Hulyo

Ang pag-disfellow maoy bahin sa kahikayan ni Jehova. Kini maoy para sa kaayohan sa tanan, apil na sa nakasala. Ang pipila diha sa kongregasyon moingon tingali nga sayop ang desisyon sa mga ansiyano nga i-disfellow ang usa ka indibiduwal. Pero hinumdomi nga kadtong nagkuwestiyon sa maong desisyon sagad dili mosultig negatibong mga butang bahin sa tawong nakasala. Wala ta mahibalo sa tanang detalye. Busa, salig nga ang mga ansiyano sa hudisyal nga komite naningkamot gyod sa pagsunod sa mga prinsipyo sa Bibliya ug sa paghukom “alang kang Jehova.” (2 Cron. 19:6) Pinaagi sa pagsuportar sa desisyon sa mga ansiyano nga i-disfellow ang imong minahal, mahimong matabangan nimo siya nga mobalik kang Jehova. “Lisod gyod para namo nga dili makig-uban sa among hingkod na nga anak,” miingon si Elizabeth. “Pero dihang mibalik na siya kang Jehova, siya miingon nga angay lang siyang ma-disfellow. Ngadtongadto, siya miingon nga daghan siyag nakat-onan nga maayong mga leksiyon.” w21.09 28-29 ¶11-12

Hunahunaa ang babayeng balo. Tingali gusto unta niyang mohatag ug labaw pa kang Jehova. Pero gihimo niya ang iyang maarangan. Gihatag niya kang Jehova ang iyang kinamaayohan. Ug nahibalo si Jesus nga ang amot sa babayeng balo bililhon kaayo sa iyang Amahan. Kini ang importanteng leksiyon para kanato: Si Jehova malipay sa dihang ihatag nato kaniya ang atong kinamaayohan​—ang atong tibuok kasingkasing ug tibuok kalag nga pag-alagad. (Mat. 22:37; Col. 3:23) Si Jehova malipay dihang makita niya nga gihimo nato ang atong maarangan! Kana nga prinsipyo mapadapat sa panahon ug kusog nga atong gigamit sa pagsimba, apil na sa atong ministeryo ug mga tigom. Sa unsang paagi mapadapat nimo ang imong nakat-onan bahin sa babayeng balo? Paghunahunag espesipikong mga indibiduwal nga kinahanglan tingaling pasaligan nga ang ilang mga paningkamot nakapalipay kang Jehova. Basin may nailhan kang tigulang nga sister nga tingali nakonsensiya o mibating way pulos kay dili na kaayo siya makapakigbahin sa ministeryo tungod sa luya nga panglawas. w21.04 6-7 ¶17, 19-20

Nahibalo si Jehova sa kinamaayohang panahon nga taposon kining daotang kalibotan. Tungod sa pagpailob ni Jehova, natigom ang dakong panon nga karon miabot nag minilyon. Sila nagsimba ug nagdayeg kaniya. Silang tanan nalipay sa taas nga pailob ni Jehova kay sila natawo pa, nakakat-on sa paghigugma kaniya, ug nakapahinungod sa ilang kaugalingon kaniya. Madayag nga husto ang desisyon ni Jehova nga molahutay sa dihang malipayon niyang gantihan ang minilyon kanato nga nakalahutay hangtod sa kataposan! Bisan pa sa tanang kagul-anan ug pag-antos nga gipahinabo ni Satanas, si Jehova malipayon gihapon nga Diyos. (1 Tim. 1:11) Makapabilin sab tang malipayon samtang mapailobon tang magpaabot nga si Jehova magbalaan sa iyang ngalan, magbindikar sa iyang pagkasoberano, magtapos sa tanang pagkadaotan, ug magwagtang sa tanan natong problema karon. Hinaot nga magmadeterminado ta nga molahutay ug makabatog kahupayan sa pagkahibalo nga ang atong langitnong Amahan nagmalahutayon sab. w21.07 13 ¶18-19

Daghan sa unang siglo ang wala motuo kang Jesus. Para nila, anak lang siya sa usa ka pobreng panday. Ug siya taga-Nasaret, usa ka siyudad nga tingali giisip sa mga tawo nga dili kaayo prominente. Bisan si Natanael, kinsa sa ulahi nahimong tinun-an ni Jesus, sa sinugdan miingon: “Duna bay maayo gikan sa Nasaret?” Basin naghunahuna siya sa tagna sa Miqueas 5:2 nga nag-ingon nga ang Mesiyas matawo sa Betlehem, dili sa Nasaret. Si propetang Isaias nagtagna nga ang mga kaaway ni Jesus dili magtagad sa ‘mga detalye sa kaliwatan’ sa Mesiyas. (Isa. 53:8) Kon ang maong mga tawo naggahin pag panahon sa pagsusi sa tanang impormasyon bahin kang Jesus, ila untang mahibaloan nga siya natawo sa Betlehem ug nga siya kaliwat ni Haring David. (Luc. 2:4-7) Sa ato pa, si Jesus natawo sa dapit nga gitagna sa Miqueas 5:2. Busa nganong wala man sila motuo kang Jesus? Ang mga tawo mihukom dayon. Wala nila susiha ang tanang impormasyon. Tungod niana, ilang gisalikway si Jesus. w21.05 2-3 ¶4-6

Ang Bibliya naghatag ug maayong mga pananglitan niadtong gipanalanginan kay midawat silag tambag. Konsideraha si Job. Bisag naa siyay kahadlok sa Diyos, dili siya perpekto. Ubos sa grabeng pagsulay, nakasulti siyag sayop nga mga butang. Ingong resulta, nakadawat siyag prangkang tambag gikan kang Elihu ug kang Jehova. Unsay reaksiyon ni Job? Siya miingon: “Ako misulti nga walay pagsabot . . . Akong bakwion ang akong gisulti, ug ako molingkod sa abog ug sa abo agig paghinulsol.” (Job 42:3-6, 12-17) Gipakita niya nga mapainubsanon siya dihang gidawat niya ang tambag ni Elihu bisag mas bata si Elihu. (Job 32:6, 7) Ang pagkamapainubsanon motabang pod nato sa pagdawat sa tambag bisag mobati ta nga ang tambag dili mapadapat kanato o mas bata ang nagtambag nato. Naa bay usa nato nga makaingon nga wala na siyay kinahanglang pauswagon kon bahin sa pagpakita sa bunga sa espiritu ug sa pagtuman sa Kristohanong ministeryo? w22.02 11 ¶8; 12 ¶12

Ang tanan diha sa kongregasyon dunay responsibilidad sa pagpalambo sa gugma ug kalinaw aron walay mobating nag-inusara. Ang atong mga pulong ug buhat puwedeng makadasig pag-ayo sa uban! Unsay imong mahimo aron tabangan kadtong nag-inusarang Saksi sa ilang pamilya nga mobating bahin sila sa kongregasyon? Pakighigala sa mga bag-ohan. Puwede nato silang kinasingkasing nga abiabihon sa atong kongregasyon. (Roma 15:7) Pero dili igo ang pagtimbaya lang kanila. Gusto nato nga sa ngadtongadto masuod nato sila. Busa pakitaig kaayo ug sinserong interes ang mga bag-ohan. Paningkamoti nga mahibaloan kon unsang mga problema ang ilang giatubang, pero likayi ang mga pangutana nga makapaulaw nila. Ang pipila tingali malisdan sa pagsulti sa ilang gibati, busa pag-amping nga dili sila pugson sa pag-estorya. Hinunoa, gamita ang mataktikanhong mga pangutana aron madasig sila sa pagsulti, ug dayon paminaw nga mapailobon sa ilang tubag. Pananglitan, puwede nimo silang pangutan-on kon sa unsang paagi nila nakat-onan ang kamatuoran. w21.06 11 ¶13-14

Gipabilhan nato ang pribilehiyo nga mahiusa sa pag-alagad kang Jehova ingong “usa ka panon ubos sa usa ka magbalantay”! Ang librong Organisado Aron Buhaton ang Kabubut-on ni Jehova, panid 165, nag-ingon: “Kay nakapahimulos ka sa maong panaghiusa, duna kay responsibilidad nga motabang sa pagmentinar niana.” Busa, kinahanglang “bansayon nato ang atong kaugalingon nga lantawon ang atong mga igsoon sumala sa paglantaw ni Jehova kanila.” Kitang tanang “ubos nga mga tawo” bililhon kang Jehova. Mao ba sab nay panglantaw nimo sa mga igsoon? Nakita ug gipabilhan ni Jehova ang tanan nimong gibuhat sa pagtabang ug pagpakitag gugma kanila. (Mat. 10:42) Gimahal nato ang atong mga isigkamagsisimba. Busa ‘determinado [ta] nga dili maghimog bisan unsa nga makapandol o makababag sa usa ka igsoon.’ (Roma 14:13) Giisip nato ang atong mga igsoon nga mas labaw kay kanato, ug gusto nato silang pasayloon nga kinasingkasing. Hinaot nga dili nato tugotan nga mapandol ta sa uban. Hinunoa, “buhaton nato ang tanan aron malinawon ang atong relasyon sa uban ug madasig ang usag usa.”—Roma 14:19. w21.06 24 ¶16-17

Kon makugihon natong tun-an ug ipadapat ang tambag nga atong madawat gikan sa Pulong sa Diyos ug sa iyang organisasyon, anam-anam natong maugmad ang mga hiyas sa Kristo. Mouswag sab ang atong kahibalo sa Diyos. Si Jesus migamit ug ilustrasyon aron ipatin-aw kon sa unsang paagi ang mensahe sa Gingharian nga atong gisangyaw nahisamag gamayng binhi nga anam-anam nga motubo sa kasingkasing sa mga tawo nga nahigugma sa pagkamatarong. Siya miingon: “Ang binhi moturok ug motubo​—kon sa unsang paagi, siya [ang nagpugas] wala mahibalo. Sa kaugalingon niini, ang yuta inanay nga magpatubo sa binhi; una ang lindog, dayon ang uhay, ug sa kataposan ang bus-ok nga mga lugas sa uhay.” (Mar. 4:27, 28) Gipatin-aw ni Jesus nga sama nga ang tanom anam-anam nga motubo, ang tawo nga modawat sa mensahe sa Gingharian anam-anam sab nga mouswag sa espirituwal. Pananglitan, samtang ang atong mga Bible study mas masuod kang Jehova, makita nato ang daghang maayong mga kausaban nga ilang nahimo. (Efe. 4:22-24) Pero kinahanglan natong hinumdoman nga si Jehova ang nagpatubo nianang gamayng binhi. w21.08 8-9 ¶4-5

Sa unsang paagi magmalipayon ta? Ang tawo nga “malipay sa kon unsay makita sa mata” mobatig katagbawan sa iyang nabatonan, sama sa iyang presenteng mga sirkumstansiya. Pero, ang tawo nga nagtinguha sa mga butang nga dili mabatonan dili gyod matagbaw. Busa unsay atong makat-onan? Aron magmalipayon, kinahanglan nga magpokus ta sa kon unsay atong nabatonan ug sa mga tumong nga puwede natong makab-ot. Posible ba gyod nga matagbaw ta sa mga butang nga ato nang nabatonan? Daghan ang naghunahuna nga dili nâ posible kay natural lang nga ganahan tang mokat-on ug bag-ong mga butang. Pero sa pagkatinuod, posible nâ. Puwede tang mobatig tinuod nga kalipay sa “makita sa [atong] mata.” Sa unsang paagi mahimo nato kana? Aron mahibaloan, konsideraha ang ilustrasyon ni Jesus sa mga talanton nga mabasa sa Mateo 25:14-30 ug matikdi kon sa unsang paagi magmalipayon ta ug mahimo pa ganing mas malipayon sa atong presenteng kahimtang. w21.08 21 ¶5-6

Si Jehova mahunahunaon kaayo niadtong “mga nahugno.” Kitang tanan, dili lang ang mga ansiyano, makatabang sa pagdasig sa atong minahal nga mga igsoon. Ang usa ka paagi nga madasig nato sila mao ang pagpakitag sinserong interes kanila. Gusto ni Jehova nga ipakita nato kanila ang kadako sa iyang gugma kanila. (Prov. 19:17) Makatabang sab ta sa atong mga igsoon pinaagi sa pagpabiling mapainubsanon ug dili pagpanghambog sa atong mga abilidad. Dili nato gusto nga mapokus kanato ang atensiyon sa uban nga tungod niana, masina sila kanato. Hinunoa, gamiton nato ang atong mga abilidad ug kahibalo sa pagdasig sa usag usa. (1 Ped. 4:10, 11) Daghan tag makat-onan kon unsaon pagtratar ang uban pinaagi sa pagkonsiderar kon giunsa pagtratar ni Jesus ang iyang mga sumusunod. Siya ang labing bantogang tawo nga nabuhi sukad. Pero, siya “malumo ug mapainubsanon.” (Mat. 11:28-30) Nanudlo siya gamit ang simpleng mga pulong ug mga ilustrasyon nga nakatandog sa kasingkasing sa mapainubsanong mga tawo.​—Luc. 10:21. w21.07 23 ¶11-12

Pakig-estorya sa mga tigulang. Tinuod, hanap na tingali ang ilang panan-aw ug hinay na tingali ang ilang linakwan ug sinultihan, pero daghan pa gihapon silag gustong buhaton ug nakahimo silag “maayong ngalan” kang Jehova. (Eccl. 7:1) Hinumdomi kon nganong gipabilhan sila ni Jehova. Padayon silang tahora. Sundoga si Eliseo. Miinsistir siya nga dili mobiya kang Elias sa kataposang adlaw nga magkauban sila. Tulo ka beses nga miingon si Eliseo: “Dili ka nako biyaan.” (2 Hari 2:2, 4, 6) Ipakita ang sinserong interes sa mga tigulang pinaagi sa matinahorong pagpangutana kanila. (Prov. 1:5; 20:5; 1 Tim. 5:1, 2) Pananglitan, puwede nimo silang pangutan-on: “Sa batabata pa ka, unsay nakapakombinsir nimo nga nakaplagan nimo ang kamatuoran?” “Sa unsang paagi ang imong mga kasinatian mas nakapasuod nimo kang Jehova?” “Unsay nakatabang nimo sa pagpabiling malipayon sa pag-alagad kang Jehova?” (1 Tim. 6:6-8) Dayon, paminaw samtang isulti nila ang ilang kasinatian. w21.09 5 ¶14; 7 ¶15

Dihang himoon nimo ang imong maarangan sa pagtuman sa sugo nga mosangyaw ug maghimog mga tinun-an, imong gipakita nga gimahal nimo ang Diyos. (1 Juan 5:3) Hunahunaa kini: Ang imong gugma kang Jehova nagpalihok na nimo sa pagsangyaw. Sayon ra bang tumanon ang maong sugo? Tingali dili. Dihang misangyaw ka sa unang higayon, gikulbaan ka ba? Segurado! Pero nahibalo ka nga kini ang buluhaton nga gustong ipahimo ni Jesus kanimo, ug gituman nimo ang iyang sugo. Ug posible, nga paglabay sa panahon, mas sayon na para nimo ang buluhatong pagsangyaw. Pero komosta ang pagdumalag pagtuon sa Bibliya? Kulbaan ka bang maghunahuna niana? Tingali. Pero dihang mangayo kag tabang kang Jehova nga madaog ang imong kakulba ug makabatog kaisog sa pagtanyag ug pagtuon sa Bibliya, si Jehova makapalig-on sa imong tinguha sa paghimog mga tinun-an. w21.07 3 ¶7

Ang mga ulipon sa karaang panahon gimarkahan aron mailhan kon kinsay nanag-iya nila. Sa susama, ang tanan karon gidahom nga dunay simbolikong marka sa ilang kamot o agtang. Ang ilang mga hunahuna ug lihok magpakita nga ang gobyerno niining sistemaha maoy nanag-iya nila ug maoy ilang gisuportahan. Dawaton ba nato kining simbolikong marka ug suportahan ang mga gobyerno niining kalibotana? Kadtong dili modawat sa marka makasinatig mga kalisdanan ug kapeligrohan. Ang basahon sa Pinadayag nag-ingon: “Walay si bisan kinsa nga makapalit o makabaligya gawas sa tawong nakabaton sa marka.” (Pin. 13:17) Pero ang katawhan sa Diyos nahibalo kon unsay Iyang himoon niadtong nakabaton sa marka nga gihisgotan sa Pinadayag 14:9, 10. Busa imbes dawaton ang maong marka, samag gisulatan nila ang ilang kamot ug, “Iya ni Jehova.” (Isa. 44:5) Karon na ang panahon nga palig-onon nato ang atong pagkamaunongon kang Jehova. Kon ato nang buhaton, malipay gyong moingon si Jehova nga siyay nanag-iya nato! w21.09 18 ¶15-16

Aron molampos sa atong ministeryo, puwede tang mangayog tabang sa uban. Gitudloan ni apostol Pablo si Timoteo ug mga pamaagi sa pagsangyaw ug pagpanudlo, ug gidasig niya si Timoteo nga gamiton kana sa pagtabang sa uban. (1 Cor. 4:17) Sama kang Timoteo, makakat-on ta sa eksperyensiyadong mga igsoon sa kongregasyon. Dugang pa, pangayog tabang kang Jehova. Pangayog giya kang Jehova matag higayon nga mosangyaw ka. Kon wala ang tabang sa iyang gamhanang balaang espiritu, dili gyod ta molampos. (Sal. 127:1; Luc. 11:13) Sa dihang mangayo kag tabang kang Jehova diha sa pag-ampo, magmaespesipiko. Pananglitan, hangyoa siya nga tultolan ka niya niadtong gustong makakat-on bahin kaniya ug andam maminaw. Kinahanglan sab tang mogahin ug panahon para sa personal nga pagtuon. Ang Pulong sa Diyos nag-ingon: ‘Pamatud-i sa inyong kaugalingon ang maayo ug dalawaton ug hingpit nga kabubut-on sa Diyos.’ (Roma 12:2) Kon mas kombinsido ta nga nahibalo ta sa kamatuoran bahin sa Diyos, mas kombinsido pod tang makigsulti sa uban diha sa ministeryo. w21.05 17-18 ¶14-16

Komosta kon bisan pa sa imong mga paningkamot ug pag-ampo para sa imong Bible study, wala gihapon siya mouswag ug kinahanglan na nimong ihunong ang inyong pagtuon? O komosta kon wala gyod kay Bible study nga nagpabawtismo? Angay ba kang makonsensiya, nga tingali maghunahuna nga wala panalangini ni Jehova ang imong ministeryo? Matikdi kon sa unsa ibase ni Jehova ang kalamposan sa atong ministeryo. Si Jehova nagpokus sa atong paningkamot ug paglahutay. Isipon ni Jehova nga malamposon ang atong ministeryo kon himoon nato ni nga makugihon tungod sa atong gugma kaniya, maminaw man ang mga tawo o dili. Si Pablo misulat: “Ang Diyos matarong, ug dili niya kalimtan ang inyong buhat ug ang gugma nga inyong gipakita para sa iyang ngalan pinaagi sa pag-alagad ug sa padayon ninyong pag-alagad sa mga balaan.” (Heb. 6:10) Si Jehova mahinumdom sa atong mga buhat ug sa atong gugma, bisan pag ang atong mga paningkamot walay maayong resulta. Busa, puwede pong mapadapat kanato ang giingon ni Pablo sa teksto karong adlawa. w21.10 25 ¶4-6

Ang kaayo ug gugma ni Jesus makita diha sa iyang paagi sa pagtratar sa iyang mga tinun-an. Nahibalo siya nga lainlain silag abilidad ug kahimtang. Busa dili pareho ang ilang maabaga nga responsibilidad, ug dili sab pareho ang ilang mahimo diha sa ministeryo. Pero giapresyar niya ang kinasingkasing nga paningkamot sa kada usa. Ang pagkamasinabtanon ni Jesus makita diha sa ilustrasyon sa mga talanton. Niana nga ilustrasyon, gihatagan sa agalon ang matag ulipon ug buluhaton “sumala sa katakos sa matag usa.” Ang usa sa duha ka kugihang ulipon mas daghag nahimo. Pero silang duha parehong giingnan sa agalon: “Dalayegon ang imong gihimo, maayo ug kasaligan nga ulipon!” (Mat. 25:14-23) Si Jesus nagpakitag kaayo ug gugma diha sa iyang paagi sa pagtratar kanato. Nahibalo siya nga lainlain ang atong abilidad ug kahimtang, ug malipay siya dihang himoon nato ang atong kinamaayohan. Angay natong sundogon si Jesus. w21.07 23 ¶12-14

Dihay mga higayon nga si Haring David wala magpakitag kaluoy. Pananglitan, dihang ang ngil-ad kaayog batasan nga si Nabal nanginsulto ug wala mohatag ug pagkaon kaniya ug sa iyang mga sundalo, nasuko kaayo si David ug gusto niyang patyon si Nabal ug ang tanang lalaki sa panimalay niini. Maayo na lang kay milihok dayon ang buotan ug mapailobong asawa ni Nabal nga si Abigail. Busa, nalikayan ni David nga mahimong sad-an sa dugo. (1 Sam. 25:9-22, 32-35) Matikdi nga sa dihang si David nadala sa iyang kasuko, siya miingon nga si Nabal ug ang tanang lalaki sa panimalay niini angayng patyon. Ug sa ulahi, si David miingon nga ang datong tawo sa ilustrasyon ni Natan angayng mamatay. Niining ikaduhang higayon, matingala tingali ta kon nganong ang usa ka mahigugmaong tawo mohatag ug ingon niana ka bug-at nga paghukom. Tagda ang konteksto. Nianang panahona, si David gihasol sa iyang konsensiya. Kon ang usa magpakanaog ug bug-at ra kaayo nga paghukom sa uban, timailhan nâ nga dili maayo ang iyang relasyon kang Jehova. w21.10 12 ¶17-18; 13 ¶20

Sa teksto karong adlawa, atong makat-onan nga masundog nato si Jehova, ang kinalabwang ehemplo sa pagkabalaan. Kinahanglang balaan ta sa atong panggawi. Morag imposible nâ kay dili ta hingpit. Si apostol Pedro mismo daghag nahimong sayop, pero makita nato sa iyang ehemplo nga puwede tang mahimong balaan. Kon maghunahunag tawong balaan, sagad maimadyin sa kadaghanan ang tawo nga dili malipayon, kinsa nagsul-ob ug sotana o uban pang espesyal nga sinina ug seryoso kaayog dagway. Pero dili kana ang gipasabot sa pagkabalaan. Si Jehova, kinsa balaan, gitawag ug “malipayong Diyos.” (1 Tim. 1:11) Ang iyang mga magsisimba “malipayon” sab. (Sal. 144:15) Ug gisaway ni Jesus kadtong nagsul-ob ug mapasigarbohong mga sinina ug naghimog maayo atubangan sa mga tawo aron dayegon. (Mat. 6:1; Mar. 12:38) Ingong mga Kristohanon, gibase nato ang atong panglantaw sa pagkabalaan sa kon unsay atong nakat-onan sa Bibliya. Nahibalo ta nga ang atong mahigugmaong Diyos dili gyod mohatag ug sugo nga dili nato kayang sundon. w21.12 2 ¶1, 3

Sa tanang regalo nga mahigugmaong gihatag sa Diyos kanato, ang usa sa kinamaayohan mao ang katakos sa pagsimba kaniya. Atong gipakita kang Jehova nga gihigugma nato siya pinaagi sa ‘pagtuman sa iyang mga sugo.’ (1 Juan 5:3) Ang usa sa mga sugo nga gusto ni Jehova nga atong sundon mao ang sugo nga gihatag ni Jesus—ang paghimog mga tinun-an ug pagbawtismo kanila. (Mat. 28:19) Gisugo sab ta niya nga maghigugmaay. (Juan 13:35) Kadtong motuman sa mga sugo ni Jehova dawaton niya ingong bahin sa iyang tibuok kalibotang pamilya sa mga magsisimba. (Sal. 15:1, 2) Magpakita tag gugma sa uban. Ang gugma mao ang kinalabwang hiyas ni Jehova. (1 Juan 4:8) Si Jehova nahigugma na kanato sa wala pa gani ta makaila kaniya. (1 Juan 4:9, 10) Masundog nato siya pinaagi sa pagpakitag gugma sa uban. (Efe. 5:1) Ang usa sa kinamaayohang mga paagi nga ikapakita nato ang gugma ngadto sa mga tawo mao ang pagtabang kanila nga makakat-on bahin kang Jehova samtang may panahon pa. (Mat. 9:36-38) Sa paghimo niana, gihatagan nato silag kahigayonan nga mahimong membro sa pamilya sa Diyos. w21.08 5-6 ¶13-14

Gihigugma pag-ayo ni Jesus si Jehova maong mihimo siyag mga sakripisyo para sa iyang Amahan ug para nato. (Juan 14:31) Ang iyang paagi sa pagkinabuhi dinhi sa yuta nagpakita nga gihigugma niya pag-ayo ang mga tawo. Kada adlaw, nagpakita siyag gugma ug kaluoy bisan dihang naay misupak niya. Ang importanteng paagi nga nagpakita siyag gugma sa mga tawo mao ang pagtudlo kanila bahin sa Gingharian sa Diyos. (Luc. 4:43, 44) Gihigugma gyod ni Jesus ang Diyos ug mga tawo kay kinabubut-on niyang giantos ang sakit nga kamatayon diha sa kamot sa mga makasasala. Pinaagi ana, iyang giablihan ang kahigayonan nga makabaton ug kinabuhing walay kataposan ang tanan. Atong gipahinungod ang atong kaugalingon kang Jehova ug nagpabawtismo ta kay gihigugma nato ang atong langitnong Amahan. Busa parehas kang Jesus, angay tang magpakitag gugma kang Jehova pinaagi sa atong maayong pagtratar sa uban. Si apostol Juan misulat: “Kon wala siya mahigugma sa iyang igsoon nga iyang nakita, unsaon man niya paghigugma sa Diyos nga wala niya makita?”​—1 Juan 4:20. w22.03 10 ¶8-9

Bisag ganahan tang mogahin ug panahon uban kang Jehova, dili ni kanunayng sayon. Busy kaayo ta, maong malisdan tingali ta sa pag-eskedyul ug panahon para sa espirituwal nga mga kalihokan. Ang trabaho, mga responsibilidad sa pamilya, ug ubang importanteng mga kalihokan dakog makuha sa atong panahon maong usahay mobati ta nga tungod sa atong ka-busy, wala na tay panahon sa pag-ampo, pagtuon, o pagpamalandong. Naa pay laing butang nga makahurot sa atong panahon. Kon dili ta mag-amping, basin ma-busy na ta sa mga kalihokan nga dili ra sayop pero makakuha sa panahon nga angay unta natong gamiton sa pagpakigsuod kang Jehova. Tagda pananglitan ang paglingawlingaw. Makahatag natog kaayohan ang pagrelaks usahay. Pero bisan ang maayong kalingawan puwedeng makahurot sa atong panahon, nga gamay na lay mabilin para sa espirituwal nga mga kalihokan. Angay natong hinumdoman nga ang paglingawlingaw dili mao ang pinakaimportante.​—Prov. 25:27; 1 Tim. 4:8. w22.01 26 ¶2-3

Dihang gisugo ni Jehova ang mga Israelinhon nga higugmaon ang ilang isigkatawo, wala siya magpasabot nga higugmaon lang nila kadtong parehas nilag rasa o nasyonalidad. Gisugo sab niya sila nga higugmaon ang mga langyaw nga nagpuyo uban kanila. Kanay giingon sa Levitico 19:33, 34. Angay nilang trataron ang langyaw sama sa ilang pagtratar sa ilang isigka-Israelinhon ug ‘higugmaon siya’ sama sa ilang paghigugma sa kaugalingon. Pananglitan, ang Balaod nag-ingon nga kinahanglang tugotan sa mga Israelinhon ang mga langyaw ug ang mga pobre nga manghagdaw. (Lev. 19:9, 10) Ang prinsipyo nga higugmaon ang mga langyaw mapadapat sa mga Kristohanon karon. (Luc. 10:30-37) Sa unsang paagi? Minilyon karon ang namalhin sa laing nasod ug posible nga ang pipila kanila nagpuyo sa inyong lugar. Kinahanglang trataron nato ang maong mga lalaki, babaye, ug mga bata uban ang dignidad ug pagtahod. w21.12 12 ¶16

Kon mosalig ta sa giya ni Jehova karon, mas molig-on ang atong pagsalig sa iyang katakos sa pagluwas kanato sa umaabot. Gikinahanglan ang lig-ong pagtuo ug bug-os nga pagsalig kang Jehova aron makabaton tag kaisog sa paghangyo sa atong amo nga mobakasyon aron motambog asembliya o kombensiyon, o kaha sa paghangyo nga usbon ang atong eskedyul sa trabaho aron makatambong sa tanang tigom ug makagahin ug dugang panahon sa ministeryo. Ibutang ta nga ang atong amo wala mosugot ug nawad-an tag trabaho. Duna ba tay pagtuo nga dili gyod ta biyaan o talikdan ni Jehova ug nga kanunay gyod ta niyang tagan-an sa atong pangunang mga panginahanglan? (Heb. 13:5) Daghan niadtong naa sa bug-os panahong pag-alagad ang makaasoy ug mga eksperyensiya kon giunsa sila pagtabang ni Jehova sa panahon nga gikinahanglan kaayo nila siya. Si Jehova kasaligan. Kay si Jehova nagauban kanato, wala tay rason nga mahadlok kon unsay mahitabo sa umaabot. Dili gyod ta biyaan sa atong Diyos kon kanunay natong unahon ang iyang kabubut-on. w22.01 7 ¶16-17

Sa unsang paagi tingali masulayan ang atong pagsalig sa mga ansiyano? Ibutang ta nga ang gi-disfellow suod nato. Maghunahuna tingali ta nga wala konsideraha sa mga ansiyano ang tanang detalye, o kaha magduhaduha ta kon ang ilang desisyon mao ba gyod ang desisyon ni Jehova. Unsay makatabang aron padayon tang mosalig sa desisyon sa mga ansiyano? Angay natong hinumdoman nga ang pag-disfellow maoy kahikayan ni Jehova. Makahatag nig kaayohan sa kongregasyon ug posibleng makatabang pod sa nakasala. Kon ang makasasala nga dili mahinulsolon magpabilin sa kongregasyon, puwede niyang maimpluwensiyahan ang uban. (Gal. 5:9) Gawas pa, maghunahuna tingali siya nga dili ra seryoso ang iyang sala ug dili tingali siya maningkamot nga bag-ohon ang iyang panghunahuna ug binuhatan aron mabalik ang iyang maayong relasyon kang Jehova. (Eccl. 8:11) Makaseguro ta nga dili sayonsayonon sa mga ansiyano ang pagdesisyon kon angay bang i-disfellow ang usa ka tawo. w22.02 5-6 ¶13-14

Importante nga mapailobon ug buotan ka ilabina kon ang gitambagan dili dayon magpadapat sa giingon sa Bibliya. Ang ansiyano angayng magbantay nga dili siya maglagot kon ang iyang tambag dili dayon dawaton o ipadapat. Busa sa iyang kaugalingong mga pag-ampo, ang ansiyano makahangyo kang Jehova nga tabangan ang igsoon nga makasabot kon nganong gitambagan siya ug tabangan pod nga ipadapat kini. Ang igsoon nagkinahanglan tingalig panahon sa pagpamalandong sa tambag nga iyang nadawat. Kon ang ansiyano mapailobon ug buotan, mas sayon para sa igsoon nga maminaw sa iyang tambag. Siyempre, ang tambag angayng ibase kanunay sa Pulong sa Diyos. Gusto nato nga ang atong tambag dili lang basta epektibo kondili “makapalipay [pod] sa kasingkasing.”​—Prov. 27:9. w22.02 18 ¶17; 19 ¶19

Dihang mag-ampo ta alang sa kusog sa pag-atubang sa usa ka kalisdanan o kahuyangan, mobati tingali ta nga dugay motubag si Jehova sa atong mga pag-ampo. Nganong duna tay mga pag-ampo nga dili dayon tubagon ni Jehova? Iyang giisip ang atong kinasingkasing nga mga pag-ampo ingong ebidensiya sa atong pagtuo. (Heb. 11:6) Interesado sab si Jehova nga makita kon unsa ta ka determinado nga magkinabuhi sumala sa atong mga pag-ampo ug mobuhat sa iyang kabubut-on. (1 Juan 3:22) Busa, kinahanglan tingali tang magpailob ug molihok sumala sa atong mga pag-ampo dihang maningkamot ta nga madaog ang dili maayong kinaiya o kahuyangan. Gipakita ni Jesus nga ang pipila sa atong mga pag-ampo dili tingali tubagon dayon. Siya miingon: “Padayon sa pagpangayo, ug kamo pagahatagan; padayon sa pagpangita, ug kamo makakaplag; padayon sa pagpanuktok, ug kamo pagaablihan; kay ang matag usa nga mangayo makadawat, ug ang matag usa nga mangita makakaplag, ug ang matag usa nga manuktok pagaablihan.”​—Mat. 7:7, 8. w21.08 8 ¶1; 10 ¶9-10

Aron molig-on ang imong pagtuo sa Maglalalang, kinahanglang padayon nimong tun-an ang Pulong sa Diyos. (Jos. 1:8) Matikdi kon unsa ka detalyado ang paghisgot sa Bibliya sa mga panghitabo sa kasaysayan. Matikdi sab ang mga tagna niini ug ang pagkaharmonya sa mga nasulat niini. Ang paghimo niana makapalig-on sa imong pagtuo nga usa ka mahigugmaon, maalamong Maglalalang ang naghimo kanato ug nga iyang gipasulat ang Bibliya. (2 Tim. 3:14; 2 Ped. 1:21) Dihang magtuon sa Pulong sa Diyos, matikdi kon sa unsang paagi makatabang ang tambag niini. Pananglitan, ang Bibliya dugay nang nagpasidaan nga ang gugma sa kuwarta makadaot ug makahatag ug “daghang kasakitan.” (1 Tim. 6:9, 10; Prov. 28:20; Mat. 6:24) Busa, makatabang gyod ang pasidaan sa Bibliya nga dili higugmaon ang kuwarta! Makahunahuna ba kag uban pang prinsipyo sa Bibliya nga nakatabang nimo? Kon mas maapresyar nato ang tambag sa Bibliya, mas mosalig ta sa way paglubad nga kaalam gikan sa atong mahigugmaong Maglalalang. (Sant. 1:5) Ingong resulta, ang atong kinabuhi mas magmalipayon.​—Isa. 48:17, 18. w21.08 17-18 ¶12-13

Kon nagkatigulang ka na, magmasaligon nga si Jehova nahinumdom sa tanan nimong nahimo kaniadto. Madasigon nimong gisuportahan ang buluhatong pagsangyaw. Milahutay ka sa mga kalisdanan, bisan niadtong makapaguol kaayo. Gisunod ug gidepensahan sab nimo ang matarong nga mga sukdanan sa Bibliya, matinumanong giatiman ang bug-at nga mga responsibilidad, ug gibansay ang uban. Gihimo nimo ang imong kinamaayohan aron maka-adjust sa daghang kausaban sa organisasyon ni Jehova. Imong gisuportahan ug gidasig ang uban nga naa sa bug-os panahong pag-alagad. Gimahal kaayo ka ni Jehova nga Diyos tungod sa imong pagkamaunongon. Siya nagsaad nga “dili niya biyaan ang mga maunongon kaniya”! (Sal. 37:28) Gipasaligan ka niya: “Hangtod sa imong pagkaubanon, ako padayong magpas-an kanimo.” (Isa. 46:4) Busa ayaw paghunahuna nga kay tigulang na ka, dili na ka importante sa organisasyon ni Jehova. Bililhon gihapon kaayo ka! w21.09 3 ¶4

Si Jehova nagpakitag kaluoy tungod sa iyang dili hitupngang kaalam. Ang Bibliya nag-ingon nga “ang kaalam nga gikan sa langit” “puno sa kaluoy ug maayong mga bunga.” (Sant. 3:17) Samag mahigugmaong ginikanan, si Jehova nahibalo nga ang iyang kaluoy makahatag ug kaayohan sa iyang mga anak. (Isa. 49:15) Ang kaluoy ni Jehova naghatag ug paglaom sa katawhan bisag dili sila hingpit. Busa ang walay kinutobang kaalam ni Jehova magpalihok niya sa pagpakitag kaluoy dihang makita niya nga dunay basehanan sa paghimo niana. Pero nahibalo sab si Jehova kon kanus-a siya dili angayng magpakitag kaluoy. Kay maalamon siya, dili gyod siya magpakitag kaluoy kon ang pagbuhat niana magkonsentir sa sayop nga binuhatan. Ibutang ta nga ang usa ka alagad sa Diyos tinuyong nagpakasala. Unsay angay natong buhaton? Si Jehova naggiya kang Pablo sa pagsulat: ‘Hunong na sa pagpakig-uban’ sa maong tawo. (1 Cor. 5:11) Ang dili mahinulsolong makasasala palagpoton gikan sa kongregasyon. Kinahanglan kanang buhaton aron mapanalipdan ang atong matinumanong mga igsoon ug mapakita ang pagkabalaan ni Jehova. w21.10 9-10 ¶7-8

Nagsimba ta kang Jehova dihang atong suportahan ang buluhaton sa Gingharian pinaagi sa atong mga donasyon. Dihang ang mga Israelinhon moatubang kang Jehova, kinahanglan nga naa silay dala. (Deut. 16:16) Magdala silag materyal nga regalo sumala sa ilang maarangan. Pinaagi niana, ikapakita nila nga mapasalamaton sila sa tanang gihimo ni Jehova para nila. Unsaon nato pagpakita ang atong gugma kang Jehova ug ang atong apresasyon sa espirituwal nga mga tagana nga atong nadawat? Ang usa ka paagi mao ang paghatag ug donasyon sa atong kongregasyon ug sa tibuok kalibotang buluhaton sumala sa atong maarangan. Si apostol Pablo miingon: “Kon naa na daan ang pagkaandam, ang paghatag mas dalawaton, sa ato pa, paghatag nga sumala sa kon unsay nabatonan sa usa, dili sa kon unsay wala niya.” (2 Cor. 8:4, 12) Si Jehova malipay kaayo sa atong kinasingkasing nga donasyon, bisag unsa pa ni ka gamay.​—Mar. 12:42-44. w22.03 24 ¶13

Dili kayang wad-on sa mga ansiyano ang tanang problema sa katawhan ni Jehova. Bisan pa ana, gusto ni Jehova nga himoon sa mga ansiyano ang ilang maarangan aron dasigon ug protektahan ang iyang katawhan. Bisag busy ang mga ansiyano, unsaon nila paggahin ug panahon aron tabangan ang mga igsoon? Sundoga ang ehemplo ni apostol Pablo. Si Pablo nangitag paagi aron apresyahon ug dasigon ang mga igsoon. Maayo gyong sundogon sa mga ansiyano ang iyang ehemplo pinaagi sa mapinanggaong pag-atiman sa katawhan ni Jehova. (1 Tes. 2:7) Gipasaligan ni Pablo ang mga igsoon nga gimahal niya sila ug gimahal pod sila ni Jehova. (2 Cor. 2:4; Efe. 2:4, 5) Gitratar ni Pablo ang mga igsoon ingong iyang mga higala ug naggahin siyag panahon kanila. Gipakita niya nga misalig siya nila kay iyang gisultian sila sa iyang mga kahuyangan ug gikabalak-an. (2 Cor. 7:5; 1  Tim. 1:15) Pero imbes magpokus si Pablo sa iyang mga problema, iyang gitabangan ang mga igsoon. w22.03 28 ¶9-10