Septiyembre

Ang pipila sa panahon ni Jesus wala makontento sa maayong mga butang nga iyang gitudlo. Gusto nilag dugang pa. Pero sa dihang midumili siya sa paghatag sa ilhanan nga ilang gipangayo, gisalikway nila siya. (Mat. 16:4) Unsay giingon sa Kasulatan? Si propetang Isaias misulat bahin sa Mesiyas: “Dili siya mosinggit o mopatugbaw sa iyang tingog, ug dili niya ipadungog ang iyang tingog diha sa dalan.” (Isa. 42:1, 2) Gihimo ni Jesus ang iyang ministeryo sa mapainubsanong paagi. Wala siya magtukod ug dagkong templo, wala siya magsul-ob ug espesyal nga mga sinina nga ginasul-ob sa mga lider sa relihiyon, ug wala sab siya magsugo nga tawgon siyag mapasigarbohong mga titulo. Sa dihang gihusay si Jesus, wala siya mohimog ilhanan aron pabilibon si Haring Herodes, bisag nagdepende niini ang iyang kinabuhi. (Luc. 23:8-11) Tinuod, si Jesus mihimog mga milagro, pero ang pinakaimportante kaniya mao ang pagsangyaw sa maayong balita. Giingnan niya ang iyang mga tinun-an: “Mianhi ko alang niini nga katuyoan.”​—Mar. 1:38. w21.05 4 ¶9-10

Kita nangita niadtong “nakiling sa pagdawat sa kamatuoran nga motultol sa kinabuhing walay kataposan.” (Buh. 13:48) Aron mahimo silang mga tinun-an, kinahanglan nato silang tabangan nga (1) makasabot, (2) modawat, ug (3) magpadapat sa ilang mga nakat-onan sa Bibliya. (Col. 2:6, 7; 1 Tes. 2:13) Ang tanan diha sa kongregasyon makatabang sa mga Bible study pinaagi sa pagkahimong maayong ehemplo sa pagpakita kanilag gugma ug sa pag-abiabi kanila dihang motambong sila sa mga tigom. (Juan 13:35) Ang nagdumala sa pagtuon kinahanglan pod tingaling mogahin ug dakong panahon ug kusog sa pagtabang sa study nga ‘mapukan ang lig-ong naparilan’ nga mga pagtulon-an o kostumbre. (2 Cor. 10:4, 5) Dangtan tingalig daghang bulan ang paggiya sa usa ka indibiduwal sa paghimo niini nga mga kausaban aron sa ngadtongadto mokuwalipikar siya sa bawtismo. Pero dili gyod masayang ang atong mga paningkamot sa pagtabang kaniya. w21.07 3 ¶6

Ingong mga Saksi ni Jehova, kombinsido ba gyod ta nga kita nagtudlo sa kamatuoran ug nga ang atong paagi sa pagsimba maoy giuyonan ni Jehova? Si apostol Pablo kombinsido kaayo sa kamatuoran. (1 Tes. 1:5) Ang iyang pagtuo wala ibase sa emosyon; gitun-an gyod niya pag-ayo ang Pulong sa Diyos. Kombinsido siya nga “ang tibuok Balaang Kasulatan gisulat pinaagi sa paggiya sa Diyos.” (2 Tim. 3:16) Unsay iyang nasayran sa iyang pagtuon? Diha sa Kasulatan, nakita ni Pablo ang klaro kaayong ebidensiya nga si Jesus ang gisaad nga Mesiyas​—ebidensiya nga gibalewala sa Hudiyong mga lider sa relihiyon. Ang maong salingkapaw nga mga lider sa relihiyon nangangkon nga nagrepresentar sila sa Diyos, pero gibuhat nila ang mga butang nga iyang gidumtan. (Tito 1:16) Si Pablo dili parehas nila kay wala niya pilia kon unsang mga bahina sa Pulong sa Diyos ang iyang tuohan. Andam niyang itudlo ug ipadapat ang “tanang kabubut-on sa Diyos.”​—Buh. 20:27. w21.10 18 ¶1-2

Bisag kita ang nagtanom ug nagbisbis, kinahanglan natong hinumdoman nga ang Diyos maoy magpatubo sa atong gitanom. (1 Cor. 3:6, 7) Bililhon kang Jehova ang tanang tawo. Gihatagan ta niyag pribilehiyo nga mahimong isigkamagbubuhat sa iyang Anak sa pagtigom sa mga tawo gikan sa tanang kanasoran sa dili pa matapos kining sistemaha. (Hag. 2:7) Ang atong buluhatong pagsangyaw puwedeng ipakasama sa usa ka rescue operation. Ug kita samag mga membro sa rescue team nga gipadala aron luwason ang mga tawo nga natanggong sa usa ka minahan. Bisag pipila lang ang makakitag mga minero nga buhi pa, ang paghago sa tanang tig-rescue importante. Ingon sab niana ang atong paghago diha sa ministeryo. Wala ta mahibalo kon pila pa ang maluwas gikan sa sistema ni Satanas. Pero puwedeng gamiton ni Jehova ang bisan kinsa kanato sa pagtabang kanila. Si Andreas, nga nagpuyo sa Bolivia, miingon, “Nahibalo ko nga dihang ang usa ka tawo makakat-on sa kamatuoran ug magpabawtismo, tungod nâ sa paningkamot sa daghan nga matabangan siya.” Hinaot nga batonan nato ang susamang positibong panglantaw sa atong ministeryo. Kon ato nang himoon, panalanginan ta ni Jehova, ug ang atong ministeryo makahatag natog tinuod nga kalipay. w21.05 19 ¶19-20

Ang mangangayam dunay usa lang ka tumong​—ang pagdakop o pagpatay sa iyang biktima. Mogamit tingali siyag lainlaing lit-ag o bitik, sama sa giingon sa usa sa mga nagpakaaron-ingnong maghuhupay ni Job. (Job 18:8-10) Unsay buhaton sa mangangayam aron malit-agan ang usa ka hayop? Iyang obserbahan ang hayop. Asa ni gaadto? Unsay ganahan ani? Unsa kahay pinakamaayong lit-ag para niini? Si Satanas parehas niana nga mangangayam. Iya tang ginaobserbahan. Bantayan niya kon asa ta moadto ug kon unsay atong hilig. Dayon mogamit siyag lit-ag ug manghinaot siya nga mabitik ta niana nga dili ra makabantay. Bisan pa niana, ang Bibliya nagpasalig nato nga kon malit-agan ta, puwede gihapon tang makaikyas. Nagtudlo sab ni kanato kon unsay atong himoon aron dili gyod ta malit-agan. Ang duha sa pinakaepektibong mga lit-ag ni Satanas mao ang garbo ug kahakog. Sa libolibo na ka katuigan, malamposong gigamit ni Satanas kining ngil-ad nga mga kinaiya. Sama siyag tiglit-ag ug langgam nga magdani sa iyang biktima ngadto sa bitik o laang. (Sal. 91:3) Pero makalikay ta sa lit-ag ni Satanas. Ngano? Tungod kay gipadayag ni Jehova kanato ang mga taktika nga gigamit ni Satanas.​—2 Cor. 2:11. w21.06 14 ¶1-2

Ang matinumanong tigulang nga mga igsoon bililhon kaayo. Sa Pulong sa Diyos, ang ilang uban gipakasama sa usa ka korona. (Prov. 20:29) Pero tingali, dili dayon nato mamatikdan nga bililhon sila. Ang mga batan-on nga nahibalo kon unsa ka bililhon ang mga tigulang makakuhag mas labaw pa kay sa literal nga bahandi. Ang matinumanong mga tigulang bililhon kang Jehova nga Diyos. Nahibalo siya kon unsa silang matanga sa mga tawo, ug gipabilhan niya ang ilang nindot nga mga hiyas. Malipay siya dihang ipasa sa mga tigulang ngadto sa mga batan-on ang kaalam nga ilang nabatonan sa daghang tuig nga matinumanong pag-alagad. (Job 12:12; Prov. 1:1-4) Gipabilhan sab ni Jehova ang ilang paglahutay. (Mal. 3:16) Nakasinati silag mga problema, pero ang ilang pagtuo kang Jehova wala gyod mohuyang. Ang ilang paglaom sa umaabot mas milig-on pa kon itandi niadtong una nilang nahibaloan ang kamatuoran. Ug gimahal sila ni Jehova kay padayon nilang gimantala ang iyang ngalan “bisan sa ilang pagkatigulang.”​—Sal. 92:12-15. w21.09 2 ¶2-3

Matag karon ug unya, maayong susihon nato ang atong mga motibo. Puwede natong pangutan-on ang kaugalingon: ‘Malipay lang ba ko sa akong nahimo kon maghunahuna ko nga mas maayo ko sa uban? Naningkamot ba ko diha sa kongregasyon tungod lang kay gusto nakong mahimong kinamaayohan o mahimong mas maayo kay sa laing igsoon? O naningkamot ba ko aron mapalipay si Jehova?’ Ang Bibliya nag-awhag nga dili nato itandi ang atong kaugalingon sa uban. Ngano? Ang usa ka rason mao nga kon maghunahuna ta nga mas maayo ta sa atong igsoon, mahimo tang garboso. Sa laing bahin, kon maghunahuna ta nga ubos ra kaayo ta kon itandi sa uban, posibleng maluya ta. (Roma 12:3) Angay natong hinumdoman nga gikabig ta ni Jehova, dili tungod kay guwapa o guwapo ta, maayong manulti, o popular, kondili tungod kay kinabubut-on tang nahigugma kaniya ug naminaw sa iyang Anak.​—Juan 6:44; 1 Cor. 1:26-31. w21.07 14-15 ¶3-4

Siyempre, aron mabag-o ang atong panghunahuna, kinahanglan tang mag-ampo, magtuon sa Pulong sa Diyos, ug mamalandong. Padayon sa pagbuhat niining mga butanga, ug pangayog kusog kang Jehova. Ang iyang balaang espiritu makatabang nimo nga madaog ang tendensiya nga itandi ang imong kaugalingon sa uban. Tabangan sab ka ni Jehova nga makita kon nahimo na kang masinahon o garboso, ug tabangan ka niya sa paghimo dayog mga kausaban. (2 Cron. 6:29, 30) Si Jehova nahibalo kon unsay naa sa atong kasingkasing. Nahibalo sab siya nga naningkamot ta nga masuklan ang espiritu sa kalibotan ug ang atong kaugalingong mga kahuyangan. Sa dihang makita ni Jehova nga naningkamot ta pag-ayo nga masuklan kining mga butanga, mas molalom ang iyang gugma kanato. Aron iilustrar ang iyang pagbati kanato, gigamit ni Jehova ang gugma sa inahan sa iyang anak. (Isa. 49:15) Makapalipay gyod ang pagkahibalo nga ingon ana ka lalom ang gugma ni Jehova kanato dihang makita niya nga naningkamot ta sa pag-alagad kaniya nga kinasingkasing! w21.07 24-25 ¶17-19

Mapauswag nato ang atong kalipay pinaagi sa pagkugi pag-ayo sa bisan unsang asaynment nga ihatag kanato diha sa pag-alagad kang Jehova. ‘Magmaokupado pag-ayo’ sa buluhatong pagsangyaw, ug makigbahin sa bug-os sa mga buluhaton sa kongregasyon. (Buh. 18:5; Heb. 10:24, 25) Pangandam pag-ayo para sa mga tigom aron makahatag kag makapalig-ong mga komento. Seryosoha ang bisan unsang bahin sa estudyante nga ihatag kanimo panahon sa midweek nga tigom. Kon hangyoon ka sa pagtabang sa usa ka buluhaton diha sa kongregasyon, abot sa hustong oras ug ipakita nga kasaligan ka. Ayaw pakamenosa ang bisan unsang asaynment nga ihatag kanimo, nga maghunahunang dili ni nimo angayng gahinag panahon. Paningkamot nga mouswag ang imong mga kahanas. (Prov. 22:29) Kon magkugi ka pag-ayo sa imong espirituwal nga mga kalihokan ug asaynment, mas paspas ang imong pag-uswag ug mas magmalipayon ka. (Gal. 6:4) Mas sayon pod para nimo nga magmalipayon dihang ang uban makadawat ug pribilehiyo nga gusto unta nimong madawat.​—Gal. 5:26. w21.08 22 ¶11

Angay natong likayan ang garbo, ug magpatudlo ta kang Jehova. Sama nga ang sakit makabara sa kaugatan sa literal nga kasingkasing ug makaapektar sa pagpitik niini, ang garbo makabara sa atong simbolikong kasingkasing ug makapugong nato sa pagsunod sa giya ni Jehova. Gipagahi pag-ayo sa mga Pariseo ang ilang kasingkasing maong wala nila dawata ang klarong ebidensiya nga gipadayag kanila sa espiritu sa Diyos. (Juan 12:37-40) Peligroso to kay tungod ato, dili nila madawat ang kinabuhing walay kataposan. (Mat. 23:13, 33) Busa importante gyod nga padayon natong tugotan ang Pulong ug espiritu sa Diyos sa pagbag-o sa atong personalidad ug pag-impluwensiya sa atong panghunahuna ug mga desisyon. Kay mapainubsanon si Santiago, andam siyang magpatudlo kang Jehova. Ug nahimo siyang maayong magtutudlo tungod sa iyang pagkamapainubsanon. w22.01 10 ¶7

Kon ‘molahutay ta sa pag-ampo,’ makasalig ta nga dunggon ta sa atong langitnong Amahan. (Col. 4:2) Bisag para nato morag nalangan ang tubag, si Jehova nagsaad nga tubagon niya kini sa hustong panahon​—“dihang manginahanglan tag tabang.” (Heb. 4:16) Busa, dili gyod ta angayng maghunahuna nga nasayop si Jehova kon dili dayon niya tubagon ang atong pag-ampo sa panahon nga atong gidahom. Pananglitan, daghan ang dugay nang nag-ampo nga taposon sa Gingharian sa Diyos kining sistemaha sa mga butang. Si Jesus miingon pa gani nga angay nato kining iampo. (Mat. 6:10) Pero dili gyod maalamon kon tugotan nato nga mohuyang ang atong pagtuo sa Diyos kay ang kataposan wala moabot sa panahon nga atong gidahom! (Hab. 2:3; Mat. 24:44) Maalamon ta kon padayon tang magpaabot kang Jehova ug mag-ampo kaniya uban ang pagtuo. Ang kataposan moabot sa hustong panahon, kay gitakda na ni Jehova kon unsang “adlawa ug orasa” kini moabot. Ug kanang adlawa mao ang kinamaayohang panahon para sa tanan.​—Mat. 24:36; 2 Ped. 3:15. w21.08 10 ¶10-11

Ang mapainubsanong mga edaran nahibalo nga samtang magkatigulang sila, limitado na lang ang ilang mahimo kon itandi sa una. Konsideraha pananglitan ang atong mga tigdumala sa sirkito. Pag-edad nilag 70, sila hatagan ug bag-ong asaynment. Dili tingali nâ sayon. Gipabilhan nila ang ilang pribilehiyo sa pag-alagad sa mga igsoon. Pero nahibalo sila nga mas maayo nga ang mga batan-on maoy moatiman sa buluhaton. Busa gisundog nila ang mga Levihanon sa karaang Israel kinsa, pag-edad ug 50, kinahanglan nang moretiro sa pag-alagad sa tabernakulo. Ang kalipay sa maong edaran nga mga Levihanon wala mag-agad sa usa ka partikular nga pribilehiyo. Gipahimuslan nila pag-ayo ang uban pang pribilehiyo nga puwede nilang mabatonan, ug gihimo nila ang tanan nilang maarangan sa pagtabang sa mga batan-on. (Num. 8:25, 26) Karon, bisag ang kanhing mga tigdumala sa sirkito wala na mag-alagad sa daghang kongregasyon, panalangin kaayo sila sa ilang mga kongregasyon. w21.09 8-9 ¶3-4

Sa Lucas 15:11-32, si Jesus naghatag ug makapatandog nga sugilanon bahin sa anak nga milayas. Ang batan-ong lalaki mirebelde sa iyang amahan, milayas, ug mipanaw sa “layong lugar.” Didto, siya nagkinabuhing mapatuyangon ug imoral. Pero dihang naglisod na siya, nakapamalandong siya. Nahunahunaan niya kon unsa ka maayo ang iyang kahimtang niadtong didto pa siya sa balay sa iyang amahan. Si Jesus miingon nga ang batan-on “nakaamgo.” Nakadesisyon siya nga mopauli ug mangayog pasaylo sa iyang amahan. Importante nga naamgohan sa anak nga sayop ang iyang nahimong mga desisyon. Kinahanglan siyang magbag-o! Ang milayas nga anak nagpakitag sinserong paghinulsol sa iyang sala. Kini nga ilustrasyon dili lang usa ka makapatandog nga estorya. Ang mga prinsipyo niini makatabang sa mga ansiyano sa pagkahibalo kon ang usa ka igsoon nga nakahimog seryosong sala tinuod ba gyong naghinulsol. w21.10 5 ¶14-15

Unsay dili mauyog, o mawala? Si apostol Pablo misulat: “Kay kita makadawat man ug Gingharian nga dili mauyog, padayon [tang maghatag] sa Diyos ug sagradong pag-alagad nga may kahadlok ug pagtahod.” (Heb. 12:28) Oo, dihang matapos na ang kataposang pag-uyog, ang Gingharian sa Diyos lang ang magpabilin. (Sal. 110:5, 6; Dan. 2:44) Mubo na lang gyod ang panahon! Ang mga tawo kinahanglang modesisyon: Padayon ba nilang suportahan ang paagi sa pagkinabuhi nga gipasiugda niining kalibotana, nga moresultag kalaglagan, o maningkamot ba sila nga ipahiuyon ang ilang kinabuhi sa kabubut-on sa Diyos, nga moresultag kinabuhing walay kataposan? (Heb. 12:25) Pinaagi sa atong buluhatong pagsangyaw, matabangan nato ang mga tawo sa pagdesisyon kon unsay ilang dapigan niining importante nga isyu. Ug hinaot nga hinumdoman nato pirme ang giingon ni Ginoong Jesus: “Kining maayong balita sa Gingharian isangyaw sa tibuok yuta sa pagpamatuod ngadto sa tanang kanasoran, ug unya moabot ang kataposan.”​—Mat. 24:14. w21.09 19 ¶19-20

Mga ansiyano, duna moy talagsaong responsibilidad sa paghupay sa mga igsoon kansang mga minahal mibiya kang Jehova. (1 Tes. 5:14) Pakig-estorya nila una ug human sa tigom aron dasigon sila. Duawa sila ug pag-ampo uban kanila. Pakig-uban nila sa ministeryo, o kaha imbitaha sila nga moapil usahay sa inyong pamilyahanong pagsimba. Ang espirituwal nga mga magbalantay kinahanglang magpakitag kaluoy, gugma, ug pagtagad sa naguol nga mga karnero ni Jehova. (1 Tes. 2:7, 8) ‘Dili gusto ni Jehova nga naay malaglag kondili gusto niya nga ang tanan maghinulsol.’ (2 Ped. 3:9) Bisag ang usa ka tawo makahimo tingalig seryosong sala, ang iyang kinabuhi bililhon gihapon sa Diyos. Hunahunaa ang dako kaayong bili nga gibayad ni Jehova alang sa matag usa kanato​—ang halad lukat sa iyang minahal nga Anak. Si Jehova mahigugmaong naningkamot sa pagtabang niadtong nakahimog seryosong sala nga mobalik kaniya. Siya naglaom nga ila nang himoon, sama sa atong makita sa ilustrasyon ni Jesus bahin sa nawalang anak.​—Luc. 15:11-32. w21.09 30-31 ¶17-19

Komosta kon limitado na lang ang imong mahimo sa ministeryo tungod sa sakit? Magmalipayon gihapon ka sa imong mahimo niana nga buluhaton. Konsideraha ang eksperyensiya ni Haring David dihang gibawi niya ug sa iyang mga sundalo ang ilang mga pamilya ug kabtangan gikan sa bandidong mga Amalekanhon. Ang 200 sa iyang mga sundalo gikapoy na kaayo ug dili na makahimo sa pagpakig-away, busa nagpabilin sila aron magbantay sa mga bagahe. Human modaog sa gubat, si David nagsugo nga kadtong nakig-away ug kadtong nagbantay sa mga bagahe hatagan ug parehas nga bahin sa mga inilog. (1 Sam. 30:21-25) Ingon ana pod sa atong buluhaton nga paghimog mga tinun-an. Ang tanan nga naghimo sa ilang kinamaayohan makadawat ug parehas nga kalipay matag higayon nga dunay tawo nga mabawtismohan. Nakita ni Jehova ang atong pagkugi ug maayong mga motibo, ug siya nagpanalangin kanato. Siya nagtudlo sab kanato nga magmalipayon sa bisan unsa nga atong mahimo diha sa ministeryo. (Juan 14:12) Makaseguro ta nga malipay ang Diyos kanato kon dili ta mosurender! w21.10 28 ¶15-17

Samtang magkatigulang ta, mahadlok tingali ta nga dili na kaayo ta mapuslanon kang Jehova kon itandi niadtong bata pa ta. Tinuod nga mas menos na ang atong kusog kay sa una, pero magamit nato ang atong kaalam ug eksperyensiya sa pagtabang sa mga batan-on nga mahimong mapuslanon sa organisasyon ni Jehova ug modawat ug dugang mga responsibilidad. Ang mga tigulang angayng magmapainubsanon kon gusto nilang motabang sa mga batan-on. Ang mapainubsanong tawo mag-isip sa uban nga labaw kay kaniya. (Filip. 2:3, 4) Ang mga tigulang nga nagpakita niining hiyasa nahibalo nga sa paghimo sa usa ka asaynment, sagad dunay lainlaing epektibong paagi nga binase sa Kasulatan. Busa dili sila magdahom nga sundogon sa tanan ang ilang paagi sa paghimo sa mga butang kaniadto. (Eccl. 7:10) Bisag daghan silag mapuslanong kasinatian nga makatabang sa mga batan-on, nahibalo sila nga “ang talan-awon niining kalibotana nagakausab” ug kinahanglan tingali silang mo-adjust sa bag-ong mga kahimtang.​—1 Cor. 7:31. w21.09 8 ¶1, 3

Si Jehova dili gyod magsugo sa iyang mga magsisimba sa pagbuhat ug bisan unsa nga makapahugaw kanila. Siya ang labing balaan. Klaro ning gipakita sa kinulit diha sa bulawang plaka sa turban sa hataas nga saserdote. Gikulit diha sa plaka ang mga pulong: “Ang pagkabalaan iya ni Jehova.” (Ex. 28:36-38) Ang mensahe diha sa maong plaka magpahinumdom niadtong makakita niana nga si Jehova balaan kaayo. Pero komosta ang Israelinhon nga wala makakita sa plaka kay dili siya makaduol sa hataas nga saserdote? Mahibalo ba gihapon siya nga si Jehova balaan? Oo! Ang tanang Israelinhon makadungog niana nga mensahe samtang ang Balaod basahon atubangan sa mga lalaki, babaye, ug mga bata. (Deut. 31:9-12) Kon tua ka didto, madungog nimo kining mga pulonga: “Ako si Jehova nga inyong Diyos, . . . ug magmabalaan mo kay ako balaan.” “Kinahanglan nga balaan mo kay ako, si Jehova, balaan.”​—Lev. 11:44, 45; 20:7, 26. w21.12 3 ¶6-7

Ang pipila tingali mabalaka bahin sa ilang materyal nga panginahanglan. Nagpuyo tingali sila sa nasod nga daghan ang pobre ug lisod makakitag trabaho. Basin ang ilang kita dili makasapar sa panginahanglan sa ilang pamilya. O kaha namatay ang nanginabuhi para sa pamilya maong wala na silay kuwarta para sa ilang panginahanglan. Makabenepisyo ta kon ang kabalaka pulihan natog pagsalig. Hinumdomi nga si Jehova nagsaad nga iyang itagana ang atong materyal nga panginahanglan kon unahon nato ang espirituwal nga mga butang. (Mat. 6:32, 33) Kanunay niyang gituman ang maong saad. (Deut. 8:4, 15, 16; Sal. 37:25) Kon gitagan-an ni Jehova ang mga langgam ug mga bulak, seguradong dili ta angayng mabalaka kon unsay atong kan-on o isul-ob! (Mat. 6:26-30; Filip. 4:6, 7) Sama nga ang gugma nagpalihok sa mapinanggaong mga ginikanan sa pagtagana sa materyal nga panginahanglan sa ilang mga anak, ang gugma magpalihok sa atong langitnong Amahan sa pagtagana sa materyal nga panginahanglan sa iyang katawhan. w21.12 16-17 ¶4-5; 18 ¶8

Diha bay higayon nga gipasakitan ka pag-ayo sa laing tawo, tingali sa usa ka Kristohanon pa gani? Konsideraha ang pananglitan ni Jose kinsa nakasinatig inhustisya gikan sa iya mismong mga igsoon. Nagpokus siya sa pag-alagad kang Jehova, ug dagaya siyang gipanalanginan ni Jehova tungod sa iyang pailob ug paglahutay. Ngadtongadto, napasaylo ni Jose kadtong nakapasakit kaniya ug nakita niya kon sa unsang paagi si Jehova nagpanalangin kaniya. (Gen. 45:5) Sama kang Jose, mahupayan ta kon makigsuod ta kang Jehova ug mosalig nga tul-iron niya ang mga inhustisya sa hustong panahon. (Sal. 7:17; 73:28) Kon nag-antos ka tungod sa inhustisya o sa uban pang rason, hinumdomi nga si Jehova duol niadtong “mga dugmok ug kasingkasing.” (Sal. 34:18) Gimahal ka niya tungod sa imong pagpailob ug pagtugyan sa imong palas-anon kaniya. (Sal. 55:22) Siya ang Maghuhukom sa tibuok yuta. Walay butang nga dili niya makita. (1 Ped. 3:12) Busa, kon nakasinati kag mga problema nga dili nimo masulbad, andam ka bang magpaabot kaniya? w21.08 12 ¶14, 16

Maalamon nga gamiton nato ang atong kinabuhi sa paagi nga makapasuod nato kang Jehova. Kinahanglang magtakda tag hustong mga prayoridad. Aron magamit nato ang atong panahon sa kinamaayohang paagi, kinahanglan tingali tang modesisyon tali sa duha ka butang nga dili sayop. Makita nato ni sa nahitabo dihang mibisita si Jesus sa balay ni Maria ug Marta. Seguradong eksayted kaayo si Marta nga abiabihon si Jesus, maong nag-andam siyag daghang pagkaon. Pero si Maria milingkod sa tiilan ni Jesus ug naminaw sa iyang gitudlo. Dili ra sayop ang gihimo ni Marta, pero “gipili ni Maria ang kinamaayohang bahin.” (Luc. 10:38-42, footnote) Ngadtongadto, wala na tingali mahinumdom si Maria kon unsang mga pagkaon ang gidalit niadtong panahona, pero makaseguro ta nga wala gyod siya malimot sa gitudlo ni Jesus. Sama nga gipabilhan ni Maria ang panahon nga makauban si Jesus, pabilhan sab nato ang atong panahon uban kang Jehova. w22.01 27 ¶5-6

Bisag nagpaubos si Ahab atubangan ni Jehova, ang iyang gihimo sa ulahi nagpakita nga dili gyod siya tinuod nga mahinulsolon. Wala niya taposa ang pagsimba kang Baal diha sa iyang gingharian. Ug wala niya dasiga ang katawhan sa pagsimba kang Jehova. Human mamatay si Ahab, gipakita ni Jehova kon unsay iyang panglantaw niana nga hari. Ang propeta sa Diyos nga si Jehu miingon nga siya “daotan.” (2 Cron. 19:1, 2) Hunahunaa kini: Kon tinuoray pang naghinulsol si Ahab, seguradong dili siya tawgon sa propeta ingong tawong daotan nga nagdumot kang Jehova. Klaro nga bisag nagpakitag pagbasol si Ahab, wala gyod siya bug-os nga maghinulsol. Unsang leksiyon ang atong makat-onan kang Ahab? Sa dihang nadungog ni Ahab ang mensahe ni Elias nga silotan ang iyang pamilya, sa sinugdan siya nagpaubos. Maayo to. Pero ang iyang mga gihimo sa ulahi nagpakita nga dili tinuod ang iyang paghinulsol. Busa, kon tinuod tang naghinulsol, dili igo ang pag-ingon lang nga nagbasol ta sa atong nahimong sala. w21.10 3 ¶4-5, 7-8

Si Isaias usa ka propeta, ug posible nga ang iyang asawa nanagna pod, kay siya gitawag sab ug “propeta.” (Isa. 8:1-4) Ingong magtiayon, dayag nga ang pagsimba kang Jehova mao ang pinakaimportante sa ilang kinabuhi. Mauna pod sa mga magtiayon karon ang pagsimba kang Jehova pinaagi sa paghimo sa ilang maarangan sa pag-alagad kaniya. Mapalig-on nila ang ilang pagsalig kang Jehova kon tun-an nila nga magkauban ang mga tagna sa Bibliya ug makita nila nga natuman gyod ni. (Tito 1:2) Puwede nilang pamalandongon kon sa unsang paagi makaamot sila sa katumanan sa pipila ka tagna sa Bibliya. Pananglitan, makaamot sila sa katumanan sa tagna ni Jesus nga ang maayong balita isangyaw sa tibuok yuta sa dili pa moabot ang kataposan. Kon mas makita sa magtiayon nga nagakatuman ang tagna sa Bibliya, mas molig-on ang ilang determinasyon nga himoon ang ilang maarangan para kang Jehova. w21.11 16 ¶9-10

Si Jesus nabalaka sa iyang inahan, nga tingali biyuda na. Kay gimahal ni Jesus si Maria ug gusto niya nga maatiman kini, gihangyo niya si Juan sa pag-atiman niini. Nahibalo siya nga itagana ni Juan ang espirituwal nga panginahanglan ni Maria. Sukad niadtong adlawa, si Juan nahimong samag anak ni Maria ug nag-atiman kaniya nga samag iyang inahan. Pagkadako sa gugma ni Jesus niining bililhong babaye nga mapinanggaong nag-atiman kaniya dihang natawo siya ug karon nagtindog duol kaniya sa hapit na siyang mamatay! Unsay atong makat-onan sa gisulti ni Jesus? Posible nga mas suod ta sa atong Kristohanong mga igsoon kay sa mga membro sa atong pamilya. Tingali supakon o biyaan ta sa atong pamilya, pero ingon sa gisaad ni Jesus, kon magpabilin tang suod kang Jehova ug sa Iyang organisasyon, makabaton tag “100 ka pilo” kay sa nawala kanato. Daghan ang mahisamag atong mahigugmaong anak, inahan, o amahan. (Mar. 10:29, 30) Unsay imong gibati nga nahimo kang bahin sa usa ka espirituwal nga pamilya nga nahiusa sa pagtuo ug gugma—gugma kang Jehova ug sa usag usa?​—Col. 3:14; 1 Ped. 2:17. w21.04 9-11 ¶7-8

Ang maunongong gugma magpalihok nato nga mohimog labaw pa kay sa gidahom kanato. Sama kaniadto, daghan sa atong mga igsoon ang nagpakitag maunongong gugma sa ilang mga isigkamagtutuo, bisan niadtong wala nila mailhi sa personal. Pananglitan, dihang mahibaloan nila nga may nahitabong kalamidad, gusto dayon nilang mahibalo kon unsay ilang ikatabang. Kon may igsoon sa kongregasyon nga naglisod sa pinansiyal, mangita dayon silag paagi nga mahibaloan kon unsay gikinahanglan sa maong igsoon aron matabangan siya. Sama sa unang siglong mga Kristohanon sa Macedonia, sila mohimog labaw pa kay sa gidahom kanila. Sila mohimog mga sakripisyo ug mohatag pa ganig ‘mas labaw sa ilang maarangan’ aron tabangan ang mga igsoon nga nanginahanglan. (2 Cor. 8:3) Ang mga ansiyano mohatag ug komendasyon dihang mamatikdan nila nga ang mga igsoon mahigugmaong mitabang sa uban. Ang paghatag ug kinasingkasing nga komendasyon sa panahon nga gikinahanglan kini sa mga igsoon makahatag nilag kusog aron makalahutay.​—Isa. 32:1, 2. w21.11 11 ¶14; 12 ¶21

Kitang tanan nagkinahanglag tambag. Naay mga panahon nga mangayo tag tambag sa usa nga atong gitahod. Ug naa poy mga panahon nga duolon ta sa igsoon nga nabalaka nato aron pasidan-an ta nga hapit na tang makahimog “sayop nga lakang”​—butang nga ato unyang basolan. (Gal. 6:1) O kaha makadawat tag tambag dihang tul-iron ta tungod sa seryosong sayop nga atong nahimo. Bisag unsa pay rason nga gitambagan ta, kinahanglan nato nang dawaton, kay kana makaayo nato ug makaluwas sa atong kinabuhi! (Prov. 6:23) Ang teksto karong adlawa nagdasig nato nga ‘maminaw pag-ayo sa mga pulong sa maalamon.’ Walay tawo nga nahibalo sa tanan; naa gyoy mas labaw natog kahibalo o eksperyensiya. (Prov. 12:15) Busa ang pagpaminaw ug tambag nagpakita nga mapainubsanon ta. Nagpakita pod ni nga nahibalo ta sa atong mga limitasyon ug nga nagkinahanglan tag tabang aron makab-ot ang atong mga tumong. Si Haring Solomon misulat: “Naay kalamposan kon daghan ang magtatambag.”​—Prov. 15:22. w22.02 8 ¶1-2

Kon tinuod tang naghinulsol, dili igo ang pag-ingon lang nga nagbasol ta sa atong nahimong sala. Kinahanglan sab natong bag-ohon ang atong hunahuna ug kasingkasing. Apil niini ang pagbiya sa daotang dalan ug pagsubay pag-usab sa dalan ni Jehova. (Ezeq. 33:14-16) Ang labing importanteng tumong sa nakasala mao ang pagpasig-uli sa iyang maayong relasyon kang Jehova. Unsay atong buhaton kon nahibaloan nato nga ang usa ka suod nga higala nakahimog seryosong sala? Kon tabonan nato ang sala sa atong higala, makahatag hinuon tag kadaot kaniya. Gawas pa, dili gyod matago ang maong sala kay nagtan-aw man si Jehova. (Prov. 5:21, 22) Makatabang ka sa imong higala pinaagi sa pagpahinumdom kaniya nga ang mga ansiyano gustong motabang. Kon dili siya motug-an sa mga ansiyano, kinahanglang pahibaloon nimo ang mga ansiyano bahin niana. Magpakita ni nga gusto gyod nimo siyang tabangan. w21.10 7 ¶19-21

Kitang tanan angay mosundog sa pagsakripisyo ni Jesus. Ang Bibliya nag-ingon nga siya “nahisamag ulipon.” (Filip. 2:7) Ang kasaligang ulipon, o alagad, maningkamot gyod nga mapalipay ang iyang agalon. Ingong ulipon ni Jehova ug alagad sa mga igsoon, seguradong gusto nimo nga mas magamit ka ni Jehova ug mas makaalagad ka sa mga igsoon. Pangutan-a ang imong kaugalingon: ‘Andam ba kong mosakripisyo aron tabangan ang uban? Moboluntaryo ba dayon ko kon kinahanglang hinloan ang asembliyahanan o mentinahon ang Kingdom Hall?’ Ibutang nato nga naa kay nakita nga angayng pauswagon, pero wala kaayo kay interes nga mohimog kausaban. Kon ingon ana ang imong kahimtang, pag-ampo kang Jehova nga kinasingkasing. Isulti kang Jehova ang tanan nimong gibati, ug hangyoa siya nga ‘palig-onon ang imong tinguha sa pagbuhat sa mga butang nga gusto niya.’​—Filip. 2:13. w22.02 23 ¶9-11

Si Jesus buotan kay lumo siya ug andam mopailin-ilin bisan sa lisod nga kahimtang. (Mat. 11:29, 30) Pananglitan, dihang gihangyo siya sa babayeng Fenicianhon nga ayohon ang anak niini, mibalibad siya sa primero. Apan dihang nagpakitag dakong pagtuo ang babaye, buotan gyod si Jesus kay giayo niya ang anak niini. (Mat. 15:22-28) Pero bisag buotan si Jesus, mihatag gihapon siyag tambag. Usahay, iyang gipakita ang iyang pagkabuotan pinaagi sa pagbadlong niadtong iyang gihigugma. Pananglitan, dihang gipugngan ni Pedro si Jesus sa paghimo sa kabubut-on ni Jehova, gibadlong siya ni Jesus atubangan sa ubang mga tinun-an. (Mar. 8:32, 33) Gihimo nâ ni Jesus, dili aron pakaulawan si Pedro kondili aron bansayon siya ug pasidan-an ang ubang tinun-an nga dili mangahas sa paghimo sa mga butang nga wala silay katungod. Seguradong naulawan si Pedro, pero ang maong disiplina nakahatag niyag kaayohan. Kon tinuod tang buotan niadtong atong gimahal, usahay kinahanglan tingali nato silang tambagan. Dihang imo nang himoon, sundoga si Jesus pinaagi sa pagbase sa imong tambag sa mga prinsipyo sa Bibliya. w22.03 11 ¶12-13

Nagsimba ta kang Jehova dihang ato siyang dayegon. (Sal. 34:1) Madayeg nato si Jehova pinaagi sa pagsulti ngadto sa uban nga giapresyar nato pag-ayo ang iyang nindot nga mga hiyas ug buhat. Kon mapasalamaton ta, daghan tag maayong masulti bahin kang Jehova. Pinaagi sa paggahin ug panahon sa pagpamalandong sa pagkamaayo ni Jehova​—sa tanan niyang gihimo para nato—​dili gyod ta mahutdag rason nga dayegon siya. Ang pagsangyaw maoy maayo kaayong kahigayonan sa ‘pagtanyag sa Diyos ug halad sa pagdayeg, ang bunga sa atong mga ngabil.’ Sama ra nga hunahunaon nato pag-ayo kon unsay atong isulti sa dili pa mag-ampo kang Jehova, angay pod natong hunahunaon pag-ayo kon unsay atong isulti sa atong mga masangyawan. Gusto nato nga pinakamaayo ang atong mahatag nga “halad sa pagdayeg.” Busa mosulti ta nga madasigon ug kinasingkasing dihang magsangyaw ta. w22.03 21 ¶8