iyang organisasyon. Bisan kita nga dugay na sa kamatuoran kinahanglang padayong mosalig nga ang pamaagi ni Jehova mao gyod ang pinakamaayo. Usahay, naay mga situwasyon nga posibleng magsulay sa atong pagsalig kang Jehova. w22.02 2 ¶1-2