Agosto

Posible nga ang gipasabot ni Jesus mao ang Romanong mga sundalo nga naglansang sa iyang kamot ug tiil. Bisan pa sa mga inhustisya nga nasinati ni Jesus, wala siya masuko ug magdumot. (1 Ped. 2:23) Sama kang Jesus, kinahanglan nga andam tang mopasaylo sa uban. (Col. 3:13) Ang pipila, apil ang atong pamilya, mosupak tingali nato kay wala sila makasabot sa atong gituohan ug sa atong paagi sa pagkinabuhi. Tingali mosulti silag bakak bahin kanato, magpakaulaw nato atubangan sa uban, magdaot sa atong mga literatura, o manghulga pa gani nga pasakitan ta. Imbes magdumot, puwede tang mohangyo kang Jehova nga buksan ang mga mata niadtong nagsupak kanato aron nga sa umaabot masabtan nila ang kamatuoran. (Mat. 5:44, 45) Usahay, malisdan tingali ta sa pagpasaylo, ilabina kon nakasinati tag grabeng inhustisya. Pero kon tugotan nato nga magpabilin sa atong kasingkasing ang kasuko ug pagdumot, gipasakitan nato ang atong kaugalingon. (Sal. 37:8) Sa dihang modesisyon ta nga magpasaylo, gipili nato nga dili magdumot bisan pa sa negatibong mga butang nga atong naeksperyensiyahan.—Efe. 4:31, 32. w21.04 8-9 ¶3-4

Duna ka bay minahal nga na-disfellow? Makapaguol kaayo nâ! Hunahunaa ang kaguol ni Jehova sa dihang ang pipila niya ka anak nga mga anghel mibiya kaniya! (Jud. 6) Ug imadyina ang kasakit nga iyang gibati dihang nakita niya ang iyang minahal nga katawhan, ang mga Israelinhon, nga sublisubling mirebelde kaniya. (Sal. 78:41) Makaseguro ka nga ang atong mahigugmaong langitnong Amahan masakitan sab sa dihang ang imong minahal mobiya kaniya. Masabtan niya ang kaguol nga imong bation. Mabination niyang itagana ang pagdasig ug tabang nga imong gikinahanglan. Sa dihang ang usa ka minahal nga anak mobiya kang Jehova, sagad maghunahuna ang ginikanan nga unta duna pa silay gihimo aron matabangan ang ilang anak nga magpabilin sa kamatuoran. Ang usa ka brader miingon: “Gibasol nako ang akong kaugalingon. Damandamanon pa gani ko tungod sa pagsigeg hunahuna niana.” Ang sister nga nag-atubang ug susamang kahimtang sagad maghunahuna: “Unsa may akong sayop? Gibati nako nga napakyas ko sa pagsilsil sa kamatuoran diha sa akong anak.” w21.09 26 ¶1-2, 4

Ang pipila naghunahuna nga ang katawhan sa Diyos dili angayng magtudlog Bibliya kay wala sila makagraduwar sa inilang relihiyosong mga eskuwelahan. Pero kinahanglan nilang susihon kon unsay tinuod. Mao nay gipaningkamotan sa magsusulat sa Ebanghelyo nga si Lucas. Iyang gisusi “ang katukma niining tanan gikan sa sinugdan.” Gusto niya nga “mapamatud-an [sa iyang mga magbabasa] nga tinuod ang mga butang” nga ilang nadungog bahin kang Jesus. (Luc. 1:1-4) Ang mga Hudiyo sa karaang Berea susama kang Lucas. Sa dihang una nilang nadunggan ang maayong balita bahin kang Jesus, ilang gisusi ang Hebreohanong Kasulatan aron maseguro nga tinuod ang gitudlo kanila. (Buh. 17:11) Sa susama, kinahanglang susihon sa mga tawo karon kon unsay tinuod. Kinahanglan nilang ikomparar ang gitudlo kanila sa katawhan sa Diyos nianang sa giingon sa Kasulatan. Kinahanglan sab nilang tun-an ang gihimo sa katawhan ni Jehova sa modernong panahon. Kon maningkamot sila sa pagsusi kon unsay tinuod, dili sila mabutaan sa pagpihigpihig o sa dili tinuod nga mga estorya. w21.05 3 ¶7-8

Duna bay igsoon sa kongregasyon nga puwede nimong imbitahon nga makig-uban nimo? May mga higayon nga ilabinang maapresyar sa mga igsoon ang atong pagpakig-uban nila. Ang pipila malisdan tingali kon kauban nila ang ilang dili Saksing pamilya panahon sa mga selebrasyon nga supak sa Bibliya. Ang uban maguol tingali kaayo panahon sa espesipikong mga petsa, sama sa anibersaryo sa kamatayon sa ilang minahal. Kon mogahin tag panahon nga makig-uban sa mga igsoon nga mibatig ingon niana, atong gipakita nga gimahal gyod nato sila. (Filip. 2:20) Daghag rason kon nganong ang usa ka Kristohanon mobati usahay nga nag-inusara. Pero dili gyod nato kalimtan nga si Jehova nahibalo pag-ayo sa maong pagbati. Gitagana niya ang atong gikinahanglan, sagad pinaagi sa mga igsoon. (Mat. 12:48-50) Ingong balos, ipakita nato kang Jehova ang atong apresasyon sa iyang mahigugmaong kahikayan pinaagi sa paghimo sa atong maarangan sa pagtabang sa atong mga igsoon. Bisag unsa pa tingali atong bation usahay, wala gyod ta mag-inusara kay si Jehova kanunayng nag-uban kanato! w21.06 13 ¶18-20

Si Jesus nagpabiling positibo ug nagpadayon sa pagsangyaw bisan pag ang pipila wala maminaw sa iyang mensahe. Ngano? Nasayod siya nga ang mga tawo kinahanglang mahibalo sa kamatuoran, ug gusto niyang tabangan ang mas daghang tawo kutob sa mahimo. Nahibalo sab siya nga ang pipila nga dili maminaw sa sinugdan maminaw ra sa ulahi. Tagda ang nahitabo sa iyang pamilya. Sulod sa tulo ka tuig ug tunga nga ministeryo ni Jesus, wala gyod siyay igsoon nga nahimong tinun-an. (Juan 7:5) Pero human sa iyang pagkabanhaw, sila nahimong mga Kristohanon. (Buh. 1:14) Wala ta mahibalo kon kinsa sa ngadtongadto ang modawat sa mga kamatuoran sa Bibliya nga atong gitudlo. Ang pipila mas dugay mosanong sa kamatuoran kay sa uban. Bisan kadtong dili maminaw kanato makamatikod sa atong maayong panggawi ug positibong panglantaw, ug basin sa ngadtongadto, ilang “himayaon ang Diyos.” w21.05 18 ¶17-18

Sa dinhi pa si Jesus sa yuta, gisugo niya ang iyang mga sumusunod sa paghimo sa buluhaton nga may duha ka bahin. Gisugo niya sila sa pagsangyaw sa maayong balita sa Gingharian, ug gipakita niya kanila kon unsaon kana paghimo. (Luc. 8:1) Pananglitan, gitudloan ni Jesus ang iyang mga tinun-an kon unsay buhaton dihang dawaton o dili dawaton sa mga tawo ang mensahe sa Gingharian. (Luc. 9:2-5) Gitagna sab niya nga ang iyang mga sumusunod magsangyaw sa daghang tawo ug sa daghang lugar dihang siya miingon nga sila maghatag ug ‘pamatuod ngadto sa tanang kanasoran.’ (Mat. 24:14; Buh. 1:8) Dugang pa, iyang giingnan ang iyang mga sumusunod nga tudloan ang potensiyal nga mga tinun-an sa pagtuman sa tanang butang nga iyang gisugo. Gipakita ni Jesus nga kining importanteng buluhaton magpadayon bisan sa atong panahon, “hangtod sa hinapos sa sistema sa mga butang.” (Mat. 28:18-20) Ug sa pinadayag nga iyang gihatag kang Juan, klarong gipakita ni Jesus nga gidahom niya nga ang tanan niyang tinun-an motabang sa uban sa pagkat-on bahin kang Jehova.​—Pin. 22:17. w21.07 2-3 ¶3-4

Tungod sa kahakog, daghang tawo sa kalibotan karon ang makigkompetensiya. Pananglitan, ang usa ka negosyante mogamit tingalig dili maayong mga pamaagi aron moasenso bisag makahatag nig kadaot sa uban. Ang usa ka atleta tinuyo tingaling magpahinabog kadaot sa atleta sa pikas nga team aron silay modaog sa dula. Ang usa ka estudyante manglimbong tingali aron makapasar sa entrance exam sa usa ka iladong unibersidad. Ingong mga Kristohanon, nahibalo ta nga sayop ang maong panggawi; apil kana sa “mga buhat sa unod.” (Gal. 5:19-21) Pero posible ba nga ang pipila ka alagad ni Jehova dili tinuyong makaaghat ug kompetisyon diha sa kongregasyon? Importante kana nga pangutana kay ang pagpakigkompetensiya makapabahinbahin sa kongregasyon. Busa, maayong konsiderahon nato ang ehemplo sa matinumanong mga alagad ni Jehova diha sa Bibliya nga wala maaghat sa pagpakigkompetensiya. w21.07 14 ¶1-2

Ang maunongong gugma magpalihok nato sa pagtabang niadtong mga magul-anon. Ang mahigugmaong mga igsoon karon kinabubut-ong mounong sa mga igsoon nga naguol o naluya. Gimahal nila ang ilang mga igsoon, ug andam nilang buhaton ang ilang maarangan sa pagtabang kanila. (Prov. 12:25, footnote; 24:10) Uyon ni sa tambag ni apostol Pablo: ‘Hupaya ang mga naguol, tabangi ang mga luya, ug magpailob sa tanan.’ (1 Tes. 5:14) Sagad ang pinakaepektibong paagi sa pagtabang sa naguol nga igsoon mao ang pagpaminaw kaniya ug pagpasalig kaniya nga gimahal nimo siya. Makita ni Jehova ang imong mga paningkamot sa pagtabang sa iyang bililhong mga karnero. Ang Proverbio 19:17 nag-ingon: “Kadtong magpakitag kaluoy sa mga pobre nagpahulam kang Jehova, ug bayran Niya siya sa iyang gibuhat.” w21.11 10 ¶11-12

Unsay atong mahimo karon aron makapangandam ta para sa umaabot? Angay tang magmakontento ug kalipayan nato pag-ayo ang atong relasyon kang Jehova. Kon mas mailhan nato ang atong Diyos, mas makombinsir ta sa iyang katakos sa pagpanalipod kanato dihang moatake na ang Gog sa Magog. Ang teksto karong adlawa nagpakita kon nganong nahibalo si David nga makasalig siya sa tabang ni Jehova. Si David kanunayng misalig kang Jehova, ug wala gyod siya pakyasa sa iyang Diyos. Sa batan-on pa si David, nakig-away siya sa higanteng Filistehanon nga si Goliat ug giingnan niya ang maong bangis nga manggugubat: “Niining adlawa mismo itugyan ka ni Jehova sa akong kamot.” (1 Sam. 17:46) Sa ulahi, si David nag-alagad sa hari nga si Saul, kinsa kadaghan misulay sa pagpatay kaniya. Pero “si Jehova nag-uban” kang David. (1 Sam. 18:12) Kay naeksperyensiyahan ni David ang tabang ni Jehova kaniadto, segurado siya nga tabangan sab siya ni Jehova sa iyang giatubang nga mga problema. w22.01 6 ¶14-15

Sa tanang gibuhat ni Jehova, siya mapailobong naggahin ug panahon hangtod nga mahuman kana. Gihimo niya kana alang sa kadayeganan sa iyang ngalan ug sa kaayohan sa uban. Pananglitan, konsideraha kon sa unsang paagi anam-anam nga giandam ni Jehova ang yuta para sa tawo. Sa pagpatin-aw niini, ang Bibliya nag-ingon nga iyang gitakda ang “mga sukod niini,” giugbok ang “pundasyon niini,” ug gipahiluna ang “batong pamag-ang niini.” (Job 38: 5, 6) Naggahin pa gani siyag panahon sa pagsusi sa iyang gibuhat. (Gen. 1:10, 12) Maimadyin ba nimo ang gibati sa mga anghel dihang nakita nila ang matag bag-ong butang nga gilalang ni Jehova? Seguradong nalipay gyod sila adto! Aw, diha gani higayon nga sila “misinggit sa pagdayeg.” Unsay atong makat-onan? Gidangtag libolibo ka katuigan una mahuman ang pagpanglalang ni Jehova kay iyang gipamalandongan ang matag butang una niya kini lalanga. Ug sa dihang gisusi niya kini, siya miingon nga kini “maayo kaayo.”​—Gen. 1:31. w21.08 9 ¶6-7

Sa ilustrasyon ni Jesus, ang usa ka tawo hapit nang molangyaw. Sa wala pa siya mogikan, iyang gipatawag ang iyang mga ulipon ug gihatagan ang matag usa kanila ug mga talanton nga ilang inegosyo. Kay nahibalo ang tawo nga ang iyang mga ulipon lainlaig katakos, gihatagan niya ang usa ka ulipon ug lima ka talanton, ang lain duha, ug ang ikatulo nga ulipon usa ka talanton. Ang unang duha ka ulipon nagkugi aron motubo ang kuwarta sa ilang agalon. Pero, ang ikatulong ulipon walay gibuhat sa kuwarta nga gihatag kaniya, busa gitangtang siya sa trabaho. Giseryoso pag-ayo sa una ug ikaduhang ulipon ang responsibilidad nga gihatag kanila ug naghago sila para sa ilang agalon. Ingong resulta, nadoble nila ang talanton sa ilang agalon. Gigantihan sila sa agalon tungod sa ilang paghago. Gawas nga nalipay ang agalon, iya pa gyod silang giisip nga takos modawat ug dugang responsibilidad! w21.08 21 ¶7; 22 ¶9-10

Si Jehova nagpakitag taas nga pailob niining kataposang mga adlaw. Dili niya gusto nga dunay malaglag. (2 Ped. 3:9) Gihatagan niyag kahigayonan ang tanan sa paghinulsol. Pero ang iyang pailob dunay kinutoban. Kadtong dili mosuportar sa Gingharian sa Diyos parehas ug maagoman sa Paraon sa panahon ni Moises. Si Jehova miingon sa Paraon: “Kon gisilotan pa ti ka ug ang imong katawhan pinaagig makamatayng sakit, nahanaw na unta ka sa yuta. Apan kini ang hinungdan nga gitugotan ti ka nga mabuhi: aron ipakita kanimo ang akong gahom ug aron mailhan ang akong ngalan sa tibuok yuta.” (Ex. 9:15, 16) Sa ngadtongadto, ang tanang kanasoran mahibalo gayod nga si Jehova lang ang bugtong matuod nga Diyos. (Ezeq. 38:23) Ang pag-uyog nga gihisgotan sa teksto karong adlawa magpasabot ug walay kataposang kalaglagan niadtong dili modawat sa katungod ni Jehova sa pagmando, sama kang Paraon. w21.09 18-19 ¶17-18

Nasakitan ka ba tungod kay ang usa ka minahal na-disfellow? Ug unsay imong mahimo kon ang pipila diha sa kongregasyon mosultig mga butang nga makapasamot sa imong kaguol? Dili ta makadahom nga kanunayng husto ang ilang isulti. (Sant. 3:2) Kitang tanan dili hingpit, busa ayawg katingala kon ang pipila dili kabalo kon unsay isulti o makasulti pa ganig sakit nga mga pulong. Hinumdomi ang tambag ni apostol Pablo: “Padayon sa pagpailob sa usag usa ug kinasingkasing nga magpinasayloay kon ang usa dunay reklamo.” (Col. 3:13) Padayong suportahi ang matinumanong mga membro sa pamilya. Mas gikinahanglan nila karon ang inyong gugma ug pagdasig. (Heb. 10:24, 25) Usahay, ang mga membro sa pamilya niadtong na-disfellow mibati nga ang pipila diha sa kongregasyon dili na pod makig-estorya nila, nga mora bag na-disfellow sab sila. Dili nato gustong mobati silag ingon niana! Ang mga batan-on kansang ginikanan mibiya sa kamatuoran ilabinang nagkinahanglag komendasyon ug pagdasig. w21.09 29 ¶13-14; 30 ¶16

Sa dihang ang tigulang ug ang batan-on mag-estoryahanay, pareho silang madasig. (Roma 1:12) Sa bahin ninyong mga batan-on, mas molalom ang inyong apresasyon sa pag-atiman ni Jehova sa iyang matinumanong mga alagad, ug ang tigulang mobati nga gimahal siya. Ganahan siyang moestorya ninyo kon giunsa siya pagpanalangin ni Jehova. Ang pisikal nga katahom sagad mawala kon matigulang na, pero kadtong maunongon kang Jehova mahimong mas matahom kaniya sa matag tuig nga molabay. (1 Tes. 1:2, 3) Ngano? Tungod kay latas sa katuigan, ilang gitugotan ang espiritu sa Diyos sa pagbansay kanila ug pagtabang nila nga maugmad ang nindot nga mga hiyas. Kon mas mailhan nato ang atong minahal nga tigulang nga mga igsoon, tahoron sila, ug mokat-on gikan kanila, mas labaw pa nato silang pabilhan! Ang kongregasyon mas molig-on dili lang dihang pabilhan sa mga batan-on ang mga tigulang, kondili sa dihang pabilhan pod sa mga tigulang ang mga batan-on. w21.09 7 ¶15-18

Angay tang maningkamot nga mahimong “maluluy-on kaayo,” sama sa atong Diyos. (Efe. 2:4) Ang kaluoy dili kay pagbati lang. Gani, kini gihatagag kahulogan ingong “pagkamabination nga inubanag buhat.” Busa, maniid ta kon kinsay nanginahanglag tabang diha sa atong pamilya, kongregasyon, ug komunidad. Makakaplag gyod tag daghang kahigayonan sa pagpakitag kaluoy! Duna bay nagkinahanglag paghupay? Makahatag ba tag praktikal nga tabang, tingali pinaagi sa pagtaganag pagkaon o sa uban pang panginahanglan? Ang bag-o bang napasig-uli nga igsoon nagkinahanglag paghupay ug makapalig-ong panag-ubanay? Puwede ba natong ipaambit sa uban ang makapahupayng mensahe sa maayong balita? (Job 29:12, 13; Roma 10:14, 15; Sant. 1:27) Kon abtik tang maniid, makakita tag mga kahigayonan sa pagpakitag kaluoy. Sa dihang magpakita tag kaluoy, mapalipay gyod nato ang atong langitnong Amahan, ang Diyos nga “maluluy-on kaayo”! w21.10 13 ¶20-22

Sa Salmo 23, gihisgotan ni David ang mga butang nga importante kaayo​—ang abundang espirituwal nga mga panalangin nga iyang natagamtam kay gidawat niya si Jehova ingong iyang Magbalantay. Si Jehova nagtultol kaniya “sa mga dalan sa pagkamatarong,” ug Siya maunongong nagsuportar kang David sa maayo ug dili maayong mga panahon. Nahibalo si David nga ang iyang kinabuhi diha sa “lunhaw nga mga sibsibanan” ni Jehova wala magpasabot nga dili siya makaatubang ug mga problema. Usahay, madismayar tingali siya nga mora bag naglakaw siya “sa ngiob kaayo nga walog,” ug dunay makig-away kaniya. Pero kay si Jehova ang iyang Magbalantay, si David ‘dili mahadlok.’ Sa unsang diwa nga si David ‘wala makulangi ug maayong mga butang’? Sa espirituwal nga diwa, nabatonan niya ang tanan niyang gikinahanglan. Ang iyang kalipay wala magdepende sa materyal nga mga butang. Kontento si David sa gitagana ni Jehova. Ang importante kaniya mao ang panalangin ug proteksiyon gikan sa iyang Diyos. Sa mga pulong ni David, makita nato nga importante kaayo nga duna tay hustong panglantaw sa materyal nga mga butang. w22.01 3-4 ¶5-7

Ang mga alagad ni Jehova sa karaang panahon nagsangyaw pod sa mga tawo nga dili gustong maminaw. Pananglitan, si Noe maoy “magwawali sa pagkamatarong,” tingali sulod sa daghang katuigan. (2 Ped. 2:5) Seguradong naglaom siya nga ang mga tawo maminaw sa iyang mensahe, pero wala mag-ingon si Jehova nga kanay mahitabo. Hinunoa, dihang gisugo ni Jehova si Noe sa paghimog arka, Siya miingon: “Kinahanglan kang mosulod sa arka apil ang imong asawa, mga anak, ug mga asawa sa imong mga anak.” (Gen. 6:18) Ug dihang gisultihan siya sa Diyos bahin sa gidak-on ug kapasidad sa arka nga iyang himoon, tingali naamgohan ni Noe nga gamay ra ang maminaw sa iyang mensahe. (Gen. 6:15) Ug mao gyod nay nahitabo. Wala gyoy naminaw kang Noe. (Gen. 7:7) Giisip ba ni Jehova nga napakyas si Noe? Wala gayod! Sa panglantaw sa Diyos, milampos si Noe sa pagsangyaw kay matinumanon niyang gihimo ang gisugo ni Jehova kaniya.​—Gen. 6:22. w21.10 26 ¶10-11

Imadyina kon unsa tingali gibati ni Ruth dihang nadunggan niya ang gisulti ni Noemi! Gihimo niya ang iyang maarangan sa pagtabang kang Noemi. Si Ruth mihilak uban niya, naghupay kaniya, ug miuban niyag lakaw sulod sa pipila ka adlaw. Pero bisan pa nianang tanan, si Noemi miingon: “Gipapauli ko ni Jehova nga makaluluoy.” Pinaagi sa pagsulti niana, morag wala pabilhi ni Noemi ang tabang ni Ruth, kinsa nagbarog tupad niya. Posibleng nasakitan si Ruth sa gisulti ni Noemi. Pero miunong gihapon siya kang Noemi. (Ruth 1:3-18) Karon, ang usa ka naguol nga igsoon makasulti tingalig sakit nga mga pulong​—bisan pa sa tanan natong paningkamot nga tabangan siya. Pero dili ta angayng mahiubos. Mounong ta sa atong igsoon nga nanginahanglan, ug mangayo tag tabang kang Jehova aron makakita tag paagi sa paghupay kaniya. (Prov. 17:17) Sa primero, dili tingali dawaton sa igsoon ang atong tabang. Pero ang maunongong gugma magpalihok nato nga maningkamot sa pag-unong kaniya.—Gal. 6:2. w21.11 11 ¶17-19

Sa Bibliya, ang mga pulong “balaan” ug “pagkabalaan” sagad nagtumong sa moral ug relihiyosong kahinlo o pagkasagrado. Kini nga mga termino mahimong magpasabot sab nga gilain aron mag-alagad sa Diyos. Sa laing pagkasulti, mahimo tang balaan kon kita hinlo sa moral, nagsimba kang Jehova sa dalawatong paagi, ug kon duna tay suod nga relasyon kaniya. Ang paghunahuna pa lang nga puwede tang masuod sa atong balaang Diyos makapahingangha na kaayo, ilabina kon atong konsiderahon ang gitudlo sa Bibliya bahin sa pagkabalaan ni Jehova. Si Jehova putli ug hinlo sa tanang paagi. Mao ni giingon sa mga serapin​—mga anghel nga nag-alagad duol sa trono ni Jehova. Ang pipila kanila mipahayag: “Balaan, balaan, balaan si Jehova sa mga panon.” (Isa. 6:3) Siyempre, aron masuod sa ilang balaang Diyos, ang mga anghel kinahanglang magmabalaan—​ug balaan gyod sila. w21.12 3 ¶4-5

Ang mga batan-on sagad maghunahuna kon unsa ang kinamaayohang paagi sa pagkinabuhi. Ang mga guidance counselor sa eskuwelahan ug dili Saksing mga membro sa pamilya magdasig tingali nila nga moeskuwela sa unibersidad aron makakuhag trabaho nga dakog suweldo. Kanang klaseha sa edukasyon posibleng makahurot sa ilang panahon. Sa laing bahin, ang Saksing mga ginikanan ug ang mga igsoon sa kongregasyon magdasig tingali sa mga batan-on nga gamiton ang ilang kinabuhi sa pag-alagad kang Jehova. Unsay makatabang sa usa ka batan-on nga nahigugma kang Jehova sa paghimog kinamaayohang desisyon? Makabenepisyo siya sa pagbasa sa Efeso 5:15-17 ug pagpamalandong niana. Human mabasa kining tekstoha, ang batan-on puwedeng mangutana sa iyang kaugalingon: ‘Unsa “ang kabubut-on ni Jehova”? Unsang desisyon ang makapalipay niya? Unsang desisyon ang makatabang nako nga magamit sa kinamaayohang paagi ang akong panahon?’ Hinumdomi nga nagkinabuhi ta sa “daotang mga adlaw,” ug kining sistemaha nga gimandoan ni Satanas hapit nang taposon. w22.01 27 ¶5

Kanus-a si Santiago nahimong maunongong sumusunod ni Jesus? Human mabanhaw si Jesus, “siya nagpakita kang Santiago, unya ngadto sa tanang apostoles.” (1 Cor. 15:7) Human niana, si Santiago nahimong usa sa mga tinun-an ni Jesus. Presente siya dihang ang mga apostoles nagpaabot sa gisaad nga balaang espiritu didto sa itaas nga lawak sa Jerusalem. (Buh. 1:13, 14) Sa ulahi, si Santiago nakapribilehiyo nga mahimong membro sa unang siglong nagamandong lawas. (Buh. 15:6, 13-22; Gal. 2:9) Ug sa wala pa ang 62 C.E., gigiyahan siya sa Diyos nga magsulat para sa dinihogang mga Kristohanon. Ang maong sulat makatabang nato karon, langitnon man o yutan-on ang atong paglaom. (Sant. 1:1) Sumala sa historyano sa unang siglo nga si Josephus, si Santiago gipatay sa mando sa Hudiyong Hataas nga Saserdote nga si Ananias nga Manghod. Si Santiago nagpabiling matinumanon kang Jehova hangtod natapos niya ang iyang kinabuhi dinhi sa yuta. w22.01 8 ¶3; 9 ¶5

Unsay atong makat-onan sa teksto karong adlawa? Una, dili ta angayng magdahom nga panalipdan ta ni Jehova sa mga kalisdanan nga magsulay sa atong pagtuo. Sama nga si Jesus gisulayan hangtod sa kamatayon, angay nga andam sab tang magmatinumanon hangtod sa kamatayon kon gikinahanglan. (Mat. 16:24, 25) Pero makasalig ta nga dili itugot sa Diyos nga sulayan ta nga labaw sa atong maantos. (1 Cor. 10:13) Ikaduha, sama kang Jesus, tingali mag-antos ta bisag wala tay nahimong sala. (1 Ped. 2:19, 20) Kadtong nagsupak nato naghimo niana, dili tungod kay naa tay nahimong sayop, kondili tungod kay dili ta bahin sa kalibotan ug nagpamatuod ta sa kamatuoran. (Juan 17:14; 1 Ped. 4:15, 16) Nasabtan ni Jesus kon nganong gitugotan ni Jehova nga mag-antos siya. Pero, dili sama kaniya, ang matinumanong mga magsisimba nga nakasinatig pagsulay maghunahuna usahay kon nganong gitugotan ni Jehova nga mahitabo ang pipila ka butang. (Hab. 1:3) Ang atong maluluy-on ug mapailobong Diyos nakasabot nga wala sila mawad-ig pagtuo. Hinunoa, nagkinahanglan sila sa paghupay nga siya lang ang makatagana.​—2 Cor. 1:3, 4. w21.04 11 ¶9-10

Dawaton ni Jehova ang atong pagsimba kon nahiuyon ni sa iyang katuyoan ug kon atong gihigugma ug gitahod siya. Nahibalo ta nga si Jehova takos nga simbahon, ug gusto natong simbahon siya sa kinamaayohang paagi. Ang usa ka paagi nga nagsimba ta kang Jehova mao ang pag-ampo nato kaniya. Sa Bibliya, ang atong mga pag-ampo gipakasama sa maayong pagkaandam nga insenso nga gitanyag sa tabernakulo ug, sa ulahi, sa templo. Ang maong insenso nakapalipay sa Diyos. Ang ato pong kinasingkasing nga mga pag-ampo “makapalipay” niya bisag simple ra kaayo ang mga pulong nga atong gamiton. (Prov. 15:8; Deut. 33:10) Matandog gyod ang kasingkasing ni Jehova dihang atong isulti ang atong gugma ug apresasyon kaniya. Gusto niya nga isulti nato niya ang atong mga gikabalak-an, gilaoman, ug gipangandoy. Sa dili pa ka mag-ampo kang Jehova, maayo nga imong hunahunaon pag-ayo kon unsay imong isulti. Pinaagi niana, makatanyag kag pinakamaayong “insenso” sa imong langitnong Amahan. w22.03 20 ¶2; 21 ¶7

Sa Armagedon, dili kitay modesisyon kon kinsay makadawat sa kaluoy ni Jehova ug kon kinsay dili. (Mat. 25:34, 41, 46) Mosalig ba unya ta sa paghukom ni Jehova o moundang tag alagad niya kay dili ta mouyon sa iyang desisyon? Klaro nga kinahanglan natong palig-onon ang atong pagsalig kang Jehova karon aron bug-os tang mosalig niya sa umaabot. Imadyina kon unsay atong bation sa bag-ong kalibotan sa Diyos. Wala na ang bakak nga relihiyon ug ang hakog nga sistema sa negosyo, apil ang mga gobyerno nga nagdaogdaog ug nagpaantos pag-ayo sa mga tawo sukad pa sa una. Wala na pod unya ang mga problema sa panglawas ug pagkatigulang, ug dili na mamatay ang atong mga minahal. Si Satanas ug ang mga demonyo dili na unya makahimog kadaot sulod sa usa ka libo ka tuig. Ang tanang daotang epekto sa ilang pagrebelde mawala na. (Pin. 20:2, 3) Nianang panahona, mapasalamaton gyod kaayo ta kay misalig ta sa pamaagi ni Jehova! w22.02 6-7 ¶16-17

Si Jesus mihimog paagi aron mamentinar ang kalinaw ug iyang gidasig ang uban nga husayon ang ilang dili pagsinabtanay. Gitudloan niya sila nga makighusay sa ilang igsoon kon gusto nila nga dawaton ni Jehova ang ilang pagsimba. (Mat. 5:23, 24) Ug wala siya moundang sa pagtabang sa mga apostoles nga mahunong ang ilang pagsigeg lalis kon kinsay kinalabwan nila. (Luc. 9:46-48; 22:24-27) Aron mamentinar nato ang kalinaw, dili igo nga likayan lang nato nga mahimong hinungdan sa panaglalis. Kinahanglan tang maningkamot aron mabalik ang atong maayong relasyon sa uban ug dasigon ang mga igsoon nga husayon ang ilang dili pagsinabtanay. (Filip. 4:2, 3; Sant. 3:17, 18) Puwede natong pangutan-on ang atong kaugalingon: ‘Unsay andam nakong isakripisyo aron mabalik ang akong maayong relasyon sa uban? Kon mapasakitan ko sa igsoon, maghambin ba kog kasuko? Maghulat ba ko nga ang igsoon maoy mounag duol nako, o akoy mouna, bisan pag para nako siyay hinungdan sa problema?’ w22.03 10-11 ¶10-11

Dugay nang gitagna sa Bibliya nga ang katawhan sa Diyos “kinabubut-ong magtanyag sa ilang kaugalingon” sa pag-alagad kang Jehova ubos sa pagpanguna sa iyang Anak. (Sal. 110:3) Kanang tagnaa nagakatuman gyod karon. Kada tuig, ang madasigong mga alagad ni Jehova naggahin ug milyonmilyong oras sa pagsangyaw. Gihimo ni nila nga kinabubut-on; wala silay suweldo. Naningkamot pod sila nga matagan-an ang pisikal, emosyonal, ug espirituwal nga panginahanglan sa mga igsoon. Ang mga brader nga nagapanguna naggahin ug daghang oras sa pagpangandam para sa ilang mga bahin sa tigom ug sa pag-shepherding sa mga igsoon. Nganong ginahimo ni sa katawhan ni Jehova? Tungod sa gugma​—gugma para kang Jehova ug sa ilang isigkatawo. (Mat. 22:37-39) Si Jesus nagpakitag maayo kaayong ehemplo sa pag-una sa kaayohan sa uban. Naningkamot ta nga sundogon siya. (Roma 15:1-3) Kadtong nagsundog niya makadawat ug mga kaayohan. w22.02 20 ¶1-2

Sa Israel, diin ang kadaghanan nagtrabaho diha sa uma, ang mga trabahador kinahanglang suholan inigkahuman sa tibuok adlawng pagtrabaho. Kon dili suholan ang usa ka trabahador, basig wala siyay ikapalit ug pagkaon para sa iyang pamilya nianang adlawa. Si Jehova miingon: “Naglisod siya ug ang iyang kinabuhi nagdepende sa iyang suhol.” (Deut. 24:14, 15; Mat. 20:8) Karon, daghang empleyado ang suweldoan kas-a o kaduha sa usa ka bulan, dili kada adlaw. Pero ang prinsipyo sa Levitico 19:13 mapadapat gihapon karon. Ang pipila ka amo mamentaha sa ilang mga empleyado pinaagi sa paghatag nilag ubos kaayo nga suweldo. Nahibalo sila nga kini nga mga trabahador wala tingali laing kapilian ug magpadayon sa pagtrabaho bisag ubos kaayog suweldo. Sama rag ‘gipaugmaan [sa maong mga amo] ang paghatag ug suhol sa usa ka trabahador.’ Angay ning hinumdoman sa usa ka Kristohanon nga dunay mga empleyado. w21.12 10 ¶9-10

Human sa tanang giantos ni Jesus, seguradong giuhaw kaayo siya. Nagkinahanglan siyag tabang aron makainom. Wala isipa ni Jesus nga huyang siya kon isulti niya ang iyang gibati. Angay nga ingon ana pod ta. Tingali naanad ta nga dili nato isulti sa uban ang atong mga gikinahanglan. Pero kon nagkinahanglan tag tabang, dili ta angayng magduhaduha sa pagpangayog tabang sa uban. Pananglitan, kon kita tigulang o masakiton, puwede tingali natong hangyoon ang usa ka higala nga ubanan ta sa groseri o sa doktor. Kon naguol ta, puwede tang moduol sa usa ka ansiyano o ubang hamtong nga Kristohanon nga maminaw nato o magdasig nato pinaagig “maayong pulong.” (Prov. 12:25) Hinumdoman nato nga gimahal ta sa atong mga igsoon ug gusto ta nilang tabangan “panahon sa kalisdanan.” (Prov. 17:17) Pero dili sila makabasa sa atong hunahuna. Dili tingali sila mahibalo nga nagkinahanglan tag tabang gawas kon sultian nato sila. w21.04 11-12 ¶11-12

Daghan nato ang malisdan dihang mausab ang atong kahimtang. Ang uban nga dugay na sa espesyal nga bug-os panahong pag-alagad nakadawat ug bag-ong asaynment. Ang uban kinahanglang moundang sa ilang gimahal nga asaynment tungod sa ilang edad. Normal lang nga maguol ta kon mahitabo nâ nato. Mas sayon tang maka-adjust sa kausaban kon sundogon nato ang panghunahuna ni Jehova sa atong bag-ong kahimtang. Nindot kaayong mga butang ang iyang ginahimo karon, ug dako ang atong pribilehiyo nga makauban siya sa buluhaton. (1 Cor. 3:9) Ang gugma ni Jehova kanato dili gyod mausab. Busa kon apektado ka sa gihimong kausaban sa organisasyon, ayaw pagsigeg hunahuna kon nganong gihimo ang maong kausaban. Imbes mangandoy nga mabalik ang “kanhing mga adlaw,” hangyoa si Jehova nga tabangan ka nga makita ang kaayohan sa kausaban. (Eccl. 7:10) Hupti ang positibong panghunahuna. Pinaagi niini, magmalipayon ug magmatinumanon gihapon ta bisag mausab ang atong kahimtang. w22.03 17 ¶11-12

Kinsay pakitaan ni Jehova ug maunongong gugma? Ang Bibliya nag-ingon nga puwede natong higugmaon ang daghang butang, sama sa “disiplina,” “kahibalo,” ug “kaalam.” (Prov. 12:1; 29:3) Pero ang maunongong gugma dili mapakita ngadto sa mga butang; mapakita lang ni ngadto sa mga tawo. Apan dili kay si bisan kinsa lang ang pakitaan ni Jehova ug maunongong gugma. Iya ning ipakita niadtong dunay suod nga relasyon kaniya. Ang atong Diyos maunongon sa iyang mga higala. Duna siyay nindot nga katuyoan para nila, ug dili siya mohunong sa paghigugma kanila. Si Jehova nagpakitag gugma sa tanang tawo. Gisultihan ni Jesus si Nicodemo: “Gihigugma pag-ayo sa Diyos ang kalibotan [o, ang mga tawo] mao nga gihatag niya ang iyang bugtong nga Anak aron ang tanan nga magpakitag pagtuo kaniya dili malaglag kondili makabaton ug kinabuhing walay kataposan.”​—Juan 3:1, 16; Mat. 5:44, 45. w21.11 2 ¶3; 3 ¶6-7

Lisod ang kinabuhi niining sistemaha, ug tingali makaatubang tag mas grabe pa ganing mga kalisdanan sa umaabot. (Mat. 24:21) Nangandoy gyod ta sa panahon dihang kining tanang problema matapos na​—malimtan na ug dili na gyod mahitabo pag-usab! (Isa. 65:16, 17) Busa, kinahanglan nga padayon tang molahutay. Ngano? Tungod kay si Jesus miingon: “Pinaagi sa inyong paglahutay, maluwas ang inyong kinabuhi.” (Luc. 21:19) Ang paghunahuna kon sa unsang paagi ang uban nakalahutay sa mga kalisdanan nga susama sa atoa makatabang nato sa paglahutay. Kinsa ang kinamaayohang ehemplo sa paglahutay? Si Jehova nga Diyos. Tingali wala ka magdahom nga kana ang tubag. Pero kon imo ning hunahunaon, masabtan nimo kon ngano. Ang kalibotan gikontrolar sa Yawa, busa daghan kaayo nig problema. Si Jehova may gahom nga taposon dayon kini, pero nagpaabot siya sa hustong panahon sa pagbuhat niana. (Roma 9:22) Sa kasamtangan, ang atong Diyos padayong milahutay hangtod moabot kanang panahona. w21.07 8 ¶2-4