Mayo

Aron tabangan ta nga mailhan ang iyang Anak, mahigugmaong gipasulat ni Jehova diha sa iyang Pulong ang upat ka Ebanghelyo, nga naghisgot sa kinabuhi ug ministeryo ni Jesus. Mabasa diha sa Ebanghelyo kon unsay gisulti, gihimo, ug gibati ni Jesus. Ang maong upat ka basahon makatabang nato sa ‘pagtagad pag-ayo’ sa ehemplo ni Jesus. Naa dinha ang mga tunob nga gibilin ni Jesus. Busa pinaagi sa pagtuon sa Ebanghelyo, mas mailhan pa gyod nato si Jesus. Pinaagi niana, masunod nato pag-ayo ang iyang mga tunob. Aron makabenepisyo ta pag-ayo sa Ebanghelyo, dili igo ang pagbasa lang niini. Kinahanglan nga maggahin tag panahon sa pagtuon ug pagpamalandong pag-ayo niini. (Itandi ang Josue 1:8.) Himoang buhi ang mga asoy sa Ebanghelyo. Gamita ang imong imahinasyon aron makita, madungog, ug bation nimo ang nagakahitabo. Pag-research diha sa mga publikasyon nga gitagana sa organisasyon ni Jehova. w21.04 4-5 ¶11-13

Gatosan ka tuig una pa mianhi si Jesus sa yuta, gipadayag ni Jehova sa iyang Pulong nga ang Mesiyas budhian baylo sa 30 ka pirasong plata. (Zac. 11:12, 13) Ang magbudhi kang Jesus maoy usa sa iyang suod nga mga higala. (Sal. 41:9) Si propetang Zacarias misulat sab: “Patya ang magbalantay, ug patibulaaga ang panon.” (Zac. 13:7) Imbes mapandol niini nga mga panghitabo, ang sinserong mga tawo mapalig-on sa pagkakita nga kini nga mga tagna natuman kang Jesus. Ingon ana ba sab ang kahimtang karon? Oo. Sa atong panahon, ang pipila ka iladong mga Saksi mibiya sa kamatuoran, nahimong apostata, ug dayon misulay sa pagpahisalaag sa uban. Nagpakaylap silag dili maayong mga report, malimbongong mga estorya, ug mga bakak bahin sa mga Saksi ni Jehova diha sa balita ug sa Internet. Pero ang sinserong mga tawo wala malimbongi. Nahibalo sila nga ang Bibliya nagtagna nga mahitabo ang maong mga butang.​—Mat. 24:24; 2 Ped. 2:18-22. w21.05 11 ¶12; 12-13 ¶18-19

Ang Bibliya klarong nag-ingon nga mas masabtan sa katawhan sa Diyos ang kamatuoran paglabay sa panahon. (Col. 1:9, 10) Si Jehova anam-anam nga nagpadayag sa kamatuoran, ug kinahanglang mapailobon tang maghulat hangtod nga mas mohayag ang atong pagsabot sa kamatuoran. Sa dihang maamgohan sa mga nagapanguna nga ang atong pagsabot sa usa ka punto sa kamatuoran kinahanglang klarohon, dili sila magduhaduha sa paghimo sa gikinahanglang mga kausaban. Daghang relihiyon sa Kakristiyanohan ang naghimog mga kausaban aron mapalipay ang ilang mga membro o aron mahimong popular sa kalibotan, pero ang mga Saksi ni Jehova naghimog mga kausaban aron mas masuod sa Diyos ug mas masunod ang sumbanan sa pagsimba nga gitudlo ni Jesus. (Sant. 4:4) Naghimo tag mga kausaban, dili tungod sa kon unsay uso o gusto sa kadaghanan, kondili tungod sa mas klarong pagsabot sa Kasulatan. Gihigugma nato ang kamatuoran!​—1 Tes. 2:3, 4. w21.10 22 ¶12

Unsay imong mahimo kon mobati kang nag-inusara? Hunahunaa kon giunsa ka pagtabang ni Jehova. (Sal. 55:22) Makatabang ni nimo nga makita nga wala ka mag-inusara. Hunahunaa sab kon giunsa pagtabang ni Jehova ang mga igsoon nga mibatig kamingaw. (1 Ped. 5:9, 10) Ang brader nga si Hiroshi, kinsa mao ray Saksi sa ilang pamilya sulod na sa daghang katuigan, miingon: “Nahibalo ta nga gihimo natong tanan ang atong kinamaayohan sa pag-alagad kang Jehova, ug kana makadasig kanamong mga nag-inusarang Saksi sa pamilya.” Dugang pa, mentinaha ang maayong espirituwal nga rutina. Apil niini ang pagsulti kang Jehova kon unsa gyoy imong gibati. Importante ang regular nga pagbasa sa Pulong sa Diyos ug ang pagpamalandong sa espesipikong mga asoy nga nagpasiugda sa gugma ni Jehova kanimo. Ang pipila ka igsoon magmemoryag makapahupay kaayong mga teksto, sama sa Salmo 27:10 ug Isaias 41:10. Ang uban miingon nga ang pagpaminaw sa audio recording sa mga tun-anang materyal nakatabang nga dili kaayo sila mobating nag-inusara dihang magtuon para sa mga tigom o magbasag Bibliya. w21.06 9-10 ¶5-8

Naguol ka ba tungod sa kamatayon sa usa ka minahal? Paggahin ug panahon sa pagpalig-on sa imong pagtuo sa pagkabanhaw pinaagi sa pagbasa sa mga asoy sa Bibliya bahin niadtong gibanhaw. Naguol ka ba kay na-disfellow ang usa ka membro sa imong pamilya? Pagtuon aron makombinsir ka nga ang paagi sa Diyos sa pagpahamtang ug disiplina mao gyod ang kinamaayohan. Bisag unsang problema ang imong giatubang, gamita kana ingong kahigayonan sa pagpalig-on sa imong pagtuo. Isulti kang Jehova kon unsa gyoy imong gibati. Ayawg ilain ang imong kaugalingon. Hinunoa, magpabiling suod sa mga igsoon. (Prov. 18:1) Pakigbahin sa mga kalihokan nga makatabang nimo sa paglahutay, bisan pag himoon nimo kana uban ang mga luha. (Sal. 126:5, 6) Padayon sa pagtambong sa mga tigom, pagsangyaw, ug pagbasa sa Bibliya. Ug kanunayng hunahunaa ang nindot nga mga panalangin nga gisaad ni Jehova. Sa dihang makita nimo kon giunsa ka pagtabang ni Jehova, mas molig-on pa ang imong pagtuo kaniya. w21.11 23 ¶11; 24 ¶17

Sa unsang paagi nga ang mga tinun-an ni Jesus samag “ubos nga mga tawo”? Aw, kinsay giisip sa kalibotan nga importante? Kadtong dato, inila, ug dunay awtoridad. Sa laing bahin, ang mga tinun-an ni Jesus giisip sa kalibotan ingong dili importante o “ubos nga mga tawo.” (1 Cor. 1:26-29) Pero dili ingon niana ang panglantaw ni Jehova kanila. Nganong gihisgotan man ni Jesus kining “ubos nga mga tawo”? Ang iyang mga tinun-an bag-o lang nangutana kaniya: “Kinsa ba gayod ang kinalabwan sa Gingharian sa langit?” (Mat. 18:1) Daghang Hudiyo niadtong panahona ang naghunahuna nga ang posisyon ug ranggo importante kaayo. Ang usa ka eskolar miingon: “Ang mga tawo nabuhi ug namatay aron maangkon ang kadungganan, maayong reputasyon, kabantog, pag-uyon, ug pagtahod.” Si Jesus nahibalo nga ang mga tinun-an kinahanglang maningkamot aron wad-on sa ilang kasingkasing ang hilig nga makigkompetensiya, nga nakagamot sa kultura sa mga Hudiyo. w21.06 20 ¶2; 21 ¶6, 8, 9

Si apostol Pablo maayong panig-ingnan ingong ansiyano. Pananglitan, dihang ang mga igsoon sa Tesalonica kinahanglang tambagan, si Pablo wala magduhaduha sa pagtambag nila. Pero sa iyang mga sulat, iya unang gidayeg ang ilang mga buhat sa pagtuo, paghago tungod sa gugma, ug paglahutay. Iya pong gikonsiderar ang ilang kahimtang. Giingnan niya sila nga nahibalo siya nga dili sayon ang ilang kinabuhi ug matinumanon nilang gilahutay ang paglutos. (1 Tes. 1:3; 2 Tes. 1:4) Giingnan pa gani niya sila nga maayo silang panig-ingnan sa ubang Kristohanon. (1 Tes. 1:8, 9) Segurado nga nalipay gyod sila sa komendasyon ni Pablo! Walay duhaduha nga gimahal pag-ayo ni Pablo ang mga igsoon. Kanay rason nga epektibo ang iyang tambag sa iyang duha ka sulat sa mga taga-Tesalonica.​—1 Tes. 4:1, 3-5, 11; 2 Tes. 3:11, 12. w22.02 15 ¶6

Gigamit ni Satanas ang mga lider sa bakak nga relihiyon sa pag-ingon nga si Jehova pintas ug maoy hinungdan sa pag-antos sa tawo. Ang pipila moingon pa gani nga dihang ang mga bata mamatay, gikuha sila sa Diyos kay nagkinahanglan siyag dugang mga anghel sa langit. Pasipala gyod nâ sa Diyos! Nahibalo ta nga si Jehova mahigugmaon nga Amahan. Kon kita may grabeng sakit o kaha mamatyag minahal, dili gyod nato basolon ang atong Diyos. Hinunoa, kita nagtuo nga moabot ang adlaw nga iyang ayohon ang mga masakiton ug banhawon ang mga patay. Puwede natong sultian ang tanang maminaw kon unsa ka mahigugmaon nga Diyos si Jehova. Kana maghatag niyag maayong tubag sa usa nga nagtamay kaniya. (Prov. 27:11) Si Jehova maluluy-on nga Diyos. Maguol kaayo siya kon makita niya nga kita nag-antos​—tingali tungod sa paglutos, sakit, o sa atong pagkadili-hingpit. (Sal. 22:23, 24) Si Jehova nakasabot sa kasakit nga atong gibati. Gusto niya kining taposon, ug taposon gyod niya kini.​—Itandi ang Exodo 3:7, 8; Isaias 63:9. w21.07 9-10 ¶9-10

Sa dili madugay, ang masinugtanong mga tawo makatagamtam sa kinalabwang pribilehiyo​—ang paghigugma ug pagsimba kang Jehova hangtod sa hangtod! Wad-on ni Jesus ang tanang problema nga resulta sa pagbiya ni Adan ug Eva sa pamilya sa Diyos. Banhawon ni Jehova ang milyonmilyong tawo ug hatagan silag kahigayonan nga mabuhi sa walay kataposan nga may hingpit nga panglawas diha sa yuta nga nahimo nang paraiso. (Luc. 23:42, 43) Sa dihang ang yutan-ong bahin sa pamilya ni Jehova mahimo nang hingpit, mabatonan nilang tanan ang “himaya ug kahalangdon” nga gihisgotan ni David. Kon sakop ka sa “dakong panon,” duna kay nindot nga paglaom. (Pin. 7:9) Gimahal ka sa Diyos; gusto niya nga mahimo kang membro sa iyang pamilya. Busa himoa ang tanan aron malipay siya. Ibutang kanunay sa imong hunahuna ug kasingkasing ang mga saad sa Diyos. Pabilhi ang imong pribilehiyo nga makasimba ug makadayeg sa atong minahal nga langitnong Amahan hangtod sa hangtod! w21.08 7 ¶18-19

Si propetang Jeremias nagsangyaw sulod sa daghang katuigan bisag ang mga tawo wala maminaw ug misupak pa gani niya. Naluya kaayo siya kay “giinsulto ug giyagayagaan” siya sa mga magsusupak maong naghunahuna siya nga moundang na lang sa iyang asaynment. (Jer. 20:8, 9) Pero wala gyod nâ buhata ni Jeremias! Unsay nakatabang niya nga dili madaog sa iyang negatibong panghunahuna ug padayong magmalipayon sa iyang ministeryo? Nagpokus siya sa duha ka importanteng kamatuoran. Una, ang mensahe sa Diyos nga gisangyaw ni Jeremias maghatag sa mga tawo ug “maayong kaugmaon ug paglaom.” (Jer. 29:11) Ikaduha, si Jeremias nagdala sa ngalan ni Jehova. (Jer. 15:16) Kita sab nagsangyaw ug mensahe sa paglaom, ug kita nagdala sa ngalan ni Jehova ingong iyang mga Saksi. Kon magpokus ta niini nga mga kamatuoran, magmalipayon ta bisag unsa pay reaksiyon sa mga tawo. Busa ayawg kaluya o ayawg undang kon ang pag-uswag sa imong Bible study dili parehas sa imong gidahom. Ang paghimog mga tinun-an nagkinahanglag pailob.​—Sant. 5:7, 8. w21.10 27 ¶12-13

Bisag unsa na ta ka dugay nga nag-alagad kang Jehova, kinahanglan nga padayon natong palig-onon ang atong pagtuo kaniya. Ngano? Tungod kay kon dili ta mag-amping, mahimong mohuyang ang atong pagtuo. Hinumdomi nga ang pagtuo gibase sa ebidensiya nga tinuod ang mga butang nga dili makita. Dali ra tingali natong malimtan ang mga butang nga dili nato makita. Tungod niana, gitawag ni Pablo ang kakulag pagtuo ingong “sala nga daling makalambod nato.” Busa, sa unsang paagi maseguro nato nga magpabiling lig-on ang atong pagtuo? (2 Tes. 1:3) Una, pangayoa ang balaang espiritu ni Jehova, ug pirme nang himoa. Ngano? Tungod kay ang pagtuo maoy bahin sa bunga sa espiritu. (Gal. 5:22, 23) Dili nato padayong mapalig-on ang atong pagtuo sa Maglalalang kon wala ang tabang sa iyang balaang espiritu. Kon pirme natong pangayoon kang Jehova ang iyang espiritu, iya ning ihatag kanato. (Luc. 11:13) Makaampo pa gani ta: “Hatagi mig dugang pagtuo.” (Luc. 17:5) Dugang pa, himoang regular ang imong pagtuon sa Pulong sa Diyos.​—Sal. 1:2, 3. w21.08 18-19 ¶16-18

Ang mga tigulang mapuslanon kaayo. Bisag luya na tingali sila, daghan kaayo silag eksperyensiya sa pag-alagad sulod sa daghang katuigan. Gamiton gihapon sila ni Jehova sa lainlaing paagi. Pananglitan, ang Bibliya dunay mga asoy niadtong matinumanong nag-alagad kang Jehova bisag tigulang na. Pananglitan, si Moises mga 80 anyos na dihang nagsugod siya sa pag-alagad ingong propeta ug representante ni Jehova sa nasod sa Israel. Ang propetang si Daniel gigamit gihapon ni Jehova ingong Iyang tigpamaba bisan dihang tingali kapin na siyag 90 anyos. Ug si apostol Juan posibleng kapin na sab sa 90 anyos dihang gigiyahan siya ni Jehova sa pagsulat sa basahon sa Pinadayag. Ang ‘matarong ug diyosnong’ tawo nga si Simeon kadiyot ra hisgoti sa Bibliya, pero si Jehova nakaila niya ug gihatagan siyag pribilehiyo nga makita ang batang si Jesus ug managna bahin sa bata ug sa inahan niini.​—Luc. 2:22, 25-35. w21.09 3-4 ¶5-7

Ang mga ginikanan angayng mag-amping nga dili itandi ang ilang anak ngadto sa laing bata o magdahom nga ang ilang anak mohimog labaw pa kay sa makaya niini. Kon buhaton ni sa mga ginikanan, mahimong maglagot ang ilang anak. (Efe. 6:4) Ang sister nga si Sachiko miingon: “Gusto ni Mama nga pirme kong ma-perfect sa eksam, nga dili gyod nako kaya. Bisag dugay na kong nahumag eskuwela, usahay maghunahuna gihapon ko nga basig wala malipay si Jehova bisag gihimo nako ang akong kinamaayohan.” Si Haring David miingon nga wala siya “mangandoy ug dagko kaayong mga butang” o sa mga butang nga dili niya makab-ot. Tungod sa iyang pagkamapainubsanon, siya kontento ug malinawon. (Sal. 131:2) Unsay makat-onan sa mga ginikanan sa giingon ni David? Ikapakita sa mga ginikanan nga sila mapainubsanon kon dili sila magdahom ug labaw pa sa ilang makaya ug sa makaya sa ilang anak. Matabangan sa mga ginikanan ang ilang anak nga mobating importante kon ilhon nila kon unsay makaya ug dili makaya sa ilang anak ug dayon tabangan kini sa pagtakdag realistikong mga tumong. w21.07 21-22 ¶5-6

Gihatagan ni Jehova ang matag usa kanato ug kagawasan sa pagpili. Nagpasabot ni nga makapili ta kon sundon ba nato siya o dili. Ang pipila ka batan-on nga wala magdako sa ginikanan nga maayong ehemplo mipili sa pag-alagad kang Jehova ug nagpabiling matinumanon kaniya. Ang uban, kansang ginikanan naningkamot pag-ayo sa pagpadako kanila sumala sa mga prinsipyo sa Bibliya, mibiya sa kamatuoran dihang dagko na sila. Busa, ang matag usa kanato mao gyoy modesisyon kon moalagad ba ta kang Jehova. (Jos. 24:15) Kon naguol ka kay ang imong anak mibiya kang Jehova, ayawg hunahunaa nga imo nang sayop! Usahay, ang usa ka ginikanan mobiya sa kamatuoran ug bisan sa iyang pamilya. (Sal. 27:10) Sakit kaayo ni para sa mga anak kinsa nag-isip sa ilang ginikanan ingong ehemplo. Mga batan-on, kon ma-disfellow ang usa sa inyong ginikanan, makaseguro mo nga nahibalo sab si Jehova sa kasakit nga inyong gibati. Gimahal mo niya ug nalipay siya nga nagmaunongon mo kaniya. Hinumdomi pod nga dili kamo ang responsable sa desisyon sa inyong ginikanan. w21.09 27 ¶5-7

Dihang ang usa ka Kristohanon mapalagpot, puwede nato siyang ipakasama sa masakitong karnero nga puwedeng makatakod sa uban. Nasakit siya sa espirituwal nga diwa. (Sant. 5:14) Ang espirituwal nga sakit, sama sa ubang pisikal nga sakit, puwedeng makatakod. Busa sa pipila ka kahimtang, ang nasakit sa espirituwal kinahanglang ibulag sa kongregasyon. Kini nga disiplina maoy ekspresyon sa gugma ni Jehova para sa matinumanong mga sakop sa Iyang panon, ug posibleng makatabang ni sa nakasala nga makaamgo ug maghinulsol. Samtang napalagpot, puwede siyang motambong sa mga tigom diin siya mapakaon ug mapalig-on sa espirituwal. Puwede sab siyang mokuhag literatura aron duna siyay mabasa ug matun-an, ug puwede siyang motan-aw sa JW Broadcasting^®. Ug dihang makita sa mga ansiyano nga naghimo na siyag mga kausaban, puwede silang mohatag kaniyag tambag matag karon ug unya aron matabangan siya nga mahibalik ang iyang maayong relasyon kang Jehova ug mapasig-uli ingong usa sa mga Saksi ni Jehova. w21.10 10 ¶9, 11

Karon, atong gisunod ang sumbanan sa pagsimba nga giestablisar sa Kristohanong kongregasyon sa unang siglo. Pananglitan, atong gisunod ang organisasyonal nga kahikayan nga giestablisar sa mga apostoles sa unang siglo. Sama nila, duna tay nagapanawng mga tigdumala, mga ansiyano, ug ministeryal nga mga alagad. (Filip. 1:1; Tito 1:5) Ang atong panglantaw bahin sa sekso ug kaminyoon, ang atong pagtahod sa pagkasagrado sa dugo, ug ang atong tinguha nga protektahan ang kongregasyon gikan sa dili mahinulsolong mga makasasala gibase tanan sa sumbanan nga giestablisar sa unang siglo. (Buh. 15:28, 29; 1 Cor. 5:11-13; 6:9, 10; Heb. 13:4) Ang Bibliya klarong nag-ingon nga duna lay “usa ka pagtuo,” o relihiyon, nga giuyonan sa Diyos. (Efe. 4:4-6) Dako kaayong pribilehiyo nga nahimo tang bahin sa katawhan ni Jehova ug nahibaloan nato ang kamatuoran maylabot kaniya ug sa iyang mga katuyoan! Hinaot nga padayon tang makombinsir pag-ayo nga atong nabatonan ang kamatuoran. w21.10 22-23 ¶15-17

Si Haring Jehosapat nakaatubang ug dakong problema. Gisulong sila sa dakong kasundalohan nga gikan sa Ammon, Moab, ug sa kabukiran sa Seir. Busa nameligro siya, ang iyang pamilya, ug ang iyang katawhan. (2 Cron. 20:1, 2) Unsay gihimo ni Jehosapat? Nangayo siyag tabang ug kusog kang Jehova. Ang mapainubsanong pag-ampo ni Jehosapat, nga narekord sa 2 Cronicas 20:5-12, nagpakita kon unsa ka dako ang iyang pagsalig sa iyang mahigugmaon nga langitnong Amahan. Si Jehova nakig-estorya kang Jehosapat pinaagi sa Levihanon nga si Jahaziel, ug Iyang gisulti ang mga pulong sa teksto karong adlawa. Uban ang bug-os nga pagsalig sa iyang Diyos, gihimo ni Jehosapat ang gisugo kaniya. Dihang siya ug ang katawhan migula aron makiggubat sa mga kaaway, iyang gibutang sa atubangan, dili ang banggiitan nga mga manggugubat, kondili ang walay armas nga mga mag-aawit. Gituman ni Jehova ang iyang saad kang Jehosapat; Iyang gipildi ang mga kaaway.​—2 Cron. 20:18-23. w21.11 15-16 ¶6-7

Dihang mag-atubang tag kalisdanan, makaseguro ta nga si Jehova motabang kanato aron makapabilin tang matinumanon kaniya. (2 Cor. 4:7-9) Makasalig ta nga si Jehova padayong magpakitag maunongong gugma kanato kay, sama sa giingon sa salmista, “ang mata ni Jehova nagtan-aw niadtong mga nahadlok kaniya, niadtong naghulat sa iyang maunongong gugma.” (Sal. 33:18-22) Sa wala pa ta mag-alagad kang Jehova, nakabenepisyo ta sa gugma nga gipakita sa Diyos sa tanang tawo. Pero karon nga nagsimba na ta kaniya, nakabenepisyo sab ta sa iyang maunongong gugma. Tungod niana nga gugma, si Jehova samag naggakos ug nanalipod kanato. Siya kanunayng magauban kanato ug tumanon niya ang iyang katuyoan para kanato. Gusto niya nga molampos ta! (Sal. 46:1, 2, 7) Busa, bisan unsa pang pagsulay ang atong maatubang, si Jehova maghatag kanato sa kusog nga atong gikinahanglan aron makapabilin tang matinumanon. w21.11 7 ¶17-18

Kadaghanan nato dunay nahibaloang mga kahimtang diin ang usa ka tawo naghambin ug kasuko sa iyang kauban sa trabaho, eskolmet, paryente, o membro sa pamilya​—usahay sulod pa gani sa daghang katuigan! Hinumdomi nga ang 10 ka igsoon ni Jose sa amahan naghambin ug kasuko kaniya, ug tungod niana nakahimo silag daotang buhat kaniya. (Gen. 37:2-8, 25-28) Pero lahi ang pagtratar ni Jose kanila! Dihang nakabaton siyag awtoridad ug puwede unta siyang manimalos sa iyang mga igsoon, nagpakita siyag kaluoy kanila. Si Jose wala maghambin ug kasuko. Hinunoa, milihok siya uyon sa tambag nga narekord sa ulahi sa Levitico 19:18. (Gen. 50:19-21) Aron mapalipay ang Diyos, angayng sundogon sa mga Kristohanon si Jose, kinsa nagpasaylo sa iyang mga igsoon imbes maghambin ug kasuko o manimalos kanila. Si Jesus nag-awhag nato nga pasayloon kadtong nakasala kanato. (Mat. 6:9, 12) Sa susama, si apostol Pablo nagtambag sa iyang mga isigka-Kristohanon: “Ayaw mog panimalos, minahal nga mga igsoon.”​—Roma 12:19. w21.12 11 ¶13-14

Sa lawom nang gabii sa Nisan 14, 33 C.E., si Jesus miadto sa tanaman sa Getsemane. Didto, gibubo niya ang iyang kasingkasing kang Jehova. (Luc. 22:39-44) Niadtong lisod nga panahon, si Jesus “nangamuyo . . . sa kusog nga tingog nga inubanag mga luha.” (Heb. 5:7) Unsay giampo ni Jesus sa kataposang gabii una siya mamatay? Nangayo siyag kusog sa pagpabiling maunongon kang Jehova ug sa pagbuhat sa Iyang kabubut-on. Gidungog ni Jehova ang kinasingkasing nga pag-ampo sa iyang Anak ug nagpadala siyag anghel sa pagpalig-on kaniya. Si Jesus nahibalo kon unsa ka bug-at ang iyang responsibilidad​—ang pagbindikar sa ngalan sa iyang Amahan. Si Jehova naminaw sa kinasingkasing nga mga hangyo ni Jesus. Ngano? Tungod kay ang pangunang tumong ni Jesus mao ang pagpabiling maunongon sa iyang Amahan ug ang pagbindikar sa Iyang ngalan. Kon mao pod nay atong pangunang tumong, tubagon ni Jehova ang atong mga pag-ampo alang sa tabang.​—Sal. 145:18. w22.01 17-18 ¶15-17

Daghan karon ang nagsalikway kanato tungod sa atong neyutral nga baroganan maylabot sa politika. Nagdahom sila nga mobotar ta panahon sa eleksiyon. Pero nahibalo ta nga sa panglantaw ni Jehova, kon mopili tag tawhanong lider nga momando kanato, gisalikway nato Siya. (1 Sam. 8:4-7) Ang mga tawo naghunahuna sab nga kinahanglan tang magtukod ug mga eskuwelahan ug ospital ug mag-organisar ug mga kalihokan nga makatabang sa komunidad. Gisalikway nila ang atong mensahe kay nagkugi ta sa pagsangyaw imbes sulbaron ang mga problema sa kalibotan karon. Unsay atong buhaton aron dili mawala ang atong pagtuo? (Mat. 7:21-23) Ang atong prayoridad mao ang paghimo sa buluhaton nga gisugo ni Jesus kanato. Dili ta angayng malinga sa pagpaningkamot nga masulbad ang mga problema sa kalibotan. Gimahal nato ang mga tawo ug nabalaka ta sa ilang kahimtang, pero nahibalo ta nga ang kinamaayohang paagi nga matabangan sila mao ang pagtudlo kanila bahin sa Gingharian sa Diyos ug pagtabang kanila nga masuod kang Jehova. w21.05 7 ¶19-20

Bisag kadaghanan sa mga magmamando sa mga nasod karon nangangkon nga nag-alagad sa Diyos, dili nila gustong buhian ang ilang kaugalingong gahom ug awtoridad. Busa sama sa gihimo sa mga magmamando sa panahon ni Jesus, ang mga magmamando karon nagsupak sa Dinihogan ni Jehova pinaagi sa paglutos sa iyang maunongong mga sumusunod. (Buh. 4:25-28) Unsang kahigayonan ang gihatag ni Jehova kanila? Ang Salmo 2:10-12 nagtubag: “Busa karon, kamong mga hari, pagpakitag lawom nga pagsabot; pagpatul-id mo, kamong mga maghuhukom sa yuta. Alagara si Jehova uban ang kahadlok, ug pagsadya mo uban ang kataha. Pasidunggi ninyo ang anak, aron dili masuko ang Diyos ug mangahanaw mo sa dalan, kay ang Iyang kasuko dali rang mosilaob. Malipayon ang tanan nga modangop Kaniya.” Si Jehova maayo kaayo kay gihatagan niyag kahigayonan ang mga magsusupak sa paghimog hustong desisyon. Puwede pa silang magbag-o ug modesisyon nga dawaton ang Gingharian ni Jehova. Pero, mubo na lang ang nahibiling panahon. (Isa. 61:2) Importante gyod kaayo nga molihok na ang mga tawo aron mahibalo sa kamatuoran ug mohimo sa hustong desisyon. w21.09 15-16 ¶8-9

Ang gipasabot ni Pablo mao nga angay tang magmakontento sa materyal nga mga butang nga atong nabatonan. (Filip. 4:12) Ang pinakaimportante nato mao ang atong relasyon sa atong Diyos, dili ang bisan unsang materyal nga butang nga atong gipanag-iya. (Hab. 3:17, 18) Konsideraha kon unsay gisulti ni Moises sa mga Israelinhon human sa ilang 40 ka tuig nga paglibotlibot sa kamingawan: “Gipanalanginan mo ni Jehova nga inyong Diyos sa tanan ninyong gibuhat . . . Sulod sa 40 ka tuig, giubanan mo ni Jehova nga inyong Diyos ug walay butang nga nakulang ninyo.” (Deut. 2:7) Nianang 40 ka tuig, gitagana ni Jehova ang mana ingong pagkaon sa mga Israelinhon. Ang ilang mga sinina​—ang mismong mga sinina nga ilang dala pagbiya nila sa Ehipto—​wala gyod madunot. (Deut. 8:3, 4) Si Jehova malipay kon kita magmakontento​—kon apresyahon nato bisan ang simple niyang mga tagana, nga mag-isip niana ingong panalangin ug magpasalamat kaniya. w22.01 5 ¶10-11

Mga bana, responsibilidad ninyo ang pag-atiman sa inyong pamilya, busa naningkamot mo nga protektahan ug suportahan sila. Dihang mag-atubang ug mga problema, bation tingali ninyo nga masulbad ra ninyo kini sa kaugalingon ninyong paningkamot. Pero, sukli ang tendensiya nga mosalig sa kaugalingon. Hinunoa, pag-ampo mo alang sa tabang ni Jehova. Dugang pa, pag-ampo nga kinasingkasing uban sa inyong asawa. Pangayog giya kang Jehova pinaagi sa pagtuon sa Bibliya ug sa mga publikasyon nga gitagana sa organisasyon sa Diyos, ug ipadapat ang tambag nga inyong makita. Ang uban dili tingali mouyon sa inyong mga desisyon nga binase sa Bibliya. Moingon tingali sila nga ang kuwarta ug ang mga butang nga mapalit niini maoy makahatag ug kinamaayohang proteksiyon sa inyong pamilya. Pero hinumdomi ang pananglitan ni Haring Jehosapat. (2 Cron. 20:1-30) Siya misalig kang Jehova ug gipamatud-an niya kini pinaagi sa iyang mga buhat. Wala biyai ni Jehova ang maong maunongong tawo, ug dili sab mo niya biyaan.​—Sal. 37:28; Heb. 13:5. w21.11 15 ¶6; 16 ¶8

Gihimo ta sa larawan sa Diyos, maong gusto nato nga patas ang pagtratar sa mga tawo. (Gen. 1:26) Pero kay dili ta perpekto, puwedeng masayop ang atong konklusyon, bisan pag naghunahuna ta nga nahibalo ta sa tanang detalye. Pananglitan, hinumdomi nga si Jonas wala gyod malipay sa desisyon ni Jehova nga pakitaag kaluoy ang mga tawo sa Nineve. (Jon. 3:10–4:1) Pero unsay resulta sa desisyon ni Jehova? Kapig 120,000 ka mahinulsolong tawo sa Nineve ang naluwas! Klaro nga si Jonas ang nasayop, dili si Jehova. Si Jehova dili obligado nga mohatag ug eksplinasyon sa iyang mga desisyon. Tinuod, gitugotan ni Jehova ang iyang mga alagad sa una nga isulti ang ilang gibati bahin sa mga desisyon nga iyang gihimo o himoon. (Gen. 18:25; Jon. 4:2, 3) Ug dihay mga higayon nga mihatag siyag eksplinasyon sa iyang desisyon. (Jon. 4:10, 11) Pero si Jehova dili kinahanglang mangonsulta nato bahin sa iyang gihimo o himoon.​—Isa. 40:13, 14; 55:9. w22.02 3-4 ¶5-6

Mogawi ta nga “kinaubsan” kon atong ‘isipon ang uban nga labaw kay kanato.’ (Filip. 2:3) Kon ugmaron nato ang maong panghunahuna, mas dakog posibilidad nga dili ta makapandol sa uban. Ang tanan natong igsoon mas labaw kay kanato sa lainlaing paagi. Dali ra nato ning makita kon magpokus ta sa ilang maayong mga hiyas. Kinahanglan natong sundon ang tambag ni apostol Pablo ngadto sa mga taga-Corinto: “Kinsa bay naghimo nimong lahi sa uban? Sa pagkatinuod, unsay anaa kanimo nga wala nimo madawat? Gani, kon nadawat nimo kini, nganong manghambog ka nga daw wala nimo kini madawat?” (1 Cor. 4:7) Busa likayan gyod nato ang paghunahuna o pagpakita nga mas labaw ta kay sa uban. Kon ang usa ka brader maayong mopakigpulong o ang usa ka sister dali rang makasugod ug pagtuon sa Bibliya, angay niyang ihatag ang pasidungog kang Jehova. w21.06 21-22 ¶9-10

Nag-anam ka lisod para sa daghang Saksi ang pagpakig-estorya sa mga tawo diha sa ilang balay. Ang pipila ka magmamantala nagpuyo sa mga lugar diin daghag apartment nga estrikto kaayog seguridad o mga subdibisyon nga guwardiyado. Tingali naay guwardiya nga dili magpasulod niadtong walay kasabot nga residente didto. Ang ubang magmamantala pipila ray maabtan nga tawo sa balay o dunay mga teritoryo nga gamay rag namuyo. May mga magmamantala nga mobiyahe o mobaktas tingalig layo aron lang masangyawan ang usa ka tagbalay​—nga basin wala gani sa balay! Kon ingon ani ang atong teritoryo, dili ta angayng mohunong sa pagsangyaw. Sulayi pagduaw ang mga tawo sa laing oras. Mas daghan tag maestorya kon mosangyaw ta sa oras nga posibleng naa sila sa balay. Total, manguli man gyod sila sa ilang balay! Nakita sa daghang igsoon nga praktikal nga mosangyaw sa hapon o sa gabii kay daghan silag maabtan. Dugang pa, ang mga tagbalay tingali mas relaks ug andam makig-estorya nianang mga orasa. w21.05 15 ¶5, 7

Ingon ana ba sab ang kahimtang karon? Oo. Daghan ang masuko sa mga Saksi ni Jehova dihang dili sila moapil sa pagselebrar sa dili kasulatanhong mga tradisyon, sama sa adlawng natawhan ug Pasko. Ang uban masuko sa mga Saksi ni Jehova sa dihang dili sila moapil sa nasyonalistikong mga selebrasyon o dili mosunod sa mga kostumbre sa paglubong nga supak sa Pulong sa Diyos. Kadtong nasuko sa mga Saksi ni Jehova tungod niana nga mga rason nagtuo tingali nga dawaton sa Diyos ang ilang paagi sa pagsimba. Pero dili nila siya mapalipay kon ilang palabihon ang mga tradisyon sa kalibotan imbes ang klaro nga mga pagtulon-an sa Bibliya. (Mar. 7:8, 9) Unsay atong buhaton aron dili mawala ang atong pagtuo? Kinahanglan natong ugmaron ang dakong gugma sa mga balaod ug prinsipyo ni Jehova. (Sal. 119:97, 113, 163-165) Kon gimahal nato si Jehova, isalikway nato ang bisan unsang tradisyon nga dili makapalipay niya. Dili nato tugotan ang bisan unsa nga molabaw sa atong gugma kang Jehova. w21.05 6 ¶15-16

Unsaon nato pagpadapat ang tambag ni apostol Pablo? Kinahanglan natong huptang lig-on ang atong pagtuo pinaagi sa regular nga pagtuon, padayong pag-ampo, ug pagkugi diha sa buluhaton nga gipahimo ni Jehova kanato. (2 Tim. 4:4) Kon duna tay pagtuo, dili ta mabalaka dihang makadungog tag dili maayong mga report bahin sa mga Saksi ni Jehova. (Isa. 28:16) Ang atong gugma kang Jehova, sa iyang Pulong, ug sa atong mga igsoon motabang nato nga dili malimbongan niadtong mibiya sa kamatuoran. Sa unang siglo, daghan ang napandol ug nagsalikway kang Jesus. Pero daghan pod ang midawat kaniya. Apil kanila ang labing menos usa ka membro sa Sanhedrin ug bisan ang “daghang saserdote.” (Buh. 6:7; Mat. 27:57-60; Mar. 15:43) Karon, minilyon sab ang wala mapandol. Ngano? Tungod kay sila nahibalo ug nahigugma sa mga kamatuoran nga naa sa Kasulatan. Ang Pulong sa Diyos nag-ingon: “Ang dagayang pakigdait matagamtam niadtong nahigugma sa imong balaod; walay makapandol nila.”​—Sal. 119:165. w21.05 13 ¶20-21

Naamgohan ni apostol Pablo nga ang tanan nga iyang nalampos sa pag-alagad kang Jehova nahimo niya dili sa iyang kaugalingong kusog, kondili sa kusog sa Diyos. Pinaagi sa Iyang balaang espiritu, gihatagan ni Jehova si Pablo ug kusog sa pagtuman sa bug-os sa iyang ministeryo​—bisan pa sa paglutos, pagkapriso, ug ubang mga problema nga iyang giatubang. Si Timoteo, ang batabata pang kauban ni Pablo, kinahanglan sab mosalig sa gahom sa Diyos sa pagtuman sa iyang ministeryo. Si Timoteo miuban kang Pablo sa lagyong misyonaryong mga panaw. Dugang pa, gipadala siya ni Pablo sa ubang lugar aron duawon ug dasigon ang mga kongregasyon. (1 Cor. 4:17) Posibleng mibati si Timoteo nga dili siya kuwalipikado. Kana tingali rason kon nganong gitambagan siya ni Pablo: “Ayawg tugoti nga may motamay sa imong pagkabatan-on.” (1 Tim. 4:12) Dugang pa, nianang panahona, si Timoteo may kaugalingong tunok sa unod; ‘pirme siyang masakit.’ (1 Tim. 5:23) Pero nahibalo si Timoteo nga ang gamhanang balaang espiritu ni Jehova maghatag niya sa kusog nga iyang gikinahanglan sa pagsangyaw sa maayong balita ug pag-alagad sa iyang mga igsoon.​—2 Tim. 1:7. w21.05 21 ¶6-7

Ang prinsipyo sa Santiago 1:19 mapadapat gyod sa tanang motambag. Si Santiago misulat: “Ang matag usa kinahanglang abtik sa pagpaminaw, hinay sa pagsulti, dili daling masuko.” Ang ansiyano maghunahuna tingali nga nahibalo siya sa tanang impormasyon, pero tinuod kaha? Ang Proverbio 18:13 nagpahinumdom nato: “Kon ang usa motubag dayon nga dili una maminaw, kabuangan kana ug makauulaw.” Mas maayo nga ang ansiyano mangutana sa igsoon mismo. Angay siyang maminaw sa dili pa motambag. Puwede siyang mangutana: “Komosta man ka?” “Naa ba koy ikatabang nimo?” Kon susihon una sa mga ansiyano ang kahimtang, mas matabangan ug madasig nila ang mga igsoon. Aron mahimong epektibo ang tambag, dili igo ang pagbasa lag mga teksto o paghatag ug mga sugyot. Kinahanglang bation sa mga igsoon nga gimahal nato sila, nakasabot ta nila, ug gusto nato silang tabangan. w22.02 17 ¶14-15