Hunyo

Pobre kaayo ang babayeng balo, ug posible nga dili siya makapalit sa iyang pangunang mga panginahanglan. Pero miduol siya sa usa sa mga panudlanan ug naghulog ug duha ka gagmayng sensilyo nga ubos kaayog bili. Tingali walay madungog nga tingog sa dihang gihulog niya kini sa panudlanan. Si Jesus nahibalo kon unsay iyang gihulog​—duha ka lepton, ang kinagamyag bili nga sensilyo nga gigamit niadtong panahona. Dili gani nâ ikapalit ug usa ka goryon, nga usa sa kinabaratohang langgam nga gibaligya aron kaonon. Nakadayeg kaayo si Jesus niining babayeng balo. Busa gitawag niya ang iyang mga tinun-an, gitudlo ang babayeng balo, ug siya miingon: ‘Kining kabos nga babayeng balo naghulog ug labaw pa kay sa tanan.’ Dayon siya midugang: “Silang tanan [ilabina ang mga tawong dato] naghulog sa ilang sobra, apan siya, bisan pa sa iyang kakabos, naghulog sa tanan niyang nabatonan, ang tibuok niyang panginabuhian.” (Mar. 12:43, 44) Sa dihang gihulog niining matinumanong balo ang iyang kataposang kuwarta nianang adlawa, gisalig niya ang iyang kinabuhi sa mahigugmaong pag-atiman ni Jehova.​—Sal. 26:3. w21.04 6 ¶17-18

Si Jesus nagpabiling positibo sa iyang ministeryo dinhi sa yuta, ug gusto niya nga ang iyang mga sumusunod magmapositibo sab sa ilang ministeryo. (Juan 4:35, 36) Sa dihang si Jesus kauban pa sa iyang mga tinun-an, sila madasigon sa pagsangyaw. (Luc. 10:1, 5-11, 17) Pero dihang gidakop ug gipatay si Jesus, ang mga tinun-an temporaryong nawad-ag kadasig sa pagsangyaw. (Juan 16:32) Human mabanhaw si Jesus, gidasig niya sila nga magpokus sa pagsangyaw. Ug human siya mosaka sa langit, sila madasigon kaayo sa pagsangyaw mao nga ang ilang mga kaaway mireklamo, sumala sa gihisgotan sa teksto karong adlawa. Gigiyahan ni Jesus ang buluhaton sa unang siglong mga Kristohanon, ug gipanalanginan sila ni Jehova ug pag-uswag. Pananglitan, sa Pentekostes 33 C.E., mga 3,000 ang nabawtismohan. (Buh. 2:41) Ug padayon nga midaghan pag-ayo ang mga tinun-an. (Buh. 6:7) Pero gitagna ni Jesus nga mas daghan pa ang modawat sa maayong balita sa kataposang mga adlaw.​—Juan 14:12; Buh. 1:8. w21.05 14 ¶1-2

Nahinumdom ka ba sa higayon dihang una nimong naamgohan nga nakaplagan nimo ang kamatuoran? Naghunahuna ka nga ang tanan modawat sa mga butang nga imong gituohan. Kombinsido ka nga ang mensahe sa Bibliya makahatag nilag mas malipayong kinabuhi karon ug nindot nga paglaom sa umaabot. (Sal. 119:105) Busa, eksayted kaayo kang isulti sa imong mga higala ug pamilya ang mga kamatuoran nga imong nakat-onan. Pero unsay nahitabo? Natingala ka kay daghan ang wala modawat sa imong gisulti. Dili ta angayng matingala dihang isalikway sa uban ang mensahe nga atong gisangyaw. Sa panahon ni Jesus, kadaghanan sa mga tawo nagsalikway kaniya bisan pag naghimo siyag mga milagro nga nagpamatuod nga gipaluyohan siya sa Diyos. Pananglitan, gibanhaw ni Jesus si Lazaro​—usa ka milagro nga dili ikalimod sa iyang mga magsusupak. Bisan pa niana, ang Hudiyong mga lider wala modawat kang Jesus ingong Mesiyas. Gusto pa gani nilang patyon si Jesus ug si Lazaro!​—Juan 11:47, 48, 53; 12:9-11. w21.05 2 ¶1-2

Paningkamot nga makatambong pirme sa mga tigom. Makabenepisyo ka sa makapadasig nga mga programa, ug mailhan pod nimo ang mga igsoon. Pakighigala sa mga igsoon sa kongregasyon, bisan niadtong lahi nimog edad ug kagikan kay daghan kag makat-onan nila. Ang Bibliya nagpahinumdom nato nga “ang kaalam anaa sa mga tigulang.” (Job 12:12) Ang mga tigulang daghan pog makat-onan sa matinumanong mga batan-on. Si David mas bata kang Jonatan, pero nagkasuod gihapon sila. (1 Sam. 18:1) Nagtinabangay sila sa pag-alagad kang Jehova bisan pa sa lisod nga mga situwasyon. (1 Sam. 23:16-18) “Ang atong mga brader ug sister puwede gyod mahimong atong espirituwal nga mga ginikanan o igsoon,” miingon si Irina, sister nga mao ray Saksi sa iyang pamilya sa pagkakaron. “Puwede silang gamiton ni Jehova nga mahimong atong pamilya.” Ang imong mga higala gustong modasig ug motabang nimo, pero kinahanglan nimo silang sultihan kon unsaon nila kana paghimo. w21.06 10-11 ¶9-11

Si Jesus naghatag ug ilustrasyon bahin sa usa ka hari ug sa ulipon niini. Gipapas sa hari ang dako nga utang nga dili gyod mabayran sa ulipon. Pero, wala papasa sa maong ulipon ang mas gamay nga utang sa iyang isigkaulipon. Sa ulahi, gipabilanggo sa hari ang way kaluoy nga ulipon. Ang gihimo sa ulipon nakapasakit dili lang kaniya mismo kondili sa uban usab. Una, way kaluoy niyang gipasakitan ang iyang isigkaulipon pinaagi sa ‘pagpabilanggo kaniya hangtod nga mabayran niya ang iyang utang.’ Ikaduha, nakapasakit siya sa ubang ulipon nga nakakita sa iyang gihimo. “Pagkakita sa ubang ulipon sa nahitabo, sila naguol pag-ayo.” (Mat. 18:30, 31) Sa susama, ang atong mga buhat makaapektar sa uban. Kon dunay makasala kanato ug dili nato siya pasayloon, unsay mahitabo? Una, mapasakitan nato siya kay wala nato siya pasayloa, ug tingali kay wala nato siya tagda ug pakitaig gugma. Ikaduha, ang uban diha sa kongregasyon matugaw kon mamatikdan nila nga wala tay maayong relasyon nianang igsoona. w21.06 22 ¶11-12

Ang mga tawo gilalang sumala sa larawan sa Diyos, pero giimpluwensiyahan sila ni Satanas sa paghimog imoral nga mga buhat. Dihang nakita ni Jehova nga “grabe na ang pagkadaotan sa mga tawo” sa panahon ni Noe, siya ‘nagbasol nga iyang gihimo ang mga tawo sa yuta, ug nasakitan ang iyang kasingkasing.’ (Gen. 6:5, 6, footnote, 11) Miarang-arang ba ang kahimtang sukad niadto? Wala gyod! Seguradong nalipay ang Yawa dihang nakita niya nga misamot kagrabe ang tanang klase sa seksuwal nga imoralidad, apil ang imoral nga mga buhat tali sa mga tawo nga dili parehas ug sekso ug sa mga tawo nga parehas ug sekso! (Efe. 4:18, 19) Ilabinang malipay si Satanas kon ang mga tawo nga nagsimba kang Jehova mahaylo niya sa paghimog seryosong sala. Sa pagmando ni Satanas, gawas nga ang mga tawo ‘nagmando sa mga tawo alang sa ilang ikadaot,’ wala pod nila tumana ang sugo ni Jehova nga atimanon ang yuta ug ang mga hayop. (Eccl. 8:9; Gen. 1:28) Unsay resulta? Ang pipila ka siyentista miingon nga tungod sa ginahimo sa mga tawo, usa ka milyon pang espisye ang posibleng mapuo sa mosunod nga mga tuig. w21.07 12 ¶13-14

Ang pipila ka alagad sa Diyos nakonsensiya gihapon pag-ayo sa ilang nahimong kasaypanan kaniadto. Ang ilang mahukmanong kasingkasing nagkombinsir kanila nga si Jehova dili gyod makapasaylo nila—bisag naghinulsol na sila ug nagbag-o. Kon kanay imong gibati, ang pagkahibalo nga ang Diyos gusto gyong magpakitag maunongong gugma sa iyang mga alagad makatabang nimo nga magmalipayon sa pag-alagad kang Jehova uban ang hinlong konsensiya. Posible ni kay ‘ang dugo ni Jesus nga iyang Anak naghinlo kanato gikan sa tanang sala.’ (1 Juan 1:7) Kon maluya ka tungod sa imong kahuyangan, hinumdomi nga si Jehova andam, oo, gusto gyong mopasaylo sa mahinulsolong makasasala. Matikdi ang giingon sa salmistang si David nga koneksiyon tali sa maunongong gugma ug sa pagpasaylo. Siya misulat: “Sama nga ang kalangitan mas taas kay sa yuta, dako usab kaayo ang iyang maunongong gugma alang niadtong mga nahadlok kaniya. Sama ka layo sa sidlakan gikan sa kasadpan, ingon usab niana ka layo nga gibutang niya ang atong kalapasan gikan kanato.”​—Sal. 103:11, 12. w21.11 5-6 ¶12-13

Angayng pasidunggan sa usa ka Kristohanong bana ang iyang asawa. (1 Ped. 3:7) Ang pagpasidungog nagpasabot nga hatagan natog espesyal nga pagtagad ug pagtahod ang uban. Pananglitan, mapasidunggan sa bana ang iyang asawa pinaagi sa pagtahod kaniya. Dili siya magdahom ug labaw sa mahimo sa iyang asawa. Ug dili gyod niya siya itandi sa ubang mga babaye. Kon itandi niya ang iyang asawa sa uban, unsa kahay bation sa iyang asawa? Ang dili Saksing bana sa sister nga si Rosa sagad magtandi niya sa ubang mga babaye. Tungod sa sakit nga mga pulong sa iyang bana, si Rosa nawad-ag kompiyansa sa kaugalingon. Siya miingon, “Kinahanglang pasaligan ko pirme nga bililhon ko kang Jehova.” Sa laing bahin, ang Kristohanong bana maghatag ug pasidungog sa iyang asawa. Siya nahibalo nga kon buhaton niya kana, molig-on ang iyang relasyon sa iyang asawa ug kang Jehova. Ang bana nga nagpasidungog sa iyang asawa magdayeg kaniya, magpasalig kaniya sa iyang gugma, ug maghatag kaniyag komendasyon. w21.07 22 ¶7-8

Maguol ba ka kon duna kay gipaabot nga package nga imo gyong gikinahanglan pero wala ni moabot sa panahon nga imong gidahom? Pero kon mahibaloan nimo nga dunay balidong mga hinungdan kon ngano, posible nga magpailob ka ug andam magpaabot. Ang usa ka pananglitan nga nagpakita sa kaimportante sa pagpailob mabasa sa Proverbio 13:11. Kini nag-ingon: “Ang bahandi nga dali ra kaayong nakuha mogamay, apan ang bahandi nga gianam-anam pagtigom modaghan.” Unsay atong makat-onan niini nga bersikulo? Maalamon ang paghimo sa mga butang sa mapailobong paagi. Ang Proverbio 4:18 nag-ingon nga “ang dalan sa matarong sama sa kahayag sa adlaw nga mag-anam ka hayag hangtod sa udtong tutok.” Ang maong mga pulong haom nga nagtumong sa paagi ni Jehova sa pagpadayag sa iyang katuyoan ngadto sa iyang katawhan​—anam-anam. Pero ang maong teksto mapadapat sab sa paagi diin ang usa ka Kristohanon mouswag sa espirituwal. Ang espirituwal nga pag-uswag dili puwedeng dalidalion. Nagkinahanglan nig panahon. w21.08 8 ¶1, 3-4

Daghan tag buluhaton samtang nagkaduol ang kataposan niining sistemaha. (Mat. 24:14; Luc. 10:2; 1 Ped. 5:2) Gusto natong moalagad kang Jehova kutob sa atong maarangan. Daghan ang nagpalapad sa ilang ministeryo. Ang pipila gustong magpayunir. Ang uban gustong mag-alagad sa Bethel o moboluntaryo sa pagpanukod ug teokratikanhong mga pasilidad. Ug daghang brader ang nangab-ot aron mahimong ministeryal nga alagad o ansiyano. (1 Tim. 3:1, 8) Malipay gyod si Jehova nga makita ang iyang katawhan nga kinabubut-ong nag-alagad kaniya! (Sal. 110:3) Pero nadismayar ka ba kay wala pa nimo makab-ot ang usa ka espirituwal nga tumong? Kon mao, iampo nâ kang Jehova. (Sal. 37:5-7) Dugang pa, pangayog sugyot sa hamtong nga mga igsoon kon unsaon nimo pagpauswag ang imong pag-alagad sa Diyos, ug dayon paningkamoti pag-ayo nga ipadapat ang ilang tambag. Kon buhaton nâ nimo, basin madawat nimo ang maong pribilehiyo o makab-ot ang maong tumong. w21.08 20 ¶1; 21 ¶4

Ang balong propeta nga si Ana 84 anyos na pero “wala gayod siya mopalta sa templo.” Tungod sa iyang kanunayng “pagtambong sa tigom,” siya gipanalanginan pag-ayo kay nakita niya ang batang si Jesus. (Luc. 2:36-38) Karon, daghang matinumanong tigulang ang maayo kaayong ehemplo sa mga batan-on. Makabenepisyo kaayo ta kon mogahin tag panahon sa pagpangutana kanila ug sa pagpaminaw dihang mosulti sila bahin sa kalipay nga ilang naeksperyensiyahan sa organisasyon ni Jehova. Ang atong tigulang nga mga igsoon importante kang Jehova ug sa iyang organisasyon. Nakita nila ang lainlaing paagi nga gipanalanginan ni Jehova ang iyang organisasyon ug sila mismo. Nakakat-on silag importanteng mga leksiyon sa mga kasaypanan nga ilang nahimo. Isipa sila ingong “tuboran sa kaalam,” ug pagkat-on gikan kanila. (Prov. 18:4) Kon maggahin kag panahon nga mailhan sila, mapalig-on ang imong pagtuo. w21.09 3 ¶4; 4 ¶7-8; 5 ¶11, 13

Ingon sa gitagna ni Isaias, ang “gatas sa kanasoran” napahimuslan sa katawhan ni Jehova. (Isa. 60:5, 16) Tungod sa lainlaing kahanas ug katakos niining bililhong mga lalaki ug babaye nga nanulod sa kamatuoran, ang buluhatong pagsangyaw ginahimo diha sa 240 ka nasod ug ang mga literatura giimprenta diha sa kapig 1,000 ka pinulongan. Kay giuyog ang kanasoran niining panahon sa kataposan, ang mga tawo kinahanglan nang modesisyon. Suportahan ba nila ang Gingharian sa Diyos, o mosalig ba sila sa mga gobyerno niining kalibotana? Kini maoy desisyon nga kinahanglang himoon sa tanan. Bisag ang katawhan ni Jehova nagsunod sa mga balaod sa gobyerno sa nasod nga ilang gipuy-an, bug-os silang nagpabiling neyutral sa politika niining kalibotana. (Roma 13:1-7) Nahibalo sila nga ang Gingharian lang ang tinuod nga solusyon sa mga problema sa katawhan. Kana nga Gingharian dili bahin niining kalibotana.​—Juan 18:36, 37. w21.09 17-18 ¶13-14

Kon ang imong minahal mobiya kang Jehova, importante kaayo nga padayon nimong lig-onon ang imong kaugalingon ug ang ubang membro sa pamilya. Sa unsang paagi mahimo nimo kana? Pangayog kusog kang Jehova pinaagi sa pagpadayon sa imong rutina sa pagbasa sa Pulong sa Diyos ug pagpamalandong niana, maingon man sa pagtambong sa mga tigom. Si Joanna, kansang amahan ug igsoong babaye mibiya sa kamatuoran, miingon: “Mobati kog kalinaw sa hunahuna dihang magbasa ko bahin sa mga karakter sa Bibliya sama kang Abigail, Ester, Job, Jose, ug Jesus. Ang ilang ehemplo nakadasig ug nakatabang nako nga magmapositibo.” Dihang maguol ka, ayawg hunong sa pag-ampo kang Jehova. Hangyoa ang atong mahigugmaong Diyos nga tabangan ka nga masundog ang iyang panglantaw sa imong kahimtang ug ‘hatagan kag lawom nga pagsabot ug tudloan sa dalan nga angay nimong laktan.’ (Sal. 32:6-8) Siyempre, sakit tingali kaayo para nimo nga isulti kang Jehova kon unsa gyoy imong gibati. Pero si Jehova makasabot gyod sa imong gibating kasakit. Giawhag ka niya nga ibubo ang imong kasingkasing kaniya.​—Ex. 34:6; Sal. 62:7. w21.09 28 ¶9-10

Human sa Paskuwa sa 32 C.E., si apostol Pedro, Santiago, ug Juan nakakitag katingalahang panan-awon. Sa usa ka taas nga bukid, tingali sa usa ka bahin sa Bukid sa Hermon, nakita nila nga nausab ang panagway ni Jesus. “Ang iyang nawong misidlak sama sa adlaw, ug ang iyang besti migilaw sama sa kahayag.” (Mat. 17:1-4) Nadungog sa mga apostoles ang Diyos nga miingon: “Kini mao ang akong Anak, ang akong gihigugma, nga akong giuyonan. Pamati kamo kaniya.” Gipamatud-an sa tulo ka apostoles sa ilang paagi sa pagkinabuhi nga namati sila kang Jesus. Gusto nato silang sundogon. Mapasalamaton ta nga si Jehova naghatag natog mahigugmaong giya pinaagi sa “ulo sa kongregasyon,” si Jesu-Kristo. (Efe. 5:23) Hinaot nga magmadeterminado ta nga ‘mamati kaniya,’ sama sa gihimo ni apostol Pedro, Santiago, ug Juan. Pinaagi sa paghimo niana, madawat nato ang daghang panalangin karon ug walay kataposang kalipay sa umaabot. w21.12 22 ¶1; 27 ¶19

Ang usa ka Kristohanon sa Corinto nakig-ipon sa asawa sa iyang amahan. Giingnan ni apostol Pablo ang mga taga-Corinto nga palagpoton siya. Ang imoral nga binuhatan sa maong tawo nakaapektar sa uban diha sa kongregasyon, ug ang pipila kanila wala gani maghunahuna nga kadto maoy seryosong sala! (1 Cor. 5:1, 2, 13) Paglabayg pipila ka panahon, nahibaloan ni Pablo nga ang nakasala tinuod gyong naghinulsol! Giingnan ni Pablo ang mga ansiyano: “Kinahanglang andam mong magpasaylo kaniya ug maghupay kaniya.” Matikdi kon nganong gisulti kana ni Pablo: “Aron dili siya malumsan sa hilabihang kasubo.” Naluoy si Pablo nianang mahinulsolong tawo. Dili niya gustong makita ang maong tawo nga malumsan sa kaguol tungod sa nahimo niini, nga moundang na hinuon ni sa pagpangayog pasaylo. (2 Cor. 2:5-8, 11) Sama kang Jehova, ang mga ansiyano gustong magpakitag kaluoy. Magpahamtang silag bug-at nga disiplina kon gikinahanglan pero magpakita silag kaluoy kon posible dihang dunay tinuod nga basehanan sa paghimo niana. Kon wala gyod silay ipahamtang nga disiplina sa nakasala, wala sila magpakitag kaluoy, kondili gikonsentir nila ang sayop nga binuhatan. w21.10 11-12 ¶12-15

Ang kahiubos puwede natong ipakasama sa literal nga mga samad. Ang pipila gamay ra; ang uban mas dako. Pananglitan, dihang mag-abli tag sobre, basin masamdag gamay ang atong tudlo. Sakit nâ, pero paglabayg usa o duha ka adlaw, basig di na gani ta kahinumdom kon unsang bahina sa tudlo ang nasamad. Sa susama, ang pipila ka butang nga nahimo batok kanato ginagmay ra. Pananglitan, ang usa ka higala tingali makasulti o makahimog butang nga makapasakit nato, pero mapasaylo ra dayon nato siya. Pero kon mas dako ang samad, kinahanglan tingali ning tahion sa doktor o bendahean. Kon sigean natog tandog o kutkot ang samad, basin dugay ning maayo o mograbe hinuon. Makapaguol, susama tingali niana ang himoon sa usa ka tawo nga nahiubos pag-ayo. Basin magsige siyag hunahuna sa kahiubos nga iyang gibati ug kon unsa ka sakit ang gihimo sa laing tawo kaniya. Pero kon maghambin siyag kasuko, gipasakitan lang niya ang iyang kaugalingon. Mas maayo gyod nga sundon ang tambag sa teksto karong adlawa. w21.12 12 ¶15

Ibutang ta nga ang usa ka ansiyano naghunahuna bahin sa sininaan o pamostura sa usa ka igsoon. Puwede niyang pangutan-on ang kaugalingon, ‘Naa ba siyay nasupak nga prinsipyo sa Bibliya?’ Kay gusto niyang maseguro nga wala siya magbase sa kaugalingon niyang opinyon, mangonsulta tingali siya sa laing ansiyano o sa hamtong nga igsoon. Ila tingaling hisgotan ang tambag ni Pablo bahin sa sininaan ug pamostura. (1 Tim. 2:9, 10) Si Pablo naghisgot ug mga prinsipyo nga ang sininaan sa usa ka Kristohanon angayng desente, nagpakitag pagtahod sa kaugalingon ug sa uban, ug nagpakitag maayong panghunahuna. Pero wala siya maghimog balaod kon unsay puwede o dili puwedeng isul-ob. Nahibalo siya nga ang mga Kristohanon naay katungod nga mosul-ob sa ilang gusto basta walay malapas nga prinsipyo. Busa konsiderahon sa mga ansiyano kon ang sininaan o pamostura sa igsoon nagpakita bag pagtahod sa kaugalingon ug sa uban ug nagpakitag maayong panghunahuna. Angay natong masabtan nga ang duha ka hamtong nga Kristohanon lainlain tingalig desisyon, pero parehas silang husto. Dili nato angayng ipamugos ang atong gihunahuna nga husto ug sayop. w22.02 16 ¶9-10

Dunay maayong mga rason kon nganong angay tang magpakitag maunongong gugma sa usag usa. Unsa ang pipila niana? Matikdi kon giunsa kana pagtubag sa mosunod nga mga panultihon sa Bibliya: “Ayawg tugoti nga biyaan ka sa maunongong gugma ug pagkamatinumanon. . . . Unya uyonan ka sa Diyos ug sa mga tawo ug isipon ka ingong tawo nga lawom ug pagsabot.” “Ang tawo nga may maunongong gugma makahatag ug kaayohan sa iyang kaugalingon.” “Kadtong nagtinguhag pagkamatarong ug maunongong gugma makakaplag ug kinabuhi.” (Prov. 3:3, 4; 11:17, footnote; 21:21) Kini nga mga panultihon naghisgot ug tulo ka rason kon nganong angay tang magpakitag maunongong gugma. Una, kon magpakita tag maunongong gugma, mahimo tang bililhon sa Diyos. Ikaduha, ang pagpakita niini makahatag natog kaayohan karon. Pananglitan, makabaton tag tinuod nga mga higala. Ikatulo, ang pagpakitag maunongong gugma moresultag mga panalangin sa umaabot, apil na ang kinabuhing walay kataposan. Busa, duna tay maayong mga rason nga sundon ang pahinumdom ni Jehova: “Ipakita ang maunongong gugma ug kaluoy sa inyong pagpakiglabot sa usag usa.” w21.11 8 ¶1-2

Kon ang mga kalisdanan nga imong giatubang kaniadto ug karon nagpakita nga dunay bahin sa imong pagtuo nga kinahanglan pang palig-onon, ayawg kaluya. Isipa kini ingong kahigayonan sa pagpalig-on sa imong pagtuo. Pag-ampo nga kinasingkasing kang Jehova, ilabina dihang mag-atubang ug bug-at nga problema. Ilha nga si Jehova mahimong motaganag tabang pinaagi sa atong pamilya o sa mga igsoon. Kon tugotan nimo si Jehova sa pagtabang nimo nga makalahutay sa imong mga kalisdanan karon, mahimo kang mas masaligon nga tabangan ka niya sa paglahutay sa bisan unsang kalisdanan sa umaabot. Gitabangan ni Jesus ang iyang mga tinun-an nga makita kon unsang bahina sa ilang pagtuo ang kinahanglan nilang palig-onon. Pero wala gyod siya magduhaduha nga sa tabang ni Jehova, malahutay nila ang umaabot nga mga pagsulay. (Juan 14:1; 16:33) Masaligon siya nga dunay dakong panon nga makalabang sa dakong kasakitan tungod sa lig-ong pagtuo. (Pin. 7:9, 14) Apil unya ka sa makalabang kon pahimuslan nimo ang tanang kahigayonan karon sa pag-ugmad ug pagpalig-on sa imong pagtuo!​—Heb. 10:39. w21.11 25 ¶18-19

Dili ta magdahom nga protektahan ta ni Jehova sa milagrosong paagi. Pero nahibalo ta nga kadtong mosalig kang Jehova dili gyod makaagom ug permanenteng kadaot. Sa dili madugay, masulayan ang atong pagsalig sa katakos ni Jehova sa pagpanalipod kanato. Dihang ang Gog sa Magog, ang alyansa sa kanasoran, moatake sa katawhan sa Diyos, daw mameligro ang atong kinabuhi. Kinahanglang kombinsido ta nga si Jehova makaluwas kanato ug nga luwason gyod ta niya. Ang kanasoran maghunahuna tingali nga sama tag makaluluoyng mga karnero nga walay tigpanalipod. (Ezeq. 38:10-12) Wala tay armas ug wala ta mabansay sa pagpakiggubat. Maghunahuna ang kanasoran nga dali ra tang pildihon. Dili nila makita ang atong makita pinaagi sa atong mata sa pagtuo​—ang daghan kaayong anghel nga nagkampo libot sa katawhan sa Diyos nga andam sa pagdepensa kanato. Siyempre, ang kanasoran dili makakita kanila kay wala silay pagtuo sa Diyos. Makurat gyod sila dihang ang langitnong kasundalohan makig-away para kanato!​—Pin. 19:11, 14, 15. w22.01 6 ¶12-13

Ang tanan natong igsoon importante kang Jehova, busa angay nga importante sab sila kanato. Kinahanglan tang maningkamot nga panalipdan sila ug ipakita ang atong gugma kanila. Kon atong mahibaloan nga dunay nahiubos nato, dili ni nato angayng balewalaon, nga maghunahuna nga ang tawo sensitibo ra kaayo ug kinahanglang palabyon na lang niya ang nahitabo. Ngano kahang ang pipila mahiubos? Tingali tungod sa ilang kagikan, may mga igsoon nga ubos kaayog panglantaw sa kaugalingon. Ang uban bag-o pa lang sa kamatuoran, ug wala pa sila makakat-on kon unsaon pag-atubang ang kasaypanan sa uban. Bisan unsa pa man, kinahanglang himoon nato ang atong maarangan aron mapasig-uli ang kalinaw. Sa laing bahin, ang tawo nga pirmeng mapandol angayng makaamgo nga kini maoy dili maayong kinaiya nga kinahanglan niyang wad-on. Kinahanglan ni niyang buhaton aron makabaton siyag kalinaw sa hunahuna ug maayong relasyon sa uban. w21.06 21 ¶7

Si Jesus makasabot sa imong gibati. Kon maguol ta, malipay ta dihang hupayon ta sa usa ka higala nga nakasabot sa atong gibati, ilabina kadtong nakaatubang ug kalisdanan nga susama sa atoa. Ingon niana nga higala si Jesus. Nahibalo siya kon unsay bation sa usa dihang maluya ug magkinahanglag tabang. Nakasabot siya sa atong kahuyangan, ug paneguroon niya nga madawat nato ang tabang ‘dihang gikinahanglan’ nato kini. (Heb. 4:15, 16) Sama nga gidawat ni Jesus ang tabang sa anghel didto sa tanaman sa Getsemane, kinahanglan nga andam sab tang modawat sa tabang nga itagana ni Jehova, pinaagi man sa publikasyon, video, pakigpulong, o makapadasig nga pagbisita gikan sa usa ka ansiyano o hamtong nga higala. (Luc. 22:39-44) Si Jehova maghatag nimog “kalinaw nga gikan sa Diyos” ug magpalig-on kanimo. Dihang moampo ta, madawat nato “ang kalinaw nga gikan sa Diyos, nga labaw sa tanang pagsabot.”​—Filip. 4:6, 7. w22.01 18-19 ¶17-19

Kanunayng husto ang ginahimo ni Jehova. Pero malisdan tingali ta nga mosalig niadtong gitudlo niya nga manguna kanato. Basig maghunahuna ta kon kadtong nanguna sa organisasyon ni Jehova milihok ba gyod base sa direksiyon ni Jehova o base lang sa ilang kaugalingong desisyon. Pero kon wala tay pagsalig nila, dili ta makaingon nga naa tay pagsalig kang Jehova. Karon, si Jehova naggiya sa yutan-ong bahin sa iyang organisasyon pinaagi sa “matinumanon ug maalamong ulipon.” (Mat. 24:45) Sama sa nagamandong lawas sa unang siglo, kini nga ulipon nagdumala sa katawhan sa Diyos sa tibuok kalibotan ug naghatag ug direksiyon sa mga ansiyano sa kongregasyon. Dayon, ipadapat sa mga ansiyano ang maong direksiyon diha sa kongregasyon. Ikapakita nato nga naa tay pagsalig sa pamaagi ni Jehova pinaagi sa pagsunod sa direksiyon nga atong madawat gikan sa organisasyon ug sa mga ansiyano. w22.02 4 ¶7-8

Giisip gyod nato nga dakong kalipay ug pribilehiyo ang pagkahimong mga Saksi ni Jehova! Malipay ta dihang matabangan nato nga mahimong magtutuo kadtong “nakiling sa pagdawat sa kamatuoran nga motultol sa kinabuhing walay kataposan.” (Buh. 13:48) Parehas tag gibati ni Jesus, kinsa “nalipay pag-ayo” diha sa balaang espiritu sa dihang gisultihan siya sa iyang mga tinun-an bahin sa ilang maayong mga eksperyensiya sa pagsangyaw. (Luc. 10:1, 17, 21) Si apostol Pablo nag-awhag kang Timoteo: “Tagda kanunay ang imong kaugalingon ug ang imong pagpanudlo.” Siya midugang: “Sa pagbuhat niini maluwas nimo ang imong kaugalingon ug kadtong maminaw nimo.” (1 Tim. 4:16) Busa ang atong pagsangyaw makaluwas ug kinabuhi. Kanunay natong gihatagag pagtagad ang atong kaugalingon kay sakop ta sa Gingharian sa Diyos. Gusto natong magkinabuhi kanunay sa paagi nga makahatag ug kadayeganan kang Jehova ug nahiuyon sa maayong balita nga atong gisangyaw. (Filip. 1:27) Atong gipakita nga gihatagan natog ‘pagtagad ang atong pagpanudlo’ pinaagi sa pagpangandam pag-ayo para sa ministeryo ug pagpangayog tabang kang Jehova sa dili pa mosangyaw. w21.10 24 ¶1-2

Ang tawo nga nagsul-ob sa “bag-ong personalidad” nagsundog sa personalidad ni Jehova. Masul-ob sa usa ka tawo ang bag-ong personalidad pinaagi sa pagpakita sa bunga sa espiritu sa Diyos, sa ato pa, tugotan niya ang balaang espiritu sa paggiya sa iyang panghunahuna, pagbati, ug binuhatan. Pananglitan, gihigugma niya si Jehova ug ang Iyang katawhan. (Mat. 22:36-39) Malipayon gihapon siya bisan pa sa mga kalisdanan. (Sant. 1:2-4) Malinawon siyag relasyon sa uban. (Mat. 5:9) Mapailobon siya ug buotan. (Col. 3:13) Gusto kaayo niyang mohimog maayo. (Luc. 6:35) Ginapakita niya sa buhat nga lig-on siyag pagtuo sa iyang langitnong Amahan. (Sant. 2:18) Kalmado gihapon siya bisag gusto siyang pasuk-on sa uban ug naa siyay pagpugong sa kaugalingon dihang tentalon. (1 Cor. 9:25, 27; Tito 3:2) Aron masul-ob ang bag-ong personalidad, kinahanglan natong ugmaron ang tanang hiyas nga gihisgotan sa Galacia 5:22, 23 ug sa ubang teksto sa Bibliya. w22.03 8-9 ¶3-4

Masundog sa mga ansiyano si apostol Pablo dili lang sa pagsangyaw sa balay ug balay, kondili pinaagi pod sa pagkaandam mosangyaw bisan asa ug bisan kanus-a. (Efe. 6:14, 15) Sama kang Pablo, sa dihang mosangyaw ang mga ansiyano, magamit nila ni nga panahon aron bansayon ang uban, apil ang mga ministeryal nga alagad. (1 Ped. 5:1, 2) Pero dili gyod tugotan sa mga ansiyano nga ma-busy kaayo sila sa ilang mga asaynment nga wala na silay panahon sa pagsangyaw. (Mat. 28:19, 20) Aron mahimong balanse, usahay kinahanglan tingali nilang balibaran ang ubang asaynment. Tingali human sa pagpamalandong ug pag-ampo, ilang makita nga kon dawaton nila ang maong asaynment, mapasagdan nila ang mas importanteng mga butang, sama sa pagdumalag pamilyahanong pagsimba, pagkahimong dasig sa pagsangyaw, o pagbansay sa ilang mga anak sa pagsangyaw. Makaseguro sila nga nakasabot si Jehova nga gusto lang nilang mahimong balanse sa tanang butang. w22.03 27 ¶4, 7; 28 ¶8

Niadtong nag-study pa ka, tingali nahadlok pod ka nga mahimong Saksi ni Jehova. Basin mibati ka nga dili gyod ka makahimo sa pagsangyaw sa balay ug balay. O tingali nahadlok ka nga supakon ka sa imong pamilya o mga higala. Kon mao, makasabot ka sa imong study dihang mobati sab siyag ingon niana. Si Jesus miingon nga posible nang mahitabo. Pero, gidasig niya ang iyang mga sumusunod nga dili tugotan ang kahadlok nga mopugong nila sa pag-alagad kang Jehova. (Mat. 10:16, 17, 27) Anam-anam nga bansaya ang imong Bible study sa pagsulti sa uban bahin sa iyang pagtuo. Ang mga tinun-an ni Jesus tingali gikulbaan dihang gipadala niya sila aron mosangyaw. Pero gitabangan sila ni Jesus pinaagi sa pagtudlo kanila kon kinsay sangyawan ug kon unsay isangyaw. (Mat. 10:5-7) Unsaon nimo pagsundog si Jesus? Tabangi ang imong study nga makita kon kinsay puwede niyang sangyawan. Pananglitan, pangutan-a siya kon duna ba siyay nailhan nga posibleng matabangan kon makakat-on sa usa ka espesipikong kamatuoran sa Bibliya. Dayon, tabangi siya sa pag-andam sa iyang isulti pinaagi sa pagpakita kaniyag simpleng paagi sa pagsulti sa uban niana nga kamatuoran. w21.06 6-7 ¶15-16

“Kalit lang nangahugno ang mga tindahan ug daang mga bilding.” “Nangalisang ang mga tawo . . . Daghan ang nag-ingon nga gidangtan tog mga dos minutos. Pero para nako, morag dugay kaayo to.” Kanay giingon sa pipila nga naluwas sa linog sa Nepal niadtong 2015. Pero, niining higayona mismo, nakaeksperyensiya tag lahi nga klase sa pag-uyog​—pag-uyog nga nagakahitabo sa tanang kanasoran. Si propetang Haggeo misulat: “Kini ang giingon ni Jehova sa mga panon, ‘Sa makausa pa​—sa dili na madugay—​akong uyogon ang kalangitan ug ang yuta.’” (Hag. 2:6) Ang pag-uyog nga gihisgotan ni Haggeo dili parehas sa literal nga linog nga magpahinabo lag kadaot. Hinunoa, kini nga pag-uyog dunay maayong mga resulta. Si Jehova mismo nag-ingon: “Akong uyogon ang tanang kanasoran, ug ang bililhong mga butang sa tanang kanasoran manulod; ug akong pun-on kining balaya sa himaya.” w21.09 14 ¶1-3

Aron masuod ka sa usa ka tawo, kinahanglan nga pirme mong mag-estorya ug isulti nimo kaniya ang imong gibati. Ingon ana sab sa atong pagpakighigala kang Jehova. Sa dihang ipahayag nato diha sa pag-ampo ang atong pagbati, hunahuna, ug mga kabalaka, atong gipakita nga may pagsalig ta kaniya ug nahibalo ta nga gimahal ta niya. (Sal. 94:17-19; 1 Juan 5:14, 15) Pakig-uban sa maunongong mga higala; sila regalo gikan kang Jehova. (Sant. 1:17) Ang atong langitnong Amahan nagpakitag personal nga interes kanato pinaagi sa pagtaganag espirituwal nga pamilya kinsa nagpakitag “gugma sa tanang panahon.” (Prov. 17:17) Sa iyang sulat sa mga taga-Colosas, gihisgotan ni apostol Pablo ang pipila ka Kristohanon nga mitabang niya ug “nakahupay pag-ayo” kaniya. (Col. 4:10, 11) Bisan si Kristo Jesus nagkinahanglag tabang gikan sa iyang mga higala​—mga anghel ug tawo—​ug giapresyar niya kana. (Luc. 22:43) Ang pagsulti sa atong mga kabalaka ngadto sa usa ka hamtong nga higala wala magpasabot nga huyang ta; kini makapanalipod hinuon kanato. w21.04 24-25 ¶14-16

Komosta kon natugaw kaayo ka sa gihimo sa usa ka igsoon? Paningkamoti nga mamentinar ang kalinaw. Isulti kang Jehova ang imong gibati. Hangyoa siya nga tabangan ang igsoon nga nakapahiubos nimo ug tabangan sab ka nga makita ang maayong mga hiyas nianang igsoona​—ang mismong mga hiyas nga gipabilhan ni Jehova diha kaniya. (Luc. 6:28) Kon dili nimo makalimtan ang nahimo sa imong igsoon, hunahunaa kon unsaon nimo siya pagpakig-estorya. Labing maayo nga maghunahuna ka nga dili gyod tuyo sa igsoon nga pasakitan ka. (Mat. 5:23, 24) Sa dihang makig-estorya ka niya, hunahunaa nga maayo ang iyang intensiyon. Komosta kon dili niya gustong makig-uli? ‘Magpadayon sa pagpailob’ kaniya. Ayawg surender. (Col. 3:13) Labaw sa tanan, ayaw gyod paghambin ug kayugot kay makadaot nâ sa imong relasyon kang Jehova. Ayaw gyod tugoti ang bisan unsa nga makapandol nimo. Kon buhaton nimo kana, imong gipamatud-an nga labaw nimong gimahal si Jehova kay sa bisan unsa.​—Sal. 119:165. w21.06 23 ¶15